Sammo Hung (Sammo Hung Kam-bo) ដែលទស្សនិកជននៅកម្ពុជាហៅថា «អាម៉ាប់» នឹងទទួលពានរង្វាន់សមិទ្ធផលពេញមួយជីវិតនៅឯព្រឹត្តិការណ៍ Asian Film Awards 2023 ដែលគ្រោងនឹងធ្វើឡើងនៅថ្ងៃទី 12 មីនា 2023 នៅហុងកុង។
កាលពីថ្ងៃទី 01 មីនា គណៈកម្មការគ្រប់គ្រងព្រឹត្តិការណ៍ផ្ដល់ពានរង្វាន់ភាពយន្តអាស៊ីឆ្នាំ 2023 (Asian Film Awards 2023) បានប្រកាសថា កំពូលតារាសម្ដែងផ្នែកក្បាច់គុន Sammo Hung ទទួលបានពានរង្វាន់នេះក៏ព្រោះតែការរួមចំណែកនៅក្នុងវិស័យភាពយន្ត។ តាមរយៈលិខិតផ្ញើទៅកាន់អ្នកសារព័ត៌មាន លោក Sammo Hung សរសេរថា «ខ្ញុំពិតជារីករាយ និងភ្ញាក់ផ្អើលនៅពេលឈ្នះពានរង្វាន់នានានៅក្នុងវ័យនេះ។ ពានរង្វាន់នេះថែមទាំងមានអត្ថន័យពិសេស បញ្ជាក់ពីអាជីពសម្ដែងទាំងមូលរបស់ខ្ញុំ»។
អាម៉ាប់កើតឆ្នាំ 1952 និងបានចូលរៀននៅសាលាល្ខោនចិន Yu Jim Yuen ពេលមានអាយុ 10 ឆ្នាំ។ ក្នុងដំណាក់កាលនោះ អាម៉ាប់ ក៏មានឱកាសសម្ដែងក្នុងខ្សែភាពយន្តមួយចំនួន។ ចាប់ពីអាយុ 18 ឆ្នាំ អាម៉ាប់ ចាប់ផ្ដើមមានអាជីពជាអ្នកសម្ដែងជំនួសនៅក្នុងឈុតឆាកគ្រោះថ្នាក់ និងក្បាច់គុន។
ក្នុងអំឡុងប្រហែល 60 ឆ្នាំនៅក្នុងវិស័យភាពយន្ត លោក Sammo Hung បានកាន់តួនាទីជាច្រើន ចាប់ពីអ្នកសម្ដែង អ្នកដឹកនាំសម្ដែងក្នុងឈុតឆាកសកម្ម អ្នកដឹកនាំរឿង និងផលិតករភាពយន្ត។ អាម៉ាប់ ទទួលបានការគាំទ្រច្រើន និងមានភាពល្បីល្បាញបន្ទាប់ពីមានវត្តមាននៅក្នុងខ្សែភាពយន្តមួយចំនួន មានជាអាទិ៍ រឿង Iron Fisted Monk, Winners and Sinners, Eastern Condors (បេសកកម្មឥន្ទ្រីបូព៌ា) ឬ Kill Zone ។ល។
