នាវាទេសចរណ៍ឆ្លាតវៃមួយគ្រឿងដែលដំណើរការដោយថាមពលអគ្គិសនី ត្រូវបានសម្ពោធដាក់ឱ្យដំណើរការនៅលើដៃទន្លេ Songhua នៅភាគឦសានប្រទេសចិន។
នាវាទេសចរណ៍អគ្គិសនីដែលមានឈ្មោះថា Ling Hang Zhi Xing នេះ មានបណ្ដោយប្រហែល ២៧ ម៉ែត្រ និងទទឹង ៦ ម៉ែត្រ។ Ling Hang Zhi Xing ត្រូវបានបំពាក់ប្រព័ន្ធថ្មប្រភេទលីចូមដែកផូស្វាត(lithium iron phosphate) ចំនួន ៤ ក្រុម ដែលមានកម្លាំង ៦០០ kWh អនុញ្ញាតឱ្យវាដំណើរការ ៨ ម៉ោងបន្តបន្ទាប់ ដោយមិនចាំបាច់បញ្ចូលថាមពល។ ទម្ងន់សរុបរបស់នាវានេះគឺ ១៣៨ តោន និងអាចដឹកមនុស្សបាន ៥៣ នាក់ នេះបើតាម China Science Daily ចេញផ្សាយកាលពីថ្ងៃទី ១៨ តុលា។
Ling Hang Zhi Xing ត្រូវបានអភិវឌ្ឍឡើងសម្រាប់ដំណើរទេសចរណ៍នៅលើទន្លេ ជាមួយនឹងល្បឿន ១២ គីឡូម៉ែត្រ/ម៉ោង។ ក៏ប៉ុន្តែ ការសាកល្បងដំណើរការនៅលើតំបន់ទឹកជ្រៅ និងមិនមានរលកធំបានបង្ហាញថា វាអាចធ្វើដំណើរបានលឿនជាង ១៨ គីឡូម៉ែត្រ/ម៉ោង។ នាវានេះប្រើប្រាស់ម៉ូទ័រអគ្គិសនីចំនួន ២ គ្រឿង កម្លាំង ៦០ kW និងស្លាបចក្រប្រសិទ្ធភាពខ្ពស់។
តំបន់ត្រជាក់ដែលមានសីតុណ្ហភាព -៣០ អង្សាសេ ឬទាបជាងនៅក្នុងរដូវរងា តែងបង្កផលអាក្រក់ដល់ប្រសិទ្ធភាពរបស់ថ្មផ្ទុកអគ្គិសនី និងឧបករណ៍បញ្ចូលថាមពលរបស់នាវា។ Ling Hang Zhi Xing ត្រូវបានបង្កើតឡើងដើម្បីប្រើប្រាស់នៅក្នុងតំបន់នៅភាគឦសានរបស់ ប្រទេសចិន ដែលមានអាកាសធាតុត្រជាក់ខ្លាំង៕
