ម្ចាស់ Tesla បានឱ្យដឹងថា លោកមានផែនការធ្វើឱ្យបណ្ដាញសង្គម Twitter ក្លាយទៅជា «កម្មវិធីសម្រាប់គ្រប់យ៉ាង» ដែលដាក់ឈ្មោះឱ្យថា X បន្ទាប់ពីចាប់ផ្ដើមតភ្ជាប់ការទិញដូរ Twitter។
«ទិញ Twitter គឺជាវិធីដើម្បីជំរុញការបង្កើត X ដែលជាកម្មវិធីផ្ទុកគ្រប់យ៉ាង» មហាសេដ្ឋីអាម៉េរិកដើមកំណើតអាហ្វ្រិកខាងត្បូង អះអាងកាលពីថ្ងៃទី ០៥ តុលា ក្រោយពីគាត់បានប្រកាសទិញ Twitter ដូចដែលបានសន្យាមុននោះ។
ម្ចាស់ SpaceX មិនបាននិយាយលម្អិតថា កម្មវិធី X នឹងដំណើរការបែបណាទេ ប៉ុន្តែ គាត់បានអះអាងថា ការទិញ Twitter នឹងជួយ «បង្កើនល្បឿនក្នុងការអភិវឌ្ឍ X ពី ៣ ឆ្នាំដល់ ៥ ឆ្នាំ»។ យ៉ាងនេះក្ដី លោក ម៉ាស ក៏បានទទួលស្គាល់ថា «ការគណនានេះអាចខុស»។
នេះមិនមែនជាលើកដំបូងទេដែល អ៊ីឡុន ម៉ាស (Elon Musk) បង្ហាញអំពីមហិច្ឆតាទៅលើ «កំពូលកម្មវិធី» (App)។ កាលពីដើមឆ្នាំនេះ គាត់ក៏ធ្លាប់បានប្រៀបធៀបទស្សនវិស័យរបស់ខ្លួនជាមួយនឹង WeChat ដែលជាកម្មវិធីល្បីឈ្មោះរបស់ ចិន ដែលត្រូវបានបំពាក់មុខងារជាច្រើន តាំងពីការផ្ញើសារ ហៅទូរស័ព្ទជាវីដេអូ រហូតដល់មុខងារទូទាត់ប្រាក់ចល័ត។
នៅក្នុងសារថ្មីបំផុតដែលត្រូវបានបង្ហើបឱ្យដឹងរបស់លោក ម៉ាស មហាសេដ្ឋីរូបនេះក៏បានចែករំលែកអំពីគំនិតទាក់ទងនឹងបណ្ដាញសង្គមដែលគាត់ទិញជិតបានសម្រេចនេះដែរ។ «ខ្ញុំកំពុងគិតអំពីបណ្ដាញសង្គមដែលបំពាក់បច្ចេកវិទ្យា blockchain អាចប្រើប្រាស់ដើម្បីជជែកគ្នា ផ្ញើរូបភាព ទូទាត់ប្រាក់ឱ្យ Twitter។ អ្នកប្រើប្រាស់ត្រូវបង់ប្រាក់មួយចំនួនតូចដើម្បីចុះឈ្មោះ ប៉ុន្តែនឹងមិនត្រូវរំខាន់ដោយសារសំបុត្រសំរាម និងបូត (bot)» លោក ម៉ាស ផ្ញើសារឆ្លើយឆ្លងជាមួយបងប្រុស Kimbal របស់គាត់។
អំពីការទិញដូរ Twitter វិញ ក្រោយការបដិសេធ និងរកវិធីដកខ្លួនជាច្រើនលើក ចុងក្រោយលោក ម៉ាស ក៏ប្រកាសបន្តទិញបណ្ដាញសង្គមនេះក្នុងតម្លៃ ៥៤.២ ដុល្លារ ក្នុង ១ ភាគហ៊ុន ដូចដែលបានសន្យាកាលពីខែមេសា ២០២២ បើសិនបណ្ដាញសង្គមនេះដកពាក្យបណ្ដឹងប្រឆាំងនឹងរូបគាត់។ កិច្ចព្រមព្រៀងរវាងលោក ម៉ាស និង Twitter ត្រូវបានគេជឿថា នឹងសម្រេចបាននៅក្នុងសប្ដាហ៍នេះ។ យោងតាមក្រុមអ្នកវិភាគ មូលហេតុដែលនាំឱ្យលោក ម៉ាស ត្រូវបង្ខំចិត្តបន្តការទិញ Twitter ក៏ព្រោះតែមួយរយៈចុងក្រោយនេះ មានព័ត៌មានជាច្រើនដែលបង្កបញ្ហាដល់គាត់នៅក្នុងរឿនក្ដីនៅតុលាការ៕
