ចាប់ពីខែវិច្ឆិកាខាងមុខ OPEC+ នឹងអនុវត្តការកាត់បន្ថយការផលិតប្រេងឆៅ ២ លានធុងជារៀងរាល់ថ្ងៃ ដើម្បីរក្សាតម្លៃឱ្យនៅខ្ពស់។
តំណាងបណ្ដាប្រទេសនៅក្នុងអង្គការ OPEC+ (ក្រុមប្រទេសនាំចេញប្រេងរ៉ែ និងដៃគូសហការ) ដែលបានចូលរួមប្រជុំកាលពីម្សិលមិញ បានឱ្យដឹងថា ពួកគេនឹងកាត់បន្ថយការផលិតប្រេងឆៅ ២ លានធុងជារៀងរាល់ថ្ងៃ ដោយរាប់ចាប់ពីខែវិច្ឆិកាខាងមុខ។
នេះគឺជាការកាត់បន្ថយបរិមាណប្រេងធំបំផុត គិតចាប់ពីខែមេសា ២០២០។ ប្រការនេះបង្ហាញថា OPEC+ មានបំណងរក្សាតម្លៃប្រេងឱ្យស្ថិតក្នុងកម្រិតខ្ពស់ ក្រោយពីបានឆ្លងកាត់ការជួញដូរប្រេងក្នុងតម្លៃទាបអស់ ៧ ឆ្នាំកន្លង នេះបើតាមក្រុមអ្នកវិភាគ។
នេះគឺជាខែទីពីរជាប់ៗគ្នាហើយដែល OPEC+ កាន់បន្ថយការផលិតប្រេងឆៅ។ កាលពីខែមុន ពួកគេបានឯកភាពគ្នា បន្ថយបរិមាណប្រេងឆៅ ១ សែនធុងជារៀងរាល់ថ្ងៃ សម្រាប់ខែតុលា ២០២២។
តម្លៃប្រេងឆៅធ្លាប់ឡើងខ្ពស់ជាង ១០០ ដុល្លារ/ធុង នៅក្នុង ៦ ខែដើមឆ្នាំនេះ ដោយសារសង្គ្រាមរវាង រុស្ស៊ី និង អ៊ុយក្រែន។ ប៉ុន្តែ តម្លៃនេះ ក្រោយមកក៏បានថយចុះ ៣២% ក្នុង ៤ ខែកន្លង ដោយសារការបារម្ភអំពីឱនភាពសេដ្ឋកិច្ចសកល។ ប្រេងឆៅ Brent មានពេលខ្លះធ្លាក់ថ្លៃចុះមកនៅក្រោម ៨៣ ដុល្លារ/ធុងជាលើកដំបូងរាប់ចាប់ពីខែមករាឆ្នាំនេះ ។
