ប្រទេសជប៉ុន កំពុងតែមានផែនការពង្រីកទីផ្សាររថយន្តអគ្គិសនី ដើម្បីកាត់បន្ថយការបំភាយឧស្ម័នផ្ទះកញ្ចក់ ក្នុងនោះ ការអភិវឌ្ឍថ្មសម្រាប់រថយន្តអគ្គិសនីគឺជាកត្តាដែលមិនអាចរំលងបាន។
ដោយសារមានការរឹតបន្តឹងក្នុងការការពារបរិស្ថានកាន់តែខ្លាំងឡើងៗ ទីផ្សាររថយន្តអគ្គិសនីកំពុងតែរីកចម្រើនយ៉ាងឆាប់រហ័ស។ ដើម្បីឆ្លើយតបនឹងតម្រូវការក្នុងទីផ្សាររថយន្តអគ្គិសនី បណ្ដាក្រុមហ៊ុនធំៗរបស់ ប្រទេសជប៉ុន កំពុងតែផ្ដោតការយកចិត្តទុកដាក់យ៉ាងខ្លាំងទៅលើការអភិវឌ្ឍថ្មផ្ទុកថាមពល ព្រោះថា វាគឺជាផ្នែកដ៏សំខាន់របស់រថយន្តអគ្គិសនី។
យោងតាមសារព័ត៌មាន Sankei ក្រុមហ៊ុនសាជីវកម្ម Toyota បានឱ្យដឹងថា នឹងវិនិយោគ ៧៣០ ពាន់លានយ៉េន ដើម្បីផលិតថ្មផ្ទុកថាមពលសម្រាប់រថយន្តអគ្គិសនីនៅ ជប៉ុន និង សហរដ្ឋអាម៉េរិក ហើយការផលិតនឹងចាប់ផ្ដើមពីឆ្នាំ ២០២៤។
ក្រៅពី Toyota ក្រុមហ៊ុនខ្នាតយក្សមួយផ្សេងទៀតរបស់ ជប៉ុន ក៏បង្កើនការវិនិយោគទៅលើទីផ្សារថ្មផ្ទុកថាមពលសម្រាប់រថយន្តអគ្គិសនី នោះគឺ Honda។ Honda និងចាប់ដៃជាមួយក្រុមហ៊ុន LG របស់ កូរ៉េខាងត្បូង ដើម្បីផលិតថ្មសម្រាប់រថយន្តអគ្គិសនីនៅ សហរដ្ឋអាម៉េរិក ដោយចំណាយដើមទុនប្រមាណ ៦១០ ពាន់លានយ៉េន។ យោងតាមគម្រោង កិច្ចសហប្រតិបត្តិការនេះនឹងចាប់ផ្ដើមពីឆ្នាំ ២០២៣ និងផលិតក្នុងបរិមាណច្រើនចាប់ពីឆ្នាំ ២០២៥។
ដើម្បីគាំទ្រដល់ទីផ្សារថ្មផ្ទុកថាមពលសម្រាប់រថយន្តអគ្គិសនី ក្រសួងសេដ្ឋកិច្ច ពាណិជ្ជកម្ម និងបច្ចេកវិទ្យា របស់ ជប៉ុន ក៏បានប្រកាសគោលដៅសម្រាប់ពីពេលនេះដល់ឆ្នាំ ២០៣០ ក្នុងនោះ ក្រសួងនឹងបណ្ដុះបណ្ដាលវិស្វករឱ្យបានដល់ ៣ ម៉ឺននាក់ សម្រាប់បម្រើដល់ការអភិវឌ្ឍថ្មក្នុងវិស័យនេះ ដោយសារថា បច្ចុប្បន្ន ជប៉ុន មានបុគ្គលិកប្រមាណតែ ៥,០០០ នាក់ប៉ុណ្ណោះ ដែលធ្វើការក្នុងវិស័យផលិតថ្មផ្ទុកថាមពល។
បច្ចុប្បន្ននេះ រាជរដ្ឋាភិបាលជប៉ុន មានគោលនយោបាយជាច្រើនដែលលើកទឹកចិត្តឱ្យធ្វើការអភិវឌ្ឍដើម្បីអាចគ្រប់គ្រងទីផ្សាររថយន្តអគ្គិសនី និងថ្មផ្ទុកអគ្គិសនី ក្នុងនោះ គោលដៅចម្បងរបស់ ជប៉ុន គឺការបង្កើនការផលិតថ្មសម្រាប់រថយន្តអគ្គិសនីឱ្យបានឡើងដល់ ៦០០ Gwh ដែលស្មើនឹង ២០% នៃទីផ្សារថ្មផ្ទុកថាមពលសម្រាប់រថយន្តអគ្គិសនីនៅទូទាំងពិភពលោក ក្នុងឆ្នាំ ២០៣០៕
