កាលពីយប់ថ្ងៃទី ២ មីនា មហាសន្និបាតអង្គការសហប្រជាជាតិស្ដីពីស្ថានការណ៍នៅ ប្រទេសអ៊ុយក្រែន ត្រូវបានធ្វើឡើង ក្នុងនោះក៏មាន កម្ពុជា ផងដែរ។
ក្នុងកិច្ចប្រជុំនោះ កម្ពុជាបានសម្ដែងការព្រួយបារម្ភខ្លាំងចំពោះភាពធ្ងន់ធ្ងរនៃស្ថានការណ៍នៅ អ៊ុយក្រែន។ កម្ពុជារក្សាជំហរម៉ឺងម៉ាត់ថា «រដ្ឋជាសមាជិកទាំងអស់ ត្រូវតែគោរពអធិបតេយ្យភាព បូរណភាពដែនដី និងឯករាជ្យភាពនយោបាយរបស់រដ្ឋជាសមាជិកផ្សេងទៀត» នេះបើតាមសេចក្ដីថ្លែងការណ៍ របស់ ក្រសួងការបរទេស និងសហប្រតិបត្តិការអន្តរជាតិ របស់ កម្ពុជា។
ក្នុងមហាសន្និបាតអង្គការសហប្រជាជាតិស្ដីពីស្ថានការណ៍នៅ ប្រទេសអ៊ុយក្រែន សមាជិកភាគច្រើនបានបោះឆ្នោតថ្កោលទោសអំពើឈ្លានពានរបស់ រុស្ស៊ី នៅ អ៊ុយក្រែន និងស្នើឱ្យ រុស្ស៊ី ដងកងទ័ពទាំងអស់ចេញពីទឹកដីរបស់ អ៊ុយក្រែន ដែលអន្តរជាតិបានទទួលស្គាល់ផ្លូវការ ជាបន្ទាន់ និងដោយគ្មានលក្ខខណ្ឌ។
