ចាប់ពីខែកុម្ភៈ ឆ្នាំ ២០២២ តទៅ រដ្ឋបាលរាជធានីភ្នំពេញ នឹងផាកពិន័យចំពោះអ្នកទាំងឡាយណាដែលទុកដាក់សំណល់រឹង មិនបានបែងចែកឱ្យបានត្រឹមត្រូវ និងអ្នកបញ្ចេញសំរាមខុសពេលវេលាដែលបានកំណត់។
ខ្លឹមសារខាងលើត្រូវបានលើកឡើងដោយ ឯកឧត្តម ហួត ហៃ អភិបាលរងរាជធានីភ្នំពេញ ក្នុងកិច្ចប្រជុំមួយនៅសាលាក្រុងភ្នំពេញ កាលពីរសៀលថ្ងៃទី ១៤ មករា។
លោកអភិបាលរងរាជធានី បានមានប្រសាសន៍ថា សេវាគ្រប់គ្រងសំរាមនឹងត្រូវបានធ្វើឡើងឱ្យបានល្អប្រសើរជាងមុន មុននឹងឈានដល់ដំណាក់កាលផាកពិន័យចំពោះអ្នកល្មើសនឹងការកំណត់ ទាក់ទិននឹងការចោលសំរាម។
លោកក៏បានបន្ថែមថា បច្ចុប្បន្ន ក្រុមហ៊ុនចំនួន ៣ ដែលត្រូវបានជ្រើសរើសនៅក្នុងការដេញថ្លៃ បានចាប់ផ្ដើមការងាររបស់ពួកគេកាលពីខែកក្កដា ២០២១ ដើម្បីផ្ដល់សេវា សម្អាត ប្រមូល និងដឹកជញ្ជូនសំណល់រឹងនៅ ភ្នំពេញ។ ក្រុមហ៊ុនទាំង ៣ នេះ រួមមាន ក្រុមហ៊ុន 800Super GAEA, ក្រុមហ៊ុន Mizuda Sanitation និងក្រុមហ៊ុន Cintri។