កម្ពុជា បានខាតបង់ថវិកាស្មើនឹងការសាងសង់ស្ពានចំនួន 20 ខ្សែ ព្រោះតែជំងឺ COVID-19 ដោយថវិកាជាតិប្រមាណ 2.3 ពាន់លានដុល្លារអាម៉េរិក ត្រូវបានចំណាយក្នុងការដោះស្រាយបញ្ហាវិបត្តិសុខភាពក្នុងសម័យ COVID-19។ នេះបើតាមប្រសាសន៍របស់ប្រមុខរដ្ឋាភិបាលកម្ពុជា។
«ខ្ញុំសោកស្ដាយណាស់នៅត្រង់ថា អា COVID-19 នេះ វាបានស៊ីស្ពានរបស់ខ្ញុំប្រហែលជា 20 ស្ពាន អាហ្នឹងគិតតម្លៃខ្ពស់ផង…។ អីចឹងធ្វើឱ្យយើងត្រូវបន្តស្នើសុំមិត្ត ចិន ជួយបន្តទៀត ហើយមិត្ត ចិន នឹងបន្តជួយទៅតាមគម្រោងដែលយើងបានដាក់» សម្ដេចអគ្គមហាសេនាបតីតេជោ ហ៊ុន សែន មានប្រសាសន៍ដូច្នេះ កាលពីព្រឹកថ្ងៃទី 23 ខែវិច្ឆិកា ក្នុងឱកាសអញ្ជើញជាអធិបតីភាព ជាមួយឯកឧត្ដម Wang Wentian ឯកអគ្គរដ្ឋទូតចិន ប្រចាំនៅ កម្ពុជា ក្នុងពិធីសម្ពោធដាក់ឱ្យប្រើប្រាស់ជាផ្លូវការ ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ និងបើកការដ្ឋានគម្រោងសាងសង់ផ្លូវលេខ 71C ក្រោមហិរញ្ញប្បទានសម្បទានពី ប្រទេសចិន។
សម្ដេច ហ៊ុន សែន បានបញ្ជាក់ថា នៅមុនផ្ទុះការឆ្លងរីករាលដាលនៃជំងឺ COVID-19 រាជរដ្ឋាភិបាលកម្ពុជា មានគម្រោងសាងសង់ស្ពានជាច្រើនកន្លែង ឆ្លងកាត់ទន្លេ និងស្ទឹងនានានៅទូទាំងប្រទេស បន្ទាប់ពី កម្ពុជា ទទួលបានប្រាក់សន្សំច្រើន៕
