ប្រទេសចិន កាលពីថ្ងៃទី ២៤ មករា បានសម្ពោធដាក់ឱ្យប្រើប្រាស់ស្ពានខ្សែកាបធ្នឹមដែកប្រវែងជិត ១,៤០០ ម៉ែត្រ ដែលមានផ្លូវសម្រាប់រថភ្លើង និងផ្លូវសម្រាប់យានយន្ត ឆ្លងកាត់ទន្លេ Yangtze នៅក្នុងទីក្រុង Chongqing ភាគនិរតីប្រទេសនេះ។
គម្រោងស្ពាន Baijusi ឆ្លងទន្លេ Yangtze ត្រូវបានដាក់ឱ្យធ្វើចរាចរណ៍កាលពីថ្ងៃទី ២៤ មករា។ នៅមុននោះ ១ ថ្ងៃ ប្រជាជននៅក្នុងតំបន់ ត្រូវបានអនុញ្ញាតឱ្យមកកម្សាន្តលើស្ពានតាមចិត្ត។ នៅក្នុងវប្បធម៌ចិន ការដើរដោយថ្នើរជើងឆ្លងកាត់ស្ពានត្រូវបានគេជឿថានឹងនាំមកនូវសំណាងល្អដល់សំណង់ថ្មី។
ដោយមានប្រវែងសរុប ១,៣៨៤ ម៉ែត្រ Baijusi គឺជាស្ពានខ្សែកាបធ្នឹមដែកធំបំផុតក្នុងពិភពលោក ដោយមានទាំងផ្លូវសម្រាប់រថភ្លើង និងផ្លូវសម្រាប់យានយន្តនានា ក្នុងនោះ ជាន់ខាងលើគឺជាផ្លូវល្បឿនលឿន ២ ទិស, ៨ គន្លង ដែលមានទទឹង ៣៨ ម៉ែត្រ ខណៈដែលជាន់ក្រោមគឺជាផ្លូវដែក Chongqing លេខ ១៨ សម្រាប់រថភ្លើង។
ស្ពានដែលតភ្ជាប់តំបន់ Taiyanggang ក្នុងខណ្ឌ Banan ជាមួយនឹងតំបន់ Chengjiang ក្នុងខណ្ឌ Dadukou នេះនឹងជួយកាត់បន្ថយពេលវេលានៃការធ្វើដំណើររវាងខណ្ឌទាំង ២ មកនៅត្រឹមតែ ១០ នាទីប៉ុណ្ណោះ។ មិនត្រឹមតែមានតួនាទីជាតំណភ្ជាប់ចរាចរណ៍ទេ ប៉ុន្តែ ស្ពាន Baijusi នេះក៏ថែមទាំងក្លាយជាទិដ្ឋភាពថ្មី និងជាទីគយគន់ទេសភាពរបស់ទីក្រុងផងដែរ៕
