Amos Hochstein ទីប្រឹក្សាជាន់ខ្ពស់របស់ ក្រសួងការបរទេសអាម៉េរិក ទទួលបន្ទុកសន្តិសុខថាមពល កាលពីថ្ងៃទី ១៧ កក្កដា បាននិយាយថា តម្លៃប្រេងសាំងអាម៉េរិក អាចនឹងថយចុះមកនៅត្រឹម ៤ ដុល្លារ/gallon (១ gallon ស្មើនឹង ៣.៧៨ លីត្រ) ក្រោយពីបានឡើងលើសពី ៥ ដុល្លារ/gallon ជាលើកដំបូងក្នុងប្រវត្តិសាស្ត្រកាលពីដើមឆ្នាំនេះ។
ប្រភពព័ត៌មានពី វ៉ាស៊ីងតោន បានឱ្យដឹងថា នៅលើកម្មវិធី «Face the Nation» របស់ទូរទស្សន៍ CBS លោក Amos Hochstein បានថ្លែងថា បណ្ដាក្រុមហ៊ុនផលិតប្រេងឆៅធំៗនឹងមានប្រភពបម្រុង និងលទ្ធភាពបង្កើនប្រភពផ្គត់ផ្គង់ បន្ទាប់ពីដំណើរទស្សនកិច្ចនៅតំបន់មជ្ឈិមបូព៌ារបស់ ប្រធានាធិបតីអាម៉េរិក លោក ចូ បៃដិន។
«យោងទៅតាមអ្វីដែលយើងបានឮនៅក្នុងដំណើរទស្សនកិច្ច ខ្ញុំមានជំនឿថា យើងនឹងបានឃើញវឌ្ឍនភាពនៅប៉ុន្មានសប្ដាហ៍ខាងមុខ» លោក Amos បង្ហើបឱ្យដឹងដូច្នេះ។
មន្ត្រីរូបនេះមានជំនឿថា ក្រុមប្រទេសផលិតប្រេងឆៅនៅ មជ្ឈិមបូព៌ា នឹងបង្កើនបរិមាណប្រេងដើម្បីធានាដល់ការផ្គត់ផ្គង់ក្នុងពិភពលោក។
កាលពីថ្ងៃទី ១៥ កក្កដា ក្នុងដំណើរទៅកាន់ មជ្ឈិមបូព៌ា ជាលើកដំបូងក្នុងនាមជាប្រធានាធិបតី លោក បៃដិន ក៏បានធ្វើទស្សនកិច្ច ប្រទេសអារ៉ាប៊ីសាអូឌីត ដោយសង្ឃឹមថា នឹងមានកិច្ចព្រមព្រៀងស្ដីពីបរិមាណប្រេង ដើម្បីជួយបញ្ចុះតម្លៃប្រេងសាំងក្នុងពិភពលោក។
តម្លៃប្រេងសាំងនៅ សហរដ្ឋអាម៉េរិក ដែលកើនឡើងខ្ពស់បំផុតក្នុងអំឡុងជាង ៤០ ឆ្នាំមកនេះ កំពុងតែជំរុញឱ្យអតិផរណាកើនឡើង និងប៉ះពាល់ដល់អត្រានៃទំនុកចិត្តទៅលើលោក បៃដិន នៅក្នុងការស្ទង់មតិនានា។ ក៏ប៉ុន្តែ លោក បៃដិន មិនទាន់ទទួលបានការធានាចំពោះការបង្កើនបរិមាណប្រេងពីបណ្ដាប្រទេសនៅ មជ្ឈិមបូព៌ា នៅឡើយ។
ចំណែក រដ្ឋមន្ត្រីការបរទេសរបស់ អារ៉ាប៊ីសាអូឌីត វិញ បានឱ្យដឹងថា ជំនួបកំពូលអាម៉េរិក-អារ៉ាប៊ីសាអូឌីត កាលពីថ្ងៃទី ១៦ កក្កដា មិនបាននិយាយដល់បញ្ហាប្រេង។ មន្ត្រីរូបនេះអះអាងថា បណ្ដាប្រទេសនាំចេញប្រេង និងដៃគូ (OPEC+) នឹងបន្តវាយតម្លៃលក្ខខណ្ឌទីផ្សារ និងធ្វើអ្វីដែលចាំបាច់។
តាមគម្រោង អង្គការ OPEC+ ដែលក្នុងនោះមាន រុស្ស៊ី ផងដែរ នឹងបើកកិច្ចប្រជុំបន្ទាប់នៅថ្ងៃទី ៣ សីហាខាងមុខ៕
