ភ្នំពេញ៖ ដើម្បីចូលរួមអបអរសាទរព្រះរាជពិធីបុណ្យខួបនៃការយាងគ្រងព្រះបរមរាជសម្បត្តិរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ធនាគារជាតិនៃកម្ពុជាបានចេញសេចក្តីប្រកាសថ្មីមួយស្ដីពីការដាក់ឱ្យចរាចរប្រភេទក្រដាសប្រាក់ 5000រៀល និង1000រៀលថ្មីជាផ្លូវការចាប់ពីថ្ងៃទី25 ខែតុលា ឆ្នាំ2017 នេះតទៅ។ ដើម្បីចៀសវាងការភ័ន្តច្រឡំ សារពត៌មានឡារ៉ែនសូមលើកយកលក្ខណៈសម្គាល់ក្រដាស់ប្រាក់ 5000រៀលប្រភេទថ្មី មកបង្ហាញជូនដូចខាងក្រោម៖
យោងតាមប្រកាសស្តីពី លក្ខណៈសម្គាល់នៃធនបត្រប្រភេទ 5000រៀលថ្មី ដែលចុះហត្ថលេខា ដោយឯកឧត្តម ជា ចាន់តូ បានបង្ហាញថា៖
ក.លក្ខណៈទូទៅ
– ទំហំធនបត្រ៖ បណ្តោយ 142ម.ម និងទទឹង 68ម.ម
– ពណ៌ចម្បងគឺពណ៌ស្វាយ និងពណ៌ត្នោត។
ខ. ផ្ទៃខាងមុខនៃធនបត្រ
-ផ្នែកកណ្តាល ខាងស្តាំត្រូវបានរំលេចឡើងនូវព្រះឆាយាល័ក្ខណ៍ នៃព្រះបរមរតនកោដ្ឋ ព្រះបាទនរោត្តម សីហនុ វរ័ន្ម កាលពីព្រះអង្គនៅកំពុងបំពេញព្រះរាជបូជនីយកិច្ច ដឹកនាំចលនាតស៊ូទាមទារឯករាជ្យជាតិពីពួកអាណានិគមនិយមបារាំងសេស ខាងឆ្វេងមានលេខ«៥០០០» នៅពីលើគេ បន្ទាប់មកគឺជាហត្ថលេខារបស់ទេសាភិបាល និងអគ្គបេឡា ព្រមទាំងរូបភាពតែងលម្អយកតាមរូបក្បាច់ហោជាងនៃអគារតុលាការកំពូល និងនៅពីក្រោមនោះមានលេខ-មាលាបោះពុម្ពដោយទឹកខ្មៅពណ៌ខ្មៅ រូបចម្លាក់នាគក្បាល5 នៅវិមានឯករាជ្យ និងអក្សរ«ប្រាំពាន់រៀល» ព្រមទាំងអក្សរ «អ្នកក្លែងក្រដាសប្រាក់នឹងត្រូវផ្តន្ទាទោសតាមច្បាប់» នៅគែមខាងក្រោមនោះ។
-ផ្នែកខាងស្តាំ ជ្រុងលើមានអក្សរ «ធនាគារជាតិនៃកម្ពុជា» ព្រមទាំងលេខ-មាលាបោះពុម្ពដោយទឹកខ្មៅពណ៌ក្រហម នៅកណ្តាលមានរូបភាពអង្គដៅចំណាំខាងមុខ ដែលមើលឆ្លុះឃើញលេខ «5000» និងជ្រុងក្រោមមានលេខ «៥០០០» ព្រមជាមួយលេខ«5000» នៅពីក្រោមនោះ។
-ផ្នែកខាងឆ្វេង មានលេខ«5000» ព្រាលៗបោះពុម្ពតាមបន្ទាត់បញ្ឈរ ព្រមទាំងរូបភាពតែងលម្អពណ៌ប្រាក់ យកលំនាំតាមក្បាច់ចម្លាក់នៅប្រាសាទបន្ទាយស្រី បោះពុម្ពកាត់ទទឹងក្រដាសប្រាក់ពីលើដល់ក្រោម និងជ្រុងក្រោមមាននិមិត្តសញ្ញាសម្គាល់ប្រភេទប្រាក់ សម្រាប់ជនពិការភ្នែក ព្រមទាំងមានគំនូរបន្ទាត់ខ្លីៗជាច្រើនបង្កើតឡើងដោយលេខ «5000»ដ៏តូចល្អិត។
គ.ផ្ទៃខាងខ្នងធនបត្រ៖
-ផ្នែកកណ្តាល ត្រូវបានរំលេចឡើងនូវរូបភាពនាគក្បាល9 នៅស្ពានបុរាណកំពង់ក្តី និងរូបតួស្ពានមើលបញ្ឆិតពីចំហៀងខាងស្តាំ នៅពីលើរូបស្ពានមានតែងលម្អដោយក្បាច់ចម្លាក់នៅប្រាសាទបន្ទាយស្រី និងនៅពីក្រោមមានអក្សរ «ប្រាំពាន់រៀល»។
-ផ្នែកខាងស្តាំ ជ្រុងលើមានលេខ«5000» បោះពុម្ពតាមបន្ទាត់បញ្ឈរ នៅកណ្តាលជារូបចម្លាក់នៅជញ្ជាំងប្រាសាទបាយ័ន និងនៅជ្រុងក្រោមមានលេខ «៥០០០» ។
ផ្នែកខាងឆ្វេង ជ្រុងលើមានអក្សរ «ធនាគារជាតិនៃកម្ពុជា» អក្សរ« NATIONAL BANK OF CAMBODIA» និងលេខ«2015» នៅកណ្តាលមានរូបភាពព្រាលៗ នៃរូបចម្លាក់ព្រះកេសទេវតា នៅឯទ្វារជ័យខាងត្បូង នៃប្រាសាទបាយ័ន និងក្បាច់តែងលម្អពណ៌ប្រាក់ ផ្គុំឡើងដោយលេខ«5000»ផ្កាប់ និងនៅជ្រុងក្រោមមានលេខ «៥០០០»៕
