មជ្ឈមណ្ឌលផលិតភាពជាតិកម្ពុជានៃក្រសួងឧស្សាហកម្ម និងសិប្បកម្ម កាលពីពេលថ្មីៗនេះបានបើកវគ្គបណ្តុះបណ្តាលគ្រូបង្គោលមួយដោយផ្តោតលើប្រព័ន្ធគ្រប់គ្រងបរិស្ថានផ្អែកលើស្តង់ដារ ISO 14000 ដែលមានការចូលរួមពីវិស័យសាធារណៈ និងឯកជន ក្រុមហ៊ុន និងសហគ្រាសផលិតជាច្រើន។
តាមការអះអាងរបស់អ្នកជំនាញ ប្រធានបទបរិស្ថានក្នុងសង្វាក់ផលិតកម្មផលិតផលគ្រប់ប្រភេទកំពុងក្លាយជាកាតព្វកិច្ចដ៏សំខាន់សម្រាប់ម្ចាស់សហគ្រាសទាំងអស់។ វគ្គបណ្តុះបណ្តាលគ្រូបង្គោលស្តីពីប្រព័ន្ធគ្រប់គ្រងបរិស្ថានផ្អែកលើស្តង់ដារ ISO 14000 នេះទទួលបានការឧបត្ថម្ភដោយអង្គការផលិតភាពអាស៊ី (Asian Productivity Organization=APO) ដែលមានលេខាធិការដ្ឋាននៅទីក្រុងតូក្យូ ប្រទេសជប៉ុន តំណាងឱ្យប្រទេសជាសមាជិក APO ចំនួន19ប្រទេសនៅក្នុងតំបន់អាស៊ី។
លោក ហេង អៀង ប្រធានមជ្ឈមណ្ឌលផលិតភាពជាតិកម្ពុជា បានអះអាងថា វគ្គបណ្តុះបណ្តាលនេះ គឺផ្តោតទៅលើការលើកកម្ពស់ផលិតភាព គុណភាព និងកម្រិតនៃការប្រកួតប្រជែងសហគ្រាសនៅកម្ពុជា តាមរយៈការលើកកម្ពស់ផលិតភាពបៃតង និងការគ្រប់គ្រងគុណភាពបរិស្ថានសម្រាប់ប្រតិបត្តិនៅក្នុងដំណើរការក្រុមហ៊ុន ឬសហគ្រាសរបស់ពួកគេ។
លោកបញ្ជាក់ថា៖“បច្ចុប្បន្នក្រសួងឧស្សាហកម្ម និងសិប្បកម្ម កំពុងតែផ្សព្វផ្សាយកម្មវិធីបម្រែបម្រួលអាកាសធាតុ និងឧស្សាហកម្មបៃតង ទាំងក្នុងសហគ្រាសធុនតូច មធ្យម និងធំ។ លោក ហេង អៀង បានបន្ថែមថា មជ្ឈមណ្ឌលផលិតភាពជាតិ ចង់ពង្រីកនូវសេវាប្រឹក្សាយោបល់របស់ខ្លួនទៅលើស្តង់ដារប្រព័ន្ធគ្រប់គ្រងអន្តរជាតិ ដើម្បីគ្រប់ដណ្តប់លើប្រព័ន្ធគ្រប់គ្រងគុណភាពបរិស្ថាន។ ដូចនេះហើយប្រព័ន្ធដែលត្រឹមត្រូវបំផុតនោះគឺ ស្តង់ដារ ISO 14000 នេះតែម្តង។
ឯកឧត្តម ភោគ សុវណ្ណរិទ្ធ រដ្ឋលេខាធិការនៃក្រសួងឧស្សាហកម្ម និងសិប្បកម្ម ក៏បានជំរុញឱ្យសិក្ខាកាមចូលរួមស្វែងយល់ឱ្យបានស៊ីជម្រៅពីនិន្នាការវិវត្តថ្មីៗនៃលក្ខខណ្ឌតម្រូវដែលគិតគូរដល់បរិស្ថាន។ ឯកឧត្តមបញ្ជាក់ថា៖“ ផលិតផលដែលមានផលប៉ះពាល់ដល់បរិស្ថាន នឹងមិនមាននិរន្តរភាពទេ ព្រោះនិន្នាការរបស់អ្នកប្រើប្រាស់គឺគាំទ្រផលិតផលណាដែលធម្មជាតិ មិនប៉ះពាល់ដល់សុខភាព ទោះបីក្នុងរយៈពេលណាក៏ដោយ។
លោក Yong Kok Seng អ្នកជំនាញរបស់អង្គការផលិតភាពអាស៊ី (APO) បាននិយាយថា សហគ្រាសនៅកម្ពុជានៅមានភាពក្មេងខ្ចីនៅឡើយ ដូច្នេះគេអាចគិតគូរបញ្ហាបរិស្ថាននេះទៅក្នុងគោលនយោបាយសហគ្រាសរបស់គេ ព្រោះបរិស្ថានត្រូវបានគេគិតគូរជាសកល។
តាមរយៈការបណ្តុះបណ្តាលនោះ មជ្ឈមណ្ឌលផលិតភាពជាតិ រំពឹងថាខ្លួននឹងបង្កើនការណែនាំ និងតម្រូវការនៃការអនុវត្តស្តង់ដារគ្រប់គ្រងគុណភាព ISO 14000 នៅប្រទេសកម្ពុជា ពង្រឹង និងអភិវឌ្ឍសមត្ថភាពនៃគ្រូបង្វឹក និងអ្នកពិគ្រោះយោបល់ វិស្វករនិងអ្នកគ្រប់គ្រងផលិតកម្ម ដើម្បីអនុម័តនៃការប្រើប្រាស់វិធីសាស្ត្រអនុវត្តជាក់ស្តែងនៃការគ្រប់គ្រងបរិស្ថាន និងតម្រូវឱ្យសិក្ខាកាមយល់ពីគោលការណ៍និងមេរៀននៃការគ្រប់គ្រងបរិស្ថាន វិធីសាស្ត្រសម្រាប់អនុវត្តប្រព័ន្ធគុណភាពបរិស្ថាន និងបច្ចេកទេសអនុវត្តនៃការប្រឹក្សាយោបល់នៅក្នុងការគ្រប់គ្រងប្រព័ន្ធនេះ៕
