ភ្នំពេញ – មានគម្រោងអភិវឌ្ឍន៍លំនៅឋានជាច្រើនកំពុងតែបោះជំហានឆ្ពោះទៅរកតំបន់ភាគខាងត្បូងនៃរាជធានីភ្នំពេញ (ខណ្ឌដង្កោ)ដែលនឹងជំរុញឱ្យមានលំហូរសេដ្ឋកិច្ច និងជួយលើកកម្រិតជីវភាពប្រជាពលរដ្ឋដែលរស់នៅទីនោះឱ្យកាន់តែមានភាពល្អប្រសើរឡើង និងអ្វីដែលគួរឱ្យសាទរជាងនេះគឺ នៅក្នុងនោះមានគម្រោងអភិវឌ្ឍន៍ទីក្រុងរណបបឹងជើងឯកនឹងចេញជាផ្លូវការក្នុងពេលឆាប់ៗ ដែលនឹងកាន់តែធ្វើឱ្យកម្រិតជីវភាពប្រជាជនដែលរស់នៅតំបន់នោះកាន់តែមានភាពល្អប្រសើរជាងពេលបច្ចុប្បន្នបន្ថែមទៀត។
ក្នុងកិច្ចប្រជុំពិនិត្យការងាររៀបចំអភិវឌ្ឍន៍ទីក្រុងរណបបឹងជើងឯកដែលដឹកនាំដោយឯកឧត្ដម ឃួង ស្រេង អភិបាលរាជធានីភ្នំពេញ ធ្វើឡើងកាលពីថ្ងៃទី4 កញ្ញា បានពិភាក្សាលើបញ្ហានេះ ដោយធ្វើយ៉ាងណាឱ្យការអភិវឌ្ឍគម្រោងទីក្រុងរណបបឹងជើងឯកនេះដំណើរការទៅមុខរលូន។ ជាងនេះទៅទៀត ឯកឧត្ដមក៏បានជំរុញឱ្យក្រុមការងារកំណត់ព្រំប្រទល់តំបន់អភិវឌ្ឍន៍ និងព្រំប្រទល់អាងស្ដុកទឹកឱ្យបានច្បាស់លាស់មុននឹងឈានទៅដល់ការងារដោះស្រាយបានល្អប្រសើរឡើង។
ជុំវិញការអភិវឌ្ឍតំបន់ទីក្រុងរណបបឹងជើងឯកនេះ លោកឧកញ៉ា នួន រិទ្ធី អគ្គនាយកក្រុមហ៊ុន KFA បានលើកឡើងថា ព័ត៌មាននៃការអភិវឌ្ឍគម្រោងទីក្រុងរណបបឹងជើងឯកពិតជាដំណឹងល្អមួយ និងគួរឱ្យរីករាយជាខ្លាំង ព្រោះបានបង្ហាញឱ្យឃើញពីការដឹកនាំដ៏ត្រឹមត្រូវរបស់រាជរដ្ឋាភិបាលដែលធ្វើឱ្យមានស្ថិរភាព និងរក្សាបានកំណើនសេដ្ឋកិច្ច7% ដែលធ្វើឱ្យអ្នកវិនិយោគមានទំនុកចិត្ដ និងបន្ដការអភិវឌ្ឍទោះជាក្នុងកាលៈទេសៈណាក៏ដោយ។
អគ្គនាយកក្រុមហ៊ុន KFA បានបន្ដថា៖ «ការបង្កើតឱ្យមានទីក្រុងរណបជារឿងមួយល្អព្រោះវាបានផ្ដល់ផលប្រយោជន៍ជាច្រើន និងជាមុខមាត់របស់ប្រទេសជាតិយើង។ នៅេពលមានគម្រោងនោះកើតឡើង វានឹងបានផ្ដល់ការងារជូនដល់ប្រជាជនកាន់តែច្រើនដែលចាប់ផ្ដើមតាំងពីការងារសាងសង់រហូតដល់ការងារបដិសណ្ឋារកិច្ច និងសេវាកម្មផ្សេងៗទៀតផង»។
បច្ចុប្បន្នតម្លៃដីនៅតំបន់ដង្កោទាបបំផុតស្ថិតក្នុងចន្លោះ25-30ដុល្លារក្នុងមួយម៉ែត្រការ៉េ។ សម្រាប់តម្លៃដីលំនៅឋានមធ្យមអាចនៅចន្លោះ100-200ដុល្លារក្នុងមួយម៉ែត្រការ៉េ។ តំបន់ពាណិជ្ជកម្មចាប់ពីរង្វង់មូលកួរស្រូវទៅដល់សាលាខណ្ឌដង្កោតម្លៃដីស្ថិតក្នុងចន្លោះ300-800ដុល្លារក្នុងមួយម៉ែត្រការ៉េ។ លោកឧកញ៉ាបានលើកឡើងថា ប្រសិនបើគម្រោងទីក្រុងរណបនោះចេញជាផ្លូវការតម្លៃដីនៅទីនោះអាចនឹងកើនឡើង5ដងនៃតម្លៃធម្មតា។
ពាក់ព័ន្ធនឹងការអភិវឌ្ឍ លោកឧកញ៉ានួន រិទ្ធី បញ្ជាក់ថា៖ «ជុំវិញការអភិវឌ្ឍយើងត្រូវមើលទៅលើគម្រោងមេរបស់សាលារាជធានីភ្នំពេញ។ សម្រាប់ខ្ញុំគិតថា ជាបឋមប្រហែលជាអាចកើតឡើងនូវសូនកម្សាន្ដ បន្ទាប់មកអាចមានអគារស្នាក់នៅ អគារពាណិជ្ជកម្ម ផ្សារទំនើប សាលារៀន មន្ទីរពេទ្យ ឬអគាររដ្ឋបាលផ្សេង។ យោងតាមការរីកចម្រើននៃសេដ្ឋកិច្ចរបស់ប្រទេសយើង ក្រុមហ៊ុននឹងអាចមានការកកើតច្រើន ដូច្នេះអគារពាណិជកម្មដែលបង្កើតថ្មីៗ នឹងបំពេញតម្រូវការសម្រាប់ក្រុមហ៊ុនថ្មីៗដែលចង់មកធ្វើជំនួញដែរ»។
អគ្គនាយក្រុមហ៊ុន KFA បានលើកឧទាហរណ៍ថា ដូចជាតំបន់បឹងកេងកងដែលសម្បូរទៅដោយអគារការិយាល័យ អគារអង្គការ ប៉ុន្ដែបច្ចុប្បន្នកន្លែងខ្លះត្រូវបានផ្លាស់ប្ដូរទៅជាទីតាំងពីភោជនីយដ្ឋានល្បីៗ ទំនើបៗ ដូច្នេះអគារការិយាល័យទាំងនោះនឹងត្រូវផ្លាស់ប្ដូរទីតាំងទៅរកកន្លែងអភិវឌ្ឍន៍ថ្មីៗ ដែលយើងមើលឃើញថា វាជារឿងធម្មតា និងជាការវិវឌ្ឍនៃប្រទេសកំពុងអភិវឌ្ឍន៍៕
