Category: PR

ការប្រកួតជិះសេះវ័យក្មេងលើកទី១ធ្វើឡើងដោយ សហព័ន្ធកីឡាជិះសេះកម្ពុជា ដើម្បីត្រៀមចូលរួមប្រកួតស៊ីហ្គេមឆ្នាំ ២០២៣
កាលពីចុងសប្ដាហ៍កន្លងទៅនេះ សហព័ន្ធកីឡាជិះសេះកម្ពុជាបានរៀបចំការប្រកួតជិះសេះវ័យក្មេង ដោយមានកីឡាករប្រមាណជា ២០រូប
បានបង្ហាញពីសមត្ថភាពជិះសេះដ៏ក្លាហានរបស់ពួកគេនៅក្នុងកម្មវិធីប្រកួតជិះសេះលើកទី១ ឆ្នាំ២០២០ នៅ Cambodian Country Club ដើម្បីត្រៀមខ្លួនចាប់យកឱកាសក្នុងកីឡាស៊ីហ្គេម ២០២៣ខាងមុខនេះ ខណៈដែលកម្ពុជានឹងធ្វើជាម្ចាស់ផ្ទះរៀបចំព្រឹត្តិការណ៍កីឡាថ្នាក់តំបន់មួយនេះជាលើកដំបូង។
លោក ហ៊ូយ សុផារិទ្ធ ជាគ្រូបង្ហាត់ជិះសេះដល់ក្មេងៗបានអោយដឹងថាការចូលរួមប្រកួតកីឡាជិះសេះនេះ មិនទាន់ប្រជាប្រិយភាពណៅឡើយទេ សម្រាប់ប្រទេសកម្ពុជាទេ។
លោកបានបញ្ជាក់ថា « កីឡាប្រភេទនេះជាទូទៅគេមិនសូវចូលចិត្តទេ តែបើនិយាយរឿងប្រណាំងដាក់លុយវិញប្រហែលជាមានអ្នកចូលចិត្តច្រើន តែប្រណាំងអត់នៅក្នុងក្របខណ្ឌកីឡាទេ វាពាក់ព័ន្ធនឹងការស៊ីសង និងការប្រថុយ»។លោក ហ៊ូយ សុផារិទ្ធ បានបន្តថា« សម្រាប់កីឡាជិះសេះនេះ យើងនិងខាងសហព័ន្ធកីឡាជិះសេះកម្ពុជា បាននឹងកំពុងខិតខំពង្រឹងនិងអភិវឌ្ឍកីឡាជិះសេះឲ្យមានការរីកចម្រើន ដើម្បីត្រៀមជាម្ចាស់ផ្ទះរៀបចំកីឡាស៊ីហ្គេម២០២៣ ព្រោះថា វិញ្ញាសារជិះសេះនេះក៏ត្រូវបានគេដាក់បញ្ជូលទៅក្នុងកីឡាស៊ីហ្គេមនេះដែរ។
តាមរយៈការប្រកួតកីឡាជិះលើកទី១នេះ លោកស្រី ទេព ម៉ូណា ប្រធានសហព័ន្ធកីឡាជិះសេះកម្ពុជាបង្វឹកកីឡាករជិះសេះកម្ពុជា បានគូសបញ្ជាក់ថា សព្វថ្ងៃនេះ សម្រាប់កីឡាជិះសេះ កីឡាករកម្ពុជាមិនទាន់មានសមត្ថភាពគ្រប់គ្រាន់ដើម្បីអាចចេញទៅប្រឡូកនៅក្រៅប្រទេសទេ។
លោកស្រី ទេព ម៉ូណា បន្តថា «យើងត្រូវការបន្សាំកីឡាករវ័យក្មេងទាំងនេះឲ្យហើយ ដោយបច្ចុប្បន្ននេះ យើងឲ្យពួកគេជិះសេះហើយផ្លោះរបងត្រឹមតែកម្ពស់ល្មមមួយដែលស័ក្ដិសមនឹងវ័យរបស់ពួកគេ ជាក់ស្ដែងនៅពេលប្រកួតក្នុងកីឡាស៊ីហ្គេម ការលោតផ្លោះនឹងកាន់តែខ្ពស់ជាងនេះទៀត។ ដូចនេះវាមិនមែនជាការងាយស្រួលនោះទេ។ ដូច្នេះយើងត្រូវតែប្រឹងប្រែងបង្វឹកកីឡាករវ័យក្មេងទាំងនេះឲ្យខ្លាំង ដើម្បីអាចឲ្យពួកគេមានឱកាសចូលរួមការប្រកួតដ៏ធំនេះបាន»។
លោកស្រីបានបញ្ជាក់ថា៖ បើទោះបីជានៅកម្ពុជាមិនទាន់មានការពេញនិយមខ្លាំងចំពោះកីឡាជិះសេះមែន ប្រធានសហព័ន្ធកីឡាជិះសេះកម្ពុជាបង្វឹកកីឡាករជិះសេះកម្ពុជារូបនេះ ចង់មានការលើកកម្ពស់កីឡានេះ តាមរយៈការបញ្ជ្រាបចូលក្នុងវិស័យទេសចរណ៍ ដោយលោកស្រីបានលើកឧទាហរណ៍ថា «បើសិនជានៅតាមរមណីយដ្ឋានធម្មជាតិនានាក្នុងប្រទេសកម្ពុជា មានការជិះសេះកម្សាន្ដ ខ្ញុំគិតថាភ្ញៀវទេសចរប្រហែលជាចាប់អារម្មណ៍ជាងការប្រើមធ្យោបាយយានយន្តផ្សេងៗ ថែមទាំងអាចធ្វើឲ្យកីឡានេះកាន់តែមានប្រជាប្រិយភាពទៀតផង»៕

February 11, 2020
មណ្ឌលកំពង់ចាម Tiger Street Football 2020 ក្រុមកំពង់ចាម FC គ្រងជើងឯក
កំពង់ចាម៖ ក្រុមបាល់ទាត់កំពង់ចាម FC បានក្លាយជាជើងឯក ប្រចាំមណ្ឌលខេត្តកំពង់ចាម ដែលជាមណ្ឌលទី៥ នៃព្រឹត្តិការណ៍បាល់ទាត់ Tiger Street Football 2020 បន្ទាប់ពីឆ្លងកាត់ការប្រកួតយ៉ាងស្វិតស្វាញអស់រយៈពេល២ថ្ងៃ និងប្រកួតវគ្គផ្តាច់ព្រ័ត្រយកឈ្នះក្រុមបាល់ទាត់ផ្ទះល្វែង ម៉ារីសា អេហ្វស៊ី ជាមួយលទ្ធផល២ទល់១ដែលជាលទ្ធផលតានតឹងបំផុត។
លោក តូ វណ្ណ ថាន់ អនុប្រធានក្រុមបាល់ទាត់កំពង់ចាម FC បានលើកឡើងថា ទម្រាំក្រុមរបស់ខ្លួនបានក្លាយជាម្ចាស់ជើងឯកប្រចាំមណ្ឌលកំពង់ចាមនេះបានត្រូវឆ្លងកាត់ការប្រកួតយ៉ាងស្វិតស្វាញជាមួយក្រុមខ្លាំងៗជាច្រើន ហើយកក្តាដែលជម្រុញឲ្យក្រុមជោគជ័យ គឺកើតឡើងពីការរួបរួមសាមគ្គីគ្នាលេងក្នុងទម្រង់យល់ចិត្តគ្នា។ អនុប្រធានក្រុមបាល់ទាត់កំពង់ចាម FC បានប្តេជ្ញាចិត្តថា និងបន្តខិតខំប្រឹងបង្កើនការហ្វឹកហាត់ទ្វេដងបន្ថែមទៀត នៅវគ្គផ្តាច់ព្រ័ត្រនៅរាជធានីភ្នំពេញ គឺប្រជុំដោយជើងខ្លាំងមកពីគ្រប់ខេត្តដែលសុទ្ធសឹងជាឧបសគ្គនៃដំណើរឆ្ពោះទៅដណ្តើមតំណែងជើងឯកប្រចាំឆ្នាំ។
ក្រុមបាល់ទាត់កំពង់ចាម FC ដែលជាជើងឯកប្រចាំមណ្ឌល ខេត្តកំពង់ចាម ទទួលបានរង្វាន់លើកទឹកចិត្ត១៥០០ដុល្លារ ក្រុមបាល់ទាត់ផ្ទះល្វែង ម៉ារីសា អេហ្វស៊ី ជើងឯករងទទួលបានរង្វាន់១០០០ដុល្លារ ក្រុមបាល់ទាត់ កុកស ចំណាត់លេខ៣ទទួលបានថវិកា៥០០ដុល្លារ ក្រុមបាល់ទាត់ MEMBER FOX A ជាប់ចំណាត់លេខ៤ទទួលបានថវិកា២០០ដុល្លារ និង៣ក្រុមទៀត មានក្រុមបាល់ទាត់ KING LION, JUSTICE FT និងក្រុមបាល់ទាត់អ្នកប្រម៉ាញ់ទីក្រុងឈ្នះកៅអីឡើងទៅប្រជែងវគ្គផ្តាច់ព្រ័ត្រនៅរាជធានីភ្នំពេញ ។
សូមជម្រាបថា Tiger Street Football 2020 មណ្ឌលកំពង់ចាម ដែលជាមណ្ឌលទី៥នេះ មានខេត្តចូលរួមចំនួន៦មានស្ទឹងត្រែង រតនគិរី មណ្ឌលគិរី ក្រចេះ ព្រៃវែង ស្វាយរៀង និងខេត្តកំពង់ចាមម្ចាស់ផ្ទះសរុប៧៧ក្រុម ហើយសម្រាប់មណ្ឌលកំពង់ចាមនេះសម្រាំងជ្រើសរើសយកតែក្រុមខ្លាំងចំនួន៧ប៉ុណ្ណោះឡើងទៅប្រកួតវគ្គផ្តាច់ព្រ័ត្រ នៅរាជធានីភ្នំពេញនៅថ្ងៃទី២៩ ខែកុម្ភៈ ដល់ថ្ងៃទី១ ខែមិនា ឆ្នាំ២០២០។ ក្រុមដែលឈ្នះតំណែងជើងឯកនៅរាជធានីភ្នំពេញមានឱកាសប្រគួតផ្ទាល់ជាមួយ លោក Rio Ferdinand តារាបាល់ទាត់ពិភពលោក។
សូមបញ្ជាក់ថា ព្រឹត្តិការណ៍ Tiger Street Football 2020 បន្ទាប់ពីមណ្ឌលកំពង់ចាម និងបន្តទៅមណ្ឌលទី៦ មណ្ឌលខេត្តកំពត ដែលមាន៤ខេត្តចូលរួម គឺព្រះសីហនុ កែប កោះកុង និងកំពតម្ចាស់ផ្ទះ ដំណើរការប្រកួតនៅថ្ងៃទី១៥ ដល់ថ្ងៃទី១៦ ខែកុម្ភៈ ឆ្នាំ២០២០។ សូមចូលទៅកាន់ទំព័រហ្វេសប៊ុកផ្លូវការ របស់ស្រាបៀរថៃហ្គ័រ៖ www.facebook.com/TigerBeerKH
ស្តែងចេញនូវការតាំងចិត្តដ៏មោះមុតរបស់អ្នក ជាមួយស្រាបៀរថៃហ្គ័រ។
ពិសាដោយការទទួលខុសត្រូវ៕
February 11, 2020
CPL ជឿជាក់ថា អចលនទ្រព្យនឹងរីកចម្រើនទៅជាទីក្រុងទំនើប វៃឆ្លាត
ការអភិវឌ្ឍទីក្រុងរណបសំខាន់ចំនួន6 នៅរាជធានីភ្នំពេញដែលរាជរដ្ឋាភិបាលកម្ពុជាបានអនុញ្ញាតឱ្យសាងសង់នាពេលកន្លងមក ត្រូវបានអ្នកវិនិយោគវិស័យអចលនទ្រព្យកត់សម្គាល់ថា នឹងក្លាយជាទីក្រុងរណបបែបវៃឆ្លាតនាពេលអនាគត ដោយទីតាំងនៅក្នុងសង្កាត់ជ្រោយចង្វារ ខណ្ឌឫស្សីកែវនឹងទទួលបានការលេចមុខមាត់ខ្លាំងជាងគេក្នុងគម្រោងដែលបានចាប់ផ្តើមមានសកម្មភាពនាពេលថ្មីៗនេះ របស់ OCIC ដែលបានផ្តល់សិទ្ធិផ្តាច់មុខដល់ក្រុមហ៊ុនCPL ក្នុងការលក់អគារ The Legacy ។

លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ CPL ខេមបូឌា បានមានប្រសាសន៍ឱ្យដឹងថា៖«គម្រោងអភិវឌ្ឍន៍ទីក្រុងរណប ដែលទទួលបានការចាប់អារម្មណ៍ខ្លាំងនាពេលនេះ មានសកម្មភាពវិនិយោគក៏ល្អ ដំណើរការទិញ-លក់ក៏ល្អ ដែលផ្តោតលើតម្រូវការអតិថិជនខុសៗគ្នា។ ប៉ុន្តែគម្រោង The Legacy បានលេចចេញជារូបរាងឡើងហើយ និងសាងសង់បានរួចរាល់ប្រមាណ 90% នៅលើទឹកដីទីក្រុងរណបជ្រោយចង្វារ ហើយគ្រោងនឹងបញ្ចប់នៅខែមេសាខាងមុខ»។
នៅក្នុងដំណើរទស្សនកិច្ចនាំអតិថិជនទៅកាន់អគារ The Legacy ដើម្បីមើលអំពីដំណើរការនៃការសាងសង់អគារនេះកាលពីថ្ងៃទី9-2-2020 រួមមានPartner លោក លោកស្រី លោកឧកញ៉ា លោកជំទាវ និងអតិថិជនជាច្រើននាក់ បានចូលរួមពិនិត្យអគារកម្ពស់ 21ជាន់នេះ និងបានស្វែងយល់ពីអគារដំបូងរបស់ OCIC ក្នុងតំបន់នេះដែលនឹងមានការច្នៃប្រឌិតបែបទំនើបទាន់សម័យ និងវៃឆ្លាត រួមទាំងការស្ថិតនៅក្នុងទីតាំងល្អ និងក្នុងតំបន់ដែលមានអាកាសធាតុល្អបរិសុទ្ធ ដោយមានទន្លេ មេគង្គ និងទន្លេបាសាក់ អមសងខាង ធ្វើឱ្យបរិយាកាសជុំវិញមានផាសុកភាព។

លោកឧកញ៉ា ចេង ខេង បានប្រសាសន៍ថ្លែងអំណរគុណដល់អ្នកឧកញ៉ា ពុង ឃាវសែ ដែលជាម្ចាស់គម្រោងអគារ The Legacyនេះ ដែលបានផ្តល់ទំនុកចិត្តដល់ក្រុមហ៊ុន CPL ឱ្យធ្វើការលក់ផ្តាច់មុខ ហើយលោកឧកញ៉ាបានប្តេជ្ញាថា នឹងធ្វើឱ្យគម្រោងនេះជោគជ័យនៅក្នុងរយៈពេលខ្លី ដោយសារតែវាស្ថិតនៅក្នុងប្លង់ទីក្រុងរណបជ្រោយចង្វារ ដែលកំពុងតែមានការអភិវឌ្ឍខ្លាំង ដូច្នេះ លោកជឿជាក់ថា មិនដល់ 3ខែទេ ក្រុមហ៊ុនអចលនទ្រព្យ CPL របស់លោក អាចនឹងលក់ដាច់ចំនួន 11ជាន់នៃអគារកម្ពស់ 21ជាន់នេះ ជាមិនខាន»។
លោកឧកញ៉ាបានបន្តថា៖«ហេតុដែលខ្ញុំមានការជឿជាក់ខ្លាំង ចំពោះការលក់អគារ The Legacy យ៉ាងដូច្នេះ គឺព្រោះតែទីតាំងនៃអគារនេះល្អ ដែលអំណោយផលដល់ការរស់នៅ និងធ្វើអាជីវកម្មខ្លាំងណាស់ ហើយខ្ញុំក៏ចង់ឱ្យលោកអ្នកមករស់នៅក្នុងអគារដែលមានការចាប់អារម្មណ៍លំដាប់ស្តង់ដាពិភពលោកនេះដែរ ដោយសារតែអគារនេះមានការច្នៃប្រឌិតបែបទំនើបទាន់សម័យ និងវៃឆ្លាត ជាការសម្រិតសម្រាំងរបស់ក្រុមហ៊ុន OCIC និងមានអ្នកជំនាញមកពីប្រទេសអ៊ីស្រាអែលចូលរួមផ្តល់គម្រោងនៃការបំពាក់នូវប្រព័ន្ធបច្ចេកវិទ្យាសម្រាប់អគារទាំងមូលផងដែរ»។
លោកឧកញ៉ា ចេង ខេង បានបញ្ជាក់ថា អគារពាណិជ្ជកម្ម The Legacy មានលក្ខណៈល្អច្រើនសម្រាប់អ្នកចាប់ផ្តើមអាជីវកម្មផ្ទាល់ខ្លួនដំបូង ដែលវាមិនខុសពីអគារពាណិជ្ជកម្មដទៃទៀតទេ ដែលរួមមានការគ្រប់គ្រងអចលនវត្ថុ សេវាកម្មកក់សំបុត្រផ្សេងៗ សេវាកម្មបដិសណ្ឋារកិច្ច សេវាកម្មរដ្ឋបាល សេវាកម្មរត់ការផ្ទេរសិទ្ធិ និងបង់ពន្ធអចលនវត្ថុ សេវាកម្មបោះពុម្ព រួមនឹងការផ្សាភ្ជាប់ទំនាក់ទំនងអ្នកជំនាញលើវិស័យផ្សេងៗ ដូចជាជំនាញផ្នែកបច្ចេកវិទ្យា លើវិស័យកសិកម្ម អ្នកជំនាញផ្នែកហិរញ្ញវត្ថុជាដើម ដែលអាចផ្តល់ប្រឹក្សា ដើម្បីជួយដល់អាជីវកម្មអាចឱ្យដំណើរការទៅបាន។
សូមបញ្ជាក់ដែរថា ដោយមានចក្ខុវិស័យច្បាស់លាស់ក្រុមហ៊ុន CPLបានកំណត់គោលដៅ ជាក់លាក់មួយថា សម្រាប់ជាន់ទី19 នៃអគារពាណិជ្ជកម្ម The Legacy នៅពេលសាងសង់រួចរាល់ 100% នៅខែមេសា ឆ្នាំ2020 ខាងមុខនេះ ក្នុងនាមជាអគារខ្ពស់ដែលបានសាងសង់រួចរាល់មុនគេលើទឹកដីក្រុងរណបជ្រោយចង្វារ និងទុកសម្រាប់ធ្វើជាការិយាល័យពាណិជ្ជកម្មអ៊ីស្រាអែល-កម្ពុជាក្នុងកិច្ចការពាណិជ្ជកម្ម៕

February 11, 2020
ទទួលយកកំពូលរសជាតិនៃបទពិសោធន៍លើសពីការមើលឃើញ និងការកម្សាន្តដ៏មហាអស្ចារ្យចេញពីស្តេចកំពូលទូរទស្សន៍ សាមសុង QLED 8K (Q900)!
(ភ្នំពេញ) ថ្ងៃទី១០ ខែកុម្ភៈ ឆ្នាំ២០២០៖ ទូរទស្សន៍កាលពីមុនឱ្យតែមើលឃើញ និងឮសំឡេងគឺបានហើយប៉ុន្តែបច្ចុប្បន្ននេះបើទោះបីជាពេលវេលារត់លឿនប៉ុណ្ណាក៏នៅតែរត់មិនទាន់ជាមួយនឹងបច្ចេកវិទ្យាដែលនឹកស្មានមិនដល់របស់ក្រុមហ៊ុន សាមសុង ដែរ! ជាក់ស្តែងសម្រាប់ស្តេចកំពូលទូរទស្សន៍ សាមសុង QLED 8K (Q900) លោកអ្នកប្រាកដជាទទួលបាននូវអ្វីដែលអស្ចារ្យជាទីបំផុតលើសពីការមើលឃើញ និងការកម្សាន្តរបស់លោកអ្នក!
ទាំងរូបរាង, រចនាបទ, កម្រិតពណ៌, ពន្លឺ, និងសំឡេង គឺពិតជាអាចនាំអារម្មណ៍របស់អ្នកដែលកំពុងទស្សនាឱ្យស្លុង និងស្ថិតក្នុងពិភពមួយដែលល្អ និងស្រស់ស្អាតលើសពីធម្មជាតិ! ជាមួយនឹងភាពអស្ចារ្យទាំងអស់នេះហើយទើបបានធ្វើឱ្យ QLED 8K (Q900) ក្លាយជាស្តេចកំពូលទូរទស្សន៍ដ៏ឆ្លាតវៃបំផុតគ្មានគូប្រៀបក្នុងពិភពលោក! ខាងក្រោមនេះគឺជាចំណុចខ្លាំង និងមានតែមួយរបស់ស្តេចកំពូលទូរទស្សន៍ សាមសុង QLED 8K (Q900)៖
* Perfect Visual Display
ទោះជាស្ថិតក្នុងស្ថានភាពពន្លឺបែបណាក៏ដោយក៏ទូរទស្សន៍ សាមសុង QLED 8K (Q900) នៅតែមានគុណភាពខ្ពស់ក្នុងការបង្ហាញកម្រិតពណ៌យ៉ាងស្អាតត្រជាក់ភ្នែកសម្រាប់លោកអ្នកជានិច្ចជាមួយនឹងគ្រាប់ពន្លឺ Quantum Processor 8K ដែលជួយឱ្យកម្រិតពណ៌ និងកម្រិតរូបភាព និងពន្លឺមានភាពកាន់តែច្បាស់បានយ៉ាងត្រឹមត្រូវឥតខ្ចោះបំផុតក្នុងកម្រិត 8K
ពិតៗតែម្តង!
* Ambient Mode (Super Magical Screen)
ក្រៅពីការទស្សនា និងកម្សាន្តនេះគឺជា Tips ឬ Bonus នៃស្តេចកំពូលទូរទស្សន៍ក្នុងលោកដោយអាចឱ្យលោកអ្នកផ្លាស់ប្តូរទូរទស្សន៍របស់អ្នកទៅជាស៊ុមរូបថតស៊ីគ្នាទៅនឹងជញ្ជាំងរំលេចចេញជាផ្ទាំងគំនូរដែលអាចបន្ថែមឲ្យបរិវេណនៃជញ្ជាំងក្នុងគេហដ្ឋានរបស់លោកអ្នកកាន់តែស្រស់ស្អាត និងទាក់ទាញបំផុតសម្រាប់លម្អគេហដ្ឋាន!
* One Invisible Connection
ជាដុំដែលអាចតភ្ជាប់ទៅកាន់ទូរទស្សន៍ ឬឧបករណ៍ផ្សេងៗបានយ៉ាងងាយស្រួលដោយមិនធ្វើឱ្យមានភាពរញ៉េរញ៉ៃឡើយបើទោះបីជាដាក់លើតុ ឬតម្លើងចាប់ជាប់នឹងជញ្ជាំងក៏ដោយ។
* No gap wall-mount (Q Style)
គឺជាបច្ចេកវិទ្យាដែលអាចភ្ជាប់ទូរទស្សន៍ទៅនឹងជញ្ជាំងបានយ៉ាងល្អឥតខ្ចោះស្ទើតែគ្មានចន្លោះធ្វើឱ្យបន្ទប់ និងបរិវេណក្នុងគេហដ្ឋានរបស់លោកអ្នកមើលទៅកាន់តែល្អឥតខ្ចោះ!
* Real 8K Resolution
គឺជាបច្ចេកវិទ្យាចុងក្រោយដែលធ្វើឱ្យរូបភាពនៅតែម៉ដ្ឋ និងមិនបែក ឬព្រាលឡើយទោះបីជាលោកអ្នកដាក់ភ្នែកសម្លឹងមើលជិត ឬជាប់នឹងអេក្រង់ក៏ដោយ!
* 8K AI Upscaling
មិនថារូបភាពរបស់លោកអ្នកស្ថិតក្នុងកម្រិត 1080 ឬ 4K នោះទេក៏ QLED 8K (Q900) នៅតែអាចដុសខាត់ និងបង្ហាញចេញមកវិញក្នុងកម្រិត 8K ដូច Footage 8K ដើមបានផងដែរ!
* Quantum HDR 4000
ធ្វើឱ្យកម្រិត HDR (High Dynamic Range) លោតរហូតដល់ 4000 ដែលអាចធ្វើឱ្យរូបភាពដែលបញ្ចេញមកកាន់តែច្បាស់ កាន់តែលម្អិតជាទីបំផុត (Super Details) !
* Air Play Connection
អាចឱ្យកម្មវិធី Airplay របស់ IOS ក្នុងទូរស័ព្ទ ឬ ឧបករណ៍ដទៃទៀតបង្ហាញទៅកាន់អេក្រង់ដ៏ធំ ភ្លឺច្បាស់ត្រជាក់ភ្នែកបានយ៉ាងងាយស្រួលផងដែរ។
លោកអ្នកអាចរកជាវបាននៅតាមហាងចែកចាយផលិតផល សាមសុង ដូចជា៖ ស៊ុនស៊ីម៉ិចកូ, KLD 3, ផ្សារទំនើប AEON, K4 និងហាងលក់គ្រឿងអេឡិចត្រូនិក សាមសុង នានា ក្នុងព្រះរាជាណាចក្រកម្ពុជា។ សម្រាប់ព័ត៌មានបន្ថែមសូមសាកសួរដោយផ្ទាល់តាមដេប៉ូចែកចាយរបស់ សាមសុង ទាំងអស់ ដែលនៅជិតលោកអ្នកបំផុត ឬទំនាក់ទំនងតាមរយៈលេខ៖ 1800-203232 !
February 10, 2020
មណ្ឌលកំពង់ចាម Tiger Street Football 2020 សម្រាំងយក៧ក្រុមឡើងមកប្រកួតវគ្គផ្តាច់ព្រ័ត្រនៅរាជធានីភ្នំពេញ
កំពង់ចាម៖ ព្រឹត្តិការណ៍បាល់ទាត់ Tiger Street Football 2020 មណ្ឌលកំពង់ចាម ដែលជាមណ្ឌលទី៥ នារសៀលថ្ងៃទី៧ ខែ កុម្ភៈនេះ បានធ្វើសន្និសិទ និងចាប់ឆ្នោតជ្រើសគូប្រកួតហើយនៅសណ្ឋាគារ LBN ASIAN ខេត្តកំពង់ចាម។លោក យ៉េន វណ្ណៈ គណៈកម្មាការរៀបចំការប្រកួត Tiger Street Football 2020 បានបញ្ជាក់ថា មណ្ឌលកំពង់ចាម ដែលជាមណ្ឌលទី៥នេះ ត្រូវដំណើរការប្រកួតនៅថ្ងៃទី៨ស្អែកនេះ មានក្រុមចូលរួមប្រកួតប្រជែងចំនួន៧៧ក្រុម ធ្វើការប្រកួតតាមរូបមន្តជម្រុះចាញ់ធ្លាក់មានរយៈពេល២ថ្ងៃ ដោយថ្ងៃទី១ប្រកួតចំនួន៤៥ប្រកួត និងប្រកួតថ្ងៃទី២មានចំនួនលេង៣២ប្រកួត។ គណៈកម្មាការរូបនេះ បញ្ជាក់ទៀតថា មណ្ឌលកំពង់ចាម ក្នុងឆ្នាំ២០២០នេះ មានក្រុមចូលរួមប្រកួតកើនឡើងលើពីឆ្នាំ២០១៩ តែ១ក្រុមប៉ុណ្ណោះ ខណៈដែលឆ្នាំ២០១៩ មាន៧៦ក្រុម។ លោកថា ថ្វីត្បិតមណ្ឌលកំពង់ចាមមានក្រមចូលរួមប្រកួតពុំសូវមានចំនួនច្រើនដូចមណ្ឌលផ្សេងៗ ប៉ុន្តែក្រុមដែលចូលរួមសុទ្ធសឹងតែជាក្រុមខ្លាំង។
អ្នកតំណាងក្រុមហ៊ុនស្រាបៀរ Tiger (CBL) បានលើកឡើងថា ព្រឹត្តិការណ៍បាល់ទាត់ Tiger Street Football 2020 ដែលក្រុមហ៊ុនបានរៀបចំនេះ គឺក្រុមហ៊ុនចង់ចូលរួមលើកកម្ពស់អភិវឌ្ឍវិស័យបាល់ទាត់ក្នុងសាលនៅព្រះរាជាណាចក្រកម្ពុជា ពិសេសចង់ឲ្យកីឡាករដែលស្រលាញ់បាល់ទាត់នៅព្រះរាជាណាចក្រកម្ពុជាបានសម្រេចក្តីស្រមៃជាមួយបាល់ទាត់ដែលខ្លួនបានហ្វឹកហាត់ និងទទួលបានឱកាសក្លាយជាកីឡាករបាល់ទាត់អាជីពនៅក្នុងព្រះរាជណាចក្រកម្ពុជា។ តំណាងរូបនេះ បានសំណូមពរឲ្យក្រុមចូលរួមប្រកួតទាំងអស់រក្សាប្រកាន់ភ្ជាប់នៅស្មារតីយុត្តិធម៌គោរពគ្នានៅពេលប្រកួត។
សូមបញ្ជាក់ថា Tiger Street Football 2020 មណ្ឌលកំពង់ចាម ដែលជាមណ្ឌលទី៥នេះ សម្រាំងជ្រើសរើសយកតែក្រុមខ្លាំងចំនួន៧ប៉ុណ្ណោះឡើងទៅប្រកួតវគ្គផ្តាច់ព្រ័ត្រនៅរាជធានីភ្នំពេញនៅថ្ងៃ២៩ ខែកុម្ភៈ ដល់ថ្ងៃទី១ ខែមិនា ឆ្នាំ២០២០។ ក្រុមដែលឈ្នះតំណែងជើងឯកនៅរាជធានីភ្នំពេញមានឱកាសជួបផ្ទាល់ជាមួយ លោក Rio Ferdinand តារាបាល់ទាត់ពិភពលោកជាមួយប្រាក់រង្វាន់សរុប៥ម៉ឺនដុល្លារ។សូមជម្រាប់ថា ព្រឹត្តិការណ៍ Tiger Street Football 2020 បន្ទាប់ពីមណ្ឌលទី៥ មណ្ឌលកំពង់ចាម និងបន្តទៅមណ្ឌលទី៦ មណ្ឌលខេត្តកំពត ដែលមាន៤ខេត្តចូលរួម គឺព្រះសីហនុ កែប កោះកុង និងកំពតម្ចាស់ផ្ទះ ដំណើរការប្រកួតនៅថ្ងៃទី១៥ ដល់ ថ្ងៃទី១៦ ខែកុម្ភៈ ឆ្នាំ២០២០។ សូមចូលទៅកាន់ទំព័រហ្វេសប៊ុកផ្លូវការ របស់ស្រាបៀរថៃហ្គ័រ៖ www.facebook.com/TigerBeerKH
ស្តែងចេញនូវការតាំងចិត្តដ៏មោះមុតរបស់អ្នក ជាមួយស្រាបៀរថៃហ្គ័រ។
ពិសាដោយការទទួលខុសត្រូវ៕
February 8, 2020
ទទួលបានសេរីភាពនៃការបោកគក់ និងជីវិតកាន់តែងាយស្រួលបំផុតជាមួយម៉ាស៊ីនបោកសម្លៀកបំពាក់ Samsung AddWashTM ថ្មី !
(ភ្នំពេញ) ថ្ងៃទី០៦ ខែកុម្ភៈ ឆ្នាំ ២០២០៖ សម័យ AI ទៅហើយ…ហេតុអ្វីទ្រាំរួញឈឺដៃ ឈឺខ្លួន និងចំណាយពេលស្ទើរតែពេញមួយថ្ងៃក្នុងការបោកគក់ទៀត? ប្រាកដណាស់ជាមួយនឹងម៉ាស៊ីនបោកសម្លៀកបំពាក់ Samsung AddWashTM ថ្មី ជួយសម្អាតស្នាមប្រឡាក់បានស្អាតល្អ និងលឿនបំផុត! ដូច្នេះលោកអ្នក និងគ្រួសារដ៏ឆ្លាតវៃសម័យថ្មីនឹងមានពេលវេលាគ្រប់គ្រាន់ដើម្បីបំពេញការងារសំខាន់បានដោយរីករាយ និងមានទំនុកចិត្តបំផុត! មិនថាស្នាមប្រឡាក់ដែលស្ថិតនៅជាប់សម្លៀកបំពាក់យ៉ាងណានោះទេក៏ម៉ាស៊ីនបោកសម្លៀកបំពាក់ Samsung AddWash អាចជម្រះស្នាមប្រឡាក់ បានយ៉ាងមានប្រសិទ្ធភាព និងបានយ៉ាងលឿនក្នុងរយៈពេលមិនដល់៥០នាទីផង! ឡូយអត់?
ចង់ដឹងអត់ថាតើមានអ្វីពិសេស និងទំនើបអស្ចារ្យខ្លះទៅបានជាធ្វើឱ្យម៉ាស៊ីនបោកសម្លៀកបំពាក់ Samsung AddWashTM ថ្មី នេះស័ក្តិសមនឹងគ្រួសារក៏ដូចជាស្ត្រីមេផ្ទះទៅហ្ន៎? ខ្ញុំហ៊ានធានាថាគ្រាន់តែ ៤ ចំណុចខាងក្រោមនេះគឺអាចឱ្យលោកអ្នកធ្វើការសម្រេចចិត្តដោយភាពជឿជាក់ក្នុងការជ្រើសរើសយកម៉ាស៊ីនបោកសម្លៀកបំពាក់នេះ៖
* ទ្វារបន្ថែម AddWash
គឺជាទ្វាតូចមួយដែលបានបំពាក់បន្ថែម ហើយវាមានតួនាទីក្នុងការជួយសម្រួលក្នុងការបន្ថែមខោអាវដែលភ្លេច ឬលោកអ្នកគ្រាន់តែចង់ថែមខោអាវនៅចន្លោះប្រតិបត្តិការណាមួយក៏បានគ្រប់ដំណាក់កាលពេលម៉ាស៊ីនកំពុងដំណើរការដោយគ្មានបញ្ហារអាក់រអួលឡើយ។
* បំពាក់បច្ចេកវិទ្យាវៃឆ្លាត Q-rator
ជួយឱ្យលោកអ្នកអាចបញ្ជា និងតាមដានបញ្ហានានាតាមរយៈស្មាតហ្វូនបានយ៉ាងងាយស្រួលបំផុតដូចជា៖ កំណត់ការបោកគក់, កំណត់ចំណាំមុខងារប្រើញឹកញាប់, បង្ហាញពេលវេលាដែលត្រូវលាងសម្អាតធុង និងតម្រង, តាមដានថាមពលជាដើម…។
* បច្ចេកវិទ្យាបំលែងសាប៊ូទៅជាពពុះសាប៊ូ (Eco BubbleTM)
ជាបច្ចេកវិទ្យាចុងក្រោយរបស់ សាមសុង ក្នុងការធ្វើឱ្យសាប៊ូទឹក ឬម្សៅសាប៊ូបោកគក់ក្លាយជាពពុះសុទ្ធទាំងអស់ហើយជ្រាបចូលសាច់ក្រណាត់សម្លៀកបំពាក់បានយ៉ាងល្អបំផុតដោយមិនបន្សល់កំណកសាប៊ូនៅលើសម្លៀកបំពាក់ និងមិនរួញខ្ញីវខ្ញូវឡើយ។
* បច្ចេកវិទ្យា Digital Inverter
អ្នកជំនាញជួយសន្សំសំចៃថាមពលបំផុត និងធ្វើឱ្យម៉ាស៊ីនស្ងាត់មិនមានសំឡេងរំខានដោយមានការធានាជូនរហូតដល់ 11 ឆ្នាំ!!
ចង់ជ្រាបឲ្យកាន់តែច្បាស់សូមអញ្ជើញទៅទស្សនាដោយផ្ទាល់នៅតាមបណ្តាហាងទំនើបសាមសុង និងដេប៉ូចែកចាយរបស់សាមសុងណាមួយដែលនៅជិតលោកអ្នកបំផុត ឬទំនាក់ទំនងតាមរយៈលេខ៖ 1800-203232 ឬទស្សនាតាម YouTube: https://youtu.be/vzqCinAzrYU ដើម្បីទទួលបានការបោកគក់កាន់តែទំនើប និងងាយស្រួល!
February 6, 2020
ស្រាបៀរ អាន់ឆ័រ រៀបចំព្រឹត្តិការណ៍បាល់ទះនារីលើឆ្នេរខ្សាច់ 2020 WOMEN’S FIVB WORLD TOUR ជាលើកដំបូងនៅខេត្តសៀមរាប
សៀមរាប–ថ្ងៃទី០៥ ខែកុម្ភៈ ឆ្នាំ២០២០៖ ការប្រកួតបាល់ទះនារីលើឆ្នេរខ្សាច់ដ៏កក្រើកប្រចាំឆ្នាំ២០២០(2020 WOMEN’S FIVB WORLD TOUR) នៃព្រឹត្តិការណ៍កីឡាបាល់ទះលើឆ្នេរខ្សាច់អន្តរជាតិលើកទី៣ ឆ្នាំ២០២០ របស់ស្រាបៀរ អាន់ឆ័រ (3^rd Anchor International Beach Volleyball Carnival 2020) បានរៀបចំឡើងយ៉ាងធំ និងអស្ចារ្យបំផុតជាថ្មីម្តងទៀតក្នុងទឹកដីប្រទេសកម្ពុជា ដោយចាប់ផ្តើមពីខេត្តសៀមរាបពីថ្ងៃទី០៥-០៩ ខែកុម្ភៈ ឆ្នាំ២០២០ (បាល់ទះផ្នែកនារី) និងរាជធានីភ្នំពេញពីថ្ងៃទី១៩-២៣ ខែកុម្ភៈ ឆ្នាំ២០២០ (បាល់ទះផ្នែកបុរស) ដោយមានក្រុមកីឡាករឆ្នើមៗរបស់កម្ពុជា និងអន្តរជាតិចូលរួមប្រកួតចំនួនដល់ទៅ ៤៨ក្រុម មកពី១៧ប្រទេសជុំវិញពិភពលោក។
ព្រឹត្តិការណ៍កីឡាបាល់ទះលើឆ្នេរខ្សាច់អន្តរជាតិលើកទី៣ ឆ្នាំ២០២០ របស់ស្រាបៀរ អាន់ឆ័រ នេះ ត្រូវបានរៀបចំឡើងដោយមានកិច្ចសហការគ្នារវាងស្ថាប័នល្បីល្បាញពីរគឺសហព័ន្ធកីឡាបាល់ទះអន្តរជាតិ (FIVB) និងសហព័ន្ធកីឡាបាល់ទះកម្ពុជា ក្នុងគោលបំណងចម្បងដើម្បីចូលរួមចំណែកអភិវឌ្ឍវិស័យកីឡាបាល់ទះនៅក្នុងកម្ពុជា និងជាឱកាសមួយសម្រាប់យុវជនដែលស្រឡាញ់កីឡាបាល់ទះបានបញ្ចេញសមត្ថភាព បទពិសោធន៍ និងពង្រឹងបច្ចេកទេសរបស់ខ្លួនក្នុងការលេងបាល់ទះផងដែរ។
លោក Oguz Demirgenci ប្រធានក្រុមបច្ចេកទេសនៃ FIVB បានមានប្រសាសន៍ថា៖ «ការដែលមានព្រឹត្តិការណ៍នេះជាប់លាប់នៅកម្ពុជា ពិតជាល្អ និងសំខាន់ណាស់ ព្រោះ ខ្ញុំមើលឃើញថា ព្រឹត្តិការណ៍នេះកាន់តែមានភាពល្អប្រសើរឡើងពីមួយឆ្នាំទៅមួយឆ្នាំ។ ទីតាំងនៃការប្រកួតទៀតសោតមានភាពស្រស់ស្អាត នេះក៏ដោយសារតែក្រុមហ៊ុន ស្រាបៀរ អាន់ឆ័រ និងសហព័ន្ធកីឡាបាល់ទះកម្ពុជាយកចិត្តទុកដាក់ចំពោះព្រឹត្តិការណ៍នេះ ដែលវាពិតជាមានសារសំខាន់ខ្លាំងណាស់ចំពោះ FIVB»។
លោកបន្តថា«យើងសប្បាយចិត្តណាស់នៅពេលដែលបាល់ទះលើឆ្នេរខ្សាច់ត្រូវបានពង្រីកជាបន្តបន្ទាប់នៅទ្វីបអាស៊ី ដែលវានឹងចូលរួមចំណែកយ៉ាងសំខាន់ក្នុងការជួយធ្វើឱ្យវិស័យកីឡានៅក្នុងពិភពលោកកាន់តែរីកចម្រើន។ ក្នុងនាម FIVB យើងសូមកោតសរសើរចំពោះក្រុមហ៊ុន ស្រាបៀរ អាន់ឆ័រ សហព័ន្ធកីឡាបាល់ទះកម្ពុជា និងព្រះរាជាណាចក្រកម្ពុជាសម្រាប់បដិសណ្ឋារកិច្ចដ៏ល្អ និងការងារដ៏អស្ចារ្យនេះ ហើយយើងសង្ឃឹមថានឹងបន្តរៀបចំព្រឹត្តិការណ៍ដ៏ជោគជ័យនេះនាពេលអនាគតទៀត»។
ទីលានប្រកួត Anchor International Beach Volleyball Carnival 2020 ត្រូវបានតុបតែងដោយឆ្នេរខ្សាច់ធម្មជាតិដ៏សែនស្រស់ស្អាតពិតៗគួរជាទីទាក់ទាញបំផុត។ នៅជុំវិញទីលានប្រកួត មានការរៀបចំកៅអីអង្គុយ និងមានការដាក់តាំងលក់ស្រាបៀរអាន់ឆ័រ ដើម្បីឲ្យអ្នកចូលរួមទស្សនា បានពិសាស្រាបៀរអាន់ឆ័របណ្តើរ ទស្សនាបណ្តើរប្រៀបដូចជាកំពុងអង្គុយនៅមាត់សមុទ្រពិតៗយ៉ាងដូច្នេះដែរ។
សូមជម្រាបថា សម្រាប់ការប្រកួតវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រនៃព្រឹត្តិការណ៍បាល់ទះនារីលើឆ្នេរខ្សាច់ 2020 WOMEN’S FIVB WORLD TOUR ក៏មានការផ្សាយផ្ទាល់នៅលើកញ្ចក់ទូរទស្សន៍ MYTV ទំព័រហេ្វសប៊ុករបស់ស្រាបៀរអាន់ឆ័រhttps://www.facebook.com/AnchorBeerKH/ និងគេហទំព័រYouTube របស់FIVB https://www.youtube.com/channel/UCHQUWveEpeO1KTkwbDn6jNA
ផងដែរ។
សូម ត្រៀមខ្លួនទទួលយកនូវបទពិសោធន៍ថ្មីមួយទៀតនៃការលេងបាល់ទះលើឆ្នេរខ្សាច់របស់ស្រាបៀរអាន់ឆ័រក្នុងកម្មវិធី Anchor International Beach Volleyball Carnival 2020។
ស្រាបៀរ អាន់ឆ័រ ជាស្រាបៀរដែលពេញនិយមបំផុតសម្រាប់យុវវ័យសម័យថ្មី គុណភាពខ្ពស់ស្តង់ដារអន្តរជាតិ ដែលឈ្នះពានរង្វាន់ផ្នែកគុណភាពជាបន្តបន្ទាប់សរុបជាង ៣០ មេដាយ រសជាតិស្រទន់លើសគេ ផ្តល់នូវអារម្មណ៍រីករាយស្រស់ថ្លា ស័ក្តិសមបំផុតសម្រាប់គ្រប់ទីកន្លែង គ្រប់កម្មវិធី។
រីករាយស្រស់ថ្លា ចាប់ផ្តើមជាមួយស្រាបៀរ អាន់ឆ័រ!
ពិសាស្រាបៀរ អាន់ឆ័រ ដោយការទទួលខុសត្រូវ៕
February 5, 2020
ហាង Travel Hub ថ្មីៗនឹងជួយឱ្យអ្នកទេសចរណ៍កម្ពុជាអាចរៀបចំផែនការដំណើរកំសាន្ដបានកាន់តែងាយស្រួល
ហាងលក់សម្ភារៈសម្រាប់ដំណើកម្សាន្ដថ្មី «ដែលមានផលិតផលសម្បូរបែប» នៅរាជធានីភ្នំពេញ ក្រុងសៀមរាប និងក្រុងព្រះសីហនុ នឹងជួយឲ្យអ្នកទេសចរណ៍កម្ពុជាអាចរៀបចំផែនការដំណើរកម្សាន្ដរបស់ខ្លួន បានកាន់តែងាយស្រួល តាមរយៈការផ្តល់ជូននូវផលិតផលជាច្រើនម៉ាកដ៏សម្បូរបែបដែលមានគុណភាពខ្ពស់ដូចជា Lojel និង Victorinox ស្ថិតក្រោមដំបូលហាងតែមួយ។
Travel Hub ដែលមានហាងចំនួន២ទីតាំងរួចជាស្រេចនៅរាជធានីភ្នំពេញ នាផ្សារទំនើបអ៊ីអន ភ្នំពេញ និងអ៊ីអន សែនសុខ នឹងចាប់ផ្តើមបើកសាខាថ្មីៗរបស់ខ្លួននាពេលឆាប់ៗនេះ នៅក្រុងសៀមរាប និងក្រុងព្រះសីហនុ ដើម្បីជាផ្នែកមួយនៃការពង្រីកសាខាទូទាំងប្រទេសរបស់ខ្លួន ដែលនឹងមានហាងចំនួន៩សាខា នៅត្រឹមចុងឆ្នាំនេះ។
ហាង Central Mall ដែលស្ថិតនៅក្បែរផ្សារធំថ្មី ក៏នឹងត្រូវប្តូរឈ្មោះទៅជាហាង Travel Hub មួយផងដែរ ដើម្បីបង្កើតឲ្យមានបណ្តាញហាងទូទាំងទីក្រុង ដែលលក់ផលិតផលប្រកបដោយគុណភាពខ្ពស់ ដូចជា វ៉ាលី សម្ភារៈផ្សេងៗសម្រាប់ធ្វើដំណើរ និងសម្លៀកបំពាក់សម្រាប់ការធ្វើដំណើរទៅក្រៅទីក្រុង ជាដើម។
Travel Hub គឺជាកម្មសិទ្ធិរបស់ក្រុមហ៊ុន Campore Group ហើយលោក David Ghani ដែលជាប្រធានក្រុមហ៊ុននេះ បានបញ្ជាក់ថា៖ «ចំណុចដែលធ្វើឲ្យ Travel Hub មានលក្ខខណៈពិសេសជាងគេនោះ គឺការដែលយើងផ្ដល់ជូនអតិថិជននូវផលិតផល ម៉ាកយីហោល្បីៗ ដែលមានគុណភាពខ្ពស់ជាច្រើនជម្រើស ក៏ដូចជាការផ្ដល់ជូនពួកគាត់នូវអ្នកឯកទេសដែលអាចជួយផ្ដល់យោបល់ជូនដល់អ្នកដំណើរដ៏ឆ្លាតវៃរបស់កម្ពុជា ដែលស្វែងរកផលិតផលធ្វើដំណើរដែលពួកគាត់អាចជឿទុកចិត្តបាន»។
លោក David Ghani បានប្រាប់បន្តថា៖ «មនុស្សភាគច្រើន តែងមានអារម្មណ៍រំភើបខ្លាំង នៅពេលដែលពួកគាត់ររៀបចំផែនការដំណើរកម្សាន្ដរបស់គាត់។ នោះហើយគឺជាមូលហេតុដែល Travel Hub ដាក់ពាក្យស្លោកថា «កន្លែងដែលការធ្វើដំណើររបស់អ្នកចាប់ផ្តើម»។ សូម្បីតែនៅមុនពេលដែលអ្នកចេញដំណើរ Travel Hub នឹងផ្តល់ដំបូន្មាន និងសេវាល្អៗបំផុតជាច្រើន ពីហាងដ៏ចំណានរបស់យើង ដែលមានលក់នូវផលិតផលធ្វើដំណើរដ៏មានប្រជាប្រិយភាពបំផុត និងមានយីហោល្បីៗដ៏គួរឲ្យទុកចិត្តជាច្រើន ទូទាំងពិភពលោក»។
យីហោល្បីៗជាច្រើនដែលហាង Travel Hub កំពុងតែលក់នាពេលបច្ចុប្បន្ន រួមមាន វ៉ាលី មកពីក្រុមហ៊ុន The North Face, Lojel, Victorinox, Wenger, Hideo Wakamatsu និង PacSafe។ សម្ភារៈបន្ទាប់បន្សំជាច្រើនដែលផ្តល់ជូននៅហាង Travel Hub រួមមាន ឧបករណ៍ភ្ជាប់បណ្តាញ (Adaptor) ខ្នើយធ្វើដំណើរ ឧបករណ៍ចល័ត និងកាបូបជាច្រើនប្រភេទមកពីយីហោល្បីៗជាច្រើន ដូចជា Travel Blue, Cabeau, Be Relax និង Lexingham។ ជាមួយគ្នានេះ ហាងក៏មានលក់សម្លៀកបំពាក់សម្រាប់ការធ្វើដំណើរចេញក្រៅពីទីក្រុងពីក្រុមហ៊ុន 5.11 ផងដែរ ដែលសាកសមសម្រាប់អ្នកដែលចូលចិត្តផ្សងព្រេង។
លោក David Ghani បានបញ្ជាក់ថា៖ «Travel Hub មានគោលបំណងចង់ផ្តល់ឲ្យអតិថិជនរបស់យើងជាមួយនឹងសម្លៀកបំពាក់ សម្ភារៈបន្ទាប់បន្សំ កាបូប និងវ៉ាលី ដែលអាចជឿទុកចិត្តបានបំផុត ជាពិសេសរាល់សម្ភារៈទាំងអស់ដែលអ្នកដំណើរម្នាក់អាចនឹងត្រូវការដើម្បីបន្តធ្វើដំណើរកម្សាន្ត ទិញឥវ៉ាន់ ទៅកាន់ទីក្រុងបាងកក ឬសម្រាប់ការសម្រាកវិស្សមកាលបែបផ្សងព្រេងជាងនេះ នៅតាមជួរភ្នំក្រវាញ ក៏បាន។ ជម្រើសវ៉ាលីដ៏សម្បូរបែប នៅហាង Travel Hub ផ្តល់ជូនជាមួយនឹងការធានាលើគុណភាពផលិតផលរហូតដល់រយៈពេល១០ឆ្នាំ ដើម្បីផ្តល់ជំនឿទុកចិត្តទៅកាន់អតិថិជនរបស់យើង»។
ហាង Travel Hub នៅខេត្តសៀមរាប ត្រូវបានរំពឹងទុកថា នឹងបើកជាផ្លូវការនៅពាក់កណ្តាលខែកុម្ភៈ ខណៈដែលសាខានៅក្រុងព្រះសីហនុ ត្រូវបានរំពឹងទុកថា នឹងបើកដំណើរការនៅដើមខែមីនា។
លោក Ghani បានឲ្យដឹងថា ទីតាំងរបស់សាខាថ្មីទាំងនេះ ក៏នឹងឆ្លើយតបទៅនឹងការកើនឡើងរបស់ភ្ញៀវទេសចរណ៍បរទេសដែលមកទស្សនកិច្ចនៅកម្ពុជា ផងដែរ រួមជាមួយនឹងការផ្តល់ជូនតម្លៃដ៏ប្រកួតប្រជែង បើធៀបទៅនឹងប្រទេសផ្សេងទៀតក្នុងតំបន់ និងការជឿជាក់សម្រាប់អតិថិជន ទៅលើការទិញផលិតផលពិតមិនក្លែងក្លាយ ពីហាងលក់រាយប្រកបដោយកេរិ៍្តឈ្មោះមួយ។
ស្របពេលដែលប្រាក់ចំណូលរបស់ប្រជាជនកម្ពុជា មានការកើនឡើង តម្រូវការនៃការធ្វើដំណើរក៏កើនឡើងផងដែរ ខណៈដែលកំណើនអ្នកធ្វើដំណើរទៅក្រៅប្រទេស កើនឡើងប្រមាណជា ១៥% ក្នុង១ឆ្នាំ ក្នុងរយៈពេល៥ឆ្នាំចុងក្រោយនេះ ហើយជាមួយគ្នានេះ វិស័យទេសចរណ៍ក្នុងស្រុកក៏កើនឡើងឥតឈប់ឈរផងដែរ។ នេះយោងទៅតាមស្ថិតិរបស់ក្រសួងទេសចរណ៍៕

February 4, 2020
គំនូរវិចិត្រសិល្បៈនៃសរសៃសូត្រឈូក «Monochrome » កំពុងតាំងបង្ហាញនៅក្នុងសណ្ឋាគារសូហ្វីតែលភ្នំពេញភូគីត្រា
គំនូរតាំងពិព័រណ៍របស់សិល្បករដែលមានទេពកោសល្យខ្ពស់ គឺលោក Morrison POLKINGHORNE នឹងត្រូវដាក់បង្ហាញជូននៅសណ្ឋាគារសូហ្វីតែលភ្នំពេញភូគីត្រា ចាប់ពីខែកុម្ភៈដល់ខែមេសាឆ្នាំ ២០២០ ដែលជាទម្រង់សិល្បៈគំនូរមួយប្លែក គូរឡើងពីសរសៃសូត្រឈូក។
សណ្ឋាគារសូហ្វីតែលភ្នំពេញភូគីត្រានឹងបើកការតាំងពិព័រណ៍ថ្មីមួយទៀតក្រោមចំណងជើងថា «Khmer Impressions» ដោយវិចិត្រករជនជាតិអូស្ត្រាលីរូបនេះ ដែលលោកសព្វថ្ងៃកំពុងស្នាក់នៅខេត្តបាត់ដំបង។ ការតាំងពិព័រណ៍នេះនឹងប្រព្រឹត្តិទៅរយៈពេល ៣ ខែ ចាប់ផ្តើមពីខែកុម្ភៈដល់ខែមេសា ២០២០ នៅក្នុងវិចិត្រសាលសណ្ឋាគារ។
លោក Morrison POLKINGHORNE វិចិត្រករជនជាតិអូស្ត្រាលីមានទេពកោសល្យសិល្បៈប្លែកដោយលោកយកដើមឈូកជាជក់ ហើយចុចម្តងមួយៗទៅលើផ្ទាំងគំនូរ និង ប្រើប្រាស់ជ័រឈូកជាថ្នាំ។ សិល្បៈគំនូរប្រភេទនេះត្រូវបានគេឱ្យឈ្មោះថា Monochrome ដែលជាប្រភេទសិល្បៈដ៏កំរមួយ មានដើមកំណើតយូយារណាស់មកហើយនៅ នៅប្រទេសចិន និង ជប៉ុន។
ដោយផ្កាឈូកជានិមិត្តរូបនៃភាពស្រស់ស្អាត និង ភាពបរិសុទ្ធ ផ្កាឈូកត្រូវបានគេបូជាថ្វាយព្រះក្នុងព្រះពុទ្ធសាសនា។ ដោយក្តីស្រឡាញ់ផ្កាឈូកខ្លាំងលោក Morrison បានរៀបរាប់ដូចខាងក្រោមនេះថា៖ «ដោយមានការរជំរុញទឹកចិត្តពីធម្មជាតិដ៏ស្រស់បំព្រងនៃផ្កាឈូក ខ្ញុំបានយកដើមឈូកធ្វើជាជក់ ចំណែកឯផ្កា ខ្ញុំយកធ្វើជាពណ៌។ ស្រដៀងគ្នាដែរនឹង ការប្រើប្រាស់ជក់ និង ទឺកថ្នាំខ្មៅដែលជាសិល្បៈរបស់ជនជាតិចិនបុរាណ ការគូសវាសមួយៗតម្រូវឱ្យមានការផ្ចិតផ្ចង់ និង ស្អាត ដោយការប្រើពណ៌ស្រាល ឬ ធ្ងន់ ត្រូវធ្វើទៅតាមរូបភាពនិមួយៗ ផ្សេងៗគ្នា។ ស្នាដៃនេះឆ្លុះបញ្ចាំងអំពីប្រទេសកម្ពុជាជាច្រើន ដូចជាប្រព័ន្ធផ្លូវទឹកដែលជាសរសៃឈាមសេដ្ឋកិច្ចរបស់ជាតិ សសរនៃប្រាសាទអង្គរវត្តតំណាងឱ្យសម្បត្តិវប្បធម៌ និង ទេសភាពនៃជួរភ្នំ ដែលបង្ហាញអំពីទេសភាពដ៏ស្រស់បំព្រង»។
សូមជម្រាបថា គ្រប់ផ្ទាំងគំនូរទាំងអស់របស់លោក Morrison POLKINGHORNE សុទ្ធតែបានចុះហត្ថលេខាផ្ទាល់ពីលោក ដោយអមជាមួយនឹងចំនួនចុចៗនៃដើមឈូកដែលបានផ្តិតនៅលើផ្ទាំងគំនូរទាំងនោះផងដែរ។ សរុបមកដល់ពេលនេះ លោកបានផ្តិលស្នាមដើមឈូកនោះរហូតដល់ 132,383 រួចមកហើយ។ ប្លែកនិងពិសេសសម្រាប់ការតាំងពិព័រណ៍លោកនេះនៅសណ្ឋាគារសូហ្វីតែលភ្នំពេញភូគីត្រា លោក Morrison បានបង្កើតស៊ុមដែកស្រោបលើបន្ទះក្តារ ដោយធ្វើឡើងដោយលោក សូត្រ រតនា៕

February 4, 2020
ព្រឹត្តិការណ៍ Tiger Street Football 2020 ក្រុម The Forest FC គ្រងតំណែងជើងឯកមណ្ឌលបាត់ដំបង
ខេត្តបាត់ដំបង៖ ក្រុម The Forest FC បានក្លាយជាជើងឯកមណ្ឌលបាត់ដំបង បន្ទាប់ពីយកឈ្នះក្រុមបាល់ទាត់ FC CROWN (A) ប្រផិតប្រផើយក្នុងលទ្ធ២ទល់១វគ្គផ្តាច់ព្រ័ត្រ ការប្រកួត Tiger Street Football 2020 កាលពីថ្ងៃទី២ ខែកុម្ភៈ នៅទីលានកីឡដ្ឋាន វាលបែកចាន ក្រុងបាត់ដំបង ខេត្តបាត់ដំបង ។
កីឡាករ វុធ ដេវីត ប្រធានក្រុម The Forest FC បានលើកឡើងថា ការគ្រងតំណែងជើងឯកលើកទី១នេះវាជាមោទនៈភាពមួយសម្រាប់ក្រុម The Forest FC ខណៈ២លើកកន្លងមក បានត្រឹមលេខ៤ប៉ុណ្ណោះ។ ការគ្រងតំណែងជើងឯកលើកដំបូងនេះ ប្រធានក្រុម The Forest FC បានប្តេជ្ញាចិត្តខិតខំហ្វឹកហាត់ពង្រឹងសមត្ថភាពក្រុមបន្ថែមទៀត ដើម្បីលេងឲ្យស៊ីសង្វាក់គ្នានៅវគ្គ ផ្តាច់ព្រ័ត្រនៅរាធានីភ្នំពេញ ឈានទៅក្រសោបតំណែងជើងឯក Tiger Street Football 2020 លើកមុខមាត់ខេត្តបាត់ដំបង។
សម្រាប់ជ័យលាភីមណ្ឌលបាត់ដំបងនេះ ដែលជាមណ្ឌលទី៤ ក្រុមដែលប្រជែងបានចំណាត់ថ្នាក់លេខ១ The Forest FC ទទួលបានថវិការ ១៥០០ ដុល្លារ ក្រុមលេខ២បានទៅលើ FC CROWN (A) ទទួលបានថវិការ ១០០០ ដុល្លារ ចំណាត់ថ្នាក់លេខ៣ បានទៅលើក្រុម Norea Team ទទួលបានថវិការ ៥០០ ដុល្លារ និងលេខ៤បានទៅលើក្រុម យុវជនដាំស្ពៃ ទទួលបានថវិការ ២០០ ដុល្លារ។
ព្រឹត្តិការណ៍ Tiger Street Football 2020 មណ្ឌលបាត់ដំបង ដែលជាមណ្ឌលទី៤នេះ ជ្រើសរើសយក១០ក្រុមឡើងទៅប្រកួតវគ្គផ្តាច់ព្រ័ត្រ នាថ្ងៃទី២៩ ខែកុម្ភះ ដល់ថ្ងៃទី១ ខែមិនា ឆ្នាំ២០២០ នៅរាជធានីភ្នំពេញ។ ក្រុមដែលគ្រងដំណែងជើងឯក Tiger Street Football 2020 និងមានឱកាសជួបផ្ទាល់ជាមួយ លោក Rio Ferdinand ផងដែរ។
បន្ទាប់ពីបញ្ចប់មណ្ឌលបាត់ដំបង ដែលជាមណ្ឌលទី៤នេះ មណ្ឌលបន្ទាប់ គឺមណ្ឌលកំពង់ចាម ដែលមាន៦ខេត្តចូលរួម គឺស្ទឹងត្រែង រតនគិរី មណ្ឌលគិរី ក្រចេះ ព្រៃវែង ស្វាយរៀង ដាក់ពាក្យនៅមណ្ឌលខេត្តកំពង់ចាម ប្រកួតថ្ងៃទី៨ ដល់ ថ្ងៃទី៩ ខែកុម្ភៈ ឆ្នាំ២០២០។
សូមបញ្ជាក់ថា ព្រឹត្តិការណ៍ Tiger Street Football 2020 បន្ទាប់ពីមណ្ឌលទី៥ មណ្ឌលកំពង់ចាម និងបន្តទៅមណ្ឌលទី៦ មណ្ឌលខេត្តកំពត ដែលមាន៤ខេត្តចូលរួម គឺព្រះសីហនុ កែប កោះកុង និងកំពតម្ចាស់ផ្ទះ ដំណើរការប្រកួតនៅថ្ងៃទី១៥ ដល់ ថ្ងៃទី១៦ ខែកុម្ភៈ ឆ្នាំ២០២០៕
ស្តែងចេញនូវការតាំងចិត្តដ៏មោះមុតរបស់អ្នក ជាមួយស្រាបៀរថៃហ្គ័រ។
ពិសាដោយការទទួលខុសត្រូវ៕
February 4, 2020