ពួកគេត្រឡប់មកជាមួយជីវិតថ្មីដែលស្រស់បំព្រងពោរពេញដោយក្តីសង្ឃឹមឡើងវិញ
រាជធានីភ្នំពេញ ថ្ងៃទី១៧ ខែធ្នូ ឆ្នាំ២០១៨៖ កុមារកម្ពុជាដែលគ្មានលទ្ធភាពចំនួន ៧នាក់ បានវិលត្រឡប់មកដល់ប្រទេសកម្ពុជាវិញហើយ បន្ទាប់ពីពួកគេទទួលបានការវះកាត់ព្យាបាលជំងឺបេះដូងពីកំណើតដោយជោគជ័យនៅមន្ទីរពេទ្យបំរ៉ុងរ៉ាត់ប្រទេសថៃ ស្ថិតក្រោមគម្រោងសប្បុរសធម៌ព្យាបាលជំងឺបេះដូងនៅកម្ពុជា។
គម្រោងសប្បុរសធម៌ព្យាបាលជំងឺបេះដូងនៅកម្ពុជា ជាគម្រោងមួយដែលត្រូវបានបង្កើតឡើងក្នុងគោលបំណងដើម្បីប្រើប្រាស់ជំនាញឯកទេស និងធនធានផ្ទាល់របស់មន្ទីរពេទ្យបំរ៉ុងរ៉ាត់ដើម្បីផ្តល់ការវះកាត់ព្យាបាលជំងឺបេះដូងពីកំណើតដោយឥតគិតថ្លៃជូនដល់កុមារដែលគ្មានលទ្ធភាពក្នុងបណ្តាប្រទេសជិតខាង។
នៅក្នុងប្រទេសកម្ពុជា គម្រោងនេះជាកិច្ចសហប្រតិបត្តិការគ្នារវាងមូលនិធិមន្ទីរពេទ្យ បំរ៉ុងរ៉ាត់ និងមន្ទីរពេទ្យ អន្តរជាតិ បំរ៉ុងរ៉ាត់ រួមជាមួយនឹងស្ថានទូតព្រះរាជាណាចក្រថៃប្រចាំនៅ ព្រះរាជាណាចក្រកម្ពុជា សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) មន្ទីរពេទ្យកាល់ម៉ែត និងក្រុមហ៊ុនអាកាសចរណ៍ ថៃ អ៊ែរ អេស៊ា។
បន្ទាប់ពីកូនរបស់គាត់ទទួលបានជោគជ័យក្នុងការវះកាត់ ឪពុកម្តាយរបស់កុមារម្នាក់បានបង្ហាញនូវសេចក្តីរំភើប រីករាយ ដែលរកអ្វីមកប្រៀបផ្ទឹមពុំបាន ហើយបាននិយាយឲ្យដឹងថា «ខ្ញុំពិតជាសប្បាយចិត្ត និងត្រេកអរមែនទែន នៅពេលដែលខ្ញុំបានឃើញគាត់មានសុខភាពល្អ និងស្រស់ស្រាយជាងពេលដែលគាត់ឈឺ និងមានសភាពធម្មតាបន្ទាប់ពីការវះកាត់រួច។ ក្នុងនាមជាឪពុកម្តាយ ពិតជារកអ្វីមកប្រដូចមិនបានឡើយ ពេលឃើញកូនមានសុខភាពល្អ ហើយជាសះស្បើយពីជំងឺ គិតទៅដូចបានទទួលនូវជីវិតថ្មីដូចេះ្នដែរ»
ឪពុកម្តាយរបស់អ្នកជំងឺក៏បានសង្កត់ធ្ងន់អំពីសេវាកម្ម និងវេជ្ជបណ្ឌិតនៃមន្ទីរពេទ្យដែលកូនរបស់ពួកគាត់បានសម្រាកព្យាបាលផងដែរ។ ពួកគាត់និយាយថា មន្ទីរពេទ្យនេះ គឺល្អណាស់។ វេជ្ជបណ្ឌិត និងគិលានុបដ្ឋាកទាំងអស់ តែងតែបានយកចិត្តទុកដាក់ចំពោះអ្នកជំងឺ ហើយតែងតែផ្លាស់ប្តូរវេនគ្នាប្រចាំការ ដើម្បីតាមដានស្ថានភាពអ្នកជំងឺគ្រប់ពេលវេលា។
«ពិតជាល្អណាស់! ទាំងសេវាកម្ម ថ្នាំពេទ្យ បរិក្ខារពេទ្យ និងទាំងបរិយាកាសនៅក្នុងមន្ទីរពេទ្យ។ ចំពោះគ្រូពេទ្យវិញ ពួកគាត់មានភាពរួសរាយរាក់ទាក់ មានការសន្តោស ហើយឧស្សាហ៍មកត្រួតពិនិត្យសុខភាពកូនខ្ញុំជាប់ជានិច្ច ដោយខ្លាចកូនខ្ញុំគាត់មិនសូវស្រួល និងយកចិត្តទុកដាក់ដល់អ្នកជំងឺ មិនថាពេលថ្ងៃ ឫពេលយប់នោះទេ។ ចំណែកឯការស្នាក់នៅ និងការហូបចុកសម្រាប់ពួកខ្ញុំក្នុងអំឡុងពេលនៅទីនោះវិញ និយាយទៅពិតជាល្អមែនទែន»
ក្នុងរយៈពេលប៉ុន្មានឆ្នាំមកនេះ មូលនិធិមន្ទីរពេទ្យបំរ៉ុងរ៉ាត់ និងមន្ទីរពេទ្យ អន្តរជាតិ បំរ៉ុងរ៉ាត់ បានពង្រីកគម្រោងសប្បុរសធម៌មួយនេះ ដើម្បីជួយដល់កុមារដែលគ្មានលទ្ធភាពនៅតាមបណ្តាប្រទេសជិតខាងជាច្រើនដូចជា៖ ប្រទេស មីយ៉ាន់ម៉ា និងវៀតណាមជាដើម ហើយឆ្នាំនេះ បានធ្វើឡើងនៅក្នុងប្រទេសកម្ពុជា។ ចាប់តាំងពីឆ្នាំ២០០៣មក គម្រោងមួយនេះបានជួយដល់អ្នកជំងឺបានជាង៧៨២នាក់រួចមកហើយនៅក្នុងប្រទេសថៃ ដើម្បីឲ្យពួកគេទទួលបានការព្យាបាល ហើយធ្វើឲ្យពួកគេមានជីវិតស្រស់បំព្រងពោរពេញទៅដោយក្តីសង្ឃឹមសារជាថ្មីឡើងវិញ។
តាមរយៈក្តីសន្តោស និងការយកចិត្តទុកដាក់បំផុតពីក្រុមគ្រូពេទ្យ និងម្ចាស់ជំនួយទាំងអស់ ឳពុកម្តាយរបស់កុមារបានលើកឡើងថា «ក្នុងនាមជាប្រជាជនកម្ពុជា យើងសូមថ្លែងអំណរគុណ និងសម្តែងនូវការដឹងគុណយ៉ាងជ្រាលជ្រៅជាទីបំផុត ចំពោះក្រុមវេជ្ជបណ្ឌិត និងគិលានុបដ្ឋាក និងដៃគូទាំងអស់នៃមូលនិធិនេះ ជាពិសេសមូលនិធិមន្ទីរពេទ្យបំរ៉ុងរ៉ាត់ និងមន្ទីរពេទ្យអន្តរជាតិ បំរ៉ុងរ៉ាត់ ដែលបានទទួលយកកូនរបស់ខ្ញុំ និងកុមារដទៃទៀត ដើម្បីព្យាបាលវះកាត់ជំងឺបេះដូងពីកំណើត និងថែទាំដោយឥតគិតថ្លៃ ជាពិសេសសម្រាប់ការចំណាយផ្សេងៗ និងការស្នាក់នៅក្នុងមន្ទីរពេទ្យ។ នេះជាជំនួយដ៏ធំសម្រាប់ប្រជាជនកម្ពុជា»៕
