(សហរដ្ឋអាម៉េរិក)-Austin Bellamy អាយុ ២០ ឆ្នាំ រស់នៅក្នុងរដ្ឋ Ohio បានបាត់បង់ស្មារតី និងត្រូវប្រើប្រាស់ម៉ាស៊ីនជំនួយដង្ហើម ក្រោយពីត្រូវឃ្មុំពិឃាតអាហ្វ្រិកទិចនៅពេលកំពុងឆ្ការមែនឈើ។
Austin Bellamy បានកាប់ចំមែនឈើដែលមានសំបុកឃ្មុំពិឃាតអាហ្វ្រិក ពេលកំពុងត្រួសមែនឈើនៅក្នុងតំបន់ Cincinnati រដ្ឋ Ohio សហរដ្ឋអាម៉េរិក ភ្លាមនោះស្រាប់តែត្រូវហ្វូងឃ្មុំឡោមព័ទ្ធ និងទិចយ៉ាងដំណំកាលពីល្ងាចថ្ងៃទី ៣០ សីហា។ នេះបើតាមសារព័ត៌មាន AFP ដកស្រង់ព័ត៌មានពីទំព័ររៃអង្គាសប្រាក់របស់អ្នកស្រី Shawna Carters ដែលត្រូវជាម្ដាយជនរងគ្រោះ។
លោកយាយរបស់ Austin Bellamy រៀបរាប់ប្រាប់ថា «ពេលចៅខ្ញុំកាប់ចំបែកឈើ ហ្វូងឃ្មុំក៏បានហោះចេញ គេព្យាយាមបាំងបិទប៉ុន្តែមិនអាច។ ចៅខ្ញុំស្រែកឱ្យជួយ ប៉ុន្តែមិនមានអ្នកណាអាចជួយបាន»។
អ្នកផ្ទះរបស់ Austin Bellamy ដែលនៅខាងក្រោមដើមឈើ មិនអាចជួយជនរងគ្រោះបាន ព្រោះថា ពួកគេក៏ត្រូវឃ្មុំទិចដូចគ្នា។
ឃ្មុំពិឃាតអាហ្វ្រិក នៅ សហរដ្ឋអាម៉េរិកអ្នកស្រី Carters បានឱ្យដឹងថា Bellamy ត្រូវឃ្មុំទិចប្រហែល ២ ម៉ឺនទ្រនិច ក្នុងនោះមានប្រហែល ៣០ ទ្រនិចនៅក្នុងមាត់ ធ្វើឱ្យក្រុមវេជ្ជបណ្ឌិតត្រូវចំណាយពេលពេញ ១ ថ្ងៃ ទើបដកយកទ្រនិចចេញអស់។
អ្នកស្រី Carters បានថ្លែងអំណរគុណដល់ក្រុមពន្លត់អគ្គិភ័យដែលបានជួយសង្គ្រោះកូនរបស់គាត់ និងនាំទៅសង្គ្រោះបន្ទាន់។ ក្រុមវេជ្ជបណ្ឌិតនិយាយថា Bellamy នឹងបានជាសះស្បើយឡើងវិញមិនខាន។
ឃ្មុំពិឃាតអាហ្វ្រិក គឺជាប្រភេទឃ្មុំល្បីឈ្មោះនៅ សហរដ្ឋអាម៉េរិក ដោយសារតែ «ចរិតកោងកាច» របស់ពួកវា។ នៅពេលសំបុករបស់ពួកវារងការគំរាមកំហែង ហ្វូងឃ្មុំនៅក្នុងសំបុក និងនៅក្រៅសំបុក នឹងហោះសម្រុកចេញវាយប្រហារលើអ្នកឈ្លានពាន៕
