អន្តរជាតិ - La Reine Media

ព្រះអង្គម្ចាស់ Charles ក្លាយជាមហាក្សត្រថ្មីរបស់ ចក្រភពអង់គ្លេស

ព្រះអង្គម្ចាស់ Charles ព្រះជន្ម ៧៣ ព្រះវស្សា រាជទាយាទអង់គ្លេស ក្លាយជាមហាក្សត្រ Charles ទី ៣ របស់ ចក្រភពអង់គ្លេស ក្រោយពីព្រះមាតារបស់ទ្រង់ គឺមហាក្សត្រី Elizabeth ទី ២ បានយាងចូលទិវង្គត។

Clarence House ដែលជារាជដំណាក់របស់ព្រះអង្គម្ចាស់ Charles កាលពីថ្ងៃទី ០៨ កញ្ញា បានបញ្ជាក់ថា ព្រះអង្គម្ចាស់ Charles នឹងក្លាយជាមហាក្សត្រ Charles ទី ៣ ដែលផ្ទុយពីពាក្យចចាមអារ៉ាមកន្លងមកដែលថា ព្រះអង្គនឹងប្រើប្រាស់ព្រះរាជឋានៈផ្សេង។ ព្រះអង្គម្ចាស់ Charles នឹងត្រូវបានប្រកាសជាផ្លូវការថាជា មហាក្សត្រ នៅក្នុងវិមាន St James’s នាទីក្រុងឡុងដ៍ នៅពេលឆាប់ៗខាងមុខ។

ក្រោយប្រកាសរបស់រាជដំណាក់ខាងលើ ព្រះអង្គម្ចាស់ Charles ក៏បានចេញប្រកាសស្ដីពីការយាងចូលទិវង្គតរបស់មហាក្សត្រី Elizabeth ទី ២។

ព្រះអង្គម្ចាស់ Charles ទី ៣ ប្រសូត្រនៅថ្ងៃទី ១៤ វិច្ឆិកា ១៩៤៨ នៅក្នុងរាជវាំង Buckingham។ ព្រះអង្គគឺជារាជបុត្រាច្បងរបស់មហាក្សត្រី Elizabeth ទី ២ ជាមួយនឹងព្រះអង្គម្ចាស់ Philip។ ឆ្នាំ ១៩៥២ នៅពេលមហាក្សត្រី Elizabeth ទី ២ គ្រងរាជបន្តពីព្រះបីតា ព្រះអង្គម្ចាស់ Charles ក៏បានក្លាយជារាជទាយាទនៅពេលមានព្រះជន្មបាន ៣ វស្សា។

កាលពីថ្ងៃទី ២៩ កក្កដា ១៩៨១ ព្រះអង្គម្ចាស់ Charles បានរៀបអភិសេកជាមួយព្រះនាង Diana Spencer។ ព្រះអង្គមានបុត្រា ២ អង្គ គឺ William ប្រសូត្រឆ្នាំ ១៩៨២ និង Harry ប្រសូត្រក្នុងឆ្នាំ ១៩៨៤។

ខែធ្នូ ១៩៩២ ព្រះអង្គម្ចាស់ Charles និងព្រះនាង Diana ប្រកាសលែងលះជាមួយគ្នា ហើយបានលែងលះជាផ្លូវការក្នុងឆ្នាំ ១៩៩៦។ មួយឆ្នាំក្រោយមក ព្រះនាង Diana និងមិត្តប្រុស Dodi Fayed បានបាត់ជីវិតក្នុងករណីគ្រោះថ្នាក់ចរាចរណ៍រថយន្តនៅ បារីស នៅពេលព្យាយាមគេចពីក្រុមអ្នកប្រមាញ់រូបថត។

ឆ្នាំ ២០០៥ ព្រះអង្គម្ចាស់ Charles បានរៀបអភិសេកជាមួយ Camilla Parker Bowles នៅ Windsor Guildhall។ តាមទម្លាប់ នៅពេលរាជទាយាទ Charles ឡើងគ្រងរាជសម្បត្តិ Camilla នឹងត្រូវបានតែងតាំងជាអគ្គមហេសី ដែលជាឋានៈខ្ពស់ជាងគេបង្អស់សម្រាប់មហេសីស្ដេច។ ប៉ុន្តែ ដោយសាររាជវង្សអង់គ្លេស មុននោះ នៅមានការបារម្ភអំពីប្រតិកម្មរបស់សាធារណជន ទើបមានពាក្យចចាមអារ៉ាមថា ព្រះនាង Camilla នឹងប្រើតែឋានៈជាស្នមឯក ឬមហេសីប៉ុណ្ណោះ មិនមែនអគ្គមហេសីឡើយ។

កាលពីដើមឆ្នាំនេះ មហាក្សត្រី Elizabeth ធ្លាប់មានបន្ទូលថា ចង់ឃើញបុត្រីសុណិសា (កូនប្រសាស្រី) Camilla របស់ទ្រង់ ទទួលបានរាជឋានៈជាអគ្គមហេសី នៅពេលព្រះអង្គម្ចាស់ Charles ឡើងគ្រងរាជសម្បត្តិ៕

September 9, 2022

មហាក្សត្រីអង់គ្លេស Elizabeth II នៃចក្រភពអង់គ្លេស យាងចូលទិវង្គតក្នុងព្រះជន្ម ៩៦ ព្រះវស្សា

យោងតាមព័ត៌មានដែលត្រូវបានប្រកាសដោយរាជវាំង Buckingham មហាក្សត្រីនៃចក្រភពអង់គ្លេស Queen Elizabeth បានយាងចូលទិវង្គតកាលពីថ្ងៃទី ០៨ កញ្ញា ក្នុងព្រះជន្មាយុ ៩៦ ព្រះវស្សា នៅវិមាន Balmoral ក្នុងតំបន់ Scotland។

មហាក្សត្រី Elizabeth បានយាងចូលទិវង្គត ២ ថ្ងៃបន្ទាប់ពីបានបំពេញរាជកិច្ចតែងតាំងនាយករដ្ឋមន្ត្រីថ្មីរបស់ អង់គ្លេស គឺលោកស្រី Liz Truss។

ប្រកាសរបស់រាជវាំង Buckingham បានបញ្ជាក់ថា «មហាក្សត្រីបានយាងចូលទិវង្គតនៅ Balmoral កាលពីល្ងាចនេះ (ពេលវេលាក្នុងស្រុក)។

មុននោះ ប្រកាសមួយពីរាជវាំង Buckingham បានឱ្យដឹងថា ក្រុមវេជ្ជបណ្ឌិតកំពុងមានការបារម្ភអំពីព្រះរាជសុខភាពរបស់មហាក្សត្រី Elizabeth II និងស្នើឱ្យមានការរក្សាការតាមដានចំពោះព្រះរាជសុខភាព។

ព្រះមហាក្សត្រី Elizabeth II ប្រសូត្រក្នុងថ្ងៃទី ២១ ខែមេសា ឆ្នាំ ១៩២៦ នៅទីក្រុងឡុងដ៍ ប្រទេសអង់គ្លេស។ មហាក្សត្រី Elizabeth II គឺជារាជបុត្រីច្បងរបស់ព្រះអង្គម្ចាស់ Albert (មហាក្សត្រ George VI) និងព្រះនាង Elizabeth Bowes – Lyon។ មហាក្សត្រី Elizabeth II បានឡើងគ្រងរាជសម្បត្តិជាផ្លូវការកាលពីថ្ងៃទី ០២ មិថុនា ១៩៥៣ នៅពេលទើបតែមានព្រះជន្ម ២៧ វស្សា បន្ទាប់ពីព្រះបិតារបស់ទ្រង់បានចូលទិវង្គត។

មហាក្សត្រី Elizabeth II និងព្រះអង្គម្ចាស់ Charles

បន្ទាប់ពី មហាក្សត្រី Elizabeth II បានយាងចូលទិវង្គត ព្រះអង្គម្ចាស់ Charles ព្រះជន្ម ៧៣ ព្រះវស្សា បានក្លាយជាមហាក្សត្ររបស់ ចក្រភពអង់គ្លេស ក៏ដូចជាមេដឹកនាំរបស់ប្រទេសចំនួន ១៤ ទៀត ដែលស្ថិតក្នុង សមាគមប្រជាជាតិខមម្មុនវែល (Commonwealth of Nation)៕

September 9, 2022

មនុស្សយ៉ាងហោច ១០ នាក់បានស្លាប់នៅក្នុងរដូវបុណ្យប្រណាំងសត្វខ្ទីង នៅ អេស្ប៉ាញ នាឆ្នាំនេះ

រដូវបុណ្យប្រកួតប្រណាំងជាមួយសត្វខ្ទីងឆ្នាំនេះនៅ អេស្ប៉ាញ បានធ្វើឱ្យកក្រើកសាធារណមតិ នៅពេលមនុស្ស ១០ នាក់បានបាត់បង់ជីវិតដោយសារត្រូវសត្វនេះវ័ធ។

ការរត់ប្រណាំង ប្រជែងជាមួយនឹងសត្វខ្ទីងគឺជាពិធីបុណ្យប្រពៃណីនៅ អេស្ប៉ាញ សម្រាប់មនុស្សគ្រប់គ្នា និងត្រូវបានប្រារព្ធឡើងនៅក្នុងតំបន់ជាច្រើននៃប្រទេសនេះ។ ការប្រកួតនឹងសត្វខ្ទីងត្រូវបានចាត់ទុកថាជាពិធីសំខាន់បំផុតនៅក្នុងរដូវបុណ្យនារដូវក្ដៅនៅទូទាំងប្រទេស។

ក៏ប៉ុន្តែ បុណ្យប្រណាំងសត្វខ្ទីងដែលបានចាប់ផ្ដើមពីរដូវក្ដៅឆ្នាំនេះ កំពុងតែបង្កឱ្យមានភាពចម្រូងចម្រាសនៅក្នុងសង្គម ដោយសារតែមនុស្សយ៉ាងតិច ១០ ត្រូវបានសត្វខ្ទីងវ័ធរហូតដល់ស្លាប់។

ក្នុងពិធីបុណ្យប្រណាំងនឹងសត្វខ្ទីង គណៈកម្មការបុណ្យតែងតែលែងសត្វខ្ទីងមួយហ្វូងយ៉ាងតិច ៦ ក្បាល ឱ្យរត់លើដងផ្លូវមួយនៅក្នុងក្រុងដែលត្រូវបានរៀបចំរួចជាស្រេច។ ក្រុមអ្នកចូលរួមការប្រកួតនេះ នឹងរត់ពីមុខសត្វខ្ទីង និង «បញ្ឆេះកំហឹង» ដាក់ខ្ទីង ដើម្បីឱ្យវាដេញវ័ធពីក្រោយ ក្នុងបំណងបង្ហាញពី «ភាពក្លាហាន» របស់ពួកគេ។

មនុស្សជាច្រើនបាននាំគ្នាប្រឆាំងនឹងភាពគ្រោះថ្នាក់នៃពិធីបុណ្យនេះ បង្កឱ្យមានមតិចម្រូងចម្រាសគ្នានៅក្នុងសង្គម។ រាប់ចាប់ពីឆ្នាំ ២០១៥ មនុស្សប្រហែល ៣០ នាក់បានស្លាប់នៅក្នុងព្រឹត្តិការណ៍ប្រណាំងជាមួយសត្វខ្ទីងនៅទីក្រុង Valencia របស់ អេស្ប៉ាញ។

ការជជែកគ្នាជុំវិញបញ្ហានៃពិធីបុណ្យដ៏ពេញនិយមនេះ ត្រូវបានគេយកចិត្តទុកដាក់រហូតដល់ក្លាយជាកត្តាសំខាន់ដែលអាចកំណត់ការឈ្នះចាញ់នៅក្នុងការបោះឆ្នោតនៅ អេស្ប៉ាញ។ ប៉ុន្តែ German Zaragoza ដែលជាប្រធានសហព័ន្ធក្លឹបប្រណាំងសត្វខ្ទីង បានបញ្ជាក់ថា ទង្វើណាមួយដែលប្រឆាំងនឹងពិធីបុណ្យប្រពៃណីនេះ នឹងត្រូវរងប្រតិកម្មយ៉ាងខ្លាំងក្លា៕

September 8, 2022

កំពូលភ្នំថ្ម កំពុង «បង្កើត» ពពកសក្បុស និងយ៉ាងស្រស់ស្អាត (វីដេអូ)

ពពកដ៏ចម្លែក ទំនងជាបាញ់ចេញពីកំពូលភ្នំ Gibraltar នៅក្នុងវីដេអូមួយដែលត្រូវបានថត និងបង្ហោះដោយស្ថាប័នឧតុនិយម Gibraltar។

ស្ថាប័នឧតុនិយម Gibraltar បានចែករំលែកវីដេអូ time-lapse ដែលថតបានកាលពីថ្ងៃទី ២៤ សីហា ពីផ្លូវរត់ក្នុងព្រលានយន្តហោះអន្តរជាតិ Gibraltar នៅលើទំព័រ Twitter។ ក្នុងវីដេអូដែលត្រូវបានខាល់ល្បឿន ពពកសក្បុស ហាក់ដូចជាត្រូវបានបង្កើតឡើងពីស្រទាប់ឧស្ម័នស្ដើងព័ទ្ធជុំវិញកំពូលភ្នំ Gibraltar ដែលមានកម្ពស់ជាង ៤០០ ម៉ែត្រ ជាទីដែលមានហ្វូងស្វាព្រៃ Barbary ប្រមាណ ៣០០ ក្បាលកំពុងរស់នៅ។

ពពកចម្លែកនេះត្រូវបានហៅថា ពពក banner ជាប្រភេទពពកនៅលើកំពូលភ្នំ។ ពពក banner កើតឡើងនៅពេលមានខ្យល់កម្លាំងខ្លាំងបក់បោកទៅលើបរិយាកាសដែលមានកម្រិតសំណើមខ្ពស់នៅលើភ្នំ ធ្វើឱ្យបរិយាកាសនោះហោះទៅលើកំពូលភ្នំ។ នៅពេលឡើងទៅដល់កំពូលភ្នំ បរិយាកាសនោះក៏ចុះត្រជាក់ នាំឱ្យចំហាយទឹកប្រមូលផ្ដុំទៅជាពពកអណ្ដែតជុំវិញកំពូលភ្នំ ឬត្រូវខ្យល់បក់ឱ្យហោះដូចទិដ្ឋភាពក្នុងវីដេអូនេះ។

ភ្នំ Gibraltar ជាទីកន្លែងសមស្របដើម្បីឱ្យពពក banner កកើត ព្រោះថា តំបន់ភ្នំនេះតែងមានខ្យល់ Levant ជាប្រភេទខ្យល់ដែលបក់ទៅទិសខាងលិច តាមច្រកសមុទ្រ Gibraltar នៅសមុទ្រភាគខាងត្បូងនៃ ប្រទេសអេស្ប៉ាញ។ ដូច្នេះ អ្នកស្រុកក្នុងតំបន់នេះក៏ហៅពពក banner នេះថា «Levanter»។

Gibraltar គឺជាទឹកដីឯនាយសមុទ្ររបស់ ចក្រភពអង់គ្លេស មានទីតាំងស្ថិតនៅជាប់នឹង ប្រទេសអេស្ប៉ាញ នៅភាគនិរតី៕

September 8, 2022

សហរដ្ឋអាម៉េរិក បាញ់សាកល្បងមីស៊ីលអន្តរទ្វីប Minuteman III

កងទ័ពអាម៉េរិក ឱ្យដឹងថា បានបាញ់មីស៊ីលអន្តរទ្វីបកាលពីថ្ងៃទី ០៧ កញ្ញា និងបានជូនដំណឹងជាមុនដល់ រុស្ស៊ី អំពីការសាកល្បងនេះ។

«អង្គភាពវាយប្រហារទូទាំងពិភពលោកនៃទ័ពអាកាសអាម៉េរិក បានបាញ់មីស៊ីលអន្តរទ្វីប (ICBM) Minuteman III មិនបំពាក់អាវុធ ពីមូលដ្ឋាននៅ California» ទ័ពអាកាសអាម៉េរិក ប្រកាសដូច្នេះ។

នេះគឺជាលើកទីពីរក្នុងរយៈពេលមិនដល់មួយខែ ដែល សហរដ្ឋអាម៉េរិក បានសាកល្បង ICBM។ ទីក្រុងវ៉ាស៊ីងតោន បញ្ជាក់ថា បានជូនដំណឹងជាមុនដល់ រុស្ស៊ី អំពីករណីធ្វើតេស្តនេះ។ ការជូនដំណឹងជាមុននេះ ទំនងជាក្នុងបំណងទប់ស្កាត់ភាពតានតឹងរវាងប្រទេសទាំងពីរដែលកំពុងកើនឡើងស្រាប់។

ទ័ពអាកាសអាម៉េរិក សង្កត់ធ្ងន់ថា «ករណីសាកល្បងនេះមិនមែនជាលទ្ធផលកើតចេញពីព្រឹត្តិការណ៍នានានៅលើពិភពលោកនាបច្ចុប្បន្នឡើយ»។

ទ័ពអាកាសអាម៉េរិក កាលពីថ្ងៃទី ១៦ សីហា បានបាញ់សាកល្បងមីស៊ីលអន្តរទ្វីប Minuteman III ដោយជោគជ័យ ក្រោយការពន្យារពេលអស់ ២ សប្ដាហ៍ ដើម្បីបញ្ចៀសភាពតានតឹងទាក់ទងនឹងបញ្ហា អ៊ុយក្រែន និង កោះតៃវ៉ាន់។

Minuteman III ដែលជាមីស៊ីលអាចបំពាក់ក្បាលគ្រាប់នុយក្លេអែរ ផលិតដោយ Boeing គឺជាផ្នែកសំខាន់បំផុតនៅក្នុងឃ្លាំងអាវុធយុទ្ធសាស្ត្ររបស់ សហរដ្ឋអាម៉េរិក។ មីស៊ីលនេះបាញ់បានរយៈចម្ងាយជាង ៩,៦០០ គីឡូម៉ែត្រ និងមានល្បឿនប្រមាណ ២៤,០០០ គីឡូម៉ែត្រ/ម៉ោង៕

September 8, 2022

ក្រុមតំណាងរាស្ត្រអាម៉េរិក ធ្វើទស្សនកិច្ចភ្លាមៗនៅ កោះតៃវ៉ាន់

ប្រតិភូតំណាងរាស្ត្រ ៨ រូបរបស់ សហរដ្ឋអាម៉េរិក បានមកដល់ កោះតៃវ៉ាន់ ក្នុងដំណើរទស្សនកិច្ចមួយដែលមិនបានប្រកាសជាមុន ហើយគ្រោងនឹងធ្វើការនៅទីនេះរយៈពេល ២ ថ្ងៃ។

ការិយាល័យតំណាងរបស់ សហរដ្ឋអាម៉េរិក ប្រចាំ កោះតៃវ៉ាន់ (AIT) បានឱ្យដឹងថា ប្រតិភូតំណាងរាស្ត្រ ៨ រូបរបស់ សហរដ្ឋអាម៉េរិក ដឹកនាំដោយ Stephanie Murphy សមាជិកគណៈកម្មការយោធានៅ សភាជាន់ទាប បានមកដល់ កោះតៃវ៉ាន់ កាលពីព្រលប់ថ្ងៃទី ០៧ កញ្ញា ហើយគ្រោងនឹងធ្វើការនៅទីនេះរយៈពេល ២ ថ្ងៃ។ AIT បន្ថែមថា នេះគឺជាផ្នែកមួយក្នុងដំណើរទស្សនកិច្ចរបស់ពួកគេមកកាន់ តំបន់ឥណ្ឌូ-ប៉ាស៊ីហ្វ៊ិក។

«ប្រតិភូនឹងមានជំនួបជាមួយក្រុមមេដឹកនាំជាន់ខ្ពស់របស់ តៃវ៉ាន់ ដើម្បីពិភាក្សាអំពីទំនាក់ទំនងជាមួយ សហរដ្ឋអាម៉េរិក, បញ្ហាសន្តិសុខក្នុងតំបន់, បញ្ហាពាណិជ្ជកម្ម និងវិនិយោគ, បណ្ដាញផ្គត់ផ្គង់ទូទាំងសកលលិក ក៏ដូចជាបញ្ហាសំខាន់ៗដែលជាចំណាប់អារម្មណ៍របស់ភាគីទាំងពីរ» AIT ឱ្យដឹងដូច្នេះ។

ការិយាល័យមេដឹកនាំកោះតៃវ៉ាន់ ប្រកាសថា លោកស្រី Tsai Ing-wen នឹងជួបពិភាក្សាជាមួយប្រតិភូតំណាងរាស្ត្រអាម៉េរិក នៅព្រឹកនេះ។

«នេះគឺជាប្រតិភូតំណាងរាស្ត្រអាម៉េរិក ក្រុមទី ៦ ដែលបានមកកាន់ កោះតៃវ៉ាន់ រាប់ចាប់តាំងពី កងទ័ពចិនដីគោក ធ្វើលំហាត់សមយុទ្ធយោធាកាលពីដើមខែសីហា។ ប្រការនេះបង្ហាញថា សហរដ្ឋអាម៉េរិក ផ្ដល់តម្លៃ និងគាំទ្រចំពោះ កោះតៃវ៉ាន់ នៅច្រើនថ្នាក់ ច្រើនកម្រិត» ការិយាល័យមេដឹកនាំកោះតៃវ៉ាន់ អធិប្បាយដូច្នេះ។

ទាក់ទិននឹងបញ្ហានេះ ក្រុមមន្ត្រីនៅ ទីក្រុងប៉េកាំង មិនទាន់បញ្ចេញប្រតិកម្មអ្វីនៅឡើយ។ ប៉ុន្តែ កន្លងមក ដំណើរទស្សនកិច្ចបែបនេះ តែងតែត្រូវរងការរិះគន់ និងការព្រមាន ក៏ដូចជាចំណាត់ការនានាពីសំណាក់ ចិនដីគោក។

September 8, 2022

អ្នកម្ដាយប្រយុទ្ធជាមួយសត្វខ្លាដោយដៃទទេ ដើម្បីសង្គ្រោះកូនអាយុ ១៥ ខែ

(ឥណ្ឌា)-ស្ត្រីម្នាក់នៅក្នុងរដ្ឋ Madhya Pradesh ត្រូវរងរបួសធ្ងន់បន្ទាប់ពីប្រយុទ្ធគ្នាជាមួយសត្វខ្លាដោយដៃទទេដើម្បីជួយសង្គ្រោះជីវិតកូនប្រុស។

ហេតុការណ៍នេះបានកើតឡើងកាលពីថ្ងៃទី ០៤ កញ្ញា នៅក្បែរតំបន់អភិរក្សសត្វខ្លា Bandhavgarh ក្នុងរដ្ឋ Madhya Pradesh ភាគកណ្ដាលប្រទេសឥណ្ឌា។

អ្នកស្រី Archana Choudhary អាយុ ២៥ ឆ្នាំ រួមនឹងកូនប្រុសអាយុ ១៥ ខែ កំពុងស្ថិតនៅលើវាយស្រែ ក៏ស្រាប់តែមានសត្វខ្លាមួយក្បាលបោលចេញពីព្រៃ វាយប្រហារទៅលើកូនតូច បំណងចាប់យកជាចំណី។

សារព័ត៌មានឥណ្ឌា បានរាយការណ៍ថា សត្វខ្លានេះខាំក្បាលកូនតូចនោះ និងរកវិធីនាំយកទៅធ្វើជាអាហារ។ ភ្លាមនោះ Choudhary ក៏ស្ទុះចូលវាយ ធាក់ទាត់ទៅលើសត្វខ្លា ទន្ទឹមនឹងការស្រែកឱ្យគេជួយ។ ប្រជាជននៅក្បែរនោះ ក៏នាំគ្នាចាប់យកអាវុធ និងសម្រុកចូល ដេញសត្វសាហាវនេះ។

Bhola Prasad ដែលជាស្វាមីរបស់ Choudhary បានប្រាប់ថា ភរិយាគាត់ត្រូវធ្លុះសួត និងរងរបួសច្រើនកន្លែងទៀត ចំណែកកូនប្រុសត្រូវរបួសត្រង់ក្បាល ប៉ុន្តែមិនធ្ងន់ធ្ងរ។ ក្រោយពីសង្គ្រោះបន្ទាន់ ម្ដាយ និងកូនក៏ត្រូវបានបញ្ជូនទៅកាន់មន្ទីរពេទ្យថ្នាក់លើនៅទីក្រុង Jabalpur ដែលមានចម្ងាយ ១៣០ គូឡូម៉ែត្រ។

វេជ្ជបណ្ឌិត Misthi Ruhela នៅ Jabalpur និយាយថា ជនរងគ្រោះកំពុងត្រូវបានព្យាបាលក្នុងបន្ទប់ពិសេស និងបានចាក់ថ្នាំបង្ការជំងឺរួចហើយ។

ករណីខាងលើនេះ ធ្វើឱ្យប្រជាជនក្នុងតំបន់អភិរក្សាសត្វខ្លាមានការភ័យខ្លាចជាខ្លាំង។ អាជ្ញាធរក្នុងតំបន់ កំពុងស្វែងរកចាប់សត្វខ្លាមួយក្បាលនេះ និងចាត់វិធានការដើម្បីកុំឱ្យមានករណីបែបនេះកើតឡើងទៀត៕

September 7, 2022

ទឹកដីនៅលើមេឃមួយផ្នែករបស់ប្រទេសអវកាស Asgardia ជិតធ្លាក់មកកាន់ផែនដី ខណៈ «អាជ្ញាធរ» ត្រៀមបោះឆ្នោតរើស «មេដឹកនាំ»

ផ្កាយរណប Asgardia-1 របស់គម្រោងប្រទេសអវកាស Asgardia កំពុងតែបន្ទាបខ្លួន ហើយអាចធ្លាក់ចូលក្នុងបរិយាកាសផែនដី និងឆេះខ្ទេចនៅអំឡុងពាក់កណ្ដាលខែកញ្ញាខាងមុខ។

ប្រទេសអវកាសដំបូងរបស់មនុស្សជាតិ គឺ Asgardia កំពុងប្រឈមមុខនឹងហានិភ័យបាត់បង់ «ទឹកដី» តែមួយគត់នាបច្ចុប្បន្ន នៅទីអវកាស ដែលជាផ្កាយរណប Asgardia-1។ ទិន្នន័យតាមដានពីកងកម្លាំងអវកាសអាម៉េរិក និងប្រភពមួយចំនួនទៀតបានបង្ហាញថា «ទឹកដី Asgardia-1» របស់ប្រទេសអវកាស Asgardia ដែលស្ថិតនៅលើមេឃ នឹងធ្លាក់មកកាន់បរិយាកាសផែនដី ហើយឆេះខ្ទេចនៅពាក់កណ្ដាលខែកញ្ញា ២០២២។

បណ្ឌិត Igor Ashurbeyli អ្នកវិទ្យាសាស្ត្រជនជាតិរុស្ស៊ី គឺជាអ្នកស្នើឱ្យបង្កើត Asgardia ដែលជាប្រទេសអវកាសឯករាជ្យដំបូងគេនៅខែតុលា ២០១៦។ «ប្រទេស» នេះត្រូវបានដាក់ឈ្មោះទៅតាមតំបន់ដីនៅលើមេឃនៅក្នុងទេវកថាអឺរ៉ុបខាងជើង។ ពលរដ្ឋនានាអាចសុំចូលសញ្ជាតិ Asgardia ដោយមិនគិតថ្លៃ។

បេសកកម្មរបស់ Asgardia គឺនាំមកនូវសន្តិភាព ជួយឱ្យគ្រប់គ្នាអាចយល់ និងប្រើប្រាស់បច្ចេកវិទ្យាអវកាសបានងាយស្រួល និងការពារផែនដីពីការគំរាមកំហែងពីទីអវកាស។

មហិច្ឆតារបស់ ប្រទេសអវកាសនេះ គឺ នាំមកនូវសន្តិភាព ជួយឱ្យគ្រប់គ្នាអាចយល់ និងប្រើប្រាស់បច្ចេកវិទ្យាអវកាសបានងាយស្រួល និងការពារផែនដីពីការគំរាមកំហែងពីទីអវកាស។

ផ្កាយរណប Asgardia-1 ដែលត្រូវបានគេចាត់ទុកថាជាទឹកដីមួយផ្នែករបស់ប្រទេស Asgardia ត្រូវបានបាញ់បង្ហោះកាលពីឆ្នាំ ២០១៧។ ក្រៅពីជាអ្នកតំណាងឱ្យទឹកដីរបស់ Asgardia នៅក្រៅផែនដី ផ្កាយរណប Asgardia-1 ក៏នាំយកទៅជាមួយនូវច្បាប់ចម្លងនៃរដ្ឋធម្មនុញ្ញរបស់ Asgardia, ទង់ជាតិ Asgardia និងទិន្នន័យស្ដីពី «ពលរដ្ឋ» របស់ Asgardia រួមនឹងបេសកកម្មជាច្រើនផ្សេងទៀត។

តំណាងម្នាក់របស់ Asgardia បានឱ្យដឹងថា ពួកគេកំពុងពិនិត្យលើបញ្ហានេះ ប៉ុន្តែមិនបាននិយាយអ្វីបន្ថែម។ បច្ចុប្បន្នមិនទាន់ដឹងថា ការបាត់បង់ទឹកដី (ផ្កាយរណប Asgardia-1) នេះ នឹងជះឥទ្ធិពលដល់ទិសដៅក្លាយជាប្រទេសអវកាសឯករាជ្យ ឬយ៉ាងណានោះទេ។

បច្ចុប្បន្ន មិនទាន់មានប្រទេសណាមួយទទួលស្គាល់នាមជាប្រទេសរបស់ Asgardia នៅឡើយ។ ក៏ប៉ុន្តែអង្គការនេះនៅតែធ្វើសកម្មភាពតាមអនឡាញ និងមានគម្រោងបោះឆ្នោតជ្រើសរើសតំណែង «មេដឹកនាំប្រទេស» នៅថ្ងៃទី ០៩ កញ្ញាខាងមុខ៕

September 7, 2022

អ៊ីតាលី ប្រកាសអំពីវិធានការថ្មីដើម្បីកាត់បន្ថយបរិមាណឧស្ម័នប្រើប្រាស់ប្រចាំថ្ងៃ

វិធានការថ្មីនេះ កំណត់ថា កម្ដៅនៅក្នុងអគារឧស្សាហកម្មត្រូវតែស្ថិតនៅត្រឹម ១៧ អង្សាសេ និងកន្លែងដទៃទៀតគឺ ១៩ អង្សាសេ ទាបជាង ១ អង្សាសេ ធៀបនឹងការណែនាំកន្លងមក។

កាលពីថ្ងៃទី ០៦ កញ្ញា ការិយាល័យបរិវត្តកម្មប្រព័ន្ធអេកូរបស់អ៊ីតាលី បានប្រកាសដាក់ចេញនូវការវិធានការថ្មីដើម្បីសន្សំសំច័យថាមពលនៅក្នុងរដូវរងា ជាផ្នែកមួយនៃផែនការកាត់បន្ថយការប្រើប្រាស់ឧស្ម័ននៅទូទាំងសហភាពអឺរ៉ុប (EU) ក្នុងគ្រាដែលតម្លៃឧស្ម័នបាន និងកំពុងកើនឡើងខ្ពស់ខ្លាំងដោយសារសង្គ្រាមរវាង រុស្ស៊ី និង អ៊ុយក្រែន។

យោងតាមការកំណត់ថ្មី កម្ដៅនៅក្នុងអគារឧស្សាហកម្មត្រូវបានកំណត់ឱ្យនៅត្រឹម ១៧ អង្សាសេ និងកន្លែងដទៃទៀតគឺ ១៩ អង្សាសេ ទាបជាង ១ អង្សាសេ ធៀបនឹងការណែនាំកន្លងមក។

ក្រៅពីនេះ រយៈពេលនៃការបើកប្រព័ន្ធកម្ដៅក៏ត្រូវបានកាត់បន្ថយ ក្នុងនោះ ១ ថ្ងៃត្រូវកាត់បន្ថយ ១ ម៉ោង និង ១ ឆ្នាំ ត្រូវកាត់បន្ថយ ១៥ ថ្ងៃ។ វិធានការថ្មីនេះត្រូវបានធ្វើឡើងនៅក្នុងក្របខណ្ឌនៃផែនការកាត់បន្ថយថាមពលប្រើប្រាស់ ១៥% ចាប់ពីថ្ងៃទី ០១ សីហា ២០២២ ដល់ ៣១ មីនា ២០២៣។

ក៏ប៉ុន្តែ ស្ថាប័ន និងទីតាំងមួយចំនួនត្រូវបានលើកលែងពីវិធានការថ្មីនេះ ក្នុងនោះរួមមានដូចជា មន្ទីរពេទ្យ មណ្ឌលចាស់ជរា សាលាបឋមសិក្សា និងកុមារដ្ឋាន ក៏ដូចជាតំបន់ភាគខាងជើងដែលមានអាកាសធាតុត្រជាក់ខ្លាំង៕

September 7, 2022

ក្រុមសង្គ្រោះរបស់ ចិន ចាប់ផ្ដើមឆ្លងជ្រោះទៅជួយជនរងគ្រោះក្នុងហេតុការណ៍រញ្ជួយដី (រូបភាព)

ក្រុមមន្ត្រីចិន នាំគ្នាឆ្លងកាត់ព្រៃ និងជ្រោះ នៅក្នុងបេសកកម្មជួយសង្គ្រោះ បន្ទាប់ពីហេតុការណ៍រញ្ជួយដីកម្លាំង ៦.៦ រិចទ័រ បានកើតឡើងនៅក្នុងខេត្ត Sichuan បណ្ដាលឱ្យមនុស្សយ៉ាងតិច ៤៦ នាក់បាត់បង់ជីវិត។

ខេត្ត Sichuan កាលពីថ្ងៃទី ០៥ កញ្ញា ទទួលរងគ្រោះរញ្ជួយដីដ៏ធំមួយ នាំឱ្យកក្រើកទីក្រុង Kangding ដែលមានប្រជាជនប្រហែល ១ សែននាក់កំពុងរស់នៅ រួមនឹងទីប្រជុំជនជាច្រើនផ្សេងទៀត។ ទូរទស្សន៍ចិន CCTV ឱ្យដឹងថា យ៉ាងហោចណាស់មានមនុស្ស ៤៦ នាក់បានស្លាប់ និងរាប់សិបនាក់រងរបួស និងបាត់ខ្លួន។

កងកម្លាំងជួយសង្គ្រោះរាប់ពាន់នាក់ កំពុងញាប់ដៃញាប់ជើងចូលរួមស្វែងរក និងជួយសង្គ្រោះជនរងគ្រោះនៅក្រោយហេតុការណ៍រញ្ជួយដីនេះ។

September 6, 2022

Category: អន្តរជាតិ