អន្តរជាតិ - La Reine Media

នូវែលសេឡង់ អនុម័តហាមលក់បារីឱ្យមនុស្សកើតក្រោយឆ្នាំ 2008

អាជ្ញាធរនូវែលសេឡង់ ទើបតែបានអនុម័តច្បាប់ហាមលក់ថ្នាំជក់ឱ្យមនុស្សកើតក្រោយឆ្នាំ 2008 ជារៀងរហូត ដើម្បីទប់ស្កាត់មនុស្សជំនាក់ក្រោយជក់បារី។

ច្បាប់ថ្មីដែលទើបត្រូវបានអនុម័តកាលពីថ្ងៃទី 13 ធ្នូ 2022 នេះ នឹងមានសុពលភាពចាប់ពីឆ្នាំ 2023។ យោងតាមច្បាប់ថ្មីនេះ ចាប់ពីឆ្នាំ 2023 មនុស្សដែលមានអាយុក្រោម 15 ឆ្នាំ ឬកើតក្រោយឆ្នាំ 2008 នឹងត្រូវបានហាមមិនឱ្យទិញបារីជារៀងរហូត។

ចុងឆ្នាំក្រោយ នូវែលសេឡង់ នឹងដកហូតអាជ្ញាប័ណ្ណ 90% ក្នុងចំណោមលិខិតអនុញ្ញាតដែលបានផ្ដល់ឱ្យអ្នកលក់រាយថ្នាំជក់នៅប្រទេសនេះ។

បុគ្គលដែលបំពានច្បាប់នេះនឹងអាចត្រូវបានពិន័យជាប្រាក់រហូតដល់ 95,000 ដុល្លារអាម៉េរិក។ ច្បាប់នេះក៏តម្រូវឱ្យកាត់បន្ថយសារធាតុ nicotine ក្នុងថ្នាំជក់ផងដែរ ដើម្បីធ្វើឱ្យវាមិនសូវបង្កបញ្ហាញៀន៕

December 15, 2022

គិលានុបដ្ឋាកអង់គ្លេស 100,000 នាក់ ចូលរួមធ្វើកូដកម្មធំមិនធ្លាប់មានពីមុនមក

គិលានុបដ្ឋាកអង់គ្លេសប្រហែល 100,000 នាក់ នាំគ្នាធ្វើកូដកម្មទ្រង់ទ្រាយធំមិនធ្លាប់មានពីមុនមក ជាជម្រើសចុងក្រោយក្នុងការទាមទារដំឡើងប្រាក់ខែ។

សមាជិកសហជីព RCN (Royal College of Nursing) នៅទូទាំងអង់គ្លេស វ៉ែលស៍ និងអៀរឡង់ខាងជើង ឈប់ធ្វើការចាប់ពីម៉ោង 08 ដល់ម៉ោង 20 ថ្ងៃទី 15 ធ្នូ ក្រោយពីបដិសេធរបបបើកប្រាក់ខែថ្មីដែលលើកឡើងដោយរដ្ឋាភិបាលអង់គ្លេស។ នេះគឺជាកូដកម្មដំបូងក្នុងប្រវត្តិសាស្ត្រ 106 ឆ្នាំរបស់ RCN ហើយក៏ជាកូដកម្មធំជាងគេបង្អស់នៅ អង់គ្លេស គិតមកដល់បច្ចុប្បន្ន។

គិលានុបដ្ឋាកនៅផ្នែកលាងឈាម សង្គ្រោះបន្ទាន់ និងថែទាំទារកជាដើម នៅបន្តធ្វើការ ប៉ុន្តែសេវាកម្មសុខាភិបាលនៅក្នុងផ្នែកដទៃនឹងត្រូវកាត់បន្ថយក្នុងពេលធ្វើកូដកម្ម នេះបើតាម RCN។

មនុស្សជាច្រើននៅ អង់គ្លេស កំពុងត្រូវរងផលប៉ះពាល់យ៉ាងធ្ងន់ធ្ងរដោយសារទំនិញឡើងថ្លៃខ្ពស់ ក្នុងគ្រាដែលអតិផរណាមានល្បឿនលឿនជាងល្បឿននៃការដំឡើងប្រាក់ខែ ចំណែកគិលានុបដ្ឋាកក៏ត្រូវធ្វើការលើសកម្លាំងព្រោះតែបញ្ហាខ្វះធនធានមនុស្ស ។ មូលហេតុទាំងនេះហើយដែលបាននាំឱ្យមានកូដកម្មដ៏ធំនេះកើនឡើង៕

December 15, 2022

ប្រាក់ចំណូលបានពីប្រេងឆៅរបស់ប្រទេសរុស្ស៊ី ចាប់ផ្ដើមថយចុះ

អង្គការថាមពលអន្តរជាតិ និយាយថា ប្រាក់ចំណូលរបស់ ប្រទេសរុស្ស៊ី ដែលបានពីរ៉ែប្រេងក្នុងខែវិច្ឆិកា បានថយចុះ បើទោះជាបរិមាណប្រេងដែលបានលក់ចេញបានកើនឡើង ដែលនេះគឺជាសញ្ញាបញ្ជាក់ថា ទណ្ឌកម្មរបស់លោកខាងលិច ចាប់ផ្ដើមមានប្រសិទ្ធភាព។

យោងតាម Guardian ដែលចុះផ្សាយនាថ្ងៃនេះបានឱ្យដឹងថា អង្គការថាមពលអន្តរជាតិ (IEA) គណនាឃើញថា រុស្ស៊ី រកបានចំណូលប្រហែល 15.8 ពាន់លានដុល្លារអាម៉េរិក ពីការលក់ប្រេងនៅក្នុងខែវិច្ឆិកា 2022 ដែលនេះគឺជាកម្រិតទាបទីពីរក្នុងឆ្នាំនេះ។

ចំណែកបរិមាណប្រេងឆៅ និងផលិតផលធ្វើពីប្រេងរបស់ រុស្ស៊ី បានកើនឡើងដល់ 8.1 លានធុង/ថ្ងៃ ដែលនេះគឺជាកម្រិតខ្ពស់បំផុតរាប់ចាប់ពីខែមេសា 2022។

Guardian បានឱ្យដឹងថា នេះទំនងជាសញ្ញាបញ្ជាក់ថា ទណ្ឌកម្មពីបណ្ដាប្រទេសលោកខាងលិចដែលដាក់ទៅលើ ទីក្រុងមូស្គូ ក្នុងបំណងកាត់បន្ថយប្រាក់ចំណូលពីការនាំចេញថាមពលរបស់ រុស្ស៊ី ចាប់ផ្ដើមមានប្រសិទ្ធភាព។

សហភាពអឺរ៉ុប (EU) និង G7 កាលពីថ្ងៃទី 05 ធ្នូ បានឯកភាពគ្នាក្នុងការកំណត់តម្លៃពិតានឱ្យនៅត្រឹម 60 ដុល្លារអាម៉េរិក/ធុង ចំពោះប្រេងដែលដឹកជញ្ជូនតាមផ្លូវសមុទ្ររបស់ រុស្ស៊ី គ្រាដែលបស្ចិមលោកចង់កាត់បន្ថយប្រាក់ចំណូលរបស់ មូស្គូ ផង និងចង់គ្រប់គ្រងបញ្ហាអតិផរណាក្នុងវិស័យថាមពលផង។ ប្រេងដែលមិនមែនជារបស់ រុស្ស៊ី កាលពីថ្ងៃទី 14 ធ្នូ មានតម្លៃប្រហែល 81 ដុល្លារអាម៉េរិក/ធុង៕

December 15, 2022

(World Cup 2022)- អ្នកគាំទ្រម៉ារ៉ុក ប៉ះទង្គិចជាមួយប៉ូលិសនៅ បែលហ្ស៊ិក

អ្នកគាំទ្រប្រហែល 100 នាក់ ក្នុងនោះមានទាំងអ្នកចងទង់របស់ ប្រទេសម៉ារ៉ុក បានប៉ះទង្គិចជាមួយប៉ូលិសនៅ ព្រុចសែល បន្ទាប់ពីក្រុមបាល់ទាត់ជម្រើសជាតិរបស់ ម៉ារ៉ុក ចាញ់ ក្រុមបារាំង នៅវគ្គពាក់កណ្ដាលផ្ដាច់ព្រ័ត្រ។

ក្រុមអ្នកគាំទ្រម៉ារ៉ុក កាលពីយប់ថ្ងៃទី 14 ធ្នូ បានប្រមូលផ្ដុំគ្នានៅក្បែរស្ថានីយរថភ្លើង Brussels South និងបាននាំគ្នាបាញ់កាំជ្រួច និងគប់វត្ថុផ្សេងៗទៅលើក្រុមប៉ូលិសប្រឆាំងកុបកម្ម ព្រមទាំងបានដុតធុងក្រដាស និងថង់សំរាមផងដែរ។ ប៉ូលិសក៏បានប្រើប្រាស់រថយន្តពន្លត់អគ្គិភ័យបាញ់ទឹក និងបាញ់ផ្សែងបង្ហូរទឹកភ្នែកដើម្បីរំសាយហ្វូងមនុស្ស។

ការប៉ះទង្គិចគ្នារវាងប៉ូលិស និងអ្នកគាំទ្រម៉ារ៉ុក បានកើតឡើងក្នុងរយៈពេលខ្លី និងមិនបង្កឱ្យមានការខូចខាតធ្ងន់ធ្ងរនោះទេ។ ប៉ូលិសក៏បានចាប់ខ្លួនមនុស្សមួយចំនួន។

យោងតាម Mirror ការប៉ះទង្គិចបែបនេះក៏បានកើតឡើងក្នុងតំបន់មួយចំនួននៅ ប្រទេសបារាំង ផងដែរ។ ប៉ូលិសប្រឆាំងកុបកម្មត្រូវបានដាក់ពង្រាយនៅតំបន់មួយចំនួនរបស់ រដ្ឋធានីប៉ារីស ដើម្បីបំបែកហ្វូងមនុស្សដែលគាំទ្រ ម៉ារ៉ុក និង បារាំង។ រូបភាពលើបណ្ដាញសង្គមបង្ហាញថា មានមនុស្សមួយចំនួនពាក់មួកជិតក្បាលដេញតាមអ្នកគាំទ្រម៉ារ៉ុក។

អ្នកគាំទ្រម៉ារ៉ុក និងអ្នកគាំទ្របារាំង ក៏បានប៉ះទង្គិចគ្នានៅ Place de la Comedie ទីក្រុង Montpellier ក្នុងនោះមានអ្នកខ្លះបាញ់កាំជ្រួចសំដៅលើគូបដិបក្ខ ខណៈដែលសំឡេងស្រែកដាក់គ្នាលាន់ឮកងរំពង មុនពេលប៉ូលិសចូលធ្វើអន្តរាគមន៍។

https://www.youtube.com/watch?v=UTu4Te79NA4

ក្រុមជម្រើសជាតិម៉ារ៉ុក កាលពីថ្ងៃទី 14 ធ្នូ បានចាញ់ក្រុមរបស់ បារាំង 0-2 ក្នុងវគ្គពាក់កណ្ដាលផ្ដាច់ព្រ័ត្រនៅ World Cup 2022។ ម៉ារ៉ុក លើកនេះបានយកឈ្នះលើក្រុមធំៗជាច្រើន ហើយក៏បានក្លាយជាតំណាងទ្វីបអាហ្វ្រិកដំបូងគេដែលបានឡើងដល់វគ្គពាក់កណ្ដាលផ្ដាច់ព្រ័ត្រនៅ World Cup។

ក្រុមជម្រើសជាតិបារាំង នឹងប៉ះក្រុមរបស់ អាហ្សង់ទីន ក្នុងវគ្គផ្ដាច់ព្រ័ត្រដែលនឹងធ្វើឡើងនៅថ្ងៃទី 18 ធ្នូ ខណៈដែល ម៉ារ៉ុក ត្រូវជួប ក្រូអាត ក្នុងការប្រកួតដណ្ដើមពានរង្វាន់លេខ 3 មុននោះមួយថ្ងៃ៕

December 15, 2022

អ្នកគាំទ្រប្រធានាធិបតីប្រេស៊ីល ដុតរថយន្ត និងប៉ះទង្គិចជាមួយប៉ូលិស

អ្នកគាំទ្រប្រធានាធិបតីប្រេស៊ីលលោក Bolsonaro ដុតបំផ្លាញរថយន្ត និងព្យាយាមសម្រុកចូលការិយាល័យប៉ូលិសនៅ ប្រាស៊ីលីយ៉ា ដើម្បីរំដោះមេដឹកនាំបាតុករម្នាក់ដែលត្រូវបានចាប់ខ្លួន។

បាតុកម្មហិង្សាបានកើតឡើងនៅ រដ្ឋធានីប្រាស៊ីលីយ៉ា កាលពីថ្ងៃទី 12 ធ្នូ ក្រោយពីកម្លាំងសន្តិសុខបានចាប់ខ្លួន Jose Acacio Serere Xavante ទៅតាមបញ្ជាតុលាការជាន់ខ្ពស់ (STF) ដែលបានចោទថា មានគំរាមកំហែងដល់នីតិរដ្ឋប្រជាធិបតេយ្យ។

លោក Serere Xavante ដែលជាមេដឹកនាំក្រុមមនុស្សមួយក្រុងនៅក្នុងតំបន់ គាំទ្រប្រធានាធិបតី Jair Bolsonaro និងបដិសេធលទ្ធផលបោះឆ្នោតកាលពីថ្ងៃទី 30 តុលា 2022 ដែលលោក Bolsonaro ត្រូវចាញ់លោក Luiz Inacio Lula da Silva។

សមត្ថកិច្ចត្រូវប្រើប្រាស់ផ្សែងបង្ហូរទឹកភ្នែក និងគ្រាប់កាំភ្លើងជ័រដើម្បីរំសាយបាតុករ។ រថយន្តជាច្រើនគ្រឿងត្រូវបានដុតបំផ្លាញនៅក្នុងបាតុកម្មហិង្សានេះ ខណៈមនុស្សមួយចំនួនប៉ះទង្គិចជាមួយប៉ូលិស ក្នុងពេលដែលបាតុករព្យាយាមសម្រុកចូលអគាររបស់ប៉ូលិសដើម្បីរំដោះលោក Serere Xavante។

រដ្ឋមន្ត្រីក្រសួងយុត្តិធម៌ប្រេស៊ីល ប្រកាសថា នឹងស្រាវជ្រាវរឿងនេះ ហើយបានបញ្ជាក់ថា ស្ថានការណ៍កំពុងស្ងប់ស្ងាត់មកវិញ។

កាលពីថ្ងៃទី 07 ធ្នូ លោក Lula បានទទួលឯកសារបញ្ជាក់ថា លោកបានជាប់ឆ្នោត ដែលនេះក៏ជាការបញ្ចប់រដូវកាលប្រកួតប្រជែងជាមួយនឹងលោក Bolsonaro។ STF កាលពីថ្ងៃទី 12 ធ្នូ ក៏បានបញ្ជាក់ថា ជ័យជម្នះបានទៅលើលោក Lula។

ចំណែកលោក Bolsonaro វិញ បានបដិសេធលទ្ធផលនៃការបោះឆ្នោត ដោយចោទថា មានការលួចបន្លំ។ ថ្វីបើបានបដិសេធលទ្ធផល ប៉ុន្តែ លោក Bolsonaro ក៏មិនរារាំងការផ្ទេរអំណាច ខណៈដែលអ្នកគាំទ្ររបស់លោក នៅតែធ្វើបាតុកម្ម និងអំពាវនាវឱ្យកងទ័ពចូលធ្វើអន្តរាគមន៍៕

December 13, 2022

រូបថត 10 សន្លឹកដ៏អស្ចារ្យបំផុតនៅក្នុងបេសកកម្មទៅកាន់ឋានព្រះចន្ទ Artemis 1

បេសកកម្មដំបូងនៅក្នុងកម្មវិធី Artemis របស់ ណាសា (NASA) បានបញ្ចប់ដោយជោគជ័យ ក្នុងនោះមានរូបថតច្រើនសន្លឹកដែលស្ដែងឱ្យឃើញភាពអស្ចារ្យនៃបេសកកម្មវិទ្យាសាស្ត្រនេះ។

(រូបខាងលើ) 9 ថ្ងៃមុនពេលចាប់ផ្ដើមការហោះហើររបស់ Artemis 1 ប្រព័ន្ធបាញ់បង្ហោះ SLS របស់ ណាសា ក្នុងមជ្ឈមណ្ឌលអវកាស Kennedy នៅ Florida បានត្រៀមខ្លួនរួចរាល់។

នេះជារូបភាពនៅប៉ុន្មានវិនាទីក្រោយពីរ៉ុក្កែតត្រូវបានបញ្ឆេះម៉ាស៊ីន ចាប់ផ្ដើមការហោះហើរទៅកាន់ឋានព្រះចន្ទកាលពីថ្ងៃទី 16 វិច្ឆិកា 2022។

រូបភាពបង្ហាញពី SLS បន្ទាប់ពីបានចាប់ផ្ដើមហោះឡើងបានមួយនាទី ។ SLS គឺជារ៉ុក្កែតកម្លាំងខ្លាំងបំផុតរបស់ពិភពលោក។

ថ្ងៃទី 16 វិច្ឆិកា 2022 ដែលជាថ្ងៃដំបូងនៃបេសកកម្ម Artemis 1 យានអវកាស Orion ថតរូបរបស់ផែនដីពីទីអវកាសដែលមានចម្ងាយប្រហែល 91,732 គីឡូម៉ែត្រ ក្នុងពេលហោះហើរទៅឋានព្រះចន្ទ។

នៅថ្ងៃទី 13 នៃបេសកកម្ម យាន Orion ហោះទៅដល់តំបន់ឆ្ងាយពីផែនដីបំផុត (432,210 គីឡូម៉ែត្រ)។

ក្នុងថ្ងៃទី 05 ធ្នូ 2022 ដែលជាថ្ងៃទី 20 របស់បេសកកម្ម Artemis 1 យាន Orion ថតរូបភាពផ្ទៃរបស់ព្រះចន្ទពីអវកាសកម្រិតទាប។

ថ្ងៃទី 21 នៃបេសកកម្ម (ថ្ងៃទី 05 ធ្នូ) យាន Orion បែរទៅក្រោយមើលព្រះចន្ទ បន្ទាប់ពីបានហោះជុំវិញឋាននេះ និងចាប់ផ្ដើមដំណើរត្រលប់មកកាន់ផែនដី។

ឧបករណ៍នានារបស់ ណាសា ដែលនៅក្នុងយាន Orion ក្នុងនោះមានទាំងតុក្កតារូបសុនក Snoopy ក្នុងឈុតអ្នកអវកាស កំពុងអណ្ដែតដោយសារគ្មានកម្លាំងទំនាញ។

ប៉ុន្មាននាទីមុនពេលយាន Orion ទម្លាក់ខ្លួនចូលបរិយាកាសផែនដីក្នុងល្បឿន 40,000 គីឡូម៉ែត្រ/ម៉ោង វាក៏ថតរូបចុងក្រោយរបស់ផែនដីពីទីអវកាស។ ខែលការពារកម្ដៅរបស់យាន Orion អាចស៊ូតនឹងសីតុណ្ហភាព 2,800 អង្សាសេ ពេលកំពុងធ្លាក់ឆ្លងកាត់បរិយាកាស ដែលកម្ដៅនេះជិតស្មើនឹងពាក់កណ្ដាលនៃកម្ដៅរបស់ផ្ទៃព្រះអាទិត្យ។

នៅវេលាម៉ោង 00 និង 40 នាទី ថ្ងៃទី 12 ធ្នូ 2022 ម៉ោងនៅ កម្ពុជា យាន Orion បានចុះចតលើមហាសមុទ្រប៉ាស៊ីហ្វិក ក្នុងតំបន់ដែលមានចម្ងាយ 9.3 គីឡូម៉ែត្រពីកប៉ាល់ស្រង់ USS Portland របស់ទ័ពជើងទឹកអាម៉េរិក៕

December 12, 2022

មកស្វែងយល់អំពី Oulu ដែលជា «ទីក្រុងកង់រដូវរងា» នៅទ្វីបអឺរ៉ុប

(ហ្វាំងឡង់)- សីតុណ្ហភាពចុះដល់ -25 អង្សាសេក៏មិនអាចរារាំងអ្នកជិះកង់នៅទីក្រុង Oulu ជាកន្លែងដែលហៅខ្លួនឯងថា «ទីក្រុងកង់រដូវរងា» បានឡើយ។

«ខ្ញុំជិះកង់ពេញមួយឆ្នាំ។ ខ្ញុំថែមទាំងគ្មានរថយន្ត» Ari Karjalainen ឱ្យដឹងដូច្នេះនៅពេលត្រលប់ទៅផ្ទះក្រោយពីបានទិញគ្រឿងទេសកាលពីថ្ងៃទី 01 ធ្នូ។

Oulu ដែលជាទីក្រុងនៅភាគខាងជើងប្រទេសហ្វាំងឡង់ មានចម្ងាយពីតំបន់អាកទិក ឬហៅថាប៉ូលខាងជើងប្រហែល 160 គីឡូម៉ែត្រទៅទិសខាងត្បូង។ បើទោះជាមេឃធ្លាក់ព្រឹល ទីតាំងចតកង់នៅតែពេញណែន។ ប្រជាជនក្នុងតំបន់ស្ទើរតែគ្រប់រូប ចូលចិត្តជិះកង់ មិនថា ក្ដៅ ឬត្រជាក់។

«ឱ្យតែស្លៀកពាក់កក់ក្ដៅ» Mimmi Kahkonen អាយុ 22 ឆ្នាំ ឆ្លើយតបដូច្នេះនៅពេលត្រូវបានសួរថា ធ្វើយ៉ាងណាដើម្បីជិះកង់ក្នុងអាកាសធាតុត្រជាក់បែបនេះ។

មនុស្សមួយចំនួនជិះកង់ដែលប្រើប្រាស់សម្បកកង់ពិសេសមិនរអិលសម្រាប់រដូវរងា ប៉ុន្តែអ្នកខ្លះក៏នៅតែប្រើប្រាស់សម្បកកង់ធម្មតា។

«ពួកយើងបានស៊ាំនឹងរដូវត្រជាក់ទៅហើយ ដូច្នេះមិនគិតថានេះគឺជាឧបសគ្គធំឡើយ» Harri Vaarala វិស្វករផ្នែកគមនាគមន៍របស់ទីក្រុង ថ្លែងដូច្នេះ។

ទីក្រុងឆ្នេរសមុទ្រ Oulu ជាមធ្យមធ្លាក់ព្រឹល 5 ខែ និងសីតុណ្ហភាពក្រោម 0 អង្សាសេ ពេញមួយឆ្នាំ។ កង់គឺជាមធ្យោបាយធ្វើដំណើរដែលរួមចំណែក 1/5 នៃចរាចរណ៍សរុបតាមដងផ្លូវ។ Harri Vaarala ពន្យល់ថា កត្តាសំខាន់មួយដែលធ្វើឱ្យកង់ទទួលបានការពេញនិយមគឺថា ទីក្រុងមានគន្លងផ្លូវសម្រាប់កង់ ដែលទទួលបានអាទិភាពក្នុងការឈូសឆាយ និងថែទាំជាពិសេសនៅពេលមានព្រឹលធ្លាក់។

សាលា Metsokangas មានសិស្ស 1,200 នាក់ ក្នុងនោះមានប្រហែល 1,000 នាក់ជិះកង់ទៅរៀនពេញមួយរដូវរងា។ ប៉ុន្មានឆ្នាំមកនេះ ទីក្រុងបានបើកឱ្យប្រើប្រាស់គន្លង «ផ្លូវល្បឿនលឿនសម្រាប់កង់» ដែលមានទទឹង 6 ម៉ែត្រ។

យោងតាម Harri Vaarala នៅតំបន់មួយចំនួន សាលាក្រុងថែមទាំងផ្ដល់អាទិភាពដល់កង់ច្រើនជាងរថយន្ត ហើយកន្លែងខ្លះទៀតក៏ប្ដូរគន្លងសម្រាប់រថយន្តមកជាគន្លងសម្រាប់កង់ទៀតផង ដោយផ្អែកទៅលើតម្លៃ និងអត្ថប្រយោជន៍ជាក់ស្ដែង។

សាលាក្រុង Oulu មានក្រុមការងារតាមដានគន្លងផ្លូវសម្រាប់កង់ ដើម្បីធានាថា មិនមានព្រឹល ឬឧបសគ្គដែលអាចបង្កផលប៉ះពាល់ដល់អ្នកជិះកង់៕

December 12, 2022

យានអវកាស Orion ត្រលប់មកកាន់ផែនដីវិញ បន្ទាប់ពីបានបំពេញបេសកកម្មនៅឋានព្រះចន្ទ

(សហរដ្ឋអាម៉េរិក)- Artemis 1 ដែលជាបេសកកម្មសាកល្បងមិនមានមនុស្សជិះរយៈពេល 25 ថ្ងៃនៅឯឋានព្រះចន្ទ បានបញ្ចប់បេសកកម្មរបស់ខ្លួននៅពេលយានអវកាស Orion របស់ ណាសា ចុះចតដោយជោគជ័យលើសមុទ្រកាលពីយប់មិញ។

យានអវកាស Orion សម្រេចបានដំណាក់កាលចុងក្រោយនៃដំណើរហោះហើរជាង 385,000 គីឡូម៉ែត្រ ពីព្រះចន្ទត្រលប់មកកាន់ផែនដី។ យានអវកាសនេះបានចុះចតលើផ្ទៃទឹកនៃមហាសមុទ្រប៉ាស៊ីហ្វិក ក្នុងលំហសមុទ្រ Baja California របស់ ម៉ិកស៊ិក កាលពីម៉ោង 12 និង 40 នាទី ថ្ងៃទី 11 ធ្នូ 2022 ត្រូវនឹងម៉ោង 00 និង 40 នាទី ថ្ងៃទី 12 ធ្នូ 2022 នៅ កម្ពុជា។

ក្រោយពីបានចុះចត យាន Orion បានឆ្លងកាត់រយៈពេល 6 ម៉ោងនៅលើផ្ទៃសមុទ្រ ដោយសារ ណាសា ត្រូវការប្រមូលទិន្នន័យ និងធ្វើការពិសោធមួយចំនួនមុនពេលក្រុមជំនួយចាប់ផ្ដើមការស្រង់។ យានយន្តមួយចំនួនរួមមាន ឧទ្ធម្ភាគចក្រ និងកប៉ាល់ស្រង់ USS Portland ជាដើម របស់ទ័ពជើងទឹកអាម៉េរិក បានរង់ចាំជាស្រេចនៅក្បែរនោះ។

ដោយទទួលបានជោគជ័យពី Artemis 1 ណាសា នឹងវិភាគទិន្នន័យដែលប្រមូលបានក្នុងដំណើរហោះហើរនេះ និងជ្រើសរើសក្រុមហោះហើរសម្រាប់បេសកកម្ម Artemis 2 ដែលនឹងធ្វើការហោះហើរនៅឆ្នាំ 2024។ Artemis 2 នឹងនាំអវកាសចរហោះទៅតាមគំរូបេសកកម្ម Artemis 1 ដោយគោចរជុំវិញឋានព្រះចន្ទ ប៉ុន្តែមិនចុះចត។ បេសកកម្ម Artemis 3 នឹងធ្វើឡើងនៅឆ្នាំ 2025 ក្នុងនោះ អវកាសចរនឹងចុះចតលើឋានមួយនេះជាថ្មី៕

December 12, 2022

ប្រធានាធិបតីឥណ្ឌូណេស៊ី បង្ហោះរូបស្ដីពីពិធីរៀបអាពាហ៍ពិពាហ៍កូនប្រុស

ប្រធានាធិបតីឥណ្ឌូណេស៊ី Widodo បង្ហោះរូបថតលោកកំពុងធ្វើពិធីងូតទឹកអប់ឱ្យកូនប្រុសពៅ Kaesang Pangarep និងកូនប្រសាស្រី Erina Gudono។

«ពីទីលំនៅរបស់យើងនៅក្នុងទីក្រុង Surakarta ថ្ងៃនេះ យើងរួមនឹងកូនប្រុស Kaesang Pangarep ធ្វើពិធីទទួលកូនប្រសាស្រី Erina Cudono។ សូមអរព្រះគុណព្រះ ដែលការប្រារព្ធពិធីដំណើរការបានរលូត និងល្អប្រសើរ» ប្រធានាធិបតី Joko Widodo បង្ហោះលើ Instagram កាលពីថ្ងៃទី 09 ធ្នូ ក្នុងថ្ងៃអាពាហ៍ពិពាហ៍កូនប្រុសពៅ Pangarep។

ប្រធានាធិបតីឥណ្ឌូណេស៊ី ក៏បានផ្ញើសារសូមអភ័យទោសចំពោះស្ថានភាពកកស្ទះចរាចរណ៍ដែលអាចកើតឡើងដោយសារពិធីរៀបមង្គលការកូនប្រុសរបស់លោកផងដែរ។

Kaesang អាយុ 27 ឆ្នាំ គឺជាកូនប្រុសពៅក្នុងចំណោមកូន 3 នាក់របស់ ប្រធានាធិបតីឥណ្ឌូណេស៊ី។ Kaesang គឺជាអ្នកជំនួញមួយរូបដែលគ្រប់គ្រងក្រុមហ៊ុនមួយចំនួន។

កូនប្រសាស្រីរបស់ ប្រធានាធិបតីឥណ្ឌូណេស៊ី គឺ Erina អាយុ 25 ឆ្នាំ បច្ចុប្បន្នធ្វើជាអ្នកវិភាគផ្នែកហិរញ្ញវត្ថុប្រចាំធនាគារ JP Morgan សាខានៅ ហ្សាការតា។ នាងក៏ជាតំណាងរបស់ទីក្រុង Yogyakarta នៅក្នុងការប្រលងសម្រស់ថ្នាក់ជាតិ Puteri Indonesia ឆ្នាំ 2022 ដោយជាប់ក្នុង top 11។

អ្នកលេងបណ្ដាញសង្គមនៅ ឥណ្ឌូណេស៊ី នាំគ្នាជូនពរដល់គូស្វាមីភរិយាថ្មីនេះ ហើយថា ពួកគេសមគ្នាណាស់។ មនុស្សមួយចំនួនក៏សម្ដែងការសប្បាយចិត្ត នៅពេលបានឃើញពិធីមង្គលការនេះពោរពេញដោយទំនៀមទម្លាប់ប្រពៃណី៕

December 10, 2022

តារាចម្រៀងកូរ៉េខាងត្បូង នឹងហោះទៅកាន់អវកាសជាមួយមហាសេដ្ឋីជប៉ុន

មហាសេដ្ឋី Yusaku Maezawa កាលពីថ្ងៃទី 08 ធ្នូ បានប្រកាសឈ្មោះសមាជិកក្រុមហោះហើរ 8 នាក់ ក្នុងនោះមានទាំងតារាចម្រៀងរ៉ែប T.O.P របស់ក្រុម Big Bang ផងដែរ ដែលនឹងរួមដំណើរជាមួយគាត់ ហោះទៅគោចរជុំវិញឋានព្រះចន្ទនៅឆ្នាំ 2023។

គម្រោងដំណើរទេសចរណ៍ជុំវិញឋានព្រះចន្ទរបស់ Maezawa ដែលមានឈ្មោះថា DearMoon ត្រូវបានប្រកាសជាលើកដំបូងកាលពីឆ្នាំ 2018 និងយកសិល្បករជាចំណុចកណ្ដាល។ ដំបូង មហាសេដ្ឋីជប៉ុន គ្រោងអញ្ជើញមនុស្សដែលគាត់ចង់ធ្វើដំណើរជាមួយ ប៉ុន្តែក្រោយមកក៏បានប្ដូរផ្លាស់ទៅជាការប្រកួតប្រជែងមួយដែលបេក្ខជនអាចចុះឈ្មោះតាមអនឡាញ។ Maezawa នឹងចេញថ្លៃទាំងស្រុងសម្រាប់ក្រុមហោះហើរនេះ។

បេក្ខជនទាំង 8 នាក់ដែលត្រូវបានជ្រើសរើសរួមមាន DJ និងជាអ្នកផលិតចម្រៀងរាំអេឡិចត្រូនិច Steve Aoki របស់ សហរដ្ឋអាម៉េរិក, Youtuber ជនជាតិអាម៉េរិក Tim Dodd, សិល្បករ និងអ្នកបង្កើតក្បាច់រាំជនជាតិឆែក Yemi AD, ជាងថតរូបជនជាតិអអៀរឡង់ Rhiannon Adam, ជាងថតរូបជនជាតិអង់គ្លេស Karim Iliya, ផលិតករភាពយន្តជនជាតិអាម៉េរិក Brendan Hall, តារាសម្ដែងជនជាតិឥណ្ឌា Dev Joshi និងតារាចម្រៀងរ៉ែប T.O.P របស់ក្រុមចម្រៀងកូរ៉េខាងត្បូង Big Bang។

យោងតាមទិន្នន័យលើទំព័រ DearMoon ដំណើរហោះហើរតាមយានអវកាស Starship ដែលកំពុងត្រូវបានអភិវឌ្ឍរបស់ SpaceX នេះ នឹងអូសបន្លាយពេលជិត 6 ថ្ងៃ និងគោចរជុំវិញព្រះចន្ទ ដោយមិនមានការចុះចត។ នៅពេលផលិតរួចរាល់ Starship នឹងក្លាយជារ៉ុក្កែតដែលមានកម្លាំងខ្លាំងបំផុតនៅលើពិភពលោក។

កាលពីខែធ្នូឆ្នាំកន្លង មហាសេដ្ឋីជប៉ុន Maezawa ស្ថាបនិករបស់មជ្ឈមណ្ឌលទិញដូរសម្លៀកបំពាក់អនឡាញធំបំផុតនៅ ជប៉ុន បានហោះទៅកាន់ស្ថានីយអវកាសអន្តរជាតិ ក្នុងរយៈពេលខ្លី ជាមួយនឹងអ្នកផលិតវីដេអូរបស់គាត់គឺ Yozo Hirano រួមនឹងក្រុមអវកាសចរជនជាតិរុស្ស៊ី តាមរយៈយានអវកាស Soyuz។ ថ្លៃសម្រាប់ដំណើរហោះហើរនេះគឺប្រហែល 73 លានដុល្លារអាម៉េរិក៕

December 9, 2022

Category: អន្តរជាតិ