អន្តរជាតិ - La Reine Media

«ចំណតកង់ក្រោមទឹក» ជួយដោះស្រាយបញ្ហាធំសម្រាប់រាជធានីអាំស្ទែដាំ

(ហូឡង់) – អាជ្ញាធររាជធានីអាំស្ទែដាំ កំពុងព្យាយាមរំដោះកន្លែងចតកង់សាធារណៈដ៏ស្អេកស្កះដោយចំណតក្រោមទឹកទន្លេដែលមានតម្លៃទាប។

ក្រោមទឹកថ្លាឆ្វង់ក្បែរស្ថានីយរថភ្លើងនៅកណ្ដាលរាជធានីអាំស្ទែដាំ គឺជាចំណតកង់ដែលអាចដាក់បាន 7,000 គ្រឿង។ តាមគម្រោង ចំណត់កង់ដែលនឹងត្រូវសម្ពោធដាក់ឱ្យប្រើប្រាស់នៅថ្ងៃទី 26 មករា 2023 នេះ គឺជាសមិទ្ធផលដែលមានតម្លៃ 60 លានអឺរ៉ូ (ជិត 65 លានដុល្លារអាម៉េរិក) ដែលចាប់ផ្ដើមស្ថាបនាតាំងពី 4 ឆ្នាំមុន។

គោលដៅរបស់គម្រោងនេះគឺការរៀបចំសម្អាតកន្លែងចតកង់ខូចដែលអ្នកធ្វើដំណើរទុកចោល ដើម្បីសាងសង់ចំណតថ្មីដែលមានរបៀបរៀបរយ ស្អាត សុវត្ថិភាព និងស្ថិតនៅក្រោមទឹក។ អ្នកជិះកង់អាចចតដោយមិនគិតថ្លៃក្នុងរយៈពេល 24 ម៉ោង និងបង់ 1.46 ដុល្លារអាម៉េរិកសម្រាប់ 24 បន្ទាប់។

ជណ្ដើរយន្តមួយនឹងនាំភ្ញៀវឡើងទៅកាន់ចំណតរថភ្លើងនៅក្បែរនោះ ជាទីដែលមានរថភ្លើងទៅមកជាង 200,000 ជើងជារៀងរាល់ថ្ងៃ។ ចំណត់កង់មួយកន្លែងផ្សេងទៀតក៏ទើបត្រូវបានសាងសង់រួចរាល់នៅក្បែរកំពង់ផែ IJ ដោយខ្ទង់ប្រាក់វិនិយោគ 27 លានដុល្លារអាម៉េរិក និងអាចដាក់កង់បានជាង 4,000 គ្រឿង។

ចំណត់កង់ខាងលើត្រូវបានគ្រប់គ្រងដោយប្រព័ន្ធឆ្លាតវៃ អាចឱ្យម្ចាស់កង់ដឹងថា ទីតាំងណានៅសល់កន្លែងចតចំនួនប៉ុន្មាន។

«ស្ថានីយរថភ្លើងកណ្ដាលក្រុងគឺជាទីតាំងមមាញឹកបំផុតនៅអាំស្ទែដាំ» Pieter Visser ប្រធានគម្រោងចំណតកង់របស់រាជធានីនិយាយដូច្នេះ។ «មនុស្សជាច្រើនយកទីសាធារណៈធ្វើជាកន្លែងចតកង់។ រាជធានីចង់ធ្វើចំណតកង់ក្រោមដីដើម្បីទុកផ្លូវសាធារណៈសម្រាប់អ្នកថ្មើរជើង ទេសចរ និងជនពិការ»។

យោងតាម BOVAG និង RAI ដែលជាអង្គការស្រាវជ្រាវលើយានយន្ត បច្ចុប្បន្នហូឡង់មានកង់ជាង 23.4 លានគ្រឿង បើទោះមានប្រជាជនតែ 17.8 លាននាក់។ កង់គឺជាមធ្យោបាយធ្វើដំណើរពេញនិយមបំផុតនៅហូឡង់ ពិសេសគឺរាជធានីអាំស្ទែដាំ។

នៅហូឡង់ សូម្បីតែស្ត្រីមានផ្ទៃពោះក៏ចូលចិត្តជិះកង់ដែរ

ចំពោះវិស័យផ្លូវដែក គម្រោងស្ថានីយកង់ក្រោមទឹកបឹង ក៏ជួយឱ្យការធ្វើដំណើរដោយរថភ្លើងអគ្គិសនីរបស់ប្រជាជន មានភាពងាយស្រួល និងទាក់ទាញជាងមុន។

ចំណតកង់ក្រោមដី

ប្រជាជននៅអាំស្ទែដាំបានសម្ដែងការសប្បាយរីករាយនៅពេលគម្រោងចំណតកង់ជិតត្រូវបានដាក់ឱ្យប្រើប្រាស់។ Marco te Brommelstroet ប្រធានវិទ្យាស្ថានកង់ទីក្រុងនៅសាកលវិទ្យាល័យអាំស្ទែដាំ បានឱ្យដឹងថា គន្លឹះជោគជ័យរបស់គមនាគមន៍សាធារណៈគឺការតភ្ជាប់បណ្ដាប្រភេទមធ្យោបាយធ្វើដំណើរជាមួយគ្នា។

សកម្មភាពសាងសង់ចំណតកង់ក្រោមទឹកនៅអាំស្ទែដាំ ប្រទេសហូឡង់

ចំណែក Lucas Snaije ប្រធានផ្នែកស្រាវជ្រាវ និងតស៊ូមតិរបស់អង្គការគាំទ្រការជិះកង់ BYCS ឱ្យដឹងថា គម្រោងខាងលើអាចជាគំរូសម្រាប់បណ្ដាប្រទេសយកទៅអនុវត្តតាមដើម្បីលើកទឹកចិត្តប្រជាជនឱ្យនាំគ្នាងាកមកជិះកង់៕

January 23, 2023

មនុស្សទីពីរដែលបានដើរលើដីឋានព្រះចន្ទ រៀបការក្នុងវ័យជាង 90 ឆ្នាំ

អវកាសចរ Edwin Aldrin ដែលជាមនុស្សទីពីរបានដើរលើដីឋានព្រះចន្ទកាលពីឆ្នាំ 1969 បានរៀបការក្នុងថ្ងៃខួបកំណើតលើកទី 93 ជាមួយនឹងកូនក្រមុំវ័យ 64 ឆ្នាំ។

«នៅក្នុងថ្ងៃខួបកំណើតលើកទី 93 របស់ខ្ញុំ និងជាថ្ងៃដែលខ្ញុំបានទទួលពានរង្វាន់ Living Legends of Aviation ខ្ញុំរីករាយ និងសូមប្រកាសថា ខ្ញុំ និងគូស្នេហ៍យូរឆ្នាំ Anca Faur បានរៀងការ» អតីតអ្នកអវកាស Edwin “Buzz” Aldrin ប្រកាសលើ Twitter ស្ដីពីអាពាហ៍ពិពាហ៍កាលពីថ្ងៃទី 20 មករា 2023។

«យើងបានធ្វើពិធីរៀបមង្គលការដ៏ឧត្ដុង្គឧត្ដម ប៉ុន្តែមានលក្ខណៈជាឯកជននៅ Los Angeles និងមានការរំភើបដូចយុវវ័យដទៃ» លោក Edwin Aldrin បន្ថែមដូច្នេះ។

ក្នុងសំណេរ លោក Edwin Aldrin ក៏បង្ហោះអមជាមួយនឹងរូបថតដែលគាត់ស្លៀកពាក់ឈុត tuxedo ហើយកូនក្រមុំ Faur ក្នុងឈុតរ៉ូបដៃវែងផងដែរ។

អតីតអវកាសចរ Edwin Aldrin និងគូស្នេហ៍យូរឆ្នាំ Anca Faur

កើតឆ្នាំ 1959 អ្នកស្រី Anca Faur គឺជាប្រធានគម្រោងរបស់ក្រុមហ៊ុនវិទ្យាសាស្ត្រ និងគីមី Johnson Matthey។ អ្នកស្រី ក៏ជាអនុប្រធានរបស់ក្រុមហ៊ុន Buzz Aldrin Venture ចាប់ពីឆ្នាំ 2019។

លោក Edwin Aldrin បានរៀបការជាលើកដំបូងកាលពីឆ្នាំ 1954 ជាមួយនឹង Joan Archer។ អ្នកទាំងពីរមានកូនជាមួយគ្នា 3 នាក់ មុនពេលលែងលះកាលពីឆ្នាំ 1974។ ក្រោយមក Edwin Aldrin ក៏បានរៀបការជាមួយ Beverly Van Zile កាលពីឆ្នាំ 1975 និងរស់នៅជាមួយគ្នាបាន 3 ឆ្នាំ។ បន្ទាប់មកទៀត លោក Edwin Aldrin

ក៏បានរៀបការជាមួយនឹង Lois Driggs Cannon ក្នុងឆ្នាំ 1988 និងរស់នៅជាមួយគ្នាបាន 24 ឆ្នាំ មុនពេលលែងលះ។

(ពីឆ្វេងទៅស្ដាំ) លោក Neil Armstrong, Michael Collins និង Buzz Aldrin

កាលពីខែកក្កដា 1969 យានអវកាស Apollo 11 រួមនឹងអវកាសចរ 3 រូប ដែលរួមមានលោក Neil Armstrong, Buzz Aldrin និងពីឡុត Michael Collins បានធ្វើដំណើរទៅកាន់ឋានព្រះចន្ទ។ ពួកគេចំណាយពេល 4 ថ្ងៃដើម្បីបញ្ចប់ដំណើរហោះហើរក្នុងរយៈចម្ងាយជាង 400,000 គីឡូម៉ែត្រ។

លោក Armstrong បានស្ថិតនៅលើដីរបស់ព្រះចន្ទក្នុងរយៈពេល 2 ម៉ោង និង 32 នាទី ខណៈលោក Aldrin តិចជាងនេះប្រហែល 15 នាទី។ អវកាសចរទាំងពីរបានដោតទង់ជាតិអាម៉េរិក រើសយកសំណាកដុំថ្ម និងធ្វើការពិសោធមុនពេលត្រលប់មកកាន់យានអវកាស។ អវកាសចរទាំង 3 រូបខាងលើរបស់ក្រុម Apollo 11 បានត្រលប់មកកាន់ផែនដីវិញដោយសុវត្ថិភាព និងត្រូវបានទទួលយ៉ាងគគ្រឹកគគ្រេងដូចទៅនឹងវីរបុរស៕

January 23, 2023

ករណីបាញ់ប្រហារក្នុងថ្ងៃចូលឆ្នាំថ្មីនៅ Los Angeles សម្លាប់មនុស្ស 10 នាក់ ៖ ប៉ូលិសរកឃើញជនសង្ស័យ

មនុស្សយ៉ាងហោច 10 នាក់បានស្លាប់ និង 10 នាក់រងរបួសនៅក្នុងហេតុការណ៍បាញ់ប្រហារកាលពីយប់ថ្ងៃទី 21 មករា នៅឯក្លឹបមួយក្នុងពិធីអំណរបុណ្យចូលឆ្នាំចន្ទគតិនៅទីប្រជុំជន Monterey Park នៃទីក្រុង Los Angeles រដ្ឋ California សហរដ្ឋអាម៉េរិក។

សមត្ថកិច្ចបានឱ្យដឹងថា ករណីបាញ់ប្រហារនៅឯឧទ្យាន Monterey នេះកើតឡើងពេលប្រជាជនកំពុងធ្វើពិធី អំណរបុណ្យឆ្នាំថ្មីចន្ទគតិ។ មនុស្សយ៉ាងហោច 10 នាក់ត្រូវបានបាញ់សម្លាប់ និងប្រហែល 10 នាក់ផ្សេងទៀតបានរងរបួស និងត្រូវបានបញ្ជូនទៅកាន់មន្ទីរពេទ្យ។

ថ្មីៗនេះ ប៉ូលិសក្នុងតំបន់បានឱ្យដឹងថា បានរកឃើញរថយន្តពណ៌សមួយគ្រឿងនៅ Torrance រដ្ឋ California ដែលមានសាកសពមនុស្សម្នាក់នៅខាងក្នុង។ សមត្ថកិច្ចជឿថា រថយន្តនេះជាប់ទាក់ទិននឹងករណីបាញ់ប្រហារ ប៉ុន្តែមិនទាន់ប្រាកដថា អ្នកបើកបរដែលបានស្លាប់នោះគឺជាជនសង្ស័យ ឬយ៉ាងណានៅឡើយ។

ពិធីបុណ្យខាងលើតែងត្រូវបានប្រារព្ធឡើងរៀងរាល់ឆ្នាំ និងមានមនុស្សចូលរួមប្រហែល 100,000 នាក់រៀងរាល់ថ្ងៃ។ តំបន់ Monterey មានប្រជាជនដើមកំណើតអាស៊ីប្រហែល 65%។

ពិធីអំណរបុណ្យចូលឆ្នាំថ្មីចន្ទគតិកាលពីថ្ងៃទី 22 មករា 2023 ខាងលើត្រូវបានលុបចោលក្រោយពីមានហេតុការណ៍បាញ់ប្រហារនេះ៕

ប៉ូលិសរកឃើញសាកសពមនុស្សម្នាក់ក្នុងរថយន្តពណ៌សមួយគ្រឿង

January 23, 2023

នាយករដ្ឋមន្ត្រីអង់គ្លេសត្រូវប៉ូលិសចរាចរណ៍ផាកពិន័យព្រោះមិនដាក់ខ្សែក្រវាត់សុវត្ថិភាព

នាយករដ្ឋមន្ត្រី Rishi Sunak អាចត្រូវបានផាកពិន័យឡើងដល់ 620 ដុល្លារអាម៉េរិក ដោយសារមិនបានដាក់ខ្សែក្រវាត់សុវត្ថិភាពនៅពេលអង្គុយក្នុងរថយន្តកំពុងផ្លាស់ទី។

«ថ្ងៃនេះ យើងបានប្រកាសពីការផាកពិន័យថេរចំពោះបុរសម្នាក់អាយុ 42 ឆ្នាំ មកពីទីក្រុងឡុងដ៍» ប៉ូលិសស្រុក Lancashire នៅភាគពាយព្យប្រទេសអង់គ្លេសបានឱ្យដឹងដូច្នេះនៅលើ Twitter កាលពីថ្ងៃទី 20 មករា 2023 ដែលចង់រម្លឹកដល់ករណីនាយករដ្ឋមន្ត្រី Rishi Sunak។

ប្រកាសស្ដីពីការផាកពិន័យថេរគឺមានន័យថា លោក Sunak អាចបង់ប្រាក់ពិន័យដើម្បីបញ្ចៀសការឡើងតុលាការ។ ចំណែកអ្នកនាំពាក្យរបស់ការិយាល័យនាយករដ្ឋមន្ត្រីអង់គ្លេសបានប្រាប់ថា មេដឹកនាំអង់គ្លេស «សារភាពថា បានបង្កឱ្យមានកំហុស»។

កម្រិតនៃការផាកពិន័យចំពោះអ្នកមិនដាក់ខ្សែក្រវាត់សុវត្ថិភាពនៅលើកៅអីរថយន្តដែលកំពុងផ្លាស់ទីនៅអង់គ្លេសគឺ 100 ផោន (124 ដុល្លារអាម៉េរិក)។ បើសិនករណីនេះត្រូវបានឡើងដល់តុលាការ លោក Sunak អាចនឹងត្រូវបង់ប្រាក់ឡើងដល់ 500 ផោន (620 ដុល្លារអាម៉េរិក)។

មុននោះ កាលពីថ្ងៃទី 19 មករា នាយករដ្ឋមន្ត្រីអង់គ្លេសដើមកំណើតឥណ្ឌា លោក Rishi Sunak បានបង្ហោះវីដេអូលើបណ្ដាញសង្គម។ ក្នុងវីដេអូនេះបង្ហាញថា លោក Sunak មិនបានដាក់ខ្សែក្រវាត់សុវត្ថិភាពនៅពេលរថយន្តកំពុងផ្លាស់ទី។ ក្រោយមក លោកក៏បានសូមអភ័យទោស និងបានលុបវីដេអូនេះចេញពី Instagram។

សមត្ថកិច្ចក្នុងតំបន់ បន្ទាប់មកក៏បានប្រកាសធ្វើការស៊ើបអង្កេត និងបានបញ្ជាក់ថា នាយករដ្ឋមន្ត្រីអង់គ្លេស បានរំលោភច្បាប់ចរាចរណ៍ពិតមែន៕

January 21, 2023

លោតម៉ុងសាយក្រោមទឹកដើម្បីទទួលអំណរបុណ្យចូលឆ្នាំថ្មីប្រពៃណីចិន

(ម៉ាឡេស៊ី) – អ្នកមុជទឹកមួយក្រុមនៅឯអាងពិព័រណ៍ត្រីមួយកន្លែងក្នុងរដ្ឋធានីកូឡាឡាំពួ ស្លៀកពាក់ឈុតម៉ុងសាយ និងបំពាក់ដោយបំពង់អុកស៊ីសែន នាំគ្នាលោតសម្ដែងក្នុងទឹកអាងពិព័រណ៍ត្រី Aquaria KLCC។

«ការសម្ដែងម៉ុងសាយនៅលើគោកស្ទើរតែទាំងអស់ ទាមទារឱ្យមានភាពទន់ភ្លន់កម្រិតខ្ពស់។ យើងបង្កើតព្រឹត្តិការណ៍លោតម៉ុងសាយក្រោមទឹក ហើយនេះក៏ទាមទារឱ្យមានបច្ចេកទេសប្រហាក់ប្រហែល គ្រាន់តែខុសត្រង់ថា នៅពេលអ្នកសម្ដែងលោតឡើង ពួកគេនឹងត្រូវអណ្ដែតដោយសារស្ថិតនៅក្នុងទឹក» Daryl Foong ប្រធានអាងពិព័រណ៍ត្រី Aquaria KLCC កាលពីថ្ងៃទី 18 បានឱ្យដឹងដូច្នេះ។

អាងពិព័រណ៍ត្រី Aquaria KLCC ជួលក្រុមអ្នកមុជទឹកមកធ្វើជាអ្នកលោតម៉ុងសាយនៅឯបឹងចិញ្ចឹមត្រី និងអណ្ដើកសមុទ្រ។ ពួកគេមានក្រុមតន្ត្រីប្រគំភ្លេងកំដរនៅខាងក្រៅដើម្បីបង្កើតបរិយាកាសអ៊ឹកធឹកសម្រាប់ការសម្ដែងរបស់ក្រុមលោតម៉ុងសាយក្នុងទឹក។

ក្រុមអ្នកលោតម៉ុងសាយនេះ ប្រដាប់ដោយបំពង់អុកស៊ីសែន និងឈុតម៉ុងសាយប្រភេទស្រាលជាងធម្មតា ដើម្បីធ្វើចលនាក្នុងទឹកបានរហ័ស។ អាងពិព័រណ៍ត្រី Aquaria KLCC បានបង្កើតឱ្យមានព្រឹត្តិការណ៍អបអរចូលឆ្នាំប្រពៃណីចិនបែបនេះជាច្រើនឆ្នាំមកហើយ។

Daryl Foong ឱ្យដឹងថា ក្រុមអ្នកមុជទឹកត្រូវឆ្លងកាត់ការហ្វឹកហាត់ដើម្បីអាចសម្ដែងក្បាច់រាំទៅតាមក្បួននៃការលោតម៉ុងសាយ។

ការលោតម៉ុងសាយគឺជាទំនៀមទម្លាប់បុរាណដើម្បីទទួលអំណរបុណ្យចូលឆ្នាំថ្មីប្រពៃណីរបស់ពលរដ្ឋដើមកំណើតចិននៅម៉ាឡេស៊ី។ គិតត្រឹមឆ្នាំ 2019 ប្រទេសនេះមានប្រជាជនសរុប 32 លាននាក់ ដែលភាគច្រើនជាជនជាតិមូស្លីម និង ¼ គឺជាពលរដ្ឋដើមកំណើតចិន៕

*វីដេអូ «លោតម៉ុងសាយក្រោមទឹកដើម្បីទទួលអំណរបុណ្យចូលឆ្នាំថ្មីប្រពៃណីចិន»

January 21, 2023

ប្រជ្រៀតជាន់គ្នាក្នុងព្រឹត្តិការណ៍បាល់ទាត់ Arabian Gulf Cup បណ្ដាលឱ្យមនុស្សស្លាប់ និងរងរបួសច្រើនសិបនាក់

ហេតុការណ៍ប្រជ្រៀតជាន់គ្នាក្នុងព្រឹត្តិការណ៍បាល់ទាត់ Arabian Gulf Cup កើតឡើងក្បែរច្រកចេញ-ចូលរបស់កីឡដ្ឋានមួយនៅទីក្រុង Basra ប្រទេសអ៊ីរ៉ាក់ បណ្ដាលមនុស្សរាប់សិបនាក់រងរបួស និងស្លាប់។

កាលពីថ្ងៃទី 19 មករា ហេតុការណ៍ប្រជ្រៀតជាន់គ្នាមួយបានកើតឡើងខាងក្រៅកីឡដ្ឋានមួយនៅអ៊ីរ៉ាក់ នៅប៉ុន្មានម៉ោងមុនការប្រកួតផ្ដាច់ព្រ័ត្រដណ្ដើមពានរង្វាន់ជើងឯកបាល់ទាត់ឈូងសមុទ្រអារ៉ាប់ (Arabian Gulf Cup) រវាងអ៊ីរ៉ាក់ និងអូម៉ង់ បណ្ដាលឱ្យមនុស្សម្នាក់ស្លាប់ និង 83 នាក់រងរបួស។

ហេតុការណ៍នេះកើតឡើងក្បែរច្រកចេញ-ចូលរបស់កីឡដ្ឋាននៅទីក្រុង Basra ភាគខាងត្បូងប្រទេសអ៊ីរ៉ាក់ នៅពេលអ្នកគាំទ្ររាប់ពាន់នាក់ព្យាយាមចូលទៅខាងក្នុងកីឡដ្ឋាន។

ក្នុងការប្រកួតវគ្គផ្ដាច់ព្រ័ត្រខាងលើ អ៊ីរ៉ាក់បានឈ្នះអូម៉ង់ 3-2 និងបានក្លាយជាជើងឯក Arabian Gulf Cup ជាលើកដំបូងរាប់ចាប់ពីឆ្នាំ 1988។

Arabian Gulf Cup ដែលជាពានរង្វាន់បាល់ទាត់សម្រាប់ 8 ប្រទេសនៅតំបន់ឈូងសមុទ្រអារ៉ាប់ តែងតែធ្វើឡើង 2 ឆ្នាំម្ដង។ Arabian Gulf Cup លើកចុងក្រោយនេះត្រូវបានសម្ពោធបើកការប្រកួតកាលពីថ្ងៃទី 6 មករា 2023 ដោយមានការចូលរួមពីប្រធាន FIFA លោក Gianni Infantino ផងដែរ៕

January 20, 2023

ក្មេងអាយុ 10 ឆ្នាំដែលជាប់ 21 ថ្ងៃ ក្នុងសសរបេតុងក្រោមដីជម្រៅ 35 ម៉ែត្រនៅវៀតណាម ត្រូវបានយកឡើងមកលើហើយ

(វៀតណាម) – ក្រោយរយៈពេល 21 ថ្ងៃដែលបានធ្លាក់ចូលជាប់ក្នុងប្រហោងសសរបេតុងក្រោមដីជម្រៅ 35 ម៉ែត្រ នៅក្នុងការដ្ឋានសាងសង់ស្ពានមួយកន្លែងនៅខេត្ត Dong Thap ចុក្រោយ សាកសពរបស់ក្មេងប្រុសរងគ្រោះ Thai Ly Hao Nam ក៏ត្រូវបានយកឡើងមកលើកាលពីវេលាទៀបភ្លឺថ្ងៃទី 20 មករា 2023។

នៅវេលាម៉ោង 01 និង 20 នាទី ក្រុមសង្គ្រោះបានចុះដល់ជម្រៅ 25 ម៉ែត្រខាងក្នុងបំពង់ដែកព័ទ្ធជុំវិញសសរបេតុងប្រហោងក្នុង ជាទីដែលសពរបស់ក្មេងប្រុសវ័យ 10 ឆ្នាំ ឹកំពុងជាប់ខាងក្នុង។ ជិត 2 ម៉ោងក្រោយមក ក្រុមសង្គ្រោះក៏យកសាកសពឡើងមកលើបានសម្រេច។

មឈូស និងសាកសពរបស់ក្មេងរងគ្រោះនេះត្រូវដឹកទៅកាន់ផ្ទះដែលនៅឆ្ងាយពីកន្លែងកើតហេតុប្រហែល 1 គីឡូម៉ែត្រ ដើម្បីធ្វើបុណ្យបញ្ចុះសព។

អាជ្ញាធរវៀតណាមបានឱ្យដឹងថា លទ្ធផលនៃការធ្វើកោសល្យវិច្ច័យបង្ហាញថា ក្មេងរងគ្រោះបានស្លាប់ដោយសាររបួសច្រើនកន្លែងពេលធ្លាក់ប៉ះនឹងជញ្ជាំងសសរ និងស្ថិតក្នុងទឹក។ បន្ទាប់ពីបានធ្វើបុណ្យបញ្ចុះសពរួចរាល់ សមត្ថកិច្ចនឹងចាប់ផ្ដើមស៊ើបអង្កេតរកមូលហេតុនៃគ្រោះថ្នាក់នេះ ហើយនឹងមានចំណាត់ការចំពោះបុគ្គល ឬអង្គភាពដែលបានបង្កឱ្យមានកំហុសឆ្គង។

ករណីធ្លាក់ក្មេងចូលបំពង់សសរបេតុងខាងលើនេះបានកើតឡើងកាលពីម៉ោងប្រហែល 11 និង 30 នាទី ថ្ងៃទី 31 ធ្នូ 2022។ មុនពេលកើតហេតុ ក្មេងរងគ្រោះមានឈ្មោះថា Thai Ly Hao Nam (អាយុ 10 ឆ្នាំ) និងក្មេង 3 នាក់ទៀត បានចូលក្នុងការដ្ឋានសាងសង់ស្ពានមួយកន្លែងដើម្បីរើសអេតចាយ។ ប៉ុន្តែ Hao Nam ក៏បានធ្លាក់ទៅក្នុងបំពង់សសរបេតុងប្រហែលដែលត្រូវបានដាំទៅក្នុងដីជម្រៅប្រហែល 35 ម៉ែត្រ។ ប្រហែលកន្លះម៉ោងក្រោយពីកុមារនេះបានជួបគ្រោះថ្នាក់ កម្លាំងសង្គ្រោះក៏បានទៅដល់កន្លែងកើតហេតុ និងចាប់ផ្ដើមដំណើរការជួយសង្គ្រោះ៕

January 20, 2023

ជិតកើតមានបាតុភូត «ព្រះចន្ទថ្មី – New Moon» លើកដំបូងក្នុងអំឡុងជិត 1,000 ឆ្នាំកន្លង

នៅវេលាម៉ោងប្រហែល 03 និង 53 នាទី ថ្ងៃទី 22 មករា 2023 (ម៉ោងនៅកម្ពុជា) ព្រះចន្ទថ្មី (New Moon) នឹងមានគម្លាតពីផែនដីប្រហែល 356,568 គីឡូម៉ែត្រ ដែលជារយៈចម្ងាយជិតបំផុតរាប់ចាប់ពីមជ្ឈិមសម័យ។

ដោយសារតែស្ថិតនៅក្បែរផែនដីពេក ព្រះចន្ទនៅថ្ងៃទី 22 មករាខាងមុខ នឹងជាព្រឹត្តិការណ៍ព្រះចន្ទថ្មីធំជាងគេបង្អស់ដែលបង្ហាញខ្លួនលើមេឃ រាប់ចាប់ពីថ្ងៃទី 03 ធ្នូ 1030 នេះបើតាមទិន្នន័យនៅលើគេហទំព័រ Timeanddate។ ព្រឹត្តិការណ៍ព្រះចន្ទថ្មីនេះនឹងកើតឡើងជាថ្មីម្ដងទៀតនៅថ្ងៃទី 20 មករា 2368។

គន្លងគោចររបស់ព្រះចន្ទជុំវិញផែនដីមិនមែនមូលល្អឥតខ្ចោះនោះទេ ប៉ុន្តែវាមានរាងប្រហាក់ប្រហែលនឹងពងក្រពើ ដែលនេះមានន័យថា គម្លាតរវាងព្រះចន្ទ និងផែនដីគឺមិនដូចគ្នាគ្រប់ពេលឡើយ ក្នុងនោះចំណុចឆ្ងាយបំផុតត្រូវបានហៅថា Apogee និងចំណុចជិតបំផុតហៅថា Perigee។

ក្នុងព្រឹត្តិការណ៍ព្រះចន្ទថ្មី ព្រះចន្ទស្ថិតនៅចន្លោះរវាងព្រះអាទិត្យ និងផែនដី។ ពេលនោះ មនុស្សលើផែនដីមិនអាចមើលឃើញព្រះចន្ទឡើយ ដោយសារចំហៀងដែលងងឹតរបស់ព្រះចន្ទបែរមកកាន់ផែនដី ហើយវាក៏កើតឡើងនៅពេលថ្ងៃ និងចំថ្ងៃ 15 រោច។ ក្នុងព្រឹត្តិការណ៍នេះ ព្រះចន្ទរះ និងលិចជិតស្ទើរតែដូចទៅនឹងព្រះអាទិត្យ ធ្វើឱ្យភ្នែកធម្មតាមិនអាចមើលឃើញព្រះចន្ទ៕

January 20, 2023

សហរដ្ឋអាម៉េរិកប្រកាសអំពីកញ្ចប់ជំនួយយោធាថ្មីតម្លៃ 2.5 ពាន់លានដុល្លារសម្រាប់អ៊ុយក្រែន

ក្រសួងការពារជាតិអាម៉េរិក ប្រកាសឱ្យដឹងអំពីកញ្ចប់ជំនួយយោធាថ្មីតម្លៃ 2.5 ពាន់លានដុល្លារសម្រាប់អ៊ុយក្រែន ក្នុងនោះមានទាំងរថពាសដែក រួមនឹងអាវុធធំតូចជាច្រើនផ្សេងទៀត។

យោងតាមប្រកាសមួយកាលពីថ្ងៃទី 19 មករា របស់មន្ទីរបញ្ចកោណ កញ្ចប់ជំនួយថ្មីបំផុតនេះរួមមាន រថពាសដែក Bradley 59 គ្រឿង, រថពាសដែក Stryker 90 គ្រឿង, ប្រព័ន្ធការពារដែនអាកាស Avenger និងអាវុធតូចធំច្រើនប្រភេទទៀត ប៉ុន្តែមិនមានរថក្រោះដូចការស្នើរបស់អ៊ុយក្រែននោះទេ។

កញ្ចប់ជំនួយថ្មីបំផុតនេះបានធ្វើឱ្យជំនួយយោធាសរុបរបស់សហរដ្ឋអាម៉េរិក សម្រាប់អ៊ុយក្រែន ឡើងដល់ជាង 26.7 ពាន់លានដុល្លារ រាប់ចាប់តាំងពីសង្គ្រាមនៅអ៊ុយក្រែនបានផ្ទុះឡើង។

រថពាសដែក Stryker មិនក្រាស់ដូចរថក្រោះ ប៉ុន្តែវាធ្វើសកម្មភាពបានល្អនៅក្នុងភូមិសាស្ត្រដែលមានព្រឹល ខ្សាច់ និងល្បាប់។ រថពាសដែក Stryker អាចដឹកទាហាន 9 នាក់ ខណៈដែលរថពាសដែក Bradley អាចដឹកបាន 6 នាក់។

អាម៉េរិកប្រើប្រាស់រថពាសដែក Stryker តាំងពីឆ្នាំ 2002 រហូតដល់បច្ចុប្បន្ន ក្នុងនោះ Stryker មួយគ្រឿងមានតម្លៃប្រហែល 4.9 លានដុល្លារ។ Stryker ត្រូវបានបំពាក់កាំភ្លើងធំប្រភេទ 30 មម, 40 មម ឬ 105 មម អាស្រ័យលើកំណែនីមួយៗ និងមានកាំភ្លើងយន្ត 12.7 មម និង 7.62 មម។ រថពាសដែកនេះអាចរត់ក្នុងល្បឿន 97 គីឡូម៉ែត្រ/ម៉ោង និងមានរង្វង់ប្រតិបត្តិការប្រហែល 500 គីឡូម៉ែត្រ។

ចំណែករថពាសដែក Bradley វិញ បំពាក់កាំភ្លើងធំ 25 មម, មីស៊ីលប្រឆាំងរថក្រោះ និងអាចធ្វើសកម្មភាពក្នុងរង្វង់ 480 គីឡូម៉ែត្រ៕

January 20, 2023

គ្រាប់បែកប្រល័យលោកផ្ទុះ តើគួរលាក់ខ្លួននៅទីណាទើបមានសុវត្ថិភាពបំផុត?

(ប្រទេសស៊ីប) – យោងទៅតាមការបង្ហាញត្រាប់លើកុំព្យូទ័រ ក្រុមអ្នកជំនាញកំណត់បានទីកន្លែងដែលបង្កគ្រោះថ្នាក់ និងសុវត្ថិភាពបំផុតចំពោះមនុស្សនៅក្នុងផ្ទះដែលស្ថិតនៅមិនឆ្ងាយពីកន្លែងផ្ទុះគ្រាប់បែកនុយក្លេអែរ។

ពេលគ្រាប់បែកប្រល័យលោកផ្ទុះ គ្រប់យ៉ាងដែលនៅក្បែរនឹងត្រូវបាត់ខ្លួនភ្លាមៗ។ វិទ្យុសកម្មអាចប៉ះពាល់ដល់សុខភាពមនុស្ស ទោះជាស្ថិតនៅឆ្ងាយ។ គ្រោះថ្នាក់ធំមួយទៀតសម្រាប់អ្នកស្ថិតនៅក្នុងរយៈចម្ងាយមធ្យមពីកន្លែងផ្ទុះ នោះគឺរលកខ្យល់កញ្ឆក់ដែលមានកម្លាំងខ្លាំង និងរហ័ស អាចបក់បំប៉ើងមនុស្សទៅលើអាកាស។

ក្រុមអ្នកស្រាវជ្រាវនៅសាកលវិទ្យាល័យ Nicosia ប្រទេសស៊ីប (Cyprus) បានធ្វើការបង្ហាញត្រាប់លើកុំព្យូទ័រករណីផ្ទុះគ្រាប់បែកនុយក្លេអែរមួយគ្រាប់ដែលបំពាក់លើមីស៊ីលអន្តរទ្វីប និងរលកកញ្ឆក់ដែលកើតឡើងពីការផ្ទុះ ហើយវាយតម្លៃផលប៉ះពាល់ដល់មនុស្សដែលលាក់ខ្លួនក្នុងផ្ទះ។ លទ្ធផលនៃការវិភាគថ្មីនេះត្រូវបានចុះផ្សាយលើទស្សនាវដ្ដី Physics of Fluids កាលពីថ្ងៃទី 17 មករា។

នៅក្នុងតំបន់រងការខូចខាតកម្រិតមធ្យម រលកខ្យល់កញ្ឆក់មានកម្លាំងអាចកម្ទេចផ្ទះមួយចំនួន និងបង្កគ្រោះថ្នាក់ដល់មនុស្សនៅខាងក្រៅ ប៉ុន្តែ អគាររឹងមាំដែលសាងសង់ពីបេតុងជាដើម អាចទប់ទល់បាន។ យោងតាមការពិសោធថ្មីនេះ ការលាក់ខ្លួនក្នុងផ្ទះរឹងមាំនៅតែមិនទាន់គ្រប់គ្រាន់ក្នុងការរក្សាជីវិត។ បន្ទប់ដែលចង្អៀតអាចបង្កើនល្បឿនរបស់ខ្យល់ ហើយនៅពេលមានរលកកញ្ឆក់ ខ្យល់នឹងជះត្រលប់ពីជញ្ជាំង និងអាចបង្កើតបានជាកម្លាំងមួយដែលប្រហាក់ប្រហែលនឹងទម្ងន់របស់មនុស្ស 18 នាក់។

ករណីធ្វើតេស្តគ្រាប់បែកនុយក្លេអែរចុងក្រោយទាំង 5 របស់ពិភពលោក

«កន្លែងដែលគ្រោះថ្នាក់បំផុតនៅក្នុងផ្ទះដែលយើងត្រូវចៀសវាង រួមមាន បង្អួច ផ្លូវរួមក្នុងអគារ និងទ្វារចេញចូល។ ពេលស្ថិតក្នុងបន្ទប់ដែលនៅទល់មុខនឹងកន្លែងផ្ទុះ យើងនៅតែអាចមានសុវត្ថិភាព បើសិនលាក់ខ្លួនត្រង់ជ្រុងណាមួយក្នុងបន្ទប់» Ioannis Kokkinakis សមាជិកម្នាក់របស់ក្រុមខាងលើឱ្យដឹងដូច្នេះ។

ក្រុមអ្នកវិទ្យាសាស្ត្រសង្កត់ធ្ងន់ថា អ្នកមានពេលតែប៉ុន្មានវិនាទីប៉ុណ្ណោះក្នុងការរត់រកជម្រក បន្ទាប់ពីមានករណីផ្ទុះគ្រាប់បែកប្រល័យលោក ហើយក្នុងអគារនានាសុទ្ធតែមានប្រព័ន្ធខ្សែភ្លើង និងហ្កាសជាដើម ដូច្នេះនឹងមានអគ្គិភ័យកើតឡើង។ គ្រប់គ្នាត្រូវតែយកចិត្តទុកដាក់រាល់ហានិភ័យខាងលើ និងប្រញាប់រកដំណោះស្រាយភ្លាមៗ នេះបើតាម Drikakis។

ក្រុមអ្នកវិទ្យាសាស្ត្រសង្ឃឹមថា ការផ្ទុះគ្រាប់បែកនុយក្លេអែរនឹងមិនកើតឡើង ប៉ុន្តែពួកគេជឿថា ការយល់ដឹងអំពីផលវិបាកដែលកើតឡើងពីការផ្ទុះនេះ នឹងជួយបញ្ចៀសការស្លាប់ ឬរងរបួសធ្ងន់ និងបង្កភាពងាយស្រួលដល់ការជួយសង្គ្រោះ៕

January 19, 2023

Category: អន្តរជាតិ