អន្តរជាតិ - La Reine Media

អូស្ត្រាលីមានគម្រោងទិញនាវាមុជទឹកតម្លៃបីពាន់លានដុល្លាររបស់អាម៉េរិក

ប្រទេសអូស្ត្រាលីមានផែនការទិញនាវាមុជទឹកថ្នាក់ Virginia ទំនើបបំផុតចំនួនប្រាំគ្រឿងរបស់សហរដ្ឋអាម៉េរិក ទន្ទឹមនឹងនេះក៏អនុញ្ញាតឱ្យវ៉ាស៊ីងតោនដាក់ពង្រាយនាវាមុជទឹកនៅប្រទេសនេះ។

មន្ត្រីបួនរូបរបស់សហរដ្ឋអាម៉េរិក សុំមិនបញ្ចេញឈ្មោះ កាលពីថ្ងៃទី 08 មីនា បានឱ្យដឹងថា ការទិញដូរនាវាមុជទឹកថ្នាក់ Virginia ប្រាំគ្រឿងក្នុងទសវត្សរ៍ឆ្នាំ 2030 នឹងជាផ្នែកមួយក្នុងកិច្ចព្រមព្រៀង AUKUS រវាងអូស្ត្រាលី សហរដ្ឋអាម៉េរិក និងអង់គ្លេស។ នាវាមុជទឹកថ្នាក់ Virginia សម្រាប់ទ័ពជើងទឹកអាម៉េរិក មានតម្លៃពី 2.8 ដល់ 3.5 ពាន់លានដុល្លារ ប៉ុន្តែមិនទាន់ដឹងច្បាស់ថា អូស្ត្រាលីបានជ្រើសរើសកំណែណាមួយនៅឡើយ។

យោងតាមកិច្ចព្រមព្រៀង សហរដ្ឋអាម៉េរិកនឹងបញ្ជូននាវាមុជទឹកនុយក្លេអែរទៅធ្វើទស្សនកិច្ចនៅអូស្ត្រាលីជារៀងរាល់ឆ្នាំ មុនពេលបញ្ជូននាវាមុជទឹកមួយចំនួនទៅបោះទ័ពរយៈពេលយូរនៅភាគខាងលិចប្រទេសនេះ ដោយចាប់ផ្ដើមពីឆ្នាំ 2027។ ទីក្រុងកង់បេរ៉ានឹងទិញនាវាមុជទឹកថ្នាក់ Virginia ចំនួនបីគ្រឿងនៅដើមទសវត្សរ៍ឆ្នាំ 2030 អមនឹងជម្រើសទិញបន្ថែមពីរគ្រឿងទៀត បើសិនចាំបាច់។

កិច្ចព្រមព្រៀង AUKUS គ្រោងនឹងបញ្ចប់នៅចុងទសវត្សរ៍ឆ្នាំ 2030 នៅពេលដែលអូស្ត្រាលីបានទទួលនាវាមុជទឹកថ្មីដែលរចនាឡើងដោយអង់គ្លេស និងបំពាក់បច្ចេកវិទ្យាអាម៉េរិក។

ទាក់ទងនឹងព័ត៌មានខាងលើនេះ សេតវិមាន និងមន្ទីរបញ្ចកោណ មិនទាន់បញ្ចេញប្រតិកម្មអ្វីនៅឡើយ។ យោងតាមកិច្ចព្រមព្រៀង AUKUS ដែលចុះហត្ថលេខាកាលពីឆ្នាំ 2021 អូស្ត្រាលីអាចទិញនាវាមុជទឹកនុយក្លេអែរពីអាម៉េរិក។ វ៉ាស៊ីងតោន កង់បេរ៉ា និងក្រុងឡុង បានចំណាយពេល 18 ខែ ក្នុងការចរចាអំពីលទ្ធភាពដែលអូស្ត្រាលីអាចមានបច្ចេកវិទ្យាម៉ាស៊ីននុយក្លេអែរដ៏សម្ងាត់របស់អាម៉េរិក។

ការទិញដូរដែលមានតម្លៃរាប់សិបពាន់លានដុល្លារខាងលើ ក៏ជារបត់ដំបូងដែលអាម៉េរិកនាំចេញបច្ចេកវិទ្យានាវាមុជទឹកដើរដោយថាមពលនុយក្លេអែរ រាប់ចាប់ពីឆ្នាំ 1960 បន្ទាប់ពីបានជួយឱ្យអង់គ្លេសកសាងក្រុមនាវាចម្បាំង៕

March 9, 2023

អ្នកអវកាសរុស្ស៊ីជិតបានជិះយាន SpaceX ឡើងទៅកាន់ទីអវកាស

ណាសាមានផែនការប្រើប្រាស់យានអវកាសរបស់ SpaceX ដើម្បីនាំអវកាសចររុស្ស៊ីយ៉ាងតិចពីរនាក់ទៀត ឡើងទៅកាន់ស្ថានីយអវកាសអន្តរជាតិ (ISS)។

ណាសាកំពុងចរចាដើម្បីបន្ថែមអវកាសចររុស្ស៊ីទៅក្នុង Crew-7 និង Crew-8 ដែលជាបេសកកម្មបន្ទាប់នៃគម្រោងនាំអ្នកអវកាសឡើងទៅកាន់ ISS។ នេះបើតាមទំព័រ Space ចុះផ្សាយកាលពីថ្ងៃទី 07 មីនា។

កិច្ចព្រមព្រៀងក្នុងការបញ្ចូលអ្នកអវកាសរុស្ស៊ីទៅក្នុងបេសកកម្ម Crew-7 ដែលគ្រោងនឹងបាញ់បង្ហោះនៅរដូវស្លឹកឈើជ្រុះឆ្នាំនេះ កំពុងត្រូវបានចរចាជាមួយរដ្ឋាភិបាលរុស្ស៊ី ហើយបន្ទាប់មកនឹងវិលមកចរចាជាមួយណាសាដើម្បីសម្រេចកិច្ចព្រមព្រៀងចុងក្រោយ។ Kathy Lueders អនុប្រធានផ្នែកគ្រប់គ្រងបេសកកម្មអវកាសប្រចាំណាសា ឱ្យដឹងដូច្នេះនៅក្នុងកិច្ចប្រជុំមួយដែលធ្វើឡើងបន្ទាប់ពីបេសកកម្ម Crew-6 ត្រូវបានបាញ់បង្ហោះដោយជោគជ័យកាលពីថ្ងៃទី 02 មីនា 2023។

Lueders បន្ថែមថា អាម៉េរិក និងរុស្ស៊ី កំពុងបន្តបញ្ជូនអវកាសចរទៅកាន់អវកាសតាមរយៈយានរបស់ប្រទេសនីមួយៗ ក្នុងករណីយាន Soyuz របស់រុស្ស៊ី ឬយានរបស់អាម៉េរិកមិនអាចប្រើប្រាស់ក្នុងរយៈពេលយូរ។ ការចរចាស្ដីពី Crew-8 ក៏កំពុងត្រូវបានធ្វើឡើង ប៉ុន្តែបេសកកម្មនេះ តាមផែនការ នឹងមិនត្រូវបានបាញ់បង្ហោះមុនឆ្នាំ 2024 ឡើយ។

ណាសាធ្លាប់ពឹងផ្អែកទាំងស្រុងលើរុស្ស៊ីក្នុងការនាំអ្នកអវកាសឡើងទៅកាន់គន្លងគោចរផែនដី។ ស្ថាប័ននេះបានដាក់យានអវកាស Shuttle ឱ្យចូលនិវត្តន៍កាលពីឆ្នាំ 2011។ ក្នុងអំឡុងប្រហែលមួយទសវត្សរ៍មកនេះ អវកាសចរដែលឡើងទៅកាន់ ISS សុទ្ធតែប្រើប្រាស់យាន Soyuz ហើយណាសាត្រូវចេញថ្លៃនៅពេលប្រើប្រាស់យានរបស់រុស្ស៊ី។

បច្ចុប្បន្ន ណាសាកំពុងត្រៀមយានអវកាសចំនួនពីរដើម្បីជំនួសឱ្យយាន Shuttle នោះគឺយានអវកាស Crew Dragon របស់ SpaceX និង Starliner របស់ Boeing៕

March 9, 2023

ប្អូនស្រីរបស់លោក Kim Jong-un ថា «ការបាញ់ទម្លាក់មីស៊ីលកូរ៉េខាងជើងគឺជាការប្រកាសសង្គ្រាម»

ប្អូនស្រីបង្កើតរបស់មេដឹកនាំកូរ៉េខាងជើង យល់ថា រាល់សកម្មភាពរបស់សហរដ្ឋអាម៉េរិកដើម្បីបាញ់ទម្លាក់មីស៊ីលរបស់កូរ៉េខាងជើងដែលបាញ់សាកល្បង នឹងត្រូវបានចាត់ទុកថាជាការប្រកាសសង្គ្រាម។

«ការសាកល្បងអាវុធយុទ្ធសាស្ត្ររបស់កូរ៉េខាងជើង សុទ្ធតែធ្វើឡើងនៅលើដែនអាកាស និងដែនសមុទ្រដែលស្ថិតនៅខាងក្រៅសិទ្ធិអារកាត់របស់សហរដ្ឋអាម៉េរិក និងមិនគំរាមកំហែងដល់សុវត្ថិភាពរបស់បណ្ដាប្រទេសជិតខាង។ រាល់សកម្មភាពប្រតិកម្មយោធា មានដូចជាការបាញ់ស្កាត់មីស៊ីលជាដើម នឹងត្រូវបានចាត់ទុកជាការប្រកាសសង្គ្រាមយ៉ាងច្បាស់សំដៅលើកូរ៉េខាងជើង» លោកស្រី Kim Yo-Jong ប្អូនស្រីបង្កើតរបស់មេដឹកនាំ Kim Jong-un ប្រកាសនាថ្ងៃនេះដូច្នេះ។

ការព្រមាននេះត្រូវបានលោកស្រី Kim Yo-jong លើកឡើង បន្ទាប់ពីសារព័ត៌មានកូរ៉េខាងត្បូងកាលពីថ្ងៃទី 06 មីនា បានដកស្រង់សម្ដីរបស់ John Aquilino មេបញ្ជាការកងទ័ពអាម៉េរិកប្រចាំតំបន់ឥណ្ឌូ-ប៉ាស៊ីហ្វ៊ិក និយាយថា វ៉ាស៊ីងតោននឹងបាញ់ស្កាត់ភ្លាមៗទៅលើមីស៊ីលផ្លោងអន្តរទ្វីប (ICBM) ដែលទីក្រុងព្យុងយ៉ាងបាញ់ទៅកាន់មហាសមុទ្រប៉ាស៊ីហ្វ៊ិក។

លោកស្រី Kim Yo-jong និងមេដឹកនាំកូរ៉េខាងជើង លោក Kim Jong-un

ភាគីខាងសហរដ្ឋអាម៉េរិក មិនទាន់មានប្រតិកម្មអ្វីនៅឡើយ ទាក់ទិននឹងការព្រមានខាងលើរបស់លោកស្រី Kim Yo-jong។

កន្លងមក សហរដ្ឋអាម៉េរិក និងបណ្ដាប្រទេសលោកខាងលិចមិនធ្លាប់បានបាញ់ទម្លាក់ ឬរកវិធីទប់ស្កាត់ករណីសាកល្បងមីស៊ីលអន្តរទ្វីបរបស់ទីក្រុងព្យុងយ៉ាង ដែលត្រូវបានហាមឃាត់ទៅតាមសេចក្ដីសម្រេចរបស់ក្រុមប្រឹក្សាសន្តិសុខនៃអង្គការសហប្រជាតិ។ កូរ៉េខាងជើងតែងបាញ់សាកល្បងមីស៊ីលទៅតាមជ្រុងខ្ពស់ដើម្បីកាត់បន្ថយរយៈចម្ងាយរបស់ក្បាលគ្រាប់ និងទើបតែបាញ់ ICBM រំលងទឹកដីជប៉ុនបានប៉ុន្មានដងប៉ុណ្ណោះ៕

March 7, 2023

ឥណ្ឌូណេស៊ីផ្ដល់ជំនួយសម្រាប់ការទិញយានយន្តអគ្គិសនីចាប់ពីថ្ងៃទី 20 មីនា

មន្ត្រីឥណ្ឌូណេស៊ីបានឱ្យដឹងថា រដ្ឋាភិបាលនឹងផ្ដល់ជំនួយដល់ការទិញម៉ូតូអគ្គិសនីថ្មីរហូតដល់ 200,000 គ្រឿង និងការប្ដូរម៉ូតូសាំងទៅប្រើម៉ូតូអគ្គិសនីចំនួន 50,000 គ្រឿងនៅក្នុងឆ្នាំនេះ។

លោក Luhut Pandjaitan រដ្ឋមន្ត្រីក្រសួងសម្របសម្រួលកិច្ចការសមុទ្រ និងវិនិយោគឥណ្ឌូណេស៊ី បានឱ្យដឹងថា រដ្ឋាភិបាលប្រទេសនេះនឹងចាប់ផ្ដើមអនុវត្តគោលនយោបាយផ្ដល់ប្រាក់ឧបត្ថម្ភសម្រាប់ការប្រើប្រាស់យានយន្តដែលដំណើរការដោយថាមពលអគ្គិសនី (KBLBB) ចាប់ពីថ្ងៃទី 20 មីនា 2023 ដើម្បីលើកទឹកចិត្តឱ្យប្រជាជនងាកមកប្រើប្រាស់យានយន្តដែលមិនបំភាយឧស្ម័ន និងទាក់ទាញការវិនិយោគក្នុងវិស័យយានយន្តអគ្គិសនីនៅក្នុងប្រទេស។

ថ្លែងក្នុងសន្និសីទសារព័ត៌មានកាលពីថ្ងៃទី 06 មីនា រដ្ឋមន្ត្រីខាងលើសង្កត់ធ្ងន់ថា ការប្រើប្រាស់ KBLBB នឹងជួយជំរុញការអភិវឌ្ឍប្រកបដោយចីរភាព តាមរយៈការកាត់បន្ថយឧស្ម័នផ្ទះកញ្ចក់ និងកសាងវិស័យឧស្សាហកម្មថ្មផ្ទុកអគ្គិសនីនៅក្នុងស្រុក ហើយប្រការទាំងនេះនឹងជួយបង្កើតការងារថ្មី និងបន្ថែមប្រាក់ចំណូលជូនរដ្ឋ។

ចំណែក Febrio Kacaribu ប្រធានទីភ្នាក់ងារគោលនយោបាយសារពើពន្ធនៃក្រសួងហិរញ្ញវត្ថុ ប្រកាសថា រដ្ឋាភិបាលនឹងផ្ដល់ជំនួយសម្រាប់ការទិញម៉ូតូអគ្គិសនីថ្មីចំនួន 200,000 គ្រឿង និងការប្ដូរពីម៉ូតូសាំងទៅប្រើប្រាស់ម៉ូតូអគ្គីសនីចំនួន 50,000 គ្រឿងនៅក្នុងឆ្នាំនេះ។ ការទិញ ឬប្ដូរយកម៉ូតូអគ្គិសនីថ្មីមួយគ្រឿងនឹងទទួលបានប្រាក់ឧបត្ថម្ភចំនួន 7 លានរូពៀ (457 ដុល្លារអាម៉េរិក)។

កម្មវិធីឧបត្ថម្ភសម្រាប់ការទិញម៉ូតូថ្មីនឹងត្រូវបានអនុវត្តចំពោះតែម៉ូតូផលិតក្នុងស្រុកដែលមានអត្រាមូលដ្ឋានីយកម្មចាប់ពី 40% ឡើងទៅ។ បណ្ដាក្រុមហ៊ុនផលិតម៉ូតូអគ្គិសនីក្នុងស្រុកមិនត្រូវបានអនុញ្ញាតឱ្យដំឡើងថ្លៃក្នុងអំឡុងពេលអនុវត្តការគោលការណ៍ឧបត្ថម្ភ និងត្រូវសន្យាថា ផលិតឱ្យបានគ្រប់ចំនួនសម្រាប់កម្មវិធីនេះ។

អ្នកដែលត្រូវបានផ្ដល់អាទិភាពក្នុងការទទួលប្រាក់ឧបត្ថម្ភប្ដូរក្នុងកម្មវិធីខាងលើ គឺអាជីវកម្មខ្នាតមីក្រូ តូច និងមធ្យម (MSME) ក៏ដូចជាគ្រួសារតែប្រើប្រាស់អគ្គិសនីប្រចាំខែចន្លោះពី 450 ទៅ 900VA ក្នុងគោលដៅបង្កើនការផលិត និងប្រសិទ្ធភាពជំនួញ។

យោងតាមក្រសួងថាមពល និងរ៉ែ KBLBB អាចនឹងជួយឱ្យអ្នកប្រើប្រាស់ និងរដ្ឋាភិបាលសន្សំសំច័យប្រាក់បាន 2.77 លាន និង 32.7 ពាន់លានរូពៀ/ឆ្នាំ ព្រមទាំងកាត់បន្ថយឧស្ម័នផ្ទះកញ្ចក់បាន 0.03 លានតោន/ឆ្នាំ និងបង្កើនការងារបានច្រើន បើទោះការប្រើប្រាស់អគ្គិសនីនឹងកើន 15.2GWh ក្នុងមួយឆ្នាំ៕

March 7, 2023

តៃវ៉ាន់ព្រមានពីហានិភ័យកងកម្លាំងចិនដីគោកសម្រុកចូលមកឈ្លានពាន

មេដឹកនាំកងកម្លាំងការពារជាតិតៃវ៉ាន់បានព្រមានថា ក្នុងឆ្នាំនេះ កងទ័ពចិនដីគោកអាចនឹងស្វែងរកលេសដើម្បីសម្រុកមកកាន់កោះនេះភ្លាមៗ។

ក្នុងពេលឆ្លើយតបនឹងសំណួររបស់ក្រុមតំណាងរាស្ត្រនៅក្នុងកិច្ចប្រជុំសភានាថ្ងៃទី 06 មីនានេះ មេដឹកនាំកងកម្លាំងការពារជាតិតៃវ៉ាន់ Chiu Kuo-cheng និយាយថា កងទ័ពចិន (PLA) អាចរកឧបាយដើម្បីសម្រុកចូលតំបន់ 12 ម៉ាយ (ជាង 22 គីឡូម៉ែត្រ) គិតពីឆ្នេរសមុទ្រតៃវ៉ាន់។

យោងតាមលោក Chiu PLA អាចនឹង «សម្រុកចូលភ្លាមៗ» មកកាន់តំបន់ក្បែរកោះតៃវ៉ាន់ ក្នុងគ្រាដែលកោះនេះកំពុងផ្លាស់ដូរផ្នែកយោធាជាមួយសហរដ្ឋអាម៉េរិក។ លោកបញ្ជាក់ថា «រឿងនេះអាចកើតឡើងក្នុងឆ្នាំនេះ មានន័យថា ពួកគេកំពុងត្រៀមខ្លួន។ ពួកគេនឹងប្រើប្រាស់កម្លាំងបាយ បើសិនពិតជាត្រូវធ្វើដូច្នេះ»។

អាជ្ញាធរតៃវ៉ាន់ធ្លាប់បានប្រកាសថា នឹងប្រើប្រាស់សិទ្ធិការពារខ្លួន និងវាយបក បើសិនកងទ័ពចិនដីគោកសម្រុកចូលតំបន់ 12 ម៉ាយនៅជុំវិញកោះ។

ប្រទេសចិន ថ្មីៗនេះបានបង្កើនសកម្មភាពយោធានៅជុំវិញកោះតៃវ៉ាន់។ ប៉ុន្តែ ទីក្រុងតៃប៉ិមិនទាន់រកឃើញថាចិនបានចូលតំបន់ 24 ម៉ាយនៅឡើយ។

ប្រទេសចិនបានប្រកាសថា កោះតៃវ៉ាន់ជាខេត្តមួយរបស់ខ្លួនដែលរង់ចាំតែការបង្រួបបង្រួម និងមិនបោះបង់លទ្ធភាពនៃការប្រើប្រាស់កម្លាំងបាយ។ ចំណែកកោះតៃវ៉ាន់វិញបានប្រកាសថា មានតែប្រជាជនរបស់ពួកគេប៉ុណ្ណោះទើបអាចសម្រេចជោគវាសនាអនាគតរបស់កោះនេះ៕

March 6, 2023

កុលសម្ព័ន្ធដែលអាចមុជក្នុងទឹកបានយូរជាងគេលើពិភពលោក

ជនជាតិ Bajau នៅអាស៊ីអាគ្នេយ៍ សម្របខ្លួនបានល្អទៅនឹងសកម្មភាពមុជក្នុងទឹករយៈពេលយូរដោយផាលក្នុងរាងកាយរបស់ពួកគេវិវឌ្ឍទៅជាធំខុសប្រក្រតី។

«ជនជាតិ Bajau ការពារសមុទ្រ។ យើងមិនដែលចាកចោលសមុទ្រឡើយ ហើយមុជទឹកជាញឹកញាប់។ នោះគឺជាទម្លាប់ និងជាប្រពៃណី» នេះបើតាមការអះអាងរបស់ជនជាតិ Bajau។

ជនជាតិ Bajau នៅអាស៊ីអាគ្នេយ៍គឺជាកុលសម្ព័ន្ធពាក់កណ្ដាលពនេចរ ដែលមានសមត្ថភាពមុជទឹកសេរីដ៏លេចធ្លោជាងគេ។ ដោយរស់នៅក្នុងប្រទេសឥណ្ឌូណេស៊ី ហ្វ៊ីលីពីន និងម៉ាឡេស៊ី កុលសម្ព័ន្ធនេះគឺជាអ្នកនេសាទ ចិញ្ចឹមជីវិតដោយសារត្រីជាសំខាន់។

យោងតាមប្រពៃណី ការរស់នៅ និងភារកិច្ចរបស់ពួកគេគឺទាក់ទងនឹងការការពារសមុទ្រ។ អ្នកស្រី Ima Baineng ដែលជាអ្នកនេសាទជនជាតិ Bajau និយាយថា «យើងទទួលមរតក និងបច្ចេកទេសមុជទឹកពីដូនតា។ នៅទីនេះ កំលោះៗ និងនារីៗដែលមានកម្លាំងខ្លាំង សុទ្ធតែមុជទឹក»។

ជនជាតិ Bajau អាចមុជទឹកបានរហូតដល់ 8 ម៉ោង/ថ្ងៃ។ មនុស្សមួយចំនួនចំណាយពេលនៅក្រោមទឹករហូតដល់ 60%។ «ជារៀងរាល់ថ្ងៃ ខ្ញុំចេញទៅសមុទ្រនៅម៉ោង 4 ទៀបភ្លឺ និងត្រលប់មកផ្ទះនៅពេលថ្ងៃ។ ជាធម្មតា ខ្ញុំចាប់បានត្រី 15 គីឡូក្រាម។ កាលពីនៅក្មេង ខ្ញុំអាចមុជទឹកក្នុងជម្រៅរហូតដល់ 20 ម៉ែត្រ។ ពេលនេះចាស់ហើយ ខ្ញុំអាចមុជបានជម្រៅប្រហែល 16 ម៉ែត្រប៉ុណ្ណោះ» អ្នកនេសាទជនជាតិ Bajau លោក Mandor M Tembang ឱ្យដឹងដូច្នេះ។

យោងតាមការស្រាវជ្រាវ ទាក់ទងនឹងតំណពូជ រាងកាយរបស់កុលសម្ព័ន្ធ Bajau បានសម្របខ្លួនជាមួយនឹងការរស់នៅក្រោមទឹករួចហើយ។ ផាលដែលជាអវយវៈមួយក្នុងរាងកាយរបស់ពួកគេមានវិវឌ្ឍន៍ទៅជាធំជាងធម្មតា ជួយបង្កើនអុកស៊ីសែនក្នុងឈាមនៅពេលមុជទឹក។ ផាលរួញមកវិញដើម្បីរុញច្រានឈាមក្រហមដែលសម្បូរអុកស៊ីសែនទៅក្នុងចរន្តឈាម។ ផាលដែលធំមានផ្ទុកកោសិកាឈាមក្រហមដែលសម្បូរអុកស៊ីសែនជាងផាលតូច ដូច្នេះវាក៏ជួយឱ្យកុលសម្ព័ន្ធ Bajau អាចអត់ដណ្ដើមបានយូរជាងធម្មតា។

វីដេអូស្ដីពីកុលសម្ព័ន្ធ Bajau ដែលអាចមុជទឹកបានយូរជាងធម្មតា

Saiful M Amin អ្នកមុជទឹកអាជីពដែលប្រើបំពង់អុកស៊ីសែន បានឱ្យដឹងថា «ជនជាតិ Bajau នៅពេលមុជទឹកពួកគេ…ផ្លាស់ទីយឺតៗ។ ខ្ញុំក៏ជាអ្នកមុជទឹក ប៉ុន្តែខ្ញុំមុជចុះជម្រៅបានតែប្រហែល 5 ម៉ែត្រប៉ុណ្ណោះ។ ក៏ប៉ុន្តែ ជនជាតិ Bajau វិញ តែងមុជបានពី 12 ទៅ 15 ម៉ែត្រ។ ដូច្នេះ ជនជាតិ Bajau ពិតជាពិសេស»។

កុលសម្ព័ន្ធ Bajau ចាប់ផ្ដើមមុជទឹកដោយសេរីតាំងពីនៅតូច។ អ្នកស្រី Ima Baineng និយាយថា «តាំងពីអាយុ 4 ឆ្នាំ ខ្ញុំតែងតែងូតទឹកសមុទ្រ និងតាមឪពុកចេញទៅសមុទ្រ ទើបបានជាខ្ញុំចេះមុជទឹក»៕

March 4, 2023

អាម៉េរិកផ្ដល់ជំនួយយោធាបន្ថែម 400 លានដុល្លារដល់អ៊ុយក្រែន

ក្រសួងការបរទេសអាម៉េរិក ប្រកាសអំពីខ្ទង់ជំនួយយោធាថ្មីតម្លៃ 400 លានដុល្លារ ទៅឱ្យអ៊ុយក្រែន ក្នុងនោះមានទាំងយានយន្តសម្រាប់កងវិស្វកម្ម រួមនឹងគ្រាប់រំសេវជាច្រើនផ្សេងទៀត។

«កញ្ចប់ជំនួយផ្នែកយោធានេះមានគ្រាប់រ៉ុក្កែត HIMARS និងគ្រាប់សម្រាប់កាំភ្លើងធំដែលផ្គត់ផ្គង់ដោយសហរដ្ឋអាម៉េរិក» ក្រសួងការបរទេសអាម៉េរិក កាលពីថ្ងៃទី 03 មីនា ប្រកាសដូច្នេះ។ ខ្ទង់ជំនួយថ្មីដែលមានតម្លៃ 400 លានដុល្លារនេះធ្វើឱ្យកញ្ចប់ជំនួយយោធាសរុបរបស់អាម៉េរិកសម្រាប់អ៊ុយក្រែន ឡើងដល់ជាង 32 ពាន់លានដុល្លារ គិតចាប់ពីសង្គ្រាមបានផ្ទុះឡើង។

កញ្ចប់ជំនួយខាងលើក៏មានទាំងគ្រាប់ 25 មិល្លីម៉ែត្រសម្រាប់រថពាសដែក M2 Bradley, ឧបករណ៍ថែទាំយានយន្ត គ្រឿងបន្លាស់ និងសម្ភារៈជាច្រើនផ្សេងទៀត។ អាម៉េរិកក៏ផ្ដល់ជាលើកដំបូងនូវ M60 AVLB ដែលប្រព័ន្ធស្ពានចល័តសម្រាប់រថក្រោះ និងរថពាសដែកឆ្លងកាត់ផងដែរ។

សហរដ្ឋអាម៉េរិកប្រកាសកញ្ចប់ជំនួយថ្មីនេះនៅក្នុងគ្រាដែលរុស្ស៊ីកំពុងបង្កើនការវាយប្រហារទៅលើតំបន់ដែលគ្រប់គ្រងដោយអ៊ុយក្រែន ក្នុងនោះមានទីក្រុង Bakhmut នៅក្នុងខេត្ត Donetsk ជាដើម។

បណ្ដាប្រទេសដែលគាំទ្រអ៊ុយក្រែន កំពុងបណ្ដុះបណ្ដាលទាហានរបស់ប្រទេសនេះឱ្យចេះប្រើអាវុធថ្មីៗដែលទីក្រុងកៀវទើបតែបានទទួល។ កងទ័ពអាម៉េរិក កាលពីថ្ងៃទី 02 មីនា បានប្រកាសបើកវគ្គបណ្ដុះបណ្ដាលដល់ទាហានអ៊ុយក្រែននៅមូលដ្ឋាន Wiesbaden ប្រទេសអាល្លឺម៉ង់ ដើម្បីជួយឱ្យពួកគេរៀបផែនការទប់ទល់នឹងកងកម្លាំងរុស្ស៊ី៕

March 4, 2023

ស្ថានីយតារាសាស្ត្រចិន រកឃើញផ្កាយដុះកន្ទុយថ្មីកំពុងហោះសំដៅមកកាន់ផែនដី

ផ្កាយដុះកន្ទុយធំមួយដែលមានវដ្ដនៃគន្លងគោចរឡើងដល់ 30,000 ឆ្នាំ កំពុងហោះសំដៅមកកាន់ប្រព័ន្ធព្រះអាទិត្យ ហើយអាចមកក្បែរបំផុតនៅក្នុងខែកញ្ញា 2024។

ដុំថ្មអវកាសនេះត្រូវបានគេរកឃើញជាលើកដំបូងកាលពីថ្ងៃទី 09 មករា 2023 ដោយស្ថានីយសង្កេតតារារបស់បណ្ឌិត្យសភាវិទ្យាសាស្ត្រចិន ប៉ុន្តែ មកដល់ថ្ងៃទី 01 មីនា 2023 ទើបមជ្ឈមណ្ឌលអាចម៍ផ្កាយនៃសមគមតារាសាស្ត្រអន្តរជាតិ (MPC) បញ្ជាក់ថា វាគឺជាផ្កាយដុះកន្ទុយ និងត្រូវបានដាក់ឈ្មោះឱ្យថា C/2023 A3 (Tsuchinshan-ATLAS)។

បច្ចុប្បន្ន C/2023 A3 ស្ថិតនៅចម្ងាយ 7.3 AU (1,090 ពាន់លានគីឡូម៉ែត្រ) ពីព្រះអាទិត្យ ឆ្ងាយជាងពិភពព្រហស្បតិ៍ទៅទៀត។ ក៏ប៉ុន្តែ វាកំពុងហោះឆ្ពោះមកកាន់ព្រះអាទិត្យ ហើយកម្រិតពន្លឺរបស់វានឹងកើនឡើងយ៉ាងឆាប់រហ័សនាពេលខាងមុខ។

យោងតាមស្ថានីយសង្កេតតារារបស់ចិន ផ្កាយដុះកន្ទុយនេះនឹងហោះមកក្បែរព្រះអាទិត្យបំផុតនៅថ្ងៃទី 28 កញ្ញា 2024 ដែលពេលនោះវាមានចម្ងាយពីព្រះអាទិត្យប្រហែល 58 លានគីឡូម៉ែត្រ និងអាចមើលឃើញដោយភ្នែកទទេ។ មនុស្សលោកនឹងមានឱកាសបានទស្សនាការបញ្ចេញពន្លឺដ៏ស្រស់ស្អាតរបស់ផ្កាយដុះកន្ទុយនេះមិនខាន៕

March 3, 2023

ព្រះចន្ទជិតមានតំបន់សម្គាល់ពេលវេលា (Time Zone) ផ្ទាល់ខ្លួន

ទីភ្នាក់ងារអវកាសអឺរ៉ុប (ESA) បានលើកសំណើបង្កើតតំបន់សម្គាល់ពេលវេលាស្ដង់ដា ដើម្បីបង្កើនភាពស៊ីចង្វាក់គ្នា និងងាយស្រួលសម្រាប់បេសកកម្មអវកាសនាពេលអនាគត។

បេសកកម្មឡើងទៅកាន់ឋានព្រះចន្ទនៅជុំវិញពិភពលោកក្នុងទសវត្សរ៍ខាងមុខ មានរាប់សិបគម្រោង ដូច្នេះ ទីភ្នាក់ងារអវកាសអឺរ៉ុប បានលើកសំណើបង្កើតតំបន់សម្គាល់ពេលវេលាថ្មីនៅលើឋានព្រះចន្ទ ដើម្បីជួយឱ្យការផ្លាស់ប្ដូរព័ត៌មានមានភាពងាយស្រួលជាងបច្ចុប្បន្ន។ នេះបើតាម Smithsonian ចេញផ្សាយកាលពីថ្ងៃទី 28 កុម្ភៈ 2023។

បច្ចុប្បន្ន បេសកកម្មព្រះចន្ទប្រើប្រាស់តំបន់សម្គាល់ម៉ោងទៅតាមប្រទេសម្ចាស់បេសកកម្ម។ ក៏ប៉ុន្តែ វិធីនេះមិនមានភាពសុក្រឹត និងបណ្ដាលឱ្យយានអវកាសរបស់បណ្ដាប្រទេសខ្វះភាពស៊ីចង្វាក់គ្នា។ ESA បានប្រកាសអំពីសំណើនេះកាលពីថ្ងៃទី 27 កុម្ភៈ 2023 ប៉ុន្តែគំនិតនេះត្រូវបានលើកឡើងដំបូងក្នុងកិច្ចប្រជុំមួយនៅហូឡង់កាលពីចុងឆ្នាំ 2022។

ការបង្កើតតំបន់សម្គាល់ពេលវេលាដោយឡែកនៅលើឋានព្រះចន្ទ មិនត្រឹមតែជួយឱ្យមានភាពងាយស្រួលក្នុងការផ្លាស់ប្ដូរព័ត៌មាននោះទេ តែក៏នឹងជួយឱ្យអវកាសចរងាយស្រួលកំណត់ទិសផងដែរ។

ទោះជាយ៉ាងនេះក្ដី ក្រុមអ្នកជំនាញមិនទាន់កំណត់បានថា ម៉ោងនៅលើឋានព្រះចន្ទគួរគណនាបែបណានៅឡើយ។ លើឋានព្រះចន្ទ នាឡិកាដើរលឿនជាងលើផែនដី ដោយសារតែកម្លាំងទំនាញដែលអាចកាច់កោងពេលវេលា។ ជាក់ស្ដែង នាឡិកានៅលើឋានព្រះចន្ទនឹងកើនប្រហែល 56 មីក្រូវិនាទី ក្រោយរយៈពេល 24 ម៉ោង។ យោងតាម ESA កម្រិតនេះក៏ផ្លាស់ប្ដូរទៅតាមទីតាំងរបស់នាឡិកា៕

March 2, 2023

គ្រោះថ្នាក់រថភ្លើងបុកគ្នានៅប្រទេសក្រិកអាចបណ្ដាលមកពីកំហុសរបស់មនុស្ស

នាយករដ្ឋមន្ត្រីក្រិក Mitsotakis ថ្លែងថា «កំហុសរបស់មនុស្ស» អាចជាមូលហេតុដែលនាំឱ្យមានឧបទ្ទវហេតុរថភ្លើងពីរគ្រឿងបុកគ្នាបណ្ដាលឱ្យមនុស្ស 38 នាក់បាត់បង់ជីវិត។

«ពិតជាគួរឱ្យសោកស្ដាយ គ្រប់យ៉ាងបង្ហាញថា សោកនាដកម្មភាគច្រើនគឺដោយសារកំហុសឆ្គងដ៏គ្រោះថ្នាក់របស់មនុស្ស» នាយករដ្ឋមន្ត្រីក្រិក Kyriakos Mitsotakis ថ្លែងលើកញ្ចក់ទូរទស្សន៍កាលពីថ្ងៃទី 01 មីនា។ លោកបន្ថែមថា «នេះគឺជាករណីគ្រោះថ្នាក់រថភ្លើងដ៏សាហាវមិនធ្លាប់មានមុននេះនៅប្រទេសក្រិក ហើយវានឹងត្រូវបានស៊ើបអង្កេតយ៉ាងពេញលេញ»។

ទូរថភ្លើងចំនួនពីរត្រូវខូចខ្ទេចខ្ទីគ្មានសល់ និងទូមួយផ្សេងទៀតត្រូវភ្លើងឆាបឆេះ នៅពេលរថភ្លើងដឹកអ្នកដំណើរបុកពេញទំហឹងជាមួយនឹងរថភ្លើងដឹកទំនិញនៅក្បែរទីក្រុង Larissa ភាគខាងកើតប្រទេសក្រិកកាលពីថ្ងៃទី 28 កុម្ភៈ 2023។ អាជ្ញាធរក្រិកឱ្យដឹងថា មនុស្ស 38 នាក់បានស្លាប់ និង 57 នាក់កំពុងត្រូវបានព្យាបាលនៅមន្ទីរពេទ្យ ក្នុងនោះមាន 6 នាក់ត្រូវសង្គ្រោះបន្ទាន់។ យោងតាមក្រុមមន្ត្រីក្រិក ចំនួនអ្នកស្លាប់អាចនឹងកើនឡើងបន្តទៀត ដោយសារមនុស្សមួយចំនួននៅតែបាត់ខ្លួន។

ខ្សែរថភ្លើងដឹកអ្នកដំណើរជាង 350 នាក់ បានជួបគ្រោះថ្នាក់នៅពេលកំពុងធ្វើដំណើរពីរដ្ឋធានីអាថែន ទៅកាន់ទីក្រុង Thessaloniki នៅភាគខាងជើងប្រទេសក្រិក។

សហរដ្ឋអាម៉េរិក រុស្ស៊ី ចិន បារាំង អាល្លឺម៉ង់ អ៊ុយក្រែន ក៏ដូចជាបណ្ដាប្រទេសនានា និងបណ្ដាប្រទេសក្បែរខាង បានចូលរួមរំលែកទុក្ខជាមួយប្រជាជនក្រិក បន្ទាប់ពីសោកនាដកម្មបានកើតឡើង។ ក្រុមមន្ត្រីក្រិកប្រកាសកាន់ទុក្ខ 3 ថ្ងៃដើម្បីគោរព និងរម្លឹកដល់វិញ្ញាណក្ខន្ធជនរងគ្រោះ៕

March 2, 2023

Category: អន្តរជាតិ