អន្តរជាតិ - La Reine Media

ឥណ្ឌូណេស៊ីបញ្ជាទិញយន្តហោះចម្បាំង 18 គ្រឿងទៀតពីបារាំង

ការបញ្ជាទិញយន្តហោះចម្បាំង 18 គ្រឿងបន្ថែមទៀតនេះ គឺស្ថិតក្នុងចំណោមយន្តហោះចម្បាំង Rafale 42 គ្រឿងដែលទីក្រុងហ្សាការ៉ាតាគ្រោងនឹងបញ្ជាទិញពីប្រទេសបារាំង ដើម្បីធ្វើទំនើបកម្មកម្លាំងទ័ពអាកាសរបស់ឥណ្ឌូណេស៊ី។

បណ្ដាញផ្សព្វផ្សាយឥណ្ឌូណេស៊ី កាលពីថ្ងៃទី 26 មេសា ដកស្រង់ប្រភពព័ត៌មានពីសារព័ត៌មាន La Tribune របស់បារាំង ឱ្យដឹងថា ប្រទេសឥណ្ឌូណេស៊ីនឹងបញ្ជាទិញយន្តហោះចម្បាំង Rafale ចំនួន 18 គ្រឿងបន្ថែមទៀត នៅក្នុងកិច្ចព្រមព្រៀងតម្លៃ 2.3 ពាន់លានដុល្លារអាម៉េរិក។

ប្រភពព័ត៌មានឱ្យដឹងថា ឥណ្ឌូណេស៊ីបានធានាចំពោះប្រភពហិរញ្ញវត្ថុសម្រាប់ការទិញយន្តហោះចម្បាំងទាំងនោះ ក៏ដូចជាបណ្ដាមីស៊ីលអាកាសប្រឆាំងអាកាស។

កិច្ចព្រមព្រៀងទិញយន្តហោះចម្បាំង Rafale 18 គ្រឿងបន្ថែមទៀតនេះអាចនឹងត្រូវបានចុះហត្ថលេខាជាផ្លូវការនៅក្នុងដំណើរទស្សនកិច្ចនៅប្រទេសបារាំងនាពេលខាងមុខរបស់រដ្ឋមន្ត្រីក្រសួងការពារជាតិឥណ្ឌូណេស៊ី Prabowo Subianto។

មុននោះ កាលពីខែកញ្ញា 2022 រដ្ឋមន្ត្រីក្រសួងការពារជាតិ Prabowo ក៏បានចុះហត្ថលេខាលើកិច្ចព្រមព្រៀងទិញយន្តហោះចម្បាំង Rafale ចំនួន 6 គ្រឿងដំបូងដែលមានតម្លៃសរុប 1.1 ពាន់លានដុល្លារអាម៉េរិក។

Rafale ដែលជាយន្តហោះចម្បាំងប្រតិកម្មរហ័សដ៏ទំនើប មានម៉ាស៊ីនពីរគ្រឿង ត្រូវបានផលិតដោយក្រុមហ៊ុន Dassault Aviation និងត្រូវបានដាក់ឱ្យប្រើប្រាស់នៅក្នុងជួរកងទ័ពបារាំង។ យន្តហោះនេះអាចតាមដានគោលដៅចំនួន 8 ក្នុងពេលតែមួយ និងបំពាក់មីស៊ីលបាញ់ក្នុងអាកាស ASRAAM, AMRAAM , មីស៊ីលកម្ទេចផ្លូវរត់ក្នុងព្រលានយន្តហោះ Apache រួមនឹងមីស៊ីលប្រឆាំងនាវាចម្បាំង Harpoon ជាដើម៕

April 27, 2023

ថៃទទួលនាវាវាយឡើងច្រាំងដែលផលិតដោយប្រទេសចិន

នាវាវាយឡើងច្រាំង HTMS Chang បានទៅដល់មូលដ្ឋានទ័ពជើងទឹកនៅភាគខាងត្បូងប្រទេសថៃ បន្ទាប់ពីត្រូវបានរោងចក្រសាងសង់កប៉ាល់ចិនប្រគល់ជូនកាលពីមួយសប្ដាហ៍មុន។

ពិធីប្រគល់ និងទទួលនាវាវាយឡើងច្រាំង HTMS Chang រវាងចិន និងថៃ ត្រូវបានធ្វើឡើងកាលពីថ្ងៃទី 17 មេសានៅឯរោងចក្រសាងសង់កប៉ាល់ Hudong Zhonghua ស្ថិតក្នុងខេត្ត Shanghai ប្រទេសចិន។ នាវាចម្បាំង Chang បានចាកចេញពីរោងចក្រមួយថ្ងៃក្រោយពិធីប្រគល់ និងបានចូលចតនៅកំពង់ផែ Chuk Samet របស់ទ័ពជើងទឹក Sattahip ក្នុងខេត្ត Chonburi ភាគខាងត្បូងប្រទេសថៃ កាលពីថ្ងៃទី 25 មេសា 2023។

ប្រទេសចិន និងថៃមិនទាន់ប្រកាសឱ្យដឹងអំពីតម្លៃរបស់នាវាចម្បាំងដែលស្ថិតក្នុងថ្នាក់ Type-071E នេះនៅឡើយ។ ក៏ប៉ុន្តែ Bangkok Post កាលពីឆ្នាំ 2017 បានឱ្យដឹងថា នាវាប្រភេទនេះមានតម្លៃជាង 200 លានដុល្លារអាម៉េរិក និងត្រូវការពេលបីឆ្នាំក្នុងការផលិត។

April 26, 2023

យន្តហោះចម្បាំងណាតូ ដេញតាមក្រុមយន្តហោះរុស្ស៊ីនៅសមុទ្របាល់ទិច

ទ័ពអាកាសអាល្លឺម៉ង់ប្រកាសថាបានចាត់យន្តហោះចម្បាំងទៅកំណត់អត្តសញ្ញាណ និងតាមដានក្រុមយន្តហោះបីគ្រឿងរបស់កងទ័ពរុស្ស៊ីនៅលើដែនអាកាសសមុទ្របាល់ទិក។

«យន្តហោះចម្បាំង Typhoon របស់អាល្លឺម៉ង់ និងអង់គ្លេសត្រូវបានប្រកាសឱ្យហោះទៅកំណត់អត្តសញ្ញាណយន្តហោះយោធាបីគ្រឿង ក្រោយមកបានដឹងថា កងកម្លាំងនេះមានយន្តហោះចម្បាំង Su-27 បីគ្រឿង និងយន្តហោះឈ្លប II-20 មួយគ្រឿងរបស់រុស្ស៊ី ដែលធ្វើសកម្មភាពក្នុងដែនអាកាសអន្តរជាតិនៅសមុទ្របាល់ទិក ដោយមិនបានបើកឧបករណ៍ផ្សាយសញ្ញា» ទ័ពអាកាសអាល្លឺម៉ង់ប្រកាសនាថ្ងៃនេះដូច្នេះ។

ក្រុមមន្ត្រីអាល្លឺម៉ង់ បានបញ្ចេញរូបភាពថតជិត បង្ហាញអំពីក្រុមយន្តហោះរុស្ស៊ី ក្នុងនោះមានយន្តហោះ Su-27 ដែលលាបថ្នាំពណ៌ជាអក្សរ «Z» កំពុងផ្អៀងខ្លួនមករកយន្តហោះរបស់ណាតូ។ ប៉ុន្តែ ទ័ពអាកាសអាល្លឺម៉ង់ពុំបានបញ្ជាក់ថា មានហេតុការណ៍កើតឡើងរវាងក្រុមយន្តហោះរបស់ភាគីទាំងពីរ ឬអត់។

ក្រសួងការពារជាតិរុស្ស៊ី មកដល់បច្ចុប្បន្នមិនទាន់បញ្ចេញប្រតិកម្មឆ្លើយតបទៅនឹងព័ត៌មានខាងលើនៅឡើយ។

រុស្ស៊ី និងណាតូ តែងតែចាត់យន្តហោះចម្បាំង ឬយន្តហោះឈ្លបឱ្យហោះហើរក្បែរដែនអាកាសរបស់ភាគីទាំងពីរ។ យន្តហោះរបស់ពួកគេក៏តែងតែប្រឈមមុខដាក់គ្នានៅក្នុងបេសកកម្មទាំងនេះ ប៉ុន្តែភាគច្រើនកើតឡើងប្រកបដោយវិជ្ជាជីវៈ និងសុវត្ថិភាព។

ភាពតានតឹងនៅតំបន់សមុទ្របាល់ទិកបានកើនឡើងតាំងពីពាក់កណ្ដាលឆ្នាំមុន ដោយសារតែយុទ្ធនាការយោធារបស់រុស្ស៊ីនៅអ៊ុយក្រែន ក៏ដូចជាបញ្ហាស៊ុយអែត និងហ្វាំងឡង់សុំចូលជាសមាជិកណាតូ។ សម្ព័ន្ធយោធាណាតូបានបញ្ចូលហ្វាំងឡង់ជាសមាជិក ហើយបើសិនស៊ុយអែតបានក្លាយជាសមាជិកណាតូទៀត រុស្ស៊ីនឹងក្លាយជាប្រទេសតែមួយគត់ដែលមានឆ្នេរជាប់នឹងសមុទ្របាល់ទិក តែមិនមែនជាសមាជិកណាតូ៕

April 26, 2023

សាសនិកជិត 90 បានស្លាប់ ព្រោះតែ «ចង់ជួបព្រះយេស៊ូ»

ក្រុមមន្ត្រីប្រទេសកេនយ៉ាន បានរកឃើញសាកសព 89 នាក់ដែលទាក់ទងនឹងមេដឹកនាំសមាគមសាសនាម្នាក់ដែលត្រូវបានគេចោទថា បានអំពាវនាវឱ្យសាសនិកបង្អត់អាហារខ្លួនឯងរហូតដល់ស្លាប់ ដើម្បី «ជួបព្រះយេស៊ូ»។

«ក្រៅពីសាកសពចំនួន 73 នាក់ដែលបានលើកឡើងកាលពីម្សិលមិញ យើងបានរកឃើញសាកសព 16 នាក់ទៀត ដូច្នេះសាកសពសរុបបានកើនឡើងដល់ 89 នាក់» រដ្ឋមន្ត្រីក្រសួងមហាផ្ទៃកេនយ៉ា Kithure Kindiki ថ្លែងកាលពីថ្ងៃទី 25 មេសាដូច្នេះនៅពេលទៅកាន់កន្លែងកើតហេតុក្នុងព្រៃ Shakahola ក្បែរទីរួមស្រុកភាគខាងត្បូង Malindi។

សាកសពភាគច្រើនស្ថិតក្នុងផ្នូរបណ្ដោះអាសន្ន ខណៈមនុស្សមួយចំនួនត្រូវបានរកឃើញថានៅមានជីវិតប៉ុន្តែស្ថិតក្នុងសភាពអស់កម្លាំងធ្ងន់ធ្ងរ ហើយក្រោយមកក៏បានស្លាប់។ ហេតុការណ៍នេះត្រូវបានគេហៅថា «អំពើសម្លាប់រង្គាលក្នុងព្រៃ Shakahola»។

សមត្ថកិច្ចកេយ៉ាបានចាប់ផ្ដើមបិទខ្ទប់ និងស្វែងរកនៅក្នុងតំបន់ដែលមានទំហំ 325 ហិកតានៅក្នុងព្រៃ Shakahola ចាប់ពីថ្ងៃទី 21 មេសា បន្ទាប់ពីមានសេចក្ដីរាយការណ៍អំពីផ្នូរខ្មោចបណ្ដោះអាសន្នរាប់សិបនៅក្នុងកសិដ្ឋានរបស់ Makenzie Nthenge មេដឹកនាំសមាគមគ្រីស្ទបរិស័ទគណៈនិកាយប្រូតេស្តង់អន្តរជាតិនៅកេនយ៉ា។ Makenzie Nthenge ត្រូវបានចោទប្រកាន់ថា បានអំពាវនាវដល់សាសនិកឱ្យអត់អាហាររហូតដល់ស្លាប់ដើម្បី «បានចួបព្រះយេស៊ូ»។

លោក Kindiki បានប្រាប់ថា សមត្ថកិច្ចកេនយ៉ាបានរំដោះមនុស្សចំនួន 34 នាក់។ សមត្ថកិច្ចកេនយ៉ាព្រមានថា ចំនួនមនុស្សស្លាប់អាចនឹងកើនឡើង ខណៈដែលកាកបាទក្រហមកេនយ៉ាបានទទួលដំណឹងថា មានមនុស្សបាត់ខ្លួនជាង 200 នាក់។ សាសនិកជាច្រើនត្រូវបានគេជឿថា កំពុងគេចខ្លួននៅក្នុងព្រៃ។

Makenzie Nthenge ត្រូវបានប៉ូលិសចាប់ខ្លួន គ្រាដែលសារព័ត៌មានកេនយ៉ារាយការណ៍ថា ជននេះសម្រេចចិត្តធ្វើកូដកម្មអត់អាហារក្នុងពេលរង់ចាំឡើងតុលាការ។ «យើងជឿថា Makenzi នឹងត្រូវជាប់ពន្ធនាគារអស់មួយជីវិត» លោក Kindiki និយាយដូច្នេះ និងបន្ថែមថា ក្រុមជនល្មើសក៏នឹងត្រូវប្រឈមនឹងទណ្ឌកម្មធ្ងន់ធ្ងរ។ ប៉ូលិសកេយ៉ាបានចាប់ខ្លួនមនុស្ស 14 នាក់ ដែលទាក់ទិននឹងហេតុការណ៍ខាងលើ។

ប្រធានាធិបតីកេនយ៉ា William Ruto កាលពីថ្ងៃទី 24 មេសា ប្រកាសថា លោកបានបញ្ជាឱ្យសមត្ថកិច្ចស៊ើបអង្កេតឱ្យដល់ឫសគល់បញ្ហា ហើយថា Makenzie Nthenge គឺជា «ឧក្រិដ្ឋជនដ៏សាហាវដែលបន្លំជាមេដឹកនាំសមាគមសាសនា»៕

April 26, 2023

បេសកកម្មឡើងទៅកាន់ឋានព្រះចន្ទ ៖ ណាសាកំពុងញាប់ដៃញាប់ជើងផលិត និងដំឡើងរ៉ុក្កែតសម្រាប់អ្នកអវកាស

(សហរដ្ឋអាម៉េរិក) – ក្រុមអ្នកអវកាសដែលចូលរួមក្នុងបេសកកម្ម Artemis កំពុងត្រៀមសម្រាប់ការហោះហើរឆ្ងាយបំផុតក្នុងប្រវត្តិសាស្ត្រ នៅក្នុងយានអវកាស Orion នាឆ្នាំ 2024 ក្នុងនោះ រ៉ុក្កែតរបស់ពួកគេក៏កំពុងស្ថិតក្នុងដំណាក់កាលដំឡើង។

នៅក្នុងវីដេអូដែលចែករំលែកដោយមជ្ឈមណ្ឌលហោះហើរអវកាស Marshall របស់ណាសា កំណាត់ស្នូលរបស់រ៉ុក្កែតនៃប្រព័ន្ធបាញ់បង្ហោះ SLS ដែលប្រើក្នុងបេសកកម្ម Artemis 2 កំពុងត្រូវបានផលិតនៅឯរោងចក្រដំឡើង Michoud របស់ណាសា ស្ថិតក្នុងតំបន់ New Orleans។ កំណាត់ទាំងប្រាំរបស់រ៉ុក្កែតប្រវែង 65 ម៉ែត្រ ត្រូវបានតភ្ជាប់គ្នា ហើយកំណាត់ដែលដាក់គ្រឿងម៉ាស៊ីនទំនងជាផ្នែកចុងក្រោយបង្អស់។ នេះបើតាម Space ចុះផ្សាយកាលពីថ្ងៃទី 24 មេសា។

បន្ទាប់ពីបានផលិតរួចរាល់ កំណាត់ស្នូល SLS នឹងត្រូវបានដឹកជញ្ជូនឆ្លងកាត់ឈូងសមុទ្រម៉ិកស៊ិកទៅកាន់ Florida ។ នៅទីនោះ យានសម្រាប់បាញ់បង្ហោះនឹងត្រូវបានដំឡើងជារូបរាងពេញលេញ។

បើសិនគ្រប់យ៉ាងកើតឡើងដូចផែនការ ទីភ្នាក់ងារអវកាសអាម៉េរិកនឹងបាញ់បង្ហោះបេសកកម្ម Artemis II នៅក្នុងខែវិច្ឆិកា ឆ្នាំ 2024។ បេសកកម្មនេះនឹងដឹកអវកាសចរបួនរូបនៅក្នុងជើងហោះហើរសាកល្បងដែលត្រូវគោចរជុំវិញគន្លងតារាវិថីរបស់ឋានព្រះចន្ទ មុនពេលត្រលប់មកកាន់ផែនដីដើម្បីពិនិត្យ និងវាយតម្លៃប្រព័ន្ធនានារបស់រ៉ុក្កែត និងយានអវកាស។ ទិន្នន័យដែលប្រមូលបានពីជើងហោះហើរនេះនឹងត្រូវប្រើប្រាស់សម្រាប់បេសកកម្ម Artemis III។

អ្នកអវកាសដែលនឹងត្រូវហោះហើរក្នុងបេសកម្ម Artemis II រួមមាន បីនាក់មកពីណាសា គឺ មេបញ្ជាការ Reid Wiseman, អ្នកបើកបរ Victor Glover និងអ្នកជំនាញខាងបេសកកម្ម Christina Koch រួមនឹងអ្នកអវកាស Jeremy Hansen មកពីទីភ្នាក់ងារអវកាសកាណាដា៕

April 25, 2023

សង្គ្រាមនៅស៊ូដង់៖ ភាគីក្នុងជម្លោះយល់ព្រមឈប់បាញ់ 72 ម៉ោង

ភាគីជម្លោះទាំងពីរនៅប្រទេសស៊ូដង់ បានយល់ព្រមឈប់បាញ់រយៈពេល 72 ម៉ោង ដោយមូលហេតុមនុស្សធម៌ គ្រាដែលប្រទេសនានានាំគ្នាជម្លៀសពលរដ្ឋ។

កងកម្លាំងប្រដាប់អាវុធស៊ូដង់ (SAF) ប្រកាសអនុវត្តបទបញ្ជាឈប់បាញ់ 72 ម៉ោង ដែលចាប់ផ្ដើមពីម៉ោង 00 ថ្ងៃទី 25 មេសា ដោយបញ្ជាក់ថា សហរដ្ឋអាម៉េរិក និងអារ៉ាប៊ីសាអូឌីត បានដើរតួនាទីជាអ្នកសម្រុះសម្រួលក្នុងកិច្ចការនេះ។ កងកម្លាំងប៉ារ៉ា RSF នៅប្រទេសស៊ូដង់ ក៏បានបញ្ជាក់ថា បានយល់ព្រមផ្អាកការប្រយុទ្ធដើម្បីគាំទ្រដល់កិច្ចការមនុស្សធម៌។

រដ្ឋមន្ត្រីការបរទេសទេសអាម៉េរិក Antoni Blinken ឱ្យដឹងថា កិច្ចព្រមព្រៀងឈប់បាញ់នេះសម្រេចបានក្រោយមានកិច្ចចរចារយៈពេលពីរថ្ងៃ ដោយសារតែភាគីក្នុងជម្លោះមិនបានគោរពតាមបទបញ្ជាឈប់បាញ់មុននោះ។

នៅមុនបទបញ្ជាឈប់បាញ់ថ្មីមានសុពលភាព ភាគីជម្លោះនៅតែវាយប្រហារគ្នាយ៉ាងខ្លាំងក្លា នៅ Omdurman ដែលជាទីក្រុងមួយនៅក្បែររដ្ឋធានីខាទុំ។

បណ្ដាប្រទេសកំពុងជម្លៀសពលរដ្ឋចេញពីប្រទេសស៊ូដង់

ស៊ូដង់ស្ថិតនៅក្នុងតំបន់ភាគឦសានទ្វីបអាហ្វ្រិក ជាប់នឹងប្រទេសអេហ្ស៊ីប មានប្រជាជនជិត 48 លាននាក់។ សង្គ្រាមបានផ្ទុះឡើងរវាងកងទ័ពស៊ូដង់ និងកងកម្លាំង RSF តាំងពីថ្ងៃទី 15 មេសា 2023 បន្ទាប់ពីមានភាពតានតឹងខ្លាំងព្រោះតែផែនការច្របាច់បញ្ចូល RSF ទៅក្នុងជួរកងទ័ពស៊ូដង់។ មន្ទីរពេទ្យ និងសេវាសំខាន់ៗរបស់ប្រទេសនេះបានផ្អាកសកម្មភាពព្រោះតែសង្គ្រាម។

«មនុស្សយ៉ាងតិច 430 នាក់បានស្លាប់ និងជាង 3,700 នាក់រងរបួសនៅក្នុងការប្រយុទ្ធគ្នារវាងភាគីជម្លោះ ធ្វើឱ្យស្ថានភាពមនុស្សធម៌នៅប្រទេសនេះកាន់តែអាក្រក់ឡើង» នេះបើតាមអង្គការសុខភាពពិភពលោក (WHO)។ អង្គការសហប្រជាជាតិ (UN) បានឱ្យដឹងថា ប្រជាជនស៊ូដង់ប្រហែលពីរម៉ឺននាក់បានរត់ចេញពីតំបន់សង្គ្រាម និងសុំសិទ្ធិជ្រកកោននៅប្រទេសជិតខាង ឆាដ៕

April 25, 2023

ពេលណាទើបផែនីត្រូវបាត់បង់ព្រះចន្ទ បើសិនពួកវានៅតែចាកចេញពីគ្នាក្នុងល្បឿនដូចបច្ចុប្បន្ន?

ព្រះចន្ទនឹងត្រូវព្រះអាទិត្យលេបយកគ្មានសល់ក្រោយរយៈពេលប្រហែលប្រាំពាន់លានឆ្នាំទៀត បើសិនជាវាបន្តចាកឆ្ងាយពីផែនដីនៅក្នុងល្បឿនដូចបច្ចុប្បន្ន។

គន្លងតារាវិថីរបស់ព្រះចន្ទនៅជុំវិញផែនដី ហាក់ដូចជាមិនប្រែប្រួល ប៉ុន្តែជាក់ស្ដែង ព្រះចន្ទកំពុងតែចាកឆ្ងាយពីផែនដីយ៉ាងសន្សឹមៗ។

ក្រុមអ្នកវិទ្យាសាស្ត្រកំណត់បានល្បឿនដែលព្រះចន្ទចរចេញឆ្ងាយពីផែនដីដោយប្រើប្រាស់កញ្ចក់ដែលណាសាបានដាក់នៅឯឋានព្រះចន្ទនៅក្នុងបេសកកម្ម Apollo។ យោងតាមណាសា ក្នុងរយៈពេល 50 ឆ្នាំកន្លង ក្រុមអ្នកស្រាវជ្រាវបានបាញ់កាំរស្មីឡាសែរពីផែនដីទៅលើកញ្ចក់នោះ និងវាស់ពេលវេលាដើម្បីរកចំណាំងផ្លាត។ ដោយការប្រើប្រាស់ល្បឿនពន្លឺ អ្នកវិទ្យាសាស្ត្រគណនាឃើញថា ព្រះចន្ទកំពុងចរចាកចេញពីផែនដីក្នុងល្បឿនប្រហែល 3.8 សងទីម៉ែត្រ/ឆ្នាំ ដែលស្មើនឹងល្បឿននៃការដុះរបស់ក្រចកដៃ។

ព្រះចន្ទគោចរចេញឆ្ងាយពីផែនដីគឺដោយសារឥទ្ធិពលពីកម្លាំងទំនាញរវាងពួកវា ហើយកម្លាំងនេះធ្វើឱ្យរង្វិលជុំនៃអ័ក្សរបស់ផែនដីត្រូវយឺតជាងមុន។ យោងតាមអ្នកវិទ្យាសាស្ត្រ កាលពីប្រហែល 4.5 ពាន់លានឆ្នាំមុន នៅពេលព្រះចន្ទកកើតដំបូង ល្បឿនរង្វិលជុំនៃអ័ក្សរបស់ផែនដីគឺលឿនជាងបច្ចុប្បន្នឆ្ងាយណាស់ ដោយមួយថ្ងៃមានរយៈពេលប្រហែលតែប្រាំម៉ោងប៉ុណ្ណោះ។

ឥទ្ធិពលរបស់ជំនោរសមុទ្រក៏បន្ថយល្បឿនរង្វិលជុំនៃអ័ក្សរបស់ព្រះចន្ទ ហើយជាលទ្ធផល អ័ក្សរបស់ព្រះចន្ទត្រូវឈប់វិល ដោយមួយផ្នែករបស់វាត្រូវបែរមករកផែនដីជាដរាប។ ឥទ្ធិពលនេះក៏បន្លយល្បឿននៃរង្វិលជុំរបស់អ័ក្សផែនដី។ ក្នុងរយៈពេលប្រហែល 50 ពាន់លានឆ្នាំទៀត បើសិនមិនមានការរអាក់រអួល ល្បឿនរង្វិលជុំរបស់អ័ក្សផែនដីនឹងមានវាសនាដូចព្រះចន្ទ ពោលគឺមួយផ្នែករបស់ផែនដីនឹងបែរទៅរកព្រះចន្ទជានិច្ច។ ក្នុងពេលនោះ ផែនដី និងព្រះចន្ទនឹងឈប់ចាកឆ្ងាយពីគ្នា។

ក៏ប៉ុន្តែ ក្រោយរយៈពេលប្រហែលប្រាំពាន់លានឆ្នាំទៀត ព្រះអាទិត្យនឹងស្លាប់ ដោយវានឹងរីកធំឡើងទៅជាផ្កាយយក្សក្រហម។ ពេលនោះ ប្រព័ន្ធផែនដី – ព្រះចន្ទប្រាកដជានឹងត្រូវបានរំខាន និងបែកធ្លាយ។ បើសិនជាបន្តចាកឆ្ងាយពីផែនដីក្នុងល្បឿនដូចបច្ចុប្បន្ន ព្រះចន្ទនឹងឆ្ងាយពីផែនដីប្រហែល 189,000 គីឡូម៉ែត្របន្ថែមទៀត ហើយក៏នឹងត្រូវផ្កាយយក្សក្រហមលេបយកគ្មានសល់៕

April 24, 2023

សង្គ្រាមនៅស៊ូដង់ ៖ ប្រទេសនានានាំគ្នាជម្លៀសពលរដ្ឋត្រលប់ទៅស្រុក

បណ្ដាក្រុមប្រដាប់អាវុធរបស់អាម៉េរិក និងអង់គ្លេស បានជម្លៀសបុគ្គលិកស្ថានទូតចេញពីប្រទេសស៊ូដង់ ស្របពេលដែលប្រទេសដទៃទៀតកំពុង «ដុតដៃដុតជើង» នាំពលរដ្ឋរបស់ពួកគេទៅកាន់កន្លែងមានសុវត្ថិភាព គ្រាដែលក្រុមប្រដាប់អាវុធនានានៅស៊ូដង់ ប្រយុទ្ធដណ្ដើមអំណាចគ្នានៅក្នុងរដ្ឋធានីខាទុំ (Khartoum) កាលពីថ្ងៃទី 23 មេសា។

ការប្រយុទ្ធគ្នាខាងលើដែលបានកើតឡើងកាលពី 8 ថ្ងៃមុន រវាងកងទ័ពស៊ូដង់ និងកងកម្លាំងយោធាប៉ារ៉ា (RSF) បានផ្ទុះអាវុធដាក់គ្នា បណ្ដាលឱ្យមនុស្សយ៉ាងតិច 420 នាក់បាត់បង់ជីវិត និងរាប់លាននាក់ត្រូវជាប់គាំង មិនអាចទទួលសេវាកម្មចាំបាច់។

នៅពេលប្រជាជនព្យាយាមរត់គេចពីសង្គ្រាម ប្រទេសជាច្រើនក៏បានបញ្ជូនយន្តហោះ និងក្បួនរថយន្តទៅកាន់រដ្ឋធានីខាទុំ ដើម្បីជម្លៀសពលរដ្ឋរបស់ពួកគេ។

បារាំងបានឱ្យដឹងថា យន្តហោះមួយគ្រឿងរបស់ខ្លួនបានដឹកមនុស្សប្រហែល 100 នាក់ចាកចេញទៅកាន់ Djibouti ហើយយន្តហោះជើងទីពីរនឹងធ្វើសកម្មភាពជម្លៀសនាពេលដ៏ខ្លីខាងមុខ។

ប្រភពព័ត៌មាននានាបានរាយការណ៍ថា ការផ្ទុះអាវុធដាក់គ្នារវាងកងទ័ពស៊ូដង់ និងកងកម្លាំងប៉ារ៉ា RSF នៅស៊ូដង់ បានធ្វើឱ្យពលរដ្ឋអ៊ីរ៉ាក់ម្នាក់បាត់បង់ជីវិត និងអ្នកការទូតមួយរូបរបស់អេហ្ស៊ីបត្រូវរងរបួស។

អាល្លឺម៉ង់បានឱ្យដឹងថា ប្រទេសនេះបានបញ្ជូនយន្តហោះយោធាមួយគ្រឿងនៅ ខាទុំ។ ចំណែកអ៊ីតាលីវិញ ក៏បាននិយាយថា ជម្លៀសពលរដ្ឋរបស់ខ្លួនចេញពីស៊ូដង់ កាលពីថ្ងៃទី 23 មេសា។ ហ្កាណា ឥណ្ឌា និងលីប៊ី កំពុងតែធ្វើការដើម្បីនាំពលរដ្ឋត្រលប់ទៅស្រុករៀងៗខ្លួន។

ប្រទេសនានានាំគ្នាជម្លៀសពលរដ្ឋត្រលប់ទៅស្រុក

កាលពីថ្ងៃទី 23 មេសា អង់គ្លេសបានឱ្យដឹងថា បានជម្លៀសបុគ្គលិកការទូត និងញាតិរបស់ពួកគេចេញពីស៊ូដង់។ ហូឡង់គឺជាប្រទេសថ្មីបំផុតដែលបានប្រកាសជម្លៀសពលរដ្ឋរបស់ខ្លួនចេញពីស៊ូដង់។

ការប្រយុទ្ធគ្នាបានផ្ទុះឡើងនៅ ខាទុំ និងបណ្ដាទីក្រុងដែលនៅក្បែរនោះ រួមមាន Omdurman និង Bahri រួមនឹងបណ្ដាតំបន់នៅស៊ូដង់កាលពីថ្ងៃទី 15 មេសា។

កងទ័ពស៊ូដង់ និង RSF បានរួមគ្នាធ្វើរដ្ឋប្រហារមួយកាលពីឆ្នាំ 2021 ប៉ុន្តែបានបរាជ័យក្នុងការចរចាអំពីផែនការបង្កើតរដ្ឋាភិបាលស៊ីវិល និងបញ្ចូល RSF ទៅក្នុងកងកម្លាំងប្រដាប់អាវុធ។

ការផ្ទុះសង្គ្រាមស៊ីវិលភ្លាមៗនៅស៊ូដង់ បានបំផ្លាញផែនការស្ដាររបបប្រជាធិបតេយ្យ រុញច្រានប្រទេសក្រីក្រមួយនេះធ្លាក់ចូលទៅក្នុងវិបត្តិមនុស្សធម៌ និងប្រឈមនឹងសង្គ្រាមធំដែលអាចអូទាញមហាអំណាចបរទេស៕

April 24, 2023

សមាជិកទាំងអស់របស់ណាតូ យល់ព្រមថានឹងបញ្ចូលអ៊ុយក្រែនជាសមាជិក

អគ្គលេខាធិការនៃសម្ព័ន្ធមិត្តយោធាណាតូ (NATO) លោក Stoltenberg បានឱ្យដឹងថា សមាជិកទាំងឡាយបានយល់ព្រមបញ្ចូលប្រទេសអ៊ុយក្រែនជាសមាជិក ក្រោយពីសង្គ្រាមបានបញ្ចប់។

«ប្រធានាធិបតីវ៉ូឡូឌីមៀ ហ្សេឡែនស្គី មានក្ដីសង្ឃឹមយ៉ាងជាក់លាក់ ហើយយើងបានពិភាក្សាគ្នាអំពីបញ្ហាចូលជាសមាជិក និងការធានាសន្តិសុខសម្រាប់ទីក្រុងកៀវ» អគ្គលេខាធិការណាតូ លោក Jens Stoltenberg បានប្រាប់ក្រុមអ្នកយកព័ត៌មានកាលពីថ្ងៃទី 21 មេសាដូច្នេះ។ លោកបន្ថែមថា «សមាជិកទាំងអស់យល់ស្របថា អ៊ុយក្រែននឹងក្លាយជាសមាជិករបស់សម្ព័ន្ធនេះ»។

លោក Stoltenberg មិនបានលើកឡើងពេលវេលាដែលអ៊ុយក្រែនអាចចូលជាសមាជិកណាតូ ព្រោះថា ប្រការនេះនឹងអាចកើតឡើងតែនៅពេលសង្គ្រាមបានបញ្ចប់។ «បច្ចុប្បន្នមិនមាននរណាអាចកំណត់ពេលវេលា និងរូបមន្តក្នុងការបញ្ចប់សង្គ្រាម ប៉ុន្តែនៅពេលបញ្ចប់ យើងត្រូវការធានាថា ប្រវត្តិសាស្ត្រនេះនឹងមិនកើតឡើងជាថ្មី» អគ្គលេខាធិបការណាតូបញ្ជាក់បន្ថែម។

ប្រកាសខាងលើត្រូវបានលើកឡើងនៅខាងក្រៅកិច្ចប្រជុំរបស់ក្រុមរដ្ឋមន្ត្រីការពារជាតិស្ដីពីជំនួយយោធាសម្រាប់អ៊ុយក្រែន នៅប្រទេសអាល្លឺម៉ង់។

លោក Stoltenberg មួយថ្ងៃមុននោះបានធ្វើដំណើរទៅដល់ទីក្រុងកៀវ និងប្រកាសថា «អនាគតរបស់អ៊ុយក្រែនគឺការក្លាយជាសមាជិករបស់ណាតូ»។ បន្ទាប់មក រុស្ស៊ីក៏បានបញ្ជាក់ជាថ្មីថា ការរារាំងអ៊ុយក្រែនចូលជាសមាជិកណាតូនៅតែជាគោលដៅមួយក្នុងចំណោមគោលដៅសំខាន់ៗរបស់ប្រទេសនេះ។

រុស្ស៊ី តាំងពីយូរមកហើយ ធ្លាប់បានប្រកាសថា ដំណើរឆ្ពោះមកទិសខាងកើតរបស់ណាតូ គឺជាការគំរាមកំហែងដ៏ធ្ងន់ធ្ងរមួយចំពោះសន្តិសុខ បង្ខំឱ្យទីក្រុងមូស្គូត្រូវធ្វើយុទ្ធនាការយោធាពិសេសនៅអ៊ុយក្រែន។

កាលពីខែកញ្ញា 2022 អ៊ុយក្រែនបានចុះហត្ថលេខាលើពាក្យសុំចូលជាសមាជិកណាតូ បន្ទាប់ពីរុស្ស៊ីបានរឹបអូសយកខេត្តចំនួនបួននៅអ៊ុយក្រែន។ ទីក្រុងកៀវបានបញ្ចូលគោលដៅនេះទៅក្នុងរដ្ឋធម្មនុញ្ញតាំងពីឆ្នាំ 2019 បើទោះមានការព្រមានពីរុស្ស៊ី៕

April 22, 2023

អាម៉េរិកសហការជាមួយជប៉ុនក្នុងការហោះទៅយកដីពីព្រះចន្ទរបស់ពិភពអង្គារ

ទីភ្នាក់ងារអវកាសអាម៉េរិក (ណាសា-NASA) បានចុះហត្ថលេខាលើអនុស្សារណៈនៃការយោគយល់ជាមួយនឹងចាសា (JAXA) របស់ជប៉ុន ដើម្បីចូលរួមបេសកកម្មស្រាវជ្រាវទៅលើព្រះចន្ទរបស់ផ្កាយព្រះអង្គារ (MMX)។

អនុស្សារណៈនៃការយោគយល់ខាងលើនេះនឹងអនុញ្ញាតឱ្យណាសាផ្ដល់ប្រព័ន្ធពិសោធសម្រាប់ការស្រាវជ្រាវនៅឋានព្រះចន្ទរបស់ពិភពអង្គារ និងឧបករណ៍យកសំណាកឧស្ម័នសម្រាប់បំពាក់លើយានអវកាសរបស់បេសកកម្ម MMX។ MMX មានតួនាទីយកសំណាកដីពីព្រះចន្ទ Phobos របស់ពិភពអង្គារ និងនាំមកកាន់ផែនដី។

យានអវកាស MMX របស់ជប៉ុនគ្រោងនឹងត្រូវបានបាញ់បង្ហោះនៅឆ្នាំ 2024 និងឆ្ពោះចូលដល់គន្លងគោចររបស់ពិភពអង្គារនៅឆ្នាំ 2025។ MMX នឹងហោះទៅកាន់ព្រះចន្ទទាំងពីររបស់ពិភពអង្គារ គឺ Phobos និង Deimos ប៉ុន្តែនឹងចុះចតលើតែព្រះចន្ទធំជាងគេ Phobos ប៉ុណ្ណោះ។

MMX នឹងចុះចតលើដីព្រះចន្ទ Phobos ក្នុងរយៈពេលមិនច្រើនម៉ោងដើម្បីយកសំណាកដី។ សំណាកដីនោះនឹងត្រូវបាននាំមកកាន់ផែនដីនៅឆ្នាំ 2029 ដើម្បីឱ្យអ្នកវិទ្យាសាស្ត្រធ្វើការសិក្សាស្រាវជ្រាវ។ នេះនឹងក្លាយជាសំណាកដីដំបូងគេដែលត្រូវបានយកដោយផ្ទាល់ពីព្រះចន្ទ Phobos។

ព្រះចន្ទទាំងពីររបស់ពិភពអង្គារ គឺ Phobos និង Deimos

ទីភ្នាក់ងារអវកាសជប៉ុន ចាសា ធ្លាប់ទទួលបានជោគជ័យក្នុងការយកសំណាកដីពីអាចម៍ផ្កាយនានាក្នុងប្រព័ន្ធព្រះអាទិត្យនាពេលកន្លង។ ឆ្នាំ 2010 យានអវកាស Hayabusa បាននាំយកដុំថ្មពីអាចម៍ផ្កាយ Itokawa មកកាន់ផែនដី។ យាន Hayabusa2 របស់ជប៉ុនក៏ធ្លាប់បាននាំយកសំណាកដីពីអាចម៍ផ្កាយ Ryugu មកកាន់ផែនដីប្រកបដោយភាពរលូនផងដែរ កាលពីឆ្នាំ 2020៕

April 21, 2023

Category: អន្តរជាតិ