អន្តរជាតិ - La Reine Media

បន្ទោសតែគេគ្រប់យ៉ាង! ត្រាំពន្លះWHO ថា ណែនាំវិធីការពារវីរុសមហាសែនអន់ នាំឱ្យកូវីដ-19 រាលដាលធ្ងន់ធ្ងរ…

ប្រធានាធិបតី ដូណាល់ ត្រាំ នៃសហរដ្ឋអាមេរិក កាលពីថ្ងៃអង្គារ(ទី7មេសា)បានរិះគន់អង្គការសុខភាពពិភព លោក(WHO) យ៉ាងធ្ងន់ៗ ដោយបានចោទថា អង្គការនេះបានផ្ដល់ភាពសំខាន់ទៅលើប្រទេសចិនខ្លាំងជ្រុលពេក និងណែនាំវិធីការពារមេរោគមហាសែនអន់ក្នុងអំឡុងការឆ្លងរាតត្បាតរបស់មេរោគវីរុសកូរ៉ូណាប្រភេទថ្មី ឬកូវីដ-19 ខណៈដែលស្ថានការណ៍វិបត្តិកូវីដ-19 នៅក្នុងសហរដ្ឋអាមេរិក ជាពិសេសក្នុងទីក្រុងនីវយ៉កកាន់តែចាប់ផ្ដើមធ្ងន់ធ្ងរឡើងៗទៅជារឿយៗ។

“អង្គការសុខភាពពិភពលោក ជាអ្នកចម្លងសាយភាយវា” លោកត្រាំ បានសរសេរយ៉ាងដូច្នេះនៅក្នុងធ្វីតធើរ “សម្រាប់ហេតុផលមួយចំនួន គឺអង្គការនេះបានទទួលការគាំទ្រខាងហិរញ្ញវត្ថុមួយចំណែកធំពីសហរដ្ឋអាមេរិក តែចិនជាមជ្ឈមណ្ឌលកណ្ដាល។ សំណាងល្អដែរ ដែលខ្ញុំបានបដិសេធការណែនាំរបស់ពួកគេ ដែលប្រាប់ថា ឱ្យបើកព្រំដែនស្វាគមន៍ចិនក្នុងអំឡុងពេលដំបូងៗ…តើហេតុអី បានពួកគេផ្ដល់ការណែនាំដែលខុសឆ្គងដល់ពួកយើង?”
ទីភ្នាក់ងារសារព័ត៌មានរ៉យទ័រ ព្យាយាមទាក់ទងសាកសួរ ពាក់ព័ន្ធនឹងការរិះគន់របស់លោកត្រាំនេះ ទៅអង្គការសុខភាពពិភពលោក តែខាងអង្គការសុខភាពពិភពលោកនៅមិនទាន់ឆ្លើយតបនៅឡើយ។

កាលពីថ្ងៃទី31 មីនា អង្គការសុខភាពពិភពលោក ដែលជាអង្គការផ្នែកសុខភាពសាធារណៈរបស់អង្គការសហប្រជាជាតិ បានចេញការណែនាំដល់ប្រទេសផ្សេងៗ ឱ្យបើកព្រំដែនតាមប្រក្រតី ទោះជាមានការឆ្លងរាលដាល និងទោះជាមួយផ្នែកទៀត ពួកគេបានសង្កត់ធ្ងន់ថា ប្រទេសផ្សេងៗមានសិទ្ធិប្រើវិធានការផ្សេងៗក្នុងការការពារពលរដ្ឋរបស់ខ្លួនក៏ដោយ តែតមក ក្នុងថ្ងៃជាមួយគ្នា រដ្ឋបាលរបស់លោកត្រាំ បានសម្រេចចិត្តចេញវិធានការកម្រិតការធ្វើដំណើរ សម្រាប់អ្នកដំណើរមកពីប្រទេសចិន។

កាលពីពេលមុនហ្នឹង ពួកអ្នកនយោបាយគាំពារនិយមនៅក្នុងសហរដ្ឋអាមេរិក បាននាំគ្នាចេញមករិះគន់អង្គការសុខភាពពិភពលោកធ្ងន់ឡើងៗជារឿយៗ ចំពោះការណែនាំរបស់WHO ក្នុងអំឡុងពេលមេរោគកំពុងរាតត្បាតក្នុងកម្រិតសកល ដោយបានប្រាប់ថា អង្គការមួយនេះ ពឹងតែលើព័ត៌មានដែលខុសៗអំពីចិន ពាក់ព័ន្ធនឹងការចម្លងសាយភាយរបស់មេរោគកូរ៉ូណាប្រភេទថ្មីនេះ។

កាលពីសប្ដាហ៍កន្លងទៅ ម៉ាកូ រូប៊ីអូ សមាជិកព្រឹទ្ធសភានៃគណបក្សសាធារណរដ្ឋ បានទាមទារឱ្យ លោកថេដ្រូស អ៊ែតហាណូម កេប្រេយេស៊ុស ប្រធានអង្គការសុខភាពពិភពលោក ចុះចេញពីតំណែង ដោយបានប្រាប់ថា៖ “គាត់បណ្ដោយឱ្យចិន ប្រើអង្គការសុខភាពពិភពលោកដឹកនាំសហគមន៍ពិភពលោកទៅក្នុងផ្លូវដែលខុស”។

ការរិះគន់របស់លោកត្រាំ បានកើតឡើងក្រោមស្ថានការណ៍ការឆ្លងរាលដាលដែលមិនសូវជាល្អប៉ុន្មាននៅក្នុងប្រទេសអាមេរិក ជាពិសេសក្នុងទីក្រុងនីវយ៉ក ដែលតាមរយៈការរាប់របស់ទីភ្នាក់ងារព័ត៌មានរ៉យទ័រ បានរកឃើញថា តួលេខអ្នកឆ្លងមេរោគនៅក្នុងទីក្រុងមួយនេះ មានចំនួនច្រើន វ៉ាដាច់ប្រទេសអ៊ីតាលីរួចរាល់ទៅហើយកាលពីថ្ងៃអង្គារ(ទី7មេសា) ទាំងដែលអ៊ីតាលី គឺជាប្រទេសដែលមានអ្នកឆ្លងមេរោគច្រើនបំផុតលំដាប់លេខ3 នៅលើពិភពលោកបន្ទាប់ពីអាមេរិកនិងអេស្ប៉ាញ។

តាមរយៈការរាប់ចំនួនរបស់ទីភ្នាក់ងារព័ត៌មានរ៉យទ័រ បានរកឃើញថា នៅក្នុងទីក្រុងនីវយ៉ក(តែមួយ) មានអ្នកឆ្លងមេរោគ ចំនួន 138,836នាក់ ច្រើនជាងចំនួន 135,586នាក់ទូទាំងប្រទេសអ៊ីតាលី ខណៈដែលអាមេរិក ជាប្រទេសដែលរកឃើញអ្នកឆ្លងមេរោគ(ទូទាំងប្រទេស)ច្រើនជាងគេបំផុត ចំនួនជាង 380,000នាក់ ក្នុងនោះស្លាប់ 11,800នាក់ តាមពីក្រោយដោយប្រទេសអេស្ប៉ាញ ដែលរកឃើញអ្នកឆ្លងមេរោគ ច្រើនជាង 140,000 នាក់ និងស្លាប់ជាង 13,000នាក់។

តួលេខទាំងនេះ ត្រូវបានផ្សព្វផ្សាយចេញមក ក្នុងខណៈដែលអាមេរិកកំពុងត្រៀមខ្លួនប្រឈមនឹងស្ថានការណ៍អាក្រក់បំផុតក្នុងសប្ដាហ៍នេះ ដែលអាជ្ញាធរម្នាក់បានហៅថា “ជាសប្ដាហ៍ដែលផុតកំពូលបំផុតរបស់ការស្លាប់” ដោយសារកូវីដ-19។

ទីក្រុងនីវយ៉ក រកឃើញអ្នកស្លាប់ប្រចាំថ្ងៃ ច្រើនជាងគេបំផុត រាប់ចាប់តាំងពីមានការឆ្លងរាលដាល ដោយមានចំនួន 731នាក់ សរុប 5,489នាក់ ទោះជាកាលពីពេលមុនហ្នឹង លោក អ៊ែនឌ្រូវ៍ ឃូអូម៉ូ អភិបាលក្រុងនីវយ៉ក បានបញ្ជាក់កាលពីថ្ងៃអង្គារ(ទី7មេសា)ថា ចំនួនអ្នកជំងឺដែលចូលទៅព្យាបាលនៅតាមមន្ទីរពេទ្យផ្សេងៗ មើល ទៅហាក់ដូចជាស្ថិតក្នុងកម្រិតទប់ទប់ហើយក៏ដោយ៕

ប្រភព៖ សារព័ត៌មានបរទេស

April 8, 2020

Wuhan បញ្ចប់បម្រាមគោចររយៈពេល76ថ្ងៃ ប៉ុន្តែអង្គភាពនាំពាក្យរបស់បក្សកុម្មុយនិស្តចិនព្រមានថា…

ប្រទេសចិនបានអនុញ្ញាតឱ្យប្រជាជននៅ Wuhan មានសេរីភាពក្នុងការចេញ-ចូលទីក្រុងនេះ ចាប់ពីម៉ោង00:00:00នាទី ថ្ងៃទី8មេសា បន្ទាប់ពីការដកបម្រាមគោចររយៈ76ថ្ងៃដោយសារCOVID-19។

ការសម្រេចចិត្តដកវិធានការបម្រាមគោចរខាងលើនេះ បានបញ្ចប់ភាពឯកោជាង2ខែរបស់ទីក្រុង Wuhan រាប់ចាប់ពីបទបញ្ជាបម្រាមគោចរដែលមិនធ្លាប់មានត្រូវបានដាក់ទៅលើតំបន់ដែលមានពលរដ្ឋប្រមាណជា11លាននាក់ នៅទីក្រុងនេះ កាលពីថ្ងៃទី23មករា។ ពេលនេះ ប្រជាជនមានសិទ្ធិសេរីភាពក្នុងការធ្វើដំណើរ ឱ្យតែកម្មវិធីនៅលើទូរស័ព្ទដៃរបស់ពលរដ្ឋនីមួយៗដែលរដ្ឋាភិបាលបានបង្កើតឡើង បង្ហាញថា ពួកគេមានសុខភាពល្អ ហើយថ្មីៗនេះមិនបានជួបអ្នកណាដែលមានផ្ទុកមេរោគCOVID-19។

វិធានការការពារការឆ្លងវីរុស ដូចជាការពាក់ម៉ាស់ វាស់កម្ដៅខ្លួន និងការកាត់បន្ថយទំនាក់ទំនងផ្ទាល់រវាងមនុស្សនឹងមនុស្សនៅតែបន្តអនុវត្តនៅក្នុងទីក្រុង Wuhan។

ការសម្រេចដកបម្រាមគោចរនេះត្រូវបានធ្វើឡើងនៅក្នុងពេលដែលប្រទេសចិនមិនមានករណីស្លាប់ក្នុងរយៈពេល24ម៉ោងនាថ្ងៃទី7មេសា ចាប់ពីមេរោគផ្ទុះឆ្លងរាលដាល។ ទីក្រុង Wuhan និងខេត្ត Hubei ទាំងមូលក៏មិនបានរកឃើញករណីឆ្លងមេរោគថ្មី។ ប្រទេសចិន គិតមកដល់បច្ចុប្បន្ន បានរកឃើញអ្នកផ្ទុកវីរុសសរុបជាង81,000នាក់ ខណៈអ្នកជំងឺជាង77,000នាក់បានជាសះស្បើយ និងជាង3,300នាក់បានបាត់បង់ជីវិត។

ក៏ប៉ុន្តែ People’s Daily ដែលជាសារព័ត៌មានផ្លូវការ និងជាអង្គភាពនាំពាក្យរបស់បក្សកុម្មុយនីស្តចិន បានព្រមានថា មិនគួរអបអរឆាប់ពេកនោះទេ។ “អ្នករាល់គ្នាបានទន្ទឹងរង់ចាំថ្ងៃនេះយូរណាស់មកហើយ ហើយវាគឺជារឿងដែលគួរត្រេកអរ។ ប៉ុន្តែ វាមិនមែនជាសញ្ញានៃជ័យជំនះចុងក្រោយនោះឡើង។ យើងទាំងអស់គ្នានៅតែត្រូវរំឭកខ្លួនឯងថា យើងអាចពេញចិត្តនឹងការដែលទីក្រុង Wuhan បានដកបម្រាមគោចរ តែក៏មិនត្រូវភ្លេចខ្លួននោះដែរ” បទវិចារណកថារបស់ People’s Daily មានឃ្លាមួយសរសេរបែបនេះ។

COVID-19 បានចាប់ផ្ដើមផ្ទុះឆ្លងរាលដាលពីទីក្រុង Wuhan កាលពីខែធ្នូ ឆ្នាំ2019 ប៉ុន្តែពេលនេះ សហរដ្ឋអាមេរិក និងអឺរ៉ុប គឺជាសម្បុកមេរោគធំជាងគេរបស់ពិភពលោក។ នៅទូទាំងពិភពលោក មានករណីឆ្លងមេរោគជិត1.4លាននាក់ និងអ្នកស្លាប់ជាង79,000នាក់ ខណៈដែលអ្នកជំងឺបានជាសះស្បើយមានជាង298,000នាក់ និងអ្នកជំងឺកំពុងប្រឈមនឹងការស្លាប់មានដល់ទៅជាង47.000នាក់៕

ប្រភព៖ សារព័ត៌មានបរទេស

April 8, 2020

មនុស្សជាង81.000នាក់ស្លាប់ដោយសារ COVID-19 នៅទូទាំងសកលលោក

ពិភពលោកបានរកឃើញអ្នកផ្ទុកវីរុសកូរ៉ូណាCOVID-19 ចំនួនជាង1.4លានករណី និងស្លាប់ជាង81,000ករណី ក្នុងនោះសហរដ្ឋអាមេរិក និងអឺរ៉ុបបន្តជាសម្បុកមេរោគធំជាងគេ។

យោងតាមស្ថិតិរបស់សាកលវិទ្យាល័យ Johns Hopkins ពិភពលោកបច្ចុប្បន្នមានករណីឆ្លងវីរុសសរុប1,414,738នាក់ និង81,259នាក់បានស្លាប់ ដោយសារតែវីរុសCOVID-19 ដែលកំពុងបង្ហាញវត្តមាននៅក្នុងប្រទេស និងដែនដីចំនួន209 ក្នុងនោះមានករណីឆ្លងថ្មី72,366នាក់ និងស្លាប់ថ្មី6,701នាក់។ ករណីជាសះស្បើយមានចំនួន298,642នាក់។

សហរដ្ឋអាមេរិក៖ ឆ្លងថ្មី31,500នាក់ និងឆ្លងសរុប396,223នាក់។ ស្លាប់ថ្មី1,944នាក់ និងស្លាប់សរុប12,722នាក់។

អេស្ប៉ាញ៖ ឆ្លងថ្មី5,267នាក់ និងឆ្លងសរុប141,942នាក់។ ស្លាប់ថ្មី704នាក់ និងស្លាប់សរុប14,045នាក់។ ប្រទេសនេះគឺជាសម្បុកមេរោគធំជាងគេលំដាប់ទី2ក្នុងពិភពលោក បន្ទាប់ពីសហរដ្ឋអាមេរិក។

អ៊ីតាលី៖ ឆ្លងថ្មី3,039នាក់ និងឆ្លងសរុប135,586នាក់។ ស្លាប់ថ្មី604នាក់ និងស្លាប់សរុប17,127នាក់។ ប្រទេសនេះ នៅតែជា “វាលពិឃាត” របស់ COVID-19 ធំបំផុតក្នុងពិភពលោក។

បាររាំង៖ ឆ្លងថ្មី11,059នាក់ និងឆ្លងសរុប109,069នាក់។ ស្លាប់ថ្មី1,417នាក់ និងស្លាប់សរុប10,328នាក់។ ប្រទេសនេះ បានលោតរំលងប្រទេសអាល្លឺម៉ង់ ហើយក្លាយជាសម្បុកមេរោគធំជាងគេទី3នៅអឺរ៉ុប។

អាល្លឺម៉ង់៖ ឆ្លងថ្មី4,288នាក់ និងឆ្លងសរុប107,663នាក់។ ស្លាប់ថ្មី206នាក់ និងស្លាប់សរុប2,016នាក់។ ប្រទេសនេះ គឺជាសម្បុកមេរោគធំជាងគេលំដាប់ទី4នៅអឺរ៉ុប។

អង់គ្លេស៖ ស្លាប់ថ្មី786នាក់ និងស្លាប់សរុប6,159នាក់ ក្នុងចំណោមអ្នកជំងឺសរុប55,242នាក់។

អ៊ីរ៉ង់៖ ប្រទេសនេះបន្តជាសម្បុកមេរោគធំជាងគេទី2នៅអាស៊ី បន្ទាប់ពីប្រទេសចិន ដោយមានអ្នកជំងឺសរុប62,589នាក់ និងស្លាប់សរុប3,872នាក់។

ប្រទេសចិន និងកូរ៉េខាងត្បូងមិនទាន់ប្រកាសតួលេខថ្មីនៅឡើយ។ ប្រទេសចិន (តួលេខចុងក្រោយ) អ្នកឆ្លងសរុប81,740នាក់ និងស្លាប់សរុប3,331នាក់ ខណៈកូរ៉េខាងត្បូង (តួលេខចុងក្រោយ) អ្នកជំងឺសរុប10,331នាក់ និងស្លាប់សរុប192នាក់។

អាស៊ីអាគ្នេយ៍៖ ម៉ាឡេស៊ីបន្តជាសម្បុកមេរោគធំជាងគេក្នុងតំបន់ ដោយមានអ្នកជំងឺសរុប3,963នាក់ និងស្លាប់63នាក់។ ឥណ្ឌូនេស៊ី ជា “វាលពិឃាត” របស់ COVID-19 ធំជាងគេក្នុងតំបន់ ដោយមានអ្នកស្លាប់សរុប221នាក់ គឺកើន12ករណីធៀបនឹងម្សិលមិញ ខណៈអ្នកឆ្លងមេរោគសរុបឡើងដល់2,738នាក់៕

ប្រភព៖ សារព័ត៌មានបរទេស

April 8, 2020

មន្ទីរស្រាវជ្រាវអង់គ្លេសថា “គួរប្ដឹងប្រទេសចិនឱ្យសងសំណង6.5លានលានដុល្លារ ព្រោះតែCOVID-19”

មន្ទីរស្រាវជ្រាវ Henry Jackson Society នៅប្រទេសអង់គ្លេសយល់ថា បណ្ដាប្រទេស G7 អាចប្ដឹងប្រទេសចិន ដើម្បីទាមទារសំណងយ៉ាងតិច6.5លានលាន(6,500,000,000,000)ដុល្លារអាមេរិក ដោយសារតែបានធ្វើឱ្យវីរុសCOVID-19 ឆ្លងរាលដាល។

មន្ទីរស្រាវជ្រាវ Henry Jackson Society (HJS) ដែលមានមូលដ្ឋាននៅទីក្រុងឡុងដ៍ប្រទេសអង់គ្លេសបានសរសេរនៅក្នុងរបាយការណ៍ “សងសំណងវីរុសកូរ៉ូណា?” ដែលបានប្រកាសក្នុងថ្ងៃនេះថា “បើសិនជាប្រទេសចិនបានផ្ដល់ព័ត៌មានត្រឹមត្រូវក្នុងដំណាក់កាលដំបូង វីរុសរាតត្បាតនឹងមិនអាចចេញផុតពីប្រទេសនេះនោះទេ”។

ឯកសារខាងលើបានយល់ថា ប្រទេសចិនបានរំលោភលើច្បាប់ចំនួន10មាត្រា ក្នុងនោះមានមាត្រាមួយនិយាយអំពីបញ្ហាសុខភាពអន្តរជាតិដែលហៅកាត់ថា IHR (International Health Regulations) ដែលត្រូវបានរឹតបន្តឹងក្រោយអាសន្នរោគ SARS កាលពីឆ្នាំ2003។ HJS អះអាងថា ការព្យាយាមបិទបាំងរោគរាតត្បាតរបស់ទីក្រុងប៉េកាំង បានបណ្ដាលឱ្យ COVID-19 ឆ្លងពាសពេញពិភពលោក ធ្វើឱ្យមនុស្សជាង1.3លាននាក់ត្រូវឆ្លងមេរោគ ជាង74,000នាក់ស្លាប់ និងនាំឱ្យមានការខាតបង់ប្រាក់រាប់លានលានដុល្លារអាមេរិក។

របាយការណ៍របស់ HJS មានឃ្លាសរសេរថា “មន្ត្រីប្រទេសចិនជាច្រើន រួមទាំងអ្នកនាំពាក្យរបស់ក្រសួងការបរទេសចិន លោក Zhao Li Jian បានគាំទ្រគំនិតមិនសមហេតុផលថា COVID-19 ត្រូវបានកងទ័ពអាមេរិកាំងនាំចូលតំបន់ Wuhan មិនមែនមានប្រភពពីផ្សារលក់ត្រីសុទ្រនៅទីក្រុងនេះ ដែលជាកន្លែងទិញដូរសត្វព្រៃនោះទេ។

HJS យល់ថា ប្រទេសចិនត្រូវតែសងសំណងយ៉ាងហោចណាស់ 6.5លានលានដុល្លារអាមេរិក ប្រហាក់ប្រហែលនឹងទំហំទឹកប្រាក់ដែលបណ្ដាប្រទេសG7 កំពុងចំណាយដើម្បីទប់ទល់នឹងរោគរាតត្បាត និងជួយសង្គ្រោះខឿនសេដ្ឋកិច្ច ដោយសារប្រជាជនត្រូវនៅផ្ទះ ចំណែកវិស័យឧស្សាហកម្មក៏ត្រូវពន្យារពេល។

IHR កំណត់ឱ្យបណ្ដាប្រទេសត្រូវតែតាមដាន និងចែករំលែកព័ត៌មានអំពីលទ្ធភាពនៃការចម្លងមេរោគ និងកម្រិតធ្ងន់ធ្ងរនៃមេរោគដែលមានលទ្ធភាពចម្លងរវាងប្រទេសនិងប្រទេស។ មន្ទីរស្រាវជ្រាវ Henry Jackson Society បានចោទប្រកាន់ប្រទេសចិនថា បានធ្វើសកម្មភាពផ្ទុយពីនេះ ដោយសារតែបានបិទបាំងព័ត៌មាន និងពិន័យទៅលើអ្នកដែលព្យាយាមបញ្ចេញទិន្នន័យ។

សារព័ត៌មាន SCMP នៅហុងកុងបានឱ្យដឹងថា មនុស្សជិត200នាក់បានឆ្លងវីរុសCOVID-19 ត្រូវបានរកឃើញនៅមុនថ្ងៃទី27ធ្នូ ឆ្នាំ2019 ប៉ុន្តែអាជ្ញាធរចិន គ្រាន់តែរាយការណ៍អំពីជំងឺទៅអង្គការសុខភាពពិភពលោក(WHO) ក្រោយនោះចំនួន4ថ្ងៃ ហើយអះអាងថា មិនទាន់មានភ័ស្តុតាងបង្ហាញថា វាឆ្លងពីមនុស្សទៅមនុស្ស។

JHS បានឱ្យដឹងថា “អ្នកដែលបានផ្លុំកញ្ចែ ដូចជាវេជ្ជបណ្ឌិត Li Wenliang ជាដើម ត្រូវបានព្រមានដោយសារតែចែករំលែកព័ត៌មានអំពីរោគរាតត្បាត។ មនុស្សជាច្រើនយល់ថា COVID-19 បានឆ្លងពីមនុស្សទៅមនុស្សតាំងពីមុនអំឡុងពេលខាងលើ”។ JHS អំពាវនាវឱ្យបង្កើតជាសម្ព័ន្ធភាពដើម្បីប្ដឹង ព្រោះតែទីក្រុងប៉េកាំង “តែងតែប្រតិកម្មយ៉ាងកំរោលចំពោះការគំរាមនៅលើឆាកអន្តរជាតិ”។

ប្រធានាធិបតីចិន លោកស៊ីជិនពីង រួមនឹងមេដឹកនាំចិនដទៃទៀត កំពុងគោរពវិញ្ញាណក្ខន្ធ នៅក្នុងថ្ងៃកាន់ទុក្ខជាតិសម្រាប់ជនរងគ្រោះដោយសារវីរុសCOVID-19 (នៅទីក្រុងប៉េកាំងនៅថ្ងៃសៅរ៍ទី4 ខែមេសា)។

របាយការណ៍ក៏បានសរសេរថា “វិធានការនេះនឹងទាមទារឱ្យមានភាពក្លាហាន និងសាមគ្គីទូទាំងពិភពលោក។ អាជ្ញាធរទីក្រុង Wuhan និងខេត្ត Hubei បានរំលោភលើ IHR ក្នុងដំណាក់កាលដំបូងនៃអាសន្នរោគ ហើយការទទួលខុសត្រូវគឺត្រូវតែជារបស់មេដឹកនាំជាន់ខ្ពស់បំផុត។ ជាការពិត វិធីទប់ទល់នឹង COVID-19 របស់អាជ្ញាធរចិន បានរំលោភលើច្បាប់អន្តរជាតិ”។

ការប្ដឹងផ្ដល់ដែលកើតឡើងជុំវិញបញ្ហា IHR គឺជាសកម្មភាពដែលមិនធ្លាប់មានពីមុនមក ប៉ុន្តែ JHS យល់ថា ក្របខ័ណ្ឌក្នុង WHO អនុញ្ញាតឱ្យធ្វើរឿងនេះ។ មន្ទីរស្រាវជ្រាវអង់គ្លេសក៏បានលើកឡើងអំពីយុទ្ធសាស្ត្រដែលអាចនាំបញ្ហានេះឡើងតុលាការអាជ្ញាកណ្ដាល អង្គការពាណិជ្ជកម្មអន្តរជាតិ ឬទាក់ទងនឹងបទបញ្ញត្តនៅក្នុងកិច្ចព្រមព្រៀងវិនិយោគ ឬសម្បីតែអនុសញ្ញារបស់អង្គការសហប្រជាជាតិស្តីពីច្បាប់ដែនសមុទ្រក៏អាចយកមកប្រើបានដែរ។

Matthew Henderson ដែលជាសហអ្នកនិពន្ធនៃរបាយការណ៍នេះ យល់ថា ប្រជាជនចិនក៏ជា “អ្នករងគ្រោះដែលគ្មានកំហុស” ព្រោះតែការខ្វះការទទួលខុសត្រូវរបស់រដ្ឋាភិបាល។ “នេះគឺជាកំហុសរបស់រដ្ឋាភិបាលចិន។ ពួកគេមិនទាន់រៀនចេះអ្វីសោះបន្ទាប់ពីអាសន្នរោគ SARS។ ពាក្យមិនពិត និងព័ត៌មានក្លែងក្លាយពីដំណាក់កាលដំបូងនៃអាសន្នរោគ COVID-19 បានធ្វើឱ្យមានផលវិបាកដែលបណ្ដាលឱ្យមនុស្សជាច្រើនត្រូវបាត់បង់ជីវិត”។ នេះបើតាម Henderson។

ក្រុមអ្នករៀបចំរបាយការណ៍របស់ JHS យល់ថា ការគន់គូរអំពីទំហំនៃផលវិបាក ឬការខូចខាតសម្រាប់បណ្ដាប្រទេសកំពុងអភិវឌ្ឍ និងការបង្កើតយន្តការប្ដឹងផ្ដល់ទៅតាមលំដាប់លំដោយ ដោយយោងទៅលើច្បាប់ នឹងអាចជួយឱ្យបណ្ដាប្រទេស “ទទួលបានសំណងក្រោយការខាតបង់ដោយសារប្រទេសចិនបង្កឡើង”៕

ប្រភព៖ Sydney Morning Herald

April 7, 2020

COVID-19! ជប៉ុនប្រកាសអាសន្ន!

នាយករដ្ឋមន្ត្រីជប៉ុន លោក Shinzo Abe បានប្រកាសស្ថានភាពអាសន្នដែលមានរយៈពេល1ខែសម្រាប់រាជធានី Tokyo និងតំបន់ចំនួន6ផ្សេងទៀត ខណៈដែលករណីឆ្លងCOVID-19 បាន និងកំពុងកើនឡើងខ្លាំង។

វិធានការនេះនឹងមិនភ្ជាប់ជាមួយបម្រាមគោចរនោះទេ ប៉ុន្តែនឹងអនុញ្ញាតឱ្យអាជ្ញាធរខេត្តនៅមូលដ្ឋាន មានសិទ្ធិស្នើឱ្យពលរដ្ឋនៅតែក្នុងផ្ទះ ក៏ដូចជាបិទដំណើរការអាជីវកម្មបណ្ដោះអាសន្នបាន។

ការសម្រេចចិត្តប្រកាសអាសន្ននេះ ធ្លាប់ត្រូវបាននាយករដ្ឋមន្ត្រីជប៉ុនរំឭកនៅក្នុងកិច្ចប្រជុំមួយកាលពីម្សិលមិញ បន្ទាប់ពីតួលេខនៃការឆ្លងមេរោគ COVID-19 នៅឯរាជធានី Tokyo បានកើនលើសពី1,000នាក់។ លោក Abe ក៏បានឱ្យដឹងថា រាជរដ្ឋាភិបាលក៏នឹងស្នើបញ្ចេញកញ្ចប់ថវិកាជំនួយដែលមិនធ្លាប់មានពីមុនមក ដោយវាមានទំហំទឹកប្រាក់1លានលាន (1,000,000,000,000) ដុល្លារអាមេរិក ដើម្បីកាត់បន្ថយការខាតបង់សេដ្ឋកិច្ចដោយសារ COVID-19៕

ប្រភព៖ សារព័ត៌មានបរទេស

April 7, 2020

គណៈរដ្ឋមន្ត្រីអង់គ្លេសកំពុងបែកបាក់ផ្ទៃក្នុង ខណៈមិនច្បាស់លាស់អំពីអ្នកស្នងតំណែងនាយករដ្ឋមន្ត្រី ដែលកំពុងផ្ទុកវីរុសCOVID-19

នៅប៉ុន្មានម៉ោងប៉ុណ្ណោះ ក្រោយពីការិយាល័យនាយករដ្ឋមន្ត្រីអង់គ្លេសប្រកាសថាលោក Johnson នៅតែបន្តដឹកនាំប្រទេសពីបន្ទប់សម្រាកព្យាបាលនៅឯមន្ទីរពេទ្យ រដ្ឋមន្ត្រីការបរទេស Dominic Raab ត្រូវបានស្នើឱ្យដឹកនាំ “កិច្ចការចាំបាច់” មួយចំនួន ជំនួសនាយករដ្ឋមន្ត្រី។

នៅក្នុងកិច្ចប្រជុំមួយនៅឯការិយាល័យនាយករដ្ឋមន្ត្រីអង់គ្លេសកាលពីល្ងាចថ្ងៃទី6មេសាក្រោយពីនាយករដ្ឋមន្ត្រី Boris Johnson អាយុ55ឆ្នាំ បានចូលព្យាបាលជាបន្ទាន់នៅឯមន្ទីរពេទ្យដោយសារបានឆ្លងវីរុសCOVID-19 លោក Raab បានសន្យាជាមួយប្រជាជនថា រដ្ឋមន្ត្រី និងមន្ត្រីគ្រប់ជាន់ថ្នាក់ កំពុងតែបន្តអនុវត្តតាមបញ្ជារបស់នាយករដ្ឋមន្ត្រី។

“កិច្ចការរបស់រាជរដ្ឋាភិបាលនឹងត្រូវបានធ្វើបន្ត ហើយនាយករដ្ឋមន្ត្រីកំពុងត្រូវបានធានាសុវត្ថិភាពដោយក្រុមវេជ្ជបណ្ឌិតពូកែៗបំផុតនៅមន្ទីរពេទ្យ St Thomas” នេះបើតាមសម្ដីលោក Raab ដែលមានអាយុ46ឆ្នាំ ជារដ្ឋមន្ត្រីការបរទេសអង់គ្លេស។

លោក Raab ដែលជារដ្ឋមន្ត្រីទីមួយដែរនោះ មុននេះត្រូវបានប្រគល់ភារកិច្ចឱ្យដឹកនាំកិច្ចប្រជុំប្រចាំថ្ងៃរបស់គណៈរដ្ឋមន្ត្រីអង់គ្លេសដែលពិភាក្សាអំពីយុទ្ធសាស្ត្រប្រយុទ្ធប្រឆាំងនឹងការរាតត្បាតនៃវីរុសCOVID-19។ នៅក្នុងសេចក្ដីប្រកាសមួយ ការិយាល័យនាយករដ្ឋមន្ត្រីបានឱ្យដឹងថា រដ្ឋមន្ត្រីទីមួយ (លោក Raab) ត្រូវបានស្នើឱ្យ “បំពេញភារកិច្ចជំនួសនាយករដ្ឋមន្ត្រីលើរឿងចាំបាច់មួយចំនួន”។ នេះបង្ហាញថា រដ្ឋមន្ត្រីការបរទេស មិនទាន់ត្រូវបានអនុញ្ញាតឱ្យកាន់កាប់ទាំងស្រុងនូវតួនាទីរបស់នាយករដ្ឋមន្ត្រីនៅឡើយ។

នៅពេលត្រូវបានសួរ ថាតើបានទទួលកាន់កាប់ “ភារកិច្ចទាក់ទិននឹងសន្តិសុខជាតិ” ពីលោក Johnson ហើយឬនៅ លោក Raab ក៏បានបដិសេធមិនឆ្លើយតប។

លោក Dominic Raab រដ្ឋមន្ត្រីក្រសួងការបរទេស

ថ្នាក់ដឹកនាំដែលត្រូវឡើងជំនួសនាយករដ្ឋមន្ត្រីនៅអង់គ្លេស ខុសពីសហរដ្ឋអាមេរិក។ សិទ្ធិអំណាច និងភារកិច្ចរបស់អនុប្រធានាធិបតីអាមេរិក ត្រូវបានគេកំណត់យ៉ាងច្បាស់ដោយរដ្ឋធម្មនុញ្ញ ខណៈដែលនៅអង់គ្លេស ការិយាល័យនាយករដ្ឋមន្ត្រី មិនត្រូវបានអនុញ្ញាតឱ្យប្រើប្រាស់ ចាប់តាំងពីអតីតឧបនាយករដ្ឋមន្ត្រី Nick Clegg បានចូលរួមធ្វើសម្ព័ន្ធមិត្តជាមួយអតីតនាយករដ្ឋមន្ត្រី David Cameron កាលពីឆ្នាំ2010។

មុនពេលនាយករដ្ឋមន្ត្រី Johnson ចូលសម្រាកព្យាបាលនៅមន្ទីរពេទ្យ ភាពមិនច្បាស់លាស់ខាងលើ បានធ្វើឱ្យមានពាក្យចចាមអារ៉ាមអំពីការបែកបាក់ផ្ទៃក្នុងរវាងរដ្ឋមន្ត្រីនានា ក្នុងនោះក្រុមសម្ព័ន្ធមិត្តរបស់លោក Michael Gove (រដ្ឋមន្ត្រីនៃទីស្ដីការគណៈរដ្ឋមន្ត្រី) យល់ថា លោក Michael Gove ទើបជាអ្នកត្រូវឡើងគ្រប់គ្រងប្រទេសជំនួសនាយករដ្ឋមន្ត្រី Johnson។

នៅពេល COVID-19 បានឈានដល់ចំណុចគួរឱ្យព្រួយបារម្ភ ការិយាល័យនាយករដ្ឋមន្ត្រី បានដឹងមុនអំពីបញ្ហាដែលនឹងកើតឡើង ហើយក៏បានរៀបចំផែនការស្ដីអំពី “អ្នកស្នងតំណែងរបស់នាយករដ្ឋមន្ត្រី” ក្នុងនោះ គេឃើញថា លោក Dominic Raab ដែលជារដ្ឋមន្ត្រីទីមួយ និងជារដ្ឋមន្ត្រីការបរទេស ត្រូវបានតែងតាំងឱ្យស្ថិតនៅកំពូលតារាង ត្រៀមចូលកាន់តំណែងជួសនាយករដ្ឋមន្ត្រី។

លោក Michael Gove រដ្ឋមន្ត្រីទីមួយ និងជារដ្ឋមន្ត្រីនៃទីស្ដីការគណៈរដ្ឋមន្ត្រី (អ្នកគ្រប់គ្រងការិយាល័យនាយករដ្ឋមន្ត្រី)

ក៏ប៉ុន្តែ មកដល់ពេលនេះ សិទ្ធិអំណាចរបស់លោក Raab មិនទាន់ប្រាកដប្រជានៅឡើយ។ លោកស្រីបណ្ឌិត Catherine Haddon សមាជិកជាន់ខ្ពស់ម្នាក់នៅវិមានរដ្ឋាភិបាលឱ្យដឹងថា សិទ្ធិអំណាចមួយចំនួនអាចនឹងត្រូវបានប្រគល់ឱ្យរដ្ឋមន្ត្រីផ្សេងៗក្នុងជួរគណៈរដ្ឋមន្ត្រី៕

ប្រភព៖ សារព័ត៌មានបរទេស

April 7, 2020

អូយ បារម្ភជំនួស! ជនជាតិចិនជាច្រើនម៉ឺននាក់ប្រជ្រៀតគ្នាទៅកម្សាន្ត “ភ្នំហួងសាន” ក្រោយទើបរួចផុតវិបត្តិកូវីដ-19

ទិដ្ឋភាពដ៏គួរឱ្យភ្ញាក់ផ្អើល…មនុស្សម្នាចំនួនដ៏ច្រើននាំគ្នាសម្រុកទៅភ្នំហួងសាន ក្នុងមណ្ឌលអានហ៊ុយ ប្រទេសចិន បានបង្ហាញឱ្យឃើញពីភាពស្មុគស្មាញដែលប្រទេសនេះអាចនឹងប្រឈមនាពេលអនាគត ក្នុងខណៈដែលប្រទេសមួយនេះកំពុងព្យាយាមវិលត្រឡប់មករកសភាវប្រក្រតី និងព្យាយាមទប់ស្កាត់ការរស់ឡើងវិញរបស់វីរុសកូរ៉ូណាប្រភេទថ្មី ឬកូវីដ-19 ឱ្យបាននោះ។

ជ្រលងភ្នំទេសចរណ៍ដ៏ពេញនិយមដែលស្ថិតនៅភាគខាងកើតឆៀងខាងត្បូងរបស់ប្រទេសចិន ត្រូវបិទការបម្រើសេវាកម្មជាថ្មីម្ដងទៀត ក្រោយពីមនុស្សម្នាជាច្រើនម៉ឺននាក់ បានប្រជ្រៀតគ្នាដើរ ក្លាយជាខ្សែផ្លូវវែងមួយបន្តកន្ទុយគ្នា បំណងឡើងទៅកម្សាន្តលើភ្នំ ក្នុងអំឡុងថ្ងៃចុងសប្ដាហ៍កន្លងទៅ ក្រោមក្ដីបារម្ភកង្វល់យ៉ាងខ្លាំងថា វាអាចនឹងក្លាយជាគំនរភ្លើងដែលនឹងធ្វើឱ្យផ្ទុះវិបត្តិការឆ្លងរាលដាលរបស់មេរោគកូវីដ-19 ឡើងជាថ្មីម្ដងទៀត។

ប្រជាជនជាច្រើនម៉ឺននាក់នាំគ្នាចេញមកដើរលេងកម្សាន្ត ក្រោយពីរដ្ឋបាលមណ្ឌលអានហ៊ុយ មានប្រូម៉ូសិនដើរកម្សាន្តហ្វ្រ៊ី 29កន្លែង សង្ឃឹមបង្កើនចំនួនអ្នកទេសចរ ដែលបានចាប់ផ្ដើមតាំងពីថ្ងៃសៅរ៍(ទី4មេសា)ចុងសប្ដាហ៍កន្លងទៅ។

ក្នុងផែនការជំរុញវិស័យទេសចរណ៍នេះ អ្នកទេសចរត្រូវបានសំណូមពរឱ្យបង្ហាញពីស្ថានភាពខាងសុខភាពតាមរយៈអ៊ែបភ្លីខេសិនមួយ ពាក់ម៉ាស់អនាម័យការពារ និងមានមន្ត្រីចាំត្រួតពិនិត្យសីតុណ្ហភាពរាងកាយ មុននឹងអនុញ្ញាតឱ្យឡើងទៅ…។

តែយ៉ាងណាក៏ដោយ កាលពីថ្ងៃអាទិត្យ(ទី5មេសា) មន្ត្រីនៅឯឧទ្យាននោះ បានប្រាប់ថា ចាំបាច់ត្រូវបិទមណ្ឌលទេសចរណ៍មួយនេះជាថ្មីម្ដងទៀត ដោយសារតែចំនួនអ្នកទេសចរបានកើនលើសចំនួនដែលបានកំណត់ទុក 20,000នាក់ក្នុង 1ថ្ងៃ និងសំណូមពរឱ្យទៅដើរលេងកម្សាន្តនៅទីកន្លែងផ្សេងទៀត ឬរង់ចាំមកកម្សាន្តនៅភ្នំមួយនេះ នាឱកាសក្រោយទៀតក៏បាន។

រូបថត និងវីដេអូ ដែលបានផ្សព្វផ្សាយនៅលើ វើយប៉ ផ្លាតហ្វ៉មព័ត៌មានបណ្ដាញសង្គមអនឡាញរបស់ចិន បានបង្ហាញឱ្យឃើញពីហ្វូងមនុស្សដ៏ច្រើនកុះករ ប្រជ្រៀតគ្នាដើរឡើងទៅលើភ្នំ ក្នុងអំឡុងថ្ងៃឈប់សម្រាក 3ថ្ងៃ នៃថ្ងៃឆេងម៉េង។ មានអ្នកលេងបណ្ដាញសង្គមជាច្រើនបានបញ្ចេញការយល់ឃើញ ដូចជា “វិស័យទេសចរណ៍បានរងផលប៉ះពាល់យ៉ាងធ្ងន់ធ្ងរ ដូចគ្នានឹងវិស័យឧស្សាហកម្មដទៃទៀតដែរ តែមេរោគឆ្លងរាតត្បាត នៅមិនទាន់ចប់ទេ បើអ្នកត្រូវការបើកកន្លែងទេសចរណ៍ឡើងវិញ អ្នកចាំបាច់ត្រូវតែកំណត់ចំនួនអ្នកទេសចរ”។

ប្រទេសចិនបានរាយការណ៍ថា បានរកឃើញអ្នកឆ្លងមេរោគកូវីដ-19 ថ្មីនៅក្នុងថ្ងៃចន្ទ(ទី6មេសា) ម្សិលមិញ ត្រឹមតែ 39នាក់ប៉ុណ្ណោះ និងមានអ្នកស្លាប់បន្ថែម 2នាក់នៅក្នុងប្រទេស៕

ប្រភព៖ សារព័ត៌មានបរទេស

April 7, 2020

ព្យុះសៃខ្លូន កម្រិត5 វាយប្រហារ វ៉ានូអាទូ ធ្ងន់ធ្ងរ កាត់ផ្ដាច់កោះមួយនេះពីពិភពខាងក្រៅ

ទីភ្នាក់ងារសារព័ត៌មានAFP បានរាយការណ៍នៅព្រឹកថ្ងៃនេះ(ទី7មេសា)ថា បណ្ដុំកោះភាគខាងជើងរបស់កោះវ៉ានូអាទូ ត្រូវបានកាត់ផ្ដាច់ពីពិភពខាងក្រៅទាំងស្រុង ក្រោយពីត្រូវព្យុះសៃខ្លូន ហារ៉ូល វាយប្រហារ ដោយកាលពីសប្ដាហ៍កន្លងទៅ ព្យុះសៃខ្លូន ហារ៉ូលនេះ បានបោកបក់កម្ទេចបណ្ដុំកោះសូឡូម៉ុន ធ្វើឱ្យមានអ្នកស្លាប់ដល់ទៅ 27នាក់ មុននឹងបន្តឆ្ពោះទៅភាគខាងជើងរបស់កោះវ៉ានូអាទូកាលពីអំឡុងរាត្រីកន្លងមក ដោយមានភាពខ្លាំងក្លាក្នុងកម្រិតខ្ពស់បំផុត គឺកម្រិត5។

លោកស្រី ជែកឃើលីន ដឹ ក្លេយ៉ន់ អគ្គលេខាធិការកាកបាតក្រហមវ៉ានូអាទូ បានថ្លែងថា ព្យុះសៃខ្លូនមួយនោះ មានល្បឿនខ្យល់ដល់ទៅ 235គីឡូម៉ែត្រក្នុង 1ម៉ោង បានធ្វើឱ្យអគារជាច្រើនបាក់ដួលរលំ និងថែមទាំងកើតមានទឹកជំនន់ទាន់ហន់ទៀតផង តែនៅមិនទាន់អាចបញ្ជាក់បានអំពីព័ត៌មានលម្អិតរបស់ការខូចខាតដែលកើតឡើងបាននៅឡើយ ដោយសារតែការទំនាក់ទំនង ត្រូវបានកាត់ផ្ដាច់ទាំងស្រុង មានត្រឹមតែរូបភាពការខូចខាតដែលត្រូវបានផ្សព្វផ្សាយតាមរយៈពិភពបណ្ដាញសង្គមអនឡាញ ដែលបង្ហាញឱ្យឃើញពីភាពខូចខាតដ៏ច្រើន និងធំធេងតែប៉ុណ្ណោះ និងនៅមិនទាន់បានដឹងថា មានអ្នកស្លាប់ច្រើន ឬតិចប៉ុនណានៅឡើយ។

ព័ត៌មានបានបញ្ជាក់ថា សម្រាប់ព្យុះសៃខ្លូន ដែលមានភាពខ្លាំងក្លាកម្រិត5 ដែលបានវាយប្រហារវ៉ានូអាទូ លើកចុងក្រោយបំផុត កាលពីឆ្នាំ2015នោះ បានធ្វើឱ្យទីក្រុងផតវិឡា ខ្ទេចរាបដូចកន្ទេល និងមានអ្នកស្លាប់ 11នាក់។

លោកស្រី ដឹ ក្លេយ៉ន់ បានថ្លែងទៀតថា ទោះជាទីក្រុងផតវិឡា បានរួចផុតពីភាពកាចសាហាវបំផុតរបស់ព្យុះសៃខ្លូនលើកនេះក្ដី តែលោកស្រីក៏នៅតែមានការបារម្ភដដែលថា តំបន់ចាប់ពីភាគខាងជើងឡើងទៅ អាចនឹងត្រូវជួបនឹងភាពធ្ងន់ធ្ងររបស់ព្យុះកំណាចមួយនេះ ដែលធ្វើឱ្យលោកស្រីមានការកង្វល់បារម្ភយ៉ាងខ្លាំង ព្រោះផ្ទះសំបែងនៅក្នុងវ៉ានូអាទូ បានសាងសង់ឡើងបែបមិនសូវជារឹងមាំប៉ុន្មានឡើយ និងបារម្ភថា ប្រជាជនអាចនឹងត្រូវខូចខាតបាត់បង់ទ្រព្យសម្បត្តិរបស់ខ្លួន និងគ្មានទីស្នាក់អាស្រ័យ៕

ប្រភព៖ សារព័ត៌មានបរទេស

April 7, 2020

មេរៀន1ទៀតពីការបិទទីក្រុង! ជីវិតគូអាពាហ៍ពិពាហ៍ចិនដួលរលំ “បែកគ្នា ល្អជាងនៅជុំគ្នា”

សារព័ត៌មានក្រៅប្រទេស បានរាយការណ៍នៅថ្ងៃម្សិលមិញ(ទី6មេសា)ថា អត្រាការលែងលះគ្នារបស់គូស្វាមី-ភរិយាជនជាតិចិន ដែលកំពុងកើនឡើង មានផលប៉ះពាល់សំខាន់ ក្រោយពីការរស់នៅជាមួយគ្នាជាប់រហូតក្នុងអំឡុងពេលវិបត្តិរោគឆ្លងរាតត្បាត គឺជាការដាស់តឿនដល់បណ្ដាប្រទេសទាំងឡាយក្នុងពិភពលោក ដែលកំពុងប្រើវិធានការបិទទីក្រុង។

របាយការណ៍បានបន្តថា ក្រោយពីបញ្ចប់វិធានការបង្ខាំងឱ្យនៅតែក្នុងផ្ទះដោយរដ្ឋចិនកាលពីខែមីនា រឿងដំបូងគេដែលគូស្វាមី-ភរិយាចិនចំនួនដ៏ច្រើននាំគ្នាធ្វើ គឺទៅដាក់ឯកសារសុំលែងលះគ្នា។

សារព័ត៌មានខាងលើ បានលើកយកបទសម្ភាសរបស់អ្នកស្រី អ៊ូ(ឈ្មោះឧបមា) ជាស្ត្រីមេផ្ទះ វ័យ 30ឆ្នាំ ក្នុងមណ្ឌលក្វាងទុង ភាគខាងត្បូងប្រទេសចិន ដែលបានប្រើពេលវេលាទាំងយប់ទាំងថ្ងៃ ជិត 2ខែ នៅរួមគ្នាជាមួយស្វាមីដែលមិនបានចេញទៅធ្វើការ។ ទង្វើរបស់ស្វាមី ទោះជាការលេងជាមួយកូន ក្នុងពេលដែលកូនៗគួរតែចូលគេងជារឿងតូចតាចក៏ដោយ តែការយល់ឃើញមិនត្រូវគ្នាជាច្រើន បានក្លាយជាភាពគួរឱ្យធុញទ្រាន់ និងគួរឱ្យរំខានហួសនឹងទ្រាំបាន។

“គាត់ជាអ្នកបង្កបញ្ហានៅក្នុងផ្ទះ” អ្នកស្រីនិយាយ “ខ្ញុំលែងត្រូវការទ្រាំតទៅទៀតហើយ យើងឯកភាពថានឹងលែងគ្នា ហើយរឿងបន្តទៅទៀត គឺរកមេធាវី”

ទោះជាចិន បានចេញផ្សាយពីស្ថិតិនៃការលែងលះទូទាំងប្រទេសត្រឹមតែ1ឆ្នាំ 1ដងក្ដី តែរបាយការណ៍របស់សារព័ត៌មានពីតំបន់ផ្សេងៗក្នុងប្រទេសចិនបានបង្ហាញឱ្យដឹងថា មានការបង្ហើបឱ្យដឹងពីចំនួនគូលែងលះដែលកើនឡើងនៅក្នុងខែមីនា រាប់ចាប់ពីសប្ដាហ៍កន្លងមក ហេតុការណ៍នៃអំពើហិង្សាក្នុងគ្រួសារក៏កើនឡើងទ្វេគុណដែរ។

សញ្ញាទាំងនេះ អាចជាការព្រមាន ជាប្រផ្នូលអាក្រក់សម្រាប់គូស្នេហ៍ក្នុងតំបន់ផ្សេងៗទៀតទូទាំងពិភពលោក បើសិនគ្មានការយល់ចិត្តអាណិតអាសូរគ្នាទេ ការរស់នៅជាមួយគ្នាជាប់រហូត គឺជាវិបត្តិដ៏ធំ។

ទីក្រុងស៊ីអាន ក្នុងភាគកណ្ដាលប្រទេសចិន និងទីក្រុងតាចូវ៍ ក្នុងមណ្ឌលសេឆួន សុទ្ធតែមានរបាយការណ៍នៃការប្ដឹងផ្ដល់សុំលែងលះច្រើនជាប្រវត្តិសាស្ត្រដូចគ្នា នៅអំឡុងដើមខែមីនាកន្លងទៅ។

លោក ស្ទីហ្វ លី មេធាវីរឿងក្ដីក្នុងគ្រួសារនៃទីក្រុងសៀងហៃ នៅឯទីស្នាក់ការច្បាប់ Gentle & Trust បានថ្លែងថា មានពាក្យបណ្ដឹងសុំលែងលះកើនឡើង 25% ចាប់តាំងពីការបិទទីក្រុងបានធូរស្រាលកាលពីពាក់កណ្ដាលខែមីនា។

នៅពេលមេរោគវីរុសរាតត្បាតនាចុងខែមករា គូស្នេហ៍ក្នុងទីក្រុងជាច្រើន ត្រូវទ្រាំជាប់នៅក្រោមដំបូលផ្ទះតែមួយជាមួយគ្នា ពេលខ្លះក៏មានបងប្អូនរបស់គូស្នេហ៍ចូលមកបន្ថែមទៀត ដែលសម្រាប់មនុស្សជាច្រើន មានអារម្មណ៍ថា រឿងនេះ វាជ្រុលហួសលើសលប់ក្នុងការទ្រាំបាន។

លោក លី បានបញ្ជាក់ថា៖ “រឹតតែពួកគេប្រើពេលវេលានៅជាមួយគ្នាយូរប៉ុនណា ពួកគេក៏រឹតតែស្អប់គ្នាច្រើនឡើងប៉ុននោះដែរ”

អាជ្ញាធរចិនរំពឹងថា ការរស់នៅជាមួយគ្នារហូតដល់ទីបញ្ចប់ នឹងនាំឆ្ពោះទៅរកការធំធាត់ឡើងយ៉ាងកក់ក្ដៅរបស់ក្មេង និងជួយសងមកវិញនូវការតាំងគភ៌ដែលថយចុះដល់កម្រិតទាបបំផុតរាប់ចាប់តាំងពីការបង្កើតសាធារណរដ្ឋប្រជាមានិតចិនក្នុងឆ្នាំ1949 មក។

ទោះជាមានការបន្ធូរបន្ថយគោលនយោបាយ “កូនតែ1” និងការជំរុញដើម្បីឱ្យស្ត្រីរៀបការ និងមានបុត្រ “ក្នុងខណៈដែលអ្នកនៅផ្ទះក្នុងអំឡុងពេលដែលមានការឆ្លងរាតត្បាត គោលការណ៍ “កូនទី2” ត្រូវបានបន្ធូរបន្ថយ ដូច្នេះការនៅផ្ទះ និងការមានកូនទី2 ក៏អាចជួយប្រទេសរបស់អ្នកបានដែរ”

តែនៅក្នុងការពិតវិញ លទ្ធផលរបស់ការព្យាយាមទាំងនេះមិនបានបង្ហាញឱ្យឃើញឡើយ ផ្ទុយទៅវិញ ក្នុងសារព័ត៌មានចិន បែរជាពេញទៅដោយរបាយការណ៍នៃការឈ្លោះទាស់ទែងគ្នារបស់គូស្វាមី-ភរិយា។

អ្នកស្រី ហ្វឹង យួន សហស្ថាបនិក Equality ដែលជាអង្គការអភិវឌ្ឍន៍ឯកជនក្នុងទីក្រុងប៉េកាំង ដែលធ្វើការលើប្រធានបទ អំពើហិង្សាផ្លូវភេទ បានថ្លែងថា មានសំណូមពរចូលមកអង្គការរបស់អ្នកស្រីកើនឡើង ដើម្បីសុំជំនួយ។

Sixth Tone សារព័ត៌មានអនឡាញរបស់ទីក្រុងសៀងហៃ បានរាយការណ៍ថា ប៉ូលិសនៅក្នុងតំបន់មួយតាមបណ្ដោយដងទន្លេយ៉ង់ហ្ស៊ី ក្នុងមណ្ឌលហ៊ូពេយភាគកណ្ដាល ជិតកន្លែងដែលផ្ទុះការឆ្លងរាតត្បាតធំនៅក្នុងវូហាន បានទទួលរបាយការណ៍អំពីហេតុការណ៍អំពើហិង្សាក្នុងគ្រួសារក្នុងខែកុម្ភៈ ចំនួន 162លើក កើនឡើង 47លើក បើធៀបនឹងខែមុនហ្នឹង។

ព័ត៌មាន និងស្ថិតិថ្មីៗបំផុតទាំងអស់នេះ អាចជាការព្រមានសម្រាប់ប្រទេសផ្សេងៗនៅក្នុងពិភពលោកដែលកំពុងប្រើវិធានការបិទទីក្រុង អំពីអ្វីដែលពួកគេត្រូវតែមានខ្លាំងបំផុត នោះគឺ “ការយល់ចិត្ត និងអាណិតអាសូរគ្នាទៅវិញទៅមក” ឱ្យដល់ទីបំផុត៕

ប្រភព៖ សារព័ត៌មានបរទេស

April 7, 2020

COVID-19! “សង្គ្រាម” សម្ភារសុខាភិបាលនៅសហរដ្ឋអាមេរិក៖ រដ្ឋនឹងរដ្ឋប្រជែកគ្នា…

បណ្ដាឈ្មួញកណ្ដាលដ៏អាថ៌កំបាំង បណ្ដាទំនិញស្រមោល និងតម្លៃទំនិញកើនឡើងទៅតាមម៉ោងជាដើម គឺជាប្រការដែលក្រុមអភិបាលរដ្ឋនៅសហរដ្ឋអាមេរិកកំពុងជួបប្រទះ នៅពេល “តាមប្រមាញ់” សម្ភារសុខាភិបាល ឬឧបករណ៍វេជ្ជសាស្ត្រ។

ក្នុងពេលដែលសម្ភារផ្នែកសុខាភិបាលនៅក្នុងឃ្លាំងរដ្ឋកាន់តែខើចទៅៗ ហើយរដ្ឋបាលរបស់លោក Trump បានកាត់បន្ថយការផ្គត់ផ្គង់ទៅឱ្យបណ្ដារដ្ឋ មេដឹកនាំរដ្ឋផ្សេងៗនៅសហរដ្ឋអាមេរិក ត្រូវបង្ខំចិត្តប្រើប្រាស់វិធីសាស្ត្រពិសេសៗដើម្បីទិញម៉ាស់ ម៉ាស៊ីនជំនួយដកដង្ហើម និងឧបករណ៍ចាំបាច់ផ្សេងទៀតឱ្យខាងតែបាន។

បណ្ដារដ្ឋនៅសហរដ្ឋអាមេរិក រួមនឹងរដ្ឋាភិបាលរបស់លោក Trump ផងដែរ កំពុងតែប្រកួតប្រជែងគ្នានៅលើទីផ្សារអន្តរជាតិ ខណៈដែលតម្លៃម៉ាស៊ីនជំនួយដកដង្ហើមបានកើនឡើងទ្វេដង ចំណែកតម្លៃម៉ាស់វិញក៏បានកើនឡើងដល់10ដងឯណោះបើធៀបនឹងតម្លៃពីមុន។ ពួកគេត្រូវពឹងទៅលើមិត្តជាមហាសេដ្ឋីរបស់ពួកគេ និងបណ្ដាក្រុមហ៊ុន។ អភិបាលរដ្ឋ Massachusetts លោក Charlie Baker បានពឹងមហាសេដ្ឋី Robert Kraft ឱ្យជួយបញ្ជូនយន្តហោះរបស់ក្រុមបាល់ទាត់បែបអាមេរិកាំង (American football) Patriots ទៅកាន់ប្រទេសចិន ដើម្បីនាំយកម៉ាស់ជាង1លានបន្ទះមកកាន់សហរដ្ឋអាមេរិក។

នៅឯរដ្ឋ New York ដែលជាសម្បុកមេរោគធំជាងគេនៅសហរដ្ឋអាមេរិក អភិបាលរដ្ឋ លោក Andrew Cuomo បានស្នើឱ្យបណ្ដាមន្ទីរពេទ្យឯកជន បញ្ជូនម៉ាស៊ីនជំនួយដកដង្ហើមទៅឱ្យបណ្ដាមន្ទីរពេទ្យរដ្ឋដែលកំពុងខ្វះខាត។

មានរដ្ឋជាច្រើនបានអំពាវនាវឱ្យរដ្ឋាភិបាលចាត់ចែងក្នុងការទិញសម្ភារសុខាភិបាលជារួម ក៏ប៉ុន្តែលោក Trump ហាក់មិនចង់លូកដៃក្នុងរឿងនេះ។ សេតវិមានបានប្រកាសយ៉ាងច្បាស់ក្នុងសប្ដាហ៍នេះថា ប្រធានាធិបតីអាមេរិក ចាត់ទុកឃ្លាំងរក្សាសម្ភារវេជ្ជសាស្ត្រជាទំនិញសម្រាប់ករណីអាសន្នបំផុតតែប៉ុណ្ណោះ។

“នេះគឺជាកំហុសដែលគួរឱ្យអស់សង្ឃឹមបំផុត” អភិបាលរដ្ឋ Maryland លោក Larry Hogan ដែលជាប្រធានសមាគមអភិបាលជាតិ(National Governors Association) ថ្លែងបែបនេះ។ លោកថា “រដ្ឋនានាបានប្រជែងគ្នា ឯរដ្ឋាភិបាលក៏ប្រជែងជាមួយពួកយើង ហើយប្រទេសដទៃក៏ប្រជែងជាមួយយើង ខណៈដែលប្រភពផ្គត់ផ្គង់គឺវាមានកំណត់”។

អភិបាលរដ្ឋ Maryland ឱ្យដឹងថា ទីភ្នាក់ងារគ្រប់គ្រងគ្រោះអាសន្នសហព័ន្ធ (Federal Emergency Management Agency) បានផ្គត់ផ្គង់សម្ភារពីឃ្លាំងបម្រុងរបស់ជាតិ ប៉ុន្តែវាបានដោះស្រាយតែមួយផ្នែកដ៏តូចប៉ុណ្ណោះ។ “យើងបានទិញអ្វីៗគ្រប់យ៉ាងដែលយើងអាចទិញបាននៅក្នុងទីផ្សារ មិនថាក្នុងស្រុក ក្រៅប្រទេស ចាប់ពីកូរ៉េខាងត្បូង ចិន និងកន្លែងផ្សេងៗទៀត”។

រដ្ឋមួយចំនួន ជួនកាលក៏ត្រូវប្រជែងជាមួយមន្ទីរពេទ្យក្នុងតំបន់របស់ខ្លួន ព្រោះមន្ទីរពេទ្យនានា ចង់បានសម្ភារសុខាភិបាលឱ្យបានឆាប់បំផុតដើម្បីការពារបុគ្គលិករបស់ខ្លួន ជំនួសឱ្យការរង់ចាំការផ្គត់ផ្គង់ពីរដ្ឋាភិបាលកណ្ដាល។

វេជ្ជបណ្ឌិត Daniel Durand នៅរដ្ឋ Maryland មិននឹកស្មានសោះថា លោកត្រូវស្វែងរកទិញឈុតការពារមេរោគសម្រាប់មន្ទីរពេទ្យ នៅក្នុងទីផ្សារច្របូកច្របល់បែបនេះ។ ម៉ាស់ N95 ជាធម្មតាវាមានតម្លៃមិនដល់1ដុល្លារអាមេរិកផងក្នុង1បន្ទះ ប៉ុន្តែពេលនេះវាមានតម្លៃលើសពី3.7ដុល្លារទៅទៀត ដែលនេះគឺជាតម្លៃទាបបំផុត៖ មានមនុស្សជាច្រើនឱ្យថ្លៃដល់ទៅ10ដុល្លារឯណោះ។

លោកវេជ្ជបណ្ឌិត Daniel Durand ឱ្យដឹងថា មានឈ្មួញកណ្ដាលមួយចំនួនថែមទាំងបានគំរាមលោកទៀតផង នៅពេលដែលសួរសំណួរបែបមូលដ្ឋានបំផុតដើម្បីស្វែងយល់អំពីផលិតផល។ លោកថ្លែងថា “ខ្ញុំឮថា មានអ្នកខ្លះចំណាយរាប់លានដុល្លារហើយ នៅតែមិនទទួលបានទំនិញទៀត។ មានពួកជនខិលខូច ធ្វើសកម្មភាពបែបបញ្ឆោតទៅលើមន្ទីរពេទ្យនានាទៀតផង”។

មន្ត្រីគ្រប់គ្រងផ្នែកហិរញ្ញវត្ថុរបស់រដ្ឋ Virginia លោក Aubrey Layne ដែលជាអ្នកស្វែងរកទិញសម្ភារសុខាភិបាលសម្រាប់រដ្ឋ Virginia និយាយថា លោកធ្លាប់បានជួបឈ្មួញដែលគួរឱ្យសង្ស័យ ប៉ុន្តែពុំមានពេលគ្រប់គ្រាន់ដើម្បីធ្វើឱ្យប្រាកដថា ពួកគេនោះគួរឱ្យទុកចិត្តដែរ ឬអត់នោះទេ។ លោកបន្ថែមថា “អ្នកណាក៏និយាយថា ពួកគេស្គាល់អ្នកណាម្នាក់ដែលអាចទាក់ទងនឹងអ្នកណាម្នាក់ទៀតនៅប្រទេសចិន”។

ក្រុមឈ្មួញកណ្ដាល និងអ្នកផ្គត់ផ្គង់ កំពុងទាញប្រយោជន៍ពីស្ថានការណ៍៖ ម៉ាស៊ីនជំនួយដកដង្ហើមប្រភេទតូចដែលដើមឡើយវាមានតម្លៃត្រឹម 11,000 ទៅ14,000ដុល្លារ ប៉ុន្តែពេលនេះវាមានតម្លៃដល់ទៅ20,000 ទៅ30,000ដុល្លារ។ នេះបើតាម Christian Mitchell អភិបាលរងនៃរដ្ឋ Illinois។ ម៉ាស៊ីនប្រភេទគុណភាពខ្ពស់ដែលធ្លាប់តែមានតម្លៃ45,000ដុល្លារ តែឥឡូវវាត្រូវបានគេបន្ថែម20,000ដុល្លារពីលើទៀត៕

ប្រភព៖ សារព័ត៌មានបរទេស

April 7, 2020

Category: អន្តរជាតិ