អន្តរជាតិ - La Reine Media

អត់ចប់!! ទីប្រឹក្សាលោកត្រាំ ថា ចិនអាចលាក់លៀមព័ត៌មានវីរុស ដើម្បីផលប្រយោជន៍ខាងពាណិជ្ជកម្ម និងសង្ឃឹមផលិត “វ៉ាក់សាំង” បានមុនគេ

លោក ពីធើរ ណាវ៉ារ៉ូ ទីប្រឹក្សាផ្នែកពាណិជ្ជកម្មរបស់លោកប្រធានាធិបតី ដូណាល់ ត្រាំ បានចេញមកចោទប្រទេសចិនថា អាចមានចេតនាបិទបាំងព័ត៌មានពាក់ព័ន្ធនឹងការឆ្លងរាលដាលរបស់មេរោគកូរ៉ូណាប្រភេទថ្មី ក្នុងរយៈចាប់ផ្ដើមដំបូង “ដើម្បីផលប្រយោជន៍ខាងពាណិជ្ជកម្ម” ដោយសង្ឃឹមថា នឹងក្លាយជាអ្នកផលិតវ៉ាក់សាំងការពារមេរោគមួយនេះបានមុនគេ។ នេះបើតាមសេចក្ដីរាយការណ៍ព័ត៌មានរបស់ រ៉យទ័រ។

សហរដ្ឋអាមេរិក ដែលខណៈពេលនេះ បានក្លាយជាប្រទេសមួយដែលកំពុងរងទុក្ខទោសយ៉ាងធ្ងន់ធ្ងរបំផុតដោយសារជំងឺរាតត្បាតដ៏ធំ(Pandemic) កូវីដ-19 ធ្លាប់បានអំពាវនាវជាច្រើនលើក ឱ្យក្រុងប៉េកាំង ចែករំលែកព័ត៌មានពាក់ព័ន្ធនឹងវីរុសមរណៈ ដែលរាតត្បាតក្នុងទីក្រុងវូហានដំបូងគេ។

លោក ណាវ៉ារ៉ូ បានផ្ដល់បទសម្ភាសជាមួយទីភ្នាក់ងារព័ត៌មាន Fox Business កាលពីថ្ងៃម្សិលមិញ(ទី20មេសា)ថា៖ “មូលហេតុមួយ ដែលពួកគេមិនអនុញ្ញាតឱ្យយើងចូលទៅ និងមិនចែករំលែកព័ត៌មានពាក់ព័ន្ធនឹងមេរោគវីរុសនេះតាំងពីដំបូង អាចដោយសារតែពួកគេត្រូវការផលិតវ៉ាក់សាំងឱ្យបានមុនអ្នកណាទាំងអស់ និងមើលឃើញថា នេះគឺជាការប្រកួតប្រជែងខាងពាណិជ្ជកម្ម ជាសំណើខាងធុរកិច្ច ដែលនឹងជួយឱ្យពួកគេលក់វ៉ាក់សាំងនេះទូទាំងពិភពលោក”

“តែយើងនឹងធ្វើឱ្យពួកគេបរាជ័យ យើងនឹងឈ្នះពួកគេដោយការដឹកនាំរបស់លោកប្រធានាធិបតីត្រាំ…យើងនឹងឈ្នះពួកគេ ព្រោះក្រសួងសាធារណៈសុខាភិបាល និងសេវាកម្មសុខភាពមនុស្សរបស់យើង មានអ្នកផលិតដល់ទៅ 5នាក់ ដែលកំពុងប្រជែងគ្នាស្វែងរកវ៉ាក់សាំងការពារវីរុសមួយនេះនាពេលនេះ”

លោក ដូណាល់ ត្រាំ បានតែងតាំងលោក ណាវ៉ារ៉ូ ដែលជាអ្នករិះគន់ចិនដ៏ចំណាប់ម្នាក់ ឱ្យមើលការខុសត្រូវខាងផ្នែកការចាត់ចែងស្វែងរកវត្ថុធាតុដើមផ្សេងៗ ដើម្បីតស៊ូនឹងការឆ្លងរាលដាលរបស់កូវីដ-19។

រហូតមកដល់ពេលនេះ នៅមិនទាន់មានថ្នាំព្យាបាល ឬវ៉ាក់សាំងណាមួយដែលឆ្លងផុតការពិសោធអះអាងថា អាចការពារមេរោគកូវីដ-19 បាននៅឡើយ។

តាមរយៈមូលដ្ឋានព័ត៌មានរបស់មហាវិទ្យាល័យ ចន ហប់គីនស៍ កាលពីវេលាម៉ោង 10.00នាទី ព្រឹកថ្ងៃនេះ(ទី21មេសា)បានឱ្យដឹងថា ទូទាំងពិភពលោក មានអ្នកឆ្លងមេរោគវីរុសនេះ កើនឡើងសរុប 2.47លាននាក់ ស្លាប់រួចហើយមិនតិចជាង 170,000នាក់ឡើយ ដោយសហរដ្ឋអាមេរិក មានចំនួនអ្នកឆ្លងសរុប 786,000នាក់ និងស្លាប់ជាង 41,100នាក់ រួចទៅហើយ។

រដ្ឋបាលសហរដ្ឋអាមេរិក បានធ្វើកិច្ចព្រមព្រៀងជាមួយក្រុមហ៊ុន ចនសុន អ៊ែន ចនសុន និងក្រុមហ៊ុន ម៉ូឌើណា អ៊ិងខ៍ និងកំពុងស្ថិតក្នុងអំឡុងការចរចាជាមួយក្រុមហ៊ុនយ៉ាងតិច 2ទៀត ដើម្បីឱ្យពួកគេត្រៀមផលិតវ៉ាក់សាំងការពារវីរុសកូរ៉ូណាប្រភេទថ្មីឱ្យបានក្នុងបរិមាណច្រើនៗ ទោះជាពិភពលោកនៅមិនទាន់រកឃើញវ៉ាក់សាំងដែលមានសុវត្ថិភាព និងមានប្រសិទ្ធភាពពិតប្រាកដនៅឡើយក៏ដោយ។

អ្នកជំនាញការផ្នែកសាធារណៈសុខាភិបាលទូទាំងពិភពលោកជឿថា យ៉ាងលឿនបំផុត អាចនឹងត្រូវរង់ចាំដល់ឆ្នាំ2021ឯណោះ ទម្រាំនឹងវ៉ាក់សាំងការពារវីរុសកូវីដ-19 ត្រៀមរួចរាល់ក្នុងការប្រើការបានពិតប្រាកដ ដោយសារតែត្រូវមានការសាកល្បងលើមនុស្សយ៉ាងទូលំទូលាយ រហូតជឿជាក់លើប្រសិទ្ធភាព និងសុវត្ថិភាពជាមុនសិន។

ចំណែកឯរដ្ឋបាលចិនវិញ ក៏បានអនុម័តឱ្យនាំយកវ៉ាក់សាំងគំរូដើម ទៅធ្វើការសាកល្បងលើមនុស្សរួចមកហើយ យ៉ាងតិចក៏ 3គំរូដែរ។

សារព័ត៌មាន ប៉ាក់គីង ដេលី បានអះអាងលើព័ត៌មានពីអគ្គនាយកមជ្ឈមណ្ឌលគ្រប់គ្រងរោគរបស់ប្រទេស ដែលបានបញ្ជាក់ថា ប្រទេសចិនអាចនឹងសាកល្បងផ្ដល់វ៉ាក់សាំងទៅលើក្រុមមនុស្សមួយចំនួន ដូចជាធនធានមនុស្សខាងវេជ្ជសាស្ត្រជាដើម ក្នុងអំឡុងចុងឆ្នាំនេះ។

លោក ម៉ៃក៍ ប៉ុមប៉េអូ រដ្ឋមន្ត្រីក្រសួងការបរទេសនៃសហរដ្ឋអាមេរិក បានចេញមកដាក់សម្ពាធលើប្រទេសចិន ឱ្យថ្លែងពីព័ត៌មានខាងផ្នែកការតស៊ូប្រឆាំងវីរុសយ៉ាងច្បាស់លាស់ ខណៈដែលប្រទេសចិន ក៏បានអះអាងរួចហើយថា ខ្លួនមិនបានលាក់បាំងអ្វីឡើយ និងនៅតែរិះគន់ពួកមន្ត្រីអាមេរិកាំងដែលចេញមកដាក់សំណួរបែបនេះដែរ។

ប្រភព៖ សារព័ត៌មានបរទេស

April 21, 2020

Kim Jong-un កំពុងបាត់ខ្លួនព្រោះវះកាត់បេះដូង! សហរដ្ឋអាមេរិក និងកូរ៉េខាងត្បូងកំពុងផ្ទៀងផ្ទាត់ព័ត៌មាននេះ

សហរដ្ឋអាមេរិក និងកូរ៉េខាងត្បូង កំពុងតែផ្ទៀងផ្ទាត់ព័ត៌មានដែលថា មេដឹកនាំកូរ៉េខាងជើង លោក Kum Jong-un កំពុងស្ថិតក្នុងស្ថានភាពគ្រោះថ្នាក់ដល់ជីវិត បន្ទាប់ពីបានឆ្លងកាត់ការវះកាត់ព្យាបាលជំងឺ។

សារព័ត៌មាន CNN ដកស្រង់សម្ដីមន្ត្រីអាមេរិកាំងម្នាក់ដែលសុំមិនបញ្ចេញឈ្មោះ បានឱ្យដឹងថា ទីក្រុង Washington កំពុងតែស្វែងយល់ព័ត៌មានសម្ងាត់ស្ដីអំពីមេដឹកនាំកូរ៉េខាងជើង ស្ថិតក្នុងស្ថានភាព “គ្រោះថ្នាក់” ក្រោយពីបានទទួលការវះកាត់ព្យាបាលរោគ។ ប៉ុន្តែ ក្រុមប្រឹក្សាសន្តិសុខជាតិ និងការិយាល័យអគ្គនាយកនៃទីភ្នាក់ងារស៊ើបការណ៍សម្ងាត់របស់សហរដ្ឋអាមេរិក បដិសេធក្នុងការបញ្ចេញមតិទាក់ទងនឹងបញ្ហានេះ។

មុននេះ ទំព័រ Daily NK ដែលជាអ្នកជំនាញខាងព័ត៌មានស្ដីអំពីកូរ៉េខាងជើង ដកស្រង់ប្រភពព័ត៌មានសម្ងាត់ក្នុងប្រទេសនេះ បានឱ្យដឹងថា Kim Jong-un កំពុងតែសម្រាកព្យាបាលនៅក្នុងភូមិគ្រឹះមួយដែលស្ថិតនៅក្នុងតំបន់លម្ហែកាយ លើភ្នំ Kumgang នៃខេត្ត Hyangsan បន្ទាប់ពីបានទទួលការវះកាត់ព្យាបាលបេះដូងនៅក្នុងមន្ទីរពេទ្យមួយនៅក្បែរនោះកាលពីថ្ងៃទី12មេសាកន្លងទៅ។ Daily NK បានឱ្យដឹងថាសុខភាពរបស់លោក Kim Jong-un មានស្ថានភាពអាក្រក់ទៅៗក្នុងអំឡុងប៉ុន្មានខែចុងក្រោយនេះ ដោយសារតែលោកជក់បារីច្រើន ធាត់ជ្រុល និងធ្វើការហួសកម្លាំងខ្លាំងពេក។

“អ្វីដែលខ្ញុំបានដឹងនោះគឺថា គាត់បានប្រឈមនឹងបញ្ហាសុខភាពបេះដូងយ៉ាងធ្ងន់ធ្ងរចាប់ពីខែសីហាឆ្នាំមុន ប៉ុន្តែ ស្ថានភាពជម្ងឺកាន់តែអាក្រក់ទៅៗ ក្រោយពីបានមកកាន់ភ្នំ Paektu ជាច្រើនលើក” នេះបើតាមប្រភពព័ត៌មានសុំមិនបញ្ច៣ឈ្មោះ ដែលនិយាយអំពីលោក Kim Jong-un និងភ្នំដ៏ពិសិដ្ឋនៅកូរ៉េខាងជើង។

រដ្ឋាភិបាលកូរ៉េខាងត្បូងក៏កំពុងតែផ្ទៀងផ្ទាត់ព័ត៌មានខាងលើនេះដែរ។ មន្ត្រីមកពីក្រសួងបម្រួបបង្រួមកូរ៉េខាងត្បូង និងទីភ្នាក់ងារស៊ើបការណ៍សម្ងាត់របស់កូរ៉េខាងត្បូងបានឱ្យដឹងថា ពួកគេមិនទាន់ដឹងច្បាស់អំពីបញ្ហានេះនៅឡើយ។

អវត្តមានមិនធម្មតារបស់មេដឹកនាំកូរ៉េខាងជើងក្នុងមួយរយៈខ្លីចុងក្រោយនេះ បានធ្វើឱ្យមានលេចឮព័ត៌មានថា លោកកំពុងមានបញ្ហាសុខភាព។ លោក Kim Jong-un មិនបានបង្ហាញខ្លួនក្នុង “ថ្ងៃនៃព្រះអាទិត្យ” កាលពីថ្ងៃទី15មេសា ដែលជាថ្ងៃខួបកំណើតរបស់លោក Kim Il-sung និងជាថ្ងៃបុណ្យជាតិដ៏សំខាន់របស់កូរ៉េខាងជើង។

មុននេះមួយថ្ងៃ កូរ៉េខាងជើងក៏បានបាញ់មីស៊ីលរយៈចម្ងាយខ្លីមួយគ្រាប់ ដែលនេះត្រូវបានកូរ៉េខាងត្បូងនិយាយថា ជាផ្នែកមួយនៃពិធីបុណ្យជាតិខាងលើរបស់កូរ៉េខាងជើង។ ព្រឹត្តិការណ៍សំខាន់ៗបែបនេះ ជាទូទៅតែងមានវត្តមានរបស់លោក Kim Jong-un ក៏ប៉ុន្តែ សារព័ត៌មាន KCNA មិនបាននិយាយអ្វីអំពីការសាកល្បងមីស៊ីលខាងលើនេះនោះទេ។ មេដឹកនាំកូរ៉េខាងជើងក៏បានអវត្តមាននៅក្នុងកិច្ចប្រជុំសំខាន់មួយក្នុងរដូវក្ដៅរបស់ក្រុមប្រឹក្សាប្រជាជនជាន់ខ្ពស់ដែលត្រូវបានធ្វើឡើងនៅក្នុងខែមេសា នៅមុន “ថ្ងៃនៃព្រះអាទិត្យ”។

Kim Jong-un បង្ហាញខ្លួនជាលើកចុងក្រោយកាលពីចុងសប្ដាហ៍មុន ដែលពេលនោះ លោកធ្វើជាប្រធានកិច្ចប្រជុំមួយនៃក្រសួងនយោបាយនៃបក្សពលករកូរ៉េខាងជើង កាលពីថ្ងៃទី11មេសា។ Daily NK ផ្សាយថា លោក Kim Jong-un បានចូលមន្ត្រីពេទ្យ បន្ទាប់ពីកិច្ចប្រជុំនេះបានបញ្ចប់។

សូមរំឭកថា លោក Kim Jong-un ធ្លាប់បានបាត់ខ្លួនជាង1ខែកាលពីឆ្នាំ2014 នាំឱ្យមានការសង្ស័យថា លោកមានបញ្ហាសុខភាពធ្ងន់ធ្ងរ។ ក្រោយមក មេដឹកនាំរូបនេះ ក៏បានចេញមកដឹកនាំប្រទេសឡើងវិញ ដោយស្ថិតក្នុងសភាពកាន់ឈើច្រត់។ កាលណោះ អ្នកយកការណ៍សម្ងាត់របស់កូរ៉េខាងត្បូងបានឱ្យដឹងថា លោក Kim Jong-un បានវះកាត់ដុំពកនៅត្រង់កជើង៕

ប្រភព៖ CNN, Reuters, AP

April 21, 2020

ពិភពលោកបាត់បង់មនុស្សឆ្នើមម្នាក់ទៀតហើយ! ស្ថាបនិក Tom & Jerry និង Popeye បានទទួលមរណៈភាពនៅអាយុ 95ឆ្នាំ

ស្ថាបនិកគំនូរជីវចលកំប្លុកកំប្លែងឆ្មារកណ្តុរ ឬ Tom & Jerry និង Poepeye លោក Gene Deitch បានទទួលមរណភាពហើយនៅវ័យ 95ឆ្នាំ នៅទីក្រុងប្រាក សាធារណរដ្ឋឆេក។

លោក Gene Deitch គឺជាម្ចាស់ពានរង្វាន់អូស្កាអាមេរិកផ្នែកគំនូរជីវចល អ្នកដឹកនាំរឿងគំនូរជីវចល និងជាអ្នកផលិតខ្សែភាពយន្តគំនូរជីវចលដ៏ល្បីល្បាញលើពិភលោក។ នៅក្នុងនោះស្នាដៃរបស់លោកជាច្រើនត្រូវបានសាធារណជនចាប់អារម្មណ៍ និងទទួលបានការគាំទ្ររាប់ទសវត្សរហូតមកដល់បច្ចុប្បន្ននេះ។

នៅឆ្នាំ 1960 ភាពយន្តរបស់លោកឈ្មោះថា “Munro” បានឈ្នះពានរង្វាន់គំនូរជីវចលល្អ និងបន្តឈ្នះពានរង្វាន់ផ្ទួនគ្នានៅឆ្នាំ 1964 លើខ្សែភាពយន្តរឿង “Here’s Nudnik” និង “How to Avoid Frienship”។

នៅក្នុងឆ្នាំ 2004 លោក Dene Deitch បានទទួលពានរង្វាន់ Winsor McCay សម្រាប់ការខិតខំប្រឹងប្រែងផលិតខ្សែភាពយន្តគំនូរជីវចលក្នុងជីវិតរបស់គាត់៕

April 21, 2020

COVID-19 នៅអាស៊ីអាគ្នេយ៍៖ សិង្ហបុរីឈរកំពូលតារាង ខណៈដែល4ប្រទេសទៀតមិនទាន់មានករណីស្លាប់

នៅអាស៊ីអាគ្នេយ៍ តួលេខនៃអ្នកជំងឺ COVID-19 បានកើនលើស30,000នាក់។ សិង្ហបុរីគឺជាសម្បុកមេរោគធំជាងគេបង្អស់ក្នុងតំបន់នេះ ដោយមានអ្នកជំងឺសរុប8,014នាក់ កើន1,426ករណី ក្នុងរយៈពេល24ម៉ោងចុងក្រោយនេះ ក្នុងនោះមានអ្នកស្លាប់សរុប11នាក់។

ក្រសួងសុខាភិបាលសិង្ហបុរី បានឱ្យដឹងថា ករណីឆ្លងថ្មីភាគច្រើននៅក្នុងជំរំស្នាក់នៅរបស់ពលករបរទេស ខណៈដែល16ករណីគឺជាជនជាតិសិង្ហបុរី និងអ្នកស្នាក់នៅអចិន្ត្រៃយ៍។ 90%នៃអ្នកជំងឺសរុបនៅសិង្ហបុរី គឺជាប់ទាក់ទងជាមួយបុគ្គលិកបរទេស។

ឥណ្ឌូនេស៊ី មានអ្នកជំងឺថ្មី185នាក់ និងអ្នកជំងឺសរុប6,760នាក់ ខណៈអ្នកស្លាប់ថ្មីមាន8នាក់ និងអ្នកស្លាប់សរុបឡើងដល់590នាក់ ក្នុងនោះមានវេជ្ជបណ្ឌិត20រូបផងដែរ។

ហ្វីលីពីន៖ អ្នកស្លាប់សរុបបានកើនដល់428នាក់ បន្ទាប់ពីមានករណីស្លាប់ថ្មី19នាក់កាលពីម្សិលមិញ។ អ្នកជំងឺថ្មីមានចំនួន200នាក់ និងអ្នកជំងឺសរុបមាន 6,459នាក់។

ម៉ាឡេស៊ី មានអ្នកជំងឺថ្មី36នាក់ និងអ្នកជំងឺសរុបមាន 5,425នាក់ ក្នុងនោះមានអ្នកស្លាប់89នាក់។

ប្រទេសថៃ៖ ថ្ងៃនេះបានរាយការណ៍ថា មានអ្នកជំងឺថ្មី27នាក់ ក្នុងចំណោមអ្នកជំងឺសរុប2,792នាក់។ ចំនួនអ្នកស្លាប់សរុបនៅប្រទេសនេះមាន47នាក់។

ឡាវ និងទីម័រខាងកើតនៅតែជាប្រទេសដែលមានអ្នកជំងឺCOVID-19 តិចជាងគេបង្អស់ក្នុងតំបន់អាស៊ិអាគ្នេយ៍ ដោយមានអ្នកជំងឺសរុបជាបន្តបន្ទាប់គឺ19 និង22នាក់។ វៀតណាម ឡាវ កម្ពុជា និងទីម័រខាងកើតគឺជាបណ្ដាប្រទេសនៅអាស៊ីអាគ្នេយ៍ដែលមិនទាន់មានករណីស្លាប់ដោយសារវីរុស COVID-19 នៅឡើយ៕

ប្រភព៖ សារព័ត៌មានបរទេស

April 21, 2020

ជិត170,000នាក់ស្លាប់ដោយសារ COVID-19 នៅទូទាំងពិភពលោក

សកលលោកទាំងមូលមានអ្នកស្លាប់ជិត170,000នាក់ ក្នុងចំណោមអ្នកជំងឺCOVID-19 ជិត2.5លាននាក់ ដែលភាគច្រើននៅសហរដ្ឋអាមេរិក និងបណ្ដាប្រទេសនៅអឺរ៉ុប។

ស្ថិតិរបស់សាកលវិទ្យាល័យ Johns Hopkins របស់សហរដ្ឋអាមេរិក បានឱ្យដឹងថា មនុស្សចំនួន 2,470,410នាក់ បានឆ្លងវីរុស COVID-19 នៅក្នុងប្រទេស និងដែនដីចំនួន210 នៅទូទាំងពិភពលោក ក្នុងនោះមាន 169,595នាក់បានស្លាប់។ អ្នកជំងឺថ្មី កើន76,117នាក់ និងអ្នកស្លាប់ថ្មីកើន4,657នាក់ បើធៀបនឹងម្សិលមិញ។

សហរដ្ឋអាមេរិក នៅតែជាសម្បុកមេរោគធំជាងគេបង្អស់ក្នុងពិភពលោក ដោយមានអ្នកជំងឺសរុប782,159នាក់ អ្នកស្លាប់សរុប41,872នាក់។ អ្នកជំងឺ COVID-19 ដែលបានជាសះស្បើយក្នុងប្រទេសនេះ កើនដល់71,832នាក់។

អេស្ប៉ាញគឺជាសម្បុកមេរោគធំជាងគេទី2ក្នុងពិភពលោក ដោយមានអ្នកស្លាប់20,852នាក់ ខណៈដែលអ្នកជំងឺថ្មីមានចំនួន4,266នាក់ ធ្វើឱ្យចំនួនអ្នកជំងឺសរុបឡើងដល់200,210នាក់។ ប្រទេសនេះទើបបានជួបតួលេខនៃអ្នកស្លាប់ដោយសារ COVID-19 ទាបបំផុតក្នុងអំឡុង1ខែមកនេះ ហើយក៏ជាលើកដំបូងដែលអេស្ប៉ាញមានអ្នកស្លាប់តិចជាង400នាក់ក្នុង1ថ្ងៃ រាប់ចាប់ពីរោគរាតត្បាតនេះឆ្លងដល់ប្រទេសនេះ។

អ៊ីតាលី៖ អ្នកជំងឺថ្មី2,256នាក់ អ្នកជំងឺសរុប181,228នាក់ ខណៈអ្នកស្លាប់ថ្មី454នាក់ អ្នកស្លាប់សរុប24,114នាក់។

បារាំង៖ អ្នកជំងឺថ្មី3,585នាក់ អ្នកស្លាប់ថ្មី574នាក់ និងអ្នកជំងឺសរុប156,479នាក់ អ្នកស្លាប់សរុប20,292នាក់។

អាល្លឺម៉ង់៖ អ្នកជំងឺថ្មី1,469នាក់ អ្នកស្លាប់ថ្មី120នាក់ ចំណែកអ្នកជំងឺសរុបមាន146,653នាក់ និងអ្នកស្លាប់សរុប4,706នាក់។

អង់គ្លេស៖ អ្នកជំងឺថ្មី4,676នាក់ អ្នកស្លាប់ថ្មី449នាក់ និងអ្នកជំងឺសរុប124,743នាក់ អ្នកស្លាប់សរុប16,509នាក់។

ប្រទេសចិន៖ តួលេខចុងក្រោយបង្ហាញថា ប្រទេសនេះមានអ្នកជំងឺសរុប83,817នាក់ និងអ្នកស្លាប់សរុប4,636នាក់។

អ៊ីរ៉ង់នៅតែជាសម្បុកមេរោគធំជាងគេទី2នៅអាស៊ី បន្ទាប់ពីប្រទេសចិន ដោយមានអ្នកជំងឺសរុប83,505នាក់ ក្នុងនោះមានអ្នកស្លាប់5,209នាក់។ អ្នកជំងឺថ្មី និងអ្នកស្លាប់ថ្មីនៅប្រទេសនេះ គឺមាន1,294 និង91នាក់៕

ប្រភព៖ សារព័ត៌មានបរទេស

April 21, 2020

COVID-19! សហរដ្ឋអាមេរិក៖ ជាង42,000នាក់ស្លាប់ និងជិត790,000នាក់បានឆ្លងវីរុស

វីរុស COVID-19 បានធ្វើឱ្យមនុស្សជិត790,000នាក់ត្រូវកើតជំងឺនៅសហរដ្ឋអាមេរិក ក្នុងនោះមានជាង42,000នាក់បានស្លាប់ និង4,003,551នាក់បានជាះស្បើយ។

យោងតាមទិន្នន័យនៅលើ Worldometers គិតមកដល់បច្ចុប្បន្ន ចំនួនអ្នកស្លាប់ដោយសារ COVID-19 នៅសហរដ្ឋអាមេរិក បានឡើងដល់ជាង42,300នាក់ កើនជាង1,700នាក់បើធៀបនឹងមុននេះមួយថ្ងៃ។ ចំនួនអ្នកជំងឺថ្មីនៅប្រទេសនេះក៏បានកើនជិត25,000នាក់ ធ្វើឱ្យអ្នកជំងឺសរុបឡើងដល់ជាង789,000នាក់។

បច្ចុប្បន្ន អាមេរិកគឺជាប្រទេសដែលមានអ្នកជំងឺ និងអ្នកស្លាប់ដោយសរ COVID-19 ច្រើនជាងគេបង្អស់ក្នុងពិភពលោក។ រដ្ឋមួយចំនួនមានសញ្ញាបង្ហាញថា បានឆ្លងផុតដំណាក់កាលកំពូលនៃការឆ្លងវីរុស ប៉ុន្តែអភិបាលរដ្ឋនានានៅតែបង្ហាញការប្រុងប្រយ័ត្នខ្ពស់ជាមួយនឹងគម្រោងបើកដំណើរការសេដ្ឋកិច្ចឡើងវិញ។

អភិបាលរដ្ឋ New York យល់ថា អាចនឹងត្រូវចំណាយពេលរាប់សប្ដាហ៍ ឬរាប់ខែទៀត ទើបទីក្រុងដែលមានប្រជាជនច្រើនជាងគេនៅសហរដ្ឋអាមេរិកនេះ អាចបើកដំណើរការសេដ្ឋកិច្ចឡើងវិញ ដោយសារតែមិនទាន់ធ្វើតេស្តជាទូទៅដើម្បីកំណត់ទំហំនៃស្ថានភាពរោគរាតត្បាតនេះនៅឡើយ។

ក្រុមអ្នកជំនាញយល់ថា កត្តាចាំបាច់បំផុតដើម្បីអាចបើកដំណើរការសេដ្ឋកិច្ចឡើងវិញ នោះគឺត្រូវតែបង្កើនការធ្វើតេស្តរកវីរុស។ ផ្ទុយទៅវិញ ការបន្ធូរបន្ថយការដើរហើរ ឬការបើកដំណើរការសេដ្ឋកិច្ចឡើងវិញឆាប់ពេក អាចធ្វើឱ្យវីរុសនេះ បង្កើនឥទ្ធិពលរបស់វាឡើងវិញ។

ចំណែកលោកប្រធានាធិបតី Donald Trump បានបង្ហាញភាពអន្ទះសាជាមួយនឹងគម្រោងបើកដំណើរការសេដ្ឋកិច្ចឡើងវិញរបស់ប្រទេសនេះ។ កាលពីចុងសប្ដាហ៍មុន លោកបានអំពាវនាវឱ្យ “ដោះលែង” រដ្ឋមួយចំនួនចេញពីស្ថានភាពនៃបម្រាមគោចរ។ បន្ទាប់ពីមានការលើកឡើងបែបនេះ បាតុកម្មជាច្រើនដែលប្រឆាំងទៅនឹងការពន្យារសុពលភាពនៃបម្រាមគោចរ ក៏បានកើតឡើងនៅក្នុងរដ្ឋមួយចំនួននៅពាសពេញសហរដ្ឋអាមេរិក។

រោគរាតត្បាត COVID-19 បាន និងកំពុងធ្វើឱ្យប៉ះពាល់ខ្លាំងដល់សេដ្ឋកិច្ចសហរដ្ឋអាមេរិក ខណៈដែលក្រុមហ៊ុន អាជីវកម្មមិនចាំបាច់ទាំងអស់ ត្រូវបានផ្អាកដំណើរការដើម្បីទប់ស្កាត់ការឆ្លងរាលដាលនៃវីរុសនេះ។ ពលរដ្ឋអាមេរិកាំងរាប់សិបលាននាក់ត្រូវបាត់បង់ចំណូលប្រចាំខែ ដោយសារគ្មានការងារធ្វើ ក្នុងនោះក៏មានពលរដ្ឋជាង22លាននាក់បានដាក់ពាក្យសុំជំនួយពីរដ្ឋាភិបាល៕

April 21, 2020

មនុស្សជាង100,000នាក់ចូលរួមពិធីបុណ្យសព ដោយមិនខ្ចីខ្វល់ដល់បម្រាមគោចរដើម្បីទប់ស្កាត់ COVID-19 នៅបង់ក្លាដែស

មនុស្សប្រមាណជាជាង100,000នាក់ បាននាំគ្នាចូលរួមពិធីបុណ្យសពអ្នកប្រាជ្ញម្នាក់នៃសាសនាឥស្លាម នៅឯខណ្ឌ Brahmanbaria ដោយមិនខ្ចីអើពើដល់បម្រាមគោចរក្នុងការទប់ស្កាតការឆ្លងរាលដាលវីរុសCOVID-19។

ក្រុមមនុស្សទាំងនេះ បានចូលរួមពិធីបុណ្យសពរបស់លោក Maulana Zubayer Ahmad Ansari ដែលជាអ្នកអធិប្បាយ(ទេសនា) ដ៏ល្បីល្បាញក្នុងសាសនាឥស្លាម កាលពីថ្ងៃទី18មេសា ដោយមិនខ្វល់អំពីការហាមឃាត់ការជួបជុំគ្នាលើសពី5នាក់របស់រដ្ឋាភិបាលបង់ក្លាដែស នាំឱ្យមានការព្រួយបារម្ភជាខ្លាំងអំពីហានិភ័យនៃការឆ្លងវីរុសCOVID-19 ជាសម្បុកនៅក្នុងប្រទេសនេះ។

ចំនួនមនុស្សដែលបានចូលរួមក្នុងពិធីបុណ្យសពនេះ ត្រូវបានលោកអាចារ្យ Ali Farhad ដែលជាជំនួយការពិសេសរបស់នាយករដ្ឋមន្ត្រីបង់ក្លាដែស និងអ្នកនាំពាក្យរបស់អង្គភាពនគរបាល Brahmanbaria បញ្ជាក់ដូចខាងលើ។

ហ្វូងមនុស្សខាងលើ បានធ្វើដំណើរដោយថ្មើរជើងពីតំបន់ជុំវិញ និងកាត់តាមបណ្ដាផ្លូវទៅកាន់តំបន់ Brahmanbaria ដើម្បីចូលរួមពិធីបុណ្យសព ប៉ុន្តែ ពួកគេពុំបានពាក់ម៉ាស់ ឬស្រោមដៃដើម្បីការពារសុខភាពនោះឡើយ។

មន្ត្រីនគរបាលម្នាក់ឈ្មោះ Alamgir Hossain ឱ្យដឹងថា “យើងបានស្នើឱ្យពួកគេពាក់ម៉ាស់ដើម្បីការពារសុខភាព តាមរយៈឧបករណ៍បំពងសំឡេងជាបន្តបន្ទាប់រហូតដល់ពិធីបុណ្យបានបញ្ចប់ ប៉ុន្តែ ពួកគេមិនស្ដាប់នោះទេ។

ដោយសារតែមិនអាចគ្រប់គ្រងក្រុមមនុស្សនេះបាន ក្រុមសមត្ថកិច្ចក៏បានដកថយពីពិធីបុណ្យ ហើយបានបង្កើតគណៈកម្មការមួយដើម្បីស៊ើបអង្កេតរកមូលហេតុថា តើហេតុអ្វីពិធីបុណ្យដ៏ធំនេះ នៅតែអាចកើតឡើងបាននៅក្នុងអំឡុងពេលដែលបម្រាមគោចរនៅមានសុពលភាព។ នេះបើតាមអ្នកនាំពាក្យនគរបាលបង់ក្លាដែស Sohel Rana។

សូមបញ្ជាក់ថា បង់ក្លាដែសបានចេញបម្រាមគោចរទូទាំងប្រទេសចាប់ពីថ្ងៃទី26មីនា រហូតដល់ថ្ងៃទី25មេសា ដើម្បីទប់ស្កាត់ COVID-19។ បច្ចុប្បន្ន ប្រទេសនេះ មានអ្នកជំងឺ2,456នាក់ ក្នុងនោះមាន91នាក់បានស្លាប់ ប៉ុន្តែ ក្រុមមន្ត្រីបានឱ្យដឹងថា តួលេខជាក់ស្ដែងអាចខ្ពស់ជាងនេះ ដោយសារតែមិនមានឧបករណ៍ធ្វើតេស្តគ្រប់គ្រាន់៕

ប្រភព៖ សារព័ត៌មានបរទេស

April 20, 2020

អាជ្ញាធរកាណាដា បាញ់សម្លាប់ “ខ្មាន់កាំភ្លើង” ដែលស្លៀកឈុតប៉ូលិសបន្លំខ្លួន-បើកឡានបាញ់រះទូទាំងទីក្រុង សម្លាប់មនុស្ស 16នាក់

ថ្ងៃទី20 មេសានេះ សារព័ត៌មាន ដេលី មេល និង ដឹ ហ្គាឌៀន បានរាយការណ៍បន្តអំពីហេតុការណ៍ ជនល្មើសបើករថយន្តដើរបាញ់រះនៅតាមទីកន្លែងជាច្រើននៅភាគខាងជើងទីក្រុងផូតាភីក រដ្ឋណូវ៉ាស្កូសៀ របស់ប្រទេសកាណាដា រយៈពេល 12ម៉ោង ដែលធ្វើឱ្យមានអ្នកស្លាប់យ៉ាងតិច 16នាក់ និងរងរបួសមួយចំនួនទៀត តាំងពីថ្ងៃសៅរ៍ទី18 មេសា កន្លងមក។

មកដល់ពេលនេះ ក្រុមអាជ្ញាធរប៉ូលិស អាចគ្រប់គ្រងស្ថានការណ៍បានហើយ និងបានអះអាងថា ជនល្មើសដែលបានដឹងឈ្មោះនៅពេលក្រោយមកគឺ ហ្គាប្រៀល វ៉តមែន ជាជាងធ្វើធ្មេញសិប្បនិម្មិត អាយុ 51ឆ្នាំ បានស្លាប់ហើយ នៅក្នុងស្ថានីយប្រេងមួយកន្លែង នៅឆ្ងាយពីចំណុចបង្កហេតុទៅភាគខាងត្បូងប្រមាណ 96គីឡូម៉ែត្រ កាលពីអំឡុងពេលព្រឹក នៃថ្ងៃទី19 មេសា តាមពេលវេលាក្នុងស្រុក។

ព័ត៌មានបឋម មិនបានបញ្ជាក់ថា តើជនល្មើស វ៉តមែន បានស្លាប់ដោយរបៀបណានោះទេ តែមានរូបភាពពីកាមេរ៉ារបស់ក្រុមអាជ្ញាធរដែលបំពាក់អាវុធ បានសម្រុកចូលទៅប្រកៀករថយន្តជនល្មើស និងប្រញាប់ប្រញាល់នាំយកសាកសពរបស់ វ៉តមែន ចេញពីស្ថានីយប្រេងនោះ ដែលគេប៉ាន់ស្មានថា អាចត្រូវប៉ូលិសបាញ់សម្លាប់ ចំណែកមូលហេតុ និងតើមានរឿងអ្វីដែលបណ្ដាលឱ្យឈានដល់ការបង្កហេតុបាញ់សម្លាប់មនុស្សរបស់ វ៉តមែន នោះ កំពុងស្ថិតក្នុងការស៊ើបសួរនៅឡើយ។

ទីភ្នាក់ងារព័ត៌មានAP បានបញ្ជាក់ថា សោកនាដកម្មបាញ់រះ សម្លាប់មនុស្សដ៏សាហាវឃោរឃៅបំផុតក្នុងប្រវត្តិសាស្ត្រនៃប្រទេសកាណាដានេះ បានកើតឡើងក្នុងអំឡុងពេលព្រលប់ៗនៃថ្ងៃទី18 មេសា បន្ទាប់ពីជនល្មើស វ៉តមែន ដែលបានបន្លំខ្លួនដោយស្លៀកឯកសណ្ឋានប៉ូលិស បើករថយន្តត្រាច់ចរទៅតាមទីកន្លែងជាច្រើននៅក្នុងទីក្រុងផូថាភីក និងប្រើអាវុធដែលជាកាំភ្លើងយន្ត បាញ់រះទៅលើក្រុមមនុស្សចំនួនដ៏ច្រើន ដោយក្នុងរបាយការណ៍ បានបញ្ជាក់ថា ជនល្មើសបានបើកឡានប៉ូលិស តែក្រោយមកអគ្គស្នងការដ្ឋានប៉ូលិសផ្លូវគោក នៃប្រទេសកាណាដា បានថ្លែងអះអាងថា ជារថយន្តច្នៃប្រឌិតធ្វើឱ្យដូចរថយន្តប៉ូលិស។

លោកវរសេនីយ៍ឯកប៉ូលិស គ្រីស លេធើរ ស្នងការប៉ូលិសកាណាដា បានថ្លែងបញ្ជាក់ ដោយបានជឿថា ហេតុការណ៍នោះ ជាទង្វើរបស់ជនល្មើសតែម្នាក់ឯងគត់ ខណៈដែលលោកឧត្ដមសេនីយ៍ទោប៉ូលិស លី ប៊ើរគើរមែន ជំនួយការអគ្គស្នងការប៉ូលិសជាតិ បានថ្លែងថា មន្ត្រីប៉ូលិសម្នាក់ឈ្មោះ ហេឌិ ស្ទីវេនសុន អាយុ 23ឆ្នាំ ជាជនរងគ្រោះម្នាក់ក្នុងចំណោមអ្នកស្លាប់ទាំងនោះ។

ក្រោយពេលបំពេញតួនាទីដែលបានប្រញាប់ប្រញាល់ទៅកន្លែងកើតហេតុ និងព្យាយាមការពារប្រជាជន លោកបានធ្វើដំណើរទៅជួបក្រុមគ្រួសាររបស់មន្ត្រីប៉ូលិស ស្ទីវេនសុន និងគ្មានពាក្យអ្វី ថ្លែងក្នុងការប្រៀបធៀបក្ដីឈឺចាប់របស់ពួកគេបានឡើយ “កូនទាំង 2នាក់ត្រូវបាត់បង់ម្ដាយ ស្វាមីត្រូវបាត់បង់ភរិយា ឪពុកម្ដាយត្រូវបាត់បង់កូនស្រី និងក្ដីបាត់បង់ជាច្រើនទៀតពីមិត្តភក្តិ និងមន្ត្រីមិត្តរួមការងារ”

ចំណែកលោកនាយករដ្ឋមន្ត្រី ចាស្ទីន ធ្រូដូ មេដឹកនាំកាណាដា បានថ្លែងថ្កោលទោសថា នេះគឺជាហេតុការណ៍ដ៏អាក្រក់បំផុតមួយ។ ចំណែកលោក ថម ធែកហ្គាត សមាជិកសភាតំបន់ក្រុងផូថាភីក បានថ្លែងថា អ្នករស់នៅក្នុងទីក្រុងដែលធ្លាប់តែស្ងប់សុខមួយនេះ កំពុងភ័យរន្ធត់ និងមិនចង់ជឿថា មានហេតុការណ៍ដ៏អាក្រក់កើតឡើងនៅទីនេះឡើយ។

ប្រភព៖ សារព័ត៌មានបរទេស

April 20, 2020

ប្រធានាធិបតីប្រទេសប្រេស៊ីល ចូលរួមធ្វើបាតុកម្មប្រឆាំងបម្រាមគោចរក្នុងប្រទេសរបស់ខ្លួន

ប្រធានាធិបតី Jair Bolsonaro រួមជាមួយមនុស្សរាប់រយនាក់ នាំគ្នាធ្វើបាតុកម្មនៅខាងក្រៅអគ្គបញ្ជាការដ្ឋានកងទ័ពនៅ Brasilia ដើម្បីប្រឆាំងទៅនឹងបទបម្រាមគោចររបស់អភិបាលរដ្ឋនានាក្នុងប្រទេសនេះ។

មនុស្សប្រមាណជា600នាក់ បាននាំគ្នាធ្វើបាតុកម្មកាលពីថ្ងៃទី19មេសា អំពាវនាវឱ្យកងទ័ព ធ្វើអន្តរាគមន៍ទៅលើវិធានការទប់ទល់នឹង COVID-19 ព្រមទាំងស្នើឱ្យបិទទ្វារសភាជាតិផងដែរ។ មនុស្សមួយចំនួន លើកបដាដែលមានសរសេរថា “យោធាធ្វើអន្តរាគមន៍ជាមួយប្រធានាធិបតី Bolsonaro”។

ក្រុមអ្នកសង្កេតការណ៍នយោបាយ បានឱ្យដឹងថា ក្រុមបាតុករនេះគឺជាអ្នកគាំទ្ររបស់ប្រធានាធបិតី Jair Bolsonaro។ ពួកគេបានអំពាវនាវឱ្យកងទ័ព ជួយដល់ប្រធានាធិបតី ដោយសារពួកគេយល់ថា តុលាការជាន់ខ្ពស់ និងសភាជាតិ កំពុងតែរារាំងប្រធានាធិបតី ក្នុងការប្រឆាំងទៅនឹងបទបញ្ជាបម្រាមគោចរ ទប់ស្កាត់ COVID-19 ដែលអភិបាលរដ្ឋនានាក្នុងប្រទេស បានដាក់ចេញ។

“ខ្ញុំនៅទីនេះ ព្រោះតែជឿជាក់អ្នកទាំងអស់គ្នា ហើយអ្នកទាំងអស់គ្នានៅទីនេះក៏ព្រោះតែជឿជាក់ប្រេស៊ីល” ប្រធានាធិបតី Bolsonaro មានប្រសាសន៍នៅលើរថយន្ត ទៅកាន់ក្រុមបាតុកម្ម។ លោកបន្តថា “ចូរប្រយុទ្ធដើម្បីប្រទេសជាតិ។ ចូរជឿជាក់លើប្រធានាធិបតីរបស់អ្នក ជាមនុស្សដែលនឹងធ្វើអ្វីៗដែលចាំបាច់ដើម្បីការពារខឿនប្រជាធិបតេយ្យ និងសេរីភាព ដែលជាប្រការដ៏សំខាន់សម្រាប់យើងគ្រប់គ្នា”។

ក៏ប៉ុន្តេ ប្រធានាធិបតីរូបនេះ មិនបានបញ្ចេញមតិអ្វីទាំងអស់ជុំវិញការអំពាវនាវរបស់ក្រុមបាតុករ ដែលស្នើឱ្យកងទ័ពធ្វើអន្តរាគមន៍ ក៏ដូចជាការស្នើឱ្យបិទសភាជាតិនោះឡើយ។

ប្រធានាធិបតីប្រេស៊ីល ចូលរួមបាតុកម្មប្រឆាំងបម្រាមគោចរក្នុងប្រទេសរបស់ខ្លួន

Bolsonaro ដែលជាអតីតមន្ត្រីយោធាម្នាក់ដែរនោះ បានរិះគន់ជាបន្តបន្ទាប់ទៅលើវិធានការដាក់បម្រាមគោចរទប់ស្កាត់ COVID-19 ពីសំណាក់អភិបាលរដ្ឋនានានៃប្រទេសនេះ ដែលក្នុងនោះក៏មានបណ្ដារដ្ឋដែលមានប្រជាជនច្រើនបំផុតនៅប្រេស៊ីល ដូចជារដ្ឋ Sao Paulo និងរដ្ឋ Rio de Janeiro ជាដើម។

សូមរំឭកថា កាលពីថ្ងៃទី17មេសា លោក Bolsonaro បានដកតំណែងរដ្ឋមន្ត្រីក្រសួងសុខាភិបាល ដែលជាអ្នកគាំទ្រវិធានការទប់ស្កាត់ COVID-19 ដែលត្រូវបានប្រធានាធិបតី Bolsonaro យល់ថា អាចបំផ្លាញសេដ្ឋកិច្ចប្រទេសនេះ។

គិតត្រឹមថ្ងៃទី20មេសានេះ ប្រេស៊ីលដែលជាប្រទេសមានប្រជាជនសរុបជាង200លាននាក់នេះ បានរកឃើញអ្នកជំងឺកូរ៉ូណាសរុបចំនួន 38,654នាក់ ក្នុងនោះមាន2,462នាក់បានបាត់បង់ជីវិត៕

ប្រភព៖ សារព័ត៌មានបរទេស

April 20, 2020

ជិត165,000នាក់ស្លាប់ដោយសារCOVID-19 នៅទូទាំងសកលលោក

ពិភពលោកទាំងមូលបានរកឃើញអ្នកផ្ទុកមេរោគCOVID-19 ជិត2.4លាននាក់ ក្នុងនោះមានអ្នកជំងឺជិត165,000នាក់បានបាត់បង់ជីវិត ដែលភាគច្រើននៅសហរដ្ឋអាមេរិក និងបណ្ដាប្រទេសនៅអឺរ៉ុប។

ស្ថិតិរបស់សាកលវិទ្យាល័យ Johns Hopkins ឱ្យដឹងថា នៅក្នុងប្រទេស និងដែនដីចំនួន210 ក្នុងពិភពលោក មានអ្នកជំងឺសរុប2,394,291នាក់ ក្នុងនោះមាន164,938នាក់បានស្លាប់ និង611,880នាក់បានជាសះស្បើយ។

សហរដ្ឋអាមេរិកគឺជាសម្បុកមេរោគធំជាងបង្អស់នៅក្នុងពិភពលោក ដោយមានអ្នកជំងឺសរុប755,533នាក់ អ្នកស្លាប់40,461នាក់ និងអ្នកជំងឺជាសះស្បើយមាន67,172នាក់។

អេស្ប៉ាញគឺជាសម្បុកមេរោគធំជាងគេលំដាប់ទី2នៅក្នុងពិភពលោក ដោយមានអ្នកជំងឺថ្មី4,258នាក់ និងអ្នកស្លាប់ថ្មី410នាក់ នៅក្នុងចំណោមអ្នកជំងឺសរុប198,674នាក់ និងអ្នកស្លាប់សរុប20,453នាក់។ តួលេខនៃអ្នកស្លាប់នៅក្នុងប្រទេសនេះបានថយចុះទាបបំផុតក្នុងអំឡុងជិត1ខែកន្លងទៅ ដែលនេះបង្ហាញថា វិធានការទប់ស្កាត់ដោយបម្រាមគោចរដ៏ខ្លាំងក្លាកំពុងតែមានប្រសិទ្ធភាព។

អ៊ីតាលី រាយការណ៍ថា បានរកឃើញអ្នកជំងឺថ្មី3,047នាក់បន្ថែមទៀត ធ្វើឱ្យអ្នកជំងឺសរុបឡើងដល់178,872នាក់។ ប្រទេសនេះក៏មានអ្នកស្លាប់ថ្មី433នាក់ នាំឱ្យតួលេខនៃអ្នកស្លាប់សរុបកើនដល់23,660នាក់។

រដ្ឋាភិបាលប្រទេសអ៊ីតាលីបានប្រកាសថា ទទួលបានជោគជ័យលើ COVID-19 នៅក្នុងតំបន់ភាគខាងត្បូង ខណៈមេដឹកនាំតំបន់ឧស្សាហកម្មនានានៅភាគខាងជើងប្រទេស បានជំរុញឱ្យមានការអនុញ្ញាតឱ្យពួកគេបើកដំណើរការអាជីវកម្ម និងរោងចក្រឡើងវិញនៅដើមខែឧសភាខាងមុខ។

បារាំងបានរកឃើញអ្នកជំងឺថ្មី1,101នាក់ និងស្លាប់ថ្មី395នាក់។ អ្នកជំងឺសរុប152,894នាក់ និងអ្នកស្លាប់សរុប19,718នាក់។

អាល្លឺម៉ង់៖ អ្នកជំងឺថ្មី1,460នាក់ អ្នកស្លាប់ថ្មី48នាក់ និងអ្នកជំងឺសរុប145,184នាក់ អ្នកស្លាប់សរុប4,586នាក់។

អង់គ្លេស៖ អ្នកជំងឺថ្មី5,850នាក់ អ្នកស្លាប់ថ្មី596នាក់ និងអ្នកជំងឺសរុប120,067នាក់ អ្នកស្លាប់សរុប16,000នាក់។ ស្ថិតិអ្នកស្លាប់របស់ប្រទេសនេះ រាប់តែអ្នកជំងឺដែលស្លាប់នៅក្នុងមន្ទីរពេទ្យតែប៉ុណ្ណោះ។ អង់គ្លេសក៏កំពុងតែពន្យារសុពលភាពនៃបម្រាមគោចរយ៉ាងតិច3សប្ដាហ៍ទៅមុខទៀត ដោយសារស្ថានភាពមិនទាន់ប្រសើរឡើង។

ប្រទេសចិន៖ មិនទាន់ប្រកាសតួលេខថ្មី ក៏ប៉ុន្តែ តួលេខចុងក្រោយបង្ហាញថា មានអ្នកជំងឺសរុប83,805នាក់ និងស្លាប់សរុប4,636នាក់។

អ៊ីរ៉ង់បន្តជាសម្បុកមេរោគធំជាងគេទី2នៅអាស៊ី ដោយមានអ្នកជំងឺសរុប82,211នាក់ និងអ្នកស្លាប់សរុប5,118នាក់ ក្នុងនោះមានអ្នកជំងឺថ្មី1,343នាក់ និងអ្នកស្លាប់ថ្មី87នាក់។ នេះជាថ្ងៃទី6ហើយដែលប្រទេសនេះមានអ្នកស្លាប់ដោយសារ COVID-19 ក្រោយ100នាក់៕

ប្រភព៖ សារព័ត៌មាន

April 20, 2020

Category: អន្តរជាតិ