អន្តរជាតិ - La Reine Media

សារព័ត៌មាននានាសង្ស័យថា Kim Jong-un បានបាត់បង់ស្មារតី ខណៈចិនបានបញ្ជូនក្រុមវេជ្ជបណ្ឌិតទៅកូរ៉េខាងជើង

ទីភ្នាក់ងារសារព័ត៌មានល្បីៗជាច្រើនបានចុះផ្សាយជាបន្តបន្ទាប់ស្ដីអំពីសុខភាពរបស់មេដឹកនាំកូរ៉េខាងជើង ខណៈដែលមានដំណឹងចចាមអារ៉ាមថា លោក Kim Jong-un កំពុងប្រឈមនឹងការបាត់បង់ជីវិត។

ទីភ្នាក់ងារសារព័ត៌មាន Shunkan Gendai របស់ជប៉ុន ធ្លាប់បានដកស្រង់ព័ត៌មានពីប្រភពជិតស្និទ្ធនឹងប្រទេសចិន ដែលធ្វើការក្នុងវិស័យសុខាភិបាល ឱ្យដឹងអំពីស្ថានភាពសុខភាពរបស់លោក Kim Jong-un ផងដែរ។ ប្រភពព័ត៌មានបានឱ្យដឹងថា នៅក្នុងពេលកំពុងធ្វើទស្សនកិច្ចទឹកដី លោក Kim Jong-un ស្រាប់តែយកដៃមកឱបទ្រូង រួចក៏ដួលទៅលើដី។ ក្រុមគ្រូពេទ្យ និងមន្ត្រីនៅក្បែរនោះ ក៏បានបញ្ជូនលោកទៅកាន់មន្ទីរពេទ្យសង្គ្រោះបន្ទាន់។ ទន្ទឹមនឹងនេះ កូរ៉េខាងជើងក៏បានស្នើសុំជំនួយពីចិនផងដែរ ទាក់ទិននឹងសុខភាពរបស់មេដឹកនាំប្រទេសនេះ។

សារព័ត៌មានកូរ៉េខាងត្បូង Daily NK ដែលមានជំនាញខាងផ្ដល់ព័ត៌មានអំពីកូរ៉េខាងជើង ក៏ធ្លាប់បានផ្សាយថា លោក Kim Jong-un បានឆ្លងកាត់ការវះកាត់មួយកាលពីថ្ងៃទី12មេសា។ ចំណែក CNN ក៏បានរាយការណ៍ថា ទីក្រុងវ៉ាស៊ីងតោន កំពុងស្រាវជ្រាវព័ត៌មានដើម្បីបញ្ជាក់អំពីដំណឹងដែលថា មេដឹកនាំកូរ៉េខាងជើងកំពុងស្ថិតក្នុងស្ថានភាពគ្រោះថ្នាក់ដល់ជីវិត បន្ទាប់ពីបានទទួលការវះកាត់។

ប្រភពព័ត៌មានមួយចំនួនក៏បានចេញផ្សាយថា ប្រទេសចិនប្រហែលជាកំពុង “ព្រួយបារម្ភខ្លាំង” នៅមានលេចឮព័ត៌មានចចាមអារ៉ាមជាច្រើនស្ដីអំពីសុខភាព ក៏ដូចជាការប្រឈមនឹងការបាត់បង់ជីវិតរបស់លោក Kim Jong-un ដែលអាចនាំឱ្យមានបញ្ហាអស្ថិរភាពក្នុងតំបន់ឧបទ្វីបកូរ៉េ។

ប្រទេសចិនត្រូវបានគេរាយការណ៍ថា បានបញ្ជូនគណៈប្រតិភូដែលមានក្រុមវេជ្ជបណ្ឌិតទៅកាន់កូរ៉េខាងជើង ដើម្បីជួយដោះស្រាយបញ្ហាសុខភាពរបស់លោក Kim Jong-un កាលពីថ្ងៃទី23មេសា បន្ទាប់ពីមានដំណឹងចចាមអារ៉ាមជាច្រើនទាក់ទិននឹងបញ្ហាសុខភាពរបស់មេដឹកនាំកូរ៉េខាងជើង ដែលត្រូវគេជឿថា កំពុងស្ថិតក្នុងស្ថានភាពគ្រោះថ្នាក់ដល់ជីវិតព្រោះតែជំងឺ៕

ប្រភព៖ សារព័ត៌មានបរទេស

April 25, 2020

អាមេរិកាំងបញ្ចេញផែនទីភូមិសាស្ត្រពេញលេញនៃឋានព្រះចន្ទ

ជាលើកដំបូងហើយដែលផ្ទៃដីទាំងមូលរបស់ព្រះចន្ទត្រូវបានគូរឡើងវិញដោយមជ្ឈមណ្ឌលតារាសាស្ត្រនៃទីភ្នាក់ងារអង្កេតភូមិសាស្ត្រសហរដ្ឋអាមេរិក USGS (United States Geological Survey)។

ផែនទីថ្មីនេះ ត្រូវបានបង្កើតឡើងដោយការបូកផ្សំគ្នារវាងផែនទីភូមិសាស្ត្រចំនួន6ផ្សេងទៀតនៃកម្មវិធី Apollo និងទិន្នន័យដែលបានមកពីផ្កាយរណបនានាក្នុងពេលថ្មីៗនេះ បានបង្ហាញអំពីរចនាសម្ព័ន្ធផ្ទៃខាងលើយ៉ាងច្បាស់របស់ឋានព្រះចន្ទ ជាមួយនឹងភាពលម្អិតដែលមិនធ្លាប់មានពីមុនមក។

ចំពោះសហគមន៍អ្នកវិទ្យាសាស្ត្រ ផែនទីនេះគឺជាឯកសារដែលកាត់ថ្លៃមិនបាន សម្រាប់បេសកកម្មនៅលើព្រះចន្ទនាពេលអនាគត ដែលជួយដល់ការសិក្សាស្រាវជ្រាវប្រវត្តិ4.5ពាន់លានឆ្នាំរបស់ភពរណបធម្មជាតិតែមួយគត់ដែលគោចរជុំវិញភពផែនដីមួយនេះ។

Corey Fortezzo មកពី USGS ដែលជាប្រធាននៃការសិក្សាស្រាវជ្រាវនេះបានឱ្យដឹងថា “ផែនទីនេះគឺជាចំណុចកំពូលនៃគម្រោងដែលអូសបន្លាយរាប់ទសវត្សរ៍។ វាផ្ដល់ព័ត៌មានសំខាន់ៗសម្រាប់ការស្រាវជ្រាវផ្នែកវិទ្យាសាស្ត្រថ្មីៗផ្សេងទៀត”។

ដើម្បីអាចបង្កើតបានផែនទីភូមិសាស្ត្រទូទាំងឋានព្រះចន្ទ ទីភ្នាក់ងារ USGS បានសហការជាមួយ NASA និងវិទ្យាស្ថានស្រាវជ្រាវភព និងព្រះចន្ទ(LPI) របស់សហរដ្ឋអាមេរិក រួមនឹងទីភ្នាក់ងាររុករកអវកាសជប៉ុន(JAXA)។ អ្នកវិទ្យាសាស្ត្របានប្រើប្រាស់កាមេរ៉ាភូមិសាស្ត្រពីយានអវកាស SELENE របស់ជប៉ុន ដើម្បីប្រមូលទិន្នន័យនៅតំបន់អេក្វាទ័រ និងប្រើប្រាស់ម៉ាស៊ីនឡាហ្សែរវាស់កម្ពស់នៅលើយានអវកាស Lunar Reconnaissance Orbiter របស់ NASA ដើម្បីបន្ថែមផែនទីភូមិសាស្ត្រនៅប៉ូលខាងជើង និងខាងត្បូង។

“ព្រះចន្ទតែងមានកម្លាំងទាក់ទាញយ៉ាងខ្លាំងសម្រាប់មនុស្ស ហើយយើងក៏តែងតែរង់ចាំថ្ងៃមួយដែលអាចវិលត្រឡប់ទៅកាន់ទីនោះ។ ពិតជាអស្ចារ្យណាស់នៅពេលបានឃើញ USGS បង្កើតបានប្រភពធនធានដែលអាចជួយឱ្យ NASA រៀបគម្រោងសម្រាប់បេសកកម្មនាពេលអនាគត” នេះបើតាមសម្ដីរបស់ Jim Reilly ដែលជាប្រធានទីភ្នាក់ងារ USGS និងជាអតីតអវកាសចររបស់ NASA៕

https://www.youtube.com/watch?v=lTKbXpIqGtY

ប្រភព៖ សារព័ត៌មានបរទេស

April 25, 2020

ចិន បញ្ជូនក្រុមពេទ្យទៅកូរ៉េខាងជើង ជួយផ្ដល់ការណែនាំការព្យាបាលលោក “គីម ជុងអ៊ុន”

រដ្ឋបាលចិន បានបញ្ជូនក្រុមមន្ត្រី និងអ្នកជំនាញការខាងវេជ្ជសាស្ត្រ ទៅប្រទេសកូរ៉េខាងជើង ដើម្បីផ្ដល់ការណែនាំក្នុងការព្យាបាលលោក គីម ជុង អ៊ុន មេដឹកនាំកូរ៉េខាងជើង។ នេះបើតាមប្រភពស្និទ្ធនឹងប្រទេសខាងលើបានបង្ហើបឱ្យដឹង។

ការធ្វើដំណើរទៅប្រទេសមើមយិនស៊ឹនក្រហម របស់ក្រុមគណៈគ្រូពេទ្យ និងអ្នកតំណាងចិន កើតឡើងក្រោមព័ត៌មានចចាមអារ៉ាមដ៏ច្រើនថា លោក គីម ជុងអ៊ុន បានធ្លាក់ខ្លួនឈឺ ដល់ថ្នាក់កើតអាការខូម៉ា។

ប្រភពព័ត៌មាន 2នាក់ បានឱ្យដឹងថា ក្រុមគណៈអ្នកតំណាង ដែលដឹកនាំដោយមន្ត្រីថ្នាក់ខ្ពស់ចំណាស់ម្នាក់នៃគណៈកម្មការទំនាក់ទំនងអន្តរជាតិ របស់បក្សកុម្មុយនីស្តចិន បានចេញដំណើរពីទីក្រុងប៉េកាំង ទៅប្រទេសកូរ៉េខាងជើង កាលពីព្រឹកថ្ងៃព្រហស្បតិ៍(ទី23មេសា)។

ទាំងអស់នេះ អ្នកឆ្លើយឆ្លងព័ត៌មានរ៉យទ័រ នៅមិនទាន់អាចទាក់ទងគណៈកម្មការទំនាក់ទំនងអន្តរជាតិរបស់ចិន ដើម្បីសុំការអះអាងបាននៅឡើយទេ និងថែមទាំងមិនទាន់បានទទួលចម្លើយពីក្រសួងការបរទេសរបស់ប្រទេសចិននៅឡើយដូចគ្នា។

វេបសាយ Daily NK ដែលជាទីភ្នាក់ងារព័ត៌មាន របស់ក្រុមអ្នកភៀសខ្លួនកូរ៉េខាងជើងនៅក្នុងទីក្រុងសេអ៊ូល បានរាយការណ៍កាលពីដើមសប្ដាហ៍នេះថា លោក គីម កំពុងស្ថិតក្នុងអំឡុងពេលសម្រាកសះស្បើយពីការវះកាត់សរសៃឈាមបេះដូង កាលពីថ្ងៃទី12 មេសាកន្លងទៅ។

អាជ្ញាធររដ្ឋបាលកូរ៉េខាងត្បូង និងមន្ត្រីនៃគណៈកម្មការទំនាក់ទំនងអន្តរជាតិរបស់ចិនម្នាក់ បានចេញ មកបដិសេធរបាយការណ៍របស់ CNN ដែលថា លោក គីម ជុងអ៊ុន មានអាការធ្ងន់ធ្ងរ “ដល់ដំណាក់កាលវិបត្តិ” ខណៈដែលទីស្ដីការប្រធានាធិបតីកូរ៉េខាងត្បូង ក៏បានអះអាងដែរថា មិនមានរកឃើញសញ្ញាណាមួយ ខុសប្រក្រតីពីខាងក្រុងព្យុងយ៉ាងឡើយ។

ក្នុងថ្ងៃព្រហស្បតិ៍(ទី23មេសា) លោកប្រធានាធិបតីសហរដ្ឋអាមេរិក ដូណាល់ ត្រាំ ក៏ជាមនុស្សម្នាក់ដែលបានចេញមកនិយាយក្នុងទំនងជាមិនសូវជឿព័ត៌មានរឿងលោក គីម ឈឺធ្ងន់ នេះដែរ។
លោកថ្លែងថា “ខ្ញុំគិតថា របាយការណ៍នេះ មិនត្រឹមត្រូវទេ” លោកបានប្រាប់ទៅអ្នកសារព័ត៌មាន តែក៏មិនបានអះអាងថា លោកបានទាក់ទងសាកសួរទៅក្រុមមន្ត្រីកូរ៉េខាងជើងហើយឬនៅដែរ។

ប្រភពព័ត៌មានក្នុងប្រទេសកូរ៉េខាងត្បូងម្នាក់ បានប្រាប់រ៉យទ័រកាលពីម្សិលមិញ(ទី24មេសា) ថា តាមរយៈសម្រង់ព័ត៌មានដែលពួកគេទទួលបាន គឺលោក គីម ជុងអ៊ុន នៅរស់នៅឡើយ ហើយប្រហែលជានឹងបង្ហាញខ្លួនចំពោះមុខសារព័ត៌មាន នាពេលឆាប់នេះដែរ។

ប្រភពព័ត៌មានម្នាក់ទៀត ដែលចូលដល់អង្គភាពសម្រង់ព័ត៌មានរបស់សហរដ្ឋអាមេរិក បានបញ្ជាក់ថា ដូចដែលយើងបានដឹងស្រាប់ហើយថា លោក គីម ជុងអ៊ុន មានបញ្ហាសុខភាព ប៉ុន្តែរហូតមកដល់ពេលនេះ នៅមិនទាន់មានព័ត៌មានណាមួយ បញ្ជាក់ច្បាស់ថា គាត់ឈឺធ្ងន់ដល់ថ្នាក់ខូម៉ា ឬមិនអាចបង្ហាញខ្លួនចំពោះមុខសាធារណជនបាននោះទេ។

លោក គីម ជុងអ៊ុន បានបង្ហាញខ្លួនលើកចុងក្រោយបង្អស់ នៅក្នុងកិច្ចប្រជុំគណៈកម្មការនយោបាយរបស់បក្សពលករកូរ៉េ កាលពីថ្ងៃទី11 មេសា តែបែរជាមិនបានចូលរួមពិធីអបអរសាទរថ្ងៃខួបកំណើតអតីតប្រធានាធិបតី គីម អ៊ីលស៊ុង ស្ថាបនិករដ្ឋកូរ៉េក្រហម កាលពីថ្ងៃទី15 មេសា ដែលរឿងនេះ គឺជារឿងដែលខុសប្រក្រតីយ៉ាងខ្លាំង។

លោក គីម ដែលបច្ចុប្បន្ន ប្រហែលជាមានអាយុ 36ឆ្នាំ ធ្លាប់បានបាត់មុខពីសារព័ត៌មានរយៈពេល 1ខែ កាលពីឆ្នាំ2014 មុននឹងបង្ហាញខ្លួនឡើងវិញម្ដងទៀត ក្នុងសភាពដើរជើងប៉័ងពៀច។

ព័ត៌មានចចាមអារ៉ាមរឿងសុខភាពរបស់លោក គីម ចាប់ផ្ដើមលាន់ឮកាន់តែច្រើនឡើងជារឿយៗ ដោយសារតែគាត់ជាអ្នកញៀនបារីខ្លាំង ថែមទាំងកាន់តែធាត់ឡើងយ៉ាងចម្លែក ក្រោយពីឡើងទទួលតំណែងជាមេដឹកនាំកូរ៉េខាងជើងក្នុងឆ្នាំ2011 ក្រៅពីនេះ មនុស្សនៅក្នុងត្រកូលគីម ថែមទាំងធ្លាប់មានប្រវត្តិ ឈឺជំងឺបេះដូង ជាច្រើននាក់ទៀតផង។

អតីតមេដឹកនាំប្រទេសកូរ៉េក្រហម លោក គីម ចង់អ៊ីល ដែលជាឪពុករបស់លោក គីម ជុងអ៊ុន ធ្លាប់មានជំងឺសរសៃឈាមក្នុងខួរក្បាលក្នុងឆ្នាំ2008 ដែលកាលនោះ សារព័ត៌មានកូរ៉េខាងត្បូង បានរាយការណ៍ថា មានគ្រូពេទ្យពីប្រទេសចិន និងបារាំងចូលរួមក្នុងការព្យាបាលទៀតផង។

លោក គីម ជុងអ៊ុន ជាទាយាទជំនាន់ទី3 ដែលបានទទួលតំណែងបន្ត ជាមេដឹកនាំខ្ពស់បំផុត ក្រោយពីឪពុករបស់លោកបានស្លាប់ដោយសភាវគាំងបេះដូងកាលពីចុងឆ្នាំ2011។

លោក គីម ធ្លាប់បានធ្វើដំណើរទៅប្រទេសចិនរួចមកហើយចំនួន 4លើក តាំងពីឆ្នាំ2008 និងក្នុងឆ្នាំកន្លងទៅ លោកប្រធានាធិបតី ស៊ី ជីនភីង របស់ចិន ក៏ធ្លាប់បានទៅទស្សនកិច្ចប្រទេសកូរ៉េខាងជើងដែរ ដែលជាទស្សនកិច្ចបែបផ្លូវរដ្ឋ លើកដំបូងរបស់មេដឹកនាំចិនក្នុងរយៈពេល 14ឆ្នាំមកនេះ៕

ប្រភព៖ សារព័ត៌មានបរទេស

April 25, 2020

អាមេរិកាំង-ចិនឈ្លោះគ្នា! កិច្ចប្រជុំG20 ក្នុងថ្ងៃទី24មេសា ត្រូវបានលុបចោល

កិច្ចប្រជុំតាមរយៈវីដេអូរវាងបណ្ដាមេដឹកនាំប្រទេស G20 ត្រូវបានលុបចោលនៅនាទីចុងក្រោយ ព្រោះតែជម្លោះរវាងសហរដ្ឋអាមេរិក និងប្រទេសចិន ទាក់ទិននឹងតួនាទីរបស់អង្គការសុខភាពពិភពលោក(WHO) នៅក្នុងការដោះស្រាយបញ្ហា COVID-19។

ប្រភពព័ត៌មានមួយសុំមិនបញ្ចេញឈ្មោះ ដែលមានការយល់ដឹងស៊ីជម្រៅអំពីបញ្ហាខាងលើ បានឱ្យដឹងថា កិច្ចប្រជុំនេះ តាមគម្រោងនឹងត្រូវធ្វើឡើងនៅក្នុងថ្ងៃទី24មេសា ប៉ុន្តែត្រូវបានលុបចោលទៅវិញ ព្រោះតែសហរដ្ឋអាមេរិកអះអាងថា អង្គការសុខភាពពិភពលោក ជាអ្នកទទួលខុសត្រូវចំពោះសកម្មភាពទប់ទល់នឹងវីរុសCOVID-19 ក្នុងដំណាក់កាលដំបូង ខណៈដែលប្រទេសចិន ប្ដេជ្ញាបដិសេធមិនជជែកអំពីសំណើរស៊ើបអង្កេតលើ WHO។

ប្រភពព័ត៌មានបានឱ្យដឹងថា កិច្ចប្រជុំកំពូលរបស់ក្រុមប្រទេស G20 នៅតែអាចត្រូវបានធ្វើឡើងនាពេលខាងមុខ បើសិនជាភាគីអាមេរិកាំង និងចិនយល់ព្រមលើការសម្របសម្រួលមួយជាមួយ WHO។

តាមគម្រោង កិច្ចប្រជុំកំពូលនឹងមានវត្តមានរបស់ប្រធានាធិបតីអាមេរិកាំង លោក Donald Trump និងប្រធានាធិបតីចិន លោក Xi Jinping។ ប៉ុន្តែ ចុងក្រោយ កិច្ចប្រជុំនេះមិនបានកើតឡើងនៅក្នុងរបៀបវារៈផ្លូវការដែលត្រូវបាន អារ៉ាប៊ីសាអ៊ូឌីត ដែលជាប្រធានបន្តវេនឆ្នាំនេះ ប្រកាសនោះទេ។

មកដល់ពេលនេះ គណៈកម្មធិការ G20 មិនទាន់បានចេញប្រតិកម្មជុំវិញព័ត៌មានខាងលើនេះនៅឡើយ។

Shen Dingli សាស្ត្រាចារ្យផ្នែកទំនាក់ទំនងកិច្ចការបរទេស មកពីសាកលវិទ្យាល័យ Fudan University នៅទីក្រុងសៀងហៃ ប្រទេសចិន បានឱ្យដឹងថា “ប្រទេសចិនយល់ថា អាមេរិកាំងផ្អាកផ្ដល់ជំនួយដល់ WHO គឺដើម្បីបង្វែរចំណាប់អារម្មណ៍លើការដឹកនាំទន់ខ្យោយក្នុងការទប់ស្កាត់ COVID-19 និងព្យាយាមទម្លាក់កំហុសទៅលើប្រទេសចិន ប៉ុន្តែ អាមេរិកាំងវិញ និយាយថា WHO គឺជាផ្នែកមួយនៃប្រទេសចិន ហើយប្រទេសចិនត្រូវតែទទួលខុសត្រូវទៅលើការខូចខាតធ្ងន់ធ្ងរនៅសហរដ្ឋអាមេរិក”។ លោក Shen Dingli បន្តថា “ទំនាក់ទំនងរវាងចិនជាមួយនឹងសហរដ្ឋអាមេរិក បានប្រែជាអាក្រក់ជាងមុន ដែលវាជាបញ្ហាគួរឱ្យព្រួយបារម្ភ។ អនាគតនឹងកាន់តែអាក្រក់ជាងនេះ”។

សូមរំឭកថា កិច្ចប្រជុំកំពូលដែលធ្វើឡើងតាមរយៈវីដេអូរវាងមេដឹកនាំនៃបណ្ដាក្រុមប្រទេស G20 ដែលពិភាក្សាអំពីវិធីទប់ទល់នឹង COVID-19 ត្រូវបានធ្វើឡើងជាលើកដំបូងនៅក្នុងថ្ងៃទី26មីនាកន្លងទៅ។ ក្រុមមេដឹកនាំបានមូលមតិគ្នាថានឹងធ្វើអ្វីៗគ្រប់យ៉ាងដើម្បីឆ្លងផុតពីវិបត្តិសុខភាពនេះ និងបានព្រមព្រៀងគ្នាក្នុងការទម្លាក់កញ្ចប់ថវិកា 5លានលានដុល្លារដើម្បីជួយសង្គ្រោះសេដ្ឋកិច្ចនៅទូទាំងពិភពលោក។

ក្រោយកិច្ចប្រជុំដំបូងរបស់ G20 សហរដ្ឋអាមេរិក និងប្រទេសចិន បាន និងកំពុងឈ្លោះប្រកែកគ្នាអំពីតួនាទីរបស់អង្គការសុខភាពពិភពលោក(WHO) ដែលជាលទ្ធផល សហរដ្ឋអាមេរិក បានផ្អាកជំនួយដល់អង្គការនេះ។ ចំណែកប្រទេសចិនវិញ កាលពីថ្ងៃទី23មេសា ប្រកាសថានឹងផ្ដល់ជំនួយ30លានដុល្លារបន្ថែមទៀតទៅឱ្យអង្គការអន្តរជាតិមួយនេះ ដើម្បីទប់ទល់នឹងវីរុសCOVID-19។

Jia Qingguo សាស្ត្រាចារ្យមួយរូបមកពីមហាវិទ្យាល័យស្រាវជ្រាវអន្តរជាតិនៃសាកលវិទ្យាល័យប៉េកាំង បានឱ្យដឹងថា ទំនាក់ទំនងរវាងចិននិងអាមេរិកាំង បានធ្លាក់ទៅក្នុងស្ថានភាពអាក្រក់អស់រយៈពេលច្រើនឆ្នាំមកហើយ ប៉ុន្តែវាកាន់តែអាក្រក់ជាងមុន ដោយសារតែ COVID-19។ “នេះគួរណស់តែជាឱកាសល្អដើម្បីឱ្យប្រទេសទាំង2 សហការគ្នាក្នុងការទប់ទល់នឹង COVID-19 ប៉ុន្តែ សហរដ្ឋអាមេរិកបានទម្លាក់កំហុសទៅលើចិន ហើយការប្រឆាំងតបតរបស់ចិន បានធ្វើឱ្យភាគីទាំងសងខាងបង្កើនការប្រឈមមុខដាក់គ្នា”។

លោក Jia Qingguo បន្តថា បើសិនជាលោក Trump ជាប់ឆ្នោតម្ដងទៀតនៅខែវិច្ឆកាឆ្នាំនេះ នោះទំនាក់ទំនងរវាងអាមេរិកាំងជាមួយចិន អាចនឹងបន្តកើនកម្ដៅ ហើយក្លាយជាការប្រឈមមុខដាក់គ្នាលើគ្រប់បញ្ហា។

ប្រទេសG20 (Group of 20) គឺជាក្រុមប្រទេសដែលមានការអភិវឌ្ឍខ្លាំងជាងគេទាំង20 នៅក្នុងពិភពលោក ដែលត្រូវបានបង្កើតឡើងក្នុងឆ្នាំ1999 នៅទីក្រុងវ៉ាស៊ីងតោននៃសហរដ្ឋអាមេរិក។ ជាទូទៅ G20 គឺជាជំនួបរវាងរដ្ឋមន្ត្រីហិរញ្ញវត្ថុ និងថ្នាក់ដឹកនាំធនាគារមកពីបណ្ដាលប្រទេសទាំង19 ដែលមានសេដ្ឋកិច្ចរីកចម្រើនខ្លាំងក្នុងពិភពលោក បូករួមទាំងប្រទេសអភិវឌ្ឃន៍ក្នុងសហភាពអឺរ៉ុបផងដែរ។ កាលពីដំបូងឡើយ សមាជិកនៃក្រុមប្រទេសG7 ដែលបានបង្កើតឡើងនៅឆ្នាំ1975 គឺមានដូចជា សហរដ្ឋអាមេរិក អាល្លឺម៉ង់ បារាំង រុស្ស៊ី កាណាដា អ៊ីតាលី ចក្រភពអង់គ្លេស និងជប៉ុន។ ហើយក្រុមប្រទេសG20ត្រូវបានផ្សំឡើងដោយសមាជិក12ផ្សេងទៀត ដូចជា ប្រទេសអាហ្សង់ទីន ប្រេស៊ីល ចិន ឥណ្ឌា ឥណ្ឌូនេស៊ី ម៉ិកស៊ិក ប្រទេសរុស្ស៉ី អារ៉ាប៊ីសាអ៊ូឌីត អាហ្វ្រិកខាងត្បូង កូរ៉េខាងត្បូង និងតួរគី។

គោលបំណងសំខាន់នៃការបង្កើតក្រុមប្រទេសG20នេះឡើង គឺជួយជំរុញកំណើនសេដ្ឋកិច្ចពិភពលោក កំណើនពាណិជ្ជកម្មអន្តរជាតិ និងការត្រួតពិនិត្យទីផ្សារហិរញ្ញវត្ថុសកល៕

ប្រភព៖ សារព័ត៌មានបរទេស

April 25, 2020

មនុស្សជិត197,000នាក់បានស្លាប់ដោយសារ COVID-19 នៅទូទាំងសកលលោក

ពិភពលោកទាំងមូលមានអ្នកស្លាប់ជិត197,000នាក់ ក្នុងចំណោមអ្នកជំងឺជាង2,8លាននាក់ ដែលភាគច្រើនកើតឡើងនៅក្នុងទ្វីបអឺរ៉ុប និងអាមេរិក។

យោងតាមសាកលវិទ្យាល័យ Johns Hopkins ប្រទេស និងដែនដីចំនួន210 ក្នុងពិភពលោក បានរកឃើញអ្នកជំងឺCOVID-19 ចំនួន2,826,847នាក់ ក្នុងនោះក៏មានអ្នកស្លាប់ប្រមាណជា197,082នាក់ផងដែរ ដោយមានអ្នកជំងឺថ្មី82,396នាក់ និងអ្នកស្លាប់ថ្មី5,617នាក់។ ចំណែកអ្នកជំងឺដែលបានជាសះស្បើយមានចំនួន779,774នាក់។

សហរដ្ឋអាមេរិកនៅតែជាសម្បុកមេរោគកូរ៉ូណាធំជាងគេក្នុងពិភពលោក ជាមួយនឹងអ្នកជំងឺសរុប923,612នាក់ និងស្លាប់សរុប51,017នាក់។ អ្នកជំងឺថ្មី កើន37,170នាក់ និងអ្នកស្លាប់កើន 1,858នាក់។

អេស្ប៉ាញជាសម្បុកមេរោគធំជាងគេលំដាប់ទី2ក្នុងពិភពលោក និងជា “វាលពិឃាត” របស់ COVID-19 ធំជាងគេលំដាប់ទី3 បន្ទាប់ពីសហរដ្ឋអាមេរិក និងអ៊ីតាលី។ អេស្ប៉ាញមានអ្នកស្លាប់សរុបឡើងដល់ជាង22,500នាក់ ក្នុងចំណោមអ្នកជំងឺជិត220,000នាក់។ អ្នកជំងឺថ្មី មាន6,740នាក់ និងអ្នកស្លាប់ថ្មី មាន367នាក់។

អ៊ីតាលី៖ អ្នកជំងឺថ្មី3,021នាក់ អ្នកស្លាប់ថ្មី420នាក់ ក្នុងចំណោមអ្នកជំងឺសរុប192,994នាក់ និងអ្នកស្លាប់សរុប25,969នាក់។

បារាំង៖ មានអ្នកជំងឺថ្មី1,645នាក់ អ្នកស្លាប់ថ្មី389នាក់ ក្នុងចំណោមអ្នកជំងឺសរុប159,828នាក់ និងអ្នកស្លាប់សរុប22,245នាក់។

អាល្លឺម៉ង់ត្រូវបានវាយតម្លៃថា បានប្រតិកម្មឆាប់រហ័សទៅនឹង COVID-19 ហើយអាចគ្រប់គ្របវីរុសបានយ៉ាងល្អនៅដំណាក់កាលដំបូង។ ប៉ុន្តែ អធិការបតី Angela Merkel បានព្រមានថា នេះគ្រាន់តែជាចំណុចចាប់ផ្ដើមដំបូងនៃរោគរាតត្បាតតែប៉ុណ្ណោះ។ អាល្លឺម៉ង់ បច្ចុប្បន្នមានអ្នកជំងឺសរុប143,464នាក់ និងអ្នកស្លាប់សរុប5,760នាក់ ក្នុងនោះអ្នកជំងឺថ្មីមាន1,870នាក់ និងអ្នកស្លាប់ថ្មី185នាក់។

អង់គ្លេសទើបបានរកឃើញអ្នកជំងឺថ្មី 5,386នាក់ និងអ្នកស្លាប់ថ្មី684នាក់ ធ្វើឱ្យចំនួនអ្នកជំងឺសរុបឡើងដល់143,464នាក់ និងអ្នកស្លាប់សរុប19,506នាក់។

អ៊ីរ៉ង់បានក្លាយជាសម្បុកមេរោគធំជាងគេនៅក្នុងទ្វីបអាស៊ី ដោយមានអ្នកជំងឺសរុប88,194នាក់។ ប្រទេសនេះទើបមានអ្នកស្លាប់ថ្មី93នាក់ នេះជាថ្ងៃទី11ហើយដែលតួលេខអ្នកស្លាប់ថ្មីក្រោម100នាក់។ អ៊ីរ៉ង់មានអ្នកស្លាប់សរុប5,574នាក់៕

ប្រភព៖ សារព័ត៌មានបរទេស

April 25, 2020

សហរដ្ឋអាមេរិកមានអ្នកស្លាប់ជិត52,000នាក់ដោយសារCOVID-19 លោក Trump ថ្លែងថា “អាមេរិកធ្វើបានល្អ”

ប្រធានាធិបតីសហរដ្ឋអាមរិក លោក Donald Trump បានថ្លែងថា រដ្ឋាភិបាលអាមេរិកាំងទប់ទល់នឹងរោគរាតត្បាតCOVID-19 បានយ៉ាងល្អ និងបានសង្ឃឹមថា តួលេខនៃអ្នកស្លាប់ដោយសារវីរុសកូរ៉ូណានេះនឹងទាបជាងច្រើន ធៀបនឹងការព្យាករ100,000នាក់ពីសំណាក់ក្រុមអ្នកជំនាញការ។

គិតត្រឹមបច្ចុប្បន្ន សហរដ្ឋអាមេរិកមានអ្នកស្លាប់ដោយសារវីរុសCOVID-19 សរុបឡើងដល់ 52,092នាក់ កើនជាង1,800នាក់ បើធៀបនឹងមុននេះមួយថ្ងៃ។ អ្នកជំងឺថ្មីក្នុងប្រទេសនេះមានជាង3,700នាក់ ធ្វើឱ្យចំនួនអ្នកជំងឺសរុបកើនដល់923,612នាក់។

ឆ្លើយតបនឹងសំណួររបស់អ្នកយកព័ត៌មាន ស្ដីអំពីការទទួលខុសត្រូវក្នុងការទប់ស្កាត់របស់រដ្ឋាភិបាល ខណៈដែលមានអ្នកស្លាប់ជាង50,000នាក់ដោយសារCOVID-19 លោក Trump បានឆ្លើយថា “ខ្ញុំគិតថា យើងធ្វើបានយ៉ាងល្អហើយ”។ លោកក៏បានលើកឡើងអំពីការព្យាករកន្លងមករបស់ក្រុមអ្នកជំនាញដែលថា តួលេខនៃអ្នកស្លាប់ដោយសារវីរុសCOVID-19 នៅសហរដ្ឋអាមេរិក អាចមានយ៉ាងតិច100,000នាក់។ លោក Trump ថ្លែងថា “យើងសង្ឃឹមថា តួលេខជាក់ស្ដែងនឹងទាបជាងនេះ”។

លោក Trump បានប្រកាសថា “ការរឹតបន្តឹងការដើរហើរ” អាចអូសបន្លាយដល់ក្រោយថ្ងៃទី1ឧសភា។ សភាជាន់ទាបអាមេរិកាំង កាលពីម្សិលមិញក៏បានអនុម័តយល់ព្រមទម្លាក់កញ្ចប់ថវិកាជំនួយសេដ្ឋកិច្ច ដែលមានទំហំទឹកប្រាក់ 480ពាន់លានដុល្លារដើម្បីជួយដល់អាជីវកម្មខ្នាតតូច មន្ទីរពេទ្យ និងការធ្វើតេស្តរកមេរោគ COVID-19៕

ប្រភព៖ សារព័ត៌មានបរទេស

April 25, 2020

មន្ទីរបញ្ចកោណព្រមានអំពីហានិភ័យនៃការប្រើប្រាស់ COVID-19 ជាអាវុធជីវសាស្ត្រ

មន្ទីរបញ្ចកោណ និងក្រុមអ្នកស៊ើបការណ៍សម្ងាត់អាមេរិកាំងកាន់តែមានការព្រួយបារម្ភអំពីហានិភ័យដែល COVID-19 ត្រូវបានគេយកមកប្រើជាអាវុធជីវសាស្ត្រ ដែលអាចក្លាយជាការគំរាមកំហែងយ៉ាងធ្ងន់ធ្ងរដល់ពិភពលោក។

Politico ដកស្រង់សម្ដីរបស់ក្រុមមន្ត្រីស៊ើបការណ៍សម្ងាត់ និងការពារជាតិអាមេរិកាំង បានឱ្យដឹងថា មន្ទីរបញ្ចកោណ(The Pentagon) និងក្រុមអ្នកស៊ើបការណ៍សម្ងាត់អាមេរិកាំង កាន់តែយកចិត្តទុកដាក់ទៅលើការស៊ើបអង្កេតលើសម្មតិកម្មមួយដែលយល់ថា សត្រូវអាចនឹងប្រើប្រាស់វីរុសកូរ៉ូណាប្រភេទថ្មី ជាអាវុធជីវសាស្ត្រ។ ប្រការនេះបានបង្ហាញអំពីការយល់ដឹងកាន់តែកើនឡើងពីសំណាក់ក្រុមអ្នកការពារជាតិអាមេរិកាំង អំពីវីរុសCOVID-19 ក៏ដូចជាហានិភ័យដែលវីរុសនេះនឹងបង្កឡើង។

ក៏ប៉ុន្តែ ក្រុមមន្ត្រីសហរដ្ឋអាមេរិកសង្កត់ធ្ងន់ថា ប្រការខាងលើនេះមិនមែនមានន័យថា ពួកគេជឿថា COVID-19 ត្រូវបានបង្កើតឡើងដោយមានគោលដៅធ្វើជាអាវុធនោះទេ។ ក្រុមអ្នកស៊ើបការណ៍នៅតែបន្តស៊ើបអង្កេតរកប្រភពរបស់វីរុសនេះ ប៉ុន្តែ បច្ចុប្បន្នមិនទាន់មានភ័ស្ដុតាងបែបវិទ្យាសាស្ត្រ ឬព័ត៌មានសម្ងាត់ណាមួយដែលអាចបង្ហាញច្បាស់ថា សម្មតិកម្មដែលថា វីរុសនេះបានរួចចេញពីបន្ទប់ពិសោធន៍នៅប្រទេសចិននៅឡើយ។

ទន្ទឹមនឹងនេះ ក្រុមអ្នកស៊ើបការណ៍សម្ងាត់ក៏បានចាប់ផ្ដើមស្រាវជ្រាវទៅលើគោលដៅនានាដែលមានលទ្ធភាពក្លាយជា”កត្តាអរិភាព” ក្នុងការធ្វើអាវុធូបនីយកម្មលើវីរុសCOVID-19 ពិសេសគឺសំដៅលើគោលដៅធំៗ។ ប្រភពព័ត៌មានចំនួន3 ដែលគួរឱ្យទុកចិត្ត បានឱ្យដឹងថា ក្រសួងការពារជាតិអាមេរិកាំង ថ្មីៗនេះបានបង្វែរទិសដៅ ដោយផ្ដោតទៅលើការតាមដានលទ្ធភាពខាងលើនេះយ៉ាងហ្មត់ចត់។

អ្នកនាំពាក្យរបស់មន្ទីរបញ្ចកោណ Mike Andrew បានថ្លែងថា កម្មវិធីការពារគីមីសាស្ត្រ និងជីវសាស្ត្ររបស់មន្ទីរបញ្ចកោណ ដែលមានភារកិច្ចអនុវត្តយុទ្ធសាស្ត្ររបស់ក្រសួងការពារជាតិសហរដ្ឋអាមេរិកទាក់ទិននឹងការទប់ទល់នឹងអាវុធប្រល័យលោក នឹងបន្តគាំទ្រដល់បណ្ដាស្ថាប័ន ជាមួយនឹងវិធានការទប់ស្កាត់COVID-19 ដូចជាការធ្វើតេស្តរកមេរោគ ការអភិវឌ្ឍវ៉ាក់សាំង ការផ្គត់ផ្គង់ម៉ាស់ និងម៉ាស៊ីនស្ទង់កម្ដៅ។ល។

យ៉ាងណាក៏ដោយ លោក Andrews បានបដិសេធមិនឆ្លើយតបនឹងសំណួរដែលសួរថា តើក្រសួងការពារជាតិកំពុងតែស៊ើបអង្កេតទៅលើលទ្ធភាពដែលថាកម្លាំងអរិភាពណាមួយប្រើប្រាស់COVID-19 ធ្វើជាអាវុធដែរ ឬយ៉ាងណានោះទេ។

មន្ត្រីក្រសួងការពារជាតិម្នាក់របស់សហរដ្ឋអាមេរិកថ្លែងថា ហានិភ័យដែលCOVID-19 អាចក្លាយជាអាវុធ “ហាក់នៅជាកត្តាដែលបង្កការព្រួយបារម្ភកម្រិតទាបនៅឡើយ” ខណៈដែលសំណួរនានាដែលត្រូវបានយកចិត្តទុកដាក់នាបច្ចុប្បន្ន នៅតែលើកឡើងជុំវិញប្រភពរបស់វីរុស ក៏ដូចជាព័ត៌មានដែលរដ្ឋាភិបាលចិនបានដឹងនៅក្នុងដំណាក់កាលដំបូងៗនៃរោគរាតត្បាតនេះ។

ក៏ប៉ុន្តែ ក្រុមអតីតមន្ត្រីជាន់ខ្ពស់របស់មន្ទីរបញ្ចកោណបានឱ្យដឹងថា ការខិតខំប្រឹងប្រែងរួម នៅតែបន្តធ្វើឡើងដើម្បីពិនិត្យរាល់ការគំរាមកំហែង រួមមានទាំងលទ្ធភាពនៃការប្រើប្រាស់ COVID-19 ជាអាវុធជីវសាស្ត្រផងដែរ។

“អាវុធជីវសាស្ត្រមិនដូចទៅនឹងអាវុធប្រភេទគ្រាប់រំសេវនោះទេ។ វាគឺជាមេរោគ។ បើគិតអំពីលក្ខណៈធម្មជាតិ វីរុសបច្ចុប្បន្ន អាចត្រូវបានក្រុមដែលមានបច្ចេកវិទ្យាមិនសូវទំនើបប្រើប្រាស់ជាអាវុធជីវសាស្ត្រ។ សម្រាប់ប្រទេសមួយដែលមានកម្មវិធីអាវុធជីវសាស្ត្រទំនើបៗ វីរុសនេះអាចត្រូវបានបន្ថែមលក្ខណៈពិសេសកម្រិតខ្ពស់ជាងនេះ” នេះបើតាម Andy Weber ដែលជាជំនួយការរបស់រដ្ឋមន្ត្រីការពារជាតិ ទទួលបន្ទុកគ្រប់គ្រងកម្មវិធីនុយក្លេអែរ គីមីសាស្ត្រ និងជីវសាស្ត្រ ក្នុងសម័យអតីតប្រធានាធិបតី Barack Obama។

ការគំរាមកំហែងលាក់មុខ

អតីតមន្ត្រីម្នាក់របស់រដ្ឋាភិបាលសហរដ្ឋអាមេរិកបានឱ្យដឹងថា បើសិនជាចង់ប្រែក្លាយ COVID-19 ឱ្យទៅជាអាវុធជីវសាស្ត សត្រូវមិនចាំបាច់ធ្វើដោយផ្ទាល់ដៃនោះទេ ព្រោះថាវាអាចបន្សល់ដាន។ ជំនួសមកវិញ សត្រូវអាចធ្វើឱ្យអ្នកណាម្នាក់ឆ្លងវីរុសCOVID-19 ទៅតាមលក្ខណៈធម្មជាតិ ហើយក្រោយមក សត្រូវនឹងនាំមនុស្សនេះទៅកាន់តំបន់ដែលសត្រូវគិតថា គោលដៅរបស់ខ្លួនតែងតែមកកាន់ទីនោះ។

ការឆ្លងរាលដាលយ៉ាងឆាប់រហ័សរបស់ COVID-19 រវាងសមាជិកនៃក្រុមនាវិកនៅលើនាវាផ្ទុកយន្តហោះចម្បាំងអាមេរិកាំង USS Theodore Roosevelt បានបង្ហាញអំពីគ្រោះថ្នាក់ដ៏ធំ ដោយវាបានធ្វើឱ្យនាវាផ្ទុកយន្តហោះយុទ្ធសាស្ត្រដែលដំណើរការដោយថាមពលនុយក្លេអែររបស់សហរដ្ឋអាមេរិក ត្រូវគាំងដំណើររាប់សប្ដាហ៍។ COVID-19 ក៏បានធ្វើឱ្យមេបញ្ជាការនាវានេះត្រូវឆ្លងវីរុស និងត្រូវដកហូតតំណែង ចំណែករដ្ឋមន្រ្តីស្តីទីនៃកងទ័ពជើងទឹកសហរដ្ឋអាមេរិក ក៏ត្រូវបង្ខំចិត្តលាលែងពីតំណែង។

CNN កាលពីថ្ងៃទី22មេសា បានដកស្រង់សម្ដីមន្ត្រីជាន់ខ្ពស់កងទ័ពជើងទឹកអាមេរិកាំងម្នាក់ ឱ្យដឹងថា សហរដ្ឋអាមេរិក បច្ចុប្បន្នមាននាវាចម្បាំង26គ្រឿងហើយដែលកំពុងមានបុគ្គលិកឆ្លងវីរុសCOVID-19។ ក្រៅពីនេះ សហរដ្ឋអាមេរិកក៏មាននាវាចម្បាំងចំនួន14គ្រឿងផ្សេងទៀត ធ្លាប់មានបុគ្គលិកឆ្លងវីរុសនេះដែរ ប៉ុន្តែក្រុមនាវិកទាំងនោះបានជាសះស្បើយអស់ហើយមកដល់បច្ចុប្បន្ន។

គិតត្រឹមថ្ងៃទី26មីនា សហរដ្ឋអាមេរិកមានទាហានប្រមាណជា3,578នាក់បានឆ្លងវីរុសCOVID-19 ក្នុងនោះមាន2នាក់បានបាត់បង់ជីវិត។ ក្នុងចំណោមទាហានដែលបានឆ្លងវីរុសកូរ៉ូណា គឺមានជិត800នាក់ជាទាហានជើងទឹករបស់នាវាផ្ទុកយន្តហោះ USS Theodore Roosevelt។

ក្រុមមេដឹកនាំជាន់ខ្ពស់របស់កងទ័ពជើងទឹកអាមេរិកាំង មកដល់បច្ចុប្បន្ន នៅតែមិនទាន់ដឹងថា ការឆ្លងរាលដាលវីរុសនៅលើនាវា USS Theodore Roosevelt នេះ មានប្រភពពីណានៅឡើយ។ ក៏ប៉ុន្តែ ប្រការនេះបានបង្ហាញយ៉ាងច្បាស់ថា កងទ័ពត្រូវទទួលរងការខូចខាតកម្រិតណា នៅពេលត្រូវបានវាយប្រហារដោយអាវុធជីវសាស្ត្រ។

យោងតាម Reuters សហរដ្ឋអាមេរិកនាបច្ចុប្បន្ន នៅតែជាសម្បុកមេរោគ COVID-19 ធំជាងគេបង្អស់ក្នុងពិភពលោក ដោយមានអ្នកជំងឺជិត900,000នាក់ ក្នុងនោះមានអ្នកជំងឺជាង50,000នាក់បានបាត់បង់ជីវិត៕

ប្រភព៖ សារព័ត៌មានបរទេស

April 24, 2020

តារាវិទូថា ប្រព័ន្ធព្រះអាទិត្យប្រហែលជាបាន “ប្លន់” អាចម៍ផ្កាយចំនួន19 ពីប្រព័ន្ធផ្កាយដទៃ

វត្ថុអវកាសដែលមានគន្លងគោចរខុសគេ ត្រូវបានអ្នកវិទ្យាសាស្ត្រយល់ថា ដោយសារប្រព័ន្ធព្រះអាទិត្យរបស់មនុស្ស ស្រូបទាញពីប្រព័ន្ធព្រះអាទិត្យ(ផ្កាយ) ដទៃ ដែលនៅក្បែរខាង តាំងតែពីរាប់ពាន់លានឆ្នាំមុន។

ក្រុមអ្នកវិទ្យាសាស្ត្របានធ្វើការសិក្សាទៅលើវត្ថុអវកាសចំនួន19 ដែលស្ថិតនៅក្នុងទិសដែលឆៀងទៅនឹងផ្ទៃស្របនៃគន្លងគោចររបស់ប្រព័ន្ធព្រះអាទិត្យទាំងមូល។ នេះបើតាមការចេញផ្សាយកាលពីថ្ងៃទី23មេសា របស់សារព័ត៌មាន IFL។ ក្នុងនោះ វត្ថុអវកាសចំនួន17 គឺស្ថិតក្នុងក្រុម Centaur ដែលមានគន្លងគោចរចន្លោះពិភពព្រហស្បតិ៍ និងពិភពសៅរ៍។ ចំណែកសមាជិក(វត្ថុអវកាស)ចំនួន2ផ្សេងទៀត ធ្វើដំណើរក្រៅគន្លងគោចររបស់ពិភពណិបទូន។

ក្រុមអ្នកវិទ្យាសាស្ត្របានរកឃើញ គន្លងគោចរខុសគេរបស់វត្ថុអវកាសទាំង19នេះ នៅពេលធ្វើការវិភាគលើកុំព្យូទ័រដើម្បីស្វែងយល់អំពីដំណាក់កាលដំបូងនៃការកកើតប្រព័ន្ធព្រះអាទិត្យ។ ប្រការនេះបានបង្ហាញថា វត្ថុអវកាសចំនួន19ខាងលើ មិនមែនកកើតឡើងជាមួយនឹងពិភព កូនភព ផ្កាយដុះកន្ទុយ និងអាចម៍ផ្កាយជាដើមនៅក្នុងប្រព័ន្ធព្រះអាទិត្យរបស់មនុស្សនោះទេ។ ផ្ទុយទៅវិញ ពួកវាប្រហែលជាត្រូវបានស្រូបទាញចូលប្រព័ន្ធព្រះអាទិត្យកាលពីជាង4ពាន់លានឆ្នាំមុន ដែលកាលណោះប្រព័ន្ធព្រះអាទិត្យកំពុងកកើតនៅក្នុងពពកធូលីអវកាស។ ដើម្បីប្រការខាងលើអាចកើតឡើងបាន ព្រះអាទិត្យរបស់មនុស្សត្រូវតែស្ថិតនៅក្បែរៗប្រព័ន្ធផ្កាយដទៃ។

បណ្ឌិត Fathi Namouni មកពីស្ថានីយអង្កេតអវកាស Cote d’Azur បានឱ្យដឹងថា “កាលពីដើមឡើយ ដោយសារនៅមិនឆ្ងាយពីគ្នា ដូច្នេះផ្កាយទាំងឡាយតែងតែទទួលរងទំនាញពីគ្នាទៅវិញទៅមកខ្លាំងជាងបច្ចុប្បន្នឆ្ងាយណាស់ ដែលកាលណោះ កូនភព(ឬអាចម៍ផ្កាយ) អាចត្រូវបានប្រព័ន្ធផ្កាយមួយនេះ ទាញយកពីប្រព័ន្ធផ្កាយមួយផ្សេងទៀត”។

បើសិនជាវត្ថុអវកាសទាំង19នេះ មានប្រភពពីប្រព័ន្ធផ្កាយផ្សេង នោះវានឹងមានតម្លៃខ្លាំងណាស់សម្រាប់វិទ្យាសាស្ត្រ។
Maria Helena Morais ដែលជាសមាជិកនៃក្រុមស្រាវជ្រាវខាងលើ និងជាតារាវិទូមកពីសាកលវិទ្យាល័យនៃរដ្ឋ Sao Paulo ប្រទេសប្រេស៊ីល ថ្លែងថា “ការរកឃើញក្រុមវត្ថុអវកាសអន្តរតារា គឺជាជំហានដ៏សំខាន់ដើម្បីស្វែងយល់អំពីចំណុចដូចគ្នា និងខុសគ្នាទាក់ទិននឹងរូបសាស្ត្រ និងគីមីសាស្ត្ររវាងអាចម៍ផ្កាយរបស់ប្រព័ន្ធព្រះអាទិត្យ និងអាចម៍ផ្កាយរបស់ប្រព័ន្ធផ្កាយដទៃ”។

Morais បន្ថែមថា “ក្រុមវត្ថុអវកាសនេះ នាំមកនូវព័ត៌មានអំពីកញ្ចុំផ្កាយដែលជាកន្លែងកកើតរបស់ព្រះអាទិត្យ ដែលនេះនឹងអនុញ្ញាតឱ្យក្រុមតារាវិទូយល់បន្ថែមអំពីដំណើរការនៃការ “ប្លន់” យកអាចម៍ផ្កាយ និងតួនាទីរបស់វត្ថុអវកាសអន្តរតារា នៅក្នុងការធ្វើពិពិធកម្ម និងកំណត់រូបរាងនៃវិវត្តនាការរបស់ប្រព័ន្ធព្រះអាទិត្យ”៕

ប្រភព៖ សារព័ត៌មានបរទេស

April 24, 2020

ក្ដីសង្ឃឹម រលាយអស់!! លទ្ធផលនៃការសាកល្បងថ្នាំ “Remdesivir” ព្យាបាលកូវីដ-19 បរាជ័យក្នុងការជួយអ្នកជំងឺធ្ងន់ធ្ងរនៅចិន

ថ្នាំសាកល្បងប្រឆាំងវីរុសឈ្មោះ“Remdesivir” របស់ក្រុមហ៊ុន Gilead Sciences Inc បានបរាជ័យក្នុងការជួយសង្គ្រោះអ្នកជំងឺកូវីដ-19 ដែលមានអាការធ្ងន់ធ្ងរ ក្នុងអំឡុងពេលសាកល្បងខាងគ្លីនិក(ព្យាបាល)នៅក្នុងប្រទេសចិន តែយ៉ាងណាក៏ដោយ ក្រុមហ៊ុនផលិតថ្នាំពេទ្យមួយនេះ បានប្រាប់ថា លទ្ធផលនៃការសិក្សាស្រាវជ្រាវទាំងនោះ មិនទាន់ជាបទសរុបទេ ដោយសារតែវា ចប់មុនកំណត់។ នេះបើតាមសេចក្ដីរាយការណ៍របស់ទីភ្នាក់ងារព័ត៌មានរ៉យទ័រ។

ភាគហ៊ុនរបស់ Gilead បានធ្លាក់ចុះច្រើនជាង4% តាមក្រោយព័ត៌មានដែលលេចធ្លាយចេញមកដោយចៃដន្យ ដែលធ្វើឡើងដោយសារព័ត៌មាន Financial Times ដែលបានរាយការណ៍មុនគេ ខណៈដែលរបាយការណ៍នេះធ្វើឡើងមិនប៉ុន្មានថ្ងៃ ក្រោយពេលមានលេចឮដំណឹងថា អ្នកជំងឺដែលឆ្លងមេរោគកូវីដ-19 ដែលបានទទួលថ្នាំ“Remdesivir” ក្នុងការសាកល្បងខាងការព្យាបាលរបស់មន្ទីរពេទ្យ នៃមហាវិទ្យាល័យឈិកាហ្គោ សហរដ្ឋអាមេរិក បានជាសះស្បើយយ៉ាងឆាប់រហ័ស។

ចំណែកឯទីភ្នាក់ងារព័ត៌មានSTAT បានរាយការណ៍ កាលពីសប្ដាហ៍មុន ដោយបានដកស្រង់សម្ដីអ្នកដឹកនាំការសាកល្បងដែលបានបញ្ជាក់ថា អ្នកជំងឺដែលបានចូលរួមក្នុងការសាកល្បងខាងគ្លិនិកថ្នាំមួយនេះ សុទ្ធតែមានអាការគ្រុនក្ដៅខ្លួនខ្លាំង និងមានអាការខាងប្រព័ន្ធដង្ហើមធ្ងន់ធ្ងរ អាចចាកចេញពីមន្ទីរពេទ្យបានក្នុងរយៈពេលមិនដល់1សប្ដាហ៍ផង។

យ៉ាងណាក៏ដោយ ខាងមហាវិទ្យាល័យ បានដាស់តឿនថា វាហាក់ដូចជាលឿនពេកក្នុងប្រញាប់សរុបរឿងនេះ ដោយសារតែការសាកល្បងនោះ មិនបានរួមជាមួយការ “សាកល្បងបែបជាក្រុមដែលមានការគ្រប់គ្រង” នៅឡើយ ដូច្នេះទើបវាជារឿងពិបាកក្នុងការចង្អុលបង្ហាញច្បាស់ៗថា ការពិតទៅថ្នាំនេះ នឹងជួយឱ្យអ្នកជំងឺឆាប់ធូរស្រាលបានល្អឡើង ឬអត់នោះទេ?។ ទាំងអស់នេះ ក្នុងការសាកល្បងបែបគ្រប់គ្រង អ្នកជំងឺខ្លះ នឹងមិនបានទទួលថ្នាំដើម្បីបើកផ្លូវឱ្យក្រុមគណៈគ្រូពេទ្យរកបទសរុបថា ការពិតទៅ តើថ្នាំនេះហុចផលប៉ះពាល់ដល់អាការឈឺថ្កាត់របស់អ្នកជំងឺដែរឬទេ?

ថ្នាំ “Remdesivir” របស់ Gilead បានទទួលការចាប់អារម្មណ៍យ៉ាងខ្លាំង ដោយសារតែបច្ចុប្បន្នមិនទាន់មានថ្នាំ ឬវិធីការព្យាបាលណាមួយដែលបានទទួលការអនុម័តនៅឡើយ ដូចគ្នានឹងវ៉ាក់សាំងការពារមេរោគកូវីដ-19ដែរ ខណៈដែលបណ្ដាក្រុមគណៈគ្រូពេទ្យទូទាំងពិភពលោក កំពុងរិះរកគ្រប់បែបយ៉ាង តាមដែលអាចធ្វើបាន ដើម្បីបង្វែរដំណើរផ្លូវរបស់ជំងឺឆ្លងដ៏ធ្ងន់ធ្ងរនេះដែលអាចធ្វើទុក្ខសួតរបស់អ្នកឆ្លងមេរោគ។

សេចក្ដីព្រាងឯកសារ ដែលអង្គការសុខភាពពិភពលោកធ្វើឱ្យបែកធ្លាយចេញមកដោយចៃដន្យ បានបញ្ជាក់ថា ក្នុងការសាកល្បងនៅប្រទេសចិន ដែលជាការប្រើថ្នាំចាក់ចូលទៅតាមសរសៃឈាម មិនទទួលបានជោគជ័យក្នុងការជួយអ្នកជំងឺឱ្យមានអាការល្អប្រសើរឡើង ឬបន្ថយមេរោគក្នុងក្រសែឈាមនោះទេ តែយ៉ាងណាក៏ដោយ សេចក្ដីលម្អិតផ្សេងៗមិនទាន់មានច្រើននៅឡើយ និងបានបង្ហាញថា ចំណុចមិនសមប្រកបផ្សេងៗក្នុងការវាយតម្លៃព័ត៌មាន មិនទាន់ល្អពេញលេញនៅឡើយ។

ក្នុងសេចក្ដីព្រាងឯកសារនោះបានបញ្ជាក់ថា ការសាកល្បងខាងគ្លីនិក(ព្យាបាល)ពាក់ព័ន្ធនឹងអ្នកជំងឺ 237នាក់ ក្នុងនោះមាន 158នាក់បានទទួលថ្នាំ “Remdesivir” ចំណែក 79នាក់ទៀតបានទទួលថ្នាំបញ្ឆោត ដែលធ្វើឱ្យរកឃើញថា អត្រាការស្លាប់ក្នុងអ្នកជំងឺដែលបានទទួលថ្នាំ “Remdesivir” ស្ថិតក្នុងអត្រា 13.9% ប្រហាក់ប្រហែលនឹងអត្រាការស្លាប់ក្នុងក្រុមគ្រប់គ្រង(អ្នកទទួលថ្នាំបញ្ឆោត) ដែលស្ថិតក្នុងអត្រា 12.8%។

Gilead បានថ្លែងថា “លទ្ធផលការសិក្សាស្រាវជ្រាវ នៅមិនទាន់ទទួលបានចំណុចសរុបដែលច្បាស់ពិតប្រាកដនៅឡើយទេ ទោះជាសញ្ញានៅក្នុងព័ត៌មានបានបង្ហាញពីសក្ដានុពលដែលជាប្រយោជន៍របស់ “Remdesivir” ជាពិសេសជាមួយអ្នកជំងឺដែលបានទទួលការព្យាបាលតាំងពីដំបូងៗក្ដី”

យ៉ាងណាក៏ដោយ ពួកអ្នកវិភាគដទៃទៀត ទទួលបានចំណុចសរុបមួយចំនួន ពីការសាកល្បងទាំងនោះហើយ។ លោក ស្ទីហ្វេន ស៊ីដហៅស៍ អ្នកវិភាគពីស្ថាប័ន ចាដរេយ៍ម៉ន់ដ៍ ចេមស៍ និយាយថា “ឈុតព័ត៌មានដែលគ្រប់គ្រងដោយចិន នឹងបង្កឱ្យកើតមានទស្សនៈនៃការពិត ដែលមានចំពោះ “Remdesivir” នោះគឺ វាមើលទៅហាក់ដូចជាប្រើមិនបានលទ្ធផលល្អទេ ជាមួយអ្នកជំងឺដែលមានអាការធ្ងន់ធ្ងរ”៕

ប្រភព៖ សារព័ត៌មានបរទេស

April 24, 2020

Trump ផ្ដល់អនុសាសន៍៖ ចាក់ពន្លឺ ឬថ្នាំសម្អាតមេរោគទៅក្នុងរាងកាយ ដើម្បីព្យាបាលCOVID-19

ការចាក់ថ្នាំសម្អាតមេរោគទៅក្នុងរាងកាយអ្នកជំងឺ អាចសម្លាប់COVID-19បាន ប៉ុន្តែក្រុមអ្នកជំនាញផ្នែកសុខាភិបាលយល់ថា គំនិតនេះ “គ្រោះថ្នាក់ណាស់”។

“ខ្ញុំឃើញថា សារធាតុរម្ងាប់មេរោគ អាចសម្លាប់វីរុសដោយប្រើពេលត្រឹមតែ1នាទី គឺ1នាទីតែប៉ុណ្ណោះ។ ហើយថា តើមានវិធីណាដែលយើងអាចធ្វើបែបនេះបាន ដោយការចាក់បញ្ចូលវាទៅក្នុងរាងកាយ ឬក៏មានវិធីណាមួយដែលអាចសម្លាប់វាបានដែរទេ?” ប្រធានាធិបតី Donald Trump ថ្លែងបែបនេះនៅក្នុងសន្និសីទសារព័ត៌មានមួយនៅសេតវិមានកាលពីថ្ងៃទី23មេសា។ ប៉ុន្តែ លោក Trump មិនបានលើកឡើងអំពីឈ្មោះថ្នាំណាមួយនោះទេ។

លោក Trump យល់ថា COVID-19 វាយលុកចូលទៅក្នុងសួតដោយចំនួនដ៏ច្រើន ដូច្នេះលោកមានការយកចិត្តទុកដាក់ទៅលើគំនិតមួយ នោះគឺ ការប្រើប្រាស់សារធាតុសម្អាតមេរោគ។ លោក Trump ថ្លែងថា “យើងទាំងអស់គ្នានឹងត្រូវពឹងលើក្រុមគ្រូពេទ្យ ប៉ុន្តែប្រការនេះចំពោះខ្ញុំ គឺពិតជាគួរឱ្យចាប់អារម្មណ៍”។

មន្ត្រីសុខាភិបាលជាន់ខ្ពស់ម្នាក់បានឱ្យដឹងបន្ទាប់ពីប្រសាសន៍របស់លោក Trump ថា បន្ទប់ពិសោធន៍នានារបស់សហរដ្ឋអាមេរិក កំពុងតែពិនិត្យ និងអភិវឌ្ឍវិធីសាស្ត្រព្យាបាល COVID-19 ដោយប្រើសារធាតុសម្អាតមេរោគនេះ។

យោបល់របស់ប្រធានាធិបតីសហរដ្ឋអាមេរិកនេះ ត្រូវបានលើកឡើងបន្ទាប់ពី Bill Bryan ដែលជាមន្ត្រីក្រសួងសន្តិសុខផ្ទៃក្នុង បានរាយការណ៍អំពីការពិសោធដែលក្រុមនេះបានធ្វើឡើង ដែលលទ្ធផលបង្ហាញថា COVID-19 មិនអាចរស់បានយូរនៅក្នងបរិយាកាសក្ដៅនិងសើមនោះឡើយ។ ការដែលលោក Bryan ថ្លែងថា “មេរោគនេះងាប់យ៉ាងលឿននៅក្រោមពន្លឺថ្ងៃ” ធ្វើឱ្យលោក Trump សួរខ្លួនឯងថា តើគេអាចនាំយកពន្លឺ “ចាក់បញ្ចូលទៅក្នុងរាងកាយ” ដើម្បីសម្លាប់វីរុសនេះដែរ ឬអត់?

ឆ្លើយតបបន្ថែមទៅនឹងសំណួររបស់អ្នកយកព័ត៌មាន លោក Bryan និយាយថា បើមានតែកម្ដៅ និងសំណើម នោះនឹងមិនអាចសម្លាប់ COVID-19 បានទេ បើសិនជាអ្នករាល់គ្នាមិនបន្តគោរពវិធានការបម្រាមគោចរ និងវិធានការផ្សេងៗ។

ក្រុមអ្នកជំនាញខាងសុខាភិបាលនៅសហរដ្ឋអាមេរិក ក្នុងនោះមាន Vin Gupta ដែលជាវេជ្ជបណ្ឌិតឯកទេសខាងជំងឺសួត អ្នកជំនាញផ្នែកខាងគោលនយោបាយសុខាភិបាលសកល បានច្រានចោល “អនុសាសន៍មិនសមស្រប” របស់ប្រធានាធិបតីអាមេរិកាំង។ Gupta បានថ្លែងថា “គំនិតស្ដីអំពីការចាក់បញ្ចូល ឬលេបផលិតផលអ្វីមួយទៅក្នុងរាងកាយដើម្បីសម្អាតមេរោគ គឺជារឿងដែលមិនអាចទៅរួច និងប្រកបដោយគ្រោះថ្នាក់។ នោះគឺជាវិធីដែលត្រូវបានគេប្រើប្រាស់ច្រើន នៅពេលពួកគេចង់សម្លាប់ខ្លួន”។

លោក Trump កន្លងមកធ្លាប់បានសរសើរចំពោះវិធីព្យាបាលអ្នកជំងឺCOVID-19 ដែលមិនទាន់ត្រូវបានត្រួតពិនិត្យ នៅក្នុងសន្និសីទសារព័ត៌មានស្ដីអំពី COVID-19។ លោកធ្លាប់គាំទ្រឱ្យប្រើថ្នាំព្យាបាលជំងឺគ្រុនចាញ់ hydroxychloroquine ដើម្បីព្យាបាល COVID-19 ហើយលោក Trump ថែមទាំងបានសរសើរថា នេះអាចជា “អំណោយរបស់ព្រះ” ទៀតផង។ ក៏ប៉ុន្តែ ក្រុមមន្ត្រីសុខាភិបាលបានព្រមានអំពីការប្រើប្រាស់ថ្នាំនេះសម្រាប់ព្យាបាលCOVID-19។

បុរសម្នាក់រស់នៅក្នុងរដ្ឋ Arizona នៃសហរដ្ឋអាមេរិក កាលពីខែមីនាបានបាត់បង់ជីវិត បន្ទាប់ពីលេបថ្នាំ chloroquine phosphate ព្រោះតែជឿថា វាជួយឱ្យគាត់ទប់ស្កាត់ COVID-19។ ប្រពន្ធរបស់បុរសដែលបានស្លាប់ខាងលើនេះ បានប្រាប់ NBC News ថា អ្នកស្រីធ្លាប់បានមើលកម្មវិធីទូរទស្សន៍មួយ ក្នុងនោះមានប្រធានាធិបតី Donald Trump បាននិយាយអំពីអត្ថប្រយោជន៍នានារបស់ថ្នាំ chloroquineនេះ។

ពិភពលោកទាំងមូល បច្ចុប្បន្នមានប្រទេស និងដែនដីចំនួន210ហើយ ដែលមានវត្តមានរបស់COVID-19។ វីរុសនេះ បានបណ្ដាលឱ្យមនុស្ស 2,725,920នាក់កើតរោគ ក្នុងនោះមាន191,061នាក់បានស្លាប់។ ចំណែកនៅសហរដ្ឋអាមេរិកវិញ មានអ្នកជំងឺសរុប 886,709នាក់ ក្នុងនោះមានអ្នកស្លាប់ 50,243នាក់ ខណៈអ្នកដែលបានជាសះស្បើយ មានចំនួន 85,922នាក់៕

ប្រភព៖ សារព័ត៌មានបរទេស

April 24, 2020

Category: អន្តរជាតិ