អន្តរជាតិ - La Reine Media

ជាង6លាននាក់ឆ្លងវីរុសCOVID-19 នៅទូទាំងពិភពលោក

ពិភពលោកបានរកឃើញអ្នកផ្ទុកវីរុសCOVID-19 ជាង6លាននាក់ និង366,000នាក់បាត់បង់ជីវិត មនុស្សជាច្រើនបានចាប់ផ្ដើមបើកដំណើរការសេដ្ឋកិច្ចឡើងវិញ។

ប្រទេសនិងដែនដីចំនួន213 ក្នុងពិភពលោក ត្រូវបានរាយការណ៍ថា បានរកឃើញអ្នកជំងឺCOVID-19 សរុប 6,026,091នាក់ និងអ្នកជំងឺ366,415នាក់បានស្លាប់ ក្នុងនោះមានអ្នកជំងឺថ្មី146,010នាក់ និងអ្នកស្លាប់ថ្មី5,720នាក់។ អ្នកជំងឺបានជាសះស្បើយ កើនដល់2,655,953នាក់។

សហរដ្ឋអាមេរិកនៅតែជាសម្បុកមេរោគ COVID-19 ធំជាងគេដដែល ដោយមានអ្នកជំងឺសរុប 1,793,263នាក់ និងអ្នកស្លាប់សរុប104,539នាក់។ ប្រទេសនេះបានរកឃើញអ្នកជំងឺថ្មី ដល់ទៅ 24,802នាក់ និងស្លាប់1,209នាក់ក្នុងអំឡុង24ម៉ោងចុងក្រោយនេះ។

ចំណែកប្រទេសប្រេស៊ីលវិញ មានអ្នកជំងឺសរុប 468,338នាក់ និងស្លាប់ 27,944នាក់ ខណៈដែលប្រទេសរុស្ស៊ី មានអ្នកជំងឺ COVID-19 សរុប 387,623នាក់ និងអ្នកស្លាប់4,374នាក់។

May 30, 2020

សហរដ្ឋអាមេរិកផ្ដាច់ទំនាក់ទំនងជាមួយ WHO

លោក Donald Trump បានប្រកាសថា អាមេរិកាំងផ្ដាច់ទំនាក់ទំនងជាមួយនឹង WHO ដោយសារតែវិធីដោះស្រាយបញ្ហា COVID-19 របស់អង្គការនេះ និងចោទថា ស្ថិតក្រោមបង្គាប់បញ្ជាទាំងស្រុងពីចិន។

“ដោយសារតែពួកគេមិនធ្វើការកែទម្រង់ដ៏ចាំបាច់បំផុតដែលយើងបានស្នើ ថ្ងៃនេះយើងនឹងផ្ដាច់ទំនាក់ទំនងជាមួយនឹងអង្គការសុខភាពពិភពលោក (WHO) និងបង្វែរខ្ទង់ថវិកាសម្រាប់អង្គការនេះ ទៅកាន់តម្រូវការបន្ទាន់ផ្នែកសុខាភិបាលសាធារណៈដទៃទៀតក្នុងពិភពលោក ដែលស័ក្ដិសមជាងនេះ” ប្រធានាធិបតីអាមេរិកាំង លោក Donald Trump ថ្លែងបែបនេះកាលពីថ្ងៃទី29ឧសភា នៅសេតវិមាន។

លោក Trump ថ្លែងនៅសេតវិមានកាលពីថ្ងៃទី29កន្លងទៅ

លោក Trump ថ្លែងថា មន្ត្រីចិន “មិនអើពើចំពោះកាតព្វកិច្ចក្នុងការរាយការណ៍” ទៅកាន់ WHO អំពី COVID-19 និងដាក់សម្ពាធលើអង្គការនេះដើម្បី “កុហកពិភពលោក”។ ប្រធានាធិបតីអាមេរិកាំងបន្ថែមថា “ចិនគ្រប់គ្រង WHO ទាំងស្រុង បើទោះបង់វិភាគទានត្រឹមតែ40លានដុល្លារ ខណៈដែលអាមេរិកាំងចំណាយដល់ទៅ450លានដុល្លារក្នុងមួយឆ្នាំ។ ពិភពលោក ត្រូវការចម្លើយរបស់ចិនអំពីវីរុស។ យើងត្រូវការតម្លាភាព”។

បច្ចុប្បន្ន មិនទាន់ដឹងថា ការសម្រេចរបស់លោក Trump នឹងចាប់ផ្ដើមមានសុពលភាពនៅពេលណានៅឡើយ។ ប៉ុន្តែ សេចក្ដីសម្រេចឆ្នាំ 1948 របស់សភាអាមេរិកាំងស្ដីអំពីសមាជិកភាពរបស់សហរដ្ឋអាមេរិកនៅ WHO បានសរសេរថា សហរដ្ឋអាមេរិក “មានសិទ្ធិដកខ្លួនចេញពីអង្គការសុខភាពពិភពលោក បើសិនជាបានប្រកាសជូនដំណឹងមុនមួយឆ្នាំ”។ សហរដ្ឋអាមេរិកគឺជាសមាជិកតែម្នាក់គត់ដែលអាចដកខ្លួនចេញពី WHO ដោយស្របច្បាប់។ នេះជាសិទ្ធិដែលប្រទេសនេះបានស្នើនៅពេលចូលជាសមាជិកនៃអង្គការនេះ។

លោក Tedros ប្រធានអង្គការសុខភាពពិភពលោក (WHO)

កាលពីថ្ងៃទី14មេសា លោក Trump បានប្រកាសផ្អាកការបង់វិភាគទានដល់ WHO ជាមួយនឹងមូលហេតុថា អង្គការនេះឃុបឃិតជាមួយចិនក្នុងការលាក់បាំងភាពធ្ងន់ធ្ងររបស់ COVID-1 នៅប្រទេសចិន បណ្ដាលឱ្យប្រទេសជាច្រើនខាតបង់ពេលវេលាដ៏សំខាន់ក្នុងការត្រៀមទប់ទល់នឹងវីរុស ព្រមទាំងបានពន្យារពេលក្នុងការសម្រេចចិត្តដាក់បម្រាមគោចរ។ ចិន និង WHO បានច្រានចោលការចោទប្រកាន់នេះ។

ថ្ងៃទី18ឧសភា លោក Trump បានចេញលិខិតប្រកាសរិះគន់ និងចោទប្រកាន់ WHO ថាជា “អាយ៉ង” របស់ចិន និងគំរាមឈប់ផ្ដល់ជំនួយដល់អង្គការនេះជារៀងរហូត លើកលែងតែ WHO អនុវត្ត “ការកែទម្រង់នានា” ក្នុងរយៈពេល30ថ្ងៃ។

May 30, 2020

“Mark Zuckerberg បាត់បង់ជីវិតក្នុងវ័យ36ឆ្នាំ” ជាចំណងជើងអត្ថបទដែលបានចុះផ្សាយដោយគេហទំព័រ The Shovel និង The Chaser

គេហទំព័រចំនួន2 បានបង្ហោះសារជាព័ត៌មានក្លែងក្លាយនៅលើទំព័រ Facebook ដើម្បីពិសោធទៅលើការប្រកាសរបស់បណ្ដាញសង្គមនេះ ដែល Mark Zuckerberg បានអះអាងថា “បណ្ដាញសង្គមមិនគួរធ្វើជាអាជ្ញាកណ្ដាលក្នុងការសម្រេចថាអ្វីជាការពិត និងអ្វីជាការក្លែងក្លាយ”។

សារព័ត៌មាន Business Insider បានឱ្យដឹងថា គេហទំព័រ2ដែលមានជំនាញខាងសរសេរខ្លឹមសាររិះគន់ និងមានមូលដ្ឋាននៅអូស្ត្រាលី គឺ The Shovel និង The Chaser បានបង្ហោះអត្ថបទចំនួន2ដែលមានខ្លឹមសារខុសពីការពិត ស្ដីអំពី CEO របស់ Facebook។ The Shovel បានសរសេរថា “Mark Zuckerberg-បានស្លាប់ក្នុងវ័យ36” ខណៈដែល The Chaser បានសរសេរចំណងជើងថា “Zuckerberg គឺជាអ្នករំលោភបំពានផ្លូវភេទកុមារ”។

គេហទំព័រទាំង2ខាងលើនេះ បានបញ្ជាក់ថា នេះគឺជាព័ត៌មានខុសពីការពិត ហើយពួកគេគ្រាន់តែចង់សាកល្បងទៅលើសមត្ថភាពនៃការទប់ស្កាត់ព័ត៌មានក្លែងក្លាយរបស់ Facebook ក៏ដូចជា “សាកល្បង” លើការប្រកាសមុននេះរបស់ម្ចាស់ Facebook ដោយចង់ដឹងថានឹងមានអ្វីកើតឡើង បន្ទាប់ពី Zuckerberg និយាយថា បណ្ដាញសង្គម មិនគួរធ្វើជាអាជ្ញាកណ្ដាលដើម្បីកាត់ក្ដីរកការពិតនោះទេ។

បច្ចុប្បន្ន អត្ថបទក្លែងក្លាយខាងលើ មិនទាន់ត្រូវបានលុបចោលនៅឡើយ។ ចំណែកតំណាងរបស់ Facebook ក៏មិនទាន់មានប្រតិកម្មអ្វីនោះដែរទាក់ទិននឹងរឿងនេះ៕

ប្រភព៖ សារព័ត៌មានបរទេស

May 29, 2020

ម្ចាស់ Facebook ថា “បណ្ដាញសង្គមមិនគួរធ្វើជាអាជ្ញាកណ្ដាល” ក្រោយលោក Trump ចុះហត្ថលេខាលើបទបញ្ជាទាក់ទងនឹងបណ្ដាញសង្គម

អគ្គនាយកប្រតិបត្តិរបស់ Facebook លោក Mark Zuckerberg យល់ថា បណ្ដាញសង្គមមិនគួរក្លាយជាកន្លែងពិនិត្យរកភាពពិតរបស់ព័ត៌មានដែលបង្ហោះដោយអ្នកនយោបាយនោះឡើយ។

“ខ្ញុំគិតថា Facebook ឬកម្មវិធីដែលប្រើអ៊ីនធើណិតទូទៅនានា មិនគួរធ្វើជាអាជ្ញាកណ្ដាលក្នុងការកាត់ក្ដីរកភាពពិតនោះទេ” Zuckerberg ប្រាប់ CNBC បន្តថា “សេចក្ដីថ្លែងការណ៍នយោបាយគឺជាផ្នែកមួយប្រកបដោយភាពរសើបនៅក្នុងសង្គមប្រជាធិបតេយ្យ ហើយអ្នករាល់គ្នាអាចដឹងបានអំពីអ្វីដែលអ្នកនយោបាយបានថ្លែង”។

មហាសេដ្ឋី Zuckerberg និយាយថា Facebook ប្រើប្រាស់ប្រព័ន្ធចម្រោះព័ត៌មានឯករាជ្យ តាមពេលវេលាជាក់ស្ដែង និងបូករួមជាមួយក្រុមត្រួតពិនិត្យខ្លឹមសារដែលធ្វើការជាប្រចាំ។ ប៉ុន្តែ CEO របស់ Facebook ថ្លែងថា កម្មវិធីត្រួតពិនិត្យមិនបានព្យាយាមវិភាគរកខុស-ត្រូវទៅលើសេចក្ដីថ្លែងការណ៍ ឬការប្រកាសដែលមានចរិតនយោបាយនោះទេ។ លោកក៏បានបញ្ជាក់ថា នេះគឺជាបញ្ហា “រសើប” ដែលបណ្ដាញសង្គមដូចជា Facebook ជាដើម ត្រូវតែ “មានការគោរព”។

កាលពីខែតុលាឆ្នាំមុន Facebook បានប្រកាសថា ខ្លួនអនុញ្ញាតឱ្យអ្នកនយោបាយឃោសនានៅលើបណ្ដាញសង្គមនេះបាន សូម្បីតែខ្លឹមសារឃោសនានោះជាព័ត៌មានមិនត្រឹមត្រូវ។ ក៏ប៉ុន្តែ ថ្មីៗនេះ Facebook ធ្លាប់បានលុបសារមួយទាក់ទិននឹងវីរុសCOVID-19 ដែលត្រូវបានបង្ហោះដោយប្រធានាធិបតីប្រេស៊ីល លោក Jair Bolsonaro កាលពីខែមីនា។ បញ្ហានេះត្រូវបានម្ចាស់ Facebook អះអាងថា “អ្វីក៏ដោយ ក៏តែងតែមានដែនកំណត់របស់វា សូម្បីតែអ្នកនយោបាយ។ គ្មាននរណាម្នាក់មានសិទ្ធិប្រើប្រាស់ Facebook ដើម្បីបង្កើតអំពើហិង្សា ឬបង្ហោះព័ត៌មានក្លែងក្លាយដែលបង្កផលប៉ះពាល់នោះទេ”។

Zuckerberg បច្ចុប្បន្នកំពុងតែរក្សាជំហរកណ្ដាល។ ជាងនេះ Zuckerberg ថែមទាំងបានព្យាយាមបែងចែកភាពខុសគ្នារវាង Facebook ជាមួយនឹង Twitter ទៀតផង បន្ទាប់ពី Twitter បានដាក់ tag និងតំណភ្ជាប់នៅលើសារចំនួន2ឃ្លារបស់ប្រធានាធិបតី Donald Trump។ សកម្មភាពរបស់ Twitter ត្រូវបានគេមើលឃើញថា ជាមូលហេតុធំមួយដែលនាំឱ្យលោក Trump ចុះហត្ថលេខាលើបទបញ្ជាមួយទាក់ទងនឹងបណ្ដាញសង្គម ដែលលោក Trump អះអាងថា គឺក្នុងបំណង “ការពារសិទ្ធិសេរីភាពក្នុងការបញ្ចេញមតិនៅចំពោះការគំរាមកំហែងមួយក្នុងចំណោមការគំរាមកំហែងដ៏ធ្ងន់ធ្ងរបំផុតក្នុងប្រវត្តិសាស្ត្រសហរដ្ឋអាមេរិក”។

សេតវិមានកំពុងតែពិចារណាបង្កើតក្រុមប្រឹក្សាមួយដើម្បីត្រួតពិនិត្យទៅលើការតវ៉ាទាក់ទិននឹងនិន្នាការប្រឆាំងនឹងមតិអភិរក្សនិយមនៅលើបណ្ដាញសង្គមនានា។

បើទោះជាយ៉ាងនេះក៏ដោយ យោងតាម USA Today រដ្ឋាភិបាលរបស់លោក Trump តែឯងនឹងមិនអាចកែប្រែ ឬបិទបណ្ដាញសង្គមបានឡើយ។ ព្រោះថា បញ្ហាខាងលើនេះ តម្រូវឱ្យមានការគាំទ្រពីរដ្ឋសភា ឬគណៈកម្មធិការទូរគមនាគមន៍ជាតិ FCC (Federal Communications Commission)៕

ប្រភព៖ សារព័ត៌មានបរទេស

May 29, 2020

រដ្ឋាភិបាលលោក Trump ពិចារណា “លុបចោលទិដ្ឋាការ” របស់និស្សិតចិនរាប់ពាន់នាក់ ដែលកំពុងសិក្សានៅលើទឹកដីសហរដ្ឋអាមេរិក

សហរដ្ឋអាមេរិកមានគម្រោងលុបចោលទិដ្ឋាការរបស់និសិស្ស និងក្រុមអ្នកសិក្សាស្រាវជ្រាវជនជាតិចិនរាប់ពាន់នាក់ដែលត្រូវបានយល់ថាមានជាប់ទាក់ទងជាមួយនឹងកងទ័ពនៅទីក្រុងប៉េកាំង។

ក្រុមមន្ត្រីរដ្ឋាភិបាលអាមេរិកដែលទទួលបន្ទុកលើគម្រោងខាងលើបានឱ្យដឹងថា អ្នកដែលត្រូវបានយកមកពិចារណាក្នុងការលុបចោលទិដ្ឋាការ មានជាប់ទាក់ទងផ្ទាល់ជាមួយនឹងសាលាដែលមានទំនាក់ទំនងនឹងកងទ័ពរំដោះប្រជាជនចិន (PLA)។ ប្រភពព័ត៌មានខាងលើក៏បានឱ្យដឹងថា ក្រុមមន្ត្រីរដ្ឋាភិបាលបានពិភាក្សាអំពីបញ្ហានេះអស់រយៈពេល3ឆ្នាំមកហើយ។

“យើងនឹងប្រកាសអំពីសកម្មភាពដែលត្រូវធ្វើចំពោះទីក្រុងប៉េកាំងនៅថ្ងៃស្អែក ហើយយើងមិនពេញចិត្តជាមួយនឹងប្រទេសចិននោះដែរ” លោក Trump ថ្លែងប្រាប់អ្នកសារព័ត៌មានកាលពីម្សិលមិញ។ លោក បន្តថា “យើងមិនសប្បាយនឹងអ្វីដែលបានកើតឡើង។ មនុស្សនៅក្នុងប្រទេសចំនួន186 នៅទូទាំងពិភពលោក កំពុងរងទុក្ខ”។

គម្រោងខាងលើរបស់សហរដ្ឋអាមេរិកអាចប៉ះពាល់ដល់និស្សិតចិនយ៉ាងតិច3,000នាក់ដែលកំពុងសិក្សានៅសហរដ្ឋអាមេរិក។ ក៏ប៉ុន្តែ នេះគ្រាន់តែជាតួលេខតិចបំផុតប៉ុណ្ណោះនៅក្នុងចំណោមនិស្សិតចិនជិត370,000នាក់នៅសហរដ្ឋអាមេរិក ដែលតួលេខនេះស្មើនឹង 33.7% នៃនិស្សិតបរទេសសរុបដែលកំពុងរៀននៅលើទឹកដីអាមេរិក។ ទំហំទឹកប្រាក់ដែលសហរដ្ឋអាមេរិកទទួលបានពីនិស្សិតទាំងនេះ មានប្រមាណជាជិត15ពាន់លានដុល្លារក្នុងឆ្នាំ2018។

ក្រុមនិសិស្សចិនជួបជុំគ្នាក្នុងពិធីបើកបវេសនកាលនៅសាកលវិទ្យាល័យ Columbia រដ្ឋ New York សហរដ្ឋអាមេរិក កាលពីថ្ងៃទី22ឧសភា ឆ្នាំ2019។

ក្រុមមេដឹកនាំសាលា និងអង្គការវិទ្យាសាស្ត្រអាមេរិកាំងដែលទទួលបានប្រយោជន៍ពីនិស្សិតចិន មានការព្រួយបារម្ភថា សកម្មភាពខាងលើនឹងអាចនាំឱ្យមានការសងសឹកពីទីក្រុងប៉េកាំង ដោយការកាត់បន្ថយសិស្សិត និងសាលារបស់ជនជាតិអាមេរិកាំងនៅលើទឹកដីចិន។

តំណាងរាស្ត្រ Cotton យល់ថា ក្រុមនិស្សិតចិនមកសហរដ្ឋអាមេរិកដើម្បីទទួលបានការបណ្ដុះបណ្ដាលពីប្រព័ន្ធអប់រំរបស់សហរដ្ឋអាមេរិក ហើយក្រោយមកពួកគេត្រលប់ទៅស្រុកចិនវិញដើម្បី “ប្រជែងជាមួយនឹងកិច្ចការរបស់យើង” និងលួចយកគំនិតច្នៃប្រឌិតរបស់សហរដ្ឋអាមេរិក។ លោក Cotton បន្តថា ដោយសារមូលហេតុនេះ ក្រុមនិស្សិតចិនគួរតែត្រូវបានហាមមិនឱ្យមកសហរដ្ឋអាមេរិកដើម្បីសិក្សាស្រាវជ្រាវផ្នែកវិទ្យាសាស្ត្រនៅសាលានានា លើទឹកដីសហរដ្ឋអាមេរិក៕

ប្រភព៖ សារព័ត៌មានបរទេស

May 29, 2020

ក្រុមហ៊ុន Twitter និយាយថា បទបញ្ជារបស់លោក Trump គឺជា “រឿងនយោបាយ”

តំណាងរបស់ក្រុមហ៊ុនបណ្ដាញសង្គម Twitter បានចោទប្រកាន់បទបញ្ជារឹតត្បិតបណ្ដាញសង្គមដែលទើបត្រូវបានប្រធានាធិបតីអាមេរិកចុះហត្ថលេខានេះថា ជាការ “ប្រឆាំងនឹងវឌ្ឍនភាព” និងជា “រឿងនយោបាយ”។

“បទបញ្ជានេះគឺជាសកម្មភាពប្រឆាំងនឹងវឌ្ឍនភាព និងជារឿងនយោបាយ ដែលផ្ដោតទៅលើច្បាប់ដ៏សំខាន់មួយ។ មាត្រាទី230 នៃច្បាប់ស្ដីអំពីទូរគមនាគមន៍ (Communications Decency Act) បានការពារការច្នៃប្រឌិត និងសិទ្ធិសេរីភាពនៃការបញ្ជេញមតិរបស់ពលរដ្ឋសហរដ្ឋអាមេរិក ហើយវាត្រូវបានកែលម្អដោយតម្លៃនៃប្រជាធិបតេយ្យ។ ការព្យាយាមជាឯកតោភាគីដើម្បីធ្វើឱ្យប៉ះពាល់ដល់ប្រការនេះនឹងគំរាមកំហែងអនាគតនៃសេរីភាពក្នុងការបញ្ចេញមតិតាមអ៊ីនធើណិត” នេះបើតាមអ្នកនាំពាក្យរបស់ក្រុមហ៊ុន Twitter។

សេចក្ដីប្រកាសខាងលើ ត្រូវបាន Twitter លើកឡើង បន្ទាប់ពីប្រធានាធិបតីអាមេរិកកាលពីថ្ងៃទី28ឧសភា បានចុះហត្ថលេខាលើបទបញ្ជាមួយដែលនឹងរឹតបន្តឹងក្រុមហ៊ុនបណ្ដាញសង្គម។

ប្រធានាធិបតី Donald Trump ថ្លែងកាលពីថ្ងៃទី28ឧសភា បន្ទាប់ពីបានចុះហត្ថលេខាលើបទបញ្ជាទាក់ទងនឹងបញ្ហាបណ្ដាញសង្គមនេះថា “ក្រុមហ៊ុនបណ្ដាញសង្គមភាគតិចកំពុងកាន់កាប់ព័ត៌មានទំនាក់ទំនងសាធារណៈនិងឯកជនភាគច្រើននៅសហរដ្ឋអាមេរិក។ ពួកគេធ្វើការត្រួតពិនិត្យ កាត់បន្ថយ កែប្រែ លាក់បាំង និងផ្លាស់ប្ដូររាល់ទំនាក់ទំនងគ្រប់រូបភាពរវាងពលរដ្ឋ និងសាធារណជន ដោយមិនត្រូវបានត្រួតពិនិត្យ។ យើងមិនអាចអនុញ្ញាតឱ្យបញ្ហានេះបន្តកើតមានទៀតនោះទេ”។

បទបញ្ជាដែលត្រូវបានចុះហត្ថលេខាដោយលោក Trump នេះ នឹងផ្លាស់ប្ដូរទម្លាប់ដែលមានតាំងពីរាប់ឆ្នាំមុន ដែលចាត់ទុកបណ្ដាញសង្គមជាផលិតករដែលត្រូវទទួលខុសត្រូវលើខ្លឹមសារដែលបានបង្ហោះដោយអ្នកប្រើប្រាស់។

ប៉ុន្មានម៉ោងក្រោយពីបានចុះហត្ថលេខាលើបទបញ្ជាស្ដីអំពីបណ្ដាញសង្គម លោក Trump ក៏បានសរសេរនៅលើ Twitter ថា បណ្ដាញសង្គម Facebook ក៏បាន “រិះគន់ចំពោះ Twitter”។ លោក Trump សរសេរថា “អគ្គនាយកប្រតិបត្តិរបស់ Facebook លោក Mark Zuckerberg ក៏បានរិះគន់ Twitter ថា “យើងមានគោលការណ៍ផ្សេងពី Twitter អំពីប្រការនេះ”។ លោក Trump បន្តថា “Facebook ក៏មិនគួរធ្វើជាអ្នកសម្រេចចិត្តក្នុងការកំណត់ថាខុស ឬត្រូវ ទៅលើខ្លឹមសារដែលអ្នករាល់គ្នាបានសរសេរនៅលើបណ្ដាញសង្គម”។

ប៉ុន្តែ យ៉ាងណាក៏ដោយ បណ្ដាក្រុមហ៊ុនបច្ចេកវិទ្យា ដូចជា Facebook និង Google ក៏បានចេញសេចក្ដីប្រកាសប្រឆាំងនឹងបទបញ្ជារបស់លោក Trump ផងដែរ ដោយយល់ថា វាមានហានិភ័យបង្កគ្រោះថ្នាក់ដល់អ៊ីនធើណិត និងខឿនសេដ្ឋកិច្ចឌីជីថល៕

ប្រភព៖ សារព័ត៌មានបរទេស

May 29, 2020

លោក Trump ចុះហត្ថលេខាលើបទបញ្ជាស្ដីពីបញ្ហាបណ្ដាញសង្គម

ប្រធានាធិបតីសហរដ្ឋអាមេរិកបានចុះហត្ថលេខាលើបទបញ្ជាមួយទាក់ទិននឹងបណ្ដាក្រុមហ៊ុនបណ្ដាញសង្គមកាលពីថ្ងៃទី28ឧសភា ហើយបានហៅនេះថាជា “សកម្មភាពដើម្បីការពារសេរីភាពនៃការបញ្ចេញមតិរបស់ពលរដ្ឋអាមេរិកាំង”។

“ក្រុមហ៊ុនបណ្ដាញសង្គមភាគតិចកំពុងកាន់កាប់ព័ត៌មានទំនាក់ទំនងសាធារណៈនិងឯកជនភាគច្រើននៅសហរដ្ឋអាមេរិក។ ពួកគេធ្វើការត្រួតពិនិត្យ កាត់បន្ថយ កែប្រែ លាក់បាំង និងផ្លាស់ប្ដូររាល់ទំនាក់ទំនងគ្រប់រូបភាពរវាងពលរដ្ឋ និងសាធារណជន ដោយមិនត្រូវបានត្រួតពិនិត្យ។ យើងមិនអាចអនុញ្ញាតឱ្យបញ្ហានេះបន្តកើតមានទៀតនោះទេ”។ ប្រធានាធិបតី Donald Trump ថ្លែងបែបនេះកាលពីថ្ងៃទី28ឧសភា បន្ទាប់ពីបានចុះហត្ថលេខាលើបទបញ្ជាទាក់ទងនឹងបញ្ហាបណ្ដាញសង្គម។

លោក Trump បានអះអាងថា បទបញ្ជានេះគឺដើម្បី “ការពារសេរីភាពនៃការបញ្ចេញមតិនៅចំពោះមុខការគំរាមកំហែងមួយដ៏ធ្ងន់ធ្ងរបំផុតក្នុងប្រវត្តិសាស្ត្រអាមេរិក។ Twitter លែងនៅជាទីតាំងប្រមូលផ្ដុំរបស់សាធារណជនទៀតហើយ តែវាបានក្លាយជានិពន្ធនាយកដែលមានការយល់ឃើញដោយឡែក។ ខ្ញុំគិតថា យើងអាចនិយាយអំពីបញ្ហាដូចគ្នានេះចំពោះក្រុមហ៊ុន Google ក្រុមហ៊ុន Facebook និងក្រុមហ៊ុនមួយចំនួនទៀត”។

បទបញ្ជាខាងលើនេះត្រូវបានធ្វើឡើងដើម្បីដកហូតសិទ្ធិទទួលបានការលើកលែងផ្នែកច្បាប់របស់បណ្ដាក្រុមហ៊ុនបណ្ដាញសង្គម ដូចជា Twitter ជាដើម ដោយតម្រូវឱ្យស្ថាប័នរដ្ឋវាយតម្លៃថាតើបណ្ដាញសង្គមទាំងនេះមានលក្ខខណ្ឌគ្រប់គ្រាន់ឬទេក្នុងការធានាលើការទទួលខុសត្រូវផ្លូវច្បាប់សម្រាប់ខ្លឹមសារដែលត្រូវបានមនុស្សរាប់លាននាក់បង្ហោះ។

បទបញ្ជារបស់លោក Trump នេះ នឹងផ្លាស់ប្ដូរទម្លាប់ដែលមានតាំងពីរាប់ឆ្នាំមុន ដែលបានចាត់ទុកបណ្ដាញសង្គមជាផលិតករដែលត្រូវទទួលខុសត្រូវលើខ្លឹមសារដែលបានបង្ហោះដោយអ្នកប្រើប្រាស់។

Twitter កាលពីថ្ងៃទី27ឧសភា បានដាក់ tag នៅលើសារចំនួន2ឃ្លារបស់លោក Trump ហើយបានបន្ថែមឧទានសញ្ញានៅខាងក្រោមសារទាំងនេះ។ ពេលចុចទៅលើតំណភ្ជាប់(link) ដែលត្រូវបានភ្ជាប់ទៅនឹងសារនោះ អ្នកប្រើប្រាស់នឹងត្រូវបាននាំទៅកាន់ទំព័រមួយដែលគ្រប់គ្រងដោយ Twitter ដែលមានសរសេរថា ប្រសាសន៍របស់ម្ចាស់សេតវិមានគឺមិនត្រឹមត្រូវនោះទេ។

លោក Trump ក្រោយមកក៏បានចោទប្រកាន់ Twitter និងបណ្ដាញសង្គមផ្សេងទៀតថា “បិទមាត់” អ្នកអភិរក្សនិយម។ កាលណោះ លោក Trump បានគំរាមថានឹងកែប្រែឱ្យបានខ្លាំងក្លា ឬបិទបណ្ដាញសង្គមទាំងនេះ។ ប៉ុន្តែ ក្រុមអ្នកវិភាគយល់ថា លោក Trump ពិបាកក្នុងការធ្វើឱ្យការគំរាមរបស់លោកក្លាយជាការពិត ព្រោះថា រាល់ការកែប្រែទៅលើបណ្ដាញសង្គមនានា ទាក់ទិននឹងខ្លឹមសារនៅលើបណ្ដាញសង្គមរបស់ពួកគេដែលត្រូវបានបង្ហោះដោយអ្នកប្រើប្រាស់ គឺតម្រូវឱ្យមានការអនុម័តពីរដ្ឋសភា៕

ប្រភព៖ សារព័ត៌មានបរទេស

May 29, 2020

ជិត5.9លាននាក់បានឆ្លង COVID-19 នៅទូទាំងសកលលោក

ពិភពលោកទាំងមូលបានរកឃើញអ្នកផ្ទុកវីរុសCOVID-19 សរុបជិត 5.9លាននាក់ និងជាង 360,000នាក់បានបាត់បង់ជីវិត។

ប្រទេសនិងដែនដីចំនួន213 ក្នុងពិភពលោក ត្រូវបានរាយការណ៍ថា មានអ្នកឆ្លងវីរុសCOVID-19 សរុប 5,880,081នាក់ និងអ្នកស្លាប់សរុបឡើងដល់360,695នាក់ ក្នុងនោះមានអ្នកជំងឺថ្មី 99,678នាក់ និងអ្នកស្លាប់ថ្មីមាន 3,907នាក់។ អ្នកជំងឺចំនួន 2,576,260នាក់បានជាសះស្បើយ។

ទ្វីបអាមេរិកជាសម្បុកមេរោគធំជាងគេបង្អស់ ក្នុងនោះតំបន់អាមេរិកខាងជើងមានអ្នកជំងឺCOVID-19 សរុប1,980,527នាក់ តំបន់អាមេរិកខាងត្បូងមាន757,461នាក់ ខណៈដែលទ្វីបអឺរ៉ុបមាន1,969,899នាក់ អាស៊ីមាន1,051,266នាក់ និងអាហ្វ្រិកមាន131,570នាក់។

សហរដ្ឋអាមេរិក ប្រស៊ីល និងរុស្ស៊ី គឺជាប្រទេសដែលមានអ្នកជំងឺCOVID-19 ច្រើនជាងគេក្នុងពិភពលោក។ សហរដ្ឋអាមេរិកមានអ្នកជំងឺសរុប1,767,571នាក់ និងអ្នកស្លាប់សរុប103,302នាក់ ចំណែកប្រទេសប្រេស៊ីលមានអ្នកជំងឺសរុប438,812នាក់ (អ្នកជំងឺថ្មីមាន24,151នាក់) និងអ្នកស្លាប់សរុប26,991នាក់ (អ្នកស្លាប់ថ្មី1,294នាក់) ខណៈដែលប្រទេសរុស្ស៊ីមានអ្នកជំងឺសរុប 379,051នាក់ (ក្នុងនោះមានអ្នកជំងឺថ្មី 8,371នាក់) និងអ្នកស្លាប់សរុប4,142នាក់ (ក្នុងនោះមានអ្នកស្លាប់ថ្មី 174នាក់)៕

ប្រភព៖ សារព័ត៌មានបរទេស

May 29, 2020

សភានីតិកម្មហុងកុងកើតចលាចល និងត្រូវផ្អាកកិច្ចប្រជុំ ព្រោះតែតំណាងរាស្ត្រគប់ថង់ឈើស្អុយទៅលើប្រធានសភា

តំណាងរាស្ត្រម្នាក់មកពីបក្សប្រជាធិបតេយ្យ បានគប់ថង់ដែលមានវត្ថុស្អុយទៅលើប្រធានសភានីតិកម្មហុងកុង ធ្វើឱ្យកិច្ចប្រជុំពិភាក្សាអំពីសេចក្ដីព្រាងច្បាប់ភ្លៀងជាតិត្រូវបានអាក់ខាន។

សភានីតិកម្មហុងកុង LEGCO (Legislative Council of Hong Kong) ព្រឹកមិញនេះបានបន្តកិច្ចពិភាក្សាលើសេចក្ដីព្រាងច្បាប់ស្ដីអំពីភ្លេងជាតិ។ នៅពេលកិច្ចប្រជុំចាប់ផ្ដើម តំណាងរាស្ត្រម្នាក់មកពីបក្សប្រជាធិបតេយ្យ គឺលោក Ted Hui Chi-fung ស្រាប់តែរត់ទៅរកប្រធានសភា Andrew Leung Kwan-yuen ហើយបានគប់ថង់ពណ៌សមួយសំដៅទៅកាន់ប្រធានសភារូបនេះ។ ធាតុរាវនៅក្នុងថង់ក៏បានបែកខ្ចាយចេញមកក្រៅ ធ្វើឱ្យស្អុយពេញសាលប្រជុំ។

ភ្លាមនោះ តំណាងរាស្ត្រ Ted Hui ក៏ត្រូវបានក្រុមសន្តិសុខនាំខ្លួនចេញទៅខាងក្រៅ ហើយកិច្ចប្រជុំខាងលើក៏ត្រូវបានពន្យារពេល។ ចំណែក តំណាងរាស្ត្រ Chan Hoi-yan ក៏ត្រូវបានបញ្ជូនទៅកាន់មន្ទីរពេទ្យ ព្រោះតែមានអារម្មណ៍មិនស្រួលខ្លួនដោយសារក្លិនស្អុយនោះ។

ក្រុមសន្តិសុខបាននាំគ្នាយកផួយមកគ្របពីលើថង់ឈើស្អុយ និងប្រើថ្នាំបាញ់បំបាត់ក្លិនក្នុងសាលប្រជុំ នៅមុនពេលបុគ្គលិកអនាម័យមកដល់។ ក្រុមមន្ត្រីពន្លត់អគ្គិភ័យ និងប៉ូលិសជាច្រើននាក់ក៏ត្រូវបានបញ្ជូនមកកាន់វិមានសភានេះដែរ។

Ted Hui បានប្រកាសថា ខ្លួនប្រើប្រាស់ថង់ដាក់ឈើស្អុយដើម្បីតវ៉ា ព្រោះតែលោក Leung បានកាត់បន្ថយពេលវេលារបស់ក្រុមតំណាងរាស្ត្របក្សប្រឆាំងក្នុងការសម្ដែងមតិទាក់ទិននឹងសេចក្ដីព្រាងច្បាប់ភ្លេងជាតិ។

សេចក្ដីព្រាងច្បាប់ភ្លេងជាតិ តម្រូវឱ្យសាលារៀននានានៅហុងកុង បង្រៀនភ្លេងជាតិប្រទេសចិនដល់សិស្ស រួមនឹងអង្គការផ្សេងៗក៏ត្រូវចាត់ចែងការច្រៀងចម្រៀង និងលេងភ្លេងជាតិនេះដែរ។ ចំណែកអ្នកដែលមានឥរិយាបថប្រមាថមើលងាយភ្លេងជាតិនេះនឹងត្រូវដាក់ទោសឱ្យជាប់ពន្ធនាគារ ឬពិន័យជាប្រាក់ទៀតផង៕

ប្រភព៖ សារព័ត៌មានបរទេស

May 28, 2020

អាមេរិកាំងនិងចិនបង្កើត “សង្គ្រាមវោហារសាស្ត្រ” នៅអង្គការសហប្រជាជាតិ ព្រោះតែបញ្ហាហុងកុង

ប្រតិភូអាមេរិកាំង និងប្រតិភូចិននៅអង្គការសហប្រជាជាតិបានដំឡើងសម្លេងដាក់គ្នា ទាក់ទិននឹងការដែលទីក្រុងប៉េកាំងបង្កើតច្បាប់សន្តិសុខសម្រាប់គ្រប់គ្រងទីក្រុងហុងកុង។

សារព័ត៌មាន Reuters បានចេញផ្សាយថា ប្រតិភូអាមេរិកាំង និងចិន នៅឯទីស្នាក់ការនៃអង្គការសហប្រជាជាតិ កាលពីថ្ងៃទី27ឧសភា បានបើកសង្គ្រាមវោហារសាស្ត្រដាក់គ្នាជាបន្តបន្ទាប់ ក្រោយពីទីក្រុងប៉េកាំងបានទាត់ចោលសំណើរបស់សហរដ្ឋអាមេរិកដែលស្នើឱ្យបើកកិច្ចប្រជុំក្រុមប្រឹក្សាសន្តិសុខដើម្បីពិភាក្សាអំពីគម្រោងដែលចិនកំពុងបង្កើតច្បាប់សន្តិសុខសម្រាប់តំបន់ពិសេសហុងកុង។

នៅក្នុងសេចក្ដីប្រកាសមួយ ប្រតិភូអាមេរិកាំងនៅអង្គសហប្រជាជាតិបានសង្កត់ធ្ងន់ថា នេះគឺជា “បញ្ហាបន្ទាន់ដែលមានការចាប់អារម្មណ៍ពីពិភពលោកទាំងមូលដោយវាទាក់ទងនឹងសន្តិភាព និងសន្តិសុខអន្តរជាតិ ហើយវាក៏ត្រូវការការយកចិត្តទុកដាក់ពីសមាជិកទាំង15ប្រទេសនៃក្រុមប្រឹក្សាសន្តិសុខរបស់អង្គការសហប្រជាជាតិ។

ឯកអគ្គរដ្ឋទូតចិនប្រចាំនៅអង្គការសហប្រជាជាតិ លោក Zhang Jun ក្រោយមកក៏បានបង្ហោះសារនៅលើទំព័រ Twitter ថា “ទីក្រុងប៉េកាំង ដាច់ខាតមិនទទួលយកសំណើមិនសមហេតុផល” ដូចខាងលើរបស់សហរដ្ឋអាមេរិកនោះឡើយ ព្រោះថា សេចក្ដីព្រាងច្បាប់សន្តិសុខជាតិសម្រាប់ហុងកុងគឺជាបញ្ហាផ្ទៃក្នុងរបស់ចិន និង “មិនទាក់ទងអ្វីជាមួយភារកិច្ចរបស់ក្រុមប្រឹក្សាសន្តិសុខនៃអង្គការសហប្រជាជាតិនោះដែរ”។

អាមេរិកាំងនិងចិនបង្កើត "សង្គ្រាមវោហារសាស្ត្រ" ដាក់គ្នា នៅអង្គការសហប្រជាជាតិ ព្រោះតែបញ្ហានៅហុងកុង — កិច្ចប្រជុំមួយរបស់អង្គការសហប្រជាជាតិ។

សហរដ្ឋអាមេរិកនិយាយថា ការដែលចិនបានទាត់ចោលកិច្ចប្រជុំរបស់ក្រុមប្រឹក្សាសន្តិសុខស្ដីអំពីបញ្ហាហុងកុង រួមជាមួយនឹង “ការលាក់បាំងអំពី COVID-19 និងការរំលោភជាបន្តបន្ទាប់ទៅលើកិច្ចព្រមព្រៀងផ្នែកសិទ្ធិមនុស្សនានា ការបំពានច្បាប់នៅលើសមុទ្រចិនខាងត្បូងជាដើម បានបង្ហាញថា ទីក្រុងប៉េកាំងបានអនុវត្តផ្ទុយពីភារកិច្ចជាសមាជិកមួយរបស់អង្គការសហប្រជាជាតិ”។

ជាការឆ្លើយតប អគ្គរដ្ឋទូតចិន លោក Zhang Jun បានចោទប្រកាន់សហរដ្ឋអាមេរិកថា ជាប្រទេស “បង្កភាពច្របូកច្របល់ក្នុងពិភពលោក” និង “បំពានច្បាប់អន្តរជាតិ”។

សេចក្ដីព្រាងច្បាប់សន្តិសុខហុងកុងរបស់ប្រទេសចិននេះ តាមគម្រោងនឹងត្រូវបានអនុម័តជាផ្លូវការនៅថ្ងៃទៅ28ឧសភាខាងមុខ ដែលជាថ្ងៃបិទបញ្ចប់កិច្ចប្រជុំប្រចាំឆ្នាំរបស់សភាចិន។ ច្បាប់នេះនឹងហាមមិនឱ្យមានសកម្មភាពផ្ដាច់ខ្លួន និងអំពើរដ្ឋប្រហារ ក៏ដូចជាការជ្រៀតជ្រែកពីបរទេស និងការធ្វើភេរវកម្មក្នុងទីក្រុង៕

ប្រភព៖ សារព័ត៌មានបរទេស

May 28, 2020

Category: អន្តរជាតិ