អន្តរជាតិ - La Reine Media

កងទ័ពជិត7ម៉ឺននាក់ ត្រូវបានដាក់ពង្រាយដើម្បីទប់ទល់នឹងកុបកម្មនៅសហរដ្ឋអាមេរិក ខណៈបាតុករជិត1ពាន់នាក់ត្រូវបានចាប់ខ្លួន

រដ្ឋធានីវ៉ាស៊ីងតោននៃសហរដ្ឋអាមេរិក កំពុងតែបង្ហាញវត្តមានរបស់ទាហានរាប់ពាន់នាក់ រួមនឹងគ្រឿងសព្វាវុធយោធាជាច្រើន ដែលដាក់ពង្រាយនៅតាមតំបន់នានា ក្នុងបំណងគ្រប់គ្រងស្ថានការណ៍កុបកម្មដែលកើតឡើងក្រោយពីការស្លាប់របស់បុរសស្បែកខ្មៅឈ្មោះ George Floyd។

ក្រោយរយៈពេល5ថ្ងៃនៃការកើតមានបាតុកម្មនៅរដ្ឋធានីវ៉ាស៊ីងតោនដើម្បីទាមទាររកយុត្តិធម៌ជូនជនរងគ្រោះស្បែកខ្មៅឈ្មោះ Floyd ដែលត្រូវបានប៉ូលីសចាប់ខ្លួន និងសង្កត់ករហូតដល់ស្លាប់នៅឯរដ្ឋ Minnesota លោក ប្រធានាធិបតី Donald Trump បានចាប់ផ្ដើមបង្ហាញសាច់ដុំដែលហាក់ដូចមិនធ្លាប់មានពីមុនមក ដោយមានការដាក់ពង្រាយកងទ័ពរាប់ពាន់នាក់នៅទីក្រុងវ៉ាស៊ីតោន ខណៈដែលមានកុបកម្ម និងការឆក់ប្លន់មួយចំនួនបានកើតឡើង។

យន្តហោះឈ្លបយកការណ៍ RC-26B របស់កងកម្លាំងការពារជាតិ បានបង្ហាញខ្លួននៅទីក្រុងវ៉ាស៊ីងតោនកាលពីព្រលប់ថ្ងៃទី2មិថុនា។ ចំណែកឧទ្ធម្ភាគចក្រ Bell 412 ដែលមានជំនាញខាង “ហិតក្លិន” ចំហាយវិទ្យុសកម្មនុយក្លេអែរ ក៏ត្រូវបានបញ្ជូនមកកាន់រដ្ឋធានីផងដែរ ដែលប្រការនេះបង្ហាញថា រដ្ឋាភិបាលអាមេរិកាំង មានការព្រួយបារម្ភខ្លាំងចំពោះបាតុកម្ម និងកុបកម្មដែលអាចនាំឱ្យមានអំពើភេរវកម្ម។ល។

ព័ត៌មានមួយចំនួនដែលមិនទាន់ត្រូវបានបញ្ជាក់ប្រភពច្បាស់លាស់នៅលើបណ្ដាញសង្គមបានបង្ហើបឱ្យដឹងអំពីសកម្មភាពរបស់យន្តហោះគ្មានមនុស្សបើកនៅវ៉ាស៊ីងតោន។ កាលពីថ្ងៃទី3មិថុនា ក្រុមអ្នកតាមដានបានឃើញយន្តហោះយោធា V-22 Osprey របស់កងម៉ារីនសហរដ្ឋអាមេរិក ត្រូវបានប្រើប្រាស់ដើម្បីដឹកជញ្ជូនទ័ព។

ក្នុងរយៈពេល2ថ្ងៃ ចាប់ពីថ្ងៃទី30 និង31 ខែឧសភា ការប៉ះទង្គិចគ្នារវាងបាតុករ និងប៉ូលីសបានកើតឡើងជាហូរហែ នាំឱ្យសមត្ថកិច្ចប្រើប្រាស់គ្រាប់បែកបង្ហូរទឹកភ្នែកដើម្បីបំបែកហ្វូងបាតុក។ កងទ័ពក្នុងតំបន់ក៏ត្រូវបានដាក់ពង្រាយដើម្បីជួយដល់ប៉ូលីសក្រុងវ៉ាស៊ីងតោន។

អំពើឆក់ប្លន់ ការលួចទ្រព្យសម្បត្តិ និងកុបកម្មបានកើតឡើងនៅពេលយប់ ធ្វើឱ្យអាជ្ញាធរត្រូវដាក់បម្រាមគោចរ និងបញ្ចេញឆ្មាំការពារជាតិនៅវ៉ាស៊ីងតោន។

ក៏ប៉ុន្តែ ប៉ុន្មានថ្ងៃចុងក្រោយនេះ សកម្មភាពបាតុកម្ម បានកើតឡើងភាគច្រើនគឺដោយសន្តិវិធី។ ការហែក្បួនដ៏ធំនៅយប់ថ្ងៃទី2មិថុនាបានបំពានបម្រាមគោចរ19ម៉ោង ប៉ុន្តែមិនមានអំពើហិង្សាកើតឡើងនោះទេ។

ប្រធានាធិបតីសហេរដ្ឋអាមេរិកកាលពីថ្ងៃទី1មិថុនា បានប្រកាសថា កំពុងបញ្ជូនទាហានរាប់ពាន់នាក់មកកាន់ទីក្រុងវ៉ាស៊ីងតោនដើម្បីបង្រាបបាតុករ។ លោក Trump ក៏បានគំរាមថានឹងបញ្ជូនកងទ័ពទៅកាន់រដ្ឋទាំងឡាយណាដែលបានបដិសេធមិនប្រើប្រាស់ឆ្មាំការពារជាតិ។

កាលពីម្សិលមិញ (3មិថុនា) ទាហានប្រមាណជា3,000នាក់បានបង្ហាញវត្តមាននៅក្នុងរដ្ឋធានីវ៉ាស៊ីងតោន ក្នុងនោះមានកងកម្លាំងឆ្មាំការពារជាតិរបស់រដ្ឋធានីចំនួន1,300នាក់ និង2,300នាក់ទៀតត្រូវបានបញ្ជូនមកពីបណ្ដារដ្ឋផ្សេងៗ។ CNN ដកស្រង់សម្ដីរបស់មន្ត្រីការពារជាតិម្នាក់ឱ្យដឹងថា ទាហានប្រមាណ 1,300នាក់ផ្សេងទៀតនឹងត្រូវបានបញ្ជូនពីកងពលធំទ័ពអាកាសលេខ82 តាមគម្រោងនឹងត្រូវដាក់ពង្រាយនាប៉ុន្មានថ្ងៃខាងមុខ។

យោងតាមអភិបាលរដ្ឋវ៉ាស៊ីងតោន លោកស្រី Muriel Bowser ទាហានទាំងនោះអាចប្រើប្រាស់គ្រាប់បែកផ្សែងបង្ហូរទឹកភ្នែក ដំបងឆក់ និងស្លៀកពាក់ឈុតការពារកុបកម្មក្នុងពេលធ្វើសកម្មភាពដើម្បីគ្រប់គ្រងរដ្ឋធានី ប៉ុន្តែ ពួកគេនឹងមិនត្រូវបានបំពាក់គ្រាប់ពិតនោះទេ។ ប៉ុន្តែ កាលពីថ្ងៃទី3មិថុនា សារព័ត៌មាន Star and Stripes ដកស្រង់សម្ដីរបស់មន្ត្រីការពារជាតិសហរដ្ឋអាមេរិក ឱ្យដឹងថា ទាហានមួយចំនួនបានយកកាំភ្លើងតាមខ្លួនពេលបំពេញភារកិច្ច។

ទាហានដែលត្រូវបានកែននៅទូទាំងសហរដ្ឋអាមេរិក ត្រូវបានប៉ាន់ប្រមាណថា មានចំនួន67,000នាក់ ប្រហាក់ប្រហែលនឹងទាហានដែលត្រូវបានដាក់ពង្រាយដើម្បីបញ្ចប់កុបកម្មដែលបានកើតឡើងក្រោយការធ្វើឃាតអាចារ្យ Martin Luther King Jr. កាលពីឆ្នាំ1968។

ចាប់ពីថ្ងៃទី29ឧសភា បាតុករជាង400នាក់ត្រូវបានចាប់ខ្លួននៅក្នុងទីក្រុងវ៉ាស៊ីងតោន ខណៈនៅទូទាំងប្រទស មានបាតុករជាង9,300នាក់ត្រូវបានចាប់ខ្លួន៕

ប្រភព៖ សារព័ត៌មានបរទេស

June 4, 2020

George Floyd និងប៉ូលិសឃោរឃៅ ធ្លាប់ធ្វើការកន្លែងជាមួយគ្នា!!!

តាមរយៈហេតុការណ៍ដែល ចច ហ្វ្លយដ៍ (George Floyd) បុរសស្បែកខ្មៅ ត្រូវ ដេរេក ឆូវីន (Derek Chauvin) ប៉ូលិសស្បែកស ប្រើជង្គង់សង្កត់ក ខណៈចាប់ឃុំខ្លួនអស់រយៈពេលជាច្រើននាទី រហូតដល់ស្លាប់កាលពីថ្ងៃទី25 ឧសភាកន្លងទៅនោះ បើទោះជាប៉ូលិសរូបនោះត្រូវបានបណ្ដេញចេញពីអង្គភាព និងត្រូវបានចោទប្រកាន់ពីបទឃាតកម្មទៅហើយក្ដី តែទោសទណ្ឌ នឹងធ្ងន់ ឬក៏ស្រាលយ៉ាងណានោះ វាមានចំណុចសង្កេតដែលអាចមានផលដល់រឿងក្ដីដែលកើតឡើងនេះបាន។

ម៉ាយ៉ា សានតាម៉ារៀ (Maya Santamaria) ស្ត្រីម្ចាស់ហាង អេល នូអេវ៉ូ រ៉ូដេអូ (El Nuevo Rodeo) ណៃត៍ក្លិបល្បីល្បាញក្នុងក្រុមពួកអាមេរិកឡាទីន ដែលស្ថិតនៅប៉ែកខាងត្បូងនៃទីក្រុង មីននីអាប៉ូលិស រដ្ឋមីននីសូតា (Minneapolis, Minnesota) សហរដ្ឋអាមេរិក បានឱ្យដឹងថា ទាំង 2នាក់នោះ(ហ្វ្លយ និង ដេរេក) ធ្លាប់ធ្វើការជាសន្តិសុខ នៅក្នុងណៃត៍ក្លិបរបស់អ្នកស្រីជាមួយគ្នា ដោយដេរេក ធ្វើយូរមកហើយ ប្រហែលជា 17ឆ្នាំ ជាមេក្រុមរបស់ពួកប៉ូលិសដែលមកមើលការខុសត្រូវណៃត៍ក្លិប ខណៈដែល ហ្វ្លយ មានការងារផ្សេងទៀតស្រាប់ហើយនោះ តែងតែត្រូវបានហៅមកជួយធ្វើអន្តរាគមន៍ជាមួយកម្លាំងសន្តិសុខ បែបម្ដងម្កាល ពេលមានពិធីធំៗជាមួយគ្នាយ៉ាងតិចណាស់ក៏ជាង 10ដងដែរ ដោយកាលពីឆ្នាំកន្លងទៅ(2019) ក៏នៅតែធ្វើនៅឡើយ ទើបតែមកផ្អាក ក្នុងអំឡុងពេលមានវីរុសកូរ៉ូណាឆ្លងរាលដាលហ្នឹងឯង។

អ្នកស្រីបានបង្ហើបឱ្យដឹងទៀតថា ដេរេក ត្រូវគ្នាណាស់ជាមួយពួកអតិថិជនអាមេរិកឡាទីន តែបើអតិថិជនដែលបង្កបញ្ហានោះជាជនស្បែកខ្មៅវិញ គឺច្រើនតែមានអំពើហិង្សាខ្លាំងក្លាកើតឡើងជាញឹកញាប់មិនខាន។ ទោះជាអ្នកស្រីមិនអាចអះអាងបានថា ទាំង 2នាក់នោះ ស្គាល់គ្នា ឬអត់ក៏ដោយ តែខ្ញុំ(អ្នកសរសេរ)ក៏គិតថា រឿងនេះ វាអាចមានអាថ៌កំបាំងអ្វីម្យ៉ាងជ្រៅជាងយើងគិតទៅទៀត ដែលបើសិនជា ដេរេក ធ្លាប់ស្គាល់ ហើយធ្លាប់ស្អប់មុខ ហ្វ្លយដ៍ ពីមុនមកផងនោះ ការកាត់ក្ដីករណីដែលជាដើមហេតុបណ្ដាលឱ្យ ហ្វ្លយដ៍ ស្លាប់នោះ ប្រហែលជាមានទោសធ្ងន់ជាងអ្នកណាៗ គិតទៅទៀតយ៉ាងពិតប្រាកដ។ រឹតតែសាកល្បងពិចារណាមើលពីទិដ្ឋភាព ខណៈដែល ដេរេក យកជង្គង់សង្កត់ក ហ្វ្លយដ៍ ឱ្យបានច្បាស់ៗផងនោះ យើងនឹងមើលឃើញថា គេកំពុងតែសម្លឹងមើលជនរងគ្រោះក្នុងអារម្មណ៍ហាក់ដូចជាសប្បាយចិត្តខ្លាំងណាស់ និងយកដៃឆ្វេងលូកហោប៉ាវខោទៀតផង។ ទិដ្ឋភាពនេះ បង្ហាញឱ្យឃើញពីភាពឈាមត្រជាក់របស់ប៉ូលិសម្នាក់នេះបានយ៉ាងច្បាស់ក្រឡែត។

ករណីការស្លាប់របស់ ចច ហ្វ្លយដ៍ ត្រូវបានមើលឃើញថា ជាការរើសអើងជាតិសាសន៍ពណ៌សម្បុរ ដែលសាងក្ដីមិនពេញចិត្តយ៉ាងខ្លាំង និងយ៉ាងទូលំទូលាយ។ មនុស្សម្នាបាននាំគ្នាចេញមកតាមដងផ្លូវ រហូតរាលដាលទៅក្នុងទីក្រុងជាច្រើនទៀត មានការបំផ្លិចបំផ្លាញទព្យសម្បត្តិ ហាងលក់ទំនិញ និងឆ្លៀតឱកាសឆក់ប្លន់ទៀតផងក៏មាន។ តែយ៉ាងណាក៏ដោយ ជនល្បីឈ្មោះជាច្រើនមកពីពិភពសិល្បៈ អ្នកចម្រៀង តារាសម្ដែង និងពិភពកីឡា កីឡាករតឺនីស កីឡាករបាល់ទាត់-ល- បាននាំគ្នាចេញមករួមបង្ហាញពីកម្លាំងនៃការមិនយល់ស្របចំពោះការរើសអើងពូជសាសន៍ពណ៌សម្បុរលើកនេះ ហើយ EYE ON SPORTS ក្នុងឋានៈជាអត្ថបទដែលពាក់ព័ន្ធនឹងរឿងគ្រប់យ៉ាងនៃជីវិតតាមរយៈកីឡា ដែលតែងតែមានរឿងរ៉ាវទាក់ទិននឹងនយោបាយជាញឹកញាប់នោះ ក៏សូមរួមកម្លាំងតវ៉ាទាមទារ សម្ដែងការមិនយល់ស្របចំពោះការរើសអើងពណ៌សម្បុរក្នុងគ្រានេះមួយចំណែកដែរ។

កាលពីអតីតកាល ក្នុងពិភពកីឡា ក៏ធ្លាប់មានការបង្ហាញកម្លាំងតតាំងនឹងការរើសអើងពូជសាសន៍ពណ៌សម្បុរនេះដែរ ខ្ញុំសូមថយត្រឡប់ទៅក្នុងហេតុការណ៍ការប្រកួតកីឡាអូឡាំពិក ក្នុងឆ្នាំ1968 ដែលទីក្រុងមិកស៊ីកូ ស៊ីធី ធ្វើជាម្ចាស់ផ្ទះរៀបចំព្រឹត្តិការណ៍ដ៏ធំមួយនេះ ដែលនៅយុគសម័យនោះ បញ្ហាការរើសអើងពណ៌សម្បុរនៅមានច្រើនណាស់នៅក្នុងសហរដ្ឋអាមេរិក។ នាពេលព្រឹកនៃថ្ងៃទី16 តុលា ឆ្នាំ1968នោះ គឺជាការប្រកួតកីឡារត់ប្រណាំង 200ម៉ែត្រ ផ្ដាច់ព្រ័ត្រផ្នែកបុរស ដែលលទ្ធផលបានបង្ហាញថា អត្តពលិកស្បែកខ្មៅរបស់សហរដ្ឋអាមេរិកបានឡើងទទួលពានរង្វាន់ដល់ទៅ 2នាក់ ដោយ ថមមី ស្ម៊ីត(Tommy Smith) បានមកដល់ទីមុនគេ ក្នុងរយៈពេល 19.83វិនាទី បំបែកឯកទគ្គកម្មពិភពលោក។ កីឡាករ ភីធើរ ណ័រមែន (Peter Norman) មកពីអូស្ត្រាលី មកដល់ទីលំដាប់ទី2 ដោយប្រើរយៈពេល 20.06វិនាទី និង ចន ខាឡូស (John Carlos) កីឡាករស្បែកខ្មៅរបស់សហរដ្ឋអាមេរិកម្នាក់ទៀត តាមមកដល់ទីលំដាប់លេខ3 ដោយប្រើពេល 20.10វិនាទី។

ពេលឡើងទទួលពានរង្វាន់ ទាំង 3នាក់ សុទ្ធតែមានពាក់និមិត្តសញ្ញានៃការលើកតម្កើងសិទ្ធិមនុស្សរបស់អូឡាំពិក(Olympic Project for Human Rigths)នាសម័យនោះទាំងអស់ តែអ្វីដែលពិសេសនោះគឺ អត្តពលិកស្បែកខ្មៅរបស់សហរដ្ឋអាមេរិកទាំង 2នាក់ បានណាត់គ្នាសម្ដែងនិមិត្តសញ្ញាដើម្បីបង្ហាញអំពីកម្លាំងរបស់ជនស្បែកខ្មៅ ដោយទាំង 2នាក់មិនពាក់ស្បែកជើង តែពាក់ស្រោមជើងពណ៌ខ្មៅ ដែលបង្ហាញពីភាពទីទ័លក្ររបស់ជនស្បែកខ្មៅ។ ថមមី មានកន្សែងបង់កពណ៌ខ្មៅ បង្ហាញពី ក្ដីមោទនភាពរបស់ជនស្បែកខ្មៅដែលហៅថា ប្ល៊ែក ផ្រាយដ៍ (Black Pride) ខណៈដែល ចន បានដោះឡេវអាវក្រៅរបស់គេ ដែលនេះជានិមិត្តសញ្ញា បង្ហាញពីភាពរួមគ្នាជាធ្លុងមួយរបស់ជនវណ្ណៈកម្មករនៅក្នុងសហរដ្ឋអាមេរិក និងពាក់ខ្សែអង្កាំ ឧទ្ទិសដល់ជនស្បែកខ្មៅដែលត្រូវបានធ្វើបាប ឬសម្លាប់ រួមទាំងពួកដែលត្រូវបានចាប់បោះទម្លាក់ទៅក្នុងសមុទ្រ ក្នុងយុគសម័យដេញចាប់ជនស្បែកខ្មៅយកមកធ្វើជាទាសករ។

ការពិត អត្តពលិកស្បែកខ្មៅរបស់អាមេរិកទាំង 2នាក់ បានណាត់គ្នាពាក់ស្រោមដៃពណ៌ខ្មៅ ដែលជានិមិត្តសញ្ញាបង្ហាញពីកម្លាំងរបស់ជនស្បែកខ្មៅ ដែលហៅថា ប្ល៊ែក ផៅវើរ (Black Power) ជាទង្វើដែលកើតឡើងនៅក្នុងសហរដ្ឋអាមេរិក ក្នុងយុគទសវត្សរ៍ទី60 ដែលសង្កត់ធ្ងន់លើការរួមកម្លាំងគ្នាតស៊ូ ដើម្បីផលប្រយោជន៍របស់ជនជាតិស្បែកខ្មៅ…តែ ចន បែរជាភ្លេចពាក់ស្រោមដៃចេញមក ពេលនោះ ភីធើរ (កីឡាកររបស់អូស្ត្រាលីដែលឡើងទទួលរង្វាន់លេខ2) ក៏ណែនាំឱ្យ ថមមី ចែករំលែកស្រោមដៃខាងឆ្វេងទៅឱ្យ ចន ពាក់ផង។ នេះហើយ ជាដើមហេតុដែលធ្វើឱ្យមានរូបភាពអត្តពលិកសហរដ្ឋអាមេរិក ខណៈឡើងទទួលពានរង្វាន់ បង្ហាញពីការពាក់ស្រោមដៃម្នាក់ម្ខាង ឈរឱនមុខ និងលើកកណ្ដាប់ដៃឡើងម្នាក់ម្ខាងនៅលើក្ដារចំណាត់ថ្នាក់នោះឯង។ លទ្ធផលនៃការសម្ដែងនិមិត្តសញ្ញាក្នុងគ្រានោះ បានធ្វើឱ្យអត្តពលិកសហរដ្ឋអាមេរិកទាំង 2នាក់ ត្រូវគេបង្ខំឱ្យចាកចេញកន្លែងស្នាក់នៅរបស់អ្នកកីឡា និងថែមទាំងត្រូវបញ្ជាឱ្យប្រគល់ពានរង្វាន់នោះ ទៅឱ្យគណៈកម្មការអូឡាំពិកវិញទៀតផង៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

June 4, 2020

ទាហានមួកខៀវកម្ពុជា10នាក់នៅប្រទេសម៉ាលី បានឆ្លង COVID-19

រដ្ឋមន្ត្រីក្រសួងការពារជាតិកម្ពុជា កាលពីថ្ងៃទី០៣ ខែមិថុនាបានឱ្យដឹងថា កងទ័ពអង្គការសហប្រជាជាតិពីកម្ពុជាចំនួន10នាក់បានឆ្លងវីរុសCOVID-19។

ក្នុងចំណោមអ្នកជំងឺCOVID-19 ទាំង10នាក់នោះ មានម្នាក់បានបាត់បង់ជីវិត នោះគឺ ឧត្តមសេនីយ៍ទោ ស សាវី។ សពឧត្តមសេនីយ៍រូបនេះ នឹងត្រូវធ្វើបុណ្យនៅនាថ្ងៃនេះនៅប្រទេសម៉ាលី។

សម្តេចពិជ័យសេនាទៀបាញ់បានបញ្ជាក់ថា កម្ពុជានឹងមិនរាថយឡើយក្នុងការជួយរក្សាសន្តិភាពពិភពលោក ខណៈកម្ពុជាបានបញ្ជូនកងទ័ពរបស់ខ្លួនចំនួនជិត800នាក់ក្នុងនាមអង្គការសហប្រជាជាតិ ទៅបំពេញបេសកកម្មរក្សាសន្តិភាពនៅតាមបណ្ដាប្រទេសដែលកំពុងមានអស្ថិរភាព រួមមាន ប្រទេសស៊ូដង់ខាងត្បូង ប្រទេសលីបង់ សាធារណរដ្ឋអាហ្វ្រិកកណ្ដាល និងប្រទេសម៉ាលី។ ក្នុងចំណោមទាហានខាងលើ មានស្ត្រីជិត80នាក់។

គិតមកដល់បច្ចុប្បន្ន កម្ពុជាបានរកឃើញអ្នកឆ្លងវីរុសCOVID-19 ចំនួន 125នាក់ ក្នុងនោះមាន123នាក់បានជាសះស្បើយ និង2នាក់កំពុងទទួលការព្យាបាល៕

June 4, 2020

សារព័ត៌មានលំដាប់ពិភពលោកមួយ បង្ហាញព័ត៌មានស៊ីជម្រៅថា ចិន ពិតជាផ្ញើទិន្នន័យទៅឱ្យ WHO យឺតយ៉ាវមែន…និង ទាំងចិន ទាំងអាមេរិក សុទ្ធតែនិយាយមិនត្រង់…

កាលពីថ្ងៃទី2 មិថុនា អង្គភាពផ្នែកស៊ើបព័ត៌មានស៊ីជម្រៅរបស់ AP ទីភ្នាក់ងារព័ត៌មានលំដាប់ពិភពលោករបស់សហរដ្ឋអាមេរិក បានបង្ហាញព័ត៌មានបែបស៊ីជម្រៅ និងទិន្នន័យនៅពីក្រោយស្ថានការណ៍ ក្នុងអំឡុងការរកឃើញជំងឺឆ្លងដោយសារមេរោគវីរុសកូរ៉ូណាឆ្នាំ2019 ឬកូវីដ-19 នៅទីក្រុងវូហាន ប្រទេសចិន ដោយពួកគេបានរកឃើញថា បណ្ដាក្រុមអ្នកវិទ្យាសាស្រ្តរបស់អង្គការសុខភាពពិភពលោក ឬ WHO សុទ្ធតែមានអារម្មណ៍មួម៉ៅនឹងភាពយឺតយ៉ាវនៃការផ្ដល់ទិន្នន័យពីខាងរដ្ឋបាលចិន។

AP បានបញ្ជាក់ថា ព័ត៌មានថ្មីៗដែលក្រុមអ្នកស៊ើបព័ត៌មានបែបស៊ីជម្រៅរបស់ខ្លួនបានរកឃើញនោះ មិនស៊ីគ្នាជាមួយទាំងពាក្យអះអាងរបស់រដ្ឋបាលចិន និងការចោទប្រកាន់របស់លោកប្រធានាធិបតី នៃសហរដ្ឋអាមេរិក ដូណាល់ត្រាំ ដែលបានចោទថា រដ្ឋបាលចិន និង WHO បានរួមដៃគ្នាបិទបាំងសហគមន៍ពិភពលោកនោះឡើយ ប៉ុន្តែ វាបានឆ្លុះបញ្ចាំងឱ្យឃើញពីការខិតខំប្រឹងប្រែងរបស់ WHO ក្នុងការអង្វរសុំទិន្នន័យពីខាងចិនយកមកវិភាគ ដើម្បីដាស់តឿនមនុស្សលោក ទោះជាខ្លួនឯងគ្មានអំណាចអ្វី និងស្ថិតក្រោមសម្ពាធដ៏ធំមហាសាលក្ដី…។

ថយត្រឡប់ទៅកាលពីដើមខែមករាវិញ កាលនោះ WHO ធ្លាប់បានថ្លែងសម្ដែងនូវការកោតសរសើរចំពោះរដ្ឋបាលចិនជាបន្តបន្ទាប់ ដូចជា រឿងការទប់ទល់នឹងមេរោគដែលឆាប់រហ័ស និងដាច់ខាត និងបានសម្ដែងការអរគុណ ដែលរដ្ឋបាលចិនបានប្រញាប់ប្រគល់ទិន្នន័យខាងពូជកំណើតរបស់វីរុសកូរ៉ូណាប្រភេទថ្មីនោះមកឱ្យ WHO “ភ្លាមៗ” រួមទាំងកោតសរសើររដ្ឋបាលចិនថា មានភាពប្រឹងប្រែងព្យាយាមធ្វើការ និងគ្មានលាក់បាំង “យ៉ាងគួរឱ្យពេញចិត្ត និងគ្មានពាក្យនឹងបរិយាយ”។

ប៉ុន្តែ នៅពីក្រោយរឿងរ៉ាវទាំងនោះ AP បានរកឃើញថា បរិយាកាសនៅក្នុងស្ថាប័ន WHO នាពេលនោះ ពោរពេញទៅដោយក្ដីមួម៉ៅ និងមិនពេញចិត្តរបស់ក្រុមមន្ត្រី ដោយសារតែនៅមិនទាន់បានទទួលទិន្នន័យដែលចាំបាច់ ដើម្បីបញ្ឈប់ការឆ្លងរាលដាលរបស់មេរោគវីរុសមួយនោះ ដោយរដ្ឋបាលចិនបានប្រគល់ទិន្នន័យកូដពូជកំណើត ឬ ជីណូម មកឱ្យ យឺតពេលជាង 1សប្ដាហ៍ ក្រោយពីបន្ទប់ប្រតិបត្តិការរបស់រដ្ឋបាលចិនបានដោះកូដរបស់ជីណូម រួចរាល់ទៅហើយយ៉ាងតិច 3កន្លែង។

ផែនទីជីណូម របស់ពូជកំណើតវីរុសកូរ៉ូណា ទូទាំងពិភពលោក

AP សន្និដ្ឋានថា មូលហេតុនៃការយឺតយ៉ាវនេះ បណ្ដាលមកពីកម្មវិធីគ្រប់គ្រងទិន្នន័យដ៏តឹងរ៉ឹង និងការប្រកួតប្រជែងដណ្ដើមគ្នាកសាងស្នាដៃ ផ្ទៃក្នុងស្ថាប័នសាធារណៈសុខាភិបាលរបស់ចិន ដែលការសន្និដ្ឋាននេះ គឺបានមកពីការដែល AP បានសម្ភាស និងពិនិត្យមើលឯកសារចំនួនដ៏ច្រើនរបស់ចិន។

ការប្រគល់ទិន្នន័យជីណូម របស់រដ្ឋបាលចិនមកឱ្យ WHO កើតមានឡើងក្រោយពីបន្ទប់ប្រតិបត្តិការ 1កន្លែងនៅក្នុងប្រទេសចិន បាននាំទិន្នន័យទាំងនោះទៅផ្សព្វផ្សាយតាមរយៈវេបសាយប្រឆាំងវីរុសវិទ្យា នៅថ្ងៃទី11 មករារួចហើយ។ បន្តពីនោះមក រដ្ឋបាលចិន ថែមទាំងបានបញ្ជូនទិន្នន័យផ្នែកអាការជំងឺ និងតួលេខអ្នកឆ្លងមេរោគ យឺតយ៉ាវរហូតដល់ទៅ 2សប្ដាហ៍ទៀត តាមរយៈការពិនិត្យមើលឯកសារផ្ទៃក្នុងរបស់ WHO ដែលអាចហុចផលឱ្យនាំឆ្ពោះទៅរកការពន្យឺតការឆ្លងរាលដាលបានតាំងពីដំបូង។

របាយការណ៍បានបញ្ជាក់ថា ការសម្ដែងការកោតសរសើររបស់ WHO ចំពោះរដ្ឋបាលចិននៅចំពោះមុខសហគមន៍ពិភពលោកនោះ គឺធ្វើឡើងដើម្បីព្យាយាមយកចិត្តស្ថាប័នរបស់ចិន ដើម្បីឱ្យពួកគេទាំងនោះបញ្ជូនទិន្នន័យផ្សេងៗទៀត ដែល WHO ត្រូវការ មកបន្ថែមទៀតឱ្យបានលឿនបំផុត ដែលរឿងនេះ ឯកសារផ្ទៃក្នុងរបស់ WHO បានបង្ហាញថា នៅផ្ទៃក្នុងស្ថាប័ន WHO វិញ ក្រុមមន្ត្រីដែលពាក់ព័ន្ធ បានសម្ដែងក្ដីមិនពេញចិត្តនៅក្នុងកិច្ចប្រជុំ កាលពីថ្ងៃទី6 មករា ដោយសារតែយល់ឃើញថា ទិន្នន័យដែលរដ្ឋបាលចិនផ្ញើមកឱ្យនោះ មិនទាន់គ្រប់គ្រាន់ចំពោះការវាយតម្លៃពីសមត្ថភាពក្នុងការឆ្លងរាតត្បាត ពីមនុស្ស ទៅមនុស្ស និងភាពប្រថុយប្រថានរបស់មនុស្សលោកនៅឡើយ។

លោកស្រីវេជ្ជបណ្ឌិត ម៉ារៀ ហ្វាន ឃើកហូហ្វ អ្នកជំនាញខាងរោគរាតត្បាតជនជាតិអាមេរិកាំងនៅក្នុងស្ថាប័ន WHO បច្ចុប្បន្នមានតំណែងជា ប្រធានក្រុមទប់ទល់នឹងមេរោគកូវីដ-19 របស់ WHO បានបញ្ជាក់ថា អង្គភាពផ្នែកវាយតម្លៃរបស់ WHO មានទិន្នន័យតិចតួចបំផុត មិនគ្រប់គ្រាន់ក្នុងការអនុញ្ញាតឱ្យរៀបផែនការទប់ទល់នឹងអ្វីបានឡើយ។

របាយការណ៍ស៊ើបព័ត៌មានបែបស៊ីជម្រៅនេះ កើតឡើងក្នុងអំឡុងពេលដែល WHO កំពុងប្រឈមនឹងសំឡេងរិះគន់យ៉ាងធ្ងន់ធ្ងរ ដោយសារទើបនឹងទទួលយកការតែងតាំងគណៈកម្មការឯករាជ្យមួយ ដើម្បីត្រួតពិនិត្យការដំណើរការរបស់គ្រប់ភាគី ដែលការថ្លែងសរសើររដ្ឋបាលចិន របស់ WHO នេះ ត្រូវបានថ្កោលទោសយ៉ាងខ្លាំងក្លា ពីលោកប្រធានាធិបតី ដូណាល់ ត្រាំ ថា កាន់ជើង និងសហការគ្នាជាមួយរដ្ឋបាលចិន រហូតដល់ថ្ងៃទី29 ឧសភា មេដឹកនាំសហរដ្ឋអាមេរិករូបនេះ បានប្រកាសកាត់ផ្ដាច់សម្ព័ន្ធភាពជាមួយ WHO ដែលហុចផលឱ្យ WHO លែងទទួលបានប្រាក់បរិច្ចាគពីសហរដ្ឋអាមេរិកដល់ទៅ 450លានដុល្លារ និងដែលធ្វើឱ្យមានការជំទាស់ពីបណ្ដាសម្ព័ន្ធមិត្តរបស់ខ្លួនជាច្រើន។

ផ្ទុយទៅវិញ លោកប្រធានាធិបតី ស៊ី ជីនភីង មេដឹកនាំចិន បានប្រកាសថា ចិននឹងផ្ដល់ប្រាក់គាំទ្រទៅ WHO ចំនួនដល់ទៅ 2ពាន់លានដុល្លារ ក្នុងរយៈពេលមិនលើស 2ឆ្នាំ ព្រមទាំងបានអះអាងថា ចិននឹងដំណើរការតាមសម្ព័ន្ធកិច្ច ដើម្បីគាំទ្រ WHO និងសហគមន៍ពិភពលោកយ៉ាងចំពេលវេលាទៀតផង។

ទាំងអស់នេះ WHO គឺជាស្ថាប័នដែលត្រូវបានបង្កើតឡើង ដើម្បីធ្វើជាមជ្ឈមណ្ឌលបញ្ជាការកណ្ដាលចម្បងរបស់សហគមន៍ពិភពលោក ក្នុងការទប់ទល់ក្នុងករណីកើតមានការឆ្លងរាតត្បាតធំៗនៃជំងឺផ្សេងៗ ប៉ុន្តែ គ្មានបទប្បញ្ញត្តិណាមួយផ្ដល់អំណាចឱ្យ WHO កៀបសង្កត់ប្រទេសជាសមាជិកបានឡើយ ត្រូវតែអាស្រ័យលើការស្ម័គ្រចិត្តរួមសហការទាំងស្រុង។

AP មើលឃើញថា ព័ត៌មានទាំងអស់ខាងលើ បានបង្ហាញថា WHO មិនបានរួមដៃគ្នាជាមួយរដ្ឋបាលចិន ដូចការចោទប្រកាន់របស់មេដឹកនាំសហរដ្ឋអាមេរិកឡើយ ប៉ុន្តែ WHO មិនអាចធ្វើការបានយ៉ាងពេញទំហឹងឡើយ ដោយសារតែការប្រគល់ទិន្នន័យដែលមានតិចតួចបំផុត តាមដែលអាចធ្វើបានរបស់រដ្ឋបាលចិន តាមបទប្បញ្ញត្តិតែប៉ុណ្ណោះ។

ករណីដែលកើតឡើងនេះ ហុចផលឱ្យ WHO ត្រូវតែខំព្យាយាមធ្វើគ្រប់វិធី ដើម្បីអង្វរសុំទិន្ន័យពីរដ្ឋបាលចិនបន្ថែមទៀត តែការពិតមួយដែលច្បាស់លាស់បំផុតនោះគឺ ការកោតសរសើររបស់អ្នកជំនាញការ និងបណ្ដាអ្នកវិទ្យាសាស្ត្រទូទាំងពិភពលោក ចំពោះអ្នកវិទ្យាសាស្ត្រ និងអ្នកជំនាញការរបស់ចិន ដែលធ្វើការបានឆាប់រហ័ស និងចំគោលដៅ៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

June 4, 2020

រដ្ឋមន្ត្រីក្រសួងការពារជាតិសហរដ្ឋអាមេរិក ជំទាស់ការប្រើកងទ័ពបំបែកបាតុកម្ម

Mark Esper បានធ្វើការជំទាស់ទៅនឹងការអនុវត្តច្បាប់ប្រឆាំងកុបកម្ម (Anti-Riot Act) ដែលប្រើប្រាស់កងទ័ពដើម្បីបំបែកហ្វូងបាតុករនៅទូទាំងប្រទេស។

រដ្ឋមន្ត្រីក្រសួងការពារជាតិសហរដ្ឋអាមេរិក លោក Mark Esper ថ្លែងថា យុទ្ធសាស្ត្រដាក់ពង្រាយកងទ័ពសម្រាប់ការអនុវត្តច្បាប់នានា គួរប្រើប្រាស់តែនៅក្នុង “ករណីបន្ទាន់ និងធ្ងន់ធ្ងរបំផុតប៉ុណ្ណោះ”។ រដ្ឋមន្ត្រីការពារជាតិរូបនេះ បានថ្លែងនៅក្នុងសន្និសីទសារព័ត៌មានមួននៅរដ្ឋធានីវ៉ាស៊ីងតោនកាលពីថ្ងៃទី3មិថុនាថា “យើងមិនមែនស្ថិតនៅក្នុងស្ថានភាពដូច្នេះទេ។ ខ្ញុំមិនគាំទ្រការប្រើច្បាប់ប្រឆាំងកុបកម្មនោះឡើយ”។

ដើម្បីអាចដាក់ពង្រាយកងទ័ពនៅសហរដ្ឋអាមេរិកក្នុងបំណងអនុវត្តច្បាប់អ្វីមួយ លោក Trump ត្រូវតែធ្វើឱ្យច្បាប់ប្រឆាំងកុបកម្មឆ្នាំ1807 ដំណើរការឡើងវិញ ដែលច្បាប់នេះត្រូវបានប្រើជាលើកចុងក្រោយនៅឆ្នាំ1992 ដើម្បីឆ្លើយតបទៅនឹងកុបកម្មនៅ Los Angeles។

លោក Trump កាលពីដើមសប្ដាហ៍នេះបានថ្លែងថា លោកអាចប្រើប្រាស់កងទ័ពដើម្បីទប់ទល់នឹងកុបកម្មនៅក្នុងបណ្ដាទីក្រុង ប៉ុន្តែ លោកមិនទាន់បានធ្វើឱ្យច្បាប់ប្រឆាំងកុបកម្មដំណើរការឡើងវិញនៅឡើយ។ ទាហានចំនួន1,600នាក់បានបោះជំរំនៅខាងក្រៅរដ្ឋធានីវ៉ាស៊ីងតោន ដើម្បីត្រៀមខ្លួនជាស្រេចសម្រាប់ការចូលធ្វើអន្តរាគមន៍ក្នុងរដ្ឋធានីបើសិនជាចាំបាច់។

ក្នុងសន្និសីទសារព័ត៌មាន លោក Mark Esper បានរិះគន់ខ្លាំងៗទៅលើសកម្មភាពរបស់ប៉ូលិសក្រុង Minneapolis ដែលបានធ្វើឱ្យបុរសស្បែកខ្មៅម្នាក់ ឈ្មោះ Floyd ស្លាប់កាលពីថ្ងៃទី25ឧសភា ដោយការប្រើជង្គង់សង្កត់ក នៅក្នុងពេលចាប់ខ្លួនជនរងគ្រោះនេះ។ លោក Mark Esper បានហៅអំពើនេះថាជា “អំពើមនុស្សឃាត” និងជា “ឧក្រិដ្ឋកម្មដ៏សាហាវ”។

បាតុកម្មទាមទារយុត្តិធម៌ជូនសពលោក Floyd ត្រូវបានធ្វើឡើងនៅក្នុងទីក្រុងជាង140នៅសហរដ្ឋអាមេរិក។ ក្រុមជ្រុលនិយម និងក្រុមឱកាសនិយមមួយចំនួន បានប្រើប្រាស់ហេតុការណ៍នេះដើម្បីឆក់ប្លន់ និងបំផ្លិចបំផ្លាញទ្រព្យសម្បត្តិសាធារណៈ និងឯកជន។ ទីក្រុងយ៉ាងតិច40 ត្រូវបានដាក់បម្រាមគោចរដើម្បីទប់ទល់នឹងកុបកម្ម។ ទាហានការពារជាតិជាង20,000នាក់ក៏ត្រូវបានដាក់ពង្រាយដើម្បីជួយដល់កងកម្លាំងនគរបាលក្នុងការអនុវត្តច្បាប់នៅវ៉ាស៊ីងតោន និង28រដ្ឋផ្សេងទៀតផងដែរ៕

ប្រភព៖ សារព័ត៌មានបរទេស

June 4, 2020

មិត្តរបស់ George Floyd ស្រែកថា “យើងនឹងហែកកម្ទេចប្រព័ន្ធនេះពីក្រៅទៅក្នុង” ខណៈមនុស្ស 60,000នាក់ ប្រមូលផ្ដុំគ្នា រំឭកវិញ្ញាណក្ខន្ធជនរងគ្រោះ

ទីក្រុង Houston ដែលជាទីកំណើតរបស់ George Floyd បានប្រារព្ធពិធីហែក្បួនដើម្បីរំឭកវិញ្ញាណក្ខន្ធបុរសស្បែកខ្មៅដែលត្រូវបានប៉ូលិសសង្កត់កស្លាប់កាលពីពេលថ្មីៗនេះ ដោយមានមនុស្សចូលរួមប្រមាណ 60,000នាក់។

ពិធីហែក្បួនរំឭក និងគោរពវិញ្ញាណក្ខន្ធរបស់ George Floyd ត្រូវបានធ្វើឡើងនៅទីក្រុង Houston រដ្ឋ Texas កាលពីថ្ងៃទី2មិថុនា ដោយមានការជួយជ្រោមជ្រែងពីសិល្បករល្បីឈ្មោះក្នុងតំបន់ នោះគឺអ្នកចម្រៀង Rapper ឈ្មោះ Trae Tha Truth ដែលជាមិត្តជិតស្និទ្ធរបស់ Floyd និងអ្នកចម្រៀង Bun B។ អភិបាលក្រុង និងអធិការនគរបាលក្រុង Houston ក៏បានចូលរួមផងដែរ។

តារាចម្រៀងរ៉ែប លោក Trae Tha Truth ជាមិត្តជិតស្និទ្ធរបស់ Floyd

George Floyd បានរស់នៅអស់រយៈពេល46ឆ្នាំក្នុងតំបន់ដែលភាគច្រើនសុទ្ធតែជាជនជាតិស្បែកខ្មៅ នៅទីក្រុង Houston ដែលមានចម្ងាយពីកន្លែងប្រារព្ធពិធីរំឭកវិញ្ញាណក្ខន្ធប្រមាណជា2គីឡូម៉ែត្រ។ George Floyd ទៅធ្វើការនិងរស់នៅក្នុងទីក្រុង Minneapolis រដ្ឋ Minnesota បានមួយរយៈពេលខ្លីប៉ុណ្ណោះ។

“យើងនឹងជំនួសមុខឱ្យគាត់ (George Floyd)។ យើងនឹងហែកកម្ទេចប្រព័ន្ធនេះពីក្រៅទៅក្នុង។ George Floyd កំពុងតែសម្លឹងពីលើមើលមកយើង ហើយគាត់កំពុងញញឹម” Trae Tha Truth និយាយនៅចំពោះមុខមហាជនដែលប្រមូលផ្ដុំគ្នានៅខាងមុខ។

បន្ទាប់ពីពិធីបួងសួង ក្រុមមនុស្សបានចាកចេញពីតំបន់សួនច្បារ ឆ្ពោះទៅកាន់សាលាក្រុង។ Sheila Jackson Lee ដែលជាតំណាងរាស្ត្រមកពីបក្សប្រជាធិបតេយ្យ នៅតំបន់ដែល Floyd រស់នៅ បានប្រកាសថា នឹងស្នើបង្កើតច្បាប់កែទម្រង់កងកម្លាំងនគរបាលនៅថ្ងៃទី4មិថុនាខាងមុខ ដើម្បីរំឭកដល់វិញ្ញាណក្ខន្ធរបស់ Floyd។

អភិបាលក្រុង Houston លោក Sylvester Turner ដែលជាបុរសស្បែកខ្មៅម្នាក់ដែរនោះ ថ្លែងថា លោកយល់អំពីការឈឺចាប់របស់ពួកគេ ហើយពួកគេកំពុងធ្វើឱ្យមានផលប៉ះពាល់។ “យើងមិនត្រឹមតែស្ដាប់នោះទេ តែយើងត្រូវតែធ្វើសកម្មភាព។ ខ្ញុំចង់ឱ្យអ្នករាល់គ្នាដឹងថា ការហែក្បួន និងការធ្វើបាតុកម្មរបស់អ្នករាល់គ្នា មិនមែនគ្មានប្រយោជន៍នោះឡើយ”។

ទីក្រុង Houston ហាក់ដូចមិនមានបាតុកម្មហិង្សាកើតឡើងដូចទៅនឹងទីក្រុងផ្សេងៗនៅសហរដ្ឋអាមេរិកនោះទេ។ David Hill ដែលជាគ្រូអាចារ្យ និងជាសកម្មជនសង្គមម្នាក់នៅទីក្រុង Houston ដែលបានស្គាល់ច្បាស់អំពីគ្រួសាររបស់ Floyd បានថ្លែងថា “អ្នកដែលបានស្គាល់ George Floyd បានជួយបង្កើតបរិយាកាសសម្រាប់ Houston។ George Floyd ជាមនុស្សស្លូតត្រង់ និងជាមនុស្សផ្អែមល្ហែមម្នាក់”។

Floyd បានស្លាប់ដោយសារ “បេះដូង និងសួតលែងដំណើរការ ព្រោះតែត្រូវប៉ូលីសចាប់ក្រៀក និងសង្កត់ក” កាលពីថ្ងៃទី25ឧសភា នៅពេលត្រូវបានចាប់ខ្លួនពីបទចាយលុយក្លែងក្លាយ។ ហេតុការណ៍នេះបាននាំឱ្យមានបាតុកម្មជាច្រើនកើតឡើងនៅក្នុងទីក្រុងយ៉ាងតិចចំនួន140នៅសហរដ្ឋអាមេរិក ដើម្បីទាមទារយុត្តិធម៌ជូន Floyd៕

ប្រភព៖ សារព័ត៌មានបរទេស

June 3, 2020

ប្អូនរបស់ George Floyd អំពាវនាវទៅកាន់ក្រុមបាតុករ

Terrence Floyd ដែលជាប្អូនប្រុសរបស់ George Floyd បានស្រែកអំពាវនាវដល់ក្រុមបាតុករនានា ឱ្យឈប់ធ្វើសកម្មភាពហិង្សា និងឆក់ប្លន់ ហើយគួរជំនួសមកវិញដោយការបោះឆ្នោតជ្រើសរើសអ្នកដែលស័ក្ដិសមសម្រាប់ការដឹកនាំប្រទេស នាពេលខាងមុខ។

“ខ្ញុំដឹងថា អ្នករាល់គ្នាពិតជាមិនសប្បាយចិត្ត ប៉ុន្តែ ប្រហែលជាមិនស្មើពាក់កណ្ដាលនៃការកើតទុក្ខរបស់ខ្ញុំនោះទេ” លោក Terrence Floyd ថ្លែងបែបនេះកាលពីថ្ងៃទី1មិថុនា នៅឯទីតាំងគោរពវិញ្ញាណក្ខន្ធបណ្ដោះអាសន្ននាទីក្រុង Minneapolis រដ្ឋ Minnesota សហរដ្ឋអាមេរិក ជាកន្លែងដែល George Floyd ត្រូវបានប៉ូលីស Derek Chauvin ចាប់សង្កត់ករហូតដល់ស្លាប់។

Terrence បន្ថែមថា “ដូច្នេះ បើសិនជាខ្ញុំមិនមែនជាអ្នកខឹងខ្លាំង និងបង្កឱ្យមានចលាចល អស្ថិរភាពក្នុងសង្គម តើអ្នករាល់គ្នាកំពុងធ្វើអ្វី? សកម្មភាពទាំងនោះមិនបានជួយឱ្យប្អូនប្រុសរបស់ខ្ញុំរស់ឡើងវិញឡើយ។ យើងខ្ញុំជាគ្រួសារសន្តិភាព និងគោរពព្រះ”។

Floyd បានស្លាប់ដោយសារ “បេះដូង និងសួតលែងដំណើរការ ព្រោះតែត្រូវប៉ូលីសចាប់ក្រៀក និងសង្កត់ក” កាលពីថ្ងៃទី25ឧសភា នៅពេលត្រូវបានចាប់ខ្លួនពីបទចាយលុយក្លែងក្លាយ។ ហេតុការណ៍នេះបាននាំឱ្យមានបាតុកម្មជាច្រើនកើតឡើងនៅក្នុងទីក្រុងយ៉ាងតិចចំនួន140នៅសហរដ្ឋអាមេរិក ដើម្បីទាមទារយុត្តិធម៌ជូន Floyd។ បាតុកម្មទាំងនោះ បាននាំឱ្យមានអំពើហិង្សា ការឆក់ប្លន់ និងការបំផ្លិចបំផ្លាញទ្រព្យជាច្រើនកើតឡើង ហើយមនុស្សប្រមាណជា4,400នាក់ត្រូវបានចាប់ខ្លួន។

Terrence និយាយជាមួយក្រុមបាតុករថា ការឆក់ប្លន់ និងបំផ្លិចបំផ្លាញទ្រព្យសម្បត្តិអាចបំពេញចិត្តយើង ឬត្រឹមត្រូវនៅពេលនេះ ប៉ុន្តែចុងក្រោយវានៅតែមិនបានប្ដូរផ្លាស់អ្វីនោះឡើយ។ ជាងនេះ វានឹងធ្វើឱ្យខូចខាតដល់មូលហេតុនៃការក្រោកតវ៉ារបស់យើងប្រឆាំងនឹងអំពើហិង្សារបស់ក្រុមប៉ូលីសកាលពីដំបូង។

ប្អូនប្រុសរបស់ Terrence បន្តថា “ប្រការដូចគ្នានេះធ្លាប់បានកើតឡើងនៅរាល់ពេលមានអំពើហិង្សាពីប៉ូលីស។ អ្នកទាំងឡាយតែងតែធ្វើបាតុកម្ម បំផ្លិចបំផ្លាញគ្រប់យ៉ាង ប៉ុន្តែពួកគេ (ប៉ូលីស) នៅតែមិនកែប្រែ។ អ្នករាល់គ្នាដឹងថាមកពីហេតុអ្វីទេ? ព្រោះថា នោះមិនមែនជាកិច្ចការដែលពួកគេធ្វើ ប៉ុន្តែពួកយើងទេដែលជាអ្នកធ្វើ។ ដូច្នេះ សូមធ្វើវាដោយប្រើវិធីផ្សេង”។

“សូមឈប់គិតថា សម្លេងរបស់យើងមិនមានសារសំខាន់ទៀតទៅ ហើយនាំគ្នាទៅបោះឆ្នោត។ ចូរកុំរង់ចាំស្ដាប់ការនិយាយពីអ្នកដទៃដែលថា អ្នកនេះ អ្នកនោះ យ៉ាងដូចម្ដេច។ ចូរស្វែងយល់ដោយខ្លួនឯងអំពីមនុស្សដែលអ្នកបានបោះឆ្នោតជ្រើសរើស” នេះជាសម្ដីប្រកបដោយសន្តិភាពរបស់ Terrence ដែលជាប្អូនប្រុសរបស់លោក George Floyd៕

ប្រភព៖ សារព័ត៌មានបរទេស

June 3, 2020

អ្នកថតសកម្មភាពប៉ូលីសសង្កត់ក George Floyd រហូតដល់ស្លាប់ បានបញ្ចេញមតិ

Darnella Frazier អាយុ17ឆ្នាំ បានឱ្យដឹងថា នាងទទួលបានសាររិះគន់ជាច្រើននៅលើ Facebook បន្ទាប់ពីនាងបានបង្ហោះវីដេអូបង្ហាញអំពី George Floyd ត្រូវប៉ូលីសប្រើជង្គង់សង្កត់ករហូតដល់ស្លាប់។

Frazier រៀបរាប់ថា មនុស្សជាច្រើនបានសួរនាងថា ហេតុអ្វីមិនសង្គ្រោះ Floyd ជំនួសឱ្យការឈរថតវីដេអូជិត10នាទីទៅវិញ ក្នុងពេលដែលប៉ូលីសកំពុងសង្កត់កបរុសស្បែកខ្មៅអាយុ46ឆ្នាំនេះនៅលើដី? Frazier បកស្រាយថា នាងនៅក្មេងពេក និងមិនហ៊ានប្រឆាំងនឹងក្រុមប៉ូលីស។

Frazier និយាយថា “ខ្ញុំមិនជឿថា អ្នកទាំងឡាយដែលមិនបានស្ថិតក្នុងស្ថានភាពដូចខ្ញុំ យល់អំពីមូលហេតុ និងអារម្មណ៍របស់ខ្ញុំ នៅពេលដែលខ្ញុំធ្វើដូច្នេះនោះឡើយ”។ នាងថ្លែងថា នាងមិនចង់ឃើញអ្នកណាម្នាក់ផ្សេងទៀតធ្លាក់ទៅក្នុងស្ថានភាពដូច Floyd។ នាងក៏ខ្លាចប៉ូលីសធ្វើការសងសឹកផងដែរ។

នារីវ័យ17ឆ្នាំខាងលើបន្តថា “បើសិនជាមិនមានខ្ញុំនោះទេ ប៉ូលីស4នាក់នោះក៏មិនត្រូវបានបណ្ដេញចេញពីការងារ។ ពួកគេប្រាកដជានឹងលាក់បាំងការពិតចំពោះរឿងនេះ។ ជំនួសឱ្យការរិះគន់ អ្នកគួរតែអរគុណខ្ញុំ ព្រោះថា បើជាសាច់ញាតិរបស់អ្នក អ្នកក៏ប្រាកដជាចង់ដឹងការពិត”។

ឃ្លីបវីដេអូមួយដែលត្រូវបានចែករំលែកដោយ NowThis បង្ហាញថា កាលពីថ្ងៃទី26ឧសភា នាង Fazier បានត្រលប់មកកាន់កន្លែងដែល Floyd ត្រូវប៉ូលីសសម្លាប់ និងបានយំនៅពេលនឹកឃើញដល់ហេតុការណ៍នោះ។ Frazier បានយំ និងឱបបាតុករនៅទីនោះ។

លោក George Floyd ដែលត្រូវបានប៉ូលីសសង្កត់ករហូតដល់ស្លាប់

ឃ្លីបវីដេអូដែលត្រូវបាន Frazier ចែករំលែកកាលពីថ្ងៃទី25ឧសភា បានបង្ហាញអំពីសកម្មភាពប៉ូលីស Derek Chauvin នៅទីក្រុង Minneapolis រដ្ឋ Minnesota កំពុងសង្កត់ក Floyd ដោយប្រើជង្គង់រហូតដល់9នាទី។ នៅពេលជិតដាច់ដង្ហើម Floyd បានស្រែកអង្វរថា គាត់មិនអាចដកដង្ហើមបាន ដែលដូចបេះបិទទៅនឹងសម្ដីចុងក្រោយរបស់ Eric Garner ដែលបានស្លាប់កាលពីឆ្នាំ2014 ក្រោមដៃរបស់ប៉ូលីសនៅ New York ហើយបានក្លាយជាកំហឹងរបស់ចលនា “Black Lives Matter” (ជីវិតរបស់ជនស្បែកខ្មៅក៏សំខាន់)។ បុរសស្បែកខ្មៅ Floyd ក្រោយមកក៏បានស្លាប់នៅឯមន្ទីរពេទ្យ។

របាយករណ៍នៃការធ្វើកោសល្យវិច័យបានបង្ហាញថា Floyd បានស្លាប់ដោយសារ “បេះដូង និងសួតលែងដំណើរការព្រោះតែត្រូវប៉ូលីសចាប់ក្រៀក និងសង្កត់ក”។ របាយករណ៍ក៏បានបន្ថែមថា “នេះជាករណីមនុស្សឃាត”។ បញ្ហាសុខភាពរបស់ Floyd ក៏ត្រូវបានលើកឡើង “គាត់មានជំងឺបេះដូង និងលើសឈាម(សម្ពាធឈាមខ្ពស់) និងប្រើប្រាស់ថ្នាំបំបាត់ការឈឺចាប់ រួមនឹងការប្រើប្រាស់គ្រឿងញៀន”។

ប៉ូលីស4នាក់ដែលជាប់ពាក់ព័ន្ធនឹងបញ្ហាខាងលើត្រូវបានបណ្ដេញចេញពីមុខតំណែង។ Chauvin ត្រូវបានចាប់ខ្លួន និងត្រូវចោទពីបទសម្លាប់មនុស្សក្នុងកម្រិត3។ ហេតុការណ៍នេះបាននាំឱ្យមានបាតុកម្មជាច្រើនកើតឡើងនៅក្នុងទីក្រុងយ៉ាងតិចចំនួន140នៅសហរដ្ឋអាមេរិក ដើម្បីទាមទារយុត្តិធម៌ជូន Floyd។ បាតុកម្មទាំងនោះ បាននាំឱ្យមានអំពើហិង្សាជាច្រើនកើតឡើង ហើយមនុស្សប្រមាណជា4,400នាក់ត្រូវបានចាប់ខ្លួន។

គ្រួសារសពលោក Floyd ឱ្យដឹងថា ពិធីគោរពវិញ្ញាណក្ខន្ធរបស់គាត់នឹងត្រូវបានធ្វើឡើងនៅថ្ងៃទី8និងទី9 ខែមិថុនានៅទីក្រុង Houston ក្នុងរដ្ឋ Texas៕

ប្រភព៖ សារព័ត៌មានបរទេស

June 3, 2020

បារាំងបញ្ជូនប៉ូលិសបង្រាបកុបកម្ម ទៅទប់ទល់នឹងបាតុករ

ប៉ូលិសបង្រាបកុបកម្មរបស់បារាំង ប្រើប្រាស់គ្រាប់បែកផ្សែងបង្ហូរទឹកភ្នែកដើម្បីបំបែកហ្វូងបាតុករនៅរដ្ឋធានីប៉ារីស នៅពេលដែលបាតុករនាំគ្នាដុតភ្លើងនៅលើដងផ្លូវ ក្រោយពីការស្លាប់របស់ George Floyd នៅសហរដ្ឋអាមេរិក។

ក្រុមបាតុករនៅទីក្រុងបារីស កាលពីម្សិលមិញបាននាំគ្នាលុតជង្គង់ និងលើកកណ្ដាប់ដៃក្នុងបាតុកម្មចម្រុះជាតិសាសន៍ដែលភាគច្រើនប្រកបដោយសន្តិវិធី និងមានករណីតានតឹងមួយចំនួនតូចប៉ុណ្ណោះ ដោយសារមានការដុតភ្លើងនៅតាមដងផ្លូវ ប៉ុន្តែ ត្រូវបានក្រុមពន្លត់អគ្គិសភ័យចាត់ការទាន់ពេល។

សមត្ថកិច្ចនៃទីក្រុងបារីស ប្រទេសបារាំង បានឱ្យដឹងថា យ៉ាងហោចណាស់មានមនុស្ស20,000នាក់បានចូលរួមធ្វើបាតុកម្ម ដោយមិនអើពើដល់បម្រាមទាក់ទិននឹង COVID-19 ដើម្បីបង្ហាញការគោរពដល់ George Ployd ដែលបានស្លាប់នៅពេលប៉ូលិសចាប់ខ្លួននៅសហរដ្ឋអាមេរិក និង Adama Traore ដែលជាជនជាតិស្បែកខ្មៅនៅបារាំងបានស្លាប់ក្នុងពេលត្រូវឃុំខ្លួនកាលពីឆ្នាំ2016។

បាតុករមួយចំនួនបានឱ្យដឹងថា ស្ថានភាពហិង្សារបស់ក្រុមសមត្ថកិច្ច បានប្រែជាអាក្រក់ឡើងៗនៅក្នុងការអនុវត្តវិធានការទប់ស្កាត់ការឆ្លងវីរុស COVID-19 ដែលបណ្ដាលឱ្យកម្មករនៅជាយក្រុង ដែលជាក្រុមភាគតិចក្នុងសង្គម កាន់តែក្ដៅក្រហាយព្រោះតែអយុត្តិធម៌។

ប៉ូលិសបានបង្ហាញវត្តមានតិចជាង បើធៀបនឹងបាតុកម្មផ្សេងៗនៅបារីស។ ពួកគេបានបាញ់ឧស្ម័នបង្ហូរទឹកភ្នែក ក្រោយមកក៏បានផ្ទុះអាវុធនៅពេលបាតុករគប់វត្ថុនានាទៅកាន់ប៉ូលិស។ ការប៉ះទង្គិចគ្នាប្រកបដោយភាពតានតឹងក៏បានកើតឡើងនៅក្នុងបាតុកម្មដែលទាក់ទិននឹងរឿងខាងលើនៅឯទីក្រុង Marseille ផងដែរ។

បាតុកម្មនានាបានចាប់ផ្ដើមផ្ទុះឡើងនៅទីក្រុង Minneapolis ក្នុងរដ្ឋ Minnesota សហរដ្ឋអាមេរិក ជាកន្លែងដែលបុរសជនជាតិស្បែកខ្មៅម្នាក់ឈ្មោះ George Floyd ត្រូវបានប៉ូលីសសង្កត់ករហូតដល់ស្លាប់ ធ្វើឱ្យមានការក្ដៅក្រហាយដោយសារស្ថានភាពរើសអើងពូជសាសន៍ និងអំពើហិង្សារបស់ប៉ូលីស។ តំបន់ជាច្រើននៅសហរដ្ឋអាមេរិក ត្រូវបានដាក់បម្រាមគោចរ និងដាក់ពង្រាយទាហានការពារជាតិ ក្នុងគ្រាដែលមានក្រុមជ្រុលនិយមនាំគ្នាឆក់ប្លន់ និងបំផ្លិចបំផ្លាញទ្រព្យសម្បត្តិសាធារណៈ។

បាតុកម្មនេះ ក្រោយមកក៏បានរាលដាលដល់ប្រទេសជាច្រើនក្នុងពិភពលោក ដូចជា អូស្ត្រាលី ហូឡង់ អ៊ីស្រាអែល ដោយនាំគ្នាលើកបដា និងស្រែកថា “ខ្ញុំមិនអាចដកដង្ហើម”។ ការខឹងសម្បានេះក៏ត្រូវបានបង្ហាញនៅលើបណ្ដាញសង្គមផងដែរ នៅពេលប្រជាជនស៊ុយអែតរាប់ពាន់នាក់បានចូលរួមធ្វើបាតុកម្មតាមអ៊ីនធើណិត៕

ប្រភព៖ AP

June 3, 2020

Apple និង Amazon រួមនឹងក្រុមហ៊ុនធំៗ បញ្ចេញសកម្មភាពអ្វីខ្លះក្នុងគ្រាមានបាតុកម្មច្រើនបែបនេះ?

បាតុកម្មជាច្រើន និងជាបន្តបន្ទាប់ដែលត្រូវបានបង្កើតឡើងក្រោយពីការស្លាប់របស់បុរសស្បែកខ្មៅម្នាក់ឈ្មោះ Floyd បានរីករាលដាលទូទាំងសហរដ្ឋអាមេរិក ធ្វើឱ្យក្រុមហ៊ុនធំៗ ដូចជា Apple, Amazon និង Target ជាដើម ត្រូវបញ្ចេញមតិ។
ក្រុមហ៊ុន Amazon បានបង្ហោះសារនៅលើ Twitter អំពី “សង្គ្រាមប្រឆាំងនឹងការរើសអើងពូជសាសន៍ និងអយុត្តិធម៌” ប៉ុន្តែ មិនទាន់បានប្រកាសឱ្យដឹងអំពីគម្រោង ឬវិធីដែលក្រុមហ៊ុននេះនឹងលើកយកមកប្រើដើម្បីដោះស្រាយបញ្ហានេះនៅឡើយ។

លោក Evan Spiegel ដែលជា CEO របស់ក្រុមហុ៊ន Snap

CEO របស់ក្រុមហុ៊ន Snap លោក Evan Spiegel បានអំពាវនាវឱ្យបង្កើតគណៈកម្មធិការទាមទារសំណងមួយនៅសហរដ្ឋអាមេរិកដើម្បីទប់ទល់នឹងការរើសអើងពូជសាសន៍។ លោក Evan ក៏បានសង្កត់ធ្ងន់ថា ក្រុមហ៊ុន Snap នឹងបរិច្ចាគប្រាក់ដើម្បីជួយដល់អង្គការនានាដែលធ្វើសកម្មភាពលើកកម្ពស់យុត្តិធម៌ និងភាពស្នើគ្នាផងដែរ។

ចំពោះ CEO របស់ក្រុមហ៊ុន Target គឺលោក Brian Cornell វិញ បានប្រកាសថា នឹងផ្ដល់ជំនួយមនុស្សធម៌ រួមមានជាអាហារ និងរបស់របរចាំបាច់ដល់សាធារណជន។ ទន្ទឹមនឹងនេះ ក្រុមហ៊ុន Target ក៏នឹងបន្តផ្ដល់ប្រាក់ខែចំនួន2ខែបន្ថែមទៀតដល់បណ្ដាបុគ្គលិកនៅហាងរបស់ខ្លួនដែលត្រូវបានបិទទ្វារ។ ក្រុមហ៊ុន Target ក៏បានចុះកិច្ចសន្យានៅក្នុងសំបុត្រដែលទទួលបានពីអង្គការ Children’s Minnesota ថា នឹងចូលរួមដោះស្រាយបញ្ហារើសអើងពូជសាសន៍ជាមួយនឹងអង្គការនេះ។

ក្រុមហ៊ុន Starbucks ក៏បានជជែកជាមួយដៃគូរបស់ខ្លួនអំពីការរើសអើងពូជសាសន៍។ CEO របស់ Starbucks លោក Kevin Johnson សង្កត់ធ្ងន់ថា “សន្យារបស់យើងជាមួយនឹងដៃគូ គឺការបំពេញបេសកកម្ម និងតម្លៃរបស់យើងជារៀងរាល់ថ្ងៃ”។

CEO របស់ក្រុមហ៊ុន Facebook គឺលោក Mark Zuckerberg ក៏បានសន្យាថានឹងផ្ដល់ជំនួយ10ដុល្លារដើម្បីទប់ស្កាត់គ្រោះរើសអើងពូជសាសន៍។ លោក Zuckerberg ថ្លែងថា “ព្រឹត្តិការណ៍ដ៏ឈឺចាប់កាលពីសប្ដាហ៍មុនបានរំឭកយើងថា ប្រទេសជាតិយើងត្រូវការពេលវេលាយូរដើម្បីឱ្យបុគ្គលនីមួយៗទទួលបានសេរីភាពជាមួយនឹងភាពជាមនុស្ស និងសន្តិភាព”។ ប៉ុន្តែ Mark Zuckerberg នៅតែត្រូវបានគេរិះគន់ ដោយសារតែមិនបានធ្វើសកម្មភាពអ្វីសោះចំពោះសាររបស់លោក Trump ដែលហាក់ដូចជាគំរាមប្រើកម្លាំងទ័ពមកលើក្រុមបាតុករ។

ចំណែកក្រុមហ៊ុន The Walt Disney បានប្រកាសនៅលើ Twitter ថា “យើងប្រឆាំងចំពោះអំពើប្រកាន់ពូជសាសន៍។យើងគាំទ្រការបង្រួបបង្រួម។ យើងនៅជាមួយបុគ្គលិកស្បែកខ្មៅ និងសហគមន៍អ្នកមានសម្បុរស្បែកខ្មៅទាំងអស់។ យើងត្រូវតែសាមគ្គី និងបញ្ចេញមតិ”។

រីឯក្រុមហ៊ុន TokTok វិញ បានធ្វើការសុំទោសចំពោះhashtag “#BlackLivesMatter” និង “#GeorgeFloyd” ដែលបានបង្ហាញចំនួនអ្នកមើលស្មើ “0” ខណៈដែលការពិត វាមានដល់ទៅរាប់ពាន់លាននាក់ចូលមើល។ ក្រុមហ៊ុននេះបានបកស្រាយថា នេះជាកំហុសបច្ចេកទេស។ TikTok បានសន្យាថានឹងបរិច្ចាគ 3លានដុល្លារសម្រាប់មូលនិធីដើម្បីសហគមន៍ និង1លានដុល្លារផ្សេងទៀតសម្រាប់កម្មវិធីទប់ស្កាត់ការរើសអើងពូជសាសន៍ និងបញ្ហាអយុត្តិធម៌សង្គម។

CEO របស់ក្រុមហ៊ុន Apple គឺលោក Tim Cook បានដកស្រង់សម្ដីរបស់ Martin Luther King Jr. ៖ “សន្តិភាពអវិជ្ជមានដែលបង្កប់ដោយជម្លោះនឹងមិនអាចមកជំនួសសន្តិភាពវិជ្ជមានបានទេ ដោយមានវត្តមានរបស់យុត្តិធម៌”។ New York Times បានឱ្យដឹងថា នៅក្នុងកំណត់ហេតុមួយផ្ញើជូនបុគ្គលិក Apple លោក Tim Cook បានសន្យាថានឹងបរិច្ចាគប្រាក់ជំនួយទៅឱ្យបណ្ដាអង្គការមិនស្វែងរកកម្រៃផងដែរ ដើម្បីដោះស្រាយបញ្ហាអយុត្តិធម៌សង្គម៕

ប្រភព៖ សារព័ត៌មានបរទេស

June 2, 2020

Category: អន្តរជាតិ