Category: អន្តរជាតិ

ហុងកុងចាប់ខ្លួនបាតុករ370នាក់ ក្នុងនោះមាន10នាក់ត្រូវបានចោទពីបទ “រំលោភច្បាប់សន្តិសុខថ្មី”
ប៉ូលិសហុងកុងបានចាប់ខ្លួនមនុស្សប្រមាណជា370នាក់ ក្នុងនោះមាន10នាក់ត្រូវបានចាប់ខ្លួនដោយយោងទៅលើច្បាប់សន្តិសុខថ្មីរបស់ហុងកុង ខណៈដែលមានមនុស្សរាប់ពាន់នាក់បានចេញធ្វើបាតុកម្ម។
កងកម្លាំងប៉ូលិសហុងកុងបានបាញ់ទឹក គ្រាប់ជ័រ និងផ្សែងបង្ហូរទឹកភ្នែកដើម្បីបំបែកហ្វូងបាតុករដែលបានចេញធ្វើបាតុកម្មកាលពីម្សិលមិញ នៅពេលដែលមនុស្សរាប់ពាន់នាក់បាននាំគ្នាហែក្បួនដើម្បីរំឭកដល់ថ្ងៃដែលប្រទេសអង់គ្លេសប្រគល់ហុងកុងមកឱ្យប្រទេសចិន ដោយមិនខ្វល់អំពីបម្រាមរបស់អាជ្ញាធរ។
បាតុករចំនួន10នាក់ដែលត្រូវបានចាប់ខ្លួនទៅតាមច្បាប់សន្តិសុខថ្មី ព្រោះតែពួកគេបាននាំយកទង់ឯករាជ្យ ស្លាកសម្រាប់បិទ និងខិត្តប័ណ្ណទៅតាមខ្លួន។ “ការធ្វើយុទ្ធនាការដើម្បីឯករាជ្យសម្រាប់ហុងកុងគឺជារឿងខុសច្បាប់” នេះបើតាមសម្ដីរបស់មេដឹកនាំផ្នែកសន្តិសុខហុងកុង លោក John Lee។
នៅក្នុងហេតុការណ៍ខាងលើនេះ មានមន្ត្រីរដ្ឋាភិបាលចំនួន7នាក់បានរងរបួស ក្នុងនោះម្នាក់ត្រូវបានចាក់នឹងរបស់ស្រួចចាំស្មា ខណៈកំពុងចាប់ខ្លួនបាតុករ ចំណែកមន្ត្រី3រូបផ្សេងទៀតរងរបួសដោយសារត្រូវគេជិះម៉ូតូបុក។
ទីក្រុងប៉េកាំងបានប្រកាសថា ច្បាប់សន្តិសុខថ្មីនេះនឹងជួយរក្សាសណ្ដាប់ធ្នាប់ក្នុងតំបន់រដ្ឋបាលពិសេសហុងកុង ក្រោយពីមានអស្ថិរភាពជិតមួយឆ្នាំមកនេះ។ ច្បាប់សន្តិសុខហុងកុងត្រូវបានប្រធានាធិបតីចិន លោក ស៊ី ជីនភីង ចុះហត្ថលេខាកាលពីល្ងាចថ្ងៃទី30មិថុនាកន្លងទៅ បន្ទាប់ពីច្បាប់នេះត្រូវបានគណៈកម្មធិការអចិន្ត្រៃយ៍នៃរដ្ឋសភាចិន អនុម័តក្នុងសម័យប្រជុំលើកទី20។
ច្បាប់នេះដាក់ទោសឧក្រិដ្ឋចំពោះសកម្មភាពល្មើសចំនួន4ប្រភេទ រួមមាន សកម្មភាពផ្ដាច់ខ្លួន រដ្ឋប្រហារ ភេរវកម្ម និងអំពើឃុបឃិតជាមួយបរទេស ឬក្រុមមនុស្សនៅខាងក្រៅដើម្បីបង្កគ្រោះថ្នាក់ដល់សន្តិសុខជាតិ។ ជនណាដែលបានរំលោភលើច្បាប់នេះ អាចត្រូវបានកាត់ទោសឱ្យជាប់ពន្ធនាគារអស់មួយជីវិត ហើយសិទ្ធិក្នុងការប្ដឹងនិងកាត់ទោសលើ “ករណីធ្ងន់ធ្ងរ” គឺស្ថិតក្រោមអាជ្ញាធរថ្នាក់ជាតិ។
រដ្ឋមន្ត្រីការបរទេសសហរដ្ឋអាមេរិក លោក Mike Pompeo និងក្រុមអ្នកតំណាងរាស្ត្រអាមេរិកាំង បានសម្ដែងការមិនសប្បាយចិត្តនៅពេលដែលចិនអនុម័តច្បាប់សន្តិសុខថ្មីនេះ។ សហភាពអឺរ៉ុប (EU) ក៏បានប្រកាសថា ច្បាប់នេះមានហានិភ័យបង្កឱ្យមានការធ្លាក់ចុះយ៉ាងធ្ងន់ធ្ងរនូវកម្រិតនៃស្វ័យគ្រប់គ្រងរបស់ទីក្រុងហុងកុង ហើយទន្ទឹមនឹងនេះក៏ផ្ដល់ផលអាក្រក់ដល់ឯករាជ្យភាពផ្នែកយុត្តិធម៌ និងនីតិរដ្ឋរបស់តំបន់រដ្ឋបាលពិសេសនេះផងដែរ។
ប្រទេសអង់គ្លេសក៏បានប្រកាសអនុញ្ញាតឱ្យពលរដ្ឋហុងកុងដែលមានលក្ខខណ្ឌគ្រប់គ្រាន់ចំនួន3លាននាក់ ទទួលយកលិខិតឆ្លងដែនបរទេសរបស់អង់គ្លេស រួមនឹងអ្នកដែលស្ថិតក្នុងបន្ទុក ឱ្យមកតាំងទីលំនៅក្នុងប្រទេសនេះ និងមានឱកាសក្លាយជាពលរដ្ឋអង់គ្លេសកទៀតផង។ ក្រសួងការបរទេសអង់គ្លេសបានឱ្យដឹងថា ការទទួលយកជនភៀសខ្លួនថ្មីនេះនឹងត្រូវបានធ្វើឡើង “ក្នុងរយៈពេលប៉ុន្មានខែខាងមុខនេះ”។
ចំណែកប្រទេសចិនវិញ បានឱ្យដឹងថា ប្រទេសចំនួន52 បានគាំទ្រច្បាប់សន្តិសុខហុងកុង ក្នុងនោះមានដូចជា ប្រទេសគុយបា ប្រទេសប៉ាគីស្ថាន មីយ៉ានម៉ារ អាហ្ស៊ីប កាមេរូន វេណេស៊ុយអេឡា និងបេឡារូស។ល។
ប្រភព៖ សារព័ត៌មានបរទេស
July 2, 2020
ឆ្លងមេរោគហើយជាង 10លាននាក់ តែ WHO ថា ចំណុចអាក្រក់បំផុត នៅមិនទាន់មកដល់ទេ និងត្រៀមបញ្ជូនក្រុមអ្នកជំនាញទៅចិន រកប្រភពកំណើតវីរុស…
6ខែ រាប់ចាប់ពីមានការឆ្លងរាលដាលរបស់មេរោគវីរុសកូរ៉ូណាប្រទេសថ្មី ឬកូវីដ-19 មក ពិភពលោកនៅតែស្ថិតនៅឆ្ងាយពីពាក្យថា “ចប់” និងចំណុចអាក្រក់បំផុត ថែមទាំងមិនទាន់មកដល់ទៀតផង…នេះបើតាមរយៈការដាស់តឿនរបស់អង្គការសុខភាពពិភពលោក ឬ WHO កាលពីថ្ងៃចន្ទ(ទី29មិថុនា)ម្សិលមិញ និងថែមទាំងបានបង្ហើបឱ្យដឹងទៀតថា កំពុងតែត្រៀមបញ្ជូនក្រុមការងារទៅប្រទេសចិន ដើម្បីស្វែងរកដើមកំណើតរបស់ជំងឺរាតត្បាតដ៏ធំមួយនេះ។
ក្រោយឆ្លងកាត់បង្គោលជោគជ័យដ៏គួរឱ្យសោកសង្រេង ដែលចំនួនអ្នកស្លាប់បានកើនដល់ 500,000នាក់ និងឆ្លងមេរោគហក់ឡើងលើស 10លាននាក់ អង្គការសុខភាពពិភពលោក បានបញ្ជាក់ថា នេះគឺជាអំឡុងពេលដែលត្រូវបង្កើនភាពពុះពារព្យាយាមក្នុងការតស៊ូ ដើម្បីការពារអាយុជីវិតមនុស្សជាតិ។
លោក ថេដ្រូស អាត់ហាណូម ហ្គេប្រេយេស៊ុស ប្រធានអង្គការសុខភាពពិភពលោក បាននិយាយនៅក្នុងការថ្លែងការណ៍ពីចម្ងាយមួយថា “6ខែមុន ប្រហែលជាគ្មានអ្នកណានឹកស្រមៃឃើញថា ពិភពលោករបស់យើង និងវិថីជីវិតរបស់យើង នឹងត្រូវបានគ្រវែងចូលទៅរកភាពច្របូលច្របល់ដោយសារវីរុសថ្មីមួយនេះឡើយ…យើងគ្រប់គ្នាត្រូវការឱ្យវាបញ្ចប់ យើងគ្រប់គ្នាសុទ្ធតែត្រូវការឱ្យជីវិតដើរទៅមុខជាបន្តទៀត តែការពិតដ៏សែនលំបាកលំបិន នៅមិនទាន់ទៅជិតចំណុចបញ្ចប់នៅឡើយ”
លោកបន្ថែមថា “ទោះជាប្រទេសជាច្រើនមានភាពរីកចម្រើនទៅមុខខ្លះៗហើយមែន តែការពិត គឺជំងឺរាតត្បាតដ៏ធំទូទាំងពិភពលោក នៅតែបង្កើនល្បឿនយ៉ាងលឿន យើងគ្រប់គ្នាស្ថិតនៅក្នុងស្ថានការណ៍នេះដូចគ្នា ហើយយើងគ្រប់គ្នា នឹងស្ថិតនៅក្នុងស្ថានការណ៍នេះយូរតទៅទៀត…យើងចាំបាច់ត្រូវតែប្រមូលសន្សំភាពបត់បែន ភាពស៊ូទ្រាំ ភាពទន់ភ្លន់ ដាក់ខ្លួន និងភាពសណ្ដោសប្រណី ឱ្យបានច្រើនឡើងក្នុងច្រើនខែខាងមុខទៀត យើងនឹងជួបការបាត់បង់យ៉ាងច្រើនមែនទែន តែយើងមិនអាចបាត់បង់សេចក្ដីសង្ឃឹមបានឡើយ”
លោកថេដ្រូស ប្រាប់ថា ជំងឺរាតត្បាតដ៏ធំ បានបង្ហាញឱ្យឃើញពីផ្នែកល្អបំផុត និងអាក្រក់បំផុតរបស់មនុស្សជាតិ ដោយសំអាងលើទង្វើនៃក្ដីមេត្តាករុណា និងភាពជាធ្លុងមួយ តែមួយជ្រុងទៀត ក៏មានការបង្វែរ បំភ្លៃទិន្នន័យ និងយកមេរោគវីរុសមកធ្វើជាល្បែងនយោបាយ។
លោកបន្តទៀតថា “ក្នុងបរិយាកាសនៃភាពបែកបាក់ខាងនយោបាយរបស់ពិភពលោក និងការប្រេះស្រាំក្នុងកម្រិតជាតិ ចំណុចអាក្រក់បំផុត មិនទាន់មកដល់នៅឡើយ…ខ្ញុំសោកស្ដាយ ដែលត្រូវនិយាយបែបនេះ…ដោយសភាពបរិស្ថាន និងសភាវការណ៍ដែលសុទ្ធតែស្ថិតក្នុងលក្ខណៈនេះ យើងមានកង្វល់ពាក់ព័ន្ធនឹងស្ថានការណ៍ដែលនឹងអាក្រក់បំផុត”
ក្រៅពីនេះ លោកថេដ្រូស នៅបានថ្លែងទៀតថា អង្គការសុខភាពពិភពលោក នឹងបញ្ជូនក្រុមការងារពិសេសមួយទៅប្រទេសចិននាសប្ដាហ៍ក្រោយ ពាក់ព័ន្ធនឹងការស្វែងរកប្រភពកំណើតរបស់វីរុស ដែលដុតបញ្ឆេះជំងឺរាតត្បាតដ៏ធំកូវីដ-19 ធ្វើឱ្យឆេះរាលដាលទូទាំងពិភពលោក។
ស្ថាប័នសុខភាពសាធារណៈរបស់អង្គការសហប្រជាជាតិមួយនេះ បានព្យាយាមដាក់សម្ពាធប្រទេសចិនមកតាំងពីដើមខែឧសភា ដោយបង្ខំឱ្យប្រទេសមួយនេះ អញ្ជើញគណៈអ្នកជំនាញការរបស់ពួកគេ(WHO) ចូលទៅស៊ើបអង្កេតស្វែងរកសត្វដើមកំណើតរបស់មេរោគកូរ៉ូណាប្រភេទថ្មី ដោយលោកថេដ្រូស បាននិយាយថា “ការបានដឹងពីប្រភពកំណើតរបស់មេរោគវីរុសនេះ គឺជារឿងមួយសំខាន់បំផុត”។
លោកបានថ្លែងថា “យើងនឹងអាចប្រយុទ្ធនឹងមេរោគវីរុសនេះបានល្អឡើង ប្រសិនបើយើងបានដឹងគ្រប់យ៉ាងពាក់ព័ន្ធនឹងវីរុសនេះ ក្នុងនោះរួមទាំងដឹងថា វាចាប់ផ្ដើមឡើងដោយរបៀបណាទៀតផង…យើងនឹងបញ្ជូនក្រុមការងារទៅប្រទេសចិននាសប្ដាហ៍ក្រោយនេះ ដើម្បីត្រៀមការសម្រាប់រឿងនេះ ហើយយើងសង្ឃឹមថា វានឹងនាំមកនូវការយល់ដឹងថា វីរុសនេះ ចាប់ផ្ដើមឡើងរបៀបយ៉ាងម៉េច?”
តែលោកមិនបានបញ្ជាក់ប្រាប់ថា ក្រុមការងារឈុតនេះ នឹងមានអ្នកជំនាញការមកពីប្រទេសណាខ្លះ ឬភារកិច្ចពិសេសរបស់ពួកគេ គឺអ្វីឡើយ។
យ៉ាងណាក្ដី ពួកអ្នកវិទ្យាសាស្ត្រ ជឿថា មេរោគវីរុសកូរ៉ូណាប្រភេទថ្មិ ដែលចាប់កំណើតឡើងនៅក្នុងប្រទេសចិនកាលពីចុងឆ្នាំកន្លងទៅនោះ បានលោតចេញពីសត្វចូលមករកមនុស្ស ដោយមានភាពអាចទៅរួចថា មានចំណុចចាប់ផ្ដើមចេញពីផ្សារលក់សាច់សត្វប្លែកៗ នៅក្នុងទីក្រុងវូហាន៕
ប្រភព៖ សារព័ត៌មានបរទេស
June 30, 2020
ដឹងហើយ ចង់ទន់ជង្គង់!! បើកតម្លៃ “Remdesivir” ថ្នាំកូវីដ-19 1ដប $390 និងព្យាបាលជាដាច់តម្លៃ $2,340
ហ្គីលលៀត សៃអេនសេស ក្រុមហ៊ុនផលិតឱសថដ៏ល្បីល្បាញរបស់អាមេរិក នឹងគិតប្រាក់ពីរដ្ឋបាលសហរដ្ឋអាមេរិក និងប្រទេសអភិវឌ្ឍន៍នានា 390ដុល្លារ ក្នុង1ដប សម្រាប់ “រេមដេស៊ីវៀរ” ឬ Remdesivir ថ្នាំព្យាបាលជំងឺកូវីដ-19 ឬប្រមាណ 2,340ដុល្លារ ពេញមួយរយៈពេលព្យាបាលឱ្យជាដាច់ ដែលប្រើពេលវេលា 5ថ្ងៃ។
នៅក្នុងសេចក្ដីថ្លែងការណ៍ ដែលបានផ្សព្វផ្សាយកាលពីថ្ងៃចន្ទ(ទី29មិថុនា)ម្សិលមិញ ក្រុមហ៊ុនហ្គីលលៀត បានបញ្ជាក់ថា ខ្លួននឹងដាក់ស្នើតម្លៃខាងលើ ទៅបណ្ដាប្រទេសអភិវឌ្ឍន៍ហើយនៅទូទាំងពិភពលោក ដើម្បីធ្វើជាគំរូតម្លៃស្តង់ដាតែមួយដូចគ្នា ចៀសវាងការចរចាតម្លៃតាមប្រទេសមួយៗ ដែលនឹងធ្វើឱ្យការទទួលបានថ្នាំមានភាពយឺតយ៉ាវ។
លោក ដានៀល អូដេយ៍ CEO របស់ក្រុមហ៊ុន ហ្គីលលៀត សៃអេនសេស ថ្លែងថា “យើងត្រូវការការជឿជាក់ថា នឹងគ្មានអ្វីមករារាំង រេមដេស៊ីវៀរ ក្នុងការចូលទៅដល់អ្នកប្រើប្រាស់ឡើយ តម្លៃ នឹងសាងការជឿទុកចិត្តថា គ្រប់គ្នាទូទាំងពិភពលោក នឹងទទួលបានថ្នាំមួយនេះ”
390ដុល្លារ ក្នុង 1ដប ជាតម្លៃសម្រាប់អង្គភាពផ្សេងៗរបស់រដ្ឋបាល និងនៅពេលការផ្គត់ផ្គង់មានច្រើនឡើង ខាងហ្គីលលៀត នឹងចាប់ផ្ដើមលក់ថ្នាំមួយនេះ តាមរយៈការចាត់ចែងចំណាយនៅតាមហាងទូទៅ ដោយតម្លៃសម្រាប់ក្រុមហ៊ុនធានារ៉ាប់រងសុខភាពឯកជន និងអ្នកទិញបែបពាណិជ្ជកម្មផ្សេងៗក្នុងសហរដ្ឋអាមេរិក នឹងស្ថិតក្នុងតម្លៃ 520ដុល្លារ ក្នុង1ដប ឬ 3,120ដុល្លារ ពេញមួយរយៈពេល 5ថ្ងៃនៃការព្យាបាល។
Remdesivir ជាថ្នាំមួយ ក្នុងចំណោមថ្នាំព្យាបាលកូវីដ-19 ដំបូងៗ ដែលគេស្គាល់យ៉ាងទូលំទូលាយ ដោយវាបានទទួលការអនុញ្ញាតពីគណៈអ្នកគ្រប់គ្រងច្បាប់ទម្លាប់របស់សហរដ្ឋអាមេរិក កាលពីខែឧសភា សម្រាប់ប្រើក្នុងករណីបន្ទាន់ ក្រោយពីការសាកល្បងប្រើទៅលើមនុស្ស 1ក្រុមធំ ហើយរកឃើញថា ថ្នាំនេះជួយជំរុញការស្ដារខ្លួនឡើងវិញរបស់អ្នកជំងឺកូវីដ-19 ដែលសម្រាកព្យាបាលនៅក្នុងមន្ទីពេទ្យ និងកាន់តែឆាប់ជាសះស្បើយឡើងប្រមាណជា 4ថ្ងៃ។
ពេលនេះ ថ្នាំ និងវ៉ាក់សាំងជាច្រើនរយប្រភេទ កំពុងស្ថិតក្នុងអំឡុងការអភិវឌ្ឍទូទាំងពិភពលោក ខណៈដែលពួកអ្នកស្រាវជ្រាវ បាននាំគ្នាញាប់ដៃញាប់ជើងរិះរកវិធីទប់ស្កាត់ការឆ្លងរាលដាលរបស់មេរោគរាតត្បាតដ៏ធំនេះ ដែលចម្លងមេរោគឆ្លងទៅមនុស្សទូទាំងពិភពលោកជាង 10លាននាក់ និងស្លាប់រួចទៅហើយជាង 500,000នាក់។
ក្រុមហ៊ុនផលិតឱសថ ហ្គីលលៀត សៃអេនសេស ធ្លាប់បានសន្យាបរិច្ចាគថ្នាំ ពេញមួយខែមិថុនានេះ តែឥរិយាបថរបស់ក្រុមហ៊ុន ដែលថានឹងគិតប្រាក់ ក្រោយពីការបរិច្ចាគបានបញ្ចប់នោះ បានធ្វើឱ្យកើតមានប្រធានបទជជែកតវ៉ាគ្នាយ៉ាងក្ដៅគគុក ដោយសារតែការដាក់តម្លៃរបស់ហ្គីលលៀតនេះនឹងបង្កឱ្យកើតមានផលប៉ះពាល់ឡើង ព្រោះវាបានក្លាយជាគំរូមូលដ្ឋានលើរឿងតម្លៃរបស់ថ្នាំព្យាបាលកូវីដ-19 ទាំងឡាយផ្សេងទៀត ដែលនឹងផលិតចេញមកនាពេលអនាគត។
តម្លៃភាគហ៊ុនរបស់ ហ្គីលលៀត សៃអេនសេស បានហក់ឡើងដល់ 1.8% ក្រោយពីការដាក់តម្លៃថ្នាំ Remdesivir ក្នុងតម្លៃ 2,340ដុល្លារ សម្រាប់ការព្យាបាលដែលប្រើរយៈពេល 5ថ្ងៃ នៅក្នុងសហរដ្ឋអាមេរិក និងបណ្ដាប្រទេសអភិវឌ្ឍន៍ហើយមួយចំនួន។
វិបត្តិវីរុសកូរ៉ូណាប្រភេទថ្មី នៅក្នុងសហរដ្ឋអាមេរិក កំពុងតែវិលត្រឡប់មករីករាលដាលជាថ្មីម្ដងទៀត ខណៈដែលករណីអ្នកឆ្លងមេរោគថ្មី បានឡើងដល់កម្រិតខ្ពស់បំផុតជាប្រវត្តិសាស្ត្រ ដោយនៅក្នុងរដ្ឋមួយចំនួន ដូចជា តិចសាស់ អារីហ្សូណា និងហ្វ្លរីដា ជាដើម អ្នកជំងឺបានចាប់ផ្ដើមពេញណែនក្នុងមន្ទីរពេទ្យ ហើយផែនការវិលមកបើកសេដ្ឋកិច្ចឡើងវិញនោះ ត្រូវបានផ្អាកទុកសិន។
ទាំងអស់នេះ ក្នុងរយៈពេលនៃការព្យាបាល 5ថ្ងៃ ចាំបាច់ត្រូវប្រើថ្នាំ Remdesivir ចំនួន 6ដប តែក៏មានអ្នកជំងឺមួយចំនួន ដែលចាំបាច់ត្រូវប្រើពេលវេលាព្យាបាលដល់ទៅ 10ថ្ងៃ ឬអស់ថ្នាំ 11ដបដែរ ដូច្នេះ តម្លៃចាយវាយសរុបខ្ពស់បំផុត អាចកើនឡើងដល់ 4,290ដុល្លារឯណោះ៕
ប្រភព៖ សារព័ត៌មានបរទេស
June 30, 2020
មិនទាន់ចប់!! លោកដូណាល់ ត្រាំ ត្រូវអ៊ីរ៉ង់ត្រៀមសុំ “InterPol” ចេញដីកាចាប់ខ្លួន ក្នុងរឿងក្ដីសម្លាប់ឧត្ដមសេនីយ៍ សុឡៃម៉ានី
អាជ្ញាធរប្រទេសអ៊ីរ៉ង់ បានអនុម័តវិធានការដើម្បីត្រៀមស្នើសុំទៅ InterPol ឬប៉ូលិសអន្តរជាតិ ឱ្យចេញដីកាចាប់ខ្លួនលោកប្រធានាធិបតីសហរដ្ឋអាមេរិក ដូណាល់ ត្រាំ ក្នុងរឿងក្ដីលបធ្វើឃាតអតីតអគ្គមេបញ្ជាការអង្គភាពប្រយុទ្ធ ឃុតស៍ គឺឧត្ដមសេនីយ៍ កាសេម សុឡៃម៉ានី ក្នុងអំឡុងដែលឧត្ដមសេនីយ៍រូបនេះកំពុងស្ថិតនៅក្នុងប្រទេសអ៊ីរ៉ាក់កាលពីខែមករាកន្លងទៅ។
ស្ពុតនិក នីវស៍ សារព័ត៌មានរបស់ប្រទេសរុស្ស៊ី បានរាយការណ៍នៅថ្ងៃទី29 មិថុនាម្សិលមិញថា បានរកឃើញថា ទីភ្នាក់ងារព័ត៌មានរបស់អ៊ីរ៉ង់ជាច្រើន រួមទាំងMehr News និងហ្វារ៍ នីវស៍ផង បានរាយការណ៍ដោយអាងលើប្រភពព័ត៌មានខាងក្រសួងយុត្តិធម៌ នៃប្រទេសអ៊ីរ៉ង់ថា អាជ្ញាធរអ៊ីរ៉ង់កំពុងស្ថិតក្នុងដំណើរការវិធានការត្រៀមស្នើសុំឱ្យប៉ូលិសអន្តរជាតិ ចេញដីកាចាប់ខ្លួន ដែលហៅថា “ដីកាក្រហម” ប្រឆាំងមេដឹកនាំសហរដ្ឋអាមេរិក។
អគ្គអយ្យការក្នុងទីក្រុងតេអេរ៉ង់ លោកអាលី អាល់ខាសៃ-មេហ៍រ (Ali Alqasi-Mehr) បានថ្លែងកាលពីថ្ងៃចន្ទ(ទី29មិថុនា)ម្សិលមិញថា “មានភាពអាចទៅរួច ក្នុងការបញ្ជាក់ពីតួបុគ្គលចំនួន 36នាក់ ដែលគេជឿថា ជាប់ពាក់ព័ន្ធក្នុងការត្រៀមការ ឬពាក់ព័ន្ធនឹងការលបធ្វើឃាតលោកឧត្ដមសេនីយ៍ កាសេម សុឡៃម៉ានី ដែលនៅក្នុងចំណោមក្រុមមនុស្សទាំងនោះ គឺជាអ្នកនយោបាយដ៏សំខាន់ និងនាយទាហានលំដាប់ខ្ពស់របស់អាមេរិក និងប្រទេសដទៃទៀត”។ លោកបានបន្តទៀតថា “ឈ្មោះដែលបង្ហាញឡើងដំបូងគេគឺ ប្រធានាធិបតីសហរដ្ឋអាមេរិក ដូណាល់ ត្រាំ”។
យោងតាមមន្ត្រីដែលរកឃើញរឿងនេះ បាននិយាយថា អាជ្ញាធរនៃក្រសួងយុត្តិធម៌របស់អ៊ីរ៉ង់ កំពុងប្រើវិធានការ ដើម្បីត្រូវការនាំយកមនុស្សទាំងនោះ ចូលមកក្នុងកិច្ចដំណើរការយុត្តិធម៌នៅក្នុងប្រទេសអ៊ីរ៉ង់ និងបានអំពាវនាវទៅដល់ទីស្នាក់ការប៉ូលិសអ៊ីនធើរប៉ូល ដែលមានទីតាំងនៅក្នុងប្រទេសបារាំង ឱ្យរួមសហការដោយការចេញដីកាក្រហមចំពោះមនុស្សទាំងអស់នោះ ដែលសិនជាបានទទួលការអនុម័ត ខាងប៉ូលិសអន្តរជាតិ នឹងត្រូវស្នើសុំឱ្យស្ថាប័នចេញបញ្ជាប្រើច្បាប់ក្នុងប្រទេសផ្សេងៗ ផ្ដល់ការសហការក្នុងការតាមរក និងចាប់ខ្លួនជនត្រូវចោទទាំងនោះ។
ទីភ្នាក់ងារព័ត៌មានរុស្ស៊ីថ្លែងថា ក្រុងតេអេរ៉ង់បានដាក់បទចោទទៅលើលោកត្រាំ និងមនុស្សដទៃទៀត ក្នុងរឿងក្ដីសម្លាប់មនុស្ស និងមានទង្វើបង្កភេរវកម្ម ដែលជារឿងក្ដីមានស្ថានទម្ងន់ទោសខ្ពស់បំផុត គឺប្រហារជីវិត ក្រោមច្បាប់អាជ្ញារបស់ប្រទេសអ៊ីរ៉ង់នៅពេលនេះ។
យោងតាមអគ្គអយ្យការខ្ពស់បំផុតរបស់អ៊ីរ៉ង់បាននិយាយថា ក្រុងតេអេរ៉ង់នឹងធ្វើឱ្យលោកត្រាំ ចូលមកក្នុងកិច្ចដំណើរការខាងយុត្តិធម៌ឱ្យបាន ទោះបីជាលោកត្រាំផុតពីតំណែងហើយក៏ដោយ។
សូមរំឭកថា លោកឧត្ដមសេនីយ៍ កាសេម សុឡៃម៉ានី ត្រូវសហរដ្ឋអាមេរិកប្រើយន្តហោះដ្រូនលបធ្វើឃាតកាលពីថ្ងៃទី3 មករា ដើមឆ្នាំនេះក្នុងអំឡុងពេលស្ថិតនៅក្នុងប្រទេសអ៊ីរ៉ាក់ ដោយនៅក្នុងអំឡុងចុងខែមករានោះ សារព័ត៌មាន ប៊ីសស៊ីនីស អ៊ីនសៃឌើរ បានរាយការណ៍ថា តាមរយៈការធ្វើប្រជាមតិចេញមក បានបង្ហាញថា 1 ក្នុងចំណោម 4នាក់នៃប្រជាជនអាមេរិកាំង ជឿថា លោកប្រធានាធិបតី ដូណាល់ ត្រាំ គួរតែត្រូវឡើងតុលាការអាជ្ញាអន្តរជាតិ ដើម្បីស៊ើបអង្កេតពីករណីលបធ្វើឃាតឧត្ដមសេនីយ៍សុឡៃម៉ានី ក្នុងរឿងក្ដី ឧក្រិដ្ឋជនសង្គ្រាម ខណៈដែល 55%ទៀត ជឿថា ការលបធ្វើឃាតឧត្ដមសេនីយ៍សុឡៃម៉ានី នឹងធ្វើឱ្យប្រទេសអាមេរិក កាន់តែមានសុវត្ថិភាពតិចទៅៗ៕

ប្រភព៖ សារព័ត៌មានបរទេស
June 30, 2020
ប្រើក្បាច់គុនគុងហ្វ៊ូ!!?? ក្រុងប៉េកាំងបញ្ជូន “អ្នកចេះវិជ្ជាគុន” ទៅព្រំដែនជាប់ប្រទេសឥណ្ឌា មុនកើតហេតុប៉ះទង្គិចគ្នាក្ដៅគគុក
ចិនបាននាំយកក្រុមអ្នកឡើងភ្នំ និងអ្នកចេះក្បាច់គុន ចូលទៅបន្ថែមកម្លាំងឱ្យកងទាហានរបស់ខ្លួន ដែលកំពុងប្រចាំការនៅក្បែរព្រំដែនជាប់នឹងប្រទេសឥណ្ឌា មិនយូរប៉ុន្មាន មុននឹងកើតហេតុការណ៍ប៉ះទង្គិចគ្នារវាងកងទាហានរបស់ប្រទេសទាំង2 ដែលធ្វើឱ្យមានអ្នកស្លាប់ជាច្រើននាក់ ដោយមិនមានការប្រើអាវុធ ឬគ្រឿងផ្ទុះអ្វីទាំងអស់ កាលពីពាក់កណ្ដាលខែមិថុនាកន្លងទៅថ្មីៗ។ នេះបើតាមសេចក្ដីរាយការណ៍របស់ទីភ្នាក់ងារព័ត៌មានរបស់រដ្ឋចិន។
ព្រំដែនរួមក្នុងតំបន់ នៅជ្រលងភ្នំចោតខ្ពស់របស់ប្រទេសជិតខាងគ្នាទាំង2 ដែលមានបំពាក់អាវុធនុយក្លេអ៊ែរដូចគ្នានេះ តែងតែកើតមានភាពតានតឹងឡើងជាប្រចាំ តែការប៉ះទង្គិចគ្នា ដែលកើតឡើងក្នុងគ្រានេះ អាចរាប់បានថា ជាការប្រឈមមុខដាក់គ្នាដែលមានអ្នកស្លាប់ច្រើនបំផុតក្នុងរង្វង់រយៈពេលជាង 50ឆ្នាំកន្លងមកនេះ។
តាមរបាយការណ៍ព័ត៌មានរបស់ “ឆៃណា ណេស្សិននែល ឌីហ្វិនស៍ នីវស៍” សារព័ត៌មានផ្លូវការរបស់ភាគីទាហានចិន បានឱ្យដឹងថា កងកម្លាំងទាហានភូមិ (Militia) អង្គភាពថ្មីចំនួន 5កង ដែលក្នុងនោះមានពួកអតីតសមាជិករបស់ក្រុមអ្នករត់កាន់គប់ភ្លើងអូឡាំពិក ឆ្លងកំពូលភ្នំអេវើរេសត៍ និងពួកអ្នកប្រយុទ្ធ មកពីក្លិបហ្វឹកហាត់វិជ្ជាគុនលាយឡំនៅក្នុងនោះដែរ បានមកតម្រង់ជួរទទួលការត្រួតពលនៅក្នុងក្រុងឡាសា តំបន់គ្រប់គ្រងខ្លួនឯង ទីបេត៍ កាលពីថ្ងៃទី15 មិថុនា។
ស្ថានីយទូរទស្សន៍មជ្ឈិមរបស់រដ្ឋបាលចិន(ស៊ីស៊ីធីវី) បានចាក់ផ្សាយក្លិបវីដេអូ ដែលបង្ហាញឱ្យឃើញពី កងទាហានថ្មី ចំនួនជាច្រើនរយនាក់ កំពុងឈរតម្រង់ជួរនៅក្នុងក្រុងឡាសា។
តាមរបាយការណ៍របស់ “ឆៃណា ណេស្សិននែល ឌីហ្វិនស៍ នីវស៍” លោក វ៉ាង ហៃចៀង មេបញ្ជាការកងទាហានទីបេត៍ បានថ្លែងថា ពួកអ្នកប្រយុទ្ធដែលមកពីក្លិបហ្វឹកហាត់វិជ្ជាក្បាច់គុន “អ៊ឹនប៉ូ” នឹង “បង្កើនកម្រិតភាពរឹងមាំក្នុងការរៀបចំស្ថាប័ន និងក្នុងការប្រមូលផ្ដុំពលទាហាន” រហូតដល់ “ការឆ្លើយតបយ៉ាងឆាប់រហ័ស និងមានសមត្ថភាពខ្ពស់ក្នុងការផ្ដល់ការអន្តរាគមន៍” របស់កងទាហានភូមិទាំងនេះ “បានកើនឡើងយ៉ាងច្រើន”។ បើទោះជាលោកវ៉ាង មិនបានអះអាងយ៉ាងចំហច្បាស់លាស់ថា ការនាំមនុស្សទាំងអស់នេះចេញមកដាក់ប្រចាំការនៅត្រង់ចំណុចនោះ មានភាពពាក់ព័ន្ធនឹងភាពតានតឹងខាងព្រំដែនដែលកំពុងកើតឡើងក៏ដោយ។
តែនៅអំឡុងពេលតមក ក្នុងថ្ងៃដដែលនោះឯង ស្រាប់តែ ទាហានចិន និងទាហានឥណ្ឌា បានកើតការប៉ះទង្គិចគ្នា នៅក្នុងតំបន់ឡាដាក់ ដែលស្ថិតនៅឆ្ងាយពីក្រុងឡាសា ប្រមាណជា 1,300គីឡូម៉ែត្រ ដោយខាងភាគីឥណ្ឌា បានថ្លែងថា ទាហានរបស់ខ្លួន 20នាក់ ត្រូវបានសម្លាប់ក្នុងការប្រយុទ្ធគ្នាដោយប្រើអាវុធសាហាវៗ អាក្រក់ៗនៅក្នុងថ្ងៃនោះ រួមទាំងបានអះអាងទៀតថា ភាគីទាហានចិន បានស្លាប់ច្រើនជាងខាងខ្លួនទៅទៀត តែខាងភាគីចិនវិញ មិនដែលបញ្ជាក់ថា មានអ្នករបួសឬក៏អត់ ឬមានចំនួនប៉ុន្មាននាក់ឡើយ។
ទាំង 2ភាគី សុទ្ធតែថ្កោលទោសគ្នាទៅវិញទៅមកថា ជាអ្នកបង្កហេតុ ធ្វើឱ្យកើតការវាយប្រយុទ្ធគ្នាឡើង ដោយបានប្រើដុំថ្ម និងដំបងប្រភេទផ្សេងៗធ្វើជាអាវុធ និងគ្មានការបាញ់កាំភ្លើង ឬគ្រឿងផ្ទុះអ្វីទាំងអស់។
ទាំងអស់នេះ កន្លងមក ចិន និងឥណ្ឌាបានធ្វើកិច្ចព្រមព្រៀងរួមគ្នាមួយ ដោយហាមប្រើប្រាស់កាំភ្លើង និងគ្រឿងផ្ទុះនៅក្នុងទីតាំងនោះ តែកងកម្លាំងទាំង 2ខាង ក៏នៅតែប៉ះទង្គិចគ្នាយ៉ាងកាចសាហាវ ដោយប្រើអាវុធដែលធ្វើឡើងដោយខ្លួនឯងបែបភ្លាមៗនៅនឹងកន្លែងនោះតែម្ដង។
ឥណ្ឌាបានថ្លែងកាលពីថ្ងៃពុធ ទី25 មិថុនាកន្លងទៅថា ខ្លួនបានបន្ថែមកម្លាំងនៅក្នុងតំបន់ព្រំដែនលើជ្រលងភ្នំហិមាល័យ ត្រង់ចំណុចនោះ ដោយបាននិយាយថា ដើម្បីឱ្យមានភាពប្រដំប្រសងគ្នានឹងការបន្ថែមកម្លាំងក្នុងទំនងដូចគ្នារបស់ភាគីចិន។
សម្រាប់ទីភ្នាក់ងារព័ត៌មានផ្លូវការរបស់ចិនវិញ ក្នុងអំឡុងប៉ុន្មានសប្ដាហ៍កន្លងមក បានបង្ហាញឱ្យឃើញដដែលៗថា មានកិច្ចការងារខាងយោធាដ៏អ៊ឹកធឹកក្លៀវក្លា រួមទាំងការហ្វឹកហាត់តតាំងប្រឆាំងអាកាសយាន នៅលើទីខ្ពង់រាបក្នុងតំបន់យោធាទីបេត៍ ដែលមានព្រំដែនជាប់គ្នានឹងខាងឥណ្ឌាផងដែរ។
ឆៃណា ណេស្សិននែល ឌីហ្វិនស៍ នីវស៍ បានបន្ថែមទៀតថា ការបង្កើនកម្លាំងទាហានភូមិថ្មីៗបែបនេះ គឺក្នុងគោលបំណងដើម្បី “បង្កើនភាពរឹងមាំដល់តំបន់ព្រំដែន និងបង្កើនស្ថិរភាពរបស់ទីបេត៍”៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា
June 30, 2020
យានអវកាសចិន បើកលើផ្នែកងងឹតបំផុត លើពិភពព្រះចន្ទ បានចម្ងាយ 463.26 ម៉ែត្រហើយ
កាលពីថ្ងៃទី28 ខែមិថុនា ឆ្នាំ2020 នៅក្នុងសេចក្ដីប្រកាសរបស់រដ្ឋបាលអវកាសចិន បានរាយការណ៍ថា រយៈពេល 1ឆ្នាំកន្លះមកនេះ យាន Yutu-2 នៃបេសកកម្ម Chang’e-4 បានបើកបរនៅលើផ្ទៃដីផ្នែកម្ខាងទៀតនៃពិភពព្រះចន្ទ (តំបន់ងងឹតដែលមនុស្សលើផែនដីមិនអាចមើលឃើញ និងជាតំបន់ដែលមិនទាន់មានប្រទេសណាបញ្ជូនយានអវកាសទៅដល់) បានចម្ងាយ 463.26ម៉ែត្រហើយ។
រដ្ឋបាលអវកាសចិន បានសម្រេចជោគជ័យលើកដំបូងជាប្រវត្តិសាស្រ្ត ក្នុងការចុះចតយាន Yutu-2 លើផ្ទៃដីពិភពព្រះចន្ទខាងលើនេះ កាលពីថ្ងៃទី3 ខែមករា ឆ្នាំ2019 ដើម្បីរុករករ៉ែ និងសិក្សាពីរចនាសម្ព័ន្ធ និងគំរូនានា។
ប្រតិបត្តិការរបស់យាននេះ នឹងជួយឱ្យអ្នកវិទ្យាសាស្រ្តដឹងអំពីអាថ៌កំបាំងនានា ដែលស្ថិតក្រោមដីព្រះចន្ទនៅតំបន់ងងឹតនោះ ការប៉ះទង្គិចគ្នារវាងពិភពព្រះចន្ទ និងវត្ថុដទៃទៀត សកម្មភាពភ្នំភ្លើង និងការវិវឌ្ឍភូគព្ភសាស្រ្តលើពិភពមួយនេះជាដើម។
ចិន ក៏គ្រោងនឹងបានបង្ហោះយានអវកាស Chang’e-5 ដើម្បីនាំយកគំរូដែល Yutu-2 ប្រមូលបានពីពិភពព្រះចន្ទ មកផែនដី នៅចុងឆ្នាំនេះផងដែរ៕
June 29, 2020
សហរដ្ឋអាមេរិកបញ្ចូលឈ្មោះក្រុមហ៊ុនចំនួន20ទៅក្នុងបញ្ជី “ក្រុមហ៊ុនដែលគ្រប់គ្រងដោយបក្សកុម្មុយនិស្តចិន” ដើម្បីរៀបចំការដាក់ទណ្ឌកម្មផ្នែកហិរញ្ញវត្ថុ
អាជ្ញាធររបស់ប្រធានាធិបតិអាមេរិកាំង Donald Trump បានរកឃើញក្រុមហ៊ុនចិនចំនួន20ដែលជាកម្មសិទ្ធិ ឬគ្រប់គ្រងដោយកងទ័ពនៃបក្សកុម្មុយនិស្តចិន ដែលនេះបានធ្វើឱ្យក្រុមអ្នកវិភាគយល់ថា វាជាជំហានបឋមដើម្បីឱ្យសហរដ្ឋអាមេរិកធ្វើការដាក់ទណ្ឌកម្មថ្មីមួយទៀត។ ក្នុងបញ្ជីឈ្មោះនេះ ក៏មានក្រុមហ៊ុន Huawei, Hikvision, China Mobile និងក្រុមហ៊ុន China Telecom ផងដែរ។
យោងតាម Reuters ឯកសារពីក្រសួងការពារជាតិអាមេរិកបានបង្ហើបឱ្យដឹងអំពីបញ្ជីឈ្មោះមួយដែលមានរាយនាមក្រុមហ៊ុនចិនចំនួន20ដែលទទួលបានជំនួយពីកងទ័ពចិន និងកំពុងរកស៊ីនៅសហរដ្ឋអាមេរិក ភាគច្រើនគឺជាក្រុមហ៊ុនរដ្ឋ និងគ្របដណ្ដប់ទៅលើវិស័យជាច្រើនដូចជា អាកាសចរណ៍ ទូរគមនាគមន៍ ថាមពលនុយក្លេអែរ ផលិតកប៉ាល់។ល។
បណ្ដាក្រុមហ៊ុនចិនផ្សេងទៀតដែលមានឈ្មោះនៅក្នុងបញ្ជីនេះ រួមមានដូចជា៖ ក្រុមហ៊ុនឧស្សាហកម្មអាកាសចរណ៍ចិន (Aviation Industry Corporation of China) ក្រុមហ៊ុនសាងសង់ផ្លូវដែកចិន (China Railway Construction Corporation) ក្រុមហ៊ុនបច្ចេកវិទ្យាអាកាសចរណ៍ចិន (AviChina Industry & Technology Company Limited) ក្រុមហ៊ុនវិទ្យាសាស្ត្រនិងបច្ចវិទ្យាចិន (China Aviation Science and Industry Corporation) ក្រុមហ៊ុនបច្ចេកវិទ្យាចិនភាគខាងត្បូង (China South Industries Group) ក្រុមហ៊ុនឧស្សាហកម្មផលិតកប៉ាល់ចិន (China State Shipbuilding Corporation) ក្រុមហ៊ុនផលិតកប៉ាល់រដ្ឋចិន (China State Shipbuilding Corporation) ក្នុងក្រុមឧស្សាកម្មចិនភាគខាងជើង (China North Industries Group Corporation) ក្រុមហ៊ុន Inspur Group ក្រុមហ៊ុន Aero Engine Corporation of China ក្រុមហ៊ុន Panda Green Energy Group ក្រុមហ៊ុន China General Nuclear Power Group ក្រុមហ៊ុន China General Nuclear Power Group និងក្រុមហ៊ុន China National Nuclear Corporation ផងដែរ។
ក្រសួងការពារជាតិសហរដ្ឋអាមេរិក បានយោងទៅតាមច្បាប់ផ្ដល់សិទ្ធិការពារជាតិឆ្នាំ1999 ដើម្បីបង្កើតបញ្ជីឈ្មោះក្រុមហ៊ុនខាងលើនេះ។ របាយការណ៍បានឱ្យដឹងថា បច្ចុប្បន្ន មន្ទីរបញ្ចកោណមិនទាន់បានកំណត់សកម្មភាពទាក់ទិននឹងការដាក់ទណ្ឌកម្មណាមួយនៅឡើយ ប៉ុន្តែ ដោយយោងទៅតាមច្បាប់ ប្រធានាធិបតីសហរដ្ឋអាមេរិកមានសិទ្ធិអនុវត្តការដាក់ទណ្ឌកម្មហិរញ្ញវត្ថុទៅលើក្រុមហ៊ុនទាំងនេះ រួមមានទាំងការបង្កកទ្រព្យសម្បត្តិរបស់ក្រុមហ៊ុនទាំងនេះទៀតផង។ នេះបើតាមទំព័រ Axios។
ក្រៅពីនេះ Axios ក៏បានឱ្យដឹងថា ប្រធានាធិបតីសហរដ្ឋអាមេរិកក៏នៅមានសិទ្ធិក្នុងការប្រើប្រាស់ច្បាប់ “កម្លាំងសេដ្ឋកិច្ចបន្ទាន់អន្តរជាតិ IEEPA (International Emergency Economic Powers Act) ដើម្បីដាក់ទណ្ឌកម្មលើបណ្ដាក្រុមហ៊ុនរបស់កងទ័ពចិននៅលើទឹកដីសហរដ្ឋអាមេរិកផងដែរ។
សេតវិមានមិនបានបង្ហើបឱ្យដឹងថា នឹងបង្កកទ្រព្យសម្បត្តិរបស់បណ្ដាក្រុមហ៊ុននេះឬអត់ ប៉ុន្តែ មន្ត្រីជាន់ខ្ពស់រដ្ឋាភិបាលម្នាក់បានថ្លែងថា បញ្ជីឈ្មោះខាងលើនេះនឹងត្រូវបានរដ្ឋាភិបាលសហរដ្ឋអាមេរិក ក្រុមហ៊ុន អ្នកវិនិយោគ ក្រុមអ្នកសិក្សាស្រាវជ្រាវ និងដៃគូសហការជាដើម ធ្វើការស៊ើបអង្កេតលម្អិត មុនពេលអញ្ជើញបណ្ដាក្រុមហ៊ុនចិនខាងលើមកសហការ ពិសេសគឺនៅពេលដែលចំនួនក្រុមហ៊ុនក្នុងបញ្ជីនេះបានកើនឡើងច្រើន។
ប្រភពព័ត៌មានបានឱ្យដឹងថា បញ្ជីឈ្មោះនេះនឹងបង្កផលប៉ះពាល់ធ្ងន់ធ្ងរដល់បណ្ដាក្រុមហ៊ុនអាមេរិកាំងដែលសហការជាមួយក្រុមហ៊ុនចិន និងក្រុមជំនាញនានារបស់ចិនដែលកំពុងរកស៊ីនៅលើទឹកដីសហរដ្ឋអាមេរិក៕
ប្រភព៖ សារព័ត៌មានបរទេស
June 26, 2020
មេដឹកនាំ 3រូប…ខ្លាំង! តែខ្លោច…
ខណៈដែលមនុស្សទូទាំងពិភពលោកនៅតែត្រូវប្រុងប្រយ័ត្នការឆ្លងរាលដាលរបស់កូវីដ-19 ដែលនៅតែសាងបញ្ហានៅក្នុងភូមិភាគជាច្រើននោះ ប្រទេសដែលប្រកាសបន្ធូរបន្ថយវិធានការគ្រប់គ្រងការពារមួយចំនួន កំពុងប្រឈមនឹងការឆ្លងមេរោគរលកទី2 ដូចដែលយើងបានឃើញស្រាប់ហើយ ដូចជានៅក្នុងប្រទេសចិន កូរ៉េខាងត្បូង អូស្ត្រាលី និងថ្មីៗបំផុតគឺ អាល្លឺម៉ង់…។
នៅអាល្លឺម៉ង់ មានបុគ្គលិកមន្ទីរសត្តឃាតឆ្លងមេរោគជាង 1,500នាក់ ក្នុងទីក្រុងគូទើស្លូហ៍ ត្រូវបិទទីក្រុងដែលមានមនុស្សរស់នៅជាង 3សែននាក់មួយនេះ និងត្រូវប្រើកងទាហានចូលទៅជួយក្នុងការពិនិត្យរកមេរោគពីអ្នកដែលស្ថិតក្នុងក្រុមមនុស្សដែលមានភាពប្រថុយប្រថាន និងនៅមានភាពអាចទៅរួចក្នុងការត្រូវតែបិទ និងដាក់ទីក្រុងនោះឱ្យនៅដាច់ដោយឡែក។
ទោះជាយ៉ាងដូច្នោះក្ដី ក៏សហគមន៍ពិភពលោកនៅតែបានឃើញ និងបានដឹងពីអាការអំណួតអួតអាង មិនយកចិត្តទុកដាក់ខ្វល់ខ្វាយនឹងភាពប្រថុយប្រថានរបស់មេដឹកនាំ យ៉ាងតិច 3រូប របស់ប្រទេសដែលមានអ្នកឆ្លងមេរោគ និងស្លាប់ច្រើនបំផុត 3លំដាប់លើគេក្នុងពិភពលោក ក្នុងអំឡុងពេលកន្លងមក ដែលបានព្យាយាមមិនព្រមទទួលស្គាល់ថា កូវីដ-19 អាចសាងវិបត្តធ្ងន់ធ្ងរគ្រប់ផ្នែកបែបនេះ។
មេដឹកនាំទាំង 3រូបនោះ គឺលោកដូណាល់ ត្រាំ នៃសហរដ្ឋអាមេរិក លោកឆាអ៊ី បូលសូណារូ នៃប្រទេសប្រេស៊ីល និងលោកបូរីស ចនសុន នៃប្រទេសអង់គ្លេស។ ទាំង 3នាក់នេះមានទង្វើមិនខុសគ្នាទេ គឺអួតខ្លួនឯងពូកែ មិនខ្លាចការឆ្លងមេរោគ មិនព្រមពាក់ម៉ាស់អនាម័យការពារពេលទៅបង្ហាញខ្លួននៅក្នុងហ្វូងមហាជន និងធ្វើព្រងើយកន្តើយចំពោះសំឡេងរិះគន់ទាំងឡាយ។
ទីកន្លែងសម្រាប់កប់ខ្មោច
គឺជាគំរូមិនល្អចំពោះប្រជាជន ដែលមើលឃើញច្បាស់នោះ គឺជនស្បែកសភាគច្រើនដែលទៅចូលរួមស្ដាប់លោកត្រាំថ្លែងការណ៍ រកសំឡេងឆ្នោតនៅទីក្រុងថាល់សា អូក្លាហូម៉ា ភាគច្រើនមិនព្រមពាក់ម៉ាស់អនាម័យការពារ ទោះជាអង្គុយជិតៗគ្នានៅក្នុងទីលានកីឡដ្ឋាន ហើយមន្ត្រីរបស់លោកត្រាំ ត្រូវបានរកឃើញថា ឆ្លងមេរោគដល់ទៅ 8នាក់។
លោកត្រាំ ត្រូវបាក់មុខ អារម្មណ៍មួម៉ៅល្អក់កករ ព្រោះអ្នកមកចូលរួមស្ដាប់ការថ្លែងប្រាស្រ័យនាពេលនោះ មានត្រឹមតែ 7ពាន់ជាងនាក់ នៅក្នុងទីលានកីឡាដ្ឋានដែលអាចដាក់មនុស្សបានដល់ទៅ 2ម៉ឺននាក់ ដែលមុនពេលនោះ មានការរំពឹងទុកថា នឹងមានមនុស្សមកក្បែរៗ 1លាននាក់ តាមរយៈការណាត់ទុកជាមុន។
សហរដ្ឋអាមេរិក ជាប់លេខ1 ជាប្រទេសដែលមានចំនួនអ្នកឆ្លងមេរោគជាង 2.3លាននាក់ ស្លាប់ជាង 1.22សែននាក់ ហើយលោកត្រាំថែមទាំងបានដកវិធានការការពារផ្សេងៗចេញ និងថែមទាំងប្រើពាក្យសម្ដីស្ទើរលេងស្ទើរមែន ពាក់ព័ន្ធនឹងវិធានការពិនិត្យរកមេរោគទៀតផង។ ភាពបរាជ័យក្នុងការទប់ទល់នឹងស្ថានការណ៍នេះ ធ្វើឱ្យលោកត្រាំលែងមានភាពគួរឱ្យគោរពជឿជាក់។
តែលោកត្រាំ ក៏នៅតែមាត់រឹង មិនព្រមទទួលស្គាល់ភាពខុសឆ្គងរបស់ខ្លួន គិតតែពីបន្ទោសអ្នកដទៃ និងរឿងហេតុផ្សេងៗ ព្រមទាំងបង្កើតរឿងផ្សេងៗឡើង ដើម្បីបិទបាំងភាពបរាជ័យរបស់ខ្លួន…ថ្មីៗបំផុតនេះ លោកត្រាំ បានចេញបញ្ជា ហាមជនបរទេសដែលមានជំនាញថ្វីដៃ មិនឱ្យចូលប្រទេសដើម្បីធ្វើការងារ ដោយយកលេសថា ត្រូវរក្សាការងារទុកឱ្យប្រជាជនអាមេរិក។
បទបញ្ជានេះ នឹងហុចផលប៉ះពាល់ដល់កម្លាំងពលកម្មជាច្រើនសែននាក់ ជាពិសេសក្នុងផ្នែកធុរកិច្ចរបស់ព័ត៌មានវិទ្យា ធ្វើឱ្យ Google ធ្វីតធើរ ហ្វេសប៊ុក និងអាម៉ាហ្សូន មានការមិនពេញចិត្តយ៉ាងខ្លាំង និងបានប្រុងប្រៀបរៀបចំថា នឹងធ្វើលិខិតចំហមួយ សម្ដែងពីក្ដីមិនពេញចិត្ត ព្រោះបទបញ្ជានេះ វានឹងធ្វើឱ្យខ្វះខាតកម្លាំងពលកម្មខាងផ្នែកនេះ។
លោក ត្រាំ នៅមិនទាន់មានវិធីណាមួយក្នុងការកែបញ្ហាកូវីដ-19 បាននៅឡើយ ព្រោះមិនបានយកចិត្តដាក់ចំពោះការដាស់តឿនរបស់បណ្ដាអ្នកជំនាញការ ដែលមិនអាចចូលជិតលោកត្រាំបាន ព្រោះទៅផ្ដល់ទិន្នន័យដែលធ្វើឱ្យលោកត្រាំមិនចូលចិត្ត ធ្វើឱ្យអ្នកជំនាញការពូកែៗ ដូចជាលោកវេជ្ជបណ្ឌិត អ៊ែនថូនី ហ្វៅស៊ី និងរូបឺត រេដហ្វ៊ីល របស់ស្ថាប័ន ស៊ីឌីស៊ី ត្រូវបិទមាត់។
ទាំង 2នាក់នេះ ទើបតែទៅផ្ដល់យោបល់ជាមួយគណៈកម្មាធិការរបស់សភាតំណាងរាស្ត្រកាលពីថ្ងៃអង្គារ រួមជាមួយប្រធានស្ថាប័នផ្សេងៗ ដែលមានចំណែកក្នុងការទប់ទល់នឹងការឆ្លងរាលដាលរបស់មេរោគកូវីដ-19 ដោយបានសម្ដែងពីក្ដីបារម្ភកង្វល់ថា នឹងមានការឆ្លងរាលដាលជាថ្មីម្ដងទៀត ព្រោះមើលឃើញតួលេខអ្នកឆ្លងបានកើនឡើងខ្លាំងនៅក្នុងរដ្ឋជាច្រើន ខណៈនៅមានទាន់វ៉ាក់សាំងការពារ។
មេដឹកនាំប្រទេសប្រេស៊ីល លោក ឆាអ៊ី បូលសូណារូ ត្រូវគេមើលឃើញថា ជាលោកត្រាំ នៃភូមិភាគអាមេរិកឡាទីន ក៏មានទង្វើមិនខុសគ្នាដែរ មិនពាក់ម៉ាស់អនាម័យការពារពេលទៅបង្ហាញខ្លួននៅក្នុងហ្វូងសាធារណជន ហើយរាងព្រហើនៗ មិនស្ដាប់អ្នកណា និងមិនជឿគោលការណ៍វិទ្យាសាស្ត្រ ធ្វើឱ្យតួលេខអ្នកឆ្លងមេរោគ និងស្លាប់នៅក្នុងប្រទេសប្រេស៊ីល ក្លាយជាប្រទេសលំដាប់លេខ2។
ប្រជាជនប្រេស៊ីលឆ្លងមេរោគជាង 1.12លាននាក់ ស្លាប់រួចទៅហើយជាង 5ម៉ឺននាក់ ជាប់លំដាប់លេខ2 បន្ទាប់ពីសហរដ្ឋអាមេរិក។ ជនរងគ្រោះភាគច្រើន ជាជនកុលសម្ព័ន្ធព្រៃនៅតាមដងទន្លេអាម៉ាហ្សូន ដែលការសិក្សាអប់រំទៅមិនដល់ និងនៅក្នុងទីប្រជុំជនអនាធិបតេយ្យចំនួនដ៏ច្រើនក្នុងទីក្រុងធំៗ ដូចជា រីអូ ដឺ ចាណេរ៉ូ, ប្រាស៊ីលៀ និងសៅ ប៉ូឡូ ជាដើម។
ការឆ្លងរាលដាលនៅប្រេស៊ីល ទើបតែមានតួលេខកើនឡើងក្នុងអត្រាខ្ពស់នៅក្នុងខែនេះឯង ហើយប្រទេសជិតខាង ដូចជា ប៉េរូ ឈីលី កូឡុំបៀ ជាដើម ក៏មានចំនួនអ្នកឆ្លងមេរោគច្រើនដូចគ្នា ក្លាយជាប្រភពចម្លងដ៏ធំមួយ នៅតំបន់អាមេរិកឡាទីន។
លោក បូលសូណារូ ធ្វើឫកពូកែអួតអាង រហូតដល់តុលាការបញ្ជាឱ្យពាក់ម៉ាស់អនាម័យការពារកាលពីថ្ងៃអង្គារ ដូច្នេះ ចាំមើលថា តើមេដឹកនាំដែលយកគំរូតាមលោកត្រាំ នឹងហ៊ានប្រឆាំងនឹងបញ្ជាតុលាការដែរឬទេ? និងថែមទាំងត្រូវចាំមើលទៀតថា តើការឆ្លងមេរោគ និងស្លាប់ប្រចាំថ្ងៃរបស់ប្រជាជនប្រេស៊ីល នឹងថយចុះឬទេ? បើមេដឹកនាំនៅតែគ្មានវិធានការដែលទទួលបានលទ្ធផលល្អបែបនេះ។
នៅមានម្នាក់ទៀត ដែលចេញក្បួនដូចលោកត្រាំដែរ នោះគឺលោក បូរីស ចនសុន នាយករដ្ឋមន្ត្រីនៃប្រទេសអង់គ្លេស ដែលច្រើនតែមិនពាក់ម៉ាស់អនាម័យការពារ និងយឺតយ៉ាវក្នុងការកែសម្រួលវិធានការទប់ទល់មេរោគកូវីដ-19។ អង់គ្លេសមានតួលេខអ្នកស្លាប់ជាង 5ម៉ឺននាក់ដូចគ្នា ហើយក្នុង 1ថ្ងៃៗ ការឆ្លងមេរោគ និងការស្លាប់ នៅតែស្ថិតក្នុងអត្រាខ្ពស់ជាងប្រទេសផ្សេងៗក្នុងទ្វីបអឺរ៉ុបនៅឡើយ។
កាលពីមុនហ្នឹង លោកចនសុន បានអះអាងថា ត្រូវឱ្យប្រជាជនទទួលមេរោគ និងសាងប្រពន្ធប្រឆាំងជំងឺដោយខ្លួនឯង។ វិធានការគ្រប់គ្រងក៏មិនតឹងរ៉ឹង រហូតដល់ការឆ្លងមេរោគ និងចំនួនអ្នកស្លាប់កើនឡើងច្រើន ពេញហៀរក្នុងមន្ទីរពេទ្យ និងកន្លែងទុកសាកសព ដែលភាគច្រើនជាជនស្បែកពណ៌ផ្សេងៗ និងជនជាតិភាគតិច។
ពេលខ្លះត្រូវប្រើប្រាស់អគារកន្លែងចតរថយន្ត ធ្វើជាកន្លែងដាក់សាកសពបណ្ដោះអាសន្នសម្រាប់អ្នកស្លាប់ដែលជាជនមុស្ល៊ីម រង់ចាំការនាំយកទៅបញ្ចុះ…និងទម្រាំតែចេញវិធានការតឹងរ៉ឹង ការឆ្លងរាលដាលក៏រីកធំបាត់ទៅហើយ តែលោកចនសុន ក៏ដូចលោកត្រាំដែរ គឺត្រូវការបន្ធូរបន្ថយវិធានការដើម្បីស្ដារសេដ្ឋកិច្ច ទាំងដែលការឆ្លងរាលដាលនៅមិនទាន់ថយចុះនៅឡើយ។
ថ្ងៃទី4 ខែក្រោយ លោកចនសុន នឹងអនុញ្ញាតឱ្យធុរកិច្ចផ្សេងៗ ដូចជា រង្គសាល ភោជនីយដ្ឋាន ហាងអ៊ុតកែសម្ផស្ស និងហាងបម្រើសេវាកម្មផ្សេងៗ បើកដំណើរការតាមប្រក្រតី នៅសល់តែក្រុមអាជីពដែលប្រថុយប្រថានប៉ុណ្ណោះ ដែលត្រូវរង់ចាំមើលស្ថានការណ៍បន្តទៀត។
មានអ្នកលើកចំណុចសង្កេតឡើងថា បើមេដឹកនាំ ទាំងលោកត្រាំ លោកបូលសូណារូ និងលោកចនសុន បានប្រកាសវិធានការគ្រប់គ្រងការពារតឹងរ៉ឹងឱ្យលឿនជាងនេះ ចំនួនអ្នកឆ្លងមេរោគ និងស្លាប់ ប្រហែលជាមិនច្រើនដល់ថ្នាក់នោះទេ តែទាំង 3នាក់មានភាពដូចគ្នាមួយ គឺមិនស្ដាប់អ្នកណា មិនជឿគោលការណ៍វិទ្យាសាស្ត្រ អំណួត និងមិនទទួលខុសត្រូវលើការខូចខាត។
លោកត្រាំ ថែមទាំងត្រូវអ្នកសារព័ត៌មានដាក់ចំណុចសង្កេតទៀតថា តើមើលឃើញជីវិតប្រជាជនអាមេរិកាំង គ្មានន័យ ឬយ៉ាងណា? បានជាយកទៅធ្វើជារឿងកំប្លែង ក្នុងអំឡុងការថ្លែងប្រាស្រ័យរកសំឡេងឆ្នោត និងការថ្លែងការណ៍នាពេលកន្លងមក និងប្រហែលជាលោក មានគ្រឹះនៃការរិះគិតក្នុងអារម្មណ៍រើសអើងពណ៌សម្បុរ ជាតិសាសន៍ទៀតផងក៏មិនដឹង ទើបមានផ្នត់គំនិតស្ដាំនិយមយ៉ាងគ្មានបិទបាំងបែបនេះ។
អ្នកជំនាញការដែលបានផ្ដល់យោបល់ទៅគណៈកម្មាធិការ បានឱ្យរង់ចាំមើលថា 2សប្ដាហ៍ទៀតបន្ទាប់ពីនេះទៅ តើតួលេខអ្នកឆ្លងមេរោគ នឹងកើនឡើងច្រើនឬទេ? ដោយសារតែការប្រមូលផ្ដុំគ្នានៅក្នុងទីកន្លែងផ្សេងៗ រួមទាំងអូក្លាហូម៉ាផង និងត្រូវចាំមើលថា នៅក្នុងតំបន់ផ្សេងៗ នៅក្នុងទ្វីបជាច្រើនដែលកំពុងបង្ហាញសញ្ញាថា មានការឆ្លងរាលដាលរលកទី2 នោះ មានភាពអាចទៅរួចខ្ពស់ណាស់៕
ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា
June 26, 2020
រន្ទះបាញ់នៅឥណ្ឌាបានសម្លាប់មនុស្សជាង100នាក់! គ្រួសារសពទទួលបានសំណងច្រើន
មនុស្សជាង100នាក់បានបាត់បង់ជីវិត និងរាប់សិបនាក់រងរបួសក្នុងថ្ងៃតែមួយនៅក្នុងរដ្ឋ Bihar និងរដ្ឋ Uttar Pradesh នៅភាគខាងជើងប្រទេសឥណ្ឌា ដោយសារតែត្រូវរន្ទះបាញ់។
មន្ទីរគ្រប់គ្រងគ្រោះមហន្តរាយនៃរដ្ឋ Bihar បានឱ្យដឹងថា ស្រុក Gopalganj មានអ្នកស្លាប់ច្រើនជាងគេ ដោយមាន13ករណី។ ចំណែកក្រៅពីនេះ គឺមាននៅក្នុងតំបន់ចំនួន22ផ្សេងទៀតរបស់រដ្ឋនេះ ខណៈដែលមានយ៉ាងតិច30នាក់ត្រូវរងរបួស។ រដ្ឋ Uttar Pradesh ក៏បានរាយការណ៍ថា មានមនុស្សចំនួន24នាក់បានស្លាប់ និង12នាក់រងរបួសដោយសាររន្ទះបាញ់។
ករណីខាងលើនេះបានកើតឡើងនៅក្នុងថ្ងៃទី25មិថុនា2020ដូចគ្នា។ Sandeep Kumar ដែលជាមន្ត្រីម្នាក់មកពីមន្ទីរគ្រប់គ្រងគ្រោះមហន្តរាយនៃរដ្ឋ Bohar ថ្លែងថា ក្រុមគ្រួសារនីមួយៗដែលមានអ្នកស្លាប់ដោយសាររន្ទះបាញ់ សុទ្ធតែទទួលបានប្រាក់ជំនួយចំនួន5,300នាក់។
នាយករដ្ឋមន្ត្រីឥណ្ឌា លោក Narendra Modi បានបង្ហោះសារនៅលើទំព័រ Twitter របស់លោកថា ករណីស្លាប់ដោយសាររន្ទះបាញ់នៅក្នុងបណ្ដាស្រុកនៃរដ្ឋ Bihar និងរដ្ឋ Uttar Pradesh គឺជា “ព័ត៌មានដ៏គួរឱ្យសង្វេគ”។ លោកបន្តថា អាជ្ញាធរមូលដ្ឋានបានចូលរួមបំពេញបេសកកម្មជួយសង្គ្រោះបន្ទាន់ ព្រមទាំងផ្ញើសារចូលរួមរំលែកទុក្ខជាមួយគ្រួសារនៃជនរងគ្រោះផងដែរ។
នៅប្រទេសឥណ្ឌា និងតំបន់អាស៊ីខាងត្បូង តែងតែមានករណីស្លាប់ដោយសាររន្ទះបាញ់ជាញឹកញាប់នៅក្នុងខែឧសភានិងខែមិថុនាជារៀងរាល់ឆ្នាំ។ យោងតាមអង្គភាពគ្រប់គ្រងឯកសារជាតិឥណ្ឌា មនុស្សចំនួន2,880នាក់បានស្លាប់ដោយសាររន្ទះបាញ់នៅក្នុងឆ្នាំ2017 និង2,357នាក់នៅក្នុងឆ្នាំ2018។
ករណីបាត់បង់ជីវិតដោយសាររន្ទះបាញ់នៅប្រទេសឥណ្ឌា ភាគច្រើនកើតឡើងទៅលើកសិករដែលជាអ្នកតែងតែចេញទៅធ្វើការនៅកណ្ដាលវាល សូម្បីតែពេលមេឃកំពុងភ្លៀង៕
ប្រភព៖ សារព័ត៌មានបរទេស
June 26, 2020
តៃវ៉ាន់បញ្ជូនទ័ពទៅកាន់ប្រជុំកោះដែលកំពុងដណ្ដើមគ្នាជាមួយចិន
កងទ័ពម៉ារីនតៃវ៉ាន់ បញ្ជូនទាហានរបស់ខ្លួនទៅកាន់ប្រជុំកោះ Pratas (ឬ Dongsha/Tungsha) បន្ទាប់ពីមានដំណឹងថា ទីក្រុងប៉េកាំងត្រៀមធ្វើសមយុទ្ធនៅក្នុងតំបន់។
កាលពីថ្ងៃទី22មិថុនាកន្លងទៅ មន្ត្រីម្នាក់ដែលស្ថិតក្នុងកងកម្លាំងការពារកោះរបស់តៃវ៉ាន់ បានឱ្យដឹងថា កងទ័ពម៉ារីនរបស់តៃវ៉ាន់កំពុងត្រូវបានបញ្ជូនមកកាន់ប្រជុំកោះ Tungsha ក្នុងរយៈពេលខ្លី ដើម្បីធ្វើការហ្វឹកហាត់។ ប៉ុន្តែ មន្ត្រីរូបនេះមិនបានបង្ហើបឱ្យដឹងលម្អិតអំពីចំនួនទាហានដែលត្រូវបញ្ជូនមកកាន់ទីនេះ រួមនឹងពេលវេលាច្បាស់លាស់នោះទេ។
ប្រជុំកោះ Tungsha ដែលស្ថិតនៅភាគឦសាននៃសមុទ្រចិនខាងត្បូង មានតួនាទីជាយុទ្ធសាស្ត្រយ៉ាងសំខាន់សម្រាប់ចិនប៉េកាំង និងចិនតៃប៉ិ ដោយសារតែប្រជុំកោះនេះនៅទល់មុខផ្លូវចេញចូលសមុទ្រប៉ាស៊ីហ្វីករបស់កងទ័ពជើងទឹកចិនដែលមានមូលដ្ឋាននៅកោះ Hainan។ បច្ចុប្បន្ន តៃវ៉ាន់កំពុងតែដាក់ពង្រាយកងកម្លាំងប៉ូលិសជើងទឹកដើម្បីត្រូតពិនិត្យប្រជុំកោះTungsha ប៉ុន្តែ ភាគីខាងទីក្រុងប៉េកាំងក៏បាននិងកំពុងអះអាងថា នេះគឺជាទឹកដីរបស់ខ្លួន។
ប្រជុំកោះនេះនៅទល់មុខផ្លូវចេញចូលសមុទ្រប៉ាស៊ីហ្វីករបស់កងទ័ពជើងទឹកចិនដែលមានមូលដ្ឋាននៅកោះ Hainan
សកម្មភាពខាងលើរបស់កោះតៃវ៉ាន់ ត្រូវបានធ្វើឡើងក្រោយពីមានដំណឹងថា កងទ័ពរំដោះប្រជាជនចិន (PLA) មានគម្រោងធ្វើសមយុទ្ធទ្រង់ទ្រាយធំនៅក្នុងតំបន់នាខែសីហាខាងមុខ ក្នុងនោះក៏នឹងមានឈុតឆាកអនុវត្តសេនារីយោវាយលុកដណ្ដើមប្រជុំកោះTungsha ផងដែរ។
ភាពតានតឹងនៅឆកសមុទ្រតៃវ៉ាន់ ថ្មីៗនេះបានឡើងកម្ដៅខ្លាំងបន្ទាប់ពីចិនបានបញ្ជូនយន្តហោះចម្បាំង យន្តហោះទម្លាក់គ្រាប់បែក រួមនឹងយន្តហោះដឹកជញ្ជូនចូលទៅក្បែរកោះក្នុងរយៈពេល6ខែ។ ភាគីក្រសួងការពារជាតិចិន មិនទាន់បានបញ្ជាក់អំពីមូលហេតុដែលនាំឱ្យមានការបង្កើនវត្តមានទ័ពនៅជុំវិញកោះតៃវ៉ាន់នៅឡើយ។
ទីតាំងប្រជុំកោះ Pratas (ឬ Dongsha/Tungsha) ដែលកំពុងត្រូវបានគ្រប់គ្រងដោយតៃវ៉ាន់
ក្រុមអ្នកវិភាគយល់ថា សកម្មភាពហោះហើរទៅកៀកកោះតៃវ៉ាន់ ហាក់ដូចជាការប្រតិកម្មរបស់ទីក្រុងប៉េកាំង ក្រោយពីទីក្រុងវ៉ាស៊ីងតោន បានបញ្ជូនយន្តហោះដឹកជញ្ជូនឱ្យហោះទៅដល់ជាយកោះ។ ទន្ទឹមនឹងនេះ ទីក្រុងប៉េកាំងក៏មានបំណងព្រមានទៅលើករណីតៃវ៉ាន់បាញ់រ៉ុកកែតចំនួន2គ្រាប់កាលពីថ្ងៃទី11មិថុនាផងដែរ។ ការបាញ់សាកល្បងកាំជ្រួចរបស់តៃវ៉ាន់នេះ ស្ថិតនៅក្នុងកម្មវិធីអភិវឌ្ឍអាវុធដើម្បីបង្កើនសមត្ថភាពការពារកោះតៃវ៉ាន់នៅចំពោះមុខការគំរាមកំហែងពីចិនដីគោក៕
ប្រភព៖ Focus Taiwan
June 25, 2020