អន្តរជាតិ - La Reine Media

កម្ពុជារកឃើញករណីឆ្លងCOVID-19 ថ្មី 5នាក់ ខណៈពិភពលោករកឃើញជាង291,000នាក់ក្នុងរយៈពេល24ម៉ោងចុងក្រោយនេះ

ក្រសួងសុខាភិបាលកម្ពុជា នាព្រឹកនេះ (1សីហា) បានប្រកាសឱ្យដឹងថា បានរកឃើញអ្នកជំងឺCOVID-19 ថ្មី ចំនួន5ករណីបន្ថែមទៀត ដែលនេះត្រូវបានរកឃើញកាលពីថ្ងៃទី31កក្កដា2020។

គិតមកដល់បច្ចុប្បន្ន កម្ពុជាបានរកឃើញអ្នកផ្ទុក COVID-19 សរុប ចំនួន239នាក់ ក្នុងនោះអ្នកជំងឺបានជាសះស្បើយមានចំនួន164នាក់ ចំណែកអ្នកជំងឺកំពុងសម្រាកព្យាបាលមានចំនួន73នាក់។

នៅក្នុងរយៈពេល24ម៉ោងចុងក្រោយនេះដែរ ពិភពលោកទាំងមូលត្រូវបានរាយការណ៍ថា បានរកឃើញអ្នកផ្ទុកវីរុសCOVID-19 ថ្មី ចំនួន291,536នាក់ និងអ្នកស្លាប់ថ្មីដោយសារវីរុសនេះមានចំនួន688នាក់ ដូច្នេះ តួលេខសរុបនៃអ្នកផ្ទុកវីរុសនេះនៅទូទាំងពិភពលោកបានកើនឡើងដល់17,754,190នាក់ ចំណែកអ្នកស្លាប់សរុបមានចំនួន682,885នាក់។ អ្នកជំងឺបានជាសះស្បើយមានចំនួន11,159,580នាក់។

August 1, 2020

បេក្ខជនប្រធានាធិបតីសហរដ្ឋអាមេរិក Kanye West កំពុងប្រឈមនឹងការលែងលះ ព្រោះមិនព្រមឈប់ពីឆាកនយោបាយ

ប្រភពជិតស្និទ្ធជាមួយអ្នកស្រី Kim Kardashian បានឱ្យដឹងថា តារាទូរទស្សន៍រូបនេះកំពុងពិចារណាទៅលើរឿងលែងលះ បន្ទាប់ពីបានជជែកគ្នាជាមួយលោក Kanye West កាលពីដើមសប្ដាហ៍។

កាលពីថ្ងៃទី30កក្កដា ប្រភពព័ត៌មានរបស់ People បានបង្ហើបឱ្យដឹងថា “Kim មិនទទួលបាននូវអ្វីដែលនាងប្រាថ្នា ក្រោយពីបានទៅជួប Kanye។ គាត់ហាក់មិនយល់អំពីអ្វីដែលភរិយារបស់គាត់បាននិយាយសោះឡើយ។ Kanye មិនបានផ្លាស់ប្ដូរអ្វីទាំងអស់ បើទោះជា Kim បាននិយាយជាច្រើនលើក។ នាងកំពុងតែពិចារណាចំពោះរឿងលែងលះគ្នា បើទោះវាជាបញ្ហាចុងក្រោយដែលត្រូវគិត។ Kanye West គឺជាដៃគូជីវិតរបស់ Kim ប៉ុន្តែពេលនេះ នាងមិនដឹងថាត្រូវធ្វើអ្វីនោះទេ”។

ប្រភពព័ត៌មានមួយផ្សេងទៀត បានប្រាប់សារព័ត៌មាន People ថា អ្នកស្រី Kim បានទៅរកលោក Kanye West កាលពីដើមសប្ដាហ៍ដើម្បីរំឭកគាត់ឱ្យឈប់ឈរឈ្មោះជាបេក្ខភាពប្រធានាធិបតីសហរដ្ឋអាមេរិក។ នាងចង់ឱ្យស្វាមីផ្ដោតទៅលើការព្យាបាលជំងឺផ្លូវចិត្ត ព្រោះថា លោក West មានរោគសញ្ញានៃជំងឺផ្លូវចិត្តបាយប៉ូឡា (bipolar disorder) ជាច្រើនឆ្នាំមកហើយ ប៉ុន្តែគាត់មិនចង់ព្យាបាល។ ពេលខ្លះ តារាចម្រៀងរ៉ែបរូបនេះ ថែមទាំងបាននិយាយថា គ្រួសាររបស់លោក ចង់បង្ខាំងលោកនៅក្នុងមន្ទីរពេទ្យឆ្កួតទៀតផង។

អស់ជាច្រើនឆ្នាំមកហើយ លោក West ចេះតែគេចពីគ្រួសារ ទៅរស់នៅក្នុងកសិដ្ឋាននៅ Cody ក្នុងរដ្ឋ Wyoming ដើម្បីផលិតចម្រៀង។ Kim តែងនាំកូនៗពី Los Angeles ទៅលេងនឹង West ជារៀងរាល់ខែ។

Kanye West បានទាក់ទង Kim Kardashian តាំងពីខែមេសា ឆ្នាំ2012 ហើយ2ឆ្នាំក្រោយមក ពួកគេក៏បានរៀបការជាមួយគ្នា។ អ្នកទាំង2 មានកូនចំនួន4នាក់ ៖ North (អាយុ7ឆ្នាំ) Saint (4ឆ្នាំ) Chicago (2ឆ្នាំ) និង Psalm (អាយុ1ឆ្នាំ)។

តារាចម្រៀងរ៉ែប Kanye West បានក្លាយជាបេក្ខជនប្រធានាធិបតីសហរដ្ឋអាមេរិក ចាប់ពីថ្ងៃទី15កក្កដា។ បន្ទាប់ពីថ្ងៃឃោសនារកសំឡេងឆ្នោតដំបូង លោក West បានបង្ហោះសាររិះគន់ជាច្រើនទៅលើគ្រួសារ។ Kim Kardashian បានឱ្យដឹងថា ស្វាមីរបស់អ្នកស្រីមានជំងឺផ្លូវចិត្ត ដូច្នេះទើបមិនអាចគ្រប់គ្រងសម្ដីខ្លួនឯងបាន។ ក្រោយមក លោក West ក៏បានសុំទោសប្រពន្ធតាមរយៈបណ្ដាញសង្គម។ អ្នកស្រី Kim បានធ្វើដំណើរទៅកាន់រដ្ឋ Wyoming កាលពីថ្ងៃទី24កក្កដា ដើម្បីថែទាំស្វាមី ក្រោយពីបានដឹងថា លោក West ត្រូវចូលពេទ្យសង្គ្រោះបន្ទាន់៕

ប្រភព៖ សារព័ត៌មានបរទេស

>អត្ថបទទាក់ទង៖ តារាចម្រៀងរ៉ែប Kanye West បានចុះឈ្មោះជាបេក្ខភាពសម្រាប់តំណែងប្រធានាធិបតីសហរដ្ឋអាមេរិកជាផ្លូវការរួចហើយ

July 31, 2020

វៀតណាមរកឃើញអ្នកផ្ទុកCOVID-19 សរុបជាង500នាក់! ក្រុមអ្នកជំនាញអាមេរិក និងអូស្ត្រាលីអះអាងថា នេះមិនទាន់ក្លាយជារលកទី2នៃវីរុសCOVID-19 នៅឡើយ

ទីក្រុងហាណូយបានធ្វើតេស្តលឿនបានចំនួនជិត52,000លើកទៅលើពលរដ្ឋដែលជាប់សង្ស័យថាអាចមានផ្ទុកវីរុសCOVID-19 ក្នុងពេលដែលទីក្រុងហូជីមិញបានបញ្ចេញលទ្ធផលធ្វើតេស្តចំនួន1,351នាក់។

នៅទីក្រុងហាណូយ ក្នុងចំណោមសំណាកចំនួន21,000ករណី ដែលត្រូវបានធ្វើតេស្តលឿន គឺមាន2ករណីបង្ហាញថាវិជ្ជមានជាមួយនឹងCOVID-19 ប៉ុន្តែលទ្ធផលនៃការធ្វើតេស្តដោយប្រើបច្ចេកទេស PCR សុទ្ធតែបង្ហាញលទ្ធផលអវិជ្ជមាន។

លោក Khong Minh Tuan នាយករងនៃមជ្ឈមណ្ឌលគ្រប់គ្រងជំងឺនៃក្រុងហាណូយបានឱ្យដឹងថា CDC របស់ទីក្រុងនេះ បានធ្វើតេស្តលឿនសរុបជិត52,000លើកនៅក្នុងខណ្ឌចំនួន30។ គិតដល់ថ្ងៃនេះ (31កក្កដា) ទីក្រុងហាណូយបានធ្វើតេស្តលឿនទៅលើពលរដ្ឋដែលមកពីទីក្រុងដាណាំងនៅក្នុងខែកក្កដា ចំនួន21,732នាក់។

នៅក្នុងថ្ងៃនេះ ទីក្រុងហាណូយបានរកឃើញអ្នកផ្ទុកវីរុសCOVID-19 ចំនួន2ករណីតែប៉ុណ្ណោះ ដែលអ្នកទាំងនេះមានជាប់ពាក់ព័ន្ធនឹងទីក្រុងដាណាំង។

ចំណែកនៅទីក្រុងហូជីមិញវិញ គិតមកដល់ពេលនេះ កំពុងធ្វើតេស្តលើសំណាករបស់ពលរដ្ឋចំនួន14,000នាក់ ក្នុងចំណោមមនុស្សចំនួន22,000នាក់ដែលបានមករាយការណ៍ បន្ទាប់ពីបានត្រលប់មកពីទីក្រុងដាណាំង រាប់ចាប់ពីថ្ងៃទី1កក្កដា។ ក្នុងចំណោមសំណាកចំនួន14,000ករណីដែលកំពុងធ្វើតេស្ត គឺមានលទ្ធផលអវិជ្ជមានចំនួន1,351នាក់ ក្រៅពីនេះ កំពុងរង់ចាំលទ្ធផល។

បច្ចុប្បន្ន ទីក្រុងហូជីមិញកំពុងព្យាបាលអ្នកជំងឺCOVID-19 ថ្មី ចំនួន2នាក់ ដែលជាជនជាតិអាមេរិកាំង។ ទីក្រុងនេះកំពុងតាមដានមនុស្សចំនួន470នាក់ ចំណែក1,113នាក់ផ្សេងទៀតកំពុងដាក់ឱ្យនៅដោយឡែក ខណៈ3,350នាក់ទៀតកំពុងបង្ខាំងខ្លួននៅក្នុងផ្ទះ។

គិតមកដល់បច្ចុប្បន្ន ប្រទេសវៀតណាមបានរកឃើញអ្នកជំងឺសរុបចំនួន 509នាក់ ក្នុងនោះមាន136នាក់កំពុងទទួលការព្យាបាល និង373នាក់បានជាសះស្បើយ។ ទីក្រុងចំនួន3ដែលបានរកឃើញអ្នកផ្ទុកវីរុសCOVID-19 ច្រើនជាងគេ រួមមានរដ្ឋធានីហាណូយ (123នាក់) ទីក្រុងដាណាំង (85នាក់) និងទីក្រុងហូជីមិញ (64នាក់)។

ទាក់ទិននឹងតួលេខនៃករណីរកឃើញអ្នកផ្ទុកវីរុសCOVID-19 នៅវៀតណាមក្នុងពេលថ្មីៗនេះ ក្រុមជំនាញផ្នែកសុខាភិបាលនៃសហរដ្ឋអាមេរិក និងអូស្ត្រាលី បានអះអាងថា ស្ថានភាព COVID-19 នៅប្រទេសវៀតណាម មិនទាន់ក្លាយជារលកនៃការរាតត្បាតទី2របស់វីរុសនេះនៅឡើយ។ ក៏ប៉ុន្តែ ក្រុមវេជ្ជបណ្ឌិតទាំងនេះបានផ្ដល់យោបល់ថាវៀតណាមគួរតែបន្ថែមការប្រុងប្រយ័ត្នជាងនេះ៕

ប្រភព៖ សារព័ត៌មានបរទេស

July 31, 2020

ប្រទេសចំនួន11ដែលមានអ្នកស្លាប់ដោយសារCOVID-19 ច្រើនជាង1ម៉ឺននាក់

ពិភពលោកបានរកឃើញអ្នកផ្ទុកវីរុសCOVID-19 ចំនួនជាង17.4លាននាក់ និងអ្នកស្លាប់ចំនួនជាង675,000នាក់ នៅពេល WHO ស្នើឱ្យបណ្ដាប្រទេសបន្ធូរបន្ថយការរឹតត្បិតលើការដើរហើរជាអន្តរជាតិ។

ប្រទេសនិងដែនដីចំនួនជាង200នៅទូទាំងពិភពលោកត្រូវបានរាយការណ៍ថា បានរកឃើញអ្នកឆ្លងវីរុសCOVID-19 ចំនួន17,433,441នាក់ និងអ្នកស្លាប់ដោយសារវីរុសនេះបានកើនដល់675,178នាក់ ក្នុងនោះមានអ្នកជំងឺថ្មី297,674នាក់ និងអ្នកស្លាប់ថ្មី6,832នាក់ត្រូវបានរកឃើញក្នុងរយៈពេល24ម៉ោងចុងក្រោយនេះ។ ចំណែកអ្នកជំងឺបានជាសះស្បើយ មានចំនួន10,917,809នាក់ នេះបើតាមស្ថិតិរបស់ Worldometers។

សហរដ្ឋអាមេរិក ប្រេស៊ីល និងឥណ្ឌា គឺជាបណ្ដាប្រទេសដែលមានអ្នកជំងឺCOVID-19 ច្រើនជាងគេក្នុងពិភពលោក ក្នុងនោះសហរដ្ឋអាមេរិកមានអ្នកជំងឺសរុប4,634,985នាក់ ប្រេស៊ីលមាន2,613,789នាក់ និងឥណ្ឌាមាន1,639,350នាក់។

ប្រទេសចំនួន11ដែលមានអ្នកស្លាប់លើសពី1ម៉ឺននាក់ រួមមាន សហរដ្ឋអាមេរិក (155,285) ប្រេស៊ីល (91,377នាក់) ម៉ិកស៊ិក (46,000នាក់) អង់គ្លេស (45,999នាក់) ឥណ្ឌា (35,786នាក់) អ៊ីតាលី (35,132នាក់) បារាំង (30,254នាក់) អេស្ប៉ាញ (28,443នាក់) ប៉េរូ (18,816នាក់) អ៊ីរ៉ង់ (16,569នាក់) និងរុស្ស៊ី (13,802នាក់)។

អង្គការសុខភាពពិភពលោក កាលពីថ្ងៃទី30កក្កដា យល់ថា បណ្ដាប្រទេសគួរតែដកវិធានការរឹតត្បិតការដើរហើរទៅមកក្នុងពិភពលោកបន្ទាប់ពីបានវាយតម្លៃហានិភ័យដោយខ្លួនឯង។ ទន្ទឹមនឹងនេះគួរតែផ្ដល់អាទិភាពដល់សកម្មភាពផ្ដល់សេវាកម្មបន្ទាន់ សកម្មភាពមនុស្សធម៌ និងអនុញ្ញាតឱ្យពលរដ្ឋរបស់ខ្លួនត្រលប់ចូលប្រទេសរបស់ពួកគេវិញ៕

July 31, 2020

កុមារាខ្មែរដែលចេះនិយាយ16ភាសា ពេលនេះជីវិតបានក្លាយទៅជាយ៉ាងណាហើយ?

ដោយសារតែចេះនិយាយបាន16ភាសា និងព្រោះតែវីដេអូដែលត្រូវបានអ្នកទេសចរបរទេសបង្ហោះលើបណ្ដាញសង្គម កុមារា ធុច សាលីក (Thuch Salik) ក៏មានឈ្មោះល្បីល្បាញក្រោយរយៈពេលតែមួយយប់ប៉ុណ្ណោះ។ បច្ចុប្បន្ន កុមារារូបនេះមានជីវភាពរស់នៅខុសពីមុនឆ្ងាយណាស់។

មានឈ្មោះល្បីល្បាញដោយសារទទួលបានចំណាប់អារម្មណ៍ពីស្ត្រីអ្នកជំនួញ

ធុច សាលីក (14ឆ្នាំ) គឹជាកុមារាម្នាក់រស់នៅជាមួយគ្រួសារដែលមានសមាជិក4នាក់នៅក្នុងផ្ទះចាស់ទ្រុឌទ្រោមមួយខ្នងដែលនៅមិនឆ្ងាយប៉ុន្មានពីប្រាសាទតាព្រហ្មនៃខេត្តសៀមរាប។ រាល់ព្រឹក សាលីក ត្រូវជិះកង់ផ្លូវឆ្ងាយទៅសាលារៀន ហើយល្ងាចក៏ស្ពាយកន្ត្រកវត្ថុអនុស្សាវរីយ៍ដើម្បីលក់ឱ្យអ្នកទេសចរនៅមុខក្លោងទ្វារចូលប្រាសាទអង្គរវត្ត។

ដើម្បីអាចទំនាក់ទំនងជាមួយភ្ញៀវទេសចរបរទេស សាលីក និងក្រុមកុមារផ្សេងទៀត ត្រូវរៀននិយាយភាសាបរទេសដោយខ្លួនឯង។ ប៉ុន្តែ កុមារា សាលីក មានលក្ខណៈពិសេសជាងគេ ព្រោះតែមានសមត្ថភាពចាប់យកភាសាបរទេសបានល្អ។ សមត្ថភាពនៃការនិយាយភាសាបរទេសរបស់ សាលីក កាន់តែរីកច្រើនឡើងៗដោយសារបានប្រាស្រ័យទាក់ទងផ្ទាល់ជាមួយនឹងអ្នកទេសចរបរទេសជារៀងរាល់ថ្ងៃ រហូតដល់អាចនិយាយបាន16ភាសា។

សាលីកបានឱ្យដឹងថា “ដំបូង ខ្ញុំរៀនភាសាអង់គ្លេសតិចតួច ប៉ុន្តែក្រោយមក ម្ដាយខ្ញុំបានបញ្ជូនខ្ញុំឱ្យទៅលក់នៅឯភ្នំបាក់ខែង ជាកន្លែងដែលមានអ្នកទេសចរជនជាតិចិនច្រើន ហើយខ្ញុំក៏ត្រូវរៀននិយាយជាមួយពួកគេ។ នៅពេលឃើញអ្នកទេសចរ ខ្ញុំចាប់ផ្ដើមច្រៀងដើម្បីទាក់ទាញពួកគេ”។

ភាពឆ្លាតវៃ និងភាពក្លាហានរបស់ សាលីក បានធ្វើឱ្យអ្នកទេសចរជាច្រើនចូលចិត្ត និងជួយទិញ។ ប្រាក់ដែលរកបាន សាលីក តែងតែប្រគល់ទាំងអស់ជូនម្ដាយដើម្បីចាត់ចែងទៅលើការសិក្សារបស់ សាលីក និងប្អូនប្រុសឈ្មោះ ធុច ទិត្យា។ សំណាងល្អសម្រាប់ សាលីក បានមកដល់ក្នុងឆ្នាំ2018 នៅពេលដែលបានជួបស្ត្រីអ្នកជំនួញជនជាតិម៉ាឡេស៊ី និងជា blogger ផ្នែកទេសចរណ៍ម្នាក់។

ស្ត្រីអ្នកជំនួញខាងលើមានការភ្ញាក់ផ្អើលខ្លាំងនៅពេលបានឃើញសមត្ថភាពនៃការនិយាយភាសាបរទេសរបស់ សាលីក។ ស្ត្រីរូបនេះក៏បានថតសកម្មភាពដែល សាលីក និយាយជាភាសាចិន ជប៉ុន ថៃជាដើមបានយ៉ាងល្អ និងបានបង្ហោះវីដេអូនេះទៅក្នុងបណ្ដាញសង្គម Facebook។ វីដេអូនេះក៏ចាប់ផ្ដើមទទួលបានចំណាប់អារម្មណ៍យ៉ាងខ្លាំងពីអ្នកលេងបណ្ដាញសង្គម ដែលកាលណោះមានអ្នកចូលមើលជាង1លាននាក់ និងចែករំលែករាប់ម៉ឺនលើក ក្នុងរយៈពេលតែ5ថ្ងៃប៉ុណ្ណោះ បន្ទាប់ពីបានបង្ហោះ។

ធុច សាលីក ក៏ស្រាប់តែមានឈ្មោះល្បីល្បាញ និងមានសារព័ត៌មានជាច្រើនបាននាំគ្នាទៅសុំសម្ភាស និងរាយការណ៍។ នៅពេលត្រូវបានអ្នកយកព័ត៌មានរបស់ Channel News Asia សួរថា អាចនិយាយបានប៉ុន្មានភាសា សាលីក បានចាប់ផ្ដើមរាប់ និងឆ្លើយថា 16ភាសា រួមមាន ភាសាអាល្លឺម៉ង់ អ៊ីតាលី បារាំង អេស្ប៉ាញ អង់គ្លេស ម៉ាឡេស៊ី រុស្ស៊ី ថៃ វៀតណាម កូរ៉េ ជប៉ុន និងភាសាតំបន់ចំនួន3ទៀតរបស់ប្រទេស (ចិនកុកងឺ ចិនក្វាងតុង ចិនហៃណាន)។

ជីវិតចាប់ផ្ដើមទទួលជោគជ័យ បន្ទាប់ពីបានល្បីឈ្មោះ

ក្រោយពីមានឈ្មោះល្បីល្បាញនៅលើបណ្ដាញសង្គម សាលីក ក៏ទទួលបានការអញ្ជើញឱ្យទៅទេសចរណ៍នៅប្រទេសចិន។ ទូរទស្សន៍ជាច្រើនបាននាំគ្នាផ្ដល់ជំនួយដល់គ្រួសាររបស់ សាលីក ក្នុងការទៅធ្វើជាភ្ញៀវនៃកម្មវិធីផ្សេងៗ។ ទន្ទឹមនឹងនេះ ក៏មានអ្នកជំនួញ ស្ថាប័ន និងក្រុមមនុស្សធម៌ជាច្រើនបានជួយដល់កុមារារូបនេះ ក្នុងនោះក៏មានការសន្យាផ្ដល់ជំនួយឧបត្ថម្ភការសិក្សារបស់ សាលីក រហូតដល់រៀនចប់មហាវិទ្យាល័យទៀតផង។

ឆ្នាំ2019 សាលីក បានទៅសិក្សានៅប្រទេសចិនជាផ្លូវការនៅសាលាភាសាបរទេស Hailiang ក្នុងខេត្ត Zhejiang។ លោកឧកញ៉ា ឃិត ឈឿន ដែលជាអគ្គនាយកផ្សារ KC គឺជាអ្នកឧបត្ថម្ភធំដល់កុមារា សាលីក។

ទៅដល់ប្រទេសចិន នៅពេលចុះពីយន្តហោះភ្លាម សាលីក ត្រូវបានទទួលស្វាគមន៍យ៉ាងកក់ក្ដៅពីសិស្ស និងគ្រូបង្រៀនជាច្រើននៃសាលា Hailiang។ សាលីក ថែមទាំងទទួលបានបាច់ផ្កា និងការរាំច្រៀងទទួលស្វាគមន៍ទៀតផង។ បន្ទាប់ពីបានចូលរៀន សាលីក ស្នាក់នៅក្នុងបន្ទប់អន្តេវាសិកដ្ឋានជាមួយសិស្សជនជាតិកូរ៉េខាងត្បូងម្នាក់។

បច្ចុប្បន្ន សាលីក កំពុងប្រឹងប្រែងសិក្សាខ្លាំងណាស់ ហើយប្អូនក៏មានបំណងប្រឡងចូលសាកលវិទ្យាល័យប៉េកាំងផងដែរ។ សាលីក ប្រាប់ថា “ប្អូនចូលចិត្តសាលារៀនខ្លាំងណាស់។ ប្អូនដឹងថា អក្សរចិនពិតជាពិបាកសរសេរ ប៉ុន្តែការនិយាយវិញ ប្អូនមិនបានជួបការលំបាកអ្វីនោះទេ។ ផ្នែកគណិតវិទ្យា និងភាសាអង់គ្លេសក៏មិនមានបញ្ហាដែរ”។

មិត្តភក្ដិក្នុងសាលារៀននេះ អ្នកណាៗក៏ស្រលាញ់ចូលចិត្តសាលីក។ សិស្សជនជាតិចិនម្នាក់បានសម្ដែងចំណាប់អារម្មណ៍ថា “ប្អូនចង់រៀនសូត្រពី សាលីក។ សាលីក ពិតជាអស្ចារ្យណាស់។ គេចេះច្រើនភាសា។ ស្ថានភាពរបស់ប្អូនល្អជាង សាលីក ឆ្ងាយណាស់ ប៉ុន្តែបែរជារៀនមិនបានល្អដូច សាលីក”។

ក្រៅពីជនជាតិចិន សាលីក ក៏មានមិត្តភក្ដិជាជនជាតិកូរ៉េខាងត្បូងដែរ។ សាលីក តែងតែលេងបាល់ទះ និងបាល់បោះជាមួយអ្នកគ្រប់គ្នាក្រោយពីចប់ម៉ោងសិក្សា បើទោះជាមានរូបរាង “តូច ស្គម” ជាងមិត្តភក្ដិផ្សេងៗក៏ដោយ។ លោក ហានណា វ៉ាង (Hannah Wang) ដែលជាគ្រូរបស់ សាលីក ឱ្យដឹងថា “សិស្សម្នាក់នេះពិតជាស្ដាប់បង្គាប់ និងឧស្សាហ៍រៀនសូត្រណាស់។ ប៉ុន្តែ ខ្ញុំសង្ឃឹមថា សាលីក នឹងកែលម្អទម្លាប់ហូបចុក គេគួរតែហូបឱ្យបានគ្រប់គ្រាន់ជារៀងរាល់ថ្ងៃ ដើម្បីសុខភាពបានប្រសើរឡើង”។

ធុច សាលីក (ស្ដាំ) ជាមួយម្ដាយ និងប្អូនប្រុស ធុច ទិត្យា

ចំណែកក្រុមគ្រួសាររបស់ ធុច សាលីក វិញ សមាជិកគ្រួសារទាំងអស់បានមករស់នៅក្នុងក្រុងភ្នំពេញ ដោយមានការជ្រោមជ្រែករបស់ក្រុមអ្នកឧបត្ថម្ភ និងស្ថាប័នមនុស្សធម៌នានា។ នៅភ្នំពេញ ពួកគេបន្តមុខរបរលក់គ្រឿងអលង្ការឱ្យភ្ញៀវទេសចរ៕

July 30, 2020

សហរដ្ឋអាមេរិកលេចចេញចំណុចខ្សោយ បន្ទាប់ពីទីប្រឹក្សាសន្តិសុខជាតិឆ្លងCOVID-19

ពលរដ្ឋអាមេរិកាំងហាក់បានដឹងថា មិនមាននរណាម្នាក់មានសុវត្ថិភាពនៅចំពោះមុខ COVID-19 ឡើយ សូម្បីតែ Robert O’Brien ដែលជាអ្នកគ្រប់គ្រងកិច្ចការសន្តិសុខជាតិ។

សេតវិមានបានឱ្យដឹងថា O’Brien គឺជាមន្ត្រីជាន់ខ្ពស់បំផុតដែលត្រូវបានបញ្ជាក់ថា វិជ្ជមានជាមួយនឹងវីរុសCOVID-19 រាប់ចាប់តាំងពីវីរុសនេះចាប់ផ្ដើមរាតត្បាតនៅសហរដ្ឋអាមេរិក។ នេះក៏ជាករណីថ្មីបំផុតដែលមន្ត្រីធ្វើការនៅក្បែរប្រធានាធិបតី Donald Trump ត្រូវបានគេរកឃើញថាមានផ្ទុកវីរុសCOVID-19។

ព័ត៌មានដែលបញ្ជាក់ថា O’Brien បានឆ្លង COVID-19 នេះ បានបង្ហាញថា ការគំរាមកំហែងពីវីរុសនេះកំពុងតែស្ថិតនៅក្នុងសេតវិមាន និងមានការព្រួយបារម្ភអំពីវិធានការដោះស្រាយបញ្ហាវិបត្តិសុខភាពដ៏ធ្ងន់ធ្ងររបស់រដ្ឋអំណាច។ នេះបើតាម Samantha Vinograd ដែលជាអ្នកវិភាគមកពី CNN។

អ្នកស្រី Samantha Vinograd សង្កត់ធ្ងន់ថា “បើសិនជារដ្ឋាភិបាលមិនអាចការពារសុខភាពរបស់មន្ត្រីជាន់ខ្ពស់ដូចជា O’Brien ជាដើមបែបនេះ គឺពិតជាពិបាកក្នុងការជឿជាក់ថា ពួកគេពិតជាអាចការពារសុខភាពរបស់ពលរដ្ឋអាមេរិកាំងបាន”។

Samantha Vinograd ថ្លែងថា ការដែលលោក Robert O’Brien បានឆ្លងវីរុសនេះ គឺវាស្ទើរដូចទៅនឹង “ស្ថានភាពអាសន្ន” អំពីសុខភាពយ៉ាងដូច្នោះដែរ។ បើទោះជាសេតវិមានធ្លាប់បានប្រកាសអំពីករណីបុគ្គលិកនៅទីនេះឆ្លងវីរុសCOVID-19ក៏ដោយ ប៉ុន្តែករណីរបស់លោក O’Brien គឺពិតគួរឱ្យប្រកាសអាសន្នជាង ព្រោះតែជាបុគ្គលដែលមានទំនាក់ទំនងទូលំទូលាយ និងមានឥទ្ធិពល។

ជាធម្មតា ទីប្រឹក្សាសន្តិសុខជាតិតែងតែស្ថិតនៅក្បែរប្រធានាធិបតី អនុប្រធានាធិបតី ប្រធានការិយាល័យសេតវិមាន រួមជាមួយនឹងរដ្ឋមន្ត្រីជាច្រើនផ្សេងទៀតជាញឹកញាប់នៅក្នុងសន្និសីទសារព័ត៌មាន ឬកិច្ចប្រជុំនានារបស់ក្រុមប្រឹក្សាសន្តិសុខជាតិ។

ទីប្រឹក្សាសន្តិសុខជាតិម្នាក់ ក៏តែងតែមានទំនាក់ទំនងផ្ទាល់ជាមួយនឹងបុគ្គលិកជាន់ខ្ពស់ផ្នែកសន្តិសុខរាប់សិបនាក់ នៅពេលបំពេញភារកិច្ចសំខាន់ៗជារៀងរាល់ថ្ងៃ ព្រោះតែត្រូវទទួលរបាយការណ៍ផ្ទាល់ពីទីភ្នាក់ងារសន្តិសុខជាតិ NSA (National Security Agency) បុគ្គលិកនៃក្រុមប្រឹក្សាសន្តិសុខជាតិ NSC ( National Safety Council) រួមនឹងមន្ត្រីផ្សេងៗទៀត។

ក៏ប៉ុន្តែ សេតវិមានបានបញ្ជាក់ថា លោក O’Brien មានអាការរោគស្រាលៗប៉ុណ្ណោះ ព្រមទាំងបានអះអាងថា ប្រធានាធិបតី Donald Trump និងអនុប្រធានាធិបតី Mike Pence មិនមានហានិភ័យនៃការឆ្លងវីរុសនេះទេ។ លោក O’Brien មិនបានបង្ហាញវត្តមាននៅកន្លែងធ្វើការរបស់លោកតាំងតែពីសប្ដាហ៍មុន ហើយលោកក៏នៅតេគ្រប់គ្រងក្រុមប្រឹក្សាសន្តិសុខជាតិ តាមរយៈទូរស័ព្ទ។ នេះបើតាម Bloomberg។

យ៉ាងណាក៏ដោយ Samantha Vinograd យល់ថា ការដែលលោក O’Brien បានឆ្លងវីរុសនេះ ក៏មានន័យថា COVID-19 មានវត្តមាននៅទីតាំងនានានៅស្លាបខាងលិចនៃសេតវិមាន (West Wing of the White House) អស់មួយរយៈពេលមកហើយដែរ។ បញ្ហានេះអាចធ្ងន់ធ្ងរជាងអ្វីដែលយើងបានដឹង ដោយសារតែកាលពីពាក់កណ្ដាលខែកក្កដា លោក O’Brien និងក្រុមការងារបានធ្វើដំណើរទៅអឺរ៉ុបដើម្បីជួបពិភាក្សាជាមួយសមភាគីអង់គ្លេស បារាំង អាល្លឺម៉ង់ និងអ៊ីតាលី។ រូបថតដែល NSC បានចែករំលែក បានបង្ហាញថា ពួកគេឈរក្បែរគ្នាដោយមិនបានពាក់ម៉ាស់ការពារទេ។

អ្នកស្រី Vinograd ឱ្យដឹងថា លោក O’Brien ប្រហែលជាបានចម្លងវីរុសទៅអ្នកដទៃជាច្រើននាក់ បើសិនជាលោកបានឆ្លងវីរុសនេះនៅមុនពេលធ្វើដំណើរទៅកាន់អឺរ៉ុប។ អ្នកស្រី Vinograd យល់ថា “ការដែលសេតវិមានមិនអាចធានាសុវត្ថិភាពដល់ទីប្រឹក្សាសន្តិសុខជាតិរបស់ខ្លួនបានបែបនេះ គឺជាសារមួយដ៏គួរឱ្យព្រួយបារម្ភ ដែលបង្ហាញឱ្យឃើញនូវសមត្ថភាពនៃការទប់ទល់ COVID-19 របស់រដ្ឋាភិបាល”៕

ប្រភព៖ សារព័ត៌មានបរទេស

July 30, 2020

“ដង្កូវយក្សអវកាស” ប្រវែងដល់ទៅជិត10លានលានគីឡូម៉ែត្រ (វីដេអូ)

បណ្ដុំពពកយក្សដែលមានរូបរាងស្រដៀងទៅនឹងដង្កូវយក្សមួយក្បាល កំពុងតែស្រូបទាញយកវត្ថុធាតុអវកាសដើម្បីក្លាយជាផ្កាយថ្មីមួយដួង។

តើដង្កូវយក្សដែលកំពុងលេបយកវត្ថុអវកាសដ៏ធំមហិមា និងមានប្រវែងដល់ទៅ9.7លានលាន (9,700,000,000,000) គីឡូម៉ែត្រនេះគឺជាអ្វីឱ្យប្រាកដ?

វត្ថុធាតុនេះត្រូវបានគេដាក់រហ័សនាមឱ្យថា “ដង្កូវអវកាស”។ “ដង្កូវអវកាស” នេះ គឺជាបណ្ដុំពពកដ៏ធំមហិមា និងត្រូវបានអ្នកវិទ្យាសាស្ត្រដាក់ឈ្មោះជាផ្លូវការថា IRAS 20324+4057។

IRAS 20324+4057 កំពុងស្ថិតក្នុងដំណាក់កាលដំបូងនៃការកកើតជាផ្កាយ (ផ្កាយគឺជាព្រះអាទិត្យដែលដូចទៅនឹងព្រះអាទិត្យរបស់មនុស្សនាបច្ចុប្បន្ន)។ មានន័យថា វាមិនទាន់ក្លាយជាផ្កាយមួយដួងនៅឡើយ។

វត្ថុអវកាសនេះកំពុងតែរីកមាឌដោយការប្រមូលនិងលេបយករាល់វត្ថុដែលនៅជុំវិញផ្កាយមហាក្ដៅចំនួន65ដួងដែលស្ថិតក្នុងកញ្ចុំផ្កាយ Cygnus OB2 ដែលមានទីតាំងនៅមិនឆ្ងាយពី “ដង្កូវអវកាស” នេះ។

កញ្ចុំផ្កាយ Cygnus OB2 ដែលកំពុងបញ្ចេញកម្ដៅខ្លាំង បង្កើតបានជាខ្យល់ផ្កាយដ៏សាហាវជាមួយនឹងវិទ្យុសកម្មអ៊ុលត្រាវីយ៉ូឡេត (ultraviolet radiation) ដ៏មហាសាល បណ្ដាលឱ្យបណ្ដុំពពកយក្ស IRAS 20324+4057 នេះ ប្រែរូបរាងទៅជាវែងអន្លាយយ៉ាងដូច្នេះ។ ប្រការនេះក៏កំពុងតែរារាំងដំណើរការនៃការប្រមូលលេបវត្ថុធាតុអវកាសនានារបស់ IRAS 20324+4057។

អ្នកវិទ្យាសាស្ត្របានឱ្យដឹងថា ពេលវាលនឹងអាចឆ្លើយទៅនឹងសំណួរដែលសួរថា “តើបណ្ដុំពពកយក្សនេះ អាចប្រមូលបានវត្ថុធាតុចាំបាច់គ្រប់គ្រាន់ក្នុងការវិវឌ្ឍខ្លួនទៅជាផ្កាយមួយដួងបានដែរ ឬយ៉ាងណា?”។

ប្រភព៖ សារព័ត៌មានបរទេស

July 29, 2020

និស្សិតចិន នៅអូស្ត្រាលី គឺមុខសញ្ញារបស់ក្រុមបោកប្រាស់ ឱ្យបន្លំធ្វើជាត្រូវចាប់ជំរិតទារប្រាក់ពីឪពុកម្ដាយ

ប៉ូលិសអូស្ត្រាលី បានបង្ហើបឱ្យដឹងថា ក្រុមនិស្សិតជនជាតិចិននៅក្នុងទីក្រុងស៊ីដនី កំពុងក្លាយជាមុខសញ្ញារបស់ក្រុមជនពាល ដែលបោកប្រាស់ និងបង្ខំឱ្យរៀបចំឆាកបន្លំធ្វើជា ខ្លួនឯងត្រូវពួកជនពាលចាប់ជំរិត ហើយផ្ញើឃ្លិបវីដេអូទៅឱ្យក្រុមគ្រួសារនៅឯប្រទេសចិន ដើម្បីជំរិតទារប្រាក់ថ្លៃដោះលែងក្នុងចំនួនដ៏ច្រើន។

ជាពិសេស ក្នុងឆ្នាំនេះ មានការដាក់ពាក្យបណ្ដឹងក្នុងលក្ខណៈបែបនេះចំនួន 8នាក់រួចមកហើយ ដោយជនរងគ្រោះម្នាក់ បានបង់ប្រាក់ថ្លៃដោះលែងកូនរបស់ខ្លួន ទៅឱ្យជនល្មើសចំនួន 2លានដុល្លារអូស្ត្រាលី។ ប៉ូលិសបានឱ្យដឹងថា ជនរងគ្រោះសុខចិត្តបង់ប្រាក់ថ្លៃដោះលែង ក៏ព្រោះតែជឿថា កូនចៅជាទីស្រឡាញ់របស់ខ្លួន កំពុងតែស្ថិតក្នុងស្ថានភាពគ្រោះថ្នាក់។

ប៉ូលិសរដ្ឋ នីវសៅថ៍វេលស៍ ថែមទាំងបញ្ជាក់ទៀតថា ការបោកប្រាស់ក្នុងលក្ខណៈនេះ “បានកើនឡើងច្រើន ពេញមួយពាក់កណ្ដាលឆ្នាំ2020នេះ” និងធ្វើឡើងជា “ប្រព័ន្ធដ៏ធំមួយ” ដូច្នេះហើយទើបសំណូមពរឱ្យនិស្សិតដែលបានទទួលទូរស័ព្ទគំរាមក្នុងលក្ខណៈបែបនេះ ប្រញាប់ចូលមកប្ដឹងប៉ូលិសភ្លាមៗកុំបង្អង់យូរ។

តើពួកក្រុមបោកប្រាស់នោះធ្វើបែបណា?

អាជ្ញាធរអូស្ត្រាលី បានបញ្ជាក់ថា ប្រព័ន្ធបោកប្រាស់ “បែបក្រុម ខល សិនធើរ៍” នេះ មានមូលដ្ឋានប្រតិបត្តិការនៅក្រៅប្រទេស ដែលធ្វើឱ្យពិបាកតាមដាន ដោយជាទូទៅ ជនល្មើសប្រភេទនេះ ច្រើនតែអះអាងថា ខ្លួនជាមន្ត្រីមកពីស្ថានទូតចិន ឬជាអាជ្ញាធរនៃរដ្ឋផ្សេងៗ ហើយទូរស័ព្ទទៅរកជនរងគ្រោះ ដោយឱ្យដំណឹងថា ជនរងគ្រោះមានចំណែកពាក់ព័ន្ធនឹងការបង្កបទឧក្រិដ្ឋនៅក្នុងប្រទេសចិន ឬកំពុងប្រឈមនឹងការបៀតបៀនផ្សេងៗ។

បន្ទាប់ពីនោះ ជនល្មើស ដែលភាគច្រើនចេះនិយាយភាសាចិនកណ្ដាល ច្រើនតែបញ្ជាឱ្យនិស្សិតរងគ្រោះ បង់ថ្លៃឃុំគ្រង ដើម្បីកុំឱ្យត្រូវអាជ្ញាធរចាប់ឃុំខ្លួន ឬចាប់បញ្ជូនត្រឡប់ទៅប្រទេសវិញ។

ក្នុងករណីខ្លះ និស្សិតទាំងនោះ ថែមទាំងត្រូវបោកប្រាស់ឱ្យឈប់ទាក់ទងទៅក្រុមគ្រួសារ និងមិត្តភក្តិ និងឱ្យទៅជួលបន្ទប់ស្នាក់នៅឯសណ្ឋាគារ ហើយបោកប្រាស់ឱ្យរៀបចំឆាក ថតរូប ឬវីដេអូ ធ្វើឱ្យគេជឿថា ខ្លួនឯងកំពុងត្រូវជនល្មើសចាប់ជំរិត ដើម្បីទារប្រាក់ថ្លៃដោះលែងពីក្រុមគ្រួសារ។

ជនរងគ្រោះម្នាក់ ដែលជាឪពុករបស់និស្សិតរងគ្រោះម្នាក់ បានចាយប្រាក់ថ្លៃដោះលែងកូនរបស់គាត់ ជាង 2លានដុល្លារអូស្ត្រាលី ក្រោយពីបានទទួលឃ្លិបវីដេអូដែលបង្ហាញឱ្យឃើញថា កូនស្រីរបស់ខ្លួនកំពុងស្ថិតក្នុងសភាពត្រូវគេចាប់ចង ញ៉ុកក្រណាត់បិទមាត់ និងចងដៃ ចងជើង នៅក្នុងកន្លែងដែលមិនស្គាល់ទីតាំង។

បន្ទាប់ពីនោះ បុរសជាឪពុក បានទាក់ទងទៅប៉ូលិសក្រុងស៊ីដនី និងបន្ទាប់ពីការស្វែងរកប្រមាណជា 1ម៉ោងក្រោយមក ក៏រកឃើញថា និស្សិតស្រីម្នាក់នោះមានសុវត្ថិភាព កំពុងស្ថិតនៅក្នុងបន្ទប់សណ្ឋាគារមួយក្នុងទីក្រុងស៊ីដនី។

ចំណែកជនរងគ្រោះដទៃទៀត បានប្ដឹងទៅប៉ូលិសក្នុងឆ្នាំនេះថា ពួកគេបានបង់ប្រាក់ទៅឱ្យក្រុមបោកប្រាស់ទាំងនោះ ក្នុងចន្លោះពី 20,000-300,000ដុល្លារអូស្ត្រាលី។

លោក ដារេន បិនណិតត៍ មេបញ្ជាការកងស៊ើបអង្កេតរបស់ប៉ូលិសរដ្ឋនីវសៅថ៍វេលស៍ បានថ្លែងថា គ្រួសារខ្លះ សុខចិត្តបង់ប្រាក់ទាំងអស់ដែលពួកគេមាន ឱ្យទៅពួកក្រុមប្រព័ន្ធបោកប្រាស់នេះ ដើម្បីសុវត្ថិភាពរបស់មនុស្សជាទីស្រឡាញ់។

ក្នុងករណីជាច្រើន ក្រោយប៉ូលិសបានទទួលការផ្ដល់ដំណឹង ក៏រកឃើញជនរងគ្រោះក្នុងសភាពដែលមានសុវត្ថិភាពនៅថ្ងៃតមក និងជាញឹកញាប់ណាស់ ដែលជនរងគ្រោះមានអារម្មណ៍ខ្មាស់គេ និងខ្មាស់ខ្លួនឯង រហូតមិនហ៊ានចូលទៅប្ដឹងប៉ូលិស។

ប៉ូលិសរដ្ឋនីវសៅថ៍វេលស៍ បញ្ជាក់ថា “ជនរងគ្រោះនៃការរៀបចំឆាកចាប់ជំរិតទារប្រាក់ ដែលយើងរកឃើញ បានទទួលការឈឺចាប់ខាងផ្លូវចិត្តពីហេតុការណ៍ដែលកើតឡើងនេះ ដោយជឿថា ពួកគេបានធ្វើឱ្យខ្លួនឯង និងបុគ្គលដែលជាទីស្រឡាញ់ ធ្លាក់ក្នុងគ្រោះថ្នាក់មែនទែន”

ហេតុអ្វី បានជាមនុស្សម្នាលង់ជឿ?

ប៉ូលិសបានបញ្ជាក់ថា ការបោកប្រាស់ក្នុងលក្ខណៈនេះ ពួកគេធ្វើក្នុងលក្ខណៈជាប្រព័ន្ធធំមួយ និងមើលទៅហាក់ដូចជាប្រើការទូរស័ព្ទស្វ័យប្រវត្តិ ស្វែងរកគ្រប់មនុស្សនៅក្នុងបញ្ជីលេខទូរស័ព្ទដែលមាននាមត្រកូលចិន។

លោកមេបញ្ជាការ បិនណិតត៍ ថ្លែងថា “ពួកនេះបង់សំណាញ់រកចាប់ជនរងគ្រោះជារង្វង់ធំមួយ និងទោះជាបានជនរងគ្រោះដែលលង់ជឿមិនប៉ុន្មាននាក់មែន តែក៏ទទួលបានប្រាក់យ៉ាងច្រើនដែរ”

ក្រៅពីនេះ លោកបានចង្អុលបង្ហាញថា ការបោកប្រាស់ក្នុងលក្ខណៈនេះ កំពុងកើនឡើងខ្ពស់ ក្នុងអំឡុងប៉ុន្មានខែកន្លងមកនេះ ដោយ “ស្ទើរតែគ្រប់សប្ដាហ៍ យើងមានអ្នកធ្លាក់ខ្លួនក្លាយជាជនរងគ្រោះនៃការបោកប្រាស់បែបនេះ”

ក្រុមអ្នកជួយសង្គ្រោះផ្នែកច្បាប់ដល់ក្រុមនិស្សិតបរទេសក្នុងប្រទេសអូស្ត្រាលី បញ្ជាក់ថា និស្សិត 1ក្រុមនេះ មានភាពប្រថុយប្រថានកើនឡើងក្នុងអំឡុងពេលដែលកើតវិបត្តិជំងឺកូវីដ-19 ដោយសារតែការដែលពួកគេត្រូវពឹងលើការធ្វើការងារបណ្ដោះអាសន្ន និងមិនបានទទួលការឃុំគ្រងអំពីរដ្ឋ។

ខណៈដែលប៉ូលិសបញ្ជាក់ថា “បច្ច័យផ្នែកវប្បធម៌” រួមទាំងការរស់នៅយ៉ាងឯការបស់និស្សិតបរទេស ធ្វើឱ្យពួកគេធ្លាក់ខ្លួនក្លាយជាមុខសញ្ញារបស់ជនពាល បានយ៉ាងងាយ។

លោក បិនណិតត៍ ប្រាប់ថា ជនរងគ្រោះទាំងនេះ អាចត្រូវពង្វក់ឱ្យធ្វើរឿងដែលហួសវិស័យ ដូចជា ការរៀបចំឆាកការចាប់ពង្រត់ជំរិតខ្លួនឯង ព្រោះពួកគេបានធ្លាក់ខ្លួនស្ថិតក្រោម “ការគ្រប់គ្រងខាងផ្លូវចិត្ត” របស់ជនល្មើស។

ប៉ូលិសនីវសៅថ៍វេលស៍ បានណែនាំថា “មានរឿងសំខាន់ 2ប្រការ ដែលនិស្សិតបរទេសអាចធ្វើបាន ដើម្បីការពារខ្លួនឯងពីឧក្រិដ្ឋជនប្រភេទនេះ គឺទី1-ដឹងថាមានការបោកប្រាស់ក្នុងរូបបែបហ្នឹង។ ទី2-សុំការជួយសង្គ្រោះតាំងពីពេលដំបូងៗភ្លាម បើសង្ស័យថា ខ្លួនឯង ឬអ្នកដែលយើងស្គាល់កំពុងប្រឈមនឹងការបោកប្រាស់បែបនេះ។

ក្រៅពីនៅក្នុងប្រទេសអូស្ត្រាលីហើយ នៅមានរបាយការណ៍ អំពីហេតុការណ៍បោកប្រាស់ក្នុងលក្ខណៈនេះ នៅក្នុងប្រទេសនីវហ្ស៊ីលែនដ៍ និងសហរដ្ឋអាមេរិក ដូចគ្នា៕

ប្រភព៖ សារព័ត៌មានបរទេស

July 29, 2020

អ៊ីរ៉ង់បាញ់កម្ទេច “គំរូនាវាផ្ទុកយន្តហោះចម្បាំងអាមេរិក” (វីដេអូ)

កងកម្លាំងឆ្មាំបដិវត្តអ៊ីរ៉ង់ បានបាញ់មីស៊ីលកម្ទេចគំរូនាវាផ្ទុកយន្តហោះចម្បាំងសហរដ្ឋអាមេរិកមួយគ្រឿង នៅក្នុងសមយុទ្ធយោធារបស់ខ្លួននៅលើឆកសមុទ្រ Hormuz កាលពីម្សិលមិញ។

វីដេអូដែលថតសកម្មភាពសមយុទ្ធដែលមានឈ្មោះថា “Great prophet 14” បានបង្ហាញថា កងកម្លាំងពិសេសអ៊ីរ៉ង់ ប្រើប្រាស់ទូកល្បឿនលឿនឡោមព័ន្ធគំរូនាវាផ្ទុកយន្តហោះអាមេរិក។ កម្លាំងពិសេសនេះក៏បានធ្វើសមយុទ្ធសម្រុកចូលទៅគ្រប់គ្រងនាវានេះដោយប្រើឧទ្ធម្ភាគចក្រ ការចូលគ្រប់គ្រងពីលើផ្ទៃទឹក និងពីក្រោមទឹក។ ក្រោយមក ឧទ្ធម្ភាគចក្រមួយគ្រឿងរបស់កងកម្លាំងឆ្មាំបដិវត្តអ៊ីរ៉ង់ (IRGC) ក៏បានបាញ់គ្រាប់រ៉ុកកែតតម្រង់គំរូនាវានេះ។

សមយុទ្ធនេះត្រូវបានធ្វើឡើងនៅក្បែរឆកសមុទ្រ Hormuz ដែលជាផ្លូវនាវាចរណ៍ដ៏សំខាន់ ជាកន្លែងដែលទំនិញប្រេងប្រមាណជា1/5នៃពិភពលោក ត្រូវនាំឆ្លងកាត់។ សមយុទ្ធនេះ ត្រូវបានបង្កើតឡើងនៅក្នុងគ្រាដែលភាពតានតឹងរវាងអ៊ីរ៉ង់ និងសហរដ្ឋអាមេរិក មិនទាន់មានសញ្ញាថមថយនៅឡើយ។

កងទ័ពអ៊ីរ៉ង់ថែមទាំងហាត់បាញ់រ៉ុកកែតសំដៅយន្តហោះគ្មានមនុស្សបើក នៅក្បែរតំបន់ទីក្រុង Bandar Abbas ផងដែរ។ ក្រៅពីនេះក៏មានការហាត់បាញ់រ៉ុកកែតចេញពីរថយន្តដឹកទំនិញ ពីទូកល្បឿនលឿន និងពីប្រព័ន្ធរ៉ុកកែតស្ពាយលើស្មាជាដើម។

មេបញ្ជាការរង ទទួលបន្ទុកបេសកកម្ម Abbas Nilforoushan ថ្លែងថា “កងកម្លាំងឆ្មាំបដិវត្តអ៊ីស្លាមអ៊ីរ៉ង់ ប្រើប្រាស់កាំជ្រួចផ្លោងរយៈចម្ងាយឆ្ងាយ ដែលមានសមត្ថភាពបាញ់ចាំគោលដៅនៅលើផ្ទៃទឹករបស់សត្រូវឈ្លានពាននៅទីឆ្ងាយ នៅក្នុងសមយុទ្ធនេះ”។

សមយុទ្ធមួយនេះត្រូវបានគេមើលឃើញថា ជាការព្រមានអំពីហានិភ័យនៃការផ្ទុះអាវុធដាក់គ្នារវាងអ៊ីរ៉ង់ជាមួយនឹងសហរដ្ឋអាមេរិក នៅក្នុងតំបន់ផ្លូវនាវាចរណ៍ដែលកប៉ាល់ដឹកប្រេងនានាឆ្លងកាត់។ កាលពីពាក់កណ្ដាលឆ្នាំ2019 កប៉ាល់ដឹកប្រេងមួយចំនួនដែលឆ្លងកាត់តំបន់ឆកសមុទ្រ Hormuz ត្រូវរងការវាយប្រហារ។ សហរដ្ឋអាមេរិកបានចោទអ៊ីរ៉ង់ថា ជាអ្នកនៅពីក្រោយការវាយប្រហារនេះ ប៉ុន្តែត្រូវបានអ៊ីរ៉ង់ច្រានចោល។

ភាពតានតឹងរវាងសហរដ្ឋអាមេរិកនិងអ៊ីរ៉ង់ បានចាប់ផ្ដើមកើនកម្ដៅខ្លាំងបន្ទាប់ពីប្រធានាធិបតិ Donald Trump បានដកសហរដ្ឋអាមេរិកចេញពីកិច្ចព្រមព្រៀងនុយក្លេអែររវាងអាមេរិកនិងអ៊ីរ៉ង់កាលពីឆ្នាំ2018។ អ៊ីរ៉ង់ក៏ធ្លាប់បានបាញ់ទម្លាក់យន្តហោះគ្មានមនុស្សបើកមួយគ្រឿងរបស់សហរដ្ឋអាមេរិកផងដែរកាលពីខែមិថុនា2019 ដែលហេតុការណ៍នេះវិះនឹងបញ្ឆេះសង្គ្រាមរវាងប្រទេសទាំង2ទៀតផង។

https://www.youtube.com/watch?v=CImlCIOUFgM

ការស្អប់ខ្ពើមគ្នារវាងអ៊ីរ៉ង់និងសហរដ្ឋអាមេរិក បានកើនកម្ដៅថែមមួយកម្រិតទៀត បន្ទាប់ពីឧត្តមសេនីយ៍ Qasem Soleimani មេបញ្ជាការកងកម្លាំងពិសេស Quds របស់ IRGC ត្រូវបានធ្វើឃាតនៅប្រទេសអ៊ីរ៉ាក់កាលពីខែមករា។ បញ្ហាថ្មីៗនេះបំផុតនោះគឺករណីដែល IRGC បញ្ជូនទូកល្បឿនលឿនទៅក្បែរនាវាចម្បាំងសហរដ្ឋអាមេរិក និងករណីយន្តហោះ F-15 ហោះទៅក្បែរយន្តហោះដឹកអ្នកដំណើររបស់អ៊ីរ៉ង់នៅលើដែនអាកាសប្រទេសស៊ីរី៕

ប្រភព៖ សារព័ត៌មានបរទេស

July 29, 2020

លោក គីម ជុងអ៊ុន សប្បាយចិត្ត ក្នុងថ្ងៃគម្រប់ខួប 67ឆ្នាំ ផ្អាកសង្គ្រាមជាមួយកូរ៉េខាងត្បូង ចែកកាំភ្លើងខ្លីឱ្យទាហាន ដោយគ្មានពាក់ម៉ាស់ការពារវីរុស

ទីភ្នាក់ងារព័ត៌មានAFP បានរាយការណ៍អំពីបរិយាកាសក្នុងការរៀបចំពិធីរំឭកខួប 67ឆ្នាំ ថ្ងៃផ្អាកសង្គ្រាម ឬការបញ្ឈប់សង្គ្រាមរវាងកូរ៉េទាំង2 កាលពីថ្ងៃទី27 កក្កដា ឆ្នាំ1953 ថា ទាំងកូរ៉េខាងជើង និងកូរ៉េខាងត្បូង បានរៀបចំពិធីនេះដោយឡែកពីគ្នារៀងៗខ្លួន ក្រោមសម្ព័ន្ធភាពដ៏តានតឹងរបស់ប្រទេសទាំង2 ជាពិសេស ពេលកើតមានការចោទប្រកាន់ថា កូរ៉េខាងត្បូង បានសាយភាយមេរោគកូវីដ-19 ចូលទៅក្នុងប្រទេសកូរ៉េខាងជើង។

នៅទីក្រុងព្យុងយ៉ាង ទីក្រុងធំរបស់ប្រទេសកូរ៉េខាងជើង លោកគីម ជុងអ៊ុន មេដឹកនាំខ្ពស់បំផុតរបស់កូរ៉េខាងជើង បានធ្វើជាអធិបតីភាពក្នុងពិធី ដោយបានប្រគល់កាំភ្លើងខ្លីឱ្យបណ្ដានាយទាហានថ្នាក់ឧត្ដមសេនីយ៍ និងថ្នាក់ដឹកនាំកងទ័ពជើងចាស់ ដែលបានថ្លែងសច្ចាប្រណិធាន ស្មោះស្ម័គ្រភក្ដីចំពោះលោកប្រធានគីម ដើម្បីជាការឆ្លងរបៀបវារៈសំខាន់នេះ។

នាយទាហានគ្រប់រូបដែលចូលរួមក្នុងពិធីនេះ ក្រៅពីមិនបានពាក់ម៉ាស់ការពារវីរុសហើយ នៅបានឈរជិតៗគ្នា ដើម្បីថតរូបជាក្រុម បើទោះជាកូរ៉េខាងជើងទើបតែប្រកាសស្ថានការណ៍អាសន្នថា រកឃើញអ្នកជំងឺសង្ស័យឆ្លងមេរោគកូវីដ-19 ដំបូងគេនៅក្នុងប្រទេស និងបិទទីក្រុងឃែសុង ទីក្រុងព្រំដែនដែលធ្លាប់ធ្វើជំនួញរួមគ្នាក៏ដោយ។

កូរ៉េខាងជើង ថែមទាំងចាប់ឃាត់ខ្លួនអ្នកក្បត់ប្រទេសជាតិដែលប្ដូរចិត្ត វិលត្រឡប់មកពីកូរ៉េខាងត្បូងវិញ ឆ្លងកាត់តំបន់DMC មកពីខាងត្បូង ដើម្បីបន្ទោសថា បាននាំមេរោគកូវីដ-19 ពីកូរ៉េខាងត្បូង មកចម្លងនៅក្នុងកូរ៉េខាងជើង។

ចំណែកខាងមន្ត្រីកូរ៉េខាងត្បូងវិញ បាននិយាយថា បុរសម្នាក់ដែលគេជឿថា ជាអ្នកក្បត់ប្រទេសជាតិ តែប្ដូរចិត្តវិញនោះ មិនដែលទទួលការអះអាងថា ឆ្លងមេរោគកូវីដ-19 ទេ និងថែមទាំងមិនដែលបានប៉ះពាល់ជាមួយអ្នកជំងឺទៀតផង។

លោក គីម ឌូយ៉ន អ្នកជំនាញការរឿងកូរ៉េ មកពីក្រុមអ្នកស្រាវជ្រាវសិក្សាវិបត្តិអន្តរជាតិ បានបញ្ជាក់ថា កូរ៉េខាងជើង មានសញ្ញាក្នុងការមានអ្នកជំងឺកូវីដ-19 ស្រាប់ទៅហើយ តែបានឆ្លៀតឱកាសនេះ ចោទប្រកាន់ថា ជាកំហុសរបស់កូរ៉េខាងត្បូង ជាជាងបន្ទោសចិនដែលជាសម្ព័ន្ធមិត្តនឹងគ្នាដ៏យូរអង្វែង។

ចំណែកនៅឯខាងកូរ៉េខាងត្បូងវិញ ក្រៅពីរៀបចំពិធីរំឭកខួបថ្ងៃផ្អាកសង្គ្រាមហើយ ថែមទាំងជាពិធីរំឭកខួបនៃការចូលរួមរបស់កងកម្លាំងសហប្រជាជាតិ ឬUN Forces Participation Day ដែលគម្រប់ខួប 67ឆ្នាំដូចគ្នា។

ពិធីនេះ ត្រូវបានរៀបចំឡើងនៅក្នុងភូមិ ប៉ាន់ មុនចម ទីក្រុងប៉ាជូ ដែលមានអតីតយុទ្ធជនកូរ៉េខាងត្បូង រួមទាំងទាហានអាមេរិក និងតំណាងអង្គការសហប្រជាជាតិ ចូលរួមផងដែរ។ គ្រប់គ្នាសុទ្ធតែពាក់ម៉ាស់អនាម័យការពារ ឈរឆ្ងាយៗពីគ្នា តាមវិធានការការពារមេរោគកូវីដ-19។

ការរៀបចំពិធីនេះ គឺដើម្បីរំឭកគុណដល់អតីតយុទ្ធជនជាង 2លាននាក់ មកពី 22ប្រទេស ដែលបានចូលរួមជាមួយកងកម្លាំងកូរ៉េខាងត្បូងក្រោមទង់អង្គការសហប្រជាជាតិ៕

ប្រភព៖ សារព័ត៌មានបរទេស

July 28, 2020

Category: អន្តរជាតិ