Category: អន្តរជាតិ

ក្រុមបាតុករថៃ៖ ថ្វីបើត្រូវបានបំបែក និងបញ្ចប់បាតុកម្មពេលនេះ ប៉ុន្តែពួកគេនឹងនៅតែបន្តតវ៉ា
ក្រុមមេដឹកនាំបាតុកម្មថៃ កាលពីយប់មិញ (16តុលា) បានប្រកាសបញ្ចប់បាតុកម្មនៅទីក្រុងបាងកក ក្រោយពីកងកម្លាំងប៉ូលិសប្រឆាំងកុបកម្មបានដាក់ពង្រាយរថយន្តបាញ់ទឹកដើម្បីបំបែកហ្វូងបាតុករ។
“បញ្ចប់បាតុកម្ម” នេះគឺជាសារមួយដែលត្រូវបានផ្ញើពីសមាជិកម្នាក់នៃក្រុមមេដឹកនាំចលនាបាតុកម្មកាលពីយប់ថ្ងៃទី16តុលា។
ការសម្រេចចិត្តនេះត្រូវបានធ្វើឡើងបន្ទាប់ពីកងកម្លាំងនគរបាលប្រឆាំងកុបកម្មរាប់រយនាក់ត្រូវបានដាក់ពង្រាយដើម្បីទប់ទល់នឹងបាតុករជាង2,000នាក់នៅក្នុងទីក្រុងបាងកកកាលពីរសៀលថ្ងៃទី16តុលា។ ក្រុមប៉ូលិសបានស្នើឱ្យក្រុមបាតុករត្រលប់ទៅផ្ទះ បើមិនដូច្នោះទេពួកគេនឹងត្រូវបំបែកហ្វូងដោយការបាញ់ទឹក។ ប៉ុន្តែ ក្រុមបាតុករបានបិទផ្លូវមួយកំណាត់ ច្រៀងបទចម្រៀងជាតិ និងស្នើឱ្យក្រុមប៉ូលិស “ចាកចេញ”។
បន្ទាប់មក ប៉ូលិសបានដំឡើងប្រព័ន្ធបាញ់ទឹក និងតម្រង់ទៅរកក្រុមបាតុករ នាំឱ្យបាតុករជួរមុខប្រើប្រាស់ឆត្រដើម្បីទប់ទល់ ក្នុងនោះមានអ្នកខ្លះបានគប់ដបជ័រសំដៅរកប៉ូលិសផងដែរ។ ក្រោយមក ក្រុមបាតុករត្រូវបានបំបែកយ៉ាងឆាប់រហ័ស ប៉ុន្តែពួកគេនិយាយថានឹងនៅតែបន្តធ្វើបាតុកម្ម។ យោងតាមមន្ទីរសុខាភិបាលនៃមន្ទីរពេទ្យមួយនៅទីក្រុងបាងកក ប៉ូលិសចំនួន4នាក់ និងបាតុករម្នាក់បានរងរបួស។
“រដ្ឋាភិបាលកំពុងប្រើប្រាស់អំពើហិង្សាដើម្បីបំបែកចលនារបស់ពលរដ្ឋ” Tattep Ruangprapaikitseree ដែលជាមេដឹកនាំបាតុករម្នាក់និយាយដូច្នេះ។ Pin ដែលជានិស្សិតម្នាក់ វ័យ22ឆ្នាំ បានឱ្យដឹងថា៖ “ខ្ញុំត្រូវតែតស៊ូដើម្បីអនាគតរបស់ខ្ញុំ”។
នាយករដ្ឋមន្ត្រីថៃ លោក Prayuth Chan-ocha កាលពីថ្ងៃទី15តុលា បានចេញបទបញ្ជាបន្ទាន់មួយដែលហាមមិនឱ្យមានការប្រមូលផ្ដុំគ្នាលើសពី4នាក់ ប៉ុន្តែ មនុស្សប្រមាណ10,000នាក់បានជួបជុំគ្នាធ្វើបាតុកម្មដើម្បីប្រឆាំងតវ៉ានៅក្នុងថ្ងៃដដែលនោះ បើទោះជាមានការព្យាយាមបំបែកពីកងកម្លាំងប៉ូលិសក៏ដោយ។
ក្រុមបាតុករបានចោទប្រកាន់លោក Prayuth ដែលបានឡើងកាន់កាប់អំណាចក្រោយរដ្ឋប្រហារយោធាកាលពីឆ្នាំ2014ថា បានប្រើឧបាយកលក្នុងការបោះឆ្នោតកាលពីឆ្នាំទៅដើម្បីបន្តក្ដោបក្ដាប់អំណាច។ ប៉ុន្តែ លោកនាយករដ្ឋមន្ត្រីថៃ បានឱ្យដឹងថា ការបោះឆ្នោតបានប្រព្រឹត្តទៅដោយយុត្តិធម៌ និងបានអះអាងថា លោកនឹងមិនលាលែងពីតំណែងនោះឡើយ។
ក្រុមបាតុករក៏បានស្នើឱ្យធ្វើវិសោធនកម្មរដ្ឋធម្មនុញ្ញ និងកែទម្រង់របបយោធាផងដែរ។ ជាងនេះ ក្រុមបាតុករក៏បានស្នើឱ្យរាជវង្សមានតម្លាភាពជាងបច្ចុប្បន្ន ទាក់ទងនឹងឯកសារហិរញ្ញវត្ថុនៅក្នុងស្ថានភាពសេដ្ឋកិច្ចកំពុងដាំក្បាលចុះដោយសារ Covid-19 នេះ។
ជាទូទៅ បាតុកម្មបានប្រព្រឹត្តទៅដោយសន្តិវិធី ប៉ុន្តែមានហេតុការណ៍តែមួយគាត់ដែលបាននាំឱ្យអាជ្ញាធរយកជាលេសដើម្បីអនុវត្តបទបញ្ជាបន្ទាន់ដែលបណ្ដាលឱ្យមានការចាប់ខ្លួនបាតុករ2រូប នោះគឺហេតុការណ៍ឡោមព័ទ្ធរថយន្តដែលកំពុងដឹកមហេសី Suthida។ ចំណែកក្រុមមន្ត្រីរដ្ឋាភិបាលវិញបានឱ្យដឹងថា បាតុកម្មបានបង្កផលប៉ះពាល់ធ្ងន់ធ្ងរដល់សេដ្ឋកិច្ច និងសន្តិសុខជាតិ៕
ប្រភព៖ Reuters
October 17, 2020
ប្រធានាធិបតីចិន “ក្អក” ច្រើនដង នៅពេលកំពុងថ្លែងការណ៍ ធ្វើឱ្យមហាជនព្រួយបារម្ភខ្លាំង (វីដេអូ)
ប្រធានាធិបតីចិន លោក Xi Jinping មានអាការក្អកច្រើនដង នៅពេលកំពុងថ្លែងការណ៍នៅទីក្រុង Shenzhen នាំឱ្យពលរដ្ឋប្រទេសនេះមានការព្រួយបារម្ភអំពីបញ្ហាសុខភាពរបស់លោក។
នៅក្នុងពេលធ្វើសេចក្ដីថ្លែងការមួយដែលត្រូវបានផ្សាយផ្ទាល់នៅទីក្រុង Shenzhen កាលពីថ្ងៃទី14តុលាដើម្បីជំរុញការអភិវឌ្ឍនៅក្នុងតំបន់សេដ្ឋកិច្ចពិសេសដំបូងរបស់ប្រទេសចិនបន្តរីកចម្រើនទៅមុខទៀត ប្រធានាធិបតី Xi Jinping មានអាការក្អកជាបន្តបន្ទាប់។
នៅពេលលោកឈប់និយាយដោយសារតែអាការក្អក ទូរទស្សន៍ជាតិចិន (CCTV) ក៏បានបែរកាមេរ៉ាទៅរកតំណាងរាស្ត្រផ្សេងទៀត។ យ៉ាងនេះក្ដី គេនៅតែឮសំឡេងក្អករបស់លោក និងសំឡេងលោកលើកកែវទឹកមកពិសាដើម្បីផ្សើមបំពង់ក។
វីដេអូដែលបង្ហាញអំពីសកម្មភាពខាងលើនេះ ក៏ត្រូវបានគេចុះផ្សាយ និងចែករំលែកយ៉ាងឆាប់រហ័សនៅលើបណ្ដាញសង្គមចិន អមជាមួយនឹងការព្រួយបារម្ភអំពីសុខភាពរបស់ប្រធានាធិបតីចិន។ សារព័ត៌មាន CNN យល់ថា អាការក្អកនេះអាចបណ្ដាលមកពីមេដឹកនាំចិនស្ងួតបំពង់ក ព្រោះតែបានថ្លែងការណ៍ជិត1ម៉ោង។ លោក Xi Jinping ក៏ធ្លាប់បានក្អកពេលដែលលោកកំពុងថ្លែងការណ៍កាលពីឆ្នាំ2019ផងដែរ។
https://www.youtube.com/watch?v=INNJi9Ax3w8
លោក Xi Jinping ដែលមានអាយុ67ឆ្នាំ ធ្លាប់បានបង្ហាញឱ្យឃើញជាច្រើនលើកថា លោកជាមនុស្សចូលចិត្តធ្វើកីឡា ដូចជាការហាត់ប្រាណ ហែលទឹក និងឡើងភ្នំជាដើម។ កាលពីនៅកំលោះ បុរសនេះធ្លាប់ហាត់ប្រដាល់ ទាត់បាល់ និងចូលចិត្តបាល់ទះផងដែរ៕
ប្រភព៖ CNN
October 16, 2020
ប្រទេសចិនបញ្ចេញវ៉ាក់សាំង Covid-19 ប្រភេទសាកល្បង ដែលមានតម្លៃក្រោម60ដុល្លារ
ប្រទេសចិនចាប់ផ្ដើមផ្ដល់វ៉ាក់សាំងប្រភេទសាកល្បងដល់ពលរដ្ឋមួយចំនួននៅក្នុងទីក្រុង Jiaxing នៃខេត្ត Zhejiang ភាគខាងកើតប្រទេសនេះ ក្នុងតម្លៃ60ដុល្លារអាមេរិក។
អាជ្ញាធរទីក្រុង Jiaxing កាលពីថ្ងៃទី15តុលា បានឱ្យដឹងថា ពលរដ្ឋដែលមានវ័យចាប់ពី18ដល់59ឆ្នាំ ដែលមានតម្រូវការចាំបាច់ អាចសុំប្រឹក្សាយោបល់នៅមន្ទីរពេទ្យដើម្បីទិញវ៉ាក់សាំងប្រឆាំង Covid-19 របស់ក្រុមហ៊ុន Sinovac Biotech ដែលអាជ្ញាធរកំពុងផ្ដល់សម្រាប់ក្រុមមនុស្សមួយចំនួន ដូចជាបុគ្គលិកសុខាភិបាលជាដើម។
មជ្ឈមណ្ឌលគ្រប់គ្រងនិងបង្ការរោគឆ្លងនៃទីក្រុង Jiaxing មិនបានបញ្ជាក់ថា “តម្រូវការចាំបាច់” គឺជាអ្វីខ្លះនោះទេ។ ចំណែកក្រុមមន្ត្រីក៏មិនបានឱ្យដឹងថា មានមនុស្សប៉ុន្មាននាក់នៅក្នុងទីក្រុងនេះបានចាក់វ៉ាក់សាំងនេះនោះដែរ។ វ៉ាក់សាំងនេះ ត្រូវចាក់ជាពីរលើក និងឃ្លាតពីគ្នា28ថ្ងៃ។ អាជ្ញាធរឱ្យដឹងថា វ៉ាក់សាំងនេះមានតម្លៃ400យុន ប្រហែលនឹង59ដុល្លារអាមេរិក។
យោងតាមអាជ្ញាធរក្រុង Jiaxing ប្រទេសចិនបានផ្ដល់វ៉ាក់សាំងដល់ពលកររាប់សែននាក់នៅក្នុងវិស័យសំខាន់ៗមួយចំនួន ដូចជានៅកំពង់ផែ មន្ទីរពេទ្យ និងនៅតាមតំបន់ដែលប្រឈមនឹងហានិភ័យឆ្លងវីរុសខ្ពស់។
ប្រទេសចិន បើទោះជាមានវ៉ាក់សាំងចំនួន11ប្រភេទបានឈានដល់ដំណាក់កាលប្រើប្រាស់សាកល្បង ក្នុងនោះមាន4ប្រភេទស្ថិតក្នុងដំណាក់កាលទីបីក៏ដោយ ប៉ុន្តែមិនទាន់មានវ៉ាក់សាំងណាមួយត្រូវបានផ្ដល់អាជ្ញាប័ណ្ណដើម្បីអាចដាក់លក់ក្នុងទីផ្សារនៅឡើយ។
ប្រទេសចិនបានអនុញ្ញាតឱ្យប្រើប្រាស់ប្រភេទវ៉ាក់សាំងមួយចំនួននៅក្នុងករណីចាំបាច់នាពេលកម្លងមក ប៉ុន្តែមិនទាន់មានសេចក្ដីរាយការណ៍ណាមួយបង្ហាញថា មានករណីប្រតិកម្មអាក្រក់ក្នុងកម្រិតធ្ងន់ធ្ងរនៅឡើយ។ ទីក្រុងប៉េកាំងបានព្យាករថា ប្រទេសចិននឹងមានការផ្ដល់វ៉ាក់សាំងជាទ្រង់ទ្រាយធំនៅចុងឆ្នាំនេះផងដែរ។
នៅក្នុងសន្និសីទសារព័ត៌មានមួយកាលពីខែមុន ក្រុមមន្ត្រីចិនបានប្រកាសថា ប្រទេសនេះអាចផលិតវ៉ាក់សាំងបានចំនួន610លានអំពូលនៅចុងឆ្នាំ2020 និងបានសង្កត់ធ្ងន់ថា វានឹងមានតម្លៃសមរម្យ។ ចំណែកប្រធានាធិបតីចិន លោក Xi Jinping ក៏ធ្លាប់បានប្រកាសថា វ៉ាក់សាំងចិន នឹងក្លាយជា “ផលិតផលសាធារណៈនៅទូទាំងពិភពលោក”។
សូមបញ្ជាក់ថា ប្រទេសចិនបានចុះឈ្មោះចូលរួមការដេញថ្លៃមួយដែលត្រូវបានដឹកនាំដោយអង្គការសុខភាពពិភពលោក (WHO) ដើម្បីធានាឱ្យបានប្រាកដថា វ៉ាក់សាំង Covid-19 នឹងត្រូវបានចែកចាយដល់បណ្ដាប្រទេសកំពុងអភិវឌ្ឍនៅក្នុងពិភពលោក។ ទីក្រុងប៉េកាំងមិនបាននិយាយលម្អិតអំពីខ្ទង់ប្រាក់ដែលខ្លួនបានសន្យានៅក្នុងកិច្ចព្រមព្រៀងមួយនេះទេ។ កិច្ចព្រមព្រៀងនេះមានគោលដៅដើម្បីបង្កើតមូលនិធិមួយដែលនឹងមានតម្លៃ2ពាន់លានដុល្លារអាមេរិក ក្នុងបំណងផ្ដល់វ៉ាក់សាំង Covid-19 ទៅឱ្យប្រទេសក្រីក្រចំនួន92 ក្នុងពិភពលោកដែលមានចំណូលទាប និងមធ្យម៕
ប្រភព៖ AFP
October 16, 2020
បាតុករថៃរាប់ម៉ឺននាក់ ធ្វើបាតុកម្មនៅទីក្រុងបាងកក! “ដូចទៅនឹងឆ្កែដែលទាល់ច្រក យើងនឹងប្រយុទ្ធរហូតដល់ស្លាប់”
មនុស្សរាប់ម៉ឺននាក់ រួមមានទាំងសិស្សសាលាមធ្យមសិក្សាផងដែរ បាននាំគ្នាចូលរួមធ្វើបាតុកម្មនៅទីក្រុងបាងកក បើទោះជារាជរដ្ឋាភិបាលថៃបានចេញបទបញ្ជា ហាមមិនឱ្យប្រមូលផ្ដុំគ្នាលើសពី4នាក់ក៏ដោយ។
ហ្វូងមនុស្សបានប្រមូលផ្ដុំគ្នានៅក្នុងតំបន់ Ratchaprasong ដែលជាផ្លូវបំបែកមានមនុស្សច្រើនបំផុតនៅក្នុងរាជធានីបាងកក កាលពីល្ងាចថ្ងៃទី15តុលា និងបាននាំគ្នាស្រែកហ៊ោខ្លាំងៗថា៖ “ខ្ញុំមិនខ្លាច” “ប្រគល់សេរីភាពឱ្យមិត្តរបស់យើង” “នាយករដ្ឋមន្ត្រី Prayuth ត្រូវតែចុះចេញពីតំណែង” ព្រមទាំងបានហៅកងកម្លាំងនគរបាលថាជា “ទេសករ” របស់របបយោធាថៃទៀតផង។
Panupon Jadnok ជាមេដឹកនាំបាតុករម្នាក់បាននិយាយទៅកាន់ក្រុមបាតុករថា៖ “ដូចទៅនឹងឆ្កែដែលទាល់ច្រក យើងនឹងប្រយុទ្ធរហូតដល់ស្លាប់។ យើងនឹងមិនរាថយ មិនរត់គេចខ្លួន។ យើងនឹងមិនទៅណាទាំងអស់”។
ក្នុងហ្វូងមនុស្ស មានបាតុករម្នាក់កាន់បដាមួយដែលមានសរសេរសរសេរថា៖ “ផ្ញើជូនគ្រួសារនិងមិត្តភ័ក្ដិ បើសិនជាខ្ញុំជួបបញ្ហាអ្វី សូមកុំបន្ទោសព្រោះតែខ្ញុំបានមកធ្វើបាតុកម្ម ចូរបន្ទោសទៅលើអ្នកធ្វើបាបមនុស្ស”។
ពេលខ្លះ ក្រុមបាតុករបានធ្វើឱ្យរថយន្តរបស់ប៉ូលិសត្រូវថយក្រោយ ហើយហ្វូងមនុស្សច្រើនរហូតដល់ថ្នាក់ សំឡេងរបស់ពួកគេអាចស្ដាប់ឮស្ទើរតែទូទាំងទីក្រុង។ ដោយសារតែបាតុកម្មនេះ ផ្លូវបំបែក Ratchaprasong ត្រូវកកស្ទះ មជ្ឈមណ្ឌលពាណិជ្ជកម្មជាច្រើននៅក្នុងតំបន់ ត្រូវបិទទ្វារ។
ប៉ូលិសប្រឆាំងកុបកម្មប្រមាណជា2,500នាក់ត្រូវបានបញ្ជូនមកទប់ទល់នឹងបាតុករ។ Krissana Pattanacharoen អ្នកនាំពាក្យរបស់កងនគរបាលបានឱ្យដឹងថា ក្រុមមេដឹកនាំបាតុករបានអំពាវនាវឱ្យធ្វើបាតុកម្មកាលពីថ្ងៃទី15 “គឺពិតជាបានរំលោភច្បាប់”។
បាតុកម្មនេះបានកើតឡើងបន្ទាប់ពីរដ្ឋាភិបាលថៃ អនុវត្តការហាមមិនឱ្យប្រមូលផ្ដុំគ្នាលើសពី4នាក់ ទៅតាមបទបញ្ជាបន្ទាន់មួយដែលមានសុពលភាពចាប់ពីព្រឹកថ្ងៃទី15តុលា ដើម្បីទប់ស្កាត់នឹងបាតុកម្ម។ ក្រោយពីបទបញ្ជានេះត្រូវបានប្រកាស កម្លាំងប៉ូលិសបានបំបែកហ្វូងបាតុកររាប់ពាន់នាក់ដែលបានប្រមូលផ្ដុំគ្នានាព្រឹកនេះនៅមុខការិយាល័យនាយករដ្ឋមន្ត្រី និងបានចាប់ខ្លួនសកម្មជនចំនួន22នាក់។
សូមបញ្ជាក់ថា ចលនាបាតុកម្មនៅប្រទេសថៃ បានងើបឡើងវិញចាប់ពីខែកក្កដា ដើម្បីទាមទារឱ្យនាយករដ្ឋមន្ត្រីថៃ Prayuth Chan-ocha លាលែងពីតំណែង កែទម្រង់របបយោធាដែលដឹកនាំដោយមហាក្សត្រថៃ បង្កើតរដ្ឋធម្មនុញ្ញថ្មី និងធ្វើការបោះឆ្នោត។ ភាគីបាតុករយល់ថា មិនចាំបាច់លុបចោលរបបយោធានៅប្រទេសថៃ ប៉ុន្តែ គេត្រូវការកាត់បន្ថយអំណាចរបស់ស្ដេចទៅតាមច្បាប់រដ្ឋធម្មនុញ្ញ។
ទាក់ទងនឹងបញ្ហាខាងលើ បច្ចុប្បន្ន មិនទាន់ឃើញមានសេចក្ដីរាយការណ៍ណាមួយស្ដីពីប្រតិកម្មរបស់បរមរាជវាំងថៃនៅឡើយ។
សូមបញ្ជាក់ថា ពលរដ្ឋថៃ ត្រូវបានហាមមិនឱ្យមានការនិយាយអាក្រក់ ឬប្រមាថទៅលើមហាក្សត្រ ហើយអាចប្រឈមនឹងការជាប់ពន្ធនាគារ15ឆ្នាំ។ ក៏ប៉ុន្តែ ក្នុងមួយរយៈពេលចុងក្រោយនេះ មានមនុស្សកាន់តែច្រើនឡើងៗ ដែលបានបង្ហាញសកម្មភាព និងសម្ដីប្រឆាំងទៅនឹងស្ដេចថៃ បើទោះជាមានច្បាប់ហាមក៏ដោយ៕
ប្រភព៖ Straits Times, Guardian

October 16, 2020
កូនប្រុសពៅរបស់លោក Trump ឆ្លង COVID-19 ខណៈអ្នកបានឆ្លងសរុបនៅអាមេរិក ឡើងដល់8,148,083នាក់
ជំទាវទីមួយ Melania បានឱ្យដឹងថា Barron Trump ដែលមានអាយុ14ឆ្នាំ វិជ្ជមានជាមួយនឹងCOVID-19 ប៉ុន្តែ បច្ចុប្បន្ន លោកស្រី និងកូនប្រុសលែងមានវីរុសហើយ។
ក្រោយពីប្រធានាធិបតី Trump និងលោកជំទាវវិជ្ជមានជាមួយនឹងវីរុសCOVID-19 កាលពី2សប្ដាហ៍មុន ពេលនោះ Barron មានលទ្ធផលអវិជ្ជមាន នេះបើតាមបទអធិប្បាយដែលមានចំណងជើងថា “បទពិសោធន៍ឯកជនរបស់ខ្ញុំចំពោះ COVID-19” របស់លោកជំទាវ Melania ដែលត្រូវបានប្រកាសឱ្យដឹងកាលពីថ្ងៃទី14តុលា។
លោកស្រី Melania ឱ្យដឹងថា៖ “ប៉ុន្តែ ដូចទៅនឹងការគិតរបស់ឪពុកម្ដាយនានាកាលពីប៉ុន្មានខែកន្លងទៅ ខ្ញុំក៏មិនអាចមិនគិតអំពីថា “តើថ្ងៃស្អែក ឬខានស្អែកនឹងទៅជាយ៉ាងណា?” នោះឡើយ។ ការភ័យខ្លាចរបស់ខ្ញុំបានក្លាយជាការពិត នៅពេលកូនរបស់ខ្ញុំត្រូវបានធ្វើតេស្តម្ដងទៀត និងបានទទួលលទ្ធផលវិជ្ជមាន”។
លោកស្រីបន្តថា៖ “សំណាងល្អណាស់ដែល Barron ជាយុវជនដែលមានកម្លាំងមាំមួន និងមិនមានអាការរោគនោះទេ”។
ខណៈនោះដែរ លោកស្រី Melania មានរោគសញ្ញាស្រាលៗ ដូចជា ឈឺចាប់ក្នុងរាងកាយ ក្អក ឈឺក្បាល និងអស់កម្លាំង។ ប៉ុន្តែ លោកជំទាវទីមួយ បានប្រកាសថា បច្ចុប្បន្ន លោកស្រីនិងកូន ទើបតែទទួលបានលទ្ធផលអវិជ្ជមាននឹងCOVID-19។ លោកស្រីឱ្យដឹងថា៖ “ខ្ញុំពិតជាសប្បាយចិត្តខ្លាំងណាស់ នៅពេលយើងទាំងបីនាក់បានឆ្លងកាត់បញ្ហានេះ ហើយអាចថែរក្សាគ្នា និងអាចនៅក្បែរគ្នាបាន”។ លោកស្រីសង្ឃឹមថា “នឹងបន្តភារកិច្ចរបស់ខ្លួនបានឆាប់បំផុតតាមដែលអាចធ្វើទៅបាន”។
គិតមកដល់បច្ចុប្បន្ន សហរដ្ឋអាមេរិក បានរកឃើញអ្នកឆ្លងវីរុសCOVID-19 សរុបឡើងដល់8,148,083នាក់នាក់ ក្នុងនោះមានអ្នកស្លាប់221,818នាក់ និង2,656,624កំពុងព្យាបាល អ្នកជំងឺបានជាសះស្បើយ មានចំនួន5,269,641នាក់៕
ប្រភព៖ AFP
October 15, 2020
មេ Facebook ផ្ដល់ជំនួយ100លានដុល្លារបន្ថែមទៀត ដល់ការបោះឆ្នោតនៅសហរដ្ឋអាមេរិក
ម្ចាស់បណ្ដាញសង្គម Facebook លោក Mark Zuckerberg និងភរិយា Priscilla Chan ប្រកាសផ្ដល់ជំនួយបន្ថែម100លានដុល្លារអាមេរិក ដើម្បីជួយដល់ក្រុមមន្ត្រី និងហេដ្ឋារចនាសម្ព័ន្ធនានាសម្រាប់គាំទ្រដល់ការបោះឆ្នោតនៅសហរដ្ឋអាមេរិកក្នុងឆ្នាំ2020នេះ។
“យើងខ្ញុំបានទទួលការឆ្លើយតបច្រើនជាងការរំពឹងទុកអំពីប្រការដែលក្រុមមន្ត្រីរៀបចំការបោះឆ្នោត ត្រូវការជំនួយសម្រាប់សាងសង់ហេដ្ឋារចនាសម្ព័ន្ធដើម្បីជួយដល់ការបោះឆ្នោត។ ហេតុនេះហើយ យើងខ្ញុំសន្យាថា នឹងផ្ដល់ជំនួយ100លានដុល្លារបន្ថែមទៀតទៅឱ្យមជ្ឈមណ្ឌលបច្ចេកវិទ្យានិងជីវភាពពលរដ្ឋ (CTCL) ដើម្បីធានាឱ្យបានប្រាកដថា តំបន់ដែលត្រូវការជំនួយ នឹងទទួលបានជំនួយ” លោក Zuckerberg បង្ហោះសារយ៉ាងដូច្នេះនៅលើបណ្ដាញសង្គម Facebook កាលពីថ្ងៃទី13តុលា។
លោក Zuckerberg បន្ថែមថា តំបន់ជាង2,100 នៅមូលដ្ឋានដែលមានករិយាល័យបោះឆ្នោត បានផ្ញើលិខិតឡើងទៅកាន់ CTCL ដើម្បីស្នើសុំជំនួយ។ CTCL គឺជាអង្គការមិនស្វែងរកកម្រៃមួយនៅទីក្រុង Chicago។ គោលដៅរបស់អង្គការនេះ គឺ “ជំរុញការរីកចម្រើនផ្នែកប្រជាធិបតេយ្យ និងជួយធ្វើទំនើបកម្មលើការបោះឆ្នោតនៅសហរដ្ឋអាមេរិក”។
ម្ចាស់ Facebook និងភរិយា កន្លងមក ធ្លាប់បានផ្ដល់ជំនួយ300លានដុល្លារអាមេរិក ដើម្បីជួយដល់សកម្មភាពទាក់ទងនឹងការបោះឆ្នោតនៅសហរដ្ឋអាមេរិក ដែលកំពុងប្រឈមនឹងការលំបាកដោយសារ COVID-19។ អ្នកទាំងពីរបានផ្ដល់ជំនួយជាសម្ភារសម្រាប់ការបោះឆ្នោត និងឈុតការពារការឆ្លងវីរុសទៅឱ្យក្រុមបុគ្គលិកដែលធ្វើការខាងស្ទង់មតិ។
លោក Zuckerberg ក៏កំពុងតែធ្វើសកម្មភាពប្រឆាំងតបតទៅនឹងករណីប្ដឹងនានាដែលត្រូវបានធ្វើឡើងក្នុងបំណងទប់ស្កាត់ការប្រើប្រាស់ខ្ទង់ប្រាក់ជំនួយរបស់លោកផងដែរ។
មហាសេដ្ឋីជនជាតិអាមេរិកាំងដើមកំណើតជ្វីហ្វ (Jews) រូបនេះ អះអាងថា៖ “ចាប់តាំងពីយើងខ្ញុំបានផ្ដល់ជំនួយលើកដំបូង មានករណីប្ដឹងជាច្រើនត្រូវគេធ្វើឡើងដើម្បីរារាំងការប្រើប្រាស់ខ្ទង់ជំនួយនោះ ដោយចោទថា អង្គការនេះ (CTCL) ទទួលជំនួយដោយប្រកាន់បក្សពួក។ ការចោទប្រកាន់នេះគឺពិតជាខុសស្រឡះ”។
ខ្ទង់ថវិកាជំនួយរបស់លោក Zuckerberg ត្រូវបានលើកឡើងនៅពេលដែល Facebook កំពុងប្រឈមនឹងការតាមដានពីទីក្រុងវ៉ាស៊ីងតោន រួមនឹងសម្ពាធពីក្រុមអ្នកបង្កើតច្បាប់ ទាក់ទងនឹងបញ្ហាព័ត៌មានមិនពិតស្ដីអំពីការបោះឆ្នោតដែលត្រូវគេបង្ហោះនៅលើបណ្ដាញសង្គមនេះ៕
ប្រភព៖ Reuters
October 14, 2020
មហាក្សត្រថៃដែលមានសម្បត្តិរាប់សិបពាន់លានដុល្លារ កំពុងប្រឈមនឹងរលកនៃការរិះគន់កាន់តែខ្លាំង
ព្រះមហាក្សត្រនៃព្រះរាជាណាចក្រថៃ ត្រូវបានគេមើលឃើញថា កំពុងបណ្ដោយឱ្យបាត់បង់ការគាំទ្រពីពលរដ្ឋ និងសាធារណជនទាំងក្នុងនិងក្រៅប្រទេស បើទោះជាទ្រង់មានទ្រព្យសម្បត្តិប្រមាណ 40ពាន់លានដុល្លារក៏ដោយ។
ក្នុងរយៈពេលជាច្រើនខែកន្លងទៅថ្មីៗនេះ មហាក្សត្រថៃ ព្រះបាទ មហាវ៉ាតឈីរ៉ាឡុងកន (Maha Vajiralongkorn) បានចំណាយពេលវេលាភាគច្រើនរបស់ទ្រង់ ប្រថាប់នៅឯសណ្ឋាគារ Grand Hotel Sonnenbichl ដែលស្ថិតនៅលើជួរភ្នំ Alps ក្នុងរដ្ឋ Bavaria ប្រទេសអាល្លឺម៉ង់ ជាមួយនឹងក្រុមស្នំសរុបឡើងដល់20នាក់ឯណោះ។
ប៉ុន្តែ ពេលវេលានៃការប្រថាប់នៅប្រកបដោយហឫទ័យក្សេមក្សាន្តរបស់មហាក្សត្រ មហាវ៉ាជីរ៉ាឡុងកន ទំនងជាជិតមកដល់ទីបញ្ចប់ហើយ នៅពេលទីក្រុងប៊ែរឡាំង បានព្រមានទ្រង់ថា មិនគួរដឹកនាំប្រទេសពីទឹកដីអាល្លឺម៉ង់ ខណៈដែលបាតុកម្មនានាដែលប្រឆាំងនឹងរបបយោធាកំពុងកើតមានឡើងនៅក្នុងប្រទេសថៃ បណ្ដាលឱ្យមនុស្សជាច្រើនយល់ថា មហាក្សត្រកំពុងតែធ្វើឱ្យបាត់បង់ការគាំទ្រពីសាធារណជន ទាំងក្នុងនិងក្រៅប្រទេស។
កាលពីដើមឆ្នាំ សណ្ឋាគារ Grand Hotel Sonnenbichl បានស្វែងរកវិធីសុំច្បាប់ពិសេសពីអាជ្ញាធរនៅ Bavaria ដើម្បីឱ្យមហាក្សត្រថៃអាចប្រថាប់នៅទីនេះក្នុងរយៈពេលវែង ក្នុងគ្រាដែលអាល្លឺម៉ង់កំពុងអនុវត្តវិធានាការទប់ស្កាត់ការឆ្លងវីរុសCOVID-19។ ក៏ប៉ុន្តែ ប្រការនេះក៏បាននាំឱ្យពលរដ្ឋថៃរកឃើញថា មហាក្សត្ររបស់ពួកគេ មិនប្រថាប់នៅក្នុងស្រុក ក្នុងគ្រាដែលប្រទេសជាតិទាំងមូលកំពុងជួបបញ្ហាលំបាក។
ព័ត៌មានខាងលើ រួមនឹងការបង្ហើបឱ្យដឹងរបស់ Financial Times អំពីទំហំនៃទ្រព្យសម្បត្តិរបស់ក្សត្រថៃ (បើតាមការគន់គូរ អាចឡើងដល់ពី 30ទៅ40ពាន់លានដុល្លារអាមេរិក) បានក្លាយជាប្រភពមួយនៃបាតុកម្មប្រឆាំងរបបយោធាថៃ ដែលបញ្ហានេះមិនធ្លាប់បានកើតឡើងពីមុនមកនោះទេ។
មហាក្សត្រថៃ និងមហេសី ស៊ុធីដា យាងទៅជួបពលរដ្ឋដែលជាអ្នកគាំទ្ររបស់ទ្រង់
មហាក្សត្រថៃ ព្រះបាទ មហាវ៉ាជីរ៉ាឡុងកន ត្រូវបានគេជឿថា កំពុងកាន់កាប់ទ្រព្រសម្បត្តិខាងលើនេះ បន្ទាប់ពីបានដាក់មូលនិធិនានារបស់ព្រះបរមរាជវាំង ឱ្យស្ថិតក្រោមការគ្រប់គ្រងផ្ទាល់របស់ទ្រង់ ក្រោយពីការឡើងគ្រងរាជបានមួយរយៈពេលខ្លី។
ព្រះបាទ មហាវ៉ាជីរ៉ាឡុងកន ត្រូវបានគេចាត់ទុកថា ជាមហាក្សត្រមួយអង្គដែលមានទ្រព្យច្រើនជាងគេបំផុតក្នុងពិភពលោក។ ប៉ុន្តែ កត្តាមួយចំនួន បាននាំឱ្យកិត្តិនាមរបស់ទ្រង់ និងការគាំទ្ររបស់ពលរដ្ឋចំពោះទ្រង់ បានធ្លាក់ចុះជាលំដាប់ ក្នុងនោះ លេចធ្លោជាងគេគឺករណីលើកលែងទោសដល់អតីតស្នំឯក ស៊ិនិណាត វង្សវ៉ាតឈីរ៉ាក់ផាក់ឌី (Sineenat Wongvajirapakdi) ដែលត្រូវបានដកហូតរាល់ឋានន្តរស័ក្ដិកាលពីខែតុលា2019 ដោយសារ “មានផែនការដណ្ដើមតំណែង” ពីមហេសី ស៊ុធីដា (Suthida)។
បន្ទាប់ពីមានសម្ពាធកាន់តែខ្លាំងពីខាងក្នុង និងក្រៅប្រទេស មហាក្សត្រថៃ ដែលមានព្រះជន្ម68ឆ្នាំអង្គនេះ បានយាងត្រលប់ចូលប្រទេសវិញកាលពីចុងសប្ដាហ៍មុន ក្នុងឱកាសខួបគម្រប់4ឆ្នាំនៃការយាងចូលទិវង្គតរបស់អតីតមហាក្សត្រ ភូមិបុល អាឌុលយ៉ាដេត (Bhumibol Adulyadej)។ តាមគម្រោង ទ្រង់នឹងប្រថាប់នៅក្នុងប្រទេសរហូតដល់ចុងខែតុលា។ កាលពីម្សិលមិញ ទ្រង់រួមនឹងមហេសី បានយាងចេញទៅជួបពលរដ្ឋរបស់ទ្រង់ដែលកំពុងអង្គុយហាលភ្លៀងដើម្បីបង្ហាញអំពីការគោរពដ៏ស្ម័គ្រស្មោះចំពោះរាជវង្ស៕
ប្រភព៖ Daily Beast
អត្ថបទទាក់ទង > ទីក្រុងប៊ែរឡាំងប្រកាសព្រមានស្ដេចថៃថា “មិនគួរដឹកនាំប្រទេសពីទឹកដីអាល្លឺម៉ង់”
October 14, 2020
អ្នកទេសចរVIP : ប្រទេស ប៉េរូ បើករមណីយដ្ឋាន “ម៉ាឈូ ពិកឈូ” ឱ្យបុរសជប៉ុនតែម្នាក់គត់ ចូលទស្សនា ក្រោយទិញសំបុត្រ ហើយរង់ចាំអស់ 7ខែ
រដ្ឋបាលប្រទេសប៉េរូ បានបើកឧទ្យានបុរាណស្ថាន “ម៉ាឈូ ពិកឈូ” ឱ្យអ្នកទេសចរ ជនជាតិជប៉ុនម្នាក់ ចូលទស្សនាជាករណីពិសេស ក្រោយពីបុរសម្នាក់នេះ ត្រូវទុកសំបុត្រចូលទស្សនា រង់ចាំអស់រយៈពេល 7ខែ ក្នុងអំឡុងពេលដែលរូបគេមិនអាចធ្វើដំណើរត្រឡប់ទៅប្រទេសកំណើតវិញបាន ដោយសារតែវិបត្តិជំងឺឆ្លងកូវីដ-19។
លោក ចេសស៍ ខាតាយ៉ាម៉ាក់(Jesse Katayama) បានជាប់នៅក្នុងទីក្រុង Aguas Calientes ប្រទេសប៉េរូ ដែលជាទីក្រុងដើមផ្លូវ សម្រាប់ឡើងទៅរមណីយដ្ឋានបុរាណស្ថាន ម៉ាឈូ ពិកឈូ តាំងពីពាក់កណ្ដាលខែមីនា និងទើបតែបានទទួលការអនុញ្ញាតឱ្យចូលទស្សនាសំណាកអគារវប្បធម៌បុរាណរបស់ជនជាតិកុលសម្ព័ន្ធ អ៊ីនខា ក្រោយពីរូបគេបានដាក់ពាក្យសុំអនុញ្ញាត ជាករណីពិសេស កាលពីពេលកន្លងមក។
លោក អាឡេខាន់ដ្រូ ណេយ៍រ៉ា រដ្ឋមន្ត្រីក្រសួងវប្បធម៌ប៉េរូ បានថ្លែងតាមរយៈប្រព័ន្ធវីដេអូខុនហ្វើរិន កាលពីថ្ងៃចន្ទ(ទី13តុលា)ថា “គាត់(ចេសស៍ ខាតាយ៉ាម៉ាក់) ធ្វើដំណើរមកប៉េរូ ដោយក្ដីស្រមៃថា នឹងបានឃើញ ម៉ាឈូ ពិកឈូ…ឥលូវពលរដ្ឋជប៉ុនម្នាក់នេះ បានទទួលការអនុញ្ញាតឱ្យចូលទស្សនាប្រសាទបុរាណ ព្រមជាមួយប្រធានឧទ្យានជាតិទីនោះ ដើម្បីឱ្យគាត់ បានសមដូចបំណងប្រាថ្នាដែលបានតាំងចិត្ត មុននឹងធ្វើដំណើរត្រឡប់ទៅប្រទេសរបស់គាត់វិញ”
ខាតាយ៉ាម៉ាក់ បានទិញសំបុត្រចូលទស្សនាឧទ្យានបុរាណស្ថានម៉ាឈូ ពិកឈូ តាំងពីខែមីនា តែទើបនឹងបានចូលក្នុងរមណីយដ្ឋានបុរាណស្ថាន អាយុជាង 500ឆ្នាំនោះ កាលពីថ្ងៃទី10 តុលាកន្លងមកនេះឯង និងអាចរាប់បានថា ជាអ្នកទេសចរដំបូងគេបំផុត ដែលបានទៅលេងម៉ាឈូ ពិកឈូ ក្នុងរង្វង់ 7ខែកន្លងមកនេះ។ លោកបានសារភាពថា ពីដំបូង លោកតាំងចិត្តថា នឹងស្នាក់នៅប៉េរូ ត្រឹមតែ 2-3ថ្ងៃប៉ុណ្ណោះ។ ខាតាយ៉ាម៉ាក់ បានថ្លែងតាមរយៈឃ្លិបវីដេអូ បន្ទាប់ពីធ្វើដំណើរឡើងទៅដល់កំពូលភ្នំម៉ាឈូ ពិកឈូ ថា “វាពិតជាអស្ចារ្យណាស់!! ខ្ញុំសូមអរគុណមែនទែន!!”
រដ្ឋបាលប៉េរូ មានកំណត់ពេលការបើករមណីយដ្ឋានបុរាណស្ថានម៉ាឈូ ពិកឈូ ឱ្យភ្ញៀវទេសចរជាតិ និងអន្តរជាតិ ចូលទស្សនាឡើងវិញបាន នៅក្នុងខែវិច្ឆិកាខាងមុខនេះ តែមិនបានបញ្ជាក់ពីថ្ងៃទី ជាក់លាក់នៅឡើយ និងថែមទាំងមានផែនការកំណត់ចំនួនអ្នកទេសចរត្រឹមតែ 30% ពីចំនួនដែលធ្លាប់ទទួលបាន 675នាក់ក្នុង 1ថ្ងៃទៀតផង៕
ប្រភព៖ សារព័ត៌មានបរទេស

October 14, 2020
លោក Xi Jinping ស្នើឱ្យកងម៉ារីនចិន ត្រៀមខ្លួនជាស្រេចសម្រាប់ការធ្វើសង្គ្រាម
ប្រធានាធិបតីចិន លោក Xi Jinping បានស្នើឱ្យកងទ័ពម៉ារីនរបស់ប្រទេសនេះ កែលម្អសមត្ថភាព និងត្រៀមខ្លួនជាស្រេចសម្រាប់ការធ្វើប្រតិបត្តិការសឹក និងប្រុងជើងការគ្រប់កាលៈទេសៈ។
នៅក្នុងថ្ងៃទីពីរនៃដំណើរទស្សនកិច្ចទៅកាន់ខេត្ត Guangdong កាលពីថ្ងៃទី13តុលា ប្រធានាធិបតីចិន លោក Xi Jinping ក៏បានចូលទៅពិនិត្យមើលមូលដ្ឋានទ័ពមួយនៅភាគខាងកើតប្រទេសនេះ។
លោក Xi Jinping បានប្រាប់កងម៉ារីននៅមូលដ្ឋានទ័ពនោះថា ពួកគេគួរតែកំណត់គោលដៅក្លាយជាកងកម្លាំងប្រដាប់អាវុធ “ពហុមុខងារ ប្រតិកម្មរហ័សគ្រប់កាលៈទេសៈ ទាំងអាកាសធាតុ ទាំងភូមិសាស្ត្រ”។
“គ្រប់គ្នាគួរតែផ្ដោតទៅលើឆន្ទៈ និងកម្លាំងដើម្បីត្រៀមសម្រាប់សង្គ្រាម ទន្ទឹមនឹងនេះក៏ត្រូវប្រុងជើងការក្នុងកម្រិតខ្ពស់បំផុត” ស្ថានីយទូរទស្សន៍ចិន CCTV ដកស្រង់សម្ដីរបស់លោក Xi Jinping។
លោក Xi Jinping បានប្រកាសថា៖ “កងម៉ារីនមានភារកិច្ចជាច្រើនផ្សេងៗគ្នា ហើយការស្នើដែលបានដាក់ចេញនឹងធ្វើឱ្យមានការផ្លាស់ប្ដូរ។ ដូច្នេះ គ្រប់គ្នាត្រូវតែប្រឹងប្រែងហ្វឹកហាត់ដើម្បីត្រៀមសម្រាប់ការធ្វើសង្គ្រាម ទន្ទឹមនឹងនេះក៏ត្រូវលើកកម្ពស់សមត្ថភាពនៃការប្រយុទ្ធ និងស្ដង់ដានៃការហ្វឹកហាត់”។
ប្រធានាធិបតីចិនសង្កាត់ធ្ងន់ថា កងម៉ារីន ត្រូវរ៉ាប់រង “ភារកិច្ចសំខាន់” ក្នុងកិច្ចការពារទឹកដី និងអធិបតេយ្យរបស់ប្រទេសចិន ក៏ដូចជាផលប្រយោជន៍នៅលើផ្ទៃសមុទ្រ និងផលប្រយោជន៍របស់ចិននៅបរទេស។ យោងតាម SCMP ការប្រកាសនេះទំនងជាសំដៅទៅលើការទាមទាររបស់ចិននៅលើសមុទ្រចិនខាងត្បូង និងកោះតៃវ៉ាន់។
ដំណើរទស្សនកិច្ចរបស់ប្រធានាធិបតីចិន ត្រូវបានធ្វើឡើងនៅក្នុងកាលៈទេសៈដែលភាពតានតឹងកំពុងកើនឡើងខ្លាំងនៅតំបន់ឆកសមុទ្រតៃវ៉ាន់ និងទំនាក់ទំនងរវាងសហរដ្ឋអាមេរិកនិងកោះនេះ ចេះតែល្អូកល្អិននឹងគ្នាពីមួយថ្ងៃទៅមួយថ្ងៃ។ អ្នកនាំពាក្យរបស់ក្រសួងការបរទេសចិន កាលពីថ្ងៃទី13តុលា បានព្រមានថា ទីក្រុងប៉េកាំងនឹងឆ្លើយតបយ៉ាងខ្លាំងក្លា បើសិនជាទីក្រុងវ៉ាស៊ីងតោនអនុម័តយល់ព្រមលក់អាវុធធុនធ្ងន់ទៅឱ្យកោះតៃវ៉ាន់៕
ប្រភព៖ SCMP
October 14, 2020
ការបោះឆ្នោតនៅអាមេរិក៖ សារព័ត៌មានអាមេរិកព្យាករថា Biden មានឱកាសជាប់ឆ្នោតរហូតដល់91%
ការព្យាករមួយរបស់ Economist យល់ថា លោក Biden កំពុងក្ដាប់ណែនក្នុងដៃនូវឱកាសជាប់ឆ្នោតជាប្រធានាធិបតីអាមេរិក ខណៈដែលនឹងទទួលបានសំឡេងឆ្នោតគាំទ្រយ៉ាងច្រើនលើសលុបពីម្ចាស់ឆ្នោតនៅមូលដ្ឋាន និងម្ចាស់ឆ្នោតជាតំណាងរាស្ត្រនៅសភា។
ការព្យាករខាងលើកនេះត្រូវបាន Economist ដែលជាកាសែតជំនាញខាងសេដ្ឋកិច្ចរបស់អាមេរិក ប្រកាសជាសាធារណៈកាលពីថ្ងៃទី12តុលា2020។ ការព្យាករនេះបានបង្ហាញថា បេក្ខភាពប្រធានាធិបតីមកពីបក្សប្រជាធិបតេយ្យ លោក Joe Biden មានឱការជាប់ឆ្នោតដល់ទៅ90% នៅក្នុងការបោះឆ្នោតពីក្រុមអ្នកតំណាងរាស្ត្រនៅសភា ខណៈដែលលោក Trump ត្រូវបានព្យាករថា មានឱកាសត្រឹមតែ9%ប៉ុណ្ណោះ។ Economist ក៏បានព្យាករដែរថា លោក Donald Trump មានឱកាសត្រឹមតែ9%ប៉ុណ្ណោះក្នុងការទទួលបានជ័យជំនះលើលោក Biden។ ការព្យាករបានបង្ហាញទៀតថា ឱកាសដែលលោក Biden នឹងទទួលបានសំឡេងគាំទ្រពីពលរដ្ឋមូលដ្ឋាន គឺមានអត្រា99%។
លោក Biden ត្រូវបានព្យាករថា អាចដណ្ដើមបានសន្លឹកឆ្នោតគាំទ្រចំនួន347សំឡេងពីក្រុមតំណាសរាស្ត ដែលនេះបានកើនលើសពីសំឡេងអប្បរមា270សំឡេងដើម្បីបានជាប់ឆ្នោត។ ចំណែកលោក Trump វិញ ត្រូវគេយល់ថា នឹងអាចទទួលបានសន្លឹកឆ្នោតប្រមាណជា191សំឡេងប៉ុណ្ណោះ ពីក្រុមអ្នកតំណាងរាស្ត្រ។
អត្រាទាំងឡាយខាងលើនេះត្រូវបានលើកឡើងដោយយោងទៅតាមរូបមន្តនៃការព្យាករដែលបង្ហាញអំពីលទ្ធផលនៃការបោះឆ្នោតដែលមាន20,000សំឡេង ជាមួយនឹងស្ថានភាពនីមួយៗ ដែលត្រូវបានលើកឡើងដោយយោងទៅតាមអត្រានៃការចេញទៅបោះឆ្នោត និងកំហុសឆ្គងក្នុងការបោះឆ្នោត។
យោងតាមការព្យាករ ឱកាសដែលលោក Trump នឹងទទួលបានសំឡេងគាំទ្រ គឺមានអត្រាទាបជាងច្រើន បើធៀបនឹងគូបដិបក្ខមកពីបក្សប្រជាធិបតេ្យ។ ប៉ុន្តែ ប្រការនេះមិនមែនមានន័យថា លោក Trump ពុំមានឱកាសជាប់ឆ្នោតនោះទេ តែលោកនឹងទទួលបានសំឡេងឆ្នោតគាំទ្រចំនួន1% ផងដែរ។
ទំព័រ Five Thirty Eight របស់សារព័ត៌មាន ABC News យល់ថា លោក Trump កំពុងមានឱ្យចំនួន13%ដែលអាចយកឈ្នះលើលោក Biden ដែលនេះស្ទើរដូចទៅនឹងអត្រា13.1% ដែលសារព័ត៌មាននេះបានព្យាករអំពីលទ្ធភាពនៃការដណ្ដើមបានជ័យជំនះរបស់លោក Trump នៅចំពោះមុខគូប្រជែងកាលពីថ្ងៃទី12តុលា ឆ្នាំ2016៕
ប្រភព៖ Newsweek
October 14, 2020