អន្តរជាតិ - La Reine Media

រដ្ឋទាំង 50 របស់អាមេរិក បានទទួលស្គាល់លទ្ធផលបោះឆ្នោត

រដ្ឋទាំង 50 និងរដ្ឋធានីវ៉ាស៊ីងតោន នៃសហរដ្ឋអាមេរិក បានទទួលស្គាល់លទ្ធផលនៃការបោះឆ្នោត ខណៈដែលក្រុមតំណាងម្ចាស់ឆ្នោតនឹងធ្វើការជ្រើសរើសប្រធានាធិបតីថ្មីនៅដើមសប្ដាហ៍ក្រោយ។

West Virginia កាលពីថ្ងៃទី 9ធ្នូ បានក្លាយជារដ្ឋចុងក្រោយគេដែលទទួលស្គាល់លទ្ធផលនៃការបោះឆ្នោតជ្រើសរើសប្រធានាធិបតី ដោយបានប្រកាសជាផ្លូវការថា ប្រធានាធិបតី Donald Trump ទទួលបាន 5សំឡេងនៃតំណាងម្ចាស់ឆ្នោតរបស់រដ្ឋនេះ។

ប្រធានាធិបតីជាប់ឆ្នោត Joe Biden ត្រូវបានគេព្យាករថា ទទួលបាន 306សំឡេងឆ្នោតនៃក្រុមតំណាងម្ចាស់ឆ្នោត ខណៈដែលលោក Trump ត្រូវបានព្យាករថា ទទួលបាន 232សំឡេង។ បេក្ខភាពប្រធានាធិបតី ត្រូវការសំឡេងឆ្នោតនៃក្រុមតំណាងម្ចាស់ឆ្នោតយ៉ាងតិច 270សំឡេងនៅក្នុងចំណោម 538សំឡេង ទើបក្លាយជាប្រធានាធិបតី។

ការទទួលស្គាល់លទ្ធផលនៃការបោះឆ្នោតខាងលើ ត្រូវបានធ្វើចប់សព្វគ្រប់ ខណៈដែលលោក Trump ធ្វើការចោទប្រកាន់ជាបន្តបន្ទាប់ថា មានការលួចបន្លំសន្លឹកឆ្នោតក្នុងទ្រង់ទ្រាយធំ ប៉ុន្តែមិនបានបង្ហាញភ័ស្តុតាងជាក់លាក់។ ក្រុមរបស់លោក Trump បានដាក់ពាក្យបណ្ដឹងរាប់សិបលើក ដើម្បីជំទាស់នឹងលទ្ធផលបោះឆ្នោត ក៏ប៉ុន្តែ ពាក្យបណ្ដឹងជាច្រើនត្រូវបានច្រានចោលនៅថ្នាក់រដ្ឋ និងថ្នាក់ជាតិ។

កាលពីថ្ងៃទី 4ធ្នូ រដ្ឋ Texas បានដាក់ពាក្យបណ្ដឹងឡើងតុលាការកំពូល ដោយពន្យល់ថា តំណាងម្ចាស់ឆ្នោតនៃបណ្ដារដ្ឋ Georgia, Michigan, Pennsylvania និង Wisconsin មិនគួរត្រូវបានអនុញ្ញាតឱ្យបោះឆ្នោត ព្រោះថារដ្ឋទាំងនេះបានផ្លាស់ប្ដូរនីតិវិធីបោះឆ្នោតដោយអធម្មនុញ្ញភាពនៅក្នុងវិបត្តិសុខភាពដើម្បីអនុញ្ញាតឱ្យមានការកើនឡើងនៃសន្លឹកឆ្នោតដែលបោះតាមប្រៃសណីយ៍។ រដ្ឋ Texas ក៏បានស្នើឱ្យតុលាការកំពូលពន្យារពេលក្នុងការទទួលស្គាល់ជ័យជំនះរបស់លោក Biden ពីសំណាក់តំណាងម្ចាស់ឆ្នោតដែលនឹងធ្វើឡើងនៅថ្ងៃទី 14ធ្នូខាងមុខផងដែរ។

បច្ចុប្បន្ន មានរដ្ឋចំនួន 17 ដែលភាគច្រើនដឹកនាំដោយបក្សសាធារណរដ្ឋ បានដាក់ពាក្យបណ្ដឹងគាំទ្រដល់ពាក្យបណ្ដឹងរបស់រដ្ឋ Texas។ លោក Trump ក៏បានបញ្ជូនពាក្យបណ្ដឹងរបស់ខ្លួនឡើងទៅតុលាការកំពូលដើម្បីស្នើសុំចូលរួមក្នុងរឿងក្ដីខាងលើនេះដែរ។

រដ្ឋនីមួយៗនៅសហរដ្ឋអាមេរិក មាននីតិវិធីផ្សេងៗគ្នាក្នុងការទទួលស្គាល់លទ្ធផលនៃការបោះឆ្នោត ហើយរដ្ឋមួយចំនួនទទួលស្គាល់សំឡេងឆ្នោតនៃតំណាងម្ចាស់ឆ្នោតដាច់ដោយឡែកពីលទ្ធផលនៃការបោះឆ្នោតរបស់រដ្ឋ និងមូលដ្ឋាន។ ប៉ុន្តែ រដ្ឋមួយចំនួន ក៏មានច្បាប់ដែលតម្រូវឱ្យក្រុមតំណាងម្ចាស់ឆ្នោត បោះឆ្នោតឱ្យបេក្ខភាពដែលបានទទួលជ័យជំនះក្នុងការបោះឆ្នោតសកលនៅថ្នាក់រដ្ឋ ក្នុងនោះក៏មានការកំណត់ខ្លះដែលតម្រូវឱ្យពិន័យ ឬដកហូតតួនាទីចំពោះតំណាងម្ចាស់ឆ្នោតរូបណារូបណាដែលមិនគោរពតាមការកំណត់៕

ប្រភព៖ CNN

December 10, 2020

សាស្ត្រាចារ្យអ៊ីស្រាអែល ថា «Trump វិះធ្វើឱ្យបែកធ្លាយរឿងមនុស្សពិភពផ្កាយ»

សាស្ត្រាចារ្យមួយរូបរបស់ប្រទេសអ៊ីស្រាអែល ជឿថា ប្រធានាធិបតីអាមេរិក លោក Donald Trump បានដឹងអំពីព័ត៌មានទាក់ទិននឹងមនុស្សពិភពផ្កាយ ហើយវិះនឹងធ្វើឱ្យបែកធ្លាយព័ត៌មាននេះជាសាធារណៈ បើសិនមិនត្រូវបាន «សម្ព័ន្ធកាឡាក់ស៊ីមីលគីវ៉េ» រារាំងទាន់ពេល។

«រដ្ឋាភិបាលសហរដ្ឋអាមេរិក និងក្រុមមនុស្សមកពីពិភពផ្កាយ បានចុះកិច្ចព្រមព្រៀងមួយ អនុញ្ញាតឱ្យពួកគេធ្វើការពិសោធន៍នៅលើផែនដី» សាស្ត្រាចារ្យ Haim Eshed ដែលជាអតីតប្រធានកម្មវិធីអវកាសរបស់ប្រទេសអ៊ីស្រាអែល ក្នុងអំឡុងឆ្នាំ 1981 ដល់ឆ្នាំ 2010 ថ្លែងដូច្នេះ នៅក្នុងកិច្ចសម្ភាសមួយជាមួយនឹងសារព័ត៌មាន Ediot Aharonot កាលពីថ្ងៃទី 4 ធ្នូកន្លងទៅ។ ការប្រកាសរបស់លោក Eshed ត្រូវបានគេចាប់អារម្មណ៍ខ្លាំង ក្រោយពីសារព័ត៌មាន Jerusalem Post បានបកប្រែអត្ថបទពីភាសាហេប្រ៊ូ (Hebrew) មកជាភាសាអង់គ្លេស និងបានចុះផ្សាយកាលពីថ្ងៃទី 8ធ្នូ។

លោក Eshed ដែលជាអតីតមន្ត្រីជាន់ខ្ពស់ម្នាក់ និងជាសាស្ត្រាចារ្យដែលទទួលបានការគោរពនៅប្រទេសអ៊ីស្រាអែល បានថ្លែងថា ប្រធានាធិបតីសហរដ្ឋអាមេរិក លោក Donald Trump បានដឹងអំពីវត្តមានរបស់មនុស្សពិភពផ្កាយនៅលើផែនដី។

លោក Eshed បន្តថា៖ «មនុស្សពិភពផ្កាយបានស្នើឱ្យរក្សាការសម្ងាត់អំពីវត្តមានរបស់ពួកគេនៅលើផែនដី ព្រោះតែមនុស្សជាតិមិនទាន់ត្រៀមខ្លួនរួចរាល់ក្នុងការទទួលយកប្រការនេះ។ លោក Trump វិះនឹងធ្វើឱ្យបែកធ្លាយរឿងនេះទៅហើយ កាលពីពេលកន្លងទៅ»។

ក៏ប៉ុន្តែ សាស្ត្រាចារ្យខាងលើពន្យល់ថា មនុស្សពិភពក្រៅមកពីអង្គការដែលមានឈ្មោះថា «សម្ព័ន្ធកាឡាក់ស៊ី មីលគីវ៉េ» បានរារាំងលោក Trump មិនឱ្យបង្ហើបអំពីព័ត៌មាននេះ ក្នុងបំណងទប់ស្កាត់ «ការជ្រួលច្របល់ទ្រង់ទ្រាយធំ»។ លោកបន្តថា៖ «ពួកគេបានរង់ចាំរហូតដល់ថ្ងៃដែលមនុស្សជាតិបានរីកចម្រើនខ្លាំង និងយល់អំពីអវកាស និងយានអវកាស»។

សាស្ត្រាចារ្យអ៊ីស្រាអែល៖ «Trump វិះនឹងធ្វើឱ្យបែកធ្លាយរឿងមនុស្សពិភពផ្កាយ» — សាស្ត្រាចារ្យ Haim Eshed គឺជាអតីតប្រធានកម្មវិធីអវកាសរបស់ប្រទេសអ៊ីស្រាអែល ក្នុងអំឡុងឆ្នាំ 1981 ដល់ឆ្នាំ 2010

លោក Haim Eshed ក៏បានបញ្ជាក់ថា មនុស្សពិភពផ្កាយ និងក្រុមអវកាសអាមេរិកាំង បានធ្វើការជាមួយគ្នានៅក្នុងមូលដ្ឋានសម្ងាត់ក្រោមដីនៃឋានព្រះអង្គារផងដែរ។ សាស្ត្រាចារ្យនេះបន្ថែមថា មនុស្សពិភពផ្កាយ ចង់ឱ្យបណ្ដាប្រទេសដូចជា សហរដ្ឋអាមេរិក និងអ៊ីស្រាអែលជាដើម ជួយពួកគេដើម្បី «ស្រាវជ្រាវ និងស្វែងយល់រចនាសម្ព័ន្ធទាំងមូលរបស់ចក្រវាល»។

ក៏ប៉ុន្តែ លោក Haim Eshed មិនបានលើកឡើងអំពីភ័ស្ដុតាងណាមួយដែលអាចបញ្ជាក់អំពីការអះអាងរបស់ខ្លួនទេ។ ចំណែកសេតវិមាន និងក្រុមមន្ត្រីរបស់អ៊ីស្រាអែល ក៏មិនបានឆ្លើយតបនឹងការស្នើឱ្យធ្វើការបកស្រាយអំពីការអះអាងរបស់លោក Haim Eshed ផងដែរ។ Sue Gough ដែលជាអ្នកនាំពាក្យរបស់មន្ទីរបញ្ចកោណ បានបដិសេធការធ្វើអធិប្បាយអំពីរឿងនេះ។

អ្នកនាំពាក្យរបស់ទីភ្នាក់ងារអវកាសអាមេរិក (NASA) ឱ្យដឹងថា គោលដៅមួយក្នុងចំណោមគោលដៅចម្បងៗរបស់អង្គការនេះ នោះគឺការស្វែងរកវត្តមាននៃជីវិតនៅក្នុងចក្រវាលដ៏មហាសែនធំធេង។ ប៉ុន្តែ មកដល់បច្ចុប្បន្ន ពួកគេនៅតែមិនទាន់រកឃើញសញ្ញាណាមួយបញ្ជាក់ថា មានវត្តមានរបស់មនុស្សពិភពផ្កាយនៅឡើយ៕

ប្រភព៖ NBC News

December 9, 2020

វៀតណាមអភិវឌ្ឍវ៉ាក់សាំងប្រឆាំង Covid-19 ដល់ដំណាក់កាលណាហើយ?

ក្រុមហ៊ុន Nanogen បានសាកល្បងវ៉ាក់សាំង Covid-19 នៅលើសត្វកណ្ដុរ និងស្វា ដោយជោគជ័យកាលពីខែមិថុនា ឆ្នាំ2020 បន្ទាប់មក ក្រុមហ៊ុននេះនឹងសហការជាមួយមន្ទីរស្រាវជ្រាវវេជ្ជសាស្ត្រយោធា ដើម្បីជ្រើសរើសអ្នកស្ម័គ្រចិត្តចូលរួមក្នុងការធ្វើតេស្តវ៉ាក់សាំង Covid-19 របស់វៀតណាម ក្នុងដំណាក់កាលទីមួយ នៅថ្ងៃទី 10 ខែធ្នូខាងមុខ។

បច្ចុប្បន្ន វៀតណាមមានក្រុមហ៊ុនចំនួន 3 ដែលបានដំណើរការផលិតវ៉ាក់សាំង Covid-19 សម្រាប់ការសាកល្បងនៅក្នុងមន្ទីរពិសោធន៍ នោះគឺក្រុមហ៊ុន IVAC, Vabiotech និង Nanogen។ ក្រុមហ៊ុនទាំងនេះ កំពុងស្ថិតក្នុងដំណាក់កាលវាយតម្លៃអំពីសុវត្ថិភាព និងប្រសិទ្ធភាពរបស់វ៉ាក់សាំងនៅលើសត្វ។ ដោយឡែក ក្រុមហ៊ុន Nanogen បានឆ្លងផុតដំណាក់កាលខាងលើ និងបានត្រៀមខ្លួនជាស្រេចសម្រាប់ការប្រើប្រាស់សាកល្បងនៅលើមនុស្សដំណាក់កាលទីមួយ។

ស្ថាបនិក និងជានាយកក្រុមហ៊ុន Nanogen លោក Ho Nhan បានឱ្យដឹងថា ក្រុមហ៊ុននេះបានចាប់ផ្ដើមស្រាវជ្រាវ និងអភិវឌ្ឍវ៉ាក់សាំង Covid-19 តាំងពីដើមខែមិនា ឆ្នាំ2020 ក្នុងគ្រាដែលវីរុសនេះកំពុងឆ្លងរាលដាលនៅប្រទេសចិន។ ខែឧសភា2020 ក្រសួងវិទ្យាសាស្ត្រនិងបច្ចេកវិទ្យា បានប្រគល់ភារកិច្ចក្នុងការស្រាវជ្រាវវ៉ាក់សាំងប្រឆាំង Covid-19 មកឱ្យ Nanogen ជាផ្លូវការ។

ថ្ងៃទី 15 ខែឧសភា ក្រសួងខាងលើបានបន្តប្រគល់កិច្ចការអភិវឌ្ឍផ្នែកផលិតវ៉ាក់សាំង Covid-19 ដោយបច្ចេកវិទ្យាប្រូតេអ៊ីនផ្សំដើម្បីបង្កើតប្លាកែតដូចវីរុស និងប្លាកែតណាណូ ទៅឱ្យក្រុមហ៊ុនខាងលើ។ ថ្ងៃទី 21ឧសភា ប្រធានបទស្រាវជ្រាវវ៉ាក់សាំង Covid-19 របស់ក្រុមហ៊ុន Nanogen ទទួលបានការអនុម័តយល់ព្រមឱ្យដំណើរការពីក្រសួងវិទ្យាសាស្ត្រនិងបច្ចេកវិទ្យាវៀតណាម។

លោក Ho Nhan បញ្ជាក់ថា ក្រុមហ៊ុនរបស់លោក បានវិនិយោគជាង 200ពាន់លានដុង (8,662,600 ដុល្លារអាមេរិក) សម្រាប់ពង្រីករោងចក្រចំនួន3 ទិញវត្ថុធាតុដើម និងប្រព័ន្ធផលិតវ៉ាក់សាំង។ ក្រុមហ៊ុន Nanogen ឱ្យដឹងថា របាយការណ៍វាយតម្លៃអំពីប្រសិទ្ធភាព បង្ហាញថា វ៉ាក់សាំងរបស់ក្រុមហ៊ុននេះ ទទួលបានលទ្ធផលល្អក្នុងការប្រឆាំងនឹង Covid-19។ ដោយយោងទៅលើលទ្ធផលនេះ Nanogen ក៏បានធ្វើលិខិតស្នាមរួចរាល់ហើយ សម្រាប់បញ្ជូនឡើងទៅកាន់ក្រសួងសុខាភិបាល ដើម្បីសុំការអនុញ្ញាតបន្តដំណាក់កាលបន្ទាប់។

តំណាងរបស់ Nanogen និយាយថា វ៉ាក់សាំងរបស់វៀតណាមនឹងមានតម្លៃមិនលើសពី 500,000 ដុង (21.5 ដុល្លារអាមេរិក) នៅក្នុងមួយម្ជុល (ដូស) នោះទេ នៅពេលត្រូវបានបញ្ចេញលក់ក្នុងទីផ្សារ៕

December 9, 2020

តៃវ៉ាន់នៅតែត្អូញថា «ខ្លួនរងការគំរាមរាល់ថ្ងៃ» ខណៈអាមេរិកយល់ព្រមលក់អាវុធថ្មី តម្លៃ 280 ដុល្លារមកឱ្យកោះនេះ

តៃវ៉ាន់បាននិយាយថា ខ្លួនត្រូវប្រឈមនឹងការគំរាមកំហែងផ្នែកយោធាជារៀងរាល់ថ្ងៃ នៅក្នុងគ្រាដែលសហរដ្ឋ អាមេរិក ប្រកាសអំពីកិច្ចព្រមព្រៀងជួញដូរអាវុធថ្មីដែលមានតម្លៃ 280លាន ដុល្លារអាមេរិក រវាងទីក្រុងតៃប៉ិ និងទីក្រុងវ៉ាស៊ីងតោន។

ថ្លែងនៅក្នុងកិច្ចប្រជុំសន្តិសុខនៅទីក្រុងតៃប៉ិ ក្នុងថ្ងៃនេះ មេដឹកនាំកោះតៃវ៉ាន់ លោកស្រី Tsai Ing-wen យល់ថា មានកងកម្លាំងមួយចំនួន «តែងតែព្យាយាមរំលោភទៅលើសណ្ដាប់ធ្នាប់ដែលយោងទៅតាមស្ដង់ដាដែលមានស្រាប់។ តៃវ៉ាន់ បាននិងកំពុងទទួលរងការគំរាមកំហែងផ្នែកយោធាដូច្នេះជារៀងរាល់ថ្ងៃ»។

ការថ្លែងរបស់លោកស្រី Tsai ត្រូវបានធ្វើឡើងក្រោយពីរដ្ឋាភិបាលសហរដ្ឋអាមេរិក កាលពីថ្ងៃទី 7ធ្នូ ឱ្យដឹងថា បានជូនដំណឹងទៅសភាអំពីគម្រោងលក់ប្រព័ន្ធទំនាក់ទំនងក្នុងសមរភូមិថ្មី តម្លៃ 280 លានដុល្លារអាមេរិក ទៅឱ្យកោះតៃវ៉ាន់។ នេះគឺជាកិច្ចព្រមព្រៀងលក់ដូរអាវុធលើកទី 6 រវាងសហរដ្ឋអាមេរិក និងកោះតៃវ៉ាន់ នៅក្នុងឆ្នាំនេះ ហើយវាក៏ជាការលក់ដូរអាវុធលើកទី 11 រវាងទីក្រុងតៃប៉ិ និងទីក្រុងវ៉ាស៊ីងតោន នៅក្នុងអាណត្តិប្រធានាធិបតី Donald Trump ផងដែរ។

ភាគីខាងតៃវ៉ាន់បានឱ្យដឹងថា កិច្ចព្រមព្រៀងថ្មីនេះបង្ហាញថា សហរដ្ឋអាមេរិកមិនបានប្ដូរផ្លាស់នូវអ្វីដែលបានសន្យាក្នុងការជួយការពារកោះនេះពីសត្រូវ។

Kurt Campbell ដែលជាអ្នកការទូតកំពូលម្នាក់របស់សហរដ្ឋអាមេរិក ទទួលបន្ទុកតំបន់អាស៊ីខាងកើតក្នុងសម័យលោក Barack Obama ហើយបច្ចុប្បន្នជាទីប្រឹក្សារបស់លោក Biden បានអះអាងថា ទាំងបក្សសាធារណរដ្ឋ ទាំងបក្សប្រជាធិបតេយ្យ សុទ្ធតែគាំទ្រយ៉ាងខ្លាំងក្លាដល់កោះតៃវ៉ាន់។

«មានមនុស្សជាច្រើននៅក្នុងបក្សនយោបាយ បានយល់អំពីអត្ថន័យជាយុទ្ធសាស្ត្រជ្រាលជ្រៅ និងផលប្រយោជន៍ជាយុទ្ធសំខាន់របស់យើង នៅក្នុងការរក្សាទំនាក់ទំនងល្អជាមួយនឹងតៃវ៉ាន់» លោក Kurt Campbell ថ្លែងបែបនេះ។

កិច្ចព្រមព្រៀងលក់អាវុធទៅឱ្យកោះតៃវ៉ាន់ពីសំណាក់សហរដ្ឋអាមេរិកកន្លងមក តែងតែធ្វើឱ្យចិនមានការក្ដៅក្រហាយ និងនាំឱ្យចិនដាក់ទណ្ឌកម្មទៅលើក្រុមហ៊ុនអាមេរិកាំងមួយចំនួនដែលពាក់ព័ន្ធ។ ក្រៅពីនេះ ចិនក៏មិនភ្លេចបញ្ជូននាវាចម្បាំងទៅកាន់តំបន់ក្បែរកោះតៃវ៉ាន់ផងដែរ ដើម្បីគំរាមកោះនេះ។ ប្រទេសចិន តែងតែចាត់ទុកកោះតៃវ៉ាន់ជាខេត្តមួយដែលមិនអាចកាត់ផ្ដាច់ចេញពីប្រទេសចិន ហើយកោះនេះនឹងត្រូវវិលត្រលប់មកជារបស់ចិនវិញនាពេលខាងមុខ បើទោះជាត្រូវប្រើកម្លាំងបាយក៏ដោយ៕

ប្រភព៖ Reuters

December 8, 2020

Covid-19! ត្រូវពិន័យ 100,000ដុល្លារ ព្រោះតែចេញពីបន្ទប់ចត្តាឡីស័ក 8 វិនាទី

បុរសជនជាតិហ្វីលីពីនម្នាក់ ត្រូវបានអាជ្ញាធរតៃវ៉ាន់ពិន័យជាប្រាក់ចំនួន 3,500ដុល្លារអាមេរិក ដោយសារតែបានបំពានការកំណត់ស្ដីអំពីការធ្វើចត្តាឡីស័ក បើទោះជាបុរសនេះនៅខាងក្រៅបន្ទប់ត្រឹមតែ 8 វិនាទី។

បុរសម្នាក់ជាពលករមកពីប្រទេសហ្វីលីពីន ដែលកំពុងធ្វើចត្តាឡីស័កនៅក្នុងសណ្ឋាគារមួយក្នុងទីក្រុង Kaohsiung នៃកោះតៃវ៉ាន់ ត្រូវបានពិន័យ ដោយសារតែបានចាកចេញពីបន្ទប់របស់ខ្លួន និងទៅឈរក្បែរផ្លូវដើរ ក្បែរនោះ នេះបើតាមមន្ទីរសុខាភិបាល។

បន្ទាប់ពីបានឃើញ «ហេតុការណ៍» នេះតាមរយៈកាមេរ៉ាសន្តិសុខ បុគ្គលិកសណ្ឋាគារក៏បានទាក់ទងទៅកាន់មន្ទីរសុខាភិបាល នាំឱ្យបុរសនេះត្រូវរងការពិន័យជាទឹកប្រាក់រហូតដល់ 100,000ដុល្លារតៃវ៉ាន់ (ប្រហែល 3,500ដុល្លារអាមេរិក) បើទោះជាបុរសនេះនៅខាងក្រៅបន្ទប់ត្រឹមតែ 8 វិនាទីក៏ដោយ។

យោងតាមការកំណត់ស្ដីអំពីការទប់ស្កាត់ Covid-19 របស់តៃវ៉ាន់ អ្នកដែលកំពុងធ្វើចត្តាឡីស័ក មិនត្រូវបានអនុញ្ញាតឱ្យចាកចេញពីបន្ទប់ឡើយ ទោះជាក្នុងរយៈពេលប៉ុន្មានវិនាទីក៏ដោយ។ នៅក្នុងទីក្រុង Kaohsiung សណ្ឋាគារចំនួន 56 កន្លែង កំពុងត្រូវបានប្រើប្រាស់ជាកន្លែងសម្រាប់ធ្វើចត្តាឡីស័ក ក្នុងនោះ មានបន្ទប់សរុបប្រមាណ 3,000 បន្ទប់។

សារព័ត៌មាន Taiwan News បានចេញផ្សាយថា បុរសដែលត្រូវបានពិន័យខាងលើ បានធ្វើចត្តាឡីស័កអស់រយៈពេល 5 ថ្ងៃ ហើយបានចេញពីបន្ទប់ដើម្បីយករបស់ទៅឱ្យមិត្តភក្ដិដែលនៅក្នុងបន្ទប់ក្បែរនោះ។

តៃវ៉ាន់ ត្រូវបានគេសរសើរច្រើន ដោយសារតែមានវិធានការយ៉ាងឆាប់រហ័សក្នុងការគ្រប់គ្រង Covid-19។ កោះនេះមិនដែលបានដាក់បម្រាមគោចរតឹងរ៉ឹង ឬកាត់បន្ថយសិទ្ធិសេរីភាពរបស់ពលរដ្ឋម្ដងណានៅឡើយ។ ជំនួសមកវិញ អាជ្ញាធរកោះនេះ ផ្ដោតសំខាន់ទៅលើល្បឿននៃប្រតិកម្មរបស់ភាគីពាក់ព័ន្ធ។ អាជ្ញាធរកោះតៃវ៉ាន់ ក៏បានវិនិយោគទៅលើកិច្ចការធ្វើតេស្តតាមបែបចល័ត និងការតាមរកអ្នកពាក់ព័ន្ធ ប្រកបដោយភាពរហ័សរហួន និងប្រសិទ្ធភាព។

គិតមកដល់បច្ចុប្បន្ន តៃវ៉ាន់បានរកឃើញអ្នកឆ្លងវីរុស Covid-19 សរុប 718នាក់ ក្នុងនោះមាន 7នាក់បានស្លាប់ និង 582នាក់បានជាសះស្បើយ នេះបើតាមគេហទំព័រ Worldometers៕

ប្រភព៖ CNN, Worldometers

December 8, 2020

រដ្ឋ California ដាក់បម្រាមគោចរលើមនុស្សជាង 20លាននាក់

ក្រុមមន្ត្រីនៃរដ្ឋ California សហរដ្ឋអាមេរិក បានចេញបម្រាមគោចរយ៉ាងតឹងរ៉ឹងនៅតំបន់ភាគខាងត្បូងនៃរដ្ឋនេះ នៅក្នុងគ្រាដែលមន្ទីរពេទ្យនានាកំពុងប្រឈមនឹងការទទួលអ្នកជំងឺ Covid-19 លើសចំណុះ។

បម្រាមគោចរនៅភាគខាងត្បូងរដ្ឋ California មានសុពលភាពចាប់ពីម៉ោង0 ថ្ងៃទី 7ធ្នូ (ម៉ោង 15 នៅភ្នំពេញ) ដែលក្នុងនោះ ការិយាល័យភាគច្រើនត្រូវបានតម្រូវឱ្យបិទទ្វារ ខណៈដែលពលរដ្ឋក៏ត្រូវបានហាមមិនឱ្យជួបជុំគ្នា។ ហាងស្រា និងសេវាកម្មថែទាំឯកជន ដូចជា ហាងធ្វើសក់ជាដើម ក៏ត្រូវបង្ខំឱ្យបិទទ្វារ ស្របពេលដែលភោជនីយដ្ឋាននៅតែត្រូវបានអនុញ្ញាតឱ្យបន្តដំណើរការ ក្នុងលក្ខខណ្ឌមិនអនុញ្ញាតមានភ្ញៀវចូលមកបរិភោគក្នុងហាង ប៉ុន្តែអាចទិញយកទៅផ្ទះ ឬភាគីហាងត្រូវដឹកជញ្ជូនដល់ផ្ទះ។

បម្រាមគោចរនេះ ត្រូវបានវាយតម្លៃថា ពិតជាមានភាពតឹងរ៉ឹង ប៉ុន្តែ វានៅតែមិនទាន់ស្មើនឹងវិធានការគម្លាតសង្គមកាលពីខែមីនា នៅពេលដែលអាជ្ញាធរបានហាមការធ្វើសកម្មភាពនៅខាងក្រៅផ្ទះ ក្នុងនោះ ប្រជាជនមិនត្រូវបានអនុញ្ញាតឱ្យអង្គុយលើកៅអីសាធារណៈ ឬដើរដោយថ្មើរជើង។

California កំពុងតែឆ្លងកាត់ការឆ្លងរាលដាលនៃវីរុស Covid-19 ជាលើកទីបី ដោយមានករណីឆ្លងថ្មី និងស្លាប់ប្រចាំថ្ងៃ កើនឡើងខ្ពស់មិនធ្លាប់មាន។ តួលេខអ្នកស្លាប់នៅក្នុងរយៈពេល2ថ្ងៃនៃចុងសប្ដាហ៍កន្លងទៅ គឺ 113នាក់ ខណៈដែលករណីឆ្លងថ្មីនៅក្នុងថ្ងៃទី5ធ្នូ មានដល់ទៅ 30,075នាក់។ គិតមកដល់បច្ចុប្បន្ន រដ្ឋ California បានរកឃើញអ្នកឆ្លងវីរុសសរុប ជាង 1.3លាននាក់ និងអ្នកស្លាប់ជិត 20,000នាក់ ខណៈដែលនៅទូទាំងសហរដ្ឋអាមេរិក មនុស្សចំនួនជាង 15លាននាក់ត្រូវបានគេរកឃើញថា បានឆ្លងវីរុស Covid-19 ក្នុងនោះមានជាង 290,440នាក់បានបាត់បង់ជីវិត៕

ប្រភព៖ AFP, Worldometers

December 8, 2020

រដ្ឋមន្ត្រីឥណ្ឌូនេស៊ីត្រូវចាប់ខ្លួនជាមួយនឹងប្រាក់ពុករលួយពីជំនួយ Covid-19 រាប់ពាន់លានរូពៀ

អង្គភាពប្រឆាំងអំពើពុករលួយរបស់ឥណ្ឌូនេស៊ី (KPK) កាលពីថ្ងៃទី 6ធ្នូ បានចាប់ខ្លួនរដ្ឋមន្ត្រីក្រសួងសង្គមកិច្ច Juliari Batubara ជាមួយនឹងប្រាក់ពុករលួយយ៉ាងតិច 1.2លានដុល្លារ បន្ទាប់ពីមន្ត្រីរូបនេះបានចេញសារភាព។

យោងតាម BBC លោក Juliari Batbara ត្រូវបានគេចាត់ទុកថាជាជនសង្ស័យ ក្រោយពី KPK រឹបអូសវ៉ាលី សាកាដូ និងស្រោមសំបុត្រដែលមានប្រាក់សរុបឡើងដល់ 17ពាន់លានរួពៀ (ប្រហែល 1.2លានដុល្លារអាមេរិក) កាលពីថ្ងៃទី 5ធ្នូ។ រហូតដល់ថ្ងៃទី 6ធ្នូ លោក Batubara ក៏បានចេញសារភាព។

សេចក្ដីប្រកាសព័ត៌មានរបស់ KPK ឱ្យដឹងថា លោក Batubara ត្រូវបានចោទប្រកាន់ថា បានទទួលសំណូកយ៉ាងតិច 1.2លានដុល្លារអាមេរិកពីអ្នកម៉ៅការ 2រូបដែលទទួលបានសិទ្ធិផ្គត់ផ្គង់កញ្ចប់ជំនួយផ្នែកស្បៀងអាហារដល់ប្រជាជនដែលរងផលប៉ះពាល់ពី Covid-19 ទៅតាមកម្មវិធីរបស់រដ្ឋាភិបាល។ នៅក្នុងកញ្ចប់ជំនួយនីមួយៗ លោក Batubara ទទួលបាន 10,000រូពៀ ឬ 0.71ដុល្លារអាមេរិក។

បើសិនជាត្រូវបានកាត់ទោស លោក Batubara អាចប្រឈមនឹងការជាប់ពន្ធនាគារ 20ឆ្នាំ និងត្រូវពិន័យជាប្រាក់ 1ពាន់លានរូពៀ (ស្មើនឹង 70,000ដុល្លារអាមេរិក)។

លោក Batubara គឺជារដ្ឋមន្ត្រីទីពីរហើយនៅក្នុងគណៈរដ្ឋមន្ត្រីរបស់ប្រធានាធិបតី Joko Widodo ដែលត្រូវបានចាប់ខ្លួនក្រោមបទចោទថាបានប្រព្រឹត្តអំពីពុករលួយ នៅក្នុងរយៈពេលប៉ុន្មានសប្ដាហ៍ចុងក្រោយនេះ។

ទាក់ទងនឹងបញ្ហាខាងលើ ប្រធានាធិបតី Widodo ថ្លែងថា៖ «នេះគឺជាប្រាក់របស់ប្រជាជន។ នេះជាខ្ទង់ប្រាក់ជំនួយដ៏ចាំបាច់នៅក្នុងដំណាក់កាលប្រឈមនឹងវិបត្តិសុខភាព Covid-19 និងដើម្បីជួយដោះស្រាយបញ្ហាសេដ្ឋកិច្ច»។ លោក Widodo ប្រកាសថា លោកនឹងមិនការពារមន្ត្រីរូបណាដែលប្រព្រឹត្តអំពើពុករលួយឡើយ។

សេដ្ឋកិច្ចរបស់ប្រទេសឥណ្ឌូនេស៊ី កំពុងតែរងផលប៉ះពាល់ខ្លាំងដោយសារ Covid-19។ រដ្ឋាភិបាលប្រទេសនេះ បាននិងកំពុងអនុវត្តកម្មវិធីជាច្រើនដើម្បីជួយដល់ក្រុមមនុស្សដែលរងឥទ្ធិពលពីវិបត្តិសុខភាពនេះ៕

ប្រភព៖ France 24

December 7, 2020

ជាង 66លាននាក់បានឆ្លង Covid-19! WHO ព្រមានបណ្ដាប្រទេសថា «កុំប្រមាទ!»

អង្គការសុខភាពពិភពលោក បានធ្វើការព្រមានដល់បណ្ដាប្រទេសក្នុងពិភពលោកថា មិនត្រូវមានការប្រមាទ ឬមើលស្រាលចំពោះមហារោគរាតត្បាត Covid-19 នេះជាដាច់ខាត ក្នុងគ្រាដែលពិភពលោកទាំងមូលបានរកឃើញអ្នកឆ្លងវីរុស Covid-19 ថ្មីចំនួន 12,052នាក់។

អង្គការសុខភាពពិភពលោក (WHO) ថ្មីៗនេះ បានធ្វើសេចក្ដីព្រមានដល់បណ្ដាប្រទេសថា មិនគួរមានការមើលស្រាលចំពោះវីរុស Covid-19 ព្រោះតែការសំអាងលើកម្មវិធីចាក់វ៉ាក់សាំងការពារដែលជិតនឹងមាននាពេលខាងមុខ។ ប្រធានផ្នែកបន្ទាន់របស់ WHO លោក Michael Ryan ថ្លែងនៅក្នុងសន្និសីទសារព័ត៌មានកាលពីថ្ងៃទី 4ធ្នូថា៖ «មានវ៉ាក់សាំង មិនមែនមានន័យថា លែងមាន Covid»។

«វ៉ាក់សាំង និងការចាក់វ៉ាក់សាំងការពារ នឹងជាឧបករណ៍ជំនួយបន្ថែមធំមួយ និងខ្លាំងក្លា ទៅក្នុងប្រព័ន្ធឧបករណ៍ដែលយើងមាន។ ប៉ុន្តែ ការពឹងទៅលើវ៉ាក់សាំងតែមួយមុខ គឺមិនគ្រប់គ្រាន់ដើម្បីលុបបំបាត់មហារោគរាតត្បាតនេះឡើយ»។

ប្រធានអង្គការ WHO លោក Tedros Adhanom Ghebreyesus ថ្លែងថា ការរីកចម្រើននៃវ៉ាក់សាំង នាំមកនូវជំហានជឿនលឿនថ្មីមួយ ហើយពេលនេះ យើងអាចចាប់ផ្ដើមមើលឃើញពន្លឺនៅខាងចុងផ្លូវរូង។

«ក៏ប៉ុន្តែ WHO មានការព្រួយបារម្ភថា កាន់តែមានមនុស្សច្រើនឡើងៗយល់់ថា មហារោគរាតត្បាតបានបញ្ចប់។ តំបន់ជាច្រើនកំពុងតែមានអត្រានៃការឆ្លងខ្ពស់ខ្លាំង បង្កសម្ពាធយ៉ាងធ្ងន់ធ្ងរដល់បណ្ដាមន្ទីរពេទ្យ និងបុគ្គលិកសុខាភិបាល»។

គិតមកដល់ពេលនេះ ពិភពលោកទាំងមូលបានរកឃើញអ្នកឆ្លងវីរុស Covid-19 សរុប 66,223,906 ក្នុងនោះមានអ្នកស្លាប់ដល់ទៅ 1,524,255នាក់ ខណៈអ្នកកំពុងទទួលការព្យាបាលមានចំនួន 18,891,779នាក់ ដែលក្នុងនេះដែរមានអ្នកជំងឺចំនួន 106,090នាក់កំពុងប្រឈមនឹងការបាត់បង់ជីវិត៕

December 5, 2020

តំណាងរាស្ត្រ 9ប្រទេស ចូលរួមពិធីជប់លៀង Sex ក្នុងគ្រា Covid-19 កំពុងរាតត្បាតខ្លាំង

អ្នករៀបចំកម្មវិធីជប់លៀង Sex នៅទីក្រុង Brussels កាលពីសប្ដាហ៍មុន បានឱ្យដឹងថា បុរសជាតំណាងរាស្ត្រមកពីប្រទេសចំនួន 9 បានចូលរួមព្រឹត្តិការណ៍ដែលខ្លួនបានរៀបចំ នៅមុនពេលត្រូវបានក្រុមប៉ូលិសឆ្មក់ចូលចាប់។

នៅក្នុងកិច្ចសម្ភាសមួយជាមួយនឹងសារព័ត៌មាន Onet របស់ប៉ូឡូញ កាលពីថ្ងៃទី 3ធ្នូ David Manzheley បានឱ្យដឹងថា ខ្លួនបានប្រារព្ធកម្មវិធីជប់លៀង Sex សម្រាប់មនុស្សភេទទីបីនេះអស់រយៈពេល 2ឆ្នាំមកហើយ។ លោកបន្តថា កម្មវិធីរបស់ខ្លួនតែងតែមានមនុស្សរាប់រយនាក់ចូលរួម។

លោក Manzheley និយាយថា៖ «ក្រុមមនុស្សល្បីឈ្មោះជាច្រើនមកពីប្រទេសនានា បានបង្ហាញខ្លួននៅក្នុងពិធីជប់លៀងដែលខ្ញុំបានរៀបចំ ក្នុងនោះមានទាំងអ្នកនយោបាយប៉ូឡូញផងដែរ។ ពួកគេសុទ្ធតែជាអ្នកមានគ្រួសាររួចហើយ ហើយពួកគេក៏សុទ្ធតែស្នើឱ្យរក្សាការសម្ងាត់អំពីការចូលរួមពិធីជប់លៀងសម្រាប់មនុស្សភេទពីរបីនេះ»។

កាលពីសប្ដាហ៍មុន Manzheley បានរៀបចំពិធីជប់លៀងដូចខាងលើ នៅក្នុងផ្ទះមួយនៅទីក្រុង Brussels ដោយមានមនុស្ស 25នាក់ចូលរួម ប៉ុន្តែ ត្រូវបានក្រុមប៉ូលិសឆ្មក់ចូលត្រួតពិនិត្យ ដោយសារតែបានរំលោភលើបម្រាមគោចរដើម្បីទប់ស្កាត់ Covid-19។

Manzheley និយាយថា៖ «ពួកគេគឺជាអ្នកនយោបាយមកពី អ៊ុយក្រែន បារាំង អាល្លឺម៉ង់ ហូឡង់ លុចហ្សំបួរ ស្វីស និងអេស្ប៉ាញ។ ក៏ប៉ុន្តែ ភ្ញៀវដែលបានចូលរួមជាញឹកញាប់គឺអ្នកតំណាងរាស្ត្រនៃប្រទេសប៉ូឡូញ និងហុងគ្រី»។

អ្នករៀបចំពិធីជប់លៀង Sex ខាងលើបានអះអាងថា មានអ្នកនយោបាយដល់ទៅ 9រូបរបស់បក្សកាន់អំណាច Fidesz នៅហុងគ្រី ក្នុងនោះមានតំណាងរាស្ត្រ Jozsef Szajer ផងដែរដែលបានចូលរួមពិធីជប់លៀងនេះ។

Manzheley បានរៀបរាប់ថា ពិធីជប់លៀង Sex របស់លោក ត្រូវបានប្រារព្ធឡើងទៅតាមរូបភាព “អាក្រាតជាទីបំផុត” ក្នុងនោះ មិនមានវិធានការការពារ ក៏ដូចជាការពិនិត្យរកវីរុស Covid-19។ ភ្ញៀវគ្រប់រូបត្រូវតែចូលរួមដោយអស់ពីចិត្ត ហើយពុំមានអ្នកណាម្នាក់ត្រូវបានអនុញ្ញាតឱ្យប្រើទូរស័ព្ទ ឬថតរូបនៅក្នុងពិធីជប់លៀង Sex នេះទេ។

ក្រុមមន្ត្រីបានរកឃើញថា អ្នកចូលរួមចំនួន 25នាក់ដែលជាបុរស ភាពច្រើនគ្មានសម្លៀកបំពាក់ជាប់ខ្លួននោះឡើយ នៅក្នុងពិធីជប់លៀងក្នុងបន្ទប់មួយនៅជាន់លើរបស់ហាងកាហ្វេមួយកន្លែង។ ព័ត៌មាននេះបានបែកធ្លាយ និងបាននាំឱ្យ Szajer អាយុ 59ឆ្នាំ មកពីបក្សកំពុងកាន់អំណាច Fidesz របស់នាយករដ្ឋមន្ត្រីហុងគ្រី Vikto Orban ត្រូវលាលែងពីតំណែង។

ការិយាល័យរដ្ឋអាជ្ញានៃទីក្រុង Brussels បានទទួលស្គាល់ថា មានបុរសម្នាក់ត្រូវបានគេដាក់ឈ្មោះថា S.J. បានចូលរួមពិធីជប់លៀង និងបានព្យាយាមគេចចេញពីពិធីជប់លៀង មុនពេលត្រូវបានចាប់ខ្លួន។

Manzheley បានបញ្ជាក់ថា អ្នកចូលរួមសុទ្ធតែត្រូវបានតម្រូវឱ្យចុះឈ្មោះទៅក្នុងបញ្ជីមួយដែលប្រកាសថា មិនមានផ្ទុកវីរុស Covid-19។ គាត់និយាយថា ក្រុមប៉ូលិសអាចឆ្មក់ចូលបាន ក៏ព្រោះតែមានអ្នកទុកទ្វារចំហ៕

ប្រភព៖ Fox News

December 4, 2020

ទីផ្សារវ៉ាក់សាំងប្រឆាំង Covid-19! តើប្រទេសណាខ្លះដែលបានបញ្ជាទិញមុន ច្រើនជាងគេ?

ប្រទេសអ្នកមានជាងគេចំនួន 32 ក្នុងពិភពលោក បានបញ្ជាទិញជាមុន (pre-order) ជាងពាក់កណ្ដាលនៃបរិមាណសរុបរបស់វ៉ាក់សាំង Covid-19 នៅទូទាំងពិភពលោក ប៉ុន្តែ ប្រទេសទាំងនេះ មានប្រជាជនត្រឹមតែ 13% ប៉ុណ្ណោះនៃប្រជាជនសរុបក្នុងពិភពលោក។

យោងតាមលទ្ធនៃការប្រើប្រាស់សាកល្បងវ៉ាក់សាំង Covid-19 ដំណាក់កាលទីបី និងសេចក្ដីប្រកាសអំពីផលិតភាពដែលបានគ្រោងទុកពីបណ្ដាក្រុមហ៊ុនផលិតវ៉ាក់សាំង យើងអាចនឹងមានវ៉ាក់ស៊ាំង Covid-19 គ្រប់គ្រាន់សម្រាប់ចាក់ឱ្យប្រជាជនចំនួន 1/3 ក្នុងពិភពលោកនៅចុងឆ្នាំ 2021។ ប៉ុន្តែ ពលរដ្ឋជាច្រើននៅក្នុងបណ្ដាប្រទេសក្រីក្រ អាចនឹងត្រូវរង់ចាំរហូតដល់ឆ្នាំ 2023 ឬ 2024 ទើបអាចមានវ៉ាក់សាំងដើម្បីចាក់នឹងគេ។ នេះគឺជាទិដ្ឋភាពដែលត្រូវបានព្យាករដោយមជ្ឈមណ្ឌលកែប្រែសុខាភិបាលសកល Duke ដែលមានទីស្នាក់ការនៅតំបន់ Durham ក្នុងរដ្ឋ Carolina ខាងជើងនៃសហរដ្ឋអាមេរិក។

មើលទៅលើក្រុមហ៊ុនចំនួន 3 ដែលកំពុងកាន់កាប់បេក្ខភាពវ៉ាក់សាំង Covid-19 ដែលមានសក្ដានុពលបំផុត គឺក្រុមហ៊ុន AstraZeneca, Pfizer និង Moderna។ តាមការគណនា បរិមាណសរុបនៃផលិតផលរបស់ពួកគេ អាចធានាការផ្គត់ផ្គង់វ៉ាក់សាំង Covid-19 ចំនួន 5.3 ពាន់លានអំពូលនៅក្នុងឆ្នាំ 2021។

តាមការគណនា បរិមាណវ៉ាក់សាំងនេះអាចចាក់ឱ្យមនុស្សចាប់ពី 2.6 ដល់ 3.1 ពាន់លាននាក់នៅលើពិភពលោក អាស្រ័យទៅលើវ៉ាក់សាំងរបស់ ក្រុមហ៊ុន AstraZeneca ដែលអាចចាក់ទៅតាមសេណារីយ៉ោ 1.5អំពូល ឬ 2អំពូលសម្រាប់មនុស្សម្នាក់។

ក្រៅពីបណ្ដាក្រុមហ៊ុនផលិតវ៉ាក់សាំងខាងលើ ក៏នៅមានក្រុមហ៊ុនជាច្រើនផ្សេងទៀត ដូច្នេះ រុស្ស៊ីជាដើម។ មូលនិធិវិនិយោគ Russia Direct ឱ្យដឹងថា ពួកគេអាចផ្គត់ផ្គង់វ៉ាក់សាំង Covid-19 ទៅឱ្យមនុស្សចំនួន 500លាននាក់នៅក្រៅប្រទេសជារៀងរាល់ឆ្នាំ ចាប់ពីឆ្នាំ 2021។

នៅក្នុងពិភពលោក មានប្រទេសចំនួន 32 ហើយដែលបានបញ្ជាទិញជាងពាក់កណ្ដាលនៃបរិមាណវ៉ាក់សាំងសរុបក្នុងពិភពលោក ដែលប្រទេសទាំងនេះមានប្រជាជនសរុបប្រហែល 13% ប៉ុណ្ណោះ បើធៀបនឹងប្រជាជនសរុបទូទាំងសកលលោក។ កាណាដា បច្ចុប្បន្នគឺជាប្រទេសដែលឈរលើកំពូលតារាង ដោយប្រជាជនម្នាក់ៗរបស់ប្រទេសនេះ អាចនៅសល់វ៉ាក់សាំងដែលអាចចាក់បានរហូតដល់ 9ដងឯណោះ។

ប្រការខាងលើនេះ នឹងនាំឱ្យបណ្ដាប្រទេសក្រីក្រ ជួបការលំបាកខ្លាំងដោយសារតែមិនមានលទ្ធភាពគ្រប់គ្រាន់ក្នុងការបញ្ជាទិញជាមុននូវវ៉ាក់សាំងដែលមានសក្ដានុពល។ ក៏ប៉ុន្តែ បណ្ដាប្រទេសក្រីក្រ នៅមានក្ដីសង្ឃឹមផ្សេងមួយទៀត នោះគឺការរំពឹងទៅលើការរួមចំណែករបស់ COVAX ដែលជាមូលនិធិបែងចែកវ៉ាក់សាំងស្មើភាពគ្នា។

COVAX ត្រូវបានបង្កើតឡើង និងដំណើរការដោយអង្គការចំនួន 3 រួមមាន សម្ព័ន្ធផ្លាស់ប្ដូរត្រៀមសម្រាប់ការទប់ទល់នឹងរោគរាតត្បាត (CEPI) អង្គការសុខភាពពិភពលោក (WHO) និង Gavi ដែលជាសម្ព័ន្ធវ៉ាក់សាំង និងជាអង្គការមិនស្វែងរកកម្រៃឯកជន ដែលធ្វើសកម្មភាពក្នុងវិស័យផ្ដល់ជំនួយវ៉ាក់សាំងទៅឱ្យបណ្ដាប្រទេសដែលមានចំណូលទាប។

រហូតមកដល់ពេលនេះ COVAX បានបញ្ជាទិញជាមុននូវវ៉ាក់សាំង Covid-19 ចំនួន 700លានអំពូល ហើយបើតាមគម្រោង អង្គការនេះនឹងផ្គត់ផ្គង់វ៉ាក់សាំងចំនួន 2 ពាន់លានអំពូលនៅក្នុងឆ្នាំ 2021 ដើម្បីជួយដល់ប្រជាជនយ៉ាងតិច 20% នៅក្នុងបណ្ដាប្រទេសដែលបានចូលរួមជាមួយអង្គការនេះ។ បច្ចុប្បន្ន មានប្រទេសជាង 198 ដែលបានចុះឈ្មោះចូលរួមជាមួយនឹងអង្គការ COVAX ដោយរួមមានទាំងបណ្ដាប្រទេសអ្នកមានផងដែរ។

ក្រៅពីនេះ ក្ដីសង្ឃឹមមួយផ្សេងទៀតដែលបណ្ដាប្រទេសក្រីក្រអាចរង់ចាំ នោះគឺការផ្ដល់ជំនួយវ៉ាក់សាំងពីបណ្ដាប្រទេសអ្នកមានដែលពួកគេប្រើប្រាស់វ៉ាក់សាំងមិនអស់។ ក៏ប៉ុន្តែ ក្រុមអ្នកជំនាញយល់ថា ក្ដីសង្ឃឹមនេះ ពិតជាស្ដួចស្ដើងខ្លាំងណាស់៕

ប្រភព៖ Nature

December 3, 2020

Category: អន្តរជាតិ