អន្តរជាតិ - La Reine Media

ជិត100,000នាក់ស្លាប់ដោយសារ COVID-19 នៅសហរដ្ឋអាមេរិក លោក Trump ចេញទៅលេងកីឡា

May 24, 2020 by សឿន សំណាង

ជិត100,000នាក់ស្លាប់ដោយសារ COVID-19 Trump ចេញទៅលេងកីឡា

សហរដ្ឋអាមេរិកបានរាយការណ៍ថា អ្នកស្លាប់ថ្មីដោយសារវីរុសCOVID-19 មានចំនួនជាង1,000នាក់ នាំឱ្យតួលេខអ្នកស្លាប់សរុបឡើងដល់ជិត99,000នាក់ក្នុងចំណោមអ្នកជំងឺកូរ៉ូណាជិត1.7លាននាក់នៅទូទាំងប្រទេស។ តួលេខសរុបនៃអ្នកជំងឺ និងអ្នកស្លាប់ដោយសារ COVID-19 នៅសហរដ្ឋអាមេរិក គឺ 1,666,244នាក់ និង98,661នាក់ កើន22,659នាក់ និង1,071នាក់ ធៀបនឹងម្សិលមិញ។ រដ្ឋចំនួន50របស់សហរដ្ឋអាមេរិក បានបន្ធូរបន្ថយការរឹតត្បិតលើការដើរហើរក្នុងកម្រិតផ្សេងៗគ្នា។ ប្រធានាធិបតីអាមេរិកាំង កាលពីថ្ងៃទី22កន្លងទៅ បានចេញបទបញ្ជាមួយ អនុញ្ញាតឱ្យមានការជួបជុំគ្នាច្រើនបំផុតត្រឹម10នាក់ ឱ្យតែពួកគេគោរពទៅតាមវិធានការរក្សាគម្លាតសង្គម។ ថ្ងៃទី23ឧសភា មនុស្សរាប់ពាន់នាក់បានចេញទៅលេងសមុទ្រ និងតំបន់ទេសចរណ៍ផ្សេងៗក្នុងឱកាសរដូវបុណ្យជាតិ Memorial Day(ទិវាចងចាំវីរជនពលីអាមេរិកាំង) បន្ទាប់ពីបានជាប់ក្នុងបម្រាមគោចរអស់មួយរយៈពេលវែងកន្លងមកនេះ។ ក្នុងចំណោមមនុស្សដែលបានចេញទៅលេងខាងក្រៅកាលពីថ្ងៃសៅរ៍ ក៏មានលោកប្រធានាធិបតី Trump ផងដែរ ដែលពេលនោះលោកបានធ្វើដំណើរទៅកាន់ក្លិប Trump នៅក្នុងរដ្ឋ Virginia ដើម្បីលេងវាយកូនហ្គោល។ លោក Trump ក៏កំពុងតែជំរុញឱ្យរដ្ឋនានាបើកទ្វារសេដ្ឋកិច្ចឡើងវិញដើម្បីទប់ស្កាត់ឱនភាពសេដ្ឋកិច្ចនៅមុនការបោះឆ្នោតជាតិ៕ ប្រភព៖ សារព័ត៌មានបរទេស

ឆេះកំពង់ផែនៅសហរដ្ឋអាមេរិក(មានវីដេអូ)

May 24, 2020 by សឿន សំណាង

កាលពីថ្ងៃទី23ឧសភាកន្លងទៅ ក្រុមពន្លត់អគ្គិភ័យជាង100នាក់ ត្រូវបានបញ្ជូនទៅកាន់កន្លែងមានអគ្គិភ័យកើតឡើង ដែលស្ថិតក្នុងកំពង់ផែ Pier 45 នាទីក្រុង San Francisco រដ្ឋ California នៃសហរដ្ឋអាមេរិក។ អណ្ដាតភ្លើងបានឆេះសន្ធោសន្ធៅនៅវេលាម៉ោង7និង17នាទីម្សិលមិញនៅភាគខាងកើតសហរដ្ឋអាមេរិក(ម៉ោង18និង17នាទីនៅកម្ពុជា) បានបណ្ដាលឱ្យស្រុតអគារមួយក្នុងកំពង់ និងបានឆេះរាលដាលដល់អគារមួយចំនួនផ្សេងទៀត។ មកដល់បច្ចុប្បន្ន សមត្ថកិច្ចមិនទាន់រកឃើញមូលហេតុនៃហេតុការណ៍នេះនៅឡើយ។ អ្នកនាំពាក្យរបស់នាយកដ្ឋានពន្លត់អគ្គិភ័យនៅ San Francisco បានឱ្យដឹងថា កប៉ាល់ពន្លត់អគ្គិភ័យ St. Francis ត្រូវបានបញ្ជូនទៅកាន់កន្លែងកើតហេតុ ហើយក៏បានការពារ SS Jeremiah O’Brien (នាវាប្រវត្តិសាស្ត្រដែលត្រូវបានសាងសង់ឡើងកាលពីសង្គ្រាមលោកលើកទី2) ដោយជោគជ័យ។ ក្រៅពីនេះ នាវាពន្លត់អគ្គិភ័យជាច្រើនគ្រឿងផ្សេងទៀតក៏មានវត្តមាននៅកន្លែងកើតហេតុផងដែរដើម្បីជួយដល់សកម្មភាពអន្លត់ភ្លើង។ សូមបញ្ជាក់ថា SS Jeremiah O’Brien គឺជានាវាចម្បាំងមួយគ្រៀងដែលត្រូវបានកងទ័ពជើងទឹកសហរដ្ឋអាមេរិកផលិតឡើងកាលពីសង្គ្រាមលោកលើកទី2 ដែលឈ្មោះរបស់វាត្រូវបានដាក់ទៅតាមឈ្មោះរបស់មេបញ្ជាការនាវានេះ គឺលោក Jeremiah O’Brien។ នេះគឺជានាវាមួយក្នុងចំណោមនាវាដ៏តិចតួចដែលនៅសល់របស់ក្រុមនាវាទាំង6,939គ្រឿងដែលបានចូលរួមក្នុងការធ្វើសង្គ្រាមនៅ Normandy ប្រទេសបារាំងកាលពីឆ្នាំ1944 ក្នុងការបើកយុទ្ធនាការទ្រង់ទ្រាយធំ ប្រឆាំងនឹងណាស៊ីរបស់អាល្លឺម៉ង់នៅក្នុងសមរភូមិអឹរ៉ុបខាងលិច៕ ប្រភព៖ សារព័ត៌មានបរទេស

ជិត5.4លាននាក់បានឆ្លង COVD-19 នៅទូទាំងពិភពលោក ខណៈអ្នកស្លាប់ក៏ចេះតែកើនឡើង

May 24, 2020 by សឿន សំណាង

ពិភពលោកទាំងមូលត្រូវបានរាយការណ៍ថា បានរកឃើញមនុស្សជិត5.4លាននាក់មានផ្ទុកវីរុសCOVID-19 ក្នុងនោះមានជាង343,000នាក់បានបាត់បង់ជីវិត ខណៈតំបន់អាមេរិកខាងត្បូងបានក្លាយជាសម្បុកមេរោគកូរ៉ូណាធំ និងថ្មីមួយ គួរឱ្យព្រួយបារម្ភ។ ប្រទេសនិងដែនដីចំនួន213ក្នុងពិភពលោក មានអ្នកជំងឺCOVID-19 សរុប ឡើងដល់5,396,970នាក់ និងអ្នកស្លាប់មានចំនួន343,582នាក់ ក្នុងនោះអ្នកជំងឺ និងអ្នកស្លាប់ដែលទើបត្រូវបានរកឃើញក្នុងរយៈពេល24ម៉ោងចុងក្រោយនេះ មានចំនួន101,508នាក់ និង4,262នាក់។ អ្នកជំងឺដែលបានជាសះស្បើយ បានកើនដល់2,326,175នាក់។ ទ្វីបអាមេរិកមានអ្នកជំងឺCOVID-19សរុប2,456,635នាក់ ក្នុងនោះអាមេរិកខាងជើងមាន1,851,746នាក់ អាមេរិកខាងត្បូងមាន604,889នាក់ ចំណែកទ្វីបអឺរ៉ុបមាន1,885,900នាក់ អាស៊ីមាន936,333នាក់ និងអាហ្វ្រិកមាន109,470នាក់។ ក្នុងពិភពលោក មានប្រទេសចំនួន12ដែលមានអ្នកជំងឺច្រើនជាង100,000នាក់ រួមមាន សហរដ្ឋអាមេរិក ប្រេស៊ីល រុស្ស៊ី អេស្ប៉ាញ អង់គ្លេស អ៊ីតាលី បារាំង អាល្លឺម៉ង់ ទួរគី អ៊ីរ៉ង់ ឥណ្ឌា និងប្រទេសប៉េរូ។ ប្រទេសដែលមានអ្នកស្លាប់លើសពី20,000នាក់ មានចំនួន6ប្រទេស រួមមាន សហរដ្ឋអាមេរិក អង់គ្លេស អ៊ីតាលី អេស្ប៉ាញ បារាំង និងប្រេស៊ីល៕ ប្រភព៖ សារព័ត៌មានបរទេស

បង្ខាំងខ្លួននៅតែក្នុងផ្ទះ គេចពីកូវីដ-19 ធ្វើឱ្យសិស្សស្រីជប៉ុន “មានផ្ទៃពោះក្នុងវ័យរៀន” កើនឡើងខ្ពស់

May 23, 2020 by សឿន សំណាង

ទប់ស្កាត់មេរោគ តែមិនទប់ស្កាត់ការលូកលាន់ផ្លូវភេទ!! សិស្សស្រីកម្រិតមធ្យមសិក្សាជនជាតិជប៉ុន ដែលបានទទូចសុំការជួយសង្គ្រោះរឿងការមានគភ៌ដោយមិនបានតាំងចិត្ត បានកើនឡើងច្រើនជាប្រវត្តិសាស្ត្រ ដែលគេសន្និដ្ឋានថា ជាផលប៉ះពាល់ដែលបណ្ដាលមកពីការបង្ខាំងខ្លួននៅតែក្នុងផ្ទះ ដើម្បីទប់ស្កាត់មេរោគវីរុសកូរ៉ូណាប្រភេទថ្មី ធ្វើឱ្យមានឱកាសកើតមានភេទសម្ព័ន្ធ រហូតដល់នាំឆ្ពោះទៅរកការតាំងគភ៌ដែលមិនបានត្រៀមខ្លួន។ មន្ទីរពេទ្យជិខេ ក្នុងខេត្តឃូម៉ាម៉ូតុះ មន្ទីរពេទ្យជំនាញខាងសម្ភព រោគស្ត្រី និងកុមារ បានបង្ហើបឱ្យដឹងថា ក្នុងខែមេសាកន្លងទៅ ខាងមន្ទីរពេទ្យបានទទួលការសុំប្រឹក្សារឿងការតាំងគភ៌ដោយមិនបានត្រៀមខ្លួនជាមុន ច្រើនដល់ទៅ 592ករណី ជាចំនួនដែលខ្ពស់បំផុត ចាប់តាំងពីមានការកត់ត្រាស្ថិតិមក។ ក្នុងចំនួននេះ មានសិស្សស្រីក្នុងកម្រិតមធ្យមសិក្សាច្រើនដល់ទៅ 75ករណី ឬ 13% កើនឡើងទ្វេដងកាលពីឆ្នាំមុន ដោយសិស្សស្រីដែលមកសុំការប្រឹក្សារឿងការតាំងគភ៌ទាំងនោះ ជាក្រុមអ្នកដែលមានអាយុទាបជាង 20ឆ្នាំ មានចំនួនច្រើនជាងគេបំផុត។ មន្ទីរពេទ្យជិខេ ក្នុងខេត្តឃូម៉ាម៉ូតុះ បានរៀបចំបង្កើតមជ្ឈមណ្ឌលផ្ដល់ការប្រឹក្សារឿងការតាំងគភ៌ ទាំងតាមរយៈទូរស័ព្ទ និងអ៊ីមេល ពេញ 24ម៉ោង។ មន្ទីរពេទ្យមួយនេះ ត្រូវបានគេស្គាល់ តាមរយៈការបង្កើត “ទូទទួលទារកដែលបោះចោល” ដែលស្ត្រីក្មេងៗដែលតាំងគភ៌ដោយគ្មានចេតនា បាននាំយកទារកមកប្រគល់ឱ្យខាងមន្ទីរពេទ្យដោយមិនចាំបាច់បង្ហាញខ្លួន ដើម្បីស្វែងរកអ្នកមានបំណងយកទៅចិញ្ចឹមបន្ត។ មន្ត្រីរបស់មន្ទីរពេទ្យបានបញ្ជាក់ថា តាំងពីបើកមជ្ឈមណ្ឌលផ្ដល់ការប្រឹក្សាកាលពីឆ្នាំ2007 មក ឆ្នាំនេះមានសិស្សស្រីក្មេងៗ មកសុំការជួយសង្គ្រោះច្រើនជាប្រវត្តិសាស្ត្រ ធ្វើគេសន្និដ្ឋានថា វាជាលទ្ធផលដែលបណ្ដាលមកពីការប្រកាសសភាវអាសន្ននៃជំងឺកូវីដ-19 ធ្វើឱ្យប្រជាជនត្រូវនៅតែក្នុងផ្ទះ ដែលជាឱកាសធ្វើឱ្យបណ្ដាយុវវ័យប្រុស-ស្រី … Read more

បំបាក់មុខលោកត្រាំ!! លទ្ធផលស្រាវជ្រាវ រកឃើញថា ការប្រើថ្នាំគ្រុនចាញ់ការពារកូវីដ-19 តាមការអះអាងរបស់លោកត្រាំ រឹតតែបន្ថែមគ្រោះថ្នាក់ដល់ស្លាប់…

May 23, 2020 by សឿន សំណាង

រកឃើញហាយដ្រុកស៊ីក្លូរ៉ូគីន ថ្នាំព្យាបាលជំងឺគ្រុនចាញ់ ដែលបានអួតអាងដោយលោកប្រធានាធិបតីនៃសហរដ្ឋអាមេរិក ដូណាល់ ត្រាំ ថា អាចការពារមេរោគវីរុសកូរ៉ូណាប្រភេទថ្មី ឬកូវីដ-19បាន និងថែមទាំងប្រាប់ថា លោកបានប្រើវាជាប្រចាំ និងណែនាំឱ្យអ្នកឯទៀតធ្វើតាមដែរនោះ មានចំណែកបន្ថែមភាពប្រថុយប្រថានក្នុងការស្លាប់នៅលើអ្នកជំងឺកូវីដ-19 ដែលកំពុងសម្រាកព្យាបាលនៅក្នុងមន្ទីរពេទ្យ។ នេះបើតាមរយៈការបង្ហាញពីលទ្ធផលនៃការសិក្សាស្រាវជ្រាវមួយដែលបានបោះពុម្ពផ្សាយនៅក្នុងព្រឹត្តិបត្រវេជ្ជសាស្ត្រ Lancet។ នៅក្នុងការសិក្សាស្រាវជ្រាវដែលសង្កេតឃើញអាការអ្នកជំងឺកូវីដ-19 ដែលគេងសម្រាកព្យាបាលនៅក្នុងមន្ទីរពេទ្យ ចំនួន 96,000 បានរកឃើញថា ក្រុមអ្នកជំងឺដែលបានទទួលថ្នាំហាយដ្រុកស៊ីក្លូរ៉ូគីន(HydroxyChloriquine) ឬក្លូរ៉ូគីន(Chloriquine) មានភាពប្រថុយប្រថាននឹងការស្លាប់ ខ្ពស់ជាងអ្នកជំងឺដែលមិនបានទទួលថ្នាំនេះ។ អ្នកសរសេរអត្ថបទនេះផ្សាយនៅក្នុងព្រឹត្តិបត្រខាងលើ បានបញ្ជាក់ថា ពួកគេមិនអាចអះអាងបានថា លទ្ធផលពីការប្រើថ្នាំមួយនេះ នឹងមានប្រយោជន៍ណាមួយចំពោះអ្នកជំងឺវីរុសកូរ៉ូណាប្រភេទថ្មីនេះឡើយ ដូច្នេះហើយទើប “ការអះអាងយ៉ាងបន្ទាន់តាមរយៈការសាកល្បងខាងការព្យាបាល(ឬគ្លីនិក)បែបព្រាវៗ មានភាពចាំបាច់” តម្រូវការថ្នាំហាយដ្រុកស៊ីក្លូរ៉ូគីន បានកើនឡើងខ្ពស់បំផុត ខុសពីអំឡុងច្រើនទសវត្សរ៍មុនៗ ក្រោយពីលោកត្រាំ បានជំរុញដដែលជាដដែល ឱ្យប្រើថ្នាំមួយនេះ ដើម្បីការពារវីរុសកូរ៉ូណាប្រភេទថ្មី ព្រមទាំងបង្ខំប្រជាជនឱ្យសាកល្បងប្រើថ្នាំមួយនេះទៀតផង។ កាលពីអំឡុងពេលចុងសប្ដាហ៍កន្លងទៅ លោកត្រាំបានប្រាប់ថា លោកបានប្រើថ្នាំហាយដ្រុកស៊ីក្លូរ៉ូគីន ក្នុងឋានៈជាថ្នាំការពារ ទោះជាគ្មានភ័ស្តុតាងខាងវិទ្យាសាស្ត្រអះអាងថា ថ្នាំមួយនេះ អាចការពារមេរោគកូវីដ-19បានក៏ដោយ។ លោកត្រាំ បានអះអាងថា ក្រោយពីបានប្រឹក្សាជាមួយវេជ្ជបណ្ឌិតប្រចាំសេតវិមានហើយ លោកក៏ចាប់ផ្ដើមញ៉ាំថ្នាំហាយដ្រុកស៊ីក្លូរ៉ូគីន ជាប្រចាំរៀងរាល់ថ្ងៃ អស់រយៈ 2-3សប្ដាហ៍មកហើយ ព្រមទាំងបានអះអាងទៀតថា … Read more

នាយកធនាគារម្នាក់ រួចផុតពីការស្លាប់ក្នុងករណីធ្លាក់យន្តហោះនៅប៉ាគីស្ថាន

May 23, 2020 by សឿន សំណាង

នាយកធនាគារ និងអ្នកដំណើរម្នាក់ទៀតបានរួចផុតពីការស្លាប់ដ៏អស្ចារ្យ នៅក្នុងករណីធ្លាក់យន្តហោះដឹកអ្នកដំណើរមួយគ្រឿងរបស់ប៉ាគីស្ថាន។ លោក Zafar Masood ដែលជាគនាយកធនាគារខេត្ត Punjab នៅប្រទេសប៉ាគីស្ថាន ត្រូវបានរំដោះខ្លួនចេញពីកន្លែងកើតហេតុភ្លាមៗ និងបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ បន្ទាប់ពីយន្តហោះមួយគ្រឿងរបស់ក្រុមហ៊ុនអាកាសចរណ៍អន្តរជាតិប៉ាគីស្ថាន PIA (Pakistan International Airlines) បានធ្លាក់ទៅលើទីក្រុងការ៉ាជី (Karachi)កាលពីម្សិលមិញ។ “សូមអរគុណច្រើនដល់អ្នករាល់គ្នា។ ទេវតាមានមេត្តាចំពោះខ្ញុំ” Zafar Masood ថ្លែងបែបនេះចំពោះក្រុមមន្ត្រីដែលបានមកសួរសុខទុក្ខគាត់នៅក្នុងមន្ទីរពេទ្យ។ យន្តហោះមានស្លាកលេខ PK 8303 ដែលបានហោះចេញពី Lahore ឆ្ពោះទៅកាន់ព្រលានយន្តហោះ Jinnah ក្នុងទីក្រុង ការ៉ាជី និងមានដឹកអ្នកដំណើរជិត100នាក់ បានធ្លាក់ទៅលើទីប្រជុំជនក្បែរអាកាសយានដ្ឋាន។ ភាគីក្រុមហ៊ុន PIA សង្ស័យថា គ្រោះថ្នាក់នេះបណ្ដាលមកពីកំហុសបច្ចេកទេស។ ក្រុមមន្ត្រីរដ្ឋាភិបាលប៉ាគីស្ថានបានឱ្យដឹងថា មនុស្ស2នាក់នៅមានជីវិតក្នុងហេតុការណ៍ធ្លាក់យន្តហោះនេះ ខណៈដែលទូរទស្សន៍ក្នុងស្រុកផ្សាយថា មានមនុស្ស3នាក់បានរួចផុតពីការស្លាប់ ដោយពួកគេសុទ្ធតែអង្គុយនៅផ្នែកខាងមុខរបស់យន្តហោះ៕

វីដេអូស្ដែងៗបង្ហាញពីការធ្លាក់យន្តហោះនៅប៉ាគីស្ថាន ដែលបានសម្លាប់មនុស្សប្រមាណ100នាក់! 2នាក់នៅមានជីវិត

May 23, 2020 by សឿន សំណាង

យន្តហោះដឹកអ្នកដំណើររបស់ក្រុមហ៊ុនអាកាសចរណ៍អន្តរជាតិប៉ាគីស្ថានមួយគ្រឿងដែលដឹកមនុស្សជាង100នាក់ បានធ្លាក់នៅក្នុងតំបន់ប្រជុំជនក្នុងទីក្រុងការ៉ាជី ភាគខាងត្បូងប្រទេសប៉ាគីស្ថាន កាលពីល្ងាចម្សិលមិញ។ “យន្តហោះដែលមានស្លាកលេខPK 8303 ដឹកអ្នកដំណើរ91នាក់ និងអ្នកសមាជិកក្រុមហោះហើរចំនួន7នាក់បានចាកចេញពី Lahore និងបានបាត់ទំនាក់ទំនងជាមួយមជ្ឈមណ្ដលគ្រប់គ្រងអាកាសចរណ៍ចាប់ពីម៉ោង14និង30នាទី” នេះបើតាម Abdullah Hafeez អ្នកនាំពាក្យរបស់ក្រុមហ៊ុនអាកាសចរណ៍អន្តរជាតិប៉ាគីស្ថាន PIA។ យន្តហោះ Airbus A320 ដែលបានធ្វើសកម្មភាពអស់រយៈពេល15ឆ្នាំមកនេះ បានធ្លាក់និងបុកចំតំបន់ប្រជុំជនមួយនៅក្បែរអាកាសយានដ្ឋាន Jinnah បង្កើតឱ្យមានការផ្ទុះឆេះ និងផ្សែងយ៉ាងខ្មួលខ្មាញ់។ អ្នកដែលបានរួចផុតពីការស្លាប់ក្នុងហេតុការណ៍គ្រោះថ្នាក់នេះមានចំនួនយ៉ាងតិច2នាក់ នេះបើតាមការឱ្យពី Syed Nasir Hussain Shah អ្នកគ្រប់គ្រងស្ថាប័នព័ត៌មានរបស់ខេត្ត Sindh។ អភិបាលក្រុងការ៉ាជីមុននេះយល់ថា “នឹងមិនមានអ្នកណានៅរស់” នោះទេ ក្នុងគ្រោះថ្នាក់ធ្លាក់យន្តហោះនេះ៕ ប្រភព៖ សារព័ត៌មានបរទេស

រកឃើញកាឡាក់ស៊ីមួយដែលមានអាយុកាលចាស់ជាងគេបង្អស់ក្នុងចក្រវាល(វីដេអូ)

May 22, 2020 by សឿន សំណាង

ក្រុមអ្នកវិទ្យាសាស្ត្រទើបតែបានរកឃើញកាឡាក់ស៊ីដែលមានរូបរាងដូចថាសមួយ និងមានចម្ងាយពីផែនដីប្រមាណជា12.5ពាន់លានឆ្នាំពន្លឺ ដែលនេះជិតស្មើនឹងសម័យដំបូងនៃការកកើតចក្រវាល។ នៅក្នុងលម្ហអវកាសដែលមានអាយុកាល13.8ពាន់លានឆ្នាំពន្លឺ កាឡាក់ស៊ីស្ទើរតែទាំងអស់បានកកើតឡើងបន្តិចម្ដងៗក្នុងរយៈពេលរាប់ពាន់លានឆ្នាំ និងបានពង្រីកមាឌរហូតដូចបច្ចុប្បន្ន គឺវាហាក់បានហួសពេលបន្តិចហើយ។ ឧទាហរណ៍ដូចជា កាឡាក់ស៊ី Milky Way របស់មនុស្ស វាបានឆ្លងកាត់ព្រឹត្តិការណ៍ “ច្របាច់បញ្ចូលគ្នា” ជាច្រើនលើកមកហើយក្នុងរយៈពេល6ពាន់លានឆ្នាំដំបូងរាប់ចាប់ពីការផ្ទុះ Big Bang (Big Bang គឺជាព្រឹត្តិការណ៍ផ្ទុះដ៏មហិមាក្នុងលម្ហអវកាស ដែលជាយុគសម័យដំបូងបំផុតនៃការចាប់កំណើតរបស់ចក្រវាល)។ ក៏ប៉ុន្តែ របកគំហើញថ្មីមួយត្រូវបានធ្វើឡើងនៅឯ Atacama Large Millimiter Array (ALMA) ដែលជាស្ថានីយសង្កេតតារាដោយរលកវិទ្យុធំបំផុតក្នុងពិភពលោក ក្នុងប្រទេសឈីលី បានធ្វើឱ្យរបកគំហើញកាលពីអតីតកាលស្ដីអំពីការចាប់់កំណើតរបស់កាឡាក់ស៊ី ហាក់ងាកចេញពីភាពជាក់ស្ដែងបន្តិច។ នៅក្នុងរបាយការណ៍ដែលត្រូវបានចុះផ្សាយនៅលើទស្សនាវដ្ដី Nature កាលពីថ្ងៃទី20ឧសភាកន្លងទៅ ក្រុមអ្នកវិទ្យាសាស្ត្របានឱ្យដឹងថា ពួកគេបានរកឃើញកាឡាក់ស៊ីមួយដែលមានរូបរាងដូចថាស និងត្រូវបានដាក់ឈ្មោះឱ្យថា DLA0817g ឬ Wolfe Disk ដែលវាបានចាប់កំណើតតាំងពីដំណាក់កាលដំបូងនៃការចាប់កំណើតរបស់ចក្រវាល។ “ដោយមាន ALMA ពេលនេះយើងរកឃើញភ័ស្ដុតាងយ៉ាងច្បាស់ដែលបង្ហាញថា កាឡាក់ស៊ី DLA0817g មានវត្តមានតាំងពី 1.5ពាន់លានឆ្នាំមុន បន្ទាប់ពីការផ្ទុះ Big Bang” នេះបើតាម Marcel … Read more

ដោយសារអ្នកដំណើរពីកម្ពុជាម្នាក់ក្ដៅខ្លួន! វៀតណាមដាក់បម្រាមគោចរចំណតរថយន្តមួយ ពេញមួយយប់

May 22, 2020 by សឿន សំណាង

ដោយសារអ្នកដំណើរពីកម្ពុជាម្នាក់ក្ដៅខ្លួន! វៀតណាមដាក់បម្រាមគោចរចំណតរថយន្តពេញមួយយប់

បុរសម្នាក់ដែលធ្វើដំណើរពីកម្ពុជា ត្រឡប់ទៅកាន់ខេត្ត Hau Giang ប្រទេសវៀតណាម បានបង្ហាញអាការក្ដៅខ្លួន និងក្អក ប៉ុន្តែមិនទាន់ត្រូវបានធ្វើតេស្តរកមេរោគនៅឡើយ ដូច្នេះ នៅយប់មិញនេះ សមត្ថកិច្ចវៀតណាមបានដាក់កម្លាំងនគរបាលដើម្បីហាមឃាត់មិនឱ្យមានការចេញចូលនៅចំណតរថយន្តមួយដែលបុរសនេះកំពុងស្ថិតនៅ។ កាលពីព្រឹកមិញនេះ(22ឧសភា) សមត្ថកិច្ចគ្រប់គ្រង COVID-19 នៅទីក្រុង Can Tho និងខេត្ត Hau Giang ប្រទេសវៀតណាមបានឱ្យដឹងថា បានស្រាវជ្រាវរកឃើញអ្នករួមដំណើរជាមួយបុរសដែលវិលត្រឡប់ពីកម្ពុជានេះហើយ ដោយពួកគេកំពុងត្រូវបានដាក់ឱ្យនៅដោយឡែកក្នុងខេត្ត Hau Giang ភាគខាងត្បូងប្រទេសវៀតណាម។ មុននោះ ដោយសារតែឃើញបុរសនេះចូលមកវៀតណាមដោយមិនទាន់ទទួលបានការពិនិត្យសុខភាព និងសង្ស័យថាអាចមានផ្ទុកវីរុសCOVID-19 សមត្ថកិច្ចចម្រុះរបស់វៀតណាមក៏បានធ្វើការដាក់បុរសនេះ រួមនឹងអ្នកបើកបររថយន្ត និងអ្នករួមដំណើរទាំងអស់ ឱ្យនៅដាច់ដោយឡែក។ រហូតដល់ម៉ោង1និង30នាទីរំលងអធ្រាត្រនៃថ្ងៃទី22ឧសភានេះ ក្រុមគ្រូពេទ្យបានយកវត្ថុវិភាគពីបុរសខាងលើ និងធ្វើការពិសោធជាបន្ទាន់។ មកដល់ពេលនេះ សមត្ថកិច្ចចម្រុះរបស់វៀតណាម បានដកបម្រាមគោចរនៅចំណតរថយន្តខាងលើនោះហើយ បន្ទាប់ពីបានធ្វើតេស្តបង្ហាញថា បុរសនោះអវិជ្ជមានជាមួយនឹងវីរុសCOVID-19៕ ប្រភព៖ សារព័ត៌មានវៀតណាម

កូនស្រីរបស់ស្ថាបនិកក្រុមហ៊ុនចិន Huawei អាចត្រូវបានដោះលែងនៅសប្ដាហ៍ក្រោយ

May 22, 2020 by សឿន សំណាង

កូនស្រីរបស់ស្ថាបនិកក្រុមហ៊ុន Huawei អាចត្រូវបានដោះលែងនៅសប្ដាហ៍ក្រោយ

តុលាការកាណាដានឹងចេញសាលក្រមនៅសប្ដាហ៍ក្រោយទាក់ទងនឹងបញ្ហាដែលថា គួរតែបញ្ជូនខ្លួននាយិកាផ្នែកហិរញ្ញវត្ថុរបស់ក្រុមហ៊ុន Huawei គឺអ្នកស្រី Meng Wanzhou ទៅកាន់ទឹកដីអាមេរិកតាមសំណើពីអាមេរិកាំងដែរ ឬយ៉ាងណា។ យោងតាមសារព័ត៌មាន South China Morning Post អ្នកស្រី Heather Holmes ដែលជាអនុប្រធានតុលាការកំពូលនៃខេត្ត British Columbia របស់ប្រទេសកាដាណា នៅថ្ងៃទី22នេះ បានឱ្យដឹងថា តុលាការនេះនឹងសម្រេចប្រកាសសាលក្រមលើរឿងក្ដីរបស់អ្នកស្រី Meng Wanzhou ដែលជានាយិកាហិរញ្ញវត្ថុរបស់ក្រុមហ៊ុនចិន Huawei នៅថ្ងៃទី27ឧសភាខាងមុខ ហើយអ្នកស្រី Meng Wanzhou ប្រហែលជាអាចត្រូវបានដោះលែងឱ្យមានសេរីភាព។ សាលក្រមតុលាការខេត្ត British Columbia របស់កាដាណានឹងសម្រេចថា តើអ្នកស្រី Meng Wanzhou បានប្រព្រឹត្តបទល្មើសចំនួនពីរដែរ ឬយ៉ាងណា ពោលគឺមានន័យថា អ្នកស្រីនឹងត្រូវបានបញ្ជូនទៅកាន់សហរដ្ឋអាមេរិក បើសិនជាត្រូវបានថ្កោលទោសទាំងនៅកាណាដា ទាំងនៅសហរដ្ឋអាមេរិក។ បើសិនជាអនុប្រធានតុលាការកំពូលនៃខេត្ត British Columbia សម្រចចិត្តចេញសាលក្រមបញ្ជាក់ថា អ្នកស្រី Meng Wanzhou មិនបានប្រព្រឹត្តខុសច្បាប់សហរដ្ឋអាមេរិកនោះទេ អ្នកស្រី Wanzhou … Read more

ខឹងរុស្ស៊ីមិនឱ្យឈ្លបយកការណ៍ Trump ដកអាមេរិកចេញពីសន្ធិសញ្ញា “បើកចំហជើងមេឃ”! NATO នឹងបើកកិច្ចប្រជុំបន្ទាន់នៅថ្ងៃនេះ

May 22, 2020 by សឿន សំណាង

ខឹងរុស្ស៊ីមិនឱ្យឈ្លបយកការណ៍ Trump ដកខ្លួនចេញពីសន្ធិសញ្ញា "បើកចំហជើងមេឃ"! NATO នឹងបើកកិច្ចប្រជុំបន្ទាន់នៅថ្ងៃនេះ

ប្រធានាធិបតីអាមេរិកាំង លោក Donald Trump បានប្រកាសថា សហរដ្ឋអាមេរិកនឹងចាកចេញពីសន្ធិសញ្ញា Open Skies Treaty (បើកចំហជើងមេឃ) ដែលត្រូវបានចុះហត្ថលេខាដោយប្រទេសចំនួន34 ដោយមូលហេតុថា រុស្ស៊ីបានរំលោភជាច្រើនដងលើសន្ធិសញ្ញានេះ។ មន្ត្រីនៅសេតវិមានបានឱ្យដឹងថា ដំណើរការនៃការចាកចេញពីសន្ធិសញ្ញានេះនឹងត្រូវបានធ្វើឡើងរួចរាល់ក្នុងរយៈពេល6ខែទៅមុខទៀត ប៉ុន្តែ ប្រធានាធិបតីអាមេរិកាំងនៅតែទុកផ្លូវសម្រាប់ការវិលត្រឡប់មកវិញ។ លោក Donald Trump បានប្រាប់អ្នកយកព័ត៌មានកាលពីម្សិលមិញ (21ឧសភា) ថា “ខ្ញុំយល់ថា យើងមានទំនាក់ទំនងល្អជាមួយរុស្ស៊ី ក៏ប៉ុន្តែពួកគេមិនគោរពតាមកិច្ចព្រមព្រៀងនេះទេ។ យើងនឹងដកខ្លួនចេញពីសន្ធិសញ្ញា រហូតដល់ពួកគេគោរពអនុវត្តតាមវា (សន្ធិសញ្ញា)”។ សន្ធិសញ្ញា “បើកចំហជើងមេឃ” (Open Skies Treaty) ត្រូវបានចុះហត្ថលេខាដោយសហរដ្ឋអាមេរិក រុស្ស៊ី និងបណ្ដាប្រទេសមួយចំនួននៅអឺរ៉ុបកាលពីឆ្នាំ1992 និងមានសុពលភាពចាប់ពីឆ្នាំ2002។ សន្ធិសញ្ញានេះ ត្រូវបានបង្កើតឡើងដើម្បីធ្វើឱ្យមានតម្លាភាពអំពីសកម្មភាពយោធារបស់បណ្ដាប្រទេស។ យោងតាមកិច្ចព្រមព្រៀងនេះ ប្រទេសចំនួន35ដែលជាហត្ថាលេខី អាចធ្វើការឈ្លបយកការណ៍នៅលើដែនអាកាសរវាងគ្នានឹងគ្នា ប៉ុន្តែត្រូវរាយការណ៍ប្រាប់ប្រទេសជាម្ចាស់ផ្ទះឱ្យបាន72ម៉ោង មុននឹងធ្វើសកម្មភាព ដើម្បីឱ្យប្រទេសជាម្ចាស់ផ្ទះមានពេលប្រតិកម្មឆ្លើយតប។ ការចាកចេញពីសន្ធិសញ្ញាខាងលើនេះ ត្រូវបានលើកឡើងបន្ទាប់ពីការវាយតម្លៃរយៈពេល6ខែ ក្នុងនោះរដ្ឋាភិបាលរបស់លោក Trump បានចោទភាគីរុស្ស៊ីថា បានរំលោភកិច្ចព្រមព្រៀងជាបន្តបន្ទាប់ ដូចជាការរារាំងយន្តហោះរបស់សហរដ្ឋអាមេរិកមិនឱ្យចូលក្នុងដែនអាកាស Gruzia និងដែនដី … Read more

មនុស្សជិត334,000នាក់បានស្លាប់ដោយសារ COVID-19 នៅទូទាំងពិភពលោក

May 22, 2020 by សឿន សំណាង

ចំនួនអ្នកស្លាប់បានកើនដល់ជិត334,000នាក់ ក្នុងចំណោមអ្នកជំងឺ COVID-19 ជិត5.2លាននាក់នៅទូទាំងសកលលោក។ យោងតាមស្ថិតិរបស់ Worldometer ប្រទេសនិងដែនដីចំនួន213ក្នុងពិភពលោក ត្រូវបានរាយការណ៍ថា បានរកឃើញអ្នកផ្ទុកវីរុសកូរ៉ូណាសរុប 5,187,046នាក់ និងអ្នកស្លាប់333,987នាក់ ក្នុងនោះមានអ្នកជំងឺថ្មី111,043នាក់ និងអ្នកស្លាប់ថ្មី4,875នាក់ដែលត្រូវបានរកឃើញក្នុងរយៈពេល24ម៉ោងចុងក្រោយនេះ។ ទ្វីបដែលមានអ្នកជំងឺ COVID-19 ច្រើនជាងគេគឺទ្វីបអាមេរិក ដោយមានអ្នកជំងឺសរុប2,342,459នាក់ ក្នុងនោះអាមេរិកខាងជើងមាន1,794,669នាក់ អាមេរិកខាងត្បូងមាន547,790នាក់ ខណៈដែលអឺរ៉ុបមាន1,848,322នាក់ អាស៊ីមាន887,218នាក់ និងអាហ្វ្រិកមាន101,683នាក់។ ប្រទេសចំនួន3ដែលមានអ្នកជំងឺ COVID-19 ច្រើនជាង300,000នាក់ រួមមានសហរដ្ឋអាមេរិក រុស្ស៊ី និងប្រេស៊ីល។ ចំណែកប្រទេសដែលមានអ្នកស្លាប់ដោយសារវីរុសកូរ៉ូណាច្រើនជាង30,000នាក់ ក៏មានចំនួន3ប្រទេស គឺសហរដ្ឋអាមេរិក អង់គ្លេស និងអ៊ីតាលី។ នៅអាស៊ីអាគ្នេយ៍ ប្រទេសសិង្ហបុរី គឺជាសម្បុកមេរោគCOVID-19 ធំជាងគេបង្អស់ ដោយមានអ្នកជំងឺសរុប 29.812 នាក់ និងអ្នកស្លាប់23នាក់៕ ប្រភព៖ សារព័ត៌មានបរទេស