អន្តរជាតិ - La Reine Media

ស្ថានភាព Covid-19 នៅកម្ពុជា និងពិភពលោក សម្រាប់ថ្ងៃទី 30ធ្នូ 2020

ពិភពលោកបានរកឃើញអ្នកឆ្លងវីរុស Covid-19 សរុបជាង 82,291,830 នាក់ ក្នុងនោះកម្ពុជាមាន 364 ករណី។

គិតមកដល់ព្រឹកថ្ងៃទី 30 ខែធ្នូ ឆ្នាំ 2020 នេះ កម្ពុជាបានធ្វើតេស្តរកឃើញអ្នកវិជ្ជមាននឹង Covid-19 សរុបចំនួន 364 នាក់ ក្នុងនោះមាន 361 នាក់បានជាសះស្បើយ និង 3 នាក់កំពុងសម្រាកព្យាបាលនៅមន្ទីរពេទ្យ។ លទ្ធផលនៃការធ្វើតេស្តកាលពីថ្ងៃទី 29 ខែធ្នូ បានបង្ហាញថា ពុំមានករណីឆ្លងថ្មីនោះទេ ប៉ុន្តែ មានអ្នកជាសះស្បើយចំនួន 1 នាក់បន្ថែមទៀត។ កម្ពុជាពុំទាន់មានករណីបាត់បង់ជីវិតដោយសារការឆ្លងវីរុស Covid-19 នៅឡើយ។

នៅទូទាំងពិភពលោកឯណោះវិញ គិតត្រឹមព្រឹកនេះដែរ មានអ្នកវិជ្ជមានសរុបចំនួន 82,291,833 នាក់ ក្នុងនោះមានអ្នកជំងឺ 1,795,172 នាក់បានស្លាប់ និង58,311,965 នាក់បានជាសះស្បើយ ខណៈដែលអ្នកជំងឺ 105,936 នាក់កំពុងមានអាការធ្ងន់ធ្ងរនៅក្នុងចំណោមអ្នកជំងឺទាំង 22,184,696 នាក់ ដែលកំពុងសម្រាកព្យាបាល។

ប្រទេសដែលមានអ្នកជំងឺ Covid-19 លើសពី 1 លាននាក់ មានចំនួន 18 ប្រទេស រួមមាន សហរដ្ឋអាមេរិក ឥណ្ឌា ប្រេស៊ីល រុស្ស៊ី បារាំង អង់គ្លេស ទួរគី អ៊ីតាលី អេស្ប៉ាញ អាល្លីម៉ង់ កូឡុំប៊ី អាហ្សង់ទីន ម៉ិកស៊ិក ប៉ូឡូញ អ៊ីរ៉ង់ អ៊ុយក្រែន អាហ្វ្រិកខាងត្បូង និងប្រទេសប៉េរូ៕

ប្រភព៖ ក្រសួងសុខាភិបាលកម្ពុជា, Worldometers

December 30, 2020

ជនសង្ស័យក្នុងករណីបំផ្ទុះគ្រាប់បែកនៅ Nashville «ចង់ឱ្យពិភពលោកចងចាំខ្លួន»

រហូតដល់គ្រាប់បែកបានផ្ទុះឡើងនៅកណ្ដាលទីក្រុង Nashville កាលពីព្រឹកនៃទិវាបុណ្យណូអែល ទើប Laude យល់អំពីគំនិតដែលបង្កប់ដោយអាថ៌កំបាំងនៅពីក្រោយសម្ដីរបស់អ្នកជិតខាងដែលមានឈ្មោះថា Warner។

Rick Laude កាលពីថ្ងៃទី 28 ខែធ្នូ បាននិយាយថា ខ្លួនមានការភ្ញាក់ផ្អើលជាខ្លាំងនៅពេលបានដឹងថា អ្នកជិតខាងរបស់ខ្លួនដែលមានឈ្មោះថា Anthony Quinn Warner គឺជាជនសង្ស័យនៅក្នុងករណីបំផ្ទុះគ្រាប់បែកអត្តឃាតនៅក្នុងទីក្រុង Nashville រដ្ឋ Tennessee សហរដ្ឋអាមេរិក កាលពីចុងសប្ដាហ៍មុន ដែលបណ្ដាលឱ្យមនុស្ស 3 នាក់រងរបួស និងអគាររាប់សិបត្រូវរងការខូចខាត។

Laude បានឱ្យដឹងថា កាលពីជិតមួយសប្ដាហ៍មុនថ្ងៃបុណ្យណូអែល លោកបានឃើញ Warner ឈរខាងមុខប្រអបសំបុត្រ ហើយ Laude ក៏បានឈប់រថយន្ត ដើម្បីនិយាយគ្នាលេង។ ក្រោយពីសួរសុខទុក្ខម្ដាយរបស់ Warner លោក Laude ក៏បានសួរថា៖ «តើតាណូអែលបាននាំយកពរល្អៗជូនលោកនៅក្នុងឱកាសបុណ្យគ្រិស្តម៉ាសនេះដែរទេ?»។

លោក Warner សើច រួចនិយាយថា៖ «អូ! ពិតណាស់ Nashville និងពិភពលោកទាំងមូលនឹងមិនភ្លេចខ្ញុំទេ។ ហើយក៏មិនមានសញ្ញាណាមួយបង្ហាញថា Warner កំពុងគំរាមកំហែងនោះដែរ» Laude រៀបរាប់។

យោងតាម Laude លោក Warner ពេលខ្លះមិនបានឆ្លើយតបនៅពេលលោក និងអ្នកជិតខាងលើកដៃស្វាគមន៍នោះដែរ ប៉ុន្តែ Laude មិនបានវាយតម្លៃចំពោះប្រការនេះទេ។ «ខ្ញុំដឹងថា គាត់គឺជាមនុស្សដែលរស់នៅដោយការលាក់បាំង»។

ករណីផ្ទុះកាលពីថ្ងៃទី 25 ខែធ្នូ បានធ្វើឱ្យកក្រើកទីក្រុង Nashville ដែលជា «មជ្ឈមណ្ឌល» នៃវិស័យសិល្បចម្រៀងស្រុកស្រែរបស់សហរដ្ឋអាមេរិក ក្រោយពីរថយន្តបែប picnic មួយគ្រឿងដែលកំពុងចតនៅក្បែរផ្លូវ បន្លឺសំឡេងប្រកាសអាសន្នឱ្យគ្រប់គ្នាជម្លៀសខ្លួន ដោយព្រមានថា រថយន្តនឹងផ្ទុះនៅបន្តិចទៀតនេះ។

សមត្ថកិច្ចបានរកឃើញ DNA នៃបំណែកសាកសពនៅក្នុងកន្លែងកើតហេតុ និងពិនិត្យឃើញថា វាដូចទៅនឹង DNA របស់ Anthony Quinn Warner។ ប្រការនេះបានជួយបញ្ជាក់បន្ថែមទៅលើការសង្ស័យមុននេះថា Warner អាចជាអ្នកបំផ្ទុះគ្រាប់បែកអត្តឃាត។ ក៏ប៉ុន្តែ សមត្ថកិច្ចនៅតែមិនទាន់ដឹងអំពីគោលបំណងពិតប្រាកដរបស់ជនសង្ស័យ Warner នៅឡើយ។ សមត្ថកិច្ចកំពុងបន្តការស្រាវជ្រាវស៊ីជម្រៅបន្ថែមទៀត។

កាលពីពេលកន្លងទៅថ្មីៗនេះ Warner បានជូនអំណោយជារថយន្ត និងនិយាយប្រាប់អ្នកទទួលថា គាត់ត្រូវបានគ្រូពេទ្យពិនិត្យឃើញថា មានរោគមហារីក។ Warner ក៏បានជូនអំណោយជាផ្ទុះមួយខ្នងនៅជាយក្រុងដល់ស្ត្រីម្នាក់នៅ Los Angeles កាលពីមួយខែមុនការបំផ្ទុះគ្រាប់បែក។ គាត់បានរស់នៅក្នុងផ្ទះនេះអស់រយៈពេលជាច្រើនទសវត្សរ៍មកហើយ។

Warner ធ្លាប់ជាអ្នកឯកទេសខាងកុំព្យូទ័រ ដែលធ្វើការឱ្យក្រុមហ៊ុនអចលនទ្រព្យមួយ ប៉ុន្តែ បានសុំឈប់កាលពីដើមខែនេះ។ បុរសនេះក៏ធ្លាប់ត្រូវបានចាប់ខ្លួនកាលពីឆ្នាំ 1978 ទាក់ទិននឹងរឿងកញ្ឆា។

ប្រធានាធិបតីជាប់ឆ្នោត លោក Joe Biden បានហៅការណីបំផ្ទុះគ្រាប់បែកនេះថា ជា «ការរំលឹកអំពីកម្លាំងបំផ្លាញដែលបុគ្គលមួយរូប ឬក្រុមតូចមួយអាចធ្វើបាន ខណៈដែលលោក Trump មិនបានបញ្ចេញមតិជាសាធារណៈ ប៉ុន្តែបានពិភាក្សាជាមួយអភិបាលរដ្ឋ Tennessee លោក Bill Lee និងស្នើឱ្យមានជំនួយជាបន្ទាន់៕

ប្រភព៖ AP

December 29, 2020

លិចកប៉ាល់ដឹកមនុស្ស 19នាក់នៅកណ្ដាលសមុទ្រ សង្ស័យថា មកពីទឹកកក

កប៉ាល់នេសាទត្រី Onega បានលិចនៅក្នុងសមុទ្រ Barents បណ្ដាលឱ្យមនុស្ស 19 នាក់បាត់ខ្លួន និង 2 នាក់ទៀតត្រូវបានសង្គ្រោះដោយកប៉ាល់មួយនៅក្បែរនោះ។

ក្រសួងកិច្ចការបន្ទាន់របស់រុស្ស៊ី (Ministry of Emergency Situations of the Russian Federation) ថ្ងៃនេះ (28 ធ្នូ) បានឱ្យដឹងថា កប៉ាល់នេសាទត្រីឯកជនដែលមានឈ្មោះថា Onega បានលិចនៅវេលាម៉ោង 7កន្លះ (ម៉ោង 11កន្លះនៅភ្នំពេញ) នៅក្បែរប្រជុំកោះ Novaya Zemlya។

«នាវិករបស់កប៉ាល់នេះ មានចំនួន 19 នាក់។ 2 នាក់ត្រូវបានជួយសង្គ្រោះទាន់ពេល» ខណៈដែល 17 នាក់ផ្សេងទៀតបានបាត់ខ្លួន នេះបើតាមក្រសួងខាងលើ។ ក្នុងចំណោមនាវិក 2 រូបដែលរួចផុតពីការស្លាប់នោះ មានម្នាក់ជាអ្នកដឹកនាំកប៉ាល់ និងម្នាក់ជាបុគ្គលិកធម្មតារបស់ Onega។

ក្រុមមន្ត្រីរុស្ស៊ីជឿថា ទឹកកកដែលកកនៅលើកប៉ាល់គឺជាមូលហេតុដែលនាំឱ្យមានហេតុការណ៍លិចកើតឡើង។ បច្ចុប្បន្ន ប្រតិបត្តិការជួយសង្គ្រោះកំពុងត្រូវបានធ្វើឡើងដោយមានការចូលរួមរបស់កប៉ាល់ចំនួន 5 គ្រឿង។ ចំណែកយន្តហោះ ឬឧទ្ធម្ភាគចក្រវិញ មិនអាចចូលរួមសង្គ្រោះបាន ដោយសារអាកាសធាតុមិនអំណោយផល។

ប្រភពព័ត៌មានរបស់កាសែតរុស្ស៊ី TASS ឱ្យដឹងថា អាកាសធាតុត្រជាក់ខ្លាំងធ្វើឱ្យដងខ្លួនរបស់កប៉ាល់ Onega ត្រូវជាប់ពេញដោយទឹកកកយ៉ាងក្រាស់។ នៅក្បែរប្រជុំកោះ Novaya Zemlya សីតុណ្ហភាពធ្លាក់ចុះដល់ 0អង្សាសេ ដែលនេះមានន័យថា ទឹកភ្លៀងនឹងកកជាទឹកកកនៅពេលវាស្ថិតនៅលើវត្ថុអ្វីមួយ។

ប្រភពព័ត៌មានមួយរបស់ Interfax និយាយថា ក្រុមនាវិកត្រូវបានទឹកគួចអណ្ដែតចេញពីកប៉ាល់ដោយសារមានព្យុះមួយកើតឡើង។ ចំណែក TASS ចុះផ្សាយថា ក្រុមនាវិកដែលបានបាត់ខ្លួន ត្រូវគេជឿថា បានបាត់បង់ជីវិតទៅហើយ។

Onega គឺជាកប៉ាល់នេសាទមួយគ្រឿងដែលត្រូវបានផលិតកាលពីឆ្នាំ 1979 និងមានដោតទង់ជាតិរុស្ស៊ី។ អាជ្ញាធររុស្ស៊ី បានចាប់ផ្ដើមធ្វើការស៊ើបអង្កេតលើករណីនេះ៕

ប្រភព៖ Reuters, AFP, RT

December 28, 2020

អ្នកជំនួញថៃដែលធ្វើអត្តឃាតព្រោះតែ Covid-19៖ «បើមានជាតិក្រោយមែន ខ្ញុំនឹងត្រលប់មកសងបំណុលឱ្យអស់!»

ឈ្មួញបង្កងម្នាក់នៅខេត្ត Sa Kaeo ប្រទេសថៃ បានធ្វើអត្តឃាត ក្រោយពីក្ស័យធននៅពេលស្ថិតក្នុងរលកនៃការធ្វើពហិការមិនទទួលទានជលផលដែលទាក់ទងនឹងសម្បុកវីរុស Covid-19 ថ្មីបំផុតរបស់ប្រទេសនេះ។

នាយករដ្ឋមន្ត្រីថៃ Prayuth Chan-ocha កាលពីចុងសប្ដាហ៍មុន បានណែនាំឱ្យសមាជិកទាំងអស់នៃគណៈរដ្ឋមន្ត្រីរបស់លោក ទទួលទានបង្កងដើម្បីជួយស្ដារឡើងវិញនូវជំនឿរបស់ប្រជាជនចំពោះអាហារនេះ ក្រោយពីមានរលកនៃការធ្វើពហិការទូទាំងប្រទេសចំពោះបង្កងមកពីខេត្ត Samut Sakhon ជាកន្លែងដែលទើបតែមានរលកនៃការផ្ទុះឆ្លងរាលដាលរបស់វីរុស Covid-19។

ការណែនាំរបស់នាយករដ្ឋមន្ត្រីថៃ ត្រូវបានធ្វើឡើងបន្ទាប់ពី Chawalit Inchan ដែលជាឈ្មួញបង្កងម្នាក់ អាយុ 31 ឆ្នាំ បានចងកសម្លាប់ខ្លួនកាលពីថ្ងៃទី 25 ខែធ្នូ នៅខេត្ត Sa Keo។ នៅក្នុងវីដេអូថតដោយខ្លួនឯងនៅមុនការធ្វើអត្តឃាត Chawalit Inchan និយាយថា របរលក់ដូរបង្កងរបស់គាត់បានក្ស័យធន ហើយគាត់មិនអាចសងបំណុលចំនួន 60,000 បាត (ប្រហែល 2,000ដុល្លារអាមេរិក) បានឡើង។

Chawalit Inchan បញ្ជាក់ថា «ខ្ញុំមិនអាចបន្តទៀតបាន។ បើសិនមានជាតិក្រោយពិតមែន ខ្ញុំនឹងត្រលប់មកសងបំណុលទាំងនេះឱ្យអស់មិនខាន»។

ករណីធ្វើអត្តឃាតខាងលើ បានកើតឡើងក្នុងគ្រាដែលពលរដ្ឋថៃ កំពុងមានការភ័យខ្លាចចំពោះការឆ្លងរាលដាលថ្មីនៃ Covid-19 ដែលចាប់ផ្ដើមឡើងដោយករណីឆ្លងនៅលើអ្នកលក់បង្កងនៅផ្សារត្រីមួយកន្លែងក្នុងខេត្ត Samut Sakhon។ ក្នុងរយៈពេល 10 ថ្ងៃកន្លងទៅនេះ ប្រទេសថៃ បានរកឃើញអ្នកផ្ទុកវីរុស Covid-19 ថ្មីដល់ទៅជាង 1,300 ករណី។

បុគ្គលិកសុខាភិបាលថៃ កំពុងធ្វើការស្រាវជ្រាវលើប្រវត្តិដើរហើររបស់ពលករមកពីប្រទេសមីយ៉ានម៉ា កាលពីថ្ងៃទី 25 ខែធ្នូ នៅឯទីក្រុង Nakhon Si Thammarat

ការដែលពលរដ្ឋថៃជាច្រើនមានការព្រួយបារម្ភថា ការទទួលទានបង្កង ឬគ្រឿងសមុទ្រ អាចនាំឱ្យឆ្លងវីរុសនេះ បានបណ្ដាលឱ្យទីផ្សារបង្កងត្រូវជួបការលំបាកខ្លាំង។ «ការភ័យខ្លាចមានលក្ខណជ្រុលហួស» Taweesin Wisanuyothin ដែលជាអ្នកនាំពាក្យនៃមជ្ឈមណ្ឌលចាត់ការស្ថានការណ៍ Covid-19 របស់រដ្ឋាភិបាលថៃ បាននិយាយកាលពីថ្ងៃទី 25 ខែធ្នូ។ ក្រុមមន្ត្រីថៃ កំពុងតែព្យាយាមពន្យល់ឱ្យពលរដ្ឋយល់ថា ការទទួលទានបង្កងនឹងមិនអាចនាំឱ្យឆ្លង Covid-19 នោះទេ បើសិនវាជាអាហារឆ្អិន។

ក្រៅពីការភ័យខ្លាចចំពោះបង្កង ពលរដ្ឋថៃមួយចំនួនក៏មានការព្រួយបារម្ភខ្លាចឆ្លង Covid-19 ពីពលករមកពីប្រទេសមីយ៉ានម៉ា ជាក្រុមមនុស្សដែលត្រូវថៃជឿថា ជាប្រភពចម្លង Covid-19 នៅក្នុងខេត្ត Samut Sakhon ទៀតផង៕

ប្រភព៖ Khaosod

December 28, 2020

«Covid-19 ក្លាយពូជ» កំពុងឆ្លងរាលដាលយ៉ាងឆាប់រហ័ស ខណៈអាហ្វ្រិកខាងត្បូងវិជ្ជមានជាងមួយលានករណី

ប្រទេសអាហ្វ្រិកខាងត្បូងបានរកឃើញអ្នកឆ្លងវីរុស Covid-19 ជាងមួយលាននាក់ នៅក្នុងស្ថានភាពដែលវីរុសក្លាយពូជឈ្មោះ 501.V2 កំពុងឆ្លងរាលដាលយ៉ាងលឿននៅក្នុងប្រទេសនេះ។

យោងតាមទិន្នន័យនៅលើទំព័រ World Ometers បច្ចុប្បន្ន ប្រទេសអាហ្វ្រិកខាងត្បូង មានអ្នកឆ្លងវីរុស Covid-19 សរុបចំនួន 1,004,413 នាក់ ក្នុងនោះមាន 26,735 នាក់ បានបាត់បង់ជីវិត ខណៈអ្នកជំងឺ 1,038,766 នាក់បានជាសះស្បើយ។

បើតាមក្រុមអ្នកជំនាញ វីរុស Covid-19 ប្រភេទក្លាយពូជ (501.V2) នៅក្នុងប្រទេសអាហ្វ្រិកខាងត្បូង ងាយនឹងឆ្លងរាលដាលជាង Covid-19 ធម្មតា និងបានបង្ហាញខ្លួននៅក្នុងតំបន់សម្បុកវីរុសមួយចំនួនដែលកំពុងផ្ទុះឆ្លងជាថ្មី។

នៅពេលមន្ទីរពេទ្យនៅអាហ្វ្រិកខាងត្បូងឈានដល់ដំណាក់កាលលើសចំណុះ និងមិនមានសញ្ញានៃការរាលដាល់ដល់ចំណុចកំពូល តាមគម្រោង ប្រធានាធិបតី Ramaphoasa នឹងប្រកាសបទបញ្ជារឹតបន្តឹងលើការកាត់បន្ថយការធ្វើដំណើរដើម្បីរារាំង Covid-19។

វេជ្ជបណ្ឌិត Richard Lessells ជាអ្នកជំនាញខាងជំងឺឆ្លងនៅអាហ្វ្រិកខាងត្បូង ឱ្យដឹងថា៖ «យើងមិនមែនគ្មានសមត្ថភាពនៅពេលត្រូវប្រឈមនឹងវីរុសក្លាយពូជនេះទេ។ យើងអាចប្ដូរសកម្មភាពដើម្បីគ្រប់គ្រងវីរុសនេះមិនឱ្យឆ្លងរាលដាលជាងមុន»។ លោកបន្តថា ប្រការសំខាន់បំផុត នោះគឺការចៀសវាងការជួបជុំគ្នាក្នុងផ្ទុះ ឬទីកន្លែងដែលបិទជិត។

វេជ្ជបណ្ឌិត Richard Lessells បញ្ជាក់ថា ករណីឆ្លងលើសពីមួយលាននាក់គឺជារបត់ធ្ងន់ធ្ងរ ប៉ុន្តែ ស្ថានភាពជាក់ស្ដែងនៅអាហ្វ្រិកខាងត្បូងប្រាកដជាអាក្រក់ជាងនេះឆ្ងាយណាស់។ លោកបន្ថែមថា វីរុសក្លាយពូច 501.V2 បានបង្ហាញខ្លួនច្រើននៅបណ្ដាខេត្តជាប់មាត់សមុទ្រ ដូចជា Western Cape, Eastern Cape និង KwaZulu-Natal ជាដើម។

ប្រទេសអាហ្វ្រិកខាងត្បូងមិនទាន់មានវ៉ាក់សាំង Covid-19 នៅឡើយ បើទោះប្រធានាធិបតី Ramaphosa ធ្លាប់បានថ្លែងថា លោកសង្ឃឹមថា 10% ក្នុងចំណោមប្រជាជនសរុបជាង 60 លាននាក់នៃប្រទេសនេះ នឹងទទួលបានវ៉ាក់សាំងនៅក្នុងខែដំបូងៗនៃឆ្នាំ 2021៕

ប្រភព៖ Guardian

December 28, 2020

ឡាវហាមនាំចូលគ្រឿងសមុទ្រពីថៃ ព្រោះខ្លាច Covid-19

ប្រទេសឡាវបានចេញបទបញ្ជាផ្អាកនាំចូលគ្រឿងសមុទ្រពីប្រទេសថៃ ទន្ទឹមនឹងការរឹតបន្តឹងសកម្មភាពនៅតាមបន្ទាត់ព្រំដែនរបស់ប្រទេសទាំងពីរ បន្ទាប់ពីនៅប្រទេសថៃមានរលកនៃការឆ្លងរាលដាល Covid-19 ដែលទាក់ទងនឹងផ្សារត្រី។

ក្រសួងពាណិជ្ជកម្មឡាវ បានផ្អាកជាបន្ទាន់នូវការនាំចូលគ្រឿងសមុទ្រស្រស់ និងក្លាសេពីប្រទេសថៃចាប់ពីថ្ងៃទី 25 ខែធ្នូ ដោយសារតែមានការព្រួយបារម្ភខ្លាចគ្រឿងសមុទ្រមានផ្ទុក Covid-19។ បទបញ្ជាខាងលើត្រូវបានប្រទេសឡាវធ្វើឡើង ក្រោយពីខេត្ត Samut Sakhon របស់ថៃ ក្លាយជាចំណុចកណ្ដាលនៃរលកឆ្លងថ្មីរបស់វីរុស Covid-19 ដោយមានមនុស្សជាង 1,000 នាក់ទទួលបានលទ្ធផលវិជ្ជមាន បន្ទាប់ពីអ្នកជំនួញបង្កងម្នាក់មានផ្ទុកវីរុសនេះ។

បទបញ្ជាខាងលើនឹងប៉ះពាល់យ៉ាងធ្ងន់ធ្ងរដល់ក្រុមអ្នកនាំចូលគ្រឿងសមុទ្រនៅប្រទេសឡាវ។ អាជ្ញាធរឡាវកំពុងតែតាមដានក្រុមអ្នកនាំចូលគ្រឿងសមុទ្រនៅរដ្ឋធានី Vientiane និងបណ្ដាខេត្តរបស់ឡាវ ព្រមទាំងកំពុងបង្កើនការត្រួតពិនិត្យលើទំនិញនាំចូលតាមកុងតឺន័រ ដើម្បីស្វែងរកវត្តមានរបស់ Covid-19។ យោងតាមបទបញ្ជារបស់ក្រសួងពាណិជ្ជកម្ម អាជ្ញាធរបានអំពាវនាវឱ្យក្រុមមន្ត្រីរដ្ឋាភិបាល និងពលរដ្ឋក្នុងស្រុក គោរពតាមវិធានការនានា ដោយមិនត្រូវទិញ និងបរិភោគគ្រឿងសមុទ្រដែលនាំចូលពីប្រទេសថៃ។

ក្រុមមន្ត្រីឱ្យដឹងថា នេះគឺជាវិធានការបណ្ដោះអាសន្ន ហើយវានឹងត្រូវបានបន្តអនុវត្តរហូតដល់កិច្ចការធានាសុវត្ថិភាពសម្រាប់គ្រឿងសមុទ្រដែលនាំចូលពីប្រទេសថៃ ត្រូវបានគេធ្វើឡើង។

សូមបញ្ជាក់ថា ឡាវ និងទីម័រខាងកើតគឺជាប្រទេសពីរដែលមានករណីវិជ្ជមាននឹង Covid-19 តិចជាងគេនៅក្នុងតំបន់អាស៊ីអាគ្នេយ៍។ បច្ចុប្បន្ន ប្រទេសឡាវបានរកឃើញអ្នកឆ្លងវីរុសសរុប 41 ករណី ក្នុងនោះមាន 37 ករណីបានជាសះស្បើយ និង 4 ករណីកំពុងព្យាបាល។ ដូចទៅនឹងកម្ពុជា ប្រទេសឡាវមិនទាន់មានករណីស្លាប់ដោយសារវីរុស Covid-19 នៅឡើយ៕

ប្រភព៖ Vientiane Times

December 28, 2020

អនុប្រធានាធិបតីប្រេស៊ីល ឆ្លងវីរុស Covid-19!

ការិយាល័យអនុប្រធានាធិបតីប្រេស៊ីល បានប្រកាសឱ្យដឹងថា លោក Hamilton Mourao វិជ្ជមាននឹង Covid-19 ដែលនេះបានធ្វើឱ្យតួលេខមន្ត្រីរដ្ឋាភិបាលដែលបានឆ្លងវីរុសសរុបនៅក្នុងប្រទេសនេះ កើនឡើងថែមមួយកម្រិតទៀត។

ការិយាល័យរបស់អនុប្រធានាធិបតី Hamilton Mourao ឱ្យដឹងថា លោកទទួលបានលទ្ធផលនៃការធ្វើតេស្តកាលពីរសៀលថ្ងៃទី 27 ខែធ្នូ ហើយលោកនឹងធ្វើចត្តាឡីស័កនៅវិមាន Jabiru នារដ្ឋធានី Brasilia ជាកន្លែងស្នាក់នៅផ្លូវការរបស់អនុប្រធានាធិបតីនៃប្រទេសនេះ។

ក្រសួងសុខាភិបាលប្រេស៊ីល ក្នុងថ្ងៃដដែលក៏បានឱ្យដឹងថា ប្រទេសនេះបានរកឃើញករណីឆ្លងថ្មីចំនួន 18,479 នាក់ និងស្លាប់ថ្មី 344 នាក់ ដោយសារ Covid-19។ បច្ចុប្បន្ន ប្រេស៊ីលគឺជាសម្បុកវីរុស Covid-19 ធំជាងគេលំដាប់ទីបីក្នុងពិភពលោក បន្ទាប់ពីសហរដ្ឋអាមេរិក និងឥណ្ឌា ដោយមានអ្នកឆ្លងវីរុសសរុបជាង 7 លាននាក់ ក្នុងនោះមានអ្នកជំងឺជាង 191,000 នាក់ បានបាត់បង់ជីវិត។

សូមរំលឹកថា ប្រធានាធិបតីប្រេស៊ីល លោក Jair Bolsonaro កាលពីខែកក្កដា ក៏បានឆ្លងវីរុស Covid-19 និងបានធ្វើចត្តាឡីស័កនៅឯគេហដ្ឋានរបស់លោក។ ចំណែកសមាជិកគណរដ្ឋមន្ត្រីចំនួនពាក់កណ្ដាលរបស់លោក Jair Bolsonaro ក៏បានឆ្លងវីរុសនេះនៅក្នុងអំឡុងច្រើនខែកន្លងមកនេះផងដែរ៕

ប្រភព៖ Reuters

December 28, 2020

វេជ្ជបណ្ឌិតមានបញ្ហាប្រតិកម្មធ្ងន់ធ្ងរ បន្ទាប់ពីបានចាក់វ៉ាក់សាំង Covid-19 របស់ Moderna

វេជ្ជបណ្ឌិត Hossein Sadrzadeh ដែលជាអ្នកឯកទេសផ្នែកជំងឺមហារីកប្រចាំទីក្រុង Boston ត្រូវរងប្រតិកម្មយ៉ាងធ្ងន់ធ្ងរ ក្រោយពីបានចាក់វ៉ាក់សាំង Covid-19 ដែលអភិវឌ្ឍឡើងដោយក្រុមហ៊ុន Moderna ប៉ុន្តែ បានប្រក្រតីឡើងវិញហើយ។

វេជ្ជបណ្ឌិត Hossein Sadrzadeh ធ្វើការនៅឯមជ្ឈមណ្ឌលសុខាភិបាល Boston (BMC) ជាមនុស្សដែលតែងតែប្រតិកម្មនឹងសត្វមានសម្បក បានកើតអាការប្រតិកម្មធ្ងន់ធ្ងរ បន្ទាប់ពីបានចាក់វ៉ាក់សាំង Covid-19 មួយម្ជុលរបស់ក្រុមហ៊ុនផលិតឱសថ Moderna របស់សហរដ្ឋអាមេរិក កាលពីថ្ងៃទី 24 ខែធ្នូ។

BMC បានបញ្ជាក់ និងទទួលស្គាល់ហេតុការណ៍ខាងលើ និងបានឱ្យដឹងថា លោក Sadrzadeh ត្រូវបានតាមដានដោយក្រុមគ្រូពេទ្យដែលមានជំនាញ ក្រោយពីបានចាក់វ៉ាក់សាំង។

«គាត់មានអារម្មណ៍ថា កំពុងមានប្រតិកម្ម ហើយក៏ត្រូវបានអនុញ្ញាតឱ្យប្រើប្រាស់ប៊ិកឯកជន Epinephrine សម្រាប់ចាក់ថ្នាំ» BMC បានឱ្យដឹងដូច្នេះនៅក្នុងរបាយការណ៍មួយកាលពីថ្ងៃទី 25 ខែធ្នូ ដោយក្នុងនោះក៏មានការរំលឹកអំពីប្រភេទប៊ិកចាក់ថ្នាំ Epinephrine ដែលប្រើសម្រាប់ព្យាបាលអាការប្រតិកម្មធ្ងន់ធ្ងរ។

លោក Sadrzadeh ក៏ត្រូវបានបញ្ជូនចូលទៅកាន់សាលសង្គ្រោះបន្ទាន់ដើម្បីវាយតម្លៃស្ថានភាព ព្យាបាល និងតាមដាន។ បច្ចុប្បន្ន លោកបានចេញពីពេទ្យប្រកបដោយសុខភាពល្អ។

មុននេះក៏ធ្លាប់មានករណីស្រដៀងគ្នានេះកើតឡើងរួចមកហើយដែរ នេះបើតាមមជ្ឈមណ្ឌលគ្រប់គ្រងនិងបង្ការជំងឺអាមេរិក។ អគ្គនាយករបស់មជ្ឈមណ្ឌលស្រាវជ្រាវ និងវាយតម្លៃផ្នែកជីវសាស្ត្រនៃនាយកដ្ឋានគ្រប់គ្រងអាហារនិងឱសថអាមេរិក (FDA) ថ្មីៗនេះ ឱ្យដឹងថា «សមាសធាតុដែលគេហៅថា polyethylene អាចជាដើមហេតុនៃប្រតិកម្មនេះ»។ បច្ចុប្បន្ន FDA និង CDC របស់សហរដ្ឋអាមេរិក កំពុងសហការគ្នាដើម្បីស្រាវជ្រាវរកមូលហេតុ៕

ប្រភព៖ Boston Herald

December 26, 2020

ទីក្រុងប៉េកាំងរឹតបន្តឹងការធ្វើដំណើរឡើងវិញ នៅមុនចូលឆ្នាំថ្មី ដោយសារតែមានករណីឆ្លង Covid-19 ដែលមិនមានរោគសញ្ញា

អាជ្ញាធរនៃរដ្ឋធានីប៉េកាំងបានចាប់ផ្ដើមរឹតបន្តឹងលើការដើរហើរឡើងវិញ ដោយការស្នើ និងអំពាវនាវឱ្យពលរដ្ឋគ្រប់រូប មិនត្រូវចាកចេញពីរដ្ឋធានី បន្ទាប់ពីមានករណីឆ្លង Covid-19 មុនឆ្នាំថ្មី និងពិធីបុណ្យរដូវផ្ការីកមកដល់។

យុទ្ធនាការប្រយុទ្ធប្រឆាំងនឹងវីរុសរាតត្បាត Covid-19 របស់ទីក្រុងប៉េកាំង កំពុងប្រឈមនឹងឧបសគ្គធំមួយទៀត នៅពេលមានករណីវិជ្ជមាននឹង Covid-19 ដែលត្រូវបានរកឃើញយូរៗមួយ និងការឈប់សម្រាកចូលឆ្នាំថ្មី រួមនឹងពិធីបុណ្យរដូវផ្ការីកកំពុងតែខិតជិតមកដល់។ នេះបើតាមការឱ្យដឹងពីអាជ្ញាធរនៃទីក្រុងប៉េកាំង នៅក្នុងសន្និសីទសារព័ត៌មានមួយកាលពីថ្ងៃទី 25 ខែធ្នូ។

ទីក្រុងប៉េកាំង លើកទឹកចិត្តឱ្យប្រជាជន បន្តស្នាក់នៅក្នុងរដ្ឋធានី នៅក្នុងរដូវបុណ្យនាពេលខាងមុខ ដោយមិនត្រូវធ្វើដំណើរទៅកាន់ទីក្រុង ឬតំបន់ដែលមានហានិភ័យខ្ពស់ ឬមធ្យម ក្នុងការឆ្លងវីរុស Covid-19។ អាជ្ញាធរក៏អំពាវនាវឱ្យបណ្ដាក្រុមហ៊ុន ផ្អាកការបំពេញបេសកកម្មទៅកាន់តំបន់ក្រៅរដ្ឋធានី និងបរទេសផងដែរ ទន្លឹមនឹងការស្នើឱ្យសាលារៀន និងក្រុមហ៊ុន រៀបចំការឈប់សម្រាកឱ្យបានខុសពេលគ្នា។

Chen Bei ដែលជាអនុលេខាធិការនៃអាជ្ញាធរទីក្រុងប៉េកាំង បានឱ្យដឹងថា ក្រុមមន្ត្រីបក្ស និងអាជ្ញាធរ គួរតែធ្វើជាគំរូក្នុងការមិនចាកចេញពីប៉េកាំងនៅក្នុងរដូវបុណ្យ ហើយត្រូវតែមានការពិនិត្យម៉ត់ចត់ ឬត្រូវតែសុំការអនុញ្ញាត បើសិនចង់ធ្វើដំណើរចេញពីរដ្ឋធានី។

លោកស្រី Chen Bei បញ្ជាក់បន្ថែមថា រោងភាពយន្ត បណ្ណាល័យ សារមន្ទីរ និងទីតាំងកម្សាន្តនានា ត្រូវតែធ្វើសកម្មភាពមិនឱ្យលើសពី 75% នៃលទ្ធភាពដែលមាន។

វិធានការខាងលើនេះ ត្រូវបានដាក់ចេញបន្ទាប់ពីរដ្ឋធានីរបស់ចិនបានរាយការណ៍ថា បានរកឃើញករណីវិជ្ជមាននឹង Covid-19 ថ្មី នៅក្នុងសប្ដាហ៍នេះ។ ករណីឆ្លងថ្មីដែលត្រូវបានរកឃើញកាលពីថ្ងៃទី 25 ខែធ្នូនេះគឺជាបុគ្គលិកនៃក្រុមហ៊ុនអាកាសចរណ៍ Asiana ដែលធ្វើដំណើរត្រលប់មកពីកូរ៉េខាងត្បូង។ អាជ្ញាធរចិនបញ្ជាក់ថា នេះគឺជាករណីឆ្លងដែលមិនមានរោគសញ្ញា៕

ប្រភព៖ Global Times

December 26, 2020

អាមេរិកដាក់បម្រាមគោចរក្រោយករណីផ្ទុះដ៏ធំមួយដែលបណ្ដាលឱ្យអគាជាង 40 ត្រូវរងការខូចខាត

អភិបាលក្រុង Nashville បានចេញបទបញ្ជាហាមការធ្វើដំណើរមួយដែលនឹងអូសបន្លាយរហូតដល់ដំណាច់សប្ដាហ៍នេះនៅតំបន់ដែលរងផលប៉ះពាល់ពីករណីផ្ទុះរថយន្តកាលពីថ្ងៃទី 25 ខែធ្នូកន្លងទៅ។

«ខ្ញុំបានចុះហត្ថាលេខាលើបទបញ្ជាប្រតិបត្តិ 12 ដើម្បីដាក់តំបន់ឱ្យស្ថិតក្នុងស្ថានការណ៍អាសន្នផ្នែកស៊ីវិលចំពោះទីតាំងនានាដែលព័ទ្ធជុំវិញដោយមហាវិថី James Robertson ផ្នែកខ្លះនៃមហាវិថីលេខ 4 នៅភាគខាងជើង តំបន់ Broadway និងទន្លេ Cumberland។ បម្រាមគោចរនេះនឹងត្រូវអនុវត្តចាប់ពីម៉ោង 16កន្លះនៃថ្ងៃទី 25 ខែធ្នូ (ម៉ោង 5 កន្លះនៃថ្ងៃទី 26 ខែធ្នូ នៅកម្ពុជា) និងបញ្ចប់នៅម៉ោង 16 កន្លះនៃថ្ងៃទី 27 ខែធ្នូ (ម៉ោង 5 កន្លះនៃថ្ងៃទី 28 ខែធ្នូ នៅកម្ពុជា)» អភិបាលក្រុង Nashville លោក John Cooper បានសរសេរដូច្នេះនៅលើទំព័រ Twitter កាលពីថ្ងៃទី 25 ធ្នូ»។

លោក John Cooper បានឱ្យដឹងថា បទបញ្ជានេះក៏ផ្ដល់កម្លាំងបន្ថែមសម្រាប់ជួយដល់កិច្ចការដោះស្រាយ និងការផ្ដល់ជំនួយផងដែរ។

«ការវាយប្រហារសំដៅលើសហគមន៍របស់យើង ក្នុងបំណងបង្កភាពចលាចល និងការភ័យខ្លាចក្នុងថ្ងៃបុណ្យដ៏សុខសាន្ត និងប្រកបដោយក្ដីសង្ឃឹមនេះ។ ប៉ុន្តែ ប្រជាជន Nashville បានបង្ហាញជាច្រើនដងហើយថា ស្មារតីរបស់ទីក្រុងនេះមិនអាចត្រូវបានវាយបំបែកឡើយ»។

សូមរំលឹកថា រថយន្តមួយគ្រឿងបានផ្ទុះឡើងយ៉ាងកក្រើកដី នៅកណ្ដាលទីក្រុង Nashville នៃរដ្ឋ Tennessee សហរដ្ឋអាមេរិក កាលពីថ្ងៃទី 25 ខែធ្នូ។ ក្រុមប៉ូលិសឱ្យដឹងថា នេះគឺជាសកម្មភាពដែលមានគោលបំណង និងមានការព្រមានជាមុនថា គ្រាប់បែក «នឹងផ្ទុះ ក្រោយរយៈពេល 15 នាទីទៀត» បានបន្លឺចេញពីរថយន្ត នៅមុនពេលវាផ្ទុះ។

ក្នុងហេតុការណ៍នេះ មានមនុស្សយ៉ាងតិច 3 នាក់បានរងរបួស និងអគារច្រើនជាង 40 ត្រូវរងការខូចខាត។ មន្ត្រីពីររូបបានបញ្ជាក់ថា មានបំណែកនៃសាកសពនៅកន្លែងកើតហេតុ ប៉ុន្តែមិនទាន់ដឹងច្បាស់ថា វាជាប់ទាក់ទងនឹងហេតុការណ៍ផ្ទុះនេះដែរ ឬយ៉ាងណានៅឡើយ៕

ប្រភព៖ Fox

អត្ថបទទាក់ទង៖ ផ្ទុះកក្រើកទីក្រុងនៅអាមេរិកក្នុងថ្ងៃបុណ្យណូអែលឆ្នាំនេះ

December 26, 2020

Category: អន្តរជាតិ