អន្តរជាតិ - La Reine Media

ស្ថានភាព Covid-19 នៅកម្ពុជា និងពិភពលោក ក្នុងអំឡុង24ម៉ោងចុងក្រោយ

នៅក្នុងអំឡុង 24 ម៉ោងកន្លងទៅនេះ កម្ពុជាមិនមានករណីវិជ្ជមាននឹង Covid-19 នោះទេ ខណៈពិភពលោកទាំងមូលរកឃើញ 531,138 នាក់ ដែលជាករណីវិជ្ជមានថ្មី។

ក្រសួងសុខាភិបាលកម្ពុជាបានឱ្យដឹងថា សម្រាប់ 24 ម៉ោងមកនេះ កម្ពុជាមិនមានករណីវិជ្ជមាននឹង Covid-19 ប៉ុន្តែមានករណីជាសះស្បើយចំនួន 1 នាក់។ អ្នកជំងឺដែលបានជាសះស្បើយនេះគឺជាពលការិនីខ្មែរមកពីប្រទេសថៃ។ ព័ត៌មានលម្អិតសូមអានសេចក្ដីប្រកាសខាងក្រោម។

គិតមកដល់ថ្ងៃទី 18 មករា ឆ្នាំ 2021 នេះ កម្ពុជាបានរកឃើញអ្នកឆ្លង Covid-19 សរុបចំនួន 439 នាក់ ក្នុងនោះមានអ្នកជាសះស្បើយចំនួន 386 នាក់ និងអ្នកកំពុងព្យាបាលចំនួន 53 នាក់។

នៅទូទាំងពិភពលោក ករណីវិជ្ជមាននឹង Covid-19 បានកើនឡើងដល់ 95,464,775 នាក់ ក្នុងនោះមាន 2,039,083 បានបាត់បង់ជីវិត។ ក្នុងរយៈពេល 24 ម៉ោងកន្លងមកនេះ ពិភពលោកបានរកឃើញអ្នកឆ្លងថ្មីចំនួន 531,138 នាក់ និងអ្នកស្លាប់ថ្មីចំនួន 9,151 នាក់។ សម្រាប់តួលេខនៃអ្នកកំពុងទទួលការព្យាបាល មានចំនួន 25,270,240 នាក់ ក្នុងនោះមាន 113,222 នាក់ កំពុងប្រឈមនឹងហានិភ័យនៃការស្លាប់ ដោយសារមានអាការធ្ងន់ធ្ងរ៕

January 18, 2021

(វីដេអូ)-ឆេះព្រៃនៅឈីលី! មនុស្សជាង 25,000នាក់ត្រូវជម្លៀសខ្លួន

កាលពីថ្ងៃទី 15 មករា រដ្ឋមន្ត្រីក្រសួងមហាផ្ទៃរបស់ប្រទេសឈីលី Roberto Delgado បានប្រកាសថា ភ្លើងឆេះព្រៃមួយចំនួនដែលបានកើតឡើងក្នុងតំបន់មួយនៃទីក្រុង Valparaiso នៅភាគកណ្ដាលប្រទេសនេះ បានបំផ្លាញផ្ទះចំនួន 6 ខ្នង ព្រៃឈើជាង 300 ហិកតា និងនាំឱ្យមនុស្សយ៉ាងហោច 25,000 នាក់ត្រូវជម្លៀងខ្លួនដើម្បីការពារជីវិត។

នាយកដ្ឋានគ្រប់គ្រងបញ្ហាអាសន្នរបស់ឈីលី (Onemi) មុននេះបានបញ្ជាក់ថា ក្នុងអំឡុងពីរថ្ងៃចុងក្រោយនេះ មានករណីភ្លើងឆេះព្រៃដល់ទៅ 4 លើកដែលបានកើតឡើងនៅក្នុងតំបន់ Quilpue មានចម្ងាយពីរដ្ឋធានី Santiago ប្រហែល 110 គីឡូម៉ែត្រទៅទិសពាយព្យ។ ករណីឆេះព្រៃដំបូងបានកើតឡើងនៅ Quilpue កាលពីព្រលប់ថ្ងៃទី 14 មករា។ ផ្សែងដែលកើតចេញពីភ្លើងឆេះព្រៃនេះ មានទំហំធំដែលអាចមើលឃើញពីរដ្ឋធានី Santiago។

រដ្ឋមន្ត្រី Delgado បង្ហើបឱ្យដឹងថា ក្រសួងមហាផ្ទៃនៃប្រទេសនេះ នឹងបើកការស៊ើបអង្កេតលើករណីឆេះព្រៃនៅ Valparaiso បន្ទាប់ពីនាយកដ្ឋានព្រៃឈើជាតិ (Conaf) យល់ថា ករណីឆេះព្រៃទាំងនេះទំនងជាចេតនាអាក្រក់របស់ជនណាមួយ។

https://www.youtube.com/watch?v=tx2XZGmrOAg

ឈីលីដែលជាប្រទេសទទួលរងគ្រោះធម្មជាតិច្រើននៅក្នុងរដូវក្ដៅ បច្ចុប្បន្នកំពុងតែឆ្លងកាត់គ្រោះរាំងស្ងួតអាក្រក់បំផុតក្នុងអំឡុង 6 ទសវត្សរ៍មកនេះ ដោយ 76% នៃផ្ទៃដីរបស់ប្រទេសនេះត្រូវខ្វះទឹកប្រើប្រាស់។ ស្ថានភាពអាក្រក់បំផុតកំពុងកើតឡើងនៅភាគកណ្ដាល ដោយសារតែបរិមាណទឹកភ្លៀងបានថយចុះទាបបំផុតរាប់ចាប់ពីឆ្នាំ 2019 មកនេះ។

ចាប់ពីខែកក្កដា ឆ្នាំ 2019 ដល់ខែមិថុនា ឆ្នាំ 2020 ឈីលីមានគ្រោះភ្លើងឆេះព្រៃជាង 8,125 ករណីដែលបានកើតឡើងនៅលើផ្ទៃដីប្រហែល 102,000 ហិកតា ក្នុងនោះមានជាង 3,500 ករណី បណ្ដាលមកពីមនុស្ស៕

ប្រភព៖ Garda, Tetova News

January 16, 2021

ទាហានការពារជាតិអាមេរិក 25,000 នាក់ កំពុងការពារពិធីស្បថចូលកាន់តំណែងរបស់ប្រធានាធិបតីថ្មី

កាលពីថ្ងៃទី 15 មករា កងទ័ពអាមេរិកបានបញ្ជាក់ថា ទាហានការពារជាតិប្រមាណ 25,000 នាក់ ត្រូវបានបញ្ជូនទៅកាន់រដ្ឋធានីវ៉ាស៊ីងតោន ដើម្បីការពារពិធីស្បថចូលកាន់តំណែងរបស់ប្រធានាធិបតីជាប់ឆ្នោត Joe Biden ដែលនឹងត្រូវធ្វើឡើងនៅសប្ដាហ៍ក្រោយ។

យោងតាមសេចក្ដីប្រកាសមួយ ក្រសួងការពារជាតិបានផ្ដល់សិទ្ធិដល់ទាហានចំនួន 25,000 នាក់ ដែលត្រូវបានគ្រប់គ្រងដោយអង្គភាពស៊ើបការសម្ងាត់អាមេរិក (កើន 5,000 នាក់ ធៀបនឹងតួលេខដែលត្រូវបានបញ្ជាក់កាលពីដើមសប្ដាហ៍នេះ) ដើម្បីជួយដល់សកម្មភាពអនុវត្តច្បាប់ និងត្រៀមសម្រាប់ការពារសន្តិសុខក្នុងពិធីឡើងកាន់អំណាចរបស់ប្រធានាធិបតីថ្មី។ ឧត្តមសេនីយ៍ Daniel Hokanson មេបញ្ជាការនៃកងកម្លាំងការពារជាតិ បានឱ្យដឹងថា ក្រុមទាហាន និងអ្នកបើកបរយន្តហោះ ត្រូវបានដាក់ពង្រាយនៅជុំវិញទីក្រុងដើម្បីការពាររដ្ឋធានីរបស់ប្រទេសនេះ។

ក្រៅពីរដ្ឋធានីវ៉ាស៊ីងតោន រដ្ឋតូចៗ និងតំបន់ជាច្រើនផ្សេងទៀតក៏បានបញ្ជូនកងកម្លាំងការពារជាតិរបស់ខ្លួនមកកាន់ទីក្រុងវ៉ាស៊ីងតោន ដើម្បីចូលរួមការពារសន្តិសុខក្នុងព្រឹត្តិការណ៍ខាងមុខ ក្រោយពីមានអំពើហិង្សានៅវិមានសភាអាមេរិកកាលពីថ្ងៃទី 6 មករាកន្លងទៅ។ ប្រការនេះត្រូវបានមនុស្សមួយចំនួនប្រដូចរដ្ឋធានីវ៉ាស៊ីងតោន ទៅនឹងសមរភូមិក្នុងសម័យសង្គ្រាម។

ក្រុមទាហានដែលបានដាក់ពង្រាយនៅរដ្ឋធានីវ៉ាស៊ីងតោន ត្រូវបានបញ្ជូនមកពីរដ្ឋមួយចំនួន រួមមាន Arizona, Colorado, Delaware, Illinois, Maryland, New Jersey, New Mexico, New York, Ohio, Pennsylvania, Vermont, Virginia និងរដ្ឋ Washington ជាមួយនឹងការបន្ថែមទាហានមួយចំនួនផ្សេងទៀតពីបណ្ដារដ្ឋ Wisconsin, Nebraska, Oklahoma, New Mexico និងរដ្ឋ Maine ផងដែរ៕

ប្រភព៖ Washington Post

January 16, 2021

វៀតណាមអះអាងថា «វ៉ាក់សាំង Covid-19 របស់ខ្លួន បង្កើតអង់ទីក័រច្រើនជាង 20ដង ធៀបនឹងអ្នកមិនបានចាក់»

ក្រោយការចាក់វ៉ាក់សាំង Covid-19 កម្រិតនៃការទប់ទល់នឹងការឆ្លងវីរុសរបស់ក្រុមអ្នកស្ម័គ្រចិត្ត ត្រូវបានវាយតម្លៃថាល្អ នៅពេលវាបង្កើតអង្គបដិប្រាណច្រើនជាង 4 ដង ទៅ 20 ដង បើធៀបនឹងអ្នកមិនបានចាក់វ៉ាក់សាំងនេះ។

អនុប្រធាននៃវិទ្យាស្ថានស្រាវជ្រាវវេជ្ជសាស្ត្រយោធាវៀតណាម លោក Ho Anh Son កាលពីថ្ងៃទី 14 មករា ឱ្យដឹងថា យោងតាមការស្រាវជ្រាវថ្មីៗនេះ កម្រិតនៃការឆ្លើយតបរបស់អង្គបដិប្រាណនៃក្រុមអ្នកស្ម័គ្រចិត្តដែលបានចាក់វ៉ាក់សាំង Covid-19 ត្រូវបានវាយតម្លៃថាល្អ នៅពេលបង្កើតបានអង្គបដិប្រាណច្រើនជាង 4 ដង បើធៀបនឹងមនុស្សធម្មតា។ ជាងនេះ ក៏មានអ្នកស្ម័គ្រចិត្តខ្លះកកើតអង់ទីក័រច្រើនជាង 20 ដងក៏មាន។

លោក Son បញ្ជាក់ថា ក្រោយការចាក់វ៉ាក់សាំង Covid-19 លើកទីពីរ បរិមាណនៃអង្គបដិប្រាណរបស់អ្នកស្ម័គ្រចិត្តនឹងកើនឡើងខ្ពស់ និងរក្សាកម្រិតនេះបានយូរអង្វែង។ ដូច្នេះ ក្រុមអ្នកស្ម័គ្រចិត្តដែលបានចាក់លើកទីពីរក្នុងថ្ងៃទី 14 មករា នឹងត្រូវបានតាមដានក្នុងរយៈពេល 6 ខែ ដើម្បីឱ្យដឹងថា សមត្ថភាពនៃការការពាររបស់វ៉ាក់សាំងនេះអាចបន្លាយពេលយូរប៉ុនណា។ ក្រោយរយៈពេលមួយឆ្នាំ ក្រុមអ្នកស្ម័គ្រចិត្តនឹងត្រូវបានវាយតម្លៃលើបរិមាណនៃអង្គបដិប្រាណក្នុងរាងកាយ ដើម្បីឱ្យអ្នកស្រាវជ្រាវកំណត់បរិមាណវ៉ាក់សាំង និងផែនការចម្រាញ់ជ្រើសរើស។

ប៉ុន្តែ មកដល់បច្ចុប្បន្ន មិនទាន់មានទិន្នន័យគ្រប់គ្រាន់ដើម្បីអាចកំណត់បរិមាណវ៉ាក់សាំងដែលត្រូវចាក់នៅឡើយ។ ក្រោយចូលឆ្នាំចិន ក្រុមអ្នកវិទ្យាសាស្ត្រនៃប្រទេសវៀតណាមនឹងមានគម្រោងពិសោធវ៉ាក់សាំង Covid-19 ឈ្មោះ Nanocovax នេះសម្រាប់ដំណាក់កាលទីពីរ ដែលគ្រោងនឹងចាក់ពីរម្ជុលក្នុងមួយដូស។

Nanocovax គឺជាវ៉ាក់សាំងទប់ស្កាត់ Covid-19 ដំបូងរបស់វៀតណាម ដែលត្រូវបានផលិតឡើងដោយក្រុមហ៊ុនឱសថជីវបច្ចេកវិទ្យា Nanogen។ វ៉ាក់សាំងនេះត្រូវការសីតុណ្ហភាពចាប់ពី 2 អង្សាសេ ដល់ -8 អង្សាសេ ដើម្បីរក្សាគុណភាពបានល្អ។

កាលពីព្រឹកថ្ងៃទី 17 ខែធ្នូ ឆ្នាំ 2020 វ៉ាក់សាំង Covid-19 មួយម្ជុលដំបូងរបស់វៀតណាម ត្រូវបានចាក់ឱ្យអ្នកស្ម័គ្រចិត្តចំនួន 3 នាក់ ក្នុងចំណោមជាង 200 នាក់ដែលបានចុះឈ្មោះ។ គិតមកដល់បច្ចុប្បន្ន ការពិសោធវ៉ាក់សាំង Nanocovax លើមនុស្សដំណាក់កាលដំបូងនេះ សម្រេចបាន 50% ហើយតាមផែនការ គម្រោងនេះនឹងត្រូវបញ្ចប់នៅក្នុងខែកុម្ភៈ ឆ្នាំ 2021។ ក្រសួងសុខាភិបាលនឹងធ្វើការវាយតម្លៃ នៅមុនពេលអនុញ្ញាតឱ្យពិសោធលើមនុស្សដំណាក់កាលទីពីរ ដោយមានអ្នកស្ម័គ្រចិត្តចំនួន 560 នាក់៕

ប្រភព៖ CB

January 15, 2021

រញ្ជួយដីលើកោះមួយនៅឥណ្ឌូនេស៊ី សម្លាប់មនុស្សជាច្រើននាក់

គ្រោះរញ្ជួយដីដែលមានកម្លាំង 6.2 រិចទ័រ នៅក្បែរកោះ Sulawesi របស់ឥណ្ឌូនេស៊ីកាលពីព្រឹកមិញនេះ បណ្ដាលឱ្យមានមនុស្សស្លាប់យ៉ាងតិច 7 នាក់ និងផ្ទះរាប់សិបខ្នងត្រូវបានបំផ្លាញ។

នាយកដ្ឋានគ្រប់គ្រងគ្រោះធម្មជាតិឥណ្ឌូនេស៊ីបានឱ្យដឹងថា ចំណុចកណ្ដាលនៃគ្រោះរញ្ជួយដីនេះ ស្ថិតនៅជម្រៅ 10 គីឡូម៉ែត្រក្រុមដីដែលមានចម្ងាយ 6 គីឡូម៉ែត្រទៅទិសភាគឦសាននៃទីក្រុង Majene ក្នុងខេត្ត Sulawesi ខាងលិច។ គ្រោះរញ្ជួយដីដែលបានកើតឡើងនាព្រឹកថ្ងៃទី 15 មករានេះ មិនបង្កឱ្យមានរលកយក្សនោះទេ ប៉ុន្តែគេអាចដឹកបានយ៉ាងច្បាស់ថា វាកើតឡើងក្នុងរយៈពេល 7 វិនាទី។

គ្រោះធម្មជាតិនេះក៏នាំឱ្យមានមនុស្សយ៉ាងតិច 7 នាក់បាត់បង់ជីវិត និងរាប់រយនាក់ត្រូវរងរបួស។ ទីក្រុង Majene មានអ្នកស្លាប់ចំនួន 4 នាក់ និង 637 នាក់រងរបួស ខណៈនៅខេត្ត Mamuju មានមនុស្សស្លាប់ 3 នាក់ និងជាង 20 នាក់រងរបួស។ ផ្ទះរបស់ប្រជនជនជាង 60 ខ្នងបានត្រូវបំផ្លាញស្ទើរទាំងស្រុង។

អាជ្ញាធរឥណ្ឌូនេស៊ីបានប្រកាសថា ពលរដ្ឋរាប់ពាន់នាក់ត្រូវជម្លៀសចេញពីកន្លែងកើតហេតុ។ ការិយាល័យរបស់សណ្ឋាគារមួយ និងការិយាល័យរបស់អភិបាលខេត្ត Sulwesi ក៏ត្រូវបានរាយការណ៍ថា ត្រូវខូចខាតយ៉ាងធ្ងន់ធ្ងរ និងកំពុងដាច់ភ្លើង។

មុននោះប៉ុន្មានម៉ោង ក៏មានគ្រោះរញ្ជួយដីមួយដែលមានកម្លាំង 5.9 រិចទ័រ បានកើតឡើងនៅតំបន់នេះកាលពីយប់ថ្ងៃទី 14 មករា ធ្វើឱ្យផ្ទះជាច្រើនខ្នងត្រូវខូចខាត ប៉ុន្តែមិនមានសេចក្ដីរាយការណ៍ណាបញ្ជាក់អំពីករណីស្លាប់ ឬរបួសនៅឡើយ។

ឥណ្ឌូនេស៊ីតែងតែកើតមានគ្រោះរញ្ជួយដី និងផ្ទុះភ្នំភ្លើងជាញឹកញាប់ ដោយសារតែស្ថិតក្នុងតំបន់ «ខ្សែក្រវាត់ភ្លើង» របស់មហាសមុទ្រប៉ាស៊ីហ្វិក ជាកន្លែងដែលបន្ទះ tectonic plate ក្រោមស្រទាប់ដី និងលើថ្មរាវ ប៉ះទង្គិចនឹងគ្នា។ កាលពីឆ្នាំ 2018 មានគ្រោះរញ្ជួយដីមួយដែលមានកម្លាំង 7.5 រិចទ័រ និងរលកយក្សមួយបានកើតឡើងនៅលើកោះ Sulawesi បណ្ដាលឱ្យមានមនុស្សស្លាប់ និងបាត់ខ្លួនជាង 4,300 នាក់៕

ប្រភព៖ Reuters

January 15, 2021

ស្ថានភាព Covid-19 នៅអាស៊ីអាគ្នេយ៍ក្នុងអំឡុង 24ម៉ោងមុន

យោងតាមស្ថិតិនៅលើទំព័រ Worldometers មកដល់នាទីចុងក្រោយនៃថ្ងៃទី 14 មករា បណ្ដាប្រទេសក្នុងសមាគមប្រជាជាតិអាស៊ីអាគ្នេយ៍ (ASEAN) បានរកឃើញមនុស្សចំនួន 17,750 នាក់បន្ថែមទៀតដែលវិជ្ជមាននឹង Covid-19។

ក្នុងអំឡុង 24 ម៉ោងកន្លងទៅ ASEAN មានសមាជិកចំនួន 5 ប្រទេស មានករណីស្លាប់ដោយសារ Covid-19 រួមមាន ហ្វីលីពីន ឥណ្ឌូនេស៊ី ថៃ មីយ៉ានម៉ា និងម៉ាឡេស៊ី។

ឥណ្ឌូនេស៊ីបន្តជាសម្បុកវីរុសធំជាងគេក្នុងតំបន់អាស៊ីអាគ្នេយ៍ ដោយបានរកឃើញអ្នកវិជ្ជមាននឹង Covid-19 ចំនួន 869,600 នាក់ និងស្លាប់ចំនួន 25,246 នាក់ ក្នុងនោះមានអ្នកជំងឺថ្មីចំនួន 11,557 នាក់ និងស្លាប់ថ្មីចំនួន 295 នាក់។

ប្រទេសហ្វីលីពីន ម៉ាឡេស៊ី មីយ៉ានម៉ា ថៃ ក៏កំពុងតែជាប្រទេសដែលមានភាពវឹកវរជាងគេនៅក្នុងតំបន់អាស៊ីអាគ្នេយ៍។ វីរុស Covid-19 បានឆក់យកជីវិតមនុស្សចំនួន 38,611 នាក់នៅទូទាំងតំបន់នេះ កើន 362 នាក់ បើធៀបនឹងម្សិលមិញ ខណៈអ្នកវិជ្ជមានបានកើនដល់ 1,717,424 នាក់។ ចំណែកអ្នកបានជាសះស្បើយ មានចំនួន 1,468,261 នាក់៕

January 15, 2021

ក្រោយការបិទគណីរបស់ Trump សហភាពអឺរ៉ុបបានថ្កោលទោស និងត្រៀមចេញច្បាប់ទប់ទល់នឹងអំណាចរបស់បណ្ដាញសង្គម

ក្នុងពេលដែលមតិសាធារណជននៅសហរដ្ឋអាមេរិក កំពុងជជែកតតាំងគ្នាអំពីទង្វើរបស់ Twitter ក៏ដូចជាបណ្ដាញសង្គមដទៃទៀត ដែលបានធ្វើចំពោះប្រធានាធិបតីអាមេរិក សហភាពអឺរ៉ុបឯណោះវិញកំពុងតែត្រៀមបញ្ចេញច្បាប់ចំនួនពីរដើម្បីបង្កើនកម្លាំង និងវិសាលភាពក្នុងការគ្រប់គ្រងបច្ចេកវិទ្យា ដែលសំដៅលើបណ្ដាញសង្គមទាំងនោះ។

ការបិទគណនីបណ្ដាញសង្គមរបស់លោក Trump ក្រោយពីមានអំពើហិង្សានៅ Capitol Hill កាលពីថ្ងៃទី 6 មករា បានធ្វើឱ្យមានប្រតិកម្មខុសគ្នាទាំងស្រុងរវាងតំបន់នៃត្រើយទាំងសងខាងរបស់មហាសមុទ្រអាត្លង់ទិក។

មុននេះ បណ្ដាបណ្ដាញសង្គម រួមនឹងក្រុមហ៊ុនធំៗជាច្រើននៅសហរដ្ឋអាមេរិក បានបិទគណនីរបស់លោក Trump ជាបន្តបន្ទាប់ ក្រោយពីមានអំពើហិង្សានៅវិមានសភាជាតិក្នុងតំបន់ Capitol Hill ដោយអះអាងថា បានរំលោភគោលការណ៍របស់ក្រុមហ៊ុន។ ទង្វើនេះមិនត្រឹមតែធ្វើឱ្យប៉ះពាល់ដល់ក្រុមអ្នកគាំទ្ររបស់លោក Trump បណ្ណោះទេ តែក៏កំពុងធ្វើឱ្យមានការសង្ស័យពីសំណាក់ក្រុមអ្នកលើកកម្ពស់សិទ្ធិសេរីភាពបញ្ចេញមតិផងដែរ ពិសេសគឺនៅក្នុងប្រទេសដែលត្រូវបានគេចាត់ទុកថាជា «បិតាប្រជាធិបតេយ្យ» ដូចសហរដ្ឋអាមេរិក។

បញ្ហានេះបានធ្វើឱ្យ CEO របស់ក្រុមហ៊ុន Tesla លោក Elon Musk ដែលកំពុងកាន់កាប់តំណែងជាអ្នកមានជាងគេលំដាប់ទីមួយក្នុងពិភពលោក សរសេរនៅលើ Twitter ថា បណ្ដាក្រុមហ៊ុនបច្ចេកវិទ្យានៅត្រើយខាងលិចនៃមហាសមុទ្រអាត្លង់ទិក កំពុងក្លាយជា «អាជ្ញាកណ្ដាល» ស្ដីអំពីសិទ្ធិសេរីភាពក្នុងការបញ្ចេញមតិ។ មុននេះ CEO របស់ SpaceX ក៏បានរិះគន់ទៅលើប្រព័ន្ធត្រួតពិនិត្យរបស់ Amazon និង Facebook ហើយចាត់ទុកថានេះគឺជាបញ្ហាផ្ដាច់មុខ និងជាទង្វើមិនត្រឹមត្រូវ។

ចំណែកនៅឯត្រើយម្ខាងនៃមហាសមុទ្រអាត្លង់ទិកវិញ មិនដូចទៅនឹងសហរដ្ឋអាមេរិកនោះ សារព័ត៌មានអឺរ៉ុប និងតួអង្គរបស់សាធារណជន កម្រនឹងផ្ដោតសំខាន់ទៅលើនិយមន័យនៃសេរីភាពក្នុងការបញ្ចេញមតិ។ ក៏ប៉ុន្តែ យោងតាមការយល់ឃើញរបស់អឺរ៉ុប ការរាំងខ្ទប់លោក Trump ដោយបណ្ដាញសង្គមដែល Twitter ជាអ្នកនាំមុខគឺជាការប្រើប្រាស់អំណាចមិនសមហេតុផលដើម្បីកាត់បន្ថយសេរីភាពបញ្ចេញមតិ។ ជាក់ច្បាស់ណាស់ បណ្ដាញសង្គមទាំងនោះ មិនបានលើកឡើងឱ្យបានច្បាស់លាស់ថា តើគោលការណ៍ណាមួយត្រូវបានរំលោភបំពាន។ ការសម្រេចបិទគណនីរបស់ប្រធានាធិបតីសហរដ្ឋអាមេរិកគឺជាអំណាចរវើរវាយរបស់ក្រុមមេដឹកនាំនៃបណ្ដាញសង្គម។

សហភាពអឺរ៉ុប (EU) បានអះអាងថា ជាក្រុមហ៊ុនធម្មតា បណ្ដាញសង្គមត្រូវតែកំណត់ឱ្យបានច្បាស់អំពីសិទ្ធិ និងទំនួលខុសត្រូវ។ អ្នកនាំពាក្យរបស់អធិការបតីអាល្លឺម៉ង់ បានថ្លែងកាលពីថ្ងៃទី 11 មករាថា លោកស្រី Merkel មានយោបល់ថា ការបិទរបស់ Twitter ចំពោះគណនីរបស់លោក Trump គឺ «មានបញ្ហា»។

អំពើហិង្សានៅវិមានសភាជាតិក្នុងតំបន់ Capitol Hill នៃសហរដ្ឋអាមេរិក ត្រូវបានបណ្ដាញសង្គម យកធ្វើជាលេសដើម្បីរាំងខ្ទប់សិទ្ធិបញ្ចេញមតិ

កាលពីថ្ងៃទី 10 មករា សមាជិកនៃគណៈកម្មធិការទីផ្សារក្នុងស្រុករបស់គណៈកម្មធិការអឺរ៉ុប លោក Thierry Breton ក៏បានបញ្ចេញមតិទាក់ទងនឹងបញ្ហាខាងលើ។ លោក Thierry Breton បានហៅបញ្ហានៅឯតំបន់ Capitol Hill ថាជា «ព្រឹត្តិការណ៍ 11 កញ្ញា» នៅលើបណ្ដាញសង្គម និងបានរិះគន់បណ្ដាញសង្គមទាំងនោះថា អាចបង្កឱ្យមានការគំរាមកំហែងចំពោះខឿនប្រជាធិបតេយ្យ។ លោក Thierry Breton បន្តថា មុនព្រឹត្តិការណ៍នៅ Capitol Hill បណ្ដាញសង្គមទាំងនេះមិនអាចទប់ស្កាត់ឱ្យមានប្រសិទ្ធភាពនូវព័ត៌មានមិនពិត និងវោហាសាស្ត្របង្កអរិភាពនោះទេ។ ជំនួសមកវិញ ពួកគេបានដាក់ចេញនូវគោលការណ៍សម្រាប់លេងដើម្បីគ្រប់គ្នាដោយខ្លួនពួកគេផ្ទាល់ទៅវិញ។

Steffen Seibert អ្នកនាំពាក្យរបស់នាយករដ្ឋមន្ត្រីអាល្លឺម៉ង់ សង្កត់ធ្ងន់ថា៖ «ក្រុមអ្នកដឹកនាំ (បណ្ដាញសង្គម) មានតួនាទីធំធេងក្នុងការធានាឱ្យបានប្រាកដថា សារព័ត៌មានផ្នែកនយោបាយមិនត្រូវបានគេបំពុលដោយអរិភាព ការកុហក និងអំពើហិង្សា។ សិទ្ធិសេរីភាពក្នុងការបញ្ចេញមតិអាចត្រូវបានធ្វើអន្តរាគមន៍ ប៉ុន្តែត្រូវតែធ្វើឡើងទៅតាមច្បាប់ ពោលគឺមិនត្រូវគោរពតាមយោបល់របស់អ្នកគ្រប់គ្រងបណ្ដាញសង្គម»។

យោបល់ទាំងឡាយដែលលោកស្រី Merkel ជាអ្នកតំណាង ទទួលបានការចាប់អារម្មណ៍ខ្លាំងនៅអឺរ៉ុប។ នៅប្រទេសបារាំង មិនថាតែក្រុមអ្នកនយោបាយដែលលំអៀងទៅរកលោក Trump នោះទេ សូម្បីតែក្រុមដែលធ្លាប់រិះគន់លោក Trump ក៏មានយល់ប្រឆាំងទៅនឹងការដែល Twitter «គ្រប់គ្រងសេរីភាពក្នុងការបញ្ចេញមតិ» នេះដែរ។

ក្នុងពេលដែលមតិសាធារណជននៅសហរដ្ឋអាមេរិក កំពុងនាំគ្នាជជែកតតាំងអំពីទង្វើរបស់ Twitter ក៏ដូចជាបណ្ដាញសង្គមដទៃទៀត ដែលបានធ្វើចំពោះប្រធានាធិបតីអាមេរិក សហភាពអឺរ៉ុបឯណោះវិញកំពុងតែត្រៀមបញ្ចេញច្បាប់ចំនួនពីរដើម្បីបង្កើនអំណាច និងវិសាលភាពក្នុងការគ្រប់គ្រងបច្ចេកវិទ្យា ដែលសំដៅលើបណ្ដាញសង្គមទាំងនោះ រួមមានច្បាប់សេវាកម្មបច្ចេកវិទ្យា និងច្បាប់ទីផ្សារបច្ចេកវិទ្យា។ ច្បាប់ទាំងនេះ ភាគច្រើនសំដៅទៅលើក្រុមហ៊ុនលំដាប់យក្សក្នុងវិស័យអ៊ីនធើណិត និងបណ្ដាញសង្គម៕

ប្រភព៖ Bloomberg

January 14, 2021

«បិទគណនីរបស់ Trump រៀងរហូត» Facebook និង Twitter ខាតបង់ 51 ពាន់លានដុល្លារពីខ្ទង់តម្លៃមូលធនទីផ្សារ

ក្នុងអំឡុងបញ្ចប់ការជួញដូរកាលពីថ្ងៃទី 12 មករា តម្លៃមូលធនទីផ្សារ (Market Capitalization) សរុបរបស់បណ្ដាញសង្គមដែលមានអ្នកប្រើប្រាស់រាប់ពាន់លាននាក់នេះ បានថយចុះ 47.6 ពាន់លានដុល្លារ បើធៀបនឹងថ្ងៃទី 9 មករា។

នៅក្នុងការជួញដូរពីរលើកកន្លងទៅ ទឹកប្រាក់ចំនួន 41.2 ពាន់លានដុល្លារនៃតម្លៃមូលធនទីផ្សាររបស់ក្រុមហ៊ុន Facebook និង Twitter ត្រូវបានបាត់បង់។ នេះគឺជាបណ្ដាញសង្គមខ្នាតយក្សចំនួនពីរ ក្នុងចំណោមបណ្ដាញសង្គមជាច្រើនដែលបានសម្រេចចិត្តបិទគណនីរបស់ប្រធានាធិបតី Donald Trump ជារៀងរហូត ដោយសារតែចាត់ទុកថា លោក Trump នៅពីក្រោយអំពើហិង្សានៅវិមានសភាអាមេរិក កាលពីសប្ដាហ៍មុន។ ក្រុមហ៊ុនទាំងពីរនេះយល់ថា គណនីរបស់លោក Trump អាចបង្កហានិភ័យទាក់ទិននឹងការប្រើប្រាស់អំពើហិង្សានាពេលខាងមុខ។

មិនយូរប៉ុន្មានបន្ទាប់ពីបានសម្រេចបិទគណនីរបស់ Trump តម្លៃមូលបត្ររបស់ Facebook បានធ្លាក់ចុះ 4% នៅក្នុងថ្ងៃទី 11 មករា និង 2.2% នៅក្នុងថ្ងៃទី 12 មករា។ មូលហេតុដែលនាំឱ្យតម្លៃមូលបត្រត្រូវធ្លាក់ថ្លៃបែបនេះគឺ ព្រោះតែអ្នកវិនិយោគមួយចំនួនយល់ថា ការបិទគណនីរបស់លោក Trump នឹងធ្វើឱ្យមនុស្សមួយចំនួនចាកចេញពី Facebook។ ក្នុងអំឡុងបិទការជួញដូរមូលបត្រកាលពីថ្ងៃទី 12 មករា តម្លៃមូលធនទីផ្សាររបស់ Facebook បានថយចុះ 47.6 ពាន់លានដុល្លារ បើធៀបនឹងថ្ងៃទី 9 មករា។

ចំណែក Twitter វិញ ក៏ស្ថិតក្នុងស្ថានភាពប្រហាក់ប្រហែលគ្នានេះដែរ ខណៈដែលតម្លៃមូលបត្ររបស់ក្រុមហ៊ុននេះ បានថយចុះ 6.4% ក្នុងថ្ងៃទី 11 មករា និង 2.4% ក្នុងថ្ងៃទី 12 មករា។ ការធ្លាក់ថ្លៃនេះ បណ្ដាលឱ្យតម្លៃមូលធនទីផ្សាររបស់ Twitter ត្រូវបាត់បង់ 3.5 ពាន់លានដុល្លារអាមេរិក។ ប៉ុន្តែ ក្នុងថ្ងៃទី 13 មករា កំណើននៃតម្លៃមូលបត្ររបស់ Twitter បានស្ថិតនៅត្រឹម 2.9%។

ក្រៅពី Facebook និង Twitter បណ្ដាញសង្គម Youtube ក៏បានបិទដំណើរការគណនីរបស់លោក Trump រយៈពេលយ៉ាងតិចមួយសប្ដាហ៍ ព្រោះតែបានរំលោភលើគោលការណ៍របស់ក្រុមហ៊ុនទាក់ទងនឹងការញុះញង់ឱ្យមានអំពើហិង្សា។ Snapchat, Reddit និង TikTok ក៏ជាបណ្ដាញសង្គមខ្នាតយក្សដែលសម្រេចចិត្តបិទគណនីរបស់លោក Trump និងបានលុបខ្លឹមសារដែលមានលក្ខណញុះញង់។

គណនីរបស់លោក Donald Trump ត្រូវបាន Twitter បិទដោយគ្មានកាលកំណត់

Google និង Apple ក៏បានធ្វើសកម្មភាពប្រហាក់ប្រហែលនេះទាក់ទិននឹងអំពើហិង្សាកន្លងមក។ Google បានលុប Parler (កម្មវិធីដែលត្រូវបានគេចាត់ទុកថាជាមជ្ឈមណ្ឌលនៃបាតុកម្មបែបអភិរក្សនិយមក្នុងពេលកន្លងនៅសហរដ្ឋអាមេរិក) ចេញពីផ្សារកម្មវិធីរបស់ខ្លួនកាលពីថ្ងៃទី 17 មករា ដើម្បីការពារអ្នកប្រើប្រាស់នៅលើ Google Play។

ក្នុងគ្រានោះដែរ មុនពេលលុបចេញពី App Store ក្រុមហ៊ុន Apple បានស្នើឱ្យ Parler លុបសារដែលបានបំពានគោលការណ៍ក៏ដូចជាលើកឡើងអំពីវិធីសាស្ត្រត្រួតពិនិត្យខ្លឹមសារក្នុងអនាគត ប៉ុន្តែ Parler មិនធ្វើតាម។ បន្ទាប់មក កាលពីថ្ងៃទី 9 មករា Parler ក៏ត្រូវបានលុបចេញពី App Store។

ទាក់ទងនឹង Parler នេះដែរ សេវាកម្ម Amazon Web Services នៃក្រុមហ៊ុន Amazon កាលពីថ្ងៃទី 10 មករា ក៏បានប្រកាសឈប់ជួលម៉ាស៊ីនមេ (server) ទៅឱ្យកម្មវិធីនេះ ព្រោះបានរំលោភលើគោលការណ៍របស់ក្រុមហ៊ុន។

តម្លៃមូលបត្ររបស់ Apple និង Google សុទ្ធតែបានកើនឡើងក្នុងអត្រាទាប ក្រោយពីបានប្រកាសលុប Parler ខណៈមូលបត្រ Amazon បានកើន 1.6%។

CNN កាលពីថ្ងៃទី 11 មករា បានចេញផ្សាយថា លោក Trump អាចនឹងសងសឹកចំពោះបណ្ដាក្រុមហ៊ុនបច្ចេកវិទ្យាដែលបានលុបគណនីរបស់លោកនៅក្នុងសប្ដាហ៍ចុងក្រោយនៃអាណត្តិរបស់ខ្លួន។ ប៉ុន្តែមកដល់បច្ចុប្បន្ន គេមិនទាន់ដឹងច្បាប់អំពីចំណាត់ការរបស់ប្រធានាធិបតីអាមេរិករូបនេះ យ៉ាងណានៅឡើយ៕

ប្រភព៖ Business Insider

January 14, 2021

ប៉ូលិសដើមកំណើតវៀតណាម ចូលរួមបាតុកម្មហិង្សានៅវិមានសភាអាមេរិក កំពុងប្រឈមនឹងផ្លូវច្បាប់

Tam Dinh Pham ដែលជាមន្ត្រីប៉ូលិសអាមេរិកាំងដើមកំណើតវៀតណាមម្នាក់ ត្រូវបានផ្អាកពីការងារ ក្រោយពីបានចូលរួមធ្វើបាតុកម្មគាំទ្រលោក Trump និងរំលោភចូលកាន់កាប់វិមានសភាអាមេរិកកាលពីសប្ដាហ៍មុន។

ប្រធានស្នងការដ្ឋានប៉ូលិសក្រុង Houston លោក Art Acevedo កាលពីថ្ងៃទី 13 មករា បានបញ្ជាក់ថា មន្ត្រីប៉ូលិសម្នាក់របស់ស្នងការដ្ឋាននេះត្រូវបានផ្អាកពីការងារ ព្រោះតែបានចូលរួមធ្វើបាតុកម្មហិង្សានៅវ៉ាស៊ីងតោន ដែលក្រោយមកបានចូល «លុកលុយ» តំបន់ Capitol Hill កាលពីថ្ងៃទី 6 មករា។ មន្ត្រីប៉ូលិសឈ្មោះ Tam Dinh Pham កំពុងត្រូវបានស៊ើងអង្កេត ហើយលោក Acevedo ជឿថា ប៉ូលិសរូបនេះនឹងត្រូវប្រឈមនឹងការចោទប្រកាន់ពីអាជ្ញាធរថ្នាក់ជាតិ។

លោក Acevedo ថ្លែងថា៖ «ពុំមានអ្វីដែលត្រូវនិយាយការពារទង្វើល្មើសច្បាប់ ពិសេសនៅពេលជនល្មើសជាមន្ត្រីប៉ូលិស។ នៅតំបន់ Houston យើងតែងតែដើរតាមគន្លងច្បាប់ជានិច្ច»។

Acevedo ឱ្យដឹងថា នៅល្ងាចថ្ងៃអាទិត្យ ទី 10 មករា ពេលកំពុងសម្រាក ស្រាប់តែលោកទទួលបានអ៊ីមេលពីពលរដ្ឋម្នាក់ ក្នុងនោះមានរូបថតមួយសន្លឹកបង្ហាញថា មានប៉ូលិសម្នាក់បិទមុខ កំពុងកាន់ទង់របស់ Trump នៅឯវិមានសភាជាតិ។ លោក Acevedo ក៏បានចូលមើល Facebook របស់មន្ត្រីនគរបាលខាងលើដើម្បីស្វែងយល់ ហើយក៏រកឃើញថា កូនចៅរបស់ខ្លួនពិតជាមានវត្តមាននៅទីនោះពិតមែន។

«គ្រប់គ្នាមានសិទ្ធិ និងសេរីភាពក្នុងការធ្វើសកម្មភាពទៅតាមច្បាប់វិសោធនកម្មទីមួយ ប៉ុន្តែ ដំបូងខ្ញុំចង់ធានាថា ពួកគេមិនធ្វើអ្វីឱ្យលើសពីដែនកំណត់ និងប្រព្រឹត្តអំពើខុសច្បាប់» លោក Acevedo បន្ថែម។

ទូរទស្សន៍ KPRC 2 នៅ Houston បានផ្សាយថា មន្ត្រីប៉ូលិសខាងលើដែលមានឈ្មោះថា Tam Dinh Pham ត្រូវបានផ្អាកពីការងារចាប់ពីព្រឹកថ្ងៃទី 13 មករា។ លោក Acevedo ឱ្យដឹងថា Pham បានចូលបម្រើការក្នុងជួរប៉ូលិសនៅស្នងការដ្ឋាននគរបាលក្រុងអស់រយៈពេល 18 ឆ្នាំមកហើយ និងមិនធ្លាប់បានបំពានច្បាប់អ្វីនោះទេ។ Pham បានធ្វើដំណើរទៅកាន់ក្រុងវ៉ាស៊ីងតោនតែម្នាក់ឯងដើម្បីចូលរួមធ្វើបាតុកម្ម។

សូមរំលឹកថា ក្រុមបាតុករដែលគាំទ្រលោក Trump បានសម្រុកចូលកាន់កាប់វិមានសភាអាមេរិកកាលពីថ្ងៃទី 6 ខែមករា ក្នុងពេលដែលក្រុមតំណាងរាស្ត្រកំពុងប្រជុំដើម្បីពិចារណាលើការទទួលស្គាល់លទ្ធផលបោះឆ្នោត។ ការរំលោភចូលនេះ បាននាំឱ្យមានអំពើហិង្សាកើតឡើង និងបានសម្លាប់មនុស្សយ៉ាងតិច 5 នាក់។ អាជ្ញាធរបានចាប់ខ្លួនបាតុករមួយចំនួនដែលបានចូលរួមប្រើហិង្សា និងកំពុងស៊ើបអង្កេតលើក្រុមមន្ត្រីប៉ូលិសជាច្រើននាក់ដែលប្រចាំការនៅវិមានសភា ដោយសង្ស័យថា បានគាំទ្រដល់ក្រុមបាតុករ៕

ប្រភព៖ Click2houston

January 14, 2021

ព័រទុយហ្គាល និងស្វីស ដាក់បម្រាមគោចរជាថ្មីដោយសារ Covid-19

កាលពីថ្ងៃទី 13 មករា នាយករដ្ឋមន្ត្រីព័រទុយហ្គាល Antonio Costa បានប្រកាសថា ប្រទេសនេះនឹងដាក់បម្រាមគោចរជាថ្មីដើម្បីទប់ស្កាត់ការឆ្លងរាលដាលនៃវីរុសដែលបង្កជំងឺរលាកសួត Covid-19។

នៅក្នុងកិច្ចប្រជុំពិសេសនៃគណៈរដ្ឋមន្ត្រី លោក Antonio Costa ថ្លែងថា បទបញ្ជាបម្រាមគោចរថ្មីនេះនឹងមានសុពលភាពចាប់ពីថ្ងៃទី 15 ខែមករា ឆ្នាំ 2021 ក្នុងនោះនឹងរួមមានទាំងវិធានការរឹតបន្តឹងការធ្វើដំណើរដូចដែលបានធ្វើឡើងកាលពីខែមីនា និងខែមេសា ឆ្នាំទៅ។ ហាងទំនិញមិនចាំបាច់ ហាងកាហ្វេ ភោជនីយដ្ឋានជាដើម ត្រូវតែបិទទ្វារផ្អាកដំណើរការជាបណ្ដោះអាសន្ន លើកលែងតែសាលារៀន។ ទន្ទឹមនឹងនេះ ពលរដ្ឋក៏ត្រូវបានស្នើឱ្យនៅក្នុងផ្ទះ ប៉ុន្តែអាចចេញទៅបោះឆ្នោតជ្រើសរើសប្រធានាធិបតីជុំដំបូង ដែលនឹងត្រូវធ្វើឡើងនៅថ្ងៃទី 24 មករាខាងក្នុង។ លោក Costa បញ្ជាក់ថា ចាប់ពីថ្ងៃទី 17 មករា ពលរដ្ឋប្រទេសនេះអាចទៅបោះឆ្នោតមុនកាលកំណត់បាន។

នៅក្នុងរយៈពេល 24 ម៉ោងកន្លងទៅ ព័រទុយហ្គាលបានរកឃើញអ្នកឆ្លងវីរុស Covid-19 ថ្មីចំនួន 10,556 នាក់ និងស្លាប់ចំនួន 156 នាក់ នាំឱ្យតួលេខសរុបនៃអ្នកវិជ្ជមានកើនដល់ជាង 500,000 នាក់ និងស្លាប់ជាង 8,000 នាក់។

ទន្ទឹមនឹងព័រទុយហ្គាល រដ្ឋាភិបាលស្វីសក៏បានប្រកាសថានឹងដាក់បម្រាមគោចរ ហើយវិធានការតឹងរ៉ឹងនឹងត្រូវបានអនុវត្តចាប់ពីថ្ងៃទី 18 មករា ខាងមុខ។ ប្រទេសនេះ ក្នុងរយៈពេលមួយថ្ងៃនិងមួយយប់កន្លងទៅ បានរកឃើញអ្នកវិជ្ជមាននឹង Covid-19 ថ្មីចំនួន 3,001 នាក់ ធ្វើឱ្យតួលេខសរុបនៃអ្នកវិជ្ជមានឡើងដល់ជាង 490,000 នាក់ និងស្លាប់ជាង 8,500 នាក់៕

ប្រភព៖ RT

January 14, 2021

Category: អន្តរជាតិ