អន្តរជាតិ - La Reine Media

បាតុករប្រឆាំងរដ្ឋប្រហារយោធានៅមីយ៉ានម៉ា ចាប់ផ្ដើមបង្ហាញសញ្ញាយកគំរូតាមបាតុករថៃ

មនុស្សប្រមាណ 200 នាក់ ដែលជានិស្សិត និងគ្រូបង្រៀននៅសាកលវិទ្យាល័យ Dagon នៃទីក្រុង Yangon របស់មីយ៉ានម៉ា នាំគ្នាចេញធ្វើបាតុកម្មប្រឆាំងនឹងអំពើរដ្ឋប្រហាររបស់កងទ័ពដែលបានដណ្ដើមអំណាចពីរដ្ឋាភិបាលរបស់លោកស្រី Suu Kyi។

នៅក្នុងបាតុកម្មនាថ្ងៃទី 5 កុម្ភៈនេះ គេឃើញក្រុមគ្រូបង្រៀនចងក្រណាត់ក្រហមនៅលើដៃ ដែលជាពណ៌របស់គណបក្សសម្ព័ន្ធជាតិដើម្បីប្រជាធិបតី (NLD) របស់លោកស្រី Aung San Suu Kyi ខណៈដែលក្រុមនិស្សិតលើកម្រាមដៃចំនួន 3 ស្រែកហ៊ោថា «អ្នកម្ដាយ Suu អមត!» (ទម្លាប់របស់ពលរដ្ឋមីយ៉ានម៉ាមួយចំនួន ដែលតែងហៅលោកស្រី Suu Kyi បែបនេះ)។ នេះគឺជាសញ្ញាមួយចំនួនដែលបង្ហាញថា ជាការយកគំរូតាមបាតុករនៅប្រទេសថៃ។

ក្រុមបាតុករមីយ៉ានម៉ា បានហែក្បួនព័ទ្ធជុំវិញទីលានរបស់សាកលវិទ្យាល័យ Dagon និងបាននាំគ្នាស្រែកច្រៀងចម្រៀងបដិវត្តដ៏ល្បីឈ្មោះ។

«ក្នុងនាមជាពលរដ្ឋម្នាក់ ខ្ញុំមិនទទួលយកការធ្វើរដ្ឋប្រហារយោធាបែបនេះ។ យើងត្រូវតែប្រឆាំងនឹងអំពើកៀបសង្កត់នេះ» គ្រូបង្រៀនឈ្មោះ Win Win Maw និយាយដូច្នេះ ខណៈដែលនិស្សិតឈ្មោះ Min Sithu អះអាងថា៖ «យើងនឹងមិនបណ្ដោយឱ្យជំនាន់របស់យើង ត្រូវរស់ក្រោមរដ្ឋអំណាចយោធាបែបនេះជាដាច់ខាត»។

បាតុកម្មខាងលើបានកើតឡើង បន្ទាប់ពី Win Htein ដែលជាថ្នាក់ដឹកនាំជាន់ខ្ពស់របស់បក្ស NLD និងជំនួយការសំខាន់របស់លោកស្រី Suu Kyi ត្រូវបានចាប់ខ្លួន។

ចលនាប្រឆាំងដែលមានឈ្មោះថា «Myanmar Civil Disobedience Movement» បានអំពាវនាវនៅលើបណ្ដាញសង្គមឱ្យប្រជាជនសម្ដែងការជំទាស់នឹងរដ្ឋប្រហារយោធា ដោយការគោះឆ្នាំង ឬខ្ទះជារៀងរាល់យប់។

សូមរំលឹកថា កងទ័ពមីយ៉ានម៉ា បានធ្វើរដ្ឋប្រហារយោធា ដែលចាប់ផ្ដើមដោយការចាប់ឃុំខ្លួនលោកស្រី Suu Kyi និងថ្នាក់ដឹកនាំជាន់ខ្ពស់មួយចំនួនរបស់រដ្ឋាភិបាលស៊ីវិល ក្រោយពីអាជ្ញាធរ និងគណៈកម្មការរៀបចំការបោះឆ្នោត បានបដិសេធការតវ៉ារបស់កងទ័ព ស្ដីអំពីបញ្ហាលួចបន្លំសន្លឹកឆ្នោតនៅក្នុងការបោះឆ្នោតសភាកាលពីចុងឆ្នាំ 2020។ កងទ័ព និងប៉ូលិស ក្រោយមកក៏បានចោទប្រកាន់លោកស្រី Suu Kyi ថា បាននាំចូលដោយខុសច្បាប់នូវវិទ្យុទាក់ទង និងបានសម្រេចឃុំខ្លួនលោកស្រីរហូតដល់ថ្ងៃទី 15 កុម្ភៈ ដើម្បីបន្តស៊ើបអង្កេត។

សមាគមជំនួយអ្នកទោសនយោបាយរបស់មីយ៉ានម៉ា (AAPP) កាលពីថ្ងៃទី 4 កុម្ភៈ បានឱ្យដឹងថា មនុស្សប្រមាណជា 147 នាក់ ត្រូវបានចាប់ឃុំខ្លួន បន្ទាប់ពីមានរដ្ឋប្រហារ ក្នុងនោះក៏មានក្រុមសកម្មភាព តំណាងរាស្ត្រ និងមន្ត្រីក្នុងរដ្ឋាភិបាលរបស់លោកស្រី Suu Kyi ផងដែរ៕

ប្រភព៖ AFP, RT

February 5, 2021

រដ្ឋប្រហារយោធាជាច្រើនដែលធ្វើឱ្យកក្រើកពិភពលោក អំឡុង 10ឆ្នាំកន្លងមកនេះ

ការធ្វើរដ្ឋប្រហារយោធានៅមីយ៉ានម៉ា ធ្វើឱ្យគេនឹកឃើញដល់រដ្ឋប្រហារនានាដែលបានកើតឡើងក្នុងអំឡុងមួយទសវត្សរ៍កន្លងទៅនេះ ក្នុងនោះ អាហ្វ្រិកគឺជាទ្វីបដែលកើតមានអំពើរដ្ឋប្រហារច្រើនជាងគេបង្អស់។

ប្រទេសម៉ាលី (Mali) នៅអាហ្វ្រិកខាងលិច

កាលពីថ្ងៃទី 18 ខែសីហា ឆ្នាំ 2020 កងទ័ពម៉ាលីបានធ្វើរដ្ឋប្រហារនៅក្នុងមូលដ្ឋានទ័ពធំមួយនៅក្បែររដ្ឋធានី បាម៉ាកូ (Bamako)។ ក្រុមទាហានបះបោរបានស្នើឱ្យធ្វើកំណែទម្រង់នយោបាយ ការប្រគល់អំណាច និងធ្វើការបោះឆ្នោត។ មន្ត្រីជាន់ខ្ពស់ជាច្រើនរូបរបស់រដ្ឋាភិបាលត្រូវបានចាប់ឃុំខ្លួន ក្នុងនោះមានប្រធានាធិបតី Ibrahim Boubacar Keita និងនាយករដ្ឋមន្ត្រី Boubou Cisse ផងដែរ។

ប្រទេសស៊ូដង់ (Sudan) នៅអាហ្វ្រិកខាងជើង

កងទ័ពស៊ូដង់បានផ្ដួលរំលំ និងចាប់ខ្លួនប្រធានាធិបតីកាន់អំណាចជិត 30 ឆ្នាំ Omar al-Bashir កាលពីថ្ងៃទី 11 មេសា 2019 នាំឱ្យក្រុមប្រឹក្សាយោធាឡើងកាន់អំណាច ក្រោយពីមានបាតុកម្មប្រឆាំងរដ្ឋាភិបាលដែលធ្វើឱ្យកក្រើកទឹកដីនេះអស់រយៈពេលជាច្រើនខែ។ Omar al-Bashir ត្រូវបានចោទប្រកាន់ពីបទទាក់ទិននឹងអំពើសម្លាប់រង្គាលបាតុករ លួចបន្លំហិរញ្ញវត្ថុ។ បច្ចុប្បន្ន លោក Bashir កំពុងត្រូវជាប់ពន្ធនាគារ 2 ឆ្នាំ។

ហ្ស៊ីមបាវ៉េ (Zimbabwe) នៅអាហ្វ្រិកខាងត្បូង

កាលពីថ្ងៃទី 15 វិច្ឆិកា 2017 កងទ័ពរបស់ប្រទេសហ្ស៊ីមបាវ៉េ បានបង្ខំឱ្យប្រធានាធិបតី Robert Mugabe ដែលកាន់អំណាចយូរជាងគេនៅអាហ្វ្រិក ឱ្យចុះចេញពីតំណែង ក្រោយពីត្រូវបានឃុំខ្លួនក្នុងផ្ទះមួយរយៈពេល។ រដ្ឋប្រហារត្រូវបានធ្វើឡើងក្នុងបំណងរារាំង Mugabe ផ្ទេរអំណាចទៅឱ្យភរិយារបស់ខ្លួន គឺលោកស្រី Grace Mugabe។

បួរគីណាហ្វាសូ (Burkina Faso) នៅអាហ្វ្រិកខាងលិច

កងវរសេនាធំទទួលបន្ទុកការពារប្រធានាធិបតី (RSP) ដែលជាអង្គភាពពាក់កណ្ដាលកងទ័ពដែលត្រូវបានបង្កើតឡើងក្នុងសម័យប្រធានាធិបតី Blaise Compaore កាលពីថ្ងៃទី 16 កញ្ញា 2015 បានចាប់ខ្លួនសមាជិកគណរដ្ឋមន្ត្រីប្រទេសនេះ ក្នុងនោះមានប្រធានាធិបតីស្ដីទី Michel Kafando នាយករដ្ឋមន្ត្រី Yacouba Isasc Zida (អតីតអគ្គមេបញ្ជាការរបស់ RSP)។ មូលហេតុនៃរដ្ឋប្រហារនេះ កើតឡើងដោយសារអស្ថិរភាពនយោបាយដែលបណ្ដាលមកពីរដ្ឋប្រហារឆ្នាំ 1987។

ប្រទេសថៃ

អំឡុងពាក់កណ្ដាលឆ្នាំ 2014 ប្រទេសថៃបានធ្លាក់ទៅក្នុងវិបត្តិអស្ថិរភាពនយោបាយ នៅពេលបាតុកម្មរបស់ក្រុមប្រឆាំងបានកើតមានទ្រង់ទ្រាយធំ នាំឱ្យមានការប៉ះទង្គិចគ្នារវាងក្រុមប្រឆាំងនិងក្រុមគាំទ្រត្រកូល Shiawatra។

ខែឧសភា ឆ្នាំ 2014 កងទ័ពថៃបានធ្វើរដ្ឋប្រហារ ដោយប្រើជ័យឃោសន៍ «ផ្សះផ្សាជាតិ»។ រដ្ឋប្រហារនេះបានទម្លាក់នាយករដ្ឋមន្ត្រីថៃ លោកស្រី Yingluck Shinawatra និងដកហូតអំណាចរបស់លោក Thaksin Shinawatra ដែលជាបងប្រុសរបស់លោកស្រី Yingluck។

ប្រទេសអេហ្ស៊ីប នៅភាគឦសាននៃទ្វីបអាហ្វ្រិក

ឆ្នាំ 2012 ក្រុម «បងប្អូនមូស្លីម/ភាតរភាពមូស្លីម» (Muslim Brotherhood) បានឆ្លៀតយកបញ្ហាអស្ថិរភាពនយោបាយនៅអេហ្ស៊ីប ក្រោយប្រធានាធិបតី Hosni Mubarak ត្រូវបានផ្ដួលរំលំកាលពីឆ្នាំ 2011 ជួយឱ្យលោក Mohamed Morsi ឡើងកាន់អំណាច។ ប៉ុន្តែ នៅខែកក្កដា 2013 ក្រោយពីបាតុកម្ម និងអស្ថិរភាពដែលទាក់ទងនឹងការដឹកនាំរបស់ក្រុមភាតរភាពមូស្លីម អគ្គមេបញ្ជាការកងទ័ពអេហ្ស៊ីប ឧត្ដមសេនីយ៍ Abdel Fattah al-Sisi បានធ្វើរដ្ឋប្រហារយោធា ទម្លាក់ប្រធានាធិបតី Mohamed Morsi។ ក្រុមភាតរភាពមូស្លីម ក្រោយមកក៏ត្រូវបានបញ្ចូលទៅក្នុងបញ្ជីភេរវកម្ម។

សាធារណរដ្ឋអាហ្វ្រិកកណ្ដាល (Central African Republic)

ថ្ងៃទី 24 មីនា 2013 សាធារណរដ្ឋអាហ្វ្រិកកណ្ដាល បានធ្លាក់ទៅក្នុងវិបត្តិនយោបាយនៅពេលកងកម្លាំង Seleka ដែលភាគច្រើនជាអ្នកកាន់សាសនាអ៊ីស្លាម បានផ្ដួលរំលំប្រធានាធិបតី Francois Bozize ដែលជាអ្នកកាន់សាសនាគ្រិស្ត។ មេដឹកនាំរដ្ឋប្រហារ Michel Jotodia បានឡើងធ្វើជាប្រធានាធិបតី ខណៈ Bozizet ត្រូវរត់ភៀសខ្លួនទៅកាន់ កាមេរូន។

ហ្គីណេប៊ីសូ (Guinea-Bissau)

ថ្ងៃទី 12 មេសា 2012 រដ្ឋប្រហារបានកើតឡើងនៅចំពេលដែលការបោះឆ្នោតប្រធានាធិបតីជុំទីពីរដើម្បីជ្រើសរើសបេក្ខភាព Carlos Gomes Junior និង Kumba Iala ជិតចូលមកដល់។

កងទ័ពហ្គីណេប៊ីសូបានគ្រប់គ្រងប្រទេសស្ទើរតែទាំងស្រុង។ ប្រធានាធិបតីស្ដីទី Raymund Pereira និងអតីតនាយករដ្ឋមន្ត្រី និងជាបេក្ខភាពប្រធានាធិបតី លោក Gomes Junior ក៏ត្រូវបានចាប់ខ្លួន។ ខែមេសា 2014 Jose Mario Vaz មកពីបក្ស អាហ្វ្រិកដើម្បីឯករាជ្យរបស់ហ្គីណេប៊ីសូនិងកាបវែរ ត្រូវបានជ្រើសរើសជាប្រធានាធិបតីនៅក្នុងការបោះឆ្នោតសភា៕

ប្រភព៖ Sputnik

February 5, 2021

ទារកអាយុ 8ខែម្នាក់ នៅវៀតណាម ឆ្លង Covid-19

ក្រោយពីត្រូវបាននាំទៅធ្វើចត្តាឡីស័ក ព្រោះតែជាប់ទាក់ទងនឹងករណីឆ្លង Covid-19 នៅខេត្ត Hai Duong ទារិកាអាយុ 8 ខែម្នាក់នៅខេត្ត Binh Duong ជាប់ព្រំប្រទល់នឹងក្រុងហូជីមិញនៃប្រទេសវៀតណាម ទទួលបានលទ្ធផលវិជ្ជមាននឹង Covid-19។

ព័ត៌មានខាងលើនេះត្រូវបានវេជ្ជបណ្ឌិត Nguyen Hong Chuong ប្រធានមន្ទីរសុខាភិបាលខេត្ត Binh Duong ឱ្យដឹង កាលពីប៉ុន្មានម៉ោងមុននេះ។

យ៉ាងនេះក្ដី ក្រសួងសុខាភិបាលវៀតណាមបានបញ្ជាក់ថា ដោយសារតែទារិកានេះត្រូវបាននាំទៅធ្វើចត្តាឡីស័កតាំងតែពីដំបូង ដូច្នេះ លទ្ធភាពនៃការចម្លងវីរុសទៅអ្នកដទៃគឺមិនមាននោះទេ។

គិតមកដល់ថ្ងៃទី 4 កុម្ភៈនេះ ប្រទេសវៀតណាមបានរកឃើញអ្នកវិជ្ជមាននឹង Covid-19 សរុបចំនួន 1,948 នាក់ ក្នុងនោះមាន 449 នាក់កំពុងព្យាបាល និង 1,461 បានជាសះស្បើយ ខណៈ 35 នាក់បានបាត់បង់ជីវិត៕

February 4, 2021

បាតុកម្មនៅមីយ៉ានម៉ា ដើម្បីប្រឆាំងនឹងរដ្ឋប្រហាររបស់កងទ័ព បានចាប់ផ្ដើមហើយ!

ពលរដ្ឋមួយក្រុមនៅ Mandalay ដែលជាទីក្រុងធំលំដាប់ទីពីររបស់មីយ៉ានម៉ា បានជួបជុំគ្នាដើម្បីធ្វើបាតុកម្ម ដោយនាំគ្នាស្រែក និងលើកបដាប្រឆាំងនឹងការធ្វើរដ្ឋប្រហាររបស់កងទ័ពប្រទេសនេះ។

យោងតាមវីដេអូ និងរូបភាពនៅលើបណ្ដាញសង្គម ពលរដ្ឋមីយ៉ានម៉ារាប់សិបនាក់ ថ្ងៃនេះបានប្រមូលផ្ដុំគ្នានៅខាងក្រៅសាកលវិទ្យាល័យវេជ្ជសាស្ត្រ Mandalay ដោយលើកបដាដែលមានសរសេរថា «ប្រជាជនធ្វើបាតុកម្មប្រឆាំងនឹងរដ្ឋប្រហារយោធា»។ ក្រុមបាតុករក៏នាំគ្នាស្រែកថា «ថ្នាក់ដឹកនាំរបស់យើងត្រូវបានចាប់ខ្លួន ចូរដោះលែងពួកគេជាបន្ទាន់»។

សូមរំលឹកថា កងទ័ពមីយ៉ានម៉ា កាលពីថ្ងៃទី 1 កុម្ភៈ បានឆ្មក់ចូលចាប់ខ្លួនក្រុមមេដឹកនាំរបស់គណបក្សសម្ព័ន្ធជាតិដើម្បីប្រជាធិបតេយ្យ (NLD) ដែលមានដូចជា ទីប្រឹក្សារដ្ឋ លោកស្រី Aung San Suu Kyi និងប្រធានាធិបតី Win Myint ជាដើម។ កងរថពាសដែក និងទាហានមីយ៉ានម៉ា ក្រោយមកក៏ត្រូវបានដាក់ពង្រាយយ៉ាងឆាប់រហ័សទៅកាន់ទីក្រុងធំៗរបស់ប្រទេសនេះ។ មូលហេតុនៃការធ្វើរដ្ឋប្រហារនេះ ត្រូវបានកងទ័ពនិយាយថា ដើម្បីប្រឆាំងនឹងការដែលអាជ្ញាធរមិនបានដោះស្រាយបញ្ហាទាក់ទងនឹងការលួចបន្លំសន្លឹកឆ្នោតនៅក្នុងការបោះឆ្នោតសភាកាលពីចុងឆ្នាំ 2020។

នៅចំពោះមុខកម្លាំងដ៏ខ្លាំងក្លារបស់កងទ័ព ប្រជាជនមីយ៉ានម៉ា មានតែជ្រើសរើសវិធីទន់ភ្លន់ដើម្បីសម្ដែងការប្រឆាំងទៅនឹងរដ្ឋប្រហារ ដូចជាការបង្ហោះរូបថតនៅលើបណ្ដាញសង្គម ការធ្វើកូដកម្ម ការស្រែកច្រៀងចម្រៀងប្រជាធិបតេយ្យ និងនាំគ្នាគោះឆ្នាំង ខ្ទះ និងចុចស៊ីផ្លេឡាន ម៉ូតូជាដើម។

សកម្មភាពរបស់ប្រជាជននៅក្នុងទីក្រុង Mandalay នាថ្ងៃនេះគឺជាបាតុកម្មដំបូងគេនៅមីយ៉ានម៉ា រាប់ចាប់ពីរដ្ឋប្រហារត្រូវបានធ្វើឡើង។ មុននេះ បាតុកម្មនានាដែលបានធ្វើឡើងដើម្បីប្រឆាំងនឹងរបបរបស់ឧត្ដមសេនីយ៍ Ne Win ក្នុងឆ្នាំ 1988 ត្រូវបានកងទ័ពបង្ក្រាបយ៉ាងចាស់ដៃ។ ខែកញ្ញា ឆ្នាំ 1988 រដ្ឋប្រហារមួយផ្សេងទៀតបានកើតឡើង នាំឱ្យមានការបង្កើតក្រុមប្រឹក្សាស្ដារស្ថិរភាព និងច្បាប់ជាតិ (SLORC)។ ក្នុងអំឡុង SLORC កាន់កាប់អំណាច មេដឹកនាំស៊ីវិល សកម្មភាព និងអ្នកកាសែតរាប់ពាន់នាក់ត្រូវបានចាប់ដាក់ពន្ធនាគារអស់ជាច្រើនទសវត្សរ៍៕

ប្រភព៖ Reuters

February 4, 2021

អាចម៍ផ្កាយធំប៉ុនអគារ Chrysler ហោះក្បែរផែនដីក្នុងល្បឿនលឿនជាងសំឡេង 55ដង

អាចម៍ផ្កាយដ៏ធំមួយមានអង្កត់ផ្ចិតចាប់ពី 140-310 ម៉ែត្រ ទើបតែបានហោះក្បែរផែនដី ជាមួយនឹងល្បឿនលឿនជាងគ្រាប់កាំភ្លើង AK ដល់ទៅ 20 ដង។

អាចម៍ផ្កាយមួយដុំដែលមានឈ្មោះថា 2016 CL136 នេះ បានហោះមកជិតផែនដីបំផុតនៅវេលាម៉ោង 5 និង 26 នាទី កាលពីថ្ងៃទី 2 កុម្ភៈ នេះបើតាមមជ្ឈមណ្ឌលស្រាវជ្រាវវត្ថុអវកាសក្បែរផែន (CNEOS)។ តាមការសង្កេត ក្រុមអ្នកវិទ្យាសាស្ត្រដឹងថា អាចម៍ផ្កាយនេះមានអង្កត់ផ្ចិចប្រមាណពី 140 ដល់ 310 ម៉ែត្រ ប៉ុនអគារ Chrysler នៅទីក្រុង New York ឬតួអង់តែន Eiffel Tower នៅទីក្រុងប៉ារីសរបស់បារាំង។ អង្កត់ផ្ចិតធំបំផុតរបស់អាចម៍ផ្កាយនេះ មានទំហំប៉ុន មហាពីរ៉ាមីតហ្គីហ្សា (The Great Pyramid of Giza) នៅអេហ្ស៊ីប។

2016 CL136 ហោះក្បែរផែនដីក្នុងរយៈចម្ងាយ 5.3 លានគីឡូម៉ែត្រ ឆ្ងាយជាង 14 ដង បើធៀបនឹងគម្លាតមធ្យមរវាងផែនដីជាមួយនឹងព្រះចន្ទ។ 2016 CL136 ហោះក្នុងល្បឿន 65,017 គម/ម៉ោង លឿនជាងគ្រាប់កាំភ្លើង AK 20 ដង និងលឿនជាងសំឡេង 55 ដង ពោលគឺស្មើនឹង 1/5 នៃល្បឿនរបស់រន្ទះបាញ់។

បើសិនជា 2016 CL136 ហោះមកបុកផែនដី វានឹងបង្កឱ្យមានមហន្តរាយធំធេងកម្រិតតំបន់ ក៏ប៉ុន្តែ ក្រុមអ្នកជំនាញបញ្ជាក់ថា 2016 CL136 នឹងមិនមានលទ្ធភាពក្នុងការហោះមកបុកផែនដីនោះទេនៅក្នុងអនាគតជិតៗនេះ។

2016 CL136 គឺជាអាចម៍ផ្កាយមួយដុំនៅក្នុងចំណោមវត្ថុអវកាសជាច្រើនដែលកំពុងគោចរក្បែរផែនដី (NEO) និងហោះជុំវិញព្រះអាទិត្យ។ ក្រុមអាចម៍ផ្កាយ ឬផ្កាយដុះកន្ទុយដែលហោះហើរក្នុងរយៈចម្ងាយក្រោម 48 លានគីឡូម៉ែត្រពីផែនដី ត្រូវបានគេចាត់ទុកថាជា NEO។ គិតមកដល់បច្ចុប្បន្ន NEO ដែលត្រូវបានរកឃើញសរុប មានចំនួនប្រមាណជា 25,000 ដុំ។ NASA បានឱ្យដឹងថា វត្ថុអវកាសទាំងនេះ នឹងមិនមានឱកាសហោះមកបុកផែនដីនោះទេ រាប់ចាប់ពីពេលនេះរហូតដល់ដំណាច់សតវត្សរ៍ក្រោយ៕

ប្រភព៖ Newsweek

February 4, 2021

កងទ័ពមីយ៉ានម៉ាស្នើឱ្យក្រុមតំណាងរាស្ត្រ ចាកចេញពីរដ្ឋធានីណៃពីដោ

កងទ័ពនៃប្រទេសមីយ៉ានម៉ា បានស្នើឱ្យក្រុមតំណាងរាស្ត្រដែលទើបបានជាប់ឆ្នោត ចាកចេញពីរដ្ឋធានី ណៃពីដោ ដោយទុកពេលឱ្យ 24 ម៉ោង ក្រោយពីកងទ័ពបានធ្វើរដ្ឋប្រហារ និងឡើងគ្រប់គ្រងអំណាច។

តំណាងរាស្ត្រទាំងឡាយរបស់មីយ៉ានម៉ាដែលទើបត្រូវបានជ្រើសរើសនៅក្នុងការបោះឆ្នោតកាលពីខែវិច្ឆិកា ឆ្នាំ 2020 បានធ្វើដំណើរមកកាន់រដ្ឋធានី ណៃពីដោ ដើម្បីចូលរួមកិច្ចប្រជុំដំបូងរបស់សភាកាលពីថ្ងៃទី 1 កុម្ភៈ ប៉ុន្តែប៉ុន្មានម៉ោងមុនកិច្ចប្រជុំ កងទ័ពក៏បានធ្វើរដ្ឋប្រហារ។ បន្ទាប់មក កងទ័ពក៏បានឃុំខ្លួនតំណាងរាស្ត្រទាំងនោះនៅក្នុងអគារមួយរបស់រដ្ឋាភិបាល។

តំណាសរាស្ត្រ U Aung Kyi Nyunt មកពីបក្សសម្ព័ន្ធជាតិដើម្បីប្រជាធិបតេយ្យ (NLD) បានឱ្យដឹងថា នៅវេលាម៉ោងប្រហែល 10 ថ្ងៃទី 3 កុម្ភៈ កងទ័ពបានបញ្ជាឱ្យនាំខ្លួនក្រុមតំណាងរាស្ត្រនេះចាកចេញពីរដ្ឋធានី ណៃពីដោ ដោយទុកពេលឱ្យ 24 ម៉ោង ហើយកងទ័ពនឹងយករថយន្តដឹកទំនិញមកដឹកពួកគេ។ តំណាងរាស្ត្រចំនួន 387 នាក់កំពុងស្ថិតនៅក្នុងអគាររដ្ឋាភិបាល ក្នុងគ្រាដែលកងទ័ពចេញបញ្ជានេះ។

កាលពីមួយថ្ងៃមុននោះ កងទ័ពក៏បានចេញបញ្ជាស្រដៀងគ្នានេះដែរ ប៉ុន្តែក្រុមតំណាងរាស្ត្រ NLD ឆ្លើយថា ពួកគេរង់ចាំការណែនាំពីថ្នាក់ដឹកនាំរបស់បក្ស។ NLD ក្រោយមកក៏បានស្នើកងទ័ពអនុញ្ញាតឱ្យក្រុមតំណាងរាស្ត្រស្នាក់នៅក្នុងរដ្ឋធានីរហូតដល់ថ្ងៃទី 6 កុម្ភៈ។

យ៉ាងនេះក្ដី កងទ័ពក៏បន្តស្នើឱ្យក្រុមតំណាងរាស្ត្រចាកចេញពីរដ្ឋធានី ណៃពីដោ ក្រោយពីមានការអំពាវនាវឱ្យ «បើកកិច្ចប្រជុំសភា» នៅក្នុងអគាររដ្ឋាភិបាលដែលក្រុមតំណាងរាស្ត្រកំពុងត្រូវបានឃុំខ្លួននេះតែម្ដង ដោយសារសមាជិកសភាមានចំនួនច្រើនជាងតួលេខអប្បបរមាដែលអាចបើកកិច្ចប្រជុំដូចធម្មតាបាន។

U Aung Kyi Nyunt បានឱ្យដឹងថា ក្រុមតំណាងរាស្ត្រនឹងចាកចេញពីរដ្ឋធានី និង «មានផែនការមួយរួចជាស្រេចហើយ»។ Sai Thiha Kyaw តំណាងរាស្ត្រនៃសភាជាន់ទាបមកពីសហព័ន្ធជាតិនៃរដ្ឋ Shan ដើម្បីប្រជាធិបតេយ្យ បានឱ្យដឹងថា បានត្រលប់ទៅស្រុកកំណើត ហើយថាបក្សនេះនឹងបើកកិច្ចប្រជុំដើម្បីសម្រេចជ្រើសរើសជំហានបន្ទាប់។ Sai Thiha Kyaw ថ្លែងថា៖ «ក្នុងនាមជាតំណាងរាស្ត្រដែលត្រូវបានបោះឆ្នោត ខ្ញុំនឹងធ្វើតាមបំណងប្រាថ្នារបស់ម្ចាស់ឆ្នោត»។

ឧត្ដមសេវីយ៍ Min Aung Hlaing អគ្គមេបញ្ជាការកងទ័ពនៃប្រទេសមីយ៉ានម៉ា

កងទ័ពមីយ៉ាម៉ា កាលពីថ្ងៃទី 1 កុម្ភៈ បានចាប់ខ្លួនទីប្រឹក្សារដ្ឋ លោកស្រី Aung San Suu Kyi រួមនឹងប្រធានាធិបតី Win Myint និងថ្នាក់ដឹកនាំជាន់ខ្ពស់ជាច្រើនរូបរបស់គណបក្សសម្ព័ន្ធជាតិដើម្បីប្រជាធិបតេយ្យ (NLD) ដែលកំពុងត្រូវបានគេដណ្ដើមអំណាចនាបច្ចុប្បន្ន ដោយត្រូវបានចោទប្រកាន់ថា លួចបន្លំសន្លឹកឆ្នោតនៅក្នុងការបោះឆ្នោតកាលពីខែវិច្ឆិកា ឆ្នាំ 2020។ លោកស្រី Suu Kyi ក្រោយមកក៏ត្រូវបានចោទប្រកាន់ពីបទនាំចូលខុសច្បាប់ ទាក់ទងនឹងកូនវិទ្យុមួយគ្រឿងដែលរកឃើញនៅក្នុងគេហដ្ឋានរបស់លោកស្រី ហើយបើសិនជាត្រូវបានកាត់ទោស លោកស្រីអាចត្រូវជាប់ពន្ធនាគារ 3 ឆ្នាំ។

បច្ចុប្បន្ន ប្រទេសមីយ៉ានម៉ាន ត្រូវបានគ្រប់គ្រងដោយឧត្តមសេនីយ៍ផុតលេខ Min Aung Hlaing អគ្គមេបញ្ជាការកងទ័ពមីយ៉ានម៉ា។ ស្ថានការណ៍នេះនឹងត្រូវអូសបន្លាយរហូតដល់មានការបោះឆ្នោតថ្មីនាឆ្នាំក្រោយ។

ឧត្តមសេនីយ៍ Min Aung Hlaing អះអាងថា ការដែលកងទ័ពធ្វើរដ្ឋប្រហារគឺជារឿងស្របច្បាប់ ព្រោះថា អាជ្ញាធរមិនអាចដោះស្រាយនូវការតវ៉ារបស់ពួកគេទាក់ទិននឹងការចោទប្រកាន់ថាមានការលួចបន្លំសន្លឹកឆ្នោតនៅក្នុងការបោះឆ្នោតកាលពីចុងឆ្នាំ 2020។

បាតុកម្មប្រឆាំងនឹងរដ្ឋប្រហារយោធានៅមីយ៉ានម៉ា ក៏ត្រូវបានធ្វើឡើងនៅក្នុងប្រទេសមួយចំនួន ដូចជានៅប្រទេសថៃ និងជប៉ុនជាដើម។

សមាជិកនៃក្រុមប្រឹក្សាសន្តិសុខរបស់អង្គការសហប្រជាជាតិ កាលពីថ្ងៃទី 3 កុម្ភៈ បានបើកកិច្ចប្រជុំបន្ទាន់មួយស្ដីអំពីស្ថានការណ៍នៅមីយ៉ានម៉ា ប៉ុន្តែមិនទាន់មានសេចក្ដីសម្រេចណាមួយត្រូវបានប្រកាសនោះទេ ដោយសារមានការខ្វែងគំនិតគ្នាមួយចំនួន។ ប្រភពព័ត៌មានមួយបានឱ្យដឹងថា ភាគីចិន និងរុស្ស៊ី ស្នើឱ្យមានការពន្យារពេលបន្ថែមទៀតដើម្បីពិភាក្សាលម្អិត។

ក្រុមរដ្ឋមន្ត្រីការបរទេស G7 ដែលរួមមាន អង់គ្លេស កាណាដា បារាំង អាល្លឺម៉ង់ អ៊ីតាលី ជប៉ុន និងសហរដ្ឋអាមេរិក បានចេញសេចក្ដីប្រកាសរួម សម្ដែងការព្រួយបារម្ភយ៉ាងខ្លាំងចំពោះស្ថានការណ៍នៅមីយ៉ានម៉ា និងបានជំរុញឱ្យកងទ័ពប្រទេសនេះ ដោះលែងក្រុមអ្នកនយោបាយទាំងអស់ដែលត្រូវបានចាប់ខ្លួន៕

ប្រភព៖ Irrawaddy

February 4, 2021

Covid-19! កម្ពុជាមានករណីឆ្លងថ្មីចំនួន 1នាក់ ខណៈអ្នកវិជ្ជមានសរុបនៅទូទាំងពិភពលោកកើនដល់ជាង 404លាននាក់

ក្រសួងសុខាភិបាលកម្ពុជានាព្រឹកថ្ងៃទី 4 កុម្ភៈនេះ បានឱ្យដឹងថា បានរកឃើញករណីវិជ្ជមាននឹង Covid-19 ថ្មីចំនួន 1នាក់ទៀត ធ្វើឱ្យអ្នកឆ្លងសរុបនៅកម្ពុជាកើនដល់ 467 នាក់។

ករណីវិជ្ជមានថ្មីនេះ កើតឡើងចំពោះបុរសជនជាតិខ្មែរ អាយុ 23 ឆ្នាំ ជាករណីនាំចូល។ ព័ត៌មានលម្អិត សូមបន្តអានរបាយការណ៍របស់ក្រសួងសុខាភិបាលនៅខាងក្រោម។

គិតមកដល់ព្រឹកថ្ងៃទី 4 កុម្ភៈ នេះ តួលេខអ្នកវិជ្ជមាននឹង Covid-19 នៅកម្ពុជាបានកើនដល់ 467 នាក់ ក្នុងនោះមានអ្នកជាសះស្បើយចំនួន 451 នាក់ និងអ្នកកំពុងផ្ទុកវីរុសមានចំនួន 16 នាក់។

ទូទាំងសកលលោក គិតមកដល់ព្រឹកនេះ ករណីវិជ្ជមាននឹង Covid-19 ត្រូវបានរកឃើញសរុប មានចំនួន 104,863,591 នាក់ ក្នុងនោះអ្នកស្លាប់បានកើនដល់ 2,275,910 នាក់ និង 76,595,180 នាក់បានជាសះស្បើយ ខណៈអ្នកកំពុងផ្ទុកវីរុសមានចំនួន 25,848,449 នាក់៕

February 4, 2021

Aung San Suu Kyi នឹងត្រូវឃុំខ្លួនរហូតដល់ពាក់កណ្ដាលខែកុម្ភៈ

សារព័ត៌មានចិន Xinhua ដកស្រង់សម្ដីរបស់មន្ត្រីម្នាក់នៃបក្ស NLD ដែលកំពុងត្រូវបានគេប្លន់អំណាច កាលពីថ្ងៃទី 3 កុម្ភៈ បានឱ្យដឹងថា ប្រធានាធិបតីមីយ៉ានម៉ា លោក U Win Myint និងទីប្រឹក្សារដ្ឋ លោកស្រី Aung San Suu Kyi នឹងត្រូវបានឃុំខ្លួនរហូតដល់ថ្ងៃទី 15 ខែកុម្ភៈ ឆ្នាំ 2021។

លោក Kyi Toe សមាជិកនៃគណៈកម្មការព័ត៌មានរបស់គណបក្សសម្ព័ន្ធជាតិដើម្បីប្រជាធិបតី (NLD) របស់លោកស្រី Aung San Suu Kyi បានប្រកាសដំណឹងនេះនៅលើទំព័របណ្ដាញសង្គម។

ទាក់ទងនឹងប្រធានាធិបតី U Win Myint ឯកសាររបស់ប៉ូលិសដែលត្រូវគេចែករំលែកលើបណ្ដាញសង្គម បានបង្ហាញថា ប្រធានាធិបតីរូបនេះ និងក្រុមគ្រួសាររបស់លោក បានជួបមនុស្សមួយចំនួននៅក្នុងយុទ្ធនាការឃោសនារកសំឡេងឆ្នោតរបស់បក្ស NLD កាលពីថ្ងៃទី 20 កញ្ញា 2020 មុនការបោះឆ្នោតក្នុងខែវិច្ឆិកា 2020 និងត្រូវបានចោទប្រកាន់ពីបទរំលោភលើបទបញ្ជាទាក់ទិននឹង Covid-19 ដោយយោងទៅតាមច្បាប់គ្រោះមហន្តរាយ។

ចំណែកលោកស្រី Suu Kyi វិញ ក៏ត្រូវបានទោទពីបទនាំចូល និងប្រើប្រាស់ខុសច្បាប់ នៅពេលក្រុមប៉ូលិសបានរកឃើញកូនវិទ្យុនៅក្នុងគេហដ្ឋានរបស់លោកស្រី នារដ្ឋធានី ណៃពីដោ។ ប៉ូលិសបានស្នើតុលាការ ឃុំខ្លួនអ្នកនយោបាយទាំងពីររូបនេះក្នុងរយៈពេល 15 ថ្ងៃ រាប់ចាប់ពីថ្ងៃទី 1 កុម្ភៈ ដល់ថ្ងៃទី 15 កុម្ភៈ។

ចំពោះព័ត៌មានផ្លូវការទាក់ទងនឹងដំណឹងខាងលើនេះ មិនទាន់ត្រូវបានភាគីកងទ័ព និងភាគីប៉ូលិសមីយ៉ានម៉ាលើកឡើងនៅឡើយ។

ក្នុងថ្ងៃទី 3 កុម្ភៈ NLD ក៏បានចេញសេចក្ដីប្រកាសនៅលើបណ្ដាញសង្គម ក្នុងនោះក៏បានស្នើឱ្យដោះលែងប្រធានាធិបតី និងលោកស្រី Suu Kyi រួមនឹងការស្នើឱ្យកងទ័ពទទួលស្គាល់លទ្ធផលបោះឆ្នោតកាលពីចុងឆ្នាំ 2020 និងទប់ស្កាត់ភាពវឹកវរដែលកំពុងរារាំងដំណើរការនៃកិច្ចប្រជុំសភា។

កាលពីថ្ងៃទី 1 កុម្ភៈ ប្រធានាធិបតី U Win Myint និងទីប្រឹក្សារដ្ឋ Aung San Suu Kyi រួមនឹងក្រុមមន្ត្រីជាន់ខ្ពស់របស់ NLD ជាច្រើនរូប ត្រូវបានកងទ័ពចាប់ឃុំខ្លួន។ កងទ័ពមីយ៉ានម៉ា ក្រោយមកក៏បានប្រកាសដាក់ប្រទេសក្នុងភាពអាសន្នរយៈពេលមួយឆ្នាំ ហើយអំណាចដឹកនាំប្រទេសត្រូវបានប្រគល់ឱ្យអគ្គមេបញ្ជាការកងទ័ព៕

February 4, 2021

Covid-19! វៀតណាមដាក់ឱ្យធ្វើចត្តាឡីស័កចំពោះគ្រូពេទ្យនិងអ្នកជំងឺជាង 200នាក់ នៅមន្ទីរពេទ្យមួយក្នុងខេត្តជាប់ក្រុងហូជីមិញ

គ្រូពេទ្យ និងអ្នកជំងឺជាង 200 នាក់នៅក្នុងមន្ទីរពេទ្យពហុព្យាបាល Binh Duong នៃខេត្ត Binh Duong ត្រូវបានដាក់ឱ្យធ្វើចត្តាឡីស័កនៅក្នុងមន្ទីរពេទ្យនេះ ដោយសារជាប់ទាក់ទងនឹងអ្នកជំងឺទី 1,843។

ប្រធានមន្ទីរសុខាភិបាលខេត្ត Binh Duong នាព្រឹកថ្ងៃទី 3 មករានេះ បានឱ្យដឹងថា ការស្រាវជ្រាវលើការធ្វើដំណើររបស់អ្នកជំងឺ Covid-19 ទី 1,843 (ជានិស្សិតស្រីម្នាក់នៅទីក្រុងហូជីមិញ) បានបង្ហាញថា នាងធ្លាប់ចូលមន្ទីរពេទ្យខាងលើរយៈពេលកន្លះម៉ោង។ បន្ទាប់ពីពិនិត្យក្នុងវីដេអូកាមេរ៉ា អាជ្ញាធរក៏បានដឹងថា មានមនុស្សប្រហែល 10 នាក់ បាននៅក្បែរអ្នកជំងឺនេះ។

ក្រោយពីអ្នកជំងឺទី 1,843 ត្រូវបានកំណត់អត្តសញ្ញាណ មន្ទីរសុខាភិបាលនៃខេត្ត Binh Duong ក៏បានបិទការចេញចូលផ្នែកខ្លះនៃមន្ទីរពេទ្យនេះ ក្នុងនោះមានការដាក់បុគ្គលិកសុខាភិបាល និងអ្នកជំងឺ រួមនឹងសាច់ញាតិដែលមកមើលថែអ្នកជំងឺ ឱ្យធ្វើចត្តាឡីស័កនៅនឹងកន្លែងផងដែរ។

គិតមកដល់បច្ចុប្បន្ន វៀតណាម បានរកឃើញករណីវិជ្ជមាននឹង Covid-19 សរុបចំនួន 1,891 ក្នុងនោះមាន 393 នាក់កំពុងព្យាបាល ខណៈ 1,460 នាក់បានជាសះស្បើយ និង 35 នាក់បានបាត់បង់ជីវិត៕

ប្រភព៖ VNE

February 3, 2021

អគ្គមេបញ្ជាការកងទ័ពមីយ៉ានម៉ានិយាយថា «រដ្ឋប្រហារគឺជារឿងមិនអាចគេចបាន»

លោក Min Aung Hlaing អគ្គមេបញ្ជាការកងទ័ពមីយ៉ានម៉ា កាលពីថ្ងៃទី 2 កុម្ភៈបានប្រកាសថា ការដែលរដ្ឋាភិបាលរបស់លោកស្រី Suu Kyi ត្រូវបានផ្ដួលរំលំគឺជាប្រការដែល «មិនអាចចៀសវាងបាន» ហើយថា កងទ័ពគ្រាន់តែធ្វើទៅតាមច្បាប់ប៉ុណ្ណោះ។

កងទ័ពមីយ៉ានម៉ា កាលពីព្រឹកព្រលឹមថ្ងៃទី 1 មករា បានឆ្មក់ចូលចាប់ខ្លួនទីប្រឹក្សារដ្ឋ លោកស្រី Aung San Suu Kyi និងក្រុមមេដឹកនាំរដ្ឋាភិបាលរបស់បក្សសម្ព័ន្ធជាតិដើម្បីប្រជាធិបតេយ្យ (NLD) រួមនឹងក្រុមតំណាងរាស្ត្រប្រមាណ 400 នាក់ទៀត ជាការចាប់ផ្ដើមនៃអំពើរដ្ឋប្រហារ។

លោក Min Aung Hlaing ត្រូវបានប្រគល់ «សិទ្ធិប្រើប្រាស់ច្បាប់ សិទ្ធិរកយុត្តិធម៌ និងអនុវត្តច្បាប់» បាន និងកំពុងនាំមីយ៉ានម៉ាត្រលប់ទៅមកកាន់របបសឹក ក្រោយការពិសោធលទ្ធិប្រជាធិបតេយ្យអស់រយៈពេល 10 ឆ្នាំ។ ក្នុងសេចក្ដីថ្លែងការណ៍ដំបូងបន្ទាប់ពីបានធ្វើរដ្ឋប្រហារ លោក Hlaing អះអាងថា ការដែលកងទ័ពចូលមកគ្រប់គ្រងប្រទេសគឺជារឿង «ស្របច្បាប់» ដោយសារតែអាជ្ញាធរមិនអាចដោះស្រាយបញ្ហាដែលពួកគេកើតទុក្ខមិនសុខចិត្តអំពីការបោះឆ្នោត។

លោក Hlaing ថ្លែងថា៖ «ក្រោយពីការស្នើជាច្រើនលើក នេះគឺជាជម្រើសដែលមិនអាចគេចរួច ហើយនោះគឺជាមូលហេតុដែលយើងត្រូវជ្រើសរើស»។

នៅរដ្ឋធានី ណៃពីដោ ក្រុមទាហានប្រដាប់អាវុធកំពុងត្រូវបានដាក់ពង្រាយនៅខាងក្រៅអគារសម្រាប់តំណាងរាស្ត្រមួយកន្លែង។ តំណាងរាស្ត្រម្នាក់របស់បក្ស NLD បានអធិប្បាយថា ទីនេះដូចទៅនឹង «មន្ទីរឃុំឃាំងបើកចំហ» យ៉ាងដូច្នោះដែរ។

តំណាងរាស្ត្រម្នាក់របស់បក្ស NLD បានប្រាប់ថា លោកស្រី Aung San Suu Kyi កំពុងត្រូវបានឃុំខ្លួនក្នុងគេហដ្ឋានរបស់លោកស្រី នៅទីក្រុង ណៃពីដោ។ Kyi Toe ដែលជាបុគ្គលិកផ្នែកសារព័ត៌មានរបស់ NLD ក៏បានប្រាប់ថា អ្នកជិតខាងបានឃើញលោកស្រី Suu Kyi ស្ថិតនៅក្នុងគេហដ្ឋានរបស់លោកស្រីកាលពីព្រឹកថ្ងៃទី 2 កុម្ភៈ។ ចំណែក អ្នកវិភាគ Khim Zaw Win នៅទីក្រុង Yangon បានអះអាងថា លោកស្រីទំនងជាមានសុវត្ថិភាព។ អ្នកវិភាគរូបនេះបញ្ជាក់ថា៖ «ព័ត៌មានទាំងអស់សុទ្ធតែបានបង្ហាញថា លោកស្រីកំពុងមានសុវត្ថិភាព»។

បច្ចុប្បន្ន ប្រទេសមីយ៉ានម៉ា កំពុងត្រូវបានគ្រប់គ្រង និងដឹកនាំដោយឧត្ដមសេនីយ៍ Min Aung Hlaing ដែលជាអគ្គមេបញ្ជាការកងទ័ពរបស់មីយ៉ានម៉ា បើទោះជាអតីតឧត្តមសេនីយ៍ Myint Swe កំពុងគ្រប់គ្រងតំណែងប្រធានាធិបតីក៏ដោយ។

ប្រធានាធិបតីអាមេរិក Joe Biden បានថ្កោលទោស និងអំពាវនាវឱ្យសហគមន៍អន្តរជាតិរួមសហការគ្នាដាក់សម្ពាធ ដើម្បីបង្ខំឱ្យកងទ័ពមីយ៉ានម៉ាបោះបង់អំណាចជាបន្ទាន់ និងដោះលែងក្រុមមន្ត្រីដែលត្រូវបានចាប់ខ្លួននៅក្នុងអំពើរដ្ឋប្រហាររបស់កងទ័ព។ លោក Biden ក៏បានព្រមានអំពីការដាក់ទណ្ឌកម្មជាថ្មីទៅលើមីយ៉ានម៉ាដែលអាមេរិកបានដកចេញកាលពី 10 ឆ្នាំមុន៕

ប្រភព៖ AFP

February 3, 2021

Category: អន្តរជាតិ