អន្តរជាតិ - La Reine Media

សកម្មជននៃបក្សសាធារណរដ្ឋជិត 50% ចង់ចូលបក្សរបស់ Trump

សកម្មជនរបស់គណៈបក្សសធារណរដ្ឋ ចំនួនជិតពាក់កណ្ដាលបានប្រកាសថា បានត្រៀមខ្លួនជាស្រេចក្នុងការបោះបង់បក្សនេះ និងចូលបក្សថ្មី បើសិនបក្សថ្មីត្រូវបានដឹកនាំដោយអតីតប្រធានាធិបតី Donald Trump។

លទ្ធផលនៃការស្ទង់មតិដែលធ្វើឡើងដោយសាកលវិទ្យាល័យ Suffolk សហការជាមួយសារព័ត៌មាន USA Today បានប្រកាសកាលពីថ្ងៃទី 21 កុម្ភៈ ឱ្យដឹងថា សកម្មជនមកពីបក្សសាធារណរដ្ឋប្រមាណជា 46% និយាយថា ពួកគេនឹងធ្វើការសម្រេចចិត្តដូចបាននិយាយខាងលើ បើសិនជាអតីតប្រធានាធិបតី Donald Trump បង្កើតបក្សថ្មី។ 27% និយាយថា ពួកគេនឹងបន្តនៅជាមួយបក្សសាធារណរដ្ឋ ខណៈក្រៅពីនេះ មិនទាន់បានសម្រេចចិត្តនៅឡើយ។

សកម្មជនបក្សសាធារណរដ្ឋ និងជាម្ចាស់អាជីវកម្មខ្នាតតូចម្នាក់ បាននិយាយថា៖ «យើងមានអារម្មណ៍ថា មនុស្សរបស់បក្សសាធារណរដ្ឋ ហាក់មិនទាន់ប្រយុទ្ធឱ្យអស់ពីលទ្ធភាពដើម្បីពួកយើង ហើយយើងទាំងអស់គ្នាសុទ្ធតែឃើញថា លោក Donald Trump បានប្រយុទ្ធអស់ពីសមត្ថភាពជារៀងរាល់ថ្ងៃដើម្បីពួកយើង»។

លោក Trump មិនទាន់និយាយដល់អនាគតនយោបាយរបស់លោក ប៉ុន្តែ ក្រោយពីត្រូវបានប្រកាសលើកលែងការចោទប្រកាន់នៅសភាជាលើកទីពីរ លោក Trump ក៏បានរិះគន់យ៉ាងខ្លាំងក្លាទៅលើមេដឹកនាំបក្សសាធារណរដ្ឋ ពិសេសមេដឹកនាំបក្សសាធារណរដ្ឋនៅព្រឹទ្ធសភា លោក Mitch McConnell។

McConnell មិនបោះឆ្នោតកាត់ទោសលោក Trump ដោយមូលហេតុថា ជាការរំលោភរដ្ឋធម្មនុញ្ញ ប៉ុន្តែ ក្រោយការបោះឆ្នោតរបស់សភាជាន់ខ្ពស់ លោក McConnell បែរជានិយាយថា លោក Trump ត្រូវទទួលខុសត្រូវលើបញ្ហាសីលធម៌ និងការពិត ចំពោះអំពើហិង្សាកាលពីថ្ងៃទី 6 មករា នៅវិមានសភា និងបាននិយាយដោយប្រយោលអំពីលទ្ធភាពដែលលោក Trump អាចនឹងត្រូវបានចោទប្រកាន់អំពីបទព្រហ្មទណ្ឌ ព្រោះកំហុសឆ្គងដែលលោកបានធ្វើនៅក្នុងពេលកាន់អំណាច។ លោក Mitch McConnell បញ្ជាក់ថា៖ «គាត់មិនទាន់បានរួចខ្លួនពីបញ្ហាគ្រប់យ៉ាងនៅឡើយ»។

ប្រតិកម្មនឹងសម្ដីរបស់ McConnell លោក Trump បានប្រកាសថា បក្សសាធារណរដ្ឋនឹងទទួលបរាជ័យក្នុងការបោះឆ្នោតនៅពាក់កណ្ដាលអាណត្តិនាខាងពេលខាងមុខ បើសិនលោក McConnell នៅតែជាអ្នកដឹកនាំ។

លោក Trump ថ្លែងថា៖ «គាត់ (McConnell) នឹងមិនធ្វើអ្វីដែលចាំបាច់ត្រូវធ្វើ ឬអ្វីដែលសមស្របជាមួយនឹងប្រទេសជាតិរបស់យើងនោះទេ។ ខ្ញុំនឹងគាំទ្រក្រុមមនុស្សដែលយល់ស្របជាមួយនឹងកិច្ចការដែលធ្វើឱ្យសហរដ្ឋអាមេរិកក្លាយជាប្រទេសមហាអស្ចារ្យឡើងវិញ និងដាក់គោលនយោបាយរបស់សហរដ្ឋអាមេរិកនៅលើគេបង្អស់ នៅក្នុងការបោះឆ្នោតបឋម។ យើងត្រូវការក្រុមមេដឹកនាំដែលពូកែ ខ្លាំងក្លា ម៉ត់ចត់ និងមានចិត្តមេត្តា»។

ទីប្រឹក្សាកំពូលៗរបស់លោក Trump បានឱ្យដឹងថា ពួកគេកំពុងតែផ្ដោតការយកចិត្តទុកដាក់ទៅលើការជួយឱ្យក្រុមអ្នកអភិរក្ស បានជាប់ឆ្នោតនៅក្នុងការបោះឆ្នោតពាក់កណ្ដាលអាណត្តិនៅសភានាពេលខាងមុខ។

Jason Miller ទីប្រឹក្សាជាន់ខ្ពស់របស់លោក Trump កាលពីសប្ដាហ៍មុន បាននិយាយថា៖ «គោលដៅរបស់យើងនោះគឺការដណ្ដើមសភា និងព្រឹទ្ធសភាមកវិញ។ ខ្ញុំមិនដឹងថា មូលហេតុអ្វីបានជា McConnell បែរជាសម្រេចចិត្តវាយប្រហារលើអតីតប្រធានាធិបតីដោយវិធីនេះ ប៉ុន្តែ នៅពេលធ្វើដូច្នេះ អ្នកអាចនឹងត្រូវគេវាយបក»៕

ប្រភព៖ Hill

February 22, 2021

ធ្លាក់យន្តហោះយោធាអាមេរិក អ្នកបើកបរជនជាតិជប៉ុន និងគ្រូបង្វឹកត្រូវបាត់បង់ជីវិត

អ្នកបើកបរយន្តហោះជនជាតិជប៉ុន រួមនឹងគ្រូបង្វឹកជនជាតិអាមេរិក បានបាត់បង់ជីវិត នៅពេលយន្តហោះសម្រាប់ហ្វឹកហាត់ T-38 របស់ពួកគេបានធ្លាក់នៅក្បែរព្រលានយន្តហោះ Montgomery នៃរដ្ឋ Alabama សហរដ្ឋអាមេរិក។

យន្តហោះសម្រាប់ហ្វឹកហាត់ T-38 របស់ទ័ពអាកាសអាមេរិក បានធ្លាក់កាលពីរសៀលថ្ងៃទី 19 កុម្ភៈ ក្នុងគ្រាកំពុងហ្វឹកហាត់ទៅតាមគម្រោងនៅខាងក្រៅមូលដ្ឋានទ័ពអាកាស Columbus ក្នុងរដ្ឋ Mississippi នេះបើតាម Seth Graham មេបញ្ជាការក្រុមហោះហើរហ្វឹកហាត់លេខ 14។

គ្រូបង្វឹករបស់អាមេរិកនៅលើយន្តហោះ T-38 ដែលជួបគ្រោះថ្នាក់នេះគឺ អនុសេនីយ៍ត្រី Scot Ames Jr. មកពីក្រុមហោះហើរហ្វឹកហាត់លេខ 50 នៅមូលដ្ឋានទ័ពអាកាស Columbus។ ឈ្មោះរបស់សិក្ខាកាមជនជាតិជប៉ុន វ័យ 24 ឆ្នាំ និងជាអនុសេនីយ៍ត្រី ដែលបាត់បង់ជីវិតក្នុងហេតុការណ៍ធ្លាក់យន្តហោះនេះ មិនទាន់ត្រូវបានបង្ហើបឱ្យដឹងនៅឡើយ។

មេបញ្ជាការក្រុមហោះហើរហ្វឹកហាត់លេខ 14 របស់អាមេរិកឱ្យដឹងថា យន្តហោះ T-38 ត្រូវបានបញ្ជាដោយអ្នកបើកបរជនជាតិជប៉ុន និងជួបគ្រោះថ្នាក់នៅពេលស្ថិតក្នុងការហ្វឹកហាត់ពេលយប់ដំណាក់កាលដំបូង។ ទ័ពអាកាសអាមេរិកកំពុងធ្វើការស៊ើបអង្កេតលើមូលហេតុដែលនាំឱ្យកើតមានហេតុការណ៍ធ្លាក់យន្តហោះនេះ។

យន្តហោះហ្វឹកហាត់ T-38 របស់អាមេរិកដែលជួបគ្រោះថ្នាក់កន្លងទៅថ្មីៗនេះ នោះគឺករណីនៅមូលដ្ឋានទ័ពអាកាស Vance ក្នុងរដ្ឋ Oklahoma នៅពេលយន្តហោះរបស់ពួកគេកំពុងចុះចតជាក្រុម បណ្ដាលឱ្យអ្នកបើកបរពីរនាក់បានស្លាប់។

T-38 គឺជាយន្តហោះសម្រាប់ហ្វឹកហាត់ដែលមានកៅអីចំនួនពីរ ត្រូវបានអភិវឌ្ឍតាំងពីចុងទសវត្សរ៍ឆ្នាំ 1950 និងត្រូវបានប្រើប្រាស់រហូតដល់បច្ចុប្បន្ន។ T-38 ប្រមាណជាជាង 1,100 គ្រឿង ត្រូវបានលក់ចេញ និងត្រូវបានប្រើប្រាស់ក្នុងប្រទេស និងដែនដីចំនួន 6 ក្នុងនោះសហរដ្ឋអាមេរិកគឺជាប្រទេសដែលប្រើច្រើនជាងគេ ដោយកាន់កាប់ប្រហែល 500 គ្រឿង៕

ប្រភព៖ Task&Purpose

February 22, 2021

មេដឹកនាំក្រុមប្រទេស G7 សន្យាបង្កើនសហប្រតិបត្តិការដើម្បីទប់ទល់នឹង Covid-19

នៅក្នុងកិច្ចប្រជុំកំពូលតាមអនឡាញរបស់ក្រុមមេដឹកនាំនៃបណ្ដាប្រទេសមានឧស្សាកម្មរីកចម្រើនជាងគេក្នុងពិភពលោក (G7) ដែលដឹកនាំដោយនាយករដ្ឋមន្ត្រីអង់គ្លេស Boris Johnson ក្រុមមេដឹកនាំ G7 បានសន្យាបង្កើនកិច្ចសហប្រតិបត្តិការបន្ថែមទៀតក្នុងការប្រយុទ្ធប្រឆាំងនឹង Covid-19 ក៏ដូចជាការជួយដល់ WHO។

មុនបញ្ចប់កិច្ចប្រជុំ ក្រុមមេដឹកនាំ G7 យល់ថា ការលះបង់របស់ក្រុមមនុស្សដែលបំពេញបេសកកម្មជួរមុខនៅគ្រប់ទិសទី បានបង្ហាញនូវអ្វីៗដែលល្អប្រសើរបំផុតរបស់មនុស្សជាតិ ខណៈការអភិវឌ្ឍវ៉ាក់សាំងបានយ៉ាងឆាប់រហ័សដើម្បីទប់ទល់នឹង Covid-19 ក៏បានបង្ហាញអំពីកម្លាំងនៃបញ្ញារបស់មនុស្សលោក។

ដើម្បីសហការ និងរួមគ្នាស្ដារមុខមាត់អង្គការសុខភាពពិភពលោក (WHO) ក៏ដូចជាជួយលើកកម្ពស់តួនាទីដឹកនាំ និងចាត់ចែងរបស់អង្គការនេះ ក្រុមប្រទេស G7 បានសន្យាថានឹងពន្លឿនដំណើរការអភិវឌ្ឍ និងផ្គត់ផ្គង់វ៉ាក់សាំងនៅទូទាំងពិភពលោក សហការដើម្បីបង្កើនលទ្ធភាពផលិតវ៉ាក់សាំង ក្នុងនោះ រួមមានទាំងការអនុម័តផ្ដល់ការអនុញ្ញាតបណ្ដោះអាសន្នលើវ៉ាក់សាំងនានា និងកែលម្អការចែករំលែកព័ត៌មាន។ល។

ក្រុមមេដឹកនាំ G7 ក៏បានអះអាងជាថ្មីអំពីការគាំទ្រចំពោះកម្មវិធីនានារបស់ WHO មានដូចជាកម្មវិធីសហការបង្កើនល្បឿននៃការចូលប្រើឧបករណ៍សម្រាប់ទប់ទល់នឹង Covid-19 (ACT-A) និងកម្មវិធីផ្គត់ផ្គង់វ៉ាក់សាំងដោយយុត្តិធម៌ទៅឱ្យបណ្ដាប្រទេសក្រីក្រ និងប្រទេសដែលមានចំណូលទាប (COVAX) ជាដើម។

សេចក្ដីប្រកាសរួមរបស់ G7 ក៏បានបង្ហាញថា ជាមួយនឹងការសន្យាផ្ដល់ជំនួយបន្ថែម 4 ពាន់លានដុល្លារ ជំនួយសរុបរបស់ G7 សម្រាប់ COVAX និង ACT-A បានកើនដល់ 7.5 ពាន់លានដុល្លារអាមេរិក។ G7 និងធ្វើការជាមួយដៃគូនានា មានដូចជាក្រុមប្រទេសដែលមានសេដ្ឋកិច្ចរីកចម្រើន និងទើបលេចធ្លោ (G20) និងស្ថាប័នហិរញ្ញវត្ថុអន្តរជាតិ ដើម្បីរួមគ្នាជួយដល់សកម្មភាពរបស់ ACT-A និង COVAX របស់ WHO៕

ប្រភព៖ NYT

February 20, 2021

ព្យុះដំបូងគេក្នុងឆ្នាំ2021 ដែលអាចជះឥទ្ធិពលខ្លះដល់កម្ពុជា នឹងកើតឡើងនាសប្ដាហ៍ក្រោយ

ព្យុះ Dujuan ដែលទើបតែបានកើតឡើងនៅលម្ហសមុទ្រហ្វីលីពីន អាចនឹងបោកបក់ចូលសមុទ្រចិនខាងត្បូងនៅដើមសប្ដាហ៍ក្រោយ និងក្លាយជាព្យុះដំបូងគេនៅសមុទ្រចិនខាងត្បូងសម្រាប់ឆ្នាំ 2021 នេះ។

CNN កាលពីជាង 9 ម៉ោងមុន បានឱ្យដឹងថា ប្រព័ន្ធសម្ពាធទាបនៅភាគអាគ្នេយ៍ប្រទេសហ្វីលីពីន បានក្លាយទៅជាព្យុះ ដែលនេះគឺជាព្យុះដំបូងគេបង្អស់នៅក្នុងឆ្នាំ 2021 សម្រាប់មហាសមុទ្រប៉ាស៊ីហ្វិកភាគពាយព្យ។ ព្យុះនេះត្រូវបានគេដាក់ឈ្មោះថា Dujuan ជាឈ្មោះដែលចិនជាអ្នកស្នើឡើង ហើយវាមានន័យថា ជាផ្កាមួយប្រភេទ។ តាមការព្យាករ ព្យុះ Dujuan នឹងរីកមាឌធំជាងបច្ចុប្បន្ន រួចបោកបក់ចូលកាន់សមុទ្រចិនខាងត្បូងក្នុងអំឡុងចាប់ពីថ្ងៃទី 22-23 ខែកុម្ភៈ។

ការព្យាករបញ្ជាក់ថា មុនពេលធ្វើដំណើរចូលដល់សមុទ្រចិនខាងត្បូង ព្យុះ Dujuan អាចនឹងបង្កើនកម្លាំងរហូតដល់កម្រិតចាប់ពី 9-10 ក៏ប៉ុន្តែ ក្រោយពីបានឆ្លងផុតពីប្រទេសហ្វីលីពីន Dujuan នឹងត្រូវចុះខ្សោយ ហើយបន្តបោកបក់ចូលសមុទ្រចិនខាងត្បូងដោយកម្លាំងចាប់ពីកម្រិត 7 ដល់កម្រិត 8។ ក្រោយពីបានចូលដល់សមុទ្រចិនខាងត្បូង Dujuan ក៏អាចជះឥទ្ធិពលដល់ប្រទេសវៀតណាម និងអាចបណ្ដាលឱ្យអាកាសធាតុនៅកម្ពុជាប្រែប្រួលខ្លះ។

ការព្យាករបានបន្តថា សមុទ្រខាងត្បូងអាចនឹងមិនមានព្យុះណាមួយកើតឡើងទៀតទេ ក្រោយពីព្យុះនេះ រហូតដល់ខែឧសភា ឆ្នាំ 2021។ ចូលដល់ខែមិថុនា-កក្កដា ព្យុះ និងសម្ពាធទាបចាប់ផ្ដើមធ្វើសកម្មភាពឡើងវិញនៅតំបន់សមុទ្រខាងលើ៕

ប្រភព៖ CNN, CNBC

February 19, 2021

វ៉ាក់សាំងប្រឆាំង Covid-19 “Made in Vietnam” អាចប្រើប្រាស់បានចាប់ពីខែឧសភា 2021

ជាមួយនឹងការរីកចម្រើនផ្នែកស្រាវជ្រាវ និងការធ្វើតេស្តវ៉ាក់សាំងយ៉ាងលឿនដូចបច្ចុប្បន្ន ក្រុមមន្ត្រីមានសមត្ថកិច្ចរបស់វៀតណាមរំពឹងថា ចាប់ពីខែឧសភា 2021 វ៉ាក់សាំងនានាដែលត្រូវបានផលិតនៅវៀតណាម នឹងអាចត្រូវបានប្រើប្រាស់យ៉ាងទូលំទូលាយនៅក្នុងប្រទេសនេះ។

ទាក់ទងនឹងលទ្ធផលនៃការប្រើប្រាស់សាកល្បង ឬការពិសោធលើវ៉ាក់សាំង Nano Covax នៃក្រុមហ៊ុន Nanogen លោកវេជ្ជបណ្ឌិត Nguyen Ngo Quang ដែលជាអនុប្រធាននាយកដ្ឋានវិទ្យាសាស្ត្របច្ចេកវិទ្យានិងបណ្ដុះបណ្ដាលរបស់ក្រសួងសុខាភិបាល បានឱ្យដឹងថា ក្នុងដំណាក់កាលទីមួយ វ៉ាក់សាំងនេះមានសុវត្ថិភាព។ ជាមួយនឹងការចាក់បីលើក៖ 25 mcg, 50 mcg និង 75 mcg វ៉ាក់សាំងនេះសុទ្ធតែបង្កើតប្រព័ន្ធការពាររាងកាយបានល្អ ក្នុងនោះអត្រានៃការបង្កើតអង្គបដិប្រាណ (សមត្ថភាពការពាររាងកាយរបស់អ្នកដែលបានចាក់វ៉ាក់សាំងមិនឱ្យឆ្លង Covid-19) បានឡើងដល់ 90%។

នាព្រឹកនេះ ក្រុមប្រឹក្សាភិបាលរបស់ក្រសួងសុខាភិបាលវៀតណាម នឹងមានកិច្ចប្រជុំចុងក្រោយមួយ មុនពេលសម្រេចថា គួរឱ្យ Nano Covax ពិសោធន៍លើមនុស្សដំណាក់ទីពីរដែរ ឬយ៉ាងណា។

វេជ្ជបណ្ឌិត Ngo Quang បញ្ជាក់ថា ក្រុមហ៊ុន Nanogen មានលទ្ធភាពផលិតវ៉ាក់សាំង Covid-19 ចំនួន 70 លានដូស/ឆ្នាំ។ ចំណែកវិទ្យាស្ថាន IVAC បើសិនជាត្រូវបានវិនិយោគ ក៏នឹងអាចផលិតបាន 30 លានដូស/ឆ្នាំផងដែរ។ ជាមួយនឹងល្បឿននៃការអភិវឌ្ឍ និងផលិតភាពដូចបច្ចុប្បន្ន វៀតណាមត្រូវការពេលចំនួន 2 ខែទៀតដើម្បីបញ្ចប់ការពិសោធលើមនុស្សក្នុងដំណាក់កាលទីពីរ។

លោក Ngo Quang បន្ថែមទៀតថា ដល់ខែមេសា ឆ្នាំ 2021 ការពិសោធលើមនុស្សដំណាក់ទី 2 នឹងត្រូវបញ្ចប់ ហើយនិងមានការវាយតម្លៃដោយសុក្រឹតភាពជាងមុនទាក់ទងនឹងបរិមាណសមស្របបំផុតសម្រាប់ការចាក់វ៉ាក់សាំងនេះ។ ឈានចូលដល់ខែឧសភា ឆ្នាំ 2021 នៅក្នុងការពិសោធលើមនុស្សដំណាក់កាលទីបី វ៉ាក់សាំងរបស់វៀតណាមនឹងអាចយកទៅចាក់យ៉ាងទូលំទូលាយនៅក្នុងសហគមន៍នៃប្រទេសនេះ។

អំពីការនាំចូលវ៉ាក់សាំង Covid-19 ពីបរទេស ក្រសួងសុខាភិបាលវៀតណាម បានអនុញ្ញាតឱ្យក្រុមហ៊ុន AstraZeneca ប្រចាំវៀតណាម នាំចូលវ៉ាក់សាំង 204,000 ដូស ជាបន្ទាន់ ដើម្បីឆ្លើយតបនឹងតម្រូវការ។ តាមផែនការដែលបានព្រមព្រៀង វ៉ាក់សាំង AstraZeneca នឹងមកដល់វៀតណាម នៅថ្ងៃទី 28 កុម្ភៈ ឆ្នាំ 2021។

ក្រៅពីបរិមាណនៃវ៉ាក់សាំងខាងលើ វៀតណាមក៏នឹងទទួលបានវ៉ាក់សាំងរបស់ COVAX Facility ប្រមាណ 4.88 លានដូសផងដែរ ដែលនឹងមកដល់នាពេលខាងមុខ។ ដូច្នេះ ដំណាក់កាលដំបូង វៀតណាម នឹងមានវ៉ាក់សាំងប្រហែលជាង 5 លានដូស ដើម្បីចាក់ឱ្យពលរដ្ឋជាង 5 លាននាក់៕

ប្រភព៖ NLD

February 19, 2021

អាមេរិកផ្ដល់ជំនួយ 4ពាន់លានដុល្លារដល់កម្មវិធី COVAX របស់ WHO

រដ្ឋាភិបាលរបស់លោក Joe Biden នឹងផ្ដល់ជំនួយចំនួន 4 ពាន់លានដុល្លារដល់កម្មវិធីផ្គត់ផ្គង់វ៉ាក់សាំង COVAX ដោយសង្ឃឹមថា ប្រទេសដទៃនឹងមានការរួមចំណែកផ្ដល់វិភាគទានប្រហាក់ប្រហែលនេះ។

ប្រធានាធិបតីអាមេរិក Joe Biden បានឱ្យដឹងថា នៅក្នុងកិច្ចប្រជុំដំបូងជាមួយនឹងក្រុមមេដឹកនាំនៃប្រទេស G7 នាថ្ងៃទី 19 កុម្ភៈនេះ នឹងប្រកាសអំពីខ្ទង់ជំនួយ 2 ពាន់លានដុល្លារភ្លាមៗ ដល់ COVAX ដែលជាកម្មវិធីផ្គត់ផ្គង់វ៉ាក់សាំង Covid-19 ដឹកនាំដោយអង្គការសុខភាពពិភពលោក (WHO)។ គោលដៅរបស់ COVAX គឺដើម្បីធានាឱ្យបាននូវការផ្គត់ផ្គង់វ៉ាក់សាំង Covid-19 ប្រកបដោយយុត្តិធម៌នៅទូទាំងពិភពលោក។ ទឹកប្រាក់ជំនួយចំនួន 2 ពាន់លានដុល្លារទៀតរបស់សហរដ្ឋអាមេរិក នឹងត្រូវទូទាត់នៅក្នុងអំឡុងពីរឆ្នាំទៀត ក្រោយពីប្រទេសផ្សេងៗសម្រេចចិត្ត និងលើកឡើងនូវការសន្យាផ្គល់ជំនួយរៀងៗខ្លួនរបស់ពួកគេ។

«យើងមានបំណងប្រែក្លាយ 2 ពាន់លានដុល្លារ ឱ្យទៅជាច្រើនពាន់លានដុល្លារអាមេរិក ពោលគឺយ៉ាងហោចក៏ 15 ពាន់លានដុល្លារអាមេរិក» មន្ត្រីអាមេរិកាំងម្នាក់បានថ្លែងដូច្នេះ។ ខ្ទង់ជំនួយរបស់សហរដ្ឋអាមេរិក ត្រូវបានសភាអនុម័តយល់ព្រមរួចហើយ។

សកម្មភាពរបស់ប្រធានាធិបតី Biden គឺផ្ទុយពីអតីតប្រធានាធិបតី Donald Trump។ លោក Trump ធ្លាប់បានគំរាមថានឹងដកអាមេរិកចេញពី WHO ជាអង្គការដែលលោកចោទប្រកាន់ថា ជាអាយ៉ងរបស់ចិន។

COVAX បានកំណត់គោលដៅហើយថា នឹងផ្គត់ផ្គង់វ៉ាក់សាំង Covid-19 យ៉ាងតិចចំនួនពីរពាន់លានដូស នៅចុងឆ្នាំ 2021 សម្រាប់ពលរដ្ឋងាយឆ្លងវីរុសចំនួន 20% នៃបណ្ដាប្រទេសក្រីក្រ និងប្រទេសមានចំណូលទាប។ កម្មវិធីនេះ កំពុងប្រឈមមុខនឹងហានិភ័យនៃការដួលរលំ ដោយសារតែបញ្ហាខ្វះហិរញ្ញវត្ថុ៕

ប្រភព៖ Reuters

February 19, 2021

ឥណ្ឌូនេស៊ីពិន័យដល់ប្រាក់ 5លានរូពី ចំពោះអ្នកមិនព្រមចាក់វ៉ាក់សាំង Covid-19

អាជ្ញាធរទីក្រុង ចាកាតា (Jakarta) របស់ប្រទេសឥណ្ឌូនេស៊ី បានចេញប្រកាសព្រមានថានឹងពិន័យជាប្រាក់ចំនួន 5 លានរូពី (rupiah) ដែលប្រហែល 356.89 ដុល្លារអាមេរិក (1,455,000 រៀល) ចំពោះពលរដ្ឋរូបណាដែលមិនព្រមចាក់វ៉ាក់សាំងទប់ស្កាត់វីរុស Covid-19។

ការពិន័យជាប្រាក់ដ៏ច្រើនបែបនេះ ត្រូវបានឡើងដើម្បីបង្ខំឱ្យពលរដ្ឋគោរពទៅតាមការកំណត់ថ្មីរបស់រដ្ឋាភិបាល ក្នុងបំណងទប់ស្កាត់ការបន្តឆ្លងរាលដាលនៃវីរុសបង្កជំងឺរលាកសួតប្រភេទថ្មី Covid-19។

នៅចំពោះមុខក្រុមអ្នកសារព័ត៌មាន អភិបាលរងទីក្រុងចាកាតា Ahmad Riza Patria ថ្លែងថា៖ «បើសិនអ្នកមិនព្រមចាក់វ៉ាក់សាំង នោះអ្នកនឹងត្រូវទទួលបញ្ហាចំនួន 2 គឺមិនទទួលបានជំនួយផ្នែកសង្គមកិច្ច និងត្រូវបង់ប្រាក់ពិន័យ»។

ក្នុងយុទ្ធនាការចាក់វ៉ាក់សាំង Covid-19 ដែលចាប់ផ្ដើមកាលពីខែមុន ឥណ្ឌូនេស៊ី បានកំណត់គោលដៅចាក់វ៉ាក់សាំងដល់ពលរដ្ឋឱ្យបាន 181.5 លាននាក់ ក្នុងចំណោមពលរដ្ឋសរុបជាង 270 លាននាក់របស់ប្រទេសនេះ នៅក្នុងអំឡុង 15 ខែ។

កាលពីដើមខែនេះ ឥណ្ឌូនេស៊ី បានប្រកាសបទបញ្ជាមួយ ក្នុងនោះបានចែងថា អ្នកណាមិនព្រមចាក់វ៉ាក់សាំង Covid-19 នឹងមិនទទួលបានជំនួយផ្នែកសង្គមកិច្ច ឬសេវាកម្មរបស់រដ្ឋាភិបាល ឬមួយត្រូវបង់ប្រាក់ពិន័យ។ កម្រិតនៃការពិន័យនឹងអាស្រ័យលើការសម្រេចចិត្តរបស់ស្ថាប័នសុខាភិបាល ឬអាជ្ញាធរមូលដ្ឋាន។

លទ្ធផលនៃការស្ទង់មតិមួយដែលត្រូវបានធ្វើឡើងដោយក្រុមហ៊ុន Saiful Mujani កាលពីខែធ្នូ 2020 បង្ហាញថា មានតែ 37% ក្នុងចំណោមពលរដ្ឋ 1,202 នាក់ដែលត្រូវបានសួរ បានប្រាប់ថា ពួកគេនឹងចាក់វ៉ាក់សាំង Covid-19 ខណៈ 40% មិនទាន់សម្រេចចិត្ត និង 17% ឆ្លើយថា នឹងបដិសេធការចាក់វ៉ាក់សាំងនេះ៕

ប្រភព៖ Arabnews

February 19, 2021

ជប៉ុន «បង់ថ្លៃការពារ» ឱ្យអាមេរិកដូចមុន បើទោះ Trump ធ្លាប់ទារច្រើនជាងនេះ 4ដង

ជប៉ុននឹងពន្យារសុពលភាពនៃកិច្ចព្រមព្រៀងតម្លៃ 1.9 ពាន់លានដុល្លារដែលប្រទេសនេះត្រូវបង់ទៅឱ្យកងទ័ពសហរដ្ឋអាមេរិកដែលបោះជំរំនៅប្រទេសនេះ សម្រាប់រយៈពេលមួយឆ្នាំ បើទោះជាអតីតប្រធានាធិបតី Trump ធ្លាប់ទាមទារច្រើនជាងនេះ 4 ដងក៏ដោយ។

រដ្ឋមន្ត្រីការបរទេសជប៉ុន Toshimitsu Motegi កាលពីថ្ងៃទី 17 កុម្ភៈ បានប្រកាសថា ទីក្រុងតូខ្យូ និងវ៉ាស៊ីងតោន បានយល់ព្រមពន្យារសុពលភាពនៃកិច្ចព្រមព្រៀងខាងលើ ដោយរក្សាទុកតម្លៃដើមដែលជប៉ុនត្រូវបង់ទៅឱ្យទាហានអាមេរិកចំនួន 55,000 នាក់ ដែលបោះទ័ពក្នុងប្រទេសនេះ ក្នុងគ្រាប្រទេសទាំងពីរកំពុងចរចាគ្នាអំពីកិច្ចព្រមព្រៀងចែករំលែកខ្ទង់ចំណាយថ្មី។

កិច្ចព្រមព្រៀងចែករំលែកការចំណាយនាបច្ចុប្បន្ន នឹងត្រូវបញ្ចប់នៅក្រោយខែមីនា ឆ្នាំ 2021 ប៉ុន្តែនឹងត្រូវបានអូសបន្លាយដល់ខែមីនា ឆ្នាំ 2022 ហើយជប៉ុននឹងបន្តបង់ប្រាក់ឱ្យសហរដ្ឋអាមេរិកចំនួន 1.9 ពាន់លានដុល្លារ សម្រាប់អំឡុងពេលនេះ។

អតីតប្រធានាធិបតី Donald Trump កាលពីនៅកាន់តំណែង ធ្លាប់បានដាក់សម្ពាធឱ្យជប៉ុនបង់ថ្លៃការពារដល់អាមេរិកច្រើនជាងបច្ចុប្បន្នដល់ទៅ 4 ដង ពោលគឺប្រហាក់ប្រហែលនឹង 8 ពាន់លានដុល្លារអាមេរិក។ សម្ពាធនេះគឺស្ថិតក្នុងយុទ្ធនាការរបស់លោក Trump ដើម្បីបង្ខំឱ្យប្រទេសជាសម្ព័ន្ធមិត្ត បង្កើនការចំណាយលើវិស័យការពារជាតិរបស់ពួកគេ។

ទាហានជប៉ុន និងអាមេរិក កំពុងធ្វើសមយុទ្ធរួមគ្នា នៅ Okinawa កាលពីឆ្នាំ 2020

ទាហានអាមេរិកប្រមាណ 55,000 នាក់ កំពុងមានវត្តមាននៅលើទឹកដីជប៉ុន ក្នុងនោះមាន កងនាវាចម្បាំងទី7 (United States Seventh Fleet) របស់កងទ័ពជើងទឹក រួមនឹងក្រុមប្រយុទ្ធនាវាផ្ទុកយន្តហោះប្រចាំការ និងកងទ័ពជើងទឹកលេខ3 (III Marine Expeditionary Force) ផងដែរ។ បណ្ដាប្រទេសដែលកងទ័ពសហរដ្ឋអាមេរិកបោះជំរំ ត្រូវមានកាតព្វកិច្ច «ជួយចេញថ្លៃលើការបណ្ដុះបណ្ដាល ពលកម្ម និងភ័ស្តុភារ សម្រាប់មូលដ្ឋានទ័ព»។

រដ្ឋាភិបាលលោក Joe Biden កំពុងតែស្វែងរកការប្ដូរផ្លាស់វិធីសាស្ត្របែប «ប្រឈមមុខ» របស់អតីតរដ្ឋាភិបាលលោក Trump ចំពោះសម្ព័ន្ធមិត្ត ទាក់ទងនឹងកិច្ចសន្យាការពារប្រទេសរបស់ពួកគេ។ លោក Biden មុននេះក៏ធ្លាប់បានផ្អាកផែនការដកទ័ពអាមេរិកប្រមាណ 11,900 នាក់ ចេញ្ពីប្រទេសអាល្លឺម៉ង់ ដែលត្រូវបានលោក Trump បញ្ជាកាលពីលោកនៅគ្រប់គ្រងសេតវិមាន៕

ប្រភព៖ Aljazeera

February 18, 2021

អង់គ្លេសជិតឱ្យអ្នកមានសុខភាពល្អ ប៉ះពាល់ Covid-19 ដើម្បីស្វែងយល់បន្ថែម

ប្រទេសអង់គ្លេសនឹងអនុញ្ញាតឱ្យក្រុមអ្នកស្ម័គ្រចិត្ត ប៉ះពាល់នឹង Covid-19 ដើម្បីសិក្សាស្រាវជ្រាវបន្ថែមអំពីវីរុស បន្ទាប់ពីនាយកដ្ឋានសិលធម៌ផ្នែកវេជ្ជសាស្ត្រប្រទេសនេះ បើកភ្លើងខៀវ។

កាលពីថ្ងៃទី 17 កុម្ភៈ អង់គ្លេសបានក្លាយជាប្រទេសដំបូងគេលើពិភពលោកដែលអនុញ្ញាតឱ្យអ្នកស្ម័គ្រចិត្ត ធ្វើសកម្មភាពប៉ះពាល់នឹង Covid-19 ដើម្បីជួយដល់ការសិក្សាស្រាវជ្រាវផ្នែកវេជ្ជសាស្ត្រអំពីរោគរាតត្បាត។ ការពិសោធនេះនឹងធ្វើឡើងនៅមួយខែទៀត ក្នុងនោះ អ្នកស្ម័គ្រចិត្តចំនួន 90 នាក់ ដែលមានសុខភាពល្អ និងមានអាយុចាប់ពី 18-30 ឆ្នាំ នឹងប៉ះពាល់វីរុស Covid-19 នៅក្នុងបរិស្ថានដែលត្រូវបានគ្រប់គ្រង នេះបើតាមសេចក្ដីប្រកាសមួយចុះផ្សាយកាលពីថ្ងៃទី 17 កុម្ភៈ របស់នាយកដ្ឋានសម្រាប់អាជីវកម្ម ថាមពល និងយុទ្ធសាស្ត្រឧស្សាហកម្មអង់គ្លេស (Department for Business, Energy and Industrial Strategy)។

ការពិសោធខាងលើនេះគឺដើម្បីឱ្យដឹងច្បាស់ថា វីរុស Covid-19 ត្រូវមានបរិមាណកម្រិតណាទើបអាចចម្លងបាន និងដើម្បីស្វែងយល់អំពីប្រតិកម្មនៃប្រព័ន្ធការពាររាងកាយ ក៏ដូចជាវិធីដែលវីរុសអាចចម្លងពីមនុស្សទៅមនុស្ស។ ការសិក្សាស្រាវជ្រាវនេះ នឹងរួមចំណែកជួយឱ្យក្រុមអ្នកវិទ្យាសាស្ត្រអភិវឌ្ឍវ៉ាក់សាំង ក៏ដូចជាវិធីព្យាបាលដ៏សមស្រប។ នេះបើតាម Chris Chiu ប្រធានក្រុមស្រាវជ្រាវ មកពីសាកលវិទ្យាល័យក្រុងឡុងដ៍ (University of London) នៃចក្រភពអង់គ្លេស។

ក្រុមអ្នកស្ម័គ្រចិត្តនឹងត្រូវបានតាមដានយ៉ាងយកចិត្តទុកដាក់បំផុតពីសំណាក់ក្រុមគ្រូពេទ្យ និងអ្នកវិទ្យាសាស្ត្រ។ ក្រុមអ្នកទទួលខុសត្រូវលើការពិសោធនេះ និយាយថា វីរុស Covid-19 ដែលពួកគេយកមកធ្វើការពិសោធលើកនេះ មិនមែនជាវីរុសក្លាយពូជថ្មីនៅអង់គ្លេសនោះទេ ប៉ុន្តែវាជាវីរុស Covid-19 ទម្រង់ដើមកាលពីឆ្នាំ 2020។ រដ្ឋាភិបាលអង់គ្លេស ផ្ដល់ប្រាក់ជំនួយចំនួន 46.6 លានដុល្លារអាមេរិក ដើម្បីគាំទ្រដល់កម្មវិធីពិសោធន៍នេះ។ អ្នកដែលចង់ចូលរួមធ្វើជាអ្នកស្ម័គ្រចិត្ត អាចចុះឈ្មោះបានតាមរយៈគេហទំព័រ UK Covid Challenge ។

នៅប្រទេសអង់គ្លេស គិតមកដល់ព្រឹកថ្ងៃទី 18 កុម្ភៈ ឆ្នាំ 2021 នេះ អ្នកវិជ្ជមាននឹង Covid-19 បានកើនដល់ 4,071,185 នាក់ ក្នុងនោះមានអ្នកស្លាប់ដល់ទៅ 118,933 នាក់ និងអ្នកកំពុងផ្ទុកវីរុស ចំនួន 1,669,549 នាក់ ដែលក្នុងនេះដែរ មាន 2,708 នាក់ អាចនឹងបាត់បង់ជីវិតដោយសារមានអាការធ្ងន់ធ្ងរ៕

ប្រភព៖ AFP

February 18, 2021

ជប៉ុន ចាប់ផ្ដើមហើយ! ចាក់វ៉ាក់សាំងកូវីដ-19 បើកឆាកដោយបុគ្គលិកសុខភាពសាធារណៈ

ជប៉ុន ចាប់ផ្ដើមគ្រោងការវ៉ាក់សាំង-19 ហើយ នៅថ្ងៃពុធ (ទី17កុម្ភៈ)ម្សិលមិញ ដោយការចាក់វ៉ាក់សាំងរបស់ហ្វ៉ៃហ្ស៊ើរ ឱ្យបណ្ដាបុគ្គលិករបស់មន្ទីរពេទ្យតូក្យូ ខណៈដែលលោកនាយករដ្ឋមន្ត្រី យ៉ូឈិហ៊ីដេ ស៊ូង៉ៈ ព្យាយាមយកឈ្នះលើស្ថានការណ៍ការឆ្លងរាលដាល មុនពេលធ្វើជាម្ចាស់ផ្ទះ រៀបចំការប្រកួតកីឡាអូឡាំពិក ក្នុងរដូវក្ដៅនេះ។

ស្ថានីយទូរទស្សន៍ក្នុងតំបន់ បានផ្សព្វផ្សាយ រូបភាពបណ្ដាបុគ្គលិករបស់មន្ទីរពេទ្យ ដែលកំពុងចូលទទួលការចាក់វ៉ាក់សាំង ដោយពួកគេ គឺជាមនុស្ស

1ក្រុម ក្នុងចំណោមធនធានមនុស្សផ្នែកសុខាភិបាល 40,000នាក់ ដែលជាគោលដៅ ក្នុងការបានទទួលវ៉ាក់សាំងកូវីដ-19 ដំបូងៗគេ។

ការចាក់វ៉ាក់សាំងកូវីដ-19 ឱ្យប្រជាជន 126លាននាក់ របស់ប្រទេសជប៉ុនយ៉ាងឆាប់រហ័ស បានក្លាយជាគោលដៅសំខាន់ខ្លាំងបំផុត របស់រដ្ឋបាលលោកនាយករដ្ឋមន្ត្រី ស៊ូង៉ៈ ដោយសារតែព្រឹត្តិការណ៍អូឡាំពិក ហ្គេមស៍ ដែលទីក្រុងតូក្យូ ធ្វើជាម្ចាស់ផ្ទះ នឹងមានកំណត់ចាប់ផ្ដើមឡើង ក្នុងអំឡុងចុងខែកក្កដា ក្រោយពីបានពន្យារពេលកាលពីឆ្នាំទៅ។

ទោះជាដូច្នេះមែន ទម្រាំតែគ្រោងការចាក់វ៉ាក់សាំងឱ្យប្រជាជន នឹងរួចរាល់ស្រេចបាច់ និងចប់ជាស្ថាពរ គេសន្និដ្ឋានថា ប្រហែលជាត្រូវប្រើពេលវេលាយូរដល់ទៅរាប់ឆ្នាំ ដោយក្នុងរយៈពេលដំបូងៗ គឺជាការចាក់ឱ្យធនធានមនុស្សខាងសុខាភិបាល ប្រមាណជា 3.7លាននាក់ និងមនុស្សចាស់ អាយុ 65ឆ្នាំឡើងទៅ ប្រមាណជា 36លាននាក់។

តែយ៉ាងណាក៏ដោយ ប្រទេសជប៉ុន អាចជួបប្រទះនឹងបញ្ហារអាក់រអួលមួយចំនួន ដោយសារមានក្ដីកង្វល់ថា អាចនឹងខាតបង់ដោយឥតប្រយោជន៍ នូវវ៉ាក់សាំងរបស់ហ្វៃហ្ស៊ើរ ចំនួនច្រើនលានដូស ដោយសារតែខ្វះខាតសេរ៉ាំង និងម្ជុលចាក់ថ្នាំ ដែលចាំបាច់សម្រាប់ការបែងចែកវ៉ាក់សាំងផ្ទុកក្នុងដប ចេញជាដូសនីមួយ។

កាលពីអំឡុងចុងខែមករា មានរបាយការណ៍ថា ហ្វ៉ៃហ្ស៊ើរ បានពិចារណាកែសម្រួល បរិមាត្រការប្រើវ៉ាក់សាំងផ្ទុកក្នុងដប ដែលពីមុន ឱ្យចាក់បាន ក្នុង 1ដប 5ដូស មកជា 6ដូស និងចាំបាច់ត្រូវប្រើម្ជុលចាក់ថ្នាំថ្មី ដើម្បីឱ្យត្រូវគ្នាទៀតផងដែរ។

កាលពីមុនពេលនេះ វ៉ាក់សាំងដែលហ្វ៉ៃហ្ស៊ើរ អភិវឌ្ឍរួមជាមួយ បៃអូអេនថេក ត្រូវបានបញ្ជាក់ជាផ្លូវការថា ចាក់បាន 5ដូស ក្នុង 1ដប ដោយនៅពេលដែលត្រូវធ្វើឱ្យរលាយហើយ ក្នុងដបនីមួយៗ នឹងត្រូវបន្សាបដោយទឹកសេរ៉ូម ក្នុងបរិមាត្រ 1.8មីល្លីលិត្រ ធ្វើឱ្យវ៉ាក់សាំង ក្រោយពេលផ្សំរួច មានបរិមាត្រ 2.25មីល្លីលិត្រ និងបែងចែកចាក់ ក្នុង 1ដូស 0.3មីល្លីលិត្រ ដែលក្នុងខាងទ្រឹស្ដីវិញ អាចចាក់បានលើស 7ដូសឯណោះ។

តែទ្រឹស្ដី ជាមួយការប្រតិបត្តិ វាខុសប្លែកពីគ្នា ព្រោះបុគ្គលិកសុខាភិបាល មិនអាចគណនាបរិមាត្រថ្នាំ បានយ៉ាងត្រូវចំប៉ាច់ៗ ក្នុងការធ្វើឱ្យគ្រប់ 7ដូសដើម្បីចាក់ឱ្យបានគ្រប់ចំនួនមនុស្សឡើយ និងទោះជាដូច្នេះមែន បើសិនជាមានឧបករណ៍ដែលស័ក្តិសម ពួកគេអាចចាក់បានក្នុងចំនួន 6ដង ដោយបរិមាណដែលគួរឱ្យជឿជាក់បាន។

ប្រទេសជប៉ុន បានចុះហត្ថលេខាលើកិច្ចសន្យាផ្សេងៗ សម្រាប់ការបញ្ជាទិញវ៉ាក់សាំងកូវីដ-19 សរុបទាំងអស់ជាង 314លានដូស ពីហ្វ៉ៃហ្ស៊ើរ, អ៊ែស្ត្រាហ្សេនេកា និងម៉ូឌើណា ដែលគ្រប់គ្រាន់សម្រាប់ប្រជាជនចំនួន 157លាននាក់ ក្នុងខណៈដែលរហូតមកដល់ពេលនេះ ជប៉ុនរកឃើញអ្នកឆ្លងមេរោគកូវីដ-19 ប្រមាណជា 451,000នាក់ ក្នុងនោះមានស្លាប់ 7.013នាក់រួចហើយ។

ទោះជាករណីអ្នកឆ្លងមេរោគប្រចាំថ្ងៃ បានថយចុះក្នុងអំឡុងច្រើនសប្ដាហ៍កន្លងមក ក្រោយពីហក់ឡើងខ្ពស់បំផុត កាលពីអំឡុងដើមខែមករាក្ដី តែក្រុងតូក្យូ និងខេត្តផ្សេងៗ 9កន្លែងទៀត នៅតែស្ថិតក្រោមការប្រកាសស្ថានការណ៍អាសន្ន ដើម្បីការពារការផ្ទុះឡើងជាថ្មីរបស់ជំងឺរាតត្បាតដ៏ធំនេះដដែល៕

ប្រភព៖ ទីភ្នាក់ងារព័ត៌មានរ៉យទ័រ/អេជេនស៊ី
ប្រែ និងសម្រួលដោយ តាវ៉ែនតា

February 18, 2021

Category: អន្តរជាតិ