អន្តរជាតិ - La Reine Media

Pfizer ចាក់វ៉ាក់សាំងបង្ការ Covid-19 ម្ជុលទីបី ដើម្បីស្វែងរកវិធីទប់ទល់នឹងវីរុសក្លាយពូជថ្មី

បើទោះជាការចាក់វ៉ាក់សាំងបង្ការ Covid-19 ចំនួន 2 ម្ជុលរបស់ Pfizer មានប្រសិទ្ធភាពទៅដល់ 95% ប៉ុន្តែ ក្រុមហ៊ុននេះនៅតែបន្តការពិសោធលើការចាក់វ៉ាក់សាំងម្ជុលទីបី ដើម្បីឱ្យដឹងថា វាមានប្រសិទ្ធភាពក្នុងការទប់ ទល់នឹងវីរុស Covid-19 ក្លាយពូជថ្មីដែរ ឬយ៉ាងណា។

យោងតាម NBC News កាលពីថ្ងៃទី 25 កុម្ភៈ ក្រុមហ៊ុន Pfizer បានប្រកាសថា ខ្លួនកំពុងតែស្រាវជ្រាវលើការចាក់វ៉ាក់សាំងបន្ថែម ចំពោះក្រុមមនុស្សដែលបានចាក់គ្រប់ 2 ម្ជុល កាលពីជាង 6 ខែមុន។

នៅក្នុងកិច្ចសម្ភាសជាមួយនឹងសារព័ត៌មាន NBC News នាយកប្រតិបត្តិនៃក្រុមហ៊ុនឱសថ Pfizer លោក Albert Bourla បានឱ្យដឹងថា ម្ជុលទីបីនឹងបង្កើនប្រតិកម្មនៃប្រព័ន្ធការពាររាងកាយបានខ្ពស់ជាងមុន ដើម្បីទប់ទល់នឹងវីរុស Covid-19 ប្រភេទក្លាយពូជថ្មី។

«យើងជឿជាក់ថា ការចាក់វ៉ាក់សាំងលើកទីបីនឹងជួយបន្ថែមប្រតិកម្មរបស់ប្រព័ន្ធបង្ការវីរុសឱ្យបានខ្ពស់ជាងមុនពី 10-20 ដង» លោក Albert Bourla អះអាងដូច្នេះ។

ការពិសោធថ្មីនេះនឹងត្រូវតាមដានលើសុវត្ថិភាព និងប្រសិទ្ធភាពរបស់វ៉ាក់សាំងម្ជុលទីបី ដែលនឹងត្រូវចាក់ឱ្យក្រុមអ្នកស្ម័គ្រចិត្តដែលបែងចែកទៅតាមវ័យ៖ ក្រុមមនុស្សមានវ័យចាប់ពី 19-55 ឆ្នាំ និងក្រុមមនុស្សវ័យពី 65-85 ឆ្នាំ។

ក្រុមអ្នកស្ម័គ្រចិត្តចូលរួមការសិក្សាស្រាវជ្រាវនេះ គឺជាក្រុមដំបូងដែលទទួលបានការចាក់វ៉ាក់សាំង Pfizer/PioNTech ដែលបានចូលរួមការពិសោធក្នុងដំណាក់កាលទី ½ របស់ Pfizer ដែលបានចាប់ផ្ដើមពីខែឧសភា 2020។

ក្រុមហ៊ុន Pfizer ក៏កំពុងរៀបគម្រោងចាប់ផ្ដើមការពិសោធលើកំណែថ្មីមួយនៃវ៉ាក់សាំងបង្ការ Covid-19 របស់ខ្លួន ដើម្បីស្វែងយល់ឱ្យដឹងថា វាមានប្រសិទ្ធភាពក្នុងការទប់ស្កាត់វីរុស Covid-19 ក្លាយពូជថ្មី ដែលមានប្រភពពីប្រទេសអាហ្វ្រិកខាងត្បូងដែរ ឬអត់។

CEO របស់ Pfizer លោក Bourla បញ្ជាក់ថា៖ «ជារៀងរាល់ឆ្នាំ អ្នកត្រូវការចាក់វ៉ាក់សាំងបង្ការវីរុសបង្កគ្រុនផ្ដាសាយ។ ប្រការនេះក៏នឹងកើតឡើងចំពោះ Covid-19។ អ្នកត្រូវតែទៅចាក់វ៉ាក់សាំងបង្ការ Covid-19 ជារៀងរាល់ឆ្នាំ ដើម្បីការពារសុខភាពរបស់អ្នក»។

ចំណែក Moderna ដែលជាក្រុមហ៊ុនផលិតវ៉ាក់សាំងបង្ការ Covid-19 ទីពីរដែលទទួលបានការអនុញ្ញាតពីសហរដ្ឋអាមេរិក កាលពីថ្ងៃទី 24 កុម្ភៈ ក៏បានប្រកាសថា ពួកគេកំពុងតែធ្វើការដូចទៅនឹង Pfizer ដែរ ដើម្បីរកវិធីទប់ទល់នឹងវីរុស Covid-19 ក្លាយពូជថ្មីនៅអាហ្វ្រិកខាងត្បូង៕

ប្រភព៖ NBC News
ប្រែសម្រួល៖ បុត្រា

February 26, 2021

ដាក់គុក ១ជីវិត មិនគ្រប់គ្រាន់ទេ! ប្រទេសសិង្ហបុរី ដាក់គុក ១ជីវិត “ស្ត្រីម្ចាស់ផ្ទះ” ដែលធ្វើទារុណកម្ម ស្ត្រីអ្នកបម្រើជនជាតិភូមា រហូតដល់ស្លាប់

កាលពីថ្ងៃទី២៤កុម្ភៈ ម្សិលមិញ ទីភ្នាក់ងារព័ត៌មាន AFP បានរាយការណ៍ ពីសវនាការរឿងក្ដី ដែលស្ត្រីម្ចាស់ផ្ទះ ជនជាតិសិង្ហបុរីម្នាក់ បានធ្វើវាយបាបលើរូបរាងកាយអ្នកបម្រើ ជាស្ត្រីមេផ្ទះម្នាក់ ដ៏សែនរន្ធត់ចិត្តថា ជនជាប់ចោទដែលមានឈ្មោះថា កៃយ៉ាធីរី មូរូកាយ៉ាន់ ភេទស្រី អាយុ ៤០ឆ្នាំ សញ្ជាតិសិង្ហបុរី បានសារភាពថា ខ្លួនជាអ្នកធ្វើទារុណកម្ម លើស្ត្រីជាអ្នកបម្រើនៅក្នុងផ្ទះម្នាក់ ឈ្មោះ ផាយ ង៉ាយ ដន អាយុ ២៤ឆ្នាំ សញ្ជាតិភូមា រហូតដល់ស្លាប់ ពិតប្រាកដមែន កាលពីខែមករា ឆ្នាំ2016។

ស្ត្រីរងគ្រោះ ត្រូវរងការវាយតប់ ច្របាច់ក យកខ្សែរឹតក វាយដំដោយដំបង និងយកដែកក្ដៅ មកដាក់លើរាងកាយ និងពេលខ្លះ ប្ដី និងម្ដាយរបស់ស្ត្រីជាប់ចោទ បានចូលរួមធ្វើទណ្ឌកម្មទាំងនោះទៀតផង។

គណៈអយ្យការ បានថ្លែងថា ទង្វើរបស់ស្ត្រីជាប់ចោទ គឺមានភាពសាហាវឃោរឃៅ គ្មានមនុស្សធម៌ ត្រូវប្រឈមនឹងទោសទណ្ឌខ្ពស់បំផុត តាមបទប្បញ្ញត្តិ របស់ច្បាប់ និងចាត់ទុកថា ជារឿងក្ដីមួយដែលធ្ងន់ធ្ងរបំផុត ក្នុងការធ្វើទារុណកម្មលើនិយោជិតនៅក្នុងប្រទេសសិង្ហបុរី។

តែយ៉ាងណាក្ដី អយ្យការបានដំណើរការរឿងក្ដីរបស់ស្ត្រីជាប់ចោទឈ្មោះ មូរូកាយ៉ាន់ ក្នុងបទចោទប្រកាន់ ធ្វើទារុណកម្មបណ្ដាលឱ្យអ្នកដទៃស្លាប់ ជំនួសឱ្យបទចោទ ការធ្វើឃាតដោយចេតនា ព្រោះយល់ឃើញថា ជនរងគ្រោះ មានជំងឺពិបាកចិត្ត និងសោកសៅ ធ្វើឱ្យទោសទណ្ឌ ថយចុះមកនៅត្រឹម ជាប់គុក ១ជីវិត ជំនួសឱ្យការប្រហារជីវិតវិញ។

ជនរងគ្រោះជាអ្នកបម្រើតាមផ្ទះ សញ្ជាតិភូមារូបនេះ មានមេប៉ូលិសម្នាក់ ជាអ្នករៀបចំស្វែងរកមកឱ្យជនជាប់ចោទ កាលពីឆ្នាំ2015 ដោយមានភារកិច្ចត្រូវមើលថែទាំកូនស្រីម្នាក់ អាយុ ៤ឆ្នាំ និងកូនប្រុស អាយុ ១ឆ្នាំ ម្នាក់ទៀតរបស់ជនជាប់ជនចោទ ក្នុងរយៈពេល ១ឆ្នាំកន្លងមកនោះ។

ជនរងគ្រោះ ត្រូវបានបង្ខំឱ្យដេកសម្រាក បានត្រឹមតែ ៥ម៉ោងប៉ុណ្ណោះក្នុង ១ថ្ងៃ រហូតធ្វើឱ្យធ្លាក់ខ្លួនស្គមស្គាំង និងទម្ងន់ខ្លួនស្រកចុះដល់ទៅ ៣៨% និងក្នុងអំឡុងពេលស្លាប់ ជនរងគ្រោះ មានទម្ងន់ខ្លួននៅសល់ត្រឹមតែ ២៤គីឡូក្រាមប៉ុណ្ណោះ។

សូមជម្រាបដែរថា ទាំងអស់នេះ ប្រទេសសិង្ហបុរី មានពលករបរទេសចំណាកស្រុក ដែលជាអ្នកបម្រើតាមផ្ទះ ប្រមាណជា ២៥០ ០០០នាក់ ដែលភាគច្រើន មកពីប្រទេសក្នុងភូមិភាគអាស៊ី ដែលទីទ័លក្រ និងតែងប្រឈមនឹងការធ្វើទារុណកម្មជាប្រក្រតី៕

ប្រភព៖ សារព័ត៌មានបរទេស
ប្រែសម្រួលដោយ ទិទីតំតាតូ

February 26, 2021

ក្រុមបាតុករប្រឆាំង និងគាំទ្រកងទ័ពនៅមីយ៉ានម៉ា ប៉ះទង្គិចគ្នា

ក្រុមអ្នកគាំទ្រយោធាមីយ៉ានម៉ាដែលយកអាវុធតាមខ្លួន បានប៉ះទង្គិចគ្នានឹងក្រុមបាតុករប្រឆាំងរដ្ឋប្រហារ នៅទីក្រុង Yangon ប្រទេសភូមាកាលពីម្សិលមិញ (26 កុម្ភៈ 2021) នាំឱ្យមានការព្រួយបារម្ភកាន់តែខ្លាំង។

បាតុកម្ម និងកូដកម្មប្រឆាំងរដ្ឋប្រហារយោធា ត្រូវបានធ្វើឡើងជារៀងរាល់ថ្ងៃនៅប្រទេសភូមា (មីយ៉ានម៉ា) ក្នុងរយៈពេល 3 ខែកន្លងមកនេះ។ ក្រុមនិស្សិត រួមនឹងក្រុមបាតុករផ្សេងទៀត នៅតែមានផែនការបន្តធ្វើបាតុកម្ម។ កាលពីថ្ងៃទី 25 កន្លងទៅ នៅពេលក្រុមបាតុករប្រឆាំងរដ្ឋប្រហារបង្ហាញខ្លួន ក៏ស្រាប់តែមានមនុស្សប្រហែល 1,000 នាក់ ដែលគាំទ្រកងទ័ព ក៏បានមានវត្តមាននៅកណ្ដាលទីក្រុង។ ការប៉ះទង្គិចគ្នារវាងក្រុមបាតុករទាំងពីរក្រុមខាងលើក៏បានកើតឡើង និងក្លាយជាអំពើហិង្សាយ៉ាងឆាប់រហ័ស។

យោងតាមសាក្សី ក្រុមគាំទ្រកងទ័ព ដែលមានអាវុធក្នុងដៃ ដូចជាកាំបិត ដំបង ជំពាមកៅស៊ូ និងដុំថ្ម បានប្រវាយប្រហារលើក្រុមបាតុករប្រឆាំងរដ្ឋប្រហារ ក្នុងនោះមានបាតុករយ៉ាងតិច 2 នាក់ ត្រូវបានចាក់។

មនុស្សមួយក្រុមប្រដាប់ដោយកាំបិត បានវាយប្រហារលើបុរសម្នាក់នៅខាងក្រៅសណ្ឋាគារមួយនៅក្នុងទីក្រុង។ បុគ្គលិកពេទ្យបានជួយសង្គ្រោះបុរសដែលត្រូវរបួសពេញខ្លួននេះ បន្ទាប់ពីក្រុមជនដៃដល់បានចាកចេញ ប៉ុន្តែមិនដឹងថា បុរសនោះនៅមានជីវិតដែរ ឬអត់។

កាលពីល្ងាចម្សិលមិញ ប៉ូលិសប្រឆាំងកុបកម្មរាប់សិបនាក់ បានបាញ់គ្រាប់បែកផ្សែងបង្ហូរទឹកភ្នែកដើម្បីបំបែកហ្វូងបាតុករដែលប្រមូលផ្ដុំគ្នានៅក្បែរការិយាល័យរដ្ឋាភិបាល ដើម្បីឆាំងនឹងការដែលកងទ័ពបានតែងតាំងមន្ត្រីមូលដ្ឋានម្នាក់។

អំពើហិង្សាខាងលើ បាននាំឱ្យមានការព្រួយបារម្ភកាន់តែខ្លាំងនៅប្រទេសនេះ។ មេដឹកយោធា Min Aung Hlaing បាននិយាយថា អាជ្ញាធរកំពុងប្រើប្រាស់កម្លាំងអាវុធតិចតួចបំផុត។

ក៏ប៉ុន្តែ គិតមកដល់បច្ចុប្បន្ន យ៉ាងហោចណាស់ មានបាតុករ 3 នាក់ និងប៉ូលិសម្នាក់ បានបាត់បង់ជីវិត។ គិតត្រឹមថ្ងៃទី 24 កុម្ភៈ មនុស្សចំនួន 728 នាក់ ត្រូវបានចាប់ខ្លួន ចោទប្រកាន់ និងកាត់ទោស ទាក់ទិននឹងបាតុកម្មប្រឆាំងរដ្ឋប្រហារ៕

ប្រភព៖ Reuters
ប្រែសម្រួល៖ បុត្រា

February 26, 2021

វៀតណាមត្រៀមចាក់វ៉ាក់សាំងបង្ការ Covid-19 ដែលទើបតែបាននាំចូលកាលពីម្សិលមិញ

ថ្ងៃទី 24 កុម្ភៈកន្លងទៅ យន្តហោះដឹកវ៉ាក់សាំងបង្ការ Covid-19 បានមកដល់ប្រទេសវៀតណាម ហើយនេះគឺជាឈុតដំបូងនៃវ៉ាក់សាំងរបស់ AstraZeneca (អង់គ្លេស) ដែលត្រូវបាននាំចូលដោយក្រុមហ៊ុនវៀតណាម VNVC (Vietnam Vaccine Joint Stock Company/VNVC)។

តំណាង VNVC ឱ្យដឹងថា វ៉ាក់សាំងនេះស្ថិតក្នុងកិច្ចព្រមព្រៀងកាលពីខែវិច្ឆិកា ឆ្នាំ 2020 រវាងក្រុមហ៊ុន AstraZeneca និង VNVC។

យោងតាមអនុរដ្ឋមន្ត្រីក្រសួងសុខាភិបាលវៀតណាម បច្ចុប្បន្នប្រទេសនេះ និងប្រទេសថៃ គឺជាទឹកដីដំបូងគេនៅតំបន់អាស៊ីអាគ្នេយ៍ដែលបានទទួលវ៉ាក់សាំងពី AstraZeneca។

វ៉ាក់សាំងបង្ការ Covid-19 ដែលទើបមកដល់វៀតណាមនេះ មានចំនួន 117,000 ដូស។ ក្នុងរយៈពេល 6 ខែដើមឆ្នាំ 2021 ក្រសួងសុខាភិបាលវៀតណាម នឹងទទួលបានវ៉ាក់សាំងចំនួន 30 លានដូស ដែលប្រទេសនេះបានបញ្ជាទិញ។ ក្រៅពីនេះ COVAX ដែលជាអង្គការផ្គត់ផ្គង់វ៉ាក់សាំងទូទាំងពិភពលោកប្រកបដោយតម្លាភាព ក្រុមការចាត់ចែងរបស់អង្គការសុខភាពពិភពលោក ក៏នឹងផ្ដល់ជំនួយជាវ៉ាក់សាំង (AstraZeneca) ដល់វៀតណាមចំនួន 4.9 លានដូសផងដែរ នៅក្នុងត្រីមាសទីមួយ និងទីពីរ។ ត្រីមាសទីបី វៀតណាមនឹងទទួលបាន 33 លានដូស។

វ៉ាក់សាំង Covid-19 របស់ក្រុមហ៊ុន AstraZeneca ដែលមានឈ្មោះថា ChAdOx នេះ ត្រូវបានអភិវឌ្ឍ និងផលិតដោយក្រុមហ៊ុន AstraZeneca សហការជាមួយសាកលវិទ្យាល័យ Oxford។ វ៉ាក់សាំងនេះត្រូវបានអភិវឌ្ឍដោយប្រើប្រាស់បច្ចេកវិទ្យា vector virus ដែលយកវីរុសផ្ដាសាយធំពីសត្វស្វាខ្មៅ Chimpanzee (ឈ្មោះតាមវិទ្យាសាស្ត្រ៖ Pan troglodytes) មកផ្សំ។ ប្រសិទ្ធភាពនៃវ៉ាក់សាំងរបស់ AstraZeneca ប្រែប្រួលពី 62 ដល់ 90% អាស្រ័យទៅលើបរិមាណនៃវ៉ាក់សាំងដែលត្រូវបានប្រើប្រាស់៕

ប្រភព៖ VE, CB

February 25, 2021

អាមេរិកសាកល្បងកាំជ្រួចផ្លោងឆ្លងទ្វីប៖ បាញ់តម្រង់គោលដៅចម្ងាយជាង 6.7ពាន់គីឡូម៉ែត្រ

កងទ័ពអាកាសសហរដ្ឋអាមេរិក បានបាញ់សាកល្បងកាំជ្រួចផ្លោងឆ្លងទ្វីប Minuteman III ដែលមិនមានបំពាក់ក្បាលគ្រាប់ ចេញពីមូលដ្ឋានទ័ពនៅ California និងបានចំគោលដៅដែលមានចម្ងាយពីមូលដ្ឋានទ័ពជាង 6,700 គីឡូម៉ែត្រ។

ការធ្វើតេស្តលើកាំជ្រួចផ្លោងឆ្លងទ្វីប (ICBM) Minuteman III នេះ ត្រូវបានធ្វើឡើងនៅឯមូលដ្ឋានទ័ព Vandenberg រដ្ឋ California កាលពីយប់ថ្ងៃទី 23 កុម្ភៈ។ កាំជ្រួចផ្លោងនេះបានបាញ់ចំគោលដៅនៅលើកោះថ្មប៉ប្រះទឹក Kwajalein នៃប្រជុំកោះ Marshall ដែលមានចម្ងាយជាង 6,700 គីឡូម៉ែត្រពីទីតាំងបាញ់សាកល្បង។

«កមកន្លាំង ICBM របស់ប្រទេសយើង តែងតែត្រៀមខ្លួនជាស្រេច 24/7» ឧត្ដមសេនីយ៍ Anthony Cotton មេបញ្ជាការរងនៃបញ្ជាការដ្ឋានវាយប្រហារទូទាំងសកលលោករបស់ទ័ពអាកាសអាមេរិក ឱ្យដឹងនៅក្នុងសេចក្ដីប្រកាសមួយកាលពីថ្ងៃទី 24 កុម្ភៈ។ លោកបន្តថា «ការធ្វើតេស្តនានា បានបញ្ជាក់អំពីកម្រិតនៃការត្រៀមខ្លួន និងទំនុកចិត្តទៅលើកាំជ្រួចផ្លោង Minuteman III ដែលយើងមាន»។

https://www.youtube.com/watch?v=26JdJqSySNI

មន្ត្រីយោធាខាងលើអះអាងថា សហរដ្ឋអាមេរិក «មានសមត្ថភាពគ្រប់គ្រងទំនុកចិត្ត ជាមួយនឹងវិធានការកំញើញជាយុទ្ធសាស្ត្រសកល ការពារសុវត្ថិភាពសម្ងាត់ និងប្រសិទ្ធភាព»។

កងទ័ពអាមេរិកឱ្យដឹងថា ការសាកល្បងអាវុធនេះមិនទាក់ទងនឹងព្រឹត្តិការណ៍នយោបាយពិភពលោក ឬភាពតានតឹងណាមួយក្នុងតំបន់ ព្រោះថា វាត្រូវបានរៀបចំតាំងតែពី 5 ឆ្នាំមុនមកម្ល៉េះ។

សហរដ្ឋអាមេរិកមានកាំជ្រួចផ្លោង Minuteman III ប្រមាណ 450 ដើម នៅពាសពេញទឹកដី រួមនឹងក្បាលគ្រាប់ប្រមាណ 3,800 គ្រាប់ ដែលស្ថិតក្នុងលក្ខណត្រៀមជាស្រេច និងក្បាលគ្រាប់ 2,000 គ្រាប់កំពុងនៅក្នុងឃ្លាំងសុវត្ថិភាព។ Minuteman III អាចបំពាក់ក្បាលគ្រាប់ W87 ដែលមានកម្លាំងបំផ្លាញ 450 kiloton ឬក្បាលគ្រាប់ W78 ចំនួន 3 គ្រាប់ ស្មើនឹងកម្លាំង 350 kiloton ដែលអាចវាយប្រហារលើគោលដាច់ដោយឡែករៀងៗខ្លួន៕

ប្រភព៖ Sputnik, Airforcetimes
ប្រែសម្រួល៖ បុត្រា

February 25, 2021

អ៊ីស្រាអែលផ្ដល់ប័ណ្ណបៃតងថ្មីដល់ពលរដ្ឋដែលបានចាក់វ៉ាក់សាំងបង្ការ Covid-19 រួចរាល់

ក្រសួងសុខាភិបាលអ៊ីស្រាអែល កាលពីថ្ងៃទី 24 កុម្ភៈ បានឱ្យដឹងថា ប្រទេសនេះកំពុងតែអនុវត្តផែនការផ្ដល់ប័ណ្ណបៃតង (Green Pass) ដល់ពលរដ្ឋគ្រប់រូបដែលបានចាក់វ៉ាក់សាំងបង្ការវីរុស Covid-19 រួចរាល់ ដើម្បីឱ្យពួកគេអាចចូលទៅកាន់ទីតាំងលេងកម្សាន្ត ផ្សារទំនើប ព្រមទាំងអាចដើរទេសចរណ៍ និងចូលរួមសកម្មភាពនានាដែលមានមនុស្សច្រើន។ Green Pass នេះមានផ្ទុកទិន្នន័យសម្ងាត់នៅក្នុងកូដ QR ដើម្បីចៀសវាងការក្លែងបន្លំ។

ជាក់ស្ដែង ចាប់ពីថ្ងៃទី 21 កុម្ភៈ អ៊ីស្រាអែល បានចាប់ផ្ដើមអនុញ្ញាតឱ្យទីតាំងផ្ដល់សេវាកម្មសម្រាប់មនុស្សច្រើននាក់ បើកដំណើរការឡើងវិញ ជាមួយនឹងលក្ខខណ្ឌ «អតិថិជនត្រូវតែមានប័ណ្ណបៃតង» មិនដូច្នោះទេ ពួកគេនឹងត្រូវបានបដិសេធ។ យោងតាមស្ថិតិ មកដល់ពេលនេះ អ៊ីស្រាអែលចាក់វ៉ាក់សាំងឱ្យពលរដ្ឋបានចំនួនជាង 50% ក្នុងនោះមាន 4 លាននាក់ បានចាក់គ្រប់ចំនួន។

បើទោះជាមានការអះអាងអំពីសុវត្ថិភាព ប៉ុន្តែ នៅតែមានពលរដ្ឋជាច្រើនមានការព្រួយបារម្ភចំពោះការចាក់វ៉ាក់សាំង។ ក្នុងចំណោមអ្នកមិនទាន់បានចាក់វ៉ាក់សាំងដែលត្រូវបានសួរ មានរហូតដល់ 41% ឆ្លើយថា ពួកគេខ្លាចមានបញ្ហាសុខភាពក្រោយពីចាក់វ៉ាក់សាំង ខណៈ 30% មានការសង្ស័យអំពីប្រសិទ្ធភាពរបស់វ៉ាក់សាំង និង 25% មិនមានបំណងចាក់វ៉ាក់សាំង។

មុននេះ ប័ណ្ណបៃតង ដែលចេញដោយក្រសួងសុខាភិបាលសម្រាប់ពលរដ្ឋអ៊ីស្រាអែល គ្រាន់តែជាក្រដាសបញ្ជាក់ធម្មតាមួយសន្លឹក ដោយវាមិនមានបំពាក់បច្ចេកវិទ្យាការពារការក្លែងបន្លំនោះទេ ដូច្នេះមានករណីធ្វើប័ណ្ណក្លែងក្លាយរាប់ម៉ឺននាក់បានកើតឡើង មុននឹង Green Pass ថ្មីត្រូវបានដាក់ឱ្យប្រើប្រាស់ នេះបើតាមអ្នកជំនាញផ្នែកការពារសន្តិសុខអ៊ីនធើណិត Ran Bar-Zik។

ឆ្លើយតបនឹងបញ្ហាខាងលើ អ៊ីស្រាអែល ក៏បានចេញប័ណ្ណបញ្ជាក់សុខភាពថ្មីមួយប្រភេទទៀតដែលមានផ្ទុកកូដ QR។ ពលរដ្ឋអាចចូលទៅកាន់គេហទំព័ររបស់ក្រសួងសុខាភិបាលដើម្បីរាយការណ៍ ស្នើ និងទាញយកប័ណ្ណនេះមកប្រើប្រាស់។

ក្រោយពីមានកម្មវិធីផ្ដល់ប័ណ្ណ Green Pass រួមនឹងយុទ្ធនាការចាក់វ៉ាក់សាំង រដ្ឋាភិបាលប្រទេសអ៊ីស្រាអែល កំពុងមានក្ដីសង្ឃឹមច្រើនថានឹងអាចបើកដំណើរការសេវាកម្មទេសចរណ៍ វប្បធម៌ កម្សាន្ត និងកីឡា ជាដើមឡើងវិញ ដើម្បីស្ដារសេដ្ឋកិច្ច និងសង្គមឱ្យមានប្រក្រតីភាពដូចដំណាក់កាលមុន Covid-19៕

ប្រភព៖ NBCNews
ប្រែសម្រួល៖ បុត្រា

February 25, 2021

ប្រទេសថៃនឹងលើកលែងការធ្វើចត្តាឡីស័កចំពោះទេសចរដែលបានចាក់វ៉ាក់សាំង Covid-19 រួចរាល់

អាជ្ញាធរថៃទំនងជានឹងលុបចោលការធ្វើចត្តាឡីស័កចំពោះភ្ញៀវទេសចរណ៍បរទេសដែលបានចាក់វ៉ាក់សាំងប្រឆាំងវីរុស Covid-19 រួចរាល់ ក្នុងបំណងស្ដារវិស័យទេសចរណ៍ឡើងវិញ។

ប្រការខាងលើនេះនឹងអាចធ្វើទៅបាន លុះត្រាតែអ្នកទេសចរណ៍បង្ហាញលិខិតបញ្ជាក់អំពីការចាក់វ៉ាក់សាំង Covid-19 ប៉ុន្តែ សមត្ថកិច្ចនឹងនៅតែតាមដានពួកគេ នេះបើតាមនាយករដ្ឋមន្ត្រីថៃ Prayuth Chan-ocha ដែលបានថ្លែងក្រោយពីបានបញ្ចប់កិច្ចប្រជុំគណៈរដ្ឋមន្ត្រីនៅទីក្រុងបាងកកកាលពីថ្ងៃទី 23 កុម្ភៈ។ រដ្ឋាភិបាលនឹងពិនិត្យល្អិតល្អន់មុននឹងអនុវត្តតាមការកំណត់។

ប្រទេសថៃបានអនុម័តឱ្យប្រើប្រាស់វ៉ាក់សាំង Covid-19 របស់ក្រុមហ៊ុន Sinovac Biotech និង AstraZeneca នៅក្នុងប្រទេសនេះ ព្រមទាំងបានបញ្ជាទិញវ៉ាក់សាំងចំនួន 63 លានដូស ពីក្រុមហ៊ុនទាំងពីរនេះផងដែរ។ ថៃនឹងទទួលបានវ៉ាក់សាំង Sinovac លើកដំបូងចំនួន 2 លានដូស នៅក្នុងថ្ងៃនេះ។

ប្រទេសថៃក៏នឹងនាំចូលវ៉ាក់សាំងប្រឆាំង Covid-19 ពីក្រុមហ៊ុនដទៃទៀតនាពេលខាងមុខ ប៉ុន្តែ រដ្ឋាភិបាលនឹងគ្រប់គ្រងវ៉ាក់សាំងទាំងនោះនៅក្នុងដំណាក់កាលដំបូង។

ប្រទេសថៃ បច្ចុប្បន្ន មានអ្នកឆ្លងវីរុសជាង 25,000 នាក់ ក្នុងនោះមាន 83 នាក់បានស្លាប់ ប៉ុន្តែប្រទេសនេះស្ថិតនៅក្នុងចំណោមប្រទេសដែលមានករណីឆ្លងទាប។ យ៉ាងនេះក្ដី វិស័យទេសចរណ៍របស់ថៃ ក៏នៅតែទទួលរងផលប៉ះពាល់យ៉ាងធ្ងន់ធ្ងរដោយសារ Covid-19។

លទ្ធផលនៃការស្រាវជ្រាវកាលពីខែមុនរបស់អាជ្ញាធរទេសចរណ៍ថៃ (Tourism Authority of Thailand/TAT) បានបង្ហាញថា ក្រុមហ៊ុនដែលរកស៊ីក្នុងវិស័យទេសចរណ៍ប្រមាណ 34.7% បានបិទទ្វារ ឬផ្អាកដំណើរការ។ ប្រទេសថៃបានបើកទ្វារទទួលទេសចរចាប់ពីខែធ្នូ ឆ្នាំ 2020 ប៉ុន្តែ អ្នកទេសចរណ៍ដែលមកដល់ប្រទេសនេះ តម្រូវឱ្យធ្វើចត្តាឡីស័ករយៈពេល 14 ថ្ងៃ៕

ប្រភព៖ SCMP
ប្រែសម្រួល៖ បុត្រា

February 24, 2021

ហ្វីលីពីនស្នើ បញ្ជូនគិលានុបដ្ឋាកទៅធ្វើការនៅអង់គ្លេស និងអាល្លឺម៉ង់ ដើម្បីប្ដូរយកវ៉ាក់សាំង Covid-19

កាលពីថ្ងៃទី 23 កុម្ភៈ មន្ត្រីជាន់ខ្ពស់ហ្វីលីពីនបានឱ្យដឹងថា ប្រទេសនេះនឹងអនុញ្ញាតឱ្យបុគ្គលិកផ្នែកសុខាភិបាលរាប់ពាន់នាក់របស់ខ្លួន ដែលភាគច្រើនគឺជាគិលានុបដ្ឋាក ទៅធ្វើការនៅប្រទេសអង់គ្លេស និងអាល្លឺម៉ង់ បើសិនប្រទេសទាំងពីរនេះ យល់ព្រមផ្ដល់ជំនួយជាវ៉ាក់សាំង Covid-19 ដល់ហ្វីលីពីន។

ហ្វីលីពីនដែលជាប្រទេសមួយក្នុងចំណោមប្រទេសដែលមានករណីឆ្លងវីរុស Covid-19 ច្រើនជាងគេនៅអាស៊ី បានបន្ធូរបន្ថយបទបញ្ជាហាមបុគ្គលិកសុខាភិបាលចាកចេញពីប្រទេស ប៉ុន្តែនៅតែរឹតត្បិតលើអ្នកជំនាញសុខាភិបាល ដោយមិនអនុញ្ញាតឱ្យទៅធ្វើការនៅបរទេស លើសពី 5,000/ឆ្នាំ។

ប្រធាននាយកដ្ឋានគ្រប់គ្រងបញ្ហាអន្តរជាតិនៃក្រសួងការងារហ្វីលីពីន លោកស្រី Alice Visperas ឱ្យដឹងថា ប្រទេសនេះកំពុងរកមើលលទ្ធភាពបន្ធូរបន្ថយការហាមប្រាមលើបញ្ហាខាងលើ ដើម្បីប្ដូរយកវ៉ាក់សាំងរបស់អង់គ្លេស និងអាល្លឺម៉ង។ វ៉ាក់សាំងទាំងនោះនឹងត្រូវយកមកចាក់ឱ្យពលករបរទេស និងពលរដ្ឋហ្វីលីពីនដែលវិលត្រលប់ពីបរទេស។

អង់គ្លេស និងអាល្លឺម៉ង់ ស្ថិតក្នុងចំណោមប្រទេសដែលមានអ្នកឆ្លង Covid-19 ខ្ពស់ជាងគេក្នុងពិភពលោក។ ប្រទេសទាំងនេះបានចាក់វ៉ាក់សាំង Covid-19 ដល់ពលរដ្ឋរាប់សិបលាននាក់រួចហើយ ខណៈហ្វីលីពីន មិនទាន់បានចាប់ផ្ដើមយុទ្ធនាការចាក់វ៉ាក់សាំងឱ្យពលរដ្ឋពេញវ័យ 70 លាននាក់ ស្មើនឹង 60% នៃប្រជាជនសរុបរបស់ប្រទេសនេះនៅឡើយ។

ហ្វីលីពីន តាមគម្រោងនឹងទទួលបានវ៉ាក់សាំងនៅក្នុងសប្ដាហ៍នេះ ដោយចិនជាអ្នកផ្ដល់ជំនួយ។ ហ្វីលីពីន មានបំណងរកឱ្យបានវ៉ាក់សាំងប្រឆាំង Covid-19 ចំនួន 148 លានដូស សម្រាប់ចាក់ឱ្យពលរដ្ឋរបស់ខ្លួន។

ពលរដ្ឋហ្វីលីពីនដែលធ្វើការនៅបរទេស ក្នុងនោះមានក្រុមគិលានុបដ្ឋាកផងដែរ បាននាំមកនូវលំហូរសាច់ប្រាក់ពីបរទេស ប្រមាណ 30 ពាន់លានដុល្លារ/ឆ្នាំ ដល់ហ្វីលីពីន។ យោងតាមស្ថិតិរបស់រដ្ឋាភិបាល ឆ្នាំ 2019 គិលានុបដ្ឋាកជិត 17,000 របស់ហ្វីលីពីន បានចុះកិច្ចសន្យាធ្វើការនៅបរទេស៕

ប្រភព៖ Reuters
ប្រែសម្រួល៖ បុត្រា

February 24, 2021

ស្ថានភាពប្រឈមមុខដាក់គ្នារវាងក្រុមប៉ុលិសមីយ៉ានម៉ា និងក្រុមបាតុករប្រឆាំងរដ្ឋប្រហារ គិតមកដល់ថ្ងៃនេះ

ក្រុមប៉ូលិសភូមា (មីយ៉ានម៉ា) បាននាំគ្នាដេញ និងចាប់បាតុករជាច្រើនរយនាក់នៅក្នុងព្រឹត្តិការណ៍ប្រឈមមុខដាក់គ្នាប្រកបដោយភាពវឹកវរនៅរដ្ឋធានី ណៃពីដោ កាលពីថ្ងៃទី 22 កុម្ភៈ។

វីដេអូដែលត្រូវបានថតដោយទូរស័ព្ទរបស់ពលរដ្ឋ បង្ហាញថា ក្រុមប៉ូលិសប្រដាប់អាវុធបានបែងចែកទិសដៅគ្នា ដេញចាប់ក្រុមបាតុករដែលកំពុងរត់គេចខ្លួននៅ Pyinmana ដែលជាក្រុងរណបមួយរបស់រដ្ឋធានី។ រថយន្តប្រអប់មួយគ្រឿងរបស់ក្រុមប៉ូលិសឈប់នៅលើដងផ្លូវ ហើយបាតុករម្នាក់ត្រូវបានប៉ូលិសចាប់ខ្លួន និងត្រូវកៀប និងរុញច្រានឱ្យចូលក្នុងប្រអប់ ក្នុងពេលសំឡេងស្រែកប្រឆាំងបន្លឺឡើងកងរំពង។

អ្នកជិះម៉ូតូម្នាក់ឱ្យដឹងថា ខ្លួនបានជិះឆ្លងកាត់ក្បែររថយន្តប្រអប់ចំនួន 3 គ្រឿងរបស់ប៉ូលិស និងឃើញថា ក្នុងនោះមានបាតុករពេញណែនទាំងអស់។ យោងតាមសាក្សី បាតុករប្រមាណជាង 200 នាក់ ដែលភាគច្រើនគឺជានារីភេទ ត្រូវបានប៉ូលិសចាប់ខ្លួន។

ក្រុមគ្រួសាររបស់បាតុករដែលត្រូវបានចាប់ខ្លួន បានសម្ដែងការព្រួយបារម្ភខ្លាំងនៅលើបណ្ដាញសង្គម និងបានឱ្យដឹងថា បាតុករទាំងនោះសុទ្ធតែត្រូវបានបញ្ជូនទៅកាន់មូលដ្ឋានទ័ព។ បើសិនជាព័ត៌មាននេះជាការពិត នោះវាគឺជាករណីចាប់ខ្លួនធំបំផុត រាប់ចាប់ពីចលនាប្រឆាំងរដ្ឋប្រហារនៅមីយ៉ានម៉ាត្រូវបានបង្កើតឡើង។

មនុស្សរាប់ម៉ឺននាក់បាននាំគ្នាចេញធ្វើបាតុកម្មនៅក្នុងទីក្រុងធំៗរបស់ប្រទេសភូមា កាលពីថ្ងៃទី 22 កុម្ភៈ ដើម្បីប្រឆាំងនឹងអំពើរដ្ឋប្រហាររបស់កងទ័ព។ ពួកគេស្នើឱ្យស្ដាររដ្ឋាភិបាលស៊ីវិល និងដោះលែងក្រុមមន្ត្រីដែលត្រូវបានចាប់ខ្លួន ក្នុងនោះមានទាំងទីប្រឹក្សារដ្ឋ លោកស្រី Aung San Suu Kyi ផងដែរ។

មនុស្សយ៉ាងហោច 3 នាក់ បានបាត់បង់ជីវិតដោយសារការបាញ់ប្រហារពីក្រុមប៉ូលិស នៅក្នុងបាតុកម្មនានា ខណៈដែលភាគីខាងកងទ័ពក៏បានប្រកាសថា ប៉ូលិសម្នាក់បានស្លាប់ដោយសាររងរបួសធ្ងន់នៅពេលប្រឈមមុខដាក់គ្នាជាមួយនឹងក្រុមបាតុករនៅ Mandalay។

ប្រទេសអង់គ្លេស អាមេរិក និងកាណាដា សុទ្ធតែបានចាប់ផ្ដើមដាក់ទណ្ឌកម្មលើក្រុមមន្ត្រីយោធាជាន់ខ្ពស់របស់ប្រទេសមីយ៉ានម៉ា ប៉ុន្តែ កងទ័ពនៃប្រទេសនេះ មកដល់បច្ចុប្បន្ន នៅតែមិនអើពើដល់សម្ពាធនានាពីសហគមន៍អន្តរជាតិ៕

ប្រភព៖ Reuters

February 23, 2021

ពលរដ្ឋមីយ៉ានម៉ារាប់ម៉ឺននាក់ ចេញធ្វើបាតុកម្មប្រឆាំងកងទ័ព នាថ្ងៃនេះ

បាតុកររាប់ម៉ឺននាក់បាននាំគ្នាចេញធ្វើបាតុកម្មនៅក្នុងទីក្រុងធំៗ ដូចជា Naypyidaw, Yangon និង Mandalay ជាដើម ដើម្បីប្រឆាំងនឹងរដ្ឋប្រហារយោធា បើទោះជាមានការព្រមានសម្លាប់ ពីសំណាក់កងទ័ព។

នាថ្ងៃទី 22 កុម្ភៈ ឆ្នាំ 2021 នេះ ពលរដ្ឋមីយ៉ានម៉ារាប់ម៉ឺននាក់ នៅតែបន្តនាំគ្នាចេញដើរតាមដងផ្លូវនៅក្នុងទីក្រុង និងទីរួមស្រុកនានាពាសពេញទឹកដីមីយ៉ានម៉ា ដើម្បីជំទាស់នឹងការដែលកងទ័ពឡើងគ្រប់គ្រងអំណាច បើទោះជាក្រុមមន្ត្រីយោធាបានព្រមានថា បាតុករអាចនឹងត្រូវ «បាត់បង់ជីវិត» ប្រសិនប្រឈមមុខនឹងកងសន្តិសុខ។

Protesters take part in a demonstration against the military coup in Mandalay on February 22, 2021. (Photo by STR / AFP)

ក្រុមបាតុករខ្លះអង្គុយស្រែកហ៊ោនៅតាមដងផ្លូវក្នុងទីក្រុង Mandalay។ បាតុករជាច្រើន ពាក់មួក និងពាក់វ៉ែនតាពិសេសដើម្បីទប់ទល់នឹងផ្សែងបង្ហូរទឹកភ្នែក និងគ្រាប់កាំភ្លើងកៅស៊ូរបស់ប៉ូលិស។

Protesters hold up signs during a demonstration against the military coup in Naypyidaw on February 22, 2021. (Photo by STR / AFP)

ចលនា Civil Disobedience Movement របស់មីយ៉ានម៉ា ថ្ងៃនេះ បានអំពាវនាវឱ្យមានការធ្វើកូដកម្មទូទាំងប្រទេស និងបិទការិយាល័យ និងហាងទាំងអស់ដើម្បីប្រឆាំងនឹងកងទ័ព។ ក្រុមមេដឹកនាំបាតុករក៏បានអំពាវនាវឱ្យពលរដ្ឋភូមាទាំងអស់ ចូលរួមធ្វើបាតុកម្ម និងបង្កើតជា «សមុទ្រមនុស្សពេញទីក្រុង»។

ប៉ូលិសមីយ៉ានម៉ា កាលពីថ្ងៃទី 20 កន្លងទៅ បានបាញ់ប្រហារទៅលើក្រុមបាតុករនៅទីក្រុង Mandalay បណ្ដាលឱ្យមានអ្នកស្លាប់យ៉ាងតិច 2 នាក់ និងជាង 30 នាក់រងរបួស។

February 22, 2021

Category: អន្តរជាតិ