អន្តរជាតិ - La Reine Media

តៃវ៉ាន់ធ្វើទំនើបកម្មយន្តហោះចម្បាំង F-16 ចំនួន 42គ្រឿង ឱ្យទៅជា F-16V

យន្តហោះចម្បាំង F-16A/B របស់កោះតៃវ៉ាន់ចំនួន 42 គ្រឿងដែលត្រូវបានដំឡើងឱ្យទៅជា F-16V តាមគម្រោងនឹងត្រូវប្រគល់ឱ្យកងកម្លាំងការពារដែនកោះនេះនៅចុងខែមីនា 2021។

Huang Chih-wei មេបញ្ជាការទ័ពអាកាសតៃវ៉ាន់ កាលពីថ្ងៃទី 17 មីនា បានឱ្យដឹងថា យន្តហោះចម្បាំង F-16A/B ដែលត្រូវបានធ្វើទំនើបកម្មឱ្យទៅជា F-16V មានសមត្ថភាពអាច «រកឃើញសត្រូវបានលឿនជាង និងអាចវាយប្រហារក្នុងរយៈចម្ងាយឆ្ងាយជាង»។ យន្តហោះចម្បាំង F-16V របស់ទ័ពអាកាសតៃវ៉ាន់ បច្ចុប្បន្ន មានសមត្ថភាពវាយប្រហារគ្របដណ្ដប់ទូទាំងដែនអាកាសរបស់កោះនេះ។

យន្តហោះចម្បាំង F-16V ទាំងនេះនឹងត្រូវបានដាក់ឱ្យប្រើប្រាស់នៅក្នុងក្រុមហោះហើរយុទ្ធសាស្ត្រលេខ4 នាំឱ្យអង្គភាពនេះក្លាយជាស្ថាប័នដំបូងគេរបស់កងទ័ពការពារដែនអាកាសតៃវ៉ាន់ មានសុទ្ធតែ F-16V នេះបើតាមលោក Huang Chih-wei។ ពិធីប្រគល់យន្តហោះចម្បាំងទាំងនេះនឹងត្រូវបានធ្វើឡើងនៅចុងខែមីនា ដែលក្នុងពិធីនោះនឹងមានវត្តមានរបស់មេដឹកនាំតៃវ៉ាន់ លោកស្រី Tsai Ing-wen ផងដែរ។

ទ័ពអាកាសតៃវ៉ាន់ កាលពីឆ្នាំ 2016 បានចាប់ផ្ដើមដំណើរការកម្មវិធីដំឡើង F-16A/B ទៅជា F-16V ប្រកបដោយភាពទាន់សម័យបំផុត ជាមួយនឹងប្រព័ន្ធអេឡិចត្រូនិកស្ដង់ដាខ្ពស់ជាងគេ រួមនឹងប្រព័ន្ធគ្រប់គ្រងការហោះហើរ និងប្រយុទ្ធទាន់សម័យ។ តាមផែនការ កម្មវិធីដែលត្រូវបានដំណើរការដោយក្រុមហ៊ុនអភិវឌ្ឍឧស្សាហកម្មអាកាសចរណ៍តៃវ៉ាន់ (Aerospace Industrial Development Corporation/AIDC) សហការជាមួយនឹងក្រុមហ៊ុនផលិតអាវុធLockheed Martin របស់អាមេរិក ដែលត្រូវចំណាយប្រាក់ប្រមាណ 3.7 ពាន់លានដុល្លារខាងលើនេះ នឹងត្រូវបញ្ចប់នៅមុនដំណាច់ឆ្នាំ 2023។

ក្រៅពី F-16A/B ដែលត្រូវបានដំឡើងស្ដង់ដាថ្មី តៃវ៉ាន់ក៏បានបញ្ជាទិញយន្តហោះចម្បាំង F-16V ថ្មី ពីសហរដ្ឋអាមេរិកចំនួន 66 គ្រឿង ដែលមានតម្លៃរាប់ពាន់លានដុល្លារផងដែរ ដែលកោះមួយនេះនឹងផ្ដើមទទួលបានចាប់ពីឆ្នាំ 2022។ កាលពីឆ្នាំ 1992 កោះតៃវ៉ាន់បានទិញយន្តហោះចម្បាំង F-16 ចំនួន 160 គ្រឿង ហើយបច្ចុប្បន្នកំពុងគ្រប់គ្រងប្រមាណ 150 គ្រឿង។

កោះតៃវ៉ាន់កំពុងតែស្វែងរកវិធីដើម្បីធ្វើទំនើបកម្មលើសព្វាវុធរបស់ខ្លួន នៅក្នុងគ្រាដែលប្រទេសចិនដីគោក កំពុងបង្កើនសម្ពាធលើកោះនេះ។ មួយរយៈពេលចុងក្រោយនេះ ចិនដីគោក តែងតែបញ្ជូនយន្តហោះចម្បាំងមកកៀកនឹងកោះនេះជារៀងរាល់ថ្ងៃ នាំឱ្យតៃវ៉ាន់ត្រូវពង្រាយយន្តហោះចម្បាំងដើម្បីទប់ទល់។

លោកស្រី Tsai Ing-wen ប្រធានាធិបតីកោះតៃវ៉ាន់ និងយន្តហោះចម្បាំងមួយគ្រឿងរបស់ក្រុមហ៊ុន AIDC

ក្រុមមន្ត្រី តៃវ៉ាន់ បានឱ្យដឹងថា ក្នុងឆ្នាំ 2020 កងកម្លាំងការពារដែនអាកាសរបស់ខ្លួនបានចំណាយប្រាក់ជិត 1.1 ពាន់លានដុល្លារអាមេរិកដើម្បីទប់ស្កាត់យន្តហោះយោធារបស់ចិនដីគោក ដែលហោះចូលក្នុងតំបន់កំណត់អត្តសញ្ញាណដែនអាកាស (ADIZ) របស់កោះនេះ។ មេបញ្ជាការទ័ពអាកាសតៃវ៉ាន់ លោក Huang Chih-wei បានបញ្ជាក់ថា ប្រាក់ចំណាយក្នុងមួយម៉ោងៗ សម្រាប់យន្តហោះចម្បាំង F-16 គឺ 5,300 ដុល្លារអាមេរិក, សម្រាប់ AIDC F-CK-1 គឺ 7,800 ដុល្លារ ហើយសម្រាប់យន្តហោះប្រមាញ់នាវាមុជទឹក P-3C គឺ 7,000 ដុល្លារ។

សាធារណរដ្ឋប្រជាមានិតចិន (ចិនដីគោក) តែងតែចាត់ទុកថា កោះតៃវ៉ាន់គឺជាទឹកដីមួយផ្នែករបស់ខ្លួនដែលមិនអាចកាត់ផ្ដាច់បាន ហើយថា ការប្រកាសឯករាជ្យរបស់កោះនេះគឺ «ស្មើនឹងសង្គ្រាម»។ ប៉ុន្តែ សាធារណរដ្ឋចិន (ចិនតៃវ៉ាន់) ឯណោះវិញ កំពុងតែចាត់ទុកថា ខ្លួនជាប្រទេសឯករាជ្យស្រាប់ មិនចាំបាច់ប្រកាសឯករាជ្យទៀតឡើយ៕

ប្រភព៖ Focus Taiwan
ប្រែសម្រួល៖ បុត្រា

March 18, 2021

ព្រឹទ្ធសភាអាមេរិកតែងតាំងស្ត្រីដើមកំណើតតៃវ៉ាន់ ជាតំណាងពាណិជ្ជកម្មអាមេរិក ដើម្បីប្រឈមមុខនឹងចិន

កាលពីថ្ងៃទី 17 មីនា 2021 ព្រឹទ្ធសភាអាមេរិក បានអនុម័តតែងតាំងលោកស្រី Katherine Tai ជាអ្នកតំណាងពាណិជ្ជកម្មអាមេរិកនៅក្នុងរដ្ឋាភិបាលរបស់ប្រធានាធិបតី Joe Biden។

សារព័ត៌មាន AP និងកាសែត The Hill បានរាយការណ៍ថា លោកស្រី Katherine Tai ទទួលបានការគាំទ្រស្ទើរតែដាច់ខាតនៅក្នុងការបោះឆ្នោតរបស់សភា ដោយមាន 98 សំឡេងគាំទ្រ និងមិនមានសំឡេងជំទាស់។

លទ្ធផលខាងលើនេះ ជួយឱ្យលោកស្រី Katherine Tai ក្លាយជាពលរដ្ឋអាមេរិកាំងដើមកំណើតអាស៊ីដំបូងគេ និងជាស្ត្រីស្បែកខ្មៅដំបូងគេដែលកាន់កាប់តំណែងជាអ្នកតំណាងពាណិជ្ជកម្មអាមេរិក។ លោកស្រីបានក្លាយជាសមាជិកទី 19 នៅក្នុងគណៈរដ្ឋមន្ត្រីរបស់ប្រធានាធីបតី Biden ដែលត្រូវបានសភាជាន់ខ្ពស់គាំទ្រ។

នៅពេលកាន់កាប់តំណែងជាអ្នកតំណាងពាណិជ្ជកម្មអាមេរិក លោកស្រី Tai នឹងត្រូវប្រឈមមុខជាមួយនឹងភារកិច្ចយ៉ាងច្រើននៅក្នុងគ្រាដែលរដ្ឋាភិបាលលោក Biden កំពុងកំណត់គោលនយោបាយពាណិជ្ជកម្ម ក្នុងនោះក៏មានកិច្ចការដោះស្រាយបញ្ហាសង្គ្រាមពាណិជ្ជកម្មជាមួយប្រទេសចិន អនុវត្តកិច្ចព្រមព្រៀងពាណិជ្ជកម្មជាមួយនឹងម៉ិកស៊ិក និងកាណាដា រួមនឹងការដោះស្រាយបញ្ហាពាណិជ្ជកម្មជាមួយនឹងសហភាពអឺរ៉ុប (EU)។ល។

លោកស្រី Katherine Tai បច្ចុប្បន្នមានអាយុ 46 ឆ្នាំ គឺជាកូននៃគ្រួសារមួយមកពីកោះតៃវ៉ាន់។ លោកស្រីជាអ្នកជំនាញខាងចរចាផ្នែកពាណិជ្ជកម្ម និងជាមេធាវីជើងចាស់ម្នាក់ផងដែរ។

លោកស្រី Katherine Tai ត្រូវបានគេស្គាល់ថាជាមេធាវីលំដាប់កំពូលមួយរូបដែលធ្វើការនៅការិយាល័យតំណាងពាណិជ្ជកម្មរបស់សហរដ្ឋអាមេរិក អំពីបញ្ហាជាមួយប្រទេសចិន នៅក្នុងអំឡុងឆ្នាំ 2007-1214 ដោយចូលរួមដោះស្រាយផ្ទាល់រាល់បញ្ហាពាណិជ្ជកម្មរវាងអាមេរិក និងចិន នៅអង្គការពាណិជ្ជកម្មពិភពលោក (WTO)។

មេធាវីរូបនេះក៏ធ្លាប់បានប្រកាសថា នឹងធ្វើការជាមួយក្រុមប្រទេសជាសម្ព័ន្ធមិត្តរបស់អាមេរិក ដើម្បីបង្កើតសមរភូមិរួមមួយ សម្រាប់ទប់ទល់នឹងប្រទេសចិនដែលសហរដ្ឋអាមេរិកយល់ឃើញថា កំពុងធ្វើសកម្មភាពប្រកបដោយភាពដាច់ខាត៕

ប្រភព៖ AP, The Hill
ប្រែសម្រួល៖ បុត្រា

March 18, 2021

សមាគមព្រះពុទ្ធសាសនាធំបំផុតនៅភូមា ថ្កោលទោសកងទ័ព និងត្រៀមចេញសេចក្ដីថ្លែងការណ៍

សមាគមព្រះពុទ្ធសាសនាដែលមាន «ទឹកមាត់ប្រៃ» បំផុត នៅប្រទេសភូមា (មីយ៉ានម៉ា) បានថ្កោលទោសចំពោះការបង្រាប និងសម្លាប់បាតុករដែលកងទ័ពប្រទេសនេះបានធ្វើឡើង ទន្ទឹមនឹងការអំពាវនាវឱ្យបញ្ចប់អំពើហិង្សា។

គណៈកម្មធិការព្រះសង្ឃពុទ្ធសាសនា Maha Nayaka ដែលជាសមាគមព្រះពុទ្ធសាសនាមានអំណាចបំផុតនៅភូមា ថ្ងៃនេះ (17 មីនា 2021) បានចោទប្រកាន់ «សមាជិកមួយចំនួននៃកងកម្លាំងប្រដាប់អាវុធ» ថា បានធ្វើទារុណកម្ម និងសម្លាប់ពលរដ្ឋសាមញ្ញដែលគ្មានទោសពៃរ៍។

តាមគម្រោង សមាគមព្រះសង្ឃខាងលើនឹងផ្អាករាល់សកម្មភាពនៃព្រះពុទ្ធសាសនាដើម្បីជំទាស់នឹងការប្រើអំពើហិង្សារបស់កងទ័ពទៅលើបាតុករ។ សមាគមនេះនឹងចេញសេចក្ដីប្រកាសចុងក្រោយ បន្ទាប់ពីបានទទួលយោបល់ពីរដ្ឋមន្ត្រីក្រសួងធម្មការនិងសាសនា នៅថ្ងៃទី 18 មីនាខាងមុខ។

ក្រុមអ្នកបួសនៅមីយ៉ានម៉ា គឺជាអ្នកនាំមុខក្នុង «បដិវដ្ដ Saffron» កាលពីឆ្នាំ 2007 ក្នុងការប្រឆាំងនឹងរបបយោធា និងបានជួយបើកផ្លូវឱ្យមានរបបប្រជាធិបតេយ្យនៅប្រទេសនេះ។ ឥរិយាបថរបស់ Maha Nayaka បានបង្ហាញអំពីការប្រេះឆារវាងកងទ័ព ជាមួយនឹងសមាគមដែលមានទំនាក់ទំនងជិតស្និទ្ធនឹងរដ្ឋាភិបាល។

មីយ៉ានម៉ា បានធ្លាក់ចូលក្នុងភាពវឹកវរចាប់តាំងពីកងទ័ពបានធ្វើរដ្ឋប្រហារផ្ដួលរំលំរដ្ឋាភិបាលស្របច្បាប់ និងបានចាប់ខ្លួនលោកស្រី Aung San Suu Kyi កាលពីថ្ងៃទី 1 កុម្ភៈ 2021 ព្រមទាំងបានចាប់ខ្លួនក្រុមមន្ត្រីជាន់ខ្ពស់ជាច្រើនរូបរបស់បក្សសម្ព័ន្ធជាតិដើម្បីប្រជាធិបតេយ្យ នាំឱ្យមានបាតុកម្មកើតឡើងពាសពេញប្រទេស។ យោងតាមអង្គការគាំពារអ្នកទោសនយោបាយ បាតុករជាង 180 នាក់ បានស្លាប់នៅពេលប៉ះទង្គិចជាមួយនឹងកងកម្លាំងប្រដាប់អាវុធ។

បើទោះជាត្រូវបានបង្រាបយ៉ាងបង្ហូរឈាមក៏ដោយ ក្រុមបាតុករភូមានៅតែមិនដកថយ។ ប៉ុន្តែពួកគេកំពុងជួបបញ្ហាជាច្រើនផ្សេងទៀត ក្នុងនោះក៏មានបញ្ហាគ្មានអ៊ីនធើណិតប្រើប្រាស់ដើម្បីទាក់ទងគ្នាផងដែរ ដោយសារអាជ្ញាធរបានកាត់ផ្ដាច់៕

ប្រភព៖ Reuters
ប្រែសម្រួល៖ បុត្រា

March 17, 2021

Biden យល់ព្រមលក់អាវុធជាលើកដំបូងរបស់ខ្លួនទៅឱ្យកោះតៃវ៉ាន់

សហរដ្ឋអាមេរិកយល់ព្រមលក់កែវយឹតនាវាមុជទឹក ប្រព័ន្ធកំណត់ទិសនៃសំឡេងក្នុងទឹក (sonic navigation system) ទៅឱ្យគម្រោងផលិតនាវាមុជទឹករបស់កោះតៃវ៉ាន់ នៅក្នុងកិច្ចព្រមព្រៀងដំបូងក្នុងសម័យរបស់ប្រធានាធិបតី Joe Biden។

កម្មវិធីផលិតនាវាមុជទឹកក្នុងស្រុករបស់កោះតៃវ៉ាន់ បានឈានដល់ចំណុចគួរឱ្យចាប់អារម្មណ៍មួយ បន្ទាប់ពីទីក្រុងវ៉ាស៊ីងតោនសម្រេចផ្ទល់ការអនុញ្ញាតឱ្យនាំចេញប្រព័ន្ធអាវុធចំនួន 3 ប្រភេទដែលកោះតៃវ៉ាន់មិនអាចផលិតដោយខ្លួនឯងបាន។ នេះបើតាមមេដឹកនាំអង្គភាពការពារខ្លួនរបស់តៃវ៉ាន់ Chiu Kuo-cheng ដែលបានឱ្យដឹងកាលពីថ្ងៃទី 16 មីនា 2021។

«អំពីពេលវេលានៃការប្រគល់ទំនិញ ខ្ញុំមិនអាចនិយាយមុនបានទេ» លោក Chiu ថ្លែងដូច្នេះ។ ក្រុមមន្ត្រីតៃវ៉ាន់មិនបានឱ្យដឹងលម្អិតអំពីអាវុធដែលទីក្រុងវ៉ាស៊ីងតោនលក់មកឱ្យតៃវ៉ាន់នោះដែរ ប៉ុន្តែ កោះនេះធ្លាប់បានទទួលស្គាល់ថា ខ្លួនមិនអាចអភិវឌ្ឍប្រព័ន្ធកំណត់ទិសសំឡេងក្នុងទឹកលក្ខណឌីជីថល (sonar) ប្រព័ន្ធប្រយុទ្ធចម្រុះ និងឧបករណ៍ជំនួយបន្ថែម ដូចជា កញ្ចក់កែវយឹតរបស់នាវាមុជទឹកជាដើម នាំឱ្យតៃវ៉ាន់ត្រូវសង្ឃឹមលើបច្ចេកវិទ្យារបស់សហរដ្ឋអាមេរិក។

ប្រភពព័ត៌មានពីកងទ័ពតៃវ៉ាន់ បានបង្ហើបឱ្យដឹងថា អតីតប្រធានាធិបតី Donald Trump បានចុះហត្ថលេខាលក់ប្រព័ន្ធ sonar និងប្រព័ន្ធប្រយុទ្ធចម្រុះដល់កោះតៃវ៉ាន់មុនពេលដាច់អាណត្តិ ខណៈដែលលិខិតអនុញ្ញាតឱ្យប្រគល់កែវយឹតនាវាមុជទឹកត្រូវបានចេញជាលើកដំបូងដោយប្រធានាធិបតី Joe Biden តាមរយៈកិច្ចព្រមព្រៀងលក់អាវុធទៅឱ្យតៃវ៉ាន់។

កោះតៃវ៉ាន់ បច្ចុប្បន្នមាននាវាមុជទឹកចំនួន 4គ្រឿង ប៉ុន្តែ បានហួសសម័យអស់ហើយ

សហរដ្ឋអាមេរិកធ្លាប់សន្យាលក់នាវាមុជទឹកប្រើប្រេងម៉ាសុត-អគ្គិសនីចំនួន 8 គ្រឿងទៅឱ្យតៃវ៉ាន់កាលពីឆ្នាំ 2001។ ប៉ុន្តែ កិច្ចព្រមព្រៀងនេះក្រោយមកក៏ត្រូវលុបចោល ហើយកោះតៃវ៉ាន់បានសម្រេចចិត្តផលិតនាវាមុជទឹកដោយខ្លួនឯង។

នាវាមុជទឹកក្នុងស្រុកដំបូងរបស់តៃវ៉ាន់ ត្រូវបានចាប់ផ្ដើមផលិតកាលពីខែវិច្ឆិកា 2020 ហើយបើតាមផែនការ នាវាដំបូងនឹងត្រូវដាក់ឱ្យប្រើប្រាស់ចាប់ពីឆ្នាំ 2024 ដើម្បីជំនួសនាវាមុជទឹកដែលហួសសម័យ។

កងទ័ពកោះតៃវ៉ាន់ បច្ចុប្បន្នមាននាវាមុជទឹកចំនួន 4 គ្រឿង ក្នុងនោះមានពីរគ្រឿងផលិតនៅសហរដ្ឋអាមេរិកកាលពីសម័យសង្គ្រាមលោកលើកទីពីរ និងពីរគ្រឿងផលិតនៅប្រទេសហូឡង់ ក្នុងអំឡុងឆ្នាំ 1982-1986។ នាវាទាំងនេះ ពិតជាមិនអាចប្រៀបធៀបបានជាមួយនឹងនាវាមុជទឹករបស់ចិន ដោយសារនាវារបស់តៃវ៉ាន់ចាស់ៗអស់ទៅហើយ។

ចិនចាត់ទុកកោះតៃវ៉ាន់ជាផ្នែកមួយនៃទឹកដីរបស់ខ្លួន និងរង់ចាំតែថ្ងៃដណ្ដើមយកមកវិញប៉ុណ្នោះ បើទោះជាត្រូវធ្វើសង្គ្រាមក៏ដោយ។ ព្រោះតែហេតុនេះហើយបានជាតៃវ៉ាន់ត្រូវរកគ្រប់មធ្យោបាយដើម្បីទប់ទល់នឹងមហិច្ឆតារបស់ចិនដីគោក៕

ប្រភព៖ SCMP
ប្រែសម្រួល៖ បុត្រា

March 17, 2021

(វីដេអូ)-យន្តហោះខ្នាតតូច ហោះមកបុករថយន្តកំពុងធ្វើដំណើរ! មនុស្សបួននាក់បានស្លាប់

សាក្សីម្នាក់នៅកន្លែងកើតហេតុ បានឱ្យដឹងថា ករណី «គ្រោះថ្នាក់ចរាចរណ៍» ផ្លូវអាកាស និងផ្លូវគោកខាងលើនេះ បានបង្កឱ្យមានសំឡេងផ្ទុះយ៉ាងខ្លាំង អមជាមួយនឹងភ្លើងឆាបឆេះយ៉ាងសន្ធោសន្ធៅ។

ទូរទស្សន៍ RT បានរាយការណ៍ថា មនុស្ស្ពីរនាក់បានស្លាប់ និងពីរនាក់រងរបួសធ្ងន់ធ្ងរ បន្ទាប់ពីយន្តហោះខ្នាតតូចមួយគ្រឿងបានហោះធ្លាក់មកបុករថយន្តមួយគ្រឿងដែលកំពុងធ្វើដំណើរតាមដងផ្លូវនៅក្នុងរដ្ឋ Florida សហរដ្ឋអាមេរិក ក្បែរព្រលានយន្តហោះ North Perry កាលពីរសៀលថ្ងៃទី 15 មីនា បណ្ដាលឱ្យមនុស្សពីរនាក់នៅលើយន្តហោះត្រូវអស់សង្ខារ។ ចំណែកជនរងគ្រោះពីរនាក់ដែលជាម្ដាយនិងកូនដែលនៅក្នុងរថយន្ត កំពុងស្ថិតក្នុងស្ថានភាពគ្រោះថ្នាក់ដល់ជីវិត។

ទិដ្ឋភាពនៅក្នុងវីដេអូបង្ហាញថា យន្តហោះម៉ាស៊ីនទោល ខ្នាតតូច បានហោះមកបុកនឹងរថយន្ត បណ្ដាលឱ្យយន្តហោះត្រូវផ្ទុះឆេះ ខណៈរថយន្តត្រូវប៉ើងក្រឡាប់ផ្កាប់ផ្ងារ ក្នុងគ្រាដែលអណ្ដាតភ្លើងឆេះរាលយ៉ាងឆាប់រហ័សតម្រង់មកកាន់រថយន្ត។

នាង Anabel Fernandez បានប្រាប់ទូរទស្សន៍ CBS ថា «យើងឮសំឡេងផ្ទុះលាន់យ៉ាងខ្លាំងដូចទៅនឹងគ្រាប់បែក ហើយគ្រប់យ៉ាងបានឆាបឆេះ។ យន្តហោះបានហោះមកបុករថយន្ត»។

បន្ទាប់ពីជួបគ្រោះថ្នាក់ ស្ត្រី និងកូនក្មេងម្នាក់ត្រូវជាប់ក្នុងរថយន្ត ប៉ុន្តែត្រូវបានជួយសង្គ្រោះទាន់ពេល និងត្រូវបានបញ្ជូនទៅកាន់មន្ទីរពេទ្យដែលនៅក្បែរនោះ។ ប៉ុន្តែ ក្រោយមក ក៏បានបាត់បង់ជីវិត។

អត្តសញ្ញាណរបស់ជនរងគ្រោះ និងមូលហេតុ មិនទាន់ត្រូវបានប្រកាសឱ្យដឹងជាផ្លូវការនៅឡើយ។ ប៉ុន្តែ នាយកដ្ឋានពន្លត់អគ្គិភ័យនៃទីក្រុង Pembroke Pines បង្ហើបឱ្យដឹងថា អ្នកបើកបរយន្តហោះប្រហែលជាបានផ្ដល់ដំណឹងអំពីបញ្ហាម៉ាស៊ីនដល់មជ្ឈមណ្ឌលគ្រប់គ្រងការហោះហើររួចហើយ៕

ប្រភព៖ RT, CBS
ប្រែសម្រួល៖ បុត្រា

March 17, 2021

មូលហេតុដែលឥណ្ឌាបញ្ជូនវ៉ាក់សាំងបង្ការCovid-19 រាប់លានដូស ទៅឱ្យប្រទេសចំនួន60 ក្នុងពិភពលោក

ក្នុងគ្រាដែលបណ្ដាប្រទេសអ្នកមាននៅតែរក្សាទុកវ៉ាក់សាំងសម្រាប់ប្រើប្រាស់ក្នុងស្រុក ប្រទេសឥណ្ឌាឯណោះវិញត្រូវបានគេសរសើរយ៉ាងខ្លាំងដោយសារតែមានសន្ដានចិត្តល្អ ផ្ដល់ជំនួយជាវ៉ាក់សាំងបង្ការវីរុស Covid-19 ចំនួន 33 លានដូស និងច្រើនជាងនេះ ទៅឱ្យបណ្ដាប្រទេសក្រីក្ររាប់សិបនៅទូទាំងពិភពលោក។

នៅពេលដែលប្រទេសជាច្រើនលើពិភពលោក ដណ្ដើមគ្នាទិញ និងរក្សាទុកវ៉ាក់សាំងបង្ការវីរុស Covid-19 គេឃើញមានលេចឡើងនូវពាក្យជាច្រើនឃ្លា ដូចជា «រត់ប្រណាំងដណ្ដើមវ៉ាក់សាំង» ឬថា «លទ្ធិពលរដ្ឋវ៉ាក់សាំង» ជាដើម បានលេចឡើងនៅក្នុង «វចនានុក្រម» សកល។

ក៏ប៉ុន្តែ នៅក្នុងពេលដែលកិច្ចសហការទូទាំងពិភពលោកនៅក្នុងការចែករំលែកវ៉ាក់សាំងនៅមានកម្រិតនៅឡើយ ហើយគម្រោងបែងចែកវ៉ាក់សាំងរបស់អង្គការសុខភាពពិភពលោក (WHO) នៅតែមិនទាន់ត្រូវបានដំណើរការខ្លាំងក្លា ប្រទេសឥណ្ឌាក៏បាននិងកំពុងដើរតាមផ្លូវដោយឡែករបស់ខ្លួន នោះគឺ «ការទូតវ៉ាក់សាំង»។

យុទ្ធនាការណ៍ «Vaccine Maitri» (វ៉ាក់សាំងមិត្តភាព) របស់ប្រទេសនេះ បានបញ្ជូនវ៉ាក់សាំង Covidshield ដែលឥណ្ឌាបានផលិតទៅតាមការអនុញ្ញាតរបស់ Oxford-AstraZeneca ចំនួនរាប់លានដូស ទៅឱ្យប្រទេសប្រហែល 60 ក្នុងពិភពលោក។

ឥណ្ឌាគឺជាមហាអំណាចមួយក្នុងពិភពលោកផ្នែកផលិតឱសថ ដោយប្រទេសនេះផលិតឱសថប្រភពដើមប្រមាណ 20% និងវ៉ាក់សាំងប្រមាណ 62% ធៀបនឹងពិភពលោកទាំងមូល។ ដូច្នេះ ឥណ្ឌាទំនងជាមានប្រៀបជាងប្រទេសផ្សេងៗក្នុងការចាត់ចែងវ៉ាក់សាំង។

វ៉ាក់សាំងផលិតនៅឥណ្ឌា ត្រូវបានប្រើប្រាស់នៅអាហ្វហ្កានីស្ថាន

មុនពេលវ៉ាក់សាំងបង្ការ Covid-19 ត្រូវបានគេអភិវឌ្ឍ ឥណ្ឌាបានផ្គត់ផ្គង់ថ្នាំ hydroxychloroquine និង paracetamol ទៅឱ្យប្រទេសប្រហែល 100 និងឧបករណ៍ធ្វើតេស្ត រួមនឹងបរិក្ខារពេទ្យជាច្រើនផ្សេងទៀតទៅឱ្យប្រទេសប្រហែល 90 ក្នុងពិភពលោ។

ក្រោយមក នៅពេលវ៉ាក់សាំង Oxford-AstraZeneca មិនទាន់ទទួលបានការអនុម័តនៅឡើយ លោក Adar Poonawall ប្រធានវិទ្យាស្ថានសេរ៉ូមឥណ្ឌា (SII ជាក្រុមហ៊ុនឯកជន) បានសម្រេចចិត្តផលិតវ៉ាក់សាំងនេះ ដែលជាការផ្សងព្រេងមានតម្លៃរាប់ពាន់លានដុល្លារអាមេរិក។

នៅពេលវ៉ាក់សាំង AstraZeneca ទទួលបានការអនុម័ត SII ផលិតបានវ៉ាក់សាំងនេះក្នុងបរិមាណរាប់លានដូស ដើម្បីប្រើប្រាស់ក្នុងស្រុក និងនាំចេញទៅបរទេស។

វ៉ាក់សាំងប្រភេទផ្សេងៗគ្នារបស់ឥណ្ឌា ត្រូវបានបញ្ជូនទៅកាន់ប្រទេសស្ទើរតែទាំងអស់ដែលនៅជិតខាងឥណ្ឌា រួមមាន អាហ្វហ្គានីស្ថាន, បង់ក្លាដែស, ប៊ូតាន, ស្រីលង្កា, ម៉ាល់ឌីវ, មីយ៉ានម៉ា, នេប៉ាល ហើយឆ្ងាយជាងនេះគឺបណ្ដាប្រទេសដូចជា កម្ពុជា, សីសែល, ម៉ុងហ្គោលី, បណ្ដាប្រទេសនៅតំបន់ការីបៀន និងអាហ្វ្រិកជាដើម។

វ៉ាក់សាំងបានជួយផ្សះផ្សារទំនាក់ទំនងរវាងឥណ្ឌាជាមួយនឹងបង់ក្លាដែស និងកែលម្ហមិត្តភាពជាមួយនឹងម៉ាឌីវ ទន្ទឹមនឹងការពង្រឹងទំនាក់ទំនងមិត្តភាពជាមួយប្រទេសជាច្រើនទៀត។

វ៉ាក់សាំងផលិតនៅឥណ្ឌា ហាក់មានប្រៀបជាងបណ្ដាប្រទេសផ្សេងៗ នៅពេលនិយាយដល់ការផលិតដើម្បីគោលដៅប្រើប្រាស់ផ្ទាល់ខ្លួន ដោយសារតែមានតម្លៃទាប។ ក្រៅពីនេះ វ៉ាក់សាំងដែលផលិតដោយឥណ្ឌាក៏ត្រូវគេជឿថា មានសុវត្ថិភាព កាត់បន្ថយការចំណាយបានច្រើន ព្រោះតែមិនតម្រូវឱ្យមានការការពារ និងដឹកជញ្ជូននៅក្នុងសីតុណ្ហភាពទាប។

ក្រៅពីត្រូវបានប្រើប្រាស់នៅក្នុងបណ្ដាប្រទេសក្រីក្រ វ៉ាក់សាំងរបស់ឥណ្ឌាក៏ត្រូវបានផ្គត់ផ្គង់ដល់បណ្ដាប្រទេសអ្នកមានផងដែរ ក្នុងនោះមានដូចជាចក្រភពអង់គ្លេស និងកាណាដាជាដើម។

ប្រទេសឥណ្ឌាក៏កំពុងផ្គត់ផ្គង់វ៉ាក់សាំងបង្ការ Covid-19 ចំនួន 1.1ពាន់លានដូស ទៅឱ្យកម្មវិធី COVAX របស់អង្គការសុខភាពពិភពលោក ដើម្បីបែងចែកដល់បណ្ដាប្រទេសក្រីក្រ។

គោលនយោបាយការទូតផ្នែកវ៉ាក់សាំងរបស់ប្រទេសឥណ្ឌា បាននាំមកនូវផលប្រយោជន៍ដល់មហិច្ឆតាក្លាយជាមហាអំណាចពិភពលោកផ្នែកឱសថ និងមហាអំណាចដែលមាន «ទឹកមាត់ប្រៃ» នៃប្រទេសនេះ។ បើសិនជាកៅអីអចិន្ត្រៃយ៍នៅក្រុមប្រឹក្សាសន្តិសុខអង្គការសហប្រជាជាតិត្រូវបានរៀបចំឡើងវិញ នោះប្រទេសនានាដែលបានទទួលផលប្រយោជន៍ពីឥណ្ឌា ប្រាកដជានឹងដឹងគុណចំពោះអ្នកណាដែលធ្វើកិច្ចការច្រើនបំផុតដើម្បីសង្គ្រោះពិភពលោកដែលកំពុងទទួលរងការវាយប្រហារពី Covid-19៕

ប្រភព៖ CAN
ប្រែសម្រួល៖ បុត្រា

March 17, 2021

សមាជិកម្នាក់នៃក្រុមអ្នកជំនាញរបស់ WHO បង្ហើបអំពីប្រភពរបស់វីរុស Covid-19 បន្ទាប់ពីបានស្រាវជ្រាវនៅប្រទេសចិន

សមាជិកម្នាក់នៃក្រុមអ្នកស្រាវជ្រាវរបស់អង្គការសុខភាពពិភពលោក យល់ថា កសិដ្ឋានចិញ្ចឹមសត្វព្រៃជាច្រើននៅភាគខាងត្បូងប្រទេសចិន ទំនងជាប្រភពដែលបង្កឱ្យមានការឆ្លងរាលដាលនៃវីរុស Covid-19។

ប្រទេសចិនបានបិទទ្វារកសិដ្ឋានចិញ្ចឹមសត្វព្រៃតាំងពីខែកុម្ភៈ ឆ្នាំ 2020 នេះបើតាម Peter Daszak អ្នកបរិស្ថានវិទ្យាដែលជំនាញផ្នែករោគឆ្លងរបស់អង្គការសម្ព័ន្ធសុខភាពអេកូឡូស៊ី (EcoHealth Alliance) និងជាសមាជិកនៃប្រតិភូរបស់អង្គការសុខភាពពិភពលោក (WHO) ដែលបានទៅស្រាវជ្រាវនៅប្រទេសចិនក្នុងឆ្នាំនេះ។

ក្នុងដំណើរស្រាវជ្រាវនៅប្រទេសចិន លោក Daszak ឱ្យដឹងថា ក្រុមស្រាវជ្រាវរបស់ WHO បានរកឃើញភ័ស្ដុតាងថ្មីបង្ហាញថា កសិដ្ឋានទាំងនេះបានផ្គត់ផ្គង់សត្វព្រៃដល់ផ្សារលក់គ្រឿងសមុទ្រ Huanan (Huanan Seafood Wholesale Market) នៅទីក្រុង Wuhan ជាកន្លែងផ្ទុះឆ្លងរាល់ដាលនៃវីរុស Covid-19 ដំបូងគេកាលពីចុងឆ្នាំ 2019។

ប្រតិកម្មរបស់រដ្ឋាភិបាលចិនគឺជាសញ្ញាដ៏ខ្លាំងក្លាបង្ហាញថា ទីក្រុងប៉េកាំង វាយតម្លៃខ្ពស់ថា កសិដ្ឋាននានានៅទីនេះអាចជាច្រកចេញសម្រាប់ការឆ្លងរាលដាលរបស់វីរុសកូរ៉ូណាពីសត្វប្រចៀវមកមនុស្សនៅទីក្រុង Wuhan។

ក្នុងចំណោមកសិដ្ឋានខាងលើ មានកសិដ្ឋានមួយនៅក្នុងខេត្ត Yunnan គឺជាផ្នែកមួយនៃគម្រោងរបស់រដ្ឋាភិបាលចិន ដែលបានដំណើរការអស់រយៈពេល 20 ឆ្នាំមកហើយ។ «ពួកគេចាប់សត្វព្រៃចម្លែកៗមកចិញ្ចឹម មានដូចជាសត្វសំពោច, ប្រមា, ពង្រូល។ល» លោក Daszak បង្ហើបឱ្យដឹងដូច្នេះ។

តាមគម្រោង WHO នឹងប្រកាសលទ្ធផលនៃការសិក្សាស្រាវជ្រាវលើប្រភពរបស់ Covid-19 នៅក្នុងអំឡុងពីរសប្ដាហ៍ខាងមុខ។ Daszak វាយតម្លៃខ្ពស់ទៅលើអ្វីដែលក្រុមរបស់ WHO រកឃើញនៅប្រទេសចិន។

លោក Daszak ថ្លែងថា «ប្រទេសចិនបានជំរុញឱ្យមានការអភិវឌ្ឍកសិដ្ឋានចិញ្ចឹមសត្វព្រៃដើម្បីជាវិធីសាស្ត្រសម្រាប់កាត់បន្ថយភាពក្រីក្រនៅតំបន់ជនបទ»។ កសិដ្ឋានទាំងនេះ បានជួយឱ្យរដ្ឋាភិបាលចិនសម្រេចបានគោលដៅកាត់បន្ថយគម្លាតរវាងតំបន់ជនបទជាមួយនឹងទីក្រុងកាលពីឆ្នាំ 2020។

លោក Daszak បន្តថា «កម្មវិធីខាងលើទទួលបានជោគជ័យយ៉ាងត្រចះត្រចង់។ ឆ្នាំ 2016 កសិដ្ឋានទាំងនោះមានកម្មករសរុបចំនួន 14 លាននាក់។ វិស័យនេះ មានតម្លៃ 70 ពាន់លានដុល្លារអាមេរិក»។

ថ្ងៃទី 24 កុម្ភៈ 2020 នៅពេលស្ថានភាពរោគរាតត្បាតកើតឡើងនៅទីក្រុង Wuhan រដ្ឋាភិបាលចិនក៏បានសម្រេចចិត្តលើកិច្ចការសំខាន់មួយ នោះគឺ «ឈប់ចិញ្ចឹមសត្វព្រៃធ្វើជាអាហារ»។ «ពួកគេបានណែនាំកសិករឱ្យបំផ្លាញចោលសត្វព្រៃទាំងនោះដោយសុវត្ថិភាព មានដូចជា កប់ និងដុតជាដើម ដែលជាវិធីមិនឱ្យមានការរីករាលដាលនៃវីរុស»។

ហេតុអ្វីរដ្ឋាភិបាលចិនធ្វើដូច្នេះ? បើតាមលោក Daszak កសិដ្ឋានទាំងនេះអាចជាទីតាំងឆ្លងរាលដាលដ៏ប្រសើរ ជាកន្លែងដែលវីរុសឆ្លងពីសត្វប្រចៀវមកសត្វណាមួយផ្សេងទៀត ហើយក្រោយមកសត្វនោះបានចម្លងវីរុសនោះមកមនុស្ស។

លោក Daszak បញ្ជាក់ថា «ខ្ញុំពិតជាយល់ថា Covid-19 ចាប់ផ្ដើមឆ្លងមកមនុស្សនៅក្នុងតំបន់ភាគខាងត្បូងនៃប្រទេសចិន។ ការរកឃើញថ្មីៗនេះ ក៏សុទ្ធតែបានបញ្ជាក់អំពីប្រការនេះដែរ»៕

ប្រភព៖ Reddit, NPR
ប្រែសម្រួល៖ បុត្រា

March 16, 2021

នាយករដ្ឋមន្ត្រីថៃ ចាក់វ៉ាក់សាំងបង្ការ Covid-19 របស់ AstraZeneca! WHO បន្តលើកទឹកចិត្តឱ្យចាក់វ៉ាក់សាំងនេះ

នាយករដ្ឋមន្ត្រីថៃ លោក Prayuth Chan-ocha គឺជាមនុស្សដំបូងគេនៅប្រទេសថៃដែលបានចាក់វ៉ាក់សាំង AstraZeneca ក្នុងគ្រាដែលប្រទេសជាច្រើនក្នុងពិភពលោក កំពុងសង្ស័យលើហានិភ័យនៃបញ្ហាកកឈាមក្រោយពីការចាក់វ៉ាក់សាំងនេះ។

«ថ្ងៃនេះ ខ្ញុំបានជួយបង្កើនទំនុកចិត្តដល់សាធារណជន» នាយករដ្ឋមន្ត្រី Prayuth ថ្លែងដូច្នេះនៅពេលទទួលការចាក់វ៉ាក់សាំងបង្ការ Covid-19 របស់ក្រុមហ៊ុន AstraZeneca។ មេដឹកនាំវ័យ 67 ឆ្នាំរូបនេះ ក្រោយមកបានឱ្យដឹងថា លោកមានសុវត្ថិភាពបន្ទាប់ពីបានចាក់វ៉ាក់សាំង។

តាមគម្រោង លោក Prayuth និងសមាជិកគណៈរដ្ឋមន្ត្រី ត្រូវចាក់វ៉ាក់សាំងនៅថ្ងៃទី 12 មីនា ប៉ុន្តែ ត្រូវបានពន្យារពេល ក្រោយពីប្រទេសថៃត្រូវផ្អាកការប្រើប្រាស់វ៉ាក់សាំង AstraZeneca ដោយសារមានព័ត៌មានមិនល្អទាក់ទងនឹងការចាក់វ៉ាក់សាំងនេះ ដែលបាននាំឱ្យប្រទេសជាច្រើននៅអឺរ៉ុប ត្រូវផ្អាកយុទ្ធនាការចាក់វ៉ាក់សាំង AstraZeneca។

បណ្ដាប្រទេសដែលបានផ្អាកការប្រើប្រាស់ AstraZeneca រួមមាន បារាំង, អ៊ីតាលី, អាល្លឺម៉ង់, ស្លូវេនី, អេស្ប៉ាញ, អៀរឡង់, ហូឡង់, ដាណឺម៉ាក, អ៊ីស្លង់, អូទ្រីស, ប៊ុលហ្គារី, រ៉ូម៉ានី, អេស្តូនី, លីទុយអានី, លុចសំបួ និងប្រទេសឡាតវីយ៉ា។

ក៏ប៉ុន្តែ រដ្ឋមន្ត្រីក្រសួងសុខាភិបាលថៃ កាលពីថ្ងៃទី 15 មីនា បានប្រកាសថា យុទ្ធនាការចាក់វ៉ាក់សាំងនឹងត្រូវបានធ្វើបន្តទៀត ព្រោះថា ប្រទេសជាច្រើនបានបញ្ជាក់ថា វ៉ាក់សាំង AstraZeneca មិនមែនជាមូលហេតុដែលនាំឱ្យមានបញ្ហាកកឈាម។

វ៉ាក់សាំងបង្ការ Covid-19 ដែលផលិតឡើងដោយក្រុមហ៊ុន AstraZeneca សហការជាមួយសាកលវិទ្យា Oxford នៃប្រទេសអង់គ្លេស ត្រូវបានអនុម័តឱ្យប្រើប្រាស់បន្ទាន់ ឬចររាចរណ៍នៅក្នុងប្រទេសជាង 50 រួមមានទាំងអង់គ្លេស និងសហភាពអឺរ៉ុបផងដែរ។ គិតមកដល់ថ្ងៃទី 10 មីនា មនុស្សប្រមាណ 5 លាននាក់នៅអឺរ៉ុប បានចាក់វ៉ាក់សាំងបង្ការវីរុស Covid-19 របស់ AstraZeneca។

យ៉ាងណាក៏ដោយ អង្គការសុខភាពពិភពលោក (WHO) នៅតែលើកទឹកចិត្តឱ្យប្រទេសនានាបន្តប្រើប្រាស់វ៉ាក់សាំង AstraZeneca ដដែល ដោយអះអាងថា មកដល់ពេលនេះ WHO មិនទាន់រកឃើញទំនាក់ទំនងរវាងបញ្ហាកកឈាមជាមួយនឹងវ៉ាក់សាំងនេះនៅឡើយ។

ចំណែកនាយករដ្ឋមន្ត្រីអង់គ្លេស លោក Boris Johnson ក៏បានប្រកាសថា វ៉ាក់សាំង AstraZeneca មានសុវត្ថិភាព ហើយរដ្ឋាភិបាលអង់គ្លេសមានទំនុកចិត្តក្នុងការប្រើប្រាស់វ៉ាក់សាំងនេះ។

ភាគីក្រុមហ៊ុន AstraZeneca ក៏បានបញ្ជាក់ថា ពួកគេបានវិភាគទៅលើទិន្នន័យជាង 10 លានច្បាប់ និងបានរកឃើញថា វ៉ាក់សាំងនេះមានសុវត្ថិភាព ហើយថា មិនបានរកឃើញភ័ស្ដុតាងណាមួយបញ្ជាក់ថា វាបង្កហានិភ័យនៃបញ្ហាកកឈាមនោះឡើង៕

ប្រភព៖ Reuters
ប្រែសម្រួល៖ បុត្រា

March 16, 2021

តួលេខនៃវីរុស Covid-19 នៅទូទាំងសកលលោក និងអាស៊ីអាគ្នេយ៍ គិតត្រឹមព្រឹកថ្ងៃទី 16មីនា 2021

ពិភពលោកទាំងមូល បានរកឃើញអ្នកវិជ្ជមាននឹង Covid-19 សរុបចំនួន 120,745,285 នាក់ ក្នុងនោះមានអ្នកស្លាប់ចំនួន 2,671,178 នាក់, ជាសះស្បើយចំនួន 97,393,278 នាក់ និងកំពុងព្យាបាលចំនួន 20,680,829 នាក់ ខណៈជាង 88,000 នាក់ អាចបាត់បង់ជីវិត ដោយសារមានអាការធ្ងន់ធ្ងរ។

សហរដ្ឋអាមេរិក (វិជ្ជមានសរុប 30,135,055 នាក់, ស្លាប់សរុប 547,963 នាក់), ប្រេស៊ីល (វិជ្ជមានសរុប 11,519,609 នាក់, ស្លាប់សរុប 279,286 នាក់) និងឥណ្ឌា (វិជ្ជមានសរុប 11,409,524 នាក់, ស្លាប់សរុប 158,892 នាក់) គឺជាប្រទេសដែលរងគ្រោះដោយសារវីរុស Covid-19 ធ្ងន់ធ្ងរជាងគេបំផុតក្នុងពិភពលោក។

នៅតំបន់ ASEAN បច្ចុប្បន្ន អ្នកវិជ្ជមាននឹងវីរុសនេះ បានកើនឡើងដល់ជាង 2.610.500 នាក់ ក្នុងនោះមានករណីបានជាសះស្បើយចំនួនជាង 2.339.840 នាក់ និងអ្នកស្លាប់មានចំនួនជាង 55.980 នាក់។

ប្រទេសចំនួនបីដែលកំពុងជាសម្បុកវីរុស Covid-19 ធំជាងគេក្នុងតំបន់អាស៊ីអាគ្នេយ៍គឺ ឥណ្ឌូនេស៊ី, ហ្វីលីពីន និងម៉ាឡេស៊ី ខណៈកម្ពុជាស្ថិតក្នុងចំណាត់ថ្នាក់ទី8 ដដែល៕

ប្រភព៖ Worldometers
ដកស្រង់ និងប្រែសម្រួល៖ បុត្រា

March 16, 2021

វៀតណាមថា វ៉ាក់សាំង COVIVAC របស់ខ្លួន ទទួលបានការវាយតម្លៃខ្ពស់ពីសហរដ្ឋអាមេរិក និងឥណ្ឌា មុនការពិសោធលើមនុស្សដំណាក់កាលដំបូង

កាលពីម្សិលមិញ (15 មីនា 2021) វៀតណាមបានចាប់ផ្ដើមចាក់វ៉ាក់សាំង Covivac របស់ខ្លួនទៅឱ្យអ្នកស្ម័គ្រចិត្តចំនួន 6 នាក់ នៅក្នុងការពិសោធលើមនុស្សដំណាក់កាលដំបូង នៅឯសាកលវិទ្យាល័យវេជ្ជសាស្ត្រហាណូយ។

«នេះគឺជាប្រភេទវ៉ាក់សាំងដែលយើងខ្ញុំមានក្ដីសង្ឃឹមជាទីបំផុត ព្រោះថា វាទទួលបានការវាយតម្លៃខ្ពស់ពីឥណ្ឌា និងនៅសហរដ្ឋអាមេរិក។ ជាងនេះ លទ្ធផលនៃការត្រួតពិនិត្យនៅសាកលវិទ្យាល័យវេជ្ជសាស្ត្រ Icahn នៅ Mount Sinai ទីក្រុង New York សហរដ្ឋអាមេរិក កាលពីពេលថ្មីៗនេះ បង្ហាញថា វ៉ាក់សាំង Covivac មានប្រសិទ្ធភាពខ្ពស់ក្នុងការបង្ការវីរុសក្លាយពូជថ្មីនៅអង់គ្លេស និងនៅអាហ្វ្រិកខាងត្បូង។ល»

ខាងលើនេះគឺជាការចែករំលែកឱ្យដឹងកាលពីព្រឹកថ្ងៃទី 15 មីនា 2021 ពីសាស្ត្រាចារ្យវេជ្ជបណ្ឌិត Tran Van Thuan អនុរដ្ឋមន្ត្រីក្រសួងសុខាភិបាលវៀតណាម។

វ៉ាក់សាំង Covivac គឺជាផលិតផលសហការណ៍រវាងវិទ្យាស្ថានវ៉ាក់សាំងនិងជីវវេជ្ជសាស្ត្រ (IVAC) របស់វៀតណាម ជាមួយនឹងសាកលវិទ្យាល័យវេជ្ជសាស្ត្រ Icahn នៅ Mount Sinai ក្នុងទីក្រុង New York, សាកលវិទ្យាល័យ Texas នៅ Austin, អង្គការអាមេរិក PATH និងដៃគូផ្សេងៗមួយចំនួនទៀត។

ការសិក្សាស្រាវជ្រាវក្នុងការអភិវឌ្ឍវ៉ាក់សាំងខាងលើ ត្រូវបានតាមដានជាលក្ខណឯករាជ្យដោយ Vietstar Biomedical Research ខណៈដែលទិន្នន័យត្រូវបានគ្រប់គ្រង និងវិភាគដោយមជ្ឈមណ្ឌល BIOPHICS នៃសាកលវិទ្យាល័យ Mahidol នៃប្រទេសថៃ។

ប្រភពព័ត៌មានឱ្យដឹងថា ការពិសោធលើមនុស្សដំណាក់កាលទីមួយនេះ មានអ្នកស្ម័គ្រចិត្តចំនួន 120 នាក់ ដែលចែកចេញជា 5 ក្រុម រួមមាន 3 ក្រុមត្រូវប្រើវ៉ាក់សាំង ដែលមិនមាន adjuvant (ជាសារធាតុ មានតួនាទីដាស់ប្រព័ន្ធសរីរាង្គការពារខ្លួនរបស់មនុស្សឱ្យមានភាពរឹងមាំ ទប់ជាមួយនឹងវីរុស), 1 ក្រុមត្រូវចាក់អង្គបដិប្រាណ S កម្រិត 1mcg ដែលមានបន្ថែមសារធាតុ adjuvant និង 1 ក្រុមទៀតដែលមានអ្នកស្ម័គ្រចិត្ត 20 នាក់ នឹងត្រូវបានចាក់វ៉ាក់សាំង placebo (ទឹកអំបិលដែលបានរំងាប់មេរោគ) ដើម្បីប្រៀបធៀបជាមួយនឹងក្រុមទាំងខាងលើ។

បន្ទាប់ពីមានរបាយការណ៍លទ្ធផលនៅពាក់កណ្ដាល និងចុងដំណាក់កាលទីមួយ ដែលគ្រោងនឹងធ្វើឡើងនៅក្នុងខែកក្កដា 2021 នោះក្រុមស្រាវជ្រាវនឹងដាក់សំណើសុំការអនុម័តពីក្រសួងសុខាភិបាលដើម្បីបន្តការពិសោធលើមនុស្សដំណាក់ទីពីរ បើសិនជាវ៉ាក់សាំងសម្រេចបានដូចស្ដង់ដាសុវត្ថិភាព និងមានសមត្ថភាពទប់ស្កាត់វីរុស៕

ប្រភព៖ CB
ប្រែសម្រួល៖ បុត្រា

March 16, 2021

Category: អន្តរជាតិ