អន្តរជាតិ - La Reine Media

កាណាដាផ្អាកចាក់វ៉ាក់សាំងបង្ការ Covid-19 របស់ AstraZeneca សម្រាប់មនុស្សអាយុក្រោម 55ឆ្នាំ

យោងតាមប្រភពព័ត៌មានពីទីក្រុង Ottawa ក្រុមមន្ត្រីសុខាភិបាលនៃប្រទេសកាណាដា កាលពីថ្ងៃទី 29មីនា បានឱ្យដឹងថា ប្រទេសនេះផ្អាកការប្រើប្រាស់វ៉ាក់សាំងបង្ការ Covid-19 របស់ក្រុមហ៊ុន AstraZeneca សម្រាប់មនុស្សវ័យក្រោម 55ឆ្នាំ និងស្នើឱ្យមានការវិភាគថ្មីអំពីផលប្រយោជន៍ ក៏ដូចជាហានិភ័យដែលបង្កឡើងដោយវ៉ាក់សាំងនេះ ដោយយោងទៅលើវ័យ និងភេទ។

ឥរិយាបថខាងលើនេះត្រូវបានធ្វើឡើងបន្ទាប់ពីមានរបាយការណ៍ជាច្រើនពីអឺរ៉ុបទាក់ទងនឹងករណីកកឈាមដ៏កម្រជួប ប៉ុន្តែមានភាពធ្ងន់ធ្ងរ និងករណីស្លាប់មួយចំនួនបន្ទាប់ពីបានចាក់វ៉ាក់សាំង AstraZeneca ដែលភាគច្រើនកើតឡើងលើស្ត្រីវ័យក្មេង។ បច្ចុប្បន្ន មិនទាន់មានករណីដូចនេះត្រូវបានរាយការណ៍នៅកាណាដានៅឡើយ ក្រោយពីវ៉ាក់សាំង AstraZeneca ប្រមាណ 307,000ដូស ត្រូវបានប្រើប្រាស់។

«យើងកំពុងផ្អាកការប្រើប្រាស់វ៉ាក់សាំងរបស់ AstraZeneca សម្រាប់មនុស្សដែលមានវ័យក្រោម 55ឆ្នាំ ដើម្បីរង់ចាំលទ្ធផលនៃការវិភាគអំពីផលប្រយោជន៍ និងហានិភ័យរបស់វ៉ាក់សាំងនេះ» Haoard Njoo មន្ត្រីសុខាភិបាលមួយរូបរបស់កាណាដា ឱ្យដឹងដូច្នេះ។ លោក Njoo សង្កត់ធ្ងន់ថា កាណាដាសម្រេចធ្វើដូច្នេះគឺដោយសារមានវ៉ាក់សាំងផ្សេងពីនេះសម្រាប់ជំនួស។ វ៉ាក់សាំងបង្ការ Covid-19 ដែលកាណាដាកំពុងប្រើប្រាស់ ភាគច្រើនគឺវ៉ាក់សាំងរបស់ Pfizer Inc និង Moderna Inc.។

ក្រុមប្រឹក្សាជាតិស្ដីអំពីយុទ្ធនាការចាក់វ៉ាក់សាំង (National Advisory Committee on Immunization/NACI) របស់កាណាដា បានឱ្យដឹងថា អត្រានៃការកើតបញ្ហាកកឈាមក្រោយការចាក់វ៉ាក់សាំង AstraZeneca នៅតែមិនទាន់ច្បាស់លាស់។

ប្រទេសជាច្រើននៅអឺរ៉ុប បានផ្អាកការប្រើប្រាស់វ៉ាក់សាំងរបស់ AstraZeneca ក្នុងរយៈពេលខ្លីកាលពីដើមខែនេះ ដើម្បីស្រាវជ្រាវលើបញ្ហាកកឈាម។ ប៉ុន្តែ ក្រោយមក ស្ទើរតែទាំងអស់នៃប្រទេសទាំងនេះ បានប្រើប្រាស់វ៉ាក់សាំងនេះឡើងវិញ។ ដោយឡែក ប្រទេសបារាំងយល់ថា គួរតែចាក់វ៉ាក់សាំងរបស់ AstraZeneca ដល់មនុស្សដែលមានវ័យចាប់ពី 55ឆ្នាំឡើងទៅតែប៉ុណ្ណោះ ដោយយោងទៅតាមភ័ស្ដុតាងដែលបង្ហាញថា បញ្ហាកកឈាមមានផលប៉ះពាល់ដល់មនុស្សដែលមានវ័យនៅក្មេង។

គិតត្រឹមថ្ងៃទី 28មីនា មនុស្សយ៉ាងតិច 666,635នាក់នៅកាណាដា បានទទួលការចាក់វ៉ាក់សាំងបង្ការ Covid-19 រួចរាល់ ដែលនេះគឺស្មើនឹង 1.8% នៃប្រជាជនសរុបរបស់ប្រទេសនេះ។ បច្ចុប្បន្ន តួលេខអ្នកវិជ្ជមាននឹង Covid-19 នៅកាណាដា បានឡើងដល់ជាង 971,700នាក់ ក្នុងនោះមាន 22,900នាក់បានបាត់បង់ជីវិត។

នៅទូទាំងពិភពលោកឯណោះវិញ គិតត្រឹមព្រឹកថ្ងៃទី 30មីនា 2021 មានអ្នកវិជ្ជមាននឹង Covid-19 សរុបចំនួនជាង 128,231,000នាក់ ក្នុងនោះមានអ្នកស្លាប់ប្រមាណ 2,803,900នាក់ និងកំពុងព្យាបាលចំនួនជាង 21,987,800នាក់៕

ប្រភព៖ CBC
ប្រែសម្រួល៖ បុត្រា

March 30, 2021

មន្ត្រីប៉ូលិសដែលបានសង្កត់ក Gorge Floyd រហូតដល់ស្លាប់ ពេលនេះកំពុងត្រូវបានកាត់ទោស

សវនាការកាត់ទោស Derek Chauvin អតីតមន្ត្រីប៉ូលិសដែលត្រូវបានចោទប្រកាន់អំពីបទមនុស្សឃាតលើបុរសជនជាតិស្បែកខ្មៅម្នាក់ឈ្មោះ George Floyd នៅទីក្រុង Minneapolis (សហរដ្ឋអាមេរិក) កាលពីឆ្នាំ 2020 ត្រូវបានបើកកាលពីថ្ងៃទី 29មីនា 2021 នៅក្នុងសាលតុលាការទីក្រុង ដោយមានការយាមល្បាតយ៉ាងតឹងរ៉ឹង។

នៅពេលថ្លែងបើកសវនាការ រដ្ឋអាជ្ញា Jerry Blackwell ឱ្យដឹងថា អតីតមន្ត្រីប៉ូលិសឈ្មោះ Chauvin ត្រូវបានចោទពីបទ «ប្រើប្រាស់កម្លាំងហួសហេតុ និងមិនសមហេតុផល» ទៅលើលោក George Floyd។

ការកាត់ទោស Chauvin តាមផែនការនឹងអូសបន្លាយពេលប្រហែលមួយខែ។ ជនជាប់ចោទនេះ អាចត្រូវជាប់ពន្ធនាគារ 40ឆ្នាំ បើសិនត្រូវបានកាត់ទោសពីបទសម្លាប់មនុស្សកម្រិតទីពីរ។ ប៉ុន្តែ មកដល់បច្ចុប្បន្ន ជនជាប់ចោទមិនទាន់សារភាពទោសនៅឡើយ ដោយអះអាងថា គ្រាន់តែធ្វើទៅតាមអ្វីដែលបានហ្វឹកហាត់ប៉ុណ្ណោះ។

នៅមុនការបើកសវនាការ សាច់ញាតិ និងមេធាវីរបស់គ្រួសារលោក Floyd បាននាំគ្នាធ្វើការស្មឹងស្មាធិ៍រយៈពេល 8នាទី និង46វិនាទី ដែលដូចទៅនឹងរយៈពេលដែលអតីតប៉ូលិស Chauvin បានយកជង្គង់សង្កត់ករបស់លោក Floyd រហូតដល់ស្លាប់។

សូមរំលឹកថា កាលពីខែឧសភា 2020 George Floyd អាយុ 46ឆ្នាំ ត្រូវបានមន្ត្រីប៉ូលិសម្នាក់ឈ្មោះ Derek Chau បានយកជង្គង់សង្កត់ក បណ្ដាលឱ្យថប់ដង្ហើមរហូតដល់បាត់បង់ជីវិត។ ការស្លាប់របស់ Floyd នាំឱ្យមានបាតុកម្មជាច្រើនកើតឡើងនៅពាសពេញសហរដ្ឋអាមេរិក ដើម្បីប្រឆាំងនឹងការប្រើប្រាស់អំពើហិង្សារបស់ប៉ូលិស និងអំពើរើសអើងពូជសាសន៍នៅក្នុងប្រព័ន្ធយុត្តិធម៌របស់សហរដ្ឋអាមេរិក។

បាតុកម្មខាងលើ ក្រោយមកក៏បានរាលដាលដល់ប្រទេសមួយចំនួនក្នុងពិភពលោកផងដែរ ពិសេសគឺចលនា «សិទ្ធិរស់រានមានជីវិតរបស់ជនជាតិស្បែកខ្មៅ» (Black Lives Matters)។ ប៉ូលិស Chauvin បន្ទាប់មកក៏ត្រូវបានបញ្ឈប់ពីតំណែង ហើយត្រូវប្រឈមនឹងការចោទប្រកាន់ពីបទមនុស្សឃាត និងមនុស្សឃាតដោយអចេតនា៕

ប្រភព៖ BBC
ប្រែសម្រួល៖ បុត្រា

March 30, 2021

សង្គ្រោះកប៉ាល់ដឹកកុងតឺន័រ Ever Given បានដោយជោគជ័យ ក្រោយជាប់គាំងជិតមួយសប្ដាហ៍នៅក្នុងព្រែក Suez

ថ្ងៃទី 29មីនានេះ កប៉ាល់ Ever Given បានចាកចេញផុតពីទីតាំងជាប់គាំង និងចាប់ផ្ដើមផ្លាស់ទី ក្រោយរយៈពេលជិតមួយសប្ដាហ៍នៃការជាប់គាំងនៅក្នុងព្រែកជីក Suez ដែលបានបណ្ដាលឱ្យកប៉ាល់ដឹកទំនិញរាប់រយត្រូវស្ទះផ្លូវ។

រូបភាពមួយចំនួនដែលត្រូវបានបង្ហោះនៅលើបណ្ដាលគេហទំព័រតាមដានសកម្មភាពលើផ្ទៃសមុទ្រ Vesselfinder និង Myshiptracking បានបង្ហាញថា កន្ទុយរបស់កប៉ាល់ Ever Given បានចាកផុតពីភ្លឺខាងលិចរបស់ព្រែក Suez។ សារព័ត៌មាន AFP របស់បារាំងក៏បានបញ្ជាក់អំពីដំណឹងនេះ។

ប្រភពព័ត៌មានមិនបញ្ចេញឈ្មោះមួយនៃក្រុមហ៊ុន Shoei Kisen ដែលជាម្ចាស់កប៉ាល់ កាលពីព្រឹកថ្ងៃទី 29មីនានេះ បានឱ្យដឹងថា កប៉ាល់អូសចំនួន 11គ្រឿង បានទាញ Ever Given ចេញពីទីតាំងជាប់គាំងជាបណ្ដើរៗហើយ ប៉ុន្តែ កប៉ាល់នេះមិនទាន់ដំណើរការដូចធម្មតាបាននៅឡើយ។ ចំណែកក្រុមមន្ត្រីគ្រប់គ្រងព្រែក ភាគីអាហ្ស៊ីប និយាយថា កប៉ាល់ Ever Given បានផ្លាស់ទីមកត្រង់ទិសដៅបាន 80% ហើយ ខណៈដែលសារព័ត៌មានអង់គ្លេស Reuters ក៏បានអះអាងស្រដៀងនេះដែរ។

ជោគជ័យខាងលើនេះ បានកើតឡើងបន្ទាប់ពីក្រុមសង្គ្រោះ បានស្ដារយកដីប្រមាណ 27,000ម៉ែត្រគូប និងជម្រៅ 18ម៉ែត្រ ចេញពីបាតព្រែកដែលនៅជុំវិញកប៉ាល់ ដើម្បីជាផ្លូវសម្រាប់ការផ្លាស់ទីរបស់កប៉ាល់ដែលកំពុងជាប់គាំង។ ក្បាលរបស់កប៉ាល់បានខូចខាតមួយផ្នែក ប៉ុន្តែ រចនាសម្ព័ន្ធទាំងមូលរបស់វា នៅតែមានស្ថានភាពល្អ។

សូមរំលឹកថា កប៉ាល់ដឹកកុងតឺន័រ Ever Given ដែលគ្រប់គ្រងដោយតៃវ៉ាន់ ដែលមានជាង 200,000តោន និងដោតទង់ជាតិរបស់ប៉ាណាម៉ា បានបុកបញ្ឆិតជញ្ជាំងព្រែកជីក Suez កាលពីព្រឹកថ្ងៃទី 24មីនា នៅពេលធ្វើដំណើរពីសមុទ្រក្រហម ទៅកាន់មជ្ឈឹមបូព៌ា ដោយសារតែត្រូវព្យុះបក់បោក។

ជាលទ្ធផល Ever Given ដែលជាកប៉ាល់ធំជាងគេមួយក្នុងពិភពលោក ជាមួយនឹងប្រវែង 400ម៉ែត្រ បានជាប់គាំងទទឹងព្រែកជីកដែលត្រូវបានគេចាត់ទុកថា ជាផ្លូវទឹកសំខាន់បំផុតក្នុងពិភពលោក តភ្ជាប់រវាងសមុទ្រក្រហម និងមជ្ឈមបូព៌ា៕

ប្រភព៖ CNN, BI
ប្រែសម្រួល៖ បុត្រា

March 29, 2021

ថៃអនុញ្ញាតឱ្យទេសចរបរទេសចូល Phuket ដោយមិនបាច់ធ្វើចត្តាឡីស័ក

ចាប់ពីខែកក្កដា ឆ្នាំ 2021 ភ្ញៀវទេសចរណ៍នឹងអាចធ្វើដំណើរតាមជើងហោះហើរត្រង់ទៅកាន់កោះ Phuket ដោយមិនចាំបាច់ធ្វើចត្តាឡីស័ក បើសិនពួកគេបានចាក់វ៉ាក់សាំងបង្ការ Covid-19 រួចហើយ។

ប្រការនេះបានបញ្ជាក់ថា ក្រុមមន្ត្រីថៃកំពុងតែប្រឹងប្រែងយ៉ាងខ្លាំងក្លាដើម្បីបើកទ្វារវិស័យទេសចរណ៍ឡើងវិញនាពេលឆាប់ៗនេះ បន្ទាប់ពីត្រូវបិទទ្វារអស់មួយរយៈពេលយ៉ាងយូរដោយសារតែ Covid-19។

យោងតាមសារព័ត៌មានជប៉ុន Nikkei អង្គភាពតាមដានសេដ្ឋកិច្ចប្រទេសថៃ ជាក្រុមប្រឹក្សាសេដ្ឋកិច្ចពិសេសដែលដឹកនាំដោយនាយករដ្ឋមន្ត្រី Prayuth Chan-ocha បានលើកឡើងសេចក្ដីសម្រេចនេះកាលពីថ្ងៃទី 26មីនា។ គណៈរដ្ឋមន្ត្រីថៃ តាមផែនការនឹងធ្វើការអនុម័តគម្រោងនេះនៅក្នុងថ្ងៃទី 30មីនាខាងមុខ។

ចាប់ពីខែកក្កដា ឆ្នាំ2021 ភ្ញៀវទេសចរណ៍នឹងអាចធ្វើដំណើរតាមជើងហោះហើរត្រង់ទៅកាន់កោះ Phuket ដោយមិនតម្រូវឱ្យធ្វើចត្តាឡីស័ក ប៉ុន្តែអ្នកទេសចរណ៍នឹងត្រូវតែមានលិខិតបញ្ជាក់ថា បានចាក់វ៉ាក់សាំងបង្ការ Covid-19 រួចរាល់។

យ៉ាងនេះក្ដី ក្រុមមន្ត្រីថៃក៏កំពុងពិចារណារកវិធីសាស្ត្រផ្សេងពីនេះ។ ទេសចរមិនត្រឹមតែត្រូវបង្ហាញភ័ស្ដុតាងថា ខ្លួនបានចាក់វ៉ាក់សាំង Covid-19 រួចហើយ តែក៏នៅការត្រូវធ្វើតេស្ត PCR នៅពេលបានមកដល់ភ្លាម។ ក្រៅពីនេះ ភ្ញៀវបរទេសក៏ត្រូវទាញយកកម្មវិធីទូរស័ព្ទដែលរដ្ឋាភិបាលថៃបានដាក់ឱ្យប្រើប្រាស់ដើម្បីបម្រើដល់ការតាមដានក្នុងករណីមានទាក់ទងនឹងការឆ្លង Covid-19។

អគ្គលេខាក្រុមប្រឹក្សាភិបាលសេដ្ឋកិច្ចនិងសង្គម ដែលជាស្ថាប័នបង្កើតគោលនយោបាយសំខាន់ៗរបស់ប្រទេសថៃ លោក Danucha Pichayanan ថ្លែងថា៖ «បើសិនជាប្រទេសថៃ បើកទ្វារទទួលទេសចរបានឆាប់រហ័ស យើងនឹងអាចបង្កើនប្រាក់ចំណូលបានឆាប់រហ័ស»។

វិស័យដែលពាក់ព័ន្ធនឹងទេសចរណ៍ រួមចំណែករហូតដល់ 20% នៃ GDP សរុបរបស់ថៃ ដែលជាប្រទេសមានសេដ្ឋកិច្ចធំជាងគេលំដាប់ទីពីរនៅអាស៊ីអាគ្នេយ៍នេះ។

ដោយសារតែផលប៉ះពាល់ពី Covid-19 កំណើនសេដ្ឋកិច្ចថៃ ធ្លាក់ចុះ 6.1% ក្រោមសូន្យ ដែលមានភាពធ្ងន់ធ្ងរបំផុតរាប់ចាប់ពីវិបត្តិហិរញ្ញវត្ថុកាលពីចុងទសវត្សរ៍ 1990។

មជ្ឈមណ្ឌលគ្រប់គ្រងស្ថានការណ៍ Covid-19 របស់ថៃ បានស្នើឱ្យកាត់បន្ថយរយៈពេលនៃការធ្វើចត្តាឡីស័កពី 14 មកនៅត្រឹម 10ថ្ងៃវិញ ដោយចាប់ផ្ដើមពីថ្ងៃទី1 មេសា 2021។ ស្ថាប័ននេះកំពុងកំណត់គោលដៅបើកទ្វារសេដ្ឋកិច្ចទូទាំងប្រទេស ចាប់ពីខែតុលា ឆ្នាំ 2021៕

ប្រភព៖ Nikkei
ប្រែសម្រួល៖ បុត្រា

March 29, 2021

បាតុកម្មប្រឆាំងការរើសអើងលើជនជាតិអាមេរិកាំងដើមកំណើតអាស៊ី កំពុងផ្ទុះឡើងនៅសហរដ្ឋអាមេរិក

ពលរដ្ឋនៅក្នុងទីក្រុងចំនួន 60 នៅសហរដ្ឋអាមេរិក រួមមានទាំង San Francisco, Los Angeles, Chicago, Detroit និង Portland បាននាំគ្នាចេញធ្វើបាតុកម្មប្រឆាំងនឹងអំពើហិង្សាលើជនជាតិអាមេរិកាំងដើមកំណើតអាស៊ី កាលពីថ្ងៃទី 27មីនាកន្លងទៅ។

មនុស្សរាប់រយនាក់ប្រមូលផ្ដុំគ្នានៅក្នុងទីប្រជុំជន Queens នៃទីក្រុង New York ដើម្បីគាំទ្រដល់ការអំពាវនាវឱ្យមានបាតុកម្មទូទាំងសហរដ្ឋអាមេរិក។ «យើងបានឆ្លងកាត់មហារោគរាតត្បាតពេញមួយឆ្នាំ និងអំពើហិង្សាលើពលរដ្ឋដើមកំណើតអាស៊ី ចេះតែកើនឡើង» Judi Chang តំណាងរបស់សម្ព័ន្ធប្រឆាំងសង្គ្រាម និងប្រឆាំងការរើសអើងពូជសាសន៍ ANSWER ដែលជាអ្នកដឹកនាំបាតុកម្ម បាននិយាយដូច្នេះ។

Chang យល់ថា ការរើសអើងលើពលរដ្ឋដើមកំណើតអាស៊ីកំពុងកើនឡើងគឺដោយសារមូលហេតុនយោបាយដែលចាត់ទុកចិនជាការគំរាមកំហែង។ «ពលរដ្ឋដើមកំណើតអាស៊ីដែលខ្ញុំបានជួប សុទ្ធតែធ្លាប់ជាអ្នករងគ្រោះនៃអំពើហិង្សា ឬការរំខាន» Chang បន្ថែមដូច្នេះនាទីក្រុង New York។ «យើងត្រូវគេបរិហារកេរ្តិ៍ និងត្រូវគេស្រែកជេរ។ យើងត្រូវគេសម្លក់សម្លឹង គ្រប់គ្នាដើរគេចចេញពេលយើងមកដល់»។

ករណីបាញ់ប្រហារកាលពីថ្ងៃទី 16មីនា នៅ Atlanta ដែលបានសម្លាប់មនុស្សចំនួន 8នាក់ ក្នុងនោះមាន 6នាក់ជាស្ត្រីដើមកំណើតអាស៊ី កាន់តែធ្វើឱ្យមានការព្រួយបារម្ភខ្លាំងទាក់ទិននឹងអំពើស្អប់ខ្ពើមនៅក្នុងអំឡុងវិបត្តិសុខភាព។ បាតុករមួយចំនួននៅ Atlanta បានលើកបដាដែលមានសរសេរថា៖ «និយាយថាទេចំពោះការរើសអើងពូជសាសន៍លើជនជាតិអាស៊ី!» ឬ «ឈប់ពណ៌នាប្រទេសចិន និងពលរដ្ឋដើមកំណើតចិនតាមរបៀបអាក្រក់!»។

«ខ្ញុំមិនមែនជាវីរុស ខ្ញុំមិនមែនជាសត្រូវ ខ្ញុំគឺជាជនជាតិអាមេរិកាំងដើមកំណើតចិន ហើយខ្ញុំស្រលាញ់ប្រជាជនយើង» បាតុករម្នាក់បានលើកបដាបែបនេះនៅពេលចូលរួមធ្វើបាតុកម្មជាមួយនឹងមនុស្សប្រហែល 100នាក់ផ្សេងទៀតនៅទីប្រជុំជនចិននារដ្ឋធានីវ៉ាស៊ីងតោន។

ចំណែក Irving Lee ដែលជាបាតុករម្នាក់នៅតំបន់ Queens បានហៅ «អំពើហិង្សាប្រឆាំងនឹងជនជាតិអាស៊ី» ថាជា «អនុផលដែលកើតចេញពីគោលនយោបាយការបរទេសរបស់សហរដ្ឋអាមេរិក»។

នៅពេល Covid-19 បានចាប់ផ្ដើមរាលដាលនៅសហរដ្ឋអាមេរិកកាលពីដើមឆ្នាំ 2020 អ្នកនយោបាយមួយចំនួន រួមទាំងប្រធានាធិបតី Donald Trump ផលដែរ កាលណោះបានហៅ Covid-19 ថាជា «វីរុស Wuhan» ឬ «វីរុសចិន»។ «ខ្ញុំបានឃើញមនុស្សជាច្រើនរងផលប៉ះពាល់ដោយសារប្រការនោះ» Irving Lee ថ្លែងដូច្នេះ និងបន្តថា «ពួកគេមិនហ៊ានចេញក្រៅ ព្រោះតែមានអំពើហិង្សាកំពុងកើតឡើង»៕

ប្រភព៖ AFP
ប្រែសម្រួល៖ បុត្រា

March 28, 2021

បាតុករមីយ៉ានម៉ា 4នាក់ទៀតបានស្លាប់ដោយសារគ្រាប់កាំភ្លើងរបស់ប៉ូលិស

បាតុករភូមា (មីយ៉ានម៉ា) ចំនួន 4នាក់ទៀតបានបាត់បង់ជីវិតកាលពីថ្ងៃទី 26មីនា នាំឱ្យតួលេខអ្នកស្លាប់ដោយសារការបង្ក្រាបពីរបបយោធា ក្រោយរដ្ឋប្រហារ កើនឡើងដល់ជាង 320នាក់។

បាតុកម្មជាច្រើនកន្លែងបានកើតឡើងនៅពាសពេញប្រទេសមីយ៉ានម៉ា កាលពីថ្ងៃទី 26មីនា រួមមានទាំងតំបន់ Mandalay, Sagaing, Karen និង Chin ផងដែរ។ សាក្សីបានឱ្យដឹងថា កងកម្លាំងសន្តិសុខបានបាញ់ប្រហារទៅលើហ្វូងមនុស្សដែលកាន់ទង់ពណ៌ខ្មៅនៅភាគខាងត្បូងទីក្រុង Myeik។

«មនុស្សពីរនាក់ត្រូវបានបាញ់ចំក្បាល។ យើងមិនបាននាំយកសាកសពរបស់ជនរងគ្រោះទីបី ព្រោះតែកងកម្លាំងប្រដាប់អាវុធប្រមូលផ្ដុំគ្នានៅទីនោះ» សាក្សីម្នាក់បាននិយាយដូច្នេះ។ សាក្សីម្នាក់ទៀតប្រាប់ថា គាត់បានឃើញសាកសពទីបួន ខណៈសារព័ត៌មាន Myanmar Now ក៏បានរាយការណ៍ថា មនុស្សចំនួន 4នាក់ត្រូវបានសម្លាប់នៅក្នុងទីក្រុង Myeik។

យោងតាមតួលេខពីសមាគមសង្គ្រោះអ្នកទោសនយោបាយ (AAPP) គិតត្រឹមយប់ថ្ងៃទី 25មីនា បាតុករយ៉ាងតិចចំនួន 320នាក់បានស្លាប់ រាប់ចាប់ពីក្រោយព្រឹត្តិការណ៍រដ្ឋប្រហារនៅមីយ៉ានម៉ា។

«គ្រប់គ្នាគួររៀនសូត្រពីសោកនាដកម្មនៃការស្លាប់ដ៏អាក្រក់មុននោះ។ គ្រប់គ្នាអាចប្រឈមនឹងហានិភ័យត្រូវបាញ់តម្រង់ក្បាល ឬខ្នង» របបសឹកភូមាបានព្រមានដូច្នេះកាលពីម្សិលមិញ។

ពលរដ្ឋមីយ៉ានម៉ា បាននាំគ្នាចេញធ្វើបាតុកម្មស្ទើរតែរាល់ថ្ងៃ បន្ទាប់ពីកងទ័ពបានធ្វើរដ្ឋប្រហារ និងបានចាប់ខ្លួនទីប្រឹក្សារដ្ឋ លោកស្រី Aung San Suu Kyi រួមនឹងមន្ត្រីជាន់ខ្ពស់ជាច្រើនរូបរបស់បក្សកាន់អំណាច កាលពីដើមខែកុម្ភៈ ឆ្នាំ2021៕

ប្រភព៖ Reuters
ប្រែសម្រួល៖ បុត្រា

March 27, 2021

ចិនបញ្ជូនយន្តហោះយោធា 20គ្រឿង ទៅក្បែរកោះតៃវ៉ាន់! ទីក្រុងតៃប៉ិ ក៏ដាក់កងទ័ពឱ្យស្ថិតក្នុងការត្រៀមប្រយុទ្ធ

ក្រុមយន្តហោះយោធារបស់ចិនដីគោក រួមមានយន្តហោះទម្លាក់គ្រាប់បែក និងយន្តហោះចម្បាំងដ៏ច្រើនសន្ធឹកមិនធ្លាប់មាន បានហោះទៅក្បែរកោះតៃវ៉ាន់កាលពីម្សិលមិញ នាំឱ្យតំបន់ច្រកសមុទ្រតៃវ៉ាន់កាន់តែឡើងកំដៅខ្លាំង។

ក្រុមយន្តហោះយោធាចិនដែលបានហោះក្បែរតៃវ៉ាន់កាលពីថ្ងៃទី 26មីនា រួមមាន យន្តហោះចម្បាំងពហុមុខងារ J-16 ចំនួន 10គ្រឿង, យន្តហោះចម្បាំង J-10 ចំនួន 2គ្រឿង, យន្តហោះទម្លាក់គ្រាប់បែក H-6K ចំនួន 4គ្រឿង, យន្តហោះប្រមាញ់នាវាមុជទឹក Y-8 ចំនួន 2គ្រឿង, យន្តហោះព្រមានរហ័ស KJ-500 ចំនួន 1គ្រឿង និងយន្តហោះឈ្លបយកការណ៍ Y-8 ចំនួន 1គ្រឿង។ នេះបើតាមកងទ័ពកោះតៃវ៉ាន់ដែលបានប្រកាសឱ្យដឹងក្នុងថ្ងៃដដែល។

យន្តហោះទម្លាក់គ្រាប់បែក H-6K និងយន្តហោះប្រមាញ់នាវាមុជទឹក Y-8 ហោះហើរក្នុងតំបន់ក្បែរភាគខាងត្បូងកោះតៃវ៉ាន់ ខណៈយន្តហោះដទៃធ្វើសកម្មភាពនៅតំបន់សមុទ្រចន្លោះកោះតៃវ៉ាន់ និងប្រជុំកោះ Pratas/Dongsha។

កងកម្លាំងការពារដែនអាកាសតៃវ៉ាន់ ភ្លាមៗនោះក៏បានបញ្ជូនយន្តហោះចម្បាំងជាច្រើនគ្រឿងចេញទៅទប់ទល់ និងបានបញ្ជូនការព្រមាន ព្រមទាំងដាក់អង្គភាពការពារដែនអាកាសឱ្យស្ថិតក្នុងស្ថានការណ៍ត្រៀមប្រយុទ្ធ រហូតដល់ក្រុមយន្តហោះយោធាចិនបានចាកចេញពីតំបន់។ ភាគីចិនមិនទាន់បានបញ្ចេញការអធិប្បាយអ្វីអំពីហេតុការណ៍នេះនៅឡើយ។

នេះគឺជាយុទ្ធនាការចូលទៅកៀកកោះតៃវ៉ាន់ក្នុងទ្រង់ទ្រាយធំបំផុតមិនធ្លាប់មានរបស់យន្តហោះយោធាចិន នៅក្នុងគ្រាដែលតៃវ៉ាន់ផ្អាករាល់សកម្មភាពហោះហើររបស់ខ្លួន បន្ទាប់ពីមានករណីធ្លាក់យន្តហោះចម្បាំង F-15 ចំនួន 2គ្រឿង។

កងទ័ពតៃវ៉ាន់បានឱ្យដឹងថា ក្នុងមួយរយៈពេលកន្លងទៅនេះ ទីក្រុងប៉េកាំងតែងតែបញ្ជូនយន្តហោះយោធាមកកាន់តំបន់សមុទ្រចន្លោះកោះតៃវ៉ាន់ និងប្រជុំកោះ Pratas។

មុននោះ ក្នុងថ្ងៃដដែល ទីក្រុងតៃប៉ិ និងទីក្រុងវ៉ាស៊ីងតោន បានចុះកិច្ចព្រមព្រៀងដំបូងនៅក្នុងសម័យលោក Biden ទាក់ទងនឹងកិច្ចសហប្រតិបត្តិការល្បាតលើផ្ទៃសមុទ្រ បន្ទាប់ពីប្រទេសចិនបានអនុម័តច្បាប់ដែលអនុញ្ញាតឱ្យកងកម្លាំងល្បាតសមុទ្ររបស់ខ្លួន បាញ់ប្រហារនាវាបរទេសណាដែលស្ថិតនៅលើសមុទ្រដែលចិនអះអាងថាជាកម្មសិទ្ធិរបស់ខ្លួន។

ប្រទេសចិនតែងតែចាត់ទុកកោះតៃវ៉ាន់ជាខេត្តមួយរបស់ពួកគេដែលមិនអាចកាត់ផ្ដាច់បាន និងរង់ចាំតែការបង្រួបបង្រួមប៉ុណ្ណោះ។ ចិនក៏បានប្រកាសជារឿយៗថា នឹងប្រើកម្លាំងបាយដណ្ដើមយកតៃវ៉ាន់មកវិញ បើសិនជាចាំបាច់៕

ប្រភព៖ Reuters
ប្រែសម្រួល៖ បុត្រា

March 27, 2021

ឆេះមន្ទីរពេទ្យនៅឥណ្ឌា! អ្នកជំងឺ Covid-19 ជាច្រើននាក់បានស្លាប់

អ្នកជំងឺ Covid-19 យ៉ាងតិច 9នាក់បានស្លាប់ នៅក្នុងហេតុការណ៍អគ្គិភ័យដែលបានកើតឡើងនៅក្នុងមន្ទីរពេទ្យមួយនៅជាយភាគខាងកើតនៃទីក្រុង Mumbai ប្រទេសឥណ្ឌា កាលពីយប់ថ្ងៃទី 26មីនា។

អាជ្ញាធរឥណ្ឌាបានឱ្យដឹងថា អ្នកជំងឺ Covid-19 ជាង 70នាក់ដែលកំពុងព្យាបាលនៅទីនេះ ត្រូវបានជម្លៀសទៅកាន់មជ្ឈមណ្ឌលសុខាភិបាលផ្សេងទៀត ក្នុងពេលអគ្គិភ័យខាងលើកំពុងកើតមាន។

រូបភាពដែលត្រូវផ្សាយផ្ទាល់នៅលើទូរទស្សន៍បានបង្ហាញថា ផ្សែងបាញ់ចេញពីមន្ទីរពេទ្យ ខណៈក្រុមពន្លត់អគ្គិភ័យកំពុងធ្វើសកម្មភាពបាញ់ទឹក ក៏ដូចជាតាមរកអ្នកជំងឺ។ សាកសពមនុស្សយ៉ាងតិច 11នាក់ ត្រូវបានយកចេញពីអគារ។

មន្ត្រីនៅមូលដ្ឋានឱ្យដឹងថា ក្នុងចំណោមជនរងគ្រោះក្នុងហេតុការណ៍ មាន 2នាក់ប្រហែលជាបានស្លាប់ដោយសារ Covid-19 មុនពេលអគ្គិភ័យកើតឡើង។ បច្ចុប្បន្ន សមត្ថកិច្ចកំពុងស្រង់ស្ថិតិជនរងគ្រោះ ក៏ដូចជាស្វែងរកមូលហេតុដែលនាំឱ្យមានអគ្គិភ័យនេះ។

មជ្ឈមណ្ឌលហិរញ្ញវត្ថុ Mumbai របស់ឥណ្ឌា កំពុងឆ្លងកាត់ដំណាក់កាលអាក្រក់បំផុតដោយសារ Covid-19។ អ្នកជំងឺ Covid-19 ថ្មីចំនួនជាង 5,500នាក់ ត្រូវបានរកឃើញកាលពីថ្ងៃទី 25មីនា ដែលនេះគឺជាតួលខខ្ពស់បំផុតមិនធ្លាប់មានកន្លងមក។ មន្ទីរពេទ្យនានានៅជុំវិញទីក្រុងនេះកំពុងញាប់ដៃញាប់ជើងព្យាបាលអ្នកជំងឺថ្មីដែលចេះតែកើនឡើងពីមួយថ្ងៃ ទៅមួយថ្ងៃ។

ក្នុងអំឡុង 24ម៉ោងនៃថ្ងៃទី 26មីនា ឥណ្ឌារកឃើញអ្នកវិជ្ជមាននឹង Covid-19 ថ្មី ចំនួន 62,291នាក់ នាំឱ្យតួលេខអ្នកវិជ្ជមានសរុបកើនដល់ 11,908,373នាក់ ក្នុងនោះមានអ្នកស្លាប់ចំនួន 161,275នាក់, ជាសះស្បើយ 11,292,849នាក់ និងកំពុងព្យាបាលចំនួន 454,249នាក៕

ប្រភព៖ Aljazeera
ប្រែសម្រួល៖ បុត្រា

March 27, 2021

ប្រធានាធិបតី Joe Biden៖ «ព្រះអឺយ! ខ្ញុំនឹកលោក Trump»

ប្រធានាធិបតីអាមេរិក លោក Joe Biden បានថ្លែងថា លោកនឹកលោក Trump នៅចំពោះមុខក្រុមអ្នកយកព័ត៌មាននៅក្នុងសន្និសីទសារព័ត៌មានដំបូងរបស់ខ្លួន រាប់ចាប់តាំងពីទើបចូលកាន់តំណែង។

នៅក្នុងសន្និសីទសារព័ត៌មានផ្លូវការដំបូងរបស់ខ្លួនកាលពីថ្ងៃទី 25មីនា 2021 កន្លងទៅ ប្រធានាធិបតីអាមេរិក Joe Biden ត្រូវបានសួរថា «តើលោកមានបំណងឈរឈ្មោះជាបេក្ខភាពប្រធានាធិបតីនៅក្នុងការបោះឆ្នោតឆ្នាំ 2024 ដែរ ឬទេ ហើយបើមាន តើហេតុអ្វីបានជាមិនចាប់ផ្ដើមយុទ្ធនាការឱ្យបានឆាប់ ដូចដែលលោក Trump ធ្លាប់បានធ្វើ?»។

«អ្នកជំនាន់មុនរបស់ខ្ញុំ ប្រាកដជាត្រូវធ្វើតាំងពីដំបូងដូច្នេះហើយ។ អូ ព្រះអឺយ ខ្ញុំនឹកគាត់» ប្រធានាធិបតី Biden សើចបណ្ដើរ និយាយបណ្ដើរ នៅពេលរំលឹកដល់លោក Trump ដែលធ្លាប់បានរៀបផែនការឈរឈ្មោះបោះឆ្នោតតាំងតែពីទើបចូលកាន់តំណែងប្រធានាធិបតី។

មេដឹកនាំសហរដ្ឋអាមេរិករូបនេះ បានអះអាងថា ខ្លួននឹងឈរឈ្មោះជាបេក្ខភាពប្រធានាធិបតីនៅក្នុងការបោះឆ្នោតឆ្នាំ2024 ហើយលោកក៏យល់ឃើញថា នេះគឺជាគម្រោងការដែលមានស្រាប់។ ប៉ុន្តែ លោកថា លោកនឹងមិនរៀបចំខ្លួនយ៉ាងឆាប់រហ័សសម្រាប់ការឃោសនាបោះឆ្នោតនោះឡើយ។

«ខ្ញុំជាមនុស្សដែលចូលចិត្តជឿលើវាសនា។ ហេតុនេះ ខ្ញុំនឹងមិនត្រៀមផែនការម៉ត់ចត់រហូតដល់ 3ឆ្នាំកន្លះខាងមុខ (អំឡុងពេលត្រូវឃោសនាបោះឆ្នោត)» លោក Biden បន្ថែមដោយក្ដីរីករាយដូច្នេះ។

បើសិនជាឈរឈ្មោះជាបេក្ខជនប្រធានាធិបតីម្ដងទៀត នាឆ្នាំ 2024 លោក Joe Biden នឹងឈានចូលដល់វ័យ 82ឆ្នាំ៕

ប្រភព៖ Dailymail, MSNBC
ប្រែសម្រួល៖ បុត្រា

March 26, 2021

មិនចប់ងាយៗទេ! ឥណ្ឌារកឃើញកូវីដប្រភេទថ្មី ក្លាយពូជ 2ជាន់ ខណៈចំនួនអ្នកស្លាប់ និងឆ្លងមេរោគប្រចាំថ្ងៃ នៅតែខ្ពស់ក្នុងឆ្នាំនេះ

ប្រទេសឥណ្ឌា បានរាយការណ៍អំពីការរកឃើញ មេរោគក្លាយពូជថ្មី 1ទៀតរបស់វីរុសកូរ៉ូណាប្រភេទថ្មី ដែលក្លាយពូជ 2ជាន់(Double mutant) កាលពីថ្ងៃពុធ ទី24 មីនា ក្នុងខណៈដែលប្រទេសមួយនេះ ត្រូវប្រឈមនឹងចំនួនអ្នកឆ្លងមេរោគ និងស្លាប់ប្រចាំថ្ងៃ ច្រើនបំផុត ចាប់តាំងពីឈានចូលឆ្នាំ2021 មក។

មេរោគក្លាយពូជ ដែលក្រុមអ្នកជំនាញហៅថា “ក្លាយពូជ 2ជាន់ ឬ Double mutant” នេះ ត្រូវបានរកឃើញនៅក្នុងសំណាក ច្រើនជាង 200សំណាកនៅក្នុងរដ្ឋមហារាស្ត្រៈ រដ្ឋភាគខាងលិច ដែលបានរងផលប៉ះពាល់ដោយសារវិបត្តិកូវីដ-19 យ៉ាងធ្ងន់ធ្ងរ និងជាទីតាំងរបស់មុមបៃ ទីក្រុងចម្បងខាងហិរញ្ញវត្ថុ របស់ប្រទេសឥណ្ឌា។

យ៉ាងណាក្ដី បណ្ដាក្រុមមន្ត្រីសុខភាពសាធារណៈ បានបញ្ជាក់ថា មេរោគក្លាយពូជថ្មីនេះ នៅមិនទាន់ត្រូវបានពិនិត្យរកឃើញក្នុងចំនួនច្រើនគ្រប់គ្រាន់ ដែលអាចថា ជាប់ទាក់ទិននឹងចំនួនអ្នកឆ្លងមេរោគ ដែលកើនឡើងយ៉ាងច្រើននៅក្នុងរដ្ឋមហារាស្ត្រៈ និងរដ្ឋផ្សេងៗ ដែលក្នុងនោះរួមទាំងរដ្ឋក្រេឡាក់ និងរដ្ឋប៉ាន់ចាបនោះនៅឡើយ។

លោក រ៉ាម៉ាណាន់ ល័កស្ម៊ីណារ៉ាយ៉ាន់ ស្ថាបនិកមជ្ឈមណ្ឌលថាមពលរបស់ជំងឺ សេដ្ឋកិច្ច និងនយោបាយ ក្នុងទីក្រុងនីវដេលី បានថ្លែងថា “ការក្លាយពូជ 2ជាន់ មិនមែនជាវាក្យស័ព្ទខាងវិទ្យាសាស្ត្រទេ វាគ្រាន់តែជាមេរោគក្លាយពូជមួយទៀត ដែលមើលទៅហាក់ដូចជាមានតែនៅក្នុងប្រទេសឥណ្ឌាប៉ុណ្ណោះ”

លោកបានថ្លែងទៀតថា “សួរថា តើមានហេតុផល ដែលត្រូវកង្វល់ពាក់ព័ន្ធនឹងមេរោគក្លាយពូជមួយនេះ ជាពិសេសដែរឬទេ? វាមិនទាន់ប្រាកដដែរ ព្រោះយើងរកមិនឃើញភ័ស្តុតាងថា មេរោគក្លាយពូជមួយនេះ វាចម្លងសាយភាយបានងាយជាង ឬធ្ងន់ធ្ងរជាងវីរុសដែលយើងកំពុងប្រឈមនោះឬយ៉ាងណានៅឡើយ”

បណ្ដាសំណាក ដែលពិនិត្យរកឃើញមេរោគក្លាយពូជកូវីដ-19ថ្មី នៅក្នុងរដ្ឋមហារាស្ត្រៈ ក្នុងនោះប្រមាណជា 20% ជាសំណាកមកពីទីក្រុងណាកពុរៈ មជ្ឈមណ្ឌលកណ្ដាលខាងពាណិជ្ជកម្ម និងឡូជិស្ទិក។ នេះបើតាមការឱ្យដឹងពីលោក ស៊ុជីត គូម៉ារ ស៊ីងហ៍ អគ្គនាយកមជ្ឈមណ្ឌលគ្រប់គ្រងជំងឺនៃប្រទេសឥណ្ឌា។

“មេរោគក្លាយពូជ កំពុងបង្ហាញខ្លួនឡើង សន្សឹម” លោកស៊ីងហ៍ បានថ្លែង ព្រមទាំងបញ្ជាក់ថា សំណាក9 របស់មេរោគក្លាយពូជប្រភេទថ្មី ត្រូវបានរកឃើញនៅក្នុងទីក្រុងនីវដេលីដូចគ្នា ខណៈដែលទីក្រុងចម្បងមួយនេះ បានរកឃើញចំនួនអ្នកឆ្លងមេរោគកូវីដ-19 កើនឡើងជាបន្តបន្ទាប់ ក្នុងអំឡុងច្រើនសប្ដាហ៍កន្លងមកនេះ។

សូមជម្រាបដែរថា ប្រទេសឥណ្ឌា បានអនុម័តវ៉ាក់សាំងរួចហើយ 2ប្រភេទ មានវ៉ាក់សាំងដែលអភិវឌ្ឍដោយអ៊ែស្ត្រាហ្សេនេកា និងមហាវិទ្យាល័យអុកស្វដ និង 1ប្រភេទទៀត ដែលអភិវឌ្ឍនៅក្នុងប្រទេសដោយក្រុមហ៊ុន ភារ៉ាត់ បៃអូថេក ដែលមានប្រសិទ្ធភាពប្រឆាំងមេរោគក្លាយពូជកូវីដ-19 ដែលរកឃើញដំបូងនៅក្នុងចក្រភពអង់គ្លេស និងប្រេស៊ីល។

កាលពីថ្ងៃពុធ ទី24 មីនា ឥណ្ឌាបានរាយការណ៍ពីការរកឃើញអ្នកឆ្លងមេរោគថ្មី 47,262នាក់ ក្នុងអំឡុង 24ម៉ោង ជាចំនួនខ្ពស់បំផុត គិតចាប់តាំងពីខែវិច្ឆិកា ឆ្នាំកន្លងទៅ បណ្ដាលឱ្យចំនួនអ្នកឆ្លងមេរោគសរុបមាន 11.7លាននាក់ ខ្ពស់បំផុត ជាប់លំដាប់លេខ3 ក្នុងពិភពលោក ក្រោមតែសហរដ្ឋអាមេរិក និងប្រេស៊ីលប៉ុណ្ណោះ។

ចំនួនអ្នកស្លាប់ដោយសារកូវីដ-19 ក្នុងជុំ 24ម៉ោងកន្លងទៅ ស្ថិតក្នុងចំនួន 275នាក់ ខ្ពស់បំផុតក្នុងជុំ 1ឆ្នាំនេះ បណ្ដាលឱ្យចំនួនអ្នកស្លាប់សរុប ស្ថិតក្នុងចំនួន 160,441នាក់។

រដ្ឋជាច្រើន បានចេញបទបញ្ជាហាមប្រមូលផ្ដុំជួបជុំគ្នា មុនរដូវកាល ហូលី របស់ជនជាតិហ៊ិណ្ឌូ ក្នុងអំឡុងចុងសប្ដាហ៍នេះ ខណៈពេលជាមួយគ្នា ខាងរដ្ឋបាលកណ្ដាល បានប្រកាសពង្រីកគ្រោងការចាក់វ៉ាក់សាំងទូទាំងប្រទេស រួមទាំងមនុស្សគ្រប់រូប ដែលមានអាយុ 45ឆ្នាំឡើងទៅ ចាប់តាំងពីខែមេសាទៅ៕

ប្រភព៖ ទីភ្នាក់ងារព័ត៌មាន Reuters
ប្រែ និងសម្រួលដោយ ទិទីតំតាតូ

March 26, 2021

Category: អន្តរជាតិ