អន្តរជាតិ - La Reine Media

កូវីដ-19 ប្រហារជីវិតឪពុកមាលោកនាយករដ្ឋមន្ត្រីឥណ្ឌា ខណៈក្រុងនីវដេលី សែនទុក្ខព្រួយ ខ្លាចលែងមានអុសបូជាសាកសព

លោក Narmabaden Modi ឪពុកមារបស់លោកនាយករដ្ឋមន្ត្រីឥណ្ឌា វ័យ 80ឆ្នាំ បានស្លាប់ដោយសារជំងឺកូវីដ-19 កាលពីថ្ងៃទី27 មេសា ក្រោយពីចូលព្យាបាលខ្លួននៅក្នុងមន្ទីពេទ្យបាន 10ថ្ងៃ ខណៈពេលជាមួយគ្នា អភិបាលក្រុងនីវដេលី បានចេញបញ្ជាឱ្យចំនួនឈើដែលជាអុស សម្រាប់ដុតបូជាសាកសព ត្រូវតែមានជាប់ជានិច្ច ក្រោយពីមានការកើនឡើងនៃចំនួនសាកសព និងនាំឱ្យមានការសាងសង់កន្លែងដុតបូជាសពថ្មីឡើងយ៉ាងបន្ទាន់ ក្រោយស្ថានការណ៍វិបត្តិឆ្លងរាលដាល ដែលនៅតែមានជាបន្តឥតឈប់ឈរ។

CNN ប្រព័ន្ធផ្សព្វផ្សាយរបស់សហរដ្ឋអាមេរិក កាលពីថ្ងៃម្សិលមិញ (ទី28 មេសា) បានរាយការណ៍ថា លោកនាយករដ្ឋមន្ត្រី ណារិនដ្រា ម៉ូឌី ត្រូវបាត់បង់សាច់ញាតិម្នាក់ដោយសារវិបត្តិកូវីដ-19 ដ៏ធ្ងន់ធ្ងរនៅក្នុងប្រទេសឥណ្ឌា នៅពេលដែលលោក ណាម៉ាដាបេន ម៉ូឌី (Narmadaben Modi) ជាឪពុកមា វ័យ 80ឆ្នាំ ដែលត្រូវបានបញ្ជូនទៅមន្ទីរពេទ្យ កាលពី 10ថ្ងៃមុន បានស្លាប់នៅទីនោះ ដោយសារជំងឺកូវីដ-19 កាលពីថ្ងៃអង្គារ(ទី27មេសា)។

លោក Prahlad Modi ប្អូនប្រុសរបស់លោកម៉ូឌី បានថ្លែងតាមរយៈសេចក្ដីថ្លែងការណ៍ថា “លោកពូ ណាម៉ាដាបេន របស់ពួកយើង ត្រូវបានបញ្ជូនទៅព្យាបាលនៅមន្ទីពេទ្យរដ្ឋ កាលពីប្រមាណជា 10ថ្ងៃមុន ក្រោយពីអាការរបស់លោកធ្លាក់ចុះទ្រុឌទ្រោមខ្លាំង ដោយសារការឆ្លងមេរោគវីរុសកូរ៉ូណា ពេលនេះលោកបានស្លាប់ហើយ”

យ៉ាងណាក្ដី លោកម៉ូឌី មិនទាន់បានចេញមកថ្លែងការណ៍អ្វី អំពីការស្លាប់របស់ឪពុកមានៅឡើយ តែ CNN បានរាយការណ៍ថា កន្លងមក លោកម៉ូឌី បានរងការរិះគន់យ៉ាងខ្លាំង ចំពោះការបរាជ័យក្នុងការទប់ស្កាត់ស្ថានការណ៍ជំងឺរាតត្បាតនេះ ខណៈដែលគណបក្សនយោបាយ BJP របស់លោកនៅតែចេញឃោសនានយោបាយបក្ស បន្តឥតឈប់ សម្រាប់ការបោះឆ្នោតក្នុងតំបន់ ដែលកំពុងជិតមកដល់។

ដោយការឃោសនារកសំឡេងឆ្នោតរបស់ BJP បានកើតឡើងនៅឯរដ្ឋតេឡាំងហ្គាណា (Telangana) និងរូបភាពដែលបានផូស្តដោយមន្ត្រីរបស់គណបក្ស BJP របស់រដ្ឋ កាលពីថ្ងៃចន្ទ (ទី26មេសា) បានបង្ហាញឱ្យឃើញពីហ្វូងមនុស្សដ៏ណែនណាន់តាន់តាប់ ប្រមូលផ្ដុំគ្នានៅឯទីស្ដីការរដ្ឋបាល Greater Warangal ដែលជាកន្លែងរៀបចំការឃោសនារកសំឡេងឆ្នោត និងមនុស្សដ៏ច្រើន មិនបានពាក់ម៉ាស់ការពារ ឬរក្សាគម្លាតសុវត្ថិភាពឡើយ។

ខណៈពេលជាមួយគ្នា ក្នុងការបង្កើនការដុតបូជាសពអ្នកជំងឺកូវីដ-19 ដោយសារវិបត្តិជំងឺឆ្លងដ៏ធំនេះ បានបណ្ដាលឱ្យលោកអភិបាលក្រុងនីវដេលីខាងជើង ត្រូវផ្ញើសំបុត្រសំណូមពរ សុំឱ្យការបញ្ជូនអុសឈើ សម្រាប់ដុតបូជាសាកសព ត្រូវធ្វើឡើងជាបន្តបន្ទាប់កុំឱ្យដាច់។

សំបុត្រដែលលោក Jai Prakash ដែលផ្ញើទៅប្រធានគណៈអភិបាលក្រុងនីវដេលី លោក Arvind Kejriwal ដើម្បីសុំឱ្យចេញបញ្ជាទៅផ្នែករុក្ខាប្រមាញ់ ជួយចាត់ចែងរកឈើអុសឱ្យបានគ្រប់គ្រាន់ និងទាន់ពេលវេលា មិនរអាក់រអួល ដើម្បីឱ្យខាងស្ថានឈាបនកិច្ច អាចធ្វើការងារបានដោយរលូន និងមិនកើតមានផលប៉ះពាល់ដល់ក្រុមគ្រួសារអ្នកស្លាប់។ ចំពោះតែទីក្រុងនីដេលីមួយ កាលពីថ្ងៃអង្គារ ទី27 មានអ្នកស្លាប់ដោយសារកូវីដ-19 សរុបទាំងអស់ 381នាក់៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

April 29, 2021

Covid-19! ថៃ យកព្រលានយន្តហោះ ធ្វើជាទីតាំងចាក់វ៉ាក់សាំង

ប្រទេសថៃ នាដើមសប្ដាហ៍នេះ បានប្រែក្លាយកន្លែងបំពេញបែបបទ check-in របស់អាកាសយានដ្ឋាន សុវណ្ណភូមិ (Suvarnabhumi) ឱ្យទៅជាមជ្ឈមណ្ឌលចាក់វ៉ាក់សាំង ជាផ្នែកមួយនៃការប្រឹងប្រែងក្នុងការពន្លឿនយុទ្ធនាការចាក់វ៉ាក់សាំងបង្ការវីរុសCovid-19 របស់រដ្ឋាភិបាល។

បុគ្គលិកសុខាភិបាលនឹងចាក់វ៉ាក់សាំងជូនពលរដ្ឋជាង 1,000នាក់ ជារៀងរាល់ថ្ងៃ នៅក្នុងអាកាសយានដ្ឋានសុវណ្ណភូមិ ដែលមានទីតាំងស្ថិតនៅក្នុងទីក្រុងបាងកកនេះ។ អ្នកស្រី Siwaporn Singkhrut ជាមនុស្សម្នាក់ក្នុងចំណោមពលរដ្ឋជាង 30,000នាក់ដំបូង ដែលបានទទួលការចាក់វ៉ាក់សាំងនៅព្រលានយន្តហោះសុវណ្ណភូមិ បានឱ្យដឹងថា នៅមានកន្លែងជាច្រើនទៀតដែលអាចប្រើប្រាស់ជាមជ្ឈមណ្ឌលចាក់វ៉ាក់សាំង។ «បច្ចុប្បន្ន មានតែមួយផ្នែកនៃព្រលានយន្តហោះ បានដំណើរការ។ ជារឿងល្អជាងនេះ បើសិនវាត្រូវបានប្រើប្រាស់ទាំងស្រុង ដើម្បីឱ្យគ្រប់គ្នាអាចចូលមកទទួលការចាក់វ៉ាក់សាំង» អ្នកស្រី Siwaporn Singkhrut រៀបរាប់។

ប្រទេសថៃ កំពុងឆ្លងកាត់បញ្ហាCovid-19 ដែលឆ្លងលឿនបំផុត និងក្នុងទ្រង់ទ្រាយធំបំផុត ខណៈដែលករណីវិជ្ជមានថ្មី កើនឡើងទ្វេដង រាប់ចាប់ពីដើមខែមេសានេះ ក្នុងនោះ កាលពីថ្ងៃទី28 ប្រទេសថៃរកឃើញអ្នកវិជ្ជមានថ្មីចំនួន 2,012នាក់ និងស្លាប់ថ្មី 15នាក់។ បច្ចុប្បន្ន ប្រទេសនេះមានអ្នកវិជ្ជមានសរុបចំនួន 61,699នាក់ និងស្លាប់សរុប 178នាក់ ខណៈ 27,119នាក់កំពុងព្យាបាល។

អាជ្ញាធរថៃ បានបិទទ្វារសាលារៀន ហាមការជួបជុំដែលមានមនុស្សលើសពី 50នាក់ និងហាមលក់ភេសជ្ជៈដែលមានជាតិអាល់កុល ក្នុងរយៈពេលយ៉ាងតិចពីរសប្ដាហ៍ គិតចាប់ពីថ្ងៃទី18 ខែមេសា។ ក្រុមមន្ត្រីរដ្ឋាភិបាល បានប្រកាសថា រាជធានីបាងកក និងខេត្តចំនួន 17 ដែលស្ថិតក្នុង «តំបន់ក្រហម» ត្រូវអនុវត្តវិធានការទប់ស្កាត់ Covid-19 យ៉ាងតឹងរ៉ឹង៕

ប្រភព៖ Reuters
ប្រែសម្រួល៖ បុត្រា

April 29, 2021

Covid-19! កម្ពុជាមានអ្នកស្លាប់ថ្មី 6នាក់ ខណៈអ្នកវិជ្ជមានថ្មី ជិត 700នាក់ ក្នុងថ្ងៃទី27 ខែមេសា

នាថ្ងៃទី 28មេសា ឆ្នាំ2021នេះ ក្រសួងសុខាភិបាលកម្ពុជាបានឱ្យដឹងថា បានរកឃើញអ្នកវិជ្ជមាននឹងវីរុសCovid-19 ថ្មី ចំនួន 698នាក់ និងអ្នកជាសះស្បើយចំនួន 994នាក់ទៀត ក្នុងអំឡុង 24ម៉ោងនៃថ្ងៃទី 27 ខែមេសា ឆ្នាំ2021។

ក្នុងចំណោមអ្នកវិជ្ជមានថ្មីចំនួន 698នាក់ខាងលើនេះ មាន 1នាក់ជាពលករខ្មែរត្រលប់ពីប្រទេសថៃ ក្រៅពីនេះគឺសុទ្ធតែជាករណីពាក់ព័ន្ធនឹងព្រឹត្តិការណ៍20កុម្ភៈ។ ក្នុងថ្ងៃទី 27 ខែមេសាដដែល កម្ពុជាក៏មានអ្នកជំងឺCovid-19 ចំនួន 6នាក់បានស្លាប់។

គិតមកដល់បច្ចុប្បន្ន (28 ខែមេសា) ទូទាំងប្រទេសកម្ពុជា អ្នកឆ្លងCovid-19 សរុបបានកើនដល់ 11,761នាក់ ក្នុងនោះមានអ្នកជាសះស្បើយសរុប 4,698នាក់, អ្នកស្លាប់ 88នាក់ និងអ្នកជំងឺកំពុងព្យាបាលនៅមន្ទីរពេទ្យ ចំនួន 6,968នាក់។

នៅទូទាំងពិភពលោក គិតមកដល់ម៉ោង9 និង30នាទី ថ្ងៃទី28 ខែមេសា ឆ្នាំ2021 អ្នកវិជ្ជមាននឹង Covid-19 បានកើនឡើងដល់ 149,637,489នាក់ ក្នុងនោះមានអ្នកស្លាប់សរុប 3,153,202នាក់, អ្នកជាស្បើយ 127,221,624នាក់ និងកំពុងព្យាបាល 18,764,333នាក់៕

ប្រភព៖ ក្រសួងសុខាភិបាល, Worldometers
ដកស្រង់ និងប្រែសម្រួល៖ បុត្រា

April 28, 2021

រូបភាពថ្មី «មហាសែនច្បាស់ ត្រជាក់ភ្នែក» ស្ដីពីព្រះទិនករ

ជាងថតរូបជនជាតិអាមេរិកាំងម្នាក់ បានបញ្ចេញរូបភាពមួយសន្លឹក ក្នុងចំណោមរូបថតដែលច្បាស់បំផុត ស្ដីពីព្រះអាទិត្យ ដោយភាពច្បាស់របស់វា ឡើងដល់ 230 មេហ្គាភីកសែល។

ដើម្បីបង្កើតបានរូបថតដែលមានភាពច្បាស់ដ៏គួរឱ្យភ្ញាក់ផ្អើលនេះ តារាវិទូ និងជាជាងថតរូបម្នាក់ឈ្មោះ Andrew McCarthy បានប្រើប្រាស់តេឡេស្កុបតារាសាស្ត្រដែលមានប្រវែងប្រសព្វ 4,000មម និងអាចពង្រីកបានធំជាង 10ដង បើធៀបនឹងតេឡេស្កុបតារាសាស្ត្រស្ដង់ដា ដើម្បីផ្ដិតយករូបភាពដាច់ដោយឡែកចំនួនជិត 100,000ទីតាំងផ្សេងគ្នារបស់ព្រះអាទិត្យ ក្នុងល្បឿនប្រហែល 100រូប/វិនាទី ហើយក្រោយមកក៏ផ្គុំរូបថតទាំងនេះទៅជារូបភាពតែមួយសន្លឹកគត់។

«រូបថតទាំងនេះ ត្រូវបានថតនៅវេលាថ្ងៃជិតត្រង់ ពេលព្រះអាទិត្យបានឡើងខ្ពស់ ប៉ុន្តែ បរិយាកាសនៅតែស្ងប់ស្ងាត់» McCarthy បញ្ជាក់។

ក្នុងរូបភាពដែលបានផ្គុំ និងមានភាពច្បាស់ឡើងដល់ 230 មេហ្គាភីកសែល ព្រះទិនករបង្ហាញខ្លួនយ៉ាងក្រហមឆ្អិនឆ្អៅ និងជះពន្លឺភ្លឺសព្វបរិយាកាស។ វាច្បាស់រហូតដល់ថ្នាក់ អាចមើលឃើញទាំងកាំរស្មី plasma នៅជាយព្រះអាទិត្យដែលបានជះចូលទៅកាន់បរិយាកាស ហាក់បីដូចជាអណ្ដាតភ្លើងយ៉ាងស្រស់ស្អាត។

«កាំរស្មី plasma នេះ អណ្ដែតនៅក្នុងបរិយាកាសរបស់ព្រះអាទិត្យ ដោយសារតែឥទ្ធិពលរបស់កម្លាំងទំនាញដ៏មហិមា។ បាតុភូតនេះ កើតឡើងជាញឹកញាប់ និងអូសបន្លាយពេលយូរ» តារាវិទូ McCarthy បរិយាយបន្ថែម។

លោក McCarthy ទើបតែបានចាប់ផ្ដើមថតរូបទាក់ទងនឹងតារាសាស្ត្រកាលពី 3ឆ្នាំមកនេះប៉ុណ្ណោះ។ មុននេះ McCarthy ក៏ធ្លាប់បានថតរូបព្រះចន្ទយ៉ាងច្បាស់ផងដែរ។ រូបភាពដ៏មហាសែនច្បាស់ស្ដីពីព្រះចន្ទរបស់ McCarthy ត្រូវបានផ្គុំពីរូបថតនៃទីតាំងផ្សេងៗគ្នាចំនួន ពី 50,000-150,000កន្លែងនៃចន្ទមណ្ឌល៕

ប្រភព៖ Mail
ប្រែសម្រួល៖ បុត្រា

April 28, 2021

រដ្ឋរបស់ហសរដ្ឋអាមេរិក ផ្ដល់មូលបត្របំណុលតម្លៃ 100ដុល្លារ ដល់ពលរដ្ឋដែលបានចាក់វ៉ាក់សាំងបង្ការ Covid-19

រដ្ឋ Virginia ខាងលិខ (West Virginia) របស់សហរដ្ឋអាមេរិក នឹងផ្ដល់មូលបត្របំណុលតម្លៃ 100ដុល្លារ ដល់បុគ្គលទាំងឡាយណាដែលមានអាយុចាប់ពី 16ឆ្នាំ ដល់ 35ឆ្នាំ ដែលបានចាក់វ៉ាក់សាំងបង្ការ Covid-19 រួចរាល់។

យោងតាមសារព័ត៌មាន New York Times របស់អាមេរិក នៅក្នុងសេចក្ដីប្រកាសមួយដែលបានផ្សាយកាលពីថ្ងៃទី26 ខែមេសា លោក Jim Justice អភិបាលរដ្ឋ Virginia ខាងលិច បានប្រកាសថា ពលរដ្ឋទាំងអស់ដែលមានអាយុចាប់ពី 16 ដល់ 35ឆ្នាំ របស់រដ្ឋនេះ នឹងទទួលបានមូលបត្របំណុលដែលមានតម្លៃ 100ដុល្លារ/ម្នាក់ បន្ទាប់ពីពួកគេបានចាក់វ៉ាក់សាំងបង្ការវីរុសCovid-19 រួចរាល់ជាស្ថាពរ។

ដើម្បីទូទាត់លើខ្ទង់ចំណាយនេះ រដ្ឋ Virginia ខាងលិច នឹងប្រើប្រាស់ថវិកាដែលបានមកពីច្បាប់ CARES ជាកញ្ចប់ជំនួយសម្រាប់ដោះស្រាយបញ្ហា Covid-19 ដែលសភាបានអនុម័តកាលពីខែមីនា ឆ្នាំ2020 ក្រោមរដ្ឋបាលរបស់លោក Donald Trump។

ទន្ទឹមនឹងគម្រោងផ្ដល់មូលបត្របំណុល អភិបាលរដ្ឋ Virginia ខាងលិច ក៏បានលើកឡើងនូវវិធិសាស្ត្រជាច្រើនផ្សេងទៀត ដើម្បីលើកទឹកចិត្តឱ្យពលរដ្ឋមកទទួលការចាក់វ៉ាក់សាំង ក្នុងនោះក៏មានបង្កើតទីតាំងចាក់វ៉ាក់សាំងនៅខាងមុខសាកលវិទ្យាល័យផងដែរ។

យោងតាម New York Times រដ្ឋ Virginia ខាងលិច បច្ចុប្បន្នមានអត្រានៃការឆ្លង Covid-19 ថ្មី ខ្ពស់ជាងគេលំដាប់ទី16 និងឈរលំដាប់ទី12 បើគិតអំពីករណីត្រូវចូលព្យាបាលនៅមន្ទីរពេទ្យ ធៀបនឹងបណ្ដារដ្ឋនៅសហរដ្ឋអាមេរិក។ កន្លងមក រដ្ឋ Virginia ខាងលិច គឺជារដ្ឋដែលឈរលំដាប់ទីពីរស្ដីពីអត្រានៃចំនួនពលរដ្ឋដែលបានចាក់វ៉ាក់សាំងលើកដំបូង បន្ទាប់ពីរដ្ឋ Alaska។

ពលរដ្ឋចំនួន 35.3% របស់រដ្ឋ Virginia ខាងលិច បានចាក់វ៉ាក់សាំងបង្ការ Covid-19 យ៉ាងតិច 1ដង ក្នុងនោះមាន 29% បានចាក់វ៉ាក់សាំងរួចរាល់។ អភិបាលរដ្ឋ Virginia ខាងលិច លោក Justice បានឱ្យដឹងថា គិតដល់ថ្ងៃទី26 ខែមេសា ឆ្នាំ2021 ពលរដ្ឋវ័យចំណាស់ ចំនួន 78% បានចាក់វ៉ាក់សាំងយ៉ាងតិច 1ដូស ក្នុងនោះមាន 68.5% បានចាក់រួចរាល់។

ប៉ុន្តែ បច្ចុប្បន្ន ការចាក់វ៉ាក់សាំងរបស់រដ្ឋនេះ កំពុងមានការយឺតយ៉ាវ ដោយពលរដ្ឋប្រមាណតែ 52% ប៉ុណ្ណោះ ដែលបានចាក់វ៉ាក់សាំងលើកដំបូង ដែលតួលេខនេះ ទាបជាងឆ្ងាយបើធៀបនឹង 70% ដែលជាផែនការដំបូង។

សហរដ្ឋអាមេរិក គឺជាសម្បុកវីរុសCovid-19 ធំជាងគេក្នុងពិភពលោក ដោយមានពលរដ្ឋជិត 33លាននាក់បានឆ្លងវីរុស និងជាង 587,000នាក់បានស្លាប់ដោយសារវីរុសនេះ។ រដ្ឋ Virginia ខាងលិច បច្ចុប្បន្នមានអ្នកឆ្លងវីរុសជាង 150,000នាក់ និងជាង 2,600នាក់បានបាត់បង់ជីវិតដោយសារ Covid-19។ ទូរទស្សន៍សាធារណៈ Virginia ខាងលិច បានផ្សាយថា ពលរដ្ឋក្រោមអាយុ 20ឆ្នាំ ប្រមាណ 26% បានឆ្លង Covid-19 បើធៀបនឹងករណីឆ្លងសរុបរបស់រដ្ឋនេះ៕

ប្រភព៖ Washingtonpost, NPR
ប្រែសម្រួល៖ បុត្រា

April 28, 2021

ពិភពលោកអាចនឹងកើតរឿងធំ!!! WHO ឱ្យដឹងថា រកឃើញមេរោគក្លាយពូជឥណ្ឌា នៅក្នុងច្រើនប្រទេសហើយ

អង្គភាពសុខភាពសាធារណៈរបស់អង្គការសហប្រជាជាតិមួយនេះ បានបញ្ជាក់ថា គិតត្រឹមថ្ងៃអង្គារ ទី27មេសា មេរោគក្លាយពូជ B.1.617 ដែលរកឃើញនៅក្នុងប្រទេសឥណ្ឌា ត្រូវបានរកឃើញនៅក្នុងលេខកូដពូជវីរុស 1,200សំណាក “ពីយ៉ាងតិចបំផុត 17ប្រទេស” ឥឡូវ បានអាប់ឡូដ ឆ្ពោះទៅប្រព័ន្ធទិន្នន័យដើម បែបបើក GISAID ហើយ។

“លេខកូដពូជភាគច្រើន អាប់ឡូដមកពីប្រទេសឥណ្ឌា ចក្រភពអង់គ្លេស សហរដ្ឋអាមេរិក និងសិង្ហបុរី” អង្គការសុខភាពពិភពលោក បានបញ្ជាក់បែបនេះ នៅក្នុងការអាប់ឌែតទិន្នន័យផ្នែកជំងឺរាតត្បាតវិទ្យាប្រចាំសប្ដាហ៍ ពាក់ព័ន្ធនឹងស្ថានការណ៍របស់ជំងឺឆ្លងរាលដាលដ៏ធំកូវីដ-19។

កាលពីពេលថ្មីៗនេះ អង្គការសុខភាពពិភពលោក បានចាត់ចូលបញ្ជី B.1.617 ក្នុងឋានៈជាមេរោគក្លាយពូជដ៏គួរឱ្យចាប់អារម្មណ៍ តែមិនទាន់បានប្រកាសថា វាជា “មេរោគក្លាយពូជដែលគួរឱ្យកង្វល់” នៅឡើយ។

វីរុសកូវីដ-19 ពូជឥណ្ឌា មានការក្លាយពូជ 2ជាន់ គឺ E484Q និង L452R ទាំងអស់នេះ នៅមានការរកឃើញការក្លាយពូជបែបនេះ បំបែកគ្នានៅក្នុងវីរុសជាច្រើនពូជទៀតផង តែការក្លាយពូជរួមគ្នាទាំង 2យ៉ាងនេះ រកឃើញតែក្នុងវីរុសពូជឥណ្ឌាប៉ុណ្ណោះ។

ការចាត់ចូលក្នុងបញ្ជីខ្មៅថា ជាមេរោគក្លាយពូជដែលគួរឱ្យកង្វល់ នឹងក្លាយជាការចង្អុលបង្ហាញថា វាមានភាពគ្រោះថ្នាក់ខ្លាំងជាងវីរុសពីមុន ទាំងចម្លងរាលដាលបានងាយជាង មានភាពខ្លាំងក្លាជាង ឬអាចគេចចៀសពីការការពាររបស់វ៉ាក់សាំងបានទៀតផង។

កាលអំឡុងចុងខែមីនា ក្រសួងសុខាភិបាលឥណ្ឌា បានបញ្ជាក់ពីលទ្ធផលការវិភាគសំណាក បានបង្ហាញឱ្យឃើញថា មេរោគកូវីដ-19ក្លាយពូជប្រភេទថ្មីក្នុងប្រទេសឥណ្ឌា មិនដូចគ្នានឹងពូជដែលគួរឱ្យខ្លាចផ្សេងៗទៀតកាលពីពេលមុននោះទេ និងកំពុងសិក្សាថា តើពូជប្រភេទថ្មីនេះ នឹងធ្វើឱ្យកើតការឆ្លងបានកាន់តែងាយឡើង ឬធ្វើឱ្យវ៉ាក់សាំងដែលកំពុងមាន ចុះខ្សោយប្រសិទ្ធភាពដែរឬទេ?

ប្រទេសឥណ្ឌាកំពុងប្រឈមនឹងករណីអ្នកឆ្លងមេរោគ និងអ្នកស្លាប់ដោយសារជំងឺរាតត្បាតដ៏ធំនេះ កើនឡើងជារឿយៗ និងមានកង្វល់យ៉ាងខ្លាំងថា មេរោគក្លាយពូជកំពុងក្លាយជាកត្តាជំរុញស្រមោលនៃភាពហាយនៈឱ្យលេចកាន់តែច្បាស់ឡើង។

អង្គការសុខភាពពិភពលោក បានសង្កត់ធ្ងន់ថា មេរោគក្លាយពូជផ្សេងៗ ដែលកំពុងវិលវល់ក្នុងអំឡុងពេលជាមួយគ្នា ក៏បង្កើនការចម្លងសាយភាយខ្លាំងដូចគ្នាដែរ និងនៅពេលរួមគ្នា “ជួនកាលពួកវា អាចកំពុងមានតួនាទីសំខាន់ក្នុងការចម្លងរាលដាលនាពេលបច្ចុប្បន្នក្នុងប្រទេសមួយនេះទៀតផង”

WHO បានបញ្ជាក់ជាចុងក្រោយថា មានភាពចាំបាច់ និងបន្ទាន់ណាស់ ដែលត្រូវធ្វើការសិក្សាស្រាវជ្រាវបន្ថែមយ៉ាងល្អិតល្អន់ ក្នុងគុណលក្ខណៈដោយឡែករបស់ B.1.617 និងមេរោគក្លាយពូជផ្សេងៗ ក្នុងនោះរួមទាំងផលប៉ះពាល់របស់ការចម្លងសាយភាយមេរោគ ភាពធ្ងន់ធ្ងរ និងភាពប្រឈមក្នុងការឆ្លងមេរោគឡើងវិញម្ដងទៀតផងដែរ៕

ប្រភព៖ ទីភ្នាក់ងារព័ត៌មាន AFP
ប្រែសម្រួលដោយ តាវ៉ែនតា

April 28, 2021

ឥណ្ឌា៖ សាកសពអ្នកជំងឺCovid-19 នៅទីបូជា ពេញហៀរដល់ច្រកចេញ-ចូល ខណៈអ្នកស្លាប់ចេះតែកើនឡើងមិនឈប់ឈរ

នៅខាងក្រៅទីតាំងបូជាសពនៅរដ្ឋធានីរបស់ប្រទេសឥណ្ឌា សាកសពអ្នកជំងឺCovid-19 ដែលរុំជិតដោយក្រណាត់ពណ៌ស ត្រូវបានគេដាក់ជាជួរ រង់ចាំដល់វេនបូជា។

ក្នុងពេលដែលសាកសពចាស់កំពុងត្រូវបានតម្រៀបជាជួរ សាកសពថ្មីក៏ត្រូវបានបញ្ជូនមកកាន់កន្លែងបូជាសពជាបន្តបន្ទាប់ ធ្វើឱ្យចំនួនសាកសព ចេះតែវែងអន្លាយឡើងៗ រហូតហៀរដល់ផ្លូវចេញ-ចូលនៃទីតាំងបូជាសព Shubhashnagar នៅរដ្ឋធានី New Delhi។ នេះបើតាមវីដេអូដែលត្រូវបានបង្ហោះនៅលើបណ្ដាញសង្គម Twitter កាលពីថ្ងៃទី26 ខែមេសា។

នេះគឺជាសោកនាដកម្មដែលបានកើតឡើងនៅតំបន់ជាច្រើននៃប្រទេសឥណ្ឌា នៅពេលដែលប្រទេសនេះកំពុងប្រយុទ្ធនឹងការរាតត្បាតយ៉ាងអាក្រក់បំផុត ពីវីរុសCovid-19។ ប្រទេសឥណ្ឌា ដែលជាសម្បុកវីរុសCovid-19 ធំជាងគេទីពីរក្នុងពិភពលោក បច្ចុប្បន្ន មានអ្នកឆ្លងជាង 17.8លាននាក់ និងស្លាប់ជាង 199,000នាក់។

មុនពេលត្រូវបានយកទៅកាន់តំបន់បូជា សាកសពត្រូវបានក្រុមអ្នកបូជាសព បាញ់ថ្នាំសម្លាប់មេរោគ។ នៅក្បែរនោះគឺជាក្រុមបុគ្គលិករៀបចំពិធីបូជាសព អ្នកស្ម័គ្រចិត្ត និងសមាជិកគ្រួសារសព។ សាច់ញាតិរបស់សព ត្រូវនិយាយពាក្យថា «លា» ជាលើកចុងក្រោយទៅកាន់សាកសព ព្រោះតែក្នុងទីបូជាសពនេះតែងតែពេញណែនដោយសាកសព។

មានសាច់ញាតិរបស់សពតិចតួចណាស់ដែលត្រូវបានអនុញ្ញាតឱ្យចូលមកកាន់កន្លែងបូជាសព។ ប៉ុន្តែ ដោយសារមានសាកសពច្រើនដែលត្រូវបូជា ទីនេះក៏មានមនុស្សម្នាច្រើនដូច្នេះ។

«លឿងឡើង» គឺជាសំឡេងរបស់ក្រុមការងារនៅទីតាំងបូជាសព ដែលគេតែងតែស្ដាប់ឮជាញឹកញាប់ នៅពេលបានចូលមកកាន់កន្លែងដ៏គួរឱ្យខ្លាចនេះ។

មន្ទីរពេទ្យមួយចំនួនបានឱ្យដឹងថា ពួកគេកំពុងញាប់ដៃញាប់ជើងសង្គ្រោះអ្នកជំងឺដែលស្ថិតក្នុងស្ថានភាពខ្វះអុកស៊ីសែនធ្ងន់ធ្ងរ។ មន្ទីរពេទ្យខ្លះក៏បានប្រកាសថា លែងទទួលអ្នកជំងឺទៀតហើយ ខណៈដែលមន្ទីរពេទ្យមួយកន្លែង បានប្រកាសថា អ្នកជំងឺនឹងត្រូវឱ្យចេញពីមន្ទីរពេទ្យ បើសិនជាពួកគេមិនត្រូវបានផ្គត់ផ្គង់អុកស៊ីសែនបន្ថែម។

ពហុកីឡាដ្ឋាន Yamuna នៅ New Delhi ជាកន្លែងដែលត្រូវបានប្ដូរទៅជាមណ្ឌលព្យាបាលអ្នកជំងឺCovid-19 ដែលមានគ្រែជិត 900 ក៏បានបិទទ្វារ បន្ទាប់ពីបានបើកទ្វារបានប៉ុន្មានថ្ងៃ។ មូលហេតុដែលត្រូវបិទគឺដោយសារ «អស់គ្រែដែលមានបំពាក់អុកស៊ីសែន»។

យ៉ាងនេះក្ដី ឥណ្ឌា ទំនងជាមិនទាន់ដល់ដំណាក់កាលអាក្រក់បំផុតនៅឡើយ។ ក្រុមអ្នកជំនាញបានព្យាករថា តួលេខអ្នកឆ្លងវីរុសCovid-19 នៅប្រទេសឥណ្ឌា នឹងឡើងដល់ចំណុចកំពូល នៅពាក់កណ្ដាលខែឧសភា ហើយនឹងនៅតែបន្តកើនឡើង៕

ប្រភព៖ Sky, Reuters, CNN
ប្រែសម្រួល៖ បុត្រា

April 27, 2021

Covid-19! ឥណ្ឌាអនុញ្ញាតឱ្យមនុស្ស 600,000នាក់ ធ្វើធម្មយាត្រា ក្នុងគ្រាវីរុស កំពុងរាតត្បាតយ៉ាងខ្លាំងក្លា

អាជ្ញាធរតំបន់ Kashmir នៃប្រទេសឥណ្ឌា រៀបផែនការត្រៀមកន្លែងស្នាក់នៅសម្រាប់ហិណ្ឌូសាសនិកចំនួន 600,000នាក់ ដែលនឹងចូលរួមធ្វើធម្មយាត្រា Amarnath ប្រព្រឹត្តទៅចាប់ពីខែមិថុនាខាងមុខ។

ក្រុមមន្ត្រីនៅតំបន់ Kashmir បានផ្អាកការអនុញ្ញាតឱ្យពលរដ្ឋចុះឈ្មោះតាមគេហទំព័រដើម្បីចូលរួមពិធីធម្មយាត្រាទៅកាន់ប្រាសាទទេពក្នុងល្អាងភ្នំ Amarnath (Shri Amarnath Cave Temple) ក៏ប៉ុន្តែ បានប្រកាសថា ព្រឹត្តិការណ៍នេះនឹងនៅតែប្រព្រឹត្តទៅតាមកាលបរិច្ឆេទ ចាប់ពីថ្ងៃទី28 ខែមិថុនា ដល់ថ្ងៃទី22 ខែសីហា ឆ្នាំ2021។

អាជ្ញាធរតំបន់ Kashmir ក៏មានគម្រោងសង់ជំរំស្នាក់នៅចំនួនពីរកន្លែងដើម្បីធ្វើជាកន្លែងឈប់សម្រាកសម្រាប់ហិណ្ឌូសាសនិកដែលចូលរួមធ្វើធម្មយាត្រាទៅកាន់ប្រាសាទ Amarnath។ ប្រាសាទ Amarnath ដែលស្ថិតនៅលើកម្ពស់ 3,880ម៉ែត្រ បើធៀបនឹងផ្ទៃទឹកសមុទ្រនេះ តែងតែទទួលភ្ញៀវដែលជាហិណ្ឌូសាសនិក រាប់សែននាក់ជារៀងរាល់ឆ្នាំ។

មនុស្សម្នាក់ចូលរួមធម្មយាត្រាទៅកាន់ល្អាងភ្នំ Amarnath (Shri Amarnath Cave Temple)

នៅក្នុងគ្រាដែលប្រទេសឥណ្ឌា កំពុងប្រឈមនឹងការរីករាលដាលនៃវីរុសCovid-19 មនុស្សជាច្រើនកំពុងមានការព្រួយបារម្ភ ខ្លាចស្ថានភាពកាន់តែអាក្រក់ឡើងៗ បន្ទាប់ពីមានព្រឹត្តិការណ៍ធម្មយាត្រានេះ។

«ស្ថានការណ៍កំពុងអាក្រក់នៅពាសពេញប្រទេសឥណ្ឌា។ នឹងជារឿងល្អ បើសិនជាធម្មយាត្រា Amarnath ឆ្នាំនេះ គ្រាន់តែធ្វើឡើងជានិមិត្តរូប ដោយអនុញ្ញាតឱ្យមនុស្សតិចតួច ទៅកាន់ប្រាសាទ។ មិនដូច្នេះទេ ធម្មយាត្រានេះនឹងក្លាយទៅជាសោកនាដកម្ម» អ្នកនយោបាយ Tanvir Sadiq និយាយដូច្នេះ។

Tanvir Sadiq បានព្រមានថា ធម្មយាត្រាដែលមានមនុស្សរាប់សែននាក់ចូលរួម អាចជា «ព្រឹត្តិការណ៍មហាចម្លង ដែលគ្រោះថ្នាក់ដល់ជីវិត ខណៈដែលសមត្ថភាពរបស់ប្រព័ន្ធសុខាភិបាលនៃតំបន់ Kashmir នៅមានកម្រិតនៅឡើយ»។

មនុស្សម្នាចូលរួមពិធីបុណ្យ Kumbh Mela នៅ Haridwar នៃប្រទេសឥណ្ឌា កាលពីថ្ងៃតី 14/មេសា/2021

គណៈកម្មការគ្រប់គ្រងប្រាសាទ Shri Amarnath (SASB) ដែលជាអ្នកប្រារព្ធពិធីធម្មយាត្រា បានឱ្យដឹងថា គិតដោយឡែកក្នុងខែនេះ ហិណ្ឌូសាសនិកយ៉ាងតិច 30,000នាក់ បានចុះឈ្មោះចូលរួមធ្វើធម្មយាត្រានេះ បើទោះជាពិធីបុណ្យ Kumbh Mela មុននេះ បានក្លាយជាព្រឹត្តិការណ៍មហាចម្លងវីរុសហើយក្ដី។

បច្ចុប្បន្ន (រសៀលថ្ងៃទី27 ខែមេសា) ប្រទេសឥណ្ឌា មានអ្នកឆ្លងវីរុសCovid-19 សរុបចំនួន 17,636,307នាក់ ក្នុងនោះមានអ្នកស្លាប់សរុបចំនួន 197,894នាក់, ជាសះស្បើយ 14,556,209នាក់ និងកំពុងព្យាបាល 2,882,204នាក់៕

ប្រភព៖ DW
ប្រែសម្រួល៖ បុត្រា

April 27, 2021

ហ្វ៊ីលីពីន ឆ្លងជំងឺប្រចាំថ្ងៃកើនជិត 9ពាន់នាក់ ក្លាយជាប្រទេសឆ្លងច្រើន ទី2 ក្នុងអាស៊ាន

ថ្ងៃទី26 មេសា សារព័ត៌មាន Straits Times បានរាយការណ៍ថា ក្រសួងសុខាភិបាលនៃប្រទេសហ្វ៊ីលីពីន បានថ្លែងនៅពេលល្ងាច តាមពេលវេលាក្នុងតំបន់ថា រកឃើញអ្នកជំងឺកូវីដ-19 ថ្មីបន្ថែមទៀត 8,929នាក់ បណ្ដាលឱ្យចំនួនអ្នកឆ្លងមេរោគសរុបឡើងដល់ជាង 1លាននាក់ហើយ។

ឡើងគ្រងតំណែងជាប្រទេសទី2 ក្នុងតំបន់អាស៊ាន ដែលមានអ្នកឆ្លងមេរោគលើស 1លាននាក់ តាមពីក្រោយឥណ្ឌូនេស៊ី ដែលមានអ្នកឆ្លងមេរោគជាង 1.6លាននាក់ ចំណែកអ្នកស្លាប់ក្នុងប្រទេសមួយនេះវិញ បានកើនឡើងដល់ 16,853នាក់។

ខណៈពេលជាមួយគ្នា លំដាប់លេខ3 សម្រាប់ប្រទេសដែលមានអ្នកជំងឺកូវីដ-19ខ្ពស់បំផុតក្នុងអាស៊ាននេះ គឺប្រទេសម៉ាឡេស៊ី ជាមួយនឹងចំនួនអ្នកឆ្លងសរុប 395,718នាក់ ស្លាប់ 1,449នាក់។ មីយ៉ាន់ម៉ា មានអ្នកជំងឺសរុប 142,722នាក់ ស្លាប់ 3,207នាក់ ខណៈសិង្ហបុរី មានអ្នកជំងឺបន្ថែមទៀត 45នាក់ សរុប 61,051នាក់ និងស្លាប់ 30នាក់។

ប្រទេសថៃ មានអ្នកឆ្លងមេរោគ សរុប 57,508នាក់ ស្លាប់ 148នាក់។ ព្រះរាជាណាចក្រកម្ពុជា មានអ្នកជំងឺសរុប យ៉ាងតិច 9,975នាក់ ស្លាប់ 74នាក់ រីឯប្រទេសវៀតណាម មានអ្នកជំងឺសរុប 2,843នាក់ ស្លាប់ 35នាក់។

សាធារណរដ្ឋប្រជាធិបតេយ្យប្រជាមានិតឡាវ មានអ្នកជំងឺកើនឡើងដល់ 436នាក់ មិនទាន់មានអ្នកស្លាប់ និងប្រទេសប្រ៊ុយណេ មានអ្នកឆ្លងមេរោគ សរុប 223នាក់ និងស្លាប់ 3នាក់៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

April 27, 2021

ទឹកចិត្តគួរឱ្យសរសើរ!! CEO របស់ “Google និង Microsoft” កើតនៅឥណ្ឌា ប្រកាសជួយប្រទេសកំណើត តស៊ូកូវីដ-19

CEO 2នាក់ របស់ក្រុមហ៊ុនយក្សធំៗល្បីឈ្មោះ ដែលកើតនៅប្រទេសឥណ្ឌា លោក សាន់តា ភិឆៃ របស់ក្រុមហ៊ុន Google និងលោក សាតាយ៉ា ណាដេលឡា របស់ Microsoft បានថ្លែងកាលពីថ្ងៃចន្ទ ទី26 មេសាថា នឹងផ្ដល់ការជួយសង្គ្រោះយ៉ាងប្រញាប់ចំពោះប្រទេសឥណ្ឌា ដើម្បីតស៊ូប្រឆាំងនឹងវិបត្តិកូវីដ-19 ដែលកំពុងឆ្លងរាលដាលយ៉ាងធ្ងន់ធ្ងរក្នុងខណៈពេលនេះ។

CNN ប្រព័ន្ធព័ត៌មានរបស់សហរដ្ឋអាមេរិក បានរាយការណ៍នៅថ្ងៃទី26 ម្សិលមិញថា លោកសានតា ភិឆៃ និងលោក សាតាយ៉ា ណាដេលឡា អ្នកគ្រប់គ្រងលំដាប់ខ្ពស់របស់ក្រុមហ៊ុន ហ្គូហ្គល និងក្រុមហ៊ុន ម៉ៃក្រូសូហ្វត៍ ដែលកើតនៅប្រទេសឥណ្ឌា កាលពីថ្ងៃចន្ទ ទី26 មេសា បានចេញមកប្រកាសជួយទីក្រុងនីវដេលី ក្នុងការដោះស្រាយវិបត្តិការខ្វះខាតខ្យល់អុកស៊ីហ្ស៊ែនខាងវេជ្ជសាស្ត្រ ត្រៀមជាស្រេចក្នុងការផ្ដល់ជំនួយផ្នែកតិចនិកកម្រិតខ្ពស់ និងរួមទាំងការផ្ដុំកម្លាំងធនធានមនុស្សរបស់ក្រុមហ៊ុន ក្នុងខណៈដែលប្រទេសឥណ្ឌាកំពុងស្ថិតក្នុងវិបត្តិ មានចំនួនអ្នកឆ្លងមេរោគដ៏ច្រើនរៀងរាល់ថ្ងៃ។

លោក ណាដេលឡា CEO ក្រុមហ៊ុនមៃក្រូសូហ្វត៍ បានថ្លែងតាមប្រព័ន្ធធ្វីតធើរថា “បេះដូងខ្ញុំស្ទើរតែរលាយ ចំពោះស្ថានការណ៍បច្ចុប្បន្ននៅក្នុងប្រទេសឥណ្ឌា”

និងបានបន្ថែមថា “ខ្ញុំមានអារម្មណ៍រំភើបដែលសហរដ្ឋអាមេរិក បានផ្ដល់ការជួយសង្គ្រោះ ហើយខាងម៉ៃក្រូសូហ្វត៍ នឹងប្រើប្រាស់សំឡេងរបស់ខ្លួន រួមទាំងធនធានមនុស្ស និងតិចណូឡូជីដែលមាន ក្នុងការជួយសម្រាលទុក្ខលំបាក និងគាំទ្រការទិញឧបករណ៍អុកស៊ីហ្ស៊ែនដែលមានភាពសំខាន់”

ហើយប៉ុន្មានម៉ោងក្រោយមក CEOធំ របស់ក្រុមហ៊ុនហ្គូហ្គល លោក សានតា ភិឆៃ បានសម្ដែងការសហការ ដោយការថ្លែងតាមរយៈប្រព័ន្ធធ្វីតធើរថា លោកមានអារម្មណ៍សោកសៅយ៉ាងខ្លាំង នៅពេលបានឃើញភាពដ៏អាក្រក់របស់ស្ថានការណ៍កូវីដ-19 នៅក្នុងប្រទេសឥណ្ឌា ព្រមទាំងប្រកាសផ្ដល់ប្រាក់ជួយសង្គ្រោះប្រទេសឥណ្ឌាចំនួន 1.35ពាន់លានរូពី ឬប្រមាណ 18លានដុល្លារ ដែលជាការជួយដោយក្រុមហ៊ុន Google និងបុគ្គលិក Google ទាំងអស់។

CNN បានរាយការណ៍ថា Google នឹងប្រគល់ជំនួយ តាមរយៈអង្គការ អ៊ុយនីសេហ្វ របស់អង្គការសហប្រជាជាតិ សម្រាប់ឧបករណ៍ខាងវេជ្ជសាស្ត្រដែលចាំបាច់ ដែលរួមទាំងខ្យល់អុកស៊ីហ្ស៊ែន និងឧបករណ៍ពិសោធន៍ ដែលឱ្យគ្រោងការ “Give India” ជាផ្លាតហ្វ៉ម ការបរិច្ចាគអនឡាញ ឱ្យទៅក្រុមគ្រួសារដែលរងផលប៉ះពាល់ដោយសារវិបត្តិកូវីដ-19។ ក្រៅពីនេះ ខាង Google នៅបានផ្ដល់បន្ថែម 15លានដុល្លារទៀត សម្រាប់ការលើកលែងថ្លៃផ្សាយពាណិជ្ជកម្មខាងសុខភាពសាធារណៈ។

ប្រព័ន្ធផ្សព្វផ្សាយសហរដ្ឋអាមេរិក បានបញ្ជាក់ថា លោកណាដេលឡា និងលោកភិឆៃ គឺជាអ្នកគ្រប់គ្រងខ្សែស្រឡាយឥណ្ឌា ដែលទទួលបានជោគជ័យលំដាប់ពិភពលោក ដោយលោកណាដេលឡា មកពីទីក្រុងហៃដឺរ៉ាបាត់ ភាគខាងត្បូងរបស់ឥណ្ឌា និងចូលធ្វើការជាមួយម៉ៃក្រូសូហ្វត៍កាលពីឆ្នាំ1992 និងក្លាយជាអ្នកគ្រប់គ្រងម៉ៃក្រូសូហ្វត៍នៅឆ្នាំ2014។

ចំណែកលោកភិឆៃ កើតនៅរដ្ឋទមិឡណាឌូ លោកមិនមានកុំព្យូទ័រប្រើប្រាស់ រហូតទាល់តែផ្លាស់ទៅនៅអាមេរិក ដើម្បីរៀនបន្តនៅមហាវិទ្យាល័យស្ទែនហ្វ៉ដ ដ៏ល្បីល្បាញ និងបានចូលធ្វើការឱ្យ Google ក្នុងឆ្នាំ2014 និង 1ឆ្នាំបន្ទាប់មក លោកក៏ត្រូវបានស្នើឈ្មោះ ឱ្យគ្រងតំណែង CEO នៅទីនោះ និងក្រោយមក ក្នុងឆ្នាំ2019 លោកចូលទទួលតំណែងជា CEO របស់ក្រុមហ៊ុន Alphabet ដែលជាក្រុមហ៊ុនមេរបស់ Google។

ប្រទេសឥណ្ឌា បានរាយការណ៍ពីចំនួនអ្នកឆ្លងមេរោគថ្មីកាលពីថ្ងៃចន្ទ ទី26 មេសា ចំនួន 352,991នាក់ និងស្លាប់ក្នុង 24ម៉ោងចុងក្រោយ ចំនួន 2,812នាក់៕

ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា

April 27, 2021

Category: អន្តរជាតិ