អន្តរជាតិ - La Reine Media

ចិន លើកសំណើ 4ចំណុច ដើម្បីដោះស្រាយជម្លោះ រវាង អ៊ីស្រាអែល និង ប៉ាលេស្ទីន

រដ្ឋមន្ត្រីការបរទេសចិន លោក Wang Yi កាលពីថ្ងៃទី16 ខែឧសភា បានឱ្យដឹងថា ទីក្រុងប៉េកាំង បានលើកឡើងនូវសំណើចំនួន 4ចំណុច ទាក់ទិននឹងការកើនឡើងនៃភាពតានតឹងរវាងប្រទេសអ៊ីស្រាអែល និងជនជាតិប៉ាលេស្ទីន។

នៅក្នុងកិច្ចប្រជុំតាមអនឡាញបើកចំហលើកដំបូងរបស់ក្រុមប្រឹក្សាសន្តិសុខអង្គការសហប្រជាជាតិ (UNSC/United Nations Security Council) រដ្ឋមន្ត្រីការបរទេសចិន លោក Wang Yi បានឱ្យដឹងថា ជំលោះរវាង អ៊ីស្រាអែល និង ប៉ាលេស្ទីន បានបង្កការស្លាប់យ៉ាងច្រើន ក្នុងនោះមានទាំងកុមារ និងស្ត្រីផងដែរ។ ស្ថានភាពនេះពិតជាធ្ងន់ធ្ងរខ្លាំងណាស់ និងចាំបាច់ត្រូវតែមានបទឈប់បាញ់ និងផ្អាករាល់សកម្មភាពហិស្សា។

លោក Wang Yi បានអំពាវនាវឱ្យសហគមន៍អន្តរជាតិ ប្រញាប់ទប់ស្កាត់ស្ថានការណ៍ កុំឱ្យអាក្រាក់ជាងនេះ ដើម្បីជួយឱ្យតំបន់នេះ ចៀសវាងបាននូវការធ្លាក់ទៅក្នុងភាពវឹកវរជាថ្មី និងការពារអាយុជីវិតរបស់ប្រជាជន។

នៅចំពោះមុខស្ថានការណ៍តានតឹងនាបច្ចុប្បន្ន ប្រទេសចិន បានលើកឡើងនូវសំណើចំណាត់ការចំនួន 4ចំនុច រួមមាន បទឈប់បាញ់ និងផ្អាករាល់អំពើហិង្សា, ជំនួយមនុស្សធម៌ជារឿងចាំបាច់, ជំនួយជាអន្តរជាតិជាកាតព្វកិច្ច, និង «ដំណោះស្រាយ រដ្ឋពីរ» គឺជាដំណោះស្រាយឫសគល់។

យោងតាមលោក Wang Yi ប៉ាលេស្ទីន តែងតែជាចំណុចស្នូលនៅក្នុងបញ្ហាមជ្ឈិមបូព៌ា។ លុះត្រាបញ្ហាប៉ាលេស្ទីន ត្រូវបានដោះស្រាយទាំងស្រុង ដោយយុត្តិធម៌ និងយូរអង្វែង ទើបតំបន់មជ្ឈិមបូព៌ា អាចទទួលបានសន្តិភាព និងសន្តិសុខយូរអង្វែង។

នៅក្នុងកិច្ចប្រជុំខាងលើនេះដែរ តំណាងបណ្ដាប្រទេសដែលបានចូលរួម ក៏បានអំពាវនាវឱ្យឈប់បាញ់ជាបន្ទាន់ និងផ្អាកសកម្មភាពហិង្សា រវាង អ៊ីស្រាអែល និងប៉ាលេស្ទីន, បន្ថយភាពតានតឹងនៃស្ថានការណ៍ ខណៈគោរពធ្វើតាមសេចក្ដីសម្រេចរបស់ក្រុមប្រឹក្សាសន្តិសុខ ក៏ដូចជាច្បាប់អន្តរជាតិ។

សូមបញ្ជាក់ថា បច្ចុប្បន្ន ប្រទេសចិន កំពុងកាន់កាប់តំណែងជាប្រធានប្ដូរវេនរបស់ក្រុមប្រឹក្សាសន្តិសុខនៃអង្គការសហប្រជាជាតិ សម្រាប់ខែឧសភានេះ៕

ប្រភព៖ Xinhua
ប្រែសម្រួល៖ បុត្រា

May 17, 2021

ទីភ្នាក់ងារសារព័ត៌មានអាមេរិក AP អំពាវនាវឱ្យស៊ើបអង្កេតលើករណី អ៊ីស្រាអែល បាញ់កម្ទេចអគារ Jala នៅហ្គាហ្សា

និពន្ធនាយិការបស់ទីភ្នាក់ងារសារព័ត៌មាន AP ចង់បើកការស៊ើបអង្កេតលើករណីវាយប្រហារលើអគារ Jala ជាទីតាំងការិយាល័យរបស់សារព័ត៌មានអន្តរជាតិមួយចំនួន នៅតំបន់ ហ្គាហ្សា។

«យើងបានដឹងថា អ៊ីស្រាអែល ប្រកាសបង្ហាញភ័ស្ដុតាង។ យើងមិនដឹងថា ជាភ័ស្ដុតាងអ្វីនោះទេ។ ខ្ញុំគិតថា នេះជាពេលស្របស្រប ដើម្បីបើកការស៊ើបអង្កេតឯករាជ្យមួយ ទៅលើអ្វីដែលបានកើតឡើង» Sally Buzbee និពន្ធនាយិការបស់ទីភ្នាក់ងារសារព័ត៌មាន AP (Associated Press) បានប្រាប់ទូរទស្សន៍កាលពីថ្ងៃទី16 ខែឧសភា។

អ្នកស្រី Sally Buzbee ឱ្យដឹងថា បុគ្គលិករបស់ខ្លួន មិនបានរងរបួស ហើយកំពុងប្រើប្រាស់ការិយាល័យរួមជាមួយនឹងគូប្រជែង AFP នៅតំបន់ ហ្គាហ្សា ប៉ុន្តែ ការវាយប្រហារ បានកម្ទេចទីតាំងសំខាន់សម្រាប់ប្រមូលព័ត៌មាននៅតំបន់នេះ។

«យើបមិនជ្រើសរើសបក្ខពួក ទាក់ទិននឹងការប្រយុទ្ធគ្នានេះ។ យើងជឿថា ត្រូវតែការពារសិទ្ធិដើម្បីឱ្យពិភពលោកបានដឹងនូវអ្វីៗដែលបានកើតឡើងក្នុងការប្រយុទ្ធគ្នានេះ» អ្នកស្រី Sally Buzbee និយាយបន្ថែម។

មតិរបស់ Sally Buzbee ត្រូវបានលើកឡើង បន្ទាប់ពីនាយករដ្ឋមន្ត្រីអ៊ីស្រាអែល លោក Benjamin Netanyahu បានបកស្រ័យអំពីមូលហេតុដែលកងទ័ពប្រទេសនេះ ធ្វើការវាយប្រហារកម្ទេចអគារ Jala នៅតំបន់ ហ្គាហ្សា ជាទីដែលមានការិយាល័យរបស់សារព័ត៌មានអន្តរជាតិ AP និង Al Jazeera កាលពីថ្ងៃទី15 ខែឧសភា។

លោក Benjamin Netanyahu ថ្លែងថា «ការិយាល័យស៊ើបការណ៍សម្ងាត់របស់ក្រុមភេរវកម្មប៉ាលេស្ទីន ដែលមានទីតាំងនៅក្នុងអគារនោះ បានរៀបចំគម្រោង និងធ្វើការវាយប្រហារភេរវកម្ម សំដៅលើពលរដ្ឋស៊ីវិលអ៊ីស្រាអែល។ ដូច្នេះ វាគឺជាគោលដៅស្របច្បាប់ទាំងស្រុង។ ខ្ញុំធានាថា យើងបានអនុវត្តវិធានការគ្រប់យ៉ាងដើម្បីមិនបង្ករបួស និងស្លាប់ដល់ជនស៊ីវិល។ ជាក់ស្ដែង ពុំមានអ្នកណាម្នាក់បានស្លាប់នៅក្នុងការវាយប្រហារតាមអាកាសនេះទេ»

អគារ Jala ដែលមានកម្ពស់ 12ជាន់ នៅតំបន់ ហ្គាហ្សា បានដួលរលំទាំងស្រុង បន្ទាប់ពីត្រូវគ្រាប់រ៉ុក្កែត និងគ្រាប់បែករបស់អ៊ីស្រាអែល។ មន្ត្រីយោធាម្នាក់របស់អ៊ីស្រាអែល បានហៅទូរស័ព្ទទៅកាន់ម្ចាស់អគារ ដោយប្រកាសអំពីការវាយប្រហារដែលនឹងកើតឡើង ហើយបានទុកពេលមួយម៉ោងសម្រាប់គ្រប់គ្នានៅខាងក្នុងអគារ រៀបចំដើម្បីចាកចេញ។ មួយម៉ោងក្រោយមក អគារនេះក៏ត្រូវយន្តហោះចម្បាំងរបស់អ៊ីស្រាអែល បាញ់កម្ទេច។

ប្រធានទីភ្នាក់ងារសារព័ត៌មាន AP លោក Gary Pruitt និយាយថា៖ «យើងពិតជារន្ធត់ខ្លាំងណាស់ និងមានការភ័យខ្លាច នៅពេលមានការវាយប្រហារនេះ។ យើងគេចផុតពីការស្លាប់តែប៉ុន្មានជំហានប៉ុណ្ណោះ»។

អ្នកនាំពាក្យរបស់សេតវិមាន បានឱ្យដឹងថា បានទាក់ទងទៅកាន់មន្ត្រីអ៊ីស្រាអែល ដើម្បីស្នើឱ្យទីក្រុង តែល អាវីវ ទទួលខុសត្រូវក្នុងការការពារសុវត្ថិភាពរបស់ក្រុមអ្នកសារព័ត៌មាន។ រដ្ឋមន្ត្រីការបរទេសអាមេរិក Antony Blinken ក៏បានហៅទូរស័ព្ទទៅកាន់ប្រធាន AP ដើម្បីសំដែងការគាំទ្រ។

ការប្រយុទ្ធគ្នារវាង អ៊ីស្រាអែល និងកងជីវពល ហាម៉ាស របស់ប៉ាលេស្ទីន នៅតំបន់ ហ្គាហ្សា នៅតែបន្តកើតមាន និងកាន់តែតានតឹងឡើង។ កងទ័ពអ៊ីស្រាអែល ឱ្យដឹងថា ហាម៉ាស បានបាញ់រ៉ុក្កែតជាង 3,000គ្រាប់ ចូលទឹកដីអ៊ីស្រាអែល ក្នុងមួយសប្ដាហ៍កន្លង បណ្ដាលឱ្យជនជាតិអ៊ីស្រាអែល យ៉ាងតិច 10នាក់ បានស្លាប់។

ចំណែកកងទ័ពអ៊ីស្រាអែល ក៏បានវាយបកសងសឹក ទៅលើតំបន់ ហ្គាហ្សា បណ្ដាលឱ្យជនជាតិប៉ាលេស្ទីនប្រមាណ 181នាក់ បាត់បង់ជីវិត ក្នុងនោះមានកុមារ 52នាក់៕

ប្រភព៖ Reuters
ប្រែសម្រួល៖ បុត្រា

May 17, 2021

អ៊ីស្រាអែល ថា ខ្លួន «មានមូលហេតុគ្រប់គ្រាន់» ដើម្បីកម្ទេចអគារសារព័ត៌មានអន្តរជាតិ នៅហ្គាហ្សា

នាយករដ្ឋមន្ត្រីអ៊ីស្រាអែល យល់ថា អគារដែលមានទីភ្នាក់ងារសារព័ត៌មានអន្តរជាតិគឺជា «គោលដៅស្របច្បាប់» ព្រោះថា វាមាន «ការិយាល័យស៊ើបការណ៍សម្ងាត់របស់ក្រុមភេរវកម្មប៉ាលេស្ទីន»។

«ការិយាល័យស៊ើបការណ៍សម្ងាត់របស់ក្រុមភេរវកម្មប៉ាលេស្ទីន ដែលមានទីតាំងនៅក្នុងអគារនោះ បានរៀបចំគម្រោង និងធ្វើការវាយប្រហារភេរវកម្ម សំដៅលើពលរដ្ឋស៊ីវិលអ៊ីស្រាអែល» នាយករដ្ឋមន្ត្រីអ៊ីស្រាអែល Benjamin Netanyahu បានប្រកាសនាថ្ងៃទី16 ខែឧសភា ទាក់ទងនឹងការវាយប្រហារកម្ទេចអគារ Jala នៅតំបន់ ហ្គាហ្សា ជាទីដែលមានការិយាល័យរបស់ទីភ្នាក់ងារសារព័ត៌មាន AP របស់អាមេរិក និង Al Jazeera របស់ប្រទេសកាតា កាលពីថ្ងៃទី15 ខែឧសភា។

«ដូច្នេះ វាគឺជាគោលដៅស្របច្បាប់ទាំងស្រុង។ ខ្ញុំធានាថា យើងបានអនុវត្តវិធានការគ្រប់យ៉ាងដើម្បីមិនបង្ករបួស និងស្លាប់ដល់ជនស៊ីវិល។ ជាក់ស្ដែង ពុំមានអ្នកណាម្នាក់បានស្លាប់នៅក្នុងការវាយប្រហារតាមអាកាសនេះទេ» លោក Netanyahu និយាយបន្ថែម។

សូមបញ្ជាក់ថា អគារ Jala ដែលមានកម្ពស់ 12ជាន់ នៅតំបន់ ហ្គាហ្សា បានដួលរលំទាំងស្រុង បន្ទាប់ពីត្រូវគ្រាប់រ៉ុក្កែត និងគ្រាប់បែករបស់អ៊ីស្រាអែល។ មន្ត្រីយោធាម្នាក់របស់អ៊ីស្រាអែល បានហៅទូរស័ព្ទទៅកាន់ម្ចាស់អគារ ដោយប្រកាសអំពីការវាយប្រហារដែលនឹងកើតឡើង ហើយបានទុកពេលមួយម៉ោងសម្រាប់គ្រប់គ្នានៅខាងក្នុងអគារ រៀបចំដើម្បីចាកចេញ។ មួយម៉ោងក្រោយមក អគារនេះក៏ត្រូវយន្តហោះចម្បាំងរបស់អ៊ីស្រាអែល បាញ់កម្ទេច។

ការប្រយុទ្ធគ្នារវាង អ៊ីស្រាអែល និងកងជីវពល ហាម៉ាស នៅតំបន់ ហ្គាហ្សា នៅតែបន្តកើតមាន និងកាន់តែតានតឹងជាងមុន។ កងទ័ពអ៊ីស្រាអែល ឱ្យដឹងថា ហាម៉ាស បានបាញ់រ៉ុក្កែតជាង 3,000គ្រាប់ ចូលទឹកដីអ៊ីស្រាអែល ក្នុងមួយសប្ដាហ៍កន្លង បណ្ដាលឱ្យជនជាតិអ៊ីស្រាអែល យ៉ាងតិច 10នាក់ បានស្លាប់។

កងទ័ពអ៊ីស្រាអែល ក៏បានវាយបកសងសឹក ទៅលើតំបន់ ហ្គាហ្សា បណ្ដាលឱ្យជនជាតិប៉ាលេស្ទីនប្រមាណ 181នាក់ បាត់បង់ជីវិត ក្នុងនោះមានកុមារ 52នាក់។

ភាពតានតឹងបានកើនឡើង បន្ទាប់ពី អ៊ីស្រាអែល កាត់បន្ថយការចូលទៅកាន់តំបន់ទីក្រុងបុរាណ យេរូសាឡឹម ក្នុងរដូវបុណ្យ Ramadan និងគំរាមបណ្ដេញជនជាតិប៉ាលេស្ទីនចំនួន 4គ្រួសារ ដែលកំពុងរស់នៅភាគខាងត្បូងនៃតំបន់ យេរូសាឡឹម ដើម្បីទុកកន្លែងឱ្យជនជាតិជ្វីហ្វ។

បញ្ហាខាងលើ បាននាំឱ្យប្រជាជនប៉ាលេស្ទីន ធ្វើបាតុកម្មប្រឆាំងតវ៉ា ហើយក៏មានការប៉ះទង្គិចជាមួយប៉ូលិសអ៊ីស្រាអែល អស់ជាច្រើនថ្ងៃ នៅខាងក្រៅវិហារ Al-Aqsa នៅតំបន់ យេរូសាឡឹមខាងត្បូង ដែលជាកន្លែងពិសិដ្ឋរបស់សាសនិកអ៊ីស្លាម បណ្ដាលឱ្យមនុស្សរាប់រយនាក់ត្រូវរងរបួស។ តុលាការ អ៊ីស្រាអែល បានផ្អាកការជំនុំជម្រះលើការបណ្ដេញចេញខាងលើ ប៉ុន្តែ នៅតែមិនអាចកាត់បន្ថយភាពតានតឹងបាន៕

ប្រភព៖ AFP
ប្រែសម្រួល៖ បុត្រា

May 17, 2021

(វីដេអូ)-ការប្រយុទ្ធគ្នារវាងប្រទេស អ៊ីស្រាអែល និង ក្រុម ហាម៉ាស នាថ្ងៃនេះ មានភាពខ្លាំងក្លាបំផុត

ការវាយប្រហារដោយយន្តហោះចម្បាំងរបស់ អ៊ីស្រាអែល ទៅលើតំបន់ ហ្គាហ្សា នាថ្ងៃនេះ បានសម្លាប់ជនជាតិប៉ាលេស្ទីន ចំនួន 26នាក់បន្ថែមទៀត ធ្វើឱ្យចំនួនអ្នកស្លាប់នៅតំបន់ឆ្នេរសមុទ្រនេះ កើនឡើងដល់ 174នាក់។

ក្រសួងសុខាភិបាលនៃតំបន់ ហ្គាហ្សា បានឱ្យដឹងថា ការវាយប្រហារតាមផ្លូវអាកាសនៅវេលាទៀបភ្លឺ ពីសំណាក់ អ៊ីស្រាអែល ទៅលើផ្ទះមួយចំនួននៅតាមបណ្ដោយផ្លូវសំខាន់ទៅកាន់មន្ទីរពេទ្យ Shiffa បានបណ្ដាលឱ្យមានអ្នកស្លាប់រហូតដល់ 26នាក់ ក្នុងនោះមានកុមារចំនួន 8នាក់ និងស្ត្រីចំនួន 10នាក់ ខណៈដែលតួលេខប៉ាន់ស្មាន ត្រូវបានគេជឿថា នឹងកើនឡើងជាបន្តបន្ទាប់។

ក្រៅពីអ្នកស្លាប់ខាងលើ ការវាយប្រហាររបស់ អ៊ីស្រាអែល ក៏បានធ្វើឱ្យមានអ្នករបួសជាង 50នាក់បន្ថែមទៀតផងដែរ។ ក្រុមអ្នកជួយសង្គ្រោះ កំពុងរត់ប្រណាំងនឹងពេលវេលា ដើម្បីសង្គ្រោះជនរងគ្រោះចេញពីគំនរបាក់បែក។ នេះគឺជាថ្ងៃដែលកងជីវពល ហាម៉ាស រងការវាយប្រហារធ្ងន់ធ្ងរបំផុត ចាប់តាំងពី ប៉ាលេស្ទីន និង អ៊ីស្រាអែល ផ្ដើមការប្រយុទ្ធគ្នាកាលពីដើមសប្ដាហ៍នេះ។

ចំណែកភាគីខាង អ៊ីស្រាអែល វិញ បានឱ្យដឹងថា ពលរដ្ឋរបស់ខ្លួនចំនួន 10នាក់ បានបាត់បង់ជីវិត ក្នុងនោះមានកុមារម្នាក់ផងដែរ បន្ទាប់ពីគ្រាប់រ៉ុក្កែត ជាច្រើនរយគ្រាប់ ត្រូវបានបាញ់ចេញពីតំបន់ ហ្គាហ្សា។

មូលហេតុនៃការប៉ះទង្គិចនេះ កើតឡើង បន្ទាប់ពី អ៊ីស្រាអែល កាត់បន្ថយការចូលទៅកាន់តំបន់ទីក្រុងបុរាណ យេរូសាឡឹម ក្នុងរដូវបុណ្យ Ramadan និងគំរាមបណ្ដេញជនជាតិប៉ាលេស្ទីនចំនួន 4គ្រួសារ ដែលកំពុងរស់នៅភាគខាងត្បូងនៃតំបន់ យេរូសាឡឹម ដើម្បីទុកកន្លែងឱ្យជនជាតិជ្វីហ្វ។

បញ្ហាខាងលើ បាននាំឱ្យប្រជាជនប៉ាលេស្ទីន ធ្វើបាតុកម្មប្រឆាំងតវ៉ា ហើយក៏មានការប៉ះទង្គិចជាមួយប៉ូលិសអ៊ីស្រាអែល អស់ជាច្រើនថ្ងៃ នៅខាងក្រៅវិហារ Al-Aqsa នៅតំបន់ យេរូសាឡឹមខាងត្បូង ដែលជាកន្លែងពិសិដ្ឋរបស់សាសនិកអ៊ីស្លាម បណ្ដាលឱ្យមនុស្សរាប់រយនាក់ត្រូវរងរបួស។ តុលាការ អ៊ីស្រាអែល បានផ្អាកការជំនុំជម្រះលើការបណ្ដេញចេញខាងលើ ប៉ុន្តែ នៅតែមិនអាចកាត់បន្ថយភាពតានតឹងបាន។

ការប្រយុទ្ធគ្នានេះ បាននាំឱ្យអង្គការសហប្រជាជាតិ និងបណ្ដាប្រទេសក្នុងពិភពលោក សំដែងការព្រួយបារម្ភ និងអំពាវនាវឱ្យមានការបន្ធូរបន្ថយភាពតានតឹង និងងាកមករកតុចរចា។

ក្រុមរដ្ឋមន្ត្រីការបរទេសរបស់សហភាពអឺរ៉ុប (EU) គ្រោងនឹងបើកកិច្ចប្រជុំតាមវីដេអូបន្ទាន់មួយ នៅថ្ងៃទី18 ខែឧសភាខាងមុខ ដើម្បីចូលរួមដោះស្រាយបញ្ហាតានតឹងរវាង អ៊ីស្រាអែល និងប៉ាលេស្ទីន៕

ប្រភព៖ AFP, Washington Post, AP
ប្រែសម្រួល៖ បុត្រា

May 16, 2021

(វីដេអូ) – អ៊ីស្រាអែល បាញ់រ៉ុក្កែត ចំអគារការិយាល័យរបស់ AP និងទីភ្នាក់ងារសារព័ត៌មានអន្តរជាតិជាច្រើនទៀត នៅតំបន់ ហ្គាហ្សា

ការវាយប្រហារតាមអាកាសរបស់អ៊ីស្រាអែល ក្នុងថ្ងៃទី15 ខែឧសភា នេះ បានបណ្ដាលឱ្យអគារមួយកន្លែង ដែលជាទីតាំងការិយាល័យរបស់ទីភ្នាក់ងារសារព័ត៌មានអន្តរជាតិជាច្រើន នៅតំបន់ ហ្គាហ្សា ក្នុងនោះមានទាំង AP (Associated Press) និង Al Jazeera ផងដែរ។

សារព័ត៌មាន Al Jazeera ដកស្រង់ប្រភពព័ត៌មានពីកន្លែងកើតហេតុ បានឱ្យដឹងថា រ៉ុក្កែតយ៉ាងតិចចំនួន 3គ្រាប់ បានបាញ់ចំអគារ al Jalaa ដែលមានកម្ពស់ 11ជាន់ ប៉ុន្តែ បច្ចុប្បន្ន មិនទាន់ដឹងច្បាស់អំពីការបាត់បង់ជីវិតមនុស្សនៅឡើយ។ រូបភាពពីកន្លែងកើតហេតុ បង្ហាញថា អគារបានដួលរលំ រចនាសម្ព័ន្ធសំណង់ត្រូវកម្ទេចទាំងស្រុង និងមានផ្សែង ធូលី រួមនឹងបំណែកនានា ខ្ទាតឡើងទៅលើ បន្ទាប់ពីត្រូវរងការវាយប្រហារតាមអាកាស ពីសំណាក់កងទ័ពអ៊ីស្រាអែល។

ប្រហែលមួយម៉ោងមុនការវាយប្រហារ អ៊ីស្រាអែល បានព្រមានដល់អ្នកដែលរស់នៅក្នុងអគារខាងលើ ឱ្យចាកចេញទៅរកកន្លែងសុវត្ថិភាព ដោយថា នឹងមានការវាយប្រហារតាមផ្លូវអាកាស។ អគារនេះគឺជាទីតាំងចម្រុះ ដោយមានកន្លែងស្នាក់នៅ និងការិយាល័យ នៅលាយឡំគ្នា។

ព្រឹកព្រលឹមថ្ងៃទី15 ខែឧសភា កងទ័ពអ៊ីស្រាអែល ក៏បានបាញ់ចំអគារមួយដែលមានកម្ពស់ 3ជាន់ នៅតំបន់ដែលមានជំរំរបស់ជនភៀសខ្លួន Shati នៅទីក្រុង ហ្គាហ្សា បណ្ដាលឱ្យមនុស្សចំនួន 10នាក់នៃគ្រួសារមួយ បានបាត់បង់ជីវិត ក្នុងនោះមានកុមារចំនួន 8នាក់។

ក្រោយការប្រយុទ្ធគ្នាអស់រយៈពេល 5ថ្ងៃ រវាងកងទ័ពអ៊ីស្រាអែល និងកងជីវពលហាម៉ាស របស់ប៉ាលេស្ទីន ដែលកំពុងកាន់កាប់តំបន់ ហ្គាហ្សា គេឃើញមានមនុស្សយ៉ាងតិច 140នាក់នៅតំបន់ ហ្គាហ្សា បានស្លាប់ ក្នុងនោះមានកុមារចំនួន 39នាក់ និងស្ត្រីចំនួន 22នាក់។ ចំណែកភាគីអ៊ីស្រាអែលវិញ ក៏មានមនុស្សចំនួន 7នាក់ បានបាត់បង់ជីវិតផងដែរ៕

ប្រភព៖ Al Jazeera, Reuters
ប្រែសម្រួល៖ បុត្រា

May 15, 2021

ស្ថានភាពជំងឺCOVID-19 នៅកម្ពុជា និងពិភពលោក ក្នុងថ្ងៃទី14 ខែឧសភា ឆ្នាំ2021

នៅទូទាំងពិភពលោក ក្នុងថ្ងៃទី14 ខែឧសភា ឆ្នាំ2021 បានរកឃើញករណីវិជ្ជមានថ្មីនឹង Covid-19 ចំនួន 22,344នាក់ ក្នុងនោះ កម្ពុជា ទើបរកឃើញ 335នាក់បន្ថែមទៀត។

ពិភពលោកទាំងមូល គិតមកដល់បច្ចុប្បន្ន មានអ្នកឆ្លងវីរុសCovid-19 សរុបចំនួន 162,550,085នាក់ ក្នុងនោះមានអ្នកស្លាប់សរុប 3,371,856នាក់, ជាសះស្បើយ 140,436,790នាក់ និងកំពុងព្យាបាលសរុបចំនួន 18,741,439នាក់។

ចំណែក កម្ពុជា វិញ គិតមកដល់បច្ចុប្បន្ន អ្នកស្លាប់ដោយសារ Covid-19 សរុបចំនួន 147នាក់។ ក្នុងអំឡុង 24ម៉ោងនៃថ្ងៃទី14 ខែឧសភា កម្ពុជា មិនមានអ្នកស្លាប់ដោយសារវីរុសនេះទេ។ ព័ត៌មានបន្ថែម សូមអានសេចក្ដីជូនដំណឹងខាងក្រោម៖

ប្រភព៖ Worldometers, ក្រសួងសុខាភិបាល
ដកស្រង់៖ បុត្រា

May 15, 2021

យន្តហោះពីរគ្រឿងបុកគ្នាលើអាកាស! មួយគ្រឿងស្ទើរដាច់ជាពីរកំណាត់ ប៉ុន្តែជារឿងអស្ចារ្យ ព្រោះពុំមានអ្នកស្លាប់!

សហរដ្ឋអាមេរិក៖ អ្នកដំណើរ និងអ្នកបើកបរយន្តហោះទាំងពីរគ្រឿង ដែលជួបគ្រោះថ្នាក់នេះ បានរួចពីការស្លាប់ប្រកបដោយភាពអស្ចារ្យ នឹកស្មានមិនដល់ នៅពេលយន្តហោះបានប៉ះទង្គិចគ្នាលើអាកាស នៃទីក្រុង Denver បណ្ដាលឱ្យយន្តហោះមួយគ្រឿង ស្ទើរដាច់ជាពីរកំណាត់។

សារព័ត៌មាន AP ដកស្រង់ប្រភពព័ត៌មានពីគណៈកម្មការសុវត្ថិភាពចរាចរណ៍ និងដឹកជញ្ជូនអាមេរិក (NTSB) និងក្រុមពន្លត់អគ្គិភ័យ South Metro ឱ្យដឹងថា ករណីខាងលើនេះ បានកើតឡើងនៅពេលយន្តហោះកំពុងហោះហើរទៅកាន់ព្រមានយន្តហោះ Centennial ជាយក្រុង Denver រដ្ឋ Colorado សហរដ្ឋអាមេរិក។ ប្រការដ៏អស្ចារ្យ នោះគឺថា ពុំមានអ្នកណាម្នាក់រងរបួសក្នុងហេតុការណ៍គ្រោះថ្នាក់នេះនោះទេ។

អ្នកបើកបរ ដែលជាមនុស្សតែម្នាក់គត់នៅលើយន្តហោះដឹកទំនិញ របស់ក្រុមហ៊ុន Key Lime បានបញ្ជាឱ្យយន្តហោះចុះចតដោយសុវត្ថិភាព នៅឯព្រលានយន្តហោះ Centennial ក្នុងស្ថានភាពយន្តហោះត្រូវរងការខូចខាតយ៉ាងធ្ងន់ធ្ងរ ដោយដំបូលយន្តហោះត្រូវដាច់ជាពីរ ចេញពីតួយន្តហោះ។

«ទំនងជា ម៉ាស៊ីនខាងស្ដាំបានខូច ទើបខ្ញុំចុះចតនៅទីនេះ» សំឡេងរបស់អ្នកបើកបរ ដែលត្រូវបានថតដោយម៉ាស៊ីនរបស់អង្គភាពគ្រប់គ្រងដែនអាកាស។

ចំណែកយន្តហោះមួយគ្រឿងផ្សេងទៀត ដែលដឹកអ្នកដំណើរម្នាក់ ជាកម្មសិទ្ធិរបស់ក្រុមហ៊ុន Cirrus Aircraft និងត្រូវាបានជួលដោយក្រុមហ៊ុនអាកាសចរណ៍ Independence Aviation ត្រូវខូចម៉ាស៊ីន មិនអាចដំណើរការបន្តទៀតបាន។ នៅពេលជួបគ្រោះថ្នាក់ អ្នកបើកបរបានចុចប៊ូតុងដំណើរការប្រព័ន្ធឆត្រសង្គ្រោះបន្ទាន់ដែលបំពាក់នៅលើតួយន្តហោះ ដើម្បីបន្ថយល្បឿន និងធ្វើការចុះចតលើឧទ្យានសាធារណៈ Cherry Creek។

បច្ចុប្បន្ន គណៈកម្មការជាតិសុវត្ថិភាព និងដឹកជញ្ជូន កំពុងស្រាវជ្រាវលើករណីគ្រោះថ្នាក់យន្តហោះបុកគ្នានេះ។ នេះបើតាមសេចក្ដីប្រកាសរបស់ស្ថាប័នគ្រប់គ្រងចរាចរណ៍។

«ដោយសារការដោះស្រាយបញ្ហាប្រកបដោយភាពលឿនរហ័ស អ្នកដំណើរ និងអ្នកបើកបរ សុទ្ធតែបានរួចផុតពីការស្លាប់ និងមិនមានបញ្ហារងរបួសធ្ងន់ធ្ងរកើតឡើង។ ករណីគ្រោះថ្នាក់យន្តហោះដែលមិនមានអ្នកស្លាប់គឺជាប្រការដ៏គួរឱ្យភ្ញាក់ផ្អើល។ យើងកំពុងស្វែងយល់ថា តើធ្វើយ៉ាងណា និងមូលហេតុអ្វី បាននាំឱ្យយន្តហោះទាំងនេះប៉ះទង្គិចគ្នាយ៉ាងដូច្នេះ» លោក John Bartmann អធិការរងប៉ូលិសស្រុក Arapahoe បាននិយាយដូច្នេះ។

យន្តហោះ Cirrus ដឹកអ្នកដំណើរពីព្រលានយន្តហោះ Centennial ក្នុងរដ្ឋ Colorado កាលពីព្រឹកថ្ងៃទី12 ខែឧសភា ឆ្ពោះទៅភាគខាងជើង ក្បែរ Fort Collins និងកំពុងធ្វើដំណើរត្រលប់មកកាន់ព្រលានយន្តហោះ Centennial ក៏ស្រាប់តែបុកនឹងយន្តហោះមួយគ្រឿងទៀត។

រីឯយន្តហោះដឹកទំនិញមួយគ្រឿងរបស់ក្រុមហ៊ុនអាកាសចរណ៍ Key Lime ដែលចេញដំណើរពីទីក្រុង Salia មានចម្ងាយទីទីក្រុង Denver ប្រហែល 161គម ទៅទិសខាងត្បូង និងមានគម្រោងចុះចតនៅឯព្រលានយន្តហោះ Centennial។

June Cvelbar ដែលជាអ្នកស្រុកម្នាក់ បានឱ្យដឹងថា នាងបានឃើញយន្តហោះទាំងពីរគ្រឿងខាងលើ ប៉ះគ្នានៅលើអាកាស នៅពេលនាងកំពុងដើរលេងក្នុងឧទ្យានរបស់រដ្ឋ។

ឯកសាររបស់នាយកដ្ឋានអាកាសចរណ៍សហរដ្ឋអាមេរិក បង្ហាញថា យន្តហោះរបស់ក្រុមហ៊ុន Key Lime ធ្លាប់បានជួបគ្រោះថ្នាក់ស្លាប់មនុស្ស ចំនួន3ករណីមកហើយ ក្នុងនោះរួមមាន 1ករណី ធ្លាក់នៅក្នុងឆ្នាំ2016, 1ករណីធ្លាក់ក្នុងឆ្នាំ2001 និង 1ករណីទៀត ធ្លាក់នៅក្នុងឆ្នាំ2000៕

ប្រភព៖ AP
ប្រែសម្រួល៖ បុត្រា

May 15, 2021

យានអវកាសចិន ចុះចតដោយជោគជ័យជាប្រវត្តិសាស្ត្រ លើពិភពព្រះអង្គារ

យានស្រាវជ្រាវ Tianwen-1 របស់ប្រទេសចិន នាថ្ងៃទី15 ខែឧសានេះ បានទទួលជោគជ័យក្នុងការចុះចតលើដីភពអង្គារ ដែលនេះគឺជាប្រវត្តិសាស្ត្រក៏អស្ចារ្យមួយទៀត ក្នុងបេសកកម្មគ្រប់គ្រងអវកាសរបស់ប្រទេសនេះ។

យោងតាមទំព័រ RT (រុស្ស៊ី) យាន Tianwen-1 របស់ទីភ្នាក់ងារអវកាសជាតិចិន (CNSA) ត្រូវបានបាញ់បង្ហោះដោយជោគជ័យ ពីមូលដ្ឋានបាញ់បង្ហោះយានអវកាស Wenchang កាលពីថ្ងៃទី23 ខែកក្កដា ឆ្នាំ2020 និងបានគោចរជុំវិញភពព្រះអង្គារ ចាប់ពីថ្ងៃទី10 ខែកុម្ភៈ ឆ្នាំ2021។ នេះគឺជាបេសកកម្មទីពីររបស់ចិន ក្នុងការឡើងទៅគោចរជុំវិញភពអង្គារ បន្ទាប់ពីបេសកកម្មដំបូងកាលពីឆ្នាំ2021 របស់យានស្រាវជ្រាវ Yinghuo-1។

របាយការណ៍ដែលមិនទាន់ត្រូវបានបញ្ជាក់ និងត្រូវបានដកស្រង់ពីប្រភពព័ត៌មាន CNSA នៅលើបណ្ដាញសង្គម Sina Weibo បានឱ្យដឹងថា នៅថ្ងៃទី15 ខែឧសភា យាន Tianwen បានចុះចតលើដីភពអង្គារដោយជោគជ័យ។

នៅព្រឹកថ្ងៃទី15 ខែឧសភានេះ CNSA ឱ្យដឹងថា៖ «យានស្រាវជ្រាវ Tianwen-1 បានដំណើរការធម្មតា ចាប់ពីពេលត្រូវបានបាញ់បង្ហោះកាលពីថ្ងៃទី23 ខែកក្កដា ឆ្នាំ2020»។

CNSA បញ្ជាក់ថា យាននេះ បានចុះចតលើតំបន់ Utopia ដែលជាតំបន់បាតខ្ទះ ត្រូវបានគេទទួលស្គាល់ថា មានទំហំធំបំផុតនៅលើភពអង្គារ ដោយមានអង្កត់ផ្ចិតប្រមាណ 3,300គីឡូម៉ែត្រ។

យោងតាមទំព័រ The Verge បានឱ្យដឹងថា តាមផែនការ ចិននឹងបញ្ជូនយានរ៉ូបូតមួយគ្រឿង ឱ្យធ្វើការនៅលើដីភពអង្គារ ដែលនេះនឹងជួយឱ្យចិនក្លាយជាប្រទេសទីពីរដែលមានយានចុះចត និងដំណើរការកិច្ចការស្រាវជ្រាវនៅលើភពនេះ បន្ទាប់ពីសហរដ្ឋអាមេរិក (បានហោះហើរ ទៅកាន់ភពអង្គារ 8លើកមកហើយ)។

សូមរំលឹកថា ចិន បានបាញ់បង្ហោះយានអវកាសគ្មានមនុស្សបើក Tianwen-1 ពីកោះ Hainan ភាគខាងត្បូងប្រទេស កាលពីខែកក្កដា ឆ្នាំ2020 ដើម្បីនាំយកយានស្រាវជ្រាវចុះចតលើភពអង្គារ ក្នុងបំណងប្រមូលទិន្នន័យស្ដីពីប្រភពទឹកក្នុងដី និងស្វែងរកសញ្ញាណដែលអាចបញ្ជាក់អំពីជីវិត កាលពីអតីតកាលនៅទីនោះ។

ក្រោយការធ្វើដំណើរជិត 7ខែ យាន Tianwen-1 ក៏បានគោចរជុំវិញភពក្រហមនេះ ចាប់ពីថ្ងៃទី10 ខែកុម្ភៈ ហើយក្រោយមកក៏បានបញ្ជូនរូបភាពយ៉ាងច្បាស់ជាច្រើន មកកាន់ផែនដី៕

ប្រភព៖ AFP, RT
ប្រែសម្រួល៖ បុត្រា

May 15, 2021

បាតុករប៉ាលេស្ទីន 4នាក់បានស្លាប់ ខណៈ អ៊ីស្រាអែល រងគ្រាប់រ៉ុក្កែតជាបន្តបន្ទាប់ ពីកងជីវពលហាម៉ាស

បាតុករជនជាតិប៉ាលេស្ទីន យ៉ាងតិចចំនួន 4នាក់ ត្រូវបានទាហានអ៊ីស្រាអែល បាញ់សម្លាប់នាថ្ងៃនេះ ខណៈដែលការប៉ះទង្គិចជាច្រើនផ្សេងទៀត បានបណ្ដាលឱ្យមានអ្នករងរបួសចំនួន 150នាក់។

កងកម្លាំងការពារជាតិអ៊ីស្រាអែល (IDF) បានឱ្យដឹងថា ខ្លួនបានបាញ់ប្រហារទៅលើ «មេដឹកនាំសំខាន់» នៅក្នុងបាតុកម្មហិង្សាមួយនាថ្ងៃទី14 ខែឧសភា នៅ Yaabad ដែលជាភូមិមួយស្ថិតនៅក្បែរទីក្រុង Jenin ភាគខាងជើងតំបន់ West Bank។

ក្នុងថ្ងៃដដែល IDF ក៏បានប្រកាសថា ខ្លួន «បានរារាំង» ជនម្នាក់ ដែលព្យាយាមចាក់សម្លាប់ទាហានម្នាក់របស់អ៊ីស្រាអែល នៅបន្ទាយមួយក្នុងតំបន់ Ofra ភាគខាងជើងទីក្រុង Ramallah។

ចំណែកក្រសួងសុខាភិបាលប៉ាលេស្ទីនវិញ បានឱ្យដឹងថា បុរសពីរនាក់ ត្រូវបានទាហានអ៊ីស្រាអែល បាញ់សម្លាប់ នៅក្បែរទីក្រុង Jennin ខណៈពីរនាក់ទៀតរងរបួស នៅពេលក្រុមទាហានអ៊ីស្រាអែល ផ្ទុះអាវុធដើម្បីទប់ទល់នឹងបាតុករហិង្សា នៅភាគខាងជើងតំបន់ West Bank ហើយក្រោយមកក៏បានបាត់បង់ជីវិត។

រថយន្តកំពុងឆាប់ឆេះ បន្ទាប់ពីត្រូវគ្រាប់រ៉ុក្កែត របស់កងជីវពលហាម៉ាស នៃប្រទេសប៉ាលេស្ទីន

ការប៉ះទង្គិចគ្នាដូចខាងលើ បាន និងកំពុងកើតឡើងជារៀងរាល់ថ្ងៃ ចាប់ពីថ្ងៃទី10 ខែឧសភា ខណៈដែលការវាយប្រហារនៅតំបន់ហ្គាហ្សា កាន់តែធ្ងន់ធ្ងរឡើងៗ ដោយមានការបាញ់រ៉ុក្កែតទៅលើទឹកដីអ៊ីស្រាអែល ពីសំណាក់ក្រុម ហាម៉ាស និងការវាយប្រហារសងសឹកតាមផ្លូវអាកាសពីសំណាក់កងទ័ពអ៊ីស្រាអែល។

ស្ថាប័នសុខាភិបាលនៅតំបន់ហ្គាហ្សា បានប្រកាសថា ជនជាតិប៉ាលេស្ទីន 109នាក់ បានស្លាប់ ក្នុងនោះមានទាំងកុមារចំនួន 28នាក់ និងស្ត្រីចំនួន 15នាក់ ខណៈដែលមនុស្សចំនួន 621នាក់ផ្សេងទៀត បានរងរបួស បន្ទាប់ពីអ៊ីស្រាអែល បានវាយប្រហារតាមអាកាស និងកាំភ្លើងត្បាល់ តម្រង់គោលដៅជាង 600 ក្នុងតំបន់នេះ។ ក្រុមហាម៉ាស និងក្រុមមួយចំនួនដែលស្ថិតក្នុងចលនាអ៊ីស្លាម Jihad បានបញ្ជាក់ថា ទាហានចំនួន 20នាក់របស់ពួកគេបានស្លាប់ ប៉ុន្តែ អ៊ីស្រាអែលថា មានច្រើនជាងនេះ។

IDF បានឱ្យដឹងថា កងជីវពលហាម៉ាស របស់ប្រទេសប៉ាលេស្ទីន បានបាញ់រ៉ុក្កែតជាង 1,800គ្រាប់ ចូលទឹកដីអ៊ីស្រាអែល រាប់ចាប់ពីដើមសប្ដាហ៍នេះ។ ប្រព័ន្ធខែលការពារដែនអាកាស Iron Dome របស់អ៊ីស្រាអែល បានបាញ់កម្ទេចរ៉ុក្កែតភាគច្រើនរបស់ក្រុមនេះ ប៉ុន្តែ នៅតែមានច្រើនគ្រាប់បានទម្លុះប្រព័ន្ធនេះ បណ្ដាលឱ្យជនជាតិអ៊ីស្រាអែល យ៉ាងតិច 7នាក់បានបាត់បង់ជីវិត។

មូលហេតុនៃការប៉ះទង្គិចនេះ កើតឡើង បន្ទាប់ពី អ៊ីស្រាអែល កាត់បន្ថយការចូលទៅកាន់តំបន់ទីក្រុងបុរាណ យេរូសាឡឹម ក្នុងរដូវបុណ្យ Ramadan និងគំរាមបណ្ដេញជនជាតិប៉ាលេស្ទីនចំនួន 4គ្រួសារ ដែលកំពុងរស់នៅភាគខាងត្បូងនៃតំបន់ យេរូសាឡឹម ដើម្បីទុកកន្លែងឱ្យជនជាតិជ្វីហ្វ។

បញ្ហាខាងលើ បាននាំឱ្យប្រជាជនប៉ាលេស្ទីន ធ្វើបាតុកម្មប្រឆាំងតវ៉ា ហើយក៏មានការប៉ះទង្គិចជាមួយប៉ូលិសអ៊ីស្រាអែល អស់ជាច្រើនថ្ងៃ នៅខាងក្រៅវិហារ Al-Aqsa នៅតំបន់ យេរូសាឡឹមខាងត្បូង ដែលជាកន្លែងពិសិដ្ឋរបស់សាសនិកអ៊ីស្លាម បណ្ដាលឱ្យមនុស្សរាប់រយនាក់ត្រូវរងរបួស។ តុលាការ អ៊ីស្រាអែល បានផ្អាកការជំនុំជម្រះលើការបណ្ដេញចេញខាងលើ ប៉ុន្តែ នៅតែមិនអាចកាត់បន្ថយភាពតានតឹងបាន៕

ប្រភព៖ AFP
ប្រែសម្រួល៖ បុត្រា

May 14, 2021

(វីដេអូ)-គ្រាប់រ៉ុក្កែតរបស់អ៊ីស្រាអែល កម្ទេចអគារកម្ពស់14ជាន់ នៅតំបន់ហ្គាហ្សា៖ អ៊ីស្រាអែល ថា ជាទីស្នាក់ការរបស់អង្គភាពស៊ើបការណ៍សម្ងាត់នៃក្រុម ហាម៉ាស

យន្តហោះចម្បាំងរបស់អ៊ីស្រាអែល បានបាញ់រ៉ុក្កែតជាច្រើនគ្រាប់ ធ្វើឱ្យអគារមួយកន្លែង មានកម្ពស់ 14ជាន់ ដែលត្រូវបានគេជឿថាជា ទីស្នាក់ការរបស់ទូរទស្សន៍ផ្កាយរណប Al-Aqsa របស់កងជីវពល ហាម៉ាស ត្រូវដួលរាបដល់ដី។

កាលពីថ្ងៃទី12 ខែឧសភា អ៊ីស្រាអែល បានវាយប្រហារតាមផ្លូវអាកាស សំដៅលើ Al-Shorouk ជាអគារមួយដែលត្រូវបាន ប៉ាលេស្ទីន និយាយថា មានក្រុមហ៊ុនជាច្រើន រួមទាំងការិយាល័យរបស់ទូរទស្សន៍ផ្កាយរណប Al-Aqsa របស់កងទ័ព ហាម៉ាស។ ប៉ុន្តែ អ៊ីស្រាអែល ជឿថា នេះគឺជាទីស្នាក់ការនៃអង្គភាពស៊ើបការណ៍សម្ងាត់របស់ ហាម៉ាស។ វាស្ថិតក្នុងតំបន់ក្រុងរ៉ូម៉ាំងបុរាណ ជាទីតាំងពាណិជ្ជកម្មធំបំផុតប្រចាំតំបន់ ហ្គាហ្សា។

អ្នករស់នៅក្នុងតំបន់នេះ បានឱ្យដឹងថា មុនការវាយប្រហារ អ៊ីស្រាអែល បានព្រមានដល់មនុស្សទាំងអស់ឱ្យចាកចេញពីអគារ ដោយការទម្លាក់គ្រាប់បែកក្លែងក្លាយមួយគ្រាប់ទៅលើដំបូលអគារ។ ភ្លាមនោះ ប្រជាជនក៏បានអំពាវនាវឱ្យមនុស្សម្នាចាកចេញពីអគារដែលជិតនឹងត្រូវបានកម្ទេច។

បន្ទាប់មក យន្តហោះចម្បាំង F-16 របស់អ៊ីស្រាអែល បានបាញ់រ៉ុក្កែត សរុប 9គ្រាប់ តម្រង់គោលដៅ បណ្ដាលឱ្យអគារត្រូវរបេះធ្លាក់ម្ដងមួយផ្ទាំងៗ ហើយរ៉ុក្កែងពីរគ្រាប់ចុងក្រោយ ក៏បានកម្ទេចអគារ Al-Shorouk នេះ ឱ្យរាបដល់ដីទាំងស្រុង។ នេះគឺជាអគារខ្ពស់ទីបីនៅតំបន់ ហ្គាហ្សា ដែលត្រូវបានយន្តហោះចម្បាំងរបស់់អ៊ីស្រាអែលវាយប្រហារ ក្នុងរយៈពេលប៉ុន្មានថ្ងៃចុងក្រោយនេះ។

https://www.youtube.com/watch?v=agf2sIy2uh4

ភាគីខាង ហាម៉ាស បានឱ្យដឹងថា ខ្លួនបានបាញ់រ៉ុក្កែត 130គ្រាប់ សំដៅប្រទេសអ៊ីស្រាអែល ដើម្បីជាការសងសឹកនឹងការវាយប្រហារលើអគារ Al-Shorouk នេះ។

ក្នុងរយៈពេលប៉ុន្មានថ្ងៃកន្លងទៅ គ្រាប់រ៉ុក្កែត របស់ក្រុម ហាម៉ាស បានសម្លាប់ជនជាតិអ៊ីស្រាអែលចំនួន 7នាក់ ក្នុងនោះមានកុមារអាយុ 6ឆ្នាំម្នាក់ និងទាហានម្នាក់ផងដែរ។

ក្រសួងសុខាភិបាលប៉ាលេស្ទីន ឱ្យដឹងថា ពលរដ្ឋប្រទេសនេះចំនួន 53នាក់បានស្លាប់ ក្នុងនោះមានកុមារចំនួន 14នាក់ផងដែរ ខណៈដែល 320នាក់ផ្សេងទៀត បានរងរបួស នៅក្នុងការវាយប្រហារពីសំណាក់យន្តហោះចម្បាំងរបស់អ៊ីស្រាអែល នៅតំបន់ហ្គាហ្សា នាសប្ដាហ៍នេះ។

មូលហេតុនៃការប៉ះទង្គិចនេះ កើតឡើង បន្ទាប់ពី អ៊ីស្រាអែល កាត់បន្ថយការចូលទៅកាន់តំបន់ទីក្រុងបុរាណ យេរូសាឡឹម ក្នុងរដូវបុណ្យ Ramadan និងគំរាមបណ្ដេញជនជាតិប៉ាលេស្ទីនចំនួន 4គ្រួសារ ដែលកំពុងរស់នៅភាគខាងត្បូងនៃតំបន់ យេរូសាឡឹម ដើម្បីទុកកន្លែងឱ្យជនជាតិជ្វីហ្វ។

បញ្ហាខាងលើ បាននាំឱ្យប្រជាជនប៉ាលេស្ទីន ធ្វើបាតុកម្មប្រឆាំងតវ៉ា ហើយក៏មានការប៉ះទង្គិចជាមួយប៉ូលិសអ៊ីស្រាអែល អស់ជាច្រើនថ្ងៃ នៅខាងក្រៅវិហារ Al-Aqsa នៅតំបន់ យេរូសាឡឹមខាងត្បូង ដែលជាកន្លែងពិសិដ្ឋរបស់សាសនិកអ៊ីស្លាម បណ្ដាលឱ្យមនុស្សរាប់រយនាក់ត្រូវរងរបួស។ តុលាការ អ៊ីស្រាអែល បានផ្អាកការជំនុំជម្រះលើការបណ្ដេញចេញខាងលើ ប៉ុន្តែ នៅតែមិនអាចកាត់បន្ថយភាពតានតឹងបាន៕

ប្រភព៖ Al Jazeera, AP
ប្រែសម្រួល៖ បុត្រា

May 13, 2021

Category: អន្តរជាតិ