អន្តរជាតិ - La Reine Media

“ប្លន់យន្តហោះរបស់កងទ័ពប៉ូឡូញ លើដែនអាកាសអឺរ៉ុប”! ការប្រកាសអាសន្ននេះ ធ្វើឱ្យអ្នកតាមដានព័ត៌មាន ច្របូកច្របល់!

សារព័ត៌មានអង់គ្លេស បានរាយការណ៍ថា ថ្ងៃទី20 ខែឧសភានេះ មានករណីប្លន់យន្តហោះរបស់កងទ័ពអាកាសនៃប្រទេសប៉ូឡូញ ខណៈដែលយន្តហោះនេះកំពុងស្ថិតនៅក្នុងដែនអាកាសអឺរ៉ុប។

យោងតាមទំព័រ Daily Express យន្តហោះមួយគ្រឿងរបស់ទ័ពអាកាសនៃប្រទេសប៉ូឡូញ ត្រូវបានចោរប្លន់ និងកំពុងហោះក្នុងដែនអាកាសអឺរ៉ុប ឆ្ពោះទៅកាន់មហាសមុទ្រអាត្លង់ទិក។

សារព័ត៌មាន News24 របស់បារាំង ឱ្យដឹងថា ក្រុមចោរប្លន់ បានគ្រប់គ្រងយន្តហោះនេះទាំងស្រុង និងកំពុងបញ្ជាឱ្យហោះទៅកាន់មហាសមុទ្រអាត្លង់ទិក។ ចំណែកប្រភពព័ត៌មានមួយចំនួនផ្សេងទៀត បញ្ជាក់ថា ករណីប្លន់នេះគឺជាផ្នែកមួយនៃសមយុទ្ធរបស់កងទ័ព។

កងទ័ពប៉ូឡូញ បានឱ្យដឹងថា សមយុទ្ធដែលមានឈ្មោះថា “tactical-special exercise renegade/Sarex-21” នេះ គឺដើម្បីប្រឆាំងនឹងការគំរាមពីអំពើភេរវកម្មនៅលើអាកាស និងសមុទ្រ។

កងទ័ពប៉ូឡូញ បានសរសេរនៅលើគេហទំព័ររបស់ខ្លួនថា៖ «សមយុទ្ធនេះ មាន 4វគ្គ ក្នុងនោះ វគ្គដំបូងគឺទាក់ទិននឹង «ករណីប្លន់យន្តហោះស៊ីវិលមួយគ្រឿង ដើម្បីជាមធ្យោបាយសម្រាប់ការវាយប្រហារភេរវកម្ម ដែលអាចគំរាមកំហែងដល់សន្តិសុខជាតិ»។ វគ្គពីរ «ទាក់ទិននឹងករណីបុកគ្នារវាងកប៉ាល់នៅលើសមុទ្រ ដែលមានការឆាបឆេះ និងលិច រួមនឹងបេសកកម្មជួយសង្គ្រោះ»។ វគ្គបន្ទាន់ចំនួនពីរទៀត នោះគឺ «ទាក់ទិននឹងការស្វែងរក និងសង្គ្រោះ បន្ទាប់ពីករណីគ្រោះថ្នាក់ធ្លាក់យន្តហោះ នៅតំបន់ពិបាកស្វែងរក»។

ខាងកងទ័ពនៃប្រទេសប៉ូឡូញ បានបញ្ជាក់ថា សមយុទ្ធខាងលើនេះ កំពុងត្រូវបានធ្វើឡើងនៅលើដែនអាកាសរបស់ប្រទេសប៉ូឡូញ៕

ប្រភព៖ Express
ប្រែសម្រួល៖ បុត្រា

May 20, 2021

មន្ត្រីនយោបាយរបស់ ហាម៉ាស ព្យាករថា ហ្គាហ្សា នឹងឈប់បាញ់ ឆាប់ៗនេះ

មន្ត្រីជាន់ខ្ពស់មួយរូបរបស់កងជីវពលអ៊ីស្លាម ហាម៉ាស នៃចលនាប៉ាលេស្ទីន បានព្យាករថា ប៉ុន្មានថ្ងៃខាងមុខនេះនឹងមានការឈប់បាញ់ ខណៈដែលសង្គ្រាមរវាង អ៊ីស្រាអែល និង ប៉ាលេស្ទីន នៅតំបន់ ហ្គាហ្សា ឈានដល់ថ្ងៃទី11។

«ខ្ញុំយល់ថា ការខិតខំដើម្បីឈានដល់ការបង្កើតបទឈប់បាញ់នឹងទទួលបានជោគជ័យ» Moussa Abu Marzouk អ្នកនយោបាយមួយរបស់ក្រុម ហាម៉ាស បានប្រាប់ទូរទស្សន៍ al-Mayadeen របស់ លីបង់ នាថ្ងៃទី20 ខែឧសភានេះ។ «ខ្ញុំសង្ឈឹមថា នឹងសម្រេចបាននូវបទបញ្ជាឈប់បាញ់ នៅមួយ ឬពីរថ្ងៃទៀត ដោយយោងទៅលើការឯកភាពរបស់ភាគីទាំងសងខាង»។

ប្រធានាធិបតីអាមេរិក លោក Joe Biden កាលពីថ្ងៃទី19 ឧសភា បានអំពាវនាវឱ្យនាយករដ្ឋមន្ត្រី អ៊ីស្រាអែល Benjamin Netanyahu រកវិធីដើម្បីបន្ថយភាពតានតឹង សំដៅឈានដល់ការឈប់បាញ់។ ប្រភពព័ត៌មានសន្តិសុខពីប្រទេស អេហ្ស៊ីប បានឱ្យដឹងថា ភាគីទាំងពីរ ជាមូលដ្ឋាន គឺបានយល់ស្របថា នឹងមានការឈប់បាញ់ ដោយសារតែមានជំនួយពីអន្តរការី ប៉ុន្តែ កំពុងចរចាលម្អិតនៅឡើយ។

ទូរទស្សន៍ Al Jazeera ដែលមានទីស្នាក់ការនៅប្រទេសកាតា បានរាយការណ៍ថា Tor Wennesland ប្រេសិតពិសេសរបស់អង្គការសហប្រជាជាតិ ទទួលបន្ទុកលើបញ្ហាសន្តិភាពនៅមជ្ឈិមបូព៌ា កំពុងជួបពិភាក្សាជាមួយនឹងមេដឹកនាំ Ismail Haniyeh របស់ក្រុម ហាម៉ាស នៅប្រទេសកាតា។

ក៏ប៉ុន្តែ ក្ដីសង្ឃឹមដែលថា នឹងឈានដល់កិច្ចព្រមព្រៀងឈប់បាញ់ កំពុងតែជួបឧបសគ្គធំ នៅពេលដែលការប្រយុទ្ធគ្នារវាង អ៊ីស្រាអែល និងក្រុម ហាម៉ាស នៅតែបន្តកើតមាន។ អ៊ីស្រាអែល បានវាយប្រហារតាមផ្លូវអាកាសជាង 10លើក ទៅលើតំបន់ ហ្គាហ្សា កាលពីរំលងអធ្រាត្រ ខណៈ ក្រុម ហាម៉ាស ឱ្យដឹងថា មានមនុស្ស 4នាក់ បានរងរបួសក្នុងការវាយប្រហាររបស់ អ៊ីស្រាអែល នៅទីរួមស្រុក Khan Younis ភាគខាងត្បូង ហ្គាហ្សា។

វេលាទៀបភ្លឺ នៃថ្ងៃទី20 ខែឧសភា សំឡេងស៊ីរ៉ែនប្រកាសអាសន្នដែលជាសញ្ញាណប្រាប់ថា រ៉ុក្កែត កំពុងហោះចូលទឹកដី បានបន្លឺឡើងពាសពេញទីរួមស្រុក Beersheba នៅភាគខាងត្បូងនៃប្រទេស អ៊ីស្រាអែល និងតំបន់ជាប់ព្រំដែនជាមួយ ហ្គាហ្សា។ ប៉ុន្តែ មិនទាន់មានរបាយការណ៍អំពីករណីស្លាប់ ឬរបួស និងការខូចខាតនៅឡើយ។

ចាប់ពីមានការវាយប្រយុទ្ធគ្នាតាំងពីថ្ងៃទី10 ខែឧសភា ក្រុមមន្ត្រីសុខាភិបាល ប៉ាលេស្ទីន ឱ្យដឹងថា មនុស្សយ៉ាងតិច 228នាក់បានស្លាប់ នៅក្នុងការវាយប្រហារពី អ៊ីស្រាអែល។ ចំណែក អ៊ីស្រាអែល ក៏បានឱ្យដឹងថា ពលរដ្ឋរបស់ខ្លួនចំនួន 12នាក់បានស្លាប់ នៅក្នុងការវាយប្រហារពីរ៉ុក្កែត របស់កងជីវពល ហាម៉ាស។

សូមរំលឹកថា ក្រុម ហាម៉ាស បានបាញ់រ៉ុក្កែតទៅលើទឹកដីអ៊ីស្រាអែល កាលពីថ្ងៃទី10 ខែឧសភា ដើម្បីសងនឹងសកម្មភាពដែលពួកគេហៅថាជា ទង្វើរំលោភសិទ្ធិមនុស្សរបស់ អ៊ីស្រាអែល ទៅលើជនជាតិប៉ាលេស្ទីន ដែលកំពុងរស់នៅក្នុងតំបន់ យេរូសាឡឹម នៅក្នុងរដូវបុណ្យ Ramadan របស់សាសនិកអ៊ីស្លាម និងការព្រមានអំពីការបណ្ដេញចេញជនជាតិ ប៉ាលេស្ទីន ពីតំបន់ យេរូសាឡឹមខាងកើត។

ភាពតានតឹងរវាងគូភាគីនេះ ក៏បានរួមចំណែកបង្កើតឱ្យមានអំពើហិង្សារវាងជនជាតិជ្វីហ្វ និងជនជាតិអារ៉ាប់ នៅក្នុងប្រទេសអ៊ីស្រាអែល។ ការប្រយុទ្ធគ្នាក៏បានរាលដាលដល់ព្រំដែនអ៊ីស្រាអែល-លីបង់ បណ្ដាលឱ្យមានអំពើហិង្សានៅតំបន់ West Bank ដែលត្រូវអ៊ីស្រាអែលកាន់កាប់។

ភាគីអ៊ីស្រាអែល ឱ្យដឹងថា កាលពីថ្ងៃទី19 ខែឧសភា រ៉ុក្កែតចំនួន 4គ្រាប់ ត្រូវបានបាញ់ចេញពីប្រទេសលីបង់ ចូលទឹកដីរបស់អ៊ីស្រាអែល ជាលើកទីបី រាប់ចាប់ពីមានការប្រយុទ្ធគ្នានៅ ហ្គាហ្សា។ អ៊ីស្រាអែល ក៏បានឆ្លើយតបដោយគ្រាប់កាំភ្លើងធំ៕

ប្រភព៖ Reuters
ប្រែសម្រួល៖ បុត្រា

May 20, 2021

(វីដេអូ)-ពលរដ្ឋចំណាកស្រុក ម៉ារ៉ុក រាប់ពាន់នាក់ ហែលឆ្លងសមុទ្រពេលយប់ ដើម្បីបានចូលប្រទេសអេស្ប៉ាញ

នៅចំពោះមុខស្ថានភាពឆ្លងដែនខុសច្បាប់នេះ រដ្ឋាភិបាលនៃប្រទេសអេស្ប៉ាញ ត្រូវបញ្ជូនទាហាន និងប៉ូលិស ទៅកាន់តំបន់ Ceuta នៅឆ្នេរសមុទ្រភាគខាងជើងទ្វីបអាហ្វ្រិក ដើម្បីដោះស្រាយ និងទប់ស្កាត់បញ្ហា។

យោងតាមគេហទំព័រ news.sky.com កងទ័ពអេស្ប៉ាញ បាន និងកំពុងធ្វើសកម្មភាព ដើម្បីទប់ស្កាត់ការហូរចូលនៃជនចំណាកស្រុកបរទេស ខណៈដែលមនុស្សរាប់ពាន់នាក់ ក្នុងនោះមានទាំងក្មេងៗផងដែរ បានហែលឆ្លងសមុទ្រ ចូលទឹកដី Ceuta។ ទីក្រុងស្វយ័ត Ceuta នៃប្រទេសអេស្ប៉ាញ ដែលមានប្រជាជនជាង 80,000នាក់ ស្ថិតនៅតំបន់មជ្ឈិមបូព៌ា និងមានព្រំដែនគោកជាប់នឹងប្រទេសម៉ារ៉ុក។ Ceuta តែងតែជាទីតាំងដែលក្រុមអ្នកចំណាកស្រុកមកពីអាហ្វ្រិក ជ្រើសរើស ដើម្បីចូលទៅកាន់តំបន់អឺរ៉ុប ដោយសារតែការគ្រប់គ្រងព្រំដែននៅធូររលុង។

គិតចាប់ពីវេលាទៀបភ្លឺ នៃថ្ងៃទី17 ខែឧសភា រហូតដល់ព្រឹកថ្ងៃទី18 ខែឧសភា ជនចំណាកស្រុកប្រមាណ 6,000នាក់ ក្នុងនោះមានក្មេងៗចំនួន 1,500នាក់ បានហែលឆ្លងសមុទ្រ មកកាន់តំបន់ Ceuta នេះ។ ក្នុងចំណោមនោះ ក៏មានម្នាក់បានលង់ទឹកស្លាប់ នៅពេលហែលលើសមុទ្រ។

ពលរដ្ឋចំណាកស្រុក ម៉ារ៉ុក ទាំងនេះ សុទ្ធតែទទឹកជោក បន្ទាប់ពីហែល ឬប្រើប្រាស់ទូកកៅស៊ូ ឆ្លងកាត់សមុទ្រ ចូលទឹកដីរបស់ អេស្ប៉ាញ។ ក្នុងថ្ងៃទី18 ខែឧសភា ជនចំណាកស្រុក នៅតែមកកាន់តំបន់នេះ Ceuta ប៉ុន្តែមានចំនួនតិចជាងថ្ងៃទី17 ដោយសារ អេស្ប៉ាញ បានបន្ថែមកម្លាំងយោធា និងប៉ូលិស ដើម្បីគ្រប់គ្រងស្ថានការណ៍។

កងកម្លាំងប្រដាប់អាវុធ ត្រូវបានដាក់ពង្រាយនៅឆ្នេរសមុទ្រ និងបានចាប់ខ្លួនមនុស្សមួយចំនួនដែលព្យាយាមឆ្លងដែនដោយខុសច្បាប់។ មនុស្សពេញវ័យ ត្រូវបាននាំទៅកាន់ទីលានបាល់ទាត់មួយកន្លែង រួចបញ្ជូនទៅកាន់ប្រទេស ម៉ារ៉ុក។ ចំណែកកូនក្មេងវិញ ត្រូវបានបញ្ជូនទៅកាន់អគារមួយនៅក្នុងតំបន់។

គិតមកដល់ថ្ងៃត្រង់នៃថ្ងៃទី18 ខែឧសភា ពលរដ្ឋចំណាកស្រុកប្រមាណ 2,700នាក់ ត្រូវបានបញ្ជូនត្រលប់ទៅកាន់ប្រទេស ម៉ារ៉ុក។

នាយករដ្ឋមន្ត្រីអេស្ប៉ាញ Pedro Sanchez បានឱ្យដឹងថា ជនណាដែលចូលតំបន់ Ceuta ដោយខុសច្បាប់ នឹងត្រូវបណ្ដេញត្រលប់ទៅវិញ។ លោកនិយាយថា ការកើនឡើងយ៉ាងឆាប់រហ័សនៃចំនួនជនចំណាកស្រុក គឺជា វិបត្តិធ្ងន់ធ្ងរសម្រាប់ អេស្ប៉ាញ ក៏ដូចជាតំបន់អឺរ៉ុបទាំងមូល៕

ប្រភព៖ Reuters
ប្រែសម្រួល៖ បុត្រា

May 19, 2021

(វីដេអូ)-អគារកម្ពស់ 355ម៉ែត្រ នៅប្រទេសចិន រង្គើញាប់ញ័រ បើទោះមិនមានការរញ្ជួយដី និងមូលហេតុដែលអាចកើតមាន

អ្នកថ្មើរជើងនៅតាមដងផ្លូវក្នុងទីក្រុង Shenzhen ប្រទេសចិន នាំគ្នារត់រកកន្លែងសុវត្ថិភាព នៅពេលអគារកម្ពស់ 355ម៉ែត្រ កំពុងញាប់ញ័រ បើទោះបីជាមិនមានហេតុការណ៍រញ្ជួយដីក៏ដោយ។

អគារ SEG Plaza ដែលជានិមិត្តរូបរបស់ទីក្រុង Shenzhen នៃខេត្ត Guangdong បានចាប់ផ្ដើមញាប់ញ័រនៅវេលាម៉ោងប្រហែល 13 ថ្ងៃ18 ខែឧសភា (ម៉ោងនៅកម្ពុជា) បណ្ដាលឱ្យមនុស្សរាប់ពាន់នាក់ ត្រូវជម្លៀសខ្លួនចេញទៅរកកន្លែងសុវត្ថិភាព។

ទាក់ទិននឹងបញ្ហានេះ វិស្វករ Lu Jianxin យល់ថា ឥទ្ធិពលរ៉េសូណង់ (resonance effect) ទំនងជាបានបណ្ដាលឱ្យអគារ SEG Plaza នៅទីក្រុង Shenzhen ត្រូវរង្គើញាប់ញ័រ ទោះជាមិនមានករណីរញ្ជួយដី។

«បើសិនជាមិនមានការរញ្ជួយដី ការញាប់ញ័ររបស់អគារ SEG Plaza គឺមិនមែនជាបញ្ហាធម្មតានោះទេ។ យោងតាមការវាយតម្លៃលើព័ត៌មានបច្ចុប្បន្ន នេះអាចជាការចៃដន្យនៃប្រេកង់ ពោលគឺ ឥទ្ធិពលរបស់រ៉េសូណង់» នេះបើតាមការយល់ឃើញរបស់ Lu Jianxin ប្រធានវិស្វករនៃក្រុមហ៊ុនវិទ្យាសាស្ត្រ និងបច្ចេកវិទ្យាសំណង់របស់ចិន។

អង្គភាពគ្រប់គ្រងស្ថានការណ៍អាសន្ននៃទីក្រុង Shenzhen ឱ្យដឹងថា ពុំមានការរញ្ជួយដីកើតឡើងនៅក្នុងទីក្រុងនេះ ក្នុងគ្រាដែលមានបាតុភូតខាងលើនោះទេ។ ចំណែកកម្លាំងខ្យល់វិញ ក៏ត្រូវបានរាយការណ៍ថា មានល្បឿនប្រហែល 27គម/ម៉ោង ដែលនេះមិនអាចធ្វើឱ្យអគារខ្ពស់ៗ ត្រូវញាប់ញ័រឡើយ។

វិស្វករ Lu Jianxin បន្ថែមថា គេត្រូវធ្វើការស៊ើបអង្កេតជាផ្លូវការ ទើបអាចរកឃើញមូលហេតុនៃបាតុភូតនេះ។ រីឯក្រុមអ្នកជំនាញវិញ បានឱ្យដឹងថា កម្រនឹងមានបញ្ហាអគារញាប់ញ័ររហូតដល់អាចឱ្យគេដឹងបានយ៉ាងដូច្នេះ។

Chen Wei អ្នកផ្គត់ផ្គង់ផ្នែករឹង (hardware) ដែលធ្វើការនៅ SEG Plaza ប្រាប់ថា គាត់មិនបានដឹងអំពីបញ្ហាអគារញាប់ញ័រនេះ ប៉ុន្តែ ត្រូវបានគេស្នើឱ្យចាកចេញពីអគារ ដើម្បីសុវត្ថិភាព។ ក៏ប៉ុន្តែ «មិត្តម្នាក់របស់ខ្ញុំដែលស្ថិតនៅក្នុងអគារ បានឃើញដបទឹកញាប់ញ័រ»។

SEG Plaza ដែលជាទីស្នាក់ការធំរបស់ក្រុមហ៊ុនអេឡិចត្រូនិក Shenzhen (SEG) មានកម្ពស់ 355ម៉ែត្រ និងមាន 79ជាន់ ត្រូវបានសាងសង់រួចរាល់កាលពីឆ្នាំ2020។ នៅក្នុងបញ្ជីចំណាត់ថ្នាក់ស្ដីពីកម្ពស់នៃអគារនៅទូទាំងពិភពលោក របស់ skyscrapercenter.com អគារ SEG Plaza ខ្ពស់ជាងគេលំដាប់ទី104 នៅប្រទេសចិន និងលំដាប់ទី212 នៅលើពិភពលោក។

«បាតុភូតញាប់ញ័រនេះ កំពុងត្រូវបានស្រាវជ្រាវដោយស្ថាប័នរដ្ឋមួយចំនួន ដើម្បីស្វែងរកមូលហេតុឱ្យបានច្បាស់លាស់» នេះបើតាមអង្គភាពគ្រប់គ្រងស្ថានការណ៍អាសន្ន៕

ប្រភព៖ SCMP
ប្រែសម្រួល៖ បុត្រា

May 19, 2021

ក្រុមអ្នកវិទ្យាសាស្ត្រ រកឃើញ “វិធីកម្ចាត់វីរុសCOVID-19” ក្នុងសួត បានរហូតដល់ 99.9%

ក្រុមអ្នកវិទ្យាសាស្ត្ររបស់អូស្ត្រាលី និងសហរដ្ឋអាមេរិក អភិវឌ្ឍវិធីសាស្ត្រថ្មី ប្រឆាំងនឹងវីរុស ដែលជួយកម្ចាត់ Covid-19 នៅក្នុងសត្វកណ្ដុរ បានរហូតដល់ 99.9% ដែលនេះជាការបើកផ្លូវសម្រាប់ការព្យាបាលជំងឺCovid-19 នៅលើមនុស្ស ប្រកបដោយប្រសិទ្ធភាព។

ក្រុមអ្នកវិទ្យាសាស្ត្រនៃវិទ្យាស្ថានសុខាភិបាល Menzies ក្នុងរដ្ឋ Queensland នៃប្រទេសអូស្ត្រាលី និងវិទ្យាស្ថានស្រាវជ្រាវ City of Hope របស់សហរដ្ឋអាមេរិក បានសហការគ្នា ស្រាវជ្រាវ និងអភិវឌ្ឍវិធីសាស្ត្រព្យាបាលនេះ ចាប់ពីខែមេសា ឆ្នាំ2020។

Nigel McMillan សាស្ត្រាចារ្យប្រចាំសាកលវិទ្យាល័យ Griffith របស់អូស្ត្រាលី និងជាប្រធានក្រុមស្រាវជ្រាវ បានហៅវិធីសាស្ត្រដែលពួកគេកំពុងអភិវឌ្ឍនេះថាជា «ភារកិច្ចស្វែងរក និងកម្ចាត់» ពោលគឺ វាយប្រហារផ្ទាល់ទៅលើ Covid-19។ នេះបើតាមសារព័ត៌មានអូស្ត្រាលី ដែលបានចុះផ្សាយកាលពីដើមសប្ដាហ៍នេះ។

ក្រុមអ្នកវិទ្យាសាស្ត្រ ប្រើប្រាស់វិធីសាស្ត្រ វីរុស «ជំនាន់បន្ទាប់» ជាមួយនឹងបច្ចេកវិទ្យាអសកម្មហ្សែន RNA (Ribonucleic acid) ដើម្បីវាយប្រហារផ្ទាល់ទៅលើប្រព័ន្ធហ្សែនរបស់វីរុស ធ្វើឱ្យពួកវាមិនអាចឆ្លងរាលដាលបាន។ «វាបំផ្លាញប្រព័ន្ធហ្សែន និងធ្វើឱ្យវីរុស មិនអាចរីកចម្រើនបាន» McMillan អធិប្បាយដូច្នេះ និងបន្ថែមថា នេះគឺជាលើកទីមួយហើយ ដែលពួកគេបានអភិវឌ្ឍដោយជោគជ័យនូវគ្រាប់ nano និងបញ្ចូលទៅក្នុងរាងកាយតាមរយៈសរសៃឈាម ដើម្បីឱ្យពួកវា វាយប្រហារវីរុស។

លោក McMillan និយាយថា៖ «ពួកវា (គ្រាប់ nano) ស្វែងរក និងកម្ចាត់វីរុស ដូចទៅនឹងយន្តការនៃមីស៊ីលស្វែងរកកម្ដៅ (heat-seeking missile/Infrared homing)»។

«គ្រាប់ nano ធ្វើដំណើរទៅកាន់សួត ហើយចូលទៅកាន់កោសិកាទាំងអស់របស់សួត ប៉ុន្តែ ពួកវាកម្ចាត់តែវីរុសដែលមាននៅក្នុងកោសិកាប៉ុណ្ណោះ។ ចំណែកកោសិកាដែលធម្មតា (មិនមានវីរុស) នឹងមិនរងផលប៉ះពាល់ពីវិធីព្យាបាលនេះឡើយ» លោក McMillan បញ្ជាក់។

សាស្ត្រាចារ្យ McMillan បន្តថា៖ «បើទោះមិនមែនជាវិធីព្យាបាល ប៉ុន្តែវិធីសាស្ត្រនេះ អាចជួយកម្ចាត់វីរុសក្នុងសួតបានរហូតដល់ 99.9% ឯណោះ។ ដូច្នេះ វាមានប្រសិទ្ធភាពស្ទើរដូចទៅនឹងវិធីព្យាបាល និងសម្រាប់អ្នកជំងឺដែលកំពុងស្ថិតក្នុងបន្ទាប់សង្គ្រោះបន្ទាន់ (ICU) ក្នុងករណីហួសពេលក្នុងការចាក់វ៉ាក់សាំង»។

«នេះពិតជាវិធីសាស្ត្រាដំបូងបង្អស់មួយ ទាក់ទងនឹងការព្យាបាលផ្ទាល់ ដូច្នេះហើយ យើងពិតជាមានការត្រេកអរណាស់» លោកសាស្ត្រាចារ្យថ្លែងដូច្នេះ។

យោងតាមវិធីសាស្ត្រថ្មីនេះ អ្នកជំងឺCovid-19 ដែលកំពុងស្ថិតក្នុងបន្ទាប់ ICU នឹងត្រូវបានចាក់ 1ម្ជុលជារៀងរាល់ថ្ងៃ ក្នុងរង្វង់ពី 4-5ថ្ងៃ ឬតែ 1ម្ជុលគត់ សម្រាប់អ្នកដែលទើបតែឆ្លង Covid-19។ លោក McMillan ឱ្យដឹងថា វិធីសាស្ត្រនេះ អាចបង្ហាញខ្លួនជាផ្លូវការយ៉ាងឆាប់បំផុតត្រឹមឆ្នាំ2023 អាស្រ័យទៅលើលទ្ធផលនៃដំណាក់កាលពិសោធលើមនុស្ស។

«សូមចងចាំថា វីរុសនេះ (Covid-19) នឹងមិនបាត់ទៅណាឡើយ។ យើងនឹងត្រូវរស់នៅជាមួយពួកវា ជារៀងរហូត» នេះបើតាមការបញ្ជាក់បន្ថែមពីសាស្ត្រាចារ្យ McMillan៕

ប្រភព៖ ABC
ប្រែសម្រួល៖ បុត្រា

May 19, 2021

COVID-19 នៅកម្ពុជា និងនៅទូទាំងពិភពលោក គិតត្រឹមព្រឹកថ្ងៃទី18 ខែឧសភា ឆ្នាំ2021

នាព្រឹកនេះ (18 ឧសភា) ក្រសួងសុខាភិបាលកម្ពុជា បានឱ្យដឹងថា អ្នកវិជ្ជមាននឹង Covid-19 នៅកម្ពុជា ចំនួន 345នាក់បន្ថែមទៀត ត្រូវបានរកឃើញនៅក្នុងអំឡុងថ្ងៃទី17 ខែឧសភា ឆ្នាំ2021។

ក្នុងថ្ងៃទី17 ឧសភា កម្ពុជា ក៏មានអ្នកស្លាប់ដោយសារវីរុសCovid-19 ថ្មី ចំនួន 2នាក់ទៀត នាំឱ្យតួលេខអ្នកស្លាប់សរុបកើនដល់ជាង 150នាក់។

គិតមកដល់បច្ចុប្បន្ន កម្ពុជា មានអ្នកឆ្លងវីរុសCovid-19 សរុបចំនួន 22,889នាក់ ក្នុងនោះមានអ្នកស្លាប់សរុប 156នាក់នាក់, ជាសះស្បើយ 14,343នាក់ និងកំពុងព្យាបាល ប្រមាណជាជាង 8,000នាក់។

នៅទូទាំងពិភពលោក បច្ចុប្បន្ន មានអ្នកឆ្លងវីរុសCovid-19 សរុបចំនួន 164,279,345នាក់ ក្នុងនោះមានអ្នកស្លាប់សរុបចំនួន 3,404,457នាក់, ជាសះស្បើយ 143,004,248នាក់ និងកំពុងព្យាបាលចំនួន 17,870,640នាក់៕

ប្រភព៖ ក្រសួងសុខាភិបាល, worldometers
ដកស្រង់៖ បុត្រា

May 18, 2021

ហ្គាហ្សា នឹងគ្មានអគ្គិសនីប្រើប្រាស់ ចាប់ពីចុងសប្ដាហ៍នេះ បន្ទាប់ពីបំពង់បង្ហូរប្រេង ត្រូវ អ៊ីស្រាអែល កម្ទេច!

កងទ័ព អ៊ីស្រាអែល បានបើកការវាយប្រហារយ៉ាងសន្ធាប់ ទៅលើតំបន់ ហ្គាហ្សា និងបានកម្ទេចបណ្ដាញផ្លូវរូងក្រោមដី រួមនឹងផ្ទះរបស់ក្រុមមេបញ្ជាការនៃកងជីវពល ហាម៉ាស បណ្ដាលឱ្យតំបន់នេះ ប្រឈមនឹងបញ្ហាគ្មានអគ្គិសនីប្រើប្រាស់។

កងទ័ព អ៊ីស្រាអែល កាលពីម្សិលមិញ (17 ខែឧសភា) បានប្រកាសថា ខ្លួនបានបាញ់កម្ទេចផ្លូវក្រោមដីប្រវែង 15គីឡូម៉ែត្រ របស់កងជីវពលរបស់ ប៉ាលេស្ទីន រួមទាំងផ្ទះផ្ទាល់ខ្លួនរបស់មេបញ្ជាការជាន់ខ្ពស់ចំនួន 9នាក់ នៃចលនា ហាម៉ាស។ អគារកម្ពស់ 3ជាន់មួយកន្លែងក្នុងទីក្រុង ហ្គាហ្សា ត្រូវរងការខូចខាតធ្ងន់ធ្ងរ ប៉ុន្តែ មិនមានករណីស្លាប់នោះទេ ដោយសារកងទ័ព អ៊ីស្រាអែល បានផ្ដល់ដំណឹង 10នាទី មុនការវាយប្រហាររបស់ខ្លួន ដែលនេះបានជួយឱ្យប្រជាជនចាកចេញទាន់ពេល។

អ៊ីស្រាអែល ថ្មីៗនេះ បានចាប់ផ្ដើមតម្រង់គោលដៅលើផ្ទះផ្ទាល់ខ្លួនរបស់ក្រុមមេដឹកនាំជាន់ខ្ពស់នៃកងជីវពល ហាម៉ាស ក្នុងនោះក៏មានទាំងមេបញ្ជាការនៅតំបន់ ហ្គាហ្សា Yehiyel Sinwar ផងដែរ។ ប៉ុន្តែ ក្រុមមេដឹកនាំទាំងនេះ ទំនងជាបានចាកចេញពីផ្ទះរបស់ពួកគេរួចហើយ នៅមុនការវាយប្រហារដោយយន្តហោះចម្បាំងរបស់ អ៊ីស្រាអែល។

អភិបាលក្រុង ហ្គាហ្សា Yahya Sarraj បានឱ្យដឹងថា ផ្លូវថ្នល់់ និងហេដ្ឋារចនាសម្ព័ន្ធនានាក្នុងតំបន់ ត្រូវរងការខូចខាតធ្ងន់ធ្ងរ។ «ស្ថានភាពនឹងអាក្រក់ជាងនេះ បើសិនជាការប្រយុទ្ធគ្នានៅតែបន្តកើតឡើង»។

អង្គការសហប្រជាជាតិ បានព្រមានថា រោងចក្រអគ្គិសនីតែមួយគត់នៅតំបន់ ហ្គាហ្សា កំពុងប្រឈមនឹងហានិភ័យអស់ឥទ្ធនៈដើម្បីដំណើរការ។ តំបន់នេះ បានស្គាល់បញ្ហាដាច់ភ្លើងទ្រង់ទ្រាយធំ និងអូសបន្លាយចាប់ពី 8-12ម៉ោង ជារៀងរាល់ថ្ងៃ ខណៈដែលប្រភពទឹក មិនអាចឱ្យគេផឹកបាន។ តំណាងក្រុមហ៊ុនផ្គត់ផ្គង់អគ្គិសនីប្រចាំតំបន់ ហ្គាហ្សា និយាយថា ពួកគេអាចដំណើរការបានប្រហែលពី 2-3ថ្ងៃទៀតប៉ុណ្ណោះ ព្រោះតែការវាយប្រហារតាមផ្លូវអាកាស បានបំផ្លាញបំពង់បង្ហូរប្រេង ហើយក្រុមបច្ចេកទេស ក៏មិនអាចទៅកាន់ទីតាំងនោះ ដោយសារការវាយប្រហារពីកងទ័ព អ៊ីស្រាអែល។

នាយករដ្ឋមន្ត្រី អ៊ីស្រាអែល លោក Benjamin Netanyahu ព្រមានថា ការវាយប្រហារនៅតំបន់ ហ្គាហ្សា នឹងត្រូវ «ប្រើពេលយូរ» ព្រោះប្រទេសនេះ ចង់ធ្វើឱ្យកងជីវពល ហាម៉ាស ចុះខ្សោយ។ ចំណែក មេបញ្ជាការក្រុម ហាម៉ាស Ismail Haniyeh ក៏បានប្រកាសថា សហរដ្ឋអាមេរិក រុស្ស៊ី អេហ្ស៊ីប និងកាតា បានទាក់ទងមកកាន់ចលនានេះ ដើម្បីស្នើឱ្យមានការឈប់បាញ់ ប៉ុន្តែ បញ្ជាការរូបនេះ អះអាងថា នឹង «មិនទទួលយកដំណោះស្រាយដែលបោះបង់ចោលការពលីជីវិតរបស់ប្រជាជន ប៉ាលេស្ទីន ជាដាច់ខាង»។

មូលហេតុដែលនាំឱ្យផ្ទុះការប្រយុទ្ធគ្នារវាង អ៊ីស្រាអែល និង ប៉ាលេស្ទីន នេះ បណ្ដាលមកពីភាពតានតឹងក្នុងរដូវបុណ្យ Ramadan របស់សាសនិកអ៊ីស្លាម បន្ទាប់ពី អ៊ីស្រាអែល កាត់បន្ថយការប្រមូលផ្ដុំគ្នានៅតំបន់ក្រុងចាស់ យេរូសាឡឹម និងគំរាមបណ្ដេញគ្រួសារជនជាតិ ប៉ាលេស្ទីន មួយចំនួន ចេញពីតំបន់ យេរូសាឡឹមខាងកើត ដើម្បីទុកកន្លែងសម្រាប់ជនជាតិជ្វីហ្វ។

ភាគីខាង អ៊ីស្រាអែល ឱ្យដឹងថា ក្រុម ហាម៉ាស បានបាញ់រ៉ុក្កែត ជាង 3,100គ្រាប់ ចូលទឹកដីប្រទេសនេះ ក្នុងសប្ដាហ៍កន្លង ដែលនេះគឺជាចំនួនដ៏ច្រើនមិនធ្លាប់មានពីមុនមក៕

ប្រភព៖ AP
ប្រែសម្រួល៖ បុត្រា

May 18, 2021

(វីដេអូ)-អ៊ីស្រាអែល សម្លាប់បានមេបញ្ជាការកងជីវពលរបស់ចលនា ប៉ាលេស្ទីន

កងទ័ព អ៊ីស្រាអែល បានសម្លាប់មេបញ្ជាការជាន់ខ្ពស់របស់កងជីវពលនៃចលនាប៉ាលេស្ទីន ក្នុងការវាយប្រហារតាមផ្លូវអាកាសកាលពីម្សិលមិញ (17 ឧសភា) ខណៈដែលក្រុមសកម្មប្រយុទ្ធអ៊ីស្លាម បន្តបាញ់រ៉ុក្កែតចូលទឹកដី អ៊ីស្រាអែល។

ការសម្លាប់ Hussam Abu Harbeed ដែលមេបញ្ជាការកងកម្លាំងប្រដាប់អាវុធអ៊ីស្លាម Jihad នៅភាគខាងជើងតំបន់ ហ្គាហ្សា ទំនងជាបង្កឱ្យមានប្រតិកម្មខ្លាំងក្លាពីសំណាក់ក្រុមប្រដាប់អាវុធដែលកំពុងប្រកៀកស្មារជាមួយនឹង ហាម៉ាស ជាចលនាអ៊ីស្លាមមួយកំពុងគ្រប់គ្រងតំបន់ឆ្នេរសមុទ្រ។

កងទ័ព អ៊ីស្រាអែល ឱ្យដឹងថា Hussam Abu Harbeed «ជាអ្នកនៅពីក្រោយការវាយប្រហារភេរវកម្មដោយរ៉ុក្កែត សំដៅលើពលរដ្ឋស៊ីវិលរបស់ អ៊ីស្រាអែល» ហើយថា ប្រទេសនេះ អាចបន្តសង្គ្រាម «ជារៀងរហូត»។

ក្រុមសកម្មប្រយុទ្ធនៅតំបន់ ហ្គាហ្សា វិញ ក៏មិនបានបង្ហាញសញ្ញាណណាមួយបញ្ជាក់ថា ការប្រយុទ្ធជិតនឹងបញ្ចប់នោះដែរ។ បន្ទាប់ពីការស្លាប់របស់ Hussam Abu Harbeed ក្រុម Jihad ក៏បានបាញ់រ៉ុក្កែត ទៅលើទីក្រុង Ashdod របស់ប្រទេស អ៊ីស្រាអែល បណ្ដាលឱ្យមនុស្ស 7នាក់ រងរបួស។

ជនជាតិ ប៉ាលេស្ទីន យ៉ាងតិច 7នាក់ បានស្លាប់ ដោយសារការវាយប្រហារដោយយន្តហោះចម្បាំងរបស់ អ៊ីស្រាអែល ទៅលើ ហ្គាហ្សា កាលពីយប់ម្សិលមិញ ក្នុងនោះក៏មាន 2នាក់ បានស្លាប់នៅក្នុងករណីវាយប្រហារដោយរ៉ុក្កែត សំដៅអគារការិយាល័យកម្ពស់ 7ជាន់ នៅទីក្រុង ហ្គាហ្សា។ នេះបើតាមបុគ្គលិកសុខាភិបាល។

ការប្រយុទ្ធគ្នារវាង អ៊ីស្រាអែល និង ប៉ាលេស្ទីន នេះ បណ្ដាលមកពីភាពតានតឹងក្នុងរដូវបុណ្យ Ramadan របស់សាសនិកអ៊ីស្លាម បន្ទាប់ពី អ៊ីស្រាអែល កាត់បន្ថយការប្រមូលផ្ដុំគ្នានៅតំបន់ក្រុងចាស់ យេរូសាឡឹម និងគំរាមបណ្ដេញគ្រួសារជនជាតិ ប៉ាលេស្ទីន មួយចំនួន ចេញពីតំបន់ យេរូសាឡឹមខាងកើត ដើម្បីទុកកន្លែងសម្រាប់ជនជាតិជ្វីហ្វ។

អ៊ីស្រាអែល ឱ្យដឹងថា ក្រុម ហាម៉ាស បានបាញ់រ៉ុក្កែត ជាង 3,100គ្រាប់ ចូលទឹកដីប្រទេសនេះ ក្នុងសប្ដាហ៍កន្លង ដែលនេះគឺជាចំនួនដ៏ច្រើនមិនធ្លាប់មានពីមុនមក៕

ប្រភព៖ Reuters
ប្រែសម្រួល៖ បុត្រា

May 18, 2021

អ៊ីស្រាអែល «ទាត់ចោល» គំនិតស្ដីពីបទឈប់បាញ់ជាមួយនឹង ហាម៉ាស

សហគមន៍អន្តរជាតិ មានការលំបាកខ្លាំងក្នុងការស្វែងរកដំណោះស្រាយដើម្បីសន្តិភាពសម្រាប់ អ៊ីស្រាអែល និងប៉ាលេស្ទីន ខណៈដែលរដ្ឋាភិបាលរបស់នាយករដ្ឋមន្ត្រី អ៊ីស្រាអែល Benjamin Netanyahu ដាក់ផែនការកម្ទេចកម្លាំងរ៉ុក្កែត និងកាំជ្រួចហ្វោង របស់ចលនាប្រដាប់អាវុធ ហាម៉ាស នៅតំបន់ ហ្គាហ្សា។

នាយករដ្ឋមន្ត្រី អ៊ីស្រាអែល Netanyahu កាលពីថ្ងៃទី16 ខែឧសភា បាន «ទាត់ចោល» នូវក្ដីសង្ឃឹមក្នុងការអនុវត្តបទឈប់បាញ់ថ្មី រវាង អ៊ីស្រាអែល និងកងជីវពល ហាម៉ាស។ លោក Netanyahu អះអាងថា កងទ័ពអ៊ីស្រាអែល កំពុងប្រឹងប្រែងដើម្បីកម្ទេចក្រុម ហាម៉ាស ក៏ដូចជាកម្លាំងកាំជ្រួចហ្វោង និងរ៉ុក្កែត របស់ចលនានេះ។ យុទ្ធនាការយោធានឹងត្រូវបញ្ឈប់ លុះណាតែគោលដៅខាងលើ ទទួលបានជោគជ័យ។ លោក Netanyahu និយាយថា៖ «មានសម្ពាធ ប៉ុន្តែ អ៊ីស្រាអែល ក៏មានការគាំទ្រសំខាន់ ពិសេសគឺពីភាគីសហរដ្ឋអាមេរិក»។

ព្រឹកថ្ងៃទី17 ខែឧសភានេះ ទ័ពអាកាសរបស់ អ៊ីស្រាអែល បានបន្តបើកការវាយប្រហារទៅលើតំបន់ ហ្គាហ្សា និងកម្ទេចគោលដៅ ដែល អ៊ីស្រាអែល ជឿថា ជាទីតាំងលាក់ខ្លួនរបស់ក្រុមសកម្មប្រយុទ្ធ ហាម៉ាស។ មកដល់បច្ចុប្បន្ន ការវាយប្រហារគ្នារវាងភាគីទាំងពីរ បានបណ្ដាលឱ្យមានអ្នកស្លាប់សរុបជាង 200នាក់ ក្នុងនោះមានជនជាតិប៉ាលេស្ទីន 192នាក់ និងជនជាតិអ៊ីស្រាអែល ចំនួន 10នាក់។

នៅក្នុងកិច្ចប្រជុំតាមអនឡាញបើកចំហលើកដំបូងរបស់ក្រុមប្រឹក្សាសន្តិសុខអង្គការសហប្រជាជាតិ (UNSC/United Nations Security Council) រដ្ឋមន្ត្រីការបរទេសចិន លោក Wang Yi បានឱ្យដឹងថា ជំលោះរវាង អ៊ីស្រាអែល និង ប៉ាលេស្ទីន បានបង្កការស្លាប់យ៉ាងច្រើន ក្នុងនោះមានទាំងកុមារ និងស្ត្រីផងដែរ។ ស្ថានភាពនេះពិតជាធ្ងន់ធ្ងរខ្លាំងណាស់ និងចាំបាច់ត្រូវតែមានបទឈប់បាញ់ និងផ្អាករាល់សកម្មភាពហិស្សា។

ការប្រកាសរបស់ អ៊ីស្រាអែល នេះ ត្រូវបានធ្វើឡើងបន្ទាប់ពីសហគមន៍អន្តរជាតិ រិះគន់លើការវាយប្រហារគ្នានេះ និងស្នើឱ្យមានដំណោះស្រាយសន្តិភាព។ នៅពោះមុខស្ថានការណ៍តានតឹងនាបច្ចុប្បន្ន ប្រទេសចិន បានលើកឡើងនូវសំណើចំណាត់ការចំនួន 4ចំនុច រួមមាន បទឈប់បាញ់ និងផ្អាករាល់អំពើហិង្សា, ជំនួយមនុស្សធម៌ជារឿងចាំបាច់, ជំនួយជាអន្តរជាតិជាកាតព្វកិច្ច, និង «ដំណោះស្រាយ រដ្ឋពីរ» គឺជាដំណោះស្រាយឫសគល់៕

ប្រភព៖ WSJ, Xinhua
ប្រែសម្រួល៖ បុត្រា

May 17, 2021

វ៉ាក់សាំង COVID-19! កូរ៉េខាងត្បូង ផ្ដល់ជំនួយ 10លានវ៉ុន/ម្នាក់ បើសិនពលរដ្ឋជួបបញ្ហាប្រតិកម្មធ្ងន់ធ្ងរ ក្រោយចាក់វ៉ាក់សាំង

ប្រភពព័ត៌មានពីរដ្ឋធានី សេអ៊ូល បានឱ្យដឹងថា ចាប់ពីថ្ងៃទី17 ខែឧសភា ប្រជាជនកូរ៉េខាងត្បូង នឹងទទួលបានប្រាក់ឧបត្ថម្ភផ្នែកសុខាភិបាលច្រើនបំផុតត្រឹម 10លានវ៉ុន (8,820 ដុល្លារអាមេរិក) /ម្នាក់ បូលរួមទាំងពលរដ្ឋដែលបានចាក់វ៉ាក់សាំង Covid-19 មុនថ្ងៃទី 17 ខែឧសភា បើសិនជាមានអាការធ្ងន់ធ្ងរដែលកើតឡើងដោយសារប្រតិកម្មនឹងវ៉ាក់សាំង។

ជំនួយខាងលើនេះគឺដើម្បីដោះស្រាយបញ្ហាព្រួយបារម្ភរបស់ប្រជាជន ហើយតាមរយៈនេះ ក៏នឹងជួយឱ្យអត្រានៃការចាក់វ៉ាក់សាំង អាចសម្រេចផែនការ ក្នុងការទទួលបានភាពស៊ាំនៅក្នុងសហគមន៍ទូទាំងប្រទេស ចាប់ពីខែវិច្ឆិកា ឆ្នាំ2021។

ក្រសួងសុខាភិបាលកូរ៉េខាងត្បូង បានឱ្យដឹងថា បច្ចុប្បន្នប្រទេសនេះ មានពលរដ្ឋ 3,733,000នាក់ បានចាក់វ៉ាក់សាំងម្ជុលទីមួយ គឺស្មើនឹង 7.3% នៃប្រជាជនសរុប។ ចំណែកពលរដ្ឋដែលបានចាក់វ៉ាក់សាំងម្ជុលទីពីរ មាន 935,000នាក់។ តាមផែនការ ចាប់ពីថ្ងៃទី22 ខែឧសភា កូរ៉េខាងត្បូង នឹងផ្ដើមយុទ្ធនាការចាក់វ៉ាក់សាំង Pfizer ឡើងវិញ ក្រោយពីបានផ្អាកមួយរយៈ ដោយសារតែបាត់បង់តុល្យភាពនៃខ្សែច្រវាក់ផ្គត់ផ្គង់ និងតម្រូវការ។

មណ្ឌលចាក់វ៉ាក់សាំងបង្ការ Covid-19 មួយកន្លែង នៅកូរ៉េខាងត្បូង

ក្នុងរយៈពេល 3ខែ កន្លងទៅ កូរ៉េខាងត្បូង បានប្រើអង្គបដិប្រាណ Regkirona Inj (960mg) ដើម្បីព្យាបាលដល់អ្នកជំងឺចំនួនជាង 3,000ករណី ហើយលទ្ធផលដំបូងបង្ហាញថា មានប្រសិទ្ធភាពសម្រាប់អ្នកជំងឺកម្រិតស្រាល។ Regkirona Inj. 960mg ឬហៅថា Regdanvimab (លេខកូដ CT-P59) ដែលអភិវឌ្ឍដោយក្រុមហ៊ុន Celltrion គឺជាថ្នាំព្យាបាល Covid-19 ដោយប្រើអង្គបដិប្រាណដែលត្រូវបានអភិវឌ្ឍនៅកូរ៉េខាងត្បូងដំបូងគេ ដែលទទួលបានការអនុញ្ញាតឱ្យប្រើប្រាស់។

លទ្ធផលនៃការប្រើប្រាស់ថ្នាំនេះសម្រាប់ព្យាបាលអ្នកជំងឺ Covid-19 វ័យចំណាស់ និងអ្នកជំងឺ Covid-19 ដែលមានជំងឺប្រចាំកាយ គឺមានតែមួយករណីប៉ុណ្ណោះដែលប្រែជាមានអាការធ្ងន់ធ្ងរ ប៉ុន្តែ ពុំមានករណីស្លាប់នោះទេ។ Regkirona Inj. ត្រូវបានប្រើសម្រាប់អ្នកជំងឺដែលទើបតែឆ្លងវីរុស ខណៈដែលអាការរោគនៅមានកម្រិតស្រាល ហើយថ្នាំនេះនឹងត្រូវបានចាក់ឱ្យអ្នកជំងឺនៅថ្ងៃចូលពេទ្យដំបូង។

ក្រសួងសុខាភិបាលកូរ៉េខាងត្បូង ឱ្យដឹងថា ថ្នាំ Regkirona Inj. មានប្រសិទ្ធភាពទៅលើវីរុសក្លាយពូជថ្មីនៅសហរដ្ឋអាមេរិក, អង់គ្លេស និងនីហ្សេរីយ៉ាផងដែរ។ ក៏ប៉ុន្តែ ដោយសារថ្នាំនេះត្រូវបានអនុញ្ញាតដោយមានលក្ខខណ្ឌភ្ជាប់មកជាមួយ ដូច្នេះ ក្រុមហ៊ុនផលិត ត្រូវតែផ្ដល់របាយការណ៍លទ្ធផលនៃការពិសោធលើមនុស្សដំណាក់ទីបី ទើបវាត្រូវការការផ្ទៀតផ្ទាត់សុវត្ថិភាព និងប្រសិទ្ធភាពបន្តទៀត នាពេលខាងមុខ៕

ប្រភព៖ tbs.seoul
ប្រែសម្រួល៖ បុត្រា

May 17, 2021

Category: អន្តរជាតិ