អន្តរជាតិ - La Reine Media

ព្រមាន! វីរុសបំប្លែងខ្លួនថ្មី «របស់» ឥណ្ឌា ដែល កម្ពុជា ទើបតែរកឃើញ កំពុងឆ្លងរាលដាលខ្លាំងនៅ កាណាដា

ប្រភពព័ត៌មានពីទីក្រុង Ottawa បានឱ្យដឹងថា វីរុសCovid-19 បំប្លែងខ្លួនថ្មី ប្រភេទ B.1.617 ដែលត្រូវបានរកឃើញដំបូងគេនៅប្រទេស ឥណ្ឌា ហើយដែល កម្ពុជា បានរកឃើញកាលពីថ្ងៃទី4 ខែមិថុនា ឆ្នាំ2021 បច្ចុប្បន្ន កំពុងតែ «ចាក់ឫស» ជ្រៅ ក្នុងសហគមន៍ និងឆ្លងក្នុងល្បឿនយ៉ាងលឿន នៅប្រទេស កាណាដា។

សម្បុកវីរុសCovid-19 មួយ នៅខេត្ត Newfoundland & Labrador នៃប្រទេស កាណាដា ថ្មីៗនេះ ត្រូវបានគេរកឃើញករណីឆ្លង B.1.617 យ៉ាងតិច 60នាក់ ស្របពេលដែលការផ្ទុះឆ្លងរាលដាលនៃវីរុសប្រភេទនេះ ក៏ត្រូវបានគេរកឃើញនៅក្នុងខេត្ត British Columbia, Quebec, Alberta និង Ontario ផងដែរ។

អ្នកជំនាញ Troy Day មកពីសាកលវិទ្យាល័យ Quen នៅទីក្រុង Kingston នៃខេត្ត Ontario ប្រទេស កាណដា បានឱ្យដឹងថា B.1.617 ទំនងជានឹងក្លាយជាវីរុសបំប្លែងខ្លួនថ្មី ដែល «គ្រប់គ្រង» Ontario ជាខេត្តដែលមានប្រជាជនច្រើនជាងគេបង្អស់នៅ កាណាដា នាខែក្រោយ។

ក្រុមអ្នកជំនាញផ្នែកជំងឺឆ្លង មានការព្រួយបារម្ភថា B.1.617 នឹង «រកឃើញ» ចំណុចខ្សោយនៃយុទ្ធនាការចាក់វ៉ាក់សាំងម្ជុលដំបូងរបស់ កាណាដា ហើយអាចបង្កគ្រោះថ្នាក់ដល់ការបើកទ្វារសេដ្ឋកិច្ចឡើងវិញ។

វេជ្ជបណ្ឌិត Isaac Bogoch និយាយថា B.1.617 (រកឃើញដំបូងនៅ ឥណ្ឌា) និង B.1.1.7 (រកឃើញដំបូងនៅ អង់គ្លេស) មានចំណុចប្រហាក់ប្រហែលជាច្រើន ទាក់ទិននឹងការឆ្លងរាលដាលឆាប់រហ័ស។ យោងតាម Isaac Bogoch កាណាដា ត្រូវការប្រឹងប្រែងបន្ថែមទៀត ដើម្បីចាក់វ៉ាក់សាំងម្ជុលទីពីរឱ្យបានលឿនជាងមុន។

គិតមកដល់ថ្ងៃទី5 ខែមិថុនា កាណាដា បានចាក់វ៉ាក់សាំងរួចរាល់ដល់ពលរដ្ឋជាង 2.7លាននាក់ ស្មើនឹង 7.1% នៃប្រជាជនសរុបទូទាំងប្រទេស។ កាណាដា បច្ចុប្បន្ន ជាប់ចំណាត់ថ្នាក់លេខ3 នៅក្នុងចំណោមប្រទេសឧស្សាហកម្មរីកចម្រើនជាងគេក្នុងពិភពលោក (G7) ស្ដីពីការចាក់វ៉ាក់សាំងបង្ការវីរុស Covid-19 ដោយអត្រា 67.29ដូស/100នាក់ ខណៈដែល អង់គ្លេស (ប្រទេសនាំមុខគេនៅ G7) ចាក់បាន 98.33ដូស/100នាក់។

នៅ កាណាដា គិតត្រឹមព្រឹកថ្ងៃទី7 ខែមិថុនា ឆ្នាំ2021 នេះ បានរកឃើញអ្នកឆ្លងវីរុសCovid-19 សរុបចំនួន 1,392,563នាក់ ក្នុងនោះមានអ្នកស្លាប់ចំនួន 25,724នាក់ និងកំពុងព្យាបាលចំនួន 24,194នាក់៕

ប្រភព៖ CBC
ប្រែសម្រួល៖ បុត្រា

June 7, 2021

វីរុសCOVID-19 បំប្លែងខ្លួនឥណ្ឌា (B.1.617) ឆ្លងរាលដាលខ្ពស់ជាង 40% ធៀបនឹងវីរុសបំប្លែងខ្លួននៅ អង់គ្លេស

រដ្ឋមន្ត្រីក្រសួងសុខាភិបាលអង់គ្លេស បានព្រមានថា គួរតែចាក់វ៉ាក់សាំង Covid-19 ឱ្យបានពីរម្ជុល ព្រោះថា វីរុសបំប្លែងខ្លួនថ្មីដែលត្រូវបានរកឃើញនៅ ឥណ្ឌា (B.1.617) មានលទ្ធភាពឆ្លងរាលដាលខ្ពស់ជាងវីរុសបំប្លែងខ្លួនដែលត្រូវបានរកឃើញនៅប្រទេស អង់គ្លេស។

«តួលេខ 40% ស្ដីពីលទ្ធភាពនៃការឆ្លងរាលដាល គឺជា ការព្រមានផ្នែកវិទ្យាសាស្ត្រថ្មីបំផុត ដែលខ្ញុំបានទទួល» រដ្ឋមន្ត្រីក្រសួងសុខាភិបាល អង់គ្លេស Matt Hancock ប្រកាសកាលពីថ្ងៃទី6 ខែមិថុនា។ នេះគឺជាទិន្នន័យរបស់ SAGE ដែលជាក្រុមប្រឹក្សាវិទ្យាសាស្ត្ររបស់រដ្ឋាភិបាលអង់គ្លេស។

វីរុសCovid-19 បំប្លែងខ្លួនថ្មីឈ្មោះ Dalta ដែលហៅថា វីរុសក្លាយពូជឥណ្ឌា ឬ B.1.617 (B.1.617 ជាវីរុសក្លាយពូជថ្មី ដែលបំប្លែងខ្លួនចេញពី Covid-19 ប្រភេទ B.1.1.7 របស់ អង់គ្លេស។ B.1.617 ត្រូវបានចែកជា 3ប្រភេទទៀត (sub-variant) រួមមាន B.1.617.1, B.1.617.2 និង B.1.617.3) បច្ចុប្បន្នគឺជាប្រភេទ Covid-19 ដែលឆ្លងរាលដាលខ្លាំងនៅប្រទេសអង់គ្លេស។ មុននោះ វីរុស Alpha ឬហៅថា វីរុសបំប្លែងខ្លួនអង់គ្លេស ត្រូវបានរកឃើញនៅតំបន់ Kent ធ្លាប់បានធ្វើឱ្យអង់គ្លេស ត្រូវដាក់បម្រាមគោចរកាលពីខែមករា។

លោក Hancock ទទួលស្គាល់ថា វីរុស Covid-19 ប្រភេទ Delta «កំពុងធ្វើឱ្យការគណនា ត្រូវជួបឧបសគ្គច្រើន» ទាក់ទងនឹងការដកបទបញ្ជារឹតបន្តឹងការធ្វើដំណើររបស់រដ្ឋាភិបាល ដែលតាមគម្រោងនឹងត្រូវធ្វើឡើងនៅថ្ងៃទី21 ខែមិថុនាខាងមុខ។

រដ្ឋមន្ត្រីខាងលើ និយាយថា៖ «យើងនឹងពិនិត្យលើទិន្នន័យ ថែមមួយសប្ដាហ៍ទៀត ទើបធ្វើការសម្រេចចិត្តជាក្រោយ»។

«ការណែនាំផ្នែកវិទ្យាសាស្ត្រល្អបំផុត ដែលខ្ញុំទទួលបានក្នុងគ្រានេះ នោះគឺការចាក់វ៉ាក់សាំងមួយម្ជុល នឹងមិនអាចមានប្រសិទ្ធភាពក្នុងការការពារសុវត្ថិភាពនៅចំពោះមុខវីរុសបំប្លែងខ្លួន Dalta លើកលែងតែចាក់គ្រប់ពីរម្ជុល» លោក Hancock បញ្ជាក់ដូច្នេះ។

ផ្ទាំងព័ត៌មាន ព្រមានអំពីវីរុសបំប្លែងខ្លួនថ្មី នៅអង់គ្លេស

អង់គ្លេស បានចាក់វ៉ាក់សាំងបង្ការ Covid-19 គ្រប់ពីរម្ជុល ដល់ពលរដ្ឋពេញវ័យជាង 50% ស្មើនឹង 27លាននាក់ ខណៈជាង 40លាននាក់ បានចាក់ម្ជុលទីមួយ។ ប្រទេសនេះគឺជាសម្បុកវីរុសCovid-19 ធំជាងគេលំដាប់ទី7 ក្នុងពិភពលោក ដោយមានអ្នកវិជ្ជមានជាង 4.5លាននាក់ និងស្លាប់ជាង 472,000នាក់៕

ប្រភព៖ ABC
ប្រែសម្រួល៖ បុត្រា

June 7, 2021

COVID-19 នៅ កម្ពុជា និងពិភពលោក គិតត្រឹមព្រឹកថ្ងៃទី6 ខែមិថុនា 2021

យោងតាមរបាយការណ៍របស់ក្រសួងសុខាភិបាល ដែលបានប្រកាសនាព្រឹកថ្ងៃទី6 ខែមិថុនា ឆ្នាំ2021 នេះ កម្ពុជា មានអ្នកស្លាប់ដោយសារវីរុសCovid-19 ចំនួន 11នាក់ និងអ្នកឆ្លងចំនួន 631នាក់ និងជា ចំនួន 1,069នាក់ នៅក្នុងថ្ងៃទី5 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 34,244នាក់ ក្នុងនោះមាន 263នាក់បានបាត់បង់ជីវិត, 27,147នាក់បានជា និងប្រមាណ 7,283នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 ចំនួន 3,736,352នាក់ បានស្លាប់, 156,595,909នាក់បានជា និង 13,391,687នាក់កំពុងព្យាបាល នៅក្នុងចំណោមអ្នកដែលបានឆ្លងវីរុសនេះសរុប 173,723,948នាក់៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 6, 2021

ស្ថានភាព COVID-19 នៅ កម្ពុជា និងពិភពលោក គិតត្រឹមព្រឹកថ្ងៃទី5 ខែមិថុនា 2021

យោងតាមរបាយការណ៍របស់ក្រសួងសុខាភិបាល ដែលបានប្រកាសនាព្រឹកថ្ងៃទី5 ខែមិថុនា ឆ្នាំ2021 នេះ កម្ពុជា មានអ្នកស្លាប់ដោយសារវីរុសCovid-19 ចំនួន 10នាក់ និងអ្នកឆ្លងចំនួន 538នាក់ និងជា ចំនួន 534នាក់ នៅក្នុងថ្ងៃទី4 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 33,613នាក់ ក្នុងនោះមាន 252នាក់បានបាត់បង់ជីវិត, 26,078នាក់បានជា និងប្រមាណ 7,289នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 ចំនួន 3,727,657នាក់ បានស្លាប់, 156,075,401នាក់បានជា និង 13,525,876នាក់កំពុងព្យាបាល នៅក្នុងចំណោមអ្នកដែលបានឆ្លងវីរុសនេះសរុប 173,328,934នាក់៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 5, 2021

បាតុភូត សូរ្យគ្រាស «រង្វង់ភ្លើង» ដ៏កម្រ នឹងកើតមានឡើងនៅសប្ដាហ៍ក្រោយ នៃខែមិថុនា ឆ្នាំ2021

បាតុភូតសូរ្យគ្រាស «រង្វង់ភ្លើង» ឬហៅថា សូរ្យគ្រាសរាងចិញ្ចៀន កើតឡើងនៅពេលព្រះអាទិត្យ ព្រះចន្ទ និងផែនដី តម្រៀបត្រង់ជាជួរ ក្នុងគ្រាព្រះចន្ទស្ថិតនៅលើគន្លងគោចរឆ្ងាយពីផែនដីបំផុត។

ដោយសារតែនៅឆ្ងាយពេក ព្រះចន្ទមិនអាចបិទបាំងទាំងស្រុងនូវពន្លឺពីព្រះអាទិត្យ ដូច្នេះក៏បន្សល់ទុក រូបរាង «រង្វង់ភ្លើង» ស្ថិតនៅជុំវិញ «គ្រាប់បាល់យក្សងងឹត» មួយគ្រាប់ (ព្រះចន្ទពេលថ្ងៃ)។

បាតុភូតខាងលើនេះ នឹងកើតឡើងនៅថ្ងៃទី10 ខែមិថុនា ឆ្នាំ2021 ខាងមុខ ហើយតំបន់ដែលអាចមើលឃើញច្បាស់បំផុតគឺ កាណាដា, ហ្គ្រីនឡែន និងរុស្ស៊ី។ បាតុភូតនេះនឹងបង្ហាញខ្លួនក្នុងរយៈពេល 3នាទី និង51វិនាទី។

ពលរដ្ឋនៅប្រទេស អង់គ្លេស នឹងមើលឃើញតែ 20% នៃបាតុភូតសូរ្យគ្រាសនេះ ខណៈ ស្កុតឡែន មើលឃើញ 32% នៃចំណុចខ្មៅ។ ចំណែកតំបន់ឆ្នេរនៃមហាសមុទ្រអាត្លង់ទិក ពលរដ្ឋ ក៏នឹងមើលឃើញសូរ្យគ្រាសមួយចំណិតផងដែរ នៅពេលព្រឹកព្រលឹម៕

ប្រភព៖ CBS News
ប្រែសម្រួល៖ បុត្រា

June 4, 2021

អ្នកជំងឺCOVID-19 ដែលបានស្លាប់ បែរជាត្រលប់មកផ្ទះវិញ ក្រោយពីបូជាបាន 18ថ្ងៃ

(ឥណ្ឌា)- ស្ត្រីម្នាក់ ឈ្មោះថា Girijamma រស់នៅក្នុងរដ្ឋ Andhra Pradesh ត្រូវបានគ្រួសារធ្វើពិធីបញ្ចុះសពរួចរាល់ បន្ទាប់ពីបានស្លាប់ដោយសារជំងឺCovid-19 ប៉ុន្តែ រយៈពេល 18ថ្ងៃក្រោយមក គ្រួសារមានការភ្ញាក់ផ្អើលជាខ្លាំង នៅពេលបានឃើញស្ត្រីនេះ ត្រលប់មកផ្ទះវិញ។

លោកយាយវ័យ 70ឆ្នាំ រស់នៅក្នុងភូមិ Christianpet ស្រុក Krishna កាលពីថ្ងៃទី12 ខែឧសភា ត្រូវបានប្ដី គឺ លោកតា Muthyala Gaddayya នាំទៅកាន់មន្ទីរពេទ្យ នាទីក្រុង Vijayawada ដើម្បីព្យាបាលជំងឺCovid-19។ លោកតា Gaddayya តែងទៅមើលប្រពន្ធគាត់ជាញឹកញាប់។

ប៉ុន្តែ នៅថ្ងៃទី15 ខែឧសភា លោកតា Gaddayya មិនបានឃើញប្រពន្ធរបស់គាត់នៅកន្លែងព្យាបាលនោះទេ ពេលគាត់ទៅសួរសុខទុក្ខម្ដងទៀត។ គាត់បានដើររកឯបន្ទប់ផ្សេងៗ ប៉ុន្តែ នៅតែរកមិនឃើញ។ ចុងក្រោយ ក្រុមគ្រូពេទ្យបានប្រាប់ថា អ្នកជំងឺប្រហែលជាបានស្លាប់ ហើយត្រូវនាំទៅកាន់សាលដាក់សាកសព។

នៅក្នុងសាលសាកសព លោកតា ត្រូវបានក្រុមការងារ ប្រគល់សាកសពស្ត្រីវ័យចំណាស់ម្នាក់ ដែលត្រូវរុំជិតដោយថង់ផ្លាស្ទិក។ លោកតាពិតជារន្ធត់ចិត្តជាពន់ពេក និងបាននាំសាកសពត្រលប់មកផ្ទះ ហើយធ្វើបុណ្យក្នុងថ្ងៃដដែលនោះ។

ដល់ថ្ងៃទី23 ខែឧសភា គ្រួសាររបស់លោកតា Gaddayya ត្រូវជួបទុក្ខធំមួយទៀត នៅពេលបានទទួលដំណឹងថា កូនប្រុសវ័យ 35ឆ្នាំរបស់គាត់ ឈ្មោះ Muthyala Ramesh ក៏បានបាត់បង់ជីវិត ដោយសារ Covid-19 នៅក្នុងមន្ទីរពេទ្យស្រុក Khammam។ គ្រួសរនេះ បានរៀបចំពិធីរំលឹកវិញ្ញាណក្ខន្ធលោកយាយ Girijamma និងកូនប្រុស Ramesh កាលពីថ្ងៃទី1 ខែឧសភា។

ក៏ប៉ុន្តែ មួយថ្ងៃក្រោយមក គ្រួសារ និងអ្នកភូមិ ត្រូវរន្ធត់ និងភ្ញាក់ផ្អើលជាលើកទីបី នៅពេលឃើញលោកយាយ Girijamma ត្រលប់មកផ្ទះ។ លោកយាយប្រាប់ថា គាត់អន់ចិត្ត អាណិតខ្លួនខ្លាំងណាស់ ព្រោះតែមិនមានអ្នកផ្ទះទៅទទួលគាត់ ក្រោយពីបានជាសះស្បើយ។ ខាងមន្ទីរពេទ្យ បានជូនប្រាក់ដល់លោកយាយ 3,000រូពី (41ដុល្លារអាមេរិក) ដើម្បីត្រលប់មកផ្ទះ។

គ្រួសាររបស់លោកយាយ និងអ្នកក្បែរខាងនិយាយថា ពួកគេមិនបានពិនិត្យមើលសាកសពនោះទេ ព្រោះខ្លាចឆ្លងវីរុស។ ចំណែកខាងប៉ូលិសវិញ ឱ្យដឹងថា ពុំមានអ្នកណាម្នាក់ ត្រូវបានស៊ើបអង្កេតនៅក្នុងករណីច្រឡំសាកសពនេះនោះដែរ។

បច្ចុប្បន្ន គេមិនបានដឹងថា លោកយាយបាននៅទីណាឡើយ ក្នុងរយៈពេល 18ថ្ងៃ បន្ទាប់ពីត្រូវគ្រូពេទ្យនិយាយថា បានស្លាប់។ ចម្ងាយផ្លូវពីទីក្រុង Vijayawada មកស្រុក Krishna ប្រហែល 18គីឡូម៉ែត្រ៕

ប្រភព៖ NDTV
ប្រែសម្រួល៖ បុត្រា

June 4, 2021

អ្នកស្លាប់ដោយសារ COVID-19 នៅ កម្ពុជា និងពិភពលោក គិតត្រឹមព្រឹកថ្ងៃទី4 ខែមិថុនា 2021

យោងតាមរបាយការណ៍របស់ក្រសួងសុខាភិបាល ដែលបានប្រកាសនាព្រឹកថ្ងៃទី4 ខែមិថុនា ឆ្នាំ2021 នេះ កម្ពុជា មានអ្នកស្លាប់ថ្មី ដោយសារវីរុសCovid-19 ចំនួន 6នាក់ និងអ្នកឆ្លងថ្មីចំនួន 886នាក់ នៅក្នុងថ្ងៃទី3 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 33,075នាក់ ក្នុងនោះមាន 242នាក់បានបាត់បង់ជីវិត, 25,544នាក់បានជា និងប្រមាណ 7,190នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 ចំនួន 3,717,320នាក់ បានស្លាប់, 155,622,721នាក់បានជា និង 13,570,925នាក់កំពុងព្យាបាល នៅក្នុងចំណោមអ្នកដែលបានឆ្លងវីរុសនេះសរុប 172,910,966នាក់៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 4, 2021

មេបញ្ជាការកងទ័ព សហរដ្ឋអាមេរិក ថា វៀតណាម បញ្ជាទិញយន្តហោះហ្វឹកហាត់ T-6

មេបញ្ជាការទ័ពអាកាសប្រចាំមហាសមុទ្រ ប៉ាស៊ីហ្វិក លោក Kenneth Wilsbach បានឱ្យដឹងថា កិច្ចព្រមព្រៀងទិញយន្តហោះហ្វឹកហាត់ T-6 គឺជាចំណុចលេចធ្លោ នៅក្នុងកិច្ចសហការលើវិស័យការពារជាតិ រវាង សហរដ្ឋអាមេរិក-វៀតណាម។

«វៀតណាម បានបញ្ជាទិញយន្តហោះហ្វឹកហាត់ T-6 ដើម្បីកែលម្អកម្មវិធីហ្វឹកហាត់សម្រាប់អ្នកបើកបរយន្តហោះ។ នេះគឺជាចំណុចសំខាន់មួយ និងលេចធ្លោបំផុត នៅក្នុងកិច្ចសហការទ្វេភាគី» ឧត្តមសេនីយ Kenneth Wilsbach មេបញ្ជាការកងទ័ពអាកាសប្រចាំតំបន់មហាសមុទ្រប៉ាស៊ីហ្វិក (PACAF) នៃកងទ័ពអាកាសសហរដ្ឋអាមេរិក ថ្លែងនៅក្នុងសន្និសីទសារព័ត៌នាថ្ងៃនេះ។

ព័ត៌មាននេះ ត្រូវបាន Kenneth Wilsbach លើកឡើង នៅពេលត្រូវបានសួរដល់ទំនាក់ទំនងក្នុងវិស័យការពារជាតិ រវាង វៀតណាម និង សហរដ្ឋអាមេរិក។ ប៉ុន្តែ លោក មិនបានបង្ហើបអំពីចំនួនយន្តហោះ ក៏ដូចជាតម្លៃសរុបនៃយន្តហោះ ដែល វៀតណាម បានបញ្ជាទិញនោះទេ ដោយគ្រាន់តែនិយាយថា សហរដ្ឋអាមេរិក សន្យាផ្គត់ផ្គង់តាមការបញ្ជាទិញនេះ។

វៀតណាម កាលពីឆ្នាំ2018 បានបញ្ជូនអ្នកបើកបរយន្តហោះពីរនាក់ ទៅចូលរួមវគ្គបណ្ដុះបណ្ដាល 52សប្ដាហ៍ ជាមួយនឹងយន្តហោះ T-6 Texan II នៅក្នុងកម្មវិធីគ្រប់គ្រងអាកាសចរណ៍ (ALP) របស់ទ័ពអាកាសអាមេរិក។

T-6 Texan II គឺជាស៊េរីយន្តហោះធុនស្រាល ពីរកៅអី ផលិតដោយក្រុមហ៊ុន Raytheon របស់ អាមេរិក ដោយយោងទៅតាមម៉ូដែល Pilatus PC-9 របស់ប្រទេស ស្វីស។ វាត្រូវបានអភិវឌ្ឍក្នុងទសវត្សរ៍ 1990 និងដាក់ឱ្យប្រើប្រាស់ក្នុងជួរកងទ័ពអាមេរិក ចាប់ពីឆ្នាំ2001៕

ប្រភព៖ VNExpress
ប្រែសម្រួល៖ បុត្រា

June 4, 2021

អាមេរិក ប្រកាសគម្រោងលម្អិត ស្ដីពីការចែករំលែកវ៉ាក់សាំង COVID-19 ចំនួន 80លានដូស ដល់ប្រទេសនានាក្នុងពិភពលោក

កាលពីថ្ងៃទី3 ខែមិថុនា ប្រធានាធិបតីសហរដ្ឋអាមេរិក លោក Joe Biden បានប្រកាសព័ត៌មានលម្អិតស្ដីពីគម្រោងចែករំលែកវ៉ាក់សាំងបង្ការ Covid-19 ចំនួន 25លានដូសដំបូង ក្នុងចំណោម 80លានដូស ដែលលោកធ្លាប់បានប្រកាសនាពេលកន្លងថា នឹងផ្ដល់ឱ្យបណ្ដាប្រទេស និងដែនដីក្នុងពិភពលោក។

ក្នុងប្រកាសមួយ លោក Biden បានលើកឡើងថា ក្នុងចំណោមវ៉ាក់សាំង 25លានដូស ដែល សហរដ្ឋអាមេរិក ចែករំលែកដំបូង មានជិត 19លានដូសនឹងផ្ដល់ឱ្យបណ្ដាប្រទសក្រីក្រ តាមរយៈយន្តការ COVAX របស់អង្គការសុខភាពពិភពលោក។ ក្នុងនោះ ប្រហែល 6លានដូស នឹងផ្ដល់ឱ្យបណ្ដាប្រទេសនៅតំបន់អាមេរិកឡាទីន និងតំបន់ការីប៊ីន, ប្រហែល 7លានដូសសម្រាប់តំបន់អាស៊ីខាងត្បូង និងអាស៊ីអាគ្នេយ៍, ចំណែកជិត 5លានដូសទៀត សម្រាប់ទ្វីបអាហ្វ្រិក។ ក្រៅពីនេះ វ៉ាក់សាំងជាង 6លានដូសទៀត ក្នុងចំណោម 25លានដូសខាងលើ នឹងត្រូវបានចែករំលែកផ្ទាល់ដល់កាណាដា, ម៉ិកស៊ិក, ឥណ្ឌា និងកូរ៉េខាងត្បូង។

សូមបញ្ជាក់ថា វ៉ាក់សាំងប្រហែល 7លានដូស ដែលគ្រោងនឹងផ្ដល់ឱ្យតំបន់អាស៊ីខាងត្បូង និងអាស៊ីអាគ្នេយ៍ រួមមាន៖ ឥណ្ឌា, នេប៉ាល់, បង់ក្លាដែស, ប៉ាគីស្ថាន, ស្រីលង្កា, អាហ្វហ្គានីស្ថាន, ម៉ាឌីវ, ម៉ាឡេស៊ី, ហ្វីលីពីន, វៀតណាម, ឥណ្ឌូនេស៊ី, ថៃ, ឡាវ, ប៉ាពួញូហ្គីណេ, តៃវ៉ាន់ និងបណ្ដាកោះនៅមហាសមុទ្រប៉ាស៊ីហ្វិក។ កម្ពុជា មិនមាននៅក្នុងបញ្ជីឈ្មោះនេះទេ។

យោងតាមប្រកាសរបស់ សេតវិមាន វ៉ាក់សាំង 75% ក្នុងចំណោម 80លានដូស ដែលសហរដ្ឋអាមេរិក គ្រោងនឹងចែករំលែក នឹងត្រូវបានផ្ដល់ឱ្យយន្តការ COVAX។ ចំណែកនៅសល់ 25% ទៀត ទីក្រុងវ៉ាស៊ីងតោន នឹងផ្ដល់ឱ្យបណ្ដាប្រទេសកំពុងត្រូវការបន្ទាន់ បណ្ដាប្រទេសក្បែរខាងអាមេរិក និងបណ្ដាប្រទេសដែលបានស្នើសុំ អាមេរិក ឱ្យជួយ៕

ប្រភព៖ Business Insider
ប្រែសម្រួល៖ បុត្រា

June 4, 2021

សហរដ្ឋអាមេរិក ដំណើរការគម្រោងចែកវ៉ាក់សាំង COVID-19 ដល់ប្រទេសផ្សេងៗ

រដ្ឋបាលប្រធានាធិបតី Joe Biden គ្រោងនឹងប្រកាសឱ្យដឹងពីឈ្មោះប្រទេសដែលនឹងទទួលបានវ៉ាក់សាំងបង្ការវីរុសCovid-19 ដែលជាជំនួយដំបូងរបស់សហរដ្ឋអាមេរិក។

សារព័ត៌មាន Bloomberg កាលពីថ្ងៃទី3 ខែមិថុនា ដកស្រង់ប្រភពព័ត៌មានមួយ ឱ្យដឹងថា សេតវិមាន បានសម្រេចលើការបង្កើតផែនការបែងចែកវ៉ាក់សាំង Covid-19 រាប់សិបលានដូស ទៅដល់បណ្ដាប្រទេស ដែលកំពុងត្រូវការ បន្ទាប់ពីបានពិភាក្សារួចរាល់។

លោក Joe Biden ទំនងជានឹងប្រកាសព័ត៌មានលម្អិតទាក់ទងនឹងបញ្ហាខាងលើនៅក្នុងសប្ដាហ៍នេះ ដោយគិតទៅលើកត្តាសមធម៌ និងសហការស៊ីជម្រៅជាមួយនឹងកម្មវិធី Covax ដែលដឹកនាំដោយអង្គការសហប្រជាជាតិ សម្រាប់ការផ្គត់ផ្គង់វ៉ាក់សាំងដល់បណ្ដាប្រទេសក្រីក្រ។

យុទ្ធនាការចាក់វ៉ាក់សាំងនៅសហរដ្ឋអាមេរិក មានការរីកចម្រើនខ្លាំង ដោយវ៉ាក់សាំងចំនួន 297លានដូស ត្រូវបានប្រើប្រាស់ ក្នុងនោះ ពលរដ្ឋពេញវ័យចំនួន 62.9% ទទួលបានការចាក់វ៉ាក់សាំងយ៉ាងតិចមួយដូស គិតត្រឹមថ្ងៃទី2 ខែមិថុនា ឆ្នាំ2021។

មុននោះ ប្រធានាធិបតី Joe Biden បានឱ្យដឹងថា សហរដ្ឋអាមេរិក គ្រោងនឹងផ្ដល់វ៉ាក់សាំងចំនួន 80លានដូស ក្នុងនោះមានវ៉ាក់សាំង AstraZeneca ចំនួន 60លានដូស និងវ៉ាក់សាំង Moderna, Pfizer និង Johnson & Johnson ចំនួន 20លានដូស ដល់បណ្ដាប្រទេសក្នុងពិភពលោក៕

ប្រភព៖ Reuters
ប្រែសម្រួល៖ បុត្រា

June 3, 2021

Category: អន្តរជាតិ