អន្តរជាតិ - La Reine Media

ឥណ្ឌូនេស៊ី បញ្ជាទិញនាវាចម្បាំងប្រភេទ 6,000តោន ម្ដង 6គ្រឿង

ក្រុមហ៊ុន Fincantieri របស់ អ៊ីតាលី បានចុះកិច្ចព្រមព្រៀង លក់នាវាចម្បាំងប្រភេទធម្មតា និងប្រភេទពិឃាដ FREMM ទៅឱ្យប្រទេស ឥណ្ឌូនេស៊ី ដែលនេះ ត្រូវបាន Giuseppe Bono ដែលជានាយកប្រតិបត្តិរបស់ Fincantieri និយាយថា បានអនុញ្ញាតឱ្យរោងចក្ររបស់ អ៊ីតាលី នេះ «ត្រលប់មកកាន់តំណែងសកល» នៅក្នុងវិស័យនាវាអណ្ដែតលើផ្ទៃទឹក។

បច្ចុប្បន្ន នាវា FREMM របស់ Fincantieri ដែលត្រូវបានបញ្ជាទិញ បានឡើងដល់ 20គ្រឿង ក្នុងនោះមាន 10គ្រឿង សម្រាប់កងទ័ពជើងទឹក អ៊ីតាលី, 2គ្រឿងសម្រាប់ អេហ្សីប និង 2គ្រឿងសម្រាប់ សហរដ្ឋអាមេរិក ខណៈ។ល។ សហរដ្ឋអាមេរិក តាមផែនការ នឹងបញ្ជាទិញនាវាពី Fincantieri ចំនួន 8គ្រឿងទៀត។

នាវាចម្បាំង FREMM អាចត្រូវបានគេចាត់ទុកជា នាវាចម្បាំងប្រភេទធម្មតា (frigate) និង នាវាចម្បាំងប្រភេទពិឃាដ (destroyer)។ នាវាប្រភេទនេះ សម្រាប់កងទ័ពជើងទឹកបារាំង មានទម្ងន់ displacement 6,000តោន ខណៈដែលសម្រាប់ អ៊ីតាលី មានទម្ងន់ displacement 6,700តោន។

នាវា FREMM នៅលើសមុត្រ (រូបភាពពី Fincantieri)

នៅក្នុងប្រកាសផ្សេងមួយទៀត ដែលត្រូវបានលើកឡើងកាលពីម្សិលមិញ ក្រុមហ៊ុន Fincantieri ឱ្យដឹងថា ក្រៅពីការលក់នាវាប្រភេទ FREMM កិច្ចព្រមព្រៀងនេះ ក៏រួមមានទាំងការជួសជុល និងលក់នាវាចម្បាំងថ្នាក់ Maestrale ចំនួន 2គ្រឿង ដែល អ៊ីតាលី ជិតដាក់ឱ្យចូលនិវត្តន៍ ទៅឱ្យ ឥណ្ឌូនេស៊ី ផងដែរ។

ការប្រកាសខាងលើ បានបន្ថែមថា ក្រុមហ៊ុន Leonardo របស់ អ៊ីតាលី នឹងជាអ្នកម៉ៅការមួយ ចូលរួមកិច្ចព្រមព្រៀងទិញនាវា FREMM របស់ ឥណ្ឌូនេស៊ី។ នេះមានន័យថា ក្រុមហ៊ុននេះ អាចក្លាយជាអ្នកផ្គត់ផ្គង់ប្រព័ន្ធប្រយុទ្ធ។ អំពីតម្លៃវិញ ក្រុមហ៊ុន Fincantieri មិនបានបង្ហើបឱ្យដឹង នៅក្នុងកិច្ចព្រមព្រៀងនេះទេ។

កាលពីខែមុន សហរដ្ឋអាមេរិក បានប្រកាសអំពីកិច្ចព្រមព្រៀងដែលមានតម្លៃ 553.9លានដុល្លារ ដើម្បីទិញនាវា FREMM ទីពីរ ក្នុងចំណោម 10គ្រឿង ដែលប្រទេសនេះ គ្រោងនឹងបញ្ជាទិញនាពេលខាងមុខ។ ដូច្នេះ នាវា FREMM ដែល ឥណ្ឌូនេស៊ី បានបញ្ជាទិញ អាចមានតម្លៃប្រហែល 276លានដុល្លារអាមេរិក ក្នុង 1គ្រឿង៕

ប្រភព៖ Defense News
ប្រែសម្រួល៖ បុត្រា

June 11, 2021

យានអវកាសរបស់ អាមេរិក ថតរូបរ៉ូបូតរបស់ ចិន នៅលើពិភពព្រះអង្គារ

រូបថតថ្មី បង្ហាញឱ្យឃើញស្ថានីយចុះចត និងរ៉ូបូតរបស់ ចិន កំពុងធ្វើសកម្មភាពនៅតំបន់ភាគខាងត្បូងនៃវាលរាប Utopia Planitia របស់ពិភពព្រះអង្គារ។

យាន ឬ ផ្កាយរណបតាមដានភពអង្គារ (MRO/ Mars Reconnaissance Orbiter) របស់ទីភ្នាក់ងារអវកាសអាមេរិក (NASA) បានថតរូបស្ថានីយចុះចត និងរ៉ូបូត Zhurong របស់ ចិន នៅលើភពអង្គារ កាលពីថ្ងៃទី6 ខែមិថុនា។ MRO ធ្លាប់ថតបានរូបភាពដ៏គួរឱ្យចាប់អារម្មណ៍ នៃរ៉ូបូត Curiosity និង Perseverance របស់ NASA ប៉ុន្តែ នេះគឺជាលើកដំបូងហើយ ដែលផ្កាយរណប MRO ថតរូបរ៉ូបូត Zhurong នៃបេសកកម្ម Tianwen-1 របស់ទីភ្នាក់ងារអវកាសចិន (CNSA)។ Tianwen-1 រួមមាន យានគោចរជុំវិញភពអង្គារមួយគ្រឿង ស្ថានីយចុះចតមួយគ្រឿង និងរ៉ូបូតស្រាវជ្រាវលើដីមួយគ្រឿង។

ក្នុងរូបថតនេះ កាមេរ៉ា MRO-HiRise កំណត់បានទីតាំងរបស់ឆត្រយោង និងសម្បកខាងក្រោយ (ពាក់កណ្ដាលនៃផ្នែកខាងលើរបស់យានចុះចត)

ក្រុមគ្រប់គ្រងកាមេរ៉ា HiRise របស់យាន MRO នៃសាកលវិទ្យាល័យ Arizona កាលពីថ្ងៃទី10 ខែមិថុនា បានឱ្យដឹងថា៖ «យើងអាចមើលឃើញច្បាស់ ទីតាំងជុំវិញស្ថានីយចុះចត គឺជាស្នាមចំហាយដ៏ខ្លាំងដែលបានបាញ់ចេញ (ពីយានចុះចត)»។

Zhurong ដែលបានចុះដល់ដីនៃភពអង្គារ កាលពីពាក់កណ្ដាលខែឧសភា ឆ្នាំ2021 បានជួយឱ្យ ចិន ក្លាយជាប្រទេសទីពីរដែលមានរ៉ូបូត ធ្វើសកម្មភាពនៅលើពិភពក្រហមមួយនេះ បន្ទាប់ពី សហរដ្ឋអាមេរិក។

រូប ថតបានពី រ៉ូបូត Zhurong ពេលវាបានចុះចេញផុតពីយានចុះចត

Zhurong កំពុងស្ថិតនៅលើតំបន់វាលរាប។ «រូបភាពថ្មី បង្ហាញយ៉ាងច្បាស់អំពីសណ្ឋានដីពិសេស នៅតំបន់ភាគខាងត្បូងរបស់វាលរាប Utopia Planitia ដែលរាបស្មើ និងហាក់មិនមានដុំថ្ម។ រូបភាពពណ៌លឿង មានរាងកោង គឺជាសណ្ឋានដី Aeolian (ខ្យល់បោកបក់)» នេះបើតាមក្រុម HiRise។

មកដល់បច្ចុប្បន្ន ចិន បានប្រកាសបង្ហាញរូបភាពដ៏តិចតួច ដែលពួកគេទទួលបានពីបេសកកម្ម Tianwen-1 ដែលនេះគឺផ្ទុយទៅនឹង NASA ដែលបញ្ចេញរូបភាពនៃភពអង្គារដល់សាធារណជន ជាបន្តបន្ទាប់។ ក្នុងចំណោមរូបថតដែលចិន បានបញ្ចេញឱ្យឃើញ មានរូបមួយចំនួនស្ដីអំពីផ្ទៃដីរបស់ភពអង្គារ និងដានកង់របស់យាន Zhurong នៅពេលរ៉ូបូតនេះ ចាកចេញផុតពីស្ថានីយចុះចត កាលពីខែឧសភា។

បណ្ដាបេសកកម្មដែលទទួលបានជោគជ័យក្នុងការចុះចតលើពិភពអង្គារ

រូបថតថ្មីដែលបានថតពីយាន MRO របស់ សហរដ្ឋអាមេរិក ស្ដីពីរ៉ូបូតចិន Zhurong គឺជាការឆ្លើយតបនឹងការទន្ទឹងរង់ចាំរបស់ក្រុមអ្នកចូលចិត្តវិស័យអវកាស បានមួយផ្នែក៕

ប្រភព៖ Cnet, BBC
ប្រែសម្រួល៖ បុត្រា

June 11, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី11 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី11 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 655នាក់, អ្នកជាចំនួន 810នាក់ និងអ្នកស្លាប់ថ្មីចំនួន 11នាក់បន្ថែមទៀត នៅក្នុងថ្ងៃទី10 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 37,321នាក់ ក្នុងនោះមាន 311នាក់បានបាត់បង់ជីវិត,

20,617នាក់បានជា និងប្រមាណ 6.393នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 175,622,445នាក់ត្រូវបានរកឃើញ ក្នុងនោះមាន 159,171,963នាក់បានជា, 3,788,723នាក់បានស្លាប់ និង 12,661,759នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 11, 2021

ក្រុមប្រទេស G7 នឹងផ្ដល់វ៉ាក់សាំង Covid-19 ចំនួន 1ពាន់លានដូស ដល់ពិភពលោក

ក្រុមប្រទេសឧស្សាហកម្មរីកចម្រើន (G7) នឹងបង្កើនការផលិតវ៉ាក់សាំងបង្ការ Covid-19 នៅទូទាំងពិភពលោក ដើម្បីផ្គត់ផ្គង់យ៉ាងតិច 1ពាន់លានដូស ដល់ពិភពលោក តាមរយៈកម្មវិធីចែករំលែក និងក្រោមរូបភាពនៃការផ្ដល់ជំនួយ។

«នៅក្នុងកិច្ចប្រជុំកំពូល G7 ក្រុមមេដឹកនាំពិភពលោក តាមគម្រោងនឹងប្រកាសឱ្យដឹងអំពីផែនការផ្ដល់វ៉ាក់សាំង Covid-19 យ៉ាងតិច 1ពាន់លានដូស ដល់ពិភពលោក និងរៀបគម្រោងបង្កើនការផលិតវ៉ាក់សាំង ដើម្បីសម្រេចបានគោលដៅនេះ» នៅក្នុងឆ្នាំ2023។ នេះបើតាមការិយាល័យនាយករដ្ឋមន្ត្រីអង់គ្លេស Boris Johnson ដែលបានឱ្យដឹង កាលពីថ្ងៃទី10 ខែមិថុនា។

ដំណឹងខាងលើ ត្រូវបានលើកឡើង បន្ទាប់ពីប្រធានាធិបតីអាមេរិក Joe Biden ប្រកាសថា សហរដ្ឋអាមេរិក នឹងផ្ដល់វ៉ាក់សាំង Covid-19 ចំនួន 500លានដូស ដល់ប្រទេសចំនួន 92 ដែលជាប្រទេសក្រីក្រ និងមានចំណូលក្រោមមធ្យម។

ប្រទេសអង់គ្លេស ដែលជាកន្លែងប្រារព្ធកិច្ចប្រជុំកំពូល G7 បានឱ្យដឹងថា ប្រទេសនេះនឹងផ្ដល់ជំនួយយ៉ាងតិច 100លានដូស ដល់ពិភពលោក នៅក្នុងឆ្នាំ2022 ក្នុងនោះមាន 5លានដូសនឹងត្រូវបានផ្លល់ឱ្យនៅសប្ដាហ៍ក្រោយៗនេះ។

ការសន្យាខាងលើនេះ ត្រូវបានធ្វើឡើង ក្រោយពីមានការអំពាវនាវឱ្យបណ្ដាប្រទេសអ្នកមាន ចែករំលែកវ៉ាក់សាំង ដល់បណ្ដាប្រទេសក្រីក្រ។ អង្គការមនុស្សធម៌នានា បានព្រមានថា ស្ថានភាពចាក់វ៉ាក់សាំងដោយមិនស្មើភាពគ្នានេះ កំពុងតែនាំឱ្យមាន «ការរើសអើងពូជសាសន៍ ដោយប្រើប្រាស់វ៉ាក់សាំង»៕

ប្រភព៖ AFP, Guardian
ប្រែសម្រួល៖ បុត្រា

June 11, 2021

ស្ត្រីជាតំណាងរាស្ត្រ ទះកំផ្លៀងអ្នករួមការងារ ពេលកំពុងជជែកគ្នា នៅលើកញ្ចក់ទូរទស្សន៍

ប៉ាគីស្ថាន៖ ស្ត្រីជាអ្នកតំណាងរាស្ត្រម្នាក់ ឈ្មោះ Ashiq Awan ទះកំផ្លៀងមិត្តរួមការងារម្នាក់ ឈ្មោះ Qadir Mandokhail បន្ទាប់ពីមានការខ្វែងគំនិតគ្នា នៅក្នុងការបញ្ចេញមតិលើកញ្ចក់ទូរទស្សន៍ដែលកំពុងផ្សាយផ្ទាល់។

អំពើហិង្សានេះ បានកើតឡើង នៅពេលលោកស្រី Awan ដែលជាសមាជិកម្នាក់របស់បក្ស Pakistan Tehreek-e-Insaf ចូលរួមជជែកនៅក្នុងកម្មវិធីទូរទស្សន៍មួយ ជាមួយនឹងលោក Qadir Mandokhail ដែលជាតំណាងរាស្ត្រមកពីបក្ស ប្រជាជនប៉ាគីស្ថាន MNA។ សកម្មភាពនៃអំពើហិង្សានេះ បន្ទាប់មកក៏ត្រូវបានគេចែករំលែកពេញបណ្ដាញសង្គម កាលពីថ្ងៃទី10 ខែមិថុនា។

ដោយសារតែមិនមានការឯកភាពគ្នា លោកស្រី Awan ក៏បានចូលទៅក្បែរ និងទះមួយដៃ ទៅលើគូភាគី។ លោក Qadir Mandokhail ព្យាយាមចាប់ដៃលោកស្រី Awan និងបន្តជជែកតវ៉ា ប៉ុន្តែ ស្ត្រីតំណាងរាស្ត្ររូបនេះ នៅតែប្រតាយប្រតប់ និងទះបានមួយដៃទៀត ធ្វើឱ្យលោក Qadir Mandokhail លើកដៃតបត។ ភ្លាមនោះ ក្រុមបុគ្គលិកផ្សាយរបស់ទូរទស្សន៍ ក៏បានចូលមកសម្របសម្រួល។

ក្រោយពីវីដេអូខាងលើ ត្រូវបានចែករំលែកលើបណ្ដាញសង្គម តំណាងរាស្ត្រ Awan ដែលធ្លាប់ជាជំនួយការពិសេសស្ដីពីព័ត៌មាន របស់នាយករដ្ឋមន្ត្រី Imran Khan ឱ្យដឹងថា លោក Qadir Mandokhail មុននោះ បានគំរាមលោកស្រី ព្រមទាំងបានមើលងាយគ្រួសារលោកស្រី ធ្វើឱ្យលោកស្រីមិនអាចទប់កំហឹងបាន។ លោកស្រី Awan ថែមទាំងបានព្រមានថា នឹងប្ដឹងលោក Mandokhail បន្ទាប់ពីបានពិភាក្សាជាមួយមេធាវី។

លោក Mandokhail ពេលនោះ បាននិយាយថា លោកមិនត្រូវបានគេអនុញ្ញាតឱ្យមានយោបល់ នៅក្នុងកម្មវិធីជជែកដេញដោលគ្នា ព្រោះតែលោកស្រី Awan និយាយមិនឈប់ ពេញ 30នាទី។ លោក Mandokhail ថា លោកបានសុំការអនុញ្ញាតដើម្បីបញ្ចេញយោបល់ ប៉ុន្តែ ត្រូវលោកស្រី Awan បដិសេធ ហើយថែមទាំងចោទបក្សរបស់លោកថា បានប្រព្រឹត្តអំពើពុករលួយ៕

ប្រភព៖ Republicworld, Pakistantime
ប្រែសម្រួល៖ បុត្រា

June 11, 2021

ក្រុមអ្នកវិទ្យាសាស្ត្រ រកឃើញទម្ងន់សរុបរបស់វីរុសCovid-19 ទាំងអស់ ដែលមាននៅលើពិភពលោក

បើសិនជាគ្រាប់វីរុសCovid-19 ដែលកំពុងស្ថិតនៅក្នុងរាងកាយរបស់អ្នកជំងឺនៅទូទាំងពិភពលោក ត្រូវបានគេយកមកដាក់នៅកន្លែងតែមួយ នោះទម្ងន់របស់ពួកវានឹងស្មើនឹងទម្ងន់ ចន្លោះពីប៉ោម 1ផ្លែ ទៅដល់ទម្ងន់កូនក្មេង 1នាក់។

អ្នកវិទ្យាសាស្ត្រមួយក្រុម ថ្មីៗនេះបានគណនាឃើញថា អ្នកជំងឺCovid-19 ម្នាក់ មានផ្ទុកវីរុសប្រមាណពី 10 ទៅ 100,000,000,000គ្រាប់ ក្នុងដំណាក់កាលជំងឺធ្ងន់ធ្ងរបំផុត។ ដូច្នេះ វីរុសCovid-19 ទាំងអស់ដែលបានឆ្លងទៅមនុស្សនៅទូទាំងពិភពលោក (មធ្យមភាគនៃ 1-10លានករណី នៅរាល់ដំណាក់កាលក្នុងវិបត្តិសុខភាពនេះ) នឹងមានទម្ងន់សរុប ចាប់ពី 0.1 – 10គីក្រាម។

អ្នកវិទ្យាសាស្ត្រ Ron Milo មកពីវិទ្យាស្ថានវិទ្យាសាស្ត្រ Weizmann នៃប្រទេសអ៊ីស្រាអែល និងបេក្ខភាពបណ្ឌិត Ron Sender នៅបន្ទប់ពិសោធន៍របស់ Milo ឱ្យដឹងថា Covid-19 ប្រៀបបានទៅនឹងអាវុធនុយក្លេអែរ ដោយវាមានទម្ងន់មហាសែនស្រាល ប៉ុន្តែ កម្លាំងបំផ្លាញរបស់ពួកវា ពិតជាមហិមា។

យោងតាមសាកលវិទ្យាល័យ Johns Hopkins បច្ចុប្បន្ន Covid-19 បានឆ្លងទៅមនុស្សជាង 173លាននាក់ និងបានសម្លាប់មនុស្សជាង 3.7លាននាក់។ ដើម្បីគណនាឱ្យដឹងថា តើអ្នកជំងឺម្នាក់ មានផ្ទុកវីរុសចំនួនប៉ុន្មាន ក្រុមអ្នកស្រាវជ្រាវ បានប្រើប្រាស់លទ្ធផលមុននេះ ដែលត្រូវបានយកពីសត្វស្វារោមលឿង ស្ដីពីបរិមាណគ្រាប់វីរុសនៅក្នុងជាលិកាផ្សេងៗ ដែលងាយឆ្លងវីរុស រួមមាន សួត កូនកណ្ដុរក្នុងខួរក្បាល កូនកណ្ដុរឈាមស និងប្រព័ន្ធរំលាយអាហារ។ បន្ទាប់មក ពួកគេគណនាគ្រាប់វីរុសនៅក្នុងជាលិកា 1ក្រាមៗ នៃស្វារោមលឿង ជាមួយនឹងជាលិការបស់មនុស្ស ដើម្បីរកបរិមាណនៃគ្រាប់វីរុសក្នុងជាលិការបស់មនុស្ស។

ក្រុមអ្នកវិទ្យាសាស្ត្រ បានឱ្យដឹងថា វីរុសCovid-19 1គ្រាប់ៗ មានទម្ងន់ 1 ហ្វេមតូក្រាម (femtogram) (ដែលស្មើនឹង 0.000000000000001 ក្រាម)។ ដោយយកទម្ងន់របស់វីរុស 1គ្រាប់ គុណនឹងបរិមាណរបស់វីរុស អ្នកវិទ្យាសាស្ត្រករឃើញថា អ្នកជំងឺម្នាក់ មានផ្ទុកវីរុសទម្ងន់ប្រមាណ 10 មីក្រូក្រាម (microgram) (1 មីក្រូក្រាម = 0.000001 ក្រាម)។

សាស្ត្រាចារ្យ Milo និងលោក Sender សង្ឃឹមថា ការសិក្សាស្រាវជ្រាវនេះ នឹងជំរុញឱ្យមានការពិសោធថ្មីៗ ប្រកបដោយភាពច្នៃប្រឌិតបន្ថែមទៀត។ លទ្ធផលនៃការរកឃើញនេះ ត្រូវបានចុះផ្សាយនៅលើទស្សនាវដ្ដី Proceedings of the National Academy of Sciences (PNAS)៕

ប្រភព៖ Live Science
ប្រែសម្រួល៖ បុត្រា

June 10, 2021

សហរដ្ឋអាមេរិក មានគម្រោងផ្ដល់វ៉ាក់សាំង Covid-19 ចំនួន 500លានដូស ដល់បណ្ដាប្រទេស

ប្រធានាធិបតី Joe Biden នឹងប្រកាសជាផ្លូវការនូវគម្រោងទិញវ៉ាក់សាំងបង្ការវីរុសCovid-19 ចំនួន 500លានដូស ដើម្បីចែកឱ្យបណ្ដាប្រទេសដែលរងផលប៉ះពាល់ពីវិបត្តិសុខភាព នៅក្នុងកិច្ចប្រជុំរបស់ក្រុមប្រទេស G7។

សារព័ត៌មាននៅ សហរដ្ឋអាមេរិក ដកស្រង់ប្រភពព័ត៌មាននានា កាលពីថ្ងៃទី9 ខែមិថុនា ឱ្យដឹងថា អាជ្ញាធររបស់លោក Biden មានគម្រោងទិញវ៉ាក់សាំង Covid-19 ចំនួន 500លានដូស ពីក្រុមហ៊ុន Pfizer-BioNTech ដើម្បីចែកឱ្យប្រទេសផ្សេងៗក្នុងពិភពលោក។

ប្រធានាធិបតីសហរដ្ឋអាមេរិក នឹងប្រកាសជាផ្លូវការអំពីគម្រោងខាងលើនេះ នៅក្នុងកិច្ចប្រជុំរបស់ក្រុមប្រទេសឧស្សាហកម្មរីកចម្រើនជាងគេក្នុងពិភពលោក (G7) ដែលនឹងត្រូវធ្វើឡើងនៅក្នុងប្រទេសអង់គ្លេស នាពេលដ៏ខ្លីខាងមុខ។ នេះបើតាមសារព័ត៌មាន Washington Post និង New York Times។

ប្រធានាធិបតី Biden ក៏បាននិយាយដល់បញ្ហានេះ នៅពេលឆ្លើយនឹងសំណួររបស់ក្រុមអ្នកសារព័ត៌មាន មុនពេលលោកធ្វើដំណើរទៅកាន់ទ្វីបអឺរ៉ុប។ លោកបញ្ជាក់ថា៖ «ខ្ញុំមានផែនការ ហើយនឹងប្រកាសឆាប់ៗនេះ»។

ចំណែកសារព័ត៌មាន Times បានឱ្យដឹងថា លោក Biden រួមនឹងនាយកប្រតិបត្តិនៃក្រុមហ៊ុន Pfizer លោក Albert Bourla នឹងចូលរួមសន្និសីទសារព័ត៌មានមួយ ដើម្បីប្រកាសអំពីគម្រោងខាងលើ។

យោងតាមសារព័ត៌មាន Times កិច្ចព្រមព្រៀងនេះនឹងអនុញ្ញាតឱ្យ សហរដ្ឋអាមេរិក មិនត្រូវបង់ថ្លៃដែលរួមទាំងខ្ទង់ចំណេញសម្រាប់វ៉ាក់សាំងដែលបានបញ្ជាទិញ ជាមួយនឹងគម្រោងទទួលបាន 200លានដូស ក្នុងឆ្នាំនេះ និង 300លានដូសក្នុងឆ្នាំ2022។

បច្ចុប្បន្ន សហរដ្ឋអាមេរិក បានចាក់វ៉ាក់សាំងបង្ការ Covid-19 រួចរាល់ ជូនដល់ពលរដ្ឋជាងពាក់កណ្ដាល នៃប្រទេសនេះ និងបានឱ្យដឹងថា អត្រានៃករណីឆ្លង បានថយចុះក្នុងរយៈពេលកន្លង៕

ប្រភព៖ Reuters
ប្រែសម្រួល៖ បុត្រា

June 10, 2021

ស្ថានភាព COVID-19 នៅកម្ពុជា និងពិភពលោក គិតត្រឹមព្រឹកថ្ងៃទី10 ខែមិថុនា ឆ្នាំ2021

ក្រសួងសុខាភិបាល នាព្រឹកថ្ងៃទី10 ខែមិថុនា ឆ្នាំ2021 នេះ បានឱ្យដឹងថា កម្ពុជា បានរកឃើញអ្នកវិជ្ជមាននឹង Covid-19 ចំនួន 426នាក់, អ្នកជាចំនួន 760នាក់ និងអ្នកស្លាប់ថ្មីចំនួន 11នាក់បន្ថែមទៀត នៅក្នុងថ្ងៃទី9 ខែមិថុនា ឆ្នាំ2021។

គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹង Covid-19 សរុបចំនួន 36,666នាក់ ក្នុងនោះមាន 300នាក់បានបាត់បង់ជីវិត,

29,807នាក់បានជា និងប្រមាណ 6,900នាក់ កំពុងទទួលការព្យាបាល។ ព័ត៌មានបន្ថែម សូមអានរបាយការណ៍សង្ខេបខាងក្រោម។

នៅទូទាំងពិភពលោក គិតមកដល់ថ្ងៃនេះ មានអ្នកជំងឺCovid-19 សរុបចំនួន 175,181,016នាក់ត្រូវបានរកឃើញ ក្នុងនោះមាន 158,698,660នាក់បានជា, 3,777,167នាក់បានស្លាប់ និង 12,705,189នាក់កំពុងព្យាបាល៕

ប្រភព៖ ក្រសួងសុខាភិបាល, Worldometers
ដកស្រង់៖ បុត្រា

June 10, 2021

ទិដ្ឋភាពដងផ្លូវក្នុងទីក្រុង Mumbai ក្លាយជាទន្លេ

ទីក្រុង Mumbai ដែលជាមជ្ឈមណ្ឌលហិរញ្ញវត្ថុរបស់ប្រទេសឥណ្ឌា កាលពីថ្ងៃទី9 ខែមិថុនាកន្លងទៅ មានភ្លៀងធ្លាក់ខ្លាំងរហូតដល់ 12ម៉ោង បណ្ដាលឱ្យផ្លូវនិងតំបន់នានាក្នុងទីក្រុងនេះ ត្រូវលិចដោយជំនន់ទឹកភ្លៀង។

រដូវភ្លៀងនៅប្រទេសឥណ្ឌា អូសបន្លាយពីខែមិថុនា ដល់ខែកញ្ញា។ ប្រទេសនេះ ត្រូវរងគ្រោះដោយសារទឹកជំនន់ជារៀងរាល់ឆ្នាំ។ កាលពីថ្ងៃទី9 ខែមិថុនា តំបន់មួយចំនួននៅក្នុងទីក្រុង និងនៅជាយក្រុង Mumbai មានភ្លៀងធ្លាក់ខ្លាំង រួមនឹងមានផ្គររន្ទះនាពេលព្រឹក។

ទីក្រុង Mumbai មានភ្លៀងធ្លាក់ទៅដល់ 222មម ក្នុងរយៈពេល 12ម៉ោង ស្របពេលដែលទឹកសមុទ្រជោរឡើងដល់ 4.6ម៉ែត្រ ធ្វើឱ្យទឹកភ្លៀងមិនអាចហូរចូលសមុទ្របាន នាំឱ្យដងផ្លូវក្នុងទីក្រុង ផ្លូវរថភ្លើង និងតំបន់ក្បែរខាងនៃទីក្រុងនេះ ត្រូវលិចលង់។

ភ្លៀងធំ នាំឱ្យប៉ូលិសត្រូវផ្អាកដំណើរការរថភ្លើងក្រោមដីចំនួន 4ខ្សែ ចំណែកអ្នកបើកបររថយន្តក៏ត្រូវទុកចោលរថយន្តនៅលើដងផ្លូវ។ ប៉ូលិសបានអំពាវនាវឱ្យប្រជាជននៅតែក្នុងផ្ទះ បើសិនមិនមានកិច្ចការចាំបាច់ និងហាមមិនឱ្យចូលទៅកាន់តំបន់លិចទឹក។

ទឹកជំនន់នៅទីក្រុង Mumbai ជម្រៅរហូតដល់ស្មើនឹងពោះរបស់មនុស្សពេញវ័យ។ សកម្មភាពរំដោះទឹកជំនន់ កំពុងត្រូវបានធ្វើឡើងយ៉ាងញាប់ដៃ ញាប់ជើង។

នាយកដ្ឋានគ្រប់គ្រងអាកាសធាតុឥណ្ឌា (IMD) បានប្រកាសអាសន្នកម្រិតពណ៌ក្រហម (កម្រិតខ្ពស់បំផុត) សម្រាប់ទីក្រុង Mumbai កាលពីថ្ងៃទី9 ខែមិថុនា និងប្រកាសអាសន្នកម្រិតពណ៌លឿង ដោយព្យាករថា នឹងមានភ្លើងធំ រហូតដល់ធំខ្លាំង ក្នុងរយៈពេល 4ថ្ងៃទៀត៕

ប្រភព៖ AFP
ប្រែសម្រួល៖ បុត្រា

June 10, 2021

(វីដេអូ)-រលំអគារ សង្កត់លើរថយន្តក្រុង! មនុស្សជិត 20នាក់បានស្លាប់ និងរងរបួសធ្ងន់ធ្ងរ

កូរ៉េខាងត្បូង៖ អគារកម្ពស់ 5ជាន់ ដែលកំពុងត្រូវបានរុះរើកាលពីម្សិលមិញ (9 មិថុនា) ស្រាប់តែបាក់រលំ សង្កត់លើរថយន្តក្រុងមួយគ្រឿង បណ្ដាលឱ្យមនុស្សចំនួន 9នាក់បាត់បង់ជីវិត។

អង្គភាពពន្លត់អគ្គិភ័យរបស់ កូរ៉េខាងត្បូង បានឱ្យដឹងថា ករណីគ្រោះថ្នាក់នេះ កើតឡើងនៅទីក្រុង Gwangju ចម្ងាយពីរដ្ឋធានី សេអ៊ូល 270គម ទៅទិសនិរតី។ នៅក្នុងវីដេអូដែលថតបានដោយកាមេរ៉ាសុវត្ថិភាព បង្ហាញថា ផ្ទាំងបេតុងដ៏ធំនៃអគារ បានបាក់រលំសង្កត់លើរថយន្តក្រុងមួយគ្រឿងដែលកំពុងដឹកអ្នកដំណើរចំនួន 17នាក់។ ក្រុមប្រតិកម្មរហ័ស ជួយសង្គ្រោះមនុស្សបាន 8នាក់ ចេញពីរថយន្ត ប៉ុន្តែ ពួកគេសុទ្ធតែរងរបួសធ្ងន់ធ្ងរ ខណៈអ្នកដំណើរ 9នាក់ទៀត បានបាត់បង់ជីវិត។ អ្នកបើកបររថយន្តរងគ្រោះ ក៏ស្ថិតក្នុងចំណោមអ្នករងរបួសនេះដែរ។

បុគ្គលិកពន្លត់អគ្គិភ័យ Kim Seok-sun ឱ្យដឹងថា កម្មករដែលមានភារកិច្ចរុះរើ បានចាកចេញពីអគារនេះ មុនពេលវាដួលរលំ។ បច្ចុប្បន្ន គេមិនទាន់រកឃើញមូលហេតុដែលនាំឱ្យមានករណីនេះនៅឡើយ។

កូរ៉េខាងត្បូង ធ្លាប់មានគ្រោះថ្នាក់ទាក់ទងនឹងហេដ្ឋារចនាសម្ព័ន្ធ ជាច្រើនករណីមកហើយ។ កាលពីឆ្នាំ1995 មានករណីបាក់អគារហាងទំនិញមួយ បណ្ដាលឱ្យមនុស្សជាង 500នាក់ត្រូវស្លាប់ និងឆ្នាំ1994 មនុស្សចំនួន 49នាក់បានបាត់បង់ជីវិត ដោយសារករណីបាក់ស្ពានមួយកន្លែងផងដែរ៕

ប្រភព៖ Reuters
ប្រែសម្រួល៖ បុត្រា

June 10, 2021

Category: អន្តរជាតិ