អន្តរជាតិ - La Reine Media

ការចាក់វ៉ាក់សាំងលាយឆ្លាស់គ្នា ជាជម្រើសមានសក្ដានុពលក្នុងការប្រឆាំង COVID-19

ការចាក់វ៉ាក់សាំងលាយឡំគ្នា ដើម្បីបង្ការការឆ្លងវីរុស COVID-19 កំពុងក្លាយជាដំណោះស្រាយដែលមានសក្តានុពល នៅពេលវីរុសបំប្លែងខ្លួនថ្មីប្រកបដោយគ្រោះថ្នាក់ កំពុងគំរាមកំហែងដល់យុទ្ធនាការប្រយុទ្ធប្រឆាំងនឹងវិបត្តិសុខភាពនៅទូទាំងសកលលោក។

អង្គការសុខភាពពិភពលោក (WHO) កាលពីថ្ងៃទី 12 កក្កដា បានលើកឡើងថា បណ្ដាប្រទេសពុំគួរប្រញាប់ចាក់វ៉ាក់សាំងលាយឡំគ្នានោះទេ ដោយសារតែទិន្នន័យនៃការសិក្សាស្រាវជ្រាវស្ដីពីប្រសិទ្ធភាព និងផលប៉ះពាល់ដល់សុខភាព នៅមានកំណត់។ ប៉ុន្តែ បញ្ហាយឺតយ៉ាវនៃប្រភពផ្គត់ផ្គង់វ៉ាក់សាំង រួមនឹងការឆ្លងរាលដាលខ្លាំងរបស់វីរុសបំប្លែងខ្លួនថ្មីនៅក្នុងមួយរយៈពេលចុងក្រោយនេះ ធ្វើឱ្យបណ្ដាប្រទេសត្រូវគិតគូរអំពីការប្ដូរយុទ្ធសាស្ត្រក្នុងការចាក់វ៉ាក់សាំង។

មកដល់បច្ចុប្បន្ន មានប្រទេសជាច្រើនកំពុងពិចារណាទៅលើការចាក់វ៉ាក់សាំងលាយឡំគ្នា សម្រាប់ដូសទីពីរ ឬដូសបន្ថែមដើម្បីធានាលើការការពារពលរដ្ឋរបស់ខ្លួន។ នៅ កម្ពុជា កាលពីថ្ងៃទី 01 សីហា ប្រមុខរដ្ឋាភិបាល បានមានប្រសាសន៍ថា អ្នកដែលបានចាក់វ៉ាក់សាំង Sinopharm ឬ Sinovac រួចរាល់ នឹងត្រូវបានចាក់វ៉ាក់សាំង AstraZeneca 1 ម្ជុលបន្ថែមទៀត ខណៈដែលអ្នកចាក់ AstraZeneca រួចរាល់ នឹងត្រូវចាក់រំលឹកមួយម្ជុលទៀត ដោយប្រើវ៉ាក់សាំង Sinovac វិញម្ដង។

ប្រទេសថៃ ឯណោះវិញ កាលពីថ្ងៃទី 12 កក្កដា ក៏បានឱ្យដឹងថា ប្រទេសនេះចាក់ AstraZeneca ចំនួន 2 ដូស ចំពោះអ្នកដែលបានចាក់ Sinovac ចំនួន 1 ដូសរួចហើយ។

វេជ្ជបណ្ឌិត Vinod RMT Balasubramaniam សាស្ត្រាចារ្យនៃសាកលវិទ្យាល័យ Monash ប្រទេសម៉ាឡេស៊ី បានឱ្យដឹងថា៖ «ការចាក់វ៉ាក់សាំងលាយឆ្លាស់គ្នានេះ ត្រូវបានយកចិត្តទុកដាក់កាន់តែច្រើនឡើង។ ទិន្នន័យដែលត្រូវបានប្រកាសចុងក្រោយនេះ បានបង្ហាញអំពីប្រសិទ្ធភាព និងសមត្ថភាពនៃការការពារខ្ពស់ នៅចំពោះមុខវ៉ារ្យ៉ង់នានារបស់ COVID-19»។

វិទ្យាស្ថានសេរ៉ូមរបស់ ដាណឺម៉ាក កាលពីថ្ងៃទី 02 សីហា ក៏បានបង្ហើបឱ្យដឹងថា ការចាក់ Pfizer ឬ Moderna បន្ទាប់ពីបានចាក់ AstraZeneca បង្កើតបានជាស្រទាប់ការពារដែលល្អជាង សម្រាប់មនុស្ស។ ក្រុមអ្នកវិទ្យាសាស្ត្របានរកឃើញថា រយៈពេល 14 ថ្ងៃ បន្ទាប់ពីបានចាក់លាយឆ្លាស់គ្នា ហានិភ័យនៃការឆ្លង COVID-19 បានថយចុះ 88% ប្រើធៀបនឹងអ្នកដែលមិនទាន់បានចាក់។

ការស្រាវជ្រាវមួយរបស់ប្រទេស កូរ៉េខាងត្បូង កាលពីខែកក្កដា បានឱ្យដឹងថា ការចាក់ Pfizer ចំនួន 2 ដូស ក្រោយពីចាក់ AstraZeneca 1 ដូស ជួយបង្កើនកម្លាំងការពាររាងកាយខ្ពស់ជាង 6 ដង ធៀបនឹងការចាក់តែ AstraZeneca 2 ដូស។

សាកលវិទ្យាល័យ Oxford របស់ប្រទេសអង់គ្លេស កាលពីដើមឆ្នាំនេះ ក៏បានបញ្ជាក់ថា ការចាក់លាយ Pfizer ជាមួយនឹង AstraZeneca ក៏មានប្រយោជន៍ច្រើនដល់អង្គបដិប្រាណ។

ចំណែកលទ្ធផលនៃការសិក្សាស្រាវជ្រាវមួយរបស់មូលនិធិវិនិយោគផ្ទាល់ នៃប្រទេស រុស្ស៊ី (RDIF) ដែលបានប្រកាសកាលពីថ្ងៃទី 30 កក្កដា 2021 ក៏បានឱ្យដឹងថា ការសាកល្បងចាក់វ៉ាក់សាំង Sputnik V និង AstraZeneca លាយឆ្លាស់គ្នា បានបង្ហាញថា ពុំមានផលប៉ះពាល់ធ្ងន់ធ្ងរ និងមិនបានរកឃើញករណីឆ្លងនោះទេ នៅក្នុងចំណោមអ្នកស្ម័គ្រចិត្ត។

ក្រុមមន្ត្រីសុខាភិបាលរបស់ អាល្លឺម៉ង់ កាលពីថ្ងៃទី 2 សីហា បានប្រាប់ថា ប្រទេសនេះ មានគម្រោងប្រើប្រាស់ Pfizer និង Moderna ដើម្បីចាក់ដូសបន្ថែម សម្រាប់ពលរដ្ឋវ័យចំណាស់ និងមានប្រព័ន្ធការពាររាងកាយខ្សោយ ចាប់ពីខែកញ្ញា ដោយមិនខ្វល់ថា មុននេះ ពលរដ្ឋបានចាក់វ៉ាក់សាំងប្រភេទណានោះទេ។

មកដល់បច្ចុប្បន្ន មនុស្សជាង 200 លាននាក់ បានឆ្លង COVID-19 និងជាង 4 លាននាក់បានស្លាប់ដោយសារវីរុសនេះ រាប់ចាប់ពីវាបានបង្ហាញខ្លួនដំបូងនៅទីក្រុង Wuhan ប្រទេសចិន កាលពីចុងឆ្នាំ 2019។ វ៉ាក់សាំងចំនួន 4.36 ពាន់លានដូស ត្រូវបានចាក់នៅទូទាំងសកលលោក ដោយជាមធ្យម ចាក់បាន 40.31លានដូសក្នុង 1 ថ្ងៃ។ ប្រជាជនចំនួន 29.6% របស់ពិភពលោក បានចាក់យ៉ាងតិច 1 ដូស និង 15.2% បានចាក់រួចរាល់។ ដោយឡែក នៅក្នុងបណ្ដាប្រទេសអ្នកមាន ពលរដ្ឋរបស់ពួកគេ ប្រមាណ ពី 60-80% បានចាក់យ៉ាងតិច 1 ដូស ខណៈដែលនៅក្នុងបណ្ដាប្រទេសក្រីក្រ អត្រានេះប្រហាក់ប្រហែលនឹង 1.1% ប៉ុណ្ណោះ។ នេះបើតាម Our World in Data។

ទោះជាយ៉ាងណាក៏ដោយ ក្រុមអ្នកវិទ្យាសាស្ត្របានព្រមានថា សូម្បីតែវ៉ាក់សាំងដែលមានប្រសិទ្ធភាពបំផុត ក៏មិនល្អគ្រប់ដប់នោះដែរ នៅពេលដែលអត្រានៃការឆ្លងបានកើនឡើងខ្ពស់ខ្លាំង បើទោះមិនមានហានិភ័យខ្ពស់ដល់ថ្នាក់ចូលពេទ្យ ឬស្លាប់។ ដូច្នេះ វិធានការរក្សាគម្លាតសង្គម ការរឹងបន្តឹងការជួបជុំ នៅតែត្រូវបានគេចាត់ទុកថាជារឿងសំខាន់នៅក្នុងការប្រយុទ្ធប្រឆាំងនឹង COVID-19 ពិសេសគឺនៅពេលត្រូវប្រឈមមុខនឹង វ៉ារ្យ៉ង់ Delta៕

August 7, 2021

វេជ្ជបណ្ឌិតប្រចាំសេតវិមាន ព្រមានអំពី COVID-19 បំប្លែងខ្លួនថ្មីផ្សេងទៀត ដែលសាហាវជាង Delta

វេជ្ជបណ្ឌិត Anthony Fauci ទីប្រឹក្សាផ្នែកសុខាភិបាលរបស់ សេតវិមាន បានព្រមានថា COVID-19 នឹងបន្តកើតមានវ៉ារ្យ៉ង់ថ្មីៗ ដើម្បីគេចពីវ៉ាក់សាំង បើសិនមនុស្សជាច្រើននៅតែមិនព្រមចាក់វ៉ាក់សាំងបង្ការ។

«ប្រការនោះនឹងកើតឡើង បើសិនយើងមិនអាចគ្រប់គ្រងការឆ្លងរាលដាលក្នុងសហគមន៍។ នោះក៏ជាមូលហេតុដែលខ្ញុំ និងសហការី តែងនិយាយថា អ្វីដែលសំខាន់ជាទីបំផុត នោះគឺយើងត្រូវតែចាក់វ៉ាក់សាំងឱ្យបានកាន់តែច្រើន កាន់តែល្អ» លោក Anthony Fauci ព្រមានដូច្នេះ កាលពីថ្ងៃទី 05 សីហា ឆ្នាំ 2021។

វេជ្ជបណ្ឌិតប្រចាំសេតវិមានរូបនេះ និយាយថា សហរដ្ឋអាមេរិក «មានសំណាង» នៅពេលមានវ៉ាក់សាំងទប់ទល់នឹងវីរុសបំប្លែងថ្មី ប៉ុន្តែ ប្រការនោះអាចក្លាយជារឿងឥតប្រយោជន៍ បើសិនវ៉ារ្យ៉ង់ថ្មីៗជាច្រើនផ្សេងទៀត ដែលមានភាពកាចសាហាវជាងនេះ បង្ហាញខ្លួន។

«បើវីរុសបំប្លែងថ្មីផ្សេងទៀតកើតឡើង និងមានលទ្ធភាពឆ្លងរាលដាលប្រហាក់ប្រហែលបច្ចុប្បន្ន ប៉ុន្តែ សាហាវជាង នោះយើងពិតជាអាចជួបបញ្ហាធំ។ ការដែលមិនចាក់វ៉ាក់សាំង នឹងនាំឱ្យវីរុសស្ថិតនៅក្នុងសហគមន៍» លោក Anthony Fauci បន្ថែម។

យោងតាមទិន្នន័យពីសាកលវិទ្យាល័យ Johns Hopkins គិតត្រឹមថ្ងៃទី 04 ខែសីហា សហរដ្ឋអាមេរិក រកឃើញជាមធ្យមជិត 94,000 ករណី/ថ្ងៃ រយៈពេល 7 ថ្ងៃជាប់គ្នា កើន 48% ធៀបនឹង 1 សប្ដាហ៍មុន។ Fauci ព្យាករថា ករណីឆ្លងថ្មីអាចឡើងដល់ពី 100,000 ទៅ 200,000 នាក់ នៅពេលវ៉ារ្យ៉ង់ Delta ឆ្លងរាលដាលខ្លាំង។

លោក Fauci ឱ្យដឹងថា ទូទាំង សហរដ្ឋអាមេរិក នៅមានពលរដ្ឋប្រហែល 93 លាននាក់ទៀតដែលមានលក្ខខណ្ឌគ្រប់គ្រាន់ មិនទាន់បានចាក់វ៉ាក់សាំង។

កាលពីខែមុន វេជ្ជបណ្ឌិត Stephen Morse សាស្ត្រាចារ្យនៃមជ្ឈមណ្ឌលសុខាភិបាល Irving នៃសាកលវិទ្យាល័យ Columbia ក៏មានការព្រួយបារម្ភអំពីការកើតមានវ៉ារ្យ៉ង់ថ្មីៗបន្ថែមទៀត។ សាស្ត្រចារ្យរូបនេះ ឱ្យដឹងថា «វដ្ដរបស់វ៉ារ្យ៉ង់ថ្មីនានា បន្តកើតមាន ឱ្យតែវីរុសឆ្លងរាលដាលពីមនុស្សម្នាក់ ទៅមនុស្សម្នាក់ និងរស់នៅក្នុងសហគមន៍ វានឹងបន្តវិវឌ្ឍន៍»។ លោកបណ្ឌិតបន្ថែមថា «ខ្ញុំពិតជាភ្ញាក់ផ្អើលខ្លាំងណាស់ បើសិនជា Delta គឺជាវ៉ារ្យ៉ង់ចុងក្រោយ»។

វេជ្ជបណ្ឌិត Barbara Taylor ជាប្រធាន និងជាសាស្ត្រាចារ្យផ្នែកជំងឺឆ្លងប្រចាំសាកលវិទ្យាល័យ UT Health San Antonio និយាយថា បណ្ដាវីរុសបំប្លែងខ្លួនថ្មីក្នុងពេលអនាគត «ដែលមានលទ្ធភាពឆ្លងរាលដាលខ្ពស់ជាង» កំពុងតែមានលក្ខខណ្ឌអំណោយផលក្នុងការវិវឌ្ឍ»។

វ៉ារ្យ៉ង់ Delta ថ្វីបើមិនទាន់ត្រូវបានបញ្ជាក់ជាផ្លូវការថា បង្កជំងឺធ្ងន់ធ្ងរជាង COVID-19 ដំបូង និងវ៉ារ្យ៉ងដទៃមុននោះក៏ពិតមែន ប៉ុន្តែ វាត្រូវបានអ្នកវិទ្យាសាស្ត្របញ្ជាក់ថា មានលទ្ធភាពឆ្លងរាលដាលបានលឿនជាងឆ្ងាយណាស់។ ក្រុមអ្នកស្រាវជ្រាវរបស់សាកលវិទ្យាល័យ Yale បានរកឃើញថា Delta ឆ្លងរាលដាលលឿនជាង 50% ធៀបនឹងវីរុសបំប្លែងថ្មី ប្រភេទ Alpha៕

August 6, 2021

Hubble ថតបាន «សង្គ្រាមដណ្ដើមទឹកដី» រវាង កាឡាក់ស៊ីចំនួនបី ក្នុងប្រព័ន្ធ Arp 195

កែវយឹតអវកាស Hubble ទើបតែបានផ្ញើមកកាន់ផែនដីនូវរូបថតរបស់ក្រុមកាឡាក់ស៊ី Arp 195 ដែលជាប្រព័ន្ធមួយដ៏អស្ចារ្យបំផុតនៅក្នុងចក្រវាល។

ក្រោយការបាញ់បង្ហោះបានជាង 30 ឆ្នាំ កែវយឹតអវកាស Hubble របស់ NASA (ទីភ្នាក់ងារអវកាសអាមេរិក) និង ESA (ទីភ្នាក់ងារអវកាសអឺរ៉ុប) កំពុងស្ថិតក្នុងដំណាក់កាលចុងក្រោយនៃអាយុកាលរបស់វា ដូច្នេះ ក្រុមអ្នកវិទ្យាសាស្ត្រមិនចង់បាត់បង់ពេលវេលាមួយវិនាទីណាទាំងអស់ ក្នុងការប្រើប្រាស់ឧបករណ៍នេះ។ ដូច្នេះ Hubble ត្រូវបានបញ្ជាឱ្យថតយករូបភាពដោយប្រើពេលខ្លី នៅចន្លោះដំណាក់កាលនីមួយៗនៃការសង្កេតតារារយៈពេលវែង។ រូបថតថ្មីស្ដីពី Arp 195 គឺជាឧទាហរណ៍មួយក្នុងករណីនេះ។

Arp 195 គឺជាប្រព័ន្ធកាឡាក់ស៊ីបី ដែលកំពុងប៉ះទង្គិចគ្នា រួមមានកាឡាក់ស៊ី UGC 04653, LEDA 24981 និង 2MASX J08535462+3508439។ ប្រព័ន្ធនេះស្ថិតនៅចម្ងាយប្រមាណ 763 លានឆ្នាំពន្លឺពីផែនដី និងនៅក្នុងកញ្ចុំផ្កាយ Lynx (Lynx Constellation) ហើយវាត្រូវបានដាក់ចូលក្នុងក្រុមកាឡាក់ស៊ីពិសេសបំផុតក្នុងចក្រវាល ដែលមានឈ្មោះថា Atlas of Peculiar Galaxies។

រូបថតនេះបង្ហាញថា បណ្ដាកាឡាក់ស៊ីរបស់ Arp 195 កំពុងជាប់នៅក្នុង «សង្គ្រាមដណ្ដើមទឹកដី» ប្រកបដោយភាពទាក់ទាញ។ ដោយសារតែគោចរមកក្បែរគ្នាខ្លាំងពេក ពួកវាក៏ហែកហួរគ្នាចេញជា 3 ទិស ជាដំណើរការមួយដែលចុងក្រោយអាចនាំឱ្យមានព្រឹត្តិការណ៍ច្របាច់បញ្ចូលគ្នាជាកាឡាក់ស៊ីតែមួយ។

រូបថតនេះត្រូវបានផ្ដិតយកដោយឧបករណ៍សង្កេតកម្រិតខ្ពស់ (ACS) និងកាមេរ៉ាសង្កេតផ្ទៃមេឃឌីជីថល Sloan (SDSS) របស់យាន ឬកែវយឹត Hubble។

បើត្រូវបានបាញ់បង្ហោះឡើងទៅទីអវកាសកាលពីថ្ងៃទី 24 មេសា ឆ្នាំ 1990 ប៉ុន្តែ Hubble បានដំណើរការយូរជាងអាយុកាលដែលបានកំណត់រហូតដល់ 15 ឆ្នាំ។ NASA បានរៀបចំគម្រោងជំនួសឧបករណ៍នេះ ដោយគម្រោងកែវយឹតអវកាស James Webb ដែលគ្រោងនឹងត្រូវបាញ់បង្ហោះនៅចុងខែតុលា ឬខែវិច្ឆិកា ឆ្នាំ 2021 នេះ៕

August 5, 2021

ការស្រាវជ្រាវ៖ អ្នកបានចាក់វ៉ាក់សាំង មានហានិភ័យឆ្លង COVID-19 ទាបជាងច្រើនដង ធៀបនឹងអ្នកមិនទាន់ចាក់

ការសិក្សាស្រាវជ្រាវថ្មីរបស់ប្រទេស អង់គ្លេស បានបង្ហាញថា អ្នកដែលបានទទួលការចាក់វ៉ាក់សាំងគ្រប់ចំនួនពីរដូស មានហានិភ័យឆ្លងវីរុស COVID-19 ទាបជាង 3 ដងឯណោះ បើធៀបជាមួយនឹងក្រុមមនុស្សដែលមិនទាន់បានចាក់។

ការសិក្សាស្រាវជ្រាវរបស់កម្មវិធីតាមដាន COVID-19 ដែលមានឈ្មោះថា REACT-1 ដឹកនាំដោយមហាវិទ្យាល័យអធិរាជទីក្រុងឡុងដ៍ (Imperial College London) និងក្រុមហ៊ុន Ipsos MORI នេះ គឺយោងទៅតាមលទ្ធផលនៃការធ្វើតេស្តរបស់មនុស្សជាង 98,000 នាក់ ចាប់ពីថ្ងៃទី 24 មិថុនា ដល់ 12 កក្កដា។ លទ្ធផលបានបង្ហាញថា អ្នកដែលមិនទាន់បានចាក់វ៉ាក់សាំង COVID-19 មានហានិភ័យឆ្លងវីរុស ក្នុងអត្រា 1.21% គឺខ្ពស់ជាង 3 ដង ធៀបនឹងអ្នកបានចាក់រួចរាល់ ដែលមានអត្រាឆ្លងត្រឹមតែ 0.4%។

ការស្រាវជ្រាវក៏បានឱ្យដឹងថា បើសិនអ្នកបានចាក់វ៉ាក់សាំងរួចរាល់ ឆ្លង COVID-19 ពួកគេក៏មានហានិភ័យចម្លងវីរុសទៅអ្នកដទៃ ទាបជាងផងដែរ ដោយសារតែបរិមាណវីរុសក្នុងរាងកាយមានចំនួនតិច។

សាស្ត្រាចារ្យ Paul Elliott មកពីសាលាសុខាភិបាលសាធារណៈ របស់មហាវិទ្យាល័យ Imperial College London និយាយថា៖ «ការរកឃើញបង្ហាញថា វ៉ាក់សាំងចំនួន 2 ដូស បានផ្ដល់ស្រទាប់ការពារបានល្អ នៅចំពោះមុខហានិភ័យនៃការឆ្លងវីរុស»។

នៅក្នុងចំណោមសំណាកជាង 98,000 ករណី ក្រុមអ្នកវិទ្យាសាស្ត្របានរកឃើញ 527 សំណាក មានផ្ទុកវីរុស ដែលនេះគឺប្រហាក់ប្រហែលនឹងអត្រា 0.63%។ តួលេខនេះ កើន 4 ដង បើធៀបនឹងអត្រា 0.15% នៅក្នុងរបាយការណ៍ដែលបានប្រកាសកាលពីថ្ងៃទី 17 មិថុនា ស្រាវជ្រាវចាប់ពីថ្ងៃទី 20 ឧសភា ដល់ថ្ងៃទី 07 មិថុនា។ ចំណែកអត្រាឆ្លងខ្ពស់បំផុតដែលត្រូវបានកត់ត្រានៅទីក្រុងឡុងដ៍ គឺ 0.94%៕

August 5, 2021

វិធីសាស្ត្រដែល តៃវ៉ាន់ ប្រើ និងទទួលបានជោគជ័យ នៅក្នុងការប្រែត្រលប់ស្ថានការណ៍ COVID-19

នៅក្នុងពាក់កណ្ដាលខែឧសភា ជីវភាពសុខសាន្តរបស់ប្រជាជននៅកោះ តៃវ៉ាន់ ស្រាប់តែត្រូវក្រឡាប់ចក្រ ដោយសារតែរលកនៃការឆ្លងរាលដាល COVID-19 ដ៏ធ្ងន់ធ្ងរ ប៉ុន្តែ បច្ចុប្បន្ន កោះនេះបែរជាគ្រប់គ្រងស្ថានការណ៍បានទាំងស្រុង។

កោះតៃវ៉ាន់ ធ្លាប់ត្រូវបានគេចាត់ទុកថាជា ដែនដីគំរូក្នុងការប្រយុទ្ធប្រឆាំងនឹង COVID-19 របស់ពិភពលោក។ ក្នុងគ្រាដែលតំបន់ផ្សេងៗ ជួបនឹងបញ្ហា COVID-19 សកម្មភាពសេដ្ឋកិច្ចរបស់កោះនេះ នៅតែដំណើរការក្នុងរយៈពេលភាគច្រើននៃវិបត្តិសុខភាព។ សាលារៀន នៅតែបើកទ្វារ រោងភាពយន្ត ភោជនីយដ្ឋានពេញដោយមនុស្ស សេដ្ឋកិច្ចរីកចម្រើនខ្លាំង។

ភាពសុខសាន្តខាងលើក៏ត្រូវបានបញ្ចប់កាលពីពាក់កណ្ដាលខែឧសភា ព្រោះតែការរាតត្បាតយ៉ាងធ្ងន់ធ្ងរពីវីរុស COVID-19។ ក្នុងរយៈពេលតែកន្លះខែ តួលេខអ្នកឆ្លងវីរុសនៅ តៃវ៉ាន់ បានកើនពីជាង 1,500 ឡើងដល់ជិត 9,000 នាក់។ តួលេខអ្នកឆ្លងសរុប និងអ្នកស្លាប់សរុប កើនជាបន្តបន្ទាប់គឺ ជាង 15,700 នាក់ និងជាង 790 នាក់ ច្រើនជាងឆ្ងាយធៀបនឹងតួលេខនៃការស្លាប់ 12 នាក់ ក្នុងអំឡុងមុនពេលការឆ្លងរាលដាលផ្ទុះឡើង។

ប៉ុន្តែ ស្ថានភាពនោះ ត្រូវបានកែលម្អឡើងវិញហើយ នាប៉ុន្មានថ្ងៃចុងក្រោយនេះ។ កាលពីថ្ងៃទី 17 ឧសភា ចំនួនអ្នកឆ្លងថ្មីនៅ តៃវ៉ាន់ គឺ 535 នាក់ ខណៈដែលមធ្យមភាគក្នុងអំឡុង 7 ថ្ងៃ នៃសប្ដាហ៍មុន មានមិនដល់ 20 ករណី។ ថ្ងៃទី 26 កក្កដា តៃវ៉ាន់ បានរាយការណ៍ថា អ្នកឆ្លងក្នុងសហគមន៍ មានតែ 10 នាក់ប៉ុណ្ណោះ។

យោងតាមការអធិប្បាយរបស់ Wayne Soon មកពីសារព័ត៌មាន Diplomat វីធីសាស្ត្រសំខាន់ដំបូងដែលជួយឱ្យ តៃវ៉ាន់ គ្រប់គ្រងបាននូវការឆ្លងរាលដាល នោះគឺ ការបង្កើនការអនុវត្តយុទ្ធសាស្ត្រដែលកោះនេះ បានធ្វើតាំងពីមុនមក រួមមាន ការពាក់ម៉ាស ការធ្វើចត្តាឡីស័ក និងការតាមរកអ្នកពាក់ព័ន្ធ។ តាំងពីខែមេសា ឆ្នាំ 2020 តៃវ៉ាន់ បានចាប់ផ្ដើមបង្គាប់ឱ្យពាក់ម៉ាសនៅលើមធ្យោបាយធ្វើដំណើរសាធារណៈ។ ក្រោយមក អាជ្ញាធរក៏ពង្រីកវិសាលភាពនៃការកំណត់ និងចេញបទបញ្ជាឱ្យពាក់ម៉ាស នៅពេលចេញពីផ្ទះ។

តៃវ៉ាន់ ក៏បន្ថែមមជ្ឈមណ្ឌលចត្តាឡីស័ក សម្រាប់អ្នកជំងឺ COVID-19 ក្នុងនោះមានទាំងសណ្ឋាគារ និងទីតាំងដែលគ្រប់គ្រងដោយរដ្ឋ។ ប្រការនេះ បានជួយកាត់បន្ថយការឆ្លងរាលដាលក្នុងគ្រួសារ និងសហគមន៍។

Wayne Soon វាយតម្លៃថា កត្តាសំខាន់ទីពីរ ដែលនាំមកនូវជោគជ័យឱ្យ តៃវ៉ាន់ នោះគឺ អាជ្ញាធរចេះស្ដាប់យោបល់ និងការប្ដូរផ្លាស់គោលនយោបាយ។ ដំបូងឡើយ ពួកគេរារែកក្នុងការហាមបរិយោគអាហារក្នុងភោជនីយដ្ឋាន ព្រោះតែវិធីសាស្ត្ររក្សាគម្លាតសង្គម និងការដំឡើងកញ្ចក់ការពារ ត្រូវបានគេវាយតម្លៃថាអាចទប់ស្កាត់ការឆ្លងរាលដាល។ ប៉ុន្តែ នៅចំពោះមុខការអំពាវនាវឱ្យមានការហាមធ្វើសកម្មភាពក្នុងផ្ទះ ក្នុងបន្ទប់បិទជិត អាជ្ញាធរមូលដ្ឋានជាច្រើន ក៏យល់ព្រមធ្វើតាម។

បច្ចុប្បន្ន អាជ្ញាធរតំបន់មួយចំនួន នៅតែរក្សាបម្រាមខាងលើ ព្រោះតែខ្លាចរងការរិះគន់ និងខ្លាចការផ្ទុះឆ្លងរាលដាលជាថ្មី បើទោះជាថ្មីៗនេះ តៃវ៉ាន់ បានដកវិធានការនេះរួចហើយ នៅពេលតួលេខនៃការឆ្លង បានថយចុះ។

កាលពីដើមខែមិថុនា ចំនួនពលរដ្ឋដែលបានទទួលការចាក់វ៉ាក់សាំង COVID-19 មានមិនដល់ 2% ផង នៅក្នុងចំណោមពលរដ្ឋសរុបជាង 23 លាននាក់ ដោយសារតែប្រភពផ្គត់ផ្គង់មានកំណត់ ហើយអាជ្ញាធរ តៃវ៉ាន់ នៅតែបែរខ្នងដាក់វ៉ាក់សាំងរបស់ ចិនដីគោក ដែលបានស្នើផ្ដល់ជំនួយ។

ប៉ុន្តែ ចុងក្រោយ បក្សប្រជាធិបតេយ្យជឿនលឿន ដែលកំពុងកាន់អំណាច ក៏បានគាំទ្រឱ្យទិញវ៉ាក់សាំងរបស់ Pfizer-BioNTech ពីប្រទេស អាល្លឺម៉ង់ តាមរយៈក្រុមហ៊ុនមួយនៅ ចិនដីគោក។

បណ្ដាញសារព័ត៌មាន ក៏ត្រូវបានគេមើលឃើញថា បានចូលរួមចំណែកក្នុងការទប់ស្កាត់ COVID-19 ដោយពួកគេប្រណាំងប្រជែងក្នុងការផ្ដល់ព័ត៌មានថ្មីៗបំផុតទាក់ទងនឹងបញ្ហា COVID-19 បើទោះជាវិធីផ្ដល់ព័តមានរបស់សារព័ត៌មានមួយចំនួនតូច បាននាំឱ្យប្រជាជនមានការព្រួយបារម្ភចំពោះការចាក់វ៉ាក់សាំង។

Wayne Soon បន្ថែមថា តៃវ៉ាន់ ក៏ទទួលបានផលប្រយោជន៍ពីទង្វើល្អរបស់ខ្លួន ដែលបានធ្វើកាលពីដំណាក់កាលដំបូងនៃវិបត្តិ COVID-19។ កាលពីឆ្នាំទៅ តៃវ៉ាន់ បានផ្ដល់ជំនួយជាម៉ាស ជាង 51 លានបន្ទះ ដល់ដៃគូជាច្រើនក្នុងពិភពលោក។

ជាលទ្ធផល បណ្ដាប្រទេសដែលទទួលបានជំនួយពី តៃវ៉ាន់ ក៏បានជួយជាវ៉ាក់សាំងដល់កោះនេះ។ ក្នុងរយៈពេល 2 ខែកន្លងទៅ ជប៉ុន បានផ្ដល់ជំនួយជាវ៉ាក់សាំង AstraZeneca ជាង 3.3 លានដូស ខណៈដែល សហរដ្ឋអាមេរិក ក៏បានផ្ដល់វ៉ាក់សាំង Moderna ចំនួន 2.5 លានដូស ដល់កោះនេះ។ ប្រទេស លីទុយអានី ស្លូវ៉ាគី និងសាធារណរដ្ឋឆែក ក៏បានសន្យាផ្ដល់វ៉ាក់សាំងរាប់ម៉ឺនដូស ដល់ តៃវ៉ាន់ផងដែរ។

ក្រោយទទួលបានជំនួយជាវ៉ាក់សាំង ពីកម្មវិធី COVAX របស់អង្គការសុខភាពពិភពលោក និង សហរដ្ឋអាមេរិក បច្ចុប្បន្ន តៃវ៉ាន់ បានចាក់យ៉ាងតិច 1 ដូស ដល់ប្រជាជនចំនួន 28% ច្រើនជាងឆ្ងាយ ធៀបនឹង 1% កាលពីមុនការផ្ទះឆ្លង។

ជោគជ័យរបស់ តៃវ៉ាន់ ទំនងជាមិនអាចគង់នៅបានយូរអង្វែងនោះទេ ដោយសារតែ COVID-19 ប្រភេទ Delta។ ក៏ប៉ុន្តែ បទពិសោធន៍របស់កោះនេះ ត្រូវបានគេវាយតម្លៃថា នឹងមានសមត្ថភាពគ្រប់គ្រាន់ អាចជួយឱ្យពួកគេគ្រប់គ្រងស្ថានការណ៍បានល្អ ទៅលើរលកនៃការឆ្លងរាលដាលនាពេលខាងមុខ៕

August 5, 2021

វៀតណាម៖ ករណីវិជ្ជមាននឹងវីរុស COVID-19 កើនដល់ជាង 17 ម៉ឺននាក់

ក្រសួងសុខាភិបាល វៀតណាម នាព្រឹកនេះ (04 សីហា) បានឱ្យដឹងថា បានរកឃើញអ្នកវិជ្ជមាននឹង COVID-19 ចំនួន 4,271 នាក់បន្ថែមទៀត ក្នុងនោះមាន 1,044 នាក់ គឺជាករណីឆ្លងក្នុងសហគមន៍ នៅក្នុងថ្ងៃទី 03 ខែកក្កដា។

ទីក្រុងហូជីមិញ (សៃហ្គន) មានអ្នកវិជ្ជមានថ្មីច្រើនជាងគេ (2,365 នាក់) ខណៈខេត្តប៊ិញហ្សឿងជាប់លំដាប់លេខ 2 ដោយមានអ្នកឆ្លងថ្មី 1,032 នាក់។ ដូច្នេះ តួលេខនៃករណីឆ្លងថ្មី កើន 704 នាក់ បើធៀបនឹងម្សិលមិញ។

អ្នកវិជ្ជមានសរុបនៅទីក្រុងហូជីមិញ បានកើនឡើងដល់ 105,095 នាក់ ក្នុងគ្រាដែលខេត្តប៊ិញហ្សឿន ដែលនៅជាប់នឹងទីក្រុងហូជីមិញ មានចំនួន 20,445 នាក់។ ដោយឡែក រដ្ឋធានីហាណូយ វិញ មានអ្នកវិជ្ជមានសរុប ត្រឹមតែ 1,975 នាក់ប៉ុណ្ណោះ។

តួលេខសរុបនៃអ្នកវិជ្ជមាននឹង COVID-19 នៅ វៀតណាម គិតមកដល់បច្ចុប្បន្ន មានចំនួន 174,461 នាក់ ក្នុងនោះអ្នកបានជាសះស្បើយ មានចំនួន 50,831 នាក់, អ្នកស្លាប់ចំនួន 2,071 នាក់ និងអ្នកកំពុងព្យាបាល មានចំនួន 121,555 នាក់៕

August 4, 2021

បក្សសាធារណរដ្ឋ របស់ អាមេរិក ប្រកាសថា «COVID-19 រួចចេញពីបន្ទប់ពិសោធន៍»

បក្សសាធារណរដ្ឋ របស់ សហរដ្ឋអាមេរិក បានចេញរបាយការណ៍មួយនិយាយថា COVID-19 បានលេចធ្លាយចេញពីបន្ទប់ពិសោធន៍នៅប្រទេសចិន បើទោះជាសហគមន៍អ្នកស៊ើបការណ៍សម្ងាត់ មិនទាន់ធ្វើការសន្និដ្ឋានក៏ដោយ។

លោក Mike McCaul សមាជិកនៃគណៈកម្មការកិច្ចការបរទេសរបស់សភាជាន់ទាប នៃ សហរដ្ឋអាមេរិក កាលពីថ្ងៃទី 01 សីហា ឆ្នាំ 2021 បានប្រកាសរបាយការណ៍មួយរបស់ក្រុមសមាជិកបក្សសាធារណរដ្ឋ នៅក្នុងគណៈកម្មការនេះ ដោយមានភ័ស្ដុតាងជាច្រើន បង្ហាញថា ក្រុមអ្នកវិទ្យាសាស្ត្ររបស់វិទ្យាស្ថានវីរុសសាស្ត្រ Wuhan (WIV) របស់ ចិន កំពុងពិសោធលើការកែប្រែហ្សែនរបស់វីរុស CORONA ដើម្បីចម្លងទៅមនុស្ស ហើយសកម្មភាពដូចនេះ អាចត្រូវបានលាក់បាំង។

«ពេលនេះ យើងជឿថា ដល់ពេលដែលត្រូវលុបបំបាត់សម្មតិកម្មដែលថា វីរុសមានប្រភពពីផ្សារលក់សត្វរស់។ យើងក៏ជឿជាក់ទៅលើភាពលេចធ្លោនៃភ័ស្ដុតាងនានាដែលបញ្ជាក់ថា វីរុសបានរួចចេញពីបន្ទប់ពិសោធន៍នៅទីក្រុង Wuhan ហើយករណីលេចធ្លាយនេះ កើតឡើងមុនថ្ងៃទី 12 កញ្ញា ឆ្នាំ 2021» របាយការណ៍ខាងលើបានឱ្យដឹងដូច្នេះ។

របាយការណ៍ បានយោងទៅតាមអ្វីដែលក្រុមអ្នកតំណាងររាស្ត្ររបស់បក្សសាធារណរដ្ឋហៅថា «ព័ត៌មានថ្មី និងកម្រត្រូវបានប្រកាស» ស្ដីពីការរក្សាអនាម័យនៅឯបន្ទប់ពិសោធន៍ WIV ក្នុងនោះរួមមានទាំងសំណើកាលពីខែកក្កដា ឆ្នាំ 2019 ទាក់ទិននឹងការកែលម្អប្រព័ន្ធសម្អាតកាកសំណល់គ្រោះថ្នាក់ ដោយប្រើប្រាស់ថវិកា 1.5 លានដុល្លារ បើទោះជាវិទ្យាស្ថាននេះទើបតែបើកដំណើរការមិនទាន់បាន 2 ឆ្នាំក៏ដោយ។

ក្រុមស៊ើបការណ៍សម្ងាត់ អាមេរិក កាលពីខែមេសា បានឱ្យដឹងថា ពួកគេយល់ស្របជាមួយនឹងក្រុមអ្នកវិទ្យាសាស្ត្រដែលនិយាយថា វីរុស COVID-19 មិនមែនជាផលិតផលរបស់មនុស្ស ឬត្រូវបានកែប្រែហ្សែន។ ប្រធានាធិបតី Joe Biden កាលពីខែឧសភា ក៏បានចេញបញ្ជាឱ្យក្រុមអ្នកស៊ើបការណ៍ តាមរកប្រភពរបស់វីរុស និងធ្វើរបាយការណ៍ក្នុងរយៈពេល 90 ថ្ងៃ។

អង្គភាពស៊ើបការណ៍សម្ងាត់របស់ សហរដ្ឋអាមេរិក បច្ចុប្បន្នមិនទាន់សន្និដ្ឋានថា វីរុសនេះមានប្រភពពីសត្វព្រៃ ឬរួចចេញពីបន្ទប់ពិសោធន៍នៅឡើយ។

ប្រទេសចិន បានច្រានចោលការសន្និដ្ឋានដែលថា COVID-19 រួចចេញពីបន្ទប់ពិសោធន៍នៅ Wuhan ក៏ដូចជាការចោទប្រកាន់ដែលថា ចិន បានលាក់បាំងអំពីប្រភពរបស់វីរុស។ អ្នកស្រាវជ្រាវមួយចំនួនយល់ថា វីរុសនេះ មានប្រភពពីសត្វដែលអាចចម្លងវីរុសមកមនុស្សនៅក្នុងផ្សារលក់សត្វរស់មួយនៅក្បែរវិទ្យាស្ថានវីរុសសាស្ត្ររបស់ទីក្រុង Wuhan៕

August 3, 2021

កងទ័ព អាមេរិក ធ្វើសមយុទ្ធធំជាងគេបំផុតក្នុងអំឡុង 4 ទសវត្សរ៍មកនេះ

កងទ័ពជើងទឹក និងកងម៉ារីន របស់ សហរដ្ឋអាមេរិក រៀបចំធ្វើសមយុទ្ធធំបំផុតនៅក្នុងអំឡុង 40 ឆ្នាំកន្លងមកនេះ ដោយមានការចូលរួមរបស់អង្គភាពមកពីតំបន់ដែលមានពេលវេលាខុសគ្នាជាង 17 ឯណោះ។

សមយុទ្ធទ្រង់ទ្រាយធំ (LSE) ឆ្នាំ 2021 នឹងធ្វើឡើងចាប់ពីថ្ងៃទី 03 ដល់ 16 ខែសីហា ឆ្នាំ 2021 ដោយមានវត្តមានរបស់ទីបញ្ជាការចំនួន 6 របស់កងទ័ពជើងទឹក និងកងម៉ារីន, កងនាវាចម្បាំងចំនួន 5 ក្រុម និងកងម៉ារីន ប្រចាំការនៅក្រៅប្រទេសចំនួន 3 ក្រុម។ ក្នុងសមយុទ្ធនេះក៏មានការចូលរួមពីនាវាចម្បាំងប្រមាណ 36 គ្រឿង។ នេះបើតាមការឱ្យដឹងពីកងទ័ពជើងទឹក អាមេរិក ប្រចាំការនៅអឺរ៉ុប-អាហ្វ្រិក / ក្រុមនាវាចម្បាំងទី 06។

សមយុទ្ធដែលនឹងត្រូវធ្វើឡើងនៅក្នុងតំបន់ចំនួន 17 ដែលមានពេលវេលាខុសៗគ្នានេះ មិនធ្លាប់ត្រូវបាន សហរដ្ឋអាមេរិក ធ្វើឡើងនោះទេ រាប់ចាប់ពីក្រោយសង្គ្រាមត្រជាក់។

«LSE នឹងពិសោធលើសមត្ថភាពរបស់ក្រុមមេបញ្ជាការរបស់យើង នៅលើវិស័យជាច្រើនក្នុងកងទ័ពជើងទឹក តាំងពីយុទ្ធវិធី រហូតដល់យុទ្ធសាស្ត្រ និងលទ្ធភាពនៃការផ្គុំកម្លាំងជាមួយកងម៉ារ៉ីន ដើម្បីបង្ហាញអំពីសក្ដានុពលនៃកងនាវាចម្បាំងទូទាំងពិភពលោក នៅក្នុងការអនុវត្តយុទ្ធនាការផ្គុំកម្លាំង ពីសហាសមុទ្រ រហូតដល់តំបន់ឆ្នេរសមុទ្រ» នៅក្នុងសេចក្ដីប្រកាសមួយ មេបញ្ជាការកងនាវាចម្បាំងទី 06 របស់ សហរដ្ឋអាមេរិក លោក Gene Black បានឱ្យដឹងដូច្នេះ។

James R. Holmes អ្នកជំនាញផ្នែកយុទ្ធសាស្ត្រផ្លូវសមុទ្រប្រចាំសាលា US Naval War College របស់ សហរដ្ឋអាមេរិក បានសង្កត់ធ្ងន់ថា LSE អាចធ្វើឱ្យគូប្រជែងនានាយល់ថា សហរដ្ឋអាមេរិក អាចដោះស្រាយបញ្ហានៅសមុទ្រខ្មៅ សមុទ្រមេឌីទែរ៉ាណេខាងកើត សមុទ្រចិនខាងត្បូង និងសមុទ្រចិនខាងកើត ក្នុងពេលតែមួយ៕

August 3, 2021

ព្រះសង្ឃថៃ ដែលចូលរួមធ្វើជាកម្លាំងជួរមុខ ដើម្បីទប់ទល់នឹង COVID-19៖ ដល់ពេលដែលព្រះសង្ឃត្រូវសងគុណបរិស័ទហើយ!

ព្រះសង្ឃពុទ្ធសាសនាជាច្រើនអង្គ កំពុងគ្រងឈុតការពារវីរុស ដើម្បីចូលរួមធ្វើសកម្មភាពប្រយុទ្ធប្រឆាំងនឹង COVID-19 ដែលកំពុងរាតត្បាតយ៉ាងខ្លាំងក្លានៅប្រទេសថៃ។

ប្រទេសថៃ កំពុងរងការវាយប្រហារពីវីរុស COVID-19 ប្រភេទ Delta។ តួលេខអ្នកឆ្លងវីរុស COVID-19 កំពុងកើនឡើងយ៉ាងឆាប់រហ័ស នាំឱ្យប្រព័ន្ធសុខាភិបាលប្រឈមនឹងបញ្ហាលើសចំណុះ និងបង្កការខាតបង់បន្ថែមទៀតដល់សេដ្ឋកិច្ចជាតិ។

ក្នុងស្ថានការណ៍នេះ ព្រះសង្ឃពុទ្ធសាសនាជាច្រើនអង្គនៅប្រទេសថៃ បានសម្រេចដោះឈុតចីពរទុកមួយឡែក ហើយគ្រងឈុតការពារវីរុសវិញម្ដង ដើម្បីចូលរួមធ្វើយុទ្ធនាការប្រយុទ្ធប្រឆាំងនឹង COVID-19 ក្នុងនោះមានអង្គខ្លះជួយដឹកជញ្ជូនធុងអុកស៊ីសែន អង្គខ្លះធ្វើជាជំនួយការយកសំណាក ហើយអង្គខ្លះទៀតក៏ស្ម័គ្រចិត្តធ្វើជាជំនួយការរបស់ក្រុមដឹកសាកសពអ្នកជំងឺ COVID-19 យកទៅកាន់ឡបូជាទៀតផង។

«នៅមានប្រជាជនថៃជាច្រើនទៀតដែលមិនអាចប្រើប្រាស់ប្រព័ន្ធសុខាភិបាលសាធារណៈ។ ពួកអាត្មាថែទាំគ្រប់គ្នាដែលត្រូវការជំនួយ» ព្រះអង្គ Mahapromphong ព្រះជន្ម 33 វស្សា ជាគ្រូសូត្រស្ដាំរបស់វត្ត Suthi Wararam នៅទីក្រុងបាងកក បានមានសង្ឃដីកាដូច្នេះ។

ចាប់តាំងពីថ្ងៃទី 21 កក្កដា ព្រះអង្គ Mahapromphong បាននិមន្តទៅកាន់ទីប្រជុំជនក្រីក្របំផុតនៃទីក្រុងបាងកក នាំយកធុងអុកស៊ីសែន អាហារ និងសម្ភារវេជ្ជសាស្រ ប្រគល់ដល់ដៃប្រជាជន ក៏ដូចជាយកសំណាកទៅធ្វើតេស្ត។

ព្រះអង្គ Mahapromphong រៀនយកសំណាក COVID-19 ពីក្រុមវេជ្ជបណ្ឌិត និងបុគ្គលិកសុខាភិបាលដែលធ្វើការក្នុងវត្ត Suthi Wararam ជាកន្លែងដែលត្រូវបានយកមកធ្វើជាមជ្ឈមណ្ឌលចត្តាឡីស័ក សម្រាក់អ្នកជំងឺ COVID-19។

ចៅអធិការរងវត្ត Suthi Wararam នេះ មានសង្ឃដីកាថា៖ «ព្រះសង្ឃអាចរស់បានក៏ដោយសារការដាក់បាត្រពីប្រជាជន។ ដូច្នេះ ដល់ពេលដែលពួកអាត្មាត្រូវសងគុណពួកគាត់វិញហើយ។ យ៉ាងហោចណាស់ក៏ពួកអាត្មាអាចលើកទឹកចិត្តឱ្យពួកគាត់បន្តការប្រយុទ្ធទៅទៀត»។

ចំណែកឯ ព្រះសង្ឃមួយអង្គផ្សេងទៀតដែលមានព្រះនាមថា Supornchaithammo កំពុងគង់នៅវត្ត Chin Wararam Worawiharn ក៏បានចូលជាកម្លាំងក្នុងការដឹកជញ្ជូនសាកសពអ្នកជំងឺ COVID-19 ទៅកាន់ឡបូជា។ ព្រះអង្គមានសង្ឃដីកាថា៖ «អាត្មាស្ម័គ្រចិត្តប្រឈមនឹងហានិភ័យ។ បើអាត្មាឆ្លងវីរុស អាត្មាត្រៀមខ្លួនជានិច្ចក្នុងការប្រឈមមុខនឹងវា ដោយមិនមានការស្ដាយក្រោយអ្វីឡើយ»។

ប្រទេសថៃ គិតមកដល់បច្ចុប្បន្ន បានរកឃើញអ្នកផ្ទុកវីរុស COVID-19 សរុបចំនួន 633,284 នាក់ ក្នុងនោះមានអ្នកស្លាប់ 5,168 នាក់ និងជាសះស្បើយចំនួនជាង 419,000 នាក់៕

August 2, 2021

SpaceX ទទួលបានប្រាក់ 178 លានដុល្លារ ដើម្បីនាំយានរបស់ NASA ទៅរកជីវិតលើព្រះចន្ទនៃភពព្រហស្បតិ៍

ក្រុមហ៊ុន SpaceX របស់មហាសេដ្ឋី Elon Musk បានចុះកិច្ចព្រមព្រៀងដែលមានតម្លៃ 178 លានដុល្លារជាមួយទីភ្នាក់ងារអវកាស អាមេរិក NASA ដើម្បីបាញ់បង្ហោះយានស្រាវជ្រាវមួយគ្រឿង ទៅស្វែងរកជីវិតនៅលើឋានព្រះចន្ទរបស់ភពព្រហស្បតិ៍ នៅឆ្នាំ 2024។

រ៉ុក្កែត Falcon Heavy របស់ SpaceX ត្រូវបានជ្រើសរើស ដើម្បីនាំយកយានអវកាស Europa Clipper របស់ NASA ឡើងទៅកាន់ឋានព្រះចន្ទ Europa ដែលនឹងត្រូវធ្វើឡើងនៅក្នុងខែតុលា ឆ្នាំ 2024 ដោយបាញ់បង្ហោះចេញពីមជ្ឈមណ្ឌលអវកាស Kennedy នៅក្នុងរដ្ឋ Florida សហរដ្ឋអាមេរិក។ កិច្ចព្រមព្រៀងសម្រាប់ការផ្ដល់ និងទទួលសេវាកម្មខាងលើ មានតម្លៃប្រហែល 178 លានដុល្លារអាមេរិក។

កាលពីដំបូងឡើយ NASA មានបំណងប្រើប្រាស់ប្រព័ន្ធបាញ់បង្ហោះផ្ទាល់ខ្លួន ដើម្បីបំពេញបេសកកម្មនេះ ប៉ុន្តែ ការអភិវឌ្ឍមានការយឺតយ៉ាវ។

យានអវកាស Europa Clipper ត្រូវបានរចនាឡើងដើម្បីធ្វើការសិក្សាស្រាវជ្រាវលម្អិតអំពីព្រះចន្ទ Europa របស់ភពព្រហស្បតិ៍ ក្នុងបំណងឱ្យដឹងច្បាស់ថា ឋានដែលមហាសែនត្រជាក់នេះ អាចទ្រទ្រង់ភាវរស់បានដែរ ឬអត់។

ភារកិច្ចរបស់យានអវកាសនេះគឺ ថតរូបភាពរបស់ព្រះចន្ទ Europa ឱ្យបានច្បាស់បំផុត និងស្វែងយល់អំពីសមាធាតុរបស់វា និងស្វែងរកសញ្ញានៃបាតុភូតរញ្ជួយដីកំពុងកើតឡើង ឬបានកើតឡើងកាលពីអតីតកាលថ្មីៗនេះ។

យានអវកាសរបស់ NASA នេះ ក៏នឹងត្រូវបានបំពាក់ឧបករណ៍វាស់កម្រាស់នៃស្រទាប់ទឹកកកខាងលើរបស់ Europa ស្វែងរកបឹងក្រោមដី និងវាស់ជម្រៅ រួមទាំងកម្រិតនៃជាតិប្រៃរបស់មហាសមុទ្រក្រោមផ្ទាំងទឹកកកផងដែរ។

ជាព្រះចន្ទមួយ ក្នុងចំណោមព្រះចន្ទធំជាងគេទាំង 4 របស់ភពព្រហស្បតិ៍ Europa បានក្លាយជាប្រធានបទសំខាន់នៃការសិក្សាស្រាវជ្រាវជាច្រើនកាលពីពេលកន្លង។ កាលពីឆ្នាំ 2020 ក្រុមអ្នកវិទ្យាសាស្ត្របានបញ្ជាក់ឱ្យឃើញថា វិទ្យុសកម្មមានជាប្រចាំ ដែល Europa ទទួលបានពីភពព្រហស្បតិ៍ បណ្ដាលឱ្យព្រះចន្ទមួយនេះ បញ្ចេញពន្លឺនៅក្នុងទីងងឹត៕

ប្រភព៖ Reuters

July 30, 2021

Category: អន្តរជាតិ