អន្តរជាតិ - La Reine Media

អ៊ីស្រាអែល៖ រ៉ុក្កែតច្រើនគ្រាប់ ផ្ទុះដូចគេបាញ់កាំជ្រួចអបអរ នៅលើដែនអាកាសរបស់ អ៊ីស្រាអែល

រ៉ុក្កែតចំនួនពីរគ្រាប់ដែលបាញ់ចេញពីតំបន់ ហ្គាហ្សា សំដៅទឹកដី អ៊ីស្រាអែល សុទ្ធតែត្រូវបានប្រព័ន្ធខែលការពារ IRON DOME ស្ទាក់ចាប់បាន និងផ្ទុះនៅលើផ្ទៃអាកាស។

កងកម្លាំងការពារជាតិ អ៊ីស្រាអែល (IDF) បានឱ្យដឹងថា កងជីវពល ប៉ាលេស្ទីន កាលពីយប់ថ្ងៃទី 12 កញ្ញា បានបាញ់រ៉ុក្កែតចំនួន 1 គ្រាប់ មកលើទឹកដី អ៊ីស្រាអែល ដែលនេះគឺជាយប់ទីបីបន្តបន្ទាប់គ្នាហើយដែលកងជីវពលប៉ាលេស្ទីន បានបាញ់រ៉ុក្កែតចូលប្រទេសនេះ។ ប៉ុន្មានម៉ោងក្រោយមក ក្នុងគ្រាដែលយន្តហោះចម្បាំងរបស់ IDF វាយប្រហារសងសឹកទៅលើតំបន់ ហ្គាហ្សា គ្រាប់រ៉ុក្កែតទីពីររបស់កងជីវពលប៉ាលេស្ទីន ក៏បានសំដៅមកកាន់ អ៊ីស្រាអែល។

រ៉ុក្កែតទាំងពីរគ្រាប់របស់កងជីវពល ប៉ាលេស្ទីន សុទ្ធតែត្រូវបានបាញ់ស្ទាក់កម្ទេចដោយប្រព័ន្ធខែលការពារដែនអាកាស IRON DOME របស់ អ៊ីស្រាអែល។ រូបដែលគេថតបាន បង្ហាញថា គ្រាប់រ៉ុក្កែតដែលត្រូវបានបាញ់ស្ទាក់ ផ្ទុះដូចទៅនឹងកាំជ្រួលដែលគេបាញ់សម្រាប់អបអរ នៅលើដែនអាកាស អ៊ីស្រាអែល។

ក្នុងការវាយប្រហារសងសឹក ទ័ពអាកាសរបស់ អ៊ីស្រាអែល បានបាញ់ចំគោលដៅចំនួន 4 ដែលជាមូលដ្ឋានហ្វឹកហ្វឺនទាហានរបស់ក្រុម ហាម៉ាស នៅតំបន់ ហ្គាហ្សា រួមនឹងរោងចក្រផលិតអាវុធមួយកន្លែង និងច្រកចូលផ្លូវរូងក្រោមដីមួយកន្លែងផងដែរ។

ស៊ីរ៉ែនប្រកាសអាសន្នអំពីការរងការវាយប្រហារពីរ៉ុក្កែត បានលាន់កងរំពងនៅក្នុងទីក្រុង Sderot និងតំបន់ប្រជុំជនរបស់ អ៊ីស្រាអែល ដែលស្ថិតនៅក្បែរតំបន់ ហ្គាហ្សា បណ្ដាលឱ្យមនុស្សរាប់ពាន់នាក់ត្រូវរត់ទៅលាក់ខ្លួន។ បុគ្គលិកសុខាភិបាលរបស់ អ៊ីស្រាអែល ឱ្យដឹងថា មនុស្ស 3 នាក់បានរងរបួសស្រាល នៅពេលស្វែងរកកន្លែងជ្រក។

អ្នកនាំពាក្យរបស់ក្រុមប្រឹក្សាតំបន់ Shaar Hanegev ឱ្យដឹងថា តំបន់នេះពុំមានអ្នកស្លាប់ អ្នករងរបួស ឬខូចខាតទ្រព្យសម្បត្តិអ្វីដែលបង្កឡើងដោយគ្រាប់រ៉ុក្កែតនោះទេ។ មកដល់ពេលនេះ ក៏ពុំទាន់មានក្រុមណាមួយនៃចលនាប៉ាលេស្ទីន បានចេញមុខទទួលខុសត្រូវចំពោះការវាយប្រហារដោយរ៉ុក្កែតខាងលើនេះនៅឡើយ។

ភាពតានតឹងរវាង អ៊ីស្រាអែល និងកងជីវពល ប៉ាលេស្ទីន បានឡើងកម្ដៅខ្លាំង បន្ទាប់ពីអ្នកទោសជនជាតិប៉ាលេស្ទីន 6 នាក់ ដែលសុទ្ធសឹងតែជាសមាជិកក្រុមប្រដាប់អាវុធអ៊ីស្លាមជីហាតប៉ាលេស្ទីន (PIJ) បានជីករូងរត់ចេញពីពន្ធនាគារ Gilboa។ អ៊ីស្រាអែល ក្រោយមកក៏ចាប់បានអ្នកទោស 4 នាក់ក្នុងចំណោម 6 នាក់ដែលបាន «ហែកគុក» ខណៈ PIJ ព្រមានថា នឹងសងសឹក បើសិន អ៊ីស្រាអែល ធ្វើបាបអ្នកទោសទាំងនោះ។

មូលហេតុដែលនាំឱ្យភាពតឹនតឹងរវាងភាគីទាំងពីរកើនឡើងខ្លាំង ក៏បណ្ដាលមកពីកិច្ចព្រមព្រៀងផ្ទេរសាច់ប្រាក់សុទ្ធរបស់ប្រទេសកាតា មកកាន់តំបន់ ហ្គាហ្សា ឱ្យក្រុម ហាម៉ាស បាន «ដួលរលំ»។ ហាម៉ាស គ្រោងនឹងប្រើប្រាស់សាច់ប្រាក់នេះដើម្បីបើកប្រាក់ខែឱ្យមន្ត្រីរបស់ខ្លួន ប៉ុន្តែ អាជ្ញាធររបស់នាយករដ្ឋមន្ត្រី អ៊ីស្រាអែល Naftali Bennett ឱ្យដឹងថា ពួកគេមិនមានបំណងអនុញ្ញាតឱ្យ កាតា បញ្ជូនប្រាក់ទៅឱ្យ ហាម៉ាស ដោយផ្ទាល់នោះទេ៕

September 13, 2021

អាហ្វ្រិកខាងត្បូង ប្រកាសគម្រោងប្រើប័ណ្ណបៃតងវ៉ាក់សាំង COVID-19 ខណៈអង់គ្លេស លុបចោលគម្រោងដូចគ្នានេះ

ប្រធានាធិបតីនៃប្រទេសអាហ្វ្រិកខាងត្បូង Ramaphosa បានប្រកាសគម្រោងប្រើប្រាស់ប័ណ្ណបៃតងវ៉ាក់សាំង COVID-19 និងបន្ធូរបន្ថយការរឹតត្បិតលើការធ្វើដំណើរចាប់ពីសប្ដាហ៍នេះ ក្នុងគ្រាដែលប្រទេសអង់គ្លេស បានប្រកាសថា នឹងលុបចោលគម្រោងស្នើឱ្យពលរដ្ឋបង្ហាញប័ណ្ណបៃតងវ៉ាក់សាំង នៅពេលចូលទៅកាន់ទីកន្លែងមានមនុស្សច្រើន។

ប្រធានាធិបតី អាហ្វ្រិកខាងត្បូង Cyril Ramaphosa បានប្រកាសដូចខាងលើកាលពីថ្ងៃទី 12 កញ្ញា។ អាជ្ញាធរ អាហ្វ្រិកខាងត្បូង នឹងប្រកាសលម្អិតអំពីការប្រើប្រាស់ប័ណ្ណបៃតងវ៉ាក់សាំង COVID-19 នាពេលខាងមុខ ប៉ុន្តែ ប្រភពព័ត៌មានឱ្យដឹងថា ប័ណ្ណនេះ ក្រៅពីត្រូវបានប្រើប្រាស់ដើម្បីបញ្ជាក់អំពីការចាក់វ៉ាក់សាំងរួចរាល់ វាក៏នឹងត្រូវបានប្រើក្នុងគោលដៅ និងព្រឹត្តិការណ៍ផ្សេងៗផងដែរ។

លោក Ramaphosa បន្ថែមថា «តួលេខនៃករណីឆ្លងថ្មីដែលបានថយចុះជាបន្តបន្ទាប់ក្នុងរយៈពេលច្រើនសប្ដាហ៍កន្លងទៅនេះ» នឹងអនុញ្ញាតឱ្យ អាហ្វ្រិកខាងត្បូង អាចបន្ធូរបន្ថយវិធានការរឹតត្បិតនានាចាប់ពីថ្ងៃទី 13 កញ្ញា 2021។

ប្រទេសអាហ្វ្រិកខាងត្បូង គិតមកដល់បច្ចុប្បន្ន បានរកឃើញអ្នកឆ្លង COVID-19 សរុបជាង 2.8 លាននាក់ ក្នុងនោះមានអ្នកស្លាប់សរុបជិត 85,000 នាក់។ ប្រទេសនេះបានចាក់វ៉ាក់សាំងជូនពលរដ្ឋជាង 7 លាននាក់រួចហើយ នៅក្នុងចំណោមប្រជាជនសរុបជាង 58.5 លាននាក់។ ¼ នៃពលរដ្ឋពេញវ័យរបស់ប្រទេសនេះ បានទទួលការចាក់វ៉ាក់សាំងយ៉ាងតិច 1 ដូស។

ដោយឡែក រដ្ឋាភិបាលអង់គ្លេស មុននោះបានឱ្យដឹងថា កម្មវិធីប័ណ្ណបៃតងវ៉ាក់សាំង COVID-19 នឹងត្រូវបានអនុវត្តចាប់ពីចុងខែកញ្ញានេះ បើទោះជាមានការជំទាស់ពីក្រុមហ៊ុន និងតំណាងរាស្ត្រមួយចំនួន។

យ៉ាងនេះក្ដី រដ្ឋមន្ត្រីក្រសួងសុខាភិបាលអង់គ្លេស Sajid Javid បានប្រកាសលុបចោលគម្រោងខាងលើ ដោយនិយាយថា រដ្ឋាភិបាលមិនបានចាត់ទុកថា ការប្រើប្រាស់ប័ណ្ណបៃតងវ៉ាក់សាំងជារឿងចាំបាច់នៅក្នុងស្ថានភាពវិបត្តិសុខភាពបច្ចុប្បន្ននៅ អង់គ្លេស ខណៈតួលេខនៃការចាក់វ៉ាក់សាំងបានកើនឡើងខ្ពស់។

រដ្ឋមន្ត្រីក្រសួងសុខាភិបាលអង់គ្លេស លោក Sajid Javid

អង់គ្លេស បានចាក់វ៉ាក់សាំង COVID-19 ដល់ពលរដ្ឋជាង 80% ក្នុងចំណោមពលរដ្ឋដែលមានអាយុចាប់ពី 16 ឆ្នាំឡើងទៅ។ រដ្ឋមន្ត្រីអង់គ្លេសខាងលើបន្ថែមថា គំនិតស្ដីអំពីការតម្រូវឱ្យបង្ហាញក្រដាស់ស្នាមនៅទីតាំងកំសាន្ត ធ្វើឱ្យលោកមានអារម្មណ៍ថា មានភាពតានតឹងក្នុងចិត្ត ហើយមនុស្សមួយចំនួនបានជំទាស់ និងបានហៅការស្នើនេះថាជារឿងរំលោភសិទ្ធិសេរីភាព។

បច្ចុប្បន្ន ប្រទេសនេះ បានរកឃើញអ្នកឆ្លង COVID-19 សរុបជាង 7.2 លាននាក់ ក្នុងនោះមានអ្នកស្លាប់សរុបជាង 134,200 នាក់៕

September 13, 2021

តាលីបង់ លើកមូលហេតុដែលស្ត្រីមិនអាចចូលរួមក្នុងរដ្ឋាភិបាលអន្តរកាល នៅ អាហ្វហ្គានីស្ថាន

អ្នកនាំពាក្យរបស់ តាលីបង់ យល់ថា ស្ត្រីមិនមានសមត្ថភាពធ្វើកិច្ចការរបស់រដ្ឋាភិបាល ក្នុងពេលលោកបកស្រាយអំពីអាជ្ញាធរថ្មីដែលមានសុទ្ធតែបុរស។

«ស្ត្រីម្នាក់មិនអាចធ្វើជារដ្ឋមន្ត្រីនោះឡើយ ព្រោះថា វាដូចជាអ្នកដាក់ការទទួលខុសត្រូវដ៏ធ្ងន់ធ្ងរដែលមិនអាចរែកពុនរួច ទៅលើស្មារបស់នាង» អ្នកនាំពាក្យរបស់ តាលីបង់ Sayed Zekrullah Hashimi ឆ្លើយតបនឹងសំនួររបស់សារព័ត៌មាន Tolo News កាលពីថ្ងៃទី 9 កញ្ញា ដែលនិយាយអំពីមូលហេតុដែលស្ត្រីមិនបានចូលរួមរដ្ឋាភិបាលអន្តរកាល។

ស្ត្រី អាហ្វហ្គានីស្ថាន ចូលរួមព្រឹត្តិការណ៍ដ៏ធំមួយនៅឯសាល Loya Jirga ក្នុងរដ្ឋធានីកាប៊ុល កាលពីឆ្នាំ 2020

«មិនចាំបាច់មានស្ត្រីនៅក្នុងគណៈរដ្ឋមន្ត្រីនោះទេ ពួកគេគួរនៅផ្ទះបង្កើតកូន ហើយក្រុមស្ត្រីដែលចេញធ្វើបាតុកម្មប្រឆាំងរដ្ឋាភិបាលថ្មី មិនតំណាងឱ្យស្ត្រីទាំងអស់នៅ អាហ្វហ្គានីស្ថាន ឡើយ» អ្នកនាំពាក្យខាងលើអះអាងដូច្នេះ ដែលទំនងជា តាលីបង់ មិនចាត់ទុកស្ត្រីជាផ្នែកមួយនៃសង្គម។

«ស្ត្រី 4 នាក់ដែលធ្វើបាតុកម្មនៅលើដងផ្លូវ មិនតំណាងឱ្យស្ត្រីទាំងអស់។ ស្ត្រី អាហ្វហ្គានីស្ថាន គឺជាអ្នកបង្កើតកូនចៅជនជាតិ អាហ្វហ្គានីស្ថាន ហើយអប់រំពួកគេអំពីគោលការណ៍របស់សាសនាអ៊ីស្ថាម» លោក Hashimi បញ្ជាក់។

ស្ត្រី អាហ្វហ្គានីស្ថាន ក្រោមរបប ដែលគាំទ្រដោយ អាមេរិក (រូបថតកាលពីដើមឆ្នាំ 2021)

តាលីបង់ កាលពីថ្ងៃទី 7 កញ្ញា បានប្រកាសសមាសភាពនៃរដ្ឋាភិបាលថ្មី ដែលមានលោក Mullah Mohammad Hasan Akhund ជានាយករដ្ឋមន្ត្រី។ តំណែងឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ រដ្ឋមន្ត្រីការបរទេស និងរដ្ឋមន្ត្រីមហាផ្ទៃរបស់រដ្ឋាភិបាលបណ្ដោះអាសន្ននេះ ក៏សុទ្ធតែជាក្រុមមេដឹកនាំយូរឆ្នាំរបស់ តាលីបង់។

ខុសពីរដ្ឋាភិបាលចាស់ដែលគាំទ្រដោយ សហរដ្ឋអាមេរិក រដ្ឋាភិបាលអន្តរកាលរបស់ តាលីបង់ មិនទាន់មានមន្ត្រីជាស្ត្រីភេទនៅឡើយ ធ្វើឱ្យស្ត្រី អាហ្វហ្គានីស្ថាន មួយក្រុម បាននាំគ្នាចេញធ្វើបាតុកម្មកាលពីដើមខែ ដោយសារតែការព្រួយបារម្ភថា ស្ត្រីនឹងមិនមានសំឡេងនៅក្នុងរដ្ឋាភិបាលថ្មី។

ស្ត្រី អាហ្វហ្គានីស្ថាន ក្រោមរបប តាលីបង់ (រូបថតកាលពីដើមខែកញ្ញា ឆ្នាំ 2021)

ក្រោយពីដណ្ដើមបានអំណាចគ្រប់គ្រងប្រទេស តាលីបង់ បានសន្យាថា កសាងរដ្ឋាភិបាលមួយដែលប្រកបដោយសន្តិភាពនិយមជាងរដ្ឋាភិបាលកាលពី 20 ឆ្នាំមុន ពិសេសគឺធានាសិទ្ធិរបស់ស្ត្រីនៅក្នុងក្របខណ្ឌនៃច្បាប់សាសនាអ៊ីស្លាម។ ប៉ុន្តែ មនុស្សជាច្រើនមិនបានទុកចិត្តលើការសន្យារបស់ តាលីបង់ និងមានបំណងចាកចេញពី អាហ្វហ្គានីស្ថាន ឱ្យបានកាន់តែឆាប់ កាន់តែល្អ ព្រោះខ្លាច តាលីបង់ អនុវត្តច្បាប់សាសនាដ៏មហារឹងរ៉ឹង៕

September 11, 2021

តាលីបង់ ប្រហារជីវិតបងប្រុសអតីតអនុប្រធានាធិបតី អាហ្វហ្គានីស្ថាន

អាជ្ញាធរ តាលីបង់ បានកាត់ទោសប្រហារជីវិតចំពោះ Rohullah Saleh ដែលជាបងប្រុសរបស់ Amrullah Saleh អតីតអនុប្រធានាធិបតី អាហ្វហ្គានីស្ថាន និងជាមេដឹកនាំម្នាក់របស់កងកម្លាំងតស៊ូនៅជ្រលងភ្នំ Panjshir ជាទីតាំងសំខាន់ចុងក្រោយរបស់ក្រុមប្រឆាំងនឹង តាលីបង់ ដែលនៅសេសសល់។

«ពួកគេបានប្រហារជីវិតអ៊ំប្រុសរបស់ខ្ញុំ» Ebadullah Saleh ក្មួយប្រុសរបស់ Rohullah Saleh បានឱ្យដឹងកាលពីថ្ងៃទី 10 កញ្ញា។ «ពួកគេបានសម្លាប់គាត់កាលពីម្សិលមិញ និងមិនឱ្យពួកយើងបញ្ចុះសពគាត់ទេ។ ពួកគេនិយាយជាបន្តបន្ទាប់ថា គួរតែទុកសាកសពឱ្យស្អុយរលួយ»។

ព័ត៌មានដែលថា Rohullah Saleh ត្រូវ តាលីបង់ ប្រហារជីវិត ត្រូវបានលើកឡើងបន្ទាប់ពី តាលីបង់ ដណ្ដើមបានអំណាចក្នុងការគ្រប់គ្រងខេត្ត Panjshir ដែលជាទីតាំងចុងក្រោយរបស់កងកម្លាំងតស៊ូប្រឆាំង តាលីបង់ នៅ អាហ្វហ្គានីស្ថាន។ គណនីបណ្ដាញសង្គមជាភាសាអ៊ូឌូ (Urdu) របស់សេវាកម្មសារព័ត៌មាននៃក្រុម តាលីបង់ Alemarah ឱ្យដឹងថា «យោងតាមដំណឹងដែលទទួលបាន Rohullah Saleh ត្រូវបានសម្លាប់នៅក្នុងការប្រយុទ្ធគ្នានៅ Pahjshir។

អតីតអនុប្រធានាធិបតី របស់ អាហ្វហ្គានីស្ថាន លោក Amrullah Saleh

អតីតអនុប្រធានាធិបតី Amrullah Saleh ធ្លាប់ជាមេដឹកនាំស្ថាប័នសន្តិសុខជាតិ ស្ថាប័នស៊ើបការណ៍សម្ងាត់របស់រដ្ឋាភិបាលចាស់។ បច្ចុប្បន្ន មិនដឹងច្បាស់ថា លោក Amrullah Saleh ស្ថិតនៅទីណានោះទេ។ ប្រភពព័ត៌មានមួយនៅ កាប៊ុល កាលពីដើមខែនេះឱ្យដឹងថា លោក Amrullah Saleh បានចាកចេញពីជ្រលងភ្នំ Panjshir ទៅកាន់ប្រទេសតាហ្ស៊ីគីស្ថាន ប៉ុន្តែ លោកបានបដិសេធព័ត៌មាននេះ។

រណសិរ្សតស៊ូជាតិ អាហ្វហ្គានីស្ថាន (NRF) ដែលរួមមាន កងជីវពលប្រឆាំង តាលីបង់ និងអតីតទាហាននៃកងទ័ពរដ្ឋាភិបាលចាស់ដែលស្មោះត្រង់នឹងមេដឹកនាំ Ahmad Massaoud បានប្ដេជ្ញាចិត្តបន្តប្រយុទ្ធប្រឆាំងនឹង តាលីបង់ សូម្បីតែក្រោយពីទីក្រុង Bazarak របស់ Panjshir ធ្លាក់ទៅក្នុងដៃក្រុម តាលីបង់។

ជ្រលងភ្នំ Panjshir ដែលមានកំពូលភ្នំជាច្រើនព័ទ្ធជុំវិញ មានឈ្មោះល្បីថាជាជញ្ជាំងការពារដ៏រឹងមាំសម្រាប់ប្រឆាំងនឹង តាលីបង់ នៅក្នុងបណ្ដាឆ្នាំចុងក្រោយនៃទសវត្សរ៍ឆ្នាំ 1990។ NRF បង្កើតមូលដ្ឋានទ័ពនៅជ្រលងភ្នំនេះ បន្ទាប់ពី តាលីបង់ ដណ្ដើមបានអំណាចនៅ កាប៊ុល បានប៉ុន្មានថ្ងៃ ដោយជឿថា ពួកគេអាចកាន់កាប់ជ្រលំភ្នំនេះបានល្អ៕

September 11, 2021

បារាំង ផ្ដល់សញ្ជាតិដល់បុគ្គលិកជួរមុខប្រឆាំង COVID-19 ចំនួន 12,000 នាក់

បារាំង៖ ការផ្ដល់សញ្ជាតិដល់ជនបរទេសដែលជាបុគ្គលិកជួរមុខប្រឆាំង COVID-19 ចំនួន 12,000 នាក់នៅប្រទេសបារាំង ត្រូវបានធ្វើឡើងដើម្បីជាការសងគុណដល់ក្រុមមនុស្សដែលបានជួយដល់សង្គមជាតិនៃប្រទេសនេះ។

«អ្នកដែលធ្វើការនៅជួរមុខ បានគាំទ្រដល់ការអំពាវនាវរបស់ប្រទេសជាតិ ដូច្នេះ ការដែលប្រទេសជាតិទទួលយកពួកគេគឺជារឿងត្រឹមត្រូវ។ ប្រទេសរបស់យើង ដោយសារពួកគេទើបអាចឆ្លងផុតពីរោគរាតត្បាត» រដ្ឋមន្ត្រីក្រសួងពលរដ្ឋបារាំង លោកស្រី Marlene Schiappa បានឱ្យដឹងកាលពីថ្ងៃទី 9 កញ្ញា ក្នុងពេលប្រកាសផ្ដល់សញ្ជាតិដល់បុគ្គលិកជួរមុខប្រឆាំង COVID-19 ដែលមកពីបណ្ដាប្រទេស ជាង 12,000 នាក់។

មុននោះ ការដាក់ពាក្យសុំចូលសញ្ជាតិនៅបារាំង តែងតែចំណាយពេលពីរឆ្នាំ ប៉ុន្តែ បច្ចុប្បន្ន ក្រុមបុគ្គលិកបម្រើការងារប្រយុទ្ធប្រឆាំងនឹង COVID-19 នៅជួរមុខក្នុងប្រទេសបារាំង ក៏ទទួលបានការកាត់បន្ថយពេលវេលានៃការតម្រូវឱ្យស្នាក់នៅពី 5 ឆ្នាំ មកនៅត្រឹម 2 ឆ្នាំ មុននឹងអាចស្នើសុំចូលសញ្ជាតិ។

ក្រសួងមហាផ្ទៃបារាំង កាលពីខែកញ្ញា ឆ្នាំ 2020 បានអញ្ជើញបុគ្គលិកប្រឆាំង COVID-19 នៅជួរមុខ ឱ្យឆាប់មកដាក់ពាក្យសុំសញ្ជាតិ។ រដ្ឋមន្ត្រីបានឱ្យដឹងថា មនុស្សចំនួន 16,381 នាក់បានដាក់ពាក្យ ក្នុងនោះ មាន 12,012 នាក់ ត្រូវបានអនុញ្ញាតឱ្យចូលសញ្ជាតិរួចហើយ។

បារាំង គឺជាសម្បុកវីរុស COVID-19 ធំជាងគេលំដាប់ទី 6 ក្នុងពិភពលោក ដោយមានជិត 7 លាននាក់បានឆ្លងវីរុស និងជាង 115,000 នាក់ បានស្លាប់ដោយសារ COVID-19៕

September 11, 2021

ក្មេងស្រីអាយុទើបតែមួយឆ្នាំ ត្រូវគេលួចចាប់យកទៅ «បូជាយញ្ញ» នៅឯល្អាងភ្នំ

ប្រទេសថៃ៖ ក្មេងស្រីម្នាក់ អាយុ 1 ឆ្នាំ ឈ្មោះ Pornsiri Wongsilarung ត្រូវបានសង្គ្រោះជីវិតទាន់ពេល បន្ទាប់ពីត្រូវបានជនល្មើសចាប់ យកទៅកាន់រូងភ្នំ ឈៀងម៉ៃ (Chiang Mai) និងទុកចោលរយៈពេល 3 ថ្ងៃ ដើម្បី «បូជាយញ្ញ» ជូនវិញ្ញាណបិសាច។

កុមារី Wongsilarung ឬហៅថា Gina ត្រូវបានចាប់ជំរិតនៅពេលកំពុងលេងនៅខាងក្រៅផ្ទះ នៅតំបន់ដាច់ស្រយាលក្នុងខេត្ត ឈៀងម៉ៃ ប្រទេសថៃ កាលពីថ្ងៃទី 5 កញ្ញា។ ជនល្មើសមានឈ្មោះថា Siew អាយុ 44 ឆ្នាំ ជាពលករមកពីប្រទេសភូមា (មីយ៉ានម៉ា) ហើយក៏ជាមិត្តរបស់ឱពុក Gina។

បន្ទាប់ពីបានចាប់ Gina ជនដៃដល់ Siew បានទុកកុមារីនេះនៅឯរូងភ្នំដែលមានចម្ងាយ 3 គីឡូម៉ែត្រពីផ្ទះរបស់ Gina ហើយបណ្ដោយឱ្យនាងនៅម្នាក់ឯងរយៈពេល 3 យប់។ Siew សារភាពអំពីសកម្មភាពនេះ ប៉ុន្តែនិយាយថា ខ្លួនត្រូវ «វិញ្ញាណអាទិទេពចូលសណ្ឋិត »។

«វិញ្ញាណអាទិទេពក្នុងព្រៃ បានប្រាប់ឱ្យខ្ញុំរកកូនក្មេងម្នាក់មកបូជាយញ្ញឱ្យវិញ្ញាណរបស់ព្រាយបិសាច ដូច្នេះ ខ្ញុំក៏បី Gina ទៅដាក់នៅមុខច្រកល្អាងភ្នំ។ ខ្ញុំមិនបានសម្លាប់ក្មេងនេះទេ» Siew សារភាពប្រាប់សមត្ថកិច្ច។

ប៉ូលិស បុគ្គលិកសង្គ្រោះបន្ទាន់ រួមនឹងអ្នកស្ម័គ្រចិត្តជាង 200 នាក់ ត្រូវបានបញ្ជូនទៅរកកុមារីរងគ្រោះនៅក្នុងភូមិ និងនៅក្នុងព្រៃក្បែរទីតាំងក្មេងស្រីបាត់ខ្លួន។ ក្រុមសុនកជំនាញ យន្តហោះដ្រូន និងក្រុមអ្នកមុជទឹកក៏ត្រូវបានបញ្ជូនទៅរក Gina។

រហូតដល់ថ្ងៃទី 8 កញ្ញា កុមារីរងគ្រោះត្រូវបានរកឃើញនៅខាងមុខរូងភ្នំ។ នៅលើខ្លួនមានតែអាវមួយគត់ ហើយត្រូវសត្វល្អិតខាំគ្រប់កន្លែង និងមានសភាពអស់កម្លាំងរលីង។ ប៉ុន្តែ នៅពេលបានឃើញក្រុមអ្នកសង្គ្រោះ កុមារីសើចសប្បាយរីករាយ។ Gina ភ្លាមនោះក៏ត្រូវបាននាំទៅកាន់មន្ទីរពេទ្យដើម្បីពិនិត្យសុខភាព។

«ខ្ញុំបានបួងសួងទាំងថ្ងៃ ទាំងយប់ ដើម្បីឱ្យកូនអាចត្រលប់មកផ្ទះដោយសុវត្ថិភាព។ ខ្ញុំរំភើបណាស់ពេលបានឃើញកូននៅមានជីវិត។ ខ្ញុំអាចបូជាជីវិតផ្ទាល់ខ្លួនដើម្បីបានឃើញកូនត្រលប់មកដោយសេចក្ដីសុខ» Malee Pasee អាយុ 23 ឆ្នាំ ដែលជាម្ដាយរបស់ Gina ថ្លែងដូច្នេះ។

ប៉ូលិសឱ្យដឹងថា ដំបូងជនជាប់ចោទ Siew មិនព្រមសហការ និងគ្រាន់តែសារភាពអំពីសកម្មភាពលួចចាប់ Gina ក្រោយពីត្រូវបានសួរចម្លើយពេញមួយយប់។ ជននេះក៏ត្រូវបានប៉ូលិសសង្ស័យថាមានបញ្ហាសុខភាព និងរងផលប៉ះពាល់ពីគ្រឿងញៀន៕

September 10, 2021

(វីដេអូ)-«បុរសធ្លាក់ពីអគារពាណិជ្ជកម្មពិភពលោក» កាលពីឆ្នាំ 2001 នៅតែជារូបភាពរន្ធត់បំផុតនៃហេតុការណ៍ភេរវកម្ម ថ្ងៃទី 11 កញ្ញា

រូបភាពដែលថតបានដោយលោក Richard Drew មកពីទីភ្នាក់ងារសារព័ត៌មាន អាមេរិក AP (Associated Press) ដែលបង្ហាញអំពីបុរសម្នាក់ធ្លាក់ពីអគារមជ្ឈមណ្ឌលពាណិជ្ជកម្មពិភពលោក (World Trade Center) នៅទីក្រុងនីវយ៉ក បានក្លាយជារូបភាពរន្ធត់បំផុតនៅក្នុងអំពើភេរវកម្មនៅ សហរដ្ឋអាមេរិក កាលពីថ្ងៃទី 11 ខែកញ្ញា ឆ្នាំ 2001។

បុរសដែលធ្លាក់…

ខ្ញុំធ្វើដំណើរតាមរថភ្លើងក្រោមដី ពីតំបន់ Times Square ទៅកាន់ផ្លូវ Chamber ហើយក៏បានឈប់នៅមុខអគារពាណិជ្ជកម្មពិភពលោក។ អ្វីដែលខ្ញុំបានឃើញមុនដំបូងបង្អស់គឺផ្សែង និងអណ្ដាតភ្លើងបាញ់ចេញពីអគារចំនួនពីរ។

ខ្ញុំក៏ចាប់ផ្ដើមថតរូប។ ពេលខ្ញុំកំពុងថតអគារដែលកំពុងឆេះ ស្រាប់តែបុគ្គលិកសុខាភិបាលម្នាក់ស្រែកឡើង «ព្រះអឺយ មើលនោះ»។ ខ្ញុំក៏លើកម៉ាស៊ីនថតរូបឡើង ថតមនុស្សដែលកំពុងធ្លាក់។ រូបដែលខ្ញុំថតបាន ក្រោយមកក៏ត្រូវបានដាក់ឈ្មោះថា «បុរសដែលធ្លាក់»។

រូបភាពដ៏ស្ងប់ស្ងាត់ និងមិនដូចទៅនឹងរូបភាពដ៏សាហាវនៃសោកនាដកម្មដទៃ។ ពុំមានឈាម ពុំមានអ្នកណាម្នាក់ត្រូវបានគេបាញ់ប្រហារ។ ប៉ុន្តែ ពេលមើលទៅលើរូបថតនេះ អ្នកណាក៏ស្រមៃឃើញថា ខ្លួនហាក់កំពុងស្ថិតនៅទីនោះ។ ពួកគេអាចធ្លាក់ទៅក្នុងស្ថានភាពនេះ នៅពេលត្រូវធ្វើការសម្រេចចិត្តដូចទៅនឹងបុរសនៅក្នុងរូបថត។

ថ្ងៃនោះ ប្រទេសរបស់យើងត្រូវបានវាយប្រហារដោយក្រុមភេរវករ ហើយយើងត្រូវជួបនឹងរូបភាពនៃពលរដ្ឋរបស់យើងបាត់បង់ជីវិត។ រូបថត (បុរសដែលធ្លាក់) នេះ បង្ហាញអំពីបុរសម្នាក់នៅក្នុងចំណោមនោះ។

រហូតមកដល់បច្ចុប្បន្ន គេនៅតែមិនទាន់ដឹងអំពីអត្តសញ្ញាណរបស់បុរសដែលធ្លាក់នោះ។ បុរសនោះអាចជាបុគ្គលិកភោជនីយដ្ឋាន Windows on the World នៅលើអគារខាងជើងនៃមជ្ឈមណ្ឌលពាណិជ្ជកម្មពិភពលោក៕

September 10, 2021

ទីក្រុងបាងកក គ្រោងនឹងបើកទ្វារទទួលទេសចរ ចាប់ពីខែក្រោយ

ប្រទេសថៃ មានផែនការបើកទ្វាររាជធានីបាងកក និងតំបន់មួយចំនួន ដើម្បីទទួលភ្ញៀវបរទេសចាប់ពីខែតុលា ក្នុងគ្រាដែលតួលេខអ្នកឆ្លង COVID-19 ថ្មី ប្រហែលជាបានឡើងដល់ចំនុចកំពូលរួចហើយ។

អ្នកនាំពាក្យរបស់រដ្ឋាភិបាលថៃ ថានកន វ៉ាងប៊ុនគង់ចាន់ (Thankorn Wangboonkongchan) កាលពីថ្ងៃទី 9 កញ្ញា បានឱ្យដឹងថា រាជធានីបាងកក រួមនឹង ហួហ៊ីន ប៉ាតៃយ៉ា និង ឈៀងម៉ៃ នឹងស្ថិតក្នុងកម្មវិធីបើកទ្វារទទួលទេសចរបរទេសទាំងឡាយណាដែលបានចាក់វ៉ាក់សាំងបង្ការ COVID-19 រួចរាល់ និងសន្យាថា នឹងធ្វើតេស្តឱ្យបានត្រឹមត្រូវចំពោះអ្នកទេសចរ។

ក៏ប៉ុន្តែ ប្រធានអាជ្ញាធរទេសចរណ៍ថៃ លោក យុត្ថាសាក់ ស៊ុប៉ាសន (Yuthasak Supasorn) សង្កត់ធ្ងន់ថា ទីក្រុងបាងកក នឹងបើកទ្វារតែមួយផ្នែកប៉ុណ្ណោះ ដោយចាប់ផ្ដើមពីតំបន់ទេសចរណ៍សំខាន់។ លោកថ្លែងថា អាជ្ញាធរបានដាក់គោលដៅទទួលអ្នកទេសចរណ៍ឱ្យបាន 1 លាននាក់នៅក្នុងឆ្នាំនេះ។ តួលេខនេះកាលពីឆ្នាំ 2019 គឺជិត 40 លាននាក់។

ប្រទេសថៃ កាលពីថ្ងៃទី 9 កញ្ញា បានរកឃើញអ្នកឆ្លង COVID-19 ថ្មី ចំនួន 16,031 នាក់ និង 220 នាក់បានស្លាប់ ធ្វើឱ្យតួលេខអ្នកឆ្លងសរុបឡើងដល់ 1,338,550 នាក់ និងអ្នកស្លាប់សរុបកើនដល់ 13,731 នាក់។

បច្ចុប្បន្ន ប្រទេសថៃ ចាក់វ៉ាក់សាំង COVID-19 ជូនពលរដ្ឋទូទាំងប្រទេសបាន 15% ខណៈនៅទីក្រុងបាងកក តួលេខនេះគឺ 34%៕

September 10, 2021

ត្រលប់ទៅមើលហេតុការណ៍ភេរវកម្មថ្ងៃទី 11 កញ្ញា ឆ្នាំ 2001 ដែលបានធ្វើឱ្យកក្រើក សហរដ្ឋអាមេរិក និងពិភពលោក

បណ្ដារូបភាពដែលថតបាននៅក្នុងហេតុការណ៍ដ៏មហាសែនច្របូកច្របល់ ប្រកបដោយភាពរន្ធត់ បន្ទាប់ពីក្រុមភេរវករបានបញ្ជាឱ្យយន្តហោះជាច្រើនគ្រឿង ហោះទៅបុកអគារមួយចំនួនដែលជានិមិត្តរូបរបស់ សហរដ្ឋអាមេរិក កាលពីថ្ងៃទី 11 កញ្ញា ឆ្នាំ 2001។

អណ្ដាតភ្លើង និងផ្សែង កំពុងតែហុយចេញពីអគារនៃមជ្ឈមណ្ឌលពាណិជ្ជកម្មពិភពលោក នៅទីក្រុងនីវយ៉ក ក្រោយពីក្រុមភេរវករ al-Qaeda បញ្ជាឱ្យយន្តហោះ ហោះទៅបុកអគារខ្ពស់ចំនួនពីរ នៅក្នុងថ្ងៃទី 11 កញ្ញា ឆ្នាំ 2001។

«នោះគឺជាថ្ងៃដែលរូបភាពរបស់វាមិនអាចបំភ្លេចបាន។ ថ្ងៃអវសាននៃផែនដី ហិង្សា និងកាចសាហាវដូចបៃសាច» សារព័ត៌មាន AP រៀបរាប់នៅក្នុងខួប 20 ឆ្នាំនៃព្រឹត្តិការណ៍ 11 កញ្ញា។

អ្នកដំណើរនៅតំបន់ Manhattan កំពុងឈរមើលហេតុការណ៍ដ៏រន្ធត់ នៅពេលផ្សែងបាញ់ចេញពីមជ្ឈមណ្ឌលពាណិជ្ជកម្មពិភពលោក កាលពីថ្ងៃទី 11 កញ្ញា ឆ្នាំ 2001។

អណ្ដាតភ្លើង និងផ្សែងហុយចេញពីអគារខាងជើងនៃមជ្ឈមណ្ឌលពាណិជ្ជកម្មពិភពលោក បន្ទាប់ពីត្រូវបានវាយប្រហារដោយក្រុមភេរវករ។

ក្រុមភេរវករ បានប្លន់យន្តហោះពាណិជ្ជកម្ម និងបញ្ជាឱ្យហោះបុកមជ្ឈមណ្ឌលពាណិជ្ជកម្មពិភពលោក នៅ នីវយ៉ក មន្ទីរបញ្ចកោណ នៅរដ្ឋធានីវ៉ាស៊ីងតោន។ ក្នុងចំណោមយន្តហោះដែលត្រូវបានប្លន់ មានមួយគ្រឿងបានធ្លាក់នៅវាលស្រែ នៅ Pennsylvania។ មនុស្សជិត 3,000 នាក់ បានស្លាប់ ខណៈដែលអគារភ្លោះ 110 ជាន់ នៃមជ្ឈមណ្ឌលពាណិជ្ជកម្មពិភពលោក នៅសល់តែគំនរបាក់បែក។

ស្ត្រីពីរនាក់ កំពុងឱបគ្នាយំ នៅពេលឃើញអគារនៃមជ្ឈមណ្ឌលពាណិជ្ជកម្មពិភពលោក កំពុងឆេះ។

មនុស្សម្នាយកកន្សែងបិទមុខមាត់ បន្ទាប់ពីអគារមជ្ឈមណ្ឌលពាណិជ្ជកម្មពិភពលោក បានដួលរលំ។

មនុស្សម្នាក់បានធ្លាក់ពីអគារខាងជើងនៃមជ្ឈមណ្ឌលពាណិជ្ជកម្មពិភពលោក ចំណែកមនុស្សម្នាក់ទៀតកំពុងតោងជញ្ជាំងខាងក្រៅនៃអគារដែលកំពុងឆេះ។

រូបភាពរាប់មិនអស់នៃករណីភេរវកម្មថ្ងៃទី 11 កញ្ញា ឆ្នាំ 2001 ត្រូវបានគេថត និងចែករំលែក សូម្បីតែអ្នកអវកាសនៅលើស្ថានីយអវកាសអន្តរជាតិ ក៏ថតបានរូបភាពមួយចំនួន។

មនុស្សម្នារត់ចេញពីតំបន់នៃអគារមជ្ឈមណ្ឌលពាណិជ្ជកម្មពិភពលោកដែលបានដួលរលំ ហើយនៅជុំវិញពួកគេគឺជាផ្សែង និងធូលីដេរដាស។

ប្រជាជននាំគ្នាឆ្លងកាត់ស្ពាន Brooklyn ក្នុងទីក្រុងនីវយ៉ក នៅពេលធ្វើដំណើរពី Manhattan ទៅកាន់ Brooklyn ក្រោយពីអគារចំនួនពីររបស់មជ្ឈមណ្ឌលពាណិជ្ជកម្មពិភពលោកបានស្រុតបាក់ និងដួលរលំ។

ក្រុមពន្លត់អគ្គិភ័យកំពុងស្ថិតនៅលើគំនរបាក់បែកនៅតំបន់អគារមជ្ឈមណ្ឌលពាណិជ្ជកម្មពិភពលោក នាទីក្រុងនីវយ៉ក កាលពីថ្ងៃទី 11 កញ្ញា 2001។

បុគ្គលិកពន្លត់អគ្គិភ័យម្នាក់ដែលរងគ្រោះ កំពុងស្រែកក្នុងការឈឺចាប់ ពេលត្រូវបានជួយសង្គ្រោះ។

អណ្ដាតភ្លើង និងផ្សែងហុយចេញពីផ្នែកមួយនៃមន្ទីរបញ្ចកោណ នៅរដ្ឋធានីវ៉ាស៊ីងតោន កាលពីថ្ងៃទី 11 កញ្ញា 2001។

យន្តហោះដែលមានលេខសម្គាល់ 77 របស់ក្រុមហ៊ុន American Airlines ដឹកមនុស្ស 64 នាក់ រួមទាំងភេរវករ al-Qaeda ចំនួន 5 នាក់ បានបុកផ្នែកខាងលិចនៃអគារមន្ទីរបញ្ចកោណ នៅវេលាម៉ោង 9 និង 37 នាទី នៃថ្ងៃទី 11 កញ្ញា 2001 បណ្ដាលឱ្យមនុស្ស 29 នាក់ បាត់បង់ជីវិត។

វរសេនីយឯក Bruce Westcott មកពីកងទ័ពជើងគោក កំពុងលើកទឹកចិត្តបុគ្គលិកមន្ទីរបញ្ចកោណ Racquel Kelley ក្នុងពេលអ្នកស្រីកំពុងត្រូវបានគេជួយផ្នែកសុខាភិបាល នៅខាងក្រៅមន្ទីរបញ្ចកោណ ក្នុងរដ្ឋធានីវ៉ាស៊ីងតោន៕

September 10, 2021

បច្ចេកវិទ្យាអភិវឌ្ឍវ៉ាក់សាំង COVID-19 ថ្មី ដោយប្រើរុក្ខជាតិ និងមិនបាច់រក្សាទុកក្នុងទូទឹកកក

សហរដ្ឋអាមេរិក ៖ ក្រុមវិស្វករផ្នែកវិទ្យាសាស្ត្រ ណាណូ (nano) នៅសាកលវិទ្យា California San Diego កំពុងអភិវឌ្ឍវ៉ាក់សាំងបង្ការវីរុស COVID-19 ដែលវ៉ាក់សាំងនេះអាចទ្រាំបាននឹងកម្ដៅ ដោយមានសមាសធាតុចម្បងគឺវីរុសពីរុក្ខជាតិ ឬបាក់តេរី។

វ៉ាក់សាំងខាងលើនេះ ទើបតែស្ថិតក្នុងដំណាក់កាលអភិវឌ្ឍដំបូងនៅឡើយ។ នៅលើសត្វកណ្ដុរ វ៉ាក់សាំងនេះជួយជំរុញការបង្កើតអង្គបដិប្រាណក្នុងបរិមាណយ៉ាងច្រើនដែលអាចកម្ចាត់ COVID-19។ បើសិនជាមានសុវត្ថិភាព និងប្រសិទ្ធភាពនៅលើមនុស្ស ផលិតផលនេះនឹងផ្លាស់ប្ដូររាល់ការប្រឹងប្រែងដើម្បីចែកចាយវ៉ាក់សាំង នៅទូទាំងពិភពលោក រួមទាំងតំបន់ជនបទដាច់ស្រយាល និងសហគមន៍ដែលមានប្រាក់ចំណូលទាប។

«បច្ចេកវិទ្យាវ៉ាក់សាំងរបស់យើង មានស្ថិរភាពផ្នែកសីតុណ្ហភាព ដូច្នេះវាអាចត្រូវបានប្រើប្រាស់នៅតំបន់ដែលមិនអាចដាក់ទូទឹកកកដែលមានសីតុណ្ហភាពត្រជាក់ខ្លាំង ឬទីដែលរថយន្តបំពាក់ទូទឹកកកត្រជាក់ខ្លាំងមិនអាចទៅដល់» Nicole Steinmeetz សាស្ត្រាចារ្យផ្នែកបច្ចេកទេសណាណូ និងជាប្រធានមជ្ឈមណ្ឌលបច្ចេកទេសប្រព័ន្ធស៊ាំវិទ្យាកម្រិតណាណូ នៃមហាវិទ្យាល័យ Jacobs របស់សាកលវិទ្យាល័យ UC San Diego បានឱ្យដឹងដូច្នេះ។

រុក្ខជាតិសណ្ដែកកួរដែលក្រុមស្រាវជ្រាវរបស់សាស្ត្រាចារ្យ Nicole Steinmeetzប្រើប្រាស់ក្នុងការអភិវឌ្ឍវ៉ាក់សាំងបង្ការ COVID-19

ក្នុងការស្រាវជ្រាវដែលត្រូវបានចុះផ្សាយកាលពីថ្ងៃទី 7 កញ្ញា នៅលើទស្សនាវដ្ដីនៃសមាគមគីមីសាស្ត្រ សហរដ្ឋអាមេរិក ក្រុមស្រាវជ្រាវបង្កើតបានវ៉ាក់សាំងបង្ការ COVID-19 ចំនួនពីរប្រភេទ ក្នុងនោះ ទីមួយគឺជាវ៉ាក់សាំងអភិវឌ្ឍពីវីរុសនៅលើរុក្ខជាតិ ដែលវាមានឈ្មោះថា “cowpea mosaic virus” និងមួយប្រភេទទៀត អភិវឌ្ឍពីវីរុសនៅលើបាក់តេរី ដែលហៅថា Q beta។

ការអភិវឌ្ឍវ៉ាក់សាំងទាំងពីរប្រភេទនេះ សុទ្ធតែប្រើរូបមន្តដូចគ្នា។ ក្រុមស្រាវជ្រាវប្រើប្រាស់រុក្ខជាតិសណ្ដែកកួរ និងបាក់តេរី E. coli ដើម្បីបណ្ដុះជាវីរុសរុក្ខជាតិ និងវីរុសបញ្ញើក្អែកលើបាក់តេរី ចំនួនរាប់លាន ដែលមានរូបរាងជាគ្រាប់មូលល្អិតកម្រិតណាណូ។ អ្នកវិទ្យាសាស្ត្របានប្រមូលគ្រាប់វីរុសទាំងនេះ ក្រោយមកភ្ជាប់ប្រូតេអ៊ីនបន្លាមួយកំណាត់របស់ COVID-19 ទៅលើផ្ទៃរបស់វីរុសណាណូ។ ផលិតផលសម្រេច មានរូបរាងដូចទៅនឹងវីរុសចម្លងជំងឺដែលមានសមត្ថភាពជំរុញឱ្យប្រព័ន្ធការពាររាងកាយស្គាល់ពួកវា ប៉ុន្តែ ពួកវាមិនឆ្លងរាលដាលនៅលើមនុស្ស និងសត្វនោះទេ។ ប្រូតេអ៊ីនមួយកំណាត់ខ្លីមានរូបរាងដូចបន្លាដែលត្រូវបានភ្ជាប់ទៅនឹងផ្ទៃលើនៃវីរុសសិប្បនិម្មិតរបស់ក្រុមអ្នកវិទ្យាសាស្ត្រនេះ ជំរុញឱ្យរាងកាយធ្វើប្រតិកម្ម បង្កើតបានជាអង្គបដិប្រាណប្រឆាំងនឹងវីរុស COVID-19។

Nicole F. Steinmetz សាស្ត្រាចារ្យផ្នែកបច្ចេកទេសណាណូ និងជាប្រធានមជ្ឈមណ្ឌលបច្ចេកទេសប្រព័ន្ធស៊ាំវិទ្យាកម្រិតណាណូ នៃមហាវិទ្យាល័យ Jacobs របស់សាកលវិទ្យាល័យ UC San Diego

ប្រការដែលនាំឱ្យ Steinmetz សប្បាយចិត្តខ្លាំងបំផុត នោះគឺបច្ចេកវិទ្យាវ៉ាក់សាំងនេះអាចបត់បែនបានយ៉ាងល្អទៅតាមកាលៈទេសៈ ដោយវាអាចត្រូវបានកែសម្រួលក្នុងរយៈពេលខ្លីដើម្បីសម្របខ្លួនសម្រាប់ប្រឆាំងនឹងវីរុសដែលទើបបង្ហាញខ្លួនថ្មី។

យ៉ាងនេះក្ដី សារព័ត៌មាន Phys.org បានឱ្យដឹងថា ក្រុមអ្នកស្រាវជ្រាវខាងលើ ត្រូវការពេលវេលាច្រើនបន្ថែមទៀត ដើម្បីអាចឈានដល់ដំណាក់កាលពិសោធន៍លើមនុស្ស៕

September 9, 2021

Category: អន្តរជាតិ