អន្តរជាតិ - La Reine Media

ផ្ទុះភ្នំភ្លើង Otake នៅលើកោះធំ Suwanose ! ជប៉ុន ប្រកាសអាសន្ន

អាជ្ញាធរប្រទេសជប៉ុន បានចេញសេចក្ដីព្រមាន បន្ទាប់ពីភ្នំភ្លើងនៅភាគនិរតីប្រទេសនេះ ផ្ទុះ បណ្ដាលឱ្យកម្អែភ្នំភ្លើង ក៏ដូចជាដុំថ្មភ្លើងធំៗ ត្រូវខ្ទាតចេញចម្ងាយរាប់រយម៉ែត្រ។

ស្ថាប័នឧតុនិយមរបស់ ជប៉ុន ថ្ងៃនេះ បានប្រកាសអាសន្នកម្រិត 3 នៅលើមាត្រដ្ឋានទាំង 5 កម្រិត ដែលមានន័យថា ប្រជាជនមិនគួរទៅក្បែរតំបន់ជុំវិញភ្នំភ្លើង Otake ដែលស្ថិតនៅលើកោះ Suwanose នៃខេត្ត Kagoshima នោះទេ ក្រោយករណីផ្ទុះកម្អែកាលពីថ្ងៃទី 16 ខែកញ្ញា។

បច្ចុប្បន្ន ពុំទាន់មានរបាយការណ៍ស្ដីពីការខូចខាតទ្រព្យសម្បត្តិ ក៏ដូចជាមានមនុស្សស្លាប់ ឬរងរបួសនៅឡើយ។

ការផ្ទុះដំបូង បានកើតឡើងកាលពីថ្ងៃទី 16 កញ្ញា។ ស្ថាប័នឧតុនិយមបានព្រមានថា ផ្ទាំងថ្មធំៗដែលបាញ់ចេញពីមាត់ភ្នំភ្លើងកម្ពស់ 799 ម៉ែត្រ នៅឯភូមិ Toshima អាចធ្លាក់ក្នុងរង្វង់ចម្ងាយ 2 គីឡូម៉ែត្រ។

ក្រោយការផ្ទុះកាលពីវេលាទៀបភ្លឺថ្ងៃនេះ រាជរដ្ឋាភិបាលជប៉ុន បានបង្កើតការិយាល័យទំនាក់ទំនងមួយនៅក្នុងការិយាល័យនាយករដ្ឋមន្ត្រី ដើម្បីប្រមូលព័ត៌មាន។

Suwanose ជាកោះភ្នំភ្លើងមួយដែលមានប្រជាជនមិនដល់ 100 នាក់ ស្ថិតនៅភាគខាងត្បូងកោះធំ Kyushu នៅភាគនិរតីនៃប្រទេសជប៉ុន។ ប្រទេសដែលមានភ្នំភ្លើងសកម្មជាច្រើនមួយនេះ ស្ថិតនៅលើតំបន់ខ្សែក្រវ៉ាត់ភ្លើងនៃមហាសមុទ្រប៉ាស៊ីហ្វិក (Pacific Ring of Fire) ជាទីដែលមានគ្រោះរញ្ជួយដី និងបន្ទុះភ្នំភ្លើងច្រើនជាងគេក្នុងពិភពលោក៕

September 17, 2021

ទារកអាយុ 3 ខែ និងកុមារីអាយុ 5 ឆ្នាំ ត្រូវគេប្លុងចោលនៅព្រំដែន អាម៉េរិក ដោយសង្ឃឹមថា បានរស់នៅលើទឹកដីនេះ

(សហរដ្ឋអាម៉េរិក)-ទាហានការពារព្រំដែននៅរដ្ឋ Texas បានប្រទះទើញកុមារីម្នាក់អាយុ 2 ឆ្នាំ អង្គុយក្បែរប្អូនប្រុសរបស់ខ្លួនដែលមានអាយុ 3 ខែ នៅក្រោមគុម្ពោធព្រៃ ហើយនៅក្បែរនោះគឺជាលិខិតមួយសន្លឹក។

ក្នុងពេលល្បាតនៅឯទន្លេជាប់ព្រំដែន Rio Grande ដែលខណ្ឌចែក សហរដ្ឋអាម៉េរិក និងប្រទេសម៉ិកស៊ិក កាលពីថ្ងៃទី 14 កញ្ញា បុគ្គលិកគយ និងកម្លាំងការពារព្រំដែនរបស់ អាម៉េរិក (CBP) បានប្រទះឃើញសញ្ញាមិនប្រក្រតីនៅមាត់ទន្លេ។ ពេលទៅក្បែរ ពួកគេបានឃើញកុមារីម្នាក់ពាក់អាវពណ៌លឿង ខោពណ៌ផ្កាឈូក អង្គុយក្បែរកូនគ្រែយួរដៃរបស់ទារកតូចម្នាក់។

ជនអន្តោប្រវេសន៍ កំពុងឆ្លងដែនពី ម៉ិកស៊ិក ចូល សហរដ្ឋអាមេរិក ត្រង់តំបន់ Rio Grande កាលពីខែឧសភា ឆ្នាំ 2021

លិខិតមួយសន្លឹកនៅក្បែរនោះ បានឱ្យដឹងថា កុមារីអាយុ 2 ឆ្នាំ និងទារកអាយុ 3 ខែនេះគឺជាបងប្អូនបង្កើត មកពី ហុងឌូរ៉ាស។ ក្រុមទាហានការពារព្រំដែនបានស្វែងរកមនុស្សនៅជុំវិញកន្លែងកើតហេតុ ប៉ុន្តែមិនបានឃើញអ្នកណាម្នាក់ឡើយ។ ក្មេងទាំងពីរនាក់នេះ ត្រូវបាននាំទៅកន្លែងសុវត្ថិភាព និងមិនចាំបាច់ត្រូវចូលពេទ្យ។

នេះគឺជាករណីថ្មីបំផុតដែលកុមារត្រូវបានគេយកទៅប្លុងចោលនៅព្រំដែន ដោយសង្ឃឹមថា ទាហានព្រំដែនរបស់ អាម៉េរិក នឹងបានឃើញ និងទទួលយកពួកគេ រួចដោះស្រាយបញ្ហាលិខិតស្នាម ហើយប្រគល់ក្មេងទាំងនេះមកឱ្យអាណាព្យាបាល ដែលភាគច្រើនគឺជាឪពុក ម្ដាយ ឬសាច់ញាតិរបស់ក្មេង ដែលពួកគេកំពុងស្ថិតនៅក្នុងទឹកដី អាម៉េរិក។

ជនអន្តោប្រវេសន៍ កំពុងរត់ឡើងច្រាំងទន្លេ Rio Grande ក្នុងតំបន់ Penitas រដ្ឋ Texas កាលពីខែមីនា ឆ្នាំ 2021

កាលពីខែឧសភា CBP បានបង្ហោះវីដេអូមួយបង្ហាញថា កុមារីតូចម្នាក់ អាយុ 5 ឆ្នាំ ដើរអណ្ដែតត្រសែតម្នាក់ឯង បន្ទាប់ពីត្រូវគេប្រាប់ឱ្យដើរឆ្លងព្រំដែន។

ក្រុមអន្តោប្រវេសន៍ នាំគ្នារត់ឆ្លងដែន ពី ម៉ិកស៊ិក ចូលទឹក អាម៉េរិក ត្រង់តំបន់ទន្លេ Rio Grande កាលពីខែឧសភា ឆ្នាំ 2019

កាលពីខែសីហា កម្លាំងការពារព្រំដែន សហរដ្ឋអាម៉េរិក ក៏បានឃាត់ខ្លួនបណ្ដោះអាសន្ន ចំពោះកុមារចំនួន 834 នាក់ ដែលជាក្រុមអន្តោប្រវេសន៍ឆ្លងដែនដោយមិនមានមនុស្សចាស់ដើរជាមួយ។ នៅក្នុងខែសីហា ឆ្នាំ 2021 កុមារអន្តោប្រវេសន៍ដែលពុំមានមនុស្សចាស់ដើរជាមួយ សរុបប្រមាណ 18,847 នាក់ បានឆ្លងដែនចូលទឹកដី អាម៉េរិក ប៉ុន្តែ តួលេខនេះបានថយចុះបន្តិច បើធៀបនឹងខែកក្កដា៕

September 16, 2021

ខ្លាចការវាយប្រហារពីកងទ័ពរបស់ ចិនដីគោក យន្តហោះចម្បាំងរបស់ កោះតៃវ៉ាន់ ហាត់ហោះហើរលើផ្លូវល្បឿនលឿន

យន្តហោះចម្បាំង និងយន្តហោះព្រមានរហ័សរបស់កោះតៃវ៉ាន់ ហាត់ស៊ាំហោះឡើង និងចុះចតលើផ្លូវល្បឿនលឿន នៅក្នុងសេណារីយោ «មូលដ្ឋានទ័ពអាកាសសំខាន់ៗ រងការវាយប្រហារពីគ្រាប់រ៉ុក្កែត»។

ក្រុមយន្តហោះចម្បាំងដែលរួមមាន F-16V មួយគ្រឿង, Mirage 2000 មួយគ្រឿង, IDF (Indigenous Defense Fighter) មួយគ្រឿង និង E-2 មួយគ្រឿង ធ្វើការហាត់ស៊ាំក្នុងការហោះឡើង និងចុះចតនៅលើកំណាត់ផ្លូវល្បឿនលឿនដែលស្ថិតនៅភាគខាងត្បូងស្រុក Pingtung របស់កោះតៃវ៉ាន់ កាលពីថ្ងៃទី 15 កញ្ញា។ ការហ្វឹកហាត់នេះស្ថិតក្នុងក្របខណ្ឌនៃសមយុទ្ធប្រចាំឆ្នាំ Han Kuang ដែលធ្វើឡើងចាប់ពីថ្ងៃទី 13 ដល់ 17 កញ្ញា។

ការហ្វឹកហាត់នេះគឺដើម្បីបង្ការ និងទប់ទល់នឹងស្ថានការណ៍ដែលមូលដ្ឋានកងទ័ពអាកាសនានារបស់ តៃវ៉ាន់ រងការវាយប្រហារពីសត្រូវ។

មេដឹកនាំរបស់ កោះតៃវ៉ាន់ លោកស្រី Tsai Ing-wen បានកោតសរសើរចំពោះកងកម្លាំងការពារដែនអាកាសរបស់ តៃវ៉ាន់ ដែលកាន់តែបង្ហាញអំពីភាពជឿជាក់ទៅលើលទ្ធភាពការពារដែនអាកាសរបស់កោះនេះ «តាមរយៈជំនាញក្នុងការប្រយុទ្ធដ៏អស្ចារ្យ រួមនឹងសកម្មភាពជាក់ស្ដែង និងរហ័សរហួនដែលបានមកពីការហ្វឹកហាត់ប្រចាំថ្ងៃ»។

តៃវ៉ាន់ មានផ្លូវរត់សម្រាប់យន្តហោះចម្បាំង ចំនួន 5 កន្លែង នៅគ្រប់តំបន់សំខាន់។ ផ្លូវរត់ទាំងនេះ ភាគច្រើនជាកំណត់ផ្លូវល្បឿនលឿនដែលត្រូវបានសាងសង់ជាពិសេសសម្រាប់ការហោះឡើង និងចុះចតរបស់យន្តហោះចម្បាំង ដើម្បីអាចប្រើប្រាស់បានភ្លាមៗនៅពេលមូលដ្ឋានទ័ពអាកាសត្រូវបានកម្ទេចដោយសត្រូវ។ នេះបើតាមសារព័ត៌មាន Reuters។

មូលដ្ឋានទ័ពអាកាសរបស់ តៃវ៉ាន់ ភាគច្រើនស្ថិតនៅភាគខាងលិច ទល់មុខនឹងប្រទេសចិនដីគោក ដែលអាចរងការវាយប្រហារពីមីស៊ីលភ្លាមៗ បន្ទាប់ពីសង្គ្រាមកើតឡើង។

មូលដ្ឋានទ័ពអាកាសចំនួនពីរដែលស្ថិតនៅភាគខាងកើតរបស់កោះតៃវ៉ាន់ មានឃ្លាំងយន្តហោះស្ថិតនៅជ្រៅក្នុងភ្នំ ដែលអាចទប់ទល់នឹងការវាយប្រហារបានល្អជាងបណ្ដាមូលដ្ឋាននៅភាគខាងលិចរបស់ដែនកោះនេះ។

ការហាត់ស៊ាំនានារបស់កងទ័ពតៃវ៉ាន់ ត្រូវបានធ្វើឡើងក្នុងគ្រាដែល ចិនដីគោក កំពុងបង្កើនសកម្មភាព ក៏ដូចជាវត្តមាននៅជុំវិញកោះនេះ។ ប្រទេសចិន តែងតែចាត់ទុកកោះតៃវ៉ាន់ ជាផ្នែកមួយនៃទឹកដីរបស់ខ្លួនដែលមិនអាចកាត់ផ្ដាច់បាន និងត្រៀមខ្លួនជានិច្ចក្នុងការប្រើប្រាស់អាវុធដើម្បីដណ្ដើមកោះនេះមកវិញ បើសិនជាចាំបាច់។

ក្នុងរយៈពេលចុងក្រោយនេះ ទ័ពអាកាសរបស់ តៃវ៉ាន់ ហាក់ត្រូវបញ្ជូនយន្តហោះចម្បាំងទៅបណ្ដេញយន្តហោះចិនដីគោក ស្ទើរតែរាល់ថ្ងៃ ដោយសារតែយន្តហោះយោធាចិន រំលោភចូលតំបន់កំណត់អត្តសញ្ញាណការពារដែនអាកាសរបស់ តៃវ៉ាន់៕

September 15, 2021

តាលីបង់ ដណ្ដើមតំណែងគ្នា! ថ្នាក់លើឈ្លោះប្រកែកគ្នា ថ្នាក់ក្រោមវាយតប់គ្នានៅឯវិមានប្រធានាធិបតី

អាហ្វហ្គានីស្ថាន៖ ក្រុមមន្ត្រីជាន់ខ្ពស់ តាលីបង់ បានឱ្យដឹងថា ការវាយតប់គ្នាដ៏ធំមួយបានកើតឡើងរវាងសមាជិករបស់ក្រុមនេះ ជុំវិញការបង្កើតរដ្ឋាភិបាលថ្មី។

ប្រភពព័ត៌មានពី តាលីបង់ កាលពីថ្ងៃទី 14 កញ្ញា បានឱ្យដឹងថា សហស្ថាបនិកក្រុម លោក Abdul Ghani Baradar និង Khalil ur-Rahman Haqqani រដ្ឋមន្ត្រីបណ្ដោះអាសន្នទទួលបន្ទុកជនភៀសខ្លួន ដែលជាអ្នកមានឥទ្ធិពលខ្លាំងនៅក្នុងបណ្ដាញ Haqqani (សាខាប្រដាប់អាវុធសំខាន់របស់ តាលីបង់) បានឈ្លោះប្រកែកគ្នាយ៉ាងខ្លាំងក្លា ខណៈដែលថ្នាក់ក្រោមរបស់ពួកគេ លោតចូលប្រវាយប្រតប់គ្នា។

សមាជិកជាន់ខ្ពស់ម្នាក់របស់ តាលីបង់ នៅប្រទេសកាតា និងប្រភពព័ត៌មានមួយទៀតក៏បានបញ្ជាក់ថា ការឈ្លោះទាស់ទែងគ្នាខាងលើ រវាងក្រុមមេដឹកនាំ តាលីបង់ បានកើតឡើងកាលពីចុងសប្ដាហ៍មុន។ ប្រភពព័ត៌មាននានាឱ្យដឹងថា មូលហេតុគឺដោយសារឧបនាយករដ្ឋមន្ត្រីបណ្ដោះអាសន្ន Baradar មិនពេញចិត្តនឹងរចនាសម្ព័ន្ធរបស់រដ្ឋាភិបាល តាលីបង់។

ហេតុការណ៍ឈ្លោះប្រកែកគ្នានេះត្រូវបានគេជឿថា បានចាប់ផ្ដើមចេញពីការបែកបាក់ផ្ទៃក្នុង ជុំវិញបញ្ហាដែលថា សមាជិកណាខ្លះត្រូវទទួលបានតំណែង បន្ទាប់ពីក្រុមនេះបានឡើងគ្រប់គ្រង អាហ្វហ្គានីស្ថាន។ Baradar យល់ថា ក្រុមមនុស្សដែលបានធ្វើសកម្មភាពការទូតដូចជាថ្នាក់ក្រោមរបស់លោក ត្រូវតែទទួលបានចំណាប់អារម្មណ៍ ខណៈដែលសមាជិកនៃបណ្ដាញ Haqqani និងអ្នកគាំទ្រនិយាយថា តាលីបង់ ដណ្ដើមបានជ័យជំនះតាមរយៈការប្រយុទ្ធ។

Baradar គឺជាមេដឹកនាំ តាលីបង់ ដំបូងគេដែលបានចរចាតាមទូរស័ព្ទជាមួយប្រធានាធិបតីអាម៉េរិក ដែលកាលណោះគឺលោក Donald Trump។ មុននោះ Baradar ក៏បានចុះហត្ថលេខាលើកិច្ចព្រមព្រៀង Doha ស្ដីពីការដកទ័ពរបស់ អាម៉េរិក ចេញពី អាហ្វហ្គានីស្ថាន។

ចំណែកឯបណ្ដាញ Haqqani វិញ មានជាប់ទាក់ទងនឹងការវាយប្រហារភេរវកម្មមួយចំនួនសំដៅលើកងទ័ព អាហ្វហ្កានីស្ថាន និងសម្ព័ន្ធមិត្ត ក្នុងអំឡុងច្រើនឆ្នាំមកនេះ។ សហរដ្ឋអាម៉េរិក ចាត់ទុកបណ្ដាញ Haqqani ជាអង្គការភេរវកម្ម។ Sirajuddin Haqqani ដែលជាមេដឹកនាំបណ្ដាញនេះ គឺជារដ្ឋមន្ត្រីក្រសួងមហាផ្ទៃបណ្ដោះអាសន្ននៅក្នុងរដ្ឋាភិបាលអន្តរកាលរបស់ តាលីបង់។

Khalil ur-Rahman Haqqani រដ្ឋមន្ត្រីបណ្ដោះអាសន្នទទួលបន្ទុកជនភៀសខ្លួន

ជម្លោះរវាងក្រុមទាំងពីរខាងលើបានកើតឡើងមុនពេល Baradar បាត់ខ្លួនពីទីសាធារណៈ។ មនុស្សមួយចំនួនយល់ថា Baradar ប្រហែលជាបានស្លាប់។ ប៉ុន្តែ ប្រភពព័ត៌មានពី តាលីបង់ និយាយថា Baradar បានចាកចេញពីរដ្ឋធានីកាប៊ុល ទៅកាន់ទីក្រុង កានដាហារ បន្ទាប់ពីមានជម្លោះកើតឡើង។ កាលពីថ្ងៃទី 13 កញ្ញា Baradar ឱ្យដឹងថា លោកទៅបំពេញបេសកកម្មឆ្ងាយ និងអះអាងថា លោកពុំមានបញ្ហាអ្វីនោះទេ បើទោះជាស្ថិតនៅទីណាក៏ដោយ។

តាលីបង់ បានបញ្ជាក់ថា មិនមានករណីឈ្លោះប្រកែកគ្នា ឬវាយតប់គ្នានោះទេ ហើយ Baradar នៅតែមានសុវត្ថិភាព ប៉ុន្តែបានលើកឡើងនូវការប្រកាសផ្ទុយគ្នាស្ដីអំពីសកម្មភាពរបស់សហស្ថាបនិករបស់ក្រុមនេះ។ អ្នកនាំពាក្យម្នាក់បានឱ្យដឹងថា Baradar ទៅកាន់ កានដាហារ ដើម្បីជួបមេដឹកនាំ តាលីបង់ Hibatullah Akhundzada ប៉ុន្តែក្រោយមកបែរជានិយាយថា Baradar «ហត់នឿយ និងចង់សម្រាកបន្តិច»៕

September 15, 2021

COVID-19! អនាគតនៃ «មហារោគរាតត្បាត» ក្នុងរយៈពេល 6 ខែខាងមុខ

ដោយសារតែមនុស្សរាប់ពាន់លាននាក់នៅលើពិភពលោក មិនទាន់បានចាក់វ៉ាក់សាំង វិបត្តិសុខភាពដែលបង្កឡើងដោយ COVID-19 ពិបាកនឹងត្រូវបញ្ចប់ក្នុងរយៈពេល 6 ខែខាងមុខ ប៉ុន្តែ វាអាចនឹងផ្ទុះឆ្លងរាលដាលខ្លាំងជាងបច្ចុប្បន្ន នៅក្នុងរដូវរងា។

វ៉ាក់សាំងបង្ការ COVID-19 ប្រមាណ 5.76 ពាន់លានដូស ត្រូវបានគេចាក់នៅទូទាំងសកលលោក ក្នុងនោះ 43.3% នៃប្រជាជនសរុប បានចាក់វ៉ាក់សាំងយ៉ាងតិច 1 ដូស។ ប្រការនេះមានន័យថា មនុស្សជិត 4 ពាន់លាននាក់ទៀត នៅតែមិនទាន់បានចាក់វ៉ាក់សាំង។

ក្នុងគ្រាដែលការចាក់វ៉ាក់សាំងនៅក្នុងបណ្ដាប្រទេសអ្នកមាន សុទ្ធតែចាក់បានច្រើនជាង 60% បណ្ដាប្រទេសដែលមានប្រាក់ចំណូលទាបឯណោះវិញ ការចាក់ 1 ដូសនៅតែមិនទាល់ដល់ 1.9% នៅឡើង។ ខាងលើនេះគឺជាទិន្នន័យបានមកពី Our World in Data។

ក្រុមអ្នកជំនាញ សុទ្ធតែយល់ថា ការចាក់វ៉ាក់សាំងគឺជាគន្លឹះដែលជួយឱ្យមនុស្សលោកអាចទប់ទល់នឹងរោគរាតត្បាត។ ការឆ្លងរាលដាលរបស់ COVID-19 នាបច្ចុប្បន្ន អាចត្រូវបានគ្រប់គ្រង នៅពេលប្រជាជនភាគច្រើន (90-95%) បានទទួលការចាក់វ៉ាក់សាំង ឬធ្លាប់បានឆ្លងCOVID-19។ ប៉ុន្តែ ដោយសារតែប្រភពផ្គត់ផ្គង់វ៉ាក់សាំង និងល្បឿននៃការចាក់វ៉ាក់សាំងដែលមានកំណត់ដូចបច្ចុប្បន្ន គោលដៅនេះមិនអាចសម្រេចបាននៅក្នុងរយៈពេល 6 ខែខាងមុខ។

«មិនមានការចាក់វ៉ាក់សាំង យើងនឹងងាយរងផលប៉ះពាល់ ដោយសារវីរុសនឹងឆ្លងរាលដាលខ្លាំងនៅរដូវស្លឹកឈើជ្រុះ និងរដូវរងាខាងមុខ» Lone Simonsen អ្នកឯកទេសផ្នែករោគឆ្លង និងជាសាស្ត្រាចារ្យនៅសាកលវិទ្យាល័យ Roskilde ប្រទេសដាណឺម៉ាក ថ្លែងដូច្នេះ។

Michael Osterholm ប្រធានមជ្ឈមណ្ឌលគោលនយោបាយនិងស្រាវជ្រាវរោគឆ្លងនៃសាកលវិទ្យាល័យ Minnesota នៅ Minneapolis និងជាទីប្រឹក្សារបស់ប្រធានាធិបតីសហរដ្ឋអាមេរិក Joe Biden និយាយថា៖ «ខ្ញុំគិតថា រលកនៃការឆ្លងរាលដាលនឹងបន្តកើតឡើងនៅពាសពេញពិភពលោក។ រោគឆ្លងនឹងថយចុះ ប៉ុន្តែ ក្រោយមក ខ្ញុំគិតថា យើងនឹងរងការផ្ទុះឆ្លងរាលដាលថ្មីនៅរដូវស្លឹកឈើជ្រុះ និងរដូវរងាឆ្នាំនេះ»។

ការស្កេតកូដ QR ដើម្បីប្រយុទ្ធប្រឆាំងនឹង COVID-19 នៅ សិង្ហបុរី កាលពីខែឧសភា

Osterholm បន្ថែមថា៖ «យើងនឹងបានឃើញរោគរាតត្បាតផ្ទុះឆ្លងរាលដាលខ្លាំង រួចក៏ថយចុះជាច្រើនលើក ច្រើនសា ក្នុងអំឡុងពេលច្រើនឆ្នាំទៅមុខ នៅពេលវ៉ាក់សាំងត្រូវបានចាក់ទូលំទូលាយជាងបច្ចុប្បន្ន។ ខ្ញុំអាចនិយាយបានថា នេះគឺដូចទៅនឹងភ្លើងឆេះព្រៃមួយលើកដែលមិនមានទីបញ្ចប់ រហូតដល់វាបានដុតកម្ទេចគ្រប់យ៉ាង»។

មហារោគរាតត្បាតចំនួន 5 លើកដែលមនុស្សលោកធ្លាប់ជួបប្រទះក្នុងអំឡុង 130 ឆ្នាំកន្លងទៅ អាចឱ្យយើងដឹងអំពីតម្រុយនៃដំណើរការរបស់ COVID-19 នាពេលខាងមុខ។ នេះបើតាមសាស្ត្រាចារ្យ Simonsen។

Simonsen ឱ្យដឹងថា បើទោះរោគរាតត្បាតផ្ដាសាយទូទាំងសកលលោកដែលអូសបន្លាយពេលយូរបំផុតត្រឹម 5 ឆ្នាំ ប៉ុន្តែ ពួកវាភាគច្រើនផ្ទុះឆ្លងរាលដាលចាប់ពី 2-4 លើក ក្នុងអំឡុងពេលពី 2-3 ឆ្នាំ។ COVID-19 គឺជាវីរុសដែលខ្លាំងក្លាជាងគេ នៅពេលដែលឆ្នាំទីពីរជិតត្រូវបានបញ្ចប់ ពិភពលោកនៅតែពើបប្រទះនឹងរលកឆ្លងទីបី និងមិនទាន់មានសញ្ញាបង្ហាញអំពីទីបញ្ចប់នៅឡើយ។

ប្រវត្តិសាស្ត្របានបង្ហាញថា ការយល់ឃើញថា វីរុសនឹងបាត់ទៅវិញដោយឯកឯងទៅតាមពេលវេលាគឺជារឿងខុសឆ្គងទាំងស្រុង។ «បើទោះជាវ៉ារ្យ៉ង់ថ្មីនានា មិនមែនសុទ្ធតែគ្រោះថ្នាក់ជាងមុន ប៉ុន្តែវិបត្តិសុខភាពអាចប្រែទៅជាធ្ងន់ធ្ងរ នៅពេលវីរុសស្វែងរកវិធីសម្របខ្លួនទៅនឹងបរិស្ថានថ្មី» លោកស្រី Simonsen បញ្ជាក់ដូច្នេះ។ នេះបើតាមសារព័ត៌មាន Bloomberg។

Erica Charters សាស្ត្រាចារ្យរងផ្នែកប្រវត្តិសាស្ត្រសុខាភិបាល ប្រចាំសាកលវិទ្យាល័យ Oxford ឱ្យដឹងថា COVID-19 នឹងបញ្ចប់នៅក្នុងអំឡុងពេលផ្សេងៗគ្នាទៅតាមតំបន់ផ្សេងៗគ្នា។ រដ្ឋាភិបាលនានានឹងត្រូវធ្វើការសម្រេចចិត្តទៅលើកម្រិតនៃការរាតត្បាតរបស់វីរុសដែលពួកគេអាចរស់នៅជាមួយបាន។

Erica Charters បញ្ជាក់ថា៖ «ដំណាក់កាលនៃទីបញ្ចប់របស់ COVID-19 នឹងមិនស្របគ្នានៅទេ។ រោគរាតត្បាតគឺជាបាតុភូតជីវសាស្ត្រ ប៉ុន្តែវាក៏ជាបាតុភូតនយោបាយ និងសង្គមផងដែរ»។

ដូចដែលបានរៀបរាប់ខាងលើ ក្រុមអ្នកជំនាញយល់ថា គ្រប់គ្នាត្រូវការចាក់វ៉ាក់សាំងឱ្យបានទៀងទាត់ ដើម្បីរក្សាសមត្ថភាពការពារសុខភាពផ្ទាល់ខ្លួននៅចំពោះមុខ «មហាវីរុស» COVID-19៕

September 15, 2021

ឃើញនាវាចម្បាំងរបស់ ចិន ច្រើនគ្រឿង ចូលទៅក្បែរទឹកដី សហរដ្ឋអាម៉េរិក ក៏បញ្ជូននាវាល្បាតទៅឃ្លាំមើល

នាវាចម្បាំងរបស់ប្រទេសចិន ចំនួន 4 គ្រឿង ធ្វើការចល័តនៅតំបន់សេដ្ឋកិច្ចពិសេសជុំវិញប្រជុំកោះ Aleutian នៅ Alaska នាំឱ្យ សហរដ្ឋអាម៉េរិក បញ្ជូននាវាល្បាតឆ្នេរចេញទៅតាមដាន។

នាវាល្បាត USCGC Bertholf របស់ សហរដ្ឋអាម៉េរិក បានស្ថិតនៅទល់មុខគ្នានឹងនាវាចម្បាំង 4 គ្រឿងរបស់ប្រទេសចិន ក្បែរប្រជុំកោះ Aleutian លើលម្ហសមុទ្រក្បែរដែនទឹករបស់រដ្ឋ Alaska កាលពីខែសីហា ប៉ុន្តែ រូបថតទើបតែត្រូវបានក្រុមល្បាតឆ្នេររបស់ សហរដ្ឋអាម៉េរិក បញ្ចេញកាលពីថ្ងៃទី 13 កញ្ញា ក្រោយពីទីក្រុងប៉េកាំង បានរិះគន់លើដំណើរល្បាតដោយសេរីដែលត្រូវបានក្រុងវ៉ាស៊ីងតោន ធ្វើឡើងនៅឯមហាសមុទ្រ ប៉ាស៊ីហ្វិក។

«ក្នុងដំណើរល្បាតជាប្រចាំនៅសមុទ្រ Bering និងតំបន់ប៉ូលខាងជើង កាលពីថ្ងៃទី 30 សីហា នាវាល្បាត Bertholf បានប្រឈមមុខ និងបានទាក់ទងក្រុមនាវាចម្បាំងរបស់ប្រទេសចិន នៅតំបន់សេដ្ឋកិច្ចពិសេសរបស់ សហរដ្ឋអាម៉េរិក ក្នុងលម្ហសមុទ្រនៃប្រជុំកោះ Aleutian។

ដំណើររបស់នាវាចម្បាំងចិន និងតំបន់សេដ្ឋកិច្ចពិសេសរបស់ Alaska (ខៀវ)

ការស្ថិតនៅទល់មុខគ្នារវាងភាគីទាំងពីរ សុទ្ធតែបានគោរពតាមគោលការណ៍ និងច្បាប់អន្តរជាតិ។ កងកម្លាំងចិន មិនរំលោភដែនទឹករបស់ សហរដ្ឋអាម៉េរិក» ក្រុមល្បាតឆ្នេររបស់ អាម៉េរិក បានប្រាប់ដូច្នេះនៅពេលបញ្ចេញរូបថតទាំងនេះ។

ក្រុមល្បាតឆ្នេររបស់ អាម៉េរិក មិនបានបង្ហើបឱ្យដឹងអំពីអត្តសញ្ញាណរបស់ក្រុមនាវាចម្បាំងចិន នោះទេ ប៉ុន្តែ ឱ្យដឹងថា នាវាទាំងនេះរូបមាន នាវាល្បាតសមុទ្រដែលមានមីស៊ីលនាំផ្លូវ, នាវាពិឃាដបំពាក់មីស៊ីលនាំផ្លូវ, នាវាស៊ើបការណ៍ និងនាវាដឹកជញ្ជូន។

ក្រុមមន្ត្រី ជប៉ុន កាលពីថ្ងៃទី 24 សីហា បានប្រកាសថា ក្រុមនាវាចម្បាំងរបស់ ចិន បានឆ្លងកាត់ច្រកសមុទ្រ Soya ឆ្ពោះទៅកាន់តំបន់សេដ្ឋកិច្ចពិសេសរបស់ សហរដ្ឋអាម៉េរិក នៅឯលម្ហសមុទ្រក្បែររដ្ឋ Alaska។ ក្រុមនាវារបស់ចិន ទាំងនេះ រួមមាន Type-055, Type-052, Type-093 និងនាវា 1 គ្រឿងទៀតមានលេខសម្គាល់ 799។

Aleutian គឺជាប្រជុំកោះភ្នំភ្លើងដែលលាតសន្ធឹងពីដីគោក Alaska ដល់ជាយខាងលិចនៃសមុទ្រ Bering។ នេះគឺជាទីដែលមានអាកាសធាតុអាក្រក់បំផុត និងជាដែនដីដាច់ស្រយាលបំផុតនៅលើទ្វីបអាម៉េរិកខាងជើង ប៉ុន្តែ វាមានតួនាទីជាយុទ្ធសាស្ត្រ ដោយសារតែកោះនានាបង្កើតបានជារនាំងធម្មជាតិរបស់អឌ្ឍគោលខាងលិច និងខាងកើត៕

September 14, 2021

អង្គការសហប្រជាជាតិ ៖ «តាលីបង់ មិនគោរពពាក្យសន្យា»

អាហ្វហ្គានីស្ថាន៖ មន្ត្រីរបស់អង្គការសហប្រជាជាតិនិយាយថា តាលីបង់ មិនធ្វើតាមការសន្យា ទាក់ទងនឹងការធានាសិទ្ធិ ផលប្រយោជន៍របស់ស្ត្រី និងការសងសឹកលើមន្ត្រី ឬមនុស្សរបស់រដ្ឋាភិបាលចាស់។

«ផ្ទុយពីការសន្យាកាលពី 3 សប្ដាហ៍មុន ដែលថា តាលីបង់ នឹងរក្សាសិទ្ធិរបស់ស្ត្រី ពេលនេះ ស្ត្រីត្រូវបានហាមបង្ហាញវត្តមាននៅទីសាធារណៈជាបណ្ដើរៗហើយ» ឧត្តមស្នងការសិទ្ធិមនុស្ស របស់ អង្គការសហប្រជាជាតិ Michelle Bachelet បានឱ្យដឹងដូច្នេះកាលពីថ្ងៃទី 13 កញ្ញា ដោយបានសម្ដែងការព្រួយបារម្ភអំពីផលប្រយោជន៍របស់ស្ត្រីនៅ អាហ្វហ្គានីស្ថាន ក្រោមការគ្រប់គ្រងរបស់ តាលីបង់។

លោកស្រី Michelle Bachelet និយាយថា បានទទួលព័ត៌មានថា នៅកន្លែងមួយចំនួន ក្មេងស្រី អាហ្វហ្គានីស្ថាន ក្រោមអាយុ 12 ឆ្នាំ ត្រូវបានហាមមិនឱ្យទៅសាលារៀន ខណៈដែលស្ត្រីត្រូវបានស្នើឱ្យនៅផ្ទះ ដែលនេះបាននាំឱ្យគេនឹកឃើញដល់សម័យកាលគ្រប់គ្រងអំណាចដ៏មហាតឹងរ៉ឹងរបស់ តាលីបង់ អំឡុងឆ្នាំ 1996 ដល់ឆ្នាំ 2001។

មន្ត្រីនៃអង្គការសហប្រជាជាតិរូបនេះក៏បានចោទ តាលីបង់ ថា មិនធ្វើតាមសម្ដីដែលបានសន្យា ទាក់ទងនឹងការលើកលែងទោសចំពោះអតីតមន្ត្រី បុគ្គលិកសន្តិសុខរបស់រដ្ឋាភិបាលចាស់ រួមនឹងការឆែកឆែរតាមផ្ទះ។

ឧត្តមស្នងការសិទ្ធិមនុស្ស បានអំពាវនាវឱ្យបង្កើតយន្តការត្រួតពិនិត្យលើការធានាសិទ្ធិនានារបស់ស្ត្រីនៅ អាហ្វហ្គានីស្ថាន។ «ខ្ញុំរំលឹកឡើងវិញអំពីការអំពាវនាវដល់ក្រុមប្រឹក្សាសិទ្ធិមនុស្ស អនុវត្តសកម្មភាពឱ្យបានខ្លាំងក្លា និងម៉ឺងម៉ាត់ សមស្របនឹងកម្រិតនៃភាពសំខាន់នៃវិបត្តិនេះ» លោកស្រី Michelle Bachelet សង្កត់ធ្ងន់ដូច្នេះ។

សូមរំលឹកថា ក្រោយពីបានឡើងក្ដាប់អំណាច និងគ្រប់គ្រង អាហ្វហ្គានីស្ថាន តាលីបង់ បានប្រកាសលើកលែងទោសរួមដល់ក្រុមមន្ត្រីទាំងអស់របស់រដ្ឋាភិបាលចាស់ និងបានអំពាវនាវដល់ក្រុមមន្ត្រីទាំងនេះ ត្រលប់មកធ្វើការវិញ។ តាលីបង់ ក៏បានប្រកាសថា នឹងធានាផលប្រយោជន៍របស់ស្ត្រី នៅក្នុងក្របខណ្ឌច្បាប់សាសនាអ៊ីស្លាមងផងដែរ៕

September 14, 2021

ក្រុម តាលីបង់ នឹងអនុវត្តឡើងវិញនូវ «ទណ្ឌកម្មដោយការកាត់ដៃចោល និងគប់ដុំថ្មប្រហារជីវិត»

អាហ្វហ្គានីស្ថាន៖ មេដឹកនាំក្រុម តាលីបង់ បានឱ្យដឹងថា នឹងអនុវត្តឡើងវិញនូវទណ្ឌកម្មដ៏សាហាវ ចំពោះទោសធ្ងន់ធ្ងរ ទៅតាមច្បាប់សាសនាអ៊ីស្លាម ក្នុងនោះក៏រួមមានទាំងការគប់ដំថ្ម និងកាត់ដៃចោលផងដែរ។

«គោលដៅចម្បងគឺការបម្រើដល់សាសនាអ៊ីស្លាម ដូច្នេះត្រូវតែមានក្រសួងផ្សព្វផ្សាយសីលធម៌» Mohammad Yousuf កាលពីថ្ងៃទី 13 កញ្ញា បានបកស្រាយអំពីការសម្រេចបង្កើតឡើងវិញនូវ «ក្រសួងផ្សព្វផ្សាយសីលធម៌និងទប់ស្កាត់អំពើអាក្រក់» របស់ តាលីបង់។ «យើងនឹងដាក់ទណ្ឌកម្មទៅតាមវិន័យរបស់សាសនាអ៊ីស្លាម»។

Yousuf ឱ្យដឹងថា បណ្ដា «ទោសធំៗដែលបានចែងនៅក្នុងសាសនាអ៊ីស្លាម» រួមមាន ការរួមភេទក្រៅអាពាហ៍ពិពាហ៍ អំពើមនុស្សឃាត និងអំពើលួចប្លន់ នឹងត្រូវបានដាក់ទណ្ឌកម្ម។

«មានគោលការណ៍ផ្សេងគ្នាចំពោះទោសសម្លាប់មនុស្ស។ បើសិនជាអ្នកបានស្គាល់មនុស្សម្នាក់ ហើយសម្លាប់មនុស្សនេះដោយចេតនា អ្នកនឹងទទួលទោសប្រហារជីវិត។ បើសិនគ្មានចេតនា អ្នកអាចទទួលទណ្ឌកម្មដូចជា ការបង់ប្រាក់ជំងឺចិត្ត» Yousuf បន្ថែមដូច្នេះ។ «អ្នកណាប្រព្រឹត្តអំពើលួចប្លន់នឹងត្រូវកាត់ដៃចោល។ ជនទាំងឡាយណាដែលមានទំនាក់ទំនងផ្លូវភេទខុសច្បាប់នឹងត្រូវគប់នឹងដុំថ្ម»។

តាលីបង់ នឹងអនុវត្តវិធីដាក់ទណ្ឌកម្មដ៏ធ្ងន់ធ្ងរនេះទៅលើទាំងស្ត្រី ទាំងបុរស ទោះជាកន្លងមក ក្រុមនេះធ្លាប់បានអនុវត្តទណ្ឌកម្មដោយការគប់នឹងដុំថ្មចំពោះតែស្ត្រីភេទ។ Yousuf និយាយថា ត្រូវតែមានសាក្សីចំនួន 4 នាក់ ហើយមនុស្សទាំងនេះ «ត្រូវតែរៀបរាប់ដំណើររឿងឱ្យដូចគ្នា» ដើម្បីឈានដល់ការសម្រេចដាក់ទណ្ឌកម្ម។

«តុលាការកំពូលនឹងកាត់ក្ដីលើករណីទាំងនេះ។ បើសិនជាតុលាការបានកាត់ទោស យើងនឹងអនុវត្តការដាក់ទណ្ឌកម្ម» លោក Yousuf ថ្លែងដូច្នេះ។

Hafiz Habib អនុរដ្ឋមន្ត្រីក្រសួងធម្មយាត្រានិងកិច្ចការសាសនា

ក្នុងសម័យ តាលីបង់ កាន់អំណាចនៅ អាហ្វហ្គានីស្ថាន ចាប់ពីឆ្នាំ 1996-2001 ក្រសួងផ្សព្វផ្សាយសីលធម៌និងទប់ស្កាត់អំពើអាក្រក់ បានកៀបសង្កត់លើស្ត្រីភេទយ៉ាងធ្ងន់ធ្ងរ ក្នុងនោះរួមមានទាំងការបង្គាប់ឱ្យស្ត្រីស្លៀកពាក់ឈុត បឺរកា (burqa) ដែលគ្របពីក្បាលដល់ជើង ហើយពេលចេញទៅខាងក្រៅ ត្រូវតែមានបុរសជាញាតិដើរជាមួយ ពិសេសពួកគេមិនអនុញ្ញាតឱ្យក្មេងស្រីបន្តការសិក្សា ក្រោយពីបានរៀនចប់ថ្នាក់ទី 6។

ក្រសួងខាងលើរបស់ តាលីបង់ សម័យនោះក៏បានកំណត់ពេលវេលាសម្រាប់ការថ្វាយបង្គំព្រះ ស្នើឱ្យបុរសទុកពុកមាត់ ហាមជក់បារី ហាមស្ដាប់តន្ត្រី និងការកំសាន្តស្ទើរគ្រប់រូបភាព ក្នុងនោះមានទាំងការរាំរែក និងការបង្ហោះខ្លែងផងដែរ។ ក្រុមនគរបាលសីលធម៌ ដើរល្បាតតាមដងផ្លូវ ហើយអ្នកបានបំពានវិន័យនឹងត្រូវទទួលទោសធ្ងន់ធ្ងរ ដូចជា វាយនឹងរំពាត់ កាត់ដៃចោល គប់ដុំថ្ម និងប្រហារជីវិតនៅទីសាធារណៈ។

ក៏ប៉ុន្តែ Yousuf និយាយថា ក្រសួងផ្សព្វផ្សាយសីលធម៌និងទប់ស្កាត់អំពើអាក្រក់ ក្នុងសម័យកាលថ្មីនេះ «នឹងខុសពីលើកមុន» ដោយសារតែសម័យឆ្នាំ 1996-2001 ពុំមានអ្នកស្រាវជ្រាវសាសនាអ៊ីស្លាមច្រើនសម្រាប់កំណត់គោលការណ៍។ Yousuf អះអាងថា ក្រុមអ្នកស្រាវជ្រាវនឹងកំណត់គោលការណ៍ទាំងអស់ បន្ទាប់ពី តាលីបង់ បង្កើតរដ្ឋាភិបាលរួចរាល់។

Hafiz Habib អនុរដ្ឋមន្ត្រីក្រសួងធម្មយាត្រានិងកិច្ចការសាសនា កាលពីថ្ងៃទី 9 កញ្ញា បានឱ្យដឹងថា ទណ្ឌកម្មនៅក្នុងសម័យកាន់អំណាចថ្មីរបស់ តាលីបង់ នឹងត្រូវបានសម្រេចដោយក្រុមមេធាវីសាសនាអ៊ីស្លាម។

បើទោះជា តាលីបង់ ប្រកាសថា ប្រទេសអ៊ីស្លាមអេមីរ៉ាតនៃអាហ្វហ្កានីស្ថាន (Islamic Emirate of Afghanistan) នឹងប្រកបដោយ «ភាពទូលំទូលាយ និងចម្រុះវិស័យ» ប៉ុន្តែ ក្រុមមេដឹកនាំបច្ចុប្បន្ន គ្រាន់តែជាក្រុមមនុស្សដែលដើរតាមលទ្ធិជ្រុលនិយម ពុំមានស្ត្រី ឬតំណាងនៃក្រុមជនជាតិភាគតិច។ ក្រសួងស្ត្រី អាហ្វហ្គានីស្ថាន ហាក់ត្រូវបានគេរំលាយចោលទាំងស្រុងទៅហើយ៕

September 14, 2021

ប្រទេសចិន៖ រកឃើញសាកសពកម្មករ 19 នាក់បន្ថែមទៀត ក្នុងករណីបាក់ស្រុតអណ្ដូងរ៉ែចុងក្រោយ នៅឯខ្ពង់រាបទីបេ

កម្លាំងសង្គ្រោះ ទើបតែបានរកឃើញសាកសពកម្មករចំនួន 19 នាក់ ដែលជាប់ក្រោមដីនៅក្នុងហេតុការណ៍បាក់ស្រុតអណ្ដូងរ៉ែកាលពីមួយខែមុន។

«គិតមកដល់ព្រឹកថ្ងៃទី 13 កញ្ញា បេសកកម្មសង្គ្រោះដំបូងត្រូវបានធ្វើឡើងរួចរាល់។ មនុស្សចំនួន 19 នាក់ដែលបានជាប់គាំង សុទ្ធតែត្រូវបានរកឃើញ និងមិនមានអ្នកណាម្នាក់នៅមានសញ្ញានៃការរស់រាននោះទេ» ស្ថានីយទូរទស្សន៍ជាតិចិន CCTV បានផ្សាយដូច្នេះ។

មនុស្សជាង 1,000 នាក់ បានចូលរួមបេសកកម្មជួយសង្គ្រោះដែលអូសបន្លាយពេលជិត 30 ថ្ងៃ នៅក្នុងស្ថានភាពលំបាក ដែលមានកម្ពស់ជាង 3,800 ម៉ែត្រពីផ្ទៃទឹកសមុទ្រ។ អណ្ដូងរ៉ែ Chaidaer ដែលបានបាក់ស្រុត ស្ថិតនៅក្នុងតំបន់ខ្ពង់រាប ឈីងហៃ (Qinghai)-ទីបេ ជាទីដែលត្រូវបានគេចាត់ទុកថាជា «ដំបូលផ្ទះរបស់ពិភពលោក» ជាមួយនឹងប្រជាជនរស់នៅតិចតួច និងអាកាសធាតុពិបាករស់នៅ។

ដំបូលរបស់អណ្ដូងរ៉ែ បានបាក់ស្រុតភ្លាមៗកាលពីថ្ងៃទី 14 សីហា ក្នុងគ្រាដែលមានមនុស្សចំនួន 21 នាក់ កំពុងធ្វើការនៅខាងក្នុង។ មនុស្សម្នាក់នៅមានជីវិត និងកម្មករអណ្ដូងរ៉ែម្នាក់បានស្លាប់ និងត្រូវបាននាំឡើងមកលើដី ក្រោយហេតុការណ៍កើតឡើងបានប៉ុន្មានថ្ងៃ។ នេះបើតាមសារព័ត៌មាន AFP។

គ្រោះថ្នាក់នៅអណ្ដូងរ៉ែក្នុងប្រទេសចិន កើតឡើងជាញឹកញាប់។ កាលពីខែមករា ករណីដូចគ្នានេះក៏បានកើតឡើងនៅឯខេត្តសានទុង ភាគខាងកើតប្រទេសចិន បណ្ដាលឱ្យមនុស្សចំនួន 22 នាក់ បាត់បង់ជីវិត។ ក្រោយការផ្ទុះដែលធ្វើឱ្យបាក់ស្រុតច្រកចេញ-ចូល បុគ្គលិករបស់អណ្ដូងរ៉ែក៏ត្រូវជាប់ក្រោមដីរយៈពេល 2 សប្ដាហ៍។ មនុស្ស 11 នាក់ ត្រូវបានសង្គ្រោះទាន់ពេល ខណៈ 10 នាក់បានស្លាប់ និងម្នាក់បាត់ខ្លួន។

កាលពីខែធ្នូ ឆ្នាំ 2020 កម្មករអណ្ដូងរ៉ែចំនួន 23 នាក់ បានស្លាប់ បន្ទាប់ពីបានជាប់ក្រោមដីនៅក្នុងទីក្រុងឆុងឈីង (Chongqing) ភាគខាងលិចប្រទេសចិន។ គ្រោះថ្នាក់នេះបានកើតឡើងតែប៉ុន្មានខែប៉ុណ្ណោះ បន្ទាប់ពីករណីពុលឧស្ម័ននៅក្នុងឯអណ្ដូងរ៉ែមួយផ្សេងទៀតនៅក្នុងទីក្រុងជាមួយគ្នា ដែលបណ្ដាលឱ្យកម្មករ 16 នាក់ត្រូវបាត់បង់ជីវិត៕

September 14, 2021

ប្រទេសណា ដែលផ្ដល់ជំនួយជាវ៉ាក់សាំង COVID-19 ច្រើនជាងគេក្នុងពិភពលោក?

សហរដ្ឋអាម៉េរិក គឺជាប្រទេសដែលបានផ្ដល់ជំនួយជាវ៉ាក់សាំងបង្ការវីរុស COVID-19 ច្រើនជាងគេបង្អស់ក្នុងពិភពលោក ពោលគឺច្រើនជាងមហាយក្សចិន ជប៉ុន អង់គ្លេស ទៅទៀត នេះបើតាមទិន្នន័យរបស់ UNICEF។

ទិន្នន័យដែលត្រូវបានមូលនិធិកុមាររបស់អង្គការសហប្រជាជាតិ (UNICEF) បង្ហាញថា គិតមកដល់ថ្ងៃទី 9 កញ្ញា ឆ្នាំ 2021 សហរដ្ឋអាម៉េរិក បានផ្ដល់ជំនួយវ៉ាក់សាំង COVID-19 ជាង 114 លានដូស ទៅឱ្យប្រទេសកំពុងអភិវឌ្ឍប្រមាណ 80 នៅទ្វីបអាស៊ី អាហ្វ្រិក និង អាម៉េរិកឡាទីន។ តួលេខនេះច្រើនជាង 3 ដង ធៀបនឹង 34 លានដូស ដែល ចិន បានផ្ដល់ជំនួយដល់ពិភពលោក។

UNICEF គឺជាអង្គការដែលទទួលបន្ទុកការពារ និងអភិវឌ្ឍកុមារ ទន្ទឹមនឹងនេះ UNICEF ក៏ដើរតួនាទីជាអ្នកសម្របសម្រួលក្នុងការបែងចែកវ៉ាក់សាំង COVID-19 នៃយន្តការ COVAX ដើម្បីរំលែកវ៉ាក់សាំងដល់បណ្ដាប្រទេសដែលមានចំណូលទាប។ ទិន្នន័យនេះត្រូវបាន UNICEF បូកសរុបពីព័ត៌មានជាសាធារណៈ អាចមិនបង្ហាញបានទាំងស្រុងនូវកម្រិតនៃការចូលរួមផ្ដល់ជំនួយជាវ៉ាក់សាំងនៅទូទាំងសកលលោក។

ប្រទេសចិន គឺជាអ្នកផ្ដល់ជំនួយវ៉ាក់សាំង COVID-19 ធំជាងគេលំដាប់ទីពីរក្នុងពិភពលោក ខណៈដែល ជប៉ុន ឈរលំដាប់ទីបី ដោយបានផ្ដល់ជំនួយប្រមាណ 23.3 លានដូស នេះបើតាមទិន្នន័យរបស់ UNICEF។

បណ្ដាប្រទសនៅអាស៊ី ស្ថិតក្នុងចំណោមប្រទេសដែលទទួលបានជំនួយជាវ៉ាក់សាំងបង្ការ COVID-19 ច្រើនជាងគេ ក្នុងនោះ ប្រទេសបង់ក្លាដែស, ហ្វីលីពីន, ឥណ្ឌូនេស៊ី និងប៉ាគីស្ថាន សុទ្ធតែទទួលបានជាង 10 លានដូសដូចគ្នា។

វ៉ាក់សាំងជាង 207 លានដូស ត្រូវបានផ្ដល់ជាជំនួយតាមរយៈទ្វេភាគី ឬតាមយន្តការ COVAX ទាបជាងច្រើនធៀបនឹងការស្នើរបស់គណៈកម្មការឯករាជ្យមួយដែលត្រូវបានបង្កើតឡើងដោយអង្គការសុខភាពពិភពលោក (WHO)។ នៅក្នុងរបាយការណ៍ថ្មីបំផុតកាលពីខែឧសភា គណៈកម្មការនេះបានស្នើឱ្យបណ្ដាប្រទេសដែលមានចំណូលខ្ពស់ បែងចែកវ៉ាក់សាំងយ៉ាងតិច 1 ពាន់លានដូស ទៅឱ្យបណ្ដាប្រទេសដែលមានចំណូលទាប និងមធ្យម នៅមុនថ្ងៃទី 1 កញ្ញា និង 1 ពាន់លានដូសផ្សេងទៀត នៅពាក់កណ្ដាលឆ្នាំ 2022។

កម្ពុជា ក៏ធ្លាប់បានផ្ដល់ជំនួយជាវ៉ាក់សាំងបង្ការ COVID-19 ដល់កម្ពុជា តាមរយៈយន្តការ COVAX

ការស្រាវជ្រាវមួយរបស់ក្រុមហ៊ុន Airfinity បង្ហាញថា បណ្ដាប្រទេសអ្នកមាន ទិញវ៉ាក់សាំងច្រើនជាងតម្រូវការចាំបាច់។ ក្រុមហ៊ុននេះ បានព្យាករថា សហរដ្ឋអាម៉េរិក, សហភាពអឺរ៉ុប (EU), អង់គ្លេស, កាណាដា និង ជប៉ុន នឹងសល់វ៉ាក់សាំងជាង 1.2 ពាន់លានដូសនៅក្នុងឆ្នាំ 2021 ក្រោយពីបានចាក់ឱ្យពលរដ្ឋរួចរាល់ និងចាក់ដូសជំរុញ។

WHO ដាក់ផែនការជួយឱ្យគ្រប់ប្រទេស ចាក់វ៉ាក់សាំង COVID-19 ដល់ពលរដ្ឋយ៉ាងតិច 10% ក្នុងចំណោមពលរដ្ឋទាំងអស់របស់ពួកគេនៅចុងខែនេះ មុនពេលដំឡើងតួលេខនេះឱ្យដល់យ៉ាងទាប ត្រឹម 40% នៅចុងឆ្នាំនេះ និង 70% នៅពាក់កណ្ដាលឆ្នាំ 2022។

ទិន្នន័យបានបង្ហាញថា តំបន់អាហ្វ្រិក បានចាក់វ៉ាក់សាំងដល់ពលរដ្ឋប្រមាណ 5.5% នៃចំនួនពលរដ្ឋសរុបរបស់ទ្វីបនេះ ហើយនេះគឺជាកម្រិតទាបបំផុតនៅក្នុងពិភពលោក។

ក្រុមអ្នកជំនាញ រួមមានទាំងអ្នកឯកទេសផ្នែករោគឆ្លងដ៏ល្បីឈ្មោះ Larry Brilliant បាននិយាយថា ត្រូវការចាក់វ៉ាក់សាំង COVID-19 ឱ្យបានទូលំទូលាយជាងនេះដើម្បីកាត់បន្ថយការឆ្លងរាលដាលរបស់បណ្ដាវ៉ារ្យ៉ង់ថ្មី និងបញ្ចប់ការរាតត្បាតរបស់វីរុស COVID-19 នៅទូទាំងសកលលោក។

ក្រៅពីការព្រួយបារម្ភអំពីសុខភាព ការយឺតយ៉ាវក្នុងការចាក់វ៉ាក់សាំងក៏អាចធ្វើឱ្យសេដ្ឋកិច្ចពិភពលោកត្រូវខាតបង់ 2,300,000,000,000 (2.3 សែនកោដិ ឬ 2.3 ទ្រីលាន) ដុល្លារអាម៉េរិក ចាប់ពីឆ្នាំ 2022 ដល់ឆ្នាំ 2025។ នេះបើតាមការគណនារបស់ក្រុមហ៊ុន Economist Intelligence Unit។ ក្រុមហ៊ុននេះយល់ថា បណ្ដាប្រទេសដែលមានសេដ្ឋកិច្ចទើបតែលូតលាស់នឹងរងផលប៉ះពាល់ប្រមាណ 2/3 នៃខ្ទង់ខាតបង់សរុប៕

September 13, 2021

Category: អន្តរជាតិ