អន្តរជាតិ - La Reine Media

ទស្សនាយន្តហោះទំនើប ថ្មីៗ នៅព្រឹត្តិការណ៍ពិព័រណ៍អាកាសចរណ៍ធំបំផុតរបស់ចិន

ប្រទេសចិន បង្ហាញយន្តហោះថ្មីៗជាច្រើនប្រភេទ ដូចជាយន្តហោះចម្បាំងអេឡិចត្រូនិក J-16D និង Wz-7 នៅក្នុងព្រឹត្តិការណ៍តាំងពិព័រណ៍អាកាសចរណ៍ ហ្ស៊ូហៃ (Zhuhai)។

ព្រឹត្តិការណ៍តាំងពិព័រណ៍យន្តហោះចិន «The 13th China International Aviation and Aerospace Exhibition» ឬហៅថា Airshow China 2021 ត្រូវបានធ្វើឡើងនៅក្នុងទីក្រុងហ្ស៊ូហៃ ខេត្តក្វាងទុង ចាប់ពីថ្ងៃទី 28 កញ្ញា ដល់ 3 តុលា។ នេះគឺជាពិព័រណ៍យន្តហោះធំបំផុតនៅ ប្រទេសចិន ដែលបង្ហាញអំពីអំណាចកាន់តែខ្លាំងក្លានៃទ័ពអាកាសរបស់ប្រទេសនេះ។

យន្តហោះយុទ្ធសាស្ត្រអេឡិចត្រូនិក J-16D ត្រូវបានផលិតឡើងដើម្បីបំពេញភារកិច្ចជាអ្នកបង្កការរំខានដល់ឧបករណ៍អេឡិចត្រូនិករបស់សត្រូវ។ ក្រៅពីJ-16D ប្រទេសចិន ក៏បង្ហាញយន្តហោះថ្មីមួយចំនួន ដូចជាយន្តហោះគ្មានមនុស្សបើក (UAV) យន្តហោះឈ្លបការណ៍ Wz-7 និង UAV ប្រយុទ្ធ CH-6 ជាដើម។

នារីអ្នកបើកបរយន្តហោះចិន ចុះពីលើយន្តហោះចម្បាំង J-10 បន្ទាប់ពីការហោះហើរសម្ដែង បានបញ្ចប់ កាលពីថ្ងៃទី 28 កញ្ញា។

ប្រទេសចិន កំពុងបង្កើនល្បឿនដើម្បីសម្រេចបានគោលដៅនៃការធ្វើទំនើបកម្មយោធា បំណងធ្វើឱ្យសមស្របនឹង «សង្គ្រាមទំនើប» នៅឆ្នាំ 2035។ ក្រុមអ្នកជំនាញយល់ថា ចិន កំពុងកាត់បន្ថយគម្លាតយោធាជាមួយ សហរដ្ឋអាម៉េរិក បើទោះជាមានបច្ចេកវិទ្យា និងខ្ទង់វិនិយោគលើវិស័យអាវុធ នៅអន់ជាង។

ចិន គឺជាប្រទេសដែលផ្គត់ផ្គង់យន្តហោះប្រភេទ UAV ធំជាងគេបង្អស់ក្នុងពិភពលោក ដោយសារតែ សហរដ្ឋអាម៉េរិក និង អឺរ៉ុប ស្ទាក់ស្ទើរក្នុងការនាំចេញអាវុធប្រភេទនេះ។ UAV របស់ ចិន ធ្លាប់បានចូលរួមប្រយុទ្ធ ឬបំពេញបេសកកម្មមួយចំនួននៅ មជ្ឈិមបូព៌ា និងតំបន់ផ្សេងទៀត។

កប៉ាល់ហោះ AG600 ផលិតដោយក្រុមហ៊ុនបច្ចេកវិទ្យាអាកាសចរណ៍ចិន (AVIC) កំពុងសម្ដែងបង្ហាញ នៅក្នុងពិព័រណ៍កាលពីថ្ងៃទី 28 កញ្ញា។

ព្រឹត្តិការណ៍ពិព័រណ៍យន្តហោះចិន តែងត្រូវបានធ្វើឡើងពីរឆ្នាំម្ដង ប៉ុន្តែ កាលពីឆ្នាំមុន វាត្រូវបានពន្យារពេល ដោយសារតែ COVID-19។ អ្នកមកទស្សនាព្រឹត្តិការណ៍នាឆ្នាំនេះ ភាគច្រើនគឺជាជនជាតិចិន។

យន្តហោះព្រមានរហ័ស KJ-500 ផលិតដោយក្រុមហ៊ុន សាអានស៊ី (Shaanxi)

យន្តហោះចម្បាំង J-10 របស់ក្រុមហោះហើរ Bayi Aerobatic Team

ទាហានចិន និងយន្តហោះចម្បាំង J-10 របស់ក្រុមហោះហើរ Bayi Aerobatic Team

បុគ្គលិកកំពុងរៀបចំទីតាំងសម្រាប់បង្ហាញឧទ្ធម្ភាគចក្រវាយប្រហារ Z-10 នៅក្នុងព្រឹត្តិការណ៍ពិព័រណ៍

September 29, 2021

Pfizer ពិសោធ «ថ្នាំលេប» ទប់ទល់នឹងវីរុស COVID-19 ដំណាក់កាលចុងក្រោយ

ក្រុមហ៊ុនផលិតវ៉ាក់សាំង Pfizer ប្រកាសចាប់ផ្ដើមដំណើរការពិសោធទ្រង់ទ្រាយធំចំពោះថ្នាំលេបសម្រាប់ប្រឆាំងនឹងវីរុសនៅលើមនុស្សដែលបានប៉ះពាល់អ្នកជំងឺ COVID-19 ឬមានហានិភ័យខ្ពស់ក្នុងការឆ្លងវីរុសនេះ។

យោងតាមប្រកាសកាលពីថ្ងៃទី 27 កញ្ញា របស់ក្រុមហ៊ុន Pfizer ថ្នាំលេប PF-07321332 សម្រាប់ប្រឆាំងវីរុស COVID-19 នឹងត្រូវបានធ្វើការពិសោធដំណាក់កាលចុងក្រោយនៅលើមនុស្សចំនួន 2,660 នាក់ ដែលមានសុខភាពមាំមួន មានអាយុចាប់ពី 18 ឆ្នាំឡើងទៅ និងកំពុងរស់នៅក្នុងផ្ទះជាមួយអ្នកផ្ទុកវីរុស COVID-19 ដែលមានរោគសញ្ញា។

ថ្នាំនេះត្រូវបានអភិវឌ្ឍឡើងដើម្បីទប់ស្កាត់សកម្មភាពរបស់ អង់ហ្សីម ដ៏សំខាន់មួយប្រភេទដែលវីរុសត្រូវការដើម្បី «បង្កើតកូនចៅ» ហើយថ្នាំនេះក៏នឹងត្រូវបានប្រើប្រាស់អមជាមួយនឹង ritonavir កម្រិតទាប។ Ritonavir គឺជាថ្នាំដែលពេញនិយមក្នុងការព្យាបាលអ្នកផ្ទុកវីរុស HIV។

ក្រុមហ៊ុន Pfizer ឱ្យដឹងថា ថ្នាំនេះនឹងត្រូវបានប្រើសម្រាប់អ្នកដែលមានសញ្ញានៃការឆ្លងដំបូង ឬភ្លាមៗបន្ទាប់ពីដឹងថាខ្លួនអាចឆ្លងវីរុស ដោយមិនបាច់ចូលពេទ្យ។

នៅ សហរដ្ឋអាម៉េរិក បច្ចុប្បន្ន ថ្នាំតែមួយប្រភេទគត់ដែលទទួលបានការអនុញ្ញាតឱ្យប្រើសម្រាប់អ្នកជំងឺ COVID-19 នោះគឺ remdesivir របស់ក្រុមហ៊ុន Gilead Sciences។ ថ្នាំនេះធ្លាប់ត្រូវបានយកទៅព្យាបាលអតីតប្រធានាធិបតី សហរដ្ឋអាម៉េរិក លោក Donald Trump ផងដែរ។

ក្រៅពី Pfizer ក៏នៅមានក្រុមហ៊ុនផលិតវ៉ាក់សាំង COVID-19 ធំៗជាច្រើនទៀត ដូចជា Merck & Co. និង Roche Holding AG ជាដើម កំពុងតែប្រកួតប្រជែងគ្នាក្នុងការអភិវឌ្ឍថ្នាំលេបប្រឆាំង COVID-19៕

September 28, 2021

WHO បង្កើតក្រុមថ្មីដើម្បីស្រាវជ្រាវរកប្រភពរបស់វីរុស COVID-19

អង្គការសុខភាពពិភពលោក (WHO) គ្រោងនឹងបង្កើតក្រុមថ្មីមួយដែលរួមមានអ្នកជំនាញប្រហែល 20 នាក់ ដើម្បីដំណើរការកម្មវិធីស្រាវជ្រាវរកប្រភពរបស់វីរុស COVID-19 បន្តទៀត។

សារព័ត៌មាន Wall Street Journal បានរាយការណ៍កាលពីចុងសប្ដាហ៍កន្លងទៅថា ក្រុមថ្មីរបស់ WHO ដែលមានចំនួនប្រហែល 20 នាក់ នឹងរួមមានទាំងអ្នកវិទ្យាសាស្ត្រ អ្នកជំនាញផ្នែកសុវត្ថិភាពជីវសាស្ត្រ សុវត្ថិភាពបន្ទប់ពិសោធន៍ អ្នកឯកទេសផ្នែកហ្សែន រួមទាំងក្រុមអ្នកជំនាញផ្នែកជំងឺរបស់សត្វផងដែរ។

ក្រុមស្រាវជ្រាវថ្មីនេះនឹងធ្វើកិច្ចការដូចទៅនឹងក្រុមប្រឹក្សាអចិន្ត្រៃយ៍ ជួយដល់ WHO ក្នុងការស្រាវជ្រាវលើករណីវីរុសផ្ទុះឆ្លងរាលដាលនាពេលអនាគត និងកំណត់ឱ្យដឹងច្បាស់ថា សកម្មភាពអ្វីខ្លះរបស់មនុស្ស ដែលអាចនាំឱ្យកើតជំងឺថ្មី។

ក្រុមនេះក៏ទទួលខុសត្រូវក្នុងការស្រាវជ្រាវរកប្រភពរបស់ COVID-19 ផងដែរ។ ពួកគេត្រូវបានគេជឿថា នឹងស្វែងរកភ័ស្ដុតាងថ្មីនៅ ប្រទេសចិន និងប្រទេសដទៃ។

បុគ្គលិកសុខាភិបាល នៅខាងក្រៅផ្សារបោះដុំគ្រឿងសមុទ្រ Wuhan (Wuhan South China Seafood Wholesale Market) កាលពីខែមីនា ឆ្នាំ 2020

អ្នកនាំពាក្យរបស់ WHO ឱ្យដឹងថា «អាទិភាពរបស់ក្រុមថ្មីនេះគឺទទួលបានទិន្នន័យ និងមានសិទ្ធិចូលទៅកាន់ប្រទេសដែលបានរាយការណ៍អំពីករណីឆ្លងវីរុសដំបូង»។

រដ្ឋាភិបាលចិន ជាទីដែលបានរាយការណ៍អំពីករណីឆ្លង COVID-19 នៅទីក្រុង Wuhan កាលពីខែធ្នូ ឆ្នាំ 2019 បានបដិសេធការឆ្លើយនឹងសំណួរដែលថា អនុញ្ញាតឱ្យក្រុមថ្មីរបស់ WHO ចូលទៅកាន់ទឹកដីរបស់ពួកគេដែរ ឬយ៉ាងណា។ ប៉ុន្តែ ប្រធានាធិបតីចិន លោក ស៊ីជីនពីង ធ្លាប់បានថ្លែងថា ប្រទេសចិន «បន្តគាំទ្រ និងចូលរួមស្វែងរកប្រភពរបស់ COVID-19 ដោយយោងទៅតាមវិទ្យាសាស្ត្រ ហើយប្ដេជ្ញាប្រឆាំងនឹងឥទ្ធិពលនយោបាយ តាមគ្រប់រូបភាព»។

ក្រសួងការបរទេសចិន បានឱ្យដឹងថា ប្រទេសនេះមានផែនការតាមដានយ៉ាងម៉ត់ចត់ចំពោះការជ្រើសរើសក្រុមអ្នកជំនាញថ្មីរបស់ WHO ហើយ ទីក្រុងប៉េកាំង ក៏ស្នើបញ្ចូលសមាជិកមួយចំនួនរបស់ខ្លួន ឱ្យទៅចូលរួមផងដែរ។

កាលពីខែកក្កដា WHO បានស្នើឱ្យមានដំណាក់កាលទីពីរនៃការស្រាវជ្រាវអន្តរជាតិលើប្រភពរបស់ COVID-19 ដែលក្នុងនោះមានទាំងការត្រួតពិនិត្យបន្ទប់ពិសោធន៍នានារបស់ ប្រទេសចិន។ រដ្ឋាភិបាលចិន បានរិះគន់លើសំណើនេះ ដោយយល់ថា ទីក្រុងប៉េកាំង បានសម្រេចកាតព្វកិច្ចរបស់ខ្លួនរួចហើយ នៅក្នុងការស្វែងរកប្រភព COVID-19 និងបាននិយាយថា ការស្រាវជ្រាវដំណាក់កាលទីពីរគួរតែត្រូវបានធ្វើឡើងនៅប្រទេសផ្សេង៕

September 28, 2021

ប្រធានាធិបតីបារាំង ត្រូវគេគប់នឹងគ្រាប់ស៊ុត នៅទីសាធារណៈ (វីដេអូ)

(បារាំង)-ប្រធានាធិបតីនៃ ប្រទេសបារាំង លោក អេម៉ានុយអែល ម៉ាក្រុង (Emmanuel Macron) ត្រូវបានបុរសម្នាក់គប់នឹងគ្រាប់ស៊ុត ក្នុងពេលកំពុងចូលរួមពិធីតាំងពិព័រណ៍ពាណិជ្ជកម្មនៅទីក្រុង លីយ៉ុង (Lyon) បានឱ្យដឹងថា នឹងនិយាយគ្នាជាមួយជនដៃដល់ នៅក្រោយហេតុការណ៍នេះ។

ហេតុការណ៍ខាងលើបានកើតនៅពេល ប្រធានាធិបតីបារាំង ម៉ាក្រុង ទៅធ្វើទស្សនកិច្ចនៅឯពិធីតាំងពិព័រណ៍ផ្នែកសណ្ឋាគារ និងភោជនីយដ្ឋាននៅទីក្រុងលីយ៉ុង កាលពីម្សិលមិញ។ បុរសម្នាក់ដែលគេមិនទាន់ស្គាល់អត្តសញ្ញាណ បានគប់គ្រាប់ស៊ុតតម្រង់លោក ម៉ាក្រុង ក្នុងពេលលោកកំពុងសម្ដែងស្វាគមន៍អ្នកដែលមានវត្តមានក្នុងព្រឹត្តិការណ៍។

គ្រាប់ស៊ុតបានហោះទៅចំស្មារបស់ ប្រធានាធិបតីបារាំង ប៉ុន្តែ វាមិនបែក។ ភ្លាមនោះ ជនដៃដល់ក៏ត្រូវបានចាប់ខ្លួន និងនាំចេញទៅខាងក្រៅ។ «បើគាត់មានអ្វីចង់និយាយជាមួយខ្ញុំ សូមទុកឱ្យគាត់មកជួបខ្ញុំ។ ខ្ញុំនឹងជួបនិយាយគ្នាជាមួយគាត់» លោក ម៉ាក្រុង ថ្លែងដូច្នេះ។

នេះមិនមែនជាលើកដំបូងនោះទេដែលលោក ម៉ាក្រុង ត្រូវគេគប់នឹងគ្រាប់ស៊ុត។ កាលពីឆ្នាំ 2017 លោកក៏ធ្លាប់ត្រូវគេគប់នឹងគ្រាប់ស៊ុត ម្ដងរួចហើយ ដែលកាលណោះ គាត់នៅជាបេក្ខភាពប្រធានាធិបតីនៅឡើយ។

កងអង្គរក្សរបស់ប្រធានាធិបតី ម៉ាក្រុង នឹងត្រូវបង្កើនការប្រុងប្រយ័ត្ន នៅក្នុងរយៈពេលប៉ុន្មានខែខាងមុខ គ្រាដែលលោកបង្ហាញខ្លួននៅទីសាធារណៈជាបន្តបន្ទាប់។ លោក ម៉ាក្រុង ត្រូវបានគេព្យាករថា នឹងចូលរួមដណ្ដើមសន្លឹកឆ្នោតចូលទៅកាន់កាប់វិមាន អេលីសេ (Elysee) នៅខែមេសា ឆ្នាំ 2022 ប៉ុន្តែ លោកមិនទាន់ប្រកាសជាផ្លូវការនៅឡើយ៕

September 28, 2021

កម្មករអណ្ដូងរ៉ែរាប់សិបនាក់របស់ កាណាដា កំពុងជាប់ក្រោមដី

(កាណាដា)-កម្មករចំនួន 39 នាក់ កំពុងជាប់ក្នុងអណ្ដូងរ៉ែលោហធាតុនៅភាគខាងកើតនៃ ប្រទេសកាណាដា ក្រោយមានឧបទ្ទវហេតុមួយដែលបណ្ដាលឱ្យផ្លូវចេញ-ចូលត្រូវស្ទះមុននោះ 24 ម៉ោង។

Vale ជាក្រុមហ៊ុនគ្រប់គ្រងអណ្ដូងរ៉ែ Totten នៅក្នុងខេត្ត Ontario របស់ កាណាដា បានឱ្យដឹងថា ពុំមានកម្មករណាម្នាក់រងរបួងនៅក្នុងហេតុការណ៍កាលពីថ្ងៃទី 26 កញ្ញានោះទេ ហើយពួកគេនៅតែទទួលបានអាហារ និងទឹក។ «ក្រុមសង្គ្រោះបានទៅដល់កន្លែងរបស់កម្មករ និងកំពុងនាំពួកគេឡើងមកលើ តាមរយៈប្រព័ន្ធជណ្ដើរទីពីរ» Vale បានប្រាប់ដូច្នេះ។ ក្រុមហ៊ុននេះសង្ឃឹមថា នឹងសង្គ្រោះកម្មករបានទាំងអស់នៅយប់ថ្ងៃទី 27 កញ្ញា (ព្រឹកថ្ងៃទី 28 កញ្ញា នៅ ភ្នំពេញ)។

Danica Pagnutti ជាអ្នកនាំពាក្យរបស់ក្រុមហ៊ុន Vale និយាយថា មិនមានអ្នកណាម្នាក់ស្ថិតនៅត្រង់ច្រកចេញ-ចូលធំនោះទេ នៅពេលផ្នែកមួយនៃឧបករណ៍ធុនធ្ងន់ ប៉ះទង្គិចនឹងជណ្ដើរយន្តរបស់ប្រព័ន្ធដឹកជញ្ជូន។

សកម្មភាពនៅឯអណ្ដូងរ៉ែ Totten ក្នុងទីក្រុង Greater Sudbury នៃខេត្ត Ontario ត្រូវបានផ្អាកដំណើរការចាប់ពីថ្ងៃទី 27 កញ្ញា ហើយ Vale ឱ្យដឹងថា នឹងវាយតម្លៃស្ថានការណ៍ មុនពេលដំណើរការឡើងវិញ។ អណ្ដូងរ៉ែ Totten បានបិទទ្វារកាលពីឆ្នាំ 1972 ប៉ុន្តែ ក្រុមហ៊ុន Vale បានបើកទ្វារឡើងវិញចាប់ពីឆ្នាំ 2014។ នៅក្នុងរយៈពេល 6 ខែដើមឆ្នាំនេះ ធាតុនីកែល ប្រហែល 3,600 តោន ត្រូវបានទាញយកពីអណ្ដូងរ៉ែ Totten៕

September 28, 2021

រញ្ជួយដីនៅប្រទេសក្រិក អាជ្ញាធរប្រទេសតួកគី ព្រមានអំពីរលកយក្ស

គ្រោះរញ្ជួយដីដែលមានកម្លាំង 5.8 រិចទ័រ នៅលើកោះ Crete របស់ប្រទេសក្រិក បានសម្លាប់មនុស្សយ៉ាងតិចម្នាក់ និងបណ្ដាលឱ្យប្រទេសតួកគី ព្រមានអំពីលទ្ធភាពនៃការកើតមានរលកយក្ស។

អាជ្ញាធររបស់ប្រទេសក្រិក បានឱ្យដឹងថា គ្រោះរញ្ជួយដីខាងលើបានកើតឡើងនៅវេលាម៉ោងប្រហែល 9 ព្រឹក ថ្ងៃទី 27 កញ្ញា ដោយចំណុចកណ្ដាលរបស់វាស្ថិតនៅចម្ងាយប្រហែល 246 គីឡូម៉ែត្រ ទៅទិសអាគ្នេយ៍នៃទីក្រុង Athens របស់ ក្រិក។

ស្ថាប័នតាមដានគ្រោះរញ្ជួយដីរបស់ សហរដ្ឋអាម៉េរិក និយាយថា គ្រោះរញ្ជួយដីខាងលើនេះមានកម្លាំង 6 រិចទ័រ មានចម្ងាយពីភូមិ Thrapsano ប្រហែល 7 គីឡូម៉ែត្រ ទៅទិសខាងជើង។

សារព័ត៌មាន National News បានឱ្យដឹងថា គ្រោះរញ្ជួយដីនេះក៏បានធ្វើឱ្យប្រទេសតួកគី ដែលនៅក្បែរខាង ត្រូវប្រកាសការព្រមានអំពីគ្រោះរលកយក្សនៅសមុទ្រ។

សារព័ត៌មានក្នុងស្រុក បានផ្សាយថា ផ្ទះជាច្រើនខ្នងបានខូចខាត ក្នុងនោះភាគច្រើនគឺជាផ្ទះថ្មបុរាណ ស្ថិតនៅក្នុងភូមិនានា ដែលនៅក្បែរចំណុចកណ្ដាលនៃគ្រោះធម្មជាតិនេះ។ ក្មេងៗក្នុងតំបន់ ត្រូវបានជម្លៀសចេញពីសាលារៀន។

យោងតាមទិន្នន័យពី សហភាពអឺរ៉ុប (EU) Crete គឺជាកោះធំជាងគេ និងមានប្រជាជនរស់នៅច្រើនជាងគេរបស់ ប្រទេសក្រិក ដោយមានពលរដ្ឋជាង 634,000 នាក់កំពុងរស់នៅ។

ក្រិក និងតួកគី ស្ថិតនៅលើតំបន់ដែលកើតគ្រោះរញ្ជួយដីខ្លាំងក្លាបំផុតក្នុងពិភពលោក។ គ្រោះរញ្ជួយដីកម្លាំង 7.4 រិចទ័រ កាលពីឆ្នាំ 1999 ដែលកើតឡើងនៅភាគពាយព្យនៃប្រទេសតួកគី បានសម្លាប់មនុស្សជាង 17,000 នាក់ ក្នុងនោះមានប្រហែល 1,000 នាក់ នៅទីក្រុង Istanbul។ គ្រោះរញ្ជួយដីមួយកាលពីខែកក្កដា ឆ្នាំ 2017 នៅលើកោះ Kos ជិតតំបន់ Samos របស់ ប្រទេសក្រិក ក៏បានសម្លាប់មនុស្ស 2 នាក់ផងដែរ៕

September 27, 2021

«រាជបុត្រី Wuawei» វិលចូលប្រទេសក្រោយការដោះលែង! មនុស្ស 430 លាននាក់ ចូលទស្សនាការផ្សាយផ្ទាល់

ការផ្សាយផ្ទាល់អំពីព្រឹត្តិការណ៍ Meng Wanzhou ត្រលប់មកប្រទេសវិញ របស់ស្ថានីយទូរទស្សន៍ចិន មានអ្នកទស្សនាជិត 430 លាននាក់ និងការចុចចូលចិត្តចំនួន 400 លានលើក។

ព័ត៌មានខាងលើនេះត្រូវបានប្រធានក្រុមហ៊ុនទូរគមនាគមន៍ចិន CMG (China Media Group) លោក Shen Haixiong លើកឡើងកាលពីថ្ងៃទី 26 កញ្ញា នៅទីក្រុងសៀងហៃ។

ទូរទស្សន៍ចិន កាលពីយប់ថ្ងៃទី 25 កញ្ញា បានផ្សាយផ្ទាល់ព្រឹត្តិការណ៍ Meng Wanzhou ដែលត្រូវគេស្គាល់ថាជា «រាជបុត្រី Huawei» ត្រលប់មកដល់ព្រលានយន្តហោះ Shenzhen Bao’an ក្រោយត្រូវបានឃាត់ខ្លួនមិនឱ្យចេញពីប្រទេសកាណាដា អស់រយៈពេល 3 ឆ្នាំ។ ព្រឹត្តិការណ៍នេះក៏ត្រូវបានផ្សាយផ្ទាល់នៅលើបណ្ដាញសង្គមនានាផងដែរ។

យោងតាមលោក Shen Haixiong ពលរដ្ឋប្រមាណ 400 លាននាក់ ដែលប្រើប្រាស់អ៊ីនធើណិតនៅប្រទេសចិន (ខ្ពស់ជាងចំនួនប្រជាជនសរុបរបស់ សហរដ្ឋអាម៉េរិក និង កាណាដា) បានចុចចូលចិត្ត (Like) លើព័ត៌មានផ្សាយផ្ទាល់នៅលើថ្នាលបច្ចេកវិទ្យារបស់ CMG។ «នេះគឺជាការចង់បានរបស់គ្រប់គ្នា» ប្រធានក្រុមហ៊ុន CMG ថ្លែងដូច្នេះ។ «ប្រទេសជាតិតែងតែជាទីពឹងដ៏រឹងមាំសម្រាប់ប្រជាជនចិន»។

Michael Spavor (ស្ដាំ លើ), Michael Kovrig (ស្ដាំ) និង Meng Wanzhou (ឆ្វេង)

Meng Wanzhou ត្រូវបានដោះលែងបន្ទាប់ពីមានការព្រមព្រៀងជាមួយនឹងតុលាការនៅ សហរដ្ឋអាម៉េរិក កាលពីថ្ងៃទី 24 កញ្ញា។ ប៉ុន្មានម៉ោងក្រោយមក ប្រទេសចិន ក៏បានដោះលែងពលរដ្ឋកាណាដា 2 នាក់ គឺ Michael Kovrig និង Michael Spavor ក្រោយពីបានអនុញ្ញាតឱ្យពួកគេនៅក្រៅឃុំដោយមូលហេតុសុខភាព។ Michael Kovrig និង Michael Spavor ត្រូវបានចាប់ខ្លួនប៉ុន្មានថ្ងៃប៉ុណ្ណោះ បន្ទាប់ពីលោកស្រី Wanzhou ត្រូវភាគីប្រទេសកាណាដា ឃុំខ្លួនទៅតាមសំណើរបស់ សហរដ្ឋអាម៉េរិក។

មុនការមកដល់របស់យន្តហោះដឹកលោកស្រី Wanzhou គេឃើញមានជនជាតិចិន រាប់រយនាក់ ប្រមូលផ្ដុំគ្នានៅព្រលានយន្តហោះ Shenzhen Bao’an និងបាននាំយកបដាសរសេរពាក្យស្លោកជាច្រើនដើម្បីទទួលស្វាគមន៍នាយកផ្នែកហិរញ្ញវត្ថុរបស់ក្រុមហ៊ុន Huawei រូបនេះ។ «ចុងក្រោយ ខ្ញុំក៏បានត្រលប់មកផ្ទះ» លោកស្រី Wanzhou និយាយដូច្នេះ។

លោកស្រី Wanzhou បានអរគុណដល់គ្រប់គ្នាដែលបានយកចិត្តទុកដាក់ និងជួយដល់លោកស្រី ពិសេសគឺប្រធានាធិបតីចិន លោក Xi Jinping។

ប្រទេសចិន បានចោទប្រកាន់ប្រទេសកាណាដា ថា «ស្ដាប់បង្គាប់ អាម៉េរិក» នៅពេលចាប់ខ្លួនលោកស្រី Wanzhou ដែលជាមនុស្សម្នាក់ត្រូវគេជឿថា នឹងក្លាយជាមេដឹកនាំរបស់ Huawei នាពេលអនាគត ព្រមទាំងបានចោទ សហរដ្ឋអាម៉េរិក ថា វាយប្រហារផ្នែកនយោបាយទៅលើក្រុមហ៊ុនបច្ចេកវិទ្យាចិន Huawei។

ករណីចាប់ខ្លួនលោកស្រី Wanzhou ត្រូវបានគេយល់ថា ស្ថិតក្នុងយុទ្ធនាការធំមួយ ដែល សហរដ្ឋអាម៉េរិក ធ្វើឡើង សំដៅលើ Huawei ជាក្រុមហ៊ុនបច្ចេកវិទ្យាដែលត្រូវបានទីក្រុងវ៉ាស៊ីងតោន សង្ស័យថា មានទំនាក់ទំនងយ៉ាងជិតស្និទ្ធជាមួយនឹងរដ្ឋាភិបាល ក៏ដូចជាកងទ័ពចិន។

ក៏ប៉ុន្តែ ការចោទប្រកាន់របស់ សហរដ្ឋអាម៉េរិក តែងតែត្រូវបាន Huawei ច្រានចោល ដោយអះអាងថា សហរដ្ឋអាម៉េរិក មានបំណងបង្កឧបសគ្គដល់ការរីកចម្រើនរបស់ក្រុមហ៊ុននេះ ព្រោះថា ពុំមានក្រុមហ៊ុនណាមួយរបស់ សហរដ្ឋអាម៉េរិក ផ្ដល់សេវាកម្មតម្លៃទាបដូច Huawei។ ចំណែករដ្ឋាភិបាលចិន វិញ ក៏បានចោទថា ការវាយប្រហារសំដៅ Huawei ពីសំណាក់ សហរដ្ឋអាម៉េរិក គឺជាហេតុផលនយោបាយ ដើម្បីធ្វើឱ្យកម្លាំងសេដ្ឋកិច្ចរបស់ប្រទេសចិន ធ្លាក់ចុះ៕

September 27, 2021

តាលីបង់ បង្ហាញកាន់តែច្បាស់អំពីការប្រកាន់តឹង ដូចកាល 20 ឆ្នាំមុន

មេដឹកនាំម្នាក់របស់ តាលីបង់ ប្រកាសថា នឹងស្ដារវិធានការដាក់ទណ្ឌកម្មធ្ងន់ធ្ងរដែលក្រុមនេះធ្លាប់បានអនុវត្តអំឡុងគ្រប់គ្រងអំណាចកាលពីចុងទសវត្សរ៍ឆ្នាំ 1990 ធ្វើឱ្យជ្រជាជនអាហ្វហ្គានីស្ថាន កាន់តែព្រួយភ័យចំពោះវិធីប្រើប្រាស់អំណាចរបស់កងកម្លាំងនេះ នាបច្ចុប្បន្ន។

ចាប់តាំងពី តាលីបង់ ចូលគ្រប់គ្រងរដ្ឋធានីកាប៊ុល កាលពីថ្ងៃទី 15 សីហា 2021 ពលរដ្ឋអាហ្វហ្គានីស្ថាន និងពិភពលោក តែងតាមដានមើលថា តើពួកគេអាចវិលត្រលប់ទៅរករបបដ៏គួរឱ្យភ័យខ្លាចដូចអំឡុងចុងទសវត្សរ៍ឆ្នាំ 1990 ដែរ ឬយ៉ាងណា។ ចម្លើយសម្រាប់សំនួរនេះ ចាប់ផ្ដើមបង្ហាញកាន់តែច្បាស់ តាមរយៈប្រកាសរបស់ Mullah Nooruddin Turabi ដែលជាស្ថាបនិកម្នាក់របស់ តាលីបង់ ស្ដីអំពីលទ្ធភាពនៃការស្ដារទណ្ឌកម្មប្រហារជីវិត កាត់ដៃជើង ជាដើម បើទោះពួកគេប្រហែលជាមិនប្រកាសជាសាធារណៈ។

«បណ្ដាប្រទេសរិះគន់យើង ទាក់ទិននឹងទណ្ឌកម្មដែលត្រូវបានធ្វើឡើងនៅពហុកីឡដ្ឋាន ប៉ុន្តែ យើងមិនដែលនិយាយអ្វីចំពោះច្បាប់ និងទណ្ឌកម្មរបស់ពួកគេ។ មិនមានអ្នកណាម្នាក់ត្រូវបានអនុញ្ញាតឱ្យនិយាយអំពីច្បាប់របស់យើងថា ត្រូវធ្វើយ៉ាងណានោះទេ។ យើងនឹងដើរតាមសាសនាអ៊ីស្លាម និងលើកឡើងអំពីច្បាប់របស់យើងដោយយោងទៅតាមគម្ពីរ កូរ៉ាន» Turabi បញ្ជាក់ដូច្នេះ។

សម្ដីរបស់ Turabi បានបង្ហាញថា ក្រុមមេដឹកនាំរបស់ តាលីបង់ នៅតែប្រកាន់តឹង អភិរក្សនិយមជ្រាលជ្រៅ សូម្បីតែនៅពេលពួកគេទទួលយកការផ្លាស់ប្ដូរផ្នែកបច្ចេកវិទ្យា ដូចជា វីដេអូ និងទូរស័ព្ទ។

«ការដាក់ទណ្ឌកម្មដោយការកាត់ដៃគឺជារឿងចាំបាច់ដើម្បីធានាថា មិនធ្វើខុសច្បាប់ម្ដងទៀត» Turabi អះអាងដូច្នេះ និងបន្ថែមថា ទណ្ឌកម្មនេះមានប្រសិទ្ធភាពក្នុងការគំរាម ហើយគណៈរដ្ឋមន្ត្រីកំពុងតែពិចារណាថា តើគួរដាក់ទណ្ឌកម្មនៅទីសាធារណៈដែរ ឬទេ។

អាជ្ញាធរ តាលីបង់ បានស្ដារទណ្ឌកម្មមួយចំនួនទាក់ទងនឹងបទល្មើសលួចឆក់ប្លន់។ ប្រកាសខាងលើ និងការអនុវត្តច្បាប់មួយចំនួនរបស់ តាលីបង់ នាពេលថ្មីៗនេះ មិនមែនជាមូលហេតុតែមួយដែលនាំឱ្យគេជឿថា ច្បាប់ដ៏តឹងតែងរបស់ តាលីបង់ អាចនឹងត្រូវបានស្ដារឡើងវិញក្នុងពេលឆាប់ៗនោះទេ ប៉ុន្តែ តាលីបង់ បានស្ដារក្រសួងឃោសនាសីលធម៌ ដែលទទួលខុសត្រូវក្នុងការអនុវត្តការដាក់ទណ្ឌកម្មដ៏ធ្ងន់ធ្ងរ នៅក្នុងសម័យដែល តាលីបង់ គ្រប់គ្រងអំណាចនៅ អាហ្វហ្គានីស្ថាន កាលពី 20 ឆ្នាំមុន ដោយប្រើច្បាប់ សារីអះ។

Mullah Nooruddin Turabi ស្ថាបនិកម្នាក់របស់ តាលីបង់

ច្បាប់ សារីអះ ត្រូវបានអនុវត្តដោយអាជ្ញាធរ តាលីបង់ ក្នុងអំឡុងឆ្នាំ 1996 ដល់ឆ្នាំ 2001 តាលីបង់។ ពួកគេបានហាមប្រជាជនមិនឱ្យទទួលទានសាច់ជ្រូក និងផឹកស្រា។ តន្ត្រី ទូរទស្សន៍ ភាពយន្ត និងអ៊ីនធើណិត ក៏ដូចជាទម្រង់នានានៃសិល្បៈ ដូចជាគំនូរ ឬការថតរូបជាដើម ក៏ត្រូវបានហាមឃាត់។

ស្ត្រីត្រូវបានហាមមិនឱ្យចេញទៅធ្វើការ ចំណែកក្មេងស្រីក៏ត្រូវហាមមិនឱ្យទៅសាលារៀន។ ស្ត្រីត្រូវគេតម្រូវឱ្យទៅទស្សនាពិធី purdah (ពិធីបង្ហាញអំពីទំនៀមទម្លាប់របស់ស្ត្រី នៅក្នុងសហគមន៍អ្នកកាន់សាសនាអ៊ីស្លាម មួយចំនួន) ហើយរាល់ពេលចេញទៅខាងក្រៅគឺត្រូវតែមានបុរសជាញាតិទៅជាមួយ។ អ្នកដែលរំលោភលើវិន័យនេះនឹងត្រូវទទួលទណ្ឌកម្ម។

ចំណែកឯបុរសវិញ ក៏ត្រូវហាមមិនឱ្យកោរពុកមាត់ ពុកចង្កា ដោយត្រូវទុកវាឱ្យវែង និងត្រូវស្លៀកពាក់ឈុត turban ពេលចេញទៅក្រៅ។ សកម្មភាពថ្វាយបង្គំព្រះគឺជាតួនាទីដែលត្រូវតែធ្វើ ហើយអ្នកដែលមិនគោរពតាមតួនាទីនេះនឹងត្រូវបានចាប់ខ្លួន។

ចំពោះទោសដូចជា ការលួចប្លន់វិញ ការដាក់ទណ្ឌកម្មដោយការកាត់ដៃចោល នៅតែត្រូវបាន តាលីបង់ អនុវត្ត។ ចំណែកស្ត្រីដែលត្រូវបានកាត់ទោសពីបទសហាយស្មន់ ទណ្ឌកម្មដែលត្រូវទទួលនោះគឺការប្រហារជីវិតដោយគប់នឹងដុំថ្ម ឬព្យួរក។ ទាំងនេះគឺជាការកំណត់នៅក្នុងច្បាប់អ៊ីស្លាម សារីអះ ហើយមានតែ តាលីបង់ និងក្រុមប្រដាប់អាវុធជ្រុលនិយមមួយចំនួនតូចប៉ុណ្ណោះដែលបានអនុវត្តយ៉ាងខ្ជាប់ខ្ជួន។ មុននេះ នៅក្នុងតំបន់ដែលគ្រប់គ្រងដោយ តាលីបង់ ច្បាប់នេះនៅតែត្រូវបានអនុវត្ត។

ដោយសារតែ តាលីបង់ ធ្លាប់បានអនុវត្តច្បាប់ សារីអះ ដ៏មហាតឹងតែងនេះហើយ ទើបនៅពេលកងកម្លាំងនេះត្រលប់មកកាន់កាប់អំណាចនៅ អាហ្វហ្គានីស្ថាន វិញ មនុស្សជាច្រើនបានសម្ដែងការព្រួយបារម្ភខ្លាំង ពិសេសគឺសិទ្ធិជាមូលដ្ឋានរបស់ស្ត្រី និងកុមារី៕

September 27, 2021

ស្ថានីយអវកាសចិន ធៀបនឹងស្ថានីយអវកាសអន្តរជាតិ មួយណាគ្រាន់បើជាង?

ស្ថានីយអវកាសចិន Tiangong ដែលមានទំហំតូចជាង មានបន្ទាប់ម៉ូឌុល (module) ចំនួន 3 និងកែវយឹតអវកាស ខណៈដែលស្ថានីយអវកាសអន្តរជាតិ មានទំហំធំជាង ដោយមាន បន្ទប់ម៉ូឌុល ចំនួន 16។

ប្រការដំបូងដែលអ្នកត្រូវដឹងអំពីស្ថានីយអវកាស Tiangong របស់ ប្រទេសចិន នោះគឺវាត្រូវបានផលិតឡើងទាំងស្រុងដោយប្រទេសចិនផ្ទាល់។ ចាប់តាំងពីឆ្នាំ 2011 ទីភ្នាក់ងារអវកាស NASA របស់ អាម៉េរិក ត្រូវបានហាមសហការជាមួយ ប្រទេសចិន ទៅតាមច្បាប់របស់ សហរដ្ឋអាម៉េរិក (លើកលែងតែសភាអនុញ្ញាត)។ ជាលទ្ធផល ក្រុមអវកាសចរចិន មិនបានឡើងទៅកាន់ស្ថានីយអវកាសអន្តរជាតិ (ISS) ដែលជាផលិតផលនៃកិច្ចសហការរវាងទីភ្នាក់ងារអវកាសចំនួន 5 គឺ NASA (សហរដ្ឋអាម៉េរិក), Roscosmos (រុស្ស៊ី), JAXA (ជប៉ុន), ESA (សហភាពអឺរ៉ុប) និង CSA (កាណាដា)។

ISS បច្ចុប្បន្ន មានបន្ទប់ម៉ូឌុល ចំនួន 16 ខណៈដែលដើមឡើយ ស្ថានីយអវកាសចិន Tiangong មានតែ 1 ម៉ូឌុល ប៉ុណ្ណោះ ដែលកំពុងគោចរនៅលើគន្លងតារាវិថី ប៉ុន្តែ ចុងក្រោយ Tiangong នឹងរួមមាន 3 ម៉ូឌុល។

បច្ចុប្បន្ន អ្នកអវកាសចិន ចំនួន 3 នាក់ អាចរស់នៅលើស្ថានីយអវកាស Tiangong។ ចំណែកស្ថានីយអវកាសអន្តរជាតិវិញ តែងតែមានអវកាសចរ 6 នាក់ ធ្វើការរួមគ្នា។ កាលពីឆ្នាំ 2009 នៅលើស្ថានីយអវកាសអន្តរជាតិ មានអ្នកអវកាសរហូតដល់ 13 នាក់ឯណោះ។ ប្រទេសចិន ក៏អាចឈានដល់ដំណាក់កាលដូចគ្នានេះដែរ ដោយការបន្ថែម បន្ទប់ម៉ូឌុល។

ដោយសារតែរចនារូបរាងទម្រង់ជាបន្ទប់ម៉ូឌុល ស្ថានីយអវកាសអន្តរជាតិ អាចបន្តពង្រីកមាឌ ចាប់ពីក្រោយឆ្នាំ 1998។ បើសិនជា ម៉ូឌុល មួយខូច ឬដំណើរការមិនល្អដូចមុនទៀត អ្នកអាចដោះវាចេញ នឹងដាក់ ម៉ូឌុល ថ្មី។ នេះបើតាម Quentin Parker ប្រធានវិទ្យាស្ថានស្រាវជ្រាវអវកាសនៃសាកលវិទ្យាល័យហុងកុង។

បើទោះជាស្ថានីយអវកាស Tiangong តូចជាង ប៉ុន្តែ ប្រទេសចិន បានឱ្យដឹងថា វាត្រូវបានបំពាក់បច្ចេកវិទ្យាទាន់សម័យជាង ធៀបនឹង ISS ក្នុងនោះមានប្រព័ន្ធផ្ទាំងសូឡា ដែលផ្គត់ផ្គង់ថាមពលដល់ Tiangong។ «ប្រព័ន្ធថាមពលរបស់យើង អាចស្រូបយកកម្ដៅព្រះអាទិត្យជាង 30% ខ្ពស់ជាងច្រើន បើធៀបនឹងអ្វីដែលយើងបានឃើញនៅលើស្ថានីយអវកាសដទៃ» Zhou Jianping ប្រធានក្រុមអ្នករចនានៃគម្រោងបច្ចេកទេសអវកាសមានមនុស្សបើកបររបស់ ចិន អះអាងដូច្នេះ។

ជាមូលដ្ឋាន អគ្គិសនីពីបន្ទះសូឡា ជួយរក្សាអំពូលភ្លើងឱ្យភ្លឺ។ ចំនុចពិសេសមួយនៅក្នុងរចនារបស់ Tiangong នោះគឺអគ្គិសនីទាំងនេះក៏ផ្គត់ផ្គង់ថាមពលដល់បច្ចេកវិទ្យារុញច្រានរបស់ស្ថានីយអវកាស។ ដូច្នេះ បើទោះជា Tiangong នៅតែប្រើប្រាស់ឥន្ធនៈសម្រាប់រុញច្រានធម្មតាដូចទៅនឹង ISS ក៏ពិតមែន ប៉ុន្តែ ប្រទេសចិន បានឱ្យដឹងថា ស្ថានីយរបស់ពួកគេមិនចាំបាច់ចំណាយឥន្ធនៈច្រើនសម្រាប់ការហោះហើរលើគន្លងគោចរ។

បើសិនជាមិនប្រើប្រាស់ឥន្ធនៈរាវ ឬរឹង ដើម្បីបង្កើតជាកម្លាំងរុញច្រាន អ្នកនឹងមិនបាច់យកទម្ងន់នោះទៅជាមួយ។ នោះគឺជាការសន្សំសំច័យមួយដែរ។

ទីភ្នាក់ងារអវកាសចិន បានឱ្យដឹងថា ប្រព័ន្ធរុញច្រានរបស់ Tiangong មានប្រសិទ្ធភាព និងខ្លាំងជាងប្រហែល 5 ដប ធៀបនឹង ISS ដែលជាស្ថាបត្យកម្មមួយដែលប្រើប្រាស់ឥន្ធនៈច្រើន ពោលគឺប្រហែល 9 តោន/ឆ្នាំ ដើម្បីហោះលើគន្លងគោចរ។

ឧបករណ៍មួយទៀត ដែល ISS មិនមាន នោះគឺកែវយឹតអវកាស (តេឡេស្កុប) Xuntian ដែលភ្ជាប់ជាមួយស្ថានីយ។ Xuntian ដែលមានរូបរាងស្រដៀងនឹងកែវយឹតអវកាស Hubble នឹងហោះទន្ទឹមគ្នានឹង Tiangong។ Xuntian នឹងមានកាមេរ៉ាខ្នាតយក្ស 1 គ្រាប់ ដែលអាចមើលទីអវកាសទំហំធំជាង 300 ដង ធៀបនឹងកែវយឹតអវកាស Hubble ដោយចំណាយពេលមើលតែម្ដង។ កែវយឹតអវកាសរបស់ ចិន អាចចាក់ប្រេងជាថ្មី និងត្រូវបានថែទាំដោយវិធីតភ្ជាប់ផ្ទាល់ជាមួយនឹង Tiangong។ ចំណែក Hubble វិញ ដោយសារតែវាគោចរតែឯង ដូច្នេះនៅពេលវាមានបញ្ហា គេត្រូវបញ្ជូនមនុស្សពីផែនដីទៅជួសជុល។

ថ្ងៃណាមួយ កែវយឹតអវកាស ក៏ដូចជាស្ថានីយអវកាសរបស់ ចិន អាចត្រូវបានបណ្ដាប្រទេសប្រើប្រាស់ ព្រោះថា ប្រទេសនេះធ្លាប់បានបញ្ជាក់ថា ស្ថានីអវកាសថ្មីត្រូវបានរចនាឡើងដើម្បីសហការ។

យ៉ាងនេះក្ដី Tiangong នឹងមិនមែនជាស្ថានីយអវកាសតែមួយគត់ដែលនឹងដើរតួឯកជំនួសនោះទេ នៅពេល ISS ចូលនិវត្តន៍។ បច្ចុប្បន្ន NASA កំពុងតែចាត់ចែងគម្រោងបាញ់បង្ហោះមូលដ្ឋានមួយដែលដូចទៅនឹង ISS ប៉ុន្តែ គោចរជុំវិញឋានព្រះចន្ទ ខណៈ ប្រទេសរុស្ស៊ី ក៏អាចនឹងបាញ់បង្ហោះស្ថានីយអវកាសរបស់ខ្លួននៅឆ្នាំ 2030៕

September 25, 2021

(វីដេអូ)-បន្លំខ្លួនជាមេធាវី ចូលទៅបាញ់សម្លាប់មេបងធំល្បីឈ្មោះជាងគេ ដល់ក្នុងតុលាការ

(ឥណ្ឌា)- Jitendra Gogi មេបងធំដ៏ល្បីឈ្មោះ ត្រូវបានខ្មាន់កាំភ្លើងពីរនាក់បាញ់សម្លាប់នៅក្នុងបន្ទប់កាត់ក្ដីរបស់តុលាការ នា ទីក្រុងដែលី (Delhi)។

មេបងធំខាងលើដែលធ្លាប់ត្រូវបានអាជ្ញាធរតាមចាប់ខ្លួនបំផុតនៅប្រទេសឥណ្ឌា កាលពីម្សិលមិញត្រូវបញ្ជូនឡើងតុលាការមួយនៅក្នុងខណ្ឌ Rohini ដែលស្ថិតក្នុងរដ្ឋធានីញូវដែលី។ ប៉ុន្តែ នៅពេលចៅក្រមកំពុងកាត់ក្ដី ក៏ស្រាប់តែមានបុរសពីរនាក់ដែលបន្លំខ្លួនជាមេធាវី ដកកាំភ្លើងបាញ់ប្រហារ។

សាក្សីបានឱ្យដឹងថា ស្នូរគ្រាប់កាំភ្លើងប្រហែល 10 គ្រាប់ បានផ្ទុះឡើងនៅក្នុងបន្ទប់កាត់ក្ដី។ ខ្មាន់កាំភ្លើងពីរនាក់ បាញ់ប្រហារជាច្រើនគ្រាប់ទៅលើ Gogi មុនពេលត្រូវប៉ូលិសការពារតុលាការ បាញ់សម្លាប់។

ប៉ូលិសឱ្យដឹងថា ខ្មាន់កាំភ្លើងដែលបានបាញ់សម្លាប់ Gogi គឺជាសមាជិករបស់ក្រុមដែលជាគូប្រជែង។ វីដេអូដែលបានបង្ហោះលើបណ្ដាញសង្គមបង្ហាញថា ក្រុមមេធាវី និងសាក្សី រត់យករួចខ្លួនចេញមកខាងក្រៅបន្ទប់តុលាការ នៅពេលស្នូរគ្រាប់កាំភ្លើងផ្ទុះឡើង។

Gogi អាយុប្រហែល 30 ឆ្នាំ ជាប់ទាក់ទិននឹងករណីជម្លោះបងធំ បងតូចដ៏សាហាវ រួមនឹងករណីសម្លាប់មនុស្ស ប្លន់ទ្រព្យសម្បត្តិ និងចាប់ជំរិតនៅ ទីក្រុងដែលី និងរដ្ឋជាច្រើននៅភាគខាងជើងនៃ ប្រទេសឥណ្ឌា។ Gogi ត្រូវបានចាប់ខ្លួនកាលពីឆ្នាំ 2016 ប៉ុន្តែ ក្រោយមកក៏បាន «ហែកគុក» រត់បាត់ស្រមោល។

ជននេះបានក្លាយជាគោលដៅនៃការតាមប្រមាញ់ពីក្រុមជាគូសត្រូវ និងក្រុមប៉ូលិស។ សារព័ត៌មាន ឥណ្ឌា បានឱ្យដឹងថា ក្រុមបងធំផ្សេងៗ បានយកក្រុមរបស់ Gogi ជាសត្រូវ បន្ទាប់ពីត្រូវដណ្ដើមទឹកដី។

ប៉ូលិស ឥណ្ឌា បាននិយាយថា Gogi ត្រូវបានចាប់ខ្លួនត្រលប់មកវិញកាលពីខែមីនា ឆ្នាំ 2020 នៅពេលចូលរួមប្រយុទ្ធតតាំងនឹងក្រុមបងធំ Tillu ដើម្បីដណ្ដើមកាន់កាប់ទឹកដីនៅភាគខាងជើងប្រទេស។

ករណីខ្មាន់កាំភ្លើងសម្លាប់ Gogi ធ្វើឱ្យមនុស្សមិនតិចនោះទេដែលសង្ស័យទៅលើប្រព័ន្ធសន្តិសុខនៅតុលាការរបស់ ឥណ្ឌា។ តុលាការខណ្ឌ Rohini ជាកន្លែងដែលទទួលពាក្យបណ្ដឹងច្រើនករណីដែលទាក់ទងនឹងបទល្មើសធំៗនៅប្រទេសនេះ៕

September 25, 2021

Category: អន្តរជាតិ