អន្តរជាតិ - La Reine Media

ចិនតៃវ៉ាន់ ធ្វើឱ្យចិនដីគោកខឹងខ្លាំង ដោយសារគម្រោងទស្សនកិច្ចនៅបរទេស

មេដឹកនាំស្ថាប័នការបរទេសរបស់ តៃវ៉ាន់ ប្រកាសអំពីគម្រោងធ្វើទស្សនកិច្ចផ្លូវរដ្ឋទៅកាន់ ទ្វីបអឺរ៉ុប នាសប្ដាហ៍ក្រោយ នាំឱ្យ ទីក្រុងប៉េកាំង ប្រតិកម្មខ្លាំងក្លា។

អ្នកនាំពាក្យរបស់ក្រសួងការបរទេសចិន លោក វ៉ាង វេនប៊ីន (Wang Wenbin) កាលពីថ្ងៃទី 21 តុលា បានថ្លែងថា ប្រទេសចិន «ពិតជាមិនពេញចិត្ត» នៅពេល ប្រទេសស្លូវ៉ាគី (Slovakia) និងប្រទសឆែក (Czech) ទទួលយកដំណើរទស្សនកិច្ចរបស់មេដឹកនាំការបរទេស កោះតៃវ៉ាន់ ចូសេហ្វ វូ (Joseph Wu)។ លោក វ៉ាង វេនប៊ីន អំពាវនាវប្រទេសអឺរ៉ូបទាំងពីរនេះ ចៀសវាង «ធ្វើឱ្យប៉ះពាល់ដល់មូលដ្ឋានគ្រឹះនយោបាយទ្វេភាគី» ជាមួយ ប្រទេសចិន។

អ្នកនាំពាក្យស្ថាប័នការបរទេសរបស់ តៃវ៉ាន់ លោកស្រី ជាំងអាន អ៊ូ (Joanne Ou) មុននេះបានប្រកាសថា លោក ចូសេហ្វ វូ នឹងទៅធ្វើទស្សនកិច្ចនៅ ប្រទេសស្លូវ៉ាគី នៅថ្ងៃទី 26 តុលា និងចូលរួមក្នុងវេទិការមួយដែលនឹងត្រូវបានធ្វើឡើងដោយមជ្ឈមណ្ឌលស្រាវជ្រាវគោលនយោបាយ។ បន្ទាប់មក លោក ចូសេហ្វ វូ ក៏នឹងធ្វើដំណើរទៅកាន់ រដ្ឋធានីប្រាក (Prague) ដើម្បីជួបពិភាក្សាជាមួយប្រធានសភាជាន់ខ្ពស់របស់ ប្រទេសឆែក លោក មីឡូស វីស្ត្រូស៊ីល (Milos Vystrcil) និងអភិបាលក្រុង ហ្សដេនេក រីប (Zdenek Hrib)។ លោក មីឡូស វីស្ត្រូស៊ីល និង លោក ហ្សដេនេករីប ធ្លាប់បានធ្វើទស្សនកិច្ចទៅកាន់ កោះតៃវ៉ាន់ កាលពីឆ្នាំ 2020 ដែលកាលណោះក៏បានធ្វើឱ្យ ទីក្រុងប៉េកាំង ខឹងខ្លាំងផងដែរ។

បណ្ដាប្រទេសនៅ អឺរ៉ុប ដូចជា ឆែក (Czech), ស្លូវ៉ាគី (Slovakia), ប៉ូឡូញ (Poland) និងប្រទេសឡេតូនី (Lithuania) មានទំនាក់ទំនងល្អជាមួយ កោះតៃវ៉ាន់ ក្នុងរយៈពេលកន្លង។ អាជ្ញាធរ កោះតៃវ៉ាន់ និង រដ្ឋាភិបាលឡេតូនី មានគម្រោងបើកការិយាល័យតំណាងនៅ ទីក្រុងតៃប៉ិ និង រដ្ឋធានីវីលនីស (Vilnius) នៅឆ្នាំនេះ។

ក្រៅពីដំណើរទស្សនកិច្ចនេះ លោក ចូសេហ្វ វូ ក៏កំពុងរកវិធីដើម្បីបានចូលរួមសន្និបាទនៅ រដ្ឋធានីរ៉ូម (Rome) នៃ ប្រទេសអ៊ីតាលី នាថ្ងៃទី 29 តុលា ស្ដីពីបញ្ហា ប្រទេសចិន ផងដែរ៕

October 22, 2021

WHO ព្រមានអំពីមូលហេតុដែល COVID-19 អាចអូសបន្លាយពេលដល់ឆ្នាំ 2022

អង្គការសុខភាពពិភពលោក (WHO) ឱ្យដឹងថា មហារោគរាតត្បាត COVID-19 នឹងបន្តអូសបន្លាយពេលរហូតដល់ឆ្នាំក្រោយ ដោយសារតែបណ្ដាប្រទេសក្រីក្រមិនទទួលបានវ៉ាក់សាំងក្នុងបរិមាណដែលចាំបាច់។

«យើងកំពុងដើរខុសទិសដៅ។ យើងពិតជាត្រូវការជំរុញល្បឿននៃយុទ្ធនាការបែងចែកវ៉ាក់សាំង មិនដូច្នេះទេ ជំងឺរាតត្បាតនឹងបន្តកើតឡើងមួយឆ្នាំទៀត» វេជ្ជបណ្ឌិត Bruce Aylward ទីប្រឹក្សានៃប្រធានអង្គការសុខភាពពិភពលោក កាលពីថ្ងៃទី 20 តុលា បានព្រមានអំពីការដែល COVID-19 អាចបន្តអូសបន្លាយពេលយូរជាងនេះ។

ការព្រមាននេះត្រូវបានធ្វើឡើងនៅក្នុងគ្រាដែលបណ្ដាប្រទេសក្រីក្រមិនទាន់ទទួលបានបរិមាណវ៉ាក់សាំងគ្រប់គ្រាន់តាមការចាំបាច់របស់ពួកគេ។ ប្រជាជននៅក្នុង ទ្វីបអាហ្វ្រិក មិនដល់ 5% នៅឡើយដែលបានទទួលការចាក់វ៉ាក់សាំង ខណៈដែលអត្រានេះនៅក្នុងបណ្ដាទ្វីបផ្សេងៗ មានចំនួនចាប់ពី 40% ឡើងទៅ។

បណ្ឌិត Aylward បានអំពាវនាវដល់បណ្ដាប្រទេសអ្នកមាន ទុកលទ្ធភាពឱ្យបណ្ដាក្រុមហ៊ុនផ្គត់ផ្គង់វ៉ាក់សាំង អាចផ្ដល់អាទិភាពនៃការបញ្ជាទិញវ៉ាក់សាំងដល់បណ្ដាប្រទេសដែលមានចំណូលទាប។

បណ្ដាប្រទេសអភិវឌ្ឍ គួរស្រង់ស្ថិតិឡើងវិញដើម្បីឱ្យដឹងថា ពួកគេកំពុងអនុវត្តដល់ណាហើយទាក់ទងនឹងការសន្យាស្ដីពីការផ្ដល់ជំនួយជាវ៉ាក់សាំងដល់ពិភពលោក ដែលពួកគេបានលើកឡើងនៅក្នុងសន្និសីទកំពូលនានា ដូចជា G7 នៅ St Eives នៃ ប្រទេសអង់គ្លេស។

People’s Vaccine ដែលជាសម្ព័ន្ធអង្គការមនុស្សធម៌មួយ បានបញ្ជាក់ថា គិតមកដល់បច្ចុប្បន្ន វ៉ាក់សាំងចំនួនត្រឹមតែ 1/7 ប៉ុណ្ណោះដែលត្រូវបានបញ្ជូនទៅដល់បណ្ដាប្រទេសក្រីក្រ នៅក្នុងចំណោមវ៉ាក់សាំងដែលបណ្ដាក្រុមហ៊ុនឱសថ និងបណ្ដាប្រទេសអ្នកមានបានសន្យាផ្ដល់ឱ្យ។

វ៉ាក់សាំងភាគច្រើនត្រូវបានប្រើប្រាស់នៅក្នុងបណ្ដាប្រទេសដែលមានចំណូលខ្ពស់ ឬមធ្យម ខណៈដែលវ៉ាក់សាំងដែលត្រូវបានបញ្ជូនទៅដល់ ទ្វីបអាហ្វ្រិក មានត្រឹមតែ 2.6% ប៉ុណ្ណោះ ធៀបនឹងពិភពលោកទាំងមូល។

គំនិតផ្ដួចផ្ដើមដែលហៅថា COVAX ត្រូវបានបង្កើតឡើងដើម្បីជួយដល់បណ្ដាប្រទេសក្រីក្រទទួលបានការផ្គត់ផ្គង់វ៉ាក់សាំងដោយស្មើភាពគ្នានឹងបណ្ដាប្រទេសអ្នកមាន។ COVAX ដំបូងឡើយបានកំណត់គោលដៅផ្គត់ផ្គង់វ៉ាក់សាំងឱ្យបាន 2 ពាន់លានដូសក្នុងឆ្នាំ 2021 ប៉ុន្តែ មកដល់បច្ចុប្បន្ន ទើបតែផ្គត់ផ្គង់បាន 371 លានដូសបណ្ណោះ៕

October 21, 2021

(វីដេអូ)-ហេតុការណ៍ផ្ទុះដ៏ធំមួយនៅ ប្រទេសចិន ធ្វើឱ្យកក្រើកទីក្រុង សេនយ៉ាង

ហេតុការណ៍ផ្ទុះដ៏ធំមួយដែលគេសង្ស័យថា បណ្ដាលមកពីធុងហ្គាស នៅក្នុង ទីក្រុងសេនយ៉ាង (Shenyang) ប្រទេសចិន កាលពីព្រឹកមិញនេះ បានបង្កឱ្យមានអ្នកស្លាប់ និងរបួសច្រើននាក់ ព្រមទាំងបានបំផ្លាញអគារ និងយានជំនិះច្រើនគ្រឿងផងដែរ។

ករណីនេះកើតឡើងនៅក្នុង តំបន់សេនយ៉ាង ជាទីក្រុងរដ្ឋបាលរបស់ ខេត្តលាវនីង (Liaoning) ភាគឦសាននៃ ប្រទេសចិន នៅវេលាម៉ោងប្រហែល 8 និង 20 នាទី ព្រឹក (ម៉ោង 7 និង 20 នាទី នៅ ភ្នំពេញ) បណ្ដាលឱ្យផ្នែកខាងមុខនៃអគារមួយខ្នងត្រូវក្លាយជាគំនរបាក់បែក។ ព័ត៌មានបឋមឱ្យដឹងថា យ៉ាងហោចណាស់ក៏មានមនុស្សស្លាប់ 3 នាក់ និងជាង 30 នាក់រងរបួស។

ក្រោយហេតុការណ៍កើតឡើងភ្លាម កងកម្លាំងពន្លត់អគ្គិភ័យចំនួន 110 នាក់ រួមនឹងរថយន្តបាញ់ទឹកសរុប 25 គ្រឿង ត្រូវបានបញ្ជូនទៅដល់កន្លែងកើតហេតុ។

ក្រុមសមត្ថកិច្ចបានចាប់ផ្ដើមជម្លៀសមនុស្សនៅក្បែរទីតាំងកើតហេតុ។ ស្ត្រីម្នាក់ដែលមានទីលំនៅក្បែរនោះបាននិយាយថា កញ្ចក់បង្ហួចផ្ទះរបស់គាត់ត្រូវបែកខ្ទេចខ្ទីដោយសារការផ្ទុះនេះ។

កាលពីខែមិថុនាកន្លងទៅ មានករណីផ្ទុះបំពង់បង្ហូរហ្គាសមួយនៅតំបន់ប្រជុំជននៃ ខេត្តហ៊ូប៉ី (Hubei) ភាគកណ្ដាលប្រទេសចិន បណ្ដាលឱ្យមនុស្សចំនួន 25 នាក់បាត់បង់ជីវិត និងជាង 100 នាក់រងរបួស។ មនុស្ស 8 នាក់ ក្នុងនោះក៏មានទាំងអគ្គនាយកក្រុមហ៊ុនគ្រប់គ្រងប្រព័ន្ធបំពង់បង្ហូរហ្គាស ត្រូវបានចាប់ខ្លួន បន្ទាប់ពីក្រុមមន្ត្រីរកឃើញថា វិធានការធានាសុវត្ថិភាពមិនត្រូវបានអនុវត្តត្រឹមត្រូវ៕

October 21, 2021

មូលដ្ឋានទ័ពរបស់ អាម៉េរិក ត្រូវរងការវាយប្រហារពីយន្តហោះគ្មានមនុស្សបើក

(ប្រទេសស៊ីរី)-មូលដ្ឋានទ័ពយុទ្ធសាស្ត្រ al-Tanf ត្រូវបានយន្តហោះគ្មានមនុស្សបើក (UAV) ដែលផ្ទុកពេញដោយគ្រឿងផ្ទុះ វាយប្រហារ ប៉ុន្តែមិនបានបណ្ដាលឱ្យមានទាហាន អាម៉េរិក ណាម្នាក់ស្លាប់ ឬរងរបួសនោះទេ។

មន្ត្រី អាម៉េរិក មួយរូប សុំមិនបញ្ចេញឈ្មោះ ថ្ងៃនេះបានឱ្យដឹងថា មូលដ្ឋានទ័ព al-Tanf គ្រប់គ្រងដោយ សហរដ្ឋអាម៉េរិក ដែលមានទីតាំងនៅភាគខាងត្បូងនៃ ប្រទេសស៊ីរី ត្រូវរងការវាយប្រហារពី «យន្តហោះគ្មានមនុស្សបើក (UAV) និងអាវុធ ដោយប្រយោល»។ ប្រភពព័ត៌មានពីកងសន្តិសុខនៃ ប្រទេសអ៊ីរ៉ាក់ បង្ហើបឱ្យដឹងថា ករណីវាយប្រហារនេះប្រើប្រាស់យន្តហោះ UAV ចំនួន 5 គ្រឿងដែលផ្ទុកពេញដោយគ្រឿងផ្ទុះ និងត្រូវបានបញ្ជាពី ទឹកដីស៊ីរី។

ពុំមានករណីស្លាប់ ឬរងរបួសនៅក្នុងការវាយប្រហារលើកនេះ ប៉ុន្តែ មន្ត្រីរបស់ អាម៉េរិក ឱ្យដឹងថា គេមិនទាន់ប្រាកដថា ក្រុមណាជាអ្នកនៅពីក្រោយការវាយប្រហារនេះនៅឡើយ។ យ៉ាងនេះក្ដី មូលដ្ឋានទ័ព al-Tanf កន្លងមកធ្លាប់ជាគោលដៅនៃការវាយប្រហារដោយ UAV របស់កងជីវពលស្និទ្ធនឹង អ៊ីរ៉ង់ ដែលកំពុងឈរជើងនៅលើទឹកដី ស៊ីរី។

សហរដ្ឋអាម៉េរិក គ្រប់គ្រងតំបន់ al-Tanf ចាប់តាំងពីក្រុមយោធាស៊ីរីថ្មី (NSA) ដែលគាំទ្រដោយ អាម៉េរិក ដណ្ដើមបានតំបន់ព្រំដែនជាប់នឹង ប្រទេសអ៊ីរ៉ាក់ កាលពីឆ្នាំ 2016។ មូលដ្ឋានទ័ពដែល សហរដ្ឋអាម៉េរិក បានសាងសង់នៅទីនេះត្រូវបានចាត់ទុកថាមានសារសំខាន់ជាយុទ្ធសាស្ត្រដើម្បីឱ្យ អាម៉េរិក ដណ្ដើមបានឥទ្ធិពលក្នុងតំបន់ ព្រោះតែវាស្ថិតនៅក្បែរតំបន់ត្រីកោណរវាង ប្រទេសស៊ីរី ហ្ស៊កដានី និង អ៊ីរ៉ាក់។

Al-Tanf ក៏ជាទីតាំងតែមួយគត់ដែលមានវត្តមានយោធាដ៏ច្រើនរបស់ អាម៉េរិក ក្នុង ប្រទេសស៊ីរី ដែលនៅខាងក្រៅតំបន់ភាគខាងជើងដែលគ្រប់គ្រងដោយជនជាតិ Kurd។ អាម៉េរិក ធ្លាប់បានដកទ័ពចេញពីទីនេះកាលពីឆ្នាំ 2018 ប៉ុន្តែ ក្រោយមកក៏ត្រលប់មកវិញ ហើយរក្សាវត្តមាន និងបង្កើតតំបន់កណ្ដាលដែលមានទំហំ 50 គីឡូម៉ែត្រ ព័ទ្ធជុំវិញ al-Tanf ដើម្បីទប់ស្កាត់ការប៉ះទង្គិចជាមួយកងទ័ពរដ្ឋាភិបាលស៊ីរី និង រុស្ស៊ី៕

October 21, 2021

អង់គ្លេស បញ្ជាទិញថ្នាំគ្រាប់ព្យាបាល COVID-19 រាប់សែនឈុត ដើម្បីត្រៀមសម្រាប់រដូវរងា

ប្រទេសអង់គ្លេស បានបញ្ជាទិញថ្នាំប្រឆាំងវីរុស ព្យាបាលជំងឺ COVID-19 ចំនួនរាប់សែនឈុត ដើម្បីត្រៀមសម្រាប់រដូវរងាខាងមុខ។

អាជ្ញាធរអង់គ្លេស សម្រេចបានកិច្ចព្រមព្រៀងទិញថ្នាំ molnupiravir ចំនួន 480,000 ឈុត ពីក្រុមហ៊ុន អាម៉េរិក Merck។ Molnupiravir គឺជាថ្នាំប្រឆាំងវីរុស ដែលត្រូវបានបញ្ជាក់ថា អាចកាត់បន្ថយហានិភ័យនៃការចូលពេទ្យ និងស្លាប់របស់អ្នកជំងឺ COVID-19។ កិច្ចព្រមព្រៀងទីពីរគឺថ្នាំ PF-07321332/ritonavir របស់ Pfizer ចំនួន 250,000 ឈុត។ ថ្នាំ ritonavir ផ្សំជាមួយនឹងថ្នាំគ្រាប់ប្រឆាំងវីរុសមួយប្រភេទទៀង តែងត្រូវបានគេប្រើសម្រាប់ព្យាបាលអ្នកជំងឺ អេដស៍ (AIDS) ឬអ្នកផ្ទុកវីរុស HIV។

បច្ចុប្បន្ន ពុំទាន់មានថ្នាំប្រភេទណាមួយដែលត្រូវបានស្ថាប័នគ្រប់គ្រងឱសថ និងផលិតថែទាំសុខភាព (MHRA) របស់ អង់គ្លេស ធ្វើការអនុម័តនៅឡើយ។ ថ្នាំ PF-07321332/ritonavir របស់ Pfizer ដែលកំពុងស្ថិតក្នុងដំណាក់កាលពិសោធន៍នៅឡើយ ប្រហែលជាត្រូវរង់ចាំរហូតដល់ដើមឆ្នាំ 2022 ខណៈដែល ថ្នាំ molnupiravir តាមគម្រោងនឹងត្រូវបានដឹកទៅដល់ អង់គ្លេស នៅក្នុងខែវិច្ឆិកា។

ក្រុមមន្ត្រីអង់គ្លេស បានឱ្យដឹងថា កិច្ចព្រមព្រៀងខាងលើនេះត្រូវបានធ្វើឡើងដើម្បីទប់ទល់នឹងរលកនៃការឆ្លងរាលដាលខ្លាំងថ្មីដែលអាចកើតឡើងនៅក្នុងរដូវរងាខាងមុខ។

ក្រុមអ្នកឯកទេសផ្នែករោគឆ្លងនៅ ប្រទេសអង់គ្លេស បានស្នើឱ្យរដ្ឋាភិបាលរឹតបន្តឹងសកម្មភាពមួយចំនួនរបស់ពលរដ្ឋដើម្បីទប់ស្កាត់ COVID-19 នៅពេលដែលករណីឆ្លង និងករណីចូលពេទ្យ កើនឡើងខ្ពស់ រួមនឹងការបង្ហាញខ្លួនរបស់វីរុស COVID-19 បំប្លែងខ្លួនថ្មី AY.4.2 ដែលជា «កូនចៅ» របស់ Delta។ ក្រុមវេជ្ជបណ្ឌិតបានព្រមានថា ប្រទេសអង់គ្លេស អាចប្រឈមនឹង «វិបត្តិរដូវរងា» បើសិនជាមិនចាត់វិធានការទប់ស្កាត់ជាមុន។

គិតមកដល់បច្ចុប្បន្ន អង់គ្លេស មានអ្នកឆ្លងវីរុស COVID-19 សរុបចំនួនជិត 8.59 លាននាក់ និងជាង 139,000 នាក់ បានបាត់បង់ជីវិត។ កាលពីម្សិលមិញ ប្រទេសនេះបានរាយការណ៍ថា មានករណីឆ្លងថ្មីចំនួន 49,139 នាក់ និងករណីស្លាប់ថ្មីចំនួន 179 នាក់។

រដ្ឋលេខាធិការក្រសួងសុខាភិបាលអង់គ្លេស លោក Sajid Javid បានព្រមានថា ចំនួនអ្នកឆ្លងប្រចាំថ្ងៃនៅ អង់គ្លេស អាចឡើងដល់ខ្ទង់សែន និងបានអំពាវនាវឱ្យពលរដ្ឋប្រញាប់ទៅទទួលការចាក់វ៉ាក់សាំង៕

October 21, 2021

អភិបាលក្រុងហុងកុង ធ្លាក់ពីលើជណ្ដើរ ដួលបាក់ដៃ

ប្រធានរដ្ឋបាលនៃតំបន់រដ្ឋបាលពិសេសហុងកុង លោកស្រី ខារី ឡាំ (Carrie Lam) ត្រូវចូលពេទ្យព្យាបាលបន្ទាន់ ដោយសារតែបានបាក់ឆ្អឹងកែងដៃ បន្ទាប់ពីដួល ធ្លាក់ពីលើកាំជណ្ដើរ។

យោងតាមប្រកាសរបស់អាជ្ញាធរហុងកុង លោកស្រី ខារី ឡាំ បានដួល និងធ្លាក់ពីលើកាំជណ្ដើរមកដី នៅក្នុងអគាររដ្ឋកាលពីថ្ងៃទី 18 តុលា ដែលនាំឱ្យលោកស្រីត្រូវចូលព្យាបាលនៅមន្ទីរពេទ្យ ឃ្វីន ម៉ែរី (Queen Mary)។

លោកស្រី ខារី ឡាំ រងរបួសស្រាលលើដងខ្លួន ប៉ុន្តែបានបាក់ឆ្អឹងកែងដៃ។ វេលាម៉ោងប្រហែល 9 ព្រឹក ថ្ងៃទី 19 តុលា លោកស្រីបានបង្ហាញខ្លួននៅខាងក្រៅមន្ទីរពេទ្យ ឃ្វីន ម៉ែរី ជាមួយនឹងដៃត្រូវចងព្យួរតាមបែបអ្នកបាក់ដៃ។

«ខ្ញុំគិតថា របួសនេះនឹងមិនប៉ះពាល់ដល់ការរស់នៅ ឬការបំពេញការងារប្រចាំថ្ងៃរបស់លោកស្រី» ប្រភពព័ត៌មានពីអាជ្ញាធរហុងកុង បង្ហើបឱ្យដឹងដូច្នេះ ប៉ុន្តែ បានបន្ថែមថា៖ «ថ្ងៃនេះ លោកស្រីបានសម្រាក ហើយនឹងត្រូវលុបចោលកិច្ចប្រជុំ និងព្រឹត្តិការណ៍នានា»។

អគ្គលេខាហុងកុង ចនលី ខាឈីវ (John Lee Ka-chiu) មេដឹកនាំកំពូលលំដាប់ទីពីររបស់ទីក្រុងហុងកុង នឹងបំពេញកិច្ចការជំនួសលោកស្រី ខារី ឡាំ ជាបណ្ដោះអាសន្ន ក្នុងគ្រាលោកស្រីសម្រាកព្យាបាលរបួស។

លោក ថុង ឈីហ្វា (Tung Chee-hwa) អតីតអភិបាលទីមួយនៃទីក្រុងហុងកុង កាលពីខែមុនក៏ត្រូវចូលមន្ទីរពេទ្យ ដើម្បីវះកាត់ព្យាបាលជំងឺ។ ប៉ុន្តែ មូលហេតុលម្អិតនៃការចូលព្យាបាលនៅមន្ទីរពេទ្យរបស់លោក មិនទាន់ត្រូវបានបង្ហើបឱ្យដឹងនៅឡើយ៕

October 20, 2021

(វីដេអូ)-អ្នកទោសកូរ៉េខាងជើង «ហែកគុក» គេចខ្លួនបានសម្រេច! អាជ្ញាធរចិន ប្រកាសផ្ដល់រង្វាន់រាប់ម៉ឺនដុល្លារ ដល់អ្នករាយការណ៍ពីជននេះ

អាជ្ញាធរចិន ប្រកាសប្រគល់រង្វាន់ជាប្រាក់ចំនួន 23,000 ដុល្លារអាម៉េរិក ដល់ជនណាដែលបានផ្ដល់ព័ត៌មាននាំទៅរកការចាប់ខ្លួន Zhu Zianjian ដែលជាទណ្ឌិតជនជាតិកូរ៉េខាងជើង។

នគរបាលនៃទីក្រុងជីលីន (Jilin City) នៅភាគឦសានប្រទេសចិន កាលពីម្សិលមិញ (19 តុលា) បានចេញបញ្ជាតាមចាប់ខ្លួន Zhu Xianjian ដែលជាកម្មករអណ្ដូងរ៉ែធ្យូងថ្ម អាយុ 39 ឆ្នាំ មកពីខេត្ត ហាំយ៉ុងខាងជើង នៃ ប្រទេសកូរ៉េខាងជើង។

ប្រកាសរបស់នគរបាលក្រុងជីលីន បានឱ្យដឹងថា Zhu មានកម្ពស់ 160 ស.ម និង ពាក់អាវអ្នកទោសនៅពេលរត់ចេញពីពន្ធនាគារកាលពីយប់ថ្ងៃទី 18 តុលា។ អ្នកដែលបានផ្ដល់ព័ត៌មាននាំទៅរកការចាប់ខ្លួន Zhu នឹងទទួលបានប្រាក់រង្វាន់ 100,000 យុន (ជាង 23,000 ដុល្លារអាម៉េរិក)។

កាលពីឆ្នាំ 2013 Zhu បានឆ្លងដែនខុសច្បាប់ ចូលទៅក្នុងតំបន់ស្វយ័តជនជាតិកូរ៉េយ៉ានបៀន/Yanbian (ភាសាចិន) ឬ យ៉ុនប៊ីយ៉ុន/Yeon Byeon (ភាសាកូរ៉េ) នៃទឹកដីចិន នៅតំបន់ទល់ដែនចិន-កូរ៉េខាងជើង។ ក្រោយពីបានចូលដល់ទឹកដីចិន Zhu ត្រូវបានគេកាត់ទោសឱ្យជាប់ពន្ធនាគារ 11 ឆ្នាំ និង 3 ខែ ដោយសារតែបានប្រព្រឹត្តបទល្មើសមួយចំនួន។

ក្នុងពេលជាប់ពន្ធនាគារ Zhu ទទួលបានការសម្រាលទោសពីរលើក ក្រោយពីមានការកែប្រែខ្លួន។ គិតត្រឹមអំឡុងពេលរត់ពីពន្ធនាគារ Zhu នៅសល់មិនដល់ពីរឆ្នាំទៀតប៉ុណ្ណោះ បានរួចខ្លួនដោយស្របច្បាប់។

សកម្មភាពដែលកាមេរ៉ាថតបាន បង្ហាញថា Zhu ឡើងទៅលើដំបូលឃ្លាំងនៅជាយពន្ធនាគារ រួចយកខ្សែពួរធ្វើឱ្យខូចរបងបន្លាលួសអគ្គិសនី ហើយតោងឆ្លងកាត់របង រត់គេចខ្លួនបានសម្រេច។

ករណីនេះទាក់ទាញចំណាប់អារម្មណ៍ច្រើនពីក្រុមអ្នកលេងបណ្ដាញសង្គមចិន។ អ្នកលេងម្នាក់សន្និដ្ឋានថា Zhu រត់ចេញពីពន្ធនាគារដោយជោគជ័យ ព្រោះតែក្រុមមន្ត្រីពន្ធនាគារមិនអាចចាកចេញទៅដេញចាប់អ្នកទោស ដោយសារបទបញ្ជាទាក់ទិននឹងបញ្ហាទប់ស្កាត់ COVID-19 នេះបើតាមប្រកាសពីពន្ធនាគារនៃខេត្តគួយចូវ (Guizhou) និងខេត្តក្វាងទុង (Guangdong)៕

October 20, 2021

«ឪពុកម្ដាយនឹងត្រូវទទួលពិន័យ បើសិនកូនរបស់ពួកគេប្រព្រឹត្តកំហុសឆ្គង»! សភាចិន នឹងធ្វើការអនុម័តលើសេចក្ដីព្រាងច្បាប់ថ្មីនេះ

សភានៃប្រទេសចិន នឹងធ្វើការពិនិត្យ អនុម័តលើសេចក្ដីព្រាងច្បាប់មួយដែលចែងថា បើសិនជាក្មេងម្នាក់បង្កហេតុធ្ងន់ធ្ងរ ឬប្រព្រឹត្តបទល្មើស នោះអាណាព្យាបាលរបស់ពួកគេនឹងត្រូវទទួលពិន័យ។

សារព័ត៌មាន Reuters បានរាយការណ៍ថា នៅក្នុងសេចក្ដីព្រាងច្បាប់របស់ ប្រទេសចិន ស្ដីពីការជំរុញការអប់រំគ្រួសារនេះ អាណាព្យាបាលដែលនឹងត្រូវបានស្ដីបន្ទោស ក៏នឹងត្រូវឱ្យអនុវត្តកម្មវិធីណែនាំ អប់រំនៅក្នុងផ្ទះ បើសិនរដ្ឋអាជ្ញារកឃើញថា ក្មេងដែលស្ថិតក្រោមអាណាព្យាបាលរបស់ពួកគេ បានប្រព្រឹត្តអំពីខុសឆ្គង ឬល្មើសច្បាប់។

លោក Zang Tiewei អ្នកនាំពាក្យរបស់គណៈកម្មការទទួលបន្ទុកលើបញ្ហាបង្កើតច្បាប់របស់សភា បានបកស្រាយថា៖ «មានកត្តាជាច្រើនបណ្ដាលឱ្យក្មេងជំទង់មានឥរិយាបថខុសឆ្គង ក្នុងនោះ កង្វះការអប់រំនៅក្នុងគ្រួសារ ឬការអប់រំមិនសមស្របគឺជាមូលហេតុចម្បង»។

សេចក្ដីព្រាងច្បាប់នេះក៏អំពាវនាវដល់ស្រទាប់ឪពុកម្ដាយ និងអាណាព្យាបាល រៀបចំពេលវេលាដើម្បីឱ្យកូនៗរបស់ពួកគេបានសម្រាក សប្បាយរីករាយ និងហាត់ប្រាណផងដែរ។ គណៈកម្មការខាងលើនឹងពិនិត្យលើបញ្ហានេះនៅក្នុងកិច្ចប្រជុំនាសប្ដាហ៍នេះ។

ក្នុងឆ្នាំ 2021 រដ្ឋាភិបាលប្រទេសចិន បានដាក់ចេញវិធានការតឹងរ៉ឹងជាច្រើនទាក់ទិននឹងក្មេងជំទង់ និងយុវវ័យ តាំងពីការកំណត់ពេលវេលានៃការលេងហ្គេមអនឡាញ ការហាមបង្រៀនក្រៅម៉ោងរដ្ឋ រហូតដល់ការរឹតបន្តឹងលើនិន្នាការគាំទ្រតារាសំណព្វ (idol) របស់យុវវ័យផងដែរ៕

October 19, 2021

កុមារអាយុពី 5 ឆ្នាំ ដល់ 11 ឆ្នាំ ចាប់ផ្ដើមទទួលការចាក់វ៉ាក់សាំងបង្ការ COVID-19 នៅ អេក្វាទ័រ

កាលពីថ្ងៃទី 18 តុលា អនុប្រធានាធិបតីនៃ ប្រទេសអេក្វាទ័រ លោក Alfredo Borrero ប្រកាសចាប់ផ្ដើមជាផ្លូវការនូវយុទ្ធនាការចាក់វ៉ាក់សាំងបង្ការ COVID-19 ដល់កុមារដែលមានអាយុចាប់ពី 5 ឆ្នាំ ដល់ 11 ឆ្នាំ ក្នុងគ្រាដែលស្ថានភាពជំងឺរាតត្បាតនេះនៅតែមានភាពស្មុគស្មាញ។

ក្នុងពិធីបើកយុទ្ធនាការចាក់វ៉ាក់សាំង លោក Borrero អះអាងថា នឹងសម្រេចជាស្ថាពរនូវយុទ្ធនាការបង្កើតភាពស៊ាំក្នុងសហគមន៍ និងជំរុញសង្គមឱ្យត្រលប់មករកសភាពដើមវិញ ទៅតាមជំហាន។ ទន្ទឹមនឹងនេះ ការចាក់វ៉ាក់សាំងដល់កុមារនឹងជួយឱ្យពួកគេត្រលប់ចូលសាលារៀនវិញប្រកបដោយសុវត្ថិភាព។

យោងតាមក្រុមមន្ត្រីសុខាភិបាល ក្រុមកុមារដែលមានអាយុ 5 ឆ្នាំ នឹងទទួលបានការចាក់វ៉ាក់សាំង Pfizer របស់ សហរដ្ឋអាម៉េរិក ក្នុងលក្ខខណ្ឌ «បានចាក់វ៉ាក់សាំងការពារជំងឺដទៃរួចរាល់»។ ចំណែកកុមារដែលមានអាយុចាប់ពី 6 ឆ្នាំ ដល់ 11 ឆ្នាំ នឹងត្រូវចាក់វ៉ាក់សាំងចិន Sinovac។

នៅ ប្រទេសអេក្វាទ័រ កុមារដែលមានអាយុចាប់ពី 5 ដល់ 11 ឆ្នាំ មានចំនួន 13% ធៀបនឹងចំនួនប្រជាជនសរុប 17.7 លាននាក់។ មកដល់បច្ចុប្បន្ន ពលរដ្ឋប្រហែល 10 លាននាក់របស់ប្រទេសនៅ ទ្វីបអាម៉េរិកខាងត្បូងមួយនេះ បានទទួលការចាក់វ៉ាក់សាំង COVID-19 រួចរាល់។ អាក្វាទ័រ គឺជាប្រទេសមួយក្នុងចំណោមប្រទេសដែលមានអ្នកស្លាប់ដោយសារ COVID-19 ច្រើនជាងគេនៅតំបន់ អាម៉េរិកឡាទីន។ ប្រទេសប្រេស៊ីល ប៉េរូ, កូឡុំប៊ី អាហ្សង់ទីន និង ស៊ីលី ក៏សុទ្ធតែជាប្រទេសដែលមានអត្រានៃការស្លាប់ដោយសារ COVID-19 ខ្ពស់ជាងគេនៅតំបន់ខាងលើ៕

October 19, 2021

លក់កូនស្រីដើម្បីដោះបំណុល ដោយសារតែសេដ្ឋកិច្ចដាំក្បាលចុះ

(អាហ្វហ្គានីស្ថាន)-ប្ដីប្រពន្ធមួយគូនៅទីក្រុង Herat ត្រូវប្រគល់កូនស្រីអាយុ 3 ឆ្នាំ ទៅឱ្យម្ចាស់បំណុល នៅក្នុងស្ថានភាពគ្រោះទុរភិក្សកំពុងគ្របដណ្ដប់ទឹកដី អាហ្វហ្គានីស្ថាន ចាប់តាំងពី តាលីបង់ បានឡើងក្ដាប់អំណាច។

ដើម្បីដោះស្រាយជីវភាពគ្រួសារ Saleha ដែលជាស្ត្រីវ័យ 40 ឆ្នាំ មានការងារជាអ្នកបោសសម្អាតផ្ទះនៅទីក្រុង Herat ស្ថិតក្នុងភាគខាងលិចនៃ ប្រទេសអាហ្វហ្គានីស្ថាន ក៏បានខ្ចីប្រាក់ពីម្ចាស់ផ្ទះ។ ស្ត្រីដែលមានកូន 6 នាក់នេះ រកប្រាក់បានប្រហែល 70 សេនប៉ុណ្ណោះក្នុងមួយថ្ងៃ ខណៈដែលប្ដីរបស់នាងមិនមានការងារធ្វើ។

នៅពេលខ្ទង់បំណុលបានកើនដល់ 550 ដុល្លារអាម៉េរិក គ្រួសាររបស់ Saleha អស់លទ្ធភាពនឹងសងបំណុល ហើយមានតែវិធីតែមួយគត់ដែលអាចដោះស្រាយបញ្ហាហិរញ្ញវត្ថុ នោះគឺ «លក់កូនស្រីអាយុ 3 ឆ្នាំ ឈ្មោះ Najiba ឱ្យទៅម្ចាស់បំណុល»។

«បើសិនជាជីវភាពនៅតែបន្តអាក្រក់ដូច្នេះទៀត ខ្ញុំនឹងសម្លាប់កូន ហើយសម្លាប់ខ្លួនឯង។ ខ្ញុំមិនដឹងថា ល្ងាចនេះយើងនឹងមានអ្វីហូបនោះទេ» អ្នកស្រី Saleha ឱ្យដឹងដូច្នេះ។

ប្ដីរបស់អ្នកស្រីគឺលោក Abdul Wahab និយាយថា៖ «ខ្ញុំនឹងខំរកប្រាក់ដើម្បីជួយសង្គ្រោះកូនស្រី»។

ចំណែកម្ចាស់បំណុលឈ្មោះ Khalid Ahmad វិញ បានប្រាប់ថា ខ្លួនត្រូវបង្ខំចិត្តទទួលយកកុមារីអាយុ 3 ឆ្នាំនេះ ដើម្បីដោះស្រាយបំណុល។ ខ្ញុំក៏មិនមានប្រាក់។ ពួកគេមិនទាន់សងប្រាក់មកខ្ញុំ ទើបខ្ញុំមិនមានជម្រើសណាផ្សេងក្រៅតែពីការទទួលយកក្មេងតូចនេះ»។

កាលពីខែមុន កម្មវិធីអភិវឌ្ឍន៍របស់អង្គការសហប្រជាជាតិ (Unations Development Programme/UNDP) បានបញ្ជាក់ថា អាហ្វហ្គានីស្ថាន កំពុងឆ្ពោះទៅកាន់ «គ្រោះទុរភិក្សទូទាំងប្រទេស» បន្ទាប់ពី តាលីបង់ បានចូលគ្រប់គ្រងអំណាច។ ប្រធាន UNDP ប្រចាំតំបន់អាស៊ី-ប៉ាស៊ីហ្វិក លោកស្រី Kanni Wignaraja មានប្រសាសន៍ថា ក្នុងរយៈពេល 1 ឆ្នាំទៀត អត្រានៃភាពអត់ឃ្លាននៅ អាហ្វហ្គានីស្ថាន នឹងឡើងដល់ 97-98%។

តាលីបង់ បានក្ដាប់អំណាចនៅ អាហ្វហ្គានីស្ថាន កាលពីចុងខែសីហា ឆ្នាំ 2021 បន្ទាប់ពី សហរដ្ឋអាម៉េរិក ដកទ័ពចេញពីប្រទេសនេះ។ តាលីបង់ ក្រោយមកក៏បានប្ដូរឈ្មោះប្រទេសទៅជា អេមីរ៉ាតអ៊ីស្លាមនៃអាហ្វហ្កានីស្ថាន (Islamic Emirate of Afghanistan) ដែលឈ្មោះនេះធ្លាប់ត្រូវបានប្រើប្រាស់ក្នុងគ្រាក្រុមនេះកាន់កាប់អំណាចនៅ អាហ្វហ្គានីស្ថាន ចន្លោះពីឆ្នាំ 1996 ដល់ឆ្នាំ 2001។

ក្រោយពី សហរដ្ឋអាម៉េរិក បានធ្វើអន្តរាគមន៍យោធាកាលពីឆ្នាំ 2001 និងបង្កើតរដ្ឋាភិបាលដែលស្និទ្ធនឹងក្រុមប្រទេសលោកខាងលិច ក្នុងរយៈពេលម្ភៃឆ្នាំ អាហ្វហ្គានីស្ថាន បានស្គាល់ភាពរុងរឿងផ្នែកសេដ្ឋកិច្ច រួមទាំងបង្កើនប្រាក់ចំណូលបានទ្វេដង ហើយវិស័យអប់រំក៏រីកចម្រើនផងដែរ។

ប៉ុន្តែ បន្ទាប់ពី តាលីបង់ ត្រលប់មកកាន់អំណាចវិញ សេដ្ឋកិច្ចរបស់ អាហ្វហ្គានីស្ថាន ក៏ដាំក្បាលចុះ និងស្ថិតក្បែរមាត់ជ្រោះមរណៈ នៅពេលសាច់ប្រាក់ជិត 10 ពាន់លានដុល្លាររបស់ធនាគារជាតិនៃប្រទេសនេះ ត្រូវ សហរដ្ឋអាម៉េរិក បង្កក៕

October 19, 2021

Category: អន្តរជាតិ