អន្តរជាតិ - La Reine Media

(វីដេអូ)-ព្យុះព្រះអាទិត្យ ល្បឿន 4 លានគីឡូម៉ែត្រ/ម៉ោង នឹងវាយលុកពិភពផែនដីនៅចុងសប្ដាហ៍នេះ

ផ្កាយរណបរបស់ NASA ថតបានទិដ្ឋភាពព្យុះព្រះអាទិត្យកំពុងផ្ទុះកញ្ជ្រោលខ្លាំង ធ្វើឱ្យរស្មីអូរ៉ូរ៉ា (aurora) នៅលើផែនដី ប្រែជាបង្ហាញខ្លួនយ៉ាងច្បាស់នៅក្នុងថ្ងៃបុណ្យហាឡូវីន (Halloween)។

វីដេអូពីផ្កាយរណប Solar Dynamics Orbiter របស់ NASA បង្ហាញថា ការកញ្ជ្រោលនៃផ្ទៃខាងលើរបស់ព្រះអាទិត្យកើតឡើងពីថ្ងៃទី 25 ដល់ថ្ងៃទី 28 តុលា និងបញ្ចប់ដោយការផ្ទុះមួយដ៏ធំដែលអាចបង្កើនរស្មីអូរ៉ូរ៉ា នៅលើផែនដីចំថ្ងៃបុណ្យហាឡូវីន។

ព្យុះព្រះអាទិត្យកើតឡើងជាច្រើនបែប ក្នុងនោះមានការផ្ទុះភ្លើងព្រះអាទិត្យ (Solar flare) និងការផ្ទុះកាំរស្មីអូរ៉ូរ៉ា (CME/Coronal Mass Ejections)។ Solar flare គឺជាការផ្ទុះវិទ្យុសកម្មខ្លាំងក្លា បញ្ចេញរលកពន្លឺផូតុង (photon) សំដៅមកកាន់ផែនដី។ កម្លាំងរបស់ការផ្ទុះភ្លើងព្រះអាទិត្យមាន 3 កម្រិតគឺ C, M និង កម្រិត X ក្នុងនេះ X គឺជាកម្រិតខ្លាំងបំផុត។ CME រួមមាន ពពកប្លាស្មា និង ម៉ាញ៉េទិក ដែលបាញ់ចេញពីផ្ទៃខាងលើរបស់ព្រះអាទិត្យ នាំមកជាមួយនូវភាគល្អិតជាច្រើន។ ការផ្ទុះភ្លើងព្រះអាទិត្យ និង ការផ្ទុះកាំរស្មីអូរ៉ូរ៉ា មានប្រភពតែមួយ ដោយកើតឡើងពីការរអាក់រអួលនៃម៉ាញ៉េទិក (disruption of the magnetic) នៅក្នុងតំបន់បរិយាកាសខាងក្រៅរបស់ព្រះអាទិត្យ។

NASA ឱ្យដឹងថា ថ្វីបើការផ្ទុះភ្លើងព្រះអាទិត្យដែលមានផ្ទុកវិទ្យុសកម្មគ្រោះថ្នាក់នេះមិនអាចឆ្លងកាត់បរិយាកាសផែនដីបាន តែវាខ្លាំងគ្រប់គ្រាន់ដែលអាចបង្កការរំខានដល់បណ្ដាញទាក់ទង និង GPS។

ការផ្ទុះភ្លើងព្រះអាទិត្យកាលពីថ្ងៃទី 28 តុលា និងអមដោយ CME បានបញ្ចេញភាគល្អិតដែលផ្ទុកអគ្គិសនី ធ្វើដំណើរក្នុងល្បឿន 4 លានគីឡូម៉ែត្រ/ម៉ោង។ ភាគល្អិតទាំងនេះនឹងមកដល់ពិភពផែនដីនៅចុងសប្ដាហ៍ ហើយអាចធ្វើឱ្យបាតុភូតរស្មីអូរ៉ូរ៉ា កាន់តែខ្លាំងក្លាជាងមុន។

បាតុភូតអូរ៉ូរ៉ា នៅលើផែនដី កើតឡើងនៅពេលភាគល្អិតផ្ទុកអគ្គិសនីពីព្រះអាទិត្យ ប៉ះជាមួយនឹងបរិយាកាសខាងលើរបស់ផែនដី បង្កើតបានជារលកពន្លឺយ៉ាងរស់រវើក។ ដែនម៉ាញ៉េទិករបស់ផែនដី នាំភាគល្អិតផ្ទុកអគ្គិសនី ទៅកាន់តំបន់ប៉ូល ទើបរស្មីអូរ៉ូរ៉ា តែងតែបង្ហាញខ្លួននៅភាគខាងជើង៕

November 1, 2021

Elon Musk ថា បរិច្ចាគប្រាក់ 6 ពាន់លានដុល្លារដើម្បីដោះស្រាយគ្រោះទុរភិក្សក៏បាន តែអង្គការស្បៀងអាហារពិភពលោក ត្រូវធ្វើរឿងម្យ៉ាង

ទាក់ទងនឹងបញ្ហាខ្វះថវិកាទិញស្បៀងអាហារជួយដល់ប្រជាជនកំពុងជួបគ្រោះអត់ឃ្លា មហាសេដ្ឋីជនជាតិអាម៉េរិក ដើម្បីកំណើតអាហ្វ្រិកខាងត្បូង និយាយថា «បរិច្ចាគ 6 ពាន់លានដុល្លារដើម្បីសង្គ្រោះពិភពលោកក៏បាន» ប៉ុន្តែ លោក Elon Musk ចង់ឱ្យប្រធានស្ថាប័នមួយរបស់អង្គការសហប្រជាជាតិ «បង្ហាញតម្លៃភាពថវិកា» ឱ្យបានច្បាស់លាស់។

លោក Elon Musk ទើបតែបានលើកឡើងនូវប្រតិកម្មចំពោះមតិរបស់ប្រធានអង្គការមួយរូបរបស់អង្គការសហប្រជាជាតិ ដែលនិយាយថា គ្រាន់តែមួយចំណែកដ៏តូចនៃទ្រព្យសម្បត្តិរបស់ក្រុមអ្នកមានបំផុតក្នុងពិភពលោកក៏អាចដោះស្រាយបាននូវគ្រោះទុរភិក្សនៅលើសកលលោក។

មហាសេដ្ឋី Elon Musk បានប្រតិកម្មទៅនឹងមតិមួយរបស់លោក David Beasley ប្រធានកម្មវិធីស្បៀងអាហារពិភពលោករបស់អង្គការសហប្រជាជាតិ តាមរយៈការបង្ហោះសារមួយឃ្លានៅលើបណ្ដាញសង្គម Twitter។

មុននោះ លោក David Beasley ថ្លែងថា៖ «ត្រូវការ 6 ពាន់លានដុល្លារ ដើម្បីសង្គ្រោះមនុស្ស 42 លាននាក់ដែលជិតនឹងអត់បាយស្លាប់។ ប្រការនេះពិតជាពិបាក។ ក្រុមមហាសេដ្ឋី គួរតែធ្វើភ្លាមនៅពេលនេះ»។ ក្រុមមហាសេដ្ឋីដែលលោក Beasley កំពុងនិយាយដល់នៅទីនេះគឺ Elon Musk និង Jeff Bezos ជាដើម ដែលជាអ្នកមានជាងគេក្នុងពិភពលោក។

CEO របស់ក្រុមហ៊ុន Tesla លោក Elon Musk មានទ្រព្យជិត 289 ពាន់លានដុល្លារ នេះបើតាមស្ថិតិរបស់សារព័ត៌មាន Bloomberg។ ប្រការនេះមានន័យថា លោក Beasley កំពុងតែលើកឡើងនូវគំនិតមួយដែលថា លោក Elon Musk គ្រាន់តែបរិច្ចាគប្រហែល 2% នៃទ្រព្យសរុបរបស់ខ្លួនគឺអាចជួយឱ្យមនុស្ស 42 លាននាក់នៅទូទាំងសកលលោក រួចផុតពីគ្រោះទុរភិក្ស។

ឆ្លើយតបនឹងបញ្ហាខាងលើ កំពូលអ្នកមាន Elon Musk និយាយថា បើសិនជាកម្មវិធីស្បៀងអាហារពិភពលោក អាចបង្ហាញតម្លៃភាពថវិកា និងអនុញ្ញាតឱ្យគ្រប់គ្នាបានដឹងអំពីខ្ទង់ថវិកានោះត្រូវបានចំណាយដោយរបៀបណា ហើយ «អាចអធិប្បាយនៅខាងក្រោមសារ Twitter នេះ នូវវិធីជាក់លាក់ដែលថា 6 ពាន់លានដុល្លារ អាចដោះស្រាយគ្រោះទុរភិក្ស ខ្ញុំនឹងលក់ភាគហ៊ុននៅក្រុមហ៊ុន Tesla ភ្លាម ដើម្បីបរិច្ចាគ»។

បច្ចុប្បន្ន សារខាងលើរបស់លោក Elon Musk ទទួលបានការចែករំលែកតៗគ្នាជាង 3 ម៉ឺនលើក និងការចុចចូលចិត្តជាង 2 សែនលើក រួមនឹងការបញ្ចេញមតិជាច្រើនទៀត។

ក្រៅពីការបញ្ចេញមតិផ្ទុយ និងស្រប ការចុចចូលចិត្ត និងការចែករំលែកតគ្នារបស់អ្នកលេងបណ្ដាញសង្គម គេក៏ឃើញគណនី Twitter របស់លោក David Beasley ចូលមកបកស្រាយ៖ «ខ្ញុំអាចធានាបានថា ប្រព័ន្ធគណនីរបស់យើងពិតជាមានតម្លាភាព និងជាសាធារណៈទាំងស្រុង។ ភាគីខាងលោក អាចធ្វើការជាមួយកម្មវិធីស្បៀងអាហារពិភពលោក ដើម្បីធានាចំពោះបញ្ហានេះ»។

ប៉ុន្តែ នៅខាងក្រោមការបកស្រាយរបស់លោក David Beasley មានគណនីមួយដែលមានឈ្មោះថា @CG បានបញ្ចេញមតិថា៖ «ខ្ញុំជឿជាក់ថា គាត់នេះមិនមែនរស់នៅក្នុងផ្ទះដ៏តូចដែលមានតម្លៃតែ 35,000 ដុល្លារ ដូច Elon Musk នោះទេ»៕

November 1, 2021

អាម៉រិក ពន្យារពេលអនុម័តលើវ៉ាក់សាំងបង្ការ COVID-19 របស់ក្រុមហ៊ុន Moderna សម្រាប់កុមារ

ក្រុមហ៊ុន Moderna បានឱ្យដឹងថា អាជ្ញាធរ សហរដ្ឋអាម៉េរិក ពន្យារពេលការអនុម័តឱ្យប្រើប្រាស់វ៉ាក់សាំងបង្ការ COVID-19 របស់ក្រុមហ៊ុននេះ ដើម្បីមានពេលវេលាគ្រប់គ្រាន់សម្រាប់វាយតម្លៃបន្ថែម។

ការិយាល័យគ្រប់គ្រងអាហារ និងឱសថ (FDA) របស់ សហរដ្ឋអាម៉េរិកកាលពីថ្ងៃទី 29 វិច្ឆិកា បាន «ប្រកាសឱ្យ Moderna ដឹងថា ពួកគេត្រូវការពេលវេលាបន្ថែមទៀតដើម្បីវាយតម្លៃលើការវិភាគលក្ខណៈអន្តរជាតិនានាស្ដីពីហានិភ័យនៃបញ្ហារលាកសាច់ដុំបេះដូងបន្ទាប់ពីបានចាក់វ៉ាក់សាំង»។ នេះបើតាមក្រុមហ៊ុនផលិតឱសថ Moderna បានឱ្យដឹងនៅក្នុងប្រកាសកាលពីថ្ងៃទី 31 តុលា។

Moderna ឱ្យដឹងថា ដំណើរការនៃការវាយតម្លៃរបស់ FDA ស្ដីពីការដែលថា គួរតែលើកទឹកចិត្តឱ្យចាក់វ៉ាក់សាំងរបស់ក្រុមហ៊ុននេះ ដល់ក្មេងដែលមានវ័យចាប់ពី 12 ឆ្នាំ ដល់ 17 ឆ្នាំដែរ ឬអត់ នោះអាចអូសបន្លាយពេលដល់ខែមករា ឆ្នាំ 2022។

បញ្ហារលាកសាច់ដុំបេះដូង និងរលាកស្រោមបេះដូងខាងក្រៅគឺជារោគសញ្ញាដ៏កម្រ ទាក់ទងនឹងវ៉ាក់សាំងបង្ការ COVID-19 របស់ Pfizer និង Moderna ដែលកើតឡើងនៅលើក្មេងប្រុស និងបុរសវ័យក្មេង។

ក៏ប៉ុន្តែ មជ្ឈមណ្ឌលគ្រប់គ្រង និងទប់ស្កាត់ជំងឺឆ្លង (CDC) របស់ សហរដ្ឋអាម៉េរិក បានឱ្យដឹងថា ហានិភ័យនៃការកើតអាការខាងលើគឺខ្ពស់ជាងធម្មតា បន្ទាប់ពីឆ្លង COVID-19។ CDC អាម៉េរិក បញ្ជាក់ថា «បញ្ហារលាកសាច់ដុំបេះដូងបន្ទាប់ពីបានចាក់វ៉ាក់សាំងដែលប្រើបច្ចេកវិទ្យា mRNA គឺកម្រកើតមាន ហើយវាមានលក្ខណៈស្រាល»។

សហរដ្ឋអាម៉េរិក កាលពីថ្ងៃទី 29 ខែតុលា បានអនុញ្ញាតឱ្យប្រើប្រាស់វ៉ាក់សាំងបង្ការ COVID-19 របស់ Pfizer-BioNTech សម្រាប់ចាក់ឱ្យកុមារអាយុចាប់ពី 5 ឆ្នាំ ដល់ 11 ឆ្នាំ ដោយបរិមាណទាបជាង ធៀបនឹងការចាក់ឱ្យមនុស្សពេញវ័យ។ មុននោះ Moderna ក៏បានដាក់ពាក្យទៅកាន់ FDA ដើម្បីសុំច្បាប់ចាក់វ៉ាក់សាំងដល់ក្មេងអាយុក្រោម 18 ឆ្នាំផងដែរ៕

November 1, 2021

ផ្កាយដុះកន្ទុយធំបំផុតដែលមនុស្សធ្លាប់រកឃើញ កំពុងសំដៅមកកាន់ផែនដី (វីដេអូ)

ផ្កាយដុះកន្ទុយមួយដែលអាចមានទំហំធំជាងគេ ដែលមនុស្សធ្លាប់បានរកឃើញ និងមានប្រភពពីពពក Oort កំពុងតែហោះសំដៅមកកាន់ភពផែនដី។

ជាមួយនឹងអង្កត់ផ្ចិតប្រវែងពី 100-200 ម៉ែត្រ ផ្កាយដុះកន្ទុយ Bernardinelli-Bernstein (C/2014UN271) នឹងហោះមកក្បែរព្រះអាទិត្យបំផុតក្នុងឆ្នាំ 2031។ គម្លាតជិតបំផុតរវាងផ្កាយដុះកន្ទុយនេះ និងផែនដី ប្រហាក់ប្រហែលនឹងរយៈចម្ងាយពីផែនដីទៅកាន់ភពសៅរ៍។ ក្រុមអ្នកវិទ្យាសាស្ត្រឱ្យដឹងថា ផ្កាយដុះកន្ទុយនេះ អាចជាវត្ថុអវកាសធំបំផុតដែលមនុស្សធ្លាប់បានឃើញនៅក្នុងពពក Oort។

ផ្កាយដុះកន្ទុយ Bernardinelli-Bernstein (C/2014UN271) ត្រូវបានរកឃើញដោយអ្នកវិទ្យាសាស្ត្រ Perdro Bernardinelli និង Gary Bernstein មកពីសាកលវិទ្យាល័យ Pennsylvania សហរដ្ឋអាម៉េរិក កាលពីដើមឆ្នាំនេះ។ ពួកគេបានរកឃើញទិន្នន័យរបស់វត្ថុអវកាសនេះដែលប្រមូលបានចាប់ពីឆ្នាំ 2014 ដល់ 2018 ប៉ុន្តែ ពុំឃើញកន្ទុយរបស់វា ដូច្នេះ ដំបូងឡើយ វាត្រូវបានគេច្រលំថាជាកូនភព។

ប៉ុន្តែ ក្នុងរយៈពេលមួយថ្ងៃ បន្ទាប់ពីបានប្រកាសថាបានរកឃើញ ក្រុមអ្នកតារាសាស្ត្របានប្រើប្រាស់ស្ថានីយសង្កេត Las Cumbres ដើម្បីថតរូបថ្មី និងបានរកឃើញថា កន្ទុយរបស់វាកើតឡើងកាលពី 3 ឆ្នាំមុន ហើយកំពុងហោះសំដៅយ៉ាងលឿនចេញពីពពក Oort។ ក្រោយមក ក្រុមតារាវិទូក៏បានចាត់វាចូលក្នុងក្រុមផ្កាយដុះកន្ទុយជាផ្លូវការ។

ក្រោយការស្រាវជ្រាវលម្អិត ក្រុមរបស់ Bernardinelli និង Bernstein រកឃើញថា ផ្កាយដុះកន្ទុយនេះធ្លាប់បានគោចរមកក្បែរព្រះអាទិត្យកាលពី 3.5 លានឆ្នាំមុន ជាមួយនឹងគន្លាតប្រហែល 18 au (ខ្នាតតារាសាស្ត្រ/Astronomical Unit គឺជាចម្ងាយមធ្យមចន្លោះពីផែនដី ទៅព្រះអាទិត្យ ពោលគឺប្រហែល 150 លានគីឡូម៉ែត្រ)។

បច្ចុប្បន្ន ផ្កាយដុះកន្ទុយនេះកំពុងស្ថិតនៅចម្ងាយ 3 ពាន់លានគីឡូម៉ែត្រ ពី ព្រះអាទិត្យ។ បើទោះជា C/2014UN271 មានទំហំធំ ហើយសូម្បីតែវាស្ថិតនៅជិតព្រះអាទិត្យបំផុតក្រោយ 10 ឆ្នាំទៀត ក្រុមតារាវិទូឱ្យដឹងថា មនុស្សនៅតែមិនអាចមើលឃើញវាដោយភ្នែកទទេបានដែរ៕

October 31, 2021

សូមប្រយ័ត្ន! អ្នកបានចាក់វ៉ាក់សាំងរួចហើយ នៅតែអាចចម្លង Delta ដល់សមាជិកទាំងឡាយក្នុងគ្រួសារ

(អង់គ្លេស)-លទ្ធផលនៃការស្រាវជ្រាវរបស់សាកលវិទ្យាល័យនៃចក្រភព អង់គ្លេស Imperial College London បានបង្ហាញថា អ្នកបានទទួលការចាក់វ៉ាក់សាំង COVID-19 ដែលឆ្លង Delta នៅតែអាចចម្លងវីរុសនេះដល់សមាជិកគ្រួសារ។

«យើងបានរកឃើញថា អ្នកដែលបានចាក់វ៉ាក់សាំងរួចហើយ នៅតែអាចឆ្លង និងចម្លងវីរុសក្នុងគ្រួសារ ឆ្លងទៅកាន់សមាជិកដែលបានចាក់វ៉ាក់សាំងរួចហើយថែមទៀតផង» វេជ្ជបណ្ឌិត Anika Singanayagam ដែលជាអ្នកគ្រប់គ្រងមួយរូបនៅក្នុងគម្រោងស្រាវជ្រាវរបស់សាកលវិទ្យាល័យ Imperial College London បានឱ្យដឹងកាលពីថ្ងៃទី 28 តុលា។

ការស្រាវជ្រាវនេះត្រូវបានធ្វើឡើងលើមនុស្សចំនួន 621 នាក់។ ក្នុងចំណោម 205 នាក់ ដែលប៉ះពាល់ផ្ទាល់ជាមួយនឹងអ្នកផ្ទុក Delta មាន 38% គឺជាអ្នកដែលបានចាក់វ៉ាក់សាំង COVID-19 រួចហើយ ខណៈ 25% មិនទាន់ចាក់វ៉ាក់សាំង។

ក្រុមមនុស្សដែលបានចាក់វ៉ាក់សាំង មានលទ្ធផលអវិជ្ជមានទៅវិញឆាប់រហ័សជាង ធៀបនឹងក្រុមដែលមិនទាន់ចាក់វ៉ាក់សាំង ប៉ុន្តែ កំហាប់វីរុសក្នុងដំណាក់កាលខ្ពស់បំផុត នៅតែប្រហាក់ប្រហែលនឹងអ្នកមិនទាន់បានចាក់វ៉ាក់សាំង។

ចំពោះសមាជិកគ្រួសារដែលបានចាក់វ៉ាក់សាំងរួចហើយតែនៅតែវិជ្ជមាននឹង COVID-19 ភាគច្រើនពួកគេបានចាក់វ៉ាក់សាំងមុនក្រុមមនុស្សដែលបានចាក់វ៉ាក់សាំងក្រោយ និងអវិជ្ជមាន។ ក្រុមអ្នកវិទ្យាសាស្ត្រឱ្យដឹងថា នេះគឺជាភ័ស្ដុតាងបង្ហាញថា សមត្ថភាពរបស់ប្រព័ន្ធភាពស៊ាំត្រូវថយចុះទៅតាមពេលវេលា និងបានគាំទ្រឱ្យមានការចាក់ដូសបន្ថែម។

អ្នកវិទ្យាសាស្ត្រសង្កត់ធ្ងន់ថា លទ្ធផលនៃការស្រាវជ្រាវនេះមិនធ្វើឱ្យមានការប្ដូរផ្លាស់ចំពោះការយល់ឃើញដែលថា ការចាក់វ៉ាក់សាំងគឺជាវិធីសាស្ត្រល្អបំផុតដើម្បីកាត់បន្ថយហានិភ័យនៃការកើតអាការធ្ងន់ធ្ងរនៅពេលបានឆ្លងវីរុស COVID-19 នោះទេ៕

October 30, 2021

អាម៉េរិក អនុញាតឱ្យចាក់វ៉ាក់សាំង Pfizer ដល់ក្មេងពីអាយុ 5 ឆ្នាំ ដល់ 11 ឆ្នាំ

សហរដ្ឋអាម៉េរិក បានអនុម័តឱ្យប្រើប្រាស់វ៉ាក់សាំងបង្ការ COVID-19 របស់ Pfizer សម្រាប់ចាក់ដល់ក្មេងដែលមានអាយុពី 5 ឆ្នាំ ដល់ 11 ឆ្នាំ បន្ទាប់ពីក្រុមអ្នកជំនាញអះអាងថា ផលប្រយោជន៍មានច្រើនលើសលុប ធៀបនឹងហានិភ័យ។

ការសម្រេចខាងលើដែលត្រូវបានធ្វើឡើងកាលពីថ្ងៃទី 29 តុលា បានបើកផ្លូវឱ្យមានយុទ្ធនាការចាក់វ៉ាក់សាំងបង្ការ COVID-19 ដល់ក្មេងចំនួន 28 លាននាក់នៅប្រទេសនេះ។ ក្រៅពី សហរដ្ឋអាម៉េរិក កន្លងមកក៏មានប្រទេសជាច្រើនបានអនុញ្ញាតឱ្យចាក់វ៉ាក់សាំងដល់កុមារដែលមានអាយុប្រហាក់ប្រហែលនេះដែរ មានដូចជា កម្ពុជា ស៊ីលី គុយបា ចិន និង អេមីរ៉ាតអារ៉ាប់រួម។

ក្រុមហ៊ុនឱសថ Pfizer និងដៃគូសហការ BioNTech សប្ដាហ៍នេះបានប្រកាសថា រដ្ឋាភិបាលអាម៉េរិក បានទិញវ៉ាក់សាំង Comirnaty ចំនួន 50 លានដូសពីក្រុមហ៊ុននេះ សម្រាប់ចាក់ឱ្យក្មេងៗ ក្នុងនោះរួមទាំងកុមារអាយុក្រោម 5 ឆ្នាំផងដែរ។

ក្រុមអ្នកជំនាញកំពុងសិក្សាអំពីសុវត្ថិភាពរបស់វ៉ាក់សាំង Pfizer នៅលើក្មេងចំនួន 3,000 នាក់ ប៉ុន្តែ មិនបានរកឃើញផលប៉ះពាល់ធ្ងន់ធ្ងរណាមួយនោះទេ។ កុមារអាយុចាប់ពី 5 ឆ្នាំ ដល់ 11 ឆ្នាំ នឹងត្រូវបានចាក់វ៉ាក់សាំង Pfizer ចំនួន 2 ដូស ដែលមានគម្លាតពីគ្នា 3 សប្ដាហ៍ ដោយបរិមាណ 10 microgram ដែលស្មើនឹង 1/3 ធៀបនឹងបរិមាណវ៉ាក់សាំងដែលចាក់ឱ្យក្រុមមនុស្សដែលមានអាយុច្រើនជាងនេះ៕

October 30, 2021

អាម៉េរិក ផ្ដល់ជម្រើសភេទទីបីដំបូងបង្អស់ នៅលើអត្តសញ្ញាណប័ណ្ណថ្មី

សហរដ្ឋអាម៉េរិក ផ្ដល់អត្តសញ្ញាណប័ណ្ណដំបូងដែលមានជម្រើសភេទ X ជារបត់ថ្មីមួយនៅក្នុងការទទួលស្គាល់សិទ្ធិរបស់ពលរដ្ឋដែលមិនបានកំណត់ភេទជាស្រី ឬប្រុស។

«ក្នុងឱកាសនៃការផ្ដល់អត្តសញ្ញាណប័ណ្ណនេះ ខ្ញុំចង់រំលឹកឡើងវិញនូវការសន្យារបស់ក្រសួងការបរទេសអាម៉េរិក អំពីការលើកកម្ពស់សិទ្ធិ សេរភាព សេចក្ដីថ្លៃថ្នូរ និង សមភាពសម្រាប់មនុស្សគ្រប់រូប រួមទាំងសហគមន៍ LGBT (LGBT គឺជាគំនិតដំបូងដែលតំណាងឱ្យស្ត្រីស្រឡាញ់ភេទដូចគ្នា (lesbian), បុរសស្រលាញ់ភេទដូចគ្នា (gay), មនុស្សស្រលាញ់ភេទទាំងពីរ (bisexual) និងអ្នកកែភេទ(transgender)។ នេះបើតាម Ned Price ដែលជាអ្នកនាំពាក្យរបស់ក្រសួងការបរទេសសហរដ្ឋអាម៉េរិក។

ជម្រើស X ត្រូវបានរៀបចំឡើងសម្រាប់ពលរដ្ឋទាំងឡាយណាដែលមិនអាចកំណត់ភេទទៅតាមជម្រើស ប្រុស ឬស្រី។ Price ឱ្យដឹងថា នឹងផ្ដល់ជម្រើសនេះនៅលើអត្តសញ្ញាណប័ណ្ណ និងលិខិតបញ្ជាក់កំណើតរបស់ពលរដ្ឋអាម៉េរិក នៅក្រៅប្រទេស ចាប់ពីដើមឆ្នាំ 2022។

ប្រកាសរបស់ក្រសួងខាងលើ ត្រូវបានធ្វើឡើងមួយថ្ងៃបន្ទាប់ពី «ទិវាយល់ដឹងពីភេទមិនប្រក្រតី» (Intersex Awareness Day) ដែលបានប្រារព្ធឡើងកាលពីថ្ងៃទី 26 ខែតុលា។

កន្លងមក ប្រធានាធិបតី Joe Biden ធ្លាប់បានសន្យាថា រាប់បញ្ចូលការគាំទ្រដល់សិទ្ធិសេរីភាពរបស់សហគមន៍ LGBTQ ទៅក្នុងអាទិភាពកំពូលរបស់រដ្ឋាភិបាល។

មកដល់បច្ចុប្បន្ន ប្រទេសយ៉ាងតិច 11 នៅលើពិភពលោក បានអនុញ្ញាតឱ្យជ្រើសរើសភេទទីបីនៅលើអត្តសញ្ញាណប័ណ្ណ ក្នុងនោះមានទាំង ប្រទេសកាណាដា, អាល្លឺម៉ង់, អាហ្សង់ទីន, ឥណ្ឌា, នេប៉ាល និង ប៉ាគិស្ថាន ផងដែរ នេះបើតាមបណ្ដាញនិយោជកសម្រាប់សមភាព និងសមាហរណកម្ម ដែលមានទីស្នាក់ការនៅ ទីក្រុងឡុងដ៍ ចក្រភពអង់គ្លេស៕

October 28, 2021

តៃវ៉ាន់ ជឿជាក់ថា សហរដ្ឋអាម៉េរិក នឹងជួយការពារកោះនេះ

មេដឹកនាំ កោះតៃវ៉ាន់ លោកស្រី Tsai Ing-wen មានជំនឿថា សហរដ្ឋអាម៉េរិក នឹងការពារកោះនេះ បើសិនជាមានការវាយប្រហារពី ចិនដីគោក នៅពេលដែលភាពតានតឹងកំពុងកើនឡើងខ្លាំងនៅច្រកសមុទ្រតៃវ៉ាន់។

«ខ្ញុំមានជំនឿងថា កងកម្លាំងរបស់ សហរដ្ឋអាម៉េរិក នឹងជួយការពារ តៃវ៉ាន់ នៅចំពោះមុខ ប្រទេសចិន បើសិនជាចាំបាច់» នេះបើតាមសម្ដីរបស់ លោកស្រី Tsai Ing-wen នៅក្នុងកិច្ចសម្ភាសជាមួយ CNN កាលពីថ្ងៃទី 27 តុលា។ ក្នុងកិច្ចសម្ភាសនេះ លោកស្រីក៏បានទទួលស្គាល់ជាលើកដំបូងថា កងទ័ពរបស់ សហរដ្ឋអាម៉េរិក កំពុងបណ្ដុះបណ្ដាលដល់កងកម្លាំងរបស់ កោះតៃវ៉ាន់ បន្ទាប់ពីមន្ត្រីម្នាក់របស់មន្ទីរបញ្ចកោណ បានបង្ហើបឱ្យដឹងព័ត៌មាននេះកាលពីដើមខែតុលា។

លោកស្រី Tsai Ing-wen ថ្លែងថា «យើងសហការយ៉ាងទូលំទូលាយជាមួយ សហរដ្ឋអាម៉េរិក ដើម្បីបង្កើនសមត្ថភាពការពារខ្លួន» រួមមានទាំងការដែល សហរដ្ឋអាម៉េរិក កំពុងបណ្ដុះបណ្ដាលមន្ត្រីយោធារបស់ តៃវ៉ាន់ ផងដែរ។

ប៉ុន្តែ មេដឹកនាំរបស់ តៃវ៉ាន់ រូបនេះ ក៏បានសង្កត់ធ្ងន់ថា លោកស្រីសង្ឃឹមថា ចិនដីគោក និង កោះតៃវ៉ាន់ អាច «រួមរស់ជាមួយគ្នានៅក្នុងសន្តិភាព» និងត្រៀមខ្លួនជានិច្ចក្នុងការជួបពិភាក្សាជាមួយប្រធានាធិបតីចិន លោក ស៊ី ជីនពីង ដើម្បី «កាត់បន្ថយការយល់ច្រលំ» ដោះស្រាយបញ្ហាខ្វែងគំនិតគ្នានៅក្នុងប្រព័ន្ធនយោបាយ។

ការអធិប្បាយរបស់លោកស្រី Tsai Ing-wen ត្រូវបានលើកឡើងនៅពេលប្រធានាធិបតីអាម៉េរិក លោក Joe Biden រិះគន់ចំពោះ ប្រទេសចិន ទាក់ទិននឹងសកម្មភាពយោធានៅក្បែរ កោះតៃវ៉ាន់ ក្នុងពេលលោកចូលរួមកិច្ចប្រជុំកំពូលអាស៊ីអាគ្នេយ៍ ដែលមានវត្តមានរបស់នាយករដ្ឋមន្ត្រីចិន លោក Li Keqiang ផងដែរ។

សហរដ្ឋអាម៉េរិក និង ចិនដីគោក កំពុង «ឈ្លោះប្រកែកគ្នា» ទាក់ទងនឹងការដែលថា គួរអនុញ្ញាតឱ្យ តៃវ៉ាន់ ចូលជាសមាជិកនៃអង្គការនានារបស់ អង្គការសហប្រជាជាតិ ឬអត់។ អាម៉េរិក យល់ថា តៃវ៉ាន់ គួរតែបានចូលរួម ដោយសារ «តម្លៃជាក់ស្ដែង» ខណៈដែល ចិនដីគោក ប្រកាសថា កោះតៃវ៉ាន់ មិនមានសិទ្ធិចូលរួមក្នុងអង្គការអន្តរជាតិណាមួយនោះទេ៕

October 28, 2021

2% នៃទ្រព្យសម្បត្តិរបស់ Elon Musk អាចដោះស្រាយគ្រោះទុរភិក្ស នៅទូទាំងសកលលោក

ប្រាក់ចំនួន 2% នៃទ្រព្យសម្បត្តិសរុបចំនួន 289 ពាន់លានដុល្លារ របស់មហាសេដ្ឋី Elon Musk ដែលជានាយកប្រតិបត្តិនៃក្រុមហ៊ុន Tesla និងក្រុមហ៊ុន SpaceX អាចជួយសង្គ្រោះមនុស្សចំនួន 42 លាននាក់ និងដោះស្រាយគ្រោះទុរភិក្សនៅទូទាំងពិភពលោក។

ក្រុមមហាសេដ្ឋីគួរតែ «ឧបត្ថម្ភនៅពេលនេះ និងតែម្ដងគត់» នាយកកម្មវិធីស្បៀងអាហារពិភពលោក (WFP) របស់អង្គការសហប្រជាជាតិ លោក David Beasley បានឆ្លើយក្នុងកិច្ចសម្ភាសរបស់កម្មវិធីដែលត្រូវបានផ្សាយកាលពីថ្ងៃទី 26 តុលា របស់ CNN ស្ដីពីកំពូលអ្នកមានជាងគេពីររូបគឺ លោក Jeff Bezos និងលោក Elon Musk។

«42 ពាន់លានដុល្លារ ដើម្បីជួយដល់ប្រជាជនចំនួន 42 លាននាក់ ដែលជាអ្នកនឹងត្រូវស្លាប់ បើសិនយើងមិនបានជួយពួកគេ។ រឿងនេះមិនស្មុគស្មាញឡើយ» លោក David Beasley និយាយដូច្នេះ។

យោងតាមសារព័ត៌មាន Bloomberg នាយកប្រតិបត្តិរបស់ក្រុមហ៊ុនផលិតរថយន្តអគ្គិសនី Tesla លោក Elon Musk មានទ្រព្យជិត 289 ពាន់លានដុល្លារ។ David Beasley បានស្នើសុំឱ្យមានការបរិច្ចាគ 2% នៃទ្រព្យរបស់មហាសេដ្ឋី Elon Musk។ តម្លៃទ្រព្យរបស់បណ្ដាមហាសេដ្ឋីនៅ សហរដ្ឋអាម៉េរិក បានកើនឡើងជិតទ្វេដង ចាប់ពីវីរុស COVID-19 បានបង្ហាញខ្លួនដំបូង ដោយកើនដល់ជាង 5 លានលាន (ទ្រីលាន) ដុល្លារ នៅក្នុងខែតុលា នេះបើតាមវិទ្យាស្ថានអាម៉េរិក សម្រាប់កិច្ចការស្រាវជ្រាវគោលនយោបាយ និងយុត្តធម៌ពន្ធដារ។

លោក Beasley យល់ថា ការដែលពិភពលោកត្រូវប្រឈមនឹងវិបត្តិច្រើនក្នុងពេលតែមួយ ដូចជាបញ្ហាបម្រែបម្រួលអាកាសធាតុ និងរោគរាតត្បាត COVID-19 គឺមានន័យថា ប្រទេសជាច្រើនកំពុងដើរជិតដល់ «គ្រោះទុរភិក្ស»។

យោងតាមរបាយការណ៍របស់ WFP ដែលបានប្រកាសកាលពីថ្ងៃទី 25 តុលា ប្រជាជនអាហ្វហ្គានីស្ថាន ចំនួនពាក់កណ្ដាល ដែលស្មើនឹង 22.8 លាននាក់ កំពុងប្រឈមនឹងវិបត្តិទុរភិក្ស ក្នុងនោះមានកុមារជាង 3.2 លាននាក់ផងដែរ។

នៅប្រទេសអេត្យូពី អង្គការ WFP បានគណនាឃើញថា មនុស្ស 5.2 លាននាក់កំពុងត្រូវការជំនួយស្បៀងអាហារបន្ទាន់ នៅតំបន់ Tigray ជាទីដែលនាយករដ្ឋមន្ត្រី Abiy Ahmed បញ្ជាឱ្យវាយប្រហារទ្រង់ទ្រាយធំប្រឆាំងនឹងរណសិរ្យរំដោះប្រជាជន Tigray (TPLF) កាលពីឆ្នាំទៅ។ ជនស៊ីវិលរាប់ពាន់នាក់បានស្លាប់ និងជាង 2 លាននាក់ត្រូវរត់ចោលស្រុក។

បណ្ដាអង្គការមនុស្សធម៌ដូចជា WFP ជាដើម ត្រូវប្រឹងប្រែងធ្វើការដោយត្រដរដើម្បីមានប្រភពផ្គត់ផ្គង់សម្រាប់ពលរដ្ឋដែលកំពុងមានតម្រូវ ធ្វើឱ្យវិបត្តិកាន់តែធ្ងន់ធ្ងរឡើង។

«យើងមិនដឹងថា ពួកគេបានអ្វីដើម្បីបរិភោគនោះទេ» Beasley ថ្លែងនៅក្នុងកិច្ចសម្ភាសដូច្នេះ។ «យើងអស់ឥន្ធនៈ គ្មានប្រាក់ដើម្បីបើកប្រាក់ខែដល់បុគ្គលិក ហើយក៏មិនអាចបញ្ជូនរថយន្តដឹកទំនិញចូលតំបន់នោះ»៕

October 27, 2021

ជនជាតិអាស៊ី ដំបូងគេ ដែលធ្វើជាចៅក្រមតុលាការសហព័ន្ធ នៅ សហរដ្ឋអាម៉េរិក

Tana Lin ដែលជាពលរដ្ឋអាម៉េរិក ដើមកំណើតអាស៊ី ត្រូវបានសភាជាន់ខ្ពស់របស់ អាម៉េរិក អនុម័តឱ្យកាន់តំណែងជាចៅក្រមតុលាការសហព័ន្ធនៅ ទីក្រុង Seattle រដ្ឋវ៉ាស៊ីងតោន។

លោកស្រី Lin ដែលជាប្រធានក្រុមប្រឹក្សាសម្ព័ន្ធសេរីស៊ីវិលសហរដ្ឋអាម៉េរិក នៅក្នុងរដ្ឋ វ៉ាស៊ីងតោន នឹងក្លាយជាជនជាតិអាម៉េរិកដើមកំណើតអាស៊ី ដំបូងគេ ដែលក្លាយជាចៅក្រមតុលាការសហព័ន្ធនៅ វ៉ាស៊ីងតោន នេះបើតាម Patty Murray តំណាងរាស្ត្រនៅសភាជាន់ខ្ពស់របស់គណៈបក្សប្រជាធិបតេយ្យ។

«ជនជាតិអាម៉េរិកស័ក្ដិសមមានប្រព័ន្ធយុត្តិធម៌ការពារសិទ្ធិរបស់ពលរដ្ឋគ្រប់រូប។។ ការកសាងប្រព័ន្ធតុលាការដែលមានយុត្តិធម៌ជាង ចាប់ផ្ដើមដោយការតែងតាំងបណ្ដាមេធាវីសធារណៈ និងមេធាវីសិទ្ធិមនុស្ស ដូចជាលោកស្រី Lin ជាដើម ឱ្យធ្វើជាចៅក្រម» Murray ថ្លែងដូច្នេះ។

លោកស្រី Lin ត្រូវបានប្រធានាធិបតី Joe Biden ជ្រើសរើសជាបេក្ខភាពសម្រាប់តំណែងចៅក្រមតុលាការសហព័ន្ធ នៅក្នុងខណ្ឌវ៉ាស៊ីងតោនខាងលិច កាលពីខែមេសា។ រដ្ឋវ៉ាស៊ីងតោន មានតុលាការសហព័ន្ធចំនួនពីរ រួមមានតុលាការស្រុកខាងកើត (United States District Court for the Eastern District of Washington) និងតុលាការស្រុកខាងលិច (United States District Court for the Western District of Washington)។

លោកស្រី Lin អាយុ 55 ឆ្នាំ គឺជាមេធាវីសម្រាប់ពលករក្នុងករណីរើសអើងក្នុងការងារ ក្នុងនោះក៏មានពលករអន្តោប្រវេសន៍មកពីខាងក្រៅ នៅក្នុង រដ្ឋវ៉ាស៊ីងតោន។

សភាជាន់ខ្ពស់អាម៉េរិក ថ្មីៗនេះក៏បានយល់ព្រមឱ្យ Lauren King ដែលជាមេធាវីឯកទេសខាងការពារកុលសម្ព័ន្ធ ធ្វើជាចៅក្រមតុលាការសហព័ន្ធរដ្ឋវ៉ាស៊ីងតោន ហើយនេះក៏ជាជនជាតិដើមអាម៉េរិកដំបូង ដែលបានធ្វើជាចៅក្រមតុលាការសហព័ន្ធ។ David Estudillo អតីតមេធាវីអន្តោប្រវេសន៍ និងជាចៅក្រមតុលាការស្រុក Grant ត្រូវបានជ្រើសតាំងជាជាចៅក្រមតុលាការសហព័ន្ធ នៅ វ៉ាស៊ីងតោនខាងលិច។

លោកស្រី Lin បានចាប់ផ្ដើមការងារជាមេធាវីសធារណៈនៅក្នុង រដ្ឋធានីវ៉ាស៊ីងតោន មុនពេលក្លាយជាមេធាវីសាកល្បងការងារទទួលបន្ទុកការពារក្ដីទាក់ទងនឹងបញ្ហាការងារ ស្ថិតក្រោមឱវាទនៃអង្គភាពសិទ្ធិពលរដ្ឋរបស់ក្រសួងយុត្តិធម៌។

លោកស្រី Lin គឺជាជនជាតិចិនតៃវ៉ាន់ ដែលបានមករស់នៅលើទឹកដីសហរដ្ឋអាម៉េរិក តាំងពីរអាយុ 3 ឆ្នាំ។ មុនពេលបានទៅសិក្សា លោកស្រីចេះនិយាយតែភាសាចិនកុកងឺប៉ុណ្ណោះ។ លោកស្រី បានបញ្ចប់ការសិក្សានៅសាកលវិទ្យាល័យ Cornell និងមហាវិទ្យាល័យច្បាប់នៃសាកលវិទ្យាល័យនីវយ៉ក៕

October 27, 2021

Category: អន្តរជាតិ