អន្តរជាតិ - La Reine Media

កូនស្រីរបស់ Thaksin បង្ហាញខ្លួន! នេះជាសញ្ញាដំបូងនៃការវិលត្រលប់របស់ត្រកូល Shinawatra

ក្រោយការចាកចេញពីការក្ដោបក្ដាប់អំណាចនៅ ប្រទេសថៃ ត្រកូល Shinawatra ទំនងជាកំពុងចិញ្ចឹមចិត្តវិលត្រលប់មកវិញ ហើយសញ្ញាដំបូងនៃការវិលត្រលប់នេះ នោះគឺការបង្ហាញខ្លួនរបស់ Paetongtarn ដែលជាកូនស្រីរបស់អតីតនាយករដ្ឋមន្ត្រី Thaksin Shinawatra។

Paetongtarn Shinawatra កូនស្រីពៅរបស់អតីតនាយករដ្ឋមន្ត្រីថៃ Thaksin កាលពីថ្ងៃទី 28 តុលា បានបង្ហាញខ្លួននៅក្នុងសន្និសីទមួយរបស់បក្ស ភឿថៃ នៅក្នុងខេត្ត Khon Kaen ភាគឦសានប្រទេសនេះ។

ក្រោយការឧទ្ទេសនាមរបស់ Sompong Amornwiwat ជាមេដឹកនាំបក្សដែលជិតអស់អាណត្តិ Paetongtarn ក៏បានឡើងបញ្ចេញមតិ ហើយបានប្រកាសថា ខ្លួនត្រូវបានជ្រើសតាំងជាមេដឹកនាំរបស់គណៈកម្មការប្រឹក្សាយោបល់ផ្នែកនវានុវត្តន៍ និងសមាហរណកម្ម នៃបក្សភឿថៃ ដែលជាបក្សប្រឆាំងធំបំផុតនៅប្រទេសថៃ។

នេះគឺជាលើកដំបូងហើយដែល Paetongtarn បានប្រកាសជាសាធារណៈអំពីការចូលប្រលូកក្នុងវិស័យនយោបាយរបស់ខ្លួននៅប្រទេសថៃ។

លោក Thaksin ដែលជាស្ថាបនិកនៃបក្សភឿថៃ ត្រូវបានកាត់ទោសកំបាំងមុខក្រោមបទចោទទាក់ទិននឹងអំពើពុករលួយ និងត្រូវរស់នៅនិរទេសខ្លួនចាប់តាំងពីពេលត្រូវបានផ្ដួលរំលំដោយរដ្ឋប្រហារយោធាកាលពីឆ្នាំ 2006។ ប៉ុន្តែ ឥទ្ធិពលនយោបាយរបស់លោក បានជួយឱ្យសមាជិកត្រកូល Thaksin មួយចំនួនបានចូលកាន់កាប់មុខនាទីជាន់ខ្ពស់។ ប្អូនថ្លៃ Somchai Wongsawat និងប្អូនស្រីបង្កើត Yingluck Shinawatra របស់លោក Thaksin ធ្លាប់ជានាយករដ្ឋមន្ត្រី ប៉ុន្តែ ពួកគេត្រូវចាកចេញពីតំណែងមុនអាណត្តិ ហើយត្រូវជួបបញ្ហាផ្លូវច្បាប់មួយចំនួន។

November 6, 2021

ក្រុមតំណាងរាស្ត្រសហរដ្ឋអាម៉េរិក មានបំណងផ្ដល់ជំនួយយោធា 20 ពាន់លានដុល្លារ ដល់ កោះតៃវ៉ាន់

ក្រុមតំណាងរាស្ត្រមកពីបក្សសាធារណរដ្ឋ បានធ្វើសេចក្ដីព្រាងច្បាប់ថ្មីមួយ ដើម្បីអាចផ្ដល់ជំនួសយោធា ដែលមានតម្លៃ 2 ពាន់លានដុល្លារ/ឆ្នាំ ដល់ កោះតៃវ៉ាន់ ក្នុងរយៈពេល 10 ឆ្នាំបន្តបន្ទាប់ ដើម្បីជួយឱ្យកោះនេះមានសមត្ថភាពគ្រប់គ្រាន់ដើម្បីការពារខ្លួន។

សេចក្ដីព្រាងច្បាប់ដែលមានឈ្មោះថា «បង្កើនសមត្ថភាពកំញើញដល់តៃវ៉ាន់» ត្រូវបានស្នើឡើងកាលពីម្សិលមិញដោយតំណាងរាស្ត្រ Jim Risch នៃសភាជាន់ខ្ពស់ ដែលជាសមាជិកជាន់ខ្ពស់របស់បក្សសាធារណរដ្ឋ មកពីគណៈកម្មការកិច្ចការបរទេសរបស់ សហរដ្ឋអាម៉េរិក។ សេចក្ដីព្រាងច្បាប់នេះក៏ទទួលបានការគាំទ្រពីតំណាងរាស្ត្រដទៃទៀតរបស់បក្សសាធារណរដ្ឋផងដែរ មានដូចជា Mike Crapo, John Cornyn, Bill Hagerty, Mitt Romney និង Marco Rubio។

បច្ចុប្បន្ន មិនទាន់ដឹងអំពីការយល់ឃើញរបស់ក្រុមតំណាងរាស្ត្រនៃបក្សប្រជាធិបតេយ្យ នៅឡើយ ទាក់ទិននឹងសេចក្ដីព្រាងច្បាប់នេះ ប៉ុន្តែ វាប្រាកដជានឹងបន្ថែមសម្ពាធទៅលើលោក Joe Biden ស្របពេលដែលមានតំណាងរាស្ត្រជាច្រើន បានអំពាវនាវឱ្យបង្កើនទំនាក់ទំនងរវាងសហរដ្ឋអាម៉េរិក និង កោះតៃវ៉ាន់។

ប្រទេសចិន តែងតែចាត់ទុក កោះតៃវ៉ាន់ ជាខេត្តមួយរបស់ខ្លួន ដែលរង់ចាំតែការបង្រួបបង្រួមប៉ុណ្ណោះ ហើយថា នឹងប្រើកម្លាំងបាយដើម្បីយកកោះនេះមកវិញ បើសិនជាចាំបាច់។ ថ្មីៗនេះ កងទ័ពចិន បានបង្កើនវត្តមានរបស់ខ្លួននៅលើតំបន់កំណត់អត្តសញ្ញាណការពារដែនអាកាសរបស់ កោះតៃវ៉ាន់ និងធ្វើលំហាត់សមយុទ្ធទ្រង់ទ្រាយធំជាបន្តបន្ទាប់ ស្របពេលដែល តៃវ៉ាន់ ក៏កំពុងត្រៀមខ្លួនសម្រាប់សង្គ្រាមដែលអាចកើតឡើងគ្រប់ពេល ដោយសង្ឃឹមថា សហរដ្ឋអាម៉េរិក នឹងចូលមកជួយការពារកោះនេះ ពីការលុកលុយរបស់ ប្រទេសចិន៕

November 5, 2021

នូវែលសេឡង់ បន្ថែមឱសថមួយប្រភេទទៀត សម្រាប់ព្យាបាលអ្នកជំងឺ COVID-19

រដ្ឋមន្ត្រីក្រសួងសុខាភិបាលនៃ ប្រទេសនូវែលសេឡង់ នាថ្ងៃទី 5 វិច្ឆិកា បានឱ្យដឹងថា ឱសថមួយប្រភេទទៀតត្រូវបានដាក់ឱ្យប្រើប្រាស់សម្រាប់ការព្យាបាលអ្នកជំងឺ COVID-19 នៅប្រទេសនេះ ដែលនេះគឺជាដំណឹងល្អចំពោះអ្នកជំងឺ ក៏ដូចជាប្រព័ន្ធសុខាភិបាល។

លោក Andrew Little រដ្ឋមន្ត្រីក្រសួងសុខាភិបាលនៃ ប្រទេសនូវែលសេឡង់ បញ្ជាក់ថា ការិយាល័យជាតិបញ្ជាទិញឱសថ (Pharmac) ទទួលបានប្រភពផ្គត់ផ្គង់ថ្នាំ Baricitinib ដែលជាថ្នាំមានប្រសិទ្ធភាពក្នុងការប្រឆាំងវីរុស COVID-19។

Baricitinib គឺជាប្រភេទថ្នាំទី 5 ដែល Pharmac មាននៅក្នុងដៃ ខណៈដែលថ្នាំ 4 ប្រភេទផ្សេងទៀត រួមមាន remdesivir, tocilizumab, molnupiravir និង Ronapreve កំពុងត្រូវបានប្រើប្រាស់រាល់ថ្ងៃ។

ឱសថប្រភេទថ្មីដែលត្រូវបានណែនាំឱ្យប្រើសម្រាប់ព្យាបាលអ្នកជំងឺ COVID-19 ដែលមានអាការធ្ងន់ធ្ងរនេះ តាមគម្រោងនឹងត្រូវបានផ្គត់ផ្គង់ដល់ Pharmac ចំនួន 500 ឈុត (មួយឈុត ព្យាបាលមួយជា) នៅក្នុងខែវិច្ឆិកានេះ។ ប្រការនេះគឺជារឿងសំខាន់ ព្រោះថា ពិភពលោកកំពុងតែខ្វះថ្នាំ tocilizumab ហើយការដែលមានថ្នាំថ្មីនឹងជួយឱ្យក្រុមវេជ្ជបណ្ឌិតមានជម្រើសបន្ថែមសម្រាប់ព្យាបាលអ្នកជំងឺ។ នេះបើតាមលោករដ្ឋមន្ត្រី។

លោក Little សង្កត់ធ្ងន់ថា ឱសថទាំង 5 ខាងលើ សុទ្ធតែមិនទាន់ត្រូវបានអាជ្ញាធរសុវត្ថិភាពវេជ្ជសាស្ត្ររបស់ នូវែលសេឡង់ (Medsafe) អនុម័តឱ្យប្រើប្រាស់សម្រាប់ព្យាបាលអ្នកជំងឺ COVID-19 នៅឡើយ ប៉ុន្តែ ក្រុមវេជ្ជបណ្ឌិតអាចប្រើបានដោយយោងទៅតាមច្បាប់វេជ្ជសាស្ត្ររបស់ប្រទេសនេះ៕

November 5, 2021

អង់គ្លេស ក្លាយជាប្រទេសដំបូងដែលបានអនុម័តឱ្យប្រើប្រាស់ថ្នាំគ្រាប់ព្យាបាលជំងឺ COVID-19 នៅផ្ទះ

អង់គ្លេស បានក្លាយជាប្រទេសដំបូងគេបង្អស់ក្នុងពិភពលោកដែលបានអនុម័តឱ្យប្រើប្រាស់ថ្នាំ Molnupiravir របស់ក្រុមហ៊ុនផលិតឱសថអាម៉េរិក Merck ដែលថ្នាំនេះត្រូវបានវាយតម្លៃថា មានប្រសិទ្ធភាពខ្ពស់ក្នុងការព្យាបាលជំងឺ COVID-19។

«ថ្ងៃនេះគឺជាថ្ងៃប្រវត្តិសាស្ត្ររបស់ប្រទេសជាតិយើង នៅពេល អង់គ្លេស ក្លាយជាប្រទេសដំបូងគេក្នុងពិភពលោក អនុម័តថ្នាំប្រឆាំងវីរុសដែលអាចលេបនៅផ្ទះដើម្បីព្យាបាលជំងឺ COVID-19» រដ្ឋលេខាធិការក្រសួងសុខាភិបាលអង់គ្លេស លោក Sajid Javid ថ្លែងដូច្នេះ។

ប្រកាសខាងលើត្រូវបានធ្វើឡើងនៅពេលការិយាល័យគ្រប់គ្រងឱសថ និងផលិតផលថែទាំសុខភាព (MHRA) របស់ អង់គ្លេស អនុម័តឱ្យប្រើថ្នាំគ្រាប់ប្រឆាំងវីរុស molnupiravir របស់ក្រុមហ៊ុន សហរដ្ឋអាម៉េរិក Merck ដើម្បីព្យាបាលជំងឺ COVID-19 កម្រិតមធ្យម និងស្រាល។

លោក Javid បន្ថែមថា៖ «នេះនឹងជាកត្តាដែលអាចប្ដូរផ្លាស់ស្ថានភាពចំពោះក្រុមពលរដ្ឋដែលងាយរងគ្រោះបំផុត និងប្រព័ន្ធភាពស៊ាំមានកម្រិត។ ពួកគេនឹងទទួលបានវិធីសាស្ត្រព្យាបាលដែលមានលក្ខណៈលោតផ្លោះ»។

អង់គ្លេស កាលពីខែមុនបានប្រកាសថា បានបញ្ជាទិញឱសថ molnupiravir នេះ ចំនួន 480,000 ឈុត (មួយឈុត ព្យាបាលមួយជា)។

ថ្នាំនេះមានប្រសិទ្ធភាពក្នុងការព្យាបាលជំងឺ COVID-19 ដោយការកាត់បន្ថយសមត្ថភាពកើតកូនចៅរបស់វីរុស។ MHRA ឱ្យដឹងថា ការពិសោធរបស់ពួកគេបង្ហាញថា ថ្នាំនេះមានសុវត្ថិភាព និងប្រសិទ្ធភាពក្នុងការកាត់បន្ថយហានិភ័យនៃការចូលពេទ្យ និងការស្លាប់ ចំពោះអ្នកជំងឺកម្រិតស្រាល និងមធ្យម ជាក្រុមអ្នកជំងឺដែលអាចប្រឈមនឹងអាការធ្ងន់ធ្ងរ។

MHRA បានណែនាំឱ្យប្រើប្រាស់ថ្នាំនេះក្នុងរង្វង់ 5 ថ្ងៃ រាប់ចាប់ពីថ្ងៃដែលមានរោគសញ្ញា។ ឱសថ molnupiravir ក៏ត្រូវបានអនុញ្ញាតឱ្យប្រើសម្រាប់អ្នកជំងឺដែលមានយ៉ាងតិចមួយកត្តាដែលអាចនាំទៅរកសភាពធ្ងន់ធ្ងរ រួមមាន ធាត់ខ្លាំង វ័យចំណាស់ ជំងឺទឹកនោមផ្អែម និងជំងឺបេះដូង។

ក្រុមហ៊ុន Merck ឱ្យដឹងថា តាមគម្រោង ខ្លួននឹងផលិតឱសថនេះគ្រប់ 10 ឈុតនៅចុងឆ្នាំនេះ ហើយបរិមាណនឹងត្រូវបានបង្កើននៅឆ្នាំ 2022។

បច្ចុប្បន្ន ប្រទេសជាច្រើនបានបញ្ជាទិញឱសថ molnupiravir នេះ ក្នុងនោះ សហរដ្ឋអាម៉េរិក បានបញ្ជាទិញចំនួន 1.7 លានឈុត ក្នុងតម្លៃ 1.2 ពាន់លានដុល្លារអាម៉េរិក។

នៅ កម្ពុជា កាលពីពេលថ្មីៗនេះ ក្រសួងសុខាភិបាល ក៏បានអនុញ្ញាតឱ្យប្រើប្រាស់ឱសថ molnupiravir នេះ ដើម្បីព្យាបាលជំងឺ COVID-19 ផងដែរ ប៉ុន្តែ ក្នុងលក្ខខណ្ឌបន្ទាន់៕

November 5, 2021

ស្ត្រីដើមកំណើតអាស៊ី វ័យ 35 ឆ្នាំ ក្លាយជាអភិបាលក្រុង នៅ សហរដ្ឋអាម៉េរិក

លោកស្រី Michelle Wu អាយុ 35 ឆ្នាំ ដែលជាពលរដ្ឋអាម៉េរិក ដើមកំណើតអាស៊ី ត្រូវបានបោះឆ្នោតជ្រើសរើសជាអភិបាលក្រុងភេទស្រីដំបូងបង្អស់របស់ Boston ក្រោយពីជិត 200 ឆ្នាំ ដែលទីក្រុងនេះជ្រើសរើសមេដឹកនាំជាបុរសស្បែកស។

លោកស្រី Michelle Wu សមាជិកបក្សប្រជាធិបតេយ្យ ដែលបានយកឈ្នះលើគូប្រជែង Annissa Essaibi George មកពីបក្សជាមួយគ្នា កាលពីថ្ងៃទី 2 វិច្ឆិកា ក្លាយជាអភិបាលក្រុងភេទស្រីដំបូងបង្អស់របស់ Boston ដែលជាក្រុងរដ្ឋបាលរបស់រដ្ឋ Massachusetts។ លោកស្រី Wu នឹងស្បថចូលកាន់តំណែងនៅថ្ងៃទី 16 វិច្ឆិកាខាងមុខ។

Essaibi George ក៏បានទទួលស្គាល់បរាជ័យរបស់ខ្លួន និងបានអបអរលោកស្រី Wu ដែលក្លាយជាស្ត្រី ក៏ដូចជាជនជាតិអាម៉េរិក ដើមកំណើតអាស៊ី ដំបូងគេ ដែលបានជាប់ឆ្នោតជាអភិបាលក្រុង Boston។

ការសន្យាពីរចំនុចដែលប្រកបដោយមហិច្ឆតាជាងគេរបស់លោកស្រី Wu គឺការផ្ដោតទៅលើផ្ទះសម្បែង និងចរាចរណ៍សាធារណៈ ដែលជាបញ្ហាប្រចាំថ្ងៃរបស់ប្រជាជនជាង 675,000 នាក់នៅក្នុងទីក្រុងនេះ។ ឧបសគ្គផ្សេងទៀតដែលលោកស្រីត្រូវប្រឈម រួមមាន បញ្ហាអប់រំ សង្គ្រាមប្រឆាំង COVID-19 និងបញ្ហាប្រែប្រួលអាកាសធាតុ។

លោកស្រី Wu មានឱពុក ម្ដាយជាជនអន្តោប្រវេសន៍មកពី កោះតៃវ៉ាន់។ លោកស្រីធំឡើងនៅ Chicago និងបានទៅរស់នៅក្នុងទីក្រុង Boston ដើម្បីសិក្សានៅសាកលវិទ្យាល័យ Harvard។ លោកស្រីធ្លាប់ជាស្ត្រីដើមកំណើតអាស៊ីដំបូងគេដែលបានជាប់ឆ្នោតជាសមាជិកក្រុមប្រឹក្សាក្រុង Boston កាលពីឆ្នាំ 2013 នៅក្នុងវ័យ 28 ឆ្នាំ ហើយ 3 ឆ្នាំបន្ទាប់ លោកស្រីក៏បានក្លាយជាប្រធានក្រុមប្រឹក្សាក្រុង៕

November 4, 2021

3 ជំហានត្រូវអនុវត្ត ដើម្បីអាចធ្វើអាណានិគមលើពិភពព្រះអង្គារបាន នៅឆ្នាំ 2040 (វីដេអូ)

ដើម្បីអាចរស់នៅលើភពព្រះអង្គារបាន មនុស្សលោកត្រូវរកវិធីសុវត្ថិភាពដើម្បីហោះឡើងទៅកាន់ឋានមួយនេះ រួចបង្កើតខ្យល់អុកស៊ីសែន និងទឹក ដាំដំណាំ និងសាងសង់ទីជម្រក។

បច្ចុប្បន្ន មានតែភពមួយគត់ដែលមានសក្ដានុពល អាចនាំឱ្យមនុស្សឈានដល់ការពង្រីកដែនដីអាណានិគមនៅខាងក្រៅផែនដី នោះគឺពិភពព្រះអង្គារ។ ភពក្រហមនេះ បានក្លាយជាគោលដៅសម្រាប់ដាក់អាណានិគមនៅខាងក្រៅពិភពផែនដី ដោយសារតែអំណោយផលពីទំហំ និងរយៈចម្ងាយរបស់វា។

មាន 3 ជំហានដែលជួយឱ្យមនុស្សអាចដាក់អាណានិគមលើពិភពព្រះអង្គារនៅឆ្នាំ 2040 ៖

ទីមួយ៖ ការធ្វើដំណើរ

ឧបសគ្គដំបូងដែលធំបំផុតសម្រាប់ការធ្វើអាណានិគម នោះគឺហោះទៅកាន់ពិភពនោះដោយសុវត្ថិភាព។ NASA នឹងបញ្ជូនយានអវកាសដឹកមនុស្សដំបូងហោះទៅកាន់ភពអង្គារនៅក្នុងទសវត្សរ៍ក្រោយ ដោយប្រើប្រាស់ប្រព័ន្ធបាញ់បង្ហោះយានអវកាស (SLS)។

ប៉ុន្តែ ប្រការនោះទំនងជាមិនទាន់គ្រប់គ្រាន់សម្រាប់ការធ្វើអាណានិគមលើភពក្រហមនេះនៅឡើយ។ យានអវកាសនឹងត្រូវការផ្ទាំងការពារវិទ្យុសកម្មពិសេសដើម្បីរារាំងកាំរស្មីដ៏គ្រោះថ្នាក់ដែលបាញ់ពីទីអវកាសសំដៅមកកាន់យាន នៅក្នុងដំណើរហោះហើរដែលមានរយៈពេល 9 ខែ។

ក្រុមអ្នកវិទ្យាសាស្ត្រយល់ថា ការហោះហើរទៅកាន់ភពព្រះអង្គារ នឹងបណ្ដាលឱ្យក្រុមអ្នកអវកាសត្រូវប្រឈមនឹងបរិមាណវិទ្យុសកម្មគ្រោះថ្នាក់ដ៏ច្រើន។ បរិមាណវិទ្យុសកម្មនេះមិនត្រឹមតែធ្វើឱ្យហានិភ័យកើតជំងឺមហារីកកើនឡើងនោះទេ ប៉ុន្តែ វាក៏ប៉ះពាល់ដល់អវយវៈបន្តពូជផងដែរ។ និយាយរួម ការហោះហើរឆ្លងកាត់ទីអវកាស នឹងធ្វើឱ្យមានប្រតិកម្មតានតឹងជាច្រើន ដែលបង្កផលអាក្រក់ដល់ប្រព័ន្ធហ្សែន និងប្រព័ន្ធការពាររាងកាយ។

ផលប៉ះពាល់ខាងលើអាចបញ្ចប់រាល់គម្រោងធ្វើអាណានិគមលើផ្កាយព្រះអង្គារ នៅមុនពេលមនុស្សទៅដល់ភពក្រហមនេះ។ ប៉ុន្តែ មានគំនិតពីរដែលអាចការពារក្រុមអវកាសចរពីវិទ្យុសកម្មអវកាស។ ឧទាហរណ៍៖ សមាសធាតុមួយចំនួនត្រូវបានគេជឿថា អាចទប់ទល់ ឬបន្សាបធាតុវិទ្យុសកម្មបាន ដូចជា lithium hydride។ ប៉ុន្តែ វាមិនទាន់ត្រូវបានពិសោធពេញលេញនៅលើយានអវកាសនៅឡើយ។ ពេលវេលាសម្រាប់ការអភិវឌ្ឍ សាកល្បង និងដាក់ឱ្យប្រើប្រាស់ អាចស៊ីពេលអស់ប្រហែល 20 ឆ្នាំ។

ទីពីរ៖ បង្កើតបរិស្ថានដែលអាចទ្រទ្រង់ជីវិត

ប្រការដំបូងដែលក្រុមអវកាសចរត្រូវសម្រេចបានដើម្បីចាប់ផ្ដើមធ្វើអាណានិគមគឺការកសាងប្រភពបង្កើតខ្យល់បរិយាកាស ទឹក អាហារ និងថាមពលនៅលើដីមហាឆ្ងាយនេះ។ នេះគឺជាក្ដីសង្ឃឹមតែមួយគត់សម្រាប់ជីវិតរបស់ពួកគេ ដោយសារតែប្រភពផ្គត់ផ្គង់ពីយានអវកាស មានកំណត់។

ដូច្នេះ តើយើងត្រូវធ្វើយ៉ាងណាដើម្បីបំប្លែងខ្យល់អាកាសនៅលើភពអង្គារទៅជាអុកស៊ីសែនដែលអាចដកដង្ហើមបាន?

ចម្លើយសម្រាប់សំនួរនេះអាចជាមនុស្សយន្ត ឬរ៉ូបូត។ កាលពីខែមេសា ឆ្នាំ 2021 រ៉ូបូត Perseverance បានបង្កើតអុកស៊ីសែននៅលើផ្ទៃរបស់ភពអង្គារដោយជោគជ័យ ដោយប្រើប្រាស់ឧបករណ៍ MOXIE។ នេះគឺជាឧបករណ៍តូចមួយដែលអាចបំប្លែងឧស្ម័ន Carbon Dioxide ក្នុងបរិយាកាស ទៅជាអុកស៊ីសែន តាមរយៈយន្តការមួយដែលមានឈ្មោះថា Solid Oxide Electrosis។

ឧបករណ៍ខាងលើនេះ អាចផលិតអុកស៊ីសែនគ្រប់គ្រាន់សម្រាប់មនុស្សម្នាក់ដកដង្ហើមក្នុងរយៈពេល 10 នាទី ជិតស្មើនឹងបរិមាណអុកស៊ីសែនដែលបញ្ចេញដោយដើមឈើមួយដើមនៅលើផែនដី។ ជាមួយនឹងបច្ចេកវិទ្យាដែលមានស្រាប់ អ្នកវិទ្យាសាស្ត្រគ្រាន់តែបង្កើនទំហំដើម្បីឆ្លើយតបនឹងតម្រូវការក្នុងការធ្វើអាណានិគមប៉ុណ្ណោះ។ ជាទ្រឹស្ដី មនុស្សអាចប្រើប្រាស់ MOXIE ដើម្បីជំនួសឱ្យរុក្ខជាតិនាពេលអនាគតដ៏ខ្លីខាងមុខ។

ដូចទៅនឹងស្ថានីយអវកាសអន្តរជាតិ (ISS) យានទៅកាន់ភពអង្គារនឹងត្រូវបានបំពាក់ប្រព័ន្ធកែច្នៃទឹកដ៏មានប្រសិទ្ធភាព។ ប្រព័ន្ធនេះនឹងជួយឱ្យអវកាសចរ មានសេរីភាពក្នុងការរុករកប្រភពធនធានធម្មជាតិដែលមានសក្ដានុពលនៅលើភាពក្រហម។

ភ័ស្ដុតាងបានបង្ហាញថា ផ្ទៃរបស់ភពព្រះអង្គារ ធ្លាប់ត្រូវបានគ្របដណ្ដប់ដោយមហាសមុទ្រ ទន្លេ និងបឹង ដូចទៅនឹងផែនដី។ ក្រុមអ្នកវិទ្យាសាស្ត្រធ្លាប់បានរកឃើញបឹងទឹកមួយដែលស្ថិតក្រោមផ្ទៃទឹកកក ក្នុងជម្រៅ 1.5 ម៉ែត្រ ខាងក្រោមដុំទឹកកកនៅប៉ូលខាងត្បូង។ ប៉ុន្តែ យើងនឹងត្រូវការគម្រោងអភិវឌ្ឍដ៏ធំមួយដើម្បីអាចចូលទៅគ្រប់គ្រងបឹងទឹកនោះ។ មនុស្សត្រូវការពេល 20 ឆ្នាំ ដើម្បីអភិវឌ្ឍឱ្យមានប្រសិទ្ធភាព។

ទីបី៖ តាំងទីលំនៅ

Matt Damon បានដាំដើមឈើ នៅក្នុងខ្សែភាពយន្តរឿង «The Martian»។ ក៏ប៉ុន្តែ ជាក់ស្ដែង យើងមិនទាន់ដឹងច្បាស់ថា អាចដាំដើមឈើនៅលើដីរបស់ភពព្រះអង្គារ ឬយ៉ាងណានៅឡើយ។ យ៉ាងនេះក្ដី ក្រុមអ្នកវិទ្យាសាស្ត្រនៅតែបង្ហាញអំពីក្ដីសង្ឃឹម ព្រោះតែសមាសធាតុនៃសម្បកខាងក្រៅរបស់ពិភពមួយនេះ។ ស្រទាប់ដីនេះអាចផ្ទុកសារធាតុចិញ្ចឹមច្រើនដែលរុក្ខជាតិត្រូវការដើម្បីលូតលាស់ និងរស់ មានដូចជា nitrogen, potassium និង phosphor ជាដើម។

ក៏ប៉ុន្តែ បើទោះជាមានការជឿជាក់ យើងក៏មិនទាន់ប្រាកដ 100% នោះដែរ រហូតដល់ពេលបានដាំសាកល្បង។ ស្រទាប់ដីពណ៌ក្រហមអាចផ្ទុកសារធាតុពុល ធ្វើឱ្យរុក្ខជាតិនៅទីនោះត្រូវស្រូបយកជាតិពុលនេះ។

ក្រៅពីបញ្ហាខាងលើ សូម្បីតែនៅពេលកំពុងដោះស្រាយបញ្ហាប្រភពអុកស៊ីសែន យើងនៅតែអាចដាំដុះនៅលើភពព្រះអង្គារបាន។ យ៉ាងហោចក៏យើងអាចប្រមូលវត្ថុធាតុដើម្បីសាងសង់ហេដ្ឋារចនាសម្ព័ន្ធភ្លាម។ ដោយប្រើប្រាស់ឧបករណ៍សមស្រប ថ្មនៅលើភពក្រហមនេះក៏អាចយកមកធ្វើជារបស់សម្រាប់ការពារអ្នកអវកាសនៅចំពោះមុខវិទ្យុសកម្ម នៅពេលពួកគេស្វែងរកប្រភពធនធាន ដូចជា ទឹក លោហធាតុ ឬរ៉ែដទៃទៀត។

គ្រប់ជំហានដើម្បីបង្កើតអាណានិគមលើភពអង្គារ ដូចបានរៀបរាប់ខាងលើ សុទ្ធសឹងតែមានសក្កានុពល ទោះបីជាបច្ចុប្បន្ន វាគ្រាន់តែជាការព្យាករក៏ដោយ៕

November 4, 2021

រដ្ឋាភិបាលចិន ណែនាំឱ្យពលរដ្ឋទិញទំនិញចាំបាច់ទុកប្រើប្រាស់ បំណងបង្ការការផ្ទុះឆ្លងរាលដាលថ្មីនៃវីរុស COVID-19

រដ្ឋាភិបាលចិន បានលើកទឹកចិត្តឱ្យប្រជាជនរបស់ខ្លួន ទិញ និងរក្សាទុករបស់របរប្រើប្រាស់ចាំបាច់ នៅក្នុងគ្រាដែលប្រទេសនេះបង្កើនវិធានការទប់ស្កាត់រលកនៃការផ្ទុះឆ្លងវីរុស COVID-19 ជាថ្មី។

សារព័ត៌មាន AFP កាលពីយប់ថ្ងៃទី 1 វិច្ឆិកា បានចេញផ្សាយថា ក្រសួងពាណិជ្ជកម្មរបស់ប្រទេសចិន បង្ហោះសេចក្ដីប្រកាសនៅលើគេហទំព័រផ្លូវការ ស្នើឱ្យ «គ្រួសារទាំងឡាយ រក្សាទុកទំនិញចាំបាច់មួយចំនួនដើម្បីឆ្លើយតបនឹងតម្រូវការប្រចាំថ្ងៃ និងបន្ទាន់»។ ការណែនាំនេះ មិនបាននិយាយអំពីមុខទំនិញណាមួយជាក់លាក់នោះទេ។

ប្រកាសខាងលើក៏បានស្នើឱ្យស្ថាប័នមានសមត្ថកិច្ច បង្កលក្ខណៈងាយស្រួលដល់ការផលិតកសិកផល ការរក្សាប្រភពផ្គត់ផ្គង់ឱ្យបានល្អ ការធានាលើការរក្សាទុកស្បៀងក្នុងតំបន់ និងរក្សាតម្លៃឱ្យមានលំនឹង។ សារព័ត៌មានរដ្ឋចិន កាលពីថ្ងៃទី 1 វិច្ឆិកា បានផ្សាយថា បន្លែចំនួន 28 ប្រភេទ បានឡើងថ្លៃ 16% ធៀបនឹងខែមុន។

ប្រទេសចិន គ្រប់គ្រងវិបត្តិ COVID-19 ក្នុងស្រុកបានល្អ ដោយប្រើយុទ្ធសាស្ត្រជាច្រើន ដូចជា ការបិទទ្វារព្រំដែន ការបិទខ្ទប់គោលដៅ និងការធ្វើចត្តាឡីស័ករយៈពេលយូរ។ ប្រទេសនេះកំពុងបង្កើនការអនុវត្តវិធានការតឹងរ៉ឹង ដើម្បីទប់ស្កាត់ការឆ្លងរាលដាលថ្មី ពិសេស នៅមុនព្រឹត្តិការណ៍កីឡាអូឡាំពិករដូវរងា 2022 (2022 Winter Olympics) ដែលគ្រោងនឹងបើកការប្រកួតនៅថ្ងៃទី 4 ខែកុម្ភៈ ឆ្នាំ 2022។

វិធានការតឹងរ៉ឹង បានជួយឱ្យតួលេខនៃករណីឆ្លងថ្មីនៅប្រទេសនេះ មានត្រឹមតែខ្ទង់រាប់សិបប៉ុណ្ណោះក្នុងមួយថ្ងៃ។ គិតមកដល់បច្ចុប្បន្ន ប្រទេសចិន មានអ្នកឆ្លង COVID-19 សរុបចំនួន 97,314 នាក់ ក្នុងនោះមានអ្នកស្លាប់សរុប 4,636 នាក់ និងកំពុងព្យាបាលចំនួន 912៕

November 3, 2021

CDC របស់ អាម៉េរិក យល់ព្រមឱ្យចាក់វ៉ាក់សាំង COVID-19 របស់ Pfizer ដល់កុមារអាយុពី 5-11 ឆ្នាំ

ក្រុមមន្ត្រីសុខាភិបាលរបស់ សហរដ្ឋអាម៉េរិក កាលពីថ្ងៃទី 2 វិច្ឆិកា បានឱ្យដឹងថា ប្រទេសនេះអាចចាប់ផ្ដើមយុទ្ធនាការចាក់វ៉ាក់សាំងបង្ការជំងឺ COVID-19 ដោយប្រើប្រាស់ផលិតផលរបស់ក្រុមហ៊ុន Pfizer/BioNTech សម្រាប់កុមារដែលមានអាយុចាប់ពី 5 ឆ្នាំ ដល់ 11 ឆ្នាំ ចាប់ពីថ្ងៃទី 8 វិច្ឆិកា បន្ទាប់ពីត្រូវបានអនុម័តជាចុងក្រោយរួចមក។

មជ្ឈមណ្ឌលគ្រប់គ្រង និងទប់ស្កាត់ជំងឺឆ្លង (CDC) របស់ សហរដ្ឋអាម៉េរិក បានយល់ព្រមតាមសំណើរបស់ក្រុមប្រឹក្សាវិទ្យាសាស្ត្រស្ដីពីការចាក់វ៉ាក់សាំង COVID-19 របស់ Pfizer សម្រាប់កុមារអាយុពី 5 ដល់ 11 ឆ្នាំ បន្ទាប់ពីបានរកឃើញថា ផលប្រយោជន៍មានច្រើនលើសលុបបើធៀបនឹងហានិភ័យ។

មុននោះ ស្ថាប័នគ្រប់គ្រងអាហារ និងឱសថ (FDA) របស់ អាម៉េរិក បានអនុម័តឱ្យចាក់វ៉ាក់សាំង COVID-19 របស់ Pfizer/BioNTech សម្រាប់កុមារអាយុពី 5 ដល់ 11 ឆ្នាំ។ ដូច្នេះ ពេលនេះ សហរដ្ឋអាម៉េរិក អាចបើកយុទ្ធនាការចាក់វ៉ាក់សាំងដល់កុមារចំនួន 28 លាននាក់នៅប្រទេសនេះ។ រដ្ឋាភិបាលអាម៉េរិក បានឱ្យដឹងថា បានទិញវ៉ាក់សាំងគ្រប់ចំនួនរួចហើយ និងកំពុងបែងចែកទៅតាមតំបន់នានានៅទូទាំងប្រទេស៕

November 3, 2021

មូលនិធិមហាសេដ្ឋី Jeff Bezos និង Rockefeller រួមនឹងក្រុមកំពូលអ្នកមាន ប្រកាសបរិច្ចាគរាប់សែនលានដុល្លារ ដើម្បី «សង្គ្រោះពិភពលោក»

មូលនិធិរបស់ត្រកូល Rockefeller, មហាសេដ្ឋី Jeff Bezos និង Ikea បានប្រកាសគម្រោងបង្កើតសម្ព័ន្ធថាមពលសកលសម្រាប់មនុស្សជាតិ និងពិភពផែនដី ក្នុងបំណងជួយដល់រដ្ឋាភិបាលនានា និងក្រុមអ្នកមាន អាចរួមចំណែក ជំរុញដំណើរការនៃការប្ដូរផ្លាស់ថាមពលនៅក្នុងបណ្ដាប្រទេសក្រីក្រ។

នៅក្នុងថ្ងៃដំបូងនៃសន្និសីទស្ដីពីអាកាសធាតុរបស់ អង្គការសហប្រជាជាតិ (COP26) ក្រុមសប្បុរសជន បានសន្យាថានឹងបរិច្ចាគថវិកា ដើម្បីគោលដៅទប់ទល់នឹងការប្រែប្រួលអាកាសធាតុ ក្នុងនោះ មូលនិធិរបស់ត្រកូល Rockefeller និង Ikea បានប្រកាសគម្រោងបង្កើតសម្ព័ន្ធភាពថាមពលសកលសម្រាប់មនុស្សជាតិ និងផែនដី។

អង្គការខាងលើ រួមនឹងស្ថាប័នហិរញ្ញវត្ថុ ស្ថាប័នអភិវឌ្ឍពហុគោលដៅ ចំនួន 8 ផ្សេងទៀត នឹងចាប់ផ្ដើមប្រើប្រាស់ថវិកា 10 ពាន់លានដុល្លារដំបូង ដើម្បីធ្វើការសាកល្បងនូវយុទ្ធសាស្ត្រ និងបច្ចេកវិទ្យាថ្មី ក្នុងទិសដៅជួយដល់ការអភិវឌ្ឍថាមពលប្រើប្រាស់ឡើងវិញនៅលើពិភពលោក។ បណ្ដាតំបន់ដែលនៅមានការរារែកក្នុងការប្ដូរផ្លាស់មកប្រើប្រាស់ថាមពលស្អាត នឹងទទួលបានការជំរុញខ្លាំងក្លា។ នៅពេលដំណាក់កាលដំបូងមានប្រសិទ្ធភាព ពួកគេគ្រោងនឹងទូទាត់ខ្ទង់វិនិយោគ មួយសែនលានដុល្លារបន្ថែមទៀតដើម្បីពង្រីកផែនការ។

ក្នុងគ្រានោះដែរ មូលនិធិ Bezos Earth Fund បានឱ្យដឹងថា នឹងផ្ដល់ជំនួយ 500 លានដុល្លារសម្រាប់គំនិតផ្ដួចផ្ដើមខាងលើ។ ក្រៅពីនេះ មូលនិធិនេះក៏សន្យាបរិច្ចាគបន្ថែម 1 ពាន់លានដុល្លារទៀត ដើម្បីជួយឱ្យធម្មជាតិរស់ឡើងវិញ មានដូចជាការដាំដើមឈើ និងការពង្រស់ស្មៅនៅតាមទីវាល។ល។ រួមនឹងខ្ទង់ថវិកាប្រហាក់ប្រហែលដើម្បីផ្លាស់ប្ដូរប្រព័ន្ធស្បៀងអាហារ ដោយការបង្កើនផលិតភាពកសិផល ប៉ុន្តែនៅតែធានាឱ្យបានថា ការបំភាយឧស្ម័នផ្ទះកញ្ចក់ត្រូវបានកាត់បន្ថយ។

កម្មវិធីខាងលើត្រូវប្រកាសនៅក្នុងថ្ងៃដំបូងនៃព្រឹត្តិការណ៍ COP26 ដែលត្រូវបានធ្វើឡើងនៅ Glasgow ប្រទេសស្កុតឡេន។ គោលដៅរបស់ COP26 គឺបង្កើនការសន្យាកាលពីឆ្នាំ 2009 របស់បណ្ដាប្រទេសអ្នកមាន ក្នុងការផ្ដល់ជំនួយសម្រាប់ដំណើរការនៃការប្ដូរផ្លាស់ថាមពលនៅក្នុងបណ្ដាប្រទេសក្រីក្រ ជាមួយនឹងខ្ទង់ចំណាយ មួយសែនលានដុល្លារ/ឆ្នាំ៕

November 2, 2021

ប្រធានម្នាក់របស់អង្គការសហប្រជាជាតិ សុំជួប Elon Musk ដោយផ្ទាល់ សម្បីតែនៅទីអវកាស ដើម្បីរៀបរាប់អំពី ប្រាក់ 6 ពាន់លានដុល្លារនឹងដោះស្រាយគ្រោះទុរភិក្សដោយវិធីណា

ក្រោយការឆ្លើយឆ្លងគ្នានៅលើបណ្ដាញសង្គមនាពេលកន្លង ថ្មីៗនេះ ប្រធានមួយរូបរបស់អង្គការសហប្រជាជាតិ បានស្នើសុំជួបមុខមហាសេដ្ឋី Elon Musk ដោយផ្ទាល់ ដើម្បីអធិប្បាយអំពីរបៀបនៃការប្រើប្រាស់ថវិកា 6 ពាន់លានដុល្លារ ក្នុងការសង្គ្រោះប្រជាជនរាប់លាននាក់ដែលកំពុងរងគ្រោះទុរភិក្ស។

ការឆ្លងឆ្លើយគ្នារវាងលោក David Beasley ប្រធានកម្មវិធីស្បៀងអាហារពិភពលោក របស់ អង្គការសហប្រជាជាតិ ជាមួយនឹងមហាសេដ្ឋី Elon Musk បានចាប់ផ្ដើមដោយកិច្ចសម្ភាសរបស់លោក Beasley ជាមួយនឹង CNN ដែលកាលណោះលោកបាននិយាយថា៖ ក្រុមមហាសេដ្ឋីគួរតែបរិច្ចាគនៅពេលនេះ និងតែម្ដងគត់។ 42 ពាន់លានដុល្លារ ដើម្បីជួយដល់ប្រជាជនចំនួន 42 លាននាក់ ដែលជាអ្នកនឹងត្រូវស្លាប់ បើសិនយើងមិនបានជួយពួកគេ។ រឿងនេះមិនស្មុគស្មាញឡើយ។

ក្រោយមក មហាសេដ្ឋី Elon Musk ដែលមានទ្រព្យប្រមាណជិត 289 ពាន់លានដុល្លារ បានបង្ហោះសារនៅលើ Twitter ថា៖ បើសិនជាកម្មវិធីស្បៀងអាហារពិភពលោក អាចបង្ហាញតម្លៃភាពថវិកា និងអនុញ្ញាតឱ្យគ្រប់គ្នាបានដឹងអំពីខ្ទង់ថវិកានោះត្រូវបានចំណាយដោយរបៀបណា ហើយ «អាចអធិប្បាយនៅខាងក្រោមសារ Twitter នេះ នូវវិធីជាក់លាក់ដែលថា 6 ពាន់លានដុល្លារ អាចដោះស្រាយគ្រោះទុរភិក្ស ខ្ញុំនឹងលក់ភាគហ៊ុននៅក្រុមហ៊ុន Tesla ភ្លាម ដើម្បីបរិច្ចាគ»។

ភ្លាមនោះ លោក David Beasley ក៏ចូលមកឆ្លើយឆ្លង ដោយអះអាងថា លោកអាចធានាបានថា ប្រព័ន្ធគណនីរបស់ស្ថាប័ននេះ មានតម្លាភាព ហើយថា ក្រុមរបស់លោក Musk អាចពិនិត្យ និងធ្វើការជាមួយក្រុមរបស់លោកបាន។

មកដល់ថ្ងៃនេះ លោក Beasley បន្តឆ្លើយឆ្លងជាមួយលោក Elon Musk។ លើកនេះ លោកបាន tag គណនី Twitter របស់លោក Elon Musk ចូលក្នុងសាររបស់លោក ហើយប្រាប់ថា៖ «ជំនួសឱ្យការបង្ហោះសារឆ្លើយឆ្លង សូមអនុញ្ញាតឱ្យខ្ញុំអធិប្បាយឱ្យលោកបានជ្រាប។ ខ្ញុំត្រៀមខ្លួនសម្រាប់ជួបលោកនៅគ្រប់កន្លែងក្នុងពិភពលោក សូម្បីតែនៅទីអវកាស។ ប៉ុន្តែ ខ្ញុំយល់ថា ល្អបំផុតគឺនៅកន្លែងដែលលោកអាចមើលឃើញបុគ្គលិក សកម្មភាព ដំណើរការ និងបច្ចេកវិទ្យារបស់ WFP ប្រព្រឹត្តទៅដោយរបៀបណា។ ខ្ញុំនឹងនាំយកគម្រោងនោះទៅជំរាបជូនលោក»។

នៅខាងក្រោមអត្ថបទរបស់លោក David Beasley ដែលបង្ហោះនៅលើបណ្ដាញសង្គម Twitter បច្ចុប្បន្ន មានមតិស្រប និងផ្ទុយជាច្រើន៕

November 2, 2021

Category: អន្តរជាតិ